აჭარის განათლებისა და კულტურის სამინისტრო საჯარო ლექციების დასაფინანსებლად კონკურსს აცხადებს.
განაცხადები მიიღება 19 ოქტომბრის ჩათვლით, იმ ღონისძიებების დასაფინანსებლად, რომლებიც მიმდინარე წლის პირველი დეკემბრიდან 19 დეკემბრის შუალედში უნდა ჩატარდეს.
სამინისტროს ინფორმაციით, დაფინანსდება საჯარო ლექციები, რომლებიც ჩატარდება სტუდენტების, ლექტორების, მასწავლებლებისა და საზოგადოების სხვადასხვა წარმომადგენლებისთვის.
„საჯარო ლექციის თემატიკა უნდა მოიცავდეს როგორც ზოგადი, ასევე პროფესიული და უმაღლესი განათლების ასპექტებს“.
პროგრამის მთლიანი ბიუჯეტი 4 ათასი ლარია. როგორც სამინისტროში „ბათუმელებს“ უთხრეს, იმ შემთხვევაში, თუკი მაღალბიუჯეტიანი პროექტები არ იქნება წარმოდგენილი, „შესაძლებელია დაფინანსდეს სამი პროექტიც. სხვა შემთხვევაში, დაფინანსდება ორი ან ერთი“.
