ნეტგაზეთი • RU

აჭარის ფინანსთა მინისტრი სტადიონის პროექტთან დაკავშირებით ესპანურ კომპანიას პასუხობს

 

აჭარის ფინანსთა და ეკონომიკის მინისტრი დავით ბალაძე ბათუმის სტადიონის პროექტის შესყიდვაზე კონკურსში გამარჯვებული ესპანური კომპანიის მიერ ხელშეკრულების შეწყვეტის შესაძლო გასაჩივრებას და სამინისტროს მისამართით გამოთქმულ ბრლადებებს გამოეხმაურა. აჭარის ფინანსთა და ეკონომიკის სამინისტრომ კომპანია „IBERPROEX ENGINEERING & PROJECT MANAGEMENT, S.L. – სთან დადებული ხელშეკრულება ვადების დარღვევის გამო გააუქმა. კომპანია აპირებს სამინისტროს ამ შეფასების საფუძველზე მიღებული გადაწყვეტილება სასამართლოშიც გაასაჩივროს.

IBERPROEX ENGINEERING & PROJECT MANAGEMENT, S.L – ის დირექტორის მინდობილმა პირმა გასულ კვირას „ბათუმელებთან“ ანტიკორუფციული სააგენტოს მხრიდან ზეწოლაზე, აჭარის ფინანსთა და ეკონომიკის სამინისტროს მიერ კი კანონის უხეშ დარღვევაზე ისაუბრა.  

დავით ბალაძე
დავით ბალაძე

 

ბრალდებებს დღეს აჭარის ფინანსთა და ეკონომიკის მინისტრმა დავით ბალაძემ საგანგებო ბრიფინგით უპასუხა:

„კომპანიის განცხადება, რომ სამინისტროს თანამშრომლები ვერ აცნობიერებენ თუ რასთან აქვთ საქმე, არასერიოზულია. მინდა ვთქვა, რომ სამინისტროს თანამშრომლები კარგად აცნობიერებენ თუ რა მნიშვნელობის პროექტთან გვაქვს საქმე.  როგორც ჩანს, კომპანია თავად ვერ აცნობიერებს ხელშეკრულების პირობებს.

ითხოვს ვადას, რომ ხარვეზი გამოასწოროს და ამის შემდეგ კიდევ ერთხელ ითხოვს დამატებით 50-დღიან ვადას, რომ გაუგრძელდეს ხელშეკრულების პირობები. ჩემთვის მიუღებელია ასეთ კომპანიასთან ურთიერთობა. იქ უფრო სერიოზული სამუშაოები იყო ჩასატარებელი, კომპანიამ კი გაცილებით მეტი ვადა მოითხოვა. სამინისტროს და აჭარის მთავრობას არა აქვს დრო და ფული დასაკარგი, აქედან გამომდინარე მივიღეთ გადაწყვეტილება გავაუქმეთ ხელშეკრულება და   ვმუშაობთ იმასთან დაკავშირებით, თუ რომელი კომპანიისგან იქნება შესაძლებელი სასწრაფო წესით პროექტის შეძენა. აჭარის მთავრობა ჰპირდება მოსახლეობას და ფეხბურთის გულშემატკივრებს, რომ აუცილებლად ექნებათ ფეხბურთის სტადიონი და აუცილებლად მოვახეხებთ ამ წელში პროექტის შეძენას.

რაც შეეხება იმას, რომ კომპანია სასამართლოში აპირებს ჩივილს, ეს მათი უფლებაა და არავინ შეუზღუდავს. რაც შეეხება ჩვენ პირად ინტერესებს, კარგად ჩანს ჩვენი დამოკიდებულება, მე კიდევ ერთხელ გავიმეორებ იმას, თუ ვერ აცნობიერებს კონტრაქტის პუნქტებს, შესაბამისად მოხდა კონტრაქტის პუნქტებიდან გამომდინარე  და არანაირი პირადი ინტერესებიდან გამომდინარე. ასევე არსებობდა ბევრი კითხვა იმასთან დაკავშირებით, რომ ჩვენ პირადი ინტერესები გვქონდა ესპანელებთან დაკავშირებით.

 აქ ისიც დამტკიცდა, რომ ჩვენ არანაირი ინტერესები არ გაგვაჩნია.  ჩვენი ინტერესია გაკეთდეს სტადიონი და ეს სტადიონი იყოს საერთაშორისო სტანდარტების “ – განაცხადა მინისტრმა დავით ბალაძემ ბრიფინგზე.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე