დღეს სასამართლომ ბათუმის სახელმწიფო უნივერსიტეტის საარჩევნო კომისიის 2014 წლის 19 დეკემბრის ის გადაწყვეტილება გააუქმა, რომლის თანახმადაც სტუდენტ გიორგი ბოლქვაძის საჩივარი სოციალურ და პოლიტიკურ მეცნიერებათა ფაკულტეტის დეკანის არჩევნების შედეგების ბათილად ცნობის შესახებ დაკმაყოფილდა და ფაკულტეტზე დეკანის არჩევნების მე-2 ტური დაინიშნა. მე-2 ტურის შედეგებით დეკანის თანამდებობაზე გამარჯვებულის კონკურენტი კანდიდატი – ქეთევან ბერიძე დაინიშნა.
ბათუმის უნივერსიტეტში დეკანის არჩევნები გასული წლის დეკემბერში სამ ფაკულტეტზე ჩატარდა. მათგან მხოლოდ ერთ, სოციალურ და პოლიტიკურ მეცნიერებათა ფაკულტეტზე იყო კონკურენცია, სადაც ორი კანდიდატი – ირაკლი მანველიძე და დეკანის მოვალეობის შემსრულებელი ქეთი ბერიძე იყრიდა კენჭს.
დეკანის არჩევნებში სასურველ კანდიდატს ხმას ფაკულტეტის აკადემიური პერსონალი და ფაკულტეტის საბჭოს წევრი სტუდენტები აძლევდნენ, რომელთაგან ერთ-ერთმა – გიორგი ბოლქვაძემ არჩევნების დასრულებისა და ირაკლი მანველიძის გამარჯვების შემდეგ განაცხადა, რომ მის მიმართ არჩევნების პროცესში განხორციელდა ზეწოლა ირაკლი მანველიძის მხრიდან და საარჩევნო ბიულეტენის გაუქმება მოითხოვა.
ირაკლი მანველიძე ამბობს, რომ ამ გადაწყვეტილების გაუქმებით მოქმედი დეკანი ავტომატურად არაკანონიერად ცხადდება. „ახლა სასწრაფოდ უნდა გადადგეს ეს დეკანი და მის ნაცვლად დაინიშნოს მოვალეობის შემსრულებელი, იქამდე, სანამ უნივერსიტეტი მიიღებს სასამართლოს დღევანდელ გადაწყვეტილებას, სადაც არის მითითება, რომ მან ხელახლა უნდა ჩაატაროს ადმინისტრაციული მოკვლევა ამ საკითხზე და ხელახლა გამოსცეს ადმინისტრაციული აქტი”, – ამბობს ირაკლი მანველიძე.
მისივე განმარტებით, ახლა უნივერსიტეტმა უნდა განიხილოს სოციალურ და პოლიტიკურ მეცნიერებათა ფაკულტეტის დეკანის დანიშვნის გზა – იქნება კიდევ ერთი არჩევნები თუ არჩევნების გარეშე, ავტომატურად დაინიშნება პირველ ტურში გამარჯვებული კანდიდატი.
