“არასამთავრობო ორგანიზაციები და სამოქალაქო საზოგადოების წარმომადგენლები არიან ფუნდამენტი იმისთვის, რომ დემოკრატიამ იფუნქციონიროს,” – განაცხადა კარლ ჰარცელმა, ევროკავშირის ელჩმა საქართველოში. მას “ბათუმელებმა” ხელისუფლების მაღალჩინოსნების ბოლოდროინდელ განცხადებებზე დაუსვა შეკითხვა. ხელისუფლებამ მესამე სექტორს პოლიტიკურად ანგაჟირებული უწოდა, არასამთავრობო ორგანიზაციებმა კი მუშაობის შეზღუდვის საფრთხე დაინახეს.

რა ინფორმაცია აქვს ევროკავშირის ახალ ელჩს ამ დაპირისპირების შესახებ და რა საფრთხეს ხედავს ევროკავშირი ხელისუფლებისგან მესამე სექტორზე თავდასხმაში? – ელჩმა გვიპასუხა, რომ ის საქართველოში მესამე სექტორის მუშაობას დადებითად აფასებს. ევროკავშირის ელჩმა ასევე აღნიშნა, რომ მესამე სექტორის მუშაობა ფასეულია ხელისუფლებისთვისაც.

“ძალიან მაღალია შეფასება ამ სამოქალაქო სექტორის მუშაობისა. მომწონს ის ენთუზიაზმი, რომლითაც ისინი ჩართული არიან პროცესში, მათი იდეები. ეს ძალიან ფასეულია ჩვენთვის და ხელისუფლებისთვის,”- გვითხრა კარლ ჰარცელმა.

ევროკავშირის ელჩი აჭარის სტუმარია. ამჟამად იგი აჭარის მთავრობის თავმჯდომარესთან ერთად სოფლის განვითარების მხარდაჭერის პროგრამების პრეზენტაციას ესწრება.

2017 წლის აგვისტოში 13 წლის ჯემალ ბოლქვაძემ საჯარო რეესტრში დაირეგისტრირა ქონება – ჯერ მიწის ნაკვეთი და შემდეგ ოთხსართულიანი სახლი კახაბრის დასახლებაში, ზღვასთან ახლოს. ამ სახლის მთლიანი ფართობი 454 კვადრატული მეტრია. შესაბამისად, პირველი სართულის ფართობი არის 103.22 კვადრატული მეტრი, მეორე სართული – 112.07 კვადრატული მეტრი, მესამე სართულის ფართობი 115.08 კვადრატული მეტრია და მეოთხე სართულის ფართობი – 124.40 კვადრატული მეტრი.

ამ კერძო პირის ქონება „ბათუმელების“ ინტერესის საგანი მხოლოდ ერთი მიზეზით გახდა – ქონების მფლობელის მამა, ემზარ (ბუბა) ბოლქვაძე სახელმწიფო უსაფრთხოების სამსახურში მუშაობს. „ბათუმელებმა“ სახელმწიფო უსაფრთხოების სამსახურის პრესცენტრს ჰკითხა, ამ ეტაპზე კონკრეტულად რა თანამდებობა უკავია ემზარ ბოლქვაძეს, რაზედაც გვიპასუხეს, რომ ინფორმაციას ზეპირსიტყვიერად ვერ მოგვაწვდიან და შეგვიძლია წერილობით გამოვითხოვოთ.

„ბათუმელების“ ინფორმაციით, ემზარ ბოლქვაძე სახელმწიფო უსაფრთხოების სამსახურში ხულო-ქედა-შუახევის კურატორია.

რა სახსრებით მოახერხა ემზარ ბოლქვაძის 13 წლის შვილმა ჯერ მიწის ნაკვეთის შეძენა კერძო პირისგან და შემდეგ ოთხსართულიანი ფეშენებელური სახლის აშენება? – რადგან ქონების მესაკუთრის მამის ოფიციალური შემოსავლები არ იძლევა ამ მასშტაბის მშენებლობის შესაძლებლობას, „ბათუმელებმა“ პირადად ემზარ ბოლქვაძეს ჰკითხა, რამდენად ლეგალური გზით შეიძინა მისმა მცირეწლოვანმა შვილმა ქონება.

ემზარ ბოლქვაძემ „ბათუმელებს“ სატელეფონო კომენტარში უთხრა, რომ მის შვილს ეს ქონება „შთამომავლობით ერგო“. „მაგის წინაპრები და ბაბუა მოიკითხეთ და გაიგებთ“, – გვითხრა მან. სუს-ის მაღალჩინოსანს ასევე ვკითხეთ, რომელი ბაბუის ხაზით მიიღო ქონება ჯემალ ბოლქვაძემ, რაზედაც ემზარ ბოლქვაძემ გვიპასუხა, რომ „ნაწილი ერთისგან, ნაწილი – მეორისგან“.

მორიგ კითხვაზე – თანაბრად ფლობდნენ თუ არა ბაბუები ქონებას კახაბერში, სუსის მაღალჩინოსანმა გვიპასუხა, რომ „დაკვეთას ვასრულებთ“ და არ არის ვალდებული გვიპასუხოს. „ვინც ეს ინფორმაცია გითხრა, იმან ძალიან კარგად იცის ჩემი წინაპრები და კარგად მოიკითხე“, – ასე დაგვემშვიდობა ემზარ ბოლქვაძე.

თუმცა საჯარო რეესტრის მონაცემებით არ დასტურდება, რომ ჯემალ ბოლქვაძეს ქონება მემკვიდრეობით ერგო. პირიქით – მას ეს ქონება 2017 წლის პირველ აგვისტოს აქვს შეძენილი ვინმე ასლან ჩიკვაიძისგან და ეს გარიგება დასტურდება ნასყიდობის ხელშეკრულებით. გარიგების დროს ჯემალ ბოლქვაძის წარმომადგენლად საჯარო რეესტრში მისი დედა – ირინა ხახუტაიშვილია დაფიქსირებული.

და მაინც, შეეძლო თუ არა ემზარ ბოლქვაძეს თავისი დანაზოგით ამ მასშტაბის სახლისთვის ჯერ მიწის ნაკვეთის შეძენა და მერე ოთხსართულიანი სახლის აშენება-გარემონტება? სუს-ის თანამდებობის პირის შემოსავლების ნაწილობრივ გადამოწმება შესაძლებელია საჯარო სამსახურის ბიუროში, მის მიერ შევსებული ქონებრივი დეკლარაციის მიხედვით. ქონებრივი დეკლარაცია ემზარ ბოლქვაძეს ბოლოს 2013 წელს შეუვსია და სხვა წლებთან შედარებით ყველაზე მაღალი შემოსავალი – 35 546 ლარი სწორედ ამ წელს უფიქსირდება. საჯარო მოხელე ბოლო დეკლარაციის შევსების დროს აჭარის პოლიციის მთავარი სამმართველოს უფროსის მოადგილედ მუშაობდა.

დეკლარაციის შევსების პერიოდისთვის ის ფლობდა 55 კვადრატულ მეტრ ბინას ხელვაჩაურში, მისი მეუღლე კი მერსედესის ტიპის ავტომანქანას. სხვა შემოსავალი ან ბიზნესი არც მას და არც მის ოჯახის წევრებს (სამი არასრულწლოვანი შვილი) ოფიციალურად არ აქვთ.

ემზარ ბოლქვაძის მიერ შევსებული ქონებრივი დეკლარაციების მიხედვით (2008-2012 წლები), მისი ქონებრივი მდგომარეობა უცვლელია.

____________________________

მთავარი ფოტო: ემზარ ბოლქვაძის შვილის ახალაშენებული სახლი

„აქ იმართება დისკუსია ტოლერანტობაზე?“ – იკითხა ერთ-ერთმა სტუდენტმა, ვიდრე შეხვედრა დაიწყებოდა და როცა დარბაზიდან თანხმობის ნიშნად თავი დაუქნიეს, ისიც აუდიტორიას შეუერთდა.

ბათუმის სახელმწიფო უნივერსიტეტის დიდ აუდიტორიაში სტუდენტებს გამოწვევებზე სასაუბროდ დღეს, 11 ოქტომბერს, რელიგიის საკითხთა სახელმწიფო სააგენტოს წარმომადგენლები შეხვდნენ. შეხვედრამ დისკუსიის გარეშე ჩაიარა. არც ტოლერანტობა უხსენებია ვინმეს.

„არ არის ეს ქვეყანა ისე წაქცეული, როგორც ამის წარმოჩენა სურს ზოგიერთ არასამთავრობო ორგანიზაციას. ჩვენ ბევრ ევროპულ ქვეყანასაც კი ვჯობივართ,“ – მიმართა სტუდენტებს შეხვედრის დასაწყისში ზაზა ვაშაყმაძემ, რელიგიის სააგენტოს უფროსმა. მან მიღწევებზე მოკლედ და ზოგადად ისაუბრა. თქვა ისიც, რომ UNESCO სავარაუდოდ იუდაიზმის და ქრისტიანობის საუკუნოვან თანაცხოვრებას საქართველოში არამატერიალური კულტურის ძეგლად შეაფასებს.

„ძალიან ბევრი პრობლემა დაგროვდა, გაწეწილი ვართ…“ – უთხრა სტუდენტებს ზაზა ვაშაყმაძემ და ტრიბუნა სააგენტოს თანამშრომელს – სერგო ფარულავას დაუთმო. ზაზა ვაშაყმაძე აუდიტორიიდან გავიდა და აღარ დაბრუნებულა. სერგო ფარულავა კი დაახლოებით საათნახევრის განმავლობაში სტუდენტებს აქტუალური და სადისკუსიო საკითხების ნაცვლად, რელიგიური მიმდინარეობების ისტორიაზე ესაუბრა: ისლამზე, ქრისტიანობაზე, პროტესტანტიზმზე, ბუდიზმზე…

15-20 წუთის გასვლის შემდეგ სტუდენტებმა ჩურჩული და შიდა საუბრები წამოიწყეს. „ამას Google-შიც ვნახავთ, წავედით“, „დისკუსია იქნებაო და ესაა?“ – იკითხეს სტუდენტებმა ჩუმად უკანა რიგებიდან.

რა ინფორმაცია ჰქონდათ სტუდენტებს შეხვედრის შესახებ? – „ბათუმელების“ შეკითხვას ერთმა სტუდენტმა გოგომ უპასუხა, რომელმაც ვინაობის გამხელა არ ისურვა:

„ვიცოდით, რომ იქნებოდა დისკუსია ტოლერანტობაზე, პრობლემებზე, რაც დღეს რელიგიურ ორგანიზაციებს აქვთ,“ – თქვა მან.

სტუდენტებმა პროტესტის გამოხატვას აუდიტორიის მშვიდად დატოვება ამჯობინეს. „ეხსენებიათ ტოლერანტობა მაინც“, – თქვა ერთ-ერთმა, ვიდრე რიგს ჩაივლიდა.

ისტორიის მიმოხილვის დასრულების შემდეგ სააგენტოს იურისტებმა კანონებზეც მოასწრეს საუბარი, მაგალითად, კონსტიტუციის იმ მუხლებზე, რომლებიც რელიგიის თავისუფლებას უზრუნველყოფს.

„რატომ უნდა სჭირდებოდეს ადამიანს ევროპის სასამართლოში წასვლა, ვისაც რელიგიის თავისუფლების კუთხით პრობლემა ექმნება?“  – იკითხა სტუდენტმა გიორგი ფარტენაძემ. მას იურისტებმა უთხრეს, რომ ვიდრე საქართველოში ყველა სასამართლო ინსტანციაში დავა არ დასრულდება, ადამიანი ევროსასამართლოს ვერ მიმართავს.

რელიგიური ორგანიზაციების დღევანდელი გამოწვევების შესახებ რელიგიის სააგენტოს არ უსაუბრია. შესაბამისად, არც კითხვა დასმულა ამ კუთხით.

„ვიცოდით, რომ ტოლერანტობაზე უნდა ყოფილიყო საუბარი… მთლიანობაში საინტერესო იყო მაინც, მაგრამ ძალიან სიღრმისეულად იყო და ასე არ მაინტერესებს,“ – გვითხრა სტუდენტმა გიორგი ფარტენაძემ, რომელიც შეხვედრას ბოლომდე დაესწრო.

რატომ გადაწყვიტა რელიგიის სახელმწიფო სააგენტომ სტუდენტებისთვის ლექციის წაკითხვა დისკუსიის ნაცვლად? – ეს შეკითხვა „ბათუმელებმა“ რელიგიის სააგენტოს წარმომადგენლებს დაუსვა.

„ეგ იურისტების თემაა. აი, ახლა რაც ისაუბრეს, ეგ იყო საუბრის ძირითადი თემა. ისტორიაზე იყო მხოლოდ ერთი მოხსნება,“ – გვიპასუხა სერგო ფარულავამ და ჩვენთვის პასუხის გაცემა იურისტებს სთხოვა.

„რეალურად, მთავარი მიზანი იყო ცნობიერების ამაღლება, რის ვალდებულებაც ჩვენ გვაქვს სამოქმედო გეგმის ფარგლებში. თქვენ ფიქრობთ, რომ ნებისმიერი სემინარი რაიმე ახალ აღმოჩენას უნდა ეფუძნებოდეს? ისტორიის გარდა, აუდიტორიამ მოისმინა ინფორმაცია რელიგიის პოლიტიკის შესახებ,“ – გვითხრა დავით დავითაშვილმა, რელიგიის საკითხთა სააგენტოს იურისტმა.

„ვერ მოვასწარით გამოწვევებზე საუბარი… ხვალ შევცვლით ფორმატს, ეს ხომ დოგმა არ არის,“ – დაამატა სააგენტოს კიდევ ერთმა წარმომადგენელმა, ვალერიან ლილუაშვილმა.

ხვალ რელიგიის საკითხთა სააგენტო ჟურნალისტებთან აპირებს შეხვედრას.

„მეზღვაურების დასაქმების კომპანიების უმრავლესობას ახლაც პირდაპირ აქვთ მითითებული აპლიკაციაში, რომ მამაკაცი სჭირდებათ. ქალ მეზღვაურს განაცხადის გაკეთების უფლებაც კი არ აქვს. მეც ძალიან გამიჭირდა დასაქმება, ქალი რომ ვარ იმიტომ,“ – ეს ბათუმელმა მეზღვაურმა ნათია ლაბაძემ აღნიშნა სასტუმრო „ჰილტონში“ დღეს გამართულ შეხვედრაზე.

შრომით ურთიერთობებში გენდერული ნიშნით დისკრიმინაციაზე ტრენინგი „ჰილტონში“ საზღვაო ტრანსპორტის სააგენტომ მოაწყო. სახალხო დამცველის წარმომადგენლები საზღვაო ინდუსტრიის წარმომადგენლებს გენდერული თანასწორობის შესახებ ესაუბრნენ.

რამდენად რთულია მეზღვაური ქალის დასაქმება? – „ბათუმელები“ ამ თემაზე ნათია ლაბაძეს ესაუბრა. ის პირველი მეზღვაური ქალია დამოუკიდებელი საქართველოდან, რომელიც გემზე კაპიტნის მესამე თანაშემწედ მუშაობს. შორეულ ნაოსნობაში ნათია ლაბაძე სამი წლის წინ წავიდა.

„ამჟამად ვმუშაობ კომპანია „კოლუმბიის“ გემზე. საქართველოდან მხოლოდ მე ვარ ამ გემზე, კონტეინერმზიდია და კაპიტნის მესამე თანაშემწედ ვმუშაობდი ბოლოს. რამდენიმე დღის წინ დავბრუნდი…

რეალურად რთულია დასაქმება, როცა ქალი ხარ. ეს გლობალური ტენდენციაა და მარტივად ვერ შეცვლი. კომპანიების უმრავლესობას ურჩევნია, რომ მამაკაცი აიყვანოს. უპირატესობა ფიზიკურ მონაცემებს ენიჭება, სულიერსაც… წარმოიდგინეთ, რომ ზღვაში იმყოფები 25 უცნობ მამაკაცთან ერთად, დღეები არ სრულდება, ერთსა და იმავე საქმეს აკეთებ, ერთსა და იმავე ადამიანებს უყურებ. ბევრჯერ მიფიქრია, რომ ეს ციხესავითაა, მაგრამ გამიძლია. არ ვფიქრობ, რომ მამაკაცი უფრო ძლიერია სულიერად, ვიდრე ქალი. პირიქით, ბევრი მამაკაცი მინახავს, ერთ თვეში  უკან რომ დაბრუნებულა, არ შემიძლია და მორჩაო.

კომპანია „კოლუმბმაც“ თავდაპირველად უარი მითხრა დასაქმებაზე, ქალი რომ ხარ, შეიძლება რაღაც შეზღუდვები იყოსო. მერე გერმანიიდან იყვნენ ჩამოსულები გასაუბრებაზე და მოვეწონე, ამიყვანეს,“ – გვიყვება ნათია ლაბაძე.

რატომ გადაწყვიტა ნათიამ კაპიტნობა და რა წინააღმდეგობას აწყდება კაპიტნის თანაშემწე გემზე?

„მეზღვაურობა ბავშვობიდან მინდოდა… ჩემ ირგვლივ ბევრი მეზღვაური იყო და მათ ისტორიებზე ვიზრდებოდი. მეზღვაური ქალი არავინ იყო და მე მომინდა ეს. სკოლა დასრულებული არ მქონდა, როცა ვიცოდი, რომ კაპიტანი უნდა გამოვსულიყავი. ოჯახი გვერდით დამიდგა, მთავარია მოინდომო, ყველაფერი გამოვაო… სხვებს უფრო უკვირდათ, რა გინდა გოგოს გემზე, ქალის ადგილი მაქ არ არისო.

არასდროს მინანია ჩემი არჩევანი, მაშინაც კი, როცა ძალიან რთულ სიტუაციაში აღმოვჩნდი. ყოფილა შემთხვევაც, როცა აშკარად მამაკაცის ფიზიკური ძალა იყო საჭირო, მაგრამ ხერხი სჯობია ღონესო, ტყუილად კი არ არის ნათქვამი. კარგი ურთიერთობებით ყველაფერი გამოვა.

მიგრძვნია გაუსაძლისი მონატრებაც გემზე ყოფნის დროს. ერთ დღესაც გადავწყვიტე, რომ ჩემი სახლის და ახლობლების ფოტოები საერთოდ აღარ მენახა… ასე დავძლიე მონატრება. შენი თავი თუ ვერ აიყვანე ხელში, სხვა ვერ დაგეხმარება.

მეზღვაურობა საუკეთესო გზაა იმისთვის, რომ აღმოაჩინო სამყარო, ნახო სხვადასხვა ქვეყანა, შეიგრძნო განსხვავებული კულტურა, ადამიანები… ჩემთვის მეზღვაურის პროფესია მოგზაურობას ნიშნავს.

ქალი მეზღვაური უკვირთ სხვა ქვეყნებშიც. ჯერ კიდევ მყარია სტერეოტიპი, რომ კაცი ქალზე ძლიერია. ეს მითი ნელ-ნელა იმსხვრევა. მახსოვს, ჩინეთში როცა ვიყავი, იქ თითს იშვერდნენ ჩემზე, ნახეთ, ქალია გემზეო.

ბოლოს ქალი კაპიტანი ერთ-ერთ ფრანგულ გემზე ვნახე, საოცარი ვინმე იყო. კიდევ უფრო გამიზარდა მოტივაცია,“ – გვითხრა ნათია ლაბაძემ.

ბათუმის საბავშვო ბაღების გაერთიანებამ 16 ვაკანტურ ადგილზე კონკურსი განმეორებით გამოაცხადა. როგორც გაერთიანების ხელმძღვანელი მამუკა შამილიშვილი აცხადებს, მიუხედავად იმისა, რომ საკონკურსო ბარიერი 186 კონკურსანტიდან მხოლოდ ექვსმა გადალახა, ბარიერი მაინც არ დაიწევა.

„კონკურსი ხელმეორედ ერთ თვეში გამოცხადდება. ისინი, ვინც პირველ კონკურსზე ბარიერი გადალახეს, ხვალ, 12 ოქტომბერს, გაივლიან გასაუბრებას. იმ შემთხვევაში, თუ გასაუბრებასაც წარმატებით გაივლიან, მაშინ 16 ვაკანსიაზე გამოცხადდება კონკურსი, ან გაიზრდება ვაკანსიის რაოდენობა.“

მამუკა შამილიშვილის თქმით, ტესტები შეიცვლება. „კომისია იმსჯელებს და თუ რაიმე არის შესაცვლელი ტესტებში, შემდეგ დავხვეწავთ“.

კონკურსში გამარჯვებული 14 პირი ბათუმის ახალ, 34-ე ბაღში დასაქმდება, რომელიც დაახლოებით ერთ კვირაში უნდა გაიხსნას. სამი გამარჯვებული 33-ე ბაღში დასაქმდება, დანარჩენები კი სხვადასხვა საბავშვო ბაღებში გადანაწილდებიან.

იმ შემთხვევაში, თუკი განმეორებითი კონკურსის შემთხვევაშიც ვერ გადალახავენ კონკურსანტები ბარიერს, როგორც შამილიშვილი ამბობს, ახალ საბავშვო ბაღში თანამშრომლებს დროებით, ერთთვიანი ხელშეკრულების საფუძველზე აიყვანენ.

„საბავშვო ბაღის გახსნას ვერ გადავდებთ, ამიტომ თანამშრომლებს დროებით ავიყვანთ. ჩვენ გვყავს სარეზერვო თანამშრომლები, რომლებსაც აქვთ გამოცდილება და დიდი ხანია მუშაობენ ჩვენთან მოკლევადიანი კონტრაქტებით, იქედან შევარჩევთ თანამშრომლებს“.

მამუკა შამილიშვილის თქმით, აღნიშნული პირები კონკურსშიც მონაწილეობენ, თუმცა ჯერჯერობით საკონკურსო ბარიერი ვერ გადალახეს. „იმედია, განმეორებით კონკურსზე უფრო მომზადებულები მოვლენ“.

იაკინთე [ნიკა] ჩხარტიშვილმა, რომელიც აჭარის საზოგადოებრივი მაუწყებლის მრჩეველთა საბჭოს წევრობისთვის გამოცხადებულ კონკურსში მონაწილეობს, კომისიას ვერ წარუდგინა დიპლომის ასლი, რომელიც დაადასტურებდა, რომ მას მაგისტრის ან მაგისტრთან გათანაბრებული განათლება აქვს მიღებული. კანონით, ამ პოზიციაზე მუშაობა სწორედ ამ სახის დიპლომით არის დასაშვები. ამის მიუხედავად, კომისიამ კონკურსანტი მეორე ეტაპზე მაინც გადაიყვანა.

„ბათუმელების“ ინფორმაციით, ხუთწევრიან კომისიაში მხოლოდ ერთი წევრი – „დემოკრატიის ინსტიტუტის“ წარმომადგენელი ალექსანდრე ლორთქიფანიძე არ დაეთანხმა იაკინთე [ნიკა] ჩხარტიშვილის მეორე ეტაპზე გადასვლას.

თავდაპირველად კომისიამ ხარვეზი აღმოაჩინა როგორც იაკინთე [ნიკა] ჩხარტიშვილის, ისე კიდევ სამი კონკურსანტის დოკუმენტებში და ამის შესახებ სხდომის ოქმში ჩაწერა: „წარმოდგენილი დოკუმენტაციით ვერ დგინდება უმაღლესი განათლების შესაბამისი აკადემიური ხარისხი.“

კომისიამ კონკურსანტებს ხარვეზის შესავსებად ვადა მისცა.

მიცემულ ვადაში ხარვეზის აღმოფხვრა შეძლო ორმა კონკურსანტმა, ორმა კი ხარვეზის გამოსწორება და მოთხოვნილი დოკუმენტების წარდგენა ვერ შეძლო. კომისიამ კი მიიჩნია, რომ ამ ორიდან ხარვეზი ვერ აღმოფხვრა მხოლოდ ერთმა კონკურსანტმა – ირაკლი ანთიძემ და ის მეორე ეტაპზე არ გადაიყვანა. დიპლომის ნაწილში ხარვეზი ვერც იაკინთე [ნიკა] ჩხარტიშვილმა აღმოფხვრა, მაგრამ მას სიტყვაზე ენდნენ და მეორე ეტაპზე გადაიყვანეს.

„ბათუმელებმა“ ამ საკითხზე განმარტება სთხოვა კომისიის თავმჯდომარეს, ერმილე მესხიას, რომელმაც გვითხრა, რომ იაკინთე [ნიკა] ჩხარტიშვილთან დაკავშირებით გადაწყვეტილება კომისიის სხდომაზე უმრავლესობამ მიიღო:

„იაკინთე ჩხარტიშვილმა წარმოადგინა საბუთები აჭარის სახელმწიფო და განათლების კულტურისა და სპორტის სამინისტროს არქივებიდან. ამ საბუთებიდან ირკვევა, რომ ინსტიტუტზე, რომელიც მან დაამთავრა ოთხმოცდაათიან წლებში, არც ერთ არქივში ცნობა არ იძებნება. მან წარმოადგინა განმარტება და სთხოვა კომისიას, ვინაიდან ეს ინსტიტუტი დღეს არ ფუნქციონირებს, ხოლო არქივებში დოკუმენტები არ იძებნება და მას არ აქვს შესაძლებლობა გამოითხოვოს დამატებითი ინფორმაცია, თუ შეიძლება ეს ჩაუთვალონ და მისი განცხადება მიღებული იქნას ცნობად“.

ერმილე მესხიას თქმით, კომისიამ მსჯელობის შემდეგ მიიღო ამ კონკურსანტისთვის სასარგებლო გადაწყვეტილება.

ჰქონდა თუ არა კომისიას უფლება კანონის მოთხოვნების გვერდის ავლით მიეღო გადაწყვეტილება ერთ-ერთი კონკურსანტის სასარგებლოდ და ხომ არ ნიშნავს ეს იმას, რომ ბორდის მომავალი წევრის ვინაობა უკვე გარკვეულია, ანუ კონკურსი არის ფიქტიური? – კომისიის თავმჯდომარე პასუხობს:

„…თვითონ ზეპირად აცხადებს, რომ პროგრამა იყო ხუთწლიანი, მაგრამ ეს დიპლომით არ ჩანს, მან ვერ გამოძებნა შესაძლებლობა სახელმწიფო ორგანოებიდან მიეღო ეს ინფორმაცია, ერთსაათიანი სჯა-ბაასი გვქონდა ამ საკითხზე, მაგრამ საბოლოოდ მაინც კომისიამ იფიქრა, რომ რადგან კონკურსანტი შეზღუდულია იმით, რომ არქივში მასალები არ იძებნება, საბოლოოდ ამ აზრამდე მივედით, რომ კონკურსანტის სასარგებლოდ მიგვეღო გადაწყვეტილება. კომისიამ ჩათვალა, რომ კონკურსანტი არ იყო არაფერ შუაში“, – განმარტა ერმილე მესხიამ.

ის მიიჩნევს, რომ ეს ფაქტი კომისიის მიმართ ეჭვს ვერ გააჩენს, რადგან საბოლოო გადაწყვეტილებას ეს კომისია არ იღებს.

„ბათუმელებმა“ სცადა გაერკვია, რატომ არ დაუჭირა კონკურსანტ იაკინთე ჩხარტიშვილს მხარი იურისტმა ალექსანდრე ლორთქიფანიძემ, მაგრამ მან გვითხრა, რომ ვიდრე თავად უმაღლესი საბჭო არ გამოაქვეყნებს გუშინ, 9 ოქტომბერს ჩატარებული სხდომის ოქმს, განმარტებას ვერ გააკეთებს. 

„აჭარის ტელევიზიის“ ბორდის წევრობა 11 პირს სურდა. მეორე ეტაპზე გადასულები საკონკურსო კომისიამ გასაუბრებაზე 13 ოქტომბერს დაიბარა. გასაუბრების შედეგად კომისია არანაკლებ სამ წევრს შეარჩევს და უმაღლეს საბჭოს წარუდგენს. მათგან ერთ პირს უმაღლესი საბჭო შეარჩევს.

კონკურსის პირობების მიხედვით, კანდიდატი უნდა იყოს საქართველოს მოქალაქე, „საზოგადოებრივი აღიარებისა და ნდობის მქონე პირი“. მას აუცილებლად უნდა ჰქონდეს მაგისტრის ხარისხი და ათწლიანი მუშაობის გამოცდილება, მათ შორის, 5 წელი ჟურნალისტიკაში, ადამიანის უფლებათა დაცვის სფეროში, საფინანსო, ელექტრონული კომუნიკაციების, სახელოვნებო, სამწერლო ან/და სამეცნიერო-პედაგოგიურ სფეროში.

„აჭარის ტელევიზიის“ სამეურვეო საბჭოს წევრის ანაზღაურება 2625 ლარია. სამეურვეო საბჭოს წევრს 6 წლის ვადით ირჩევს უმაღლესი საბჭო.

„აჭარის ტელევიზიის“ ბორდის დანარჩენ 4 წევრს უფლებამოსილების ვადა მომავალი წლის ნოემბერში ეწურება. 2019 წლის ოქტომბერში კი, ბორდმა „აჭარის ტელევიზიის“ ახალი დირექტორი უნდა აირჩიოს.

„აჭარის ტელევიზიის“ სამეურვეო საბჭოს მეხუთე წევრი უმაღლესმა საბჭომ უნდა შეარჩიოს. კონკურსი დაიწყო. ბორდის წევრობის 11-მა კანდიდატმა თავისი კონცეფცია არხის განვითარების შესახებ უკვე გამოაქვეყნა. კანდიდატებს 13 ოქტომბერს სპეციალური კომისია გაესაუბრება. კომისიამ მინიმუმ სამი კანდიდატი უნდა წარუდგინოს დეპუტატებს საბოლოო არჩევანის გასაკეთებლად.

„ბათუმელები“ აჭარის ტელევიზიის ბორდის წევრობის კანდიდატების კონცეფციებს გაეცნო. კანდიდატებს, რამდენიმე გამონაკლისის გარდა, ზოგადი ხედვა აქვთ წარმოდგენილი. კონცეფციები, ძირითადად, ერთმანეთს ჰგავს – ისინი ძლიერ მაუწყებელს ითხოვენ, რომელიც გავლენებისგან თავისუფალი და მაღალპროფესიონალური იქნება. კონცეფციებში ვერ ნახავთ ან მცირე დოზითაა კანდიდატების ხედვა იმის შესახებ, თუ კონკრეტულად რა პრობლემა აქვს „აჭარის ტელევიზიას“ დღეს და როგორ, რა გზებით უნდა მოგვარდეს იგი.

არსებობს განსხვავებული ხედვებიც. მაგალითად, ბორდის წევრობის კანდიდატი, ირაკლი კიკვაძე „აჭარის ტელევიზიას“ „ახალი აზროვნების“ დამკვიდრებას სთხოვს.

„აჭარის ტელევიზიის მაუწყებლობა უნდა ემსახურებოდეს ახალი ღირებულებების, ახალი აზროვნების დამკვიდრებას,“ – აღნიშნავს ირაკლი კიკვაძე. კონცეფციაში იგი ყურადღებას ამახვილებს იმაზე, რომ გადაცემები კონკრეტულ სეგმენტს უნდა იყოს მორგებული და კარგი იქნება, თუკი ახალი გადაცემა ახალგაზრდებისთვის მომზადდება. ბორდის წევრობის ეს კანდიდატი მიიჩნევს, რომ ის საზოგადოებაა თანამედროვე სამყაროში ყველაზე წარმატებული, სადაც საზოგადოებრივი მაუწყებელი კარგად მუშაობს.

„სრულიად ნათელია, რომ დღეს სწორედ ის საზოგადოება ახერხებს ყველაზე პროგრესულ განვითარებას და ექცევა ლიდერის პოზიციაზე, სადაც თანამედროვე მიდგომებით არის შემუშავებული საზოგადოებრივი მაუწყებლის კონცეფციები,“ – აღნიშნავს ირაკლი კიკვაძე.

ნათია სირაბიძე მიიჩნევს, რომ „აჭარის ტელევიზიამ“ განსაკუთრებული ყურადღება რეგიონებს და კონკრეტულად – აჭარას უნდა დაუთმოს. ბორდის წევრობის კანდიდატი მიიჩნევს, რომ მაუწყებელმა სამოქალაქო თვითშეგნების ამაღლებისთვის უნდა იმუშაოს. „უნდა იზრუნოს მოსახლეობის სახელმწიფო და სამოქალაქო თვითშეგნების ამაღლებისა და დემოკრატიული ფასეულობების დამკვიდრებისთვის, როგორიცაა კანონის უზენაესობა, გამოხატვის თავისუფლება, ტოლერანტობა, თანასწორობა და სხვა“, – წერს კონცეფციაში ნათია სირაბიძე.

რა უშლის ხელს „აჭარის ტელევიზიას“ იყოს წარმატებული – ნათია სირაბიძის აზრით, მოძველებულ ინვენტართან და ინფრასტრუქტურასთან ერთად, პრობლემაა არასაკმარისი ბიუჯეტი, ასევე ხშირი რეორგანიზაცია, არაეფექტური მარკეტინგული სტრატეგია და არასათანადო ონლაინკონტენტი. „აღნიშნული პრობლემების გამოსწორებით საზოგადოებრივი მაუწყებლის აჭარის ტელევიზია და რადიო შეძლებს გახდეს ნაციონალურ კომერციულ არხებზე უფრო რეიტინგული მთელი საქართველოს მასშტაბით“, – აღნიშნავს იგი.

ნათია სირაბიძე საკუთარ კონცეფციაში ტელევიზიის მობილური აპლიკაციების აქტიურ გამოყენებაზეც საუბრობს.

„ძლიერ მობილურ აპლიკაციაზე“ ამახვილებს ყურადღებას კონცეფციაში ბორდის წევრობის კანდიდატი ნუგზარ [ბაჩუკი] ჩხეიძეც. მისი აზრით, თანამედროვე ტექნოლოგიების პირობებში ამას განსაკუთრებული ყურადღება უნდა დაეთმოს.

ბორდის წევრად არჩევის შემთხვევაში ბაჩუკი ჩხეიძე, სავარაუდოდ, საინფორმაციო გამოშვების ეთერში გასვლის დროის შეცვლის კუთხით იმუშავებს.

„ნდობის მოპოვება მოსახლეობაში შესაძლებელია მხოლოდ სწორი, სწრაფი, ობიექტური ინფორმირების შემთხვევაში. ახალი ამბები უნდა გადიოდეს ყველაზე უფრო ყურებად დროს. ახალი ამბების გაშუქებისას პრიორიტეტი უნდა მიენიჭოს რეგიონის მოვლენების გაშუქებას, შემდეგ მთლიანი ქვეყნის მოვლენების და ბოლოს, მსოფლიოში მიმდინარე პროცესების,“ – ვკითხულობთ ბაჩუკი ჩხეიძის კონცეფციაში. მისივე აზრით, აჭარის ტელევიზიას რეგიონის თითოეულ მუნიციპალიტეტში უნდა ჰყავდეს ჟურნალისტი.

„ტელევიზიამ უნდა მოახერხოს და თავისი სტუდიიდან გავიდეს მასებში, ქალაქის უბნებში, რეგიონებში…“ – ასე უყურებს აჭარის ტელევიზიის განვითარებას ბორდის წევრობის კანდიდატი, ემზარ დიასამიძე. ის ბორდის წევრების სისხლის სამართლებრივ პასუხისმგებლობას ითხოვს, თუკი არხი „საკუთარ ნიშას ვერ დაიმკვიდრებს“.

„საზოგადოებრივ მაუწყებელს თავისი გარანტირებული ფინანსებით მნიშვნელოვანი ფორა აქვს. თუკი ტელევიზია ამ ნიშას ვერ დაიმკვიდრებს, მე, როგორც საქართველოს მოქალაქეს მიმაჩნია, რომ ჩემ მიერ გადახდილი თანხა იფლანგება და ამაზე სისხლის სამართლის პასუხისმგებლობის საკითხი უნდა დადგეს კონკრეტული პირების, მათ შორის, ბორდის წევრების მიმართ, როგორც ახლა, ისე მომავალში“, – წერს ემზარ დიასამიძე კონცეფციაში.

ემზარ დიასამიძის აზრით, პრიორიტეტების განსაზღვრისთვის დრო არ უნდა დაიხარჯოს და უნდა დაიხვეწოს „პროდუქციის შექმნის მექანიზმები, მაყურებლისთვის მიწოდების ფორმები“.

ემზარ დიასამიძე ასევე მომხრეა ჰონორარული ანაზღაურების შემოღების, შიდაკონკურენციის სისტემის ჩამოყალიბების და „მკაცრი სანქციების ამოქმედების“.

სტერეოტიპების ნგრევაზე აკეთებს აქცენტს თავის კონცეფციაში ბორდის წევრობის კანდიდატი – ნერონ აბულაძე. „მაუწყებელმა ერთმნიშვნელოვნად ხელი უნდა შეუწყოს არსებულ სტერეოტიპებად ქცეული მოვლენების ნგრევის პროცესს“, – აღნიშნავს იგი. თუმცა კონცეფციაში არაა კონკრეტულად მოცემული, რა იგულისხმება „სტერეოტიპების ნგრევაში“, ან რომელი სტერეოტიპის წინააღმდეგ რა ფორმით უნდა იმუშაოს „აჭარის ტელევიზიამ“.

ნერონ აბულაძე კონცეფციას საინფორმაციო სამსახურის გაძლიერებაზე საუბრით იწყებს. იგი მიიჩნევს, რომ „მიუკერძოებლობა და ობიექტურობა უნდა იყოს საინფორმაციო სამსახურის შეუვალი პოზიცია“. ნერონ აბულაძის აზრითაც, ტელევიზიას ყველა მუნიციპალიტეტში უნდა ჰყავდეს ჟურნალისტი.

ნერონ აბულაძე კონცეფციაში ბორდის დანიშნულებაზეც ამახვილებს ყურადღებას: „ვფიქრობ, მრჩეველთა საბჭო არ უნდა შემოიფარგლოს მხოლოდ ზოგადი პრიორიტეტების განსაზღვრით. აუცილებელია, კონკრეტული მიმართულებების განსაზღვრა – დიფერენცირება“.

სტერეოტიპების ნგრევაზე კიდევ ერთი კანდიდატი – დიანა ვაშაყმაძე საუბრობს. მისი აზრით, „აჭარის ტელევიზიას“ აქვს რესურსი მოამზადოს გადაცემები ევროინტეგრაციის თემებზე და უმცირესობების საჭიროებებზე.

დიანა ვაშაყმაძე საზოგადოებრივი მაუწყებლის უპირატესობას ხედავს იმაში, რომ არხს ბიუჯეტიდან აქვს გარანტირებული დაფინანსება და იგი თავისუფალი უნდა იყოს პოლიტიკური და კომერციული გავლენებისგან.

„თვითმიზანი უნდა იყოს არა მაღალი რეიტინგი, არამედ მაღალი ჟურნალისტური სტანდარტი. გამომდინარე აქედან, აწარმოოს ან შეიძინოს მაღალი ხარისხის პროდუქტი,“ – მიიჩნევს დიანა ვაშაყმაძე. სხვა კანდიდატებისგან განსხვავებით, დიანა ვაშაყმაძე მიიჩნევს, რომ „აჭარის ტელევიზიამ“ შესაძლოა გარე რესურსებიც აითვისოს.

„აჭარის ტელევიზიის“ დაფარვის ზონაზე ამახვილებს ყურადღებას ბორდის წევრობის კანდიდატი – რაულ ბერიძე. მას მიაჩნია, რომ რადგან ტელევიზია ქვეყანას ფარავს და არა კონკრეტულად რეგიონს, მაუწყებლობაც მხოლოდ რეგიონზე აქცენტირებული არ უნდა იყოს.

„მაუწყებელმა აუცილებლად უნდა წარმოაჩინოს ქართული საზოგადოების და ქვეყნის ეროვნული, მატერიალური და არამატერიალური სიმდიდრე. მაუწყებელმა საზოგადოებას უნდა გაუჩინოს სახელმწიფოს თანამესაკუთრის და სახელმწიფოს აღმშენებლობაში თანამონაწილეობის განცდა… გადაცემები უნდა ემსახურებოდეს სამოქალაქო საზოგადოების ჩამოყალიბებას და პასუხისმგებლიანი მოქალაქის აღზრდას,“ – აღნიშნავს კონცეფციაში რაულ ბერიძე.

რაულ ბერიძის კონცეფციაში ვერ იპოვით კონკრეტულ შეთავაზებებს, თუ როგორ უნდა მოგვარდეს პრობლემები. იგი მიიჩნევს, რომ პრობლემებზე და, შესაბამისად, სტრატეგიაზე სამეურვეო საბჭომ უნდა იმსჯელოს და ის არის პასუხისმგებელი საზოგადოების წინაშე.

„მრჩეველთა საბჭოა პასუხისმგებელი საზოგადოების წინაშე, შეიქმნას პრეცედენტი მაღალი ხარისხის მაუწყებლობისა,“ – წერს რაულ ბერიძე.

ნდობის აღდგენასა და პოლიტიკურ ძალთა გავლენებისგან გათავისუფლებაზე საუბრობს კონცეფციაში ოლღა ჟღენტი.

„ის უნდა გაემიჯნოს მმართველ თუ ოპოზიციურ პოლიტიკურ ძალთა გავლენას და აწარმოოს დამოუკიდებელი სარედაქციო პოლიტიკა… აჭარის ტელევიზიამ უნდა უზრუნველყოს გახსნილი და შეუფერხებელი კომუნიკაცია მაყურებელთან და მსმენელთან. უპირველესად საჭიროა ნდობის აღდგენა და „თანამშრომლობის“ განწყობის მუდმივი, კომუნიკაციური „ველის“ შექმნა.

ის არ უნდა მოქმედებდეს განყენებულად და თვითმიზნურად, საერთაშორისო სტანდარტების და მოთხოვნების ფორმალური დაცვით“, – აღნიშნულია ოლღა ჟღენტის კონცეფციაში.

ბორდის წევრობის კანდიდატი განსაკუთრებულ ყურადღებას აქცევს თეატრს, კულტურას და ამ კუთხით შემეცნებითი გადაცემების მომზადების აუცილებლობას. ოლღა ჟღენტი კონცეფციაში ხაზს უსვამს საზოგადოების კონკრეტული ჯგუფების პრობლემებზე სიუჟეტების მომზადების აუცილებლობასაც, თუმცა იქვე შეზღუდული შესაძლებლობების მქონე პირებს „უნარშეზღუდულებს“ უწოდებს.

„მომზადდეს სიუჟეტები და პროგრამები პენსიონერების, უნარშეზღუდული ადამიანების, უმუშევრებისა და საზოგადოების სხვა დაუცველი ფენების პრობლემების შესახებ,“ – წერია ოლღა ჟღენტის კონცეფციაში.

ტრადიციულ და ლიბერალური ღირებულებებს შორის ბალანსის დაცვის საჭიროებას ხედავს ბორდის წევრობის კანდიდატი იაკინთე [ნიკა] ჩხარტიშვილი. კანდიდატს მიაჩნია, რომ ამ კუთხით ბალანსის დაცვაზე უნდა იმუშაოს მაუწყებელმა.

„რადგან საზოგადოება ძირითადად შედგება ტრადიციული და ლიბერალური შეხედულებების მატარებელი ადამიანებისგან, აუცილებელია იქნეს დაცული ბალანსი ორთავე შეხედულებების საუკეთესო გამოვლინებებში. ტრადიციებსა და სიახლეების ბალანსი ასევე ეროვნული და ზოგადსაკაცობრიო მოსაზრებათა შორის ბალანსი უმნიშვნელოვანესი ამოცანაა საზოგადოებრივი მაუწყებლისთვის. საზოგადოებრივმა მაუწყებელმა ხელი უნდა შეუწყოს პოლიტიკური კულტურის ამაღლებას, დემოკრატიული ღირებულებებისა და პლურალისტური გარემოს განვითარებას და გაძლიერებას,“ – წერია ნიკა ჩხარტიშვილის კონცეფციაში.

ნიკა ჩხარტიშვილი მაუწყებლის განვითარების წინაპირობად დამოუკიდებლობას და „გარედან ჩარევის შესაძლებლობის სრულად გამორიცხვას“ მიიჩნევს. კონკრეტული ამოცანების ჩამონათვალში ნიკა ჩხარტიშვილიც ყურადღებას ამახვილებს ინტერნეტრესურსის გამრავალფეროვნებაზე და ასევე მზა პროდუქციის შეძენის დროს მაქსიმალურ გამჭვირვალობაზე.

„საზოგადოებრივი მაუწყებლის ინსტიტუციური რეფორმა არ დასრულებულა,“ – მიიჩნევს ბორდის წევრობის კიდევ ერთი კანდიდატი გიგა ჩხარტიშვილი. მას სხვა კანდიდატებისგან განსხვავებით, ყველაზე ვრცელი კონცეფცია მოუმზადებია და ეხება თითქმის ყველა ვალდებულებას, რაც საზოგადოებრივ მაუწყებელს კანონმდებლობით აქვს განსაზღვრული. გიგა ჩხარტიშვილის კონცეფცია სტრატეგიაზე საუბრით იწყება და ბრენდირებით სრულდება.

„პირველ რიგში, უნდა შეიქმნას ორგანიზაციის განვითარების სტრატეგია… აჭარის ტელევიზია და რადიო უფლებამოსილი და ვალდებულია შექმნას დროში გაწერილი, შედეგებზე ორიენტირებული ორგანიზაციული განვითარების და საზოგადოების ინტერესების დაკმაყოფილების სტრატეგიული გეგმა, რომლის შემუშავებაში ჩართული უნდა იყოს სტრატეგიის სპეციალისტები, საექსპერტო ჯგუფები და ფართო საზოგადოება,“ – წერია გიგა ჩხარტიშვილის კონცეფციაში.

ბორდის წევრობის ეს კანდიდატი ტელევიზიის „ფუძემდებლურ პრიორიტეტად“ ახალ ამბებს და საზოგადოებრივ-პოლიტიკურ გადაცემებს მიიჩნევს. იგი ასევე მიიჩნევს, რომ ტელევიზიას საკუთარი ანალიტიკური ჯგუფი უნდა ჰყავდეს მყარი დაფინანსებით, რომელიც საგამოძიებო ჟურნალისტიკის მიმართულებით იმუშავებს.

„მნიშვნელოვანია, რომ მაუწყებელმა თავისი ყველაზე საუკეთესო ადამიანური რესურსი მიმართოს საინფორმაციო სამსახურის მაღალპროფესიონალური გუნდის ფორმირების, მათი საჭირო უნარ-ჩვევებით, ტექნიკური და ფინანსური რესურსებით უზრუნველყოფისთვის“, – აღნიშნულია კონცეფციაში.

გიგა ჩხარტიშვილი ასევე ფიქრობს, რომ მაუწყებლობას საკუთარი საგამომცემლო სახლი უნდა ჰქონდეს, სადაც საგანმანათლებლო და შემეცნებითი ვიდეორგოლი მომზადდება და სხვადასხვა ტელევიზიაში განთავსდება.

აჭარის ტელევიზიის ბორდის წევრობა სულ 11 პირს სურდა. მეორე – გასაუბრების ეტაპზე მხოლოდ ერთი კანდიდატი, ირაკლი ანთიძე ვერ გადავიდა.

მეორე ეტაპზე გადასული კანდიდატები:

1. გიგა ჩხარტიშვილი
2. იაკინთე (ნიკა) ჩხარტიშვილი
3. ოლღა ჟღენტი
4. ნუგზარ (ბაჩუკი) ჩხეიძე
5. რაულ ბერიძე
6. ნათია სირაბიძე
7. ირაკლი კიკვაძე
8. ემზარ დიასამიძე
9. ნერონ აბულაძე
10. დიანა ვაშაყმაძე

ამ თემაზე:

ქობულეთის მუნიციპალიტეტში, სოფელ ლეღვაში მცხოვრები ფატი მანელიშვილი დღეს 100 წლის გახდა და დაბადების დღე მას აჭარის ჯანდაცვის მინიტრმა და ქობულეთის მერმა მიულოცეს და 1000 ლარი გადასცეს პროგრამის – „100 წელს გადაცილებულ მოქალაქეთა ერთჯერადი მატერიალური დახმარება“ ფარგლებში.

აჭარის ჯანდაცვის სამინისტროს ცნობით, ფატი მანელიშვილი ყოფილი მასწავლებელია. იგი 50 წლის განმავლობაში ასწავლიდა ქიმიასა და ბიოლოგიას.

ამჟამად აჭარაში 100 წლისა და 100 წელს გადაცილებული 36 მოქალაქე ცხოვრობს. ყველა მათგანი ქალია.

წელს აჭარაში 100 წელი 9 მოქალაქეს შეუსრულდა.

„100 წელს გადაცილებულ მოქალაქეთა ერთჯერადი მატერიალური დახმარების“ პროგრამას სამინისტრო 2004 წლიდან ახორციელებს.