Batumelebi

„ევრონიუსზე“ საიმიჯო რეკლამის განთავსებისათვის საქართველოს ტურიზმის ეროვნულმა ადმინისტრაციამ „ევრონიუსისგან“ ბონუსად სამი სიუჟეტი მიიღო – კახეთის, თბილისისა და აჭარის შესახებ.

აჭარის შესახებ „ევრონიუსის“ მიერ გადაღებულ სიუჟეტს საზოგადოების ზოგიერთი წარმომადგენლის მხრიდან უარყოფითი რეაქცია მოჰყვა. სოციალურ ქსელ „ფეისბუქში“ მომხმარებლები სიუჟეტს განიხილავდნენ და წერდნენ, რომ ეს აჭარის, როგორც ტურისტული რეგიონის ანტირეკლამა იყო.
„ევრონიუსზე“ გასულ სიუჟეტში ნაჩვენები იყო ბათუმის პლაჟი, ბულვარი, ერთ-ერთ კადრში კენჭებში ყელამდე ჩაფლული დამსვენებელი ყვებოდა, თუ როგორ ერთობოდა ბათუმში. ასევე ნაჩვენები იყო ბათუმის ბოტანიკური ბაღი, აჭარული ხაჭაპურის დამზადების პროცესი და „ქართული გართობა რესტორნებში“.

„ექვსკვირიანი ხელშეკრულება გვქონდა ევრონიუსთან. განვათავსეთ საიმიჯო რეკლამა. მათი მხრიდან ბონუსის სახით გამოხატეს კეთილი ნება, რომ რეკლამის გარდა ევრონიუსის ეთერში გასულიყო სამი სიუჟეტი საქართველოს შესახებ. გვითხრეს, რომ ამას გადაიღებდნენ თბილისში, კახეთსა და ბათუმში. კონკრეტული ადგილები, რას გადაიღებდნენ ან რა პერიოდში ჩამოვიდოდნენ, ჩვენთვის არ შეუთანხმებიათ. არც დახმარება უთხოვიათ, არც მათი ჩამოყვანა დაგვიფინანსებია, არც ტრანსპორტირება და განთავსება. არც ის ვიცით ზუსტად, როდის ჩამოვიდნენ.

ჩვენ მოვითხოვეთ, რომ შინაარსი ჩვენთვის შეეთანხმებინათ, მაგრამ ხელშეკრულებაში აქვთ პირდაპირ მითითებული, რომ კონტენტზე, რომელიც ევრონიუსის ეთერში გადის, პასუხისმგებელი არის მხოლოდ არხი და მას ჩვენთან არც ერთ შემთხვევაში არ შეათანხმებდნენ. შესაბამისად, არ გვქონდა ინფორმაცია რა სიუჟეტი გავიდოდა. უბრალოდ, ვიცოდით ის, რომ რეკლამის გარდა სამი სიუჟეტი მომზადდებოდა საქართველოს შესახებ,“ – განმარტეს საქართველოს ტურიზმის ეროვნულ ადმინისტრაციაში.

სარეკლამო სააგენტო „ McCANN თბილისის“ კრეატიული დირექტორი ირა ჭელიძე ამბობს, რომ მისი აზრით, „ევრონიუსის“ მიერ მომზადებული სიუჟეტები „ნორმალურია“, თუმცა უფრო „ვიწრო კუთხიდან არის დანახული.“

„ეს არის ევრონიუსის ხედვა. საერთო ხედვიდან ამოვარდნილი არ არის. ამიტომ უარყოფითი აზრი ამ სიუჟეტებზე არ მაქვს. ცოტა უფრო ვიწრო კუთხიდან არის დანახული, ვიდრე მე ვისურვებდი. მაგალითად, კახეთში მარტო ღვინო და მონასტერია, როდესაც კახეთი მარტო ღვინო და მონასტერი არ არის. თბილისში – მხოლოდ აბანოთუბანი. ეს სიუჟეტები არ არის სარეკლამო,“ – ამბობს ირა.

მისივე თქმით, როდესაც არხზე რეკლამას ათავსებ და სანაცვლოდ გთავაზობენ ბონუსს, ისეთი რამ უნდა აირჩიო, რის გაკონტროლებასაც შეძლებ.
„როცა სარეკლამო თემაზეა საუბარი, რასაც ვერ აკონტროლებ, ის არ უნდა გაუშვა. მოლაპარაკებების დროს ბონუსის სახით შეეძლოთ სხვა რამ მოეთხოვათ, რაც უკეთეს შედეგს გამოიღებდა. დამატებითი სარეკლამო დრო, მაგალითად. ბონუსები ისეთი თემაა, რომ შეიძლება ამაზე ვაჭრობა და ისეთი ბონუსის მოთხოვნა, რომელსაც მეტად გააკონტროლებ და რომელიც უფრო ეფექტური იქნება. ეს არ არის ბონუსი. ბონუსად ითვლება, მაგრამ სარეკლამო კამპანიის შემამაგრებელი ნამდვილად არ არის,“ – ამბობს ირა ჭელიძე.

ოქტომბრიდან „ევრონიუსზე“ ისევ დაიწყება საქართველოს პოპულარიზაცია და იტრიალებს ზამთრის ტურისტული პოტენციალის ამსახველი ვიდეო რგოლი. საერთო ჯამში აღნიშნული რგოლი 198-ჯერ გავა „ევრონიუსის“ ეთერში.

XVII საუკუნით დათარიღებული ზენდიდის ციხე ბათუმი-ახალციხის საავტომობილო გზიდან, ქედის მუნიციპალური ცენტრიდან ორ კილომეტრში, სოფელ ზენდიდში მდებარეობს. ციხესთან მისვლამდე ბანერი და მასზე ციხის შესახებ ინფორმაციაა განთავსებული, რაც იმაზე მიუთითებს, რომ ეს ადგილი ტურისტულ მარშრუტშია შეტანილი. 5 000 კვადრატულ მეტრზე გაშენებული ციხიდან დღეს მხოლოდ კედლების ნაწილია შემორჩენილი. ციხეს კულტურული მემკვიდრეობის ძეგლის სტატუსი აქვს.

კულტურული მემკვიდრეობის ძეგლის შიგა პერიმეტრზე სამი ოჯახი ცხოვრობს. ერთ-ერთი სახლი პირდაპირ ციხის კედლების ნაწილზეა მიშენებული, სახლის გვერდით საქათმეა. აქ მცხოვრები ილია ბეჟანიძე ამბობს, რომ ეს სახლები ორი საუკუნის წინ აშენდა და დასძენს, რომ ციხეს ხშირად უცხოელი ტურისტები სტუმრობენ.

ქედის ისტორიული მუზეუმის დირექტორი, პროფესიით ისტორიკოსი და მკვლევარი ვაჟა ფარტენაძე ამბობს, რომ თუ დროულად არ განხორციელდა ციხის კონსერვაცია, შეიძლება ციხე მალე ჩამოიშალოს.

„ნაგებობა XVII საუკუნეს მიეკუთვნება. ეს გონიოს ციხის შემდეგ ერთ-ერთი უდიდესია აჭარაში. 1998 წელს აქ არქეოლოგიური გათხრები ჩატარდა, კედლები გასუფთავდა მცენარეებისგან, რამაც დაშლის პროცესი დააჩქარა, თოვლი წვიმა თუ ქარი ციხეს ყოველდღიურად აზიანებს. შენობის შესანარჩუნებლად ციხის კონსერვაცია აუცილებელია, კონსერვაცია მხოლოდ ციხის დღემდე შემორჩენილ ნაწილს შეინახავს. აღდგენითი სამუშაოები გაცილებით დიდ ფინანსებთანაა დაკავშირებული“, – ამბობს ვაჟა ფარტენაძე.

მუზეუმის დირექტორის თქმით, ანალოგიურ მდგომარეობაშია ქედის ტერიტორიაზე არსებული სხვა ძეგლები – ციხეები და სათვალთვალო კოშკები.
ქედაში მდებარე სათვალთვალო კოშკები პირობითად XI-XIII საუკუნეებით არის დათარიღებული. ამ კოშკების დანიშნულება მტრის გაკონტროლება და ინფორმაციის გადაცემა იყო. ვაჟა ფარტენაძე ამბობს, რომ კოშკების ჯაჭვური ქსელი სოფელ სალიბაურიდან გოდერძის უღელტეხილამდე იყო, ქედის ტერიტორიაზე კი ასეთი ხუთი კოშკი არსებობს.

ვაჟა ფარტენაძე: „ქედის ტერიტორიაზე არსებული ყველა ისტორიული ძეგლი თუ ნაგებობა ცუდ მდგომარეობაშია. ამ ძეგლებმა საუკუნეებს გაუძლო და დღემდე მოაღწია. შესაძლებელია მათი იმ სახით შენახვა, რა სახითაც ჩვენამდეა მოღწეული. რაც მთავარია, ჩამონგრევის საშიშროება აღარ იქნება. ისტორიული ძეგლებიდან მხოლოდ თაღოვანი ხიდებია კარგ მდგომარეობაში. ოთხივე ხიდი რესტავრირებულია. სოფელ ზუნდაგაში არსებული საწნახელი უძველესია, მაგრამ შესაძლოა დაიშალოს, თუ არ გადაიხურა და მიწისგან არ გათავისუფლდა. ცუდ მდგომარეობაშია როგორც სოფელ საღორეთში არსებული სათვალთვალო კოშკი, რომელიც მთელ აჭარის ხეობას გადაჰყურებს, ასევე ძენწმანში, გულებსა და სოფელ დანდალოში არსებული კოშკებიც.“

ვაჟა ფარტენაძე ამბობს, რომ ისტორიული ძეგლებიდან არქეოლოგებს მხოლოდ ზენდიდის ციხე აქვთ შესწავლილი. მისივე თქმით, არქეოლოგებმა შეისწავლეს ჯვარიქედის გამოქვაბული და სოფელ კვაშტაში ნასახლარები, ჯვარიქედში 8 000 წლის წინანდელი ნივთები აღმოჩნდა, კვაშტაში ნაპოვნი ნივთები კი V საუკუნით დაათარიღეს.

ქედის მუნიციპალიტეტის გამგეობის განათლების, კულტურის, სპორტის, ტურიზმის, ახალგაზრდულ საკითხთა და ძეგლთა დაცვის სამსახურის უფროსი ეკატერინე ქაჯაია-კომახიძე ამბობს, რომ ამ დროისთვის ქედაში 37 ძეგლს აქვს კულტურული მემკვიდრეობის ძეგლის სტატუსი, 17 ძეგლი კი შესწავლის პროცესშია. იგი განმარტავს, რომ მუნიციპალიტეტის გამგეობაში არსებული სამსახური ისტორიულ მუზეუმთან ერთად სწავლობს ახალ ძეგლებს და ძეგლის ადგილმდებარეობის კოორდინატებს აზუსტებს:

„45 ძეგლია, აქედან 37 არის კულტურული მემკვიდრეობის. 17 ძეგლი შემთხვევით იქნა აღმოჩენილი დ შესასწავლია. რაც შეეხება ძეგლების მოვლა-პატრონობას, ჩვენ ძეგლებთან მისასვლელ გზებს ვაკეთებთ, ზუსტ კოორდინატებს ვადგენთ და მიმდებარე ტერიტორიებს ვასუფთავებთ.
შემთხვევით აღმოჩენილ ძეგლებს შორის ბევრია ნაეკლესიარი და ნამოსახლარი. რაც შეეხება სტატუსის მქონე 37 ძეგლს – ეს არის ჯამეები, სათვალთვალო კოშკები, ზენდიდის ეკლესია, შერვაშიძეების ნამოსახლარი, მედრესე, თაღოვანი ხიდები, გამოქვაბული და საწნახელები“.

აჭარის კულტურული მემკვიდრეობის დაცვის სააგენტოს ძეგლებზე ნებართვების გაცემისა და მონიტორინგის განყოფილების უფროსი ზაურ ახვლედიანი ამბობს, რომ მიმდინარე წლისთვის სააგენტოს ქედაში არსებულ ძეგლების რეაბილიტაცია – კონსერვაციისთვის თანხა არ აქვს გაწერილი და აღნიშნავს, რომ სააგენტო ძეგლების რეაბილიტაციას ქედაში მომავალი წლისთვის გეგმავს.

„ქედაში შარშან ჩვენ განვახორციელეთ ხიდების რეაბილიტაცია, წელს ხაბელაშვილების ხის ხიდს ჩაუტარდება რეკონსტრუქცია, რისთვისაც 60 000-ზე მეტი ლარია გათვალისწინებული. ტენდერი გამოცხადებულია და გამარჯვებული ფირმა გამოვლენილი. ხაბელაშვილების ხიდთან ერთად საკონსერვაციო სამუშაოები ჩაუტარდება პეტრასა და ხიხანის ციხეებს. ქედაში მომავალი წლისთვის ვფიქრობთ რომელიმე ძეგლის რეაბილიტაციას, მაგრამ ჯერ უნდა მოვიკვლიოთ რომელია უფრო სავალალო მდგომარეობაში, ამ საკითხებზე სააგენტო მუშაობს.

ჩვენ პერიოდულად ვაწარმოებთ მონიტორინგს ძეგლებზე. რაც შეეხება ზენდიდის ციხეს, მასზე სახლი მანამდე იყო მიშენებული, ვიდრე ძეგლის სტატუსი მიენიჭებოდა. თუ დაიგეგმება მისი კონსერვაცია, საპროექტო დოკუმენტაცია რესტავრატორებისა და არქიტექტორებთან ერთად შედგება და ეს საკითხიც გადაწყდება“ – აღნიშნა ზაურ ახვლედიანმა.

სამინისტროს ცნობით, პროგრამის მიზანია თხილის წარმოების, გადამუშავებისა და რეალიზაციის ერთიანი ციკლის შექმნა, თხილის თვითღირებულების შემცირება და ექსპორტის შესაძლებლობების გაზრდა.

პროექტის ფარგლებში, საქართველოს სოფლის მეურნეობის სამინისტრომ ზუგდიდის მუნიციპალიტეტში, კერძოდ კი სოფელ დარჩელში, უკვე დაიწყო ნაჭუჭიანი თხილის საშრობი მანქანა-დანადგარებისა და სასაწყობე ფართის მოწყობა. აღნიშნულ საწარმოს შესაძლებლობა ექნება ყოველდღიურად 24 ტონამდე ნაჭუჭიან თხილი გამოაშროს და 500 ტონამდე თხილი შეინახოს.
დარჩელის თხილის საშრობი და შესანახი საწარმო მოხმარებაში გადაეცემა კონკურსის წესით გამარჯვებულ თხილის კოოპერატივს, რომლის წევრთა რაოდენობა არ უნდა იყოს 500 მეპაიეზე ნაკლები.

  კოოპერატივს, რომელსაც დარჩელის საწარმო მოხმარებაში გადაეცემა, ვალდებულია 2018 წლის 1 სექტემბრამდე უზრუნველყოს გლობალური სოფლის მეურნეობის საუკეთესო პრაქტიკის   დანერგვა, ხოლო 2019 წლის 1 ივნისამდე უზრუნველყოს იჯარით აღებულ საწარმოში საფრთხის ანალიზისა და კრიტიკული საკონტროლო წერტილების სისტემის  დანერგვა.

სოფლის მეურნეობის სამინისტროს განცხადებით, თხილის საშრობის და სასაწყობე საწარმოს მშენებლობის დასრულება 2015 წლის აგვისტოს ბოლოსთვის არის დაგეგმილი. ამ ეტაპზე, პროგრამაში მონაწილეობის მსურველი კოოპერატივის მოძიებისა და რეგისტრაციის პროცედურები მიმდინარეობს.
 

სახანძრო სამსახურის თანამშრომლებმა ხანძარი უკვე ჩააქრეს. “ბათუმელების” ინფორმაციით, ხანძრის დროს არავინ დაშავებულა. 

ხანძრის გამომწვევ მიზეზს კი გამოძიება დაადგენს. 

გამოძიების ვერსიით, შ.ბ-მ და გ. ბ-მ კომპიუტერული მოწყობილობა ე.წ. სიმ ბოქსი შეიძინეს. აღნიშნულ კომპიუტერულ მოწყობილობაში, რომელშიც ინტერნეტტრაფიკის მეშვეობით საერთაშორისო ზარები შედიოდა, ბრალდებულები ათავსებდნენ   „ჯეოსელის“,  „მაგთიკომის“ და   „ბილაინის“ სიმ-ბარათებს.

შს სამინისტროს მიერ გავრცელებული ინფორმაციის თანახმად, სიმ-ბარათების მეშვეობით ინტერნეტტრაფიკით მიღებული ზარები გარდაიქმნებოდა და საბოლოო ობიექტთან ხორციელდებოდა, როგორც შიდა ანუ ლოკალური ზარი. ე.წ. სიმ ბოქსი ზარის მიმღებს აწვდიდა იმ ნომრის მონაცემებს, რომლებიც სიმ ბოქსში იყო მოთავსებული და არა რეალურად ზარის წამომწყების ნომერს. შეცვლილი კომპიუტერული მონაცემების შედეგად, ფიჭური კავშირგაბმულობის კომპანიები საერთაშორისო ზარების მომსახურების კანონით დადგენილი ქვედა ზღვრული ტარიფის ნაცვლად იღებდნენ გაცილებით ნაკლებს – ლოკალური ზარებისთვის განსაზღვრულ მინიმალურ თანხებს. ბრალდებულებმა ჩადენილი ქმედებით შპს „ჯეოსელს“, შპს „მაგთიკომს“ და შპს „ბილაინს“ ჯამში 95 ათასი ლარის ოდენობის ზარალი მიაყენეს.

სამართალდამცველებმა ბათუმში, შ. ბ-ს საცხოვრებელ ბინაში  ჩატარებული ჩხრეკის შედეგად, ნივთმტკიცების სახით ამოიღეს: ე.წ. სიმ ბოქსი,  „ჯეოსელის“,   „მობიტელისა“ და  „მაგთიკომის“ 5000 ცალი სიმ-ბარათი, თანხის დაუფლების ამსახველი დოკუმენტაცია და სხვა ჩანაწერები.

პოლიციამ თბილისში, გ. ბ-ს საცხოვრებელი ბინის ჩხრეკისას, ე.წ. სიმ ბოქსი და სიმ-ბარათები ნივთმტკიცებად ამოიღო.

გამოძიება მიმდინარეობს კომპიუტერული მონაცემის უნებართვო შეცვლისა და მოტყუებით ქონებრივი დაზიანების ფაქტზე, რამაც მნიშვნელოვანი ზიანი გამოიწვია (საქართველოს სსკ-ის 286-ე მუხლის 1-ლი ნაწილით და 185-ე მუხლის მე-2 ნაწილის „გ“ ქვეპუნქტით).

“ბათუმელების” ინფორმაციით, ბრალდებულებს აღკვეთი ღონისძიება თბილისის საქალაქო სასამართლომ დაახლოებით 2 კვირის წინ შეუფარდა. 

 საქმეს მოსამართლე თამარ ბეჟანიშვილი განიხილავდა, სასამართლო დარბაზი თითქმის სავსე იყო. ბრალდებული სასამართლო დარბაზში პოლიციის თანამშრომლებმა მიიყვანეს. სასამართლო პროცესზე გაირკვა, რომ ბრალდებული ზესტაფონის პოლიციაში საკუთარი ფეხით მივიდა, შესაბამისად, სიმართლეს არ შეესაბამება შინაგან საქმეთა სამინისტროს მიერ გავრცელებული ოფიციალური ინფორმაცია, თითქოსდა ბრალდებული – “შსს-ს აჭარის მთავარი სამმართველოს თანამშრომლებმა, ჩატარებული ოპერატიულ-სამძებრო და საგამოძიებო ღონისძიებების შედეგად, მომხდარიდან რამდენიმე საათში, ცხელ კვალზე დააკავეს”.

პროკურორმა რამაზ შავაძემ სასამართლოს განუმარტა, რომ 20 წლის მამაკაცი გოგონას განზრახ მკვლელობის მცდელობაშია ბრალდებული წინასწარი შეცნობით, შურისძიების მოტივით. სახელმწიფო ბრალმდებლის ინფორმაციით, საქმეში ასევე ინახება დაზარალებულის ტელეფონში აღმოჩენილი მოკლე ტექსტური შეტყობინებები. პროკურორმა თქვა, რომ ბრალდებული გოგონას სიცოცხლის მოსპობით ემუქრებოდა. საქმეში ასევე ინახება თვითმხილველების ჩვენებები, დაკავების ოქმი, შემთხვევის ადგილის დათვალიერების ოქმი და ბრალდებულის აღიარებითი ჩვენება.

მოსამართლის კითხვაზე, მხარეები ხომ არ საუბრობენ საპროცესო შეთანხმებაზე, პროკურორმა უპასუხა, რომ ასეთი რამ საერთოდ არ განიხილება.
გოგონას დანით გულმკერდის არეში ერთი შემავალი ჭრილობა აქვს მიყენებული, ასევე დაზიანებები აქვს სხეულის სხვადასხვა ნაწილში. 7 ივნისის მდგომარეობით, ის რეანიმაციულ განყოფილებაშია მოთავსებული.
იმ მოტივით, რომ ბრალდებულმა ზეგავლენა არ მოახდინოს მოწმეებზე, ხელი არ შეუშალოს მტკიცებულებების მოპოვებას ან არ ჩაიდინოს ახალი დანაშაული, პროკურორმა ბრალდებულის წინასწარი პატიმრობა მოითხოვა. ადვოკატებმა – დავით კეკელიძემ და მამუკა ჭუმბურიძემ სასამართლოში განაცხადეს, რომ მოწმეები ძირითადად პოლიციის თანამშრომლები არიან და ბრალდებული ამიტომაც მათზე ზეგავლენას ვერ მოახდენს.

ის, რომ ბრალდებული პოლიციაში საკუთარი ფეხით გამოცხადდა, ადრე ნასამართლევი არ არის – შემამსუბუქებელ გარემოებად შეაფასეს ადვოკატებმა და მისი წინასწარი პატიმრობიდან გირაოს საფუძველზე გათავისუფლება მოითხოვეს. მოსამართლის კითხვაზე, როგორ მოახერხებს ბრალდებულის ოჯახი გირაოს საფასურის გადახდას, ადვოკატმა თქვა, რომ ნათესავების იმედი აქვთ, “ფულს შეაგროვებენ”, ან მშობლები უძრავ ქონებას დააგირავებენ.

აღკვეთი ღონისძიების შეფარდებისას პროკურორმა ბრალდებულს ჰკითხა: “აპირებდით თუ არა მიმალვას? ემუქრებოდით თუ არა დაზარალებულს? ადვოკატმა პროკურორის კითხვები გააპროტესტა. “ჩემ დიდ პატივისცემას ვადასტურებ პროკურორის მიმართ, მაგრამ ეს დაკითხვის ფორმას ჰგავს. ჩვენ დღეს წინასწარი პატიმრობის საკითხს განვიხილავთ”, – თქვა მამუკა ჭუმბურიძემ, ადვოკატმა. ბრალდებულმა განაცხადა, რომ იყო შეშინებული და აპირებდა მიმალვას, თუმცა მოგვიანებით, როცა გაიაზრა მისი საქციელი, პოლიციაში მისვლა გადაწყვიტა.
მეორე შეკითხვას ბრალდებულმა არ უპასუხა.

მოსამართლემ დააკმაყოფილა პროკურორის შუამდგომლობა და ბრალდებულს პატიმრობა შეუფარდა.
სასამართლო პროცესზე ადვოკატებმა თქვეს, რომ ბრალდებული ინანიებს ჩადენილ დანაშაულს.
16 წლის გოგო ბათუმში 4 ივნისს დაჭრეს. იმ დღის განმავლობაში გავრცელებული ინფორმაციის მიხედვით, ბრალდებული დაზარალებულზე შეყვარებული იყო.
აღნიშნული დანაშაული 13-დან 17 წლამდე პატიმრობას ითვალისწინებს.
შემდეგი სასამართლო პროცესი 29 აგვისტოს გაიმართება.

კანონი არ განსაზღვრავს, რამდენი საქმის განხილვის ვალდებულება ან შესაძლებლობა აქვს მოსამართლეს დღის განმავლობაში. მოსამართლის სამუშაო დღე დილის 10 საათზე იწყება და 18 საათზე სრულდება, თუმცა მოსამართლის გადაწყვეტილებით, სასამართლო პროცესი შესაძლოა არასამუშაო საათებშიც გაგრძელდეს, ასეთი ფაქტი ბათუმის საქალაქო სასამართლოშიც ყოფილა.

სისხლის სამართლის საქმეების განრიგი ყოველდღიურად სასამართლოს ჰოლში და ოფიციალურ ვებგვერდზე თავსდება, თუმცა, ამ განრიგში არ ხვდება აღკვეთი ღონისძიების შეფარდების შესახებ ჩატარებული სასამართლო პროცესები.
ბათუმის საქალაქო სასამართლოში ერთი კვირის განმავლობაში ერთი მოსამართლე მორიგეობს, რომელიც აღკვეთი ღონისძიების შეფარდების საკითხს განიხილავს, ამის პარალელურად მორიგე მოსამართლე იხილავს საქმეებსაც. ბათუმის საქალაქო სასამართლოდან მოწოდებული ინფორმაციით ირკვევა, რომ 7 მაისიდან 7 ივნისის ჩათვლით პერიოდში, 16 დღის განმავლობაში მოსამართლე ხვიჩა კიკილაშვილს საერთოდ არც ერთი საქმე არ განუხილავს. შესაბამისად, მან 138 სისხლის სამართლის საქმის განხილვა 14 დღეში მოასწრო.

იმავე პერიოდში მოსამართლე თამარ ბეჟანიშვილმა სულ 85 საქმე განიხილა. 11 დღის განმავლობაში ბეჟანიშვილს საქმეები საერთოდ არ განუხილავს, მაგრამ 14 საქმე განიხილა, მაგალითად, 16 მაისს, 16 საქმე განხილული აქვს 15 მაისს, დანარჩენ დღეებში კი ორ-ორი საქმე აქვს განხილული. იმავე პერიოდში მოსამართლე ვიოლეტა ფორჩხიძეს ყველაზე მეტი – 17 სისხლის სამართლის საქმე ერთ დღეში აქვს განხილული [28 მაისს]. მას მოცემულ პერიოდში 12 დღე ჰქონდა ისეთი, როცა არც ერთი საქმე არ განუხილავს, ხოლო შვიდი დღის განმავლობაში ორ-ორ საქმეს განიხილავდა.

ამავე პერიოდში ერთ დღეში მაქსიმუმ 12 სისხლის სამართლის საქმე აქვს განხილული ბათუმის საქალაქო სასამართლოს თავმჯდომარეს დავით მამისეიშვილს, ყველაზე ცოტა კი – 2 საქმე. მას არც ერთი საქმე არ აქვს განხილული 16 დღის განმავლობაში, ერთი თვეში მოსამართლე დავით მამისეიშვილს კი სულ 65 საქმე განუხილავს.
თბილისის საქალაქო სასამართლოს მიერ მოწოდებული საერთო სტატისტიკური ინფორმაციის მიხედვით, 7 მაისიდან 31 მაისის ჩათვლით თბილისის საქალაქო სასამართლოს თავმჯდომარე მამუკა ახვლედიანს, ბათუმის საქალაქო სასამართლოს თავმჯდომარისგან განსხვავებით, საერთოდ არ განუხილავს საქმე. ამ პერიოდში 121 საქმე განუხილავს თბილისის საქალაქო სასამართლოს სისხლის კოლეგიის მოსამართლე გიორგი გოგინაშვილს, 26 საქმე განუხილავს ლაშა ჩხიკვაძეს, 13 – ეკა არეშიძეს, ზვიად ესაბუას კი – 1.

თბილისის საქალაქო სასამართლოს სისხლის სამართლის 33 მოსამართლე ჰყავს.

ადვოკატი გელა ნიკოლეიშვილი “ბათუმელებთან” ამბობს, რომ მისთვის აღნიშნული სტატისტიკური ინფორმაცია უცნობი იყო. მისი შეფასებით, ეს მოცემულობა მოსამართლეებს არათანაბარ პირობებში აყენებს. ადვოკატის მოსაზრებით, სისხლის სამართლის მოსამართლე დღის განმავლობაში 8-10 საქმეს თუ განიხილავს, ეს რაოდენობა აუცილებლად აისახება ხარისხზე: “მოსამართლეებიც ადამიანები არიან. შეუძლებელია ამდენი რამის დამახსოვრება. მე როცა 3-4 საქმეზე გამოვდივარ დღის განმავლობაში, მიჭირს.

მით უფრო, როცა ადვოკატი, მართალია, საქმეს სწავლობს, მაგრამ უფრო ცალმხრივად უყურებს. მოსამართლემ ორივე მხარის პოზიცია უნდა შეისწვლოს, ბრალდებისაც, დაცვისაც, მისი პოზიცია უნდა ჩამოაყალიბოს, რა თქმა უნდა, ეს ძალიან ძნელია, 3-4 საქმეზე მეტი საქმის განხილვის შემთხვევაში ვერ განიხილავს მოსამართლე იმ ხარისხით, როგორც პირველ ორ საქმეს. მოსამართლეებიც წუხან და ჩივიან ამაზე, მაგრამ ამას მოსამართლე არ წყვეტს, აუცილებელია დაემატოს მოსამართლეები და სასამართლო დარბაზები – თბილისის საქალაქო სასამართლოში ხშირია შემთხვევა, რომ მოსამართლეებს დარბაზები არ ჰყოფნით და რიგში დგომა უწევთ. ფაქტობრივად უხარისხოდ და ფორმალურად განიხილავენ საქმეებს. თუ უნდათ კვალიფიციური სასამართლო, ეს ყველაფერი უნდა გაითვალისწინონ”.
ადვოკატი იმ ფაქტს, რომ ერთი მოსამართლე თვის განმავლობაში 1 საქმეს განიხილავს, მეორე კი ასზე მეტს, “უცნაურს” და “მახინჯ პრაქტიკას” უწოდებს.

ერთი მოსამართლე დღის განმავლობაში საშუალოდ რამდენ საქმეს უნდა განიხილავდეს? – “ბათუმელების” ამ კითხვაზე უზენაესი სასამართლოს თავმჯდომარემ, ნინო გვენეტაძემ უპასუხა, რომ ასეთი შეფასების გაკეთება ძნელია: `გააჩნია საქმის სიმძიმეს”. მორიგ კითხვაზე, შესაძლებელია თუ არა დღეში, მაგალითად, 12 აღკვეთი ღონისძიების საქმის განხილვა ერთი მოსამართლის მიერ, გვენეტაძემ უპასუხა, რომ ეს “შეუძლებელია, რადგან ეს არის ღია სასამართლოს სხდომები, სადაც პროცესუალური წესებია დასაცავი, სამუშაო საათები კი არის 10-დან 6 საათამდე, გამონაკლისის გარდა”.
ნინო გვენეტაძემ ბათუმის საქალაქო სასამართლოს ერთი მოსამართლის მიერ დღეში ოცამდე საქმის განხილვის ფაქტიც შეაფასა: “შეიძლება იყოს არგუმენტები გამამართლებელი, რომ იქ იყო ვადებთან დაკავშირებული პრობლემები, მაგრამ მთავარია არა რაოდენობა, არამედ შედეგი, რამდენად ეფექტური და დასაბუთებული იყო მოსამართლის გადაწყვეტილება. თუ გვყავს ასეთი შესაძლებლობების მქონე მოსამართლეები, რომლებსაც შეუძლიათ დღის განმავლობაში განახორციელონ მაღალი ხარისხის სამართალწარმოება, მაგალითად, 12 საქმეზე, ეს მისასალმებელია. ჩვენ იქეთკენ მივდივართ, რომ მოსამართლეები განვტვირთოთ და შევუმსუბუქოთ ყოფა. ჩვენი მიზანია, ვიზრუნოთ გადაწყვეტილების ხარისხზე და არა რაოდენობაზე” – ამბობს გვენეტაძე.

უზენაესი სასამართლოს თავმჯდომარე ბათუმში დაახლოებით ერთი თვის წინ იმყოფებოდა. მაშინ ის მოსამართლეებს სამ კანონში – “საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ”, “საქართველოს იუსტიციის უმაღლესი სკოლის შესახებ”, “უზენაეს სასამართლოში საკასაციო საჩივრების დასაშვებობის კრიტერიუმების შესახებ” – შესატან ცვლილებებზე ესაუბრა. ნინო გვენეტაძემ შეხვედრაზე განაცხადა, რომ კანონში ცვლილებების შედეგად მოსამართლეებს საქმეები ელექტრონული წესით გაუნაწილდებათ [ახლა სასამართლოს თავმჯდომარეები ანაწილებენ], სასამართლოს თავმჯდომარეს კი თავად მოსამართლეები აირჩევენ.

IBERPROEX ENGINEERING & PROJECT MANAGEMENT, S.L – ის დირექტორის მინდობილმა პირმა გასულ კვირას „ბათუმელებთან“ ანტიკორუფციული სააგენტოს მხრიდან ზეწოლაზე, აჭარის ფინანსთა და ეკონომიკის სამინისტროს მიერ კი კანონის უხეშ დარღვევაზე ისაუბრა.  

ბრალდებებს დღეს აჭარის ფინანსთა და ეკონომიკის მინისტრმა დავით ბალაძემ საგანგებო ბრიფინგით უპასუხა:

„კომპანიის განცხადება, რომ სამინისტროს თანამშრომლები ვერ აცნობიერებენ თუ რასთან აქვთ საქმე, არასერიოზულია. მინდა ვთქვა, რომ სამინისტროს თანამშრომლები კარგად აცნობიერებენ თუ რა მნიშვნელობის პროექტთან გვაქვს საქმე.  როგორც ჩანს, კომპანია თავად ვერ აცნობიერებს ხელშეკრულების პირობებს.

ითხოვს ვადას, რომ ხარვეზი გამოასწოროს და ამის შემდეგ კიდევ ერთხელ ითხოვს დამატებით 50-დღიან ვადას, რომ გაუგრძელდეს ხელშეკრულების პირობები. ჩემთვის მიუღებელია ასეთ კომპანიასთან ურთიერთობა. იქ უფრო სერიოზული სამუშაოები იყო ჩასატარებელი, კომპანიამ კი გაცილებით მეტი ვადა მოითხოვა. სამინისტროს და აჭარის მთავრობას არა აქვს დრო და ფული დასაკარგი, აქედან გამომდინარე მივიღეთ გადაწყვეტილება გავაუქმეთ ხელშეკრულება და   ვმუშაობთ იმასთან დაკავშირებით, თუ რომელი კომპანიისგან იქნება შესაძლებელი სასწრაფო წესით პროექტის შეძენა. აჭარის მთავრობა ჰპირდება მოსახლეობას და ფეხბურთის გულშემატკივრებს, რომ აუცილებლად ექნებათ ფეხბურთის სტადიონი და აუცილებლად მოვახეხებთ ამ წელში პროექტის შეძენას.

რაც შეეხება იმას, რომ კომპანია სასამართლოში აპირებს ჩივილს, ეს მათი უფლებაა და არავინ შეუზღუდავს. რაც შეეხება ჩვენ პირად ინტერესებს, კარგად ჩანს ჩვენი დამოკიდებულება, მე კიდევ ერთხელ გავიმეორებ იმას, თუ ვერ აცნობიერებს კონტრაქტის პუნქტებს, შესაბამისად მოხდა კონტრაქტის პუნქტებიდან გამომდინარე  და არანაირი პირადი ინტერესებიდან გამომდინარე. ასევე არსებობდა ბევრი კითხვა იმასთან დაკავშირებით, რომ ჩვენ პირადი ინტერესები გვქონდა ესპანელებთან დაკავშირებით.

 აქ ისიც დამტკიცდა, რომ ჩვენ არანაირი ინტერესები არ გაგვაჩნია.  ჩვენი ინტერესია გაკეთდეს სტადიონი და ეს სტადიონი იყოს საერთაშორისო სტანდარტების “ – განაცხადა მინისტრმა დავით ბალაძემ ბრიფინგზე.

„ჩვენ გვქონდა ეტაპობრივად გაწერილი ხელშეკრულებაში, თუ რა დოკუმენტები უნდა ყოფილიყო წარმოდგენილი. წარმოუდგენლობის შემთხვევაში მივეცით 20-დღიანი ვადა დაჯარიმებით. ამის შემდეგ კომპანიამ კიდევ მოითხოვა 50-დღიანი ვადა, რაც ვფიქრობთ, რომ ძალიან ბევრი იყო და გამოიწვევდა, ასე ვთქვათ, სამომავლოდ პრობლემებს. მივიღეთ გადაწყვეტილება ხელშეკრულების გაუქმებასთან დაკავშირებით“, – განაცხადა მედიასთან აჭარის ფინანსთა და ეკონომიკის მინისტრმა დავით ბალაძემ.

სტადიონის პროექტის შესყიდვაზე კონკურსში გამარჯვებულ კომპანია „IBERPROEX ENGINEERING & PROJECT MANAGEMENT, S.L.-თან [„იბერპროექსთან“] სამინისტრომ ხელშეკრულება მიმდინარე წლის 31 მარტს გააფორმა.

კონკურსში გამარჯვებული მაკეტი, რომლის მიხედვითაც აჭარის მთავრობის გადაწყვეტილებით, ბათუმში სტადიონი აღარ აშენდება

„ხელშეკრულების გაუქმების შესახებ ბრძანება ძალაში შესული არ არის. გადაწყვეტილებას სამართლებრივი პროცედურა აქვს. ერთი თვის ვადაში ჩვენ შეგვიძლია ის გავასაჩივროთ ადმინისტრაციული წესით აჭარის მთავრობაში. თუ არ დაგვაკმაყოფილა ადმინისტრაციული წესით მიღებულმა საბოლოო ვერდიქტმა, შემდეგ უკვე შეგვიძლია სასამართლოს მივმართოთ… ყველაფერს რომ თავი დავანებოთ, პროექტში უამრავი თანხაა დახარჯული ჩვენ მიერ და ლოგიკურია, რომ, მინიმუმ, ამ თანხის კომპენსაცია მაინც მოვითხოვოთ“, – განაცხადა „ბათუმელებთან“ სატელეფონო საუბარში „იბერპროექსის“ დირექტორის მინდობილმა პირმა მამუკა ლობჟანიძემ.

აჭარის ფინანსთა და ეკონომიკის სამინისტროს ინფორმაციით, კომპანიამ ხელშეკრულებით გათვალისწინებულ ვადაში [ხელშეკრულების გაფორმებიდან 50 დღეში] ვერ წარმოადგინა საპროექტო ტერიტორიის საინჟინრო-გეოლოგიური კვლევა (საექსპერტო დასკვნით). სამინისტროს ინფორმაციითვე, მათ ეს დოკუმენტები  ვერც  2015 წლის 9 ივნისამდე მიცემულ დამატებით ვადაში მიიღეს.

ხელშეკრულების გაუქმების შესახებ სამინისტროს ბრძანებაში აღნიშნულია, რომ 2015 წლის 5 ივნისს სამინისტროში შევიდა კომპანიის წერილი, რომლის მიხედვითაც ის  მოითხოვს „ნაკისრი ვალდებულების შეუსრულებლობა ჩაითვალოს დაუძლეველ გარემოებად და გადავადდეს საპროექტო ტერიტორიის საინჟინრო-გეოლოგიური კვლევის ჩატარება, სახელმწიფო უწყებების მიერ დოკუმენტაციის გადამოწმების პროცესის დასრულების შესახებ, მათზე ოფიციალური შეტყობინების მიღების თარიღიდან მომდევნო 50 დღით“.

„სახელმწიფო უწყებების მიერ დოკუმენტაციის გადამოწმების“ რა პროცესზე იყო  საუბარი, აჭარის ფინანსთა და ეკონომიკის სამინისტროდან კონკრეტული პასუხი „ბათუმელებმა“ ვერ მიიღო. სამინისტროს იურიდიულ დეპარტამენტში მხოლოდ ის გვითხრეს, რომ ამ წერილით კომპანია ითხოვდა გეოლოგიური კვლევის გადავადებას – „ფორს-მაჟორში ვიყავი, ტექნიკა არ იყო საქართველოში… სხვა, მნიშვნელოვანი მაგ წერილში არაფერი არ არის“.

„გეოლოგიურ კომპანიას უთანხმდები თანხაზე, იხდი ამ თანხას და ის კვლევას ატარებს  – ეს პროცესი ძალიან მარტივია.

ფინანსთა და ეკონომიკის სამინისტრომ კარგად იცის, თუ რატომ არ მივიღეთ ასეთი გადაწყვეტილება. სამინისტროსა და სხვა სახელმწიფო უწყებების მხრიდან ჩვენგან იყო მოთხოვნილი დამატებითი დოკუმენტაცია _ ვითომდა ჩვენ მიერ საკონკურსო წარმოების დროს წარმოდგენილი დოკუმენტაციის მართებულობის დაზუსტების მიზნით. ეს საკმაოდ უხეში კანონდარღვევაა და ეს ალბათ, ერთ-ერთი საფუძველი და მთავარი არგუმენტი იქნება ჩვენი საჩივრის“, – აცხადებს მამუკა ლობჟანიძე.

ბათუმის სტადიონის პროექტის კონკურსზე წარდგენილი პაკეტების გახსნა აჭარის ფინანსთა და ეკონომიკის სამინისტროში

„დამატებით დოკუმენტებს სამინისტროდან არავინ სთხოვდა კომპანიას, ყოველ შემთხვევაში ოფიციალურად, წერილობით, თორემ ასეთი წერილი ჩვენს დეპარტამენტში აუცილებლად გაივლიდა“, – განაცხადეს ფინანსთა და ეკონომიკის სამინისტროს იურიდიულ დეპარტამენტში. დეპარტამენტში ადასტურებენ, რომ წესით, თუ რაიმე დასაზუსტებელი იყო, სამინისტროს ხელშეკრულების გაფორმებამდე უნდა მოეთხოვა და არა ხელშეკრულების გაფორმების შემდეგ.

„გეოლოგიური კვლევის ვერდაწყებაზე აქ არ არის საუბარი. ისეთი ზეწოლის პროცესში, როცა, ფაქტობრივად, დაკითხვებზე დავყავდით სხვადასხვა სახელმწიფო უწყებაში, ჩვენგან იმ გადაწყვეტილების მიღება, რომ კიდევ 150 ათასი ლარი [დაახლოებით ამდენი თანხა სჭირდებოდა გეოლოგიურ კვლევას] გადაგვეხადა, მაშინ როცა არ ვიცოდით, რითი დასრულდებოდა ეს ყველაფერი, ცოტა არ იყოს ძნელი და რთულია. ჩვენ ამის შესახებ ვესაუბრეთ სამინისტროს“, – ამბობს მამუკა ლობჟანიძე.

მისივე თქმით, ამ ყველაფერზე სამინისტროს ოფიციალურადაც მისწერეს, „მაგრამ ერთი თვე პასუხი არ გაგვცეს და ეს დრო გამოიყენეს როგორც დაგვიანების შემადგენელი ნაწილი. არადა, როცა პროექტის ერთ-ერთი კომპონენტი ერთი დღით დავაგვიანეთ, სამინისტროდან დაჯარიმების წერილი მანამდე მივიღეთ, ვიდრე ეს დაგვიანება დაფიქსირდებოდა“.

ერთ-ერთი უწყება, რომელიც „იბერპროექსის“ დოკუმენტაციით დაინტერესდა, მამუკა ლობჟანიძის თქმით, შინაგან საქმეთა სამინისტროს ანტიკორუფციული სააგენტოა: „ყოველგვარი სამართლებრივი ნორმების დარღვევით, არაფორმალურად მოგვთხოვეს დოკუმენტები ასეთი ფორმულირებით – „ჩვენ ამ საკითხს ვსწავლობთ“. ჩვენი კონტრარგუმენტი იყო ის, რომ საკითხის შესწავლას აქვს თავისი ნორმები და იმ ნორმებისთვის მიემართათ. ჩვენ ვამბობდით და ვამბობთ, რომ დოკუმენტაცია, რაც საკონკურსო პირობებში იყო მოთხოვნილი, წარმოვადგინეთ… და თუ, ვთქვათ, საკონკურსო პირობის განსაზღვრისას ვიღაცამ შეცდომა დაუშვა და არ განსაზღვრა ზუსტად რა დოკუმენტები იყო წარმოსადგენი, ან რა შინაარსის და რა ფორმით – ეს ჩვენი ბრალი არ არის…“

„ბათუმელებმა“ მამუკა ლობჟანიძეს სთხოვა იმ წერილის ასლი, რომლითაც ბიზნესჯგუფი ანტიკორუფციული სამსახურისგან მომდინარე ზეწოლაზე ატყობინებდა სამინისტროს, მაგრამ მამუკა ლობჟანიძემ განაცხადა, რომ მას სათავო ოფისთან შეთანხმების გარეშე ამ დოკუმენტის გასაჯაროება არ შეუძლია: „ვინაიდან ჩვენ მაინც სამართლებრივი გზით ვაპირებთ წასვლას, ზედმეტი მოძრაობებისგან თავს ვიკავებთ, ეს ერთი, და მეორე, მე არც ამ კომპანიის წარმომადგენელი ვარ და არც მისი თანამშრომელი. ამდენად, ყველა ასეთი გადაწყვეტილების მიღება – კონფიდენციალური ინფორმაციის გაცემაზე თუნდაც ჟურნალისტებისთვის თუ კანონიერი მოთხოვნის საფუძველზეც, უნდა გადაწყვიტოს კომპანიამ. სამინისტროს თუ სხვა სახელმწიფო უწყებებს ვუხსნი და ვერაფრით გავაგებინე, რომ მე ოფიციალურად მხოლოდ დირექტორის მინდობილი პირი ვარ და ნებისმიერი თხოვნა თუ მოთხოვნა, რომელიც გაკეთდება – ფორმალური თუ არაფორმალური, უნდა გაკეთდეს კომპანიის სახელზე და არა ჩემი მისამართით“.

რა საკითხს სწავლობს ანტიკორუფციული სააგენტო და იბარებდნენ თუ არა კომპანია „იბერპროექსის“ წარმომადგენელს ძალოვან უწყებაში? – შს სამინისტროს საზოგადოებასთან ურთიერთობის სამსახურში გვითხრეს, რომ თუ ამასთან დაკავშირებით კომენტარი გაკეთდება, გვაცნობებენ.

მამუკა ლობჟანიძის თქმით, ორივე მხარე [სამინისტრო და ანტიკორუფციული სააგენტო] პარალელურ რეჟიმში ითხოვდა ერთსა და იმავეს – „ერთი, რომ გინდა თუ არ გინდა დაადასტურეთ, კომპანია მართებულად არის რეგისტრირებული, და მეორე იყო კომპანიის გამოცდილებასთან დაკავშირებით“.

სტადიონის პროექტი და „ანბანის კოშკი“

არის თუ არა დაკავშირებული „იბერპროექსი“ ასევე ესპანურ კომპანია „ჩMD ინგენეროს“-თან, რომელმაც „ანბანის კოშკი“ [ასევე ახალი ბულვარი, აგრეთვე პარლამენტის შენობა ქუთაისში და სხვ] შენობები დააპროექტა?

„იბერპროექსის“ დირექტორის მინდობილი პირი მამუკა ლობჟანიძე `ბათუმელებთან“ აცხადებს, რომ „იბერპროექსი“ საპროექტო ორგანიზაციაა და მას ვინ რასაც შეუკვეთავს, იმ დავალებას ასრულებს, როგორც მომსახურების სფეროში მომუშავე ნებისმიერი კომპანია: „სახელმწიფოსთან კონტრაქტორი ადრე რომელი კომპანიაც იყო ძირითადად, ყველამ იცის. თავის დროზე კი, იმ ძირითადმა კომპანიამ, რომელიც აკეთებდა ამ მშენებლობებისა თუ ნაგებობების პროექტებს, „იბერპროექსს“ მხოლოდ კონკრეტული ნაწილების დაანგარიშება დაუკვეთა… თავის დროზე, როცა პირველად დამისვეს მე ეს კითხვა – მაშინაც ვუთხარი, სადმე წერია, რომ აქ რამე კანონდარღვევაა? დანაშაულია სადმე ჩადენილი? სისხლის სამართლის კოდექსში სადმე წერია, რომ წინა ხელისუფლებასთან თანამშრომლობა ავტომატურად ისჯება? რატომაა ასეთი იდუმალებით მოცული ეს ყველაფერი, ვერ ვხვდები“.

ამ ყველაფერზე კი, როგორც მამუკა ლობჟანიძე ამბობს, ამჯერად, უშუალოდ სტადიონის პროექტთან მიმართებაში საუბარი არ ყოფილა: „საერთოდ, “ექსპერტებს“, რომლებიც ამ თემაზე ლაპარაკობენ, ძირითადი არგუმენტაცია აქვთ – ამან მითხრა, იმან მითხრა. არავის არანაირ დოკუმენტში არ ჩაუხედია, ამ დოკუმენტების მართებულობა არ გადაუმოწმებია… მაგრამ უკაცრავად და, სხვადასხვა ოფიციალური დონის ჭორიკნები ამ თემასაც იყენებენ იმისთვის, რომ თავი წარმოაჩინონ – აი, ჩვენ აღმოვაჩინეთ კიდევ ერთი ხალხის ინტერესების მტერი, ხალხის მოღალატე და აი, როგორ მოვექეცით, ქართულად, ვაჟკაცურად, ხმალამოღებული ვებრძვით და ა.შ.“

აშენდება თუ არა სტადიონი ბათუმში

აჭარის ფინანსთა და ეკონომიკის სამინისტრომ აჭარის ბიუჯეტის სახსრებით ქ. ბათუმში, ლეონიძის ქ. №15-ში მდებარე მიწის ნაკვეთზე 20 000 მაყურებელზე გათვლილი სტადიონის საპროექტო-სახარჯთაღრიცხვო დოკუმენტაციის შედგენაზე კონკურსი 2015 წლის 5 იანვარს გამოაცხადა.

საკონკურსო კომისიამ 11 პროექტს შორის გამარჯვებულად „იბერპროექსის“ პროექტი გამოავლინა და კომპანიასთან ხელშეკრულება 2015 წლის 31 მარტს გააფორმა. ხელშეკრულების საერთო ღირებულება 579 000 ლარია [საკონკურსო პირობით შესყიდვის სავარაუდო ღირებულება კი 650 000 ლარი იყო]. კომპანია მე-4 კატეგორიის სტადიონის პროექტს ამზადებდა.

ფინანსთა და ეკონომიკის სამინისტროს 2015 წლის 25 ივნისის ბრძანებაში აღნიშნულია, რომ გარდა გეოლოგიური დასკვნისა, „IBERPROEX ENGINEERING & PROJECT MANAGEMENT, S.L.“-ი არაჯეროვნად ასრულებს ხელშეკრულებით ნაკისრ სხვა ვალდებულებებსაც. შესაბამისად, სამინისტროს მიაჩნია, რომ ხელშეკრულება ცალმხრივად უნდა მოიშალოს (გაუქმდეს), ხოლო კომპანიას უნდა დაეკისროს პირგასამტეხლო 12 448,5 ლარის ოდენობით, ვალდებულების დარღვევიდან 2015 წლის 25 ივნისის ჩათვლით“.

კომპანიას ხუთ თვეში, ანუ 2015 წლის პირველ სექტემბრამდე უნდა შეესრულებინა ხელშეკრულებით აღებული ვალდებულებები. ამით პროექტის საბოლოო ვარიანტი და ხარჯთაღრიცხვა დაიდებოდა, რის შემდეგაც სამინისტრო გამოაცხადებდა ტენდერს სტადიონის მშენებლობაზე [რომელიც სწორედ ამ პროექტის მიხედვით აშენდებოდა]. კომპანიის დირექტორის წარმომადგენელი “ბათუმელებთან” ამბობს, რომ აღნიშნულ 5-თვიან ვადაში თავესუფლად ასწრებდნენ ვალდებულების შესრულებას.

„პროექტი ფაქტობრივად მზად არის – გეოლოგიური ნაწილი და გამოყენებული კონსტრუქციების მდგრადობა დაგვრჩა, რომ დავიანგარიშოთ. ეს არის 2-3 კვირის ამბავი. თუმცა, სამწუხაროდ, ასეთი გადაწყვეტილება იქნა ამ ეტაპზე მიღებული“, _ განაცხადა მამუკა ლობჟანიძემ.

დავით ბალაძე: „მინდა ჩვენს მოსახლეობას, ადგილობრივ ფეხბურთის მოყვარულებს და მაყურებლებს ვუთხრა, რომ ქალაქში აუცილებლად აშენდება სტადიონი და ეს იმას არ ნიშნავს, რომ ამ პროექტის გაჩერებით საერთოდ არ იქნება სტადიონი. ჩვენ იმ თანხას, რაც არის გამოყოფილი ბიუჯეტში, მოვახმართ აუცილებლად სტადიონის ინფრასტრუქტურის განვითარებას“.

აჭარის მიმდინარე და მომდევნო წლების ბიუჯეტში სტადიონისთვის მთლიანობაში 36,5 მილიონი ლარი იყო გათვალისწინებული. სტადიონის მშენებლობა 2017 წელში უნდა დასრულებულიყო.

ამასთან, არსებობს ბიუჯეტიდან წინა ხელისუფლების დროს, ბათუმის საკრებულოს ყოფილი თავმჯდომარის, გიორგი კირთაძის ინფორმაციით, 1 მილიონად შესყიდული პროექტი, რომლის მიხედვითაც მშენებლობაზე ტენდერის გამოცხადება ამჟამინდელმა ხელისუფლებამ მიზანშეუწონლად მიიჩნია.

აღსანიშნავია, რომ აჭარის მთავრობა არაერთ კომპანიას პატიობს ვადების [მათ შორის ხანგრძლივ] დარღვევას, ათავისუფლებს პირგასამტეხლოსა თუ ბიუჯეტის სასარგებლოდ, მთლიანობაში, მილიონობით გადასახდელი ჯარიმებისგანაც კი, რაც არ მოხდა „იბერპროექსთან“ მიმართებაში.

აჭარის მთავრობის თავმჯდომარემ არჩილ ხაბაძემ მთარობის ერთ-ერთ ბოლო სხდომაზე ისიც კი არ გამორიცხა, რომ უცხოეთში ჩავიდნენ სპეციალისტები და იქ რომელიმე სტადიონის იდენტური პროექტი შეისყიდონ.

აჭარის ფინანსთა და ეკონომიკის სამინისტროში „ბათუმელებს“ უთხრეს, რომ ამ დროისთვის სტადიონის პროექტთან დაკავშირებით კონკრეტული გადაწყვეტილება მიღებული არ არის, თუმცა მიმდინარეობს მუშაობა, რა გზით განხორციელდეს პროექტის  შესყიდვა – გამარტივებული [ერთ პირთან მოლაპარაკების გზით] თუ კონკურსის წესით. სამინისტროში აცხადებენ, რომ საპროექტო თანხა, წესით, იმდენივე უნდა იყოს. კითხვაზე – არის თუ არა შესაძლებელი წინა კონკურსში წარმოდგენილი სხვა 10 პროექტიდან შერჩევა-შესყიდვა, სამინისტროში გვიპასუხეს, რომ ეს სრულიად შესაძლებელია და თუ ასე მოხდება, ე.ი. ეს ნიშნავს, რომ `აჭარის მთავრობამ მისცა თანხმობა ფინანსთა და ეკონომიკის სამინისტროს და გამარტივებული წესით შეისყიდეს“.

ანგისის სტადიონის ტენდერი უარყოფითი შედეგით

უარყოფითი შედეგით დასრულდა ბათუმში, ანგისის დასახლებაში კიდევ ერთი  სპორტული ბაზის მშენებლობაზე ბათუმის მერიის მიერ გამოცხადებული ტენდერი.

ანგისაში სპორტული ბაზის [მათ შორის სტადიონის] მშენებლობისთვის ქალაქის მერია მაქსიმუმ 5 მილიონ 330 ათასი ლარის გადახდას გეგმავდა.

ტენდერში მხოლოდ ერთი კომპანია – „კონვენტ ჯორჯია“ მონაწილეობდა [შეთავაზება 5 მილიონ 99 ათას 997 ლარი]. თუმცა, მიმდინარე წლის 5 ივნისს მერიის სატენდერო კომისიამ კომპანიას ტექნიკური დოკუმენტაციის გამო დისკვალიფიკაცია მისცა.

„კონვენტ ჯორჯიაში“ „ბათუმელებს“ უთხრეს, რომ ერთ-ერთი სატენდერო პირობით „ისეთი რაღაცა იყო მოთხოვნილი, რაც ბუნებაში არ არსებობს, კერძოდ, ბუნებრივ საფარზე სერტიფიკატი. ჩვენგან გაკეთდა აქცენტი ამაზე, მაგრამ არ იქნა გათვალისწინებული.“

ხელახალი ტენდერი ამ დრომდე არც მერიას გამოუცხადებია.