ავტორი: თამთა კონჯარია, მასწავლებელი
___
ბოლო დროს ძალიან ხშირად მახსენდება ჩემი ბავშვობა… თითოეული კადრი, თითქოსდა, ხელახლა ცოცხლდება ჩემს გონებაში.
თითოეულ ჩვენგანს მოეძებნება, ალბათ, ბავშვობის დროინდელი საყვარელი წიგნი, რომელიც თავად წაიკითხა ან წაუკითხეს. მახსოვს, პატარაობისას, ალბათ, სამი თუ ოთხი წლის ვიქნებოდი, დედას სოფელში მივყავდი, თბილისი-ზუგდიდის ღამის მატარებლით აფხაზეთისკენ, ჩემი საბერიოსკენ მივეშურებოდი..
მაშინ ჯერ კიდევ მოხუც ბებოებსა და ბაბუებს ხელით დაჰქონდათ გაზეთები, ფერადი ნახატებით გავსებული ზღაპრის წიგნები. ვაგონში მყოფმა დავინახე ბებო და მამას ვთხოვე, რამე ეყიდა ჩემთვის. მან წიქარა მიყიდა, რომელიც ფერადი ილუსტრაციებით იყო სავსე და ჩემზე დიდი შთაბეჭდილება მოახდინა…
გაცოცხლდა წიქარასა და მისი მეგობრის ისტორია და ამ ამბავმა ერთი შეხედვით, არაფრის მთქმელი მოგზაურობა, რომელიც ჩემი ცხოვრების ჩვეულებას წარმოადგენდა, დასამახსოვრებლად აქცია…
ბავშვობის დროინდელი მოგონებები ადამიანად გვაქცევს ხოლმე, მოგონებებზე საუბრისას კი არ შემიძლია გავიხსენო, რეი ბრედბერის საოცარი წიგნი “ბაბუაწვერას ღვინო”, რომელმაც ჩემთვის ყველაზე ძვირფასი, ლამაზი და ბედნიერი მოგონებები გააღვიძა..
გამახსენდა ბავშვობის ყველა სუნი, ფერები, გამახსენა რამდენად ლაღი და თავისუფალი შეიძლება იყოს ბავშვი, სამყაროს აღმოჩენაში ენდობოდეს საკუთარი გულის თქმასა და არ ეშინოდეს კითხვების დასმის, ესმოდეს რას ესაუბრება გარესამყარო და არ გაურბოდეს მას, უფრო მეტად ხდებოდეს მისი ნაწილი, გულწრფელად სჯეროდეს და სწამდეს ადამიანებისა…
მთელი ბავშვობა რომ გაქრეს ჩვენი ცნობიერიდან, „ბაბუაწვერას ღვინო“ ყველაფერს გააცოცხლებს და ამოატივტივებს. თუ კარგი ბავშვობა არ გქონია, მაგასაც დაგავიწყებს და ხელახლა გაქცევს ბავშვად…
წიგნს აქვს მაგიური ძალა ხელახლა განგაცდევინოს, გაგრძნობინოს და სურათ-ხატებით გაგიცოცხლოს მთელი სისავსით შენი ბავშვობაც…
ამიტომაც ძვირფასია თუკი მისი მაგია მთელი სამყაროს ყველა კუთხესა და კუნჭულს გადასწვდება.
დააკლიკე და შეავსე ცარიელი თაროები სოფლის ბიბლიოთეკებში
ან გადმორიცხეთ ჩვენს ანგარიშზე
სს “საქართველოს ბანკი”, ბანკის კოდი:BAGAGE22;
ანგარიშის ნომერი:
GE88BG0000000103117598
ა(ა)იპ თავისუფალ ჟურნალისტთა სახლი
