Batumelebi

„ბატონმა ბერდია ფერაძემ იცრუა, როგორც წინასწარი გამოძიებისას, ისე სასამართლოში მისი დაკითხვისას არაერთ გარემოებაზე,“ – თქვა მზია ამაღლობელის ადვოკატმა მაია მწარიაშვილმა პირველ აგვისტოს, ბათუმის საქალაქო სასამართლოში დასკვნითი სიტყვის წარმოთქმისას.

მაია მწარიაშვილი 7 საათის განმავლობაში კითხულობდა თავის დასკვნით სიტყვას. მან დეტალურად აღწერა, თითოეულმა ცრუ მოწმე პოლიციელმა, რა მოიტყუა მზია ამაღლობელის საქმეში და როგორ.

• რა მოიტყუა აჭარის პოლიციის დეპარტამენტის საგამოძიებო ნაწილის უფროსი ბერდია ფერაძე?

ნაწყვეტი მაია მწარიაშვილის დასკვნითი სიტყვიდან:

„ბერდია ფერაძემ ორივე შემთხვევაში განაცხადა, რომ ირაკლი დგებუაძე პოლიციის ეზოს ჭიშკართან გავიდა აქციის მონაწილეებისათვის დაკავების საფუძვლის განმარტების მიზნით, რაც სიცრუეა.

აღნიშნულს უტყუარად ადასტურებს ჩვენს მიერ წარმოდგენილი ვიდეომტკიცებულება „ვიდეო #14- ჩემი ოჯახის წევრი დააკავეს“, სადაც ჩანს ირაკლი დგებუაძის ჭიშკრიდან გამოსვლა და ისიც ჩანს, რომ ის ვინმესთან კომენტარის მიზნით არ გამოსულა, ის არც კი უყურებს მის წინ მდგომ ეთერ თურაძეს და მზია ამაღლობელს.

ამასთან, მას წინ ეღობება ეთერ თურაძე, რომელსაც ის უხეშად ხელით იშორებს შემდეგი  სიტყვებით – „რა ვი, ვინც გინდა ის იყავი“. ამას მოჰყვება მზია ამაღლობელის წინადადება, რათა რამენაირად შეაჩეროს – „ჩემი ოჯახის წევრი დააკავეთ“.

არც ერთი მტკიცებულებით (გარდა თავად პოლიციელთა ჩვენებისა) არ დასტურდება, რომ ის გაბაიძეების დაკავებაზე განმარტების გასაკეთებლად გამოვიდა და არც აკეთებს ამგვარ განმარტებას ვინმესთვის. ის იძულებულია ასე ვთქვათ, მიუგდოს პასუხი მზია ამაღლობელს რამდენჯერმე დასმულ შეკითხვაზე.

ბატონმა ფერაძემ იცრუა, როდესაც მიუთითა, რომ „ირაკლი დგებუაძის წინ მდგომი 2 ქალბატონი გამოხატავდნენ ირაკლი დგებუაძის და, ზოგადად, პოლიციის მიმართ აგრესიას. კერძოდ, ხმამაღლა ესაუბრებოდნენ მას და ითხოვდნენ დაკავებულების გათავისუფლებას“.

სასამართლოზე დაკითხვისას მან შეცვალა ფრაზა – „ითხოვდნენ გათავისუფლებას“ ფრაზით „ეკითხებოდნენ, თუ რატომ დააკავეს“, რაც განსხვავდება გათავისუფლების მოთხოვნისაგან.

ამავდროულად მან ვერ ახსნა, თუ რაში გამოიხატებოდა აგრესია ირაკლი დგებუაძისა და, ზოგადად, პოლიციის მიმართ. საბოლოოდ, მისი განმარტებების მიხედვით, მთელი ის აგრესია, როგორც ირაკლი დგებუაძის, ისე პოლიციელთა მიმართ იყო მზია ამაღლობელის შეკითხვა ხმამაღალი ტონით, „რატომ დააკავეთ?“

ამ გარემოების აღწერისას მოწმე ბერდია ფერაძემ იცრუა რამდენჯერმე: მზია ამაღლობელი და ეთერ თურაძე გამოხატავდნენ აგრესიას ირაკლი დგებუაძის და, ზოგადად, პოლიციის მიმართ.

რომც დავუჯეროთ ბერდია ფერაძეს, რომ ხმამაღალი ტონით ნათქვამი „რატომ დააკავეთ“ არის აგრესიის გამოხატვა პოლიციის მიმართ, მან მაინც იცრუა, ვინაიდან არც პროკურატურის მიერ წარმოდგენილ ვიდეოჩანაწერში და არც ჩვენს მიერ წარდგენილ #14 ვიდეომტკიცებულებაში მზია ამაღლობელი არ ამბობს სიტყვებს – „რატომ დააკავეთ“.

ის სულ 3 წინადადებას ამბობს და არც ერთი არ არის – „რატომ დააკავეთ“.

მოწმე ბერდია ფერაძემ იცრუა, როდესაც განაცხადა, რომ იქამდე, ვიდრე ირაკლი დგებუაძე უპასუხებდა მზია ამაღლობელს, ის აკეთებდა განმარტებებს იქვე მდგომი ჟურნალისტებისათვის და მათაც პასუხობდა.

ბერდია ფერაძემ თქვა, რომ დგებუაძემ ეს განმარტებები გააკეთა მანამდე, ვიდრე პროკურატურის მიერ წარმოდგენილ ვიდეოფაილში ჩანს.

მოწმე ბერდია ფერაძის ეს განმარტება სიცრუეა, ვინაიდან მოწმე ბერდია ფერაძე ჭიშკარში გამოდის მოგვიანებით და კერძოდ იმ დროს, როდესაც ირაკლი დგებუაძე ეკითხება მზია ამაღლობელს – „ვინ?“ ფერაძე თავიდანვე კადრში არ ჩანს.

პროკურატურის ვიდეოკადრი მოჭრილია სწორედ ამ წუთიდან და იქმნება არასწორი აღქმა, რომ მოწმე ბერდია ფერაძე იქ ინციდენტის ეპიცენტრში დგას თავიდან ბოლომდე. თუმცა ჩვენს მიერ წარდგენილი ვიდეო #14 ადასტურებს, რომ ის ჭიშკარში გამოდის 01.00 წმ-ზე, მაშინ, როდესაც ირაკლი დგებუაძე უკვე გამოსულია და საუბარი მზია ამაღლობელთან უკვე დაწყებულია.

იგივე ვიდეო აჩვენებს, რომ ირაკლი დგებუაძე არავის არ აძლევს განმარტებებს მანამდე, ვიდრე ეთერ თურაძე არ შეაყოვნებს და მზია ამაღლობელი სწრაფად არ დასვამს კითხვას. ჭიშკრიდან გამოსული ირაკლი დგებუაძე მიემართება მარცხენა მხარეს, ხოლო მზია ამაღლობელი დგას მარჯვენა მხარეს.

ირაკლი დგებუაძე არც კი შეჩერდებოდა, რომ არა ეთერ თურაძე, რომელიც წინ გადაუდგა. გარდა ამისა, მისი ჭიშკრიდან გამოსვლის მომენტში არც ჟურნალისტები დგანან, არც რაიმე კითხვებს უსვამენ დგებუაძეს და არც ის პასუხობს არარსებულ კითხვებს. ისმის მხოლოდ მოქალაქეების უკმაყოფილო შეძახილები ბესელიას და პოლიციის მიმართ განხორციელებული ძალადობების გამო.

მოწმე ბერდია ფერაძემ იცრუა და სასამართლო სხდომაზე 3-ჯერ მაინც განაცხადა, რომ მზია ამაღლობელი დავაკავეთ მე და გიორგი ბჟალავამ და შევიყვანეთ ადმინისტრაციულ შენობაში“.

ბრალდების მიერ წარმოდგენილ ვიდეოში ჩანს, რომ მზია ამაღლობელი შეაგდეს ჭიშკარში მოწმე ბერდია ფერაძემ, თავად ირაკლი დგებუაძემ და სხვა ნიღბიანმა პოლიციელებმა, ხოლო მოწმე გიორგი ბჟალავა მზია ამაღლობელამდე არც კი მისულა.

უფრო მეტიც, ის ჭიშკარში რჩება ამ კადრის 00.19 წმ-დე, ხოლო ამავე ტაიმკოდზე კადრში ჩანს უკვე დაკავებული მზია ამაღლობელი მიჰყავს უცნობ პირს (ჩანს მზია ამაღლობელის მარცხენა მხარეს), რომელიც ჩანს ზურგიდან.

ის, რომ ბერდია ფერაძე ცრუობს, დასტურდება ასევე ჩვენს მიერ წარდგენილი #9 ვიდეომტკიცებულებით – „სისხლით ბო… ვიყო, სისხლით“: 00.15 წმ-დან კადრის ბოლომდე ნათლად ჩანს, რომ მზია ამაღლობელი დაკავებული ჰყავთ თავად მოწმე ბერდია ფერაძეს და შავ ქურთუკსა და ნიღაბჩამოცმულ ჩვენთვის უცნობ პოლიციელს, რომელიც არ არის მოწმე გიორგი ბჟალავა, ვინაიდან გიორგი ბჟალავას უნიფორმა და კეპი სრულებით განსხვავდება მზია ამაღლობელის დამკავებელი პირის შავი ქურთუკისა და კეპისაგან.

გარდა ამისა, შეუძლებელია, დამკავებელმა მოწმე ბერდია ფერაძემ არ იცოდეს, ვინ აკავებს მასთან ერთად მზია ამაღლობელს, ვინ დგას მასთან ერთად მზია ამაღლობელისგან ხელმარცხნივ.

ცხადია, მან იცის, თუმცა მან ეს იცრუა წინასწარი გამოძიების ეტაპიდან არაერთხელ.

დასკვნით სიტყვაში პროკურორმა დაადასტურა, რომ ბჟალავა ფიზიკურად არ აკავებს მზია ამაღლობელს და განავითარა მსჯელობა იმაზე, რომ გიორგი ბჟალავა უზრუნველყოფდა მზიას უსაფრთხოებას შენობაში.

ამაზე კიდევ ვისაუბრებ.

მოწმე ბერდია ფერაძემ იცრუა, როდესაც განმარტა, რომ მზია ამაღლობელი არ ითხოვდა ადვოკატებთან შეხვედრას, რისი მტკიცებაც ყოველგვარ საღ აზრს მოკლებულია, მით უფრო, რომ მან ირაკლი დგებუაძის მხრიდან მის მიმართ განხორციელებული არასათანადო მოპყრობისა და მათ შორის შეფურთხების შესახებ, მაშინვე განუცხადა სახალხო დამცველის წარმომადგენელს.

მოწმე ბერდია ფერაძემ იცრუა, როდესაც განაცხადა, რომ მას არავითარი როლი და ფუნქცია არ ჰქონდა მზია ამაღლობელის წინააღმდეგ წარმოებულ საქმესა და ამ საქმის კვალიფიკაციასთან, ვინაიდან, როგორც მოწმე გრიგოლ ბესელიამ, ისე ირაკლი დგებუაძემ განმარტეს, რომ მან მიიღო გადაწყვეტილება გამოძიების დაწყებისა და კვალიფიკაციის შესახებაც.

მოწმე ბერდია ფერაძემ იცრუა, როდესაც განაცხადა, რომ ირაკლი დგებუაძეს ლოყა და ყური ჰქონდა წითელი და მან ეს ნახა შენობის პირველ სართულზე 10-15 წთ-ში.

უპირველეს ყოვლისა, ირაკლი დგებუაძეს არც ლოყა და არც ყური არ ჰქონდა გაწითლებული და რაც მთავარია, თავად ირაკლი დგებუაძემ უარყო, რომ ის პოლიციის შენობაში პირველ სართულზე შევიდა ან იმყოფებოდა. მან სასამართლოზე განმარტა, რომ დაახლოებით 30 წუთი ის იყო პოლიციის ეზოში გარეთ და მხოლოდ შემდეგ ავიდა პირდაპირ სამუშაო ოთახში მეორე სართულზე“.

„დაზარალებულმა ირაკლი დგებუაძემ იცრუა როგორც გამოძიებისას, ისე სასამართლოში, არაერთი გარემოების ირგვლივ”, – თქვა მზია ამაღლობელის ადვოკატმა მაია მწარიაშვილმა პირველ აგვისტოს, ბათუმის საქალაქო სასამართლოში დასკვნითი სიტყვის წარმოთქმისას.

ადვოკატი მაია მწარიაშვილი 7 საათის განმავლობაში კითხულობდა თავის დასკვნით სიტყვას. მან დეტალურად მოჰყვა ყველა ცრუ მოწმე პოლიციელის შესახებ, თუ რა მოიტყუეს მათ მზია ამაღლობელის საქმეში და როგორ.

მზია ამაღლობელის საქმეში ბათუმის პოლიციის უფროსი ირაკლი დგებუაძე, დაზარალებულად არის ცნობილი.

გთავაზობთ ამონარიდებს მაია მწარიაშვილის სასამართლოში წარმოთქმული დასკვნითი სიტყვიდან, სადაც ის ირაკლი დგებუაძეს სიცრუეში ამხელს:

„დაზარალებულმა ირაკლი დგებუაძემ იცრუა გაბაიძეების დაკავების მომენტზე და აღნიშნა, რომ დაკავებას არ შესწრებია, არამედ ამ დროს იმყოფებოდა ეზოში.

მან მიუთითა: „გაბაიძეები, ეს ვისზეც მისვამს ქალბატონი მზია კითხვას, ზუსტად მაგათზეა საუბარი, გიორგი ერქვა ამ ერთ-ერთ ნასვამ პირს, მეორე მისი ძმა იყო, სახელი არ მახსოვს ზუსტად… ამათი შემოყვანის მომენტს ვესწრები, დეპარტამენტის ეზოში ვდგავარ, ანუ ეს გიორგი არის ძალიან აგრესიული, ნასვამი, აგინებს პოლიციელებს და ძალის გამოყენებით შეჰყავთ დეპარტამენტის ეზოში.

ბუნებრივია, დავინტერესდი და რომც არ დავინტერესებულიყავი ისედაც მომახსენებდნენ ჩემი თანამშრომლები დაკავების მიზეზს.

ამ დროს რომ შემოიყვანეს ეს ორი დაკავებული, თანამშრომლები მეუბნებიან, რომ ვიდექით კედელთან ისევ ჩვენთვის, საერთოდ კომუნიკაცია არ გვქონია, ერთ-ერთი ეს ბატონი გაბაიძე აგინებს პოლიციელებს, რომ მათ როგორ უნდა დაემორჩილონ, ნახე რას ჰგვანან ეს „შნირები“, დედის მისამართით აგინებს და ა.შ. რა თქმა უნდა, სხვა გამოსავალი ასეთ დროს, პოლიციამ თავისი უფლებამოსილების ფარგლებში უნდა იმოქმედოს და იმოქმედეს, დააკავეს“.

აღნიშნულის საწინააღმდეგოდ მოწმე გრიგოლ ბესელიამ თქვა, რომ გაბაიძეების დაკავებისას ის და ირაკლი დგებუაძე იმყოფებოდნენ შენობაში და მან უთხრა ირაკლი დგებუაძეს, რომ გასულიყვნენ და განმარტებები გაეკეთებინათ.

ირაკლი დგებუაძის ამ ჩვენების საწინააღმდეგოდ მოწმეებმა ეთერ თურაძემ, მანანა ქველიაშვილმა, ეკა დავითაძემ, ჯაბა ანანიძემ განმარტეს, რომ გიორგი გაბაიძეს არ მიუყენებია რაიმე შეურაცხყოფა პოლიციელთათვის.

ეთერ თურაძის განმარტებით, ირაკლი დგებუაძეს ჰქონდა პირადი ინტერესი გიორგი გაბაიძის მიმართ. მოწმე აკაკი გვიანიძემ განმარტა, რომ გიორგი გაბაიძის დაკავებისას ის იდგა ჭიშკარში, გაბაიძე იდგა მის უკან, გაბაიძის მხრიდან შეურაცხყოფის შემთხვევაში ჯერ მას უნდა გაეგო, ვინაიდან პოლიცია ისე გამოვარდა გაბაიძის დასაჭერად, რომ ის კარებში გადათელეს.

ეს მოვლენები ზუსტად ასე ჩანს ჩვენს მიერ წარდგენილ ვიდეო #8-ში, როგორც მას აღწერს მოწმე აკაკი გვიანიძე.

ამავდროულად ჩვენს მიერ წარდგენილ ვიდეომტკიცებულება #8-ში ჩანს, რომ გიორგი გაბაიძის ძალით შეთრევამდე პოლიციის შენობის წინ სრული სიმშვიდეა და არ ისმის, არავითარი გინება და შეურაცხყოფა პოლიციის მისამართით.

კადრში ჩანს გიორგი გაბაიძის დაკავება და ისიც აღქმადია, რომ გიორგი გაბაიძე დგას მშვიდად, მას უცებ შეათრევს პოლიცია.

ამავდროულად, მოწმე გრიგოლ ბესელიას ჩვენებით, გაბაიძეების დაკავებისას ის და ირაკლი დგებუაძე იმყოფებოდნენ შენობაში. მას შემდეგ, რაც ძმები გაბაიძეები შემოიყვანეს შენობაში მან უთხრა ირაკლი დგებუაძეს, რომ გასულიყვნენ გარეთ და დაემშვიდებინათ აღელვებული ხალხი.

შესაბამისად, ირაკლი დგებუაძის ჩვენება გამოირიცხება გრიგოლ ბესელიას განმარტებით და ამავდროულად არ არსებობს სხვა რაიმე მტკიცებულება, რაც დაადასტურებდა, რომ გიორგი გაბაიძე წინააღმდეგობას უწევდა პოლიციას ეზოში და დგებუაძემ ეს ნახა.

ირაკლი დგებუაძემ ვერც ის დაასახელა, ვინ იყვნენ ის თანამშრომლები, რომლებიც მას მოუყვნენ გაბაიძის მიერ დაკავებამდე პოლიციელთა შეურაცხყოფის შესახებ.

დაზარალებულმა ირაკლი დგებუაძემ ასევე იცრუა იმასთან დაკავშირებით, რომ ჭიშკრიდან გასვლისას მას მზია აგრესიულად სთხოვდა დაკავებულების გათავისუფლებას.

ირაკლი დგებუაძემ თქვა „ნუ სახეზე ვატყობ ძალიან აღელვებას, აგრესიას, ეს ტემბრიც, ახლა შეიძლება ქალბატონია და რაღაც არ შემშინებია ამ ტემბრის, მაგრამ ბუნებრივია დავინახე, რომ აგრესიულია ძალიან და იმდენად აბსურდული მოთხოვნა ჰქონდა, ახლა როდის ათავისუფლებთ ჩემი ოჯახის წევრს და თან ამას აგრესიულად ითხოვ, ჩავთვალე, რომ იმ მომენტში მასთან კონკრეტულად საუბარს აზრი არ ჰქონდა და დავაპირე წასვლა“.

მან ჩემი არაერთი კითხვის პასუხად არაერთხელ გაიმეორა, რომ მზიამ მიმართა „როდის გაათავისუფლებ“? – აგრესიული ტონით და აგრესიული გამომეტყველებით, რაც მას გამოძიებაში გამოკითხვისას არ უთქვამს.

ვიდეომტკიცებულება #14 ადასტურებს, რომ სილამდე მზია სულ ამბობს 3 წინადადებას და არც ერთი არაა არც „გათავისუფლების მოთხოვნა“ და არც ერთი წინადადება არაა აგრესიული არც შინაარსით და არც ტონით, საერთოდ არაა რაიმეს მოთხოვნა.

უფრო მეტიც პირველი 2 წინადადებას ძალზე დაბალო ტონით ამბობს – ისე, რომ გარჩევაც ძნელია, ოდნავ მკვეთრად ისმის მხოლოდ ბოლო წინადადება: „მისმინე აგერ, მე რომ დამაკავა“. თუმცა, არსად არაა ისეთი ტონი, რომელიც აღნიშვნის ღირსია, ან მიანიშნებს საგანგებო აგრესიაზე, როგორც ამას ირაკლი დგებუაძე მიუთითებს.

ჩემი კითხვების საბოლოო პასუხად მან ჯერ განაცხადა, რომ „წინადადება – როდის გაათავისუფლებ ჩემს ახლობლებს მან აღიქვა აგრესიულ საუბრად, ხოლო #14 ვიდეოს ჩვენების შემდეგ, სადაც ისმის მზიას ფრაზა, რომ ის არ ითხოვს გათავისუფლებას, არამედ ამბობს წინადადებას – „ჩემი ოჯახის წევრი დააკავეს“, მან ამჯერად ყურადღება გაამახვილა იმაზე, რომ არ ჩანს მზიას სახის გამომეტყველება, თორემ გამომეტყველება აგრესიული იყო.

ირაკლი დგებუაძემ აღნიშნა, „ამ კონკრეტულ ვიდეოში ქალბატონი მზიას გამომეტყველებაც არ ჩანს, აქ ისმის სიტყვები ხომ რასაც მეკითხება. მე კიდევ ერთხელ გეუბნებით, რომ ჩემი მისამართით სიტყვიერ შეურაცხყოფას ქალბატონი მზიას მხრიდან ადგილი არ ქონია, თუმცა მისი სახის გამომეტყველებაზე, ვიმეორებ ფრაზას, ადამიანები ვართ და ვგრძნობთ როდის საუბრობს ადამიანი შენს მიმართ აგრესიულად“.

შესაბამისად, საბოლოოდ, მან ხან ტონი მიუთითა, ხან გამომეტყველება, მაგრამ ვერ დაასახელა ვერაფერი, რაც ოდნავ საღი აზრის მქონე ადამიანს დაარწმუნებდა, რომ მზია ძალიან აგრესიულად გამოიყურებოდა და რაც მთავარია, საუბრის დასაწყისშივე. აღელვებული კი ნამდვილად იყო.

ირაკლი დგებუაძემ იცრუა იმასთან დაკავშირებით, რომ ის იცნობდა მზია ამაღლობელს აქციებიდან. მან თქვა „აქციებზე მინახავს, რამდენიმე დღით ადრე, როგორც მახსოვს, გავსაუბრებივარ კიდეც“.

ირაკლი დგებუაძემ ვერ ახსნა, თუ რატომ დაამახსოვრდა მზია ამაღლობელი აქციებიდან, რით გამოირჩეოდა იგი.

„რით და არაფრით არ გამოირჩეოდა. არასოდეს ამ ქალბატონის მხრიდან მე რამე განსაკუთრებული ქმედება არ დამინახავს“, – აღნიშნა მან და მიუხედავად ამისა, განაცხადა, რომ მზია ამაღლობელს იცნობს აქციებიდან.

ირაკლი დგებუაძესთან რაიმე ნაცნობობა და კომუნიკაცია უარყო მზია ამაღლობელმა და ამასთან დგებუაძის განმარტების დამადასტურებელი რაიმე მტკიცებულება ბრალდებას არ წარმოუდგენია.

დაზარალებულმა ირაკლი დგებუაძემ შემდეგი პასუხი გასცა პროკურორის შეკითხვას – ვიდეო #9 „სისხლით ბოი… შვილი ვიყო, სისხლით…“ რას ნიშნავს სიტყვები „სისხლი“ და ეს ხმა მისია თუ არა.

დგებუაძემ უპასუხა, რომ ხმა ჰგავს მისას და შემდეგ ასე ახსნა: „შესაძლებელი არის, რომ ჩემი კოლეგები იდგნენ შიგნით, ეზოს შიგნით. მე მანამდეც ვთქვი, რომ რამდენიმე მეტრი შევედი თავდასხმის შემდეგ, ღობის შიგნით ჩემი კოლეგები იდგნენ, რომელთაც ფაქტი ვერ დაინახეს რა მოხდა რეალურად.

დაინახეს, რომ ქალბატონი დააკავა ბერდია ფერაძემ და გივი ბჟალავამ და შეჰყავდათ შიგნით.

ამ მომენტში შესაძლებელია, ფაქტის აღწერის დროს, უწმაწური სიტყვები ვიხმარე, რითაც ნამდვილად არ ვამაყობ, თუ, რა თქმა უნდა, ეს ჩემი ხმა არის.

რაც შეეხება, ეს ტელევიზიაშიც გავიდა, ეს ფრაზა – „სისხლით დავიჭერ“ არის ტიტრები, „სისხლით დავიჭერ“ არ არის, მანდ კითხვა დაისვა, რომ ადმინისტრაციულად დააკავეს? ერთ-ერთმა თანამშრომელმა დასვა კითხვა და ჩემი აზრი გამოვთქვი, რა ვიცი, პოლიციაში ვმუშაობ 11 წელია და ვარჩევ ადმინისტრაციულ სამართალდარღვევას და სისხლის სამართლებრივ დანაშაულს.

ჩემი აზრი იყო, რომ წესით და რიგით სისხლით უნდა დაეკავებინათ, ანუ სისხლის სამართლის 353-ე მუხლით, ეს შემიძლია გავაკეთო განმარტება“.

შემდეგ დაცვის მხარის კითხვაზე, მან კიდევ გაიმეორა, რომ ამ დროს იგი მხოლოდ ჰყვებოდა ამბავს და მას არ ამოძრავებდა შურისძიება. შესაბამისად, ირაკლი დგებუაძემ არაერთხელ იცრუა ამ ეპიზოდთან დაკავშირებითაც. კერძოდ:

მან თქვა, რომ მისი კოლეგები იდგენენ ეზოს შიგნით, ვინც ვერ დაინახა რა მოხდა და მათთვის ხსნიდა ამბავს.

სინამდვილეში კი ჩვენს მიერ წარმოდგენილი ვიდეომტკიცებულება #9-ში ჩანს, მაშინ, როდესაც ირაკლი დგებუაძე აგინებს და ემუქრება მზია ამაღლობელს, ჭიშკრის შიგნით იმყოფებიან მხოლოდ ის პოლიციელები, რომლებიც შეესწრნენ ინციდენტს, შემოაგდეს მზია და შემოჰყვნენ. კერძოდ კადრში ჩანან გრიგოლ ბესელიას მოადგილე ათაბეგაშვილი, არჩილ ანთიძე, ბერდია ფერაძე და მზიას უცნობი დამკავებელი, ასევე 2 პოლიციელი, რომლებიც ორი მხრიდან აკავებენ ირაკლი დგებუაძეს (00.00.15 წმ), რომ არ მისწვდეს მზიას ანგარიშსწორებისათვის.

კადრში ჩანს, როგორ ცდილობს ირაკლი დგებუაძე უკნიდან, მარცხენა ხელით მისწვდეს მზიას მარცხენა მხარზე (შესაძლოა მისწვდა კიდეც). ამ კადრების პარალელურად მიდის ირაკლი დგებუაძის გინება მზიას მისამართით.

აღსანიშნავია, რომ სიტყვებს „სისხლით ბოი… შვილი ვიყო, სისხლით“ ირაკლი დგებუაძე ამავე კადრში ორჯერ იმეორეს და მეორე გამეორებისას მას აგრძელებს სხვა ფრაზით – „მაგას მოვუ…ნავ დედის მუ…ლს“. შესაბამისად, არც ერთი საღად მოაზროვნე ადამიანი არ გაიზიარებს, რომ ამ კადრში ირაკლი დგებუაძე თურმე უხსნიდა კვალიფიკაციის საკითხებს სხვა პოლიციელებს.

ამავე პასუხში მან თქვა ასევე სხვა სიცრუე, რომ მზია ამაღლობელი დააკავეს ბერდია ფერაძემ და გიორგი ბჟალავამ და შეჰყავდათ შიგნით.

როგორც არაერთხელ აღვნიშნე, უშუალოდ ინციდენტისას გიორგი ბჟალავას არ დაუკავებია მზია ამაღლობელი და არც გიორგი ბჟალავას შეჰყავდა შიგნით.

ირაკლი დგებუაძემ ეს კარგად იცის, ვინაიდან ის მიდის მათ უკან და მას სწორედ ის უცნობი პოლიციელი იჭერს, რომელიც მარცხენა მხარეს უდგას დაკავებულ მზია ამაღლობელს.

ის, რომ ბჟალავამ დააკავა მზია ამაღლობელი ირაკლი დგებუაძემ არაერთხელ გაიმეორე დაკითხვისას.

დასკვნითი სიტყვისას პროკურორმა დაადასტურა, რომ ის, ვინც ჩანს კადრში (ვიდეო #6, ვიდეო #9) ბერდია ფერაძესთან ერთად და ვისაც მიჰყავს დაკავებული მზია ამაღლობელი თურმე არ არის გიორგი ბჟალავა.

სასამართლოს ყურადღებას მივაპყრობ იმ გარემოებას, რომ ბრალდებამ ეს მხოლოდ მას შემდეგ აღიარა, რაც ჩვენ სასამართლოზე კადრებით მოვახდინეთ იმის დემონსტრირება, რომ გიორგი ბჟალავა და პირი, რომელმაც დააკავა მზია ამაღლობელი არ არის ერთი და იგივე პირი.

ირაკლი დგებუაძემ იცრუა მზია ამაღლობელის ადმინისტრაციული დაკავების გარემოებებთან დაკავშირებით და სასამართლოზე განმარტა, რომ მზია ამაღლობელის ადმინისტრაციული დაკავებისას ის დგას შორიახლოს, რამდენიმე მეტრში და მზია ჭიშკართან დააკავა გოჩა ვანაძემ.

სასამართლოზე #10 ვიდეომტკიცებულების დემონსტრირების შემდეგ – „ადმინისტრაციულით დავაკავეთ, 150-ე მუხლით“ – მან გადათქვა და ამჯერად მიუთითა, რომ მან დაინახა გოჩა ვანაძის და მზიას შემხებლობა ჭიშკართან, თუმცა ვერ ახსნა, რას ნიშნავს შემხებლობა.

სინამდვილეში კი #4 და #10 ვიდეოების თანახმად, ის არათუ შორიახლოს, არამედ უშუალოდ გრიგოლ ბესელიას გვერდით დგას მაშინ, როდესაც ის აკავებს მზია ამაღლობელს, მათ შორის მის თვალწინ ბესელიას შეჰყავს მზია ამაღლობელი ჭიშკარში და ამავდროულად მას მოქალაქე მიმართავს სახელით „ირაკლი ახლა რა დაარღვია, რატომ დააკავეთ?“ ირაკლი დგებუაძე კი პასუხობს – „150-ე მუხლი“.

ირაკლი დგებუაძემ იცრუა, რომ მას საკმაოდ ძლიერი სილა მოხვდა ლოყის და ყურის არეში, რომ მან განიცადა ტკივილი, რომ მას ამ სილის გამო ლოყა-ყურის არე გაწითლებული ჰქონდა მინიმუმ 30 წუთის განმავლობაში და მან ეს სიწითლე თავად დაათვალიერა 30 წუთის შემდეგ, როდესაც შევიდა შენობაში თავის სამუშაო ოთახში.

ტკივილის ნაწილში ბრალდების მტკიცებულება არის მხოლოდ თავად ირაკლი დგებუაძის განმარტება, რომელიც არ არის გამყარებული არც ობიექტური ტესტით და არც ობიექტური, გარეგნული, აღქმადი, დამარწმუნებელი  ნიშნებით.

სასამართლოში დავკითხეთ ექსპერტად მოწვეული ექიმი-ნევროლოგი ნათია ხარატი, რომელმაც განმარტებები გააკეთა ტკივილის ცნებასთან დაკავშირებით და ახსნა ტკივილის მექანიზმი.

„ტკივილის შესწავლის საერთაშორისო ასოციაციის“ ბოლო განმარტების მიხედვით, ტკივილი განისაზღვრება შემდეგნაირად: „არასასიამოვნო სენსორული და ემოციური განცდა, რომელიც ასოცირებულია ქსოვილოვანი დაზიანების რეალურ და პოტენციურ საფრთხესთან ან აღწერს ასეთ დაზიანებას“.

როგორც ექსპერტმა ისე, დაცვის მხარის მიერ მოწმედ მოწვეულმა იმპლანტოლოგ – ქირურგმა თათია ანდღულაძემ სასამართლოს განუმარტეს, რომ რეალური ტკივილი ყოველთვის უკავშირდება ქსოვილოვან დაზიანებას, რაც ირაკლი დგებუაძის შემთხვევაში სახეზე არ გვაქვს.

ექსპერტმა სასამართლოზე ახსნა, რომ ტკივილის მტკიცება უნდა ეფუძნებოდეს არა მხოლოდ ტკივილის შეგრძნების სუბიექტურ შეფასებას, არამედ ამასთან ხილულ, შესწავლილ და დადასტურებულ მონაცემებს, რაც ირაკლი დგებუაძის შემთხვევაში არ გვაქვს.

მისი დასკვნით და ჩვენს მიერ გადაცემული საქმის მასალების საფუძველზე, სამედიცინო თვალსაზრისით შეუძლებელია იმის მტკიცება, რომ ირაკლი დგებუაძემ კადრში აღწერილი სილის შედეგად განიცადა ტკივილი. როგორც ექსპერტმა, ისე მოწმემ ისაუბრეს, რომ ტკივილის შეფასებისთვის სუბიექტურთან ერთად საჭიროა ობიექტური ნიშნების არსებობა, რაც მოცემულ შემთხვევაში არ ვლინდება, არ დასტურდება.

როგორც ექსპერტმა, ისე მოწმემ გამორიცხეს, რომ ფიზიოლოგიურად შეიძლება დამაჯერებელი იყოს თავად პროცესის იმდაგვარად აღწერა, როგორც ამას ირაკლი დგებუაძე აღწერს, რომ ძლიერი დარტყმის და წუთიერი ტკივილის შემდეგ მას ძალიან მოკლე დროში სახეზე არანაირი ზემოქმედების კვალი არ აღენიშნება, თუმცა სიწითლე წარმოიშვა შემდეგ და შენარჩუნდა მინიმუმ 30 წუთი, რის შემდეგ გაქრა ყოველგვარი სისხლძარღვოვანი დაზიანების კვალის გარეშე.

გარდა აღნიშნულისა, მოწმე თათია ანდღულაძემ სასამართლოზე დეტალურად ახსნა, როგორ მუშაობს სახის, სხეულის ბუნებრივი მოტორიკა ტკივილზე რეაქციის შემთხვევაში. მან, სილის შემდეგ ირაკლი დგებუაძის მიერ გამოვლენილი მოტორიკის შეფასებისას (მას არ ჰქონდა არანაირი თანდაყოლილი, ბუნებრივი რეაქცია) სასამართლოზე განმარტა, რომ ხილული, ობიექტური ნიშნების მიხედვით, სილის გაწვნის მომენტში ირაკლი დგებუაძეს ტკივილი არ აღუქვამს.

შესაბამისად, არ სტკენია“.

ქართული ემიგრაციული ორგანიზაციების განცხადებას ეხმიანებიან, სინდისის პატიმრის, პედაგოგისა და აქტივისტის, ნინო დათაშვილისათვის პროკურატურის ინიციატივითა და სასამართლოს გადაწყვეტილებით, არანებაყოფლობით ფსიქიატრიულ ექსპერტიზის ჩატარებას.

„ჩვენ, ქვემოთ ხელმომწერი ქართული ემიგრაციული ორგანიზაციები და ემიგრაციული ჯგუფების წარმომადგენლები, სასტიკად ვგმობთ საქართველოს არალეგიტიმური ხელისუფლების მიერ კონტროლირებადი სასამართლოს გადაწყვეტილებას პოლიტიკური პატიმრის ნინო დათაშვილისათვის იძულებითი ფსიქიატრიული ექსპერტიზის ჩატარების შესახებ.

მიგვაჩნია, რომ ეს გადაწყვეტილება ეწინააღმდეგება ადამიანის უფლებათა საყოველთაოდ აღიარებულ პრინციპებს და საერთაშორისო სამართლის ნორმებს.

ადამიანების დისკრედიტირებისა და მეტიც, ხშირად წამებისათვის ფსიქიკური ჯანმრთელობის საკითხის გამოყენება წარმოადგენდა საბჭოთა რეჟიმის ერთ-ერთ ყველაზე გავრცელებულ მეთოდს, რომლის დროსაც ადამიანები იძულებითი მკურნალობის საფარქვეშ ხდებოდნენ წამებისა და არაადამიანური მოპყრობის მსხვერპლები და ამასთან დაკავშირებით მსოფლიოსათვის უამრავი მაგალითია ცნობილი.

დღეს, საქართველოში მოქმედი ბიძინა ივანიშვილის პრორუსული რეჟიმი, რომელსაც ფაქტობრივად მიტაცებული აქვს ხელისუფლება, ნაცვლად იმისა, რომ ფსიქიკური ჯანმრთელობის პრობლემების მქონე ადამიანებისათვის ქმნიდეს შესაბამის სარეაბილიტაციო დაწესებულებებს და ებრძოდეს სტიგმას, გადასულია უდანაშაულო ადამიანების დაავადებულებად გამოცხადების მავნე პრაქტიკის დაბრუნებაზე და ნინო დათაშვილის მაგალითი არის პირველი სიგნალი განგაშისათვის.

მსოფლიოს მრავლად ახსოვს მაგალითები, როცა საბჭოთა კავშირმა დევნის ასეთი ყოველგვარ მორალსა და ზნეობას მოკლებული მეთოდი გამოიყენა ისეთი ადამიანების მიმართ, როგორებიც არიან: ალექსანდრ ბუკოვსკი, ნატალია გორბანევსკაია, ლეონიდ პლეშაკოვი, ანატოლი კორუაგინი და სხვა.

საბჭოთა ოკუპაციის ქვეშ ყოფნის პირობებში საქართველოშიც აქტიურად გამოიყენებოდა განსხვავებული აზრის მქონე ადამიანების დასჯის ეს მექანიზმი. ამის ნათელი მაგალითია ნაზი შამანაური რომელსაც 1982 წელს დუშეთის რაიონის სასამართლომ იძულებითი მკურნალობა მიუსაჯა თბილისის ასათიანის სახელობის რესპუბლიკურ ფსიქიატრიულ საავადმყოფოში, სადაც იგი არაერთგზის გახდა წამებისა და არაადამიანური მოპყრობის მსხვერპლი ხოლო 1983 წლის იანვარში ნაზი შამანაური საავადმყოფოს პერსონალმა სცემა, რის შედეგადაც მიყენებული დაზიანებების შედეგად იგი გარდაიცვალა.

სწორედ ამ პრაქტიკის გაგრძელებაა ის, რასაც ახლა მოსამართლე ფიქრია სიქტურაშვილი აკეთებს.

მოგმართავთ საერთაშორისო ორგანიზაციებს, ადამიანის უფლებათა დამცველებს, მსოფლიო დემოკრატიული საზოგადოებების ლიდერებს. საჭიროა, დროულად იქნას აღმოფხვრილი ადამიანის მიმართ ფსიქიკური ჯანმრთელობის, როგორც წამების ინსტრუმენტის გამოყენების ეს საფრთხე.

საჭიროა, დროულად გამოეხმაუროთ ამ პრაქტიკის დაბრუნებას ქართულ რეალობაში.

საჭიროა, სანქციების ქვეშ მოექცეს ყველა ის ადამიანი, რომლებიც ჩართული არიან ამ პროცესში, მათ შორის პირველ რიგში მოსამართლე ფიქრია სიქტურაშვილი, პატიმრობის შემფარდებელი მოსამართლე ეკა ბარბაქაძე და საქმის პროკურორები მედეა ცირამუა და ნინო კეპულაძე.

ქართული ემიგრაციული ორგანიზაციები და მათი წარმომადგენლები გამოვხატავთ მზადყოფნას, მოგაწოდოთ ყველა საჭირო ინფორმაცია, რაც შესაძლებლობას მოგცემთ იმოქმედოთ დაუყოვნებლივ და შესაძლებელი გახადოთ უდანაშაულო ადამიანის დაცვა პოლიტიკური დევნისა და ანგარიშსწორებისაგან.

ჩვენ გვჯერა, რომ დღეს ქართული სამოქალაქო საზოგადოების, მისი აქტიური წევრების დაცვა და მათი ბრძოლის მხარდაჭერა გამოიღებს შედეგს. დამარცხდება არალეგიტიმური ხელისუფლება და საქართველო კვლავ დაუბრუნდება ევრო-ატლანტიკური ინტეგრაციის გზას“ – ნათქვამია განცხადებაში.

განცხადებას ხელს აწერენ:

• ქართველთა ასოციაცია ნორვეგიაში „კრება“
• ქართველ ემიგრანტთა საერთაშორისო ცენტრი (ICGE), ბელგია
• „თაობები საქართველოსთვის“
• „თაობები საქართველოსთვის“ – იტალია
• „ქართული თემი დიდ ბრიტანეთში“
• შტუტგარტის ჯგუფი
• „თავისუფლების ფონდი“, გაერთიანებული სამეფო
• „ამერიკელი ქართველები პროგრესისთვის“
•  ასოციაცია „თამარიელი“
• „ცხრათვალა“, საბერძნეთი
• II Generation
• დანიაში ქართული დიასპორის წარმომადგენლებ
• „კანადელი ქართველები პროგრესისთვის“
• შვედეთში ქართული დიასპორის წარმომადგენლები
• „ქართული ემიგრაციისა და დიასპორის ინსტიტუტი“
• „პლატფორმა 2025“
• „გზა“
• ქართველთა სათვისტომო ავსტრიაში

რა ხდება?

2 აგვისტოს სინდისის პატიმრის, ნინო დათაშვილის ადვოკატებმა განაცხადეს, რომ პროკურატურის ინიციატივითა და სასამართლოს გადაწყვეტილებით, ნინო დათაშვილს ფსიქიატრიულ ექსპერტიზას ჩაუტარებენ.

თუ ნინო დათაშვილი უარს განაცხადებს ამ შემოწმებაზე სასამართლოს გადაწყვეტილების თანახმად, მას ფსიქიატრიულ დაწესებულებაში იძულებით გადაიყვანენ. შემოწმების მიზნით დათაშვილმა ფსიქიატრიულ დაწესებულებაში 20 დღე უნდა გაატაროს.

დათაშვილის ადვოკატების თქმით, დაკავებულ მასწავლებელს ხერხემლის სერიოზული პრობლემები აქვს, მას აქვს მალებს შუა დაზიანება, თიაქარი და რადიკულიტი. ამ დაავადებების თანმხლები სიმპტომია (და არა ცალკე დიაგნოზი) ემოციური ლაბილობა ანუ ემოციის და განწყობის სწრაფი მონაცვლეობა, რომელიც ნინო დათაშვილს 2019 წელს აღენიშნებოდა. ადვოკატების განცხადებით, ამ საკითხზე აპელირებს პროკურატურა და ცდილობს ნინოს სტიგმატიზებას, რადგან საზოგადოებაში ფსიქიატრიულ ექსპერტიზაზე საუბარი უკვე იწვევს გარკვეულ განწყობებს ზოგადად ამ თემის მიმართ არსებული სტიგმების გამო.

„ტირილი და ემოციის მატება არ არის დიაგნოზი ეს არის სიმპტომი, რომელიც ნინოს ხერხემლის პრობლემებს ახლავს თან“, – აცხადებენ ადვოკატები.

ადვოკატები ფიქრობენ, რომ ამ ექსპერტიზას პროკურატურა ნინო დათაშვილის წინასწარი პატიმრობის გახანგრძლივებისთვის იყენებს.

ნინო დათაშვილის სასამართლო 7 აგვისტოს არის ჩანიშნული და იქ უნდა გადაისინჯოს, არსებობს თუ არა დათაშვილის წინასწარ პატიმრობაში დატოვების აუცილებლობა.

ადვოკატების განცხადებას დღესვე, 2 აგვისტოს, გამოეხმაურა პროკურატურა.

პროკურატურის ცნობით, მოცემულ სისხლის სამართლის საქმეზე, დაცვის მხარემ წარმოადგინა ნინო დათაშვილის ჯანმრთელობის მდგომარეობის ამსახველი დოკუმენტები, სადაც თანმხლებ დაავადებად მითითებულია ფსიქო-ემოციური ლაბილობა. „ზემოაღნიშნულიდან გამომდინარე, ვინაიდან, ადვოკატების მიერვე წარმოდგენილ სამედიცინო დოკუმენტაციაში საუბარი იყო ბრალდებულის ფსიქო-ემოციურ მდგომარეობაზე, მიზანშეწონილად ჩაითვალა ექსპერტიზის დანიშვნა“ – წერს პროკურატურა.

სამოქალაქო აქტივისტი, სამოქალაქო განათლების მასწავლებელი ნინო დათაშვილი სასამართლოს მანდატურზე თავდასხმის ბრალდებით 20 ივნისს დააკავეს. პროკურატურა ცდილობს თავდასხმად დააკვალიფიციროს ინციდენტი, რომელიც დათაშვილსა და მანდატურებს შორის მოხდა ნინოს სასამართლოდან ძალის გამოყენებით, იძულებით გაძევებისას.

ორშაბათს, 4 აგვისტოს, 13 საათზე ბათუმის საქალაქო სასამართლოში დასრულდება მზია ამაღლობელის საქმის არსებითი განხილვა.

4 აგვისტოს მზია ამაღლობელი სასამართლოს დასკვნითი სიტყვით მიმართავს.

ამით დასრულდება ბათუმის საქალაქო სასამართლოში მზია ამაღლობელის საქმის 7-თვიანი განხილვა და დიდი ალბათობით, 4 აგვისტოსვე იქნება ცნობილი მოსამართლის გადაწყვეტილებაც – განაჩენი მზია ამაღლობელის საქმეზე.

მზია ამაღლობელი 2025 წლის 12 იანვარს დააკავეს სისხლის სამართლის წესით. იგი 200 დღეზე მეტია წინასწარ პატიმრობაში იმყოფება. მიუხედავად იმისა, რომ მისი წინასწარ პატიმრობაში დატოვების საფუძველი არ არსებობდა, მოსამართლე ნინო სახელაშვილმა ეს არ გაითვალისწინა და მზია ამაღლობელი პატიმრობაში დატოვა.

• რა ხდება?

პროკურატურა „ბათუმელების“ დამფუძნებელს, ჟურნალისტსა და მედიამენეჯერს, მზია ამაღლობელს 12 იანვარს, ბათუმში, პოლიციის შენობასთან მიმდინარე აქციაზე ბათუმის პოლიციის უფროსისთვის, ირაკლი დგებუაძისთვის სილის გაწვნისთვის პოლიციელზე თავდასხმაში ადანაშაულებს – სისხლის სამართლის კოდექსის 353¹-ე მუხლით, რაც 4-დან 7 წლამდე პატიმრობით ისჯება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.

მზია ამაღლობელის საქმეში არაერთი ცრუმოწმეა და ყველა მათგანი პოლიციელია.

მზია ამაღლობელის პატიმრობის განმავლობაში „ოცნების“ ლიდერები არღვევენ მზია ამაღლობელის მიმართ უდანაშაულობის პრეზუმფციას და მას აბრალებენ, თითქოს მზია ამაღლობელი „დავალებით მოქმედებდა“, მაშინ როცა მსგავს ბრალდებას მზია ამაღლობელს პროკურატურაც კი არ უყენებს.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

„ეს მართლა ისტორიული შანსია, რომლითაც აუცილებლად უნდა ისარგებლოს სამხრეთ კავკასიამ,“ – გვითხრა სამხრეთ კავკასიის საკითხებზე მომუშავე პროფესორმა გიორგი მჭედლიშვილმა, რომელსაც სომხეთის პერსპექტივაზე ვესაუბრეთ.

პროფესორი აკვირდება თვალსა და ხელს შუა როგორ იცვლება განწყობები სომხეთში და როგორ ეცლება რუსეთს ხელიდან ბერკეტები…

„რუსეთის მიზანია, არ შედგეს სამხრეთ კავკასიის რეგიონი – სრულფასოვან რეგიონს აქვს დიდი პოტენციალი მით უმეტეს ევროკავშირის და ჩინეთი-აზიის შუა გზაზე. თანაც, ამ პირობებში, როცა ირანში პრობლემებია და რუსეთი უფრო და უფრო გარიყული სახელმწიფო ხდება.

ამ მოცემულობაში სამხრეთ კავკასიის როლი იზრდება. რუსეთის ამოცანაა, არ დაუშვას ამ რეგიონის მშვიდობიანი, სტაბილური განვითარება, როგორც ეს მოხდა, მაგალითად, ბალტიის ქვეყნებში. იქაც ჰქონდათ კონფლიქტი ერთმანეთთან ტერიტორიული, მაგრამ დროულად გაიაზრეს, რომ მთავარი იყო ევროინტეგრაცია, ნატოში ინტეგრაცია და ორი-სამი კილომეტრი ჩრდილოეთით, თუ სამხრეთით მოიცდის.

დღეს ზუსტად ეს შანსი გაჩნდა კავკასიაში, როცა რუსებს აღარ ჰყოფნით ძალა მიხედონ სამხრეთ კავკასიას. აქამდე რუსეთს ეს რეგიონი ეჭირა კონფლიქტით – ყარაბაღის კონფლიქტი უნდა გაგრძელებულიყო უკუნითი უკუნისამდე, რომ რუსეთს ჰქონოდა ხელში ბერკეტები. ახლა რუსეთს ხელიდან ეცლება ბერკეტები. ნიადაგი ეცლება რუსეთს ჩვენს თვალწინ,“ – გვითხრა გიორგი მჭედლიშვილმა.

„ბათუმელებმა“ გიორგი მჭედლიშვილთან ინტერვიუ ჩაწერა. იგი ევროპის უნივერსიტეტის ასოცირებული პროფესორია და საერთაშორისო ურთიერთობის სპეციალისტი, მუშაობს სამხრეთ კავკასიის და პოსტსაბჭოთა სივრცის საკითხებზე.

• ბატონო გიორგი, სამხრეთ კავკასიაში ცვლილებებია: სომხეთი აზერბაიჯანთან ერთად შორდება რუსეთის ორბიტას. თქვენი დაკვირვებით, ამ პროცესში რამდენად გაიზარდა შანს – სომხეთმა აზერბაიჯანთან სამშვიდობო შეთანხმებას მოაწეროს ხელი, რაც სომხეთის ურთიერთობას თურქეთთანაც შეცვლის? 

ეს მართლაც უნიკალური შესაძლებლობაა – შესაძლებლობების ახალი ფანჯარაა გახსნილი, უნდა ვისარგებლოთ ამით.

პირველად ამ 35 წლის მანძილზე, რაც საბჭოთა კავშირი დაიშალა და დამოუკიდებელი ვართ სამხრეთ კავკასიის ქვეყნები, სომხეთი და აზერბაიჯანი პირველივე დღეებიდან ომობდნენ. ფაქტობრივად, ეს ქვეყნები 2020 წლამდე, ანუ ყარაბაღის მეორე ომამდე, თვლიდნენ, რომ რუსეთი იყო მათი მთავარი არბიტრი, რომ ამ კონფლიქტის გასაღები იყო რუსეთში და ორივე ცდილობდა, რუსეთისთვის მოეწონებინა როგორმე თავი – იქნებ რამე ჩემს სასარგებლოდ გადაწყდესო.

თურქეთი არ იყო ჩართული ამ პროცესში, დასავლეთი კი, მოშორებით იყო: ეს არ იყო კოსოვო და იუგოსლავია. შესაბამისად, მონოპოლისტი იყო რუსეთი: როდესაც რუსეთის ურთიერთობა რთულდებოდა აზერბაიჯანთან, სომხეთი ცდილობდა ესარგებლა ამით და პირიქით. სომხეთს ოკუპირებული ჰქონდა არამხოლოდ ყარაბაღი, არამედ კიდევ 7 რაიონი. რაღაც რეზოლუციები არსებობდა, რომ ნაწილი უნდა დაებრუნებინა, მაგრამ არ აბრუნებდნენ.

შემდეგ სომხეთის ხელისუფლებაში მოვიდა ძალიან განსხვავებული ლიდერი – მანამდე 20 წლის მანძილზე სომხეთის ორივე პრეზიდენტი – ქოჩარიანი და სარქისიანები ყარაბაღელები იყვნენ. ბევრი სომეხი დღემდე მიიჩნევს, რომ სომხეთს კი არ აქვს ყარაბაღი ოკუპირებული, არამედ ყარაბაღს – მთელი სომხეთი.

იმის გამო, რომ რუსეთი დასუსტებულია და უკრაინა უძლებს რუსეთის საშინელ აგრესიას – აკავებს რუსეთს, ეს მთავარი ფაქტორი გახდა. რუსეთს აღარ აქვს რესურსი, სხვა რეგიონში მიხედოს საქმეს. ამით ისარგებლეს სომხეთმა და აზერბაიჯანმაც, რადგან ორივეს აქვს რუსეთთან გართულებული ურთიერთობა სხვადასხვა მიმართულებით.

• სომხეთის ლიდერმა, ფაშინიანმაც განაპირობა სომხეთის რუსეთის ჩრდილიდან გასვლა? 

დიახ, თუმცა ვიდრე რუსეთი უკრაინაში დაიწყებდა სრულმასშტაბიან ომს, ფაშინიანი 2018 წელს მოვიდა სომხეთის ხელისუფლებაში და ცდილობდა, დასავლეთთან გაეღრმავებინა ურთიერთობა, ამავდროულად ცდილობდა, არც რუსეთთან გაეფუჭებინა საქმე.

თუმცა ყარაბაღის მეორე ომის შემდეგ სომხეთმა ჩათვალა, რომ რუსეთმა უღალატა. ამ ომის შემდეგ ძალიან შეიცვალა დამოკიდებულება რუსეთის მიმართ. მანამდე ეგონათ, რომ ყარაბაღში რუსეთი სომხეთს დაუდგებოდა გვერდით იმის მიუხედავად, რომ რუსეთმა არ ცნო ყარაბაღი, როგორც დამოუკიდებელი სახელმწიფო. ამიტომაც, რუსეთისთვის ყარაბაღი იყო აზერბაიჯანის ნაწილი.

ამ დროს საზოგადოებრივი აზრი სომხეთში გადაიხარა რუსეთის წინააღმდეგ, რითაც ისარგებლა ფაშინიანმა. მანამდე, 2018 წლამდე, სომხეთი ძალიან მყარად იყო რუსეთის ორბიტაში. იქ ახლაც არიან პირდაპირ პრორუსული პოლიტიკური ძალები, რომლებიც ებრძვიან ფაშინიანს.

იმის მიუხედავად, რომ არჩევნები 2026 წლის ივნისშია, სომხეთში უკვე დაწყებულია წინასაარჩევნო კამპანია. რუსეთმა სპეციალური წარმომადგენელი დანიშნა სომხეთის არჩევნებზე სადღაც აპრილში, ანუ არჩევნებამდე წელიწადით და ორი თვით ადრე…

ტელევიზიები ფაშინიანს უკანასკნელი სიტყვებით აკრიტიკებენ, განსაკუთრებით კი, მარგარეტა სიმონიანი გამოირჩევა, რომელიც ეროვნებით სომეხია და რუსული „სპუტნიკის“ ხელმძღვანელი.

მნიშვნელობით ეს არჩევნები სომხეთში არის იგივე, რა არჩევნებიც ჩვენ გვქონდა 2024 წელს.

ფაშინიანი, მოგეხსენებათ, ხელისუფლებაში მოსვლამდე მუშაობდა არასამთავრობო ორგანიზაციაში, შემდეგ ოპოზიციური, პროდასავლური გაზეთის რედაქტორი იყო. ეს ხდებოდა 2000-იან წლებში, როდესაც რეალურად ძალიან დიდი იყო რუსეთის გავლენა სომხეთზე. ფაშინიანი პროდასავლელია თავისი მენტალობით, რეალურად სურს, რომ სომხეთი დაადგეს იმ გზას, რომელზეც დგას უკრაინა, მოლდოვა და იდგა საქართველო…

• რამდენად შეიცვალა სომხეთში პრორუსული განწყობა მას აქეთ, რაც ევროპული განვითარების პერსპექტივა დაინახეს? 

სომხეთში არ აქვს ისეთი მხარდაჭერა ევროკავშირს, როგორც საქართველოში, თუმცა გაცილებით მეტი უჭერს მხარს ევროკავშირს, ვიდრე 10-15 წლის წინ. სომხეთი ხდება უფრო და უფრო პროევროპული, თუმცა არა სასურველი ტემპით.

ჩემი აზრით, ახლა ძალიან აქტიურად უნდა დაეხმაროს დასავლეთი სომხეთს, რომ, პირველ რიგში, იკლოს თურქოფობიამ – რეალურად აზერბაიჯანის მიმართაც ამიტომ არსებობს შიში, რომ აზერბაიჯანი თურქეთის მოძმე ერია.

ჩემი აზრით, სომხეთში მთავარი გზავნილი უნდა იყოს ის, რომ ჯობია სამშვიდობო მოლაპარაკება და მშვიდობა აზერბაიჯანთან და თურქეთთან ახალ ესკალაციას. ამჟამად რეალურად წაგებული ომით სარგებლობენ რევანშისტული, ანტიდასავლური ძალები, ამიტომაც, დასავლეთი უნდა დაეხმაროს სომხეთის საზოგადოებას: დაანახოს მშვიდობის უპირატესობა იმის მიუხედავად, რომ ეს მოითხოვს მტკივნეული ნაბიჯების გადადგმას სომხეთის მხრიდან.

ბევრი დრო არ არის: ჩანს, რომ რუსეთი ფსონს მორიგ არჩევნებზე დებს.

• რატომ არჩია ამ დროს ფაშინიანმა დაპირისპირება სასულიერო პირებთან? თეოლოგებისგან გვსმენია, რომ რეალურად ეკლესია პოსტსაბჭოთა ქვეყნებში, მათ შორის, საქართველოში რუსეთის მთავარი იდეოლოგიური საყრდენია. 

რეალურად საეკლესიო პირები რუსეთის „რბილი ძალაა“. სომხეთის პატრიარქს რაც შეეხება, პირდაპირ ეტყობა კორუმპირებულობა – მისთვის კათალიკოსობა ბიზნესია.

სომხეთშიც სასულიერო პირების მთავარი გზავნილებია, რომ ევროპა გვაკარგვინებს იდენტობას, ევროპა კი არა, გეი ევროპაა, აღლუმების მოწყობა გინდათ სომხეთში? – ეს იგივე გზავნილებია, რაც საქართველოში ბევრჯერ მოგვისმენია.

გაითვალისწინეთ, რომ კათოლიკოსის გარეგინის ძმა მოსკოვში იქ მცხოვრები სომხების სასულიერო ლიდერია. ამიტომაც, გასაგებია რუსეთის გავლენა სომხურ ეკლესიაში – შეიძლება ისეთი მძლავრი არაა, როგორც საქართველოში – აქ მაინც მართლმადიდებლები არიან, მაგრამ ხილვადია, რამდენად ერთიანია ეს ნარატივები.

სომხეთშიც ამჯერად რუსეთი იბრძვის ამ გზავნილებით, რომ ფაშინიანმა უღალატა სომხეთის ისტორიას, ერს და ხელი აღმართა წმინდა ეკლესიაზეც. სომხეთშიც უდიდეს როლს ასრულებს ეკლესია, რადგან რწმენამ გადაარჩინა იდენტობა – ეს შეხედულება არსებობს.

• რა ფორმით ცდილობს ყარაბაღის ომის შემდეგ რუსეთი სომხეთის ველზე დარჩენას – აქაც ომით აშინებენ, რადგან სომხეთი დაუცველია? 

ფაშინიანს ეუბნებიან, რომ ის სახელმწიფო ინტერესებს ყიდის და ყარაბაღი ფაქტობრივად უბრძოლველად დააბრუნა. რუსეთმა იქ დატოვა თავისი შენაერთები, ვითომ სამშვიდობო… გიუმრის ბაზა ცალკე ამბავია კიდევ და 2044 წლამდე იქნება.

ყარაბაღის მეორე ომის დროს, როცა ყარაბაღი თითქმის მთლიანად გაათავისუფლეს, იქ რუსეთმა 1500 ადამიანი შეიყვანა შენაერთის სახით და ამით რუსეთმა აზერბაიჯანს აგრძნობინა, არ დაუშვებს მთლიანად ყარაბაღის გათავისუფლებას – მაშინ 80%-ის დაბრუნება აცალა, მაგრამ დარჩენილი 20 % და მათ შორის დედაქალაქის გარშემო კი, ის 1500-კაციანი შენაერთი დატოვა.

ამ პროცესში აზერბაიჯანს აქვს ფუფუნება, იმოქმედოს უფრო თამამად, ვიდრე სომხეთმა. მოგეხსენებათ, აზერბაიჯანის მთავარი მოკავშირე თურქეთია.

ამიტომაც, მე ფაშინიანს განსაკუთრებით ვცემ პატივს: ალიევს ბოლო-ბოლო თურქეთი ჰყავს, როგორც უფროსი ძმა, სომხეთს კი არ ჰყავს ასეთი ძლიერი საყრდენი – მას მხარს უჭერენ საფრანგეთი და ამერიკის შეერთებული შტატები, სადაც სომხური დიასპორაა, მაგრამ ეს მხარდაჭერა არ არის სამხედრო: რამე რომ მოხდეს, საფრანგეთი სომხეთს დრონებს ვერ გაუგზავნის.

რა თქმა უნდა, აზერბაიჯანის შემთხვევაში რუსეთს თურქეთის შიში აქვს, თუმცა საქართველოსგან განსხვავებით სომხეთზე ის უნდა ითქვას, რომ მას არ აქვს საზღვარი. ბაზა კი აქვს, მაგრამ ის ხომ უნდა მომარაგდეს? ეს ბაზაც არ არის მთლიანად დაკომპლექტებული და ნაწილი გაშვებულია უკრაინაში იმდენად გაუჭირდა რუსეთს.

• გამორიცხავთ, რომ რუსეთმა თავისი ბაზა სომხეთში საქართველოს გავლით მოამარაგოს? 

თეორიულად შეიძლება ეს მოხდეს, თუმცა იმდენად არ მსიამოვნებს, ამის გაფიქრებაც არ მინდა…

საქართველოს პოლიტიკური ნება იმდენად დაქვეითებულია, არაა გამორიცხული.

არ მინდა, საქართველო აღმოჩნდეს ქვეყანა, რომელიც რეალურად ხელს შეუშლის ახალი, უკეთესი გეოპოლიტიკური რეალობის შექმნას, როდესაც სამხრეთ კავკასიაზე რუსეთს აღარ ექნება გავლენა და ამოისუნთქებს. ამით სამხრეთ კავკასიას მიეცემა საშუალება ნორმალური, მშვიდი განვითარების, რაც ეკონომიკური კეთილდღეობის პირობაა.

ცოტა ხნის წინ საქართველოს მებაჟეებმა ლარსზე გააჩერეს სომხური კონიაკი და სხვა ალკოჰოლური სასმელები, რაც რუსეთში მიჰქონდათ. რა ესაქმებოდათ იქ ჩვენებს, როცა გზავნილი შეჰქონდათ რუსეთში? მაგრამ ეს შეიძლება ყოფილიყო გზავნილი რუსეთიდან, რომ მას შეუძლია საქმეები გაართულოს.

• შეიძლება სამხრეთ კავკასია განვითარდეს საქართველოს გარეშე, თუ საქართველო რუსეთის აგენტი გახდება?  

თუ საქართველო გახდება ე.წ. სპოილერი, ეს, ცხადია, იქნება დაბრკოლება, არასრული პროექტი იქნება, მით უმეტეს იმ პირობებში, როცა საქართველოს გავლით გადის ამდენი ნავთობსადენი, გაზსადენი, რკინიგზა. რეალურად საქართველოს ყველაფერი აქვს, რომ ამ შუა დერეფნის, დასავლეთ-აღმოსავლეთის დერეფნის საკვანძო ნაწილი გახდეს და დიდი სარგებელიც მიიღოს.

ამ ტვირთების იმდენად დიდი მოცულობა გადის საქართველოზე, რომ საქართველოზე რაღაც ნაწილი ისევ გაივლის, მაგრამ სტრატეგიულად შეიძლება გახდეს მოწყვეტილი. არსებობს მაგალითები, როცა ქვეყანა ნაკლებად დემოკრატიულია და ლიბერალური, მაგრამ აქვს გეოპოლიტიკური როლი. უნდა ვიმედოვნოთ, რომ ვიყოთ ამ პროექტის ნაწილი: ჩვენთან ინფრასტრუქტურა მოწყობილია, სომხეთსა და აზერბაიჯანს შორის კი, ჯერ უნდა მიაღწიონ შეთანხმებას იგივე ზანგეზურის დერეფანზე, სწრაფად არ მიდის ეს პროცესი.

შეიძლება ძალიან არ მოგვწონდეს „ოცნების“ ხელისუფლების დამოკიდებულება უკრაინასა და რუსეთთან, მაგრამ თურქეთთან და აზერბაიჯანთან მიმართებით, ჯერჯერობით, ურთიერთობები კარგი გვაქვს. აზერბაიჯანს ნაკლებად აინტერესებს, ვინ არის ხელისუფლებაში…

სომხეთი ცდილობს, რომ ფრთხილად გავიდეს რუსული ორბიტიდან: ფაშინიანი იყო ბრიუსელში, მაგრამ შემდეგ კვირაში შეიძლება მოსკოვში ჩავიდეს, ან რუსეთში სადმე. ის ცდილობს, რუსეთი ძალიან არ გააღიზიანოს, ფრთხილად მოქმედებს. სომხეთის ეკონომიკური დამოკიდებულება რუსეთზე ძალიან დიდია. ამიტომაც, სომხეთი ნელ-ნელა გამოდის რუსეთის გავლენის სფეროდან.

• ამ ვითარებაში რამდენად არსებობს შანსი შეიცვალოს სომხეთ-თურქეთის ურთიერთობა – დღეს მათ საზღვრებიც ჩაკეტილი აქვთ. 

რა თქმა უნდა, სომხეთის ურთიერთობა თურქეთთან ვერ ლაგდებოდა აზერბაიჯანის გამო. აზერბაიჯანს თურქეთი მძევლად ჰყავდა შეიძლება ასე ითქვას, რადგან აზერბაიჯანი ამგვარად აყენებდა საკითხს: ვიდრე ყარაბაღი არ მოგვარდება, არავითარი დათმობა სომხეთთან! ახლა ყარაბაღის კონფლიქტი მოგვარდა და გაჩნდა შესაძლებლობა, მოლაპარაკებები შედგეს. გაჩნდა შანსიც, რომ სომხეთ-თურქეთის საზღვარი გაიხსნას და ურთიერთობების ნორმალიზება მოხდეს.

ბოლო წლებში სომხეთის საზოგადოებაში მოხდა პროგრესი, აღარ არის ისეთი შეხედულებები, რაც იქ არსებობდა თუნდაც 15-20 წლის წინ. მაშინ სომხეთში კონფერენციაზე ვიყავი და როცა ვესაუბრებოდი ხალხს, მეუბნებოდნენ, რომ რუსეთი არ მოსწონთ დიდად, მაგრამ თუ რუსეთი არ იქნება, თურქები და აზერბაიჯანელები შეგვჭამენო. ამას ემატებოდა 1915 წლის ისტორიული მოვლენები… ახლა ნელ-ნელა ეს განწყობები იცვლება.

ბოლო კვლევების მიხედვით, სომხეთში მოსახლეობის 47% აზერბაიჯანთან მშვიდობიან შეთანხმებას უჭერს მხარს, 40% – არ უჭერს, ანუ უფრო მეტია იმ ადამიანების რაოდენობა, ვინც ფიქრობს, რომ სომხეთის კარგი მომავალი მოითხოვს აზერბაიჯანთან ურთიერთობის დალაგებას.

• ამ გადასახედიდან რა ჩანს თქვენთვის – შეიძლება სამხრეთ კავკასია მართლაც დაკარგოს რუსეთმა? რა შეიძლება იყოს სამხრეთ კავკასიის პერსპექტივა?  

რუსეთის მიზანია, არ შედგეს სამხრეთ კავკასიის რეგიონი – სრულფასოვან რეგიონს აქვს დიდი პოტენციალი, მით უმეტეს ევროკავშირის და ჩინეთი-აზიის შუა გზაზე. თანაც, ამ პირობებში, როცა ირანში პრობლემებია და რუსეთი უფრო და უფრო გარიყული სახელმწიფო ხდება.

ამ მოცემულობაში სამხრეთ კავკასიის როლი იზრდება.

რუსეთის ამოცანაა, არ დაუშვას ამ რეგიონის მშვიდობიანი, სტაბილური განვითარება, როგორც ეს მოხდა, მაგალითად, ბალტიის ქვეყნებში. იქაც ჰქონდათ კონფლიქტი ერთმანეთთან ტერიტორიული, მაგრამ დროულად გაიაზრეს, რომ მთავარი იყო ევროინტეგრაცია, ნატოში ინტეგრაცია და ორი-სამი კილომეტრი ჩრდილოეთით, თუ სამხრეთით მოიცდის.

დღეს ზუსტად ეს შანსი გაჩნდა კავკასიაში, როცა რუსებს აღარ ჰყოფნით ძალა მიხედოს სამხრეთ კავკასიას. აქამდე რუსეთს ეს რეგიონი ეჭირა კონფლიქტით – ყარაბაღის კონფლიქტი უნდა გაგრძელებულიყო უკუნითი უკუნისამდე, რომ რუსეთს ჰქონოდა ხელში ბერკეტები. ახლა რუსეთს ხელიდან ეცლება ბერკეტები. ნიადაგი ეცლება რუსეთს ჩვენს თვალწინ.

ეს მართლა ისტორიული შანსია, რომლითაც აუცილებლად უნდა ისარგებლოს სამხრეთ კავკასიამ.

ახალგაზრდა იურისტთა ასოციაციის ხელმძღვანელი, ნონა ქურდოვანიძე ფეისბუქზე ეხმიანება სინდისის პატიმრის, პედაგოგისა და აქტივისტის, ნინო დათაშვილისათვის პროკურატურის ინიციატივითა და სასამართლოს გადაწყვეტილებით, არანებაყოფლობით ფსიქიატრიულ ექსპერტიზის ჩატარებას.

„ნინო დათაშვილს წლების წინ ხერხემალზე ჩაუტარდა ოპერაცია, რომლის თანმხლები შედეგია ემოციური ლაბილობა. ამ და სხვა წონადი არგუმენტებით, ნინოს ადვოკატი სასამართლოში ასაბუთებდა, რომ მის მიმართ არ შეიძლებოდა გამოყენებული ყოფილიყო აღკვეთის ღონისძიების სახით პატიმრობა. მოსამართლემ ეს არ გაითვალისწინა. გაუშვა ციხეში.

ციხის პირობებში შეუძლებელი იყო ჯანმრთელობის მდგომარეობაზე სათანადო ზრუნვა. მას აწუხებდა გაუსაძლისი ტკივილები და შესაბამისი პროფილის ექიმთან შეხვედრას დღეების განმავლობაში ელოდა. ვინ არის პასუხისმგებელი ნინოს ემოციურ ფონზე, რომელსაც ეს ტკივილები და უსამართლობის განცდა ამძაფრებდა? და უკანონო პატიმარს თუ ემოციური ფონი აქვს, ეს საკმარისია იმისათვის, რომ იძულებითი ფსიქიატრიული ექსპერტიზები ჩატარდეს?! აშკარაა, რომ ეს მისი დასჯის ახალი ფორმაა, რომელსაც პროკურატურა მიმართავს.

რამდენიმე დღის წინ, როდესაც ნინო ციხეში მოვინახულე, ძალიან მხნედ იყო.

მიუხედავად იმისა, რომ ტკივილგამაყუჩებელი ჰქონდა მიღებული, საკუთარი საქმის ნაცვლად, პირველი რაც მკითხა, მზია ამაღლობელის მდგომარეობა იყო. წუხდა, რომ ციხეში სასეირნო დროს ვერასდროს მოკრა თვალი მზიას. ციხის სხვადასხვა ფლიგელში არიან. ნინოს დაკავების შემდგომ პერიოდში როდესაც მზია ამაღლობელს შევხვდი, მითხრა, რომ ნინოს ციხეში გადაყვანის ამბავი რომ გაიგო, უნდოდა გასამხნევებლად წიგნი გაეგზავნა მისთვის, თუმცა, ციხის ადმინისტრაციამ ამის უფლება არ მისცა, პატიმრებს შორის ამგვარი კომუნიკაცია არ არის დაშვებულიო. ის, რომ უკანონოდ დაკავებული ადამიანები ასეთი სოლიდარულები არიან ერთმანეთის მიმართ, ეს მხოლოდ მაგალითი უნდა იყოს ყველასთვის.

მხნეობა და თავისუფლება ნინოს!“ – წერს ნონა ქურდოვანიძე.

დღეს, 2 აგვისტოს,  PHR-ის ადვოკატებმა, ნინო დათაშვილის ინტერესების დამცველებმა განაცხადეს, რომ პროკურატურის ინიციატივითა და სასამართლოს გადაწყვეტილებით პედაგოგი და აქტივისტი ნინო დათაშვილს ფსიქიატრიულ ექსპერტიზას ჩაუტარებენ. თუ ნინო დათაშვილი უარს განაცხადებს ამ შემოწმებაზე სასამართლოს გადაწყვეტილების თანახმად, მას ფსიქიატრიულ დაწესებულებაში იძულებით გადაიყვანენ. შემოწმების მიზნით დათაშვილმა ფსიქიატრიულ დაწესებულებაში 20 დღე უნდა გაატაროს.

დათაშვილის ადვოკატების თქმით, დაკავებულ მასწავლებელს ხერხემლის სერიოზული პრობლემები აქვს, მას აქვს მალებს შუა დაზიანება, თიაქარი და რადიკულიტი. ამ დაავადებების თანმხლები სიმპტომია (და არა ცალკე დიაგნოზი) ემოციური ლაბილობა ანუ ემოციის და განწყობის სწრაფი მონაცვლეობა, რომელიც ნინო დათაშვილს 2019 წელს აღენიშნებოდა. ადვოკატების განცხადებით, ამ საკითხზე აპელირებს პროკურატურა და ცდილობს ნინოს სტიგმატიზებას, რადგან საზოგადოებაში ფსიქიატრიულ ექსპერტიზაზე საუბარი უკვე იწვევს გარკვეულ განწყობებს ზოგადად ამ თემის მიმართ არსებული სტიგმების გამო. “ტირილი და ემოციის მატება არ არის დიაგნოზი ეს არის სიმპტომი, რომელიც ნინოს ხერხემლის პრობლემებს ახლავს თან”, – აცხადებენ ადვოკატები.

ადვოკატები ფიქრობენ, რომ ამ ექსპერტიზას პროკურატურა ნინოს წინასწარი პატიმრობის გახანგრძლივებისთვის იყენებს.

ნინოს სასამართლო 7 აგვისტოს არის ჩანიშნული და იქ უნდა გადაისინჯოს, არსებობს თუ არა დათაშვილის წინასწარ პატიმრობაში დატოვების აუცილებლობა.

ადვოკატების განცხადებას დღესვე, 2 აგვისტოს, გამოეხმაურა პროკურატურა.

პროკურატურის ცნობით, მოცემულ სისხლის სამართლის საქმეზე, დაცვის მხარემ წარმოადგინა ნინო დათაშვილის ჯანმრთელობის მდგომარეობის ამსახველი დოკუმენტები, სადაც თანმხლებ დაავადებად მითითებულია ფსიქო-ემოციური ლაბილობა. „ზემოაღნიშნულიდან გამომდინარე, ვინაიდან, ადვოკატების მიერვე წარმოდგენილ სამედიცინო დოკუმენტაციაში საუბარი იყო ბრალდებულის ფსიქო-ემოციურ მდგომარეობაზე, მიზანშეწონილად ჩაითვალა ექსპერტიზის დანიშვნა“ – წერს პროკურატურა.

სამოქალაქო აქტივისტი, სამოქალაქო განათლების მასწავლებელი ნინო დათაშვილი სასამართლოს მანდატურზე თავდასხმის ბრალდებით 20 ივნისს დააკავეს. პროკურატურა ცდილობს თავდასხმად დააკვალიფიციროს ინციდენტი, რომელიც დათაშვილსა და მანდატურებს შორის მოხდა ნინოს სასამართლოდან ძალის გამოყენებით, იძულებით გაძევებისას.

„დღევანდელი პროცესი სხვა თვალსაზრისით იყო საინტერესო. ეს ხომ არ იყო პროცესი, ჩვენ ხომ ვიცოდით, სადაც ვიყავით.

საბოლოოდ, მე თუ მკითხავთ, ეს ტრაგიკული დღეა. ეს პროცესი იყო იმის დადასტურება, რომ ამ ქვეყანაში სამართალს სჭირდება დაცვა.

მაგრამ სამართალს ადვოკატები და კონკრეტულად მზიას ადვოკატები ვერ დავიცავთ. სამართლის დაცვა შეუძლია მოსამართლეს, მეტს არავის. ამიტომ, ეს ყველაზე დიდი ტრაგედიაა დღევანდელი პროცესის,“ – ასე აღწერა მზია ამაღლობელის ადვოკატმა მაია მწარიაშვილმა პირველი აგვისტოს სასამართლო პროცესი.

პირველ აგვისტოს, ბათუმის საქალაქო სასამართლოში 9 საათზე მეტ ხანს გრძელდებოდა მზია ამაღლობელის სასამართლო პროცესი.

ახალი წესით, სასამართლო სხდომაზე ვიდეო-აუდიო ჩაწერა აკრძალულია სპეციალური ნებართვის გარეშე.

პროცესზე დაცვის მხარე დასკვნითი სიტყვით წარსდგა. მზია ამაღლობელის ადვოკატი მაია მწარიაშვილი სრული 7 საათი კითხულობდა თავის დასკვნით სიტყვას და ასაბუთებდა, რომ მზია ამაღლობელის ქმედება, სილის გაწვნა, არ არის სისხლის სამართლის კოდექსის

მიუხედავად იმისა, რომ „ბათუმელებმა“ წინასწარ გააგზავნა მოთხოვნა იუსტიციის საბჭოში, ვერცერთ პროცესზე გამოცემამ გადაღების ნებართვა ვერ მიიღო. იმის გამო, რომ სასამართლო პროცესზე გადაღება აკრძალულია, ადვოკატებს პროცესის დამთავრების შემდეგ უწევთ მოყოლა ჟურნალისტებთან, რა მოხდა სასამართლოში.

„მე სასამართლოზე ვთქვი, არცერთი ვართ ისეთი სულელი, რომ არ ვიცოდეთ, სად ვართ, რა საფრთხეების წინაშე ვართ, რამხელა ზეწოლის წინაშეა სასამართლო. ყველაზე მთავარი კითხვა მქონდა მოსამართლესთან: აქვს მას ის უნარები, რომ გაუძლოს ამხელა სახელისუფლებო ზეწოლას?!

პროცესის მიმდინარეობის პარალელურადაც კი კომენტარებით ფეხდაფეხ მოგვსდევდნენ და ამტკიცებდნენ, რომ ეს არის ძალიან მძიმე დანაშაული. უნდა დაისაჯოს საგანგებოდ, იქ არის, სადაც უნდა იყოს. სახელმწიფოც მოექცა ისე, როგორც უნდა მოქცეოდა.

აი, ამაზე პასუხის გამცემი არის ეს მოსამართლე?! თუ ამაზე პასუხის გამცემი არ არის, ის მოსამართლე არ არის.

იმ შემთხვევაშიც კი, გამამტყუნებელი განაჩენი რომ დაადგინოს, მოსამართლემ უნდა უთხრას ხელისუფლების ამ ე.წ. სპიკერებს, რომ თქვენ არავინ გეკითხებათ სამართლის საკითხებს.

მან უნდა უთხრას: სამართლის საკითხებს აქ ჩვენ ვწყვეტთ. უდანაშუალობის პრეზუმფციის დარღვევაზე უნდა მიუთითოს. მაგრამ ერთად ვნახავთ, ამ მოსამართლეს ეს როგორ შეუძლია და დარწმუნებული ვარ, რომ არ შეუძლია,“ – თქვა მაია მწარიაშვილმა.

მზია ამაღლობელის ადვოკატს ჟურნალისტებმა ჰკითხეს პროკურატურის შეთავაზებაზე, საპროცესო შეთანხმების შესახებ.

„კიდევ ერთხელ ავხსნი: საპროცესო შეთანხმების შემოთავაზება ამ შემთხვევაში არის მანიპულირება საზოგადოებრივ განწყობებზე. ვისაც ტვინი აქვს და ვინც დღევანდელ პროცესს უსმენდა, ამაში დარწმუნდება. ამიტომ დავხარჯეთ ამ პროცესზე ამდენი საათი.

დღევანდელ პროცესს ვინც უსმინა, თავისი თვალით ნახა და თავისი ყურით გაიგო, რა სამარცხვინო დღეშია ბრალდება.

არაფერი ამ საქმეში არ არის. პროცესი დაასრულა ბრალდებამ, პრინციპში, თქვა, რომ არაფერი არა აქვს, ითხოვს აბსურდს, მაგრამ თქვა, რომ გთავაზობთ საპროცესოს, რადგან სხვა არჩევანი არ გაქვთ. ან მიიღებთ სასჯელს 4-დან 7 წლამდე. ან აღიარეთ ეს ყველაფერი და დაიბრალეთ, რაც ჩვენ ვერ დავადასტურეთ.

ეს არის საპროცესო შემოთავაზება.

რასაკვირველია, ეს არის სწორედ ის, რასაც პირველი დღიდან ახმოვანებს ხელისუფლების არაერთი უმაღლესი თანამდებობის პირი – „აღიარეთ, მოინანიეთ, მერე ვილაპარაკოთ“.

მე ამაზე ვრცლად ვისაუბრე – ის, რაც აქამდე ვიცოდი მზიასგან ამასთან დაკავშირებით. წერა-კითხვის უცოდინარს არ ჰგავს მზია ამაღლობელი. არც იმ ადამიანს ჰგავს, ვინც ვერ იაზრებს, სად არის და რა ელოდება. მაგრამ ეს ადამიანი ამბობს, რომ არ ვითხოვ თქვენგან გულმოწყალებას, არ ვითხოვ თქვენგან რამის პატიებას. ჩავიდინე ის, რაც ჩავიდინე. მაგრამ ეს არ არის ის, რასაც თქვენ მაბრალებთ. ეს არ არის თავდასხმა პოლიციელზე.

სასამართლოს მარტივი არჩევანი აქვს.

უნდა თქვას, რომ ეს არის ან გადაცდომა, ან დანაშაული. ორივეს, ბრალდებას და უფრო მოსამართლეს ვუთხარი, რომ მზიას გაწნული სილა არ არის არც ხმაურიანი და არ არის არც დანაშაულებრივი.

არ არის ხმაურიანი, როგორც ეს გრიგოლ ბესელიამ თქვა და არ არის დანაშაულებრივი, როგორც ამას ბრალდება გვატყუებს.

დღევანდელ პროცესზე ვისხედით დაწყდომამდე. მზია წარმოიდგინეთ, ერთი წამით არ დამჯდარა და არამხოლოდ დღევანდელ პროცესზე.

ეს არის მისი პროტესტი, შინაგანი შეუგუებლობა ყველაფრისადმი. ეს ადამიანი არაფერს არ ითხოვს. არავის არაფერს არ ეხვეწება. ასე უხმოდ გამოხატავს პროტესტს. ფეხზე იდგა მთელი დღე, მშიერ-მწყურვალი, დილაუთენია წამოყვანილი, ამ დრომდე, 11 საათამდე. ამ დროს შესთავაზო ამ ადამიანს, მითხარი საბოლოო სიტყვაო, რომელიც მის ცხოვრებაში ყველაზე მნიშვნელოვანი სიტყვა იქნება, წარმოუდგენელია.

ბოლო მომენტში მოსამართლე მიხვდა, რომ ეს პროცედურული ზეწოლა მზიაზე არ წაადგებოდათ. მხოლოდ ამ მოსაზრებით გადაიდო პროცესი, რომ მზიამ ადამიანურად შეძლოს მოსვლა, აზროვნება და საბოლოო სიტყვაში იმის თქმა, რაც მას არასდროს არ მოუსმინეს. პირველად პოლიციაში ჩვენების მიცემა სთხოვეს შუაღამის 4 საათზე, ხელბორკილდადებულს, ამის შემდეგ არასოდეს მისულა მასთან გამომძიებელი მისი აზრის გასაგებად. დღეს დასკვნით სიტყვას სთხოვდნენ ღამის 11 საათზე. იმედი მაქვს, ამას მიხვდა სასამართლო,“ – თქვა მაია მწარიაშვილმა.

ჟურნალისტების კითხვაზე, რა მოლოდინი აქვს, რა გადაწყვეტილებას მიიღებს სასამართლო, ადვოკატი ამბობს, რომ „არაფერს ელოდება“.

„არაფერს ველოდები. ყველაფერი ვთქვი, რისი თქმაც მინდოდა. ბურთი სასამართლოს მოედანზეა. სამწუხაროდ, ჩემი გამოცდილება პოზიტიური მოლოდინების უფლებას არ მაძლევს.

მაგრამ მეორე მხრივ, მთელი ჩემი პროფესიული გამოცდილება ვერ ეგუება ამას და შეუძლებელია იურისტმა პროგნოზები გითხრათ. ორჯერ ორი ოთხია, რომ აქ არ არის დანაშაული. რომ მეკითხებით [პროგნოზს], მე უნდა გითხრათ, იქ უკან ვიღაცა რაღაცას როგორ გადაწყვეტს. ამიტომ ამაზე კომენტარი არ მინდა. ჰა ბურთი და ჰა მოედანი!

ორშაბათს, ეს მოსამართლე გამოვა და საკუთარ განაჩენს გამოაცხადებს,“ – თქვა მაია მწარიაშვილმა.

მზია ამაღლობელის ბოლო სასამართლო პროცესი ბათუმის საქალაქო სასამართლოში 4 აგვისტოს გაიმართება.

“თავისუფლება რეჟიმის ტყვეებს, სოლიდარობა მზია ამაღლობელს!” – ბერლინში, საქართველოს საელჩოს წინ,  ამ სახელწოდებით აქცია-პერფორმანსი გაიმართა.

პირველ აგვისტოს საქართველოს საელჩოს წინ ბერლინში მცხოვრები საქართველოს მოქალაქეები მივიდნენ და უკანონო პატიმრობაში მყოფი თანამოქალაქეების პატიმრობა გააპროტესტეს.

აქცია-პერფორმანსის ორგანიზატორი იყო ორგანიზაცია „გზა“ – ქართველი აქტივისტების გაერთიანება ევროპაში.

„მზია ამაღლობელი, რომლის წინააღმდეგ სასამართლო პროცესი პოლიტიკურად მოტივირებული ბრალდებებით მიმდინარეობს, დღეს როგორც არასდროს საჭიროებს საზოგადოებრივი სოლიდარობის ხმას. სოლიდარობა არის მოქმედება. თავისუფლება ყველას, ვინც საქართველოში სიტყვის თავისუფლებისთვის იბრძვის“, – ნათქვამია პერფორმანსის ავტორთა განცხადებაში.

აქციაზე წარმოდგენილი იყო არტ-ინსტალაცია „სინათლე წყვდიადიდან“, რომელიც ეძღვნება სინდისის პატიმრებს — იმ ადამიანებს, რომლებიც სიმართლის თქმის გამო ხვდებიან სისტემური დევნის სამიზნეში.

ბეშუმში, შუამთობის დღესასწაულზე ასულ ირაკლი კობახიძეს და “ქართული ოცნების” მაღალჩინოსნებს აქტივისტები საპროტესტო ბანერებით დახვდნენ.

“თავისუფლება პოლიტპატიმრებს” – ასეთია აქტივისტების გზავნილი “ქართული ოცნების” ხელისუფლებისადმი, რომელსაც 60-ზე მეტი პოლიტპატიმარი ჰყავს ციხეებში დატყვევებული.

დღეს, 1-ელ აგვისტოს, მზია ამაღლობელის დასკვნით სასამართლო სხდომაზე, პროკურორის რეპლიკების შემდეგ მზია ამაღლობელის ადვოკატმა, მაია მწარიაშვილმა კიდევ ერთხელ შეახსენა სასამართლოს ციხის ფსიქიატრის დასკვნა მზია ამაღლობელზე, რომელშიც წერია, რომ მზია ამაღლობელს აქვს კეთილსინდისიერების გადაჭარბებული გრძნობა.

„მზია ვერ დაიბრალებს, კეთილსინდისიერი ადამიანი ვერ დაიბრალებს იმას, რაც არ ჩაუდენია.

მე თქვენ წაგიკითხეთ მზიას დახასიათება, რომელიც ციხეში ფსიქიატრმა დაწერა, მასთან გასაუბრების შემდეგ.

„ამ ადამიანს აქვს გადაჭარბებული, არაბუნებრივი კეთილსინდისიერება“ – დაწერა ფსიქიატრმა. წარმოგიდგენიათ, უცხო ფსიქიატრი წერდა ამას.

და ბრალდება ამ ადამიანს სთხოვს, აღიარე დანაშაული, რაც არ ჩაგიდენიაო. მაგრამ ყველაზე შემაშფოთებელი რა არის იცით ქალბატონო მოსამართლევ, ამ დარბაზში ყველაზე ხმამაღლა ისმის მზიას ხმა, რომელიც ხმას არ იღებს. დგას ფეხზე, ერთი წამი არ დამჯდარა, ყველაზე ხმამაღლა მისი ხმა ისმის, თუ ვინმეს გაგონება უნდა.

სადღაც წავიკითხე, ადამიანის სულის ტკივილი რომ ესმოდეს, დედამიწა დაყრუვდებოდაო.

მზიას სულის ტკივილი რომ ესმოდეს ბრალდებას და სასამართლოს, დაყრუვდებოდნენ“ – თქვა მაია მწარიაშვილმა. მის ამ სიტყვებს სასამართლო დარბაზში ოვაციები მოჰყვა.

დღეს, 1-ელ აგვისტოს ბათუმის საქალაქო სასამართლოში დასრულდა მზია ამაღლობელის სასამართლო სხდომა, თუმცა უშუალოდ მზია ამაღლობელს დასკვნითი სიტყვის თქმის საშუალება 4 აგვისტოს, 13 საათზე ექნება.

მზია ამაღლობელმა თავად მოითხოვა დასკვნითი სიტყვის გადადება.

ამავე თემაზე: 

დღეს, 1-ელ აგვისტოს ბათუმის საქალაქო სასამართლოში დასრულდა მზია ამაღლობელის სასამართლო სხდომა, თუმცა უშუალოდ მზია ამაღლობელს დასკვნითი სიტყვის თქმის საშუალება 4 აგვისტოს, 13 საათზე ექნება.

მზია ამაღლობელმა თავად მოითხოვა დასკვნითი სიტყვის გადადება.

„სასამართლოს ვთხოვ, მომცეს საბოლოო სიტყვის უფლება, მაგრამ ამისთვის ცალკე პროცესი ჩანიშნოს.

მომზადებისთვის არა, იმისთვის, რომ ძალები ფიზიკურად აღვიდგინო და იმისთვის, რომ რისი თქმაც მინდა, აქ ხმამაღლა ვთქვა.

მინდა სასამართლომ მომცეს ამის უფლება.

მით უმეტეს, წინა სხდომაზე ბატონმა პროკურორმა მკითხა, კითხვები თუ გაქვთ, მზად ვარ მოვისმინოო. ამ საქმეზე დღესაც მაქვს კითხვები და სულ მექნება.

დღეს მოსამართლეს მარტო ერთ კითხვას დავუსვამ. თუ არ ვცდები, ბატონო პროკურორო, ვლადიმერ ჩიტაიას, დეტექტივს, რა ბედი ეწია, რა განვითარება ჰპოვა ჩიტაიას პატაკმა? მართალია, სასამართლო მოწმეების ჩამონათვალიდან ამოიღეთ ჩიტაია, მაგრამ ჩემი ტელეფონი ხომ გამოძიებას აქვს, მაინტერესებს, რა დადგინდა.

მართლა მაინტერესებს, რა დადგინდა… რა ვიცი, იპოვეს თუ არა დიფ სთეითი, გაიგეთ თუ არა სადაა, რომელ კონტინენტზე გლობალური ომის პარტია, რომელზეც კობახიძე საუბრობს და მართლა სირცხვილია, ისეთი შეურაცხმყოფელია ეს ყველაფერი… ეს ხაზი განსაკუთრებით  შეურაცხმყოფელია არამარტო ჩემთვის, თქვენთვისაც და ზოგადად ქვეყნისთვის“ – თქვა მზია ამაღლობელმა.

დღეს სასამართლომ დაცვის მხარის ადვოკატებს და პროკურატურის რეპლიკებს მოუსმინა.

პირველ აგვისტოს, 20:40 საათზე მზია ამაღლობელის ადვოკატმა, მაია მწარიაშვილმა დაასრულა თითქმის 8-საათიანი დასკვნითი სიტყვა.

დასკვნითი სიტყვის დასასრულს, მან ხაზი გაუსვა, რომ მზია ამაღლობელის საქმე თაობების განსახილველი საქმეა.

„მზია ამაღლობელის საქმე არის სარკე. ამ სარკეში როგორც კი ჩაიხედავ, გიჩვენებს, როგორ იყენებს ხელისუფლება ძალაუფლებას ბოროტად.

არის საქმეები, რომელიც დღევანდელი გადასახედიდან სხვანაირად ჩანს და ხვალინდელი გადასახედიდან – სხვაგვარად. ამის შემდეგ ბევრი წელი, მთელი საზოგადოება მოისმენს თქვენს განაჩენს, ამაში დარწმუნებული იყავით.

არის საქმეები, 20 წელი შეიძლება გავიდეს და არ კარგავს აქტუალობას, თაობების განსახილველი ხდება. ეს საქმე არის ასეთი, ესაა საქმე, რომელზეც თაობები ისაუბრებენ.

მზია ამაღლობელის გაწნული სილა არ იყო არც ხმამაღალი და არც დანაშაულებრივი. ერთსაც გვატყუებს ბრალდების მხარე და მეორესაც და ძალიან არ მინდა სასამართლომაც იგივე გაიმეოროს.

მადლობთ“ – თქვა ადვოკატმა მაია მწარიაშვილმა.

მის დასკვნით სიტყვას სასამართლო დარბაზში ტაში მოჰყვა.

სასამართლო სხდომა გრძელდება.

მოსამართლე ნინო სახელაშვილი მოისმენს მზია ამაღლობელის სხვა ადვოკატების დასკვნით სიტყვა და ასევე, პროკურატურის რეპლიკებს.

უფლებადამცველი თამაზ ბაკურიძე ფეისბუქზე მზია ამაღლობელის სოლიდარობის წერილს აქვეყნებს ბათუმის საქალაქო სასამართლოში მიმდინარე დასკვნითი სხდომის პარალელურად. .

„ბათუმელები“ უცვლელად გთავაზობთ წერილს:

„სოლიდარობის წერილი ჟურნალისტ მზია ამაღლობელს!

დღეს, როცა სიტყვას სიმართლის ძალა აქვს, შენ – მზია – რჩები იმ ერთ-ერთ იშვიათ ხმად, ვინც თავისუფლების ფასს კარგად იცნობს. შენი ბრძოლა მხოლოდ შენი არაა – ეს არის ბრძოლა ყველა იმ ადამიანის, ვინც ხმას სწევს უსამართლობის წინააღმდეგ.

შენი გვარი დღეს არა მხოლოდ ჟურნალისტური პროფესიის, არამედ შინაგანი სიმტკიცის და ნამდვილი მოქალაქეობრივი პასუხისმგებლობის სიმბოლოდ იქცა.

შენ ხმამაღლა თქვი ის, რასაც ბევრი ჩურჩულითაც ვერ ბედავდა. და ახლა, როცა გიბრძანებენ დადუმდე – ჩვენ, ვინც შენს გვერდით ვდგავართ, ვამბობთ ხმამაღლა: მზია, მარტო არ ხარ!

ამ განსაცდელის შუაგულში შენს სიმშვიდეს, სიმტკიცეს და ღირსებას ვხედავთ.

შენი თავისუფლების შეზღუდვა – ყველას თავისუფლების შეზღუდვაა. შენი სიჩუმით გამოწვეული ტკივილი – საზოგადოების ჩუმი გულისცემა ხდება. მაგრამ ეს სიჩუმე დროებითია.

ჩვენ გვჯერა, რომ სიმართლე საბოლოოდ ყოველთვის იმარჯვებს. ისევე როგორც გაზაფხული ბრუნდება ყველაზე ხანგრძლივი ზამთრის შემდეგ, ასე დაბრუნდება შენი თავისუფლებაც, შენი სიტყვაც და შენი ღიმილიც, რომელიც ბევრისთვის იმედის სინათლეა.

დღეს, კიდევ ერთხელ ვამბობთ: სოლიდარობა მზია ამაღლობელს – სიმართლისა და სიტყვის თავისუფლებისთვის მებრძოლ ადამიანს! შენი ხმა არ ჩახშობილა – ის ჩვენში ცოცხლობს და გვიბიძგებს, რომ არ დავდუმდეთ მაშინ, როცა ყველაზე მეტად უნდა ვისაუბროთ.

ძალა, სიმტკიცე და თავისუფლება – შენს მხარესაა.

პატივისცემით, ყოფილი პატიმარი და გულშემატკივარი“- წერს ფეისბუქზე თამაზ ბაკურიძე.

მზია ამაღლობელის სასამართლო პროცესი ბათუმის საქალაქო სასამართლოში 13:00 საათიდან მიმდინარეობს. დასკვნითი სხდომა ამ დრომდე [20:00 სთ] არ დასრულებულა.

სასამართლოს ესწრებიან ევროპული ქვეყნის საელჩოების წარმომადგენლები, საქართველოს მეხუთე პრეზიდენტი სალომე ზურაბიშვილი, მედიების წარმომადგენლები, სინდისის პატიმრების დედები და მზია ამაღლობელის მხარდამჭერი მოქალაქეები.

დღეს, 1-ელ აგვისტოს, საქართველოს მეხუთე პრეზიდენტი სალომე ზურაბიშვილი ბათუმში მზია ამაღლობელის სასამართლო პროცესს ესწრება.

სალომე ზურაბიშვილი სასამართლო სხდომიდან ფეისბუქზე წერს, რომ ამ პროცესმა კიდევ ერთხელ აჩვენა „ბრალდების და ბრალდებების სრული კოლაფსი“.

„ძალიან დეტალურად, ნათლად, კვალიფიციურად და დამაჯერებლად ასაბუთებს ადვოკატი, თუ რამდენი ტყუილი, რამდენი ცრუ ჩვენება წარმოადგინეს მოწმე პოლიციელებმა…

ერთმანეთთან შეუთავსებელი სიცრუე, რომელიც „არ იფუთება“, ურთიერთსაწინააღმდეგო, წარდგენილი ვიდეო მტკიცებულებებთან შეუსაბამო…

დაცვის კითხვებს გაუცემელი პასუხები, გამოუსწორებელი უზუსტობები, ცვალებადი ვერსიები, ბრალდების მხარის და მისი მოწმეების (ყველა მოწმე პოლიციელია და „დაზარალებული პოლიციელის” თანამშრომელი), ბრალდების და მისი ბრალდებების სრული კოლაფსი…

ჩვენ წინ იწერება „სისტემური სიცრუის ქრონიკა“ – წერს სალომე ზურაბიშვილი მზია ამაღლობელის სასამართლო პროცესიდან.

მზია ამაღლობელის დასკვნით სასამართლო პროცესს დღეს ევროპული ქვეყნების საელჩოების წარმომადგენლები, პოლიტიკოსები, მოქალაქეები, ჟურნალისტები და სინდისის პატიმრების დედები ესწრებიან.

• რა ხდება?

მზია ამაღლობელი უკვე 202 დღეა უკანონო პატიმარია. პროკურატურა მას პოლიციელზე თავდასხმაში ადანაშაულებს, რაც 4-დან 7 წლამდე პატიმრობით ისჯება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

დღეს, პირველ აგვისტოს, ბათუმის საქალაქო სასამართლოში 5 საათზე მეტია მიმდინარეობს მზია ამაღლობელის სასამართლო სხდომა.

მოსამართლე ნინო სახელაშვილი დაცვის მხარეს უსმენს.

მზია ამაღლობელის ადვოკატმა, მაია მწარიაშვილმა ისაუბრა სილის გაწვნის ეპიზოდზე და ხაზი გაუსვა, რომ მზია ამაღლობელის სილა ვერ დააზიანებდა ჯანმრთელობას, ხოლო ი. დგებუაძის პატივმოყვარეობის საკითხს მძიმე დანაშაულის კვალიფიკაცია ვერ მიეცემა:

„სახეში გაშლილი ხელის გარტყმა არის სილა.

ჩიქობავა ავტორიტეტია თქვენთვის?

ქართული ენის განმარტებითი ლექსიკონის (ა. ჩიქობავა) მიხედვით, გაშლილი ხელის სახეში დარტყმა არის ალიყური, სილაქი, გალაწუნება, ლაწანი, შემოლაწუნება, ტყლაშანი, თხლაშანი.

სილა ვერ აზიანებს ჯანმრთელობას.

…დაკითხვისას დგებუაძემ არაერთხელ მიუთითა, რომ იყო შეურაცხყოფილი, რაც იმას ნიშნავს, რომ მისი გადმოცემით მას შეელახა ღირსება, რაც არ არის 353-ე (პრიმა) მუხლის დაცვის ობიექტი.

პროკურორი დაგვეთანხმა, რომ მზიას ქმედება არ იყო მიმართული ჯანმრთელობის დაზიანებისაკენ.

თუ სილა ვერ აზიანებს ჯანმრთელობას, რა უნდოდა მზიას? რა არ ასვენებდა?…

სახელისუფლებო კომენტარებიც სულ ამბობს, რომ ეს არის შეურაცხყოფა, მაგრამ მძიმე დანაშაულიო…

[მძიმე დანაშაულის] კვალიფიკაცია ვერ დადგება იმაზე, რომ დგებუაძის პატივმოყვარეობა იყო შეურაცხყოფილი… ამ ეპიზოდში მზიას სახეში რომ ეჩქმიტა, რას იტყოდა ბრალდება, თავს დაესხა და სახეზე უჩქმიტაო?“ – უთხრა მაია მწარიაშვილმა მოსამართლე ნინო სახელაშვილსა და პროკურორებს.

სასამართლო სხდომა ბათუმში ამ დრომდე [19:30 სთ] გრძელდება.

უცნობია, დღეს გამოაცხადებს თუ არა განაჩენს მოსამართლე ნინო სახელაშვილი მზია ამაღლობელის საქმეზე.

დღეს, პირველ აგვისტოს, ბათუმის საქალაქო სასამართლოში 5 საათზე მეტია მიმდინარეობს მზია ამაღლობელის სასამართლო სხდომა, რომელიც ამ დრომდე [18:30] გრძელდება.

დღეს მოსამართლე ნინო სახელაშვილი დაცვის მხარეს უსმენს.

ადვოკატებმა დამატებით რამდენიმე საათი მოითხოვეს დასკვნითი სიტყვისთვის, რასაც მოსამართლე დაეთანხმა.

მზია ამაღლობელის ადვოკატი მაია მწარიაშვილი დეტალურად განიხილავს მზია ამაღლობელის საქმის ყველა დარღვევასა და ნიუანსს.

უცნობია, დღეს გამოაცხადებს თუ არა განაჩენს მოსამართლე ნინო სახელაშვილი მზია ამაღლობელის საქმეზე.

• რა ხდება?

მზია ამაღლობელი უკვე 202 დღეა უკანონო პატიმარია. პროკურატურა მას პოლიციელზე თავდასხმაში ადანაშაულებს, რაც 4-დან 7 წლამდე პატიმრობით ისჯება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

____________

ფოტოზე: მზია ამაღლობელის სასამართლო პროცესი ბათუმის საქალაქო სასამართლოში. ფოტო „ბათუმელების“ არქივიდან

დღეს, პირველ აგვისტოს, ბათუმის საქალაქო სასამართლოსთან, მზია ამაღლობელის პროცესის პარალელურად განცხადება გააკეთეს სინდისის პატიმრების ოჯახის წევრებმა და მოქალაქეებს მოუწოდეს, შეუერთდნენ ხვალ, 2 აგვისტოს, 20:00 საათზე ბათუმში დაგეგმილ აქციას.

სინდისის პატიმრების დედები და ოჯახის წევრები დღეს სპეციალურად ჩამოვიდნენ თბილისიდან ბათუმში მზია ამაღლობელის სხდომაზე დასასწრებად.

„პირველ რიგში, სოლიდარობა მზია ამაღლობელს, მადლობა მას მისი ბრძოლისთვის და ყველა იმ ადამიანს, ვისთვისაც მთავარი არის დამოუკიდებლობა და თავისუფლება ჩვენი ქვეყნის. გელოდებით ხვალ, 2 აგვისტოს, საღამოს 8 საათზე – ცენტრალური პარკის კოლონადებიდან გავმართავთ მსვლელობას.

ერთად გავაგონოთ ბათუმის ქუჩებს, მკაფიოდ და ხმამაღლა, ჩვენი ხმა, სინდისის პატიმრების ხმა და პირველ რიგში, მზია ამაღლობელის ხმა – ქალის, რომელიც შეუდრეკლად იბრძვის თავისუფლებისთვის, დამოუკიდებლობისთვის, იბრძვის რეჟიმის წინააღმდეგ.

ასე რომ, ყველას გელოდებით და იცოდეთ, რომ ერთიანობა და ერთ მუშტად შეკვრა არის ერთადერთი გამოსავალი შექმნილი ვითარებიდან. იცოდეთ, რომ ყველა განსაცდელს გამოვივლით ერთად მხოლოდ იმ შემთხვევაში, თუ ვიქნებით ძლიერად, ჩავკიდებთ ერთმანეთს ხელს და ამ ჯაჭვის გაწყვეტის ნებას არავინ და არაფერს არ მივცემთ“, – განაცხადა ირაკლი ქერაშვილის დამ, ქეთუნა ქერაშვილმა.

_______________

ფოტო: მინდია გაბაძე/„პუბლიკა“

„რა უნდა ციხეში მზია ამაღლობელს? ასეთ მოქალაქეები მაფიქრებინებენ, რომ საქართველო არ იქნება უძრავი, ჩაკეტილი და არათავისუფალი“ – მიიჩნევს ენათმეცნიერი მზექალა შანიძე.

წერილი მზექალა შანიძემ „ნეტგაზეთს“ მიაწოდა.

დღეს, პირველ აგვისტოს, ბათუმის საქალაქო სასამართლოში მზია ამაღლობელის დასკვნითი სხდომა მიმდინარეობს. უცნობია, დღეს გამოაცხადებს თუ არა განაჩენს მზია ამაღლობელის საქმის მოსამართლე, ნინო სახელაშვილი, თუმცა ამით მზია ამაღლობელის საქმის არსებითი განხილვა სრულდება.

„სოციალური სამართლიანობის ცენტრის“ თანადამფუძნებელი, ილიას უნივერსიტეტის ასოცირებული პროფესორი თამთა მიქელაძე ფეისბუქზე ეხმიანება ჟურნალისტისა და მედიამენეჯერის, მზია ამაღლობელის დასკვნით სასამართლო სხდომას, რომელიც დღეს, პირველ აგვისტოს მიმდინარეობს ბათუმის საქალაქო სასამართლოში.

თამთა მიქელაძე წერს, რომ მზია ამაღლობელი იქცა სიმბოლოდ იმ ქალების, რომლებმაც ბევრი იშრომეს და ხშირად უჩინარნი იყვნენ.

„მზია ამაღლობელი ივანიშვილის ამორალური და უმოწყალო პოლიტიკური რეჟიმის მამხილებელი ისტორიული გმირი გახდა.

მზიას საქმე არქეტიპულია: “ქალი მოძალადე რეჟიმის წინააღმდეგ”. ყველაზე ობიექტური, მოუთვინიერებელი და პროფესიონალური მედიის დამფუძნებელი ქალი რეჟიმის მიერ სასტიკად ისჯება მოძალადე, ღირსების ამყრელი პოლიციელისთვის სილის გაწვნის გამო.

მზიას სიტყვები – “იბრძოლეთ, სანამ გვიანი არ არის”, ჩვენი რეალობის და წინააღმდეგობის მთავარ პოლიტიკურ პოეზიად იქცა. ის არასდროს დაგვავიწყდება და თუ ახლა გავიმარჯვებთ, უსამართლობის არ დაშვების შეხსენება გახდება ყოველ ჯერზე მომავალში.

მზიას ციხეში შეჭრილი მოკლე, უსწორმასწორო თმა გახდა პირველი სხეულებრივი სიგნალი, შოკიც კი, რომ ის რაშიც შევდივართ არანორმალურია, საგანგებოა და საშიში და ჩვენს ყოველდღიურობაზე, რუტინაზე უარი უნდა გვეთქვა.

მზიას უცნაური, არაადამიანური სიმშვიდე პატიმრობაში, ჩვენი პოლიტიკური ბრძოლის აურის საუკეთესო აღმწერი გახდა. მშვიდად ბრძოლა არ არის ადვილი, მაგრამ ეს უნდა გვექნა.

მზია გახდა სახე იმ ჩვენი ქალების არმიის, ვინც ძალიან ბევრი იშრომა შექმნისთვის, ხშირად უჩინარიც იყო და დაბადა ნანგრევებზე, სიცარიელეში.

მზია აუტანელია რეჟიმისთვის, რადგან ის დაუმორჩილებელია და მართალი. აუტანელია იმიტომაც, რომ მზიას და მისნაირებს უკვე გაუმარჯვიათ ავტორიტარებზე და ეს ძალიან კარგად იცის მან, ვისაც ძალაუფლება უპყრია.

მზია თითქოს უმოწყალოდ სამართლიანი დროის ენერგიას ატარებს საკუთარ თავში და არქეტიპულია ისიც, რომ ეს როგორც ბევრ მითოლოგიაში, ის ქალია.

მზია აუტანელია რეჟიმისთვის იმიტომაც, რომ მის აქტს შეუძლია გარდაქმნას საჯარო სივრცე (ქართული ოცნების მხარდამჭერებისთვის) სირცხვილისა და (წინააღმდეგობაში ჩართული ადამიანებისთვის) მრისხანების ადგილად. მზია სუბვერსიულ ენერგიას ატარებს და ამას გრძნობენ კაცები სისტემაში.

დღეს მზია ამაღლობელის საქმეზე დასკვნითი სასამართლო პროცესი იმართება და არსებობს მაღალი შანსი, რომ სასამართლომ ადგილზევე გამოაცხადოს განაჩენი. თუმცა მაღალი მობილიზაციისა და საზოგადოებრივი მხარდაჭერის პირობებში, სხვა საქმეების მსგავსად, შესაძლოა განაჩენის გამოცხადება გადაიდოს.

დღეს ბევრი ადამიანი შფოთით, სევდით და ტკივილით ველით ამ პროცესს, მაგრამ გულის სიღრმეში ყველამ ვიცით, რომ მზიას მსგავსი ადამიანების, ქალების ქვეყანა ვართ და საბოლოოდ, აუცილებლად გავიმარჯვებთ“ – წერს თამთა მიქელაძე.

ცნობილი ვეტერანი ფეხბურთელი შოთა არველაძე მიიჩნევს, რომ მზია ამაღლობელი პატიმრობიდან უნდა გათავისუფლდეს.

ინფორმაციას ამის შესახებ გამოცემა „ტაბულა“ ავრცელებს.

„თავისუფლება მზია ამაღლობელს! გაათავისუფლეთ მზია ამაღლობელი პატიმრობიდან!“, – თქვა შოთა არველაძემ „ტაბულასთან“.

დღეს, პირველ აგვისტოს, ბათუმის საქალაქო სასამართლოში მზია ამაღლობელის დასკვნითი სხდომა მიმდინარეობს. უცნობია, დღეს გამოაცხადებს თუ არა განაჩენს მზია ამაღლობელის საქმის მოსამართლე, ნინო სახელაშვილი, თუმცა ამით მზია ამაღლობელის საქმის არსებითი განხილვა სრულდება.

მზია ამაღლობელი უკვე 202 დღეა უკანონო პატიმარია. პროკურატურა მას პოლიციელზე თავდასხმაში ადანაშაულებს, რაც 4-დან 7 წლამდე პატიმრობით ისჯება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

დღეს, პირველ აგვისტოს, მზია ამაღლობელის დასკვნით სასამართლო სხდომაზე, საქართველოს მეხუთე პრეზიდენტი, სალომე ზურაბიშვილი მივიდა.

სასამართლო დარბაზში შესვლამდე, მან კომენტარი გააკეთა ჟურნალისტებთან.

“მთავარი რამ, რაც ყველამ უნდა ვიცოდეთ, არის ის, რომ თუ დღეს დადგა განაჩენი, ეს იქნება განაჩენი არა მზიასი,  არამედ იქნება განაჩენი ყველა იმ ადამიანის, რომელიც მონაწილეობს/მონაწილეობდა პირველი დღიდან ამ უსამართლობაში და რომელიც პასუხისმგებელი იქნება მთელი ქვეყნის წინაშე.

დღეს რაც ხდება, ეს არის მედიის მიმართ მიზანმიმართული ქმედება, მაგრამ ამავე დროს ეს არის ქვეყნის მიმართაც. მზია არის სიმბოლო საქართველოსი,” – თქვა სალომე ზურაბიშვილმა.

სალომე ზურაბიშვილის თქმით, მზია ამაღლობელის საქმეზე “ყველაფრისთვის უნდა იყოს საზოგადოება მზად”.

“სასწაულის არ უნდა გჯეროდეს. უნდა ფიქრობდე, რომ შეიძლება მოხდეს… ღმერთი არსებობს და ამდენად სასწაულიც არსებობს, მაგრამ ამავე დროს ყველაფრისთვის უნდა ვიყოთ მზად.

უნდა ვიცოდეთ, რომ ეს განაჩენი, როგორც ეხლა ვთქვი არის და იქნება განაჩენი ყველასი, ვინც მონაწილეობს ამ უსამართლო საქმეში. მოსამართლე, პოლიციელი, დგებუაძე თუ რა ქვია იმას და რაც დაერქმევა ისტორიაში, წითელლოყა, თუ რაც არის… ყველა ის პოლიტიკური ლიდერი, ქართული ოცნების ყველა ის პასუხისმგებელი პირი, რომელიც ამაში მონაწილებს, დაწყებული ცხადია ბიძინა ივანიშვილით,” – თქვა სალომე ზურაბიშვილმა.

მზია ამაღლობელის დასკვნითი პროცესი ბათუმის საქალაქო სასამართლოში ამ წუთებშიც მიმდინარეობს. პროცესს ესწრებიან ევროპული ქვეყნების საელჩოების წარმომადგენლები საქართველოში.

დღეს, პირველ აგვისტოს, ბათუმის საქალაქო სასამართლოში მზია ამაღლობელის დასკვნითი სხდომა მიმდინარეობს.

სხდომაზე დღეს დაცვის მხარეს უსმენენ. მზია ამაღლობელის ადვოკატმა, მაია მწარიაშვილმა დღეს დასკვნითი სიტყვისას ხაზი გაუსვა, რომ მზია ამაღლობელის საქმის გამოძიება შსს-მ და პროკურატურამ ისე ჩაატარეს, რომ ერთხელაც კი არ შეხვედრიან მზია ამაღლობელს.

„გამოძიებას აწარმოებდა პოლიციის 2 რეგიონის (აჭარის და გურიის) საგამოძიებო დანაყოფის 8 გამომძიებელი, ზედამხედველობას ახორციელებდა 2 პროკურორი.

გამოძიების მანძილზე არც ერთ გამომძიებელს ან პროკურორს თვალით არ უნახავს მზია ამაღლობელი, არ ჰქონია მასთან არც ერთი კითხვა, არ გაურკვევია არც ერთი გარემოება, არ უკითხავს საერთოდ არაფერი.

საქმე ისე დასრულდა, გამოძიების მანძილზე არცერთ გამომძიებელს ან პროკურორს თვალით არ უნახავს მზია ამაღლობელი, არ ჰქონიათ არცერთი კითხვა… არაფრად ჩააგდეს ეს ადამიანი… იქნებ და იბრალებდა [იმ დანაშაულს], ასე რომ ითხოვდა პრემიერი.

გამოძიებამ საქმე დაასრულა ისე, რომ მზია ამაღლობელმა გამომძიებლები და პროკურორები პირველად ნახა სასამართლო პროცესზე“ – თქვა მაია მწარიაშვილმა.

დღეს ბათუმის საქალაქო სასამართლოში მოსამართლე ნინო სახელაშვილი მზია ამაღლობელის ადვოკატების დასკვნით სიტყვას ისმენს. მოსამართლემ, შესაძლოა, განაჩენი პირველ აგვისტოს გამოიტანოს, ან მისი გამოცხადება გადადოს.

• რა ხდება?

მზია ამაღლობელი გამოცემების – „ბათუმელებისა“ და „ნეტგაზეთის“ თანადამფუძნებელი და დირექტორია. ის თითქმის 7 თვე უკანონო პატიმრობაშია – სილის გაწვნის გამო მას პროკურატურა პოლიციელზე თავდასხმას ედავება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

დღეს, 1 აგვისტოს, ბათუმის საქალაქო სასამართლოში „ბათუმელებისა“ და „ნეტგაზეთის“ დამფუძნებლის, ჟურნალისტისა და მედიამენეჯერის, მზია ამაღლობელის დასკვნით სასამართლო პროცესს ესწრებიან ევროპული ქვეყნების საელჩოების წარმომადგენლები საქართველოში.

მზია ამაღლობელის პროცესზე დასასწრებად ჩამოვიდა ჩეხეთის ელჩი საქართველოში, პეტრ კუბერნატი. სხდომას ესწრებიან დიპლომატები ევროკავშირის, საფრანგეთის, ლიეტუვის, ნორვეგიის, ნიდერლანდების, შვედეთისა და პოლონეთის საელჩოებიდან.

საელჩოების წარმომადგენლებს სასამართლო პროცესის მიმდინარეობისას სინქრონულად, წერილობით მიეწოდებათ სხდომის თარგმანი.

ევროპის სხვადასხვა ქვეყნის საელჩოების წარმომადგენლები მზია ამაღლობელის ყველა სასამართლო პროცესს ესწრებიან. 

• რა ხდება?

მზია ამაღლობელი გამოცემების – „ბათუმელებისა“ და „ნეტგაზეთის“ თანადამფუძნებელი და დირექტორია. ის თითქმის 7 თვე უკანონო პატიმრობაშია – სილის გაწვნის გამო მას პროკურატურა პოლიციელზე თავდასხმას ედავება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

ბათუმი, 1 აგვისტო – თვალი ადევნეთ მზია ამაღლობელის სასამართლო პროცესს პირდაპირ რეჟიმში სასამართლო დარბაზიდან. ინფორმაცია ქრონოლოგიურად ახლდება პირდაპირ რეჟიმში. 

12:30 სთ – მზია ამაღლობელის დასკვნითი სასამართლო სხდომა ბათუმის საქალაქო სასამართლოში 13 საათზე დაიწყება. პროცესის დაწყებამდე სასამართლოსთან მზია ამაღლობელის კოლეგები, მეგობრებო და მხარდამჭერები იკრიბებიან სოლიდარობის ნიშნად.

12:35 სთ – „თავისუფლება მზიას!“ – ჩაქვში გადმოკიდეს ბანერი იმ ადგილას, სადაც ჩამოივლის რუსთავის ქალთა კოლონიიიდან მომავალი სასჯელაღსრულების სისტემის მანქანა, რომლითაც მზია ამაღლობელი ბათუმის საქალაქო სასამართლოში მოჰყავთ.

12: 40 სთ – მზია ამაღლობელის დასკვნით სასამართლო სხდომაზე დასასწრებად მოვიდა საქართველოს მეხუთე პრეზიდენტი, სალომე ზურაბიშვილი.

12: 40 სთ – მზია ამაღლობელის დასკვნით პროცესზე დასასწრებად და სოლიდარობის ნიშნად ბათუმში ჩამოვიდნენ სინდისის პატიმრების დედები. სასამართლოსთან არიან სინდისის პატიმრების: ზვიად ცეცხლაძის, გიორგი მინდაძის, ირაკლი მიმინოშვილის, საბა სხვიტარიძის, ნიკა კაციასა და თორნიკე გოშაძის დედები.

13: 30 სთ – მზია ამაღლობელის პროცესზე დასასწრებად ჩამოვიდა ჩეხეთის ელჩი საქართველოში, პეტრ კუბერნატი. სხდომას ესწრებიან დიპლომატები ევროკავშირის, საფრანგეთის, ლიეტუვის, ნორვეგიის, ნიდერლანდების, შვედეთისა და პოლონეთის საელჩოებიდან.

13:37 სთ – პროცესის დაწყება გვიანდება, რადგან დასწრების მსურველი ბევრია. დამსწრეთა თხოვნით მანდატურებმა დარბაზში სკამები დაამატეს, რომ თბილისიდან ჩამოსულ სინდისის პატიმრების მშობლებს დასწრება შესძლებოდათ.

მზია ამაღლობელის შემოსვლამდე დამსწრეები ერთმანეთში თავიანთ მოლოდინებსა და ვარაუდებს ცვლიან – “როგორ ფიქრობ, დღეს იქნება განაჩენი?“

სასამართლოს დარბაზში ისმის შეძახილები აქციიდან “მზია გვიყვარხარ!” “თავისუფლება მზიას!”

14:00 სთ – მაია მწარიაშვილი, მზია ამაღლობელის ადვოკატი:

„მზიას ვთხოვე ჩვენების მიცემისას ესაუბრა თავის თავზეც, მაგრამ მან ეს არ გააკეთა.

მზია ამაღლობელის ცხოვრება და საქმიანობა პირდაპირ უკავშირდება მის მიერ დაარსებულ გამოცემებს: „ბათუმელებსა“ და „ნეტგაზეთს“. ბოლო 24 წელია, იგი ყველა დღე შრომობდა იმისთვის, რომ განეხორციელებინა არაერთი პროექტი, რომელიც საქართველოში აძლიერებდა მედიას, განათლებას, მხარს უჭერდა სოციალურ თანასწორობას.

ყველაფერი კი დაიწყო 24 წლის წინ, როცა 2001 წელს ბათუმში ახალგაზრდა ენთუზიასტმა ჟურნალისტმა მზია ამაღლობელმა ამ პროცესზე მოწმედ დაკითხულ ეთერ თურაძესთან ერთად დააარსა ბეჭდური გამოცემა, გაზეთი „ბათუმელები“.

მზიას „ბათუმელების“ რედაქციამ მუშაობა დაიწყო ერთ პატარა ოთახში, მხოლოდ ერთი კომპიუტერით და თავისუფლებისადმი მზიას მყარი რწმენით. მზია ამაღლობელი მაშინ 26 წლის იყო და მზია 50 წლის გახდა ციხეში“.

14:20 სთ – მზია ამაღლობელის ადვოკატმა, მაია მწარიაშვილმა სასამართლო სხდომაზე წაიკითხა „ოცნების“ ლიდერების, ირაკლი კობახიძისა და მამუკა მდინარაძის ის ციტატები, რომელშიც ისინი მზია ამაღლობელს ადანაშაულებენ.

„როგორ უნდა დაგვარწმუნოთ, თქვენ გაქვთ უნარი, რომ გაუძლებთ [ხელისუფლების] ამ ზეწოლას… შეგიძლიათ თუ არა უთხრათ ხელისუფლების წარმომადგენლებს, რომ ეს მძიმე დანაშაული არაა?!“ – მიმართა მაია მწარიაშვილმა მოსამართლეს და დასძინა, რომ არ სჯერა, რომ ეს მოსამართლე ნინო სახელაშვილს ან ვინმეს დღევანდელ სასამართლო სისტემაში შეუძლია და ხაზი გაუსვა, რომ ამიტომაც, დაცვის მხარე იძულებულია ამ რეალობის გათვალისწინებით დაიწყოს დასკვნითი სიტყვა.

16:00 სთ – მაია მწარიაშვილი, მზია ამაღლობელის ადვოკატი:

„სასამართლომ დაარღვია მზიას უდანაშაულობის პრეზუმფცია

სასამართლომ არ იზრუნა, რომ 5 თვე ასე არ გვეყურებინა მისთვის გისოსებს მიღმა…

5 თვეა ჭუჭრუტანით ვახერხებ მზიასთან კომუნიკაციას, დღეს რომ პირისპირ დავინახე, გამიხარდა…

მთელი ამ ხნის განმავლობაში შეუძლებელი იყო მასთან ჩვენი სრულფასოვანი და ნორმალური კომუნიკაცია, ვინაიდან თავი უნდა შეყო ჭუჭრუტანაში, რომ გაიგო, რას გეუბნება მზია ამ სივრციდან. ამის გამო, განსაკუთრებით ბრალების მოწმეთა დაკითხვისას შეუძლებელი იყო მზია ამაღლობელის დაკითხვის პროცესში სრულფასოვანი მონაწილეობა, ის იძულებული იყო დაეწერა რაღაცეები და მოეწოდებინა, ვინაიდან შეუძლებელია კომუნიკაცია ზურგიდან, როდესაც ვერ ხედავ და არ გესმის, რას გეუბნება შენი დაცვის ქვეშ მყოფი.

ჩვენ ვიშუამდგომლეთ სასამართლოს წინაშე მოეცა შესაძლებლობა მზია ამაღლობელისათვის პროცესზე მოთავსებულიყო მისი ადვოკატების გვერდით ვიდრე მიმდინარეობდა ბრალდების მოწმეთა დაკითხვა…

სასამართლომ არ იზრუნა იმისთვის, რომ საზოგადოებას 5 თვეზე მეტი მზია ამაღლობელისთვის გისოსებიდან არ ეცქირა…

სასამართლო მზიას ასეთი ჩვენებით აჩვენებს, რომ ეს ადამიანი თავდამსხმელი და საშიშია საზოგადოებისთვის“.

16:28 სთ – ნახევარსაათიანი შესვენების შემდეგ სასამართლო სხდომა განახლდა შეძახილების – „თავისუფლება მზიას!“ – ფონზე.

18:35 სთ – ბათუმის საქალაქო სასამართლოში 5 საათზე მეტია მიმდინარეობს მზია ამაღლობელის სასამართლო სხდომა, რომელიც ამ დრომდე [18:30] გრძელდება.

დღეს მოსამართლე ნინო სახელაშვილი დაცვის მხარეს უსმენს.

ადვოკატებმა დამატებით რამდენიმე საათი მოითხოვეს დასკვნითი სიტყვისთვის, რასაც მოსამართლე დაეთანხმა.

მზია ამაღლობელის ადვოკატი მაია მწარიაშვილი დეტალურად განიხილავს მზია ამაღლობელის საქმის ყველა დარღვევასა და ნიუანსს.

18:57 სთ – ადვოკატი მაია მწარიაშვილი მიმართავს მოსამართლესა და პროკურორს:

„სახეში გაშლილი ხელის გარტყმა არის სილა.

ჩიქობავა ავტორიტეტია თქვენთვის?

ქართული ენის განმარტებითი ლექსიკონის (ა. ჩიქობავა) მიხედვით, გაშლილი ხელის სახეში დარტყმა არის ალიყური, სილაქი, გალაწუნება, ლაწანი, შემოლაწუნება, ტყლაშანი, თხლაშანი.

სილა ვერ აზიანებს ჯანმრთელობას.

…დაკითხვისას დგებუაძემ არაერთხელ მიუთითა, რომ იყო შეურაცხყოფილი, რაც იმას ნიშნავს, რომ მისი გადმოცემით მას შეელახა ღირსება, რაც არ არის 3531-ე მუხლის დაცვის ობიექტი.

პროკურორი დაგვეთანხმა, რომ მზიას ქმედება არ იყო მიმართული ჯანმრთელობის დაზიანებისაკენ…

თუ სილა ვერ აზიანებს ჯანმრთელობას, რა უნდოდა მზიას? რა არ ასვენებდა?…

სახელისუფლებო კომენტარებიც სულ ამბობს, რომ ეს არის შეურაცხყოფა, მაგრამ მძიმე დანაშაულიო…

[მძიმე დანაშაულის] კვალიფიკაცია ვერ დადგება იმაზე, რომ დგებუაძის ღირსება იყო შეურაცხყოფილი… ამ ეპიზოდში მზიას სახეში რომ ეჩქმიტა, რას იტყოდა ბრალდება, თავს დაესხა და სახეზე უჩქმიტაო?“

20:40 სთ – მზია ამაღლობელის ადვოკატმა, მაია მწარიაშვილმა დაასრულა თითქმის 8-საათიანი დასკვნითი სიტყვა.

დასკვნითი სიტყვის დასასრულს, მან ხაზი გაუსვა, რომ მზია ამაღლობელის საქმე თაობების განსახილველი საქმეა.

„მზია ამაღლობელის საქმე არის სარკე. ამ სარკეში როგორც კი ჩაიხედავ, გიჩვენებს, როგორ იყენებს ხელისუფლება ძალაუფლებას ბოროტად.

არის საქმეები, რომელიც დღევანდელი გადასახედიდან სხვანაირად ჩანს და ხვალინდელი გადასახედიდან – სხვაგვარად. ამის შემდეგ ბევრი წელი, მთელი საზოგადოება მოისმენს თქვენს განაჩენს, ამაში დარწმუნებული იყავით.

არის საქმეები, 20 წელი შეიძლება გავიდეს და არ კარგავს აქტუალობას, თაობების განსახილველი ხდება. ეს საქმე არის ასეთი, ესაა საქმე, რომელზეც თაობები ისაუბრებენ.

მზია ამაღლობელის გაწნული სილა არ იყო არც ხმამაღალი და არც დანაშაულებრივი. ერთსაც გვატყუებს ბრალდების მხარე და მეორესაც და ძალიან არ მინდა სასამართლომაც იგივე გაიმეოროს.

მადლობთ“ – თქვა ადვოკატმა მაია მწარიაშვილმა.

მის დასკვნით სიტყვას სასამართლო დარბაზში ტაში მოჰყვა.

სასამართლო სხდომა გრძელდება.

მოსამართლე ნინო სახელაშვილი მოისმენს მზია ამაღლობელის სხვა ადვოკატების დასკვნით სიტყვა და ასევე, პროკურატურის რეპლიკებს.

21:43 სთ – მზია ამაღლობელის დასკვნითი სასამართლო სხდომა დასასრულს უახლოვდება.

ბათუმის საქალაქო სასამართლოსთან მობილიზებულია პოლიცია.

მზია ამაღლობელის ადვოკატებმა დაასრულეს დასკვნითი სიტყვა. ახლა პროკურატურას მიეცა დრო რეპლიკებისთვის.

პროკურორის რეპლიკების პარალელურად სასამართლო დარბაზში ისმის შეძახილები ქუჩიდან – „თავისუფლება მზიას!“ „ცეცხლი ოლიგარქიას!“

22:15 სთ – დღეს, 1-ელ აგვისტოს ბათუმის საქალაქო სასამართლოში დასრულდა მზია ამაღლობელის სასამართლო სხდომა, თუმცა უშუალოდ მზია ამაღლობელს დასკვნითი სიტყვის თქმის საშუალება 4 აგვისტოს, 13 საათზე ექნება.

მზია ამაღლობელმა თავად მოითხოვა დასკვნითი სიტყვის გადადება.

„სასამართლოს ვთხოვ, მომცეს საბოლოო სიტყვის უფლება, მაგრამ ამისთვის ცალკე პროცესი ჩანიშნოს.

მომზადებისთვის არა, იმისთვის, რომ ძალები ფიზიკურად აღვიდგინო და იმისთვის, რომ რისი თქმაც მინდა, აქ ხმამაღლა ვთქვა.

მინდა სასამართლომ მომცეს ამის უფლება.

მით უმეტეს, წინა სხდომაზე ბატონმა პროკურორმა მკითხა, კითხვები თუ გაქვთ, მზად ვარ მოვისმინოო. ამ საქმეზე დღესაც მაქვს კითხვები და სულ მექნება.

დღეს მოსამართლეს მარტო ერთ კითხვას დავუსვამ. თუ არ ვცდები, ბატონო პროკურორო, ვლადიმერ ჩიტაიას, დეტექტივს, რა ბედი ეწია, რა განვითარება ჰპოვა ჩიტაიას პატაკმა? მართალია, სასამართლო მოწმეების ჩამონათვალიდან ამოიღეთ ჩიტაია, მაგრამ ჩემი ტელეფონი ხომ გამოძიებას აქვს, მაინტერესებს, რა დადგინდა.

მართლა მაინტერესებს, რა დადგინდა… რა ვიცი, იპოვეს თუ არა დიფ სთეითი, გაიგეთ თუ არა სადაა, რომელ კონტინენტზე გლობალური ომის პარტია, რომელზეც კობახიძე საუბრობს და მართლა სირცხვილია, ისეთი შეურაცხმყოფელია ეს ყველაფერი… ეს ხაზი განსაკუთრებით შეურაცხმყოფელია არამარტო ჩემთვის, თქვენთვისაც და ზოგადად ქვეყნისთვის“ – თქვა მზია ამაღლობელმა.

დღეს, პირველ აგვისტოს, დღის პირველი საათიდან ბათუმის საქალაქო სასამართლოში მზია ამაღლობელის საქმეზე დასკვნითი სხდომა გაიმართება.

მოსამართლე ნინო სახელაშვილი სხდომაზე მზია ამაღლობელის ადვოკატების დასკვნით სიტყვას მოისმენს. მოსამართლემ, შესაძლოა, განაჩენი პირველ აგვისტოს გამოიტანოს, ან მისი გამოცხადება გადადოს.

მზია ამაღლობელი გამოცემების – „ბათუმელებისა“ და „ნეტგაზეთის“ თანადამფუძნებელი და დირექტორია. ის თითქმის 7 თვე უკანონო პატიმრობაშია – სილის გაწვნის გამო მას პროკურატურა პოლიციელზე თავდასხმას ედავება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

პოლონეთის სეიმის წევრი, პოლიტიკოსი „მწვანეთა პარტიიდან“, მარგარეტ ტრაჩი X-ზე ეხმიანება მზია ამაღლობელის საქმის ბოლო პროცესს, რომელიც ხვალ, 1 აგვისტოსაა ჩანიშნული ბათუმის საქალაქო სასამართლოში და წერს, რომ მზია ამაღლობელი უნდა გათავისუფლდეს.

„მზია ამაღლობელი – საქართველოში ერთ-ერთი უძველესი მედია ორგანიზაციის დამფუძნებელი, დამოუკიდებელი მედიის ვეტერანი. ცოტა ხნის წინ ის პოლიტიკური პატიმარი გახდა.

საქართველოს მთავრობის რუსეთისკენ გადახრა გრძელდება, თუმცა ქართველები დემოკრატიული და ევროპული სახელმწიფოსთვის იბრძვიან. ახლა რეპრესიები დამოუკიდებელი მედიის წინააღმდეგაა მიმართული და მზია ამაღლობელი ამ რეპრესიების წინააღმდეგობის სახე გახდა.

ნუ დავრჩებით გულგრილი ჩვენი ქართველი მეგობრების დემოკრატიისთვის ბრძოლის მიმართ. მზია უნდა გათავისუფლდეს!“ – წერს მარგარეტ ტრაჩი.

მზია ამაღლობელის საქმეზე პარასკევს, პირველ აგვისტოს, დასკვნითი სასამართლო სხდომა გაიმართება. მოსამართლე ნინო სახელაშვილს შეუძლია ამავე დღეს განაჩენიც გამოიტანოს.

ამავე თემაზე: