Batumelebi

რაზე მიუთითებს ცხვირიდან სისხლდენა

ექიმის განმარტებით, ცხვირიდან სისხლდენა შესაძლოა ცხვირის ლორწოვანას სიმშრალით ან ცხვირის ძგიდეზე სისხლძარღვების ანატომიური განლაგებით იყოს გამოწვეული, ასევე, სისხლმდენი პოლიპის ან ტრავმის გამო. შესაძლოა ეპიტაქსისი განვითარდეს მაღალი ემოციური ფონის დროსაც, ამ დროს ხდება სისხლძარღვების გადავსება, რის გამოც წყდება კაპილარი და ცხვირიდან მოდის სისხლი.

ხშირად ცხვირიდან სისხლდენის მიზეზი მაღალი არტერიული წნევაა. მაღალი წნევა აძლიერებს სისხლის ჭავლს სუსტი კაპილარების კედლებზე და ხეთქავს მათ. გარდა ამისა, არსებობს ვირუსული წარმოშობის სისხლდენები, რომლებიც უმეტესად ბავშვებშია გავრცელებული. ექიმის განმარტებით, ამ დროს შესაძლოა სისხლდენა ყურიდანაც კი განვითარდეს: “პატარებში ხშირია ვირუსული სისხლდენა, უფრო ბაქტერიული რინიტები. გარდა ამისა ცხვირიდან სისხლდენას ბავშვებში ხშირად იწვევს ის, რომ ისინი აწვალებენ ცხვირს. შუა ხნის ადამიანებს კი სისხლდენა უფრო დაავადებების გამო უვითარდებათ. ასაკოვანი ადამიანების ცხვირიდან პერიოდული სისხლდენის მიზეზი კი არის წნევა, მაღალი ემოციური ფონი, ორგანოების დაავადებები და გამომშრალი ცხვირის ლორწოვანა”, – განმარტავს ექიმი.

ეპიტაქსისი ორი სახისაა, იგი შესაძლოა განვითარდეს ცხვირის წინა ნაწილში, ასევე ცხვირის შუა და უკანა ნაწილში. “სისხლდენა, რომელიც ცხვირის წინა ნაწილში ვითარდება, არ არის საშიში, მაგრამ როცა იგი უფრო ღრმაა და ვითარდება ცხვირის შუა ან უკანა ნაწილში, სადაც სხვა ვენები გადის, საჭირო ხდება სპეციალისტის დროული ჩარევა, რათა ადამიანი სისხლისგან არ დაიცალოს და არ დაიღუპოს”, – ამბობს ნინო კვერნაძე. ასეთი სისხლდენა ძირითადად მაღალი არტერიული წნევის დროს ან რომელიმე დაავადების დროს ვითარდება.

ცხვირიდან სისხლდენა წელიწადში ერთხელ არ მიიჩნევა საგანგაშოდ, მაგრამ როცა ადამიანს ასეთი შემთხვევების გამო დისკომფორტი ექმნება, დროა ექიმს მიმართოს. ნინო კვერნაძე ამბობს, რომ ცხვირიდან სისხლდენა, გარკვეული პერიოდულობით, დღეში რამდენჯერმეც კი შეიძლება განუვითარდეს პაციენტს. “ყველა შემთხვევა საყურადღებოა. უყურადღებოდ დატოვებულმა ერთჯერადმა სისხლდენამ შეიძლება უფრო სერიოზული დაავადების დიაგნოსტიკა გამოგიტოვოს”, – ამბობს ის.

ექიმის განმარტებით, ცხვირიდან სისხლდენა, როგორც წესი, რამდენიმე წუთში ჩერდება, თუმცა ყოველთვის ასე არ ხდება და იგი შესაძლოა ნახევარ საათზე მეტ ხანსაც გაგრძელდეს.

ცხვირიდან სისხლდენის დროს არ არის რეკომენდებული თავის უკან გადაწევა და მით უმეტეს დაწოლა, ამ დროს შესაძლოა პაციენტმა სისხლი გადაყლაპოს, რის შედეგადაც კუჭი ივსება სისხლით და იწყება ღებინება. “გარდა არასასიამოვნო გემოსა და შეგრძნებისა, შეიძლება ეს მასა ისევ ცხვირში წავიდეს და უფრო გართულდეს მდგომარეობა”, – ამბობს ექიმი.

იმისთვის, რომ წინა ცხვირიდან სისხლდენა დროულად შეჩერდეს, ექიმის რეკომენდაციით, ადამიანი უნდა იჯდეს და ცხვირის ნესტოებზე დაიდოს ცივი საფენები, ცხვირის ნესტოში, წინა შესასვლელში კი მოითავსოს წყალბადის ზეჟანგში (ე.წ. “პერეკისი”) დასველებული ბამბის ტამპონი. “წყალბადის ზეჟანგი (3%-იანი) სასურველია იყოს ცივი (როცა პაციენტი ინფორმირებულია პერიოდულად სისხლდენაზე მას მაცივარშიც კი უდევს ეს ხსნარი). მას შემდეგ, რაც ე.წ. პერეკისში დასველებულ ტამპონს მოათავსებთ ცხვირის ნესტოში, ცხვირის ფრთაზე დაიდეთ ხელსახოცში გახვეული ყინულის ნატეხი და მიიჭირეთ ხელი რამდენიმე წუთის განმავლობაში”, – ამბობს ექიმი.

იმ შემთხვევაში თუ ეს ცხვირის პირველადი და წინა ნაწილის სიხლდენაა, მაშინ კაპილარი რამდენიმე წუთში დაითრომბება და სისხლდენა გაჩერდება, მაგრამ თუ სისხლდენა ცხვირის უკანა ნაწილში ხდება, მისი შეჩერება მხოლოდ სპეციალური ტამპონის საშუალებითაა შესაძლებელი, რომელიც შიგნიდან, ანუ უკანა ხახიდან თავსდება, ეს კი მხოლოდ ექიმის პრეროგატივაა.

სასამართლოს თავმჯდომარე: მოსამართლე ვარ და ვემორჩილები პოლიციელების ბრძანებას

სახელმწიფო ბრალმდებელი, პროკურორი ზურაბ კონცელიძე ბრალდებულისთვის აღკვეთის სახით პატიმრობის გამოყენებას ითხოვდა, რადგან მან ბრალდებულის მიერ ჩადენილი ქმედება, როგორც ძალადობრივი დანაშაული, ისე შეაფასა. ბრალდების დადგენილებაში წერია, რომ 18 ოქტომბერს ბათუმში, ხიმშიაშვილის ქუჩაზე, საცხოვრებელი სახლის 17 ნომერთან, იგინებოდა ნასვამ მდგომარეობაში მყოფი ბრალდებული. შემთხვევის ადგილზე ხმაურის გამო გამოიძახეს საპატრულო პოლიცია. პოლიციელები კი ბრალდებულმა სიტყვიერად შეურაცყო და ერთ-ერთ პოლიციელს დაუზიანა ფორმა.
ძიება დაიწყო სისხლის სამართლის კოდექსის 353-ე მუხლით, რაც ითვალისწინებს ჯარიმას, მინიმუმ ორი ათასი ლარის ოდენობით ან პატიმრობას მაქსიმუმ 5 წლამდე.

ადვოკატმა ნუგზარ მგელაძემ თქვა, რომ ბრალდებული მისი სოფლიდანაა, ხულოს მუნიციპალიტეტის სოფელ ღორჯომიდან, რომ ის პირადად იცნობს მის ოჯახს და ბრალდებულს. მისივე ინფორმაციით, მისი დაცვის ქვეშ მყოფს სამართალთან კონფლიქტი არასოდეს ჰქონია:

`მეგონა, რომ პროკურატურა გირაოს შეფარდებას მოითხოვდა, მე გირაოს თანხაზე ვფიქრობდი. ბატონო მოსამართლევ, ბრალდებულის მამა ავადაა, ეს ერთადერთი ვაჟია იმ ოჯახში და მამას უვლის. მამამ არ იცის, რომ ის დაკავებულია. თუ თქვენ შეუფარდებთ მას გირაოს 2 ათასი ლარის ოდენობით, ამ თანხას ჩვენ, მისი ნაცნობები და ახლობლები შევაგროვებთ, თუ უფრო მეტის გადახდას დააკისრებთ, გთხოვთ თანხის ნახევრის გადახდის შემდეგ გაათავისუფლოთ ის პატიმრობიდან~.
პროკურორმა როცა ბრალდებულის პატიმრობაში დატოვება მოითხოვა, დაასახელა ახალი დანაშაულის ჩადენისა და მიმალვის საფრთხე. ადვოკატმა თქვა, რომ ეს გამორიცხულია:

“ის მშრომელი კაცია, სასჯელად ისიც ეყოფა, რომ მას ნასამართლობა ექნება. ის კანონმორჩილი ადამიანია და ინანიებს თავის ქმედებას”.

მოსამართლემ ბრალდებულს ჰკითხა მაისურზე სისხლის ლაქებისა და ყურზე დაზიანების შესახებ. ბრალდებულმა თქვა, რომ დაეცა და ეს დაზიანებები მაშინ მიიღო. მოსამართლემ ჰკითხა ეს დაზიანებები მიიღო მას შემდეგ, რაც მასთან პოლიციელები მივიდნენ, თუ მანამდე. ბრალდებულმა უპასუხა, რომ დაზიანებები პოლიციელების მისვლამდე მიიღო.
მოსამართლის გადაწყვეტილებით, ბრალდებული საპატიმროს მას შემდეგ დატოვებს, რაც სახელმწიფო ბუჯეტში მისი ახლობლები 2 ათას ლარს შეიტანენ. მოსამართლემ ბრალდებულს საერთო ჯამში გირაოს – 4 ათასი ლარის გადასახდელად 60 დღე მისცა.

სასამართლო პროცესის დასრულების შემდეგ მოსამართლემ თავისი გადაწყვეტილება ასე განმარტა: “არსებობს იმის საფრთხე, რომ თქვენ შეიძლება ისევ დათვრეთ და დაარღვიოთ საზოგადოებრი წესრიგი, მაგრამ თქვენ არ დაიწყეთ მანიპულაცია, როცა შეიძლებოდა ამ საქციელით სამართლებრივად თქვენ სასარგებლოდ უკეთესი შედეგი დამდგარიყო – თქვენ არ გითქვამთ, რომ გცემეს პოლიციელებმა; ბრალდებულების უმრავლესობა ასე მოიქცეოდა. თქვენ გეტყობათ, რომ გულწრფელი ხართ, ამაში ისიც მარწმუნებს, რომ თქვენს ადვოკატს დაახლოებით შვიდი წელია ვიცნობ… ვფიქრობ, ადამიანს შანსი უნდა მივცეთ, რომ გაიაზროს თავისი ქმედების შედეგი, მე სასამართლოს თავმჯდომარე, მოსამართლე ვარ და ვემორჩილები პოლიციელების ბრძანებას, მაგალითად, მაშინ, როცა საჭეს ვმართავ. ვერ ვხვდები რატომ უნდა იყოთ აგრესიულები პოლიციელების მიმართ, ისინი ხომ ჩვენ უსაფრთხოებაზე ზრუნავენ… სასამართლო დარბაზი სავსეა, აქ იმყოფებიან თქვენი ახლობლები, 30-40 ადამიანი, ყველა იმაზე დარდობდა, პატიმრობაში დაგტოვებდით თუ არა. ჭკუას არ გასწავლით, მე თქვენი მოძღვარი არ ვარ, მაგრამ თქვენი ქცევით ეს ადამიანები ცუდ მდგომარეობაში ჩააყენეთ…“

მოსამართლემ განმარტა, რომ ამ შემთხვევაში პოლიციელებს რაიმე სახის დაზიანება არ მიუღიათ, თორემ აუცილებლად გამოიყენებდა ბრალდებულის მიმართ პატიმრობას.

ქობულეთში ყაჩაღობაში ბრალდებულები დააკავეს

26 ოქტომბერს, დაახლოებით 21 საათზე, ქობულეთში გაზგასამართი სადგური დააყაჩაღეს. “ბათუმელების” ინფორმაციით, თავდამსხმელებმა გაიტაცეს სამასი ლარი, ფიზიკური დაზიანება მიაყენეს გაზგასამართი სადგურის თანამშრომლებს და შემთხვევის ადგილიდან მიიმალნენ.

27 ოქტომბერს კი, საღამოს 8 საათზე, ქობულეთის რკინიგზის სადგურში ვალუტის გადამცვლელი პუნქტი დააყაჩაღეს. ჩვენივე ინფორმაციით, თავმდამსხმელებმა ჯიხურიდან დაახლოებით 15 ათასი ლარი გაიტაცეს.

შინაგან საქმეთა სამინისტროს ცნობით, ორთავე ფაქტზე გამოძიება სისხლის სამართლის კოდექსის 179-ე მუხლით მიმდინარეობს, რაც ყაჩაღობას ნიშნავს. ბრალდებულების დაკავებასთან დაკავშირებით შსს-ს კომენტარს „ბათუმელები“ მოგვიანებით მოგაწვდით.

მიღება ბათუმში თურქეთის საკონსულოს ეგიდით

მისასალმებელი სიტყვით სტუმრებს ბათუმში თურქეთის კონსულმა იასინ თემიზქანიმ მიმართა. მისასალმებელი სიტყვით საზოგადოებას ასევე მიმართეს აჭარის მთავრობის თავმჯდომარემ, არჩილ ხაბაძემ და აჭარის უმაღლესი საბჭოს თავმჯდომარემ, ავთანდილ ბერიძემ.

თურქეთის საკონსულო ბათუმში რესპუბლიკის დღეს ყოველწლიურად აღნიშნავს.

საკონსულოს სტუმრებს შორის იყვნენ ბათუმის რუსთაველის უნივერსიტეტის თანამშრომლები, სტუდენტები, სამუფთო სამმართველოს წარმომადგენლები.

მოარგო თუ არა ბათუმის მერიამ „იაფი სახლის“ ტენდერი კონკრეტულ კომპანიას

სატენდერო დოკუმენტაციის მიხედვით, ე.წ. იაფი სახლი, რომლის მშენებლობასაც ბათუმის მერია გეგმავს, მონოლითური რკინა-ბეტონისგან უნდა იყოს დაპროექტებული:

„სატენდერო დოკუმენტაციის შედგენას საფუძვლად დაედო მსუბუქი ფოლადის თხელკედლიანი კონსტრუქციების (მფთკ) ტექნოლოგიის გამოყენება შენობა-ნაგებობების მშენებლობაში შემდეგი პრინციპით: სწრაფად, ხარისხიანად, ხელმისაწვდომ ფასებში, მაღალი სეისმომედეგობით (9 ბალი). საჭიროების შემთხვევაში შესაძლებელია ასეთი შენობის დაშლა და სხვა ადგილას გადატანა მინიმალური ხარჯებით. კონსტრუქციის საყრდენი და არასაყრდენი ელემენტების შეერთება ხდება მაღალი ხარისხის თვით საბურღი ხრახნების დახმარებით. სახლის საფუძველზე დამაგრება სრულდება ანკერული მეთოდით“, – ნათქვამია სატენდერო დოკუმენტაციაში, (სტილი დაცულია) .

კომპანია სტალდომის ვებგვერდზე WWW.STALDOM.COM – გამოქვეყნებული ინფორმაციით:

„სტალდომი – ეს ადვილად ასაწყობი სახლთმშენებლობის თანამედროვე ტექნოლოგია. მოცემული ტექნოლოგიას საფუძვლად უდევს მსუბუქი ფოლადის თხელკედლიანი კონსტრუქციების (მფთკ) გამოყენება. ამგვარი მასალებისგან აშენებული შენობები, მიეკუთვნება სწრაფ აღმართავ შენობებს (საშ). მათი განმასხვავებელი თავისებურება – ისინი შენდება პრინციპით: სწრაფად, ხარისხიანად, მისაწვდომ ფასებში. მოცემული პრინციპის გამოყენება მშენებლობაში, ამგვარი შენობის მომხმარებელს აძლევს საშუალებას იცოდეს მშენებლობის ზუსტი ღირებულება ჯერ კიდევ წინასწარი საპროექტო მომზადების ეტაპზე, მიიღოს მზადყოფნაში მიყვანილი შენობა მაქსიმალურად მოკლე ვადებში, მშენებლობის დროს არ გამოიყენოს მძიმე ტექნიკა და არ დააბინძუროს სამშენებლო მოედანი სამშენებლო მასალებით, განახორციელოს მშენებლობა პრობლემატურ ნიადაგზე, მიწისძვრის საშიშროების რაიონებში (სეისმომედეგობის 9 ბალი). საჭიროების შემთხვევაში, ამ ტექნოლოგიის მიხედვით აგებული შენობა, შეიძლება დაიშალოს და აეწყოს სხვა ადგილას მინიმალური ხარჯებით. აგრეთვე სტალდომ ტექნოლოგია განკუთვნილია შენობების რეკონსტრუქციისთვის, დამატებითი სართულების დაშენებისთვის. ეს განსაკუთრებით აქტუალურია ქალაქის ძველ უბნებში, სადაც საკმაოდ რთულია მძიმე ტექნიკის გამოყენება და ძველი შენობები არ შეიძლება “დაიტვირთოს” მძიმე მასალებით. სტალდომ სისტემა საშუალებას გვაძლევს ავაშენოთ საცხოვრებელი, კომერციული და სამრეწველო დანიშნულების შენობები“. სტილი დაცულია.

შენობის საილუსტრაციოდ კომპანია აქვეყნებს ფოტოს:

იგივე ფოტო აქვს სატენდერო დოკუმენტაციაში გამოქვეყნებული მერიის შესყიდვების სამსახურსაც.

სატენდერო დოკუმენტაციის მიხედვით, „იაფი სახლის“ გარე კედლების კარკასი – „უნდა შედგებოდეს პერფორირებული მოთუთიებული ფოლადის პროფილებისგან (თერმოპროფილი) – ჰორიზონტალური მიმმართველები, დგარები, დამხმარე ელემენტები. “ ( სტილი დაცულია.)

მერიის შესყიდვების სამსახური სატენდერო დოკუმენტაციაში განმარტავს:

„თერმოპროფილი: ა) მსუბუქი ფოლადის თხელკედლიანი კონსტრუქციები (მფთკ) – მათი საფუძველია სხვადასხვა სისქის და კონფიგურაციის ცივგრეხილი პროფილები. ასეთი კონსტრუქციების განმასხვავებელი თვისებაა თერმოპროფილების გამოყენება შემოღობვის კონსტრუქციებისათვის (კედლები, ჭერი და სხვა). თერმოპროფილი არის მოთუთიებული ფოლადის პროფილი გამჭოლი გრძივი ნაკეჭნებით, რომელიც გაჭრილია ჭადრაკისებურად. აღნიშნულის საშუალებით მნიშვნელოვნად იზრდება თბოსაიზოლაციო თვისება სითბური ნაკადის ეფექტური გავლის გზის გაზრდის ხარჯზე ანუ აღმოფხვრილია ე.წ. “სიცივის ხიდი”.“

კომპანია „სტალდომი“ თავის ვებგვერდზე განმარტავს:

„თერმოპროფილი – ეს არის მოთუთიებული ფოლადის პროფილი გამჭოლი გრძივი ნაკეჭნებით, რომელიც გაჭრილია ჭადრაკისებურად. ამის წყალობით მნიშვნელოვნად იზრდება თბოსაიზოლაციო თვისება სითბური ნაკადის ეფექტური გავლის გზის გაზრდის ხარჯზე, სხვა სიტყვებით აღმოფხვრილია ეგრეთ წოდებული “სიცივის ხიდი”. კონსტრუქციის საყრდენი და არასაყრდენი ელემენტების შეერთება ხვდება მაღალი ხარისხის თვითსაბურღი ხრახნების დახმარებით. სახლის საფუძველზე დამაგრება სრულდება ანკერული მეთოდით.

ნათქვამის საილუსტრაციოდ კომპანიას და მერიას ერთი და იგივე ფოტო აქვთ გამოყენებული.

ბათუმის მერიის მოთხოვნით შენობის საყრდენი და თვითსაყრდენი გარე კედლები უნდა იყოს:

ა) გარე შემოსვა – შესრულებული უნდა იყოს “ვენტილირებადი ფასადის” პრინციპის შესაბამისად. საჰაერო ღრიჭომ უნდა უზრუნველყოს თბოიზოლაციის ვენტილაცია (სურათზე ); ბ) ქარსაწინააღმდეგო მემბრანა – სურათზე; საცხოვრებელი სახლის მშენებლობის და მიმდებარე ტერიტორიის კეთილმოწყობის სამუშაოების შესყიდვის ელექტრონული ტენდერის სატენდერო დოკუმენტაცია 13 გ) პერფორირებული მოთუთიებული ლითონის პროფილები – დამზადებული უნდა იყოს თხელფურცლიანი ფოლადისაგან. პროფილები პანელის სიბრტყეზე ერთმანეთთან შეერთებული უნდა იყოს თვითხრახნებით. ვერტიკალური დგარები, ჰორიზონტალური პროფილები და დამაკავშირებელი ელემენტები შექმნიან შენობის (სამშენებლო ობიექტის) კარკასს – (სურათზე ); დ) ეკობამბა – ეფექტური მათბუნებელი, რომელიც ავსებს კედლის მთლიან სივ-რცეს. მათბუნებელი არ უნდა იყოს აალებადი, უნდა იყოს ეკოლოგიურად უსაფრთხო და უზრუნველყოფდეს კედლების მაღალ თერმოფიზიკურ პარამეტრებს (სურათზე ); ე) ორთქლსაწინააღმდეგო ფირი – სურათზე ; ვ) თაბაშირმუყაოს ფურცლები – გამოყენებული უნდა იქნას კედლის გარე შემოს-ვისას შიდა მხარეს – (სურათზე ); შენობის შიდა კედლები უნდა შედგებოდეს მოთუთიებული ფოლადის პროფილე- ბისაგან, რომლებიც ორივე მხრიდან გადაკრულია თაბაშირმუყაოს ფურცლებით. შიგნით კედლების მთელი სივრცე ამოვსებული უნდა იყოს ეკობამბით.

კომპანია „სტალდომის“ ინფორმაციით, შენობის საყრდენი და თვითსაყრდენი გარე კედლები, რომლებსაც ის მომხმარებელს სთავაზობს შედგება:

გარე შემოსვის, რომელიც შესრულებულია “ვენტილირებადი ფასადის” (1) პრინციპის შესაბამისად, საჰაერო ღრიჭო უზრუნველყოფს თბოიზოლაციის ვენტილაციას .ქარსაწინააღმდეგო მემბრანისაგან (2).პერფორირებული მოთუთიებული ლითონის პროფილებისაგან (3), რომლებიც დამზადებულია თხელფურცლიანი ფოლადისაგან. ეს პროფილები პანელის სიბრტყეზე ერთმანეთთან შეერთებულია თვითხრახნებით. ვერტიკალური დგარები, ჰორიზონტალური პროფილები და დამაკავშირებელი ელემენტები ქმნიან შენობის კარკასს.ეფექტური მათბუნებლისაგან – ეკობამბისაგან(4), რომელიც ავსებს კედლის მთლიან სივრცეს. მათბუნებელი არ არის აალებადი, ეკოლოგიურად უსაფრთხოა, უზრუნველყოფს კედლების მაღალ თერმოფიზიკურ პარამეტრებს .ორთქლსაწინააღმდეგო ფირისგან (5).თაბაშირმუყაოს ფურცლებისაგან (6) კედლის გარეშემოსვის შიდა მხარეს (შესაძლოა გამოიყენოს DSP, MP და სხვა მასალები).შენობის შიდა კედლები შედგება მოთუთიებული ფოლადის პროფილებისაგან, რომლებიც ორივე მხრიდან გადაკრულია თაბაშირმუყაოს ფურცლებით. შიგნით კედლების მთელი სივრცე ივსება ეკობამბით.

ფოტოები ამ შემთხვევაშიც ემთხვევა.

„იაფ სახლთან“ დაკავშირებული სატენდერო პირობები კითხვებს საკრებულოს წევრ კობა ჩხეიძეს კითხვებს უჩენს:

„მაეჭვებს ის გარემოება, რომ ბათუმის მერიამ უარი თქვა ტრადიციული ბეტონის კონსტრუქციაზე, რომელიც ყველაზე უფრო აპრობირებული და ადაპტირებულია ბათუმთან. საკრებულოს სამი სხდომის განმავლობაში დაჟინებით ვითხოვდით მერიისგან აეხსნა, თუ რა ტიპის მშენებლობაზე იყო საუბარი და პროექტის ღირებულებას რატომ არ აცხადებდნენ. მაშინ მერიის წარმომადგენლებმა თქვეს, რომ ჰქონდათ მოლაპარაკებები კომპანიებთან, რომელთა სახელებიც არ დაასახელეს. შემდეგ ითქვა, რომ პროექტს მთავრობა ჩუქნიდა ბათუმის მერიას. მე ვიცი აჭარის მთავრობის პროექტების შესახებ და ვითხოვდი ეთქვათ, რომელ პროექტზე იყო საუბარი, რადგან 61 კვადრატული ფართობის ბინები, რაც კეთდება ეკომიგრანტებისთვის, იაფი სახლის ბენეფიციარებისთვის იქნება რთულად გამოსასყიდი. ასევე მაქვს კითხვა – კრიტერიუმების მსჯელობის გარეშე, რატომ გაიტანეს პროექტი ტენდერზე? – და მესამე კითხვა რატომ ეს ტექნოლოგია, რომელიც საერთოდ არ არის ბათუმური, ქართული მშენებლობისთვის აპრობირებული? და კიდევ, რატომ თხოვენ კომპანიას 10 მილიონი ბრუნვის გამოცდილებას? – გადავამოწმე და ბათუმში არ არის კომპანია, რომელიც ამ ტიპის მასალაზე მუშობს. სავარაუდოდ, საქართველოშიც ნაკლებად მოიძებნება მსგავსი კომპანია. “

ბათუმის მერიის პრესსამსახურმა იაფი სახლის მშენებლობის სამუშაოების შესყიდვესთან დაკავშირებულ სატენდერო პირობებზე კითხვებით „იაფი სახლის“ კრიტერიუმების განსაზღვრასთან დაკავშირებით მერის მიერ შექმნილი კომისიის თავმჯდომარესთან, თამაზ თურმანიძესთან გადაგვამისამართა. თამაზ თურმანიძემ „ბათუმელებთან“ განმარტა, რომ სატენდერო პორობებზე ინფორმაციას ჯერჯერობით არ ფლობს. „ბათუმელები“ კომპანია „სტალდომსაც“ დაუკავშირდა. დირექტორის ინფორმაციით შპს „სტალდომი“ ნამდვილად გეგმავს „იაფი სახლის“ ტენდერში მონაწილეობის მიღებას.

რეესტრის მონაცემებით, კომპანია სტალდომ ელ ელ სი STALDOM LLC საქართველოში ფოთის ინდუსტრიულ ზონაში 2013 წელს დარეგისტრირდა. კომპანიის მფლობელი და დირექტორი უკრაინის მოქალაქე ივან ბერეზაა. STALDOM LLC-ის წილების 100%-ს ჩეხური კომპანია STALDOM LLC ფლობს.

როგორ შეიქმნა ბათუმური ყავის მომზადების ტრადიცია

რეცეპტი, რომლითაც ბათუმში და, ზოგადად, აჭარაში, ყავას ამზადებენ, სავარაუდოდ იმდროინდელია, როცა ბათუმი ჯერ კიდევ ოსმალეთის იმპერიის ნავსადგური იყო. ოსმალებმა, რომლებმაც მსოფლიოში პირველი ყავახანა ჯერ კიდევ მე-16 საუკუნეში გახსნეს კონსტანტინოპოლში, ყავა ბათუმშიც შემოიტანეს.

ისტორია არაფერს ამბობს იმაზე, თუ როდის გაიხსნა პირველი ყავახანა ბათუმში, მაგრამ ქალაქში რომ ყავა პოპულარული სასმელი იყო, საკამათო არ არის. ისტორიული ცნობების მიხედვით XIX-XX საუკუნეების მიჯნაზე ბათუმში უკვე ექვსი ყავახანა იყო.

1920 წლის შემოდგომაზე ბათუმში რუსი პოეტი ოსიპ მანდელშტამი ჩამოვიდა, ქალაქში გაისეირნა და თავის მოგონებებში ტიპური ბათუმური ყავახანა აღწერა:

„აქვე [ბულვარში] იწყება ზეიმი საპორტო ყავახანებისთვის, მთელი ქალაქის სული და გული რომაა: თავისი კლუბებითა და ბირჟებით. ყავახანები ნახევრადჩაბნელებულია და თამბაქოს კვამლითაა გაჟღენთილი. არომატული ყავის ორთქლი დიდხანს ტრიალებს ჰაერში. ყავახანის მოსამსახურე არაქათგამოცლილია წამდაუწუმ პატარა ყავის ფინჯნების აქეთ-იქით დატარებით…”

და კიდევ ერთი მოგონება, რომელიც 1922-1924 წლების ბათუმში ყავის კულტურას უკავშირდება, ამჯერად კონსტანტინე პაუსტოვსკის: „მინიანი კარი ყველა დუქანსა და ყავახანას მონჯღრეული ჰქონდა, ყოველ ბიძგზე დიდხანს ჟღარუნებდნენ და ზრიალებდნენ… კარის გამუდმებული ჭრიალი სპილენძის ფურცლების ზრიალს უერთდებოდა. ამ ფურცლებიდან მეთუნუქეები პატარა თურქულ ყავადნებს კერავდნენ და ზედ სპილენძისავ გრძელ სახელურებს უკეთებდნენ…

…ნავსადგურში, ჭილოფგადაფარებულ ფორთოხლებზე მოხუცები ისხდნენ და ენის წლაკუნით სვამდნენ სქელ, სურნელოვან ყავას. ყავის სუნი ასდიოდა სანაპიროზე წვრილ კენჭებსაც… დიახ, ბათუმის ნავსადგური გაჟღენთილი იყო მანდარინის, ყავისა და ნავთის სუნით.”

დილის ყავა იალაღზე. მანანა ქველიაშვილის ფოტო

საბჭოთა ბათუმში ყავა აღარ იყო ჩვეულებრივი ამბავი, გარკვეულ პერიოდებში ლამის კონტრაბანდადაც კი მიიჩნეოდა და ყავის მარცვალს ას-ასი გრამობით ყიდულობდნენ ყავის მოყვარულები გადამყიდველებისგან. მიუხედავად ამისა, ბათუმში ყავა ვერასდროს ვერ ჩაანაცვლა საბჭოთა კავშირში ყველაზე ხელმისაწვდომმა არაალკოჰოლურმა სასმელმა – ჩაიმ.

თითქმის ყველა ბათუმელის სახლში დღემდე ნახავთ ვერცხლისფერ ყავის წისქვილს. ბათუმელები ყავის მარცვლებს დაბალ ცეცხლზე ხალავდნენ მუქი ფერისა და არომატის მიღებამდე, შემდეგ კი გაგრილებულ მარცვლებს პატარა ყავის წისქვილში ფქვავდნენ ხელით და მინის ქილაში ინახავდნენ. მიიჩნეოდა, რომ დაქფული ყავა დიდხანს არ უნდა შეგენახა, ასე ყავა ინესტებოდა და არომატს კარგავდა.

დღეს ბათუმში ყავას იშვიათად ფქვავენ სახლში. ყავის წისქვილები დავიწყებას მას შემდეგ მიეცა, რაც პოსტსაბჭოთა პერიოდში მაღაზიის დახლებზე დაფქული, დაფასოებული ყავა გამოჩნდა. თუმცა ყავის მოყვარულები ერთხმად თანხმდებიან – ახალდაფქულ ყავასთან დაფასოებული ყავის გემო ახლოსაც ვერ მივა.

რა არის კარგი ბათუმური ყავის მომზადების საიდუმლო? – ის ბათუმელები, რომლებიც კარგი ყავის მომზადების ნიუანსებს იცნობენ, ამბობენ, რომ მთავარია ყავის მარცვალი ახალდაფქული იყოს და ყავის ხარშვის ტემპერატურა – რაც უფრო დაბალ ცეცხლზე მზადდება ყავა, მით უფრო გემრიელია.

ბათუმში ყავა მომზადების კიდევ ერთ წესს უკავშირდება. ქვიშაზე მოხარშული ყავა საუკეთესოდ ითვლებოდა ბათუმში. ასეთ ყავას საბჭოთა ბათუმში ყველაზე კარგად სანაპიროზე ამზადებდა ქალი, რომელსაც ჰაიკუშა ერქვა და უკლებლივ ყველა ბათუმელს ჰქონდა მისი სახელი გაგონილი მაინც.

ბათუმურ ყავას ხშირად თურქულს უწოდებენ საქართველოში. ამ შემთხვევაში „თურქული” ყავის მომზადების წესს აღნიშნავს, თუმცა, თუ თურქეთში ერთხელ მაინც გაგისინჯავთ ყავა, დარწმუნდებით, რომ ეს სხვა გემოა. ამას ის თურქებიც აღნიშნავენ, რომელთაც ბათუმური ყავა გაუსინჯავთ. „ასეთ ყავას არ ამზადებენ ჩვენთან, ეს ალბათ არაბული ყავაა“, – ასეთ მოსაზრებასაც მოისმენთ მათგან, თუმცა ბათუმური ყავა არც არაბულ ყავას ჰგავს, რომლის მოხარშვის მეთოდიც განსხვავებულია.

მოხარშვის მეთოდი იდენტურია, თუმცა ყავის გემო სხვაა საბერძნეთშიც, სადაც ყავა ასევე პოპულარული სასმელია. საბერძნეთში ყავასთან ერთად მოგართმევენ რაჰათ-ლუკუმს და ერთ ჭიქა ცივ წყალს. ბერძნები ამბობენ, რომ ცივი წყალი ყავის გემოს უსვამს ხაზს.

ბათუმში წყალს იშვიათად – მაგრამ თხილს და შოკოლადს კი ხშირად ატანენ ყავას. მიღებულია ნამცხვრისა და ხილის სერვირებაც ყავასთან ერთად, თუმცა ეს მაინც გემოვნების საკითხია.

არქეოლოგი და ნეოგრეცისტი ნინო ძნელაძე ამბობს, რომ ყველაზე უცნაური, რასაც ყავას არც თუ ისე იშვიათად ატანს, შავი პური და სერველატია. ნინო ბათუმის არქეოლოგიურ მუზეუმში მუშაობს, სადაც ყოველი დღე, ისევე როგორც ბათუმში არსებული დაწესებულებების უმეტესობაში, ყავის რიტუალით იწყება: „ეს დაუწერელი კანონია, ერთი ფინჯანი ბათუმური ყავა დილით. დილის ყავას ხუმრობით „სხდომას“ ვეძახით, რომელსაც თითქმის ყველა თანამშრომელი „ესწრება“. რამდენიმე წუთში იგეგმება დღე“.

ნინო იხსენებს, რომ პირველად ყავა ჯერ კიდევ სკოლაში შესვლამდე გასინჯა:

„ჩემი, პატარა ფინჯანი მქონდა. ეს არ იყო რძიანი ან გაზავებული ყავა. ჩვეულებრივი, ბათუმური ყავა იყო, რომელსაც სიამოვნებით მივირთმევდი. იქიდან მოყოლებული ყავა ყოველდღიური ცხოვრების ნაწილია ჩემთვის.

მახსოვს, ერთი პერიოდი ყავის დეფიციტი იყო ბათუმში და გამოჩნდა დაფასოებული, მწვანე ფერის ყავის მარცვალი, რომელსაც დედა კარგად ხალავდა და ისე ფქვავდა. მახსოვს ყავის ძლიერი, სასიამოვნო არომატი ბათუმის საკათედრო ტაძრის ახლოს მდებარე ქუჩაზე, სადაც ყავას ფქვავდნენ პატარა საამქროში. ეს საამქრო შემდეგ გაუქმდა, მაგრამ ამ ადგილას ყავის სუნი კიდევ დიდხანს იდგა.”

ბათუმური ყავა უკვე დიდი ხანია გასცდა ბათუმის საზღვრებს და საქართველოში დღეს ამ მეთოდით ყველგან ამზადებენ ყავას, თუმცა განსაკუთრებით პოპულარული ეს სასმელი მაინც აჭარაშია.

დღეს, აჭარაში, სადაც არ უნდა მიხვიდეთ სტუმრად, ბათუმში, მაღალმთიან სოფლებში თუ სულაც იალაღებზე, სადაც ზაფხულობით საქონელს მწყემსავენ, ფინჯან ყავას ყველგან შემოგთავაზებენ. ეს დაუწერელი წესია – ყავა კეთილგანწყობის, პატივისცემის, შენთან საუბრის სურვილის ნიშანია.

შავი, სურნელოვანი ყავით სავსე პატარა ფინჯანთან საათობით შეიძლება საუბარი, შენი თუ მეზობლის ამბების მოყოლა, საიდუმლოებების გამხელა თუ სერიალისთვის თვალყურის დევნება.

თუ ადრე ყავას როგორც ბათუმში, ისე მაღალმთიან სოფლებში ქალები უფრო ეტანებოდნენ, სიტუაცია ახლა შეიცვალა, ყავაზე კაცებიც იშვიათად ამბობენ უარს.

ჩირუხი. იალაღებზე მყოფი ქალი მოგზაურებს ყავით უმასპინძლდება. მანანა ქველიაშვილის ფოტო

ინდირა თებიძე ქედის მუნიციპალიტეტში, სოფელ აგარაში ცხოვრობს. მისი ყოველი დილა, ისევე როგორც ათასობით ადამიანისთვის აჭარაში, ერთი ფინჯანი ბათუმური ყავით იწყება. ჩვეულებრივ, ჯერ ყავა – შემდეგ საუზმე.

ინდირა ამბობს, რომ მის მიერ მომზადებული ყავის რეცეპტი კლასიკურია: ერთი ჩაის კოვზი ყავა + ერთი ჩაის კოვზი შაქარი. ყავა არ უნდა იყოს ძალიან ტკბილი. ინდირა ამბობს, რომ ყავას გაზზე ან „ფეჩზე“ ხარშავს.

„ფეჩზე“ მოხარშული ყავის რეცეპტის მთავარი უპირატესობა ის არის, რომ ყავა და შაქარი წყალთან ერთად თავსდება პირდაპირ შეშის „ფეჩზე“ ფინჯნით. ხარშვის პროცესი უფრო ხანგრძლივია და სწორედ ეს არის „ფეჩზე“ მოხარშული ყავის გემოს საიდუმლო – ყავა ნაკლებად ქაფიანი, თუმცა უფრო არომატული გამოდის.

აჭარის სოფლებში ხშირად ნახავთ განჯინაში საგანგებოდ „ფეჩზე“ მოსახარში ყავისთვის განკუთვნილ „საშინაო“ ფინჯნებს, რომელთაც „ფეჩზე“ ხშირი დგომის გამო ძირი აქვთ გამომწვარი. სწორედ ასე, ფინჯნებში იხარშება ყველაზე გემრიელი ყავა.

ხოლო თუ მასპინძელს მდიდარი ფანტაზიაც აქვს, ყავის ფინჯნის მარჯვენა ხელით, საპირისპირო მიმართულებით გადატრიალებას შემოგთავაზებთ და ყავის ნალექზეც გიმკითხავებთ: მოსალოდნელ გზებზე, ფინჯანში გამოსახულ ბეჭდებსა და იმ ადამიანებზე, რომელთა სახელი „ა“-ზე, „ბ“-ზე ან „გ“-ზე იწყება.

ყავა ფეჩზე. სოფელი ზედა ვაშლოვანი. მანანა ქველიაშვილის ფოტო

ვისთვის არის მიუღებელი ტერმინები: ლიბერალიზმი და გენდერი

„საპატრიარქო საკუთარი ინტერესებიდან და შეხედულებებიდან გამომდინარე, ისევე როგორც ნებისმიერი ინსტიტუცია, უფლებამოსილია ჩაერიოს განათლების სისტემაში ისევე, როგორც სხვა ინტერესთა ჯგუფები. მეორე საკითხია, განათლებისა და მეცნიერების სამინისტრო როგორ ამყარებს ურთიერთობებს სხვადასხვა ჯგუფთან, როგორ ახერხებს გაუძლოს მათ ზეწოლას და გაატაროს ის პოლიტიკა, რაც მას მიაჩნია მიზანშეწონილად პროფესიული თვალსაზრისით“, – ამბობს სამოქალაქო ინტეგრაციისა და ეროვნებათაშორის ურთიერთობის ცენტრის დირექტორი შალვა ტაბატაძე.

მისი აზრით, მთავარი პრობლემა სწორედ ამ ურთიერთობისას იჩენს თავს: „ჩემი ორგანიზაცია წლებია მუშაობს განათლების საკითხებზე, მაგრამ ამ სახელმძღვანელოს სასწავლო გეგმის შემუშავების პროცესში ჩვენ არ ჩავერთეთ, იმ მარტივი მიზეზის გამო, რომ სამინისტრო პროფესიული ინტერესებიდან გამომდინარე რეკომენდაციებზე არასდროს რეაგირებს. სამაგიეროდ, რეაგირებს საპატრიარქოსა და ბიზნესმენ ლევან ვასაძის რეკომენდაციებზე. სამინისტრო აღმოჩნდა სუსტი საპატრიარქოსთან ურთიერთობის თვალსაზრისით. ამ სისუსტის დასაბალანსებლად ის შეეცადა არასამთავრობო და საერთაშორისო ორგანიზაციების გამოყენებას. ნაცვლად იმისა, რომ სამინისტროს პროფესიული ურთიერთობა აეგო საპატრიარქოსთან და დაერწმუნებინა ის მისი პოზიციის სიმყარეში, უსიტყვოდ მიიღო მისი შენიშვნები“.

შალვა ტაბატაძის თქმით, სამინისტრომ საპატრიარქოს ზეწოლით შეცვალა სასწავლო გეგმის სკოლებში შეტანის ვადებიც – „მე და საზოგადოებას“ სწავლება სკოლებში სექტემბრიდან უნდა დანერგილიყო.

შალვა ტაბატაძის აზრით, სასწავლო გეგმაში „ლიბერალიზმი“ და „დემოკრატიული ღირებულებების“ ჩაწერა ან არჩაწერა პრინციპულ პრობლემას არ ქმნის, რადგან ამ ღირებულებების გატარებას ისედაც ითვალისწინებს ზოგადი განათლების ეროვნული მიზნები, სადაც ეს ღირებულებები ჩამოყალიბებულია და განათლების სისტემის ქვაკუთხედს წარმოადგენს.

„პრობლემა გაჩნდება მაშინ, თუ სამინისტრო ამ ტერმინების ამოღებასთან ერთად გადაუხვევს განათლების საერთო პოლიტიკიდან. სასწავლო გეგმა მასწავლებლებისთვისაა და არა მოსწავლეებისთვის, ამიტომ მათ უნდა იცოდნენ ამ ღირებულებების შესახებ და არ მოახდინონ მისი იგნონირება“, – ამბობს რესპონდენტი.

საპატრიარქოს განმარტებაში წერია, რომ „ლიბერალიზმი“ და „დემოკრატიული ღირებულებები“ მოზარდების პოლიტიკურ ინდოქტრინაციას მოახდენს. მაშინ, როცა თემა – „რისი მჯერა და რისი მწამს“, ჩაანაცვლა ტერმინმა – „რელიგია“.

შალვა ტაბატაძის აზრით, „რელიგია და რწმენა“ არის სასწავლო გეგმის შემადგენელი ნაწილი, რადგან ის ჩვენი ცხოვრების ნაწილიცაა, მაგრამ პრობლემას წარმოადგენს არა რელიგიის სწავლება, არამედ სწორედ რელიგიური ინდოქტრინაცია, რომელიც, მისი აზრით, ძალიან თვალშისაცემია დღევანდელ სკოლებში.

„სამინისტრო მიიჩნევს, რომ მას სკოლებში ინდოქტრინაციის პრობლემა არ აქვს. პრობლემა არის ეს, რადგან სანამ სამინისტრო არ აღიარებს, რომ ინდოქტრინაცია და რელიგიური დისკრიმინაცია დღეს სისტემური პრობლემაა, არაფერი შეიცვლება. ეს დამოკიდებულება უნდა შეიცვალოს და ამის საწინააღმდეგო ნაბიჯები გადადგას სკოლამ“, – ამბობს შოთა ტაბატაძე. მისი აზრით, ლიბერალური ფასეულობების განვითარება ნიშნავს, რომ მოსწავლეს განუვითარო მრავალმხრივი ხედვა.

„სკოლის კულტურა, მისი ღირებულებები იმისკენ კი არ უნდა იყოს მიმართული, რომ ვიღაც „მართებულ რელიგიაზე“ მოაქციოს და ამაში ხედავდეს თავის თავს, არამედ იმაში, რომ სკოლამ გაითავისოს განათლების ეროვნული მიზნები, რომელიც ლიბერალურ ღირებულებებს ეფუძნება“.

რაც შეეხება გენდერული იდენტობის სწავლების საკითხს, შალვა ტაბატაძე მიიჩნევს, რომ ნებისმიერი საკითხის სწავლება და ინფორმირება ხელს უწყობს სწორი შეხედულებების ჩამოყალიბებას, რადგან რაც უფრო ნაკლებად არის ინფორმირებული მოსწავლე, მით უფრო ადვილია მასზე ზეგავლენის მოხდენა და პირიქით.

„განათლებული ადამიანი ნიშნავს მეტ ღიაობას, მეტ თავისუფლებას და ნაკლებ ფობიებს. განათლებულ საზოგადოებაში პრობლემას ხედავენ ის ჯგუფები, რომლებიც ცდილობენ, რომ მართონ საზოგადოება. ბუნებრივია, ასეთი რელიგიური თუ პოლიტიკური ჯგუფები განათლებულ საზოგადოებაში კონკურენტული ვეღარ იქნებიან“.

შალვა ტაბატაძის აზრით, იმ ორგანიზაციებმა, რომლებიც აღნიშნული სახელმძღვანელოს სასწავლო გეგმის შემუშავებაში იყვნენ ჩართულები, რეაგირება უნდა მოახდინონ განათლების სამინისტროს გადაწყვეტილებაზე და ხმამაღლა ისაუბრონ მის სისუსტეებზე.

საპატრიარქოს განათლების ცენტრის წარმომადგენლები აცხადებენ, რომ ტერმინები – „ლიბერალიზმი“ და „დემოკრატიული ღირებულებები“ სამინისტრომ მათი რეკომენდაციით ამოიღო სასწავლო გეგმიდან. სამინისტროში კი გვეუბნებიან, რომ „მე და საზოგადოებას“ სტანდარტის განხილვა გრძელდება და პროცესს მთლიანად სამინისტროს ეროვნული სასწავლო გეგმის დეპარტამენტი წარმართავს.

„საჯარო განხილვებსა და აქტიურ სამუშაო პროცესში ჩართულია ასევე ყველა დაინტერესებული პირი. სტანდარტი ჯერ დასრულებული არ არის, ამიტომ მის საბოლოო სახეზე ვინმეს მხრიდან საჯარო საუბარი, ამ ეტაპზე, მიზანშეწონილად არ მიგვაჩნია“, – განაცხადეს სამინისტროში.

საპატრიარქოს განცხადებით, სასწავლო გეგმა III-IV-კლასელების მიერ გაკვეთილზე სხვადასხვა სიტუაციის წარმოსახვას გულისხმობს, რაც ოჯახურ და რელიგიურ ფასეულობებს უარყოფით კონტექსტში წარმოაჩენს. მაგალითისთვის მოყვანილია ოჯახური კონფლიქტი, რომლის შესახებაც მოსწავლემ თანატოლების თანდასწრებით უნდა ისაუბროს.

განათლების სამინისტროს დოკუმენტში წერია, რომ „მე და საზოგადოებას“ სასწავლო გეგმის განხილვის პროცესში გაეროს მოსახლეობის ფონდი, გაეროს ქალთა ფონდი, ასოციაციების წარმომადგენლები, PH intarnationali და მოწვეული ექსპერტები არიან ჩართულნი.

ნამდვილად ამოიღო თუ არა ეს ტერმინები საბოლოოდ სამინისტრომ სასწავლო გეგმიდან? ამ კითხვით „ბათუმელებმა“ გაეროს ქალთა ფონდისა და PH ინტერნატიონალ-ის წარმომადგენლებს მიმართა. მათ განაცხადეს, რომ ამის თაობაზე ინფორმაციას არ ფლობენ.

სახელოვნებო ფესტივალი ბათუმში

პროექტის მასპინძელია ზ. ფალიაშვილის სახელობის სამუსიკო სკოლა-თერთმეტწლედის დიდი და მცირე საკონცერტო დარბაზი.

ნორჩი მხატვრების გამოფენა / ფესტივალის საზეიმო გახსნა დღეს 29 ოქტომბერს 17 საათზეა დაგეგმილი, მცირე დარბაზში. ლაურეატების კონცერტი ბათუმის სახელმწიფო მუსიკალური ცენტრის სიმფონიურ ორკესტრთან ერთად , ასევე, დღეს გაიმართება 18 საათზე, სამუსიკო სკოლის დიდ დარბაზში.

მასტერკლასი მხატვრებისთვის დაგეგმილია ხვალ, 30 ოქტომბერს, 16 საათზე, ბათუმის არქეოლოგიური მუზეუმის კერამიკულ სახელოსნოში. გალაკონცერტი ინდივიდუალური სოლოპროგრამით კი ხვალ, 18 საათზე გაიმართება.

ლაურეატების კონცერტი ბათუმის სახელმწიფო მუსიკალური ცენტრის სიმფონიურ ორკესტრთან ერთად გაიმართება შაბათს, 31 ოქტომბერს, 18 საათზე, დიდ დარბაზში.

კონცერტებს სიმფონიურ ორკესტრთან ერთად დირიჟორობს შოთა რუსთაველის პრემიის ლაურეატი, თბილისის ზ. ფალიაშვილის სახელობის საოპერო თეატრის დირიჟორი, ბათუმის სახელმწიფო მუსიკალური ცენტრის სიმფონიური ორკესტრის მთავარი დირიჟორი დავით მუქერია.

პროექტში ჩართულნი არიან თბილისის ვანო სარაჯიშვილის სახელობის სახელმწიფო კონსერვატორიის პროფესორი, საერთაშორისო კონკურსების ლაურეატი, მარგარიტა ლონგის სახელობის პიანისტთა საერთაშორისო კონკურსის გრან-პრის მფლობელი, საქართველოს დამსახურებული არტისტი, პიანისტი ნინო ქათამაძე და ბათუმის არტ-სტუდია „ანდამატის“ ხელმძღვანელი, ხელოვნებათმცოდნე ლია კასპელაშვილი.

საფესტივალო კვირეულში მონაწილეობენ: თბილისის, ბათუმის, ქუთაისის, ბორჯომის, გორის, ზესტაფონის, ჩხოროწყუს, ახალქალაქის, ზუგდიდის სამუსიკო, სამხატვრო და სახელოვნებო სკოლები და სასწავლებლები, ასევე მოწვეული მუსიკოსი იტალიიდან, პროფესიონალთა მე-5 ასაკობრივ კატეგორიაში – მაია მურადაშვილი, რომელმაც 2015 წლის მარმარისის საერთაშორისო კონკურსზე მე-2 საპრიზო ადგილი მოიპოვა.

ტერნოპოლის ექიმთა დელეგაციის ვიზიტი აჭარაში

დელეგაციის შემადგენლობაში არიან: ქალაქ ტერნოპოლის რეგიონული ფსიქონევროლოგიური საავადმყოფოს მთავარი ექიმი ვლადიმერ შკრობოტი, ბავშვთა რეგიონული კლინიკური საავადმყოფოს მთავარი ექიმი გრიგორი კორიცკი და ხანდაზმულთა რეგიონული მუნიციპალური ინტერნატის დირექტორი სტეფანე გლუშკო.

შეხვედრას ესწრებოდნენ მინისტრის მოადგილე ზურაბ თენიეშვილი, აჭარის საზოგადოებრივი ჯანდაცვის ცენტრის ხელმძღვანელი კობა ნაკაიძე და აჭარის ექიმთა გაერთიანებული საზოგადოების თავმჯდომარე რამაზ სურმანიძე.

ტერნოპოლელი ექიმების აჭარაში ვიზიტი გამოცდილების გაზიარებას და სამომავლო თანამშრომლობის გაღრმავებას ითვალისწინებს. შეხვედრაზე მინისტრმა სტუმრებს რეგიონის ჯანდაცვის სისტემა და სამინისტროს პრიორიტეტები გააცნო.

უკრაინელი მედიკოსები აჭარაში 4 დღეს დარჩებიან, ამ ხნის განმავლობაში გაეცნობიან ბათუმის დედათა და ბავშვთა ჯანმრთელობის დაცვის რეგიონული ცენტრის საქმიანობას, ეწვევიან რესპუბლიკურ ფსიქონევროლოგიურ კლინიკურ საავადმყოფოს, ქედის სამედიცინო ცენტრს, აჭარის ონკოლოგიის ცენტრს და წმინდა ეკატერინეს სახელობის სათნოების სავანეს.

ხელვაჩაურის მაჟორიტარი: მურმან დუმბაძის წინააღმდეგ ხმას ვერ მივცემდი

ბატონო როსტომ, რა ინტენსივობით ხვდებით ამომრჩეველს და ბოლოს როდის შეხვდით?
ბიუროში ორშაბათობით მაქვს მოსახლეობასთან შეხვედრა. გარდა ამისა, მე თვითონ ვარ სოფლელი, ვცხოვრობ სოფელ ორთაბათუმში და ჩემი ცხოვრების მეტი წილი – 30 წელი ხელვაჩაურში ვმუშაობდი სხვადასხვა თანამდებობაზე. აქედან გამომდინარე, რაიონს ვიცნობ. ჩემი ამომრჩეველთან კონტაქტი მარტო განცხადების შემოსვლით არ შემოიფარგლება, რადგანაც დეპუტატი გქვია, ადამიანი ეცდება შენთან მოვიდეს, სულ ხალხთან ურთიერთობაში ვარ. მე სხვაგან არ ვცხოვრობ, რომ ხალხთან შეხება არ მქონდეს, მათთან ერთად ვცხოვრობ.
რა ინფორმაცია გაქვთ თქვენი ამომრჩევლისგან, როგორ მუშაობს ხელვაჩაურის მუნიციპალიტეტის გამგეობა, ხალხი კმაყოფილია?

დალხენილი ცხოვრება არ გვაქვს, მაგრამ მთელი რიგი სამუშაოები ჩატარდა მუნიციპალიტეტში, მე ვიტყოდი წარმატებით. სოფლის პროგრამა მუშაობს. მოსახლეობასთან შეხვედრებისა და ჩემთან მომსვლელების მოსმენისას ჩანს, რომ ყველაზე მტკივნეული მიწის რეფომასთან დაკავშირებული საკითხებია. ამ მიმართულებით სირთულეები გვაქვს. ამასწინათ გახლდით აჭარის მთავრობის თავმჯდომარესთან, არ ვიცი ზუსტად რა ფორმით, მაგრამ ამ წელში აუცილებლად დავიწყებთ მიწების დანაწილებას, რადგან მიწას პატრონი სჭირდება. წინააღმდეგ შემთხვევაში ის პლანტაციები, რომლებიც საბჭოთა მეურნეობებს ეკუთვნოდა, ფაქტობრივად, გატყევდა. ეს საკითხები, ბუნებრივია, მუნიციპალიტეტის დონეზე ვერ გადაწყდება. ბატონი არჩილი შეგვპირდა და დარწმუნებული ვარ ყველაფერს გააკეთებს, რომ ჩატარდეს რეფორმა და მიწები გაუნაწილონ მოსახლეობას. ამისათვის ჯერ უნდა აღვწეროთ რა ფართობები გვაქვს.

უმაღლესი საბჭოს კანონპროექტი მიწების შესახებ პარლამენტში სახეცვლილი უნდა დაბრუნებულიყო. რომელ უწყებაშია ახლა ეს კანონპროექტი?
ის კანონპროექტი დაიბლოკა და მიმდინარეობს მისი ჩასწორება. ეს საკითხი თუ არ მოგვარდება, პრობლემები გვექნება, რადგან ხალხისთვის მიწა აუცილებელია. რაც შეეხება გამგეობასა და საკრებულოს _ წარმატებულად მუშაობენ. ჩვენი ხელისუფლების პირობებში, 2013-2014 წლებში ხელვაჩაურში 75 კილომეტრამდე გზა გაკეთდა, ამ დღეებში კიდევ 30 კილომეტრი გზის რეაბილიტაცია უნდა დასრულდეს. გარემონტდა ოთხი ბაღი და ჯერ კიდევ მიმდინარეობს სამუშაოები რვა ბაღში. აშენდა ორი ახალი ბაღი და კიდევ ხუთი ამ წლის ბოლომდე უნდა დასრულდეს. ბაღის მშენებლობა იგეგმება სოფელ მახოშიც. ხალხისთვის მტკივნეულია გაზიფიცირების თემაც. “სოკარისგან” გვაქვს პირობა, რომ ამ წელში 2700 აბონენტი უნდა ჩართონ სისტემაში, მაგრამ არ ვიცი რამდენად მოხერხდება. ეს მნიშვნელოვანი საკითხია, რამდენ ოჯახსაც გაზი ექნება, იმდენი ხე გადარჩება. რა არის მთავარი საკითხები სოფელში? – დენი, გაზი, წყალი. პროექტი მზად არის უკვე და მომავალი წლიდან იგეგმება მტირალას ძირიდან წყლის გამოყვანა – რამდენიმე სოფელს წყლის პრობლემა მოეხსნება. ჩვენი ხელისუფლებაში მოსვლიდან დღემდე 5 მილიონის სამუშაოები ჩატარდა, გაკეთდა და გარემონტდა სათავო ნაგებობები, მაგისტრალები და ასე შემდეგ.

რამდენად ხარისხიანად ტარდება ეს სამუშაოები, ამაზე გაქვთ ინფორმაცია?
ამაში მოსახლეობაცაა ჩართული, როცა კაცი თავის გზაზე მუშაობს, ეცდება ის როგორმე ნორმალურად გაკეთდეს. რაც შეეხება ბაღებს, არ იქნება წესიერად აშენებული, არ ჩაბარდება.
ინფრასტრუქტურული პროექტები ჩამოთვალეთ, მაგრამ მაინც გკითხავთ, რაც ხელვაჩაურის მაჟორიტარი ხართ, ყველაზე მნიშვნელოვანი რა გაკეთდა ამ მუნიციპალიტეტში ამომრჩევლისთვის, რას გამოარჩევდით?

გზებსა და წყალს დავასახელებდი, რადგან გაზიფიკაციის პრობლემაზე მუშაობა ახლა იწყება. ამ წელს თუ 2400 აბონენტი გაზს მიიღებს, ეს უკვე კარგია. საკეთებელი სულ იქნება. ვცხოვრობთ და ცხოვრებას ახლავს პრობლემები. სალიბაურის სკოლაც ერთ-ერთი დიდი საქმეა.

რაც შეეხება ბიუჯეტის ხარჯვის კონტროლს, გაქვთ ინფრომაცია როგორ იხარჯება თქვენი ამომრჩევლის ფული?
ბიუჯეტი სწორად იხარჯება. ტენდერის თემა ისეთი თემაა, რომ ამ საკითხში ჩახედული ვერ ვარ. მგონია, შეუძლებელია ტენდერის შემთხვევაში რამე არასწორად გაკეთდეს. ეს ყველაფერი კონტროლს ექვემდებარება.
ძირითადად რა საკითხებზე მოგმართავთ ამომრჩეველი?
როგორც გითხარით, ძირითადად, მიწის საკითხები აინტერესებთ. ზოგს მონაცვლეობა სჭირდება, დაემეწყრა ოჯახი და ამას ვერ აგვარებს, რადგან კანონი არ იძლევა ამის საშუალებას, ან მოქალაქე სარგებლობს ნაკვეთს და არ აქვს კანონიერ მფლობელობაში.
გასულ კვირას მოსახლეობა მაჭახლის ხეობაში, მდინარე მაჭახელაზე ჰესების შესაძლო მშენებლობის დაწყებას აპროტესტებდა. მიმდინარე პროექტსაც მდინარე ჭოროხზე ბევრი გაუგებრობა და მოსახლეობის მხრიდან უკმაყოფილება მოჰყვა. იქ მათი უფლებების დაცვა თქვენს მოვალეობებში შედის?

დაპირისპირება უკავშირდება იმას, რომ გლეხს მიწა ფაქტობრივ საკუთრებაში ჰქონდა, მაგრამ ძველი მეპატრონე შეიძლება ყოფილიყო სხვა გვარის კაცი, ამან გამოიწვია დაპირისპირება. იყო შემთხვევები, როცა მდინარეში მოქცეულ ფართობზე ითხოვდნენ კომპენსაციას, მოსახლეობა რაღაც ნაწილში მართალია, რაღაც ნაწილში კი გასარკვევია რა ხდება.
ხელვაჩაურში საუბრობენ, რომ საპარლამენტო საქმიანობის დასაწყისში გამგებლის კაბინეტში ხშირად გხედავდნენ და თითქოს საკადრო პოლიტიკაში ჩაერიეთ მას, რომელმაც თქვენი ბევრი ნათესავი დაასაქმა…

ერთი ფაქტი დამისახელონ, როცა მე მივიღე გადაწყვეტილება.

ითქვა, რომ თქვენი გავლენები შესუსტდა მას შემდეგ, რაც მურმან დუმბაძის ვიცე-სპიკერობიდან გადაყენებას მხარი არ დაუჭირეთ. ამის გამო საყვედური მიიღეთ პარტიიდან?

არავისგან საყვედური არ მიმიღია. კაცი ვარ და ასე უნდა გამეკეთებინა, როგორც მე ჩავთვალე, მართალი როგორც იყო. მურმან დუმბაძეს ვიცნობ მე როგორც კარგ ქართველს და აქედან გამომდინარე მე მის წინააღმდეგ ხმას ვერ მივცემდი. მასთან ვმეგობრობ, ვახლობლობ და მეგობრობა მე ასე მესმის.
ერთმნიშვნელოვნად შემიძლია გითხრათ, რომ მურმან დუმბაძის ხელდასმით გახდა ეს ხალხი უმაღლესი საბჭოს წევრი. იმ პერიოდში მურმან დუმბაძე მათთვის ავტორიტეტი იყო, მას უსმენდნენ, საარჩევნო სიებში მოხვდნენ და მოვიდნენ უმაღლეს საბჭოში. თუ შეიძლებოდა შემდეგ შერიგება, რატომ არ შეიძლებოდა მურმან დუმბაძესთან ერთად შერიგებულიყვნენ? _ როცა მურმან დუმბაძე გაირიცხა პარტიიდან, მეორე დღესვე ყველა შეურიგდა ერთმანეთს, ძმები და მეგობრები გახდნენ. ახლა ყველა მართალი დარჩა და მურმან დუმბაძე გამოიყვანეს მტყუანი. ადამიანი უნდა იყო მართალი შენს ქცევებში, ამას როგორც ერთი მოქალაქე გეუბნებით და არა როგორც დეპუტატი.
რაც შეეხება საკანონმდებლო საქმიანობას პარლამენტში, რა კანონპროექტებზე მოგიწიათ მუშაობა?
ჩემი ინიცირებით პარლამენტში კანონპროექტი არ ყოფილა, მაგრამ აქტიურად ვიმუშავე კანონზე კოოპერაციის შესახებ, ასევე მთის კანონზე.
თვითონ როგორ შეაფასებდით თქვენს მუშაობას, მიიღებთ იმდენ ხმას, რომ კვლავ გახდეთ დეპუტატი?

ეს ხალხის გადასაწყვეტია, მე მწამს ერთი რამის, რომ წინ უნდა ვიხედებოდეთ და უკეთესი გვჭირდება. როსტომ ხალვაშზე უკეთესი იქნება, უკეთესი უნდა მოვიდეს. თუმცა მე ვერ ვიტყვი, რომ ცუდად ვარ ჩემს ამომრჩეველთან.

მოსამართლე 4 თევზის დამჭერზე: ”ვფიქრობ, გამამტყუნებელი განაჩენი გამოვა”

მოსამართლემ სასამართლო პროცესის დაწყებისას ბრალდებულის ვინაობა დაადგინა, შემდეგ კი ბრალი განუმარტა: სასამართლოს გადაწყვეტილების აღუსრულებლობა, მანქანის მართვა, მიუხედავად იმისა, რომ ეს აკრძალულია… მოსამართლე თეიმურაზ ქათამაძეს პროკურორმა შეაწყვეტინა და მიუთითა, რომ ბრალი სისხლის სამართლის კოდექსის მე-300 მუხლით მიმდინარეობს, რაც უკანონო თევზჭერას ნიშნავს. მოსამართლემ ამის შემდეგ კოდექსი გადაშალა და ბრალდებულს განუმარტა, თუ რას ითვალისწინებდა ეს მუხლი – მაქსიმუმ სამ წლამდე პატიმრობას, ჯარიმას ან საზოგადოებისთვის სასარგებლო შრომას.
გამოძიების ვერსიით, ბრალდებულმა 2 კილოგრამი და 300 გრამი თევზი ჭოროხზე ე.წ. ეკრანბადით დაიჭირა, რითაც სახელმწიფო 47 ლარითა და 15 თეთრით აზარალა. ბრალდებულს მოსამართლემ აღკვეთის სახით გირაოს – ორი ათასი ლარის გადახდა დააკისრა და პატიმრობიდან გაათავისუფლა.

ბრალდებული ამ თანხას ვერ იხდის, რადგან ის არ მუშაობს, მის ოჯახს კი ამის შესაძლებლობა არ აქვს, ამიტომ, სავარაუდოდო, მას ისევ დააკავებენ.
როგორც სასამართლო პროცესზე საიას ადვოკატმა, პაატა დიასამიძემ განმარტა, ბრალდებულის დედა ავადაა, სასწრაფოდ ესაჭიროება ოპერაცია, თუმცა მას იმიტომ ვერ მკურნალობენ, რომ ოჯახს ფული არ აქვს. ადვოკატმა სწორედ ბრალდებულის სოციალური მდგომარეობის გამო მოითხოვა გირაოს გაუქმება: “ის თანამშრომლობს გამოძიებასთან, არ უცდია მიმალვა და საქართველოს საზღვრის დატოვება”.

მოსამართლემ და პროკურორმა სასამართლო დარბაზში განმარტეს, რომ ბრალდებულის დედის ავადმყოფობა ამ საქმესთან არავითარ შემხებლობაში არ არის. “თანაც შეუძლია ოჯახს უძრავა ქონება, სახლი დააყადაღოს”, – თქვა პროკურორმა დავით ხარძეიშვილმა.
მშობლების სახლის იპოთეკით დატვირთვა უკვე სცადა ბრალდებულმა, მაგრამ ქონება საჯარო რეესტრში არ არის დარეგისტრირებული, ამიტომაც ბანკებმა უარი თქვეს სახლის იპოთეკით დატვირთვაზე.
მოსამართლის კითხვაზე, ცნობს თუ არა ბრალდებული თავს დამნაშვედ? – ბრალდებულმა უპასუხა, რომ არა. ადვოკატმა კი განმარტა, რომ თევზჭერის ფაქტს ისინი არ უარყოფენ. `ჩვენ სადავოდ არ ვხდით თევზის დაჭერის ფაქტს. სახელმწიფოსთვს მიყენებული ზიანი, რომელიც შეადგენდა 47 ლარსა და 15 თეთრს, ბრალდებულმა უკვე აანაზღაურა. მისი ქმედება შესაძლოა შეფასდეს როგორც ადმინისტრაციული გადაცდომა, ის არ შეიცავს სისხლის სამართლებრივი დანაშაულის ნიშნებს, არასწორად მინიჭებული კვალიფიკაცია კი ამძიმებს ბრალდებულის სამართლებრივ მდგომარეობას, ამიტომ ჩვენი თხოვნაა შეწყდეს სისხლის სამართლებრივი დევნა”, – უთხრა ადვოკატმა მოსამართლეს.

“საფუძველს მოკლებულია ადვოკატის შუამდგომლობა”, – პროკურორის ეს შეფასება გაიზიარა და გაიმეორა მოსამართლე თეიმურაზ ქათამაძემაც. მისი აზრით, საქმის შეწყვეტა მტკიცებულების გამოკვლევის გარეშე არგუმენტს მოკლებულია. თუმცა, წინასასამართლო სხდომაზე, მოსამართლეები ყოველთვის განიხილავენ სისხლის სამართლებრივი დევნის შეწყვეტის საკითხს, მაგალითად, გასულ კვირას ბათუმის საქალაქო სასამართლომ სწორედ წინასასამართლო სხდომაზე შეწყვიტა ბრალდებულის დევნა.

შემდეგი სასამართლო პროცესი 4 ნოემბერს ჩაინიშნა. მოსამართლემ სხდომის ბოლოს თქვა, რომ მისი ვარაუდით სასამართლო ამ საქმეზე გამამატყუნებელ განაჩენს გამოიტანს.

ნიკო ბერიძე: პატარა ქვეყანაში შოუ-ბიზნესი არ ხარობს

ვინ არის ნიკო ბერიძე?

ნიკო ბერიძე არის ნიკო ბერიძე.

თუ გახსოვთ პირველად რამდენი წლის ასაკში იმღერეთ?

თუ არ ვცდები 5 წლის ასაკში სახლში,სახლში ოღონდ რა სიმღერა იყო ზუსტად არ მახსოვს თუ არ ვცდები სიმღერა მულტფილმიდან “საზამთრო”

პირველად როდის წარსდექით ფართო აუდიტორიის წინაშე?

7 წლის რომ ვიყავი კონკურსში მივიღე მონაწილეობა ბათუმში და გავიმარჯვე

თქვენი პირველი სიმღერა რომელიც ტრამპლინი გახდა თვენს ცხოვრებაში?

ბავშვობის პერიოდს თუ ვიგულისხმებ, იყო ლუჩიო დალას კარუზო და შემდეგ იესოს არია ოპერიდან – jesus christ superstar.

წერთ თუ არა სიმღერებს?

კი, მაქვს რამდენიმე, რომლის ჩაწერასაც ვგეგმავ მალე. ერთი უკვე მზადაა. ასევე ვწერ მუსიკას სატელევიზიო ტიხრებისათვის, გადაცემის ქუდებისთვის. ვმუშაობ საქართველოს საზოგადოებრივი მაუწყებლის აჭარის ტელევიზიაში, თუმცა ახალი დაწყებული მაქვს სიმღერის წერა და ძალიან პასუხისმგებლობით ვეკიდები.

რომელია ქართველი და შემდეგ უცხოელი კომპოზიტორი, რომლის სიმღერასაც სიამოვნებით შეასრულებდით?

ალბათ საკუთარს, იმიტომ რომ არასდროს არ შემისრულებია

როგორ შეფასებას გააკეთებთ ქართულ შოუბიზნესზე?

არც ერთ პატარა ქვეყანაში შოუ-ბიზნესი არ ხარობს, არც ჩვენ ვართ გამონაკლისი

მოგწონთ თუ არა მუსიკალური კონკურსები და აპირებთ თუ არა მომავალში მონაწილეობის მიღებას?

ერთის მხრივ კარგია ეგ პროექტები, იმიტომ რომ თუ ვარგიხარ, წამებში პოპულარულს გხდის. მეორეს მხვრივ, თუ ცუდია, იმით, რომ თუ არაა გამოცდილი ოდნავ მაინც ამ საქმეში ადამიანი, ზარმაცდება და ავიწყდება, თუ რა შრომა, ჟინი და ოფლი ჭირდება იმას, რომ მუსიკოსად შედგე და აკეთო საკუთარი მუსიკა, იყო ის ვინც ხარ და არ იყო” cover მონა” (მე არ ვამბობ რომ ქავერები არ უნდა იმღერო) სხვადასხვა ორგანიზაციებისა თუ პოლიტიკური პარტიების მონა. სამწუხაროდ დღეს უმრავლესობა ასეა. მონაწილეობის მიღებას რაც შეეხება – არა, იმიტომ, რომ მე მეყო ის, სადაც ვიყავი და დღესაც მყოფნის, თუმცა იყო შემოთავაზებები უკრაინის X ფაქტორიდან და ქართული voice–დან. ამაო პოპულარობა აღარ მჭირდება, ახლა საკუთარი რეპერტუარით წავრსდგები ფართო მსმენელის წინაშე და პოპულარობა, რომელიც მომიტანა პროექტმა, დღემდე მყოფნის და მაქვს, ნამდვილად არ მიღირს კიდე რომელიმე პროექტში მონაწილეობის მიღება. ვერ ვხვდები, ამას რატო აკეთებენ ისინი, ვინც ნამყოფი არიან სხვადასხვა პროექტში.

ყველაზე გამაღიზიანებელი ჭორი რაც საკუთარ თავზე გაგიგიათ…

ჭორები არ მაღიზიანებს საერთოდ, უფრო ვერთობი და ვხალისობ მაგ ამბავზე… არ ვიცი რომელი გითხრა.

რას აფასებ ადამიანში ყველაზე მეტად?

თავისუფლებას, ერთგულებას, პირდაპირობას, „არავაზელინობას“, „არაპეროობას“ შეგრძნებების ქონას

იცხოვრებდით თუ არა სხვა ქალაქში?

უბრალოდ დროებით შევცვლიდი ხოლმე ქალაქებსა თუ ქვეყნებს… ეს იმას არ ნიშნავს, რომ სადაც ვარ, ცუდად ვარ.

დაწერთ ბათუმზე როდესმე სიმღერას?

არა მგონია დავწერო, იმიტომ რომ მსგავსი შინაარსის მქონე სიმღერები არ მიზიდავს ქალაქებზე და ქვეყნებზე. “ეეხ ბათუმი” დაწერილია, ეყოფა ამ ეტაპზე.

რა გეგმები გაქვთ უახლოეს მომავალში?

როგორც გითხარი, საკუთარი სიმღერების ჩაწერა და რამდენიმე გასტროლი.

და ბოლოს, რას ეტყვით თქვენს მსმენელს?

თქმით არაფერს ვეტყვი, ამჯერად მუსიკა ეტყვის ზოგადად.

”ქალაქი წყალზე” – სალომე ბენიძის პროზაული კრებულის პრეზენტაცია ბათუმში

„ეს წიგნი დავწერე ყველა გოგოსთვის, ვინც იბრძვის, ცხოვრობს და წინ მიიწევს, ყველა გოგოსთვის, ვისაც ხშირად უფიქრია, რომ მეტი აღარ შეუძლია და, მიუხედავად ამისა, მხრებში გამართულს გაუგრძელებია გზა, ვისაც ბევრჯერ დაუძლევია შიში და არასოდეს უთქვამს უარი საკუთარ თავზე. „ქალაქი წყალზე“ დავწერე ყველა ბიჭისთვის, ვისაც ჰყოფნის სიყვარული, ამბიცია და სიამაყე, გვერდით ძლიერი გოგო ჰყავდეს, თუმცა, ალბათ, იმ ბიჭებისთვისაც დავწერე, რომლებსაც სწორი არჩევანის გასაკეთებლად ბიძგი სჭირდებათ. უფრო მეტიც – დავწერე იმ ბიჭებისთვისაც, ვინც მცდარი ნაბიჯი უკვე გადადგა,“ – აღნიშნულია წიგნის ელექტორნული ვერსიის ანოტაციაში.

“ქალაქი წყალზე” წარმოადგენს რამდენიმე მოთხრობისაგან შემდგარ კრებულს, რომელსაც ერთი საერთო ხაზი აერთიანებს. წიგნში მოთხრობილია შვიდი ქალის ცხოვრების, ტკივილის, სიყვარულის, ბრძოლისა და ბედნიერების ისტორია, მისტიკური და იდუმალებით მოცული ელფერით. კრებული 2015 წელს გამოსცა გამომცემლობამ „წიგნები ბათუმში“.

პრეზენტაციაზე წიგნის შეძენა, 9.9 ლარის ნაცვლად, 7 ლარად იქნება შესაძლებელი.

სალომე ბენიძემ უარი თქვა წიგნიდან მიღებულ საავტორო ჰონორარზე და თანხას მთლიანად გადასცემს ძუძუს კიბოთი დაავადებულ ქალებს.

უზენაესმა სასამართლომ შს სამინისტროს საჩივარი წარმოებაში არ მიიღო

შს სამინისტრომ უზენაეს სასამართლოს 2015 წლის 10 ივლისს მიმართა საჩივრით და მოითხოვა სასამართლოს მეორე ინსტაციის მიერ მიღებული გადაწყვეტილების გაუქმება. საქმე ეხება გადაწყვეტილებას, რომლითაც თბილისის სააპელაციო სასამართლომ შს სამინისტროს პრემიების შესახებ უწყებაში დაცული ინფორმაციის „ბათუმელებისთვის“ მიწოდება დაავალა.

საკასაციო საჩივარში შს სამინისტრო წერს: „სააპელაციო სასამართლომ არ გაითვალისწინა, რომ პოლიციის შესახებ კანონით პრემია წახალისების ერთ-ერთი ფორმაა. ამასთან ადმინისტრაციული ორგანო ვალდებულია არ გაახმაუროს პირის პერსონალური მონაცემები ამ პირის თანხმობის გარეშე“.

გაზეთმა „ბათუმელებმა“ შს სამინისტროსგან პრემიების შესახებ ინფორმაცია, თანამდებობის პირების სახელებისა და გვარების მითითებით, 2013 წლის ბოლოს გამოითხოვა. ინფორმაციის ვერმიღების შემდეგ, 2014 წლის თებერვალში, რედაქციამ შინაგან საქმეთა სამინისტროს სასამართლოში უჩივლა. თბილისის საქალაქო სასამართლომ ამ საქმეზე გადაწყვეტილების გამოტანა მხოლოდ 2015 წლის 27 თებერვალს მოახერხა და “ბათუმელების” საჩივარი ნაწილობრივ დააკმაყოფილა – დაავალდებულა პრემიების შესახებ ინფორმაციის გაცემა. თუმცა, პირველი ინსტანციის გადაწყვეტილება, შს სამინისტრომ მეორე ინსტანციაში გაასაჩივრა, სადაც სამინისტროს საჩივარი არ დაკმაყოფილდა.

შს სამინისტროს საჩივრი დასაშვებად არ ცნეს უზენაესი სასამართლოს ადმინისტრაციულ საქმეთა პალატის მოსამართლეებმა – ვასილ როინიშვილის, ლევან მუსერიძისა და მაია ვაჩაძის შემადგენლობით.

საკასაციო სასამართლოს განჩინება საბოლოო და გასაჩივრებას არ ექვემდებარება.

გაზეთ „ბათუმელების“ ინტერესებს საერთო სასამართლოებში საქართველოს ახალგაზრდა იურისტთა ასოციაცია იცავდა.

წყლით დამზადებული ფაფა 7 თვის საბასთვის – მარტოხელა დედა ”ჰუმანას” ვერ ყიდულობს

7 თვის საბას და 3 წლის ნინის დედა, 25 წლის ქრისტინე, მარტოხელა დედაა. იგი ამბობს, რომ ბავშვების მამა, რომელსაც სხვა ქალაქში ჰყავს ცოლ-შვილი, თურქეთში მუშაობს და ყოველთვიურად ბინის ქირას – 70 ლარს და მცირე საარსებო თანხას უგზავნის. რამდენიმე ხელი ტანსაცმელი, აუცილებელი თეთრეული და ნინის რამდენიმე ძველი თოჯინა ქრისტინეს ოჯახის ერთადერთი ქონებაა.

ნინი, საბა და ქრისტინე

„70 ლარს ვიხდით ამ ოთახში. 60 ლარი ბინისაა, 10 ლარი – შუქის და გაზის. მე არ ვმუშაობ, ბავშვებს ხომ უნდა მოვუარო. ნინი ჯერ სამი წლისაც არ არის, ბაღში რომ შევიყვანო. ბავშვების მამა იხდის ოთახის ფულს. ცოტა ხნის წინ 20 დღით თურქეთში ვიყავი წასული სამუშაოდ, სხვა გზა არ იყო, ბავშვები „ხაზაიკას“ დავუტოვე. უცებ ვირუსი შეეყარა, გაცივდა საბა და საავადმყოფოში მოვხვდით. ხუთი დღე იწვა საბა რეანიმაციაში, ერთი დღე – პალატაში. ექიმმა ანემიის ნიშნებიაო, ჰემოგლობინი ჰქონდა ძალიან დაბალი. „ჰუმანას“ ყიდვის საშუალება რომ არ მქონდა, საბას მოხრაკულ ფქვილს და ბრინჯის ქაშს ვაჭმევდით, წყალში მოხარშულს“, – ამბობს ქრისტინე.

საბას ექიმმა „ჰუმანას“ ფაფა გამოუწერა, მაგრამ ქრისტინემ არ იცის, როგორ იყიდის. მას ბავშვების მამის გამოგზავნილი თანხის გარდა, სხვა შემოსავალი არა აქვს, ერთი კოლოფი „ჰუმანა” კი, რომელიც ბავშვს 2-3 დღეს თუ ყოფნის, 10 ლარამდე ღირს. საავადმყოფოში საბას, რომელიც მანამდე მხოლოდ წყალზე დამზადებულ ფაფას ჭამდა, „ჰუმანას“ აჭმევდნენ და ქრისტინე ამბობს, რომ ბავშვმა საავადმყოფოში წონაშიც კი მოიმატა.

ქრისტინე სოციალურ დახმარებას არ იღებს, მიუხედად იმისა, რომ მძიმე სოციალურ პირობებში ცხოვრობს. ამბობს, რომ არ მიუმართავს სახელმწიფოსთვის დახმარების სათხოვნელად: „არ ვიცი როგორ უნდა მოვიქცე, სად უნდა მივიდე, ვის უნდა ვთხოვო დახმარება ან დამეხმარებიან თუ არა. ამ ოთახში 6 თვეა ვცხოვრობ, მანამდე ოზურგეთში ვცხოვრობდი, საბაც იქ დაიბადა.“

ჯანმრთელობის პრობლემა აქვს ნინისაც, რომლის ფეხები სწორად არ ვითარდება. ქრისტინემ არ იცის ბავშვის ზუსტი დიაგნოზი: „პირველ რიგში ნინიკოს ფეხებზე მაქვს მისახედი. გვიჯოო – ასე უძახიან მგონი ამას. მითხრეს, გამოლოცვა ეყოფაო, მყავდა გამომლოცავი, ზინა ჰქვია ქალს, გამოვულოცეთ, მაგრამ ჯერ არ ვიცი… ექიმს ვაჩვენეთ ახლა, საბა რომ იყო საავადმყოფოში. თავისითაც შეიძლება გაუსწორდესო – თქვა. ზოგი ამბობს, თუ არ მიხედე, თავისით არ გასწორდება, შეიძლება ოპერაციაც დასჭირდესო“.

ნინის რამდენიმე, ძველი თოჯინა ოთახში,კედელზე ჰკიდია. დედის საუბარს იგი წყნარად ისმენს და პერიოდულად საუბარშიც გვერთვება რეპლიკებით. კითხვაზე, რა ჰქონდა დღეს ნინის სადილად, ქრისტინე ამბობს, რომ „წვნიანი“.

ნინის ყველაზე მეტად ფოტოაპარატის ციფრულ ეკრანზე საკუთარი გამოსახულების დანახვა ამხიარულებს და თვითონაც ცდილობს ღილაკს ხელი დააჭიროს და ფოტო გადაიღოს.

ქრისტინეს ოჯახი, დედ-მამა, დები და ძმა ქობულეთში ცხოვრობენ. ერთი წელია რაც ოჯახი ქრისტინეს არ ელაპარაკება, მათ არც საბას ავადმყოფობის შესახებ იციან. ქრისტინე ამბობს, რომ უთანხმოების მიზეზი მშობლების უკმაყოფილება გახდა ბავშვების მამასთან: „მათ რომ ჰკითხო, ჩემი ქმარია პრობლემა, მაგრამ ჩემი ქმარი მათი პატივისცემის მეტს არაფერს აკეთებდა, ხუთი წელია ერთად ვართ. მაშინ ცოლს გაშორებული იყო, მაგრამ შემდეგ შერიგდნენ. იქეთაც დადის და აქეთაც. ახლა თურქეთშია სამუშაოდ. იქეთ ორი ბავშვი ჰყავს“.

ქრისტინე 16 წლის იყო, როცა 27 წლის მამაკაცმა მოიტაცა. ქმარს 19 წლის ასაკში გაშორდა და ქმრის ოჯახში ორი შვილის დატოვება მოუხდა. ქრისტინე ამბობს, რომ ამის მიზეზი მისი მშობლები გახდნენ, რომელთაც არ სურდათ ბავშვები მას წამოეყვანა.

ახლა ქრისტინეს მთავარი საზრუნავი საბასთვის „ჰუმანას“ ყიდვაა. „ბავშვების მამასაც არა აქვს იმის საშუალება, რომ დაგვეხმაროს უფრო მეტად, მას არაფერში ვადანაშაულებ. თურქეთში გავიცანით ერთმანეთი, მე სამზარეულოში ვმუშაობდი, ის – მუშად. იქ დაიწყო ჩვენი ურთიერთობა, ყველაფერი სერიოზულად იყო. ერთადერთი იმაზე მტკივა გული, თუ ცოლთან შერიგებას აპირებდა, ხომ შეეძლო არც მე გავემწარებინე და არც მისი ცოლი“.

ეკონომიკური და პოლიტიკური სისტემების გავლენა ბუნებრივ და სოციალურ გარემოზე

ძირითადი მომხსენებლები არიან:

ირაკლი მაჭარაშვილი, გარემოს დაცვის სპეციალისტი, ასოციაცია“მწვანე ალტერნატივა“;

ვახტანგ წულაძე, აჭარის ავტონომიური რესპუბლიკის გარემოს დაცვის სამმართველოს უფროსი;

საშა ხორავა, ბათუმის შოთა რუსთაველის სახელმწიფო უნივერისტეტის ასოცირებული პროფესორი.

მოდერატორი: ნატა იმედაიშვილი, რადიო „თავისუფლების“ ჟურნალისტი.

დასწრება თავისუფალია.

დისკუსია დემოკრატიული ჩართულობის ცენტრში გაიმართება. მისამართი: ქ. ბათუმი, ფარნავაზ მეფის 62-64

ბათუმში ჭავჭავაძის ქუჩიდან გოგებაშვილისა და მაზნიაშვილის ქუჩების კვეთამდე მოძრაობა შეზღუდულია

მერიის განცხადებით, აღნიშნულ მონაკვეთზე სარეაბილიტაციო პროცესის დასრულების შემდეგ, საკანალიზაციო სისტემის რეაბილიტაცია გოგებაშვილის ქუჩაზე გაგრძელდება, რის გამოც საავტომობილო მოძრაობა დაახლოებით ერთი თვის განმავლობაში ცალმხრივი იქნება.

სამუშაოებს შპს „გზა“ ახორციელებს.

”ხელისუფლება კრიმინალს ახალისებს” – ბრიფინგი ნაციონალური მოძრაობის ბათუმის ოფისში

„იმ დროს, როდესაც ხელისუფლების მიერ მართული კრიმინალები თავს ესხმიან ჩვენი პარტიის ოფისს, პარტიის წევრებსა და მათ ოჯახებს, გაუხსნელია ეს საქმეები და ნიღბიანი პირები თავისუფლად დაპარპაშებენ ქალაქში, ეს იწვევს უკუშედეგს და ახალისებს კრიმინალს.

ამის ნათელი მაგალითია ქობულეთში მომხდარი ყაჩაღობის ფაქტები. ზედიზედ ორი ყაჩაღობა მოხდა ქობულეთში. გაზგასამართ სადგურს დაესხნენ თავს ყაჩაღები, სასტიკად გაუსწორდნენ თანამშრომლებს და მეორე ფაქტი: ვალუტის ჯიხურს თავს დაესხნენ და წაიღეს 15 000 ლარი.

ვანდალური ფაქტი მოხდა გუშინ ბათუმში, 26 მაისის პარკში. გარეგანათების ნათურები მთლიანად განადგურებულია პარკში და ვფიქრობ, რომ ეს, ზედიზედ მომხდარი დანაშაული, იმის შედეგია, რომ ხელისუფლება სათანადოდ ვერ მოქმედებს, კრიმინალების დაკავება ვერ ხდება. აქედან გამომდინარე, ჩვენ მოვითხოვთ დროულად მოხდეს აღნიშნული დანაშაულის ჩამდენი პირების დაგდენა-დაკავება და მათი პასუხისგებაში მიცემა,“ – განაცხადა რაულ თავართქილაძემ.

აგროსასურსათო პროდუქციისა და ტექნოლოგიების გამოფენა-გაყიდვა ბათუმში

გამოფენაში მონაწილეობენ კომპანიები საქართველოდან, თურქეთიდან, უკრაინიდან და ირანიდან. გამოფენის მიმდინარეობისას იგეგმება სარეკლამო და საინფორმაციო ტურები, პრეზენტაციები, შეხვედრები მასმედიის წარმომადგენლებთან.

ღონისძიება 30 ოქტომბერს საზეიმოდ გაიხსნება ყინულის სასახლეში. ცერემონიას გახსნიან აჭარის მთავრობის თავმჯდომარე, აჭარის სოფლის მეურნეობის მინისტრი, აჭარის მოქმედი საკონსულოების გენერალური კონსულები, ქალაქ ბათუმის მერი.

გამოფენის დათვალიერება შესაძლებელია 12-დან 18 საათამდე.

Agro Batumi 2015 მეხუთედ იმართება. მონაწილე კომპანიებს სამი დღის განმავლობაში საშუალება ეძლევათ საკუთარი პროდუქცია მომხმარებლებს გააცნონ და ამავდროულად რეკლამირებაც გაუწიონ.

გამოფენის თანაორგანიზატორები არიან: აჭარის მთავრობა, აჭარის სოფლის მეურნეობის სამინისტრო, ქალაქ ბათუმის მერია, აჭარის სავაჭრო-სამრეწველო პალატა, საქართველოს საერთაშორისო ინვესტორთა ასოციაცია და აჭარის ტელევიზია.

”რეფორმა”, როგორც პრობლემის მფარველი

<!** Image 1 align="left" alt="გიორგი ბაგრატიონი" sub="გიორგი ბაგრატიონი" width="400" height="3000" >თავდაპირველად ვფიქრობდი, რომ სტუდენტების პოზიციების, მოთხოვნების, ინტერესების გათვალისწინება რაღაც დოზით ყოველთვის ხდებოდა, ვინაიდან მეტნაკლებად ყველა აღიარებდა არსებულ პრობლემებს, თუმცა შედეგი ის აღმოჩნდა, რომ დიდი ნაწილი ნაბიჯსაც არ დგამდა ამ პრობლემების გადასაჭრელად და მივხვდი, რომ ეს თანხმობა რეალურად სტუდენტების ხმის ჩახშობას და დროის გაწელვას ემსახურებოდა. მეტიც, დღითიდღე ვრწმუნდები, რომ უნივერსიტეტში მუშაობა იმ მიმართულებით კი არ მიდის, რომ სტუდენტებთან დიალოგის რეჟიმში მოხდეს არსებულ პრობლემებზე მსჯელობა და მათი გადაჭრის გზების ძიება, არამედ არსებული პოლიტიკა, მიმართულია იმისკენ, რომ ამ „ხმაურიანი“ ჯგუფების მარგინალიზება და გარიყვა მოხდეს, რათა უკეთ განხორციელდეს ის „პოლიტიკა” რომელიც დღეს არის უნივერსიტეტში.

გარდა იმისა, რომ დღეს უნივერსიტეტი ისევ გარედან იმართება, არც ერთი ნაბიჯი არ იდგმება ხარისხის ასამაღლებლად, უნივერსიტეტის დიდ პრობლემად ისევ რჩება სამეცნიერო მიმართულებით განვითარება, სტუდენტი დღეს განიხილება როგორც შემოსავლის წყარო, როგორც პოტენციური მუშაკი ბაზარზე და არა ცოდნის შემქმნელი და ასე შემდეგ, დღეს უნივერსიტეტში გვაქვს ახალი პრობლემა, ეს არის “რეფორმები” რომელიც თითქოს ხარისხის გაზრდაზე არის ორიენტირებული, და ეს “რეფორმები” ეხება სალექციო და სასემინარო საათებთან დაკავშირებულ შეზღუდვებს.

უნივერსიტეტში მართლაც არსებობს იმის პრობლემა, რომ სტუდენტთა ერთი ნაწილი არ ესწრება ლექციებისა და სემინარების ერთ ნაწილს, მაგრამ ნიშანდობლივია ისიც, რომ ეს ეხება კონკრეტული ლექტორების მიერ წაკითხულ ლექციებს და კონკრეტული პროგრამების მიერ დადგენილ სალექციო კურსებს.

სწორედ ამ პრობლემის მოსაგვარებლად რექტორისა და აკადემიური საბჭოს შეთანხმებით, (თუმცა როგორც ირკვევა სრული თანხმობა არ არსებობდა) შეიქმნა ახალი „რეფორმა“, რომელიც ავალდებულებს სტუდენტს დაესწროს ლექციების 1/2-ს, ხოლო რაც შეეხება სასემინარო მუშაობას, სტუდენტი ვალდებულია მიიღოს ნიშანი ყველა სემინარული მუშაობისას, რაც უფრო და უფრო მეტად ახდენს სტუდენტთა ორიენტირებას ნიშანზე და არა ხარისხზე და მეტად ხდის მიჯაჭვულს სისტემაზე, საბოლოოდ კი პრობლემა პრობლემად გვრჩება, ვინაიდან ის, რასაც ეს რეფორმა ებრძვის, არ წარმოადგენს პრობლემის სათავეს და არსებული ცვლილება ემსახურება მხოლოდ და მხოლოდ უნივერსიტეტში არსებული პრობლემის, ამ შემთხვევაში ლექციაზე დასწრების დაბალი ხარისხის გადაფარვას და „იდეალური“ და წარმოსახვითი მდგომარეობის შექმნას.

ეს „რეფორმა“ ებრძვის პრობლემის შედეგს და არა პრობლემას. მსგავსი მიდგომებით კიდევ უფრო ვუახლოვდებით საზოგადოებას, რომელიც გახვრეტილ ნავში ზის და ცდილობს, რომ წყალი ამოტუმბოს, რათა არ ჩაიძიროს, თუმცა წყლის დონე არასოდეს იკლებს, არავის უფიქრია, რომ პრობლემის სათავე, ანუ ხვრელი დაეფარათ, რომ წყალი აღარ შემოსულიყო. ამ შემთხვევაში ხვრელი არის ის ძირეული პრობლემები, რომლებიც უნივერსიტეტში დგას, დღევანდელი რეფორმა კი ტუმბო, რომელსაც უნივერსიტეტი იყენებს იმისათვის, რომ არ ჩაიძიროს. ყოველივე ამით იმის თქმას ვცდილობ, რომ პრობლემას ის კი არ წარმოადგენს, რომ სტუდენტები არ ესწრებიან ლექციებს, არამედ ის, თუ რატომ არ ესწრებიან, სწორედ ამ პრობლემების კვლევის გარეშე და გაუთვალისწინებლად არის მიღებული არსებული გადაწყვეტილება, თუმცა ვფიქრობ, ეს პრობლემები ყველასთვის ცნობილია, უბრალოდ აღიარება და ქმედითი ნაბიჯების გადადგმა არის საჭირო.

რაც შეეხება პრობლემის გამომწვევ მიზეზებს, ვფიქრობ, ორ ძირითად პრობლემასთან გვაქვს საქმე:

პირველი: ეს ეხება სხვადასხვა მიმართულებებზე, კონკრეტული ლექტორების მიერ წაკითხულ ლექციებს, რომელიც არის დიდწილად არაფრისმომცემი, უინტერესო და სრულიად დაცლილი თანამედროვეობისაგან თუ მეცნიერებისაგან. ასევე მნიშვნელოვან პრობლემად რჩება მიდგომები, რომელიც ჯერ კიდევ გამოიყენება სალექციო თუ სასემინარო მუშაობის დროს. აგრეთვე, ერთ-ერთ პრობლემას წარმოადგენს არასწორად განსაზღვრული სალექციო კურსები, ასევე შესაძლო დამთხვევები, რომელიც ხშირ შემთხვევაში არსებობს საგნის ხელმეორედ გავლის შემთხვევაში ან თავისუფალი კომპონენტების გავლის შემთხვევაში.

უნივერსიტეტი უნდა ეცადოს სწორედ ეს ძირეული პრობლემები გაანალიზოს და მიმართოს ქმედით ნაბიჯებს ამ პრობლემების მოსაგვარებლად.

რაც შეეხება არსებული რეფორმის იმით გამართლებას, რომ სტუდენტთა ერთი ნაწილი არც კი ითხოვს უკეთესს და საერთოდ არ აინტერესებს სწავლა, მაშინ მე მინდა გითხრათ, რომ თუკი თქვენ აღიარებთ ამ სეგმენტის არსებობას უნივერსიტეტში, ესეც საუნივერსიტეტო და ზოგადად განათლების არსებული სისტემის შედეგია, რომელიც ორიენტირებულია რაოდენობაზე და არა შედეგზე. და მაინც, თუკი არსებობს აუცილებლობა და მოითხოვს ვინმე, რომ უკეთ იქნას დასაბუთებული არსებული ეს მოსაზრება, მე პირადად მზად ვარ, ვინაიდან არსებობს კონკრეტული მაგალითებიც, რომლებიც ნათლად გვიჩვენებს რეალობას.

მეორე: რაც შეეხება მეორე პრობლემას, ის ძალიან მნიშვნელოვანი და მტკივნეულია და ეხება საზოგადოების სოციალურ მდგომარეობას. ბუნებრივია, ვეთანხმები იმ პოზიციას, რომ სტუდენტი უნდა ისმენდეს ლექციას და ბოლომდე უნდა იყოს ჩართული საგანმანათლებლო პროცესში, (თუმცა მეორე საკითხია ის, თუ რამდენად მოდის შესაბამისობაში არსებული საგანმანათლებლო პროცესი სასურველ ხარისხთან), მაგრამ არ შეიძლება ვისაუბროთ ამ საკითხზე ცალსახად და არ გავითვალისწინოთ ის, რომ დღეს უამრავი სტუდენტი, სოციალური მდგომარეობიდან გამომდინარე, იძულებულია იმუშაოს, სწორედ იმისათვის, რომ ისწავლოს, უარეს შემთხვევაში კი ოჯახის რჩენაც უწევს და ამ ყოველივეს გაკეთება უწევს სასწავლო პროცესის პარალელურად, იმ ლექციების გაცდენის ხარჯზე, რომელშიც თავისი ნამუშევარი თანხა აქვს გადახდილი.

რა შეიძლება იყოს ამაზე დიდი ტვირთი სტუდენტისათვის? ამ პრობლემის მოგვარების გზა კონკრეტულ შეზღუდვებზე კი არ გადის, არამედ იმ ქმედებებზე, რაც იდეაში უნდა კეთდებოდეს უნივერსიტეტში. უნივერსიტეტი უნდა იკვლევდეს და აფასებდეს არსებულ რეალობას, მათ შორის საზოგადოების სოციალურ ფონსაც და უნდა სახავდეს არსებული პრობლემების მოგვარების გზებს, რომლის გათვალისწინებაც უნდა მოხდეს სახელისუფლებო დონეზე. სწორედ ამიტომ ითხოვს სტუდენტთა ერთი ნაწილი სახელმწიფო ბიუჯეტიდან დაფინანსებას, რათა უნივერსიტეტი არ იყოს ორიენტირებული სტუდენტთა რაოდენობაზე, როგორც შემოსავლის წყაროზე. სტუდენტს შეუმსუბუქდეს ტვირთი, რომელიც მაღალი გადასახადით არის განპირობებული და უნივერსიტეტს ჰქონდეს საკმარისი რესურსი, რათა განვითარდეს. უნივერსიტეტი ვერ მიიღებს გადაწყვეტილებებს და ვერ გაატარებს რეფორმებს იმ მოვლენებისა და პროცესების უგულებელყოფის ხარჯზე რაც ქვეყანაში მიმდინარეობს.

და ბოლოს. მე არ მჭირდება სისტემის იძლება იმისათვის, რომ დავესწრო ლექციებს, მივიღო განათლება, მე არ მჭირდება შეხსენება თუ რისთვის ვარ უნივერსიტეტში, მე მჭირდება ის, რასაც ვითხოვ, (და არამარტო მე) როგორც რიგითი სტუდენტი: ეს არის საგანმანათლებლო პროცესი, რომელიც არ იქნება მხოლოდ ინფორმაციული ხასიათის, რომელიც არ იქნება დამოკიდებული დოგმატური ცოდნის გადმოცემაზე, რომელიც არ აიძულებს სტუდენტს იფიქროს ნიშანზე და არა ცოდნაზე, რომელიც მისცემს ლექტორს საშუალებას სამუშაო საათი მოახმაროს ლექციაზე გაზიარებული ცოდნის პრაქტიკულ გაჯანსაღებას, რომელიც ორიენტირებული იქნება სწავლის მეთოდზე, რომელიც ორიენტირებული იქნება ინფორმაციის გაზიარებაზე და ახალი ცოდნის დაბადებაზე და რომელიც იქნება მეცნიერებასთან შეჯერებული. ამიტომ მივმართავ გადაწყვეტილების მიმღებ ორგანოებს და პირებს, რომ გაითვალისწინონ ყველა არსებული ფაქტორი, რაც მოქმედებს დღეს განათლებაზე, გაითვალისწინონ სტუდენტთა ინტერესები, გაითვალისწინონ უნივერსიტეტის პასუხისმგებლობა ზოგადად საზოგადოების წინაშე და მიიღონ შესაბამისი გადაწყვეტილებები.

მარტივად შესაძლებელია არსებული განცხადების გამოყენება სხვადასხვა პოზიციიდან და ამის მაგალითებიც არსებობს. სტუდენტებს, რომლებიც ყოველთვის მოწინააღმდეგეები იყვნენ სისტემური, ხელოვნური რეფორმების და ითხოვდნენ რეალურ ქმედებებს, ხშირ შემთხვევაში „ოროსნების“ სტატუსი ჰქონდათ მინიჭებული და არ გამიკვირდება „ვიწრო წრე“ ამ სტატუსს მეც თუ მომანიჭებს.

ბუნებრივია არ დავიწყებ ჩემი პოზიციის მტკიცებას მათ წინაშე, უბრალოდ შევეცდები ავხსნა, თუ რაში მდგომარეობს რეალური პრობლემა და რატომ არის აცდენილი დღევანდელი რეფორმა ძირეულ საკითხებს.

ვინ არიან საპროკურორი საბჭოს წევრები

საპროკურორო საბჭოს არჩეული წევრები არიან: მთავარი პროკურატურის დეპარტამენტის პროკურორი გიგა ძნელაძე, მთავარი პროკურატურის საგამოძიებო ნაწილის სამმართველოს უფროსი ნათია სონღულაშვილი, მთავარი პროკურატურის დეპარტამენტის უფროსის მოადგილე გოჩა ფარულავა, რუსთავის რაიონული პროკურორი კონსტანტინე სირაძე, თბილისის პროკურატურის პროკურორი ანა კალანდაძე, თბილისის პროკურორის მოადგილე გიორგი გაბოძე. აჭარიდან ანზორ უსტიაძე და სამეგრელო ზემო სვანეთიდან – მამუკა ფიფია.

პროკურატურის შესახებ კანონში შეტანილი ცვლილებების თანახმად, შექმნილი საპროკურორო საბჭოს უფლებაა დაამტკიცოს საქართველოს მთავარი პროკურორის კანდიდატურა, წარუდგინოს მთავრობას მთავარი პროკურორის თანამდებობიდან გათავისუფლების წინადადება, განახორციელოს მთავარი პროკურორისა და მისი მოადგილეების წინააღმდეგ დისციპლინური სამართალწარმოება. საპროკურორო უფლებამოსილების განხორციელების პროცესში საპროკურორო საბჭო არ ჩაერევა. მთავარი პროკურორის კანდიდატურას ასახელებს და საბჭოს დასამტკიცებლად წარუდგენს იუსტიციის მინისტრი, საბჭო მას ხმათა 2/3-ით დაამტკიცებს და წარუდგენს მთავრობას, შემდეგ კი – პარლამენტს.

არასამთავრობო სექტორს უფლება აქვს რეკომენდაცია გაუწიოს ან წარადგინოს საბჭოს წევრი. ახალგაზრდა იურისტთა ასოციაციის თავმჯდომარე ანა ნაცვლიშილი „ბათუმელებთან“ ამბობს, რომ ამ პროცესში ჩართვას საია არ აპირებს: “ჩვენ ვფიქრობთ, რომ სისტემა ფუნდამეტურ რეფორმას საჭიროებს, შესაცვლელია საქალაქო და რაიონული პროკურორების შერჩევის პრინციპი, დაწინაურებისა და დისიპლინური პასუხისმგებლობის დაკისრების პროცედურა ან მათი თანამდებობიდან გათავისუფლება. სისტემა არის ცენტრალიზებული და პრაქტიკაში იმის არაერთი მაგალითი არსებობს, რომ პროკურორები დამოუკიდებლად ვერ იღებენ გადაწყვეტილებას იმ საქმეზე, რომელსაც უწევენ ზედამხედველობას.

არგუმენტი, რომელსაც ჩვენ გვეუბნება კანონის ავტორი, არის ასეთი: საიდანღაც ხომ უნდა დაგვეწყო და დავიწყეთ ყველაზე მნიშვნელოვანიდან, მთავარი პროკურორის არჩევის წესიდან. ერთბაშად ყველაფრის რეფორმირება მართლაც შეუძლებელია, მაგრამ მე მაქვს ამ არგუმენტის საწინააღმდეგოდ არგუმენტი: მოდელი, რომელიც შეიქმნა დიდ ძალაუფლებას აძლევს პროკურორთა კონფერენციაზე არჩეულ რვა პროკურორს, მაგრამ პროკურორები, რომლებიც ამ საბჭოში უნდა იყვნენ, ვერ არიან სათანადოდ დამოუკიდებლები და მათი ავტონომიურობა არ არის განმტკიცებული კანომდებლობით. არ არსებობს ბერკეტი, რომ ეს ადამიანები მიიღებენ თავისუფალ გადაწყვეტილებებს. ეს ახალი მოდელი პრობლემურია მიუხედავად იმისა, რომ პარლამენტი შემოდის გადაწყვეტილების მიღების პროცესში – საბოლოოდ გადაწყვეტილების მიმღები არის მმართველ პოლიტიკური ძალა”.

ანა ნაცვლიშვილის შეფასებით, კვოტა, რომელიც სამოქალაქო სექტორსა და აკადემიურ წრეს ეკუთვნის, გადაწყვეტლებაზე ზეგავლენას ვერ მოახდენს: “ჩვენი რეკომენდაცია იყო, რომ საბჭოს წევრების შესარჩევი კრიტერიუმები ყოფილიყო მაღალი, როგორც პროფესიული, ასევე კეთილსინდისიერების თვალსაზრისით. სამწუხაროდ, ესეც არ გაითვალისწინეს~.
კიდევ ერთი დეტალი, რაზეც საიას ხელმძღვანელი „ბათუმელებთან~ ყურადღებას ამახვილებს, არის საპროკურორო საბჭოს წევრი პროკურორების შერჩევის პრინციპი: “შიშები, რაც კანონპროექტის კითხვის დროს გაჩნდა, დადასტურდა კონფერენციის დროს. კონფერენციის გახსნისთანავე დასახელდა საბჭოს წევრობის კანდიდატების 16 გვარი. ჩვენთვის უცნობია ეს ადამიანები ვინ აარჩია, როგორ ჩამოყალიბდა საინიციატივო ჯგუფები, ამ საინიციატივო ჯგუფებმა რა კრიტერიუმებით შეარჩიეს კანდიდატები. ეს გვარწმუნებს კიდევ ერთხელ, რომ პროცესი და კანონი ვერ ქმნის გარანტიას, კეთილსინდისიერებისა და პროფესიონალიზმის მიხედვით დაასახელეს ადამიანები საბჭოში თუ სხვა მოტივებით“.

საბჭოს ერთ-ერთი წევრი _ გოჩა ფარულავა იყო აჭარაში ექსპრეზიდენტ სააკაშვილის ხელისუფლების პროკურორი. ის ახალმა მთავრობამ 2013 წელს შინაგან საქმეთა სამინისტროს ტერიტორიულ ორგანოებში საპროკურორო საქმიანობაზე ზედამხედველობის დეპარტამენტის ხელმძღვანელად დანიშნა. გოჩა ფარულავა აჭარის პროკურატურის პირველი პირი იყო ორი წლის განმავლობაში. მისი პროკურორად მუშაობის პერიოდში, 2011 წლის 21 მაისს, სამართალდამცავებმა ჯერ დაარბიეს აქცია ბათუმში, შემდეგ კი ნაცემი მოქალაქეები დააკავეს და პატიმრობა მიუსაჯეს. ეს დაკავება არასამთავრობო ორგანიზაციებმა შეაფასეს, როგორც პოლიტიკური ნიშნით ანგარიშსწორება, ხოლო ახალმა ხელისუფლებამ ისინი გაათავისუფლა, როგორც პოლიტპატიმრები.

პირადად გოჩა ფარულავას „ბათუმელებმა“ მიმართა თხოვნით, გამოეძიებინა გაზეთის რედაქტორის მიმართ კონტრდაზვერვის დეპარტამენტის თანამშრომლების მხრიდან განხორციელებული ძალადობის ფაქტი. უცნობია გოჩა ფარულავამ რა ძალისხმევა გაიღო ამ დანაშაულის გამოსაძიებლად. „ბათუმელებმა“ ორწლიანი ძიების შემდეგ თავად დაადგინა იმ პირის ვინაობა, ვინც აშანტაჟებდა ჟურნალისტს. გოჩა ფარულავასადმი გაგზავნილ მორიგ წერილში მითითებული იყო იმ პირის სახელი და გვარი, ვინც ხელმძღვანელობდა ჟურნალისტის დაშანტაჟებას. არც ამ შემთხვევაში ჩაუთვლია თავი ვალდებულად გოჩა ფარულავას უწყებას, დაეკითხა ამ საქმეზე ინფორმირებული პირები. ყოველ შემთხვევაში, უწყებას, რომელსაც გოჩა ფარულავა ხელმძღვანელობდა, საზოგადოებისთვის ამ საკითხზე ინფორმაცია არ მიუწოდებია.

პროკურორი ანზორ უსტიაძე აჭარის პროკურორის, შოთა ტყეშელაშვილის მოადგილეა. ამ თანამდებობაზე ის გასულ წელს დანიშნეს. ანზორ უსტიაძე წინა ხელისუფლების დროს ძირითადად ფინანსურ საქმეებს იძიებდა. სახელმწიფომ მისი პროკურორობით 2010 წელს გაასამართლა ბიზნესმენი ზურაბ ლობჟანიძე იმ ქონების გაყიდვისთვის, რომლითაც ახალი ხელისუფლების გამოძიების ვერსიით, ივანე მერაბიშვილი უკანონოდ სარგებლობდა, როცა ის შს მინისტრი იყო. სწორედ ამ აგარაკის უკანონო სარგებლობისთვის წარუდგინეს ბრალი 2013 წელს ვანო მერაბიშვილს.

ანზორ უსტიაძესვე ახალმა ხელისუფლებამ დაავალა ივანე მერაბიშვილის მეგობრის, ლუხუმ კაპანაძისთვის ბათუმის ქიმიურ-ფარმაცევტული ქარხნის მიყიდვის კანონიერების შესწავლა.

რა კრიტერიუმებით შეარჩიეს და დაასახელეს პროკურორები საპროკურორო საბჭოს წევრებად? – „ბათუმელებმა“ ამ კითხვის დასმა იმიტომ ვერ მოახერხა, რომ მთავარი პროკურატურის მედიასა და საზოგადოებასთან ურთიერთობის სამსახურის უფროსი ნათია სუხიაშვილი „ბათუმელების“ ზარებს ორი დღის განმავლობაში არ პასუხობდა.

კანონში შესული ცვლილებების თანახმად, საბჭოს წევრები 4 წლის ვადით აირჩიეს, რომლის თავმჯდომარეც იქნება იუსტიციის მინისტრი. საბჭო მთავარი პროკურორის კანდიდატურას მთავრობას 29 ნომებრისთვის წარუდგენს. კანონის თანახმად, პროკურორის ექვსი წლის ვადით დამტკიცებაზე პარლამენტი, სავარაუდოდ, დეკემბერში იმსჯელებს.

ქობულეთის რკინიგზის სადგურში სავალუტო ჯიხური დააყაჩაღეს

შინაგან საქმეთა სამინისტროს ცნობით, მიმდინარეობს საგამოძიებო მოქმედებები, თუმცა ბრალდებულის სახით ამ დროისთვის არავინ დაუკავებიათ.

სავალუტო ჯიხური ქობულეთის რკინიგზის სადგურში მდებარეობს, სადაც არაერთი ვიდეოთვალია დამონტაჟებული.

გამოძიება სისხლის სამართლის კოდექსის 179-ე მუხლით, ყაჩაღობის ფაქტზე მიმდინარეობს.

ივარჯიშე სანამ დაღამდება – დენის გარეშე დარჩენილი ძალოსნები [ფოტო | ვიდეო]

ძალოსნობის დარბაზი ჩაქვში

აჭარის ძალოსნების ფედერაციის გენერალური მდივანი და აჭარის ნაკრების მთავარი მწვრთნელი აბესალომ ბასილია ამბობს, რომ ამ შენობაში, რომელიც ადრე კულტურის სახლი იყო, ძალოსნები 40 წელზე მეტია ვარჯიშობენ. ამჟამად დარბაზში არ არის არც გათბობა და არც ელექტროენერგია. „ორ წელზე მეტია ელექტროენერგიის გარეშე ვართ. შეჯიბრებების დროს გენერატორს ვიყენებთ. აქ ვატარებთ აჭარის ჩემპიონატებს, ტურნირებს. „საელოქტროში“ აბონენტად ვერ გაგვაფორმეს. იმიტომ, რომ ეს შენობა ეკონომიკის სამინისტროს ეკუთვნის“, – ამბობს აბესალომ ბასილია.

ყოფილი კულტურს სახლი დაბა ჩაქვში, მეგენეიშვილის ქუჩაზე | ამ შენობის ერთ-ერთ დარბაზში ძალოსნები ვარჯიშობენ

მწვრთნელები

დარბაზს მწვრთნელები დილის 10 საათზე აღებენ და 11 ნახევარზე იწყებენ ვარჯიშს – ჯერ უფროსებთან, შემდეგ კი ბავშვებთან. აქ სამი მწვრთნელი მუშაობს – აჭარის ნაკრების მთვარი მწვრთნელი აბესალომ ბასილია, სულხან დუმბაძე და ნუგზარ ჯინჭარაძე. „ორივე ყოფილი სპორტსმენი და საქართველოს ჩემპიონია. სულხანი 10 წელია მწვრთნელად არის ჩემთან, ნუგზარი კი სამი წელია“, – ამბობს აჭარის ნაკრების მთავარი მწვრთნელი. ბავშვები დარბაზში ამჟამად ძალოსნობით დაინტერესებული სხვადასხა ასაკის 35 მოზარდი ვარჯიშობს. „ბავშვებს ვიღებთ მესამემეოთხე კლასიდან. მშობლებსაც მოჰყავთ, მაგრამ, ძირითადად, ჩვენ მივდივართ სკოლებში და ვარჩევთ, ვინც შეძლებს ვარჯიშს, მერე მშობლებს ველაპარაკებით. უსასყიდლოდ ვარჯიშობენ. რითაც შეგვიძლია, ისე ვეხმარებით მათ. ხან ვინმე სპონსორი გამოჩნდება და გვეხმარება – 500; 900; 1000 ლარით. კარგია, ბავშვებისთვის ვიტამინები რომ გვქონდეს, მაგრამ არ არის საშუალება. არც არის ისეთი კანონი, რომ ან ფედერაციამ, ან დეპარტამენტმა შეუძინოს მათ საკვები დანამატები. მარტო შეკრებისა და შეჯიბრზე წასვლის თანხა გვაქვს“.

აბესალომ ბასილია ბავშვებს ავარჯიშებს

ფედერაციის ფინანსები

აჭარის ძალოსნობის ფედერაცია დაფინანსებას ძირითადად აჭარის სპორტისა და ახალგაზრდობის საქმეთა დეპარტამენტისგან იღებს. 2015 წელს ეს დაფინანსება 45 000 ლარი იყო. „გასახარჯი დაგვრჩა 11 000 ლარი, რომელიც მსოფლიო ჩემპიონატზე წასასვლელადაა გათვალისწინებული. 3 000 ლარი დაგვემატა 2014 წელთან შედარებით. ჯერ არ ვიცით რა ცვლილებები იქნება. თუმცა ოლიმპიური წელია და, სავარაუდოდ, დაფინანსება გაიზრდება“.

ძალოსნობაში მსოფლიო ჩემპიონატი ამერიკის შეერთებული შტატების ქალაქ ჰიუსტონში გაიმართება. მასში აჭარიდან სამი ძალოსანი – ირაკლი თურმანიძე, გია მაჭავარიანი და რამინ შამილიშვილი მიიღებენ მონაწილეობას.

ზამთარი

დარბაზის ფართობი, გასახდელებიანად, 160 კვადრატული მეტრია. გასახდელები დარბაზის ბოლოში მდებარეობს და ეგრეთ წოდებული „ბრეზენტითაა“ გამოყოფილი. რამდენიმე წლის წინ შენობას გვერდით სააბაზონო მიუშენეს. აბაზანაში არ არის ცხელი წყალი. გათბობისთვის კი შეშის ღუმელს იყენებენ. „ზამთარშიც აქ ვვარჯიშობთ. ერთი კვირა არ გვაქვს დასვენება, სამი-ოთხი დღე რომ შეწყვიტო ვარჯიში, სპორტსმენი უცებ გამოვა ფორმიდან, მერე ერთი თვე სჭირდება, ორმა რომ აღიდგინოს. ტატამი შევიძინეთ, მაგრამ ელექტროენერგიის უქონლობის გამო ვერ ვამონტაჟებთ“.

ძალოსნობის დარბაზი ჩაქვშიძალოსნობის დარბაზი ჩაქვში – ვარჯიში დამთავრა

შედეგები

საქართველოს ძალოსნობის ეროვნულ ნაკრებში შვიდი ძალოსანი აჭარიდანაა: ვილიამინ ალექსიძე, რამინ შამილიშვილი, გოგიტა კაკიაშვილი, ირაკლი თურმანიძე, ბაქარ თურმანიძე, გია მაჭავარიანი, ალბერტ კუზილოვი. ისინი სხვადასხვა წონით კატეგორიასა და ასაკში ასპარეზობენ. ირაკლი თურმანიძე წელს ევროპის ჩემპიონი გახდა. ახლახან დაბრუნდა რამინ შამილიშვილი 20-23-წლიანების ევროპის ჩემპიონატიდან, რომელიც 1-5 ოქტომბერს ლიტვის ქალაქ კლაიპედაში გაიმართა. მან ატაჩში ოქრო აიღო, აკვრაში – ბრინჯაო და ორჭიდში – ვერცხლი. „ოთხი ბრინჯაო, ორი ვერცხლი და სამი ოქრო გვაქვს წელს. „ვლადიმერ სვეტილკოს შემდეგ აჭარაში ამისთანა შედეგი არ ყოფილა არასდროს“, – ამობს აბესალომ ბასილია.

ძალოსნობის დარბაზი ჩაქვში

იხილეთ ვიდეოკოლაჟი:

ტყვიის შემცველი მტვერი ბავშვის ორგანიზმში შესაძლოა ძველად აშენებული შენობების და ავეჯის ზედაპირიდან მოხვდეს

გარდა ამისა, ბავშვების ტყვიით მოწამვლას იწვევს ტყვიის შემცველი საღებავებით შეღებილი სათამაშოების ღეჭვა, შეღებილი საწოლების მოაჯირების პირით შეხება, საღებავის მტვრის შესუნთქვისას და ა.შ.

ჯანმოს განმარტებით, ტყვია მეტალია, რომელიც შხამავს ადამიანს და მძიმე ზეგავლენას ახდენს მის ჯანმრთელობაზე. იგი განსაკუთრებით საშიშია ბავშვის მზარდი ორგანიზმისთვის, თუმცა მათ უმრავლესობას ჩივილები არ აღენიშნება. ტყვიით მოშხამვასთან დაკავშირებული ძირითადი მახასიათებლებია: ყურადღების კონცენტრაციის პრობლემები, დაქვეითებული მეტყველებითი უნარები, ჰიპერაქტიულობა, სირთულეები კითხვაში, კოორდინაციის გაძნელება, ქცევითი პრობლემები, დაბალი მოსწრება სკოლაში, ზოგადსაგანმანათლებლო სკოლაში სწავლის უნარის დაქვეითების მაღალი პროცენტი, ზრდისა და განვითარების დარღვევა.

საქართველოში ტყვიისა და მისი ნაერთების გამოყენება საკვებ პროდუქტებთან შეხებაში მყოფ მასალებსა და ნაკეთობებში იზღუდება. იგი ასევე ამოღებულია კოსმეტიკური საშუალებების წარმოებიდან (გარდა თმის საღებავისა – რძემჟავა ტყვია, გათვლილი 0,5% ტყვიაზე). თუმცა, ისევ დაავადებათა კონტროლისა და საზოგადოებრივი ჯანმრთელობის ეროვნული ცენტრის ცნობით, ქვეყანაში ასობით ტონა საღებავი იმპორტირდება, საბაჟოებზე კი ქიმიური ნივთიერებების ერთიანი სახელმწიფო რეესტრის და ტესტირება/იდენტიფიკაციის საშუალებების არ არსებობის გამო, ქიმიურ ნივთიერებათა იმპორტ-ექსპორტის ეფექტური კონტროლი ვერ ხორციელდება.

აშშ დაავადებათა კონტროლისა და პრევენციის ცენტრების მონაცემებით, 1991 წელს ყოველი 6 გამოკვლეული ბავშვიდან ერთს ტყვიით მოშხამვის ნიშნები ჰქონდა.

„ჯანმრთელობისა და გარემოს გამოკვლევის მესამე ნაციონალური კონგრესის მასალების მიხედვით, აშშ-ში 930 ათასი სკოლამდელი ასაკის ბავშვის ორგანიზმში ტყვიის შემცველობა აღემატებოდა დაავადებათა კონტოლისა და პრევენციის კომიტეტის მიერ დადგენილ ნორმას (ნორმა 10 მგ/დლ). დაახლოებით 275 ათასი ბავშვის სისხლში ტყვიის შემცველობის დონე იყო 15 მგ/დლ, 85 ათას ბავშვში – 20 მგ/დლ“ – წერია დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ გამოცემულ ბროშურაში.

ტყვიით მოშხამვის შედეგები ხშირად შეუმჩნეველია და მკურნალობის გარეშე რჩება. აშშ-სა და სხვა განვითარებულ ქვეყნებში პრევენციის მიზნით, ბავშვების სისხლში ტყვიის კონცენტრაციის საყოველთაო პირველადი სკრინინგი ტარდება. საქართველოში ასეთი კვლევა, რომელიც დაადასტურებდა ტყვიის მავნე გავლენას ბავშვთა და მოზადთა ჯანმრთელობაზე, არ ჩატარებულა.

ტყვიით მოწამვლას ასევე იწვევს, ინდუსტრიული წარმოების ნარჩენებით და ტყვიის შემცველი საწვავით გარემოს დაბინძურება, რაც პირველ რიგში ფეხმძიმე ქალებისა და ბავშვებისთვის არის საშიში. საქართველოს კანონმდებლობა ითვალისწინებს პასუხისმგებლობას ტყვიაშემცველი ბენზინის ან ტეტრაეთილტყვიის საქართველოში იმპორტის ან გაყიდვისთვის, თუმცა ამ სამართალდარღვევის აღმოჩენა დღეს არსებულ არც ერთ სტრუქტურას არ აკისრია.

იმისთვის, რომ დაიცვათ ბავშვები ტყვიით მოშხამვისგან: კვირაში ერთხელ აუცილებლად უნდა დაალაგოთ ოთახები სველი წესით, ასევე მოერიდეთ ბავშვებისთვის მეტალის შეფუთვით საკვების ყიდვას. ბავშვის საკვები მდიდარი უნდა იყოს რკინით, კალციუმითა და ცილებით, რადგან ისინი ზრდიან ტყვიისადმი ორგანიზმის გამძლეობას. ბავშვისთვის არასასურველია ზედმეტად ცხიმიანი საკვები, რადგან ცხიმი ხელს უწყობს საჭმლის მომნელებელ სისტემაში ტყვიის დიდი ხნით შეჩერებას.

დაავადებათა კონტროლისა და საზოგადოებრივი ჯანმრთელობის ეროვნული ცენტრის რეკომენდაციით, იმ შემთხვევაში თუ თვლით, რომ ბავშვს შეიძლება ჰქონდეს ტყვიით მოწამვლა, მიმართეთ ექიმს და მოითხოვეთ ტყვიის შემცველობაზე სპეციალური სისხლის ანალიზი. თუ ანალიზმა უჩვენა ტყვიის დასაშვებზე მეტი კონცენტრაცია, ექიმი ბავშვს დაუნიშნავს შესაბამისი მკურნალობის კურსს. ამავე დროს, მოთხოვეთ გარემოსდაცვით ორგანიზაციებს და სახელმწიფო სტრუქტურებს შეამოწმონ თქვენი საცხოვრებელი რაიონის ტყვიით დაბინძურების შესაძლო წყაროები და გამოიკვლიონ ნიადაგში ტყვიის შემცველობა.

წამების კადრების გავრცელებით არღვევს თუ არა „ობიექტივი“ კანონს?

ნათია კაპანაძე, მედიასამართლის სპეციალისტი

მაუწყებილის ქცევის კოდექსი და მაუწყებლობის შესახებ კანონი, ამ ორი აქტით რომ ვიმსჯელოთ, რამდენად კანონიერია წამების კადრების გავრცელება ტელევიზიის ეთერში?

მაუწყებლობის შესახებ კანონში წერია, რომ „არსებობს პროგრამული შეზღუდვები მაუწყებლებისთვის და ამ დროს აკრძალულია ისეთი გადაცემები, სადაც რაიმე ფორმით მოხდება შუღლის გაღვივება, დისკრიმინაცია, ძალადობის წაქეზება. ასევე აკრძალულია პორნოგრაფიის, ადამიანის ღირსებისა და ძირითად თავისუფლებათა შემლახავი ისეთი გადაცემების ან რეკლამის განთავსება, რომელიც შეიცავს უხამსობას.

მაუწყებელთა ქცევის კოდექსში უშუალოდ არის ჩამოთვლილი ის რეგულაციები, მსგავსი შემთხვევები როგორ უნდა გაშუქდეს. ყველაზე მნიშვნელოვანი არის ის, რომ მსგავსი მასალები შეიძლება გაუშვას მაუწყებელმა დილის 06 საათიდან 24:00 საათამდე დროის შუალედებში.

„ობიექტივი“ თავის განცხადებაში ამბობს კიდეც, რომ წამების კადრებს ავრცელებს ღამის პირველის ხუთი წუთიდან. შესაბამისად, ირღვევა თუ არა კანონი?

გარდა საათობრივი შეზღუდვისა, რომელიც არეგულირებს მსგავსი მასალების განთავსებას ეთერში, მაუწყებელთა ქცევის კოდექსში არის მითითებები, მაგალითად, დანაშაულის და ანტისოციალური ქმედების გაშუქებაზე – ამ შემთხვევაში მაუწყებელმა უნდა უზრუნველყოს ეჭვმიტანილთა, მოწმეთა, დაზარალებულთა და მათი ოჯახის წევრების კანონიერი ინტერესების დაცვა. ასევე მნიშვნელოვანია, რომ არ მოხდეს ახალი დანაშაულის წახალისება – კონკრეტულმა გადაცემამ არ უნდა გამოიწვიოს ანტისოციალური ქცევები. მნიშვნელოვანია, რომ მედიასაშუალებამ თავი აარიდოს ძალადობის სენსაციად გადაქცევას, ხოლო მსგავსი კადრების ეთერში მოხვედრით, ძალადობის ფაქტების სენსაციად გადაქცევას გვერდს ვერ ავუვლით.

ასევე მნიშვნელოვანია ის, რომ შოკისმომგვრელი მასალების გამოყენებისას ფრთხილი ანალიზი ჩაატაროს მაუწყებელმა, რადგან აუდიტორიის საავარაუდო რეაქცია უნდა გაითვალისწინოს. ანუ უნდა გაითვალისწინოს მსგავსი კადრების გავრცელების შემთხვევაში მოყვება თუ არა ადამიანის პირადი ცხოვრების ხელშეუხებლობა და ახალი დანაშაულებრივი ქმედება ხომ არ იქნება წახალისებულ-წაქეზებული. ეს არის ზოგადი წესები, რომელიც ვრცელდება მთლიანად 24 საათზე.

თუკი არსებობს ასეთი რისკი, შეუძლებელია მსგავსი კადრების ტირაჟირება გამართლდეს საზოგადოებრივი ინტერესით, რადგან მოლოდინი, რომ ახალი დანაშაულის წაქეზებით უფრო მეტი ზარალი დაუდგება საზოგადოებას, არის ძალიან მაღალი.

მარეგულირებელი კომისია თუ მიიჩნევს რომ კანონს არღვევს „ობიექტივი“, მაშინ რა მოხდება მაუწყებელთან მიმართებაში?

მაუწყებლობის შესახებ კანონში, სანქციების ნაწილში წერია, რომ კონკრეტული შემთხვევა დამოკიდებულია იმაზე, აქვს თუ არა წლის განმავლობაში მაუწყებელს სხვა სანქცია მიღებული.

არსებულ მოცემულობაში მარეგულირებელ კომისიას შეუძლია დაანონსებული ერთკვირიანი ჩვენება შეზღუდოს, კანონმდებლობით არსებობს ამის მექანიზმი?

ძირითადი მექანიზმი დანაშაულისა და ანტისოციალური ქმედების გაშუქების დროს არის მაუწყებელთა ქცევის კოდექსი. ამ კოდექსის თანახმად, თვითრეგულირების გამოყენებით უნდა შეჩერდეს მსგავსი ქმედება. მაგრამ გამომდინარე იქედან, რომ წამების კადრების ნაწილი შეიცავს უხამსობას, პორნოგრაფიის ნიშნებს, მნიშვნელოვანია მარეგულირებელმა იმსჯელოს რამდენად ცდება ეს თვითრეგულირების ფარგლებს და უნდა მიიღოს თუ არა კონკრეტული გადაწყვეტილება. ასეთ შემთხვევაში არ არის ნათელი, როგორი შეიძლება იყოს მარეგულირებლის გადაწყვეტილება. თუმცა, მე ვფიქრობ, მითითებაც კი, რომ ეს არ არის ქცევის კოდექსის შესრულება, ძალიან მნიშვნელოვანი იქნება სხვა მაუწყებლებისთვისაც და კონკრეტული ერთკვირიანი ანონსისთვისაც.

შეიძლება თუ არა მოხდეს ისე, რომ კომისიამ ვერ გასცეს თავისი რეკომენდაცია ერთ კვირაში?

ამის შესაძლებლობა არსებობს, რადგან ადმინისტრაციული წარმოება თავისთავში მოიცავს ვადებს, მაგრამ შესაძლოა ადმინისტრაციული წარმოების ვადები დაჩქარდეს. კომისიას შეუძლია ეს საკითხი სწრაფად განიხილოს.

თქვენ, პირადად, ხომ არ გაქვთ ინფორმაცია ამის თაობაზე – ახერხებს თუ ვერა უახლესი ერთი კვირის ვადაში განცხადების გავრცელებას კომისია?

ზუსტად არ მაქვს ინფორმაცია, მაგრამ მარეგულირებელი კომისიის გამოხმაურებები ბოლო პერიოდში იყო მყისიერი და მეტ-ნაკლებად იმოქმედა არსებულ სიტუაციაზე, ხარვეზების გამოსწორებაზე მედიაში. მგონი, კომისია შეძლებს სწრაფ რეაგირებას და, შესაბამისად, შეჩერდება გაშუქების ის ტენდენცია, რომელიც დღეს გვაქვს.

ხომ შეიძლება მაუწყებელმა არ გაიზიაროს რეკომენდაციები და ეთერში წამების კადრების განთავსება გააგრძელოს, როგორც ეს არის დაანონსებული…

ვარაუდი იმისა, რომ შესაძლოა ეს მასალები ბოლომდე ისე გავიდეს, როგორც დაანონსებულია, რა თქმა უნდა, არსებობს. მაგრამ გარდა იმ საათობრივი შეზღუდვისა, რომელიც არსებობს ქცევის კოდექსში, არსებობს სხვა რეგულაციები, რომელიც ძალადობის გაშუქებას ეხება. თუმცა, თუ კომისია გადაწყვეტს, რომ თვითრეგულირების ფარგლებშია საჩივარი განსახილველი, ეს დროში გაიწელება, რადგან ამ შემთხვევაში არსებობს 21-დღიანი ვადა. ამიტომაც ვფიქრობ, რომ მარეგულირებლის განცხადება შეიძლება იყოს შემაკავებელი ამ პროცესში.

ქალი და მამაკაცი თანაბარი უფლებით

მალხაზ ჭკადუა, საერთაშორისო გამჭვირვალობა საქართველოს ბათუმის ოფისის კოორდინატორი, მომხსენებელი: როცა ვსაუბრობთ გენდერულ თანასწორობაზე, ხშირ შემთხვევაში სიტყვა გენდერი იწვევს გაუგებრობას, ბევრს არ გვესმის ან არასწორად გვესმის. გენდერი – ეს არის ქალისა და მამაკაცის თანასწორობა, როგორ უნდა იყვნენ თანასწორნი? ამაზე შემდგომ ვისაუბრებთ, მანამდე კი გიჩვენებთ შვიდწუთიან ანიმაციას „არის თუ არა ოცნება რეალური”. ეს არის მულტფილმი ქალაქში მცხოვრები ოჯახის შესახებ, სადაც გადმოცემულია რამდენიმე ოჯახური პრობლემა, ყურადღებით უყურეთ ანიმაციას და თქვენთვის გონებაში მოინიშნეთ რა დაგამახსოვრდათ, დააკვირდით ქალის საქციელს, დააკვირდით მამაკაცის საქციელს, დააკვირდით შვილების საქციელს…

რა არის თქვენ გარშემო მცხოვრებ ოჯახებთან საერთო ან რა განასხვავებს? ვინ ოცნებობს და რაზე ოცნებობს თქვენი შეფასებით ამ ვიდეოს მიხედვით?

მანანა ქათამაძე, ღორჯომის საჯარო სკოლის მოსწავლე: ანუ ოჯახში ყველაფერი ქალზე იყო დამოკიდებული, სიზმარში კი ქალი ოცნებობდა, რომ ყველა საქმე თანაბრად გაენაწილებინა მეუღლესთან.
მალხაზ ჭკადუა: როგორ ფიქრობთ, საქართველოში ყველაფერი ქალებზეა დამოკიდებული, თუ ქალები და კაცები თანაბრად ინაწილებენ [მაგალითად, ბავშვის მოვლის, დაუთოვების, გარეცხვის თუ ა.შ.] საქმიანობას?

მელანო ქათამაძე, ღორჯომის საჯარო სკოლის მოსწავლე: ორივეს ვხედავთ. ანუ არის ოჯახები, სადაც თანაბრად ინაწილებენ და არის შემთხვევები, როდესაც მხოლოდ ქალზეა ყველაფერი დამოკიდებული. დღეს, ჩემი აზრით, მოვალეობები არ არის თანაბრად გადანაწილებული.

მალხაზ ჭკადუა: თქვენ როგორ ფიქრობთ, რა ასაკში შეიძლება ოჯახი შეიქმნას?
მენალო ქათამაძე, ღორჯომის საჯარო სკოლის მოსწავლე: 25-30 წლის ასაკში.
მალხაზ ჭკადუა: მეც ვფიქრობ, რომ 25 წელი არის მინიმალური ზღვარი, მაგრამ, სამწუხაროდ, ასე არ ხდება, საქართველოს ბევრ რეგიონში, განსაკუთრებით ქვემო ქართლში, გოგონებს ათხოვებენ ძალიან ადრე, უმეტეს შემთხვევაში მათ არ აქვთ საშუალება მიიღონ განათლება… აღმოსავლეთ ევროპაში არასრულწლოვანი გოგონების გათხოვების სტატისტიკით მე-2 ადგილას ვართ. თქვენი აზრით, რა შეიძლება იყოს ნაადრევი ქორწინების მიზეზი?

ეკა წინწკილაძე, დისკუსიის მონაწილე: ზოგიერთი ფიქრობს, რომ შეიძლება გაუთხოვარი დარჩეს, ალბათ ეს მშობლებზეა დამოკიდებული, რადგან ისინი ამბობენ, რომ თუ 15 წლის ვერ გათხოვდები, მაშინ შინაბერად ითვლები.
მალხაზ ჭკადუა: საქართველოსთვის უცხო არ ყოფილა ნაადრევი ქორწინება, დღესაც ავღანეთში, ინდოეთში არის ტრადიცია რვა-ცხრა წლის გოგონებს ათხოვებენ უფროსი ასაკის მამაკაცებზე – ეს არის გამოცხადებული პედოფილია, ეს არის დანაშაული, ამიტომ ჩნდებიან ბავშვები თანდაყოლილი დაავადებებით. გარდა იმისა, რომ ეს არის სოციალური სიმახინჯე, ეს არის ბიოლოგიური სიმახინჯის წყაროც, 11-12 წლის გოგონა ფიზიოლოგიურად არის აბსოლუტურად მოუმზადებელი იმისთვის, რომ შვილი გააჩინოს. სამწუხაროდ, აჭარა არის მესამე ადგილზე თბილისისა და ქვემო ქართლის შემდეგ ნაადრევი ქორწინების სტატისტიკით.თუ გახსოვთ რამდენმა გოგონამ ჩააბარა წელს ეროვნული გამოცდები, რამდენი წავიდა სოფლიდან?

შორენა ქათამაძე, ღორჯომის საჯარო სკოლის მასწავლებელი: წინა წლებთან შედარებით მოთხოვნა გაიზარდა გოგონებში. გაითავისეს, რომ უნდა ჩააბარონ ეროვნული გამოცდები, რომ განათლება აუცილებელია, 21-ე საუკუნეა და მიხვდნენ განათლების საჭიროებას. ხშირად არის შემთხვევა, როდესაც გოგონას უნდა განათლების მიღება, მაგრამ მშობლები არ აძლევენ ამის საშუალებას, შემდეგ გოგონები იძულებული ხდებიან გათხოვდნენ.

გვანცა ლომაია, იურისტი: მე დღეს მინდა გელაპარაკოთ არა როგორც იურისტი, არამედ როგორც ქალი, რომელმაც გადავწყვიტე, რომ მესწავლა და ჩემი კარიერა გამეკეთებინა, ვყოფილიყავი დამოუკიდებელი. მინდა გითხრათ, რომ ამ არჩევანით ვარ ბედნიერი. გენდერული ბალანსის დარღვევა თავისთავად გულისხმობს ოჯახში ძალადობას, საქართველოში ყოველი მე-11 ქალი არის ოჯახში ძალადობის მსხვერპლი. საქართველოს კონსტიტუციით თქვენ გაქვთ განათლების, შრომის, უსაფთხოების, ჯანმრთელობის უფლება, ძალადობა კი გულისხმობს ადამიანის კონსტიტუციით აღიარებული უფლებების ხელყოფას: ეკონომიკურ, სექსუალურ, ფსიქოლოგიურ და ფიზიკურ ძალადობას. მოხდება თუ არა ოჯახში ძალადობა, აუცილებლად უნდა დაუკავშირდეთ საპატრულო პოლიციას, საპატრულო პოლიცია კი გაატარებს შესაბამის ღონისძიებებს. საქართველოში საზოგადოება არ ლაპარაკობს ოჯახურ ძალადობაზე, არის ტაბუდადებული. ბევრს მიაჩნია, რომ ეს არის ოჯახის პრობლემა და ამაზე არ საუბრობენ ხმამაღლა, არ გაქვთ იმისი ვალდებულება, თავი დაუხაროთ და აიტანოთ ძალადობა, რომელმაც შეიძლება მთელი თქვენი ცხოვრება გაანადგუროს და თავი გაგრძნობინოთ უბედურად.

ბათუმში თერმოინდუსტრიას შოურუმი გაიხსნა

ლაშა სირაბიძე: „ბათუმის წყლისა“ და მერიის ხელმძღვანელებს საკრებულოში დავიბარებთ

„ბათუმის წყლის“ ყოველდღიური ანგარიშის ჩაბარება მერიის აღმასრულებელი ხელისუფლების პრეროგატივაა. ჩვენ, სისტემატურად, წელიწადში ერთხელ ან ორჯერ ვიბარებთ მერიის შპს-ებს და სიპებს. როდესაც პრობლემამ იჩინა თავი, რა თქმა უნდა, უნდა დავიბაროთ და მოვისმინოთ არგუმენტები, თუ რა ხდება ამ საკითხზე.

ბატონო ლაშა, ბოლოს როდის მოისმინეთ „ბათუმის წყლის“ საქმიანობის შესახებ ანგარიში?

როგორც მახსოვს, ფრაქცია „ქართულ ოცნებას“ ჰყავდა მოწვეული, დაახლოებით 5-6 თვის წინ, ზუსტი თარიღი აღარ მახსოვს.

რა დარღვევების შესახებაც უწერია სახელმწიფო აუდიტის სამსახურს თავის დასკვნაში, მაშინ გამოვლინდა მსგავსი ტენდენცია?

ჩვენ, ყოველ შემთხვევაში, ასე ფუნქციონალურად ბოლომდე არ ვიყავით ჩაწვდენილი საქმიანობის ფინანსურ ნაწილში, უფრო ძირეულ საკითხებს მერია აკონტროლებს. ახლა ვხედავთ, რომ რეალურად დასჭირდა მეტი კონტროლი, მეტი პასუხისმგებლობა და მეტი გამოთხოვნა იმ საკითხების, რომელიც დღესდღეობით შეიქმნა. სავარაუდოდ, შესაძლებელია, რომ პრობლემა საერთოდ არ იყოს შექმნილი, მაგრამ ჩვენ, ყოველი შემთხვევისთვის, დაგვაინტერესა იმიტომ, რომ, ფაქტობრივად, აჟიოტაჟია ატეხილი. დღეს ვფიქრობთ, რომ ოფიციალურად გავგზავნოთ წერილი ინფრასტრუქტურის კომისიამ, როგორც საფინანსო კომისიამ და მოვისმინოთ საერთო ანგარიში.

როგორ ფიქრობთ, როდისთვის იქნება მერია მზად ამ ანგარიშის წარმოსადგენად?

ჩვენ ოფიციალურ წერილს მივწერთ დღეს და აქედან გამომდინარე ვფიქრობ, რომ მალე მოხდება ეს შეხვედრა. ეს საქმე საფინანსო კომისიის პრეროგატივაა, მაგრამ ბატონი თენგიზი [თენგიზ აფხაზავა – ბათუმის საკრებულოს საფინანსო-საბიუჯეტო კომისიის ხელმძღვანელი] არის მივლინებაში. აქედან გამომდინარე მათი კომისიის გადაწყვეტილება ჩემთვის უცნობია. სავარაუდოდ, ბატონ თენგიზს დაველოდებით და იმის შემდეგ მოვიწვევთ წყალკანალის დირექტორსა და სხვა პიროვნებებს.

საფინანსო-საბიუჯეტო კომისიის დასკვნაში, ბიუჯეტის შესრულების ნაწილში უწერიათ, რომ მერია არ ითვალისწინებს მათ შენიშვნებსა და რეკომენდაციებს. რას ფიქრობთ, ახლა შეძლებთ მერიის ყურადღების მიქცევას?

რა თქმა უნდა, მერია გაითვალისწინებს ჩვენს შენიშვნებს.

ახალი სალარო აპარატები ბაზარზე

საკონტროლო სალარო აპარატების სახელმწიფო რეესტრში შეტანილ იქნა „სამ მოდულის“ აქტივაციისათვის საჭირო მონაცემების მქონე “DATECS DP-25”მოდელის საკონტროლო სალარო აპარატი, რომლის რეალიზაციასა და მომსახურებას უზრუნველყოფს შპს „კასა ჯი“ – აცხადებენ შემოსავლების სამსახურში.

ე.წ. „სამ მოდული” (SAM MODUL) შემუშავებული იქნა შემოსავლების სამსახურში და ის მიზნად ისახავს საკონტროლო სალარო აპარატებისათვის ერთიანი სტანდარტისა და უსაფრთხოების მექანიზმების შექმნას. ამდენად, ნებისმიერი კომპანია, რომელიც წარადგენს ამ სტანდარტის შესაბამის სალარო აპარატებს, შეუძლიათ შემოვიდნენ ამ ბაზარზე.

„ბათუმელების“ ინფორმაციით სალარო აპარატების შემოტანას კიდევ ორი კომპანია გეგმავს. რაც შეეხება ფასებს, ფაქტობრივად განსხვავება არ არის, თუმცა შემოსავლების სამსახურში აცხადებენ, რომ ფასებს, რამდენიმე ოპერატორის არსებობის პირობებში, ბაზარი დაარეგულირებს.

„კასა ჯი“ საკონტროლო სალარო აპარატების რეალიზაციას უკვე ახორციელებს თბილისში, რუსთავში, ქუთაისსა და ბათუმში [ოფისი ფიროსმანის ქუჩაზე].

„კასა ჯი“-ს ვებგვერდის ინფორმაციის თანახმად „DATECS DP-25 წარმოადგენს პროგრამირებად საკონტროლო სალარო აპარატს. მისი პარამეტრები ითვალისწინებს მომხმარებლის მომსახურების მოთხოვნებს და მაღაზიების, სუპერმარკეტების, აფთიაქების, რესტორნებისა და ნებისმიერი საცალო ოპერაციის ობიექტების ანგარიშწარმოებას. აპარატი უზრუნველყოფს სრულ აღრიცხვას.

სსა „DATECS DP-25“ მუშაობს SAM მოდულის აქტივაციით, რომელიც არის ISO/IEC 7810-ის სტანდარტის შესაბამისად შექმნილი. იგი აღნიშნული სტანდარტის მიხედვით მუშაობს გარე მოწყობილობასთან და გამოიყენება დაცულობის და უსაფრთხოების უზრუნველყოფისთვის.

ტექნიკური მომსახურების ღირებულება: 6 თვე – 30 ლარი; 12 თვე – 60 ლარი;

აპარატის ღირებულება: 6 თვის მომსახურებით: 420ლ; 12 თვის მომსახურებით 450ლ“.

„ჯორჯიან სერვის ნეტვორკი“ ბულგარული კომპანია „დეიზი ტექნოლოჯის“ მიერ წარმოებულ სალარო აპარატების რეალიზაციასა და მომსახურებას ახორციელებს. ამ კომპანიაშიც აპარატის ღირებულება ერთი წლის მომსახურებით 450 ლარია.

საჯარო რეესტრის მონაცემებით შპს „კასა ჯი“, ერთი წლის წინ, 2014 წლის ოქტომბერშია დარეგისტრირებული. კომპანის მფლობელები კი თამაზ ტაბატაძე და დავით შენგელია არიან.

თამაზ ტაბატაძე რეესტრის მიხედვით 50% წილს ფლობს ასევე კომპანია „სერვის ლაინი“-ში, ხოლო 20%-ს შპს „RS Line“-ში.

რაც შეეხება დავით შენგელიას, ის მეწილეა შემდეგ კომპანიებში: შპს „აბა და კომპანია“ [წილის 3%], „ვ. ს. კომპანია” [30%] და „ბორანი“ [100%].

„ჯორჯიან სერვის ნეტვორკი“-ს 100% წილის მფლობელი კი ბულგალერი ევგენი სტაიკოვ მანახოვია.

მოქმედი კანონმდებლობით, საკონტროლო სალარო აპარატი შემოსავლების აღრიცხვისა და საგადასახადო კონტროლის ეფექტურად განხორციელების მიზნით გამოიყენება და სავალდებულოა ნაღდი ფულით ანგარიშსწორებისას, გარდა საგადასახადო კოდექსით გათვალისწინებული გამონაკლისებისა.

გოგი თოფაძე: ცოტა ხანში სტალინის სურათი ყველგან დაიკიდება

„სტალინის სურათი ყველა კაბინეტში დაიკიდება მალე, იმიტომ, რომ ის იყო გენიალური პიროვნება და მე-20 საუკუნეში აღიარებულია. მალე ყველა მიხვდება, რომ ამ კაცმა დიდი სიკეთე გააკეთა და მთელი მსოფლიო თვლის ერთ-ერთ ყველაზე დიდი პიროვნებად მე-20 საუკუნის. ის კაცი იყო სიმბოლო საქართველოსი, დღეს რომ ჩადიხარ საღაცა… ჩინეთში ჩავიდა ჩვენი დელეგაცია. იცით რა შეხვედრა იყო, სტალინის ქვეყნიდან არიანო და გადაყვენ ყველას.

მე ესე ვფიქრობ – საქართველოში, ქართველი კაცი, მე-20 საუკუნის უდიდეს ქართველს მთელი მსოფლიომ იცის, რომ ის იყო ქართველი, რომელმაც დაამარცხა ფაშიზმი… ამიტომ მაგის ლანძღვა მე მიმაჩნია, რომ არ არის ქართველი კაცის საქმე. პირიქით – მე ვფიქრობ, ის რაც მან გააკეთა, როგორ დააყენა რუსეთი ფეხზე, როგორ მიაღწია იმას 15-20 წელიწადში ეგეთი უძლიერეს ქვეყანა შექმნა. რა თქმა უნდა, ბევრი სასიკეთოც გააკეთა ქართველებისთვის, ახლა მაგას ნუ ჩამოვყვებით, რომელიც არ ჩანს დღეს, გააკეთა ძალიან ბევრი. ქართველ კაცს მაგის ლანძღვის უფლება მორალური არ უნდა ჰქონდეს“.

ჟურნალისტის კითხვაზე, თქვენს კაბინეტში გაქვთ სტალინის სურათი? – თოფაძემ ასე უპასუხა: „არა, ჯერ არა, დავკიდებ სიამოვნებით. სახლში მაქვს, ბევრი სურათები მაქვს, წიგნები მაქვს ძაან ბევრი, წაგაკითხებთ იმ წიგნებს და იქნება აზრი შეგეცვალოთ სტალინზე“.

სტალინი აღიარებულია როგორც ტირანი, რომლის მმართველობის დროს მილიონობით ადამიანი, მათ შორის ქართველები, იქნა დახვრეტილი და რეპრესირებული. საქართველოში სტალინის მსხვერპლთა რეაბილიტაციისთვის სახელმწიფომ კომპენსაცია დააწესა.

კომუნისტური ტოტალიტარული სიმბოლიკის წინააღმდეგ ბრძოლა საქართველოს დეკლარირებული პოლიტიკაა. საქართველოს მიღებული აქვს კანონი “თავისუფლების ქარტიის” შესახებ, რომლის მიზანთა შორის არის “საბჭოთა და ფაშისტური იდეოლოგიების საფუძვლების გაღვივების წინააღმდეგ პრევენციული ღონისძიებების განხორციელება, საბჭოთა და ფაშისტური სიმბოლიკების, საკულტო ნაგებობების, ძეგლების, მონუმენტების, ბარელიეფების, წარწერების, ქუჩების, მოედნების, სოფლებისა და დაბების სახელწოდებების აღმოფხვრა, ასევე საბჭოთა და ფაშისტური იდეოლოგიების მატარებელი და პროპაგანდის სხვა საშუალებების აკრძალვა”.

რესპუბლიკური საავადმყოფოს მშენებლობაზე ტენდერი დასრულდა

საავადმყოფოს მშენებლობაზე ტენდერი შპს „სტადიონმა“ გამოაცხადა, რომლის 100% წილის მფლობელი აჭარის ფინანსთა და ეკონომიკის სამინისტროა. მშენებლობა 2015-2018 წლების ბიუჯეტიდან დაფინანსდება.

ტენდერში მონაწილეობდნენ შემდეგი კომპანიები: „ანაგი“, ბოლო შეთავაზება – 25 900 000 ლარი; „დაგი“ – 24 855 000 ლარი; „ო.შ.-ინშაათი“ – 22 284 763 ლარი და „საბა კონსტრაქშენი“ – 22 172 764 ლარი.

სწორედ „საბა კონსტრაქშენის“, როგორც ყველაზე დაბალი შეთავაზების მქონე პრეტენდენტის მიერ წარმოდგენილ ტექნიკურ დოკუმენტაციას შეისწავლის სატენდერო კომისია. კომისიის თავმჯდომარე შპს `სტადიონის~ დირექტორი ჯემალ ბოლქვაძეა.

„ყველაზე დაბალი ფასის შეთავაზება არ ნიშნავს, რომ პრეტენდენტი იმავდროულად ტენდერში გამარჯვებულია. უნდა მოხდეს შერჩევა-შეფასება კანონის შესაბამისად… პირველ ეტაპზე, კომისია შეისწავლის, თუ რამდენად შესაბამისობაშია ამ კომპანიის დოკუმენტაცია სატენდერო მოთხოვნებთან,“ – უთხრა `ბათუმელებს“ ჯემალ ბოლქვაძემ.

მეორე ეტაპზე კომპანია წარადგენს საკვალიფიკაციო მონაცემებს – ესაა ადმინისტრაციული ორგანოებიდან წარმოსადგენი ცნობები [ძირითადად ფინანსური – ქონებაზე ყადაღის არარსებობის, საბიუჯეტო დავალიანების არქონის და ა.შ.].

სატენდერო კომისიას ხელშეკრულების გაფორმებამდე მაქსიმუმ 23 სამუშაო დღე აქვს. ამასთან, პრეტენდენტის დისკვალიფიკაცია ნებისმიერ ეტაპზე შეიძლება. კითხვაზე, საკმარისია თუ არა არსებული მოთხოვნები კომპანიის შესასწავლად და იმის სათქმელად, რომ ხელშეკრულების დადების შემთხვევაში ეს კომპანია საქმეს ბოლომდე მიიყვანს – ჯემალ ბოლქვაძე ამბობს, რომ `სატენდერო პირობებით წარმოსადგენი დოკუმენტაცია მაქსიმალურად ახლოსაა იდეალურთან და რაღაც რისკებისგან დაზღვეული ბოლომდე არავინაა და 100%-იან რისკებს ვერავინ გათვლის~.

არის თუ არა იმის გარანტია, რომ საავადმყოფოს მშენებლობა ოლიმპიური სტადიონის პროექტირების ბედს არ გაიზიარებს? – ჯემალ ბოლქვაძე ამბობს, რომ ის სხვა პროცედურა იყო, ეს სხვა პროცედურაა.

სატენდერო დოკუმენტაციის თანახმად, სამუშაოების შესრულების ვადად განისაზღვრება ხელშეკრულების გაფორმებიდან 2018 წლის პირველ აპრილამდე. ტენდერში გამარჯვებული ვალდებულია დაასრულოს არსებული შენობა-ნაგებობების დემონტაჟი.

ახალი საავადმყოფოს შენობა (მთავარი კორპუსი) და დამხმარე ნაგებობები გეგმით განთავსდება გრიბოედოვისა და პუშკინის ქუჩების გასწვრივ, ასწლოვანი მცენარეებით გაშენებული ბაღის გარშემო. ცენტრალური შესასვლელი მოეწყობა აბუსერიძისა და გრიბოედოვის ქუჩების კუთხეში, ხოლო სასწრაფო დახმარების მანქანები საავადმყოფოში პუშკინის ქუჩიდან მოხვდებიან, სამეურნეო შესასვლელიც იქნება პუშკინის ქუჩიდან. შენობის მთავარი კორპუსი განსხვავებული სიმაღლის სამი: A, B და C ბლოკისაგან შედგება. A და B ბლოკი ხუთსართულიანია, C ბლოკი _ ოთხსართულიანია. ტერიტორიაზე მოეწყობა ღია ავტოსადგომი პერსონალისა და მიმსვლელებისთვის.

სამუშაოების დაწყებამდე ტენდერში გამარჯვებულმა უნდა აღრიცხოს მწვანე ნარგავები. თუ საჭირო გახდება მათი მოჭრა ან გადარგვა, აღნიშნული საკითხი უნდა შეთანხმდეს შემსყიდველთან. ამასთან, ტერიტორიის შუაში არსებული სკვერი გაიმიჯნება სამშენებლო მოედნისგან და მშენებლობის პერიოდში მის გარშემო მოეწყობა დროებითი ღობე.

მუსლიმთა დავა ბათუმის სასამართლოში – ღორის თავი მედრესესთვის განკუთვნილ შენობაზე(ვიდეო)

მოსარჩელეებს მიაჩნიათ, რომ მნიშვნელოვანია სასამართლოში დადგინდეს მოპასუხეების მხრიდან დისკრიმინაციული მოპყრობის ფაქტი, რასაც, მათი შეფასებით, მუსლიმი თემის მიმართ რელიგიის თავისუფლების შეზღუდვა მოჰყვა.

“თავისუფალ ჟურბალისტთა” სახლის მიერ მომზადებულ რეპორტაჟში მოპასუხეები და მათი წარმომადგენლები კომენტარს არ აკეთებენ.

სიუჟეტი მომზადებულია პროექტის ფალგებში “ახალგაზრდებში დემოკრატიული იდეების პოპულარიზაცია” NED-ის ფინანსური მხარდაჭერით.

ქობულეთში გაზგასამართი სადგური დააყაჩაღეს

“ბათუმელების” ინფორმაციით, თავდასხმაში სამი ადამიანი მონაწილეობდა.

შინაგან საქმეთა სამინისტროს ცნობით, მიმდინარეობს საგამოძიებო ოპერატიული სამძებრო საქმიანობა. ბრალდებულები ჯერ დაკავებულები არ არიან. გამოძიება სისხლის სამართლის კოდექსის 179-ე მუხლით მიმდინარეობს, რაც ყაჩაღობას ნიშნავს.

კანონის მიხედვით, ყაჩაღობა არის თავდასხმა სხვისი მოძრავი ნივთის მართლსაწინააღმდეგო მისაკუთრების მიზნით, ჩადენილი სიცოცხლისათვის ან ჯანმრთელობისათვის საშიში ძალადობით ანდა ასეთი ძალადობის გამოყენების მუქარით, – ისჯება თავისუფლების აღკვეთით ვადით ხუთიდან შვიდ წლამდე.

ხელბურთის ნაკრები 2017 წლის ჩემპიონატისთვის ემზადება

ფოტო: საქართველოს ხელბურთის ეროვნული ფედერაციის ვებგვერდიდან

საქართველოს ხელბურთის ეროვნულ ნაკრებს ახალი მწვრთნელი ლევან გელაშვილი დაარიგებს, ეს შეხვედრა მისთვის პირველი ტურნირი იქნება. წინა შესარჩევ ტურნირში საქართველოს ნაკრებს ირაკლი კეკელიძე და ბექა ორჯონიკიძე ხელმძღვანელობდნენ. მსოფლიო ჩემპიონატის ფინალური ტურნირი 2017 წლის იანვარში საფრანგეთში გაიმართება.

მეხუთე საერთაშორისო ფესტივალი Agro Batumi 30 ოქტომბერს გაიხსნება

გამოფენის თანაორგანიზატორია აჭარის მთავრობა, სოფლის მეურნეობის სამინისტრო, ბათუმის მერია, აჭარის სავაჭრო-სამრეწველო პალატა და საქართველოს საერთაშორისო ინვესტორთა ასოციაციაა.

მონაწილე კომპანიებს სამი დღის განმავლობაში საშუალება ეძლევათ საკუთარი პროდუქცია მომხმარებელს გააცნონ და რეკლამირება გაუწიონ. გამოფენაში მონაწილეობენ: საქართველო, თურქეთი, უკრაინა, ირანი.

გამოფენის მიმდინარეობისას იგეგმება სარეკლამო და საინფორმაციო ტურები, პრეზენტაციები, შეხვედრები მასმედიის წარმომადგენლებთან.

ბათუმის მერია ერთი მილიონი ლარის საახალწლო აქსესუარებს ყიდულობს

სატენდერო დოკუმენტაციის მიხედვით, გამარჯვებულმა კომპანიამ მერიას 27 დასახელების საახალწლო აქსესუარი უნდა მიაწოდოს. სატენდერო დოკუმენტაციის მიხედვით, შესყიდული აქსესუარების ჩამონათვალში შედის როგორც საახალწლო ნაძვის ხის მორთულობები, ასევე ქუჩის დეკორაციებიც.