Batumelebi

პარტია „ელენე ხოშტარია-დროას“ წევრები ნათია ლეთოდიანი და შუშანა მაცაბერიძე 5000-5000 ლარით დააჯარიმეს პროტესტის ნიშნად მთავრობის კანცელარიის წინ შადრევნის აკრილის საღებავით შეღებვისთვის.

„დროას“ ცნობით, პარტიის წევრები ნარჩენების მართვის კოდექსის 36-ე მუხლის მიხედვით დაჯარიმდნენ.

„დროას“ წევრებმა შადრევანი წითლად ლექსო ლაშქარავას გარდაცვალების შემდეგ, 2021 წლის 18 ივლისს, პროტესტის ნიშნად  შეღებეს.

შედარებისთვის – 2021 წლის ივნისში თბილისის მერიამ 1000 ლარით დააჯარიმა „უცნობი“ ბერლინის კედლის ფრაგმენტის მოხატვისთვის.

ავტორი: თამარ ჩანჩიბაძე 

ბათუმელი ეპიდემიოლოგი ნესტან შერვაშიძე კოვიდ-19-ის პირველი შემთხვევიდან დღემდე ეხმარება ადამიანებს კოვიდის, როგორც თავად ამბობს, „უვერაგესი ვირუსის“ დამარცხებაში. ბევრი კოლეგის მსგავსად, მან თავადაც გადაიტანა კორონავირუსი.  

როგორ ექიმი-ეპიდემიოლოგი, ნესტან შერვაშიძე ცდილობს სწორი ინფორმაცია გაავრცელოს ვაქცინაციის შესახებ, იყო ჩართული პროექტში, რომლის ფარგლებშიც ჯანმრთელობის მსოფლიო ორგანიზაციისა და IOCC-ის დახმარებით 200-მდე მუსლიმმა და 100-ზე მეტმა ქრისტიანმა სასულიერო პირმა მიიღო ინფორმაცია COVID-19 ვაქცინაციის შესახებ. 

უშლის თუ არა ხელს დეზინფორმაცია ვაქცინაციის პროცესს? როგორ მუშაობენ ეპიდემიოლოგები პანდემიაში? – ნესტან შერვაშიძეს ვთხოვეთ, მისი გამოცდილება გაეზიარებინა ჩვენთვის.

„ვინც რეანიმაციის კარამდე მივიდა, ყველა ამბობს, რომ სიკვდილს ჩახედეს თვალებში“ – გვითხრა ნესტან შერვაშიძემ. 

მან ჩვენთან საუბრისას რამდენიმე საკითხზე გაამახვილა ყურადღება:

• „დეზინფორმაცია ვაქცინაციის პროცესს აფერხებს“

დეზინფორმაცია და ანტივაქსერული პროპაგანდა ვაქცინაციის პროცესს ნამდვილად აფერხებს. 

მინდა ყველას ვუთხრა – ერთადერთი გამოსავალი, რომ დავამარცხოთ ეპიდემია და გადავარჩინოთ საკუთარი და სხვისი სიცოცხლე, არის ვაქცინაცია. 

შეიძლება მე გადავიტანო უსიმპტომოდ ვირუსი, მაგრამ ჩემს მიერ დასნებოვნებულმა ადამიანმა ვეღარ გადაიტანოს და მისი სიცოცხლე საფრთხის ქვეშ დავაყენო.

ვაქცინაციასთან დაკავშირებით დეზინფორმაცია და ჭორები ახალი არ არის. ჯენერმა [ედუარდ ჯენერი – ყვავილის ვაქცინის შემქმნელი ინგლისელი ექიმი]  როდესაც შექმნა პირველი, ყვავილის ვაქცინა, მაშინაც იყვნენ ანტივაქსერები, თუმცა, ვაქცინამ საბოლოოდ ყვავილი დაამარცხა, როგორც ინფექცია. 

უიმედოდ პირველივე დღიდან არ ვყოფილვართ და ახლაც არ ვართ ეპიდემიოლოგები, იმიტომ, რომ ვაქცინა შემოვიდა. თან ისეთი და იმდენნაირი ვაქცინა, რომ აღარ აქვს მოქალაქეს უფლება, ვაქცინაციაზე უარი თქვას. 

თუკი ეჭვი გვეპარება ახალი ტექნოლოგიებით [მაგ. ფაიზერი, ასტრაზენეკა] დამზადებულ ვაქცინებზე, არის ინაქტივირებული ვირუსებით შექმნილი ვაქცინები [სინოფარმი, სინოვაკი], რომელიც ტრადიციული მეთოდითაა დამზადებული და იმით შეიძლება აიცრას მოქალაქემ. 

ახლა სახელმწიფო გვაძლევს ამის საშუალებას,  რომ ავირჩიოთ ჩვენთვის სასურველი დრო, ადგილი და ჩავიტაროთ ჩვენთვის სასურველი ვაქცინით ვაქცინაცია“. 

• „ყველაზე რთული სიტუაცია არის ახლა, მედპერსონალი ძალიან დაიღალა“ 

თავიდან როცა გავრცელდა ეს ინფექცია, წარმოუდგენლად მიგვაჩნდა, რომ ასე უცებ მოვიდოდა ჩინეთიდან ჩვენამდე, თუმცა გლობალიზაციამ გამოიწვია ის, რომ თებერვლის ბოლოს უკვე საქართველოში დადასტურდა კორონავირუსის პირველი შემთხვევა. 

საზოგადოებრივი ჯანდაცვის ხელმძღვანელობა ამბობდა, რომ ჯერ არ გვქონდა მესამეული გადაცემა, შესაბამისად, ვფიქრობდით, რომ ჩაკეტვით ინფექცია არ გავრცელდებოდა. 

პირველი მარტიდან მოყოლებული ვიყავი ჩაბმული ამ სამსახურში. დავდიოდით ეპიდკერებში, ვიკვლევდით კონტაქტებს. 

პირველ ეტაპზე უნდა მივსულიყავით ოჯახში, ტესტირება ჩაგვეტარებინა. გამოვიდოდით ოჯახიდან და აღმოჩნდებოდა, რომ ოჯახის შვიდი წევრიდან ხუთს კოვიდი ჰქონდა.

მაშინ ინფექცია ჩემთან არ მოსულა, მაქსიმალურად ვიცავდით უსაფრთხოების ზომებს, რაც არის აუცილებელი ასეთ დროს. 

დასაწყისში ნამდვილად არაფერი არ ყოფილა განსაკუთრებით რთული, მიუხედავად იმისა, რომ ღამეებს ვათენებდით მორიგეობებზე, მივდიოდით სამსახურში და უწყვეტ რეჟიმში 24/8 საათის განმავლობაში ვმუშაობდით, როგორც ეპიდემიოლოგები. 

თუმცა, დღეს რომ ის პერიოდი რომ დაბრუნდეს, ნამდვილად რესურსი აღარ არის იმის, რომ იგივე გავაკეთოთ. მართლა ძალიან ძნელია და მინდა ხალხს მოვუწოდო, რომ  ვაქცინა ჩაიტარონ. 

ელემენტარულად, დაიღალნენ ეპიდემიოლოგები და დაიღალა მედპერსონალი. 

ეპიდემიოლოგებმა ვიცით, რომ ერთი დადასტურებული შემთხვევის უკან, შეიძლება სულ მცირე კიდევ სამი შესაძლო შემთხვევა იყოს. 

რას ვეტყოდი ადამიანებს, რომლებიც მაინც ფიქრობენ, რომ კორონავირუსი არ არსებობს? –  მხოლოდ ერთს – კორონავირუსი არსებობს, არსებობდა და იარსებებს კიდეც! 

SARS-CoV-2 არ იყო უცხო ჩვენთვის, ეპიდემიოლოგებისთვის, იმიტომ რომ ჩვენ ვიცით იყო SARS-CoV-1, მაგრამ ნამდვილად არავის ეგონა, რომ ეს ასეთი ვერაგი ვირუსი აღმოჩნდებოდა. პირველი დღიდან მოყოლებული ველოდებოდით ეპიდემიოლოგები ვაქცინას, იმიტომ რომ ერთადერთი საშუალება, რომ ეპიდემია დამარცხდეს არის ვაქცინაცია! 

_______________________

მასალა მომზადებულია „მედიაწიგნიერების საკვირაო სკოლის“ ფარგლებში, რომელსაც „ბათუმელები“ ახორციელებს „ამერიკულ კუთხესთან“ ერთად. მასალაში გამოთქმული მოსაზრებები შესაძლოა არ გამოხატავდეს დონორი ორგანიზაციის შეხედულებებს.

6 სექტემბრის მონაცემებით, ბოლო 24 საათში აჭარაში კოვიდის 147 ახალი შემთხვევა დადასტურდა.

გასულ 24 საათში აჭარაში 4 პაციენტი გარდაიცვალა კოვიდით. 

დღეის მონაცემებით, აჭარის კოვიდკლინიკებში 813 პაციენტს მკურნალობენ კოვიდზე, მათგან 37 მძიმე პაციენტია.

დღეს, 6 სექტემბერს, საქართველოში კორონავირუსის 1120 ახალი შემთხვევა დადასტურდა, 61 ადამიანი გარდაიცვალა.

6 სექტემბრის მონაცემებით, საქართველოში კორონავირუსის 1120 ახალი შემთხვევა დადასტურდა, ჩატარდა 16 149 კვლევა ტესტით.

გასულ დღე-ღამეში საქართველოში 61 ადამიანი გარდაიცვალა კოვიდით.

დღეს ქვეყანაში გამოვლენილი ინფიცირების 1 120 ახალი შემთხვევიდან: თბილისში გამოვლენილია 415 შემთხვევა, აჭარაში – 147, იმერეთში – 175, ქვემო ქართლში – 48, შიდა ქართლში – 46, გურიაში – 29, სამეგრელო – ზემო სვანეთში – 94, კახეთში – 73, მცხეთა-მთიანეთში – 40, სამცხე-ჯავახეთში – 35, რაჭა-ლეჩხუმსა და ქვემო სვანეთში – 18.

ამ ეტაპზე ინფიცირების მიმდინარე აქტიური შემთხვევაა 38 391, მათგან 7 016 ადამიანი მკურნალობს საავადმყოფოში.

2 292 ადამიანი მოთავსებულია კლინიკურ სასტუმროებში, მათ შორის 1 124 – თბილისში, 712 – აჭარაში, 29 083 პირი ვირუსის მკურნალობის კურსს გადის საცხოვრებელ ბინაზე.

ესპანეთში ბათუმელი მეზღვაური დაიღუპა. ინფორმაციას საზღვაო ტრანსპორტის სააგენტოში ადასტურებენ.

პირველადი მონაცემებით, უბედური შემთხვევიოს მიზეზი ტვირთის არასწორი დასაწყობება იყო, რის გამოც ტანკერზე ქიმიურმა ნივთიერებამ გაჟონა.

პროცესში ჩართულია საგარეო საქმეთა სამინისტრო. უწყების ინფორმაციით, საქართველოს მოქალაქის გარდაცვალების მიზეზი ინტოქსიკაცია გახდა.

“აღნიშნული ფაქტის შესახებ ესპანეთში საქართველოს საკონსულო ინფორმირებულია. სადაზღვევო კომპანია ახორციელებს გადმოსვენების პროცედურებს,” – მოგვწერეს საგარეო საქმეთა სამინისტროდან.

 

„ძალიან დიდი სურვილი მაქვს, რომ ჩამოვიდეს ბატონი სააკაშვილი,“ – აღნიშნა დღეს, 5 სექტემბერს, ჟურნალისტებთან საუბრის დროს პრემიერმა ირაკლი ღარიბაშვილმა. მას მიხეილ სააკაშვილის საქართველოში შესაძლებლო დაბრუნებაზე ჰკითხეს.

„გავერთობით ძალიან კარგად, მე მას შევპირდი, რომ დავახვედრებ ჰალსტუხების ძალიან ლამაზ კოლექციას და შევაბრძანებ ციხეში. გარემონტებულ ციხეში, სხვათა შორის“, – თქვა პრემიერმა ღარიბაშვილმა.

რა ურჩია ღარიბაშვილმა ჟურნალისტებს, ნახეთ აქ.

დაავადებათა კონტროლის ეროვნული ცენტრის ინფორმაციით, დღეიდან, 5 სექტემბრიდან, უკვე შესაძლებელია „სინოფარმის ვაქცინის პირველ დოზაზე რეგისტრაცია“.

უწყების ინფორმაციით, „მოქალაქეებს სასურველი ვაქცინის მიღება შეუძლიათ როგორც booking.moh.gov.ge-ზე დარეგისტირებით, ისე წინასწარი რეგისტრაციის გარეშე ამცრელ პუნქტებში. სინოფარმით ვაქცინაცია შესაძლებელია ვაქცინაციის მოძრავ პუნქტებშიც“.

დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ დღეს საზოგადოებრივ მაუწყებელს განუცხადა, რომ  საქართველოში „სინოფარი“ შემოვა მომავალი კვირის ბოლოს. დღეიდან კი უკვე შესაძლებელია რეგისტრაცია 20 000 დოზა „სინოფარმზე“.

„სინოფარმის“ ვაქცინის პირველი დოზის მარაგის ამოწურვის შესახებ 28 აგვისტოს განაცხადეს.

___

5 სექტემბრის მონაცემებით, საქართველოში სულ ჩატარებულია 1 314 104 აცრა.

პირველი დოზით ვაქცინირებულია 838 356 ადამიანი – მოზრდილი მოსახლეობის 29.4%

სრულად ვაქცინირებულია 475 748 ადამიანი – მოზრდილი მოსახლეობის 16.7%.

ბოლო 24 საათის განმავლობაში აჭარაში კორონავირუსის 223 ახალი შემთხვევა დაფიქსირდა, გარდაიცვალა 8 ადამიანი.

აჭარის საზოგადოებრივი ჯანდაცვის ცენტრის ინფორმაციით, კლინიკებში 5 სექტემბრის მდგომარფეობით, მკურნალობს 815 პაციენტი, მათ შორის, მართვით სუნთქვაზეა 41.

ბოლო 24 საათის განმავლობაში აჭარის რეგიონში გამოჯანმრთელდა 326 ადამიანი, კოვიდსასტუმროშია 896 პირი, ხოლო ონლაინ კლინიკაში – 5185.

 

გიორგი გახარიას პარტიიდან „საქართველოსთვის” ბათუმში მაჟორიტარობისთვის 2 ქალი იბრძოლებს. ერთ-ერთი მათგანი 29 წლის ნაზი აბაშიძეა – მაჟორიტარობის კანდიდატი ჯავახიშვილისა და ბაგრატიონის დასახლებაში.

ნაზი აბაშიძე პარტიის ლიდერმა, გიორგი გახარიამ პუბლიკას 16 ენის მცოდნე პოლიგლოტად გააცნო. „ბათუმელები“ გთავაზობთ ინტერვიუს კანდიდატთან.

• ნაზი, რამ გიბიძგათ ქალაქის თვითმმართველობაში გამოგეცადათ საკუთარი შესაძლებლობები?

ურეხის ბავშვთა სახლში გავიზარდე. მერე ჩავაბარე სტამბოლის მარმარას უნივერსიტეტში, ვსწავლობდი თურქულ ენას, აღმოსავლეთმცოდნე ვარ, აზიური ენების სპეციალისტი.

ჩემი ადგილი არის იქ, სადაც საზოგადოების პრობლემებია. ვფიქრობ, ჩემი გზა მაგალითია დღევანდელი ახალგაზრდებისთვის, ჩემნაირი ახალგაზრდებისთვის, ვისაც ისეთივე რთული ცხოვრება ჰქონდა, როგორც მე.

მინდა მაგალითი ვიყო იმ ადამიანებისთვის, ვისთვისაც რთულია დღეს რაღაცეების მიღწევა, ვისაც შეუძლებლად მიაჩნია განათლებაზე, სოციალურ სიკეთეებზე ხელმისაწვდომობა. ბევრი ახალგაზრდაა, ვისაც ჰგონია, რომ ვერაფერს მიაღწევს. არადა მე ნამდვილად ვარ ნათელი მაგალითი იმისა, რომ არაფრისგან შეიძლება ყველაფერი გამოგივიდეს.

მე მინდა ვიყო ჩემნაირი ადამიანების ხმა საზოგადოებაში. მინდა ვიყო იმ ადამიანების, იმ გარემოცვის ხმა, რა გარემოცვიდანაც თავად ვარ.

• გახარიამ 16 ენის მცოდნე პოლიგლოტად გააცნო საზოგადოებას თქვენი კანდიდატურა საარჩევნო სიის წარდგენისას. რა პროფესიის ხართ, სად და რას საქმიანობდით აქამდე?

ვსწავლობდი სტამბოლის მარმარას სახელმწიფო უნივერსიტეტში, აზიური ენების სპეციალისტი ვარ, როგორც გითხარით. კი, ნამდვილად 16 ენა ვიცი: ოსმალური, სპარსული, ხორეზმული, ქოქთურქული, ლურსმული, უიღურული, უზბეკური, თათრული, ყაზახური, ყირგიზული, ყარახანლური, ძველი ანატოლიური, თურქული, ძველი თურქული, მონღოლური, აზერბაიჯანული, რუსული და ინგლისური.

პანდემიის პერიოდში ვასწავლი თურქულ ენას, პარტიულ შემოთავაზებას სანამ დავთანხმდებოდი, 25 მოსწავლე მყავდა. თურქეთიდან საქართველოში რომ ჩამოვედი, ვცდილობდი სკოლაში მემუშავა, მაგრამ აზიური ენები ჩვენს სკოლებში არ ისწავლება დიდად და სასამართლოში ვარ თარჯიმანი, ასევე ვთარგმნი სამედიცინო დოკუმენტაციას, ვამოწმებ ნოტარიულად, ვმუშაობ ასევე იუსტიციის სახლისთვის.

სტამბოლის საავადმყოფოებში ვმუშაობდი თარჯიმნად 4 წელი. მეორე კურსზე ვიყავი, როცა ქართული სათვისტომოს ხელმძღვანელმა დამირეკა და მითხრა ერთ-ერთ დიდ კლინიკაზე სტამბოლში: ქართველი პაციენტი ჰყავთ და თარჯიმანი სჭირდებათ, კარგად გადაგიხდიანო.

ასე დავიწყე მუშაობა და 4 წელი ამავე სფეროში დავრჩი.

• ურეხის ბავშვთა სახლიდან მარმარას უნივერსიტეტში სასწავლებლად წასვლა როგორ შეძელით?

დედაჩემი ცდილობდა ვყოფილიყავი ისეთი, როგორიც ახლა ვარ. მისი მთავარი მიზანი იყო შვილი განათლებული ჰყოლოდა. ეს იყო უშუქობის, უსახსრობის პერიოდი. დავიბადე გურიაში, ოზურგეთში და როცა მამა გარდამეცვალა, გადმოვედით აჭარაში საცხოვრებლად – დედა აჭარიდანაა.

მერე ბავშვთა სახლში აღმოვჩნდი. რთულია ჩემთვის ამაზე ლაპარაკი. ბავშვთა სახლის ყველა მასწავლებლის სიკეთე მახსოვს, ყველა ადამიანი, ვისაც ერთი წიგნი უჩუქებია ან უთხოვებია ჩემთვის.

მეოცე სკოლის უზომოდ მადლიერი ვარ, ამ უბნის მაჟორიტარობის კანდიდატი ვარ, კარგად ვიცნობ ამ სკოლას, მის მასწავლებლებს, ამ უბანს მთლიანად და მინდა ამ ადამიანებს, ჩემს საზოგადოებას დავეხმარო.

ქუჩაში კლასელები, მასწავლებლები მხვდებიან, მესალმებიან, მგულშემატკივრობენ. ჩემი სურვილია მათი პრობლემების და საჭიროებების გამხმოვანებელი ვიყო.

რეზო დავითაძე იყო  მე-20 სკოლის დირექტორი, ვინც პირველად მიიღო საჯარო სკოლაში ბავშვთა სახლის აღსაზრდელები.

ეს ის ადამიანია, ვინც ჩვენ, ბავშვთა სახლის ბავშვები გვაღიარა.

ერთნაირი ფეხსაცმლით, ერთნაირი სამოსით დავდიოდით სკოლაში ბავშვთა სახლის აღსაზრდელები.

ურეხის ბავშვთა სახლიდან თურქული ენის კურსებზე დავდიოდი. ბევრი ხედავდა როგორ დავდიოდი კურსებზე ყოველ დილით – წვიმასა და ქარში. 2 საათით ადრეც მივსულვარ გაკვეთილზე, რადგან საათი არ მქონდა. ტრანსპორტისა და გადაადგილების პრობლემაც იყო.

ბათუმში თურქეთის საკონსულომ ფონდი შექმნა სპეციალურად ჩემთვის, რომ ჩაბარების შემდეგ სწავლა შემძლებოდა სტამბოლში. მართალია, თუ არ ვისწავლიდი ისე არავინ მიმიღებდა მარმარას უნივერსიტეტში, მაგრამ უსახსროდ გზას ვერ გავიკვალავდი, იქ ბევრი რამ მჭირდებოდა.

ყოველთვის მინდა მადლობა გადავუხადო ყველა იმ ადამიანს, ვინც ჩემში განვითარების პოტენცია დაინახა და გზა დამანახა. დაწერთ ამას? ხომ შეიძლება?

• პარტიაზე უნდა გკითხოთ. გახარიამ პარტიის დაფუძნებისთანავე გახსნა რეგიონებში ოფისები. ზოგადადაც პარტიას საარჩევნო პირობებში დიდი დაფინანსება სჭირდება. გაქვთ ინფორმაცია პარტიის დაფინანსების ძირითად წყაროებზე?

შემოწირულობებით ვარსებობთ. პირად მაგალითს გეტყვით:  ბაგრატიონი-ჭაობის პარტიული ოფისისთვის ჩემმა მეგობარმა დამითმო ფართობი. ვთხოვე ერთი თვით და უარი ვერ მითხრა. ჩვენ არ გვაქვს დიდი დაფინანსება, უბრალოდ, არიან ადამიანები, რომლებიც ჩვენს ხედვებს იზიარებენ და გვეხმარებიან. ახლაც რომ შემოხვიდეთ ჩემს ოფისში, ჯერ ბანერიც კი არ მაქვს.

• ბათუმში რას ხედავთ მთავარ პრობლემად, რა არის ქალაქის მთავარი წუხილი?

ქალაქის მოუწესრიგებელი ინფრასტრუქტურა, სოციალური პრობლემები, გაუმართავი ჯანდაცვა – ბევრი პრობლემაა ქალაქში.

სტამბოლში ბევრ მოწინავე კლინიკაში ვმუშაობდი, ვხედავდი რა მაღალ დონეზეა იქ მედიცინა…

უმნიშვნელოვანესია ჩემთვის ბავშვთა უფლებები, ყველა ბავშვს უნდა შეეძლოს იცხოვროს ოჯახურ გარემოში, მზრუნველობის და სითბოს გარემოცვაში, ყველა ბავშვს უნდა მიუწვდებოდეს ხელი ხარისხიან განათლებაზე.

ცალკე პრობლემაა ბაღებში ადგილების დეფიციტი ბათუმში. ბევრი მსურველია და მშობლები ვერცკი არეგისტრირებენ შვილებს.

ბათუმში მცხოვრები ყველა ადამიანისთვის დიდი პრობლემაა მწვანე სივრცეების ნაკლებობა.

• საბავშვო ბაღების პრობლემებს როგორ გადაჭრიდით?

ამ პრობლემის მოსაგვარებლად ახალი ბაღები უნდა აშენდეს, საჭიროებების, შესწავლის საფუძველზე, როცა ზუსტად გვეცოდინება, რამდენი ბაღი დააკმაყოფილებს მოთხოვნებს სრულად.

სკოლამდელი და სკოლის განათლება ბავშვის უფლებაა და სახელმწიფო ვალდებულია ყველა ბავშვს მიუწვდებოდეს მის მიერ მოწყობილ სისტემაში ხელი ამ სიკეთეზე.

ადრეული ასაკიდანვე მნიშვნელოვანია ბავშვის განათლება – განვითარება. ამ პარტიაში პროფესიონალთა გუნდი მუშაობს, ვისთვისაც ისევე მნიშვნელოვანია ეს პრობლემები, როგორც ჩემთვის. ეს მაიმედებს და ძალას მმატებს.

• ბათუმში ბევრი უკანონო მშენებლობა და ჩაუბარებელი შენობებია. როგორია თქვენი მოსაზრება, რა უნდა ვუყოთ ამ ყველაფერს?

რაც აქამდე ააშენეს, ალბათ ვეღარაფერს მოვუხერხებთ. უკანონო მშენებლობები და ურბანული ქაოსი უნდა დასრულდეს და სხვა ეტაპი უნდა დაუდგეს ამ ქალაქს.

• უნდა აშენდეს თუ არა ახალი მეჩეთი ბათუმში? იცით თუ არა ამ საკითხზე თქვენი პარტიული ლიდერების მოსაზრება?

მგონია, რომ სასამართლო გადაწყვეტილებას უნდა დაველოდოთ.

• მაგრამ 2 ინსტანციის სასამართლომ უკვე შეაფასა დისკრიმინაციულად ბათუმის მერიის გადაწყვეტილება ახალი მეჩეთის მშენებლობის ხელშეშლაზე.

უზენაესი სასამართლოს გადაწყვეტილებასაც დაველოდოთ. ამაზე ვრცელ კომენტარს მე ვერ გავაკეთებ ჯერ. ისე კი, ჩემი პირადი დამოკიდებულება არის ის, რომ საკულტო ნაგებობების აშენება არ აშენებას უნდა წყვეტდეს საზოგადოება. მოვა დრო, როცა ამ საკითხზე მოგვიწევს საუბარი.

• 2019 წლის 20 ივნისის პროტესტი მინდა შეგახსენოთ. გახარიას მინისტრობის პირობებში სპეცრაზმელები თვალში დამიზნებით ესროდნენ აქციის მონაწილეებს და აბრმავებდნენ. როგორ ხედავთ თქვენ ამ პერიოდს?

ხალხის პროტესტი გულწრფელი იყო ივნისის მოვლენების დროს. ძალიან ცუდად განვითარდა მოვლენები, მაგრამ იყო პარლამენტზე შტურმის მცდელობაც და სახელმწიფო ამას ვერ დაუშვებდა. დამნაშავეა სახელმწიფო ერთი შეხედვით იმ ნაწილში, რომ სასტიკად მოექცნენ პროტესტის მონაწილეებს, მაგრამ შეიძლება უარესზე უარესიც მომხდარიყო.

• რას გულისხმობთ, რა შეიძლებოდა მომხდარიყო ადამიანებისთვის თვალების დათხრაზე უფრო უარესი?

კი, ეს ძალიან სამწუხარო იყო, მაგრამ სახელმწიფოს მხრიდანაც უნდა დავინახოთ რაღაცეები, შეიძლებოდა დიდი ქაოსი დაწყებულიყო პარლამენტში რომ შეჭრილიყვნენ პროტესტის მონაწილეები.

 

ხელვაჩაურში, სოფელ ჩხუტუნეთში ავტომანქანით ხევში გადავარდნილი ქალის მდგომარეობა სტაბილურია. დღეს, 4 სექტემბრის ხევში მსუბუქი ავტომანქანა გადავარდა, ადგილზე მისულ სასწრაფო-სამედიცინო სამსახურს 35 წლის კაცი გარდაცვლილი დახვდა, ქალი კი კლინიკაში გადაიყვანეს

კლინიკა BMC-ში გვითხრეს, რომ ქალს მრავლობითი დაზიანება აქვს, თუმცა ის სიცოცხლისთვის შეუთავსებელი არ არის. ქალს მალე ოპერაციას გაუკეთებენ.

შინაგან საქმეთა სამინისტროს ინფორმაციით, გამოძიება დაიწყო სისხლის სამართლის კოდექსის 276-ე მუხლის მე-6 ნაწილის მიხედვით.

„ქობულეთში 8 მიმართულებით და ხელვაჩაურში 4 მიმართულებით მიმდირეოაბს გზის გაწმენდითი სამუშაოები,“ – აცხადებენ აჭარის გზების დეპარტამენტში. ძლიერი წვიმის შედეგად აჭარის რეგიონში რამდენიმე სოფელში ჩამოწვა მეწყერი.

სტიქამ განსაკუთრებით ქობულეთი დააზარალა.

აჭარის გზების დეპარტამენტის ინფორმაციით, დღის განმავლობაში აღდგება მოძრაობა ყველა გზაზე, რომელიც მეწყრის გამო ჩაიკეტა.

„სამუშაოები ხორციელდება შემდეგ საავტომობილო გზებზე: კეჭიეთი–ნოღაიდლების, წყავროკა-რომანაძეების, წყავროკა-ლაზიშვილების, ზედა ლეღვა-ბარათაშვილების, ზედა კვირიკე-ბერიძეების, გვარა-ხუტულაიშვილებისდა დაგვა-ლაზისტანის მიმართულებებით.

ხელვაჩაურის მუნიციპალიტეტში 4 მიმართულებით იწმინდება საავტომობილო გზები. მახო-დავითაძეების-თხილნარი-ხინკილაძეების, კირნათი-ზედა კირნათის და მახო-გენჯახეების მიმართულებით,“ – მოგვწერეს აჭარის გზების დეპარტამენტიდან.

გზები გაიწმინდება ქედაში, შუახევსა და ხულოშიც, სადაც „მცირე მეწყრული პროცესები“ იყო მხოლოდ და გზა არ ჩაკეტილა.

ბოლო 24 საათში ბათუმში კორონავირუსით 6 ადამიანი გარდაიცვალა, დადასტურდა covid 19-ის 212 ახალი შემთხვევა.

აჭარის საზოგადოებრივი ჯანდაცვის ცენტრის მონაცემებით, 4 სექტმებრის მონაცემებით, კლინიკებში მკურნალობს 853 პაციენტი, ხოლო მართვით სუნთქვაზეა 42 პაციენტი.

ბოლო 24 საათის განმავლობაში სულ გამოჯანმრთელდა 533 პაციენტი, კოვიდსასტუმროშია 925 ადამიანი, ხოლო ონლაინ კლინიკაში – 5195.

 

ბოლო 24 საათის განმავლობაში კორონავირუსით 83 ადამიანი გარდაიცვალა.

დაავადებათა კონტროლის ეროვნული ცენტრის მონაცემებით, ბოლო 24 საათში კორონავირუსის 2684 ახალი შემთხვევა დაფიქსირდა, გამოჯანმრთელდა 2695.

4 სექტემბრის მდგომარეობით სტაციონარში რჩება 7061 ადამიანი, კარანტინის რეჟიმშია 102, ხოლო კლინიკურ სასტუმროებშია – 2453 პირი.

კურორტ ბახმაროში მდინარე ბახვისწყალი მოულოდნელად ადიდდა. წყლის მოვარდნის მომენტში, მდინარეზე მიკროავტობუსი გადადიოდა, რა დროსაც ის წყალში გაიჭედა და გამოსვლას ვეღარ ახერხებდა.

შემთხვევის ადგილზე მისულმა მაშველებმა მიკროავტობუსიდან მგზავრები უსაფრთხოდ გადმოიყვანეს ნაპირზე, თუმცა თავად სამაშველო მანქანა მდინარეში ჩარჩა.

ამ დროისთვის [14:45] მიკროავტობუსი ტრაქტორის დახმარებით უკვე ნაპირზე გამოიყვანეს.

ჯერჯერობით ვერ ხერხდება მდინარეში გაჭედილი სამაშველო მანქანის ამოყვანა.

40 წლის შემდეგ შვედური ჯგუფი ABBA მუსიკალურ ალბომს უშვებს, რომელშიც 10 ახალი კომპოზიცია შევა.

თავდაპირველად აგნეტა ფელტსკუგი, ბიორნ ულვეუსმა, ბენი ანდერსონმა და ანი ფრიდ ლიუნგსტადმა გადაწყვიტეს ორი კომპოზიცია ჩაეწერათ, თუმცა შემდეგ მთელი ალბომის ჩაწერის სურვილი გაუჩნდათ.

ლონდონში გამართულ ონლაინპრესკონფერენციაზე ABBA-მ ალმობის სახელწოდებაც გაამხილა: „Abba Voyage“, რომელიც 5 ნოემბერს გამოვა.

„I Still Have Faith In You“ და  „Don’t Shut Me Down“ ასე ჰქვია 10 სიმღერიდან ორს, რომლებიც ჯგუფის ახალ ალბომში შედის.

ABBA – ს განცხადებით, 2022 წელს ლონდონში ჯგუფი დიდ შოუსაც გამართავს ალბომის სახელწოდებით „Abba Voyage“. შოუსთვის 3 ათას მაყურებელზე გათვლილი სპეციალური არენა შენდება.

ახალი ალბომისა და გასამართი კონცერტების სერიის პოპულარიზაციისთვის ჯგუფმა ახალი ვებგვერდიც შექმნა. ABBA-მ ბოლო სტუდიური ალბომი „The Visitors“ 1981 წელს გამოუშვა.

შვედური კვარტეტი 1972 წელს გაიცნო მსმენელმა, როცა მათ პირველი კომპოზიცია „People need love“ ჩაწერეს.

ჯგუფს  8 სტუდიური ალბომი და რამდენიმე ათეული სინგლი აქვს გამოშვებული. მათი სიმღერების კრებულები დღემდე გამოდის.

მართალია, დაშლის შესახებ კვარტეტის წევრებს ოფიციალურად არასდროს განუცხადებიათ, მაგრამ 1983 წლის შემდეგ ABBA-ს აღარფერი ჩაუწერია.

2000 წელს შვედურ კვარტეტს ბენდის აღდგენა, მსოფლიო ტურნე და მილიარდდოლარიანი კონტრაქტი შესთავაზეს, რასაც ისინი არ დათანხმდნენ.

2010 წლის 15 მარტს ჯგუფი ABBA როკ-ენ-როლის დიდების დარბაზის წევრი გახდა.