ზურაბ გორგილაძის ქუჩაზე მოასფალტების სამუშაოები დაიწყო. ასფალტი დაიგება გრიბოედოვიდან ჯავახიშვილის ქუჩებს შორის არსებულ მონაკვეთზე. აღნიშნულ მონაკვეთზე უკვე გამოიცვალა საკანალიზაციო და სანიაღვრე სისტემები. სამუშაოები გორგილაძის ქუჩის გაგრძელების პროგრამის ფარგლებში მიმდინარეობს.
გორგილაძის ქუჩა
მერიის ვებგვერდზე გამოქვეყნებული ინფორმაციის თანახმად ხელშეკრულების ფარგლებში გათვალისწინებულია გორგილაძის ქუჩის გაგრძელება ჯავახიშვილიდან შარტავას ქუჩის მიმდებარე ტერიტორიამდე.
ღონისძიების ფარგლებში დაგეგმილია: 5754 კვ.მ მოცულობაზე ერთი ფენა 7სმ სისქის ასფალტბეტონის მსხვილმარცვლოვანი საფარისა და 12757 კვ.მ. მეორე ფენა 5 სმ სისქის მკვრივი წვრილმარცვლოვანი ასფალტბეტონის საფარის დაგება; მოეწყობა 885 გრძ.მ. ბაზალტის ბორდიური; 2687 კვ.მ მოცულობაზე 5 სმ სისქის ბეტონის დეკორატიული ფილების დაგება; სანიაღვრე სისტემების სამუშაოების განხორციელება; დამონტაჟდება მიწისქვეშა სანაგვე კონტეინერები და გარე განათება.
აღნიშნული სამუშაოებისთვის ქალაქის ბიუჯეტიდან 1 მილიონ 657 ათასამდე ლარია გამოყოფილი. სამუშაოებს ტენდერში გამარჯვებული შპს ,,გზა“ ასრულებს.
