„საქართველოს სახელმწიფო ელექტროსისტემამ“ ახალციხე-ბათუმის 220 კვ-იანი ელექტროგადამცემი ხაზის მშენებლობისა და ეპსლუატაციის პროექტში ცვლილებები შეიტანა.
საქართველოს გარემოს დაცვისა და სოფლის მეურნეობის სამინისტროს ინფორმაციით, ხულოს მუნიციპალიტეტის სოფელ რაქვთას მონაკვეთზე, მდინარე სხალთას მარჯვენა ნაპირზე განლაგებული სოფლებისა და სასოფლო-სამეურნეო მიწების გვერდის ასაქცევად ელექტროგადამცემი ხაზის მარშრუტი გადატანილ იქნა მდინარის მარცხენა ნაპირზე და ახალი პროექტის შესაბამისად, მიუყვება ტყით დაფარული ქედის თხემს. ხსენებულ მონაკვეთზე შეცვლილი მარშრუტის სიგრძე შეადგენს დაახლოებით 30 კილომეტრს.
გადამცემი ხაზის მშენებლობას კი 65 მეტრი სიგანის დერეფანი სჭირდება.
სამინისტროს ინფორმაციით, სოფელ რაქვთადან [ხულო]- სოფელ უდემდე [ადიგენი] მონაკვეთზე მარშრუტში შეტანილია ასევე ლოკალური ცვლილებები [2 ცვლილება, 5 და 4 კმ სიგძის მონაკვეთები]; სოფელ კლდედან – სოფელ ზიკილიამდე [ახალციხე] მონაკვეთზე კი მარშრუტში ერთი ლოკალური ცვლილებაა [დაახლოებით 5 კმ სიგრძის მონაკვეთი].
ახალციხე-ბათუმის ორჯაჭვიანი ელექტროგადამცემი ხაზის მთლიანი სიგრძე შეადგენს 150კმ-ს. 220 კვ ელექტროგადამცემი ხაზი იწყება ახალციხის არსებული 500/400 კვ ქვესადგურიდან და უკავშირდება ბათუმის არსებულ 220 კვ ქვესადგურს.
აჭარის ტერიტორიაზე ამ ელექტროგადამცემი ხაზის მშენებლობის შესახებ ვრცლად შეგიძლიათ ნახოთ ამ ბმულზე.
ახალციხე-ბათუმის ელექტროგადამცემი ხაზი მდინარე აჭარისწყლის ხეობაში
