როგორ მოვუაროთ ორქიდეას და რეკომენდებულია თუ არა მისი გადარგვა – ფლორისტის რჩევა


როგორ მოვუაროთ ბევრისთვის საყვარელ მცენარეს – ორქიდეას, რა სიხშირით მოვრწყოთ, სად მოვათავსოთ და სჭირდება თუ არა მას გადარგვა, ამის შესახებ გვირჩია ეთერ აბუსელიძემ, ფლორისტმა, მაღაზია „ჰოლანდიური ყვავილებიდან“.

ორქიდეა უდაბნოს მცენარეა და შესაბამისად უყვარს სითბო.  სიცივეში ვერ ხარობს. უნდა მოვათავსოთ ოთახში განათებულ ადგილას, სადაც იქნება საშუალო ტემპერატურა. ყვავილობის დროსაც და შემდეგაც უნდა იყოს განათებულ ადგილას.

ორქიდეას მოვლისას უშვებენ შეცდომას, როცა მას ხშირად რწყავენ ან უცვლიან ქოთანს. როცა შეიძენენ ორქიდეას, ცდილობენ, შეუცვალონ ქოთანი და გადაიტანონ უფრო მოზრდილში ან გამოუცვალონ ნიადაგი, რაც დაუშვებელია, მას არ სჭირდება არც ნიადაგის შეცვლა და არც ქოთნის გამოცვლა. ის, რაშიც არის მოთავსებული, მას ჰყოფნის არსებობის მანძილზე. თუკი მაინცა და მაინც გვინდა გადავიტანოთ სხვა ქოთანში, არაფრით არ შეიძლება ნიადაგად მიწის გამოყენება, არსებობს სპეციალური ქერქი, რომელიც იყიდება მაღაზიებში –  მხოლოდ  და მხოლოდ ის უნდა გამოვიყენოთ.

რაც შეეხება მორწყვას, უნდა მოვრწყოთ შემდეგი მეთოდით: ორქიდეა ქოთნით 20 წუთით მოვათავსოთ თასში, რომელშიც იქნება გაჩერებული წყალი. წყალი უნდა გაჩერდეს არანაკლებ 24 საათის განმავლობაში. უნდა მოვრწყოთ 15-20 დღეში ერთხელ, ბათუმის ნესტიანი კლიმატის პირობებში ამ სიხშირით მორწყვა სრულიად საკმარისია.

წლების შემდეგ, ჯანმრთელი მცენარის შემთხვევაში,  ქოთნიდან ამოდის ფესვები, დაუშვებელია მათი უკან ჩაბრუნება ან რაიმე სახით ზემოქმედება. არ არის საჭირო ზედმეტი შეხება მათზე. მცენარეს უნდა მივცეთ თავისუფლება. რაც უფრო მეტად ამოიყრის ფესვებს, მიანიშნებს, რომ მეტად ჯანმრთელია მცენარე.

ზოგადად, უმჯობესია მცენარემ იცხოვროს თავისით, ბუნებრივი ცხოვრებით. მინარევებით და სხვა საშუალებებით დახმარება, თუკი არ არის ამის საჭიროება, არ არის აუცილებელი.

ნეტგაზეთის მასალების სხვა გამოცემებში გადაბეჭდვის წესი
ნაზიბროლა ზოსიძე