საზოგადოებრივი მაუწყებელი 15 ერთეული მე-3 კლასის მსუბუქი ავტომობილის შეძენას გეგმავს, რისთვისაც სულ 597 ათას 990 ლარი აქვს გათვალისწინებული. ავტომობილებს მაუწყებელი თანმდევი საგარანტიო პირობების ფარგლებში გეგმიური ფასიანი მომსახურებით შეიძენს.

ავტომობილების შესყიდვაზე ტენდერი გამოცხადებულია, რომელიც მიმდინარე წლის 26 დეკემბერს დასრულდება. გამარჯვებულმა ავტომობილები საზოგადოებრივ მაუწყებელს, შესაბამისი ხელშეკრულების გაფორმებიდან 80 დღეში უნდა მიაწოდოს.

სხვადასხვა ტექნიკურ პირობებთან ერთად, მაუწყებელი ითხოვს, რომ ავტომობილების კარებების რაოდენობა „მაუწყებლის საქმიანობის სპეციფიკის გათვალისწინებით“ იყოს – 5 [ოთხი მძღოლის და მგზავრების და ერთი საბარგულის კარი]. ამასთან, ავტომობილების ძარის ფერი [სსიპ „საზოგადოებრივი მაუწყებლის“ ბრენდის კორპორატიული ფერის გათვალისწინებით] უნდა იყოს – წითელი ან თეთრი [დაუშვებელია სხვა ფერის ავტომობილების შეთავაზება].

ტენდერის პირობების მიხედვით, „გეგმიური ფასიანი მომსახურების დაფინანსება ასევე განხორციელდება 2018, 2019 და 2020 წლებში. ავტომობილების საგარანტიო ვადა უნდა იყოს 5 წელი ძირითად აგრეგატებზე, 3 წელი ან 150000 კილომეტრი – სრულ ავტომანქანაზე, გარდა სწრაფცვეთადი ნაწილებისა…

მიმწოდებელ ორგანიზაციას უნდა გააჩნდეს ავტოტექმომსახურების გაწევისთვის საჭირო ტექნიკური მოწყობილობები და ქალაქ თბილისის ფარგლებში გამართული ავტობოქსი, სადაც მიმწოდებელმა უნდა უზრუნველყოს, თანმდევი საგარანტიო პირობების ფარგლებში გეგმიური ფასიანი მომსახურების გაწევა შემსყიდველის ავტომანქანებზე.

საზოგადოებრივმა მაუწყებელმა მაღალი გამავლობის, „სუზუკი ვიტარას“ მარკის 20 წითელი მსუბუქი ავტომობილი 728 822 ლარად უკვე შეიძინა.

ამ ავტომობილების შესყიდვაზე ელექტრონული ტენდერი 2017 წლის ივლისში გამოცხადდა და მასში მონაწილეობა ორმა კომპანიამ მიიღო – სს „ფრანს ავტომ“ და შპს „ჯი-თი მოტორსმა“. ტენდერში „ჯი-თი მოტორსმა“ გაიმარჯვა. ამ ტენდერში ავტომობილის ფერი [მხოლოდ წითელი ] ერთ-ერთი აუცილებელი მოთხოვნა იყო.

საზოგადოებრივი მაუწყებლის ფინანსებისა და ადმინისტრაციის ბლოკის დირექტორის, ნოდარ ჭიჭინაძის განცხადებით, ერთი ავტომობილი 36 441 ლარი და 60 თეთრი დაჯდა. მისი თქმით, ეს რეალურ საბაზრო ფასზე 12 ათასი ლარით ნაკლებია.

საპატიმროდან გათავისუფლების შემდეგ ხმის ჩამწერი სტუდია მოაწყო, ხალხური სიმღერის ანსამბლში დაიწყო სიმღერა და მიხვდა, რომ მუსიკა იყო  საქმე, რომელიც სამომავლოდ უნდა ეკეთებინა. ბედნიერია და თავს კარგად გრძნობს. ოზურგეთის ხმის ჩამწერ პატარა სტუდიაში ყოველდღიურად ფუსფუსებს. დიდი სამომავლო გეგმების განხორციელებას, რომელიც ისევ მუსიკას უკავშირდება მუდმივი შრომა სჭირდება. ყოფილი პატიმარი, გრიგოლ მახარაძე საკუთარ ცხოვრებისეულ გამოცდილებაზე გვიამბობს:

„მეგობართან ერთად ხმის ჩამწერი სტუდია გავხსენი ოზურგეთში, ჩვენივე აპარატურა გვაქვს. ეს არ არის სტაბილური სამსახური, მაგრამ დღესასწაულებზე, სასწავლო წლის დასაწყისში, წლის დასასრულს გვაქვს ხშირად შეკვეთები, ფონოგრამებს ვწერთ ღონისძიებებისთვის.

ხანდახან ქორწილში დედოფალი წერს საიდუმლოდ რამე სიმღერას საქმროსთვის, ან საქმრო საცოლისთვის, რომ ქორწილში ერთმანეთს სიურპრიზი მოუწყონ. ელექტროგიტარაზე ვუკრავდი ადრე სოლო პარტიებს ერთ-ერთ როკ-ჯგუფში, ის ბენდი ისევ არსებობს, მე რაღაც დროის მერე თბილისიდან ჩემს რაიონში, ოზურგეთში დავბრუნდი და აქ დავიწყე საქმიანობა“, – გვიყვება გრიგოლ მახარაძე.

საყვარელ საქმეს აკეთებს, მუსიკალურ პროგრამებზე მუშაობს მეგობართან ერთად, რომელიც ხმის რეჟისორია. მუსიკა გრიგოლის გატაცება და უკვე პროფესიაცაა. ამბობს, რომ ოზურგეთის ხმის ჩამწერ სტუდიაში მუშაობისას ბევრ უცნაურ და საინტერესო ადამიანს ხვდება.

ოცნებობს კონცერტების გასამართად საჭირო აპარატურა ჰქონდეს, ბენდი გააკეთოს და საქართველოს პატარა ქალაქებში, რაიონებსა და სოფლებში კონცერტები ჩაატაროს. აქამდე ყოველთვის სხვადასხვა ჯგუფში უკრავდა სოლო გიტარის პარტიებს და ცალკე თავისი ნამუშევრები არავისთვის მოუსმენინებია, სიმღერები და სოლოჩანაწერები დაუგროვდა და მიიჩნევს, რომ მომავალში კონცერტებზე შეიძლება მსმენელს თავისი მუსიკის ცოცხალი შესრულება შესთავაზოს:

„ზაფხულობით ბათუმის კლუბებში, ბარებში ვუკრავთ ხოლმე ბენდთან ერთად, მაგრამ ეს სეზონური სამუშაოა, დროებითი. ვუკრავდით ერორ 404-ში და ბაიკერების ბარში: Freedom Lovers Bar.

გრიგოლ მახარაძის ჩანაწერებს, შეგიძლიათ Soundcloud-ზე მოუსმინოთ.

„Abandoned Memories”

Abandoned Memories by Grigol Maxaradze

„One Day Of Summer”

Oen Day Of Summer by Grigol Maxaradze

ვოცნებობ იმდენი საშუალება გამოვნახო ჩემივე ბენდის საქველმოქმედო კონცერტები მოვაწყო საქართველოს სხვადასხვა ქალაქში. დიდი დახმარება გაუწია ჩვენი ხმის ჩამწერ სტუდიას და პირადად მე დემოკრატიის ინსტიტუტმა და გურიის ახალგაზრდულმა რესურსცენტრმა,  ყოფილი პატიმრების გაძლიერების პროექტის ფარგლებში მათ ელექტროგიტარა Schecter C7 გადმოგვცეს.

მუსიკის და ინსტრუმენტის გარეშე არ შემიძლია. გიტარა ჩემი ცხოვრების ერთ-ერთი ყველაზე მთავარი ნივთია. ამ საქმით თავის რჩენა საქართველოში ზღაპარია, მაგრამ რაც იცი და გიყვარს, იმას უნდა აკეთებდე მთელი გულით. არ ვიცი სხვა საქმე ასე გამომივიდოდა თუ არა“, – ამბობს გრიგოლი და ბავშვობას იხსენებს, როცა ბებია ოცნებობდა შვილიშვილი ექიმი ჰყოლოდა:

„ასე უნდოდა ბებიას, მაგრამ მუსიკოსი შერჩათ ხელში, თუმცა არავის გაკვირვებია: ბებია, ბაბუა, დედ-მამა, ყველა კარგად მღეროდა ჩვენს ოჯახში, მახსოვს ბებია შვიდსიმიან გიტარაზეც უკრავდა. ჩვეულებრივ ამბად მიიღეს ჩემი მუსიკისადმი ლტოლვა და ინტერესი. მეუღლე და ორი შვილი, გოგო-ბიჭი მყავს – 14 და 15 წლის, მგულშემატკივრობს ოჯახი. ყველა პროექტი იციან, რაზეც ვმუშაობთ ხოლმე სტუდიაში და საერთო ფაციფუცში არიან ჩაბმულები“.

გრიგოლ მახარაძის ხმის ჩამწერი სტუდია  გურულ როკ-ჯგუფ „ლურჯ იალქანთან“ თანამშრომლობდა, ერთად წერდნენ სიმღერებს, მერე „ლურჯი იალქანი“ ბათუმში გადმოვიდა.

გრიგოლს მეგობართან ერთად ოზურგეთის მოზარდმაყურებელთა თეატრში მიუზიკლი: „სკოლა იქსი“ აქვს დადგმული, რომელშიც თეატრის მსახიობები თამაშობდნენ. მიუზიკლი სკოლის მოსწავლეების უფროსებთან ურთიერთობას, ამ ასაკის თავისებურებებს და თინეიჯერების ზოგად პრობლემებს ეხებოდა. სტუდია ასევე თანამშრომლობს ოზურგეთის კულტურის ცენტრთან და მზად არის გურიის რეგიონის ნებისმიერ მცხოვრებს მოემსახუროს ხმისა და ფონოგრამის ჩაწერის სერვისით.

                                                     გრიგოლ მახარაძე

გრიგოლ მახარაძე საპატიმროდან 2007 წელს გათავისუფლდა. ამ წლებზე საუბარი არ სურს. ამბობს, რომ ვერასდროს წარმოიდგენდა ოდესმე გისოსებს მიღმა თუ აღმოჩნდებოდა. მოულოდნელი, უსიამოვნო სიურპრიზი ცხოვრებისგან მშვიდად მიიღო და საკანში ყოფნისას ბევრი თავისუფალი დრო ინგლისურის გაკვეთილებით შეავსო: მოიმარაგა წიგნები, ვინც საერთოდ არ იცოდა ენა, თავიდან დააწყებინა სწავლა, ვინც იცოდა, მათ გასაუმჯობესებელ სავარჯიშოებს აკეთებინებდა და ასე აქცია ციხის წლები საგანმანათლებლო პერიოდად.

„ყველაფერი რაღაცისთვის ხდება“, – ამბობს გრიგოლ მახარაძე. – „ციხემ რაღაცები მასწავლა კიდეც, მაგალითად ის, რომ როცა ცხოვრება ახალ შანსს, ახალ გზებს გთავაზობს, აუცილებლად უნდა იყო აქტიური, მონდომებული, პასიური წლების ასანაზღაურებლად და წინ წახვიდე.

ხალხურ ანსამბლ „ვახტანგურში“ დავიწყე სიმღერა გათავისუფლების შემდეგ და მივხვდი – მუსიკა იყო წარსულის ცუდი გამოცდილების გადაფასებისთვის საუკეთესო საშუალება, კეთილი, თბილი შუქი, რომელიც მომავლის გზას მინათებდა. კარგად ვარ, საყვარელ საქმეს ვაკეთებ და ჩემი მთავარი საქმე მინდა ყოველთვის მუსიკა იყოს“.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები შესაძლოა არ გამოხატავდეს დონორი ორგანიზაციის თვალსაზრისს.

დღეს, 15 დეკემბერს, „თავისუფალ ჟურნალისტთა სახლმა“ ესეების კონკურსის გამარჯვებულები გამოავლინა და დააჯილდოვა. კონკურსანტებმა ესეები მოამზადეს თემაზე – „რატომ ევროპა“. ესეების კონკურსს სამი გამარჯვებული ჰყავს.

„რატომ ევროპა“-ს გამარჯვებულებს – ლილე მესხიძეს, თამარ თურაძესა და მალხაზ რეხვიაშვილს, საჩუქრად ტექნიკის ვაუჩერები გადაეცათ. კონკურსის ერთ-ერთმა გამარჯვებულმა, თამარ თურაძემ თავის პრიზი კონკურსის ყველა მონაწილის სახელით სოფელ გელაურში, ბოშათა დასახლებაში მცხოვრებ თანატოლს – ჯუმბერ ალიმოვს გადასცა.

ესეების კონკურსის ყველა მონაწილეს ასევე გადაეცათ წიგნების ვაუჩერი. 

კონკურსის სულ 18 ახალგაზრდა იღებდა მონაწილობას.

ყველა მათგანის ნამუშევარი შეგიძლიათ იხილოთ აქ: თამთა თავართქილაძე, ლანა კაპანაძე, ლიზა კახაბერიძე, მალხაზ რეხვიაშვილი, ნინო გოლიაძე, ნინო დიდმანიძე, დავით ჯინჭარაძე, თაკო ნინიძე, ლილე მესხიძე, ნინი თურაძე, თამარ თურაძე, მარიამ მიქელაძე, ცირა ჯგერენაია, ხატია ზუხუბაია, ხატია რომანაძე, თინათინ გიორგაძე, შოთა მორთულაძე და ივერი შაინიძე.

ესეების კონკურსი “რატომ ევროპა” „თავისუფალ ჟურნალისტთა სახლმა“ გამოაცხადა პროექტის  ფარგლებში „ანტიდასავლური დეზინფორმაციის წინააღმდეგ აჭარაში“. კონკურსის მიზანი ახალგაზრდებში ევროპული ღირებულებების პოპულარიზაცია და სტუდენტთა/მოსწავლეთა ცნობიერების ამაღლება იყო.

პროექტს – „ანტიდასავლური დეზინფორმაციის წინააღმდეგ აჭარაში” – ახორციელებს „თავისუფალ ჟურნალისტთა სახლი”, აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის მხარდაჭერით და აშშ საერთაშორისო განვითარების სააგენტოს (USAID) ფინანსური დახმარებით.

ბათუმში, ფარნავაზ მეფისა და ქუთაისის ქუჩების კვეთაში, მოქალაქე იური ბასილია კულტურული მემკვიდრეობის ძეგლზე დაშენების ნებართვას ითხოვს. ამის თაობაზე მან აჭარის კულტურული მემკვიდრეობის საგაგენტოს უკვე მიმართა და პროექტიც წარუდგინა. ესკიზის  მიხედვით მოქალაქე ორსართულიან ძეგლზე ერთი სართულის დამატებას გეგმავს, რომელსაც შუშის ფასადი ექნება.

სააგენტოს კულტურის საბჭოს ეს საკითხი 15 დეკემბერს უნდა განეხილა, თუმცა სხდომა ქვორუმის არარსებობის გამო გადაიდო.

საჯარო რეესტრის მონაცემებით, იური ბასილაია ამ სახლში 111, 40 კვადრატულ მეტრ ფართობს ფლობს. სახლს კიდევ რამდენიმე მესაკუთრე ჰყავს.

ქედის მერიამ 2018 წლის ბიუჯეტის პროექტის საჯარო განხილვა მოაწყო. ქედაში განსახორციელებელ პროექტებსა და პრიორეტეტებზე მუნიციპალიტეტის მერიის მთავარმა ფინასისტმა ჯემალ ტაკიძემ ისაუბრა, მომავალი წლის ქედის ადგილობრივი ბიუჯეტი 2017 წლის ბიუჯეტთან შედარებით, მილიონ 379 ათას 200 ლარითაა გაზრდილი.

ქედის მომავალი წლის ბიუჯეტი, პროექტით, 9 563 900 ლარია, საიდანაც, ყველაზე მეტი თანხა –  4 430 000 ლარი ინფრასტრუქტურის გამართვას მოხმარდება, 1 248 890 ლარი – განათლებას; , ჯანდაცვასა და სოციალურ პროგრამებზე კი მხოლოდ 767 600 ლარია გამოყოფილი; რაც შეეხება სოფლის მეურნეობას, ამ სფეროს განვითარებისთვის მომავალი წლის ბიუჯეტის პროექტში ერთი თეთრიც კი არ არის გათვალისწინებული.

ქედის მუნიციპალიტეტის მერი ლევან გორგილაძე განმარტავს, რომ სოფლის მეურნეობის კუთხით პროგრამებს სოფლის მეურნეობის სამინისტრო ახორციელებს, შესაბამისად, ამ მიმართულებით საჭირო თანხას სოფლის მეურნეობის სამინისტრო გამოჰყოფს.

ადგილობრივი ბიუჯეტის პროექტის განხილვას, ძირითადად, მუნიციპალიტეტის მერიისა და საკრებულოს თანამშრომლები ესწრებოდნენ.

ბიუჯეტის საჯარო განხილვისას, ქედის საკრებულოს წევრმა ოთარ ხარაძემ, პარკინსონით დაავადებულთა სამკურნალოდ, მიზნობრივი პროგრამის შემუშავება მოითხოვა, ვაჟა ბოლქვაძემ კი მთავარ პრობლემად აიპ-ებში დასაქმებულთა დაბალი ანაზღაურება დაასახელა

„სამარცხვინო ხელფასები აქვთ აიპ-ებში დასაქმებულებს, ვფიქრობ, უნდა მოხდეს გადახედვა და ხელფასების მატება. ბაღებში დასაქმებულებს ხელფასის ოდენობა რომ ჰკითხო, შეიძლება ვერც გიპასუხოს, იმდენად სამარცხვინოა“ – განაცხადა ვაჟა ბოლქვაძემ.

„ღვინის დაყენების დროს ჩაგვიტარეს ვაზის გამოყვანის სპეციფიკაზე ტრენინგი, ვფიქრობ, ასეთ რაღაცეებს ყურადღება უნდა მიექცეს და ტრენინგები შესაბამის დროს ჩატარდეს, პრობლემას კვალიფიციური აგრონომების არარსებობაც ქმნის, საჭიროა იყვნენ აგრონომები, რომლებიც რეკომენდაციებს გაგვიწევენ, რომ არ დავზარალდეთ გლეხები“ – თქვა სოფელ ოქტომბერში მცხოვრებმა ნიაზ შერვაშიძემ.

„სახელმწიფო პროგრამებით, ვაქცინაცია მსხვილფეხა საქონელს იმ დაავადებებზე კეთდება, რომელიც ადამიანზე გადადის, არის ისეთი დაავადებები, რომლებიც ცხოველიდან ადამიანზე არ გადადის, თუმცა ხშირად იწვევს საქონლის დავარდნას, აუცილებელია ადგილობრივი ბიუჯეტიდან დაფინანსდეს ზოონოზური დაავადებების ვაქცინაცია“ – თქვა სოსო შერვაშიძემ, აგროსერვისცენტრის ქედის სამსახურის უფროსმა.

ქედის მერი ლევან გორგილაძე ამბობს, რომ ზოონოზურ დაავადებებთან დაკავშირებით მერია შესაბამის თანხებს გამოჰყოფს, რაც შეეხება ხელფასების მატების მოთხოვნას, მერის თქმით, ამ ეტაპზე ხელფასის მატება შეუძლებელია.

„2018 წლის ბიუჯეტის გეგმა-პროექტში ხელფასების მატება გათვალისიწნებული არ არის იმდენად რამდენადაც ვერ მოესწრო ბიუჯეტში ამის ასახვა, რადგან როცა მოვედით ბიუჯეტის პროექტი უკვე არსებობდა, თუმცა გვექნება აქტიური მუშაობა მთავრობასთან, რომ გამოინახოს ფინანსური რესურსი და ბიუჯეტის კორექტირების დროს გავითვალსიწინოთ ხელფასების ზრდა გარკვეული პროცენტით მაინც, რაც შეეხება ზოონოზურ დაავადებებს, ვმუშაობთ თანხები გამოვნახოთ, თუმცა მიმაჩნია, რომ პროგრამის შემუშავებისას მოსახლეობაც უნდა იყოს ჩართული და პროგრამა თანადაფინასებით განხორციელდეს“ – აცხადებს ლევან გორგილაძე.

ქედის მერიის მთავარი ფინასისტის ჯემალ ტაკიძის ინფორმაციით, 2018 წელს ქედის შემოსავალი იზრდება, ზრდას სოფელ მერისში, ოქროს საბადოდან მიღებული შემოსავლები განაპიროებებს.

„ოქროს საბადოდან მიღებული მოსაკრებელი ქედის ადგილობრივ ბიუჯეტში უნდა შემოვიდეს, გეგმა-გრაფიკით კი 2018 წელს კომპანია, ნედლეულს საბადოდან მოიპოვებს თუ არა, 600 000 ლარი უნდა შემოიტანოს ბიუჯეტში. რაც შეეხება მოსახლეობის მოთხოვნას დანიშნონ აგრონომები, ჩვენ ვმუშაობთ გავაკეთოთ პროგრამა, გამოვაცხადოთ ტენდერი და ამ გზით მივიღოთ აგრონომიული მომსახურება მუნიციპალიტეტის სხვადასხვა ლოკაციებზე. ინფრასტრუქტურულ პროექტებს შორის კი ფინანსურად ყველაზე დიდი პროექტები დაბა ქედისა და აწჰესისის ტერიტორიის კეთილმოწყობაა“ – აცხადებს ჯემალ ტაკიძე.

თუ თქვენი ბავშვობის წლები 80-90-იან წლებს დაემთხვა, აუცილებლად გეხსომებათ საბჭოთა წარსულიდან შემორჩენილი საახალწლო ნაძვის ხის სათამაშოები, რომლებსაც დედები და ბებიები წლიდან წლამდე ინახავდნენ. ეს სათამაშოები ძირითადად ერთმანეთს ჰგავდა, ისეთივე თოვლის ბაბუა ან მწვანე გირჩის სათამაშო, როგორიც თქვენ გქონდათ, აუცილებლად აღმოაჩნდებოდათ მეგობრებსაც. მსგავს სათამაშოებს საბჭოთა დროის ყველა ოჯახში ნახავდით. ჩვენ წარსულის სათამაშოების ეს ფოტოები შევაგროვეთ, თუ ძველი სათამაშოები ჯერ კიდევ შემოგრჩათ, შეგიძლიათ ფოტოები გადაუღოთ და ვებგვერდებზე განათავსოთ, სადაც ძველი ნივთების განყოფილებაში ნაძვის ხის საბჭოთა სათამაშოებიც  იყიდება.

წყარო: boredpanda.com     etsy.com

ბათუმის „ბათუმმა“ რუმინეთის „ტიმიშოარა სარასენსი“ ანგარიშით 20:17 დაამარცხა. ამ გამარჯვებით „ბათუმი“ „ფლეი ოფში“ მოხვდა და 2018-2019 წლების სეზონის „ჩელენჯ ქაფში“ მოსახვედრ საგზურს ერთი ნაბიჯით მიუახლოვდა.

მიმდინარე პოლიტიკური პროცესები, საკონსტიტუციო ცვლილებები, უშიშროების საბჭო და სახელმწიფო უსაფრთხოების საკითხები – ამ საკითხებზე პრეზიდენტის ადმინისტრაციის უფროსი, გიორგი აბაშიშვილი და ეროვნული უშიშროების საბჭოს მდივანი, დავით რაქვიაშვილი დღეს, 16 დეკემბერს,  ბათუმის დემოკრატიის სკოლაში [EECMD], სკოლის კურსდამთავრებულებსა და მსმენელებს ესაუბრნენ.

დავით რაქვიაშვილმა უშიშროების საბჭოს მნიშვნელობაზე განსაკუთრებით გაამახვილა ყურადღება. მისი თქმით, „როდესაც ფრონტის ხაზზე ვართ იდეოლოგიურ დონეზე, როდესაც მიდის ჰიბრიდული ომი, ერთი მხრივ, სამხედრო სიძლიერე და მეორე მხრივ, ეროვნული მედეგობა, რასაც საზოგადოების ჩართულობა ქმნის, უმნიშვნელოვანესია და ასეთ პირობებში უშიშროების საბჭოს დასუსტება აბსოლუტურად გაუმართლებელია“.

გიორგი აბაშიშვილმა საკონსტიტუციო ცვლილებების პროცესში პრეზიდენტისა და მისი ადმინისტრაციის ჩართულობაზე ისაუბრა. მისი თქმით, „ყველა შესაძლო რესურსი იქნა გამოყენებული, დაწყებული სამოქალაქო ჩართულობის გაზრდიდან, პოლიტიკურ აქტორებთან მოლაპარაკებებითა და კომპრომისულ ვარიანტზე წასვლით დასრულებული. თუმცა, ამან შედეგი ვერ გამოიღო და ახალი კონსტიტუციის პროექტში ისიც კი არ არის ასახული, რის გამოც დაიწყო ცვლილებები – მაჟორიტარული სისტემის პროპორციულით ჩანაცვლება“.

შეხვედრაზე, დისკუსიის რეჟიმში, სხვა საკითხებიც  განიხილეს – ტერორიზმის საფრთხე, საქართველოს სამეზობლო პოლიტიკა, კრიმინალურ მენტალობასთან ბრძოლის მნიშვნელობა; პრეზიდენტის და მისი ადმინისტრაციის როლი და ფუნქციები მომავალი კონსტიტუციით, საგადასახადო პოლიტიკა, ევროკავშირის ბაზარი და სხვა.

ამ წუთებში ბათუმის „რაგბი არენაზე“, საქართველოს ვიცე-ჩემპიონი, სარაგბო კლუბი „ბათუმი“ რუმინულ კლუბ „ტიმიშოარა სარასენსთან“ შესახვედრად ემზადება.

ევროპული რაგბის კონტინენტის ფარი, რომლის ფარგლებშიც თამაში ბათუმში იმართება, მესამე დონის ევროტურნირია.
თუ თამაშს „ბათუმი“ მოიგებს, ამ გამარჯვებით „ფლეი ოფში“ მოხვდება და 2018-2019 წლების სეზონის „ჩელენჯ ქაფში“ მოსახვედრ საგზურს ერთი ნაბიჯით მიუახლოვდება.

ბათუმში, შარაბიძეების დასახლებაში, მდინარე ჭოროხის პირას რამდენიმე წუთის წინ ხანძარი გაჩნდა. საგანგენო სიტუაციების მართვის სააგენტოს ინფრომაციით ცეცხლი ეკალ-ბარდს გაუჩნდა, ადგილზე მობილიზებულია სახანძრო ბრიგადები.

მაეხანძრეების თქმით, ცეცხლის გავრცელების საშიშროება არ არის.

აჭარის საჯარო სკოლების მოსწავლეებისათვის სატრანსპორტო მომსახურებაზე საგანმანათლებლო და სამეცნიერო ინფრასტრუქტურის განვითარების სააგენტომ ტენდერი გადმოაცხადა. 2017-2018 სასწავლო წლის მეორე სემესტრში აჭარის ტერიტორიაზე მოსწავლეებისთვის ტრანსპორტით მომსახურებისთვის 2 211 368 ლარია გათვალისწინებული.

სატენდერო პირობების თანახმად „ავტოსატრანსპორტო საშუალება (ავტობუსი, მიკრო ავტობუსი, მსუბუქი ავტომობილი) თითოეული მარშრუტისათვის უნდა შეირჩეს გადასაყვან ბავშვთა რაოდენობისა და ადგილის რელიეფის შესაბამისად. დაცული უნდა იყოს მოქმედი კანონმდებლობის შესაბამისი უსაფრთხო გადაადგილების ყველა ნორმა. ტრანსპორტირებისას უზრუნველყოფილი უნდა იყოს ისეთი პირობები, რომელიც გამორიცხავს მოსწავლეთა ჯანმრთელობის ზიანს. ასევე, მოსწავლეთა ტრანსპორტირებისას ავტოსტრანსპორტო საშუალება აღჭურვილი უნდა იყოს სპეციალური ნიშნით, რომელიც მიუთითებს, რომ ხორციელდება ბავშვების გადაყვანა“.

ამასთან, „კონკრეტულ მარშრუტზე სატრანსპორტო საშუალების ტევადობა უნდა შეესაბამებოდეს სატრანსპორტო საშუალებაში სტაციონარულად დამონტაჟებულ სკამებზე დამჯდარ მდგომარეობაში გადასაყვან მოსწავლეთა რაოდენობას. კონკრეტულ მარშრუტზე განსაზღვრული გზების რაოდენობა და სატრანსპორტო საშუალების ტევადობა შესაბამისობაში უნდა იყოს გადასაყვან მოსწავლეთა რაოდენობასთან“.

სატრანსპორტო მომსახურების განხორციელების პერიოდში სავალდებულოა მოსწავლეთა დაზღვევა, რომლის ასანაზღაურებელი ლიმიტი არ უნდა იყოს 1500 ლარზე ნაკლები.

ავტოტრანსპორტით მომსახურება უნდა განხორციელდეს 2018 წლის 15 იანვრიდან 15 ივნისის ჩათვლით, სასწავლო დღეების შესაბამისად.
სასწავლო დღეების სავარაუდო რაოდენობა:

[checklist]

• ჩვეულებრივ საჯარო სკოლებში – 101 სასწავლო დღე,
• პანსიონის ტიპის სკოლებში – 42 სასწავლო დღე (კვირაში ერთი წაყვანა და ერთი წამოყვანა),
• იმ სკოლებში, სადაც სასწავლო პროცესი მიმდინარეობს შაბათ დღესაც – 118 სასწავლო დღე.

[/checklist]
ტენდერში წინადადებების მიღება მიმდინარე წლის 23 დეკემბერს დაიწყება და 26 დეკემბერს დასრულდება.

ნაძვის ხის აწყობა აუცილებელი საახალწლო რიტუალია. უმრავლესობა ამ დღისთვის საგანგებოდ ემზადება, დიდხანს და საგულდაგულოდ არჩევს ნაძვს და სათამაშოებს. ნაძვის ხის მორთვა განსაკუთრებით ბავშვებს ახარებთ, მაგრამ საბოლოოდ უფროსებიც სიხარულით ერთვებიან ახალი წლის მთავარი ატრიბუტის, ნაძვის ხის  მორთვაში. ხელოვნური ნაძვი, რომელიც ბუნებრივს ჰგავს, დიდია და ლამაზი, საკმაოდ ძვირი ღირს.

თუ ფიქრობ, რომ დღესასწაული მალე გადის და ხელოვნურ ნაძვში, რომელიც მერე მთელი წელი შეფუთული უნდა იდოს სხვენზე, ბევრის დახარჯვა სისულელეა, მაშინ შეგიძლია სახალისო, მარტივი და ორიგინალური ნაძვის ხის იდეისკენ გადაიხარო.

ერთი შეხედვით ჩვეულებრივი კიბე, შეგიძლიათ სადღესასწაულო ხედ აქციოთ.

ესეც ნაძვის ხედ გარდაქმნილი კიბის უფრო მარტივად მოწყობილი ვერსია.

თუ დიდი ნაძვის ხე უკვე ააწყეთ და მუშაობისას მაგიდაზეც გსურთ პატარა ხე გედგათ განწყობის შესაქმნელად, ფერად-ფერადი მუყაო და თექა შეგიძლიად მრგვალად გამოჭრათ და ხის ჩხირზე აასხათ.

გაქვთ შარშანდელი და შარშანწინდელი სათამაშოები ბლომად, მაგრამ აღარ მოგწონთ ძველი ნაძვის ხე? შეგიძლიათ ნაძვი არც იყიდოთ და სათამაშოების წყობით ხის იმიტაცია კედელზე შექმნათ.

ეკონაძვის ხე არაბუნებრივი, მაგრამ მაინც ხისგან დამზადებული

კიდევ უფრო  მარტივი იდეა ნაძვის ხის ქაღალდისგან დამზადებაა

თუ პატარა სახლი გაქვს და ნაძვის ხე  დიდ ადგილს გართმევს, ოთახის კუთხეც ეფექტურად გამოიყენო და ნათურებით აქციო ნაძვის ხედ.

შეიძლება უსიხარულოდ ჩანს, მაგრამ თუ ბრჭყვიალა ფერები არ გიყვარს და ბუნებრივი, სადა ფორმები გირჩევნია, ნაძვის ხეც შეგიძლია ასეთი გქონდეს.

თუ მარტო ნათურები გაქვს, ფონს გასვლა ამითაც შეიძლება, კედელზე რამდენიმე ჭიკარტის მიკვრა და ნათურებით ფორმის მიცემა დაგჭირდებათ.

მხოლოდ წვიმებითაც მშვენიერ ხეს გააწყობთ კედელზე.

ნაძვის ხე წიგნებით

პატარ-პატარა ნაძვის ხეები სარეცხის სარჭებითა და ქაღალდებით

ნაძვის ხე კედელზე

გირჩის ნაძვის ხე გარდა იმისა, რომ ლამაზი და ორიგინალურია, სახლში ტყის სასიამოვნო სუნსაც აყენებს.

სათამაშოები და საქსოვი, სქელი ძაფები ნაძვის ტოტებად

მუყაოს თეთრი ნაძვის ხე სადა და მოკრძალებული ინტერიერისთვის

აბასთუმნის ობსერვატორიის რეაბილიტაციისთვის 2 549 330 ლარია გათვალისწინებული. სამუშაოების 80 პროცენტს მსოფლიო ბანკი აფინანსებს. შესაბამის შესყიდვაზე ტენდერი კი მუნიციპალური განვითარების ფონდმა გამოაცხადა.

სატენდერო დოკუმენტაციის მიხედვით, ობსერვატორიის რეაბილიტაცია სხვადასხვა სამუშაოებს გულისხმობს, მათ შორის, დიდი ტელესკოპის AZT-11-ის სამსართულიანი ტერასული შენობის გადაგეგმარებას.

რეაბილიტაციის შემდეგ, ობსერვატორიის პირველ სართულზე განთავსდება ვიზიტორთა ცენტრი საგამოფენო სივრცითა და ვირტუალური ლაბორატორიით. აქვე მოეწყობა მცირე კაფე და საპირფარეშოები. მეორე და მესამე სართულებზე შენარჩუნდება შენობის თავდაპირველი დანიშნულებით არსებული სათავსოები და მცირედი გადაგეგმარებით აქ განთავსდება ბიბლიოთეკა და ობსერვატორიის თანამშრომელთა სამუშაო ოთახები.

„რეაბილიტირდება შენობის ტერასული გადახურვები და ფასადები. სარეაბილიტაციო სამუშაოები არ შეეხება შენობაში არსებულ ტელესკოპს და მის ტექნოლოგიურ სათავსებს, რომლებიც თავდაპირველი გეგმარებითაც განცალკევებულია შენობის სხვა სათავსებისაგან. შენობა უზრუნველყოფილი იქნება წყალსადენ-კანალიზაციის, სავენტილაციო და გათბობის სისტემებით. მოეწყობა ინტერნეტქსელი. პროექტით განსაზღვრულია AZT-11-ის შენობის მიმდებარე ტერიტორიის კეთილმოწყობა – დაზიანებული ასფალტის საფარის აღდგენა, ბორდიურების შეცვლა, ტერიტორიაზე შეირჩა ადგილები, სადაც მოეწყობა ავტოსადგომი. რეაბილიტაცია ჩაუტარდება არსებულ შადრევანს. მოეწყობა გარე განათება, დაიდგმება სანაგვე ურნები,“ – აღნიშნულია სატენდერო დოკუმენტაციაში.

რეაბილიტაცია შეეხება აბასთუმნის ობსერვატორიასთან არსებულ საბაგირო გზასაც, ასევე განახლდება სამგზავრო ვაგონი.

დღეს, 15 დეკემბერს, სასტუმრო „შერატონში“ საქართველოს სოციალურ მუშაკთა ასოციაციისა და საერთაშორისო განათლების ცენტრის  პროექტის პრეზენტაცია გაიმართა. პროექტის მიზანია სოციალურ მუშაკთა ჩართულობა შშმ პირების უფლებების ეფექტურად განხორციელების პოლიტიკის ფორმირებაში.

პროექტის პრეზენტაციას ესწრებოდნენ მუნიციპალიტეტების მერიის სოციალური განყოფილებების, ბათუმის მერიის, აჭარის ჯანდაცვისა და სოციალური მომსახურების სააგენტოს, ასევე, არასამთავრობო ორგანიზაციების წარმომადგენლები.

სოციალურ მუშაკთა ასოციაციის თავმჯდომარემ, ნინო შატბერაშვილმა, ისაუბრა პროექტის მნიშვნელობაზე.  იმაზე, თუ რამდენად დიდი როლი აქვთ სოციალურ მუშაკებს და მათ ჩართულობას იმისათვის, რომ გაიზარდოს შეზღუდული შესაძლებლობების მქონე პირების  მხარდაჭერა, სამედიცინო და სოციალურ საჭიროებებზე ხელმისაწვდომი გარემოს შესაქმნელად, მათ შორის მუნიციპალიტეტების დონეზე.

ნინო შატბერაშვილის თქმით, სახელმწიფოს მიერ დაქირავებული სოციალური მუშაკები  უფრო მეტად კონტროლის მანდატით ახორციელებენ  თავიანთ ფუნქციებს და ნაკლებეფექტურად იყენებენ სოციალური მუშაკის იმ მხარეს, რომელსაც სოციალური მხარდაჭერა და ადამიანის უფლებების დაცვა ჰქვია. „ჩვენ გვინდა, რომ ამ პროექტის მეშვეობით, სწორედ ეს კომპონენტები წამოვწიოთ წინ,“-ამბობს ის.

საუბარი შეეხო, ასევე, მედიის როლის გაძლიერებას შშმ პირების საკითხების გაშუქებაზე და საერთაშორისო დონეზე აღიარებული ტერმინების სწორად გამოყენებას შშმ პირებთან დაკავშირებით.

სხვადასხვა სფეროს წარმომადგენლებმა ისაუბრეს სისტემურ პრობლემებზე და იმ კონკრეტულ საკითხებზე, რომლებიც პრობლემას უფრო ქმნის, ვიდრე ეხმარება შშმ პირებს.  მათი თქმით, სწორედ სისტემური პრობლემის გამო ვერ ხორციელდება შშმ პირების  საჭიროებების დაკმაყოფილება, მათ შორის   ინდივიდუალური საჭიროებების დონეზე.

ასოციაცია „ერთმანეთისთვის“ წარმომადგენელმა, მირანდა ჩარკვიანმა ისაუბრა ბაზების არახელმისაწვდომობაზე. მისი თქმით, პერსონალური მონაცემების დაცვის მოტივით ყველა ბაზა ჩაკეტილია, რის გამოც ვერ ხერხდება ინფორმაციის მიღება იმის შესახებ, თუ რამდენი  შშმ პირი სარგებლობს ან ვერ სარგებლობს სახელმწიფო პროგრამებით.

ნინო შატბერაშვილის თქმით, მიუხედავად იმისა, რომ სახალხო დამცველმა ისაუბრა ბაზების ღიაობაზე, ეს საკითხი მაინც პრობლემად რჩება. „სახალხო დამცველმა ამის შესახებ თქვა, რომ კანონი იძლევა ბაზების ღიაობის შესაძლებლობას, თუკი ამ ინფორმაციის გაცემა საყოველთაო სიკეთეს ემსახურება, ასეთ შემთხვევაში დასაშვებია პერსონალური ინფორმაციის ხელმისაწვდომობა. თუმცა სახელმწიფოს ეს მაინც არ ესმის.  ბნელ ოთახში  ხელის ცეცების მდგომარეობაში როდემდე უნდა ვიყოთ,“-ამბობს ის.

არასამთავრობო ორგანიზაცია „ცვლილებები თანაბარი უფლებებისთვის“ წარმომადგენელი თომა კაკაბაძე მიიჩნევს, რომ ბაზების ღიაობაც ვერ მოგვცემს რეალურ სურათს შშმ პირთა სტატისტიკური მონაცემების შესახებ, რადგან არც ეს ბაზები მოიცავს სრულყოფილ ინფორმაციას.

ორგანიზაცია „სთეფ ფორვარდის“ წარმომადგენელის, მანანა ინაიშვილის თქმით, სტატისტიკური მონაცემების არქონა იწვევს დამატებით პრობლემებს, როგორც სახელმწიფოსთვის, ასევე კონკრეტული მოქალაქეებისთვის.  „ჯანდაცვის სამინისტრომ სმენადაქვეითებული ბავშვებისთვის გამოყო 17 იმპლანტი, შემდეგ აღმოჩნდა, რომ  უფრო მეტს ბავშვს ჰქონდა ამის საჭიროება და  ეს ციფრი  35-მდე გაიზარდა. ბუნებრივია ეს არის პრობლემა, რადგან სამინისტრო თავიდანვე ზუსტად ვერ საზღვრავს პროგრამის ბიუჯეტს და შემდეგ სჭირდება დამატებითო  სახსრების მოძიება.

ჩვენმა ორგანიზაციამ მიაღწია იმას, რომ  ამოქმედდება სკრინინგის პროგრამა და ამის შემდეგ შესძლებელი იქნება   იმის დაზუსტება, თუ რამდენი  სმედაქვეითებული ბავშვი საჭიროებს დახმარებას“.

მანანა ინაიშვილის თქმით, აუცილებელია სახელმწიფო პროგრამები ინდივიდუალური საჭიროებების დონეზე იყოს გაწერილი.

„რეგიონებში კიდევ უფრო მძიმე ვითარებაა, რადგან  გარდა იმისა რომ არ არსებობს რეაბილიტაციის ცენტრები, არის ადამიანური და პროფესიული რესურსების პრობლემა. ამიტომ, ის ოჯახები ვისაც შშმ პირი ჰყავს, ფაქტობრივად ქალაქში გადმოდის საცხოვრებლად რომ მიიღონ  პროგრამული დაფინანსება“.

სისტემურ პრობლემაზე საუბრობს სოციალური მომსახურების სააგენტოს აჭარის ფილიალის  ხელმძღვანელის მოადგილე, რუსუდან სალუქვაძეც.

„გარდა იმისა, რომ  ზუსტი სტატისტიკა არ არსებობს, ჩვენთან ბაზებში მხოლოდ ის პირები არიან რეგისტრირებული ვისაც მკვეთრად გამოხატული შეზღუდვა აქვთ, უმნიშვნელოდ გამოხატული შეზღუდვის მქონე პირები კი საერთოდ არ გვყავს რეგისტრირებული. ამიტომ, სოციალური მუშაკის ჩართულობა იქნება ეფექტური და დაეხმარება ამ ადამიანებს როგორც ინფორმაციის ხელმისაწვდომობაში, ასევე მათი მდგომარეობის გაუმჯობესებაში, რადგან ეს ადამიანები ხშირად იმ პროგრამებითაც კი ვერ სარგებლობენ, რომლებიც სახელმწიფოს აქვს დაფინანსებული, რადგან ისინი არ ფლობენ ინფორმაციას“.

პროექტის ფინანსური მხარდამჭედი ფონდი „ღია საზოგადოება საქართველოა“.

ბათუმის შოთა რუსთაველის სახელმწიფო უნივერსიტეტში დეკანის არჩევნები დასრულდა.   ბსუ-ს საარჩევნო კომისიის თავმჯდომარის, გიორგი დიასამიძის ინფორმაციით, ოთხივე ფაკულტეტზე რეგისტრირებულმა კანდიდატებმა საჭირო რაოდენობის ხმა მიიღეს.

ჰუმანიტარულ ფაკულტეტზე ხმის მიცემის უფლების მქონე 92 ამომრჩევლიდან არჩევანი 84-მა ამომრჩეველმა გააკეთა, 7 ბიულეტენი გაბათილდა, 77 – მა ამომრჩეველმა კი მარინე გიორგაძეს მისცა ხმა.

საბუნებისმეტყველო მეცნიერებათა და ჯანდაცვის ფაკულტეტზე  რეგისტრირებული 76 ამომრჩევლიდან არჩევანი 69 ამომრჩეველმა გააკეთა და ყველა მათგანმა ხმა მარინა ქორიძეს მისცა.

განათლებისა ფაკულტეტზე დეკანობის კანდიდატმა,  მადონა მიქელაძემ, რეგისტრირებული 24 ამომრჩევლიდან ყველა მათგანის მხარდაჭერა მიიღო, ხოლო ფიზიკა-მათემატიკის ფაკულტეტზე 36 ამომრჩეველიდან გულადი ფარტენაძეს 35 ამომრჩეველმა მისცა ხმა.

მარინე გიორგაძე, მარინა ქორიძე, მადონა მიქელაძე და გულად ფარტენაძე დეკანად მეორე ვადით აირჩიეს.

მოქმედი კანონმდებლობით კი, ფაკულტეტის დეკანად, ერთი და იგივე კანდიდატი ზედიზედ მხოლოდ ორჯერ შეიძლება იყოს არჩეული.

გიორგი დიასამიძის ინფორმაციით, ამ დროისთვის არჩევნებთან დაკავშირებით საჩივარი არ დაწერილა.

ბსუ-ში დეკანის არჩევნები გუშინ, 15 დეკემბერს, დილის 10 საათზე დაიწყო და საღამოს 17:00 საათზე დასრულდა. არჩევნები ფარული კენჭისყრით ჩატარდა.

ამავე თემაზე: 

მახვილაურში ახალი საჯარო სკოლა 2018-2019 წლებში უნდა აშენდეს. არსებული სკოლის შენობა, ავტობანის მშენებლობის გამო დაინგრევა.  აჭარის განათლების სამინისტროში „ბათუმელებს“ უთხრეს, რომ სკოლის პროექტი შესყიდულია და მშენებლობა მომდევნო ორ წელზეა გაწერილი.

სკოლის მშენებლობისთვის ერთი მილიონ 600 ათასი ლარია გათვალისწინებული ბიუჯეტში.  როგორც სამინისტროში გვეუბნებიან, ახალი სკოლის აშენების აუცილებლობა ავტობანის მშენებლობამ განაპირობა.

„ავტობანი გადის არა სკოლის ტერიტორიაზე, არამედ სკოლის წინ. მაგრამ, რადგან სკოლა ბუფერულ ზონაში მოხვდა, აუცილებელია მისი ადგილმონაცვლეობა. ამიტომ ახალი სკოლის ასაშენებლად სხვა ადგილზე გამოიძებნა ტერიტორია, სკოლის აშენებამდე კი, ბავშვები იმ სკოლაში გაარძელებენ სწავლას, სადაც ამჟამად არიან. სკოლის შენობა არ არის დაზიანებული და სასწავლო პროცესი ახლის აშენებამდე, ჩვეულებრივ გაგრძელდება,“- გვითხრეს განათლების სამინისტროში.

მახვილაურის საჯარო სკოლაში 200 მოსწავლე სწავლობს.

ბათუმში, რამდენიმე წუთის წინ, საცხოვრებელი კორპუსიდან ქალი გადმოვარდა, რომელიც ადგილზევე გარდაიცვალა.

„პუშკინის ქუჩის 141 ნომერში იყო გამოძახება. სასწრაფო დახმარების ბრიგდას დაახლოებით 57 წლამდე ქალი გარდაცვლილი დახვდა. ის, სავარაუდოდ, მეოთხე სართულიდან გადმოვარდა“, – გვითხრეს სასწრაფო დახმარების სამსახურში.

შინაგან საქმეთა სამინისტროს ინფორმაციით, ფაქტზე აღძრულია სისხლის სამართლის საქმე სს კოდექსის 115-ე მუხლით, რაც თვითმკვლელობამდე მიყვანას გულისხმობს.