სოციალურ ქსელ „ფეისბუქში“ გუშინ, 18 სექტემბერს, გავრცელდა ერთ-ერთი მშობლის პოსტი, სადაც ის წერს, რომ ქუთაისის ერთ-ერთი სკოლის პედაგოგმა მისი მეხუთეკლასელი შვილის მიმართ ვერბალური ბულინგი განახორციელა.
მშობელი წერს, რომ პედაგოგმა მისი ბიჭის მისამართით კლასს საჯაროდ დაუსვა კითხვა იმის გასარკვევად, ახალი მოსწავლე გოგო იყო თუ ბიჭი. და ეს მხოლოდ იმის გამო, რომ ბიჭი მოგრძო თმას ატარებს. მშობლის აზრით, პედაგოგის საქციელი შეურაცხყოფს მოზარდის ღირსებას და მოსწავლეებში დისკრიმინაციას და ბულინგს ახალისებს.
„მასწავლებელი, რომელიც ვერბალურ ბულინგს გააზრებულად ახორციელებს პირველივე დღეს ახალ მოსწავლესთან არის დამნაშავე!! მასწავლებელი, რომელიც თმის ვარცხნილობის გამო გენდერს ეჭვქვეშ აყენებს და ჯგუფს მიმართავს გასარკვევად ბიჭია თუ გოგო, არის დამნაშავე!!
არ ვიცნობ ამ მასწავლებელს პირადად, მაგრამ უკვე ვიცი, რომ მან შეძლო ჩემს შვილში ზიზღის გრძნობის გაღვიძება!!“ – წერს მშობელი.
„ბათუმელები“ ამ სკოლის დირექტორს დაუკავშირდა კომენტარისთვის. ის ამბობს, რომ სავარაუდო დისკრიმინაციის შესახებ ინფორმაცია თვითონაც „ფეისბუქიდან“ მიიღო.
„დავიძახეთ მასწავლებელი, ვკითხეთ რა მოხდა. მან სულ სხვა ინფორმაცია გვითხრა. მშობელი ჯერ არ მოსულა ჩვენამდე, როცა მშობელიც მოვა, შემდეგ ამ საკითხს სკოლის დისციპლინურ კომიტეტს გადავცემთ გამოსაკვლევად“.
„ბათუმელების“ კითხვაზე, რა ვერსიაზე საუბრობს პედაგოგი, დირექტორი ამბობს: „ლამაზი ბავშვი იყო და, უბრალოდ, ვკითხე, „შენ გოგონა ხარ?“ მასწავლებელმა უნდა გაარჩიოს, გოგონაა თუ ბიჭი. კითხვის დასმა არ უნდა იყოს საჭირო. ან სახელით, ან ქცევის, ან რამის მიხედვით, რის გამო ვერ გაარჩია, ვერ გეტყვით“, – გვეუბნება დირექტორი.
დირექტორის ინფორმაციით, პედაგოგმა ბიჭის მისამართით კითხვები სახელის ამოკითხვამდე დასვა. „მე ძალიან ვერ ჩავერევი ამ საქმეში, რადგან შეიძლება სხვაგვარად აღიქვან. როგორც ბავშვის ინტერესები უნდა დავიცვათ, ასევე უნდა დავიცვათ ნებისმიერის ინტერესები, ამიტომ ეს საქმე გადაეცემა დისციპლინურ კომიტეტს და შეისწავლიან“.
რა ზომებს გაატარებს სკოლა პედაგოგთან მიმართებაში, თუკი დადგინდება მოზარდის მიმართ დისკრიმინაცია პედაგოგის მხრიდან? – ამ კითხვას დირექტორი პირდაპირ არ პასუხობს. „ყველაფერი წერია კანონში, განათლებისა და სკოლის შესახებ შინაგანაწესში, თუ რა გადაცდომაზე რა დისციპლინური სახდელი იქნება და ამის მიხედვით მოხდება ყველაფერი“.
განათლების სამინისტროში კი „ბათუმელებს“ შემდეგი განუმარტეს: „იმ შემთხვევაში, თუ მშობლის მიერ გავრცელებული ინფორმაცია დადასტურდება, რომ მისი შვილის მიმართ სკოლის რომელიმე წარმომადგენლის მხრიდან ადგილი ჰქონდა ფიზიკურ, ფსიქოლოგიურ ან ნებისმიერი სახის ძალადობას, სამინისტროს მხრიდან რეაგირება უმკაცრესი იქნება“.
