Batumelebi

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, დღეს და ხვალ, 26 თებერვლის  21 საათიდან 27 თებერვლის  21 საათამდე აჭარაში მოსალოდნელია უმეტესად ღრუბლიანი ამინდი, დროგამოშვებით – წვიმა, მთაში მოთოვს.

იქროლებს ცვალებადი მიმართულების ქარი 10-15 მეტრი წამში.

ამინდის ტემპერატურა სანაპირო რაიონებში იქნება:

• დღისით: 5 – 10 გრადუსი
• ღამით: 2 – 7 გრადუსი

სინოპტიკოსების ცნობით, მომდევნო ორ დღეს დროგამოშვებით იწვიმებს, მთაში კი თოვაა მოსალოდნელი.

______________________

არჩილ კახაძის ფოტო

შპს „ანანა“ აჭარის განათლების სამინისტროს შესყიდვების სააგენტოს დავების საბჭოში უჩივის. კომპანია, შესყიდვების კომისიას, სამინისტროს მიერ შედგენილი იმ ოქმის გაუქმებას სთხოვს, რომელიც კომპანიისთვის დისკვალიფიკაციის მინიჭებას ითვალისწინებს. შპს „ანანა“ მონაწილეობს სამინისტროს მიერ გამოცხადებულ ტენდერში, რომელიც #23 [ მახვილაურის დასახლება] სკოლის მშენებლობას ითვალისწინებს.

მახვილაურის სკოლა ე.წ. ავტობანის მშენებლობის გამო ბუფერულ ზონაში მოხვდა, რის გამოც მისი დემონტაჟი იგეგმება. ახალი სკოლის არქიტექტურული პროექტი ბათუმის მერის ქალაქმშენებლობისა და ურბანული პოლიტიკის სამსახურში უკვე განიხილეს, გაცემულია მშენებლობის ნებართვაც.

#23-ე სკოლის მშენებლობის სამუშაოების შესყიდვაზე აჭარის განათლების სამინისტრომ ე.წ. NAT ტენდერი გამოაცხადა, რაც გულისხმობს შესყიდვას აუქციონის გარეშე, პრეტენდენტებს შორის ვაჭრობა არ მიმდინარეობს, ისინი მხოლოდ თავიანთ ფასს სთავაზობენ შემსყიდველს, რის შემდეგაც გამარჯვებული გამოვლინდება ყველაზე დაბალი ფასის მიხედვით.

ამ შემთხვევაში ტენდერში ორი კომპანია – შპს „ანანა“ და შპს „ვექტორი“ მონაწილეობდა. პრეტენდენტებმა სამუშაოს შესრულება შესმყიდველს 800 000 ლარით ნაკლებად შესთავაზეს [შპს ვექტორმა 3 098080, ხოლო შპს „ანანამ“ 3089777 ლარი დააფიქსირა ].

შეთავაზებული ფასების მიხედვით, გამარჯვება შპს „ანანას“ უნდა დარჩენოდა, თუმცა განათლების სამინისტრომ კომპანიას დისკვალიფიკაცია მისცა. ოქმის მიხედვით, კომპანიამ შესყიდვების კომისიას ზუსტი ხარჯთაღრიცხვა არ წარუდგინა:

შპს „ანანა“ შესყიდვების სააგენტოსთვის გაგზავნლი თავის საჩივარში ხარვეზს მექანიკურ შეცდომად აფასებს და განმარტავს, რომ ისეთი შეცდომის შემთხვევაში, როგორიცაა არასწორი ჯამის ან ნამრავლის მითითება, სიტყვიერი და ციფრობრივი გამოსახულების შეუსაბამობა, შესაძლებელია შესწორდეს დაზუსტების გარეშე, ერთეულის ფასის უპირატესობის პრინციპის გათვალისწინებით, მხოლოდ იმ პირობით თუ ეს არ აღემატება დაფიქსირებულ საბოლოო ფასს.

გარდა ამისა, შპს „ანანა“ საჩივარში განმარტავს, რომ სახელმწიფო შესყიდვების სააგენტოს თავმჯდომარის 2017 წლის 14 ივნისის №12 ბრძანების მიხედვით, სატენდერო კომისია არ ახდენს პრეტენდენტის დისკვალიფიკაციას, თუ მისი ტექნიკური დოკუმენტაცია არ შეიცავს ისეთ უზუსტობას, რომლის დაზუსტებაც არ გამოიწვევს ტექნიკური დოკუმენტაციის არსებით ცვლილებას ან არ გაზრდის წინადადების ფასს.

კომპანიის საჩივარი ამ დროისთვის განხილვის ეტაპზეა. იმ შემთხვევაში, თუ შესყიდვების სააგენტო კომპანიას გაამართლებს, ეს არ გამორიცხავს, რომ საჩივრით სააგენტოს დავების საბჭოს მეორე პრეტენდენტმაც მიმართოს, რაც მშენებელი კომპანიის შერჩევის პროცესს კიდევ გააჭიანურებს. შესაბამისად, გაჭიანურდება სკოლის მშენებლობის დაწყებაც.

კერძო კომპანია შესყიდვების სააგენტოსგან ითხოვს დაავალოს აჭარის კულტურული მემკვიდრეობის დაცვის სააგენტოს „შეიტანოს ცვლილება და სატენდერო დოკუმენტაცია ჩამოაყალიბოს სახელმწიფო შესყიდვების კანონმდებლობის პრინციპების შესაბამისად“. კომპანია აცხადებს, რომ სააგენტოს სატენდერო კომისიის მოთხოვნა, პრეტენდენტის გამოცდილების შესახებ, არის არაპროპორციული, კონკურენციის შემზღუდავი და დისკრიმინაციული.

დავის საგანია პეტრას ციხის ინფრასტრუქტურით მოწყობის სამუშაოებზე გამოცხადებული ტენდერი, სადაც სატენდერო თანხა 1,75 მილიონი ლარია.

ამ თემაზე: რა იგეგმება პეტრას ციხეზე – ინფრასტრუქტურის მოსაწყობად 1,7 მილიონი ლარი დაიხარჯება

სატენდერო დოკუმენტაციით, სხვა მოთხოვნებთან ერთად, პრეტენდენტს 2014 წლის 1 იანვრიდან 2019 წლის 1 იანვრამდე პერიოდში უნდა გააჩნდეს დღგ-ის ჩათვლით არანაკლებ 5 მილიონი ლარის ჯამური ღირებულების სამშენებლო/სარეკონსტრუქციო/სარეაბილიტაციო სამუშაოების შესრულების გამოცდილება; ამასთანავე, დადგენილია რომ პრენენდენტს უნდა ჰყავდეს 5-წლიანი გამოცდილების მქონე რესტავრატორი.

შპს „ალგი აუდიტი“, რომელიც სააგენტოს ედავება, თავის საჩივარში მიუთითებს: „სატენდერო დოკუმენტაციით ასევე  განსაზღვრულია, რომ 2014 წლის 1 იანვრიდან 2019 წლის 1 იანვრამდე პერიოდში პრეტენდენტს უნდა გააჩნდეს დღგ-ის ჩათვლით არანაკლებ 1 მილიონი ლარის ჯამური ღირებულების კულტურული მემკვიდრეობის ძეგლების სამშენებლო/სარეკონსტრუქციო/სარეაბილიტაციო სამუშაოების შესრულების გამოცდილება. აღნიშნული მოთხოვნა ეწინააღმდეგება კონკურენციის და პროპორციული მოთხოვნების განსაზღვრის პრინციპებს. იმის გათვალისწინებით, რომ შემსყიდველს სხვა მოთხოვნები შემუშავებული აქვს პრეტენდენტის ამჟამინდელი მდგომარეობის შესაფასებლად და სავალდებულოდ ითხოვს კონკრეტული პერსონალის არსებობას რათა უზრუნველყოფილი იქნას სამუშაოების შესრულება, გაუგებარია რა მიზანს ემსახურება 2014 წლიდან კონკრეტულად კულტურული მემკვიდრეობის ძეგლების სამშენებლო/სარეკონსტრუქციო/სარეაბილიტაციო სამუშაოების შესრულების გამოცდილების მოთხოვნა“.

„მიგვაჩნია რომ აღნიშნული მოთხოვნა ზღუდავს კონკურენციას რადგან 2014 წლიდან დღემდე შესაბამისი სტატუსის მქონე ობიექტზე ერთი მილიონი ლარის ღირებულების შესყიდვა ტენდერების მეშვეობით არც კი განხორციელებულა, რასაც მარტივად დაადგენდა შემსყიდველი მას რომ განეხორციელებინა ბაზრის კვლევა“ – აღნიშნულია „ალგი აუდიტის“ საჩივარში.

კომპანია თვლის, რომ „იმ შემთხვევაში, თუ პრეტენდენტი დღეისათვის აკმაყოფილებს ხუთმილიონიანი გამოცდილების მოთხოვნას და მას ჰყავს სატენდერო დოკუმენტაციით გათვალისწინებული გამოცდილების მქონე პერსონალი, მაშინ არავითარი მნიშვნელობა არ აქვს კულტურული მემკვიდრეობის ძეგლების სამშენებლო/სარეკონსტრუქციო/სარეაბილიტაციო სამუშაოები მის მიერ განხორციელდა ბოლო ხუთი წლის განმავლობაში, თუ ბოლო 15 წლის განმავლობაში. შესაბამისად [აღნიშნული] მოთხოვნა არის არაპროპორციული, კონკურენციის შემზღუდავი და დისკრიმინაციული“.

დავების საბჭოს ვებგვერდზე საჩივრის მიმდინარე სტატუსის ქვეშ მითითებულია, რომ „განხილვის პროცესშია“. შესყიდვების სააგენტოს ვებგვერდზე კი, სააგენტოს მიერ გამოცხადებულ ტენდერს მინიჭებული აქვს შესყიდვის სტატუსი – „წინადადებების მიღება დაწყებულია“. ანუ დავაც და ტენდერიც ამ ეტაპზე პარალელურად მიმდინარეობს.

კომპანიამ დავების საჭოს მიმდინარე წლის 17 თებერვალს მიმართა. ტენდერში წინადადებების მიღება კი დღეს, 24 თებერვალს დაიწყო და პირველ მარტს დამთავრდება.

ბათუმში მდებარე მრავალსართულიან/მრავალბინიან საცხოვრებელ სახლებზე ბათუმის მერია დაზიანებულ აზბესტისა და ლითონის ფურცლებს ლითონის ახალი პროფილური ფურცლებით შეცვლის.

18 სახლზე ლითონის ფურცლების ასაკრავად და ორი კორპუსის სადარბაზოს შესასვლელების გადახურვის მოსაწყობად ქალაქის ბიუჯეტში 300 ათას 394 ლარია გათვალისწინებული.

ტენდერი საქალაქო ინფრასტრუქტურისა და კეთილმოწყობის სამმართველომ უკვე გამოაცხადა.

აზბესტისა თუ ლითონის ფურცლები ამ ტენდერის ფარგლებში ბათუმში, შემდეგ მისამართებზე მდებარე სახლებზე შეიცვლება:

პრეტენდენტების წინადადებების მიღება 2019 წლის 10 მარტს დაიწყება და 15 მარტს შეწყდება. სამუშაოები ხელშეკრულების გაფორმებიდან 90 დღეში უნდა შესრულდეს.

პირობის თანახმად, საგარანტიო ვადა შეადგენს 24 თვეს სამუშაოების დასრულებიდან. საგარანტიო პერიოდის განმავლობაში ხარვეზის გამოვლენის შემთხვევაში კი მიმწოდებელი ვალდებულია შემსყიდველის მიერ დადგენილ ვადაში მოახდინოს გამოვლენილი ხარვეზის აღმოფხვრა ისე, რომ შესრულებული სამუშაოები სრულ შესაბამისობაში იყოს ხელშეკრულებით გათვალისწინებულ პირობებთან.

ცალკე ტენდერია გამოცხადებული ბათუმში, ნონეშვილის N58-სა და ნონეშვილის N60-ში მდებარე მრავალსართულიანი საცხოვრებელი სახლების ფასადების მოსაწყობად. ამ ორი 9-სართულიანი კორპუსის სარეაბილიტაციოდ სატენდერო თანხა 604 ათას 160 ლარია. ტენდერში წინადადებების მიღება კი 6 მარტს დაიწყება და 11 მარტს დასრულდება.

გასულ წელს ბათუმის მერიამ რუსთაველისა და თამარ მეფის ქუჩებზე რამდენიმე კორპუსის ფასადის  შესაცვლელად ესკიზებისთვის 14 300 ლარი გამოყო. საცხოვრებელი ბინების ექსტერიერის საუკეთესო ესკიზის გამოსავლენად მერიის საქალაქო ინფრასტრუქტურისა და კეთილმოწყობის სამმართველომ კონკურსებიც კი გამოაცხადა, თუმცა არც ერთი არ შედგა.

ამ კონკურსებში მონაწილეობა არავინ მიიღო. ხელახალი კონკურსები კი კეთილმოწყობის სამმართველოს ამ დრომდე არ გამოუცხადებია.

„მეტრო ჰოლდინგმა“ 21 თებერვალს გაავრცელა განცხადება, რომ კაზინო „ინტურისტის“ [„ლიბერთი კაზინოს“] ყოფილ თანამშრომლებს სახელფასო დავალიანებას 22 თებერვალს სრულად აუნაზღაურებდა. დღეს, 23 თებერვალს, „ბათუმელებს“ კაზინოს ერთ-ერთი ყოფილი თანამშრომელი დაუკავშირდა, რომელმაც განაცხადა, რომ „მეტროს“ მათთვის კუთვნილი ხელფასები სრულად არ აუნაზღაურებია.

„ვინც მივედით გუშინ, ყველას დაგვირიგეს 1000-1000 ლარი, მიუხედავად იმისა, 500 ლარი გვქონდა ასაღები ყოფილ თანამშრომლებს თუ – 2500. ჩემი ერთი ყოფილი თანამშრომელი ვერ ჩამოვიდა ბათუმში, გამიკეთა ოფიციალური მინდობილობა, თუმცა მისი თანხა არ მომცეს და ის ამ 1000 ლარის გარეშეც დარჩა. თან ამას „მეტრომ“ კუთვნილი ხელფასის ანაზღაურება კი არა, რაღაც „საჩუქარი“ თუ „ჯილდო“ დაარქვა. მე, პირადად, 3 ათასამდე ლარი მაქვს მისაღები კაზინოდან“, – გვითხრა კაზინოს ყოფილმა თანამშრომელმა.

„ბათუმელები“ დაუკავშირდა კომპანია „მეტრო ჰოლდინგს“, სადაც განაცხადეს, რომ მათ მიერ კაზინოს ყოფილ თანამშრომლებზე 22 თებერვალს გაცემული თანხა [ჩვენი ინფორმაციით, დაახლოებით 280 ათასი ლარი] არ იყო ამ ადამიანების კუთვნილი ხელფასების დაფარვა.

„ეს ჰოლდინგის დამფუძნებლის და თავმჯდომარის გალიფ ოზთურქის კეთილი ნება, ასე ვთქვათ, საჩუქარია, ვინაიდან ამ ადამიანებმა ვერ აიღეს კუთვნილი ხელფასი და ეს პროცესი დროში გაიწელა. კიდევ ერთხელ განვმარტავთ, რომ ჩვენს კომპანიას სასტუმრო „ინტურისტში“ კაზინოსთვის იჯარით ჰქონდა გაცემული მხოლოდ ფართობი კომპანია „ლიბერთი კაზინოზე“. კაზინოს ყოფილი თანამშრომლებისადმი სახელფასო დავალიანება უნდა დაფაროს კომპანია „ლიბერთი კაზინომ“. „მეტროს“ ამ მხრივ არანაირი ვალდებულება არ აქვს“, – გვითხრეს კომპანია „მეტროში“.

რაც შეეხება „მეტრო ჰოლდინგის“ მიერ ადრე გავრცელებულ განცხადებას, კომპანიაში დღეს გვითხრეს, რომ „ალბათ იყო ტექნიკური გაუმართაობა, ვინაიდან არ გვიგულისხმია, რომ „მეტრო“ კაზინოს სახელფასო დავალიანებას დაფარავდა. „სრულად დაიფარება“-ში ვგულისხმობდით იმას, რომ სრულად გაიცემოდა ის თანხა, რაც „მეტროს“ ჰქონდა ამ ადამიანებისთვის გამოყოფილი. ეს თანხა კი მართლაც გაიცა სრულად და თანაბარწილად იმ ადამიანებზე, ვინც გამოცხადდა“.

ამ თემაზე: კაზინო „ინტურისტის“ ყოფილ თანამშრომლებს დავალიანებას „მეტრო“ აუნაზღაურებს

ბათუმში კაზინო „ლიბერთი ინტურისტი“ 2019 წლის 5 იანვრიდან აღარ მუშაობს. შესაბამისად, უმუშევარი დარჩა იქ დასაქმებული 280-მდე ადამიანი. როგორც თავის დროზე „ბათუმელებს“ უთხრეს, მიზეზი ლიცენზიის ვადის გასვლა იყო, რომელსაც სს „ლიბერთი“ ფლობდა და ამუშავებდა კიდეც კაზინოს.

ბათუმში კაზინო „ინტურისტის“ თანამშრომლები თვე-ნახევრის სახელფასო დავალიანების გასტუმრებას ითხოვენ. მათ რამდენჯერმე აქციაც კი გამართეს.

თემაზე ვრცლად იხილეთ ამ ბმულზე.

მთავარი ფოტო: „ინტურისტი“, ფოტო „ბათუმელების“ არქივიდან

„პატრიოტთა ალიანსის“ რეზოლუციას „სააკაშვილი-ბოკერიას დანაშაულებრივ რეჟიმად გამოცხადების შესახებ“ მხარი დაუჭირეს „ქართული ოცნების“ დეპუტატებმაც. თუმცა, საბოლოოდ, რეზოლუციამ საჭირო ხმების რაოდენობა ვერ მოაგროვა. 45 მომხრე, 16 – წინააღმდეგი. ეს შედეგი დაფიქსირდა 21 თებერვალს, რეზოლუციის პროექტის კენჭისყრის დროს.

რეზოლუციის ავტორებს მიაჩნიათ, რომ ნაცმოძრაობის მმართველობის პერიოდი უნდა შეფასდეს როგორც „სააკაშვილი-ბოკერიას ძალადობრივი რეჟიმი“.

რეზოლუციას პარლამენტის აჭარის დეპუტაციის ერთმა ნაწილმაც დაუჭირა მხარი. სამივე მათგანი მმართველი პარტიის – „ქართული ოცნების“ მაჟორიტარები არიან. მათ ვკითხეთ, რას ელიან „ნაციონალური მოძრაობის“ მმართველობის პერიოდის რეჟიმად გამოცხადების შემთხვევაში და ამ რეზოლუციის მიღების შემდეგ ხომ არ მოითხოვდნენ დეპუტატები ოპოზიციური პოლიტიკური პარტიის აკრძალვას.

„საერთოდ, რეზოლუცია გულისხმობს იმას, რომ პარტია უნდა აიკრძალოს. „ნაციონალური მოძრაობა“ იყო დანაშაულებრივი რეჟიმის ავანგარდში,“ – მიიჩნევს ქობულეთის მაჟორიტარი დეპუტატი პარლამენტში, პროფესიით ექიმი კობა ნაკაიძე. ასეთია დეპუტატის დამოკიდებულება იმის მიუხედავად, რომ ამ რეზოლუციის ავტორი არ არის „ქართული ოცნება“, რომელსაც თავად წარმოადგენს, ხოლო „პატრიოტთა ალიანსის“ რეზოლუციის პროექტი პარტიის საქმიანობის აკრძალვას არ ითვალისწინებდა.

კობა ნაკაიძე მიიჩნევს, რომ საკამათო იქნებოდა, დემოკრატიულია თუ არა ეს პროცესი, მაგრამ „ყველაფერს სახელი უნდა დაერქვას,“ – ამბობს ის.

„პატრიოტთა ალიანსის“ მიერ მომზადებული რეზოლუციის პროექტი რეჟიმის შეფასების გარდა, კონკრეტული მოთხოვნის შესრულებასაც ითვალისწინებდა.

„6 თვის განმავლობაში პასუხისმგებლობა დაეკისროს სააკაშვილი-ბოკერიას დანაშაულებრივი რეჟიმის ყველა მთავარ ფიგურანტს, სათანადოდ დაისაჯონ ყველა რეზონანსული საქმის დამნაშავე პირები“, – აღნიშნულია რეზოლუციის კანონპროექტში.

ვინ არიან „ფიგურანტი პირები“? რატომ სჭირდება დამნაშავის დაკავებას პარლამენტში რეზოლუციის მიღება? რატომ უნდა დაუწესოს პარლამენტმა კონკრეტული ვადა პროკურატურას პოლიტიკური ოპონენტების პასუხისგებაში მისაცემად? – ამ კითხვებზე დეპუტატებს მკაფიო პასუხი არ აქვთ.

კობა ნაკაიძე, ქობულეთის მაჟორიტარი დეპუტატი პარლამენტში: „კონკრეტულ პირებზეა საუბარი, ვინც სისტემურ დანაშაულს სჩადიოდა. ეს ალბათ გადავა სამართლებრივ სივრცეში და იქ განიხილება. ეს იყო „პატრიოტთა ალიანსის“ ინიციატივა და მათ უნდა ჰკითხოთ, რატომ არის საჭირო რეზოლუციის მიღება, თუკი ვინმემ დანაშაული ჩაიდინა და დასაჭერია. მე ამ რეზოლუციის შინაარსს დავუჭირე მხარი, რადგან მას ვეთანხმები.“

ფატი ხალვაში, ბათუმის მაჟორიტარი დეპუტატი პარლამენტში: „ვისაც დაუდასტურდება დანაშაულებრივი ქმედება, უნდა დაისაჯონ, აბა როგორ? უგულავა იხდიდა სასჯელს, ვანო მერაბიშვილი იხდის. კიდევ ბევრი ადამიანია, სხვადასხვა დანაშაულის მონაწილე… მაგალითად, სააკაშვილი, ადეიშვილი, კეზერაშვილი, რომელიც შავი ფულის შემგროვებლად იყო მოაზრებული. თუკი დაუდასტურდებათ დანაშაული, რაზეც ხალხი საუბრობს, უნდა ვაპატიოთ, პასუხი არ უნდა აგონ?“

განსხვავებულად ფიქრობს ნუკრი ბეჟანიძე,  ბათუმის კიდევ მაჟორიტარი დეპუტატი პარლამენტში. „მე მხარი დავუჭირე იმას, რომ გავაანალიზოთ ის წლები. ის პერიოდი აღარ უნდა განმეორდეს. მე არ ვემხრობი ვინმეს სამართლებრივ პასუხისმგებლობას, ან იმას, რომ პარტია უნდა აიკრძალოს,“ – ამბობს ის.

რას ცვლის „სააკაშვილი-ბოკერიას დანაშაულებრივ რეჟიმად“ გამოცხადება?

დეპუტატმა კობა ნაკაიძემ კითხვითვე გვიპასუხა: „მათ შექმნეს დანაშაულებრივი სისტემა. არ იყო მხოლოდ ის, რომ ვერ მართავდა. როგორ ფიქრობთ, ფაშისტური რეჟიმის აკრძალვა თავის დროზე გერმანიაში არ იყო დემოკრატიული პროცესი?“

ფატი ხალვაში კი მიიჩნევს, რომ ამგვარი შეფასების შემთხვევაში, „ნაციონალური მოძრაობა“ პოლიტიკური ველიდან გაქრებოდა.

„თუკი გამოიკვეთებოდა, რომ ეს ადამიანები დამნაშავეები არიან, როგორ შეიძლება ისინი იყვნენ პარლამენტში, ან სადმე საპასუხისმგებლო თანამდებობაზე? მაგრამ რეზოლუცია ვერ მივიღეთ. არ ვიცი, არ მივიღეთ, თუ ვერ მივიღეთ,“ – დასძინა ფატი ხალვაშმა.

რეზოლუციის სახელწოდებაში მოხსენიებული გიგა ბოკერია ამჟამად საქართველოს პარლამენტის წევრია. ხელისუფლების შეცვლის შემდეგ, ექსპრეზიდენტ მიხეილ სააკაშვილისგან განსხვავებით, გიგა ბოკერიას მიმართ სისხლის სამართლებრივი დევნა საქართველოს პროკურატურას არ უწარმოებია.

ბათუმის ბოტანიკურ ბაღში ვიდეოკემერები განთავსდება, ზოგიერთ ადგილებში კი ვიზიტორებს შესაძლებლობა ექნებათ ისარგებლონ უსადენო ინტერნეტით. შესაბამისი მომსახურების შესასყიდად ბაღის ადმინისტრაციას 150 ათასი ლარი აქვს გათვალისწინებული. ტენდერი უკვე გამოცხადებულია.

ტენდერში მონაწილე პრეტენდენტმა უნდა უზრუნველყოს „ბათუმის ბოტანიკური ბაღისათვის“ ვიდეო სამეთვალყურეო ქსელის მოსაწყობად შესაბამისი საქონლის მიწოდება თანმდევი მომსახურებით [მონტაჟით/ინსტალაცით].

ბაღის ადმინისტრაციაში „ბათუმელებს“ უთხრეს, რომ გარკვეულ ადგილებში ვიდეოკამერები დამონტაჟებულია, ამ პროექტით კი ბოტანიკური ბაღის მთლიანი ტერიტორიის ვიდეოკონტროლი იქნება შესაძლებელი.

ტენდერში წინადადებების მიღება 2019 წლის პირველ მარტს დაიწყება და 4 მარტს დასრულდება. მომსახურების გაწევა კი გამარჯვებულმა, ხელშეკრულების გაფორმებიდან, 45 სამუშაო დღეში უნდა უზრუნველყოს.

ბოტანიკური ბაღის სატენდერო კომისია ითხოვდა ტენდერში მონაწილეს შესაბამისი გამოცდილება ჰქონოდა 2019 წლის იანვრამდე პერიოდში. ამასთან დაკავშირებით შესყიდვების გვერდზე კომისიას რამდენიმე კითხვა დაუსვეს:

[checklist]

• „რა საჭიროებების/ინტერესების დაკმაყოფილებას ემსახურება გამოცდილების პერიოდის შეზღუდვა 2019 წლის იანვრამდე და რატომ იზღუდება იმ პრეტენდენტის მონაწილეობა ტენდერში რომელსაც აქვს უახლესი გამოცდილება 2019 წლის იანვარში ან თებერვალში?
• თქვენი აზრით არაპროპორციულად და უმიზეზოდ იზღუდება თუ არა კონკურენცია იმ პირობებში, როდესაც უახლესი ყველაზე თანამედროვე გამოცდილების მქონე კომპანიას რომელსაც ამ გამოცდილების დიდი ნაწილი დაგროვილი აქვს 2019 წლის იანვარში არ ეძლევა შესაძლებლობა მონაწილეობა მიიღოს ტენდერში და კონკურენცია გაუწიოს სხვა პრეტენდენტებს?
• თქვენი აზრით იწვევს თუ არა სახელმწიფო ფულადი სახსრების არარაციონალურ ხარჯვას კონკრეტული ტენდერის ფარგლებში გაკეთებული ჩანაწერებით კონკურენციის უმიზეზოდ შემცირება?“

[/checklist]

შეკითხვების ავტორი იქვე განმარტავს, რომ მისთვის „გასაგებია, რომ 2015 წლამდე დაგროვილი გამოცდილება შესაძლოა იყოს მოძველებული და გჭირდებათ უფრო ახალი გამოცდილება, თუმცა ზედა ზღვართან დაკავშირებით, ვფიქრობთ, ზემოთ მოყვანილი კითხვების გაანალიზების შედეგად უნდა შეცვალოთ ფორმულირება და „2019 წლის იანვრამდე“-ს ნაცვლად უნდა მიუთითოთ „ტენდერის გამოცხადებამდე“. საკითხის სიმარტივიდან გამომდინარე იმედს ვიტოვებთ აღნიშნულთან დაკავშირებით საჭირო არ გახდება პირობების გასაჩივრება და ამით არ შეფერხდება ტენდერის ჩატარების პროცედურები“.

შესყიდვების გვერდზე ატვირთულია ბათუმის ბოტანიკური ბაღის პასუხიც: „სატენდერო კომისიამ იმსჯელა თქვენს მიერ დასმულ შეკითხვაზე და გადაწყვიტა: ამ კონკრეტული შემთხვევის მიმართ ტენდერის ჩანაწერი დაკორექტირდეს და განისაზღვროს შემდეგი ჩანაწერით: „ტენდერში მონაწილე პრეტენდენტს უკანასკნელი წლების განმავლობაში [2015 წლიდან, 2016, 2017, 2018, 2019 წლის 19 თებერვლამდე] შესრულებული უნდა ჰქონდეს ტენდერით გათვალისწინებული მსგავსი ხასიათის, სირთულისა და შინაარსის მომსახურებები…“

რაც შეეხება დისკრიმინაციულ მიდგომას, ბოტანიკური ბაღი აცხადებს, რომ „სატენდერო დოკუმენტაციის ჩანაწერი არ მიუთითებს დისკრიმინაციულ ან არაპროპორციულ მიდგომას, მაშინ როდესაც ძირითადად სახელმწიფო შესყიდვები მიმდინარეობს ერთი საანგარიშგებო წლის პერიოდში, შესაბამისად მცირეა იმის შესაძლებლობა, რომ ტენდერის გამოცხადებამდე რომელიმე პრეტენდენტს ჰქონოდა მისთვის აუცილებელი გამოცდილება [მსგავსი ხასიათის, სირთულისა და შინაარსის მომსახურებები], რომელიც დაუჯამდებოდა უკანასკნელი 4 წლის პერიოდში არსებულ გამოცდილებასთან ერთად, მაშინ, როდესაც მითითებული პერიოდი სავსებით საკმარისი უნდა იყოს არანაკლებ 300000 ლარის გამოცდილებისათის [გასათვალისწინებელია, რომ სატენდერო კომისია უფლებამოსილია თავის მსჯელობის საფუძველზე ჩამოაყალიბოს სატენდერო პირობები, სახელმწიფო შესყიდვების კანონის სრული დაცვით]“.

„მართვის მოწმობის C, D და E კატეგორიების შეცვლის მსურველთა დიდი რაოდენობის გამო, სააგენტოს ყველა სერვისცენტრი დამატებით იმუშავებს კვირას, 24 თებერვალს, 09:30 საათიდან 18:00 საათამდე,“ – ეს ინფორმაცია შინაგან საქმეთა სამინისტროს მომსახურების სააგენტომ დღეს, 22 თებერვალს გაავრცელა. მომსახურების სააგენტო მუშაობის სპეციალურ რეჟიმზე 8 თებერვლიდან გადავიდა.

8 თებერვლიდან პირველი მარტის ჩათვლით მომსახურების სააგენტო ყოველდღე მუშაობს დილის ათის ნახევრიდან საღამოს რვამდე. ამ რეჟიმით აღმოსავლეთის რეგიონალური ფილიალის, რუსთავის ცენტრალური ფილიალისა და დასავლეთის რეგიონალური ფილიალის მომსახურების ცენტრის მართვის მოწმობების განყოფილების თანამშრომლები მუშაობენ.

რა ანაზღაურებას უხდის შინაგან საქმეთა სამინისტრო საკუთარ თანამშრომლებს ზეგანაკვეთური შრომისთვის? – ამ კითხვით „ბათუმელებმა“ შინაგან საქმეთა სამინისტროს მიმართა. უწყებიდან მიღებულ წერილში აღნიშნულია:

„რაც შეეხება ზემოთ მითითებული თანამშრომლების მიერ სპეციალური რეჟიმის გამო ზეგანაკვეთური შრომისთვის ანაზღაურების საკითხს, აღნიშნულზე გადაწყვეტილება იქნება
მიღებული მითითებული პერიოდის დასრულების შემდგომ საქართველოს მოქმედი კანონმდებლობის შესაბამისად,“ – წერია შსს-დან მიღებულ წერილში.

ბათუმში მაღლივ საცხოვრებელ სახლებში, მეთხუთმეტე სართულიდან მეოცე და შემდეგ სართულებზე ხანძრის გაჩენის შემთხვევაში, მეხანძრეებს შემთხვევის ადგილზე მოსახვედრად ამ სახლის შიდა კიბეზე მოუწევთ ასვლა – სახლის ფასადის მხრიდან ამ სართულებს ვერ მისწვდება სახანძრო კიბე, რომლითაც ბათუმის სახანძრო-სამაშველო ჯგუფი სარგებლობს. ხანძრის დროს ლიფტით სარგებლობა დაუშვებელია, ბოლო ათი წლის განმავლობაში აშენებული სახლების უმეტესობას კი ბათუმში არც საევაკუაციო კიბე აქვს.

ბათუმში სახანძრო სამსახურს ამ დროისთვის მხოლოდ 30 მეტრი სიგრძის კიბე აქვს, რაც მეთხუთმეტე სართულის ზემოთ ვერ წვდება. გარდა ამისა, განსაკუთრებით ახალი კორპუსები ისეა აშენებული, რომ სახანძრო მანქანებისთვის ზოგჯერ ამ სახლებთან მისაახლოებლად ქუჩის გადაკეტვა ან პარკინგის ადგილის მანქანებისგან დაცლა ხდება საჭირო.

მაღლივი სახლების უმეტესობას ბათუმში ასევე არა აქვს ხანძარსაწინააღმდეგო სისტემები დამონტაჟებული, რის გამოც რთულია ხანძრის კერის აღმოჩენაც კი. სახნძრო უსაფრთხოების სამსახური კი ამ დროისთვის კეძო სახლების სახანძრო უსაფრთხოების მიმართულებით შემოწმებას არ ახორციელებს.

სამაშველო სახანძრო სამსახურის ინფორმაციით, უახლოეს მომავალში ბათუმის სახანძრო ჯგუფს 64-მეტრიანი კიბე ექნება. მის შესაძენად ბიუჯეტიდან 3 მილიონ 500 000 ლარი დაიხარჯა.

შინაგან საქმეთა სამინისტროს საგანგებო სიტუაციების მართვის სამსახურმა, საქართველოს მასშტაბით, სახანძრო უსაფრთხოების კუთხით კანონით განსაზღვრული შენობა-ნაგებობების შემოწმება 14 თებერვალს დაიწყო.

„ადმინისტრაციულ სამართალდარღვევათა კოდექსში“ შეტანილი ცვლილებების შემდეგ, სახანძრო უსაფრთხოების შემოწმებას დაექვემდებარა თითქმის ყველა შენობა-ნაგებობა და მნიშვნელოვნად გაიზარდა სანქციები. სახანძრო უსაფრთხოების წესებისა და პირობების შესახებ ტექნიკური რეგლამენტის მოთხოვნის დარღვევა ან შეუსრულებლობა 500-დან 10 000-მდე ლარის ჯარიმას ითვალისწინებს.

საგანგებო სიტუაციების მართვის სამსახურის სპეციალისტები ობიექტებს სამ ეტაპად შეამოწმებენ. პირველ ეტაპზე, შენობა-ნაგებობის შემოწმებისას, გაიცემა რეკომენდაციები და ყველა მფლობელს მიეცემა გონივრული ვადა მათ შესასრულებლად. განმეორებითი შემოწმებისას სამსახური რეკომენდაციების შესრულების მონიტორინგს განახორციელებს. ხოლო მესამე, საკონტროლო შემოწმებისას, რეკომენდაციების შეუსრულებლობის შემთხვევაში, დამრღვევი დაჯარიმდება.

სამსახური უფლებამოსილია, კრიტიკულად შეუსაბამო პირობების შემთხვევაში, სასამართლოს მიმართოს და მოითხოვოს შენობა-ნაგებობის ექსპლუატაციის შეჩერება.

მთავარი ფოტო: მანანა ქველიაშვილი

20 თებერვალს ხელვაჩაურში, სოფელ მარადიდში, გზის დატბორვას „კირნათი ჰესის“ მფლობელი კომპანია „აჭარ ენერჯი 2007“ მხოლოდ ორი დღის შემდეგ გამოეხმაურა. რა გახდა დატბორვის მიზეზი, როგორია კომუნიკაცია თურქეთში არსებულ და „კირნათი ჰესს“ შორის, თუ აანაზღაურებს კომპანია ზარალს? – „ბათუმელებს“ ამ და სხვა კითხვებზე სურდა კომპანიისგან პასუხის მიღება, თუმცა „აჭარ ენერჯი 2007“-მა მხოლოდ წერილობით გამოგზავნა მედიასთან პასუხი.

წერილში აღნიშნულია, რომ კირნათი ჰესის პროექტის განვითარების ფარგლებში, კომპანიას შესყიდული აქვს კერძო საკუთრებაში არსებული მიწის ნაკვეთთა 90 პროცენტი, თუმცა ვერ ასრულებს სოფელ მარადიდში შესასრულებელ სამშენებლო სამუშაოებს: გზები, ნაპირსამაგრი და ხიდების გამაგრება, სასაფლაოს გადატანა და ასე შემდეგ „ცალკეული არაკეთილსინდისიერი განზრახვის მქონე პიროვნებების უკანონო აქციებისა და წინააღმდეგობის გამო. შესაბამისად, კირნათი ჰესის ფუნქციონირება ხორციელდება მინიმალური წყლის ნიშნულით,“ – ვკითხულობთ წერილში.

კომპანიის მიერ მოწოდებულ წერილში დატბორვის მიზეზებზეც არის საუბარი, სადაც, კიდევ  ერთხელ, „არაკეთილსინდისიერი განზრახვის მქონე პირებია“ ნახსენები.

„წლის 20 თებერვალს კირნათი ჰესის დატბორვის ტერიტორიაზე წყლის დონის მატების შემთხვევის მიზეზს წარმოადგენდა მოულოდნელი წყლის შემოდინება. შემთხვევის კონტროლის ქვეშ აყვანა მოხდა უმოკლესი დროის პერიოდში. ზეგავლენის ქვეშ მოექცა მხოლოდ სოფელში არსებული გზის მოკლე მონაკვეთი. ასევე აღვნიშნავთ, რომ კომპანიამ გასული კვირის განმავლობაში 2-ჯერ ადგილობრივი ხელისუფლების დახმარებითა და ინფორმირებით სოფელ მარადიდში სცადა სამუშაოების წარმოება, მაგრამ ისევ არაკეთილსინდისიერი განზრახვის მქონე პირების მიერ ხელშეშლას და დაბრკოლებას ჰქონდა ადგილი“ – აღნიშნულია კომპანიის მიერ მოწოდებულ წერილში.

აქვე ვკითხულობთ, რომ გზების, ნაპირსამაგრი და ხიდების გამაგრების სამუშაოების, ასევე, სასაფლაოს გადატანის ნების დართვის შემთხვევაში „კომპანია სამუშაოებს განახორციელებს სწრაფად და ხარისხიანად, რაც ხელს შეუწყობს მსგავსი პრობლემების პრევენციასა და აღმოფხვრას“.

მარადიდის დატბორვის მიზეზად ხელვაჩაურის მერიაში და აჭარის მთავრობაში თურქეთის ტერიტორიაზე მდებარე ჰესიდან ჭარბი წყლის გამოშვებას ასახელებენ.

________

ფოტოზე: აქცია კირნათი ჰესთან, 20 თებერვალი, 2018 წ. ფოტო: „ბათუმელები“, მანანა ქველიაშვილი

საპენსიო სააგენტოში აცხადებენ, რომ სააგენტოს შეუფერხებელი საქმიანობისათვის აუცილებელია საზოგადოების ცნობიერების ამაღლება და სხვადასხვა სახის საინფორმაციო და სარეკლამო კამპანიების წარმოება, რისთვისაც საჭიროა „შესაბამისი მომსახურების შეუფერხებლად შესყიდვა“.

საინფორმაციო და სარეკლამო კამპანიის მომსახურების შესყიდვას საპენსიო სააგენტო ტენდერის გარეშე აპირებს, რისთვისაც 913 ათას 938 ლარი აქვს გათვალისწინებული.

„საქართველოს მოქალაქეებისათვის არასწორი ან/და არასრული ინფორმაციის მიწოდებამ შესაძლოა დამანგრეველი ზეგავლენა მოახდინოს საპენსიო რეფორმაზე და გამოიწვიოს საქართველოს მთავრობისა და საპენსიო სააგენტოს დისკრედიტაცია. ამასთან აღსანიშნავია, რომ გარკვეული ჯგუფები სოციალური მედიის, მასმედიისა თუ სხვა საშუალებით ავრცელებენ ნეგატიურ და არასწორ ინფორმაციას საპენსიო რეფორმასთან დაკავშირებით. ასეთი ინფორმაციის რეაგირების გარეშე დატოვება დაუშვებელია და მათი გაბათილებისა და სწორი ინფორმაციის მიწოდების მიზნით, აუცილებელია უმოკლეს ვადებში სხვადასხვა საინფორმაციო წყაროებით საპასუხო ინფორმაციის გავრცელება და მოსახლეობაში საპენსიო სააგენტოს საქმიანობის შესახებ ცნობადობის ამაღლება“, – აღნიშნულია საპენსიო სააგენტოს განაცხადში, რომლითაც საპენსიო სააგენტომ შესყიდვების სააგენტოს მიმართა.

საპენსიო სააგენტო, დაგროვებითი პენსიის შესახებ საქართველოს კანონის საფუძველზე შეიქმნა, საპენსიო შენატანების ადმინისტრირების სისტემა კი 2019 წლის 1 იანვარს ამოქმედდა.

[gray_box]„2018 წლის განმავლობაში, პირველ რიგში, სააგენტო არ იყო დაკომპლექტებული შესაბამისი თანამშრომლებით, ხოლო მეორეს მხრივ, არ იყო მოსალოდნელი საინფორმაციო/სარეკლამო საქმიანობის ინტენსიურად განხორციელების აუცილებლობა. ასეთი აუცილებლობა გამოწვეულ იქნა პირველ რიგში, გარკვეული ჯგუფების მიერ ნეგატიური ინფორმაციის გავრცელებით და მეორეს მხრივ დაგროვებითი პენსიის შესახებ კანონთან დაკავშირებით საკონსტიტუციო სასამართლოში შეტანილი კონსტიტუციური სარჩელით“, – აღნიშნულია შესყიდვების ვებგვერდზე.[/gray_box]

საპენსიო სააგენტო სარეკლამო/საინფორმაციო ღონისძიებების განხორციელებას 2019 წლის 31 დეკემბრამდე გეგმავს:

პირველი ეტაპი, ღირებულებაა 343 938 ლარი: რგოლის განთავსება ტელევიზიაში (რეგიონული ტვ + 2-3 არხი) – 3 კვირა; რადიო განთავსება- 2-3 კვირა; sms-1000000; ვებ პორტალების მომსახურება 12 თვის მანძილზე; ბუკლეტების დაბეჭდვა/გავრცელება 2 თვის მანძილზე; ვიდეო გადაღება/მონტაჟი -3 თვის მანძილზე; ვიდეო რგოლის განთავსება კინოთეატრებში –  2 თვის მანძილზე; მედიატური; ახალი დომეინი; ვიზუალური ბრენდინგი (ლოგო, ლოგობუქი) -1; ინტერნეტ კამპანია(მ.შ ფეისბუკის მომსახურება(რეკლამის ხარჯი); გრაფიკული საპრომოციო რგოლი (7-10).

მეორე ეტაპი, ღირებულებაა 570 000 ლარი: ვიდერგოლების სერია – 70; ინტერნეტ კამპანია (მ.შ ფეისბუკის მომსახურება(რეკლამის ხარჯი) – 8 თვე; რგოლების განთავსება ტელევიზიაში (რეგიონული ტვ + 2-3 არხი) – 6-7 კვირა; მედიატური; ექსპერტ კონსულტანტების მომსახურება – 8 თვე; რადიო განთავსება – 6-7 კვირა; მეტროში განთავსება და ბეჭდვა.

შესყიდვების სააგენტოში საპენსიო სააგენტოს განაცხადის განხილვის თარიღად 2019 წლის 26 თებერვალია ჩანიშნული.

დაგროვებითი პენსიის შესახებ ვრცლად შეგიძლიათ იხილოთ ამ ბმულზე.

დეკანოზ გიორგი მამალაძის საავადმყოფოში მოხვედრამ და შემდეგ მისმა ზიარებამ სასულიერო იერარქების საჯარო გამოსვლები გააქტიურა. ისინი ღიად საუბრობენ ციხიდან დეკანოზის მუქარაზე და მის მიერ გამოგზავნილ „მამხილებელ წერილეებზე“. ეპისკოპოსები არ ამბობენ, კონკრეტულად რის მხილებით ემუქრება გიორგი მამალაძე საპატრიარქოს, თუმცა ამ ფრაზებით აღწერენ ციხიდან მიღებულ წერილს: „საეკლესიო ბედუკაძეობა“, „მკვლელობაზე უფრო დიდი დანაშაული,“ „მორალურ-ზნეობრივი ხასიათის დანაშაული,“ „ყურში არ შეიშვება“, „ღმერთმა ნუ ქნას ეს ამბავი ვინმემ გაიგოს“, „ყველამ რაღაც იცის, მაგრამ ვერ ბედავს თქმას“…

რით ემუქრება დეკანოზი მამალაძე საპატრიარქოს, რატომ გახდა დეკანოზის მიერ 2017 წელს ოთხი ეპისკოპოსისთვის გამოგზავნილი წერილი ახლა აქტუალური და რა ეტაპზე გადავიდა „ციანიდის საქმე“ – „ბათუმელები“ თეოლოგს, მირიან გამრეკელაშვილს ესაუბრა.

• ბატონო მირიან, „მკვლელობაზე უფრო დიდ დანაშაულსა“ და „საეკლესიო ბედუკაძეობაზე“ საუბრობენ – ამჯერად ეპისკოპოსები. გაქვთ რაიმე ინფორმაცია, რით ემუქრება დეკანოზი მამალაძე საპატრიარქოს. ხომ არ უნდა ველოდოთ „ციანიდი ორს“?

საეკლესიო სივრცეში ვრცელდება დაუზუსტებელი ინფორმაცია, რომ გიორგი მამალაძეს აქვს საკმაოდ სერიოზული კომპრომატი უმაღლესი იერარქიის სასულიერო პირთან დაკავშირებით. ეს შეეხება ამ სასულიერო პირის ქცევას არაფორმალურ მდგომარეობაში, რომლის გახმაურებაც ძალიან დიდ უხერხულობას შეუქმნის ყველას. პირველ რიგში კი პატრიარქის გარემოცვას და თავად დეკანოზ მამალაძესაც. კომპრომატების არსებობის შემთხვევაში, მათი გავრცელება ნიშნავს აპოკალიფსს პრაქტიკული თვალსაზრისით. ეს იქნება ყველა დროის უდიდესი სკანდალი, რომელსაც კი საპატრიარქოსთან მიმართებაში ადგილი ჰქონია.

• თქვენ საიდან გაქვთ ეს ინფორმაცია?

თავიდანვე უნდა დავაზუსტოთ, რომ ეს ცნობები, რომელზეც ჩვენ ვსაუბრობთ, ჯერჯერობით, მხოლოდ ზეპირი საუბრებიდან არის ნასესხები. ფაქტობრივად, მცხეთა-თბილისის ეპარქიაში ამ კომპრომატზე თითქმის მთელი სასულიერო დასია ინფორმიერებული, თუმცა ამას ხმამაღლა არავინ ამბობს, ამას ვერავინ ბედავს… მოკლედ რომ ვთქვათ, მამა გიორგი მამალაძეს შეუძლია გაწიროს საკუთარი თავი და პრაქტიკულად მოაწყოს  აპოკალიფსი.

• თქვენი ინფორმაციით, დაკავების შემდეგ მოიპოვა ეს კომპრომატები დეკანოზმა მამალაძემ?

არა. ჩემი ინფორმაციით, ეს კომპრომატი გახდა მიზეზი მისი „გაციანიდებისა“. სავარაუდო საპატრიარქოში გაიგეს, რომ ეს კომპრომატი ჰქონდა დეკანოზ მამალაძეს… დეკანოზის მოულოდნელად საზღვარგარეთ წასვლამ დააჩქარა მისი დაკავება. საპატრიარქოში ალბათ იფიქრეს, რომ დეკანოზი უცხოეთიდან აპირებდა ამ კომპრომატის გასაჯაროვებას. შესაძლოა იმ მომენტისათვის, მისი დაკავება იყო იზოლაციის ერთ-ერთი გზა. საპატრიაქოში, როგორც ჩანს, ჩათვალეს, რომ ციხიდან დეკანოზი მამალაძე ამას ვეღარ გაბედავდა. ისედაც, ამ ნაბიჯის გადადგმა ძალიან რთულია… სავარაუდოდ ჰქონდათ იმედი, რომ ეს კომპრომატი განადგურდებოდა. აქტუალური საჯარო კომენტარებიდან გამომდინარე უფლება გვაქვს ვიფიქროთ, რომ მოცემულ მომენტში ვაჭრობა მიმდინარეობს, რათა ამ ადამიანმა დუმილი ბოლომდე შეინარჩუნოს.

• თქვენს ვერსიას რომ მივყვეთ, დეკანოზის დაკავება რატომ გამორიცხავდა ამ კომპრომატის გავრცელების საფრთხეს?

ასე ფიქრობდნენ, სავარაუდოდ, საპატრიარქოში, რომ ციხეში ყოფნა საუკეთესო იზოლაციაა. 1998 წლიდან მოყოლებული ეკლესიიდან ინტელექტუალური რესურსი აქტიურად იდევნება. შესაბამისად, ნაკლებად მოსალოდნელია, რომ ეს გადაწყვეტილება ხანგრძლივი სტრატეგიული ბჭობის შედეგად იქნა მიღებული. საპატრიარქო უფრო ალბათ ფიქრობდა, ციხეში დეკანოზს ისე დაამუშავებდნენ, რომ ის ამას ვეღარ გაბედავდა, ან აიძულებდნენ, რომ გაენადგურებინა ეს კომპრომატი.

თუმცა უკვე ვხედავთ, რომ ეს ასე არ მოხდა. თავად მამალაძე ვარაუდობდა, რომ მას მალე გამოუშვებდნენ, ბოლომდე არ გაწირავდნენ. ვარაუდობდნენ, რომ მოხდებოდა მისი რეაბილიტაცია, მაგრამ ასე არ მოხდა. რაც დრო გადის, მამალაძეს ციხიდან გამოსვლის იმედი უფრო და უფრო ეწურება. ჩვენ ახლა თვალს ვადევნებთ ამ პროცესს – მამალაძე აანალიზებს, რომ ციხიდან მის გამოყვანას არავინ ცდილობს, ქმედითი არაფერი ხდება…

• ჭიათურის და საჩხერის მიტროპლიტმა დანიელმა რამდენიმე დღის წინ თქვა, რომ ეკლესია დეკანოზის შეწყალების წინააღმდეგი არ არის. რატომ მივიდა საპატრიარქო ამ გადაწყვეტილებამდე?

პირველად ხდება, როცა საპატრიარქო მიდის დათმობაზე ამ თემატიკაში. მეუფე დანიელი პატრიარქთან დაახლოებული პირია და მან თქვა, რომ პატრიარქი არ არის წინააღმდეგი, შეიწყალონ მამალაძე. ახლა მიმდინარეობს ვაჭრობა რაღაცა – რაღაცის სანაცვლოდ.

• თქვენი აზრით, რა შემთხვევაში შეიძლება მიიღოს თავისუფლება გიორგი მამალაძემ?

თუ მამალაძე მისცემს პირობას საპატრიარქოს, რომ ეს კომპრომატი გაქრება, მაშინ თავისუფლებას მიიღებს, მაგრამ, ალბათ, სადღაც ამ კომპრომატის ასლი ინახება და ამის გარანტიას ვერ აძლევს მამალაძე საპატრიარქოს. ეს გარიგება ვერ დგება. როგორც ჩანს: მამალაძე მაინც ვა-ბანკზე არ მიდის და იტოვებს კოზირს. არც საპატრიარქოს სჯერა ბოლომდე, რომ მამალაძე წავა ამ ნაბიჯზე და გაასაჯაროვებს კომპრომატს. ვაჭრობა მიდის მამალაძის დუმილის მისაღებად, თუმცა ისე მიდის ეს პროცესი, რომ დუმილისა და ამ ამბის მშვიდობიანად დასრულების შესაძლებლობა აღარ რჩება.

• ჭყონდიდის მთავარეპისკოპოსმა პეტრემ ისაუბრა პირველად ციხიდან დეკანოზის მიერ გამოგზავნილ მუქარის წერილებზე. მან ახსენა „საეკლესიო ბედუკაძეობა“ და ის, რომ საუბარი არ ეხება ქონების მოხვეჭას. ასევე თქვა, რომ ეს ამბავი „ყურში არ შეიშვება“. რატომ გადაწყვიტა მეუფე პეტრემ მუქარის წერილებზე ახლა საუბარი?

მეუფე პეტრე მიხვდა, რომ ეს კაცი [დეკანოზი] გაწირეს. მან ასევე გაანალიზა, რომ ოთხ კედელში გამოკეტილი ადამიანი უფრო საშიშია, ვიდრე გარეთ. მირზა სუბელიანის [ხორავას ქუჩაზე მოკლული დათო სარალიძის საქმე] მაგალითზეც გამოჩნდა, რომ იქ მყოფი ადამიანი, შესაძლოა, უფრო მეტ რისკზე წავიდეს. ინფორმაციული გარღვევაც ხომ მას შემდეგ დაიწყო, როცა მირზა სუბელიანი დაკავეს, მანამდე მას ინფორმაცია არ გაუცია. პეტრემ ეს გაისიგრძეგანა, ამიტომ იმეორებდა, რომ დეკანოზი უდანაშაულოა, გამოუშვითო.

• რა როლი აქვს ამ პროცესში ბათუმის და ლაზეთის მიტროპოლიტ დიმიტრის? ვანის და ბაღდათის მიტროპოლიტმა ანტონმა მასზე მიანიშნა, როცა დეკანოზ მამლაძის მისამართით თქვა: „როდესაც გადმოვიდა [დეკანოზი] მცხეთა-თბილისის ეპარქიაში, რაღაც უცებ მოხდა მისი გადმოყვანა, რაღაც უცებ მოხდა ყველაფრის ჩაბარება, რა ვიცი ასეთი უნარები რა ჰქონდა, რომელსაც ჯერ აჭარაში ჰქონდა ყველაფერი ჩაბარებული, მერე აქ მოვიდა საპატრიარქოში და უცებ ჩაიბარა ყველაფერი, თითქოს სხვა არ იყო საქართველოს ეკლესიაშიო“. მან მიანიშნა, რომ დეკანოზს მეუფე დიმიტრი მფარველობდა. ეს ხომ არ ნიშნავს იმას, რომ მეუფე დიმიტრი ერთ-ერთია მათ შორის, ვისაც დეკანოზი ემუქრება?

ეპისკოპოსების ნაწილი ამით მიანიშნებს, რომ თუ ზიარების ღირსი იყო მამალაძე, მაშინ ორივე – დეკანოზიც და დიმიტრიც მართალნი არიან ღვთის წინაშე, თუ არადა პირიქით, ორივეს სინდისზე იყოს. თვითონ არ აზიარეს, რადგან გამოვიდოდა, რომ დამნაშავედ აღარ სცნობენ.

დეკანოზი მამალაძე იყო მეუფე დიმიტრის ფავორიტი. ის თავის თვალად და ყურად ჩასვა საპატრიაქოში, გარკვეული გამიზნულობით. მამალაძემ იმუშავა იქ მრავალი განხრით. აღმოაჩინა, რომ საპატრიარქოში არსებობს, ასე ვთქვათ, შავი ეკონომიკა. საერთოდ, ჩვენი ეკლესია არის ფეოდალური მოწყობის, ეკონომიკური თვალსაზრისით. იმის თქმა, რომ ეკლესიის შიგნით შავი ეკონომიკა არსებობს, არავის გააკვირვებდა. მერე დეკანოზმა იფიქრა, რომ ფსონი დაედო უფრო სხვა რამეზე…

თუ მამალაძე წავა ვა-ბანკზე და „გუდას თავს მოხსნის“, გამოვა, რომ დიმიტრიმ აგენტი ჩაუსვა საკუთარ ბიძას. ანტონს სურს მიანიშნოს, რომ დიმიტრიც პასუხისმგებელია ამ საკითხებზე. დიმიტრის სურდა, რომ ყოფილიყო ტახტის მემკვიდრე და მეუფე ანტონი მიეკუთვნება საპირისპირო ბანაკს, რომელსაც არ სურს დიმიტრი მორიგ პატრიარქად იხილოს.

• მეუფე დანიელი რომელ ბანაკს ეკუთვნის? ისიც საუბრობდა დეკანოზის ზიარების პასუხისმგებლობაზე.

დანიელი მიეკუთვნება თავის თავის ჯგუფს. ის არის ტახტის ერთ-ერთი პრეტენდენტი. დამოუკიდებელი თამაში მას დიდი ხანია დაწყებული ჰქონდა. მისი მრევლი თავის დროზე გახდა ზურაბ ჟვანია და ნინო ბურჯანაძე. ამ პოლიტიკური გუნდის სცენიდან გასვლის შემდეგ კი, მას ეს შანსები შეუმცირდა. თანაც, ასპარეზზე სხვა, ახალი ესპისკოპოსები გამოვიდნენ. მოკლედ, მეუფე დანიელს ცოტა ხანი პაუზა ჰქონდა აღებული. მისი ერთ-ერთი როლი, სადაც თვითონ საკუთარ თავს ხედავს, არის მედიატორი ეკლესიას და საზოგადოებას, ინტელექტუალურ წრეებს შორის. მას გააჩნია შიდა სამოქმედო გეგმა. ატარებს საერთაშორისო შეკრებებს ან მონაწილეობს მასში, ასევე გამოდიოდა თეოლოგიური ჟურნალი და ამას მეუფე დანიელის ეგიდით ახორციელბდნენ და ა. შ.

• ამ დრომდე უცნობია, რა თემაზე ისაუბრებს ბათუმის მიტროპოლიტი დიმიტრი ოთხი დღის წინ დაანონსებულ პრესკონფერენციაზე. თქვენ რა მოლოდინი გაქვთ?

მეუფე დიმიტრიმ ჯერ არ იცის, რა აქვს სათქმელი. მოცემულ მომენტში მხარეებს შორის მიდის მორიგება. ამას ამძაფრებს ისიც, რომ დეკანოზი მამალაძე გახდა ცუდად, მას, სავარაუდოდ, ჯანმრთელობა შეერყა. ორი სცენარია: შესაძლოა, რომ მისი ჯანმრთელობის მდგომარეობა გაუარესდეს და ის მოინდომებს, რომ გაასაჯაროვოს ეს ინფორმაცია, რათა სინდისი გაიწმიდოს. მეორე ვარიანტია, რომ გაჩუმდეს ბოლომდე, მაგრამ თუკი რამე მოუვა, გამწარებულ გულზე შესაძლოა ეს ინფორმაცია გაასაჯაროვოს, მაგალითად, მისმა ძმამ. სიტუაციის განვითარების არც სხვა კომბინაციაა გამორიცხული. „ციანიდის საქმე“, ინტენსიურ ფაზაში გადავიდა და დუმილის შენარჩუნების პირი უკვე მას აღარ უჩანს.