ნეტგაზეთი • RU

ყველას უნდა ჰქონდეს შანსი, ცხოვრების თანამგზავრი წიგნები აღმოაჩინოს – ნანო სარალიშვილი

ავტორი: ნანო სარალიშვილი, “მოგზაური ბიბლიოთეკის” მხარდამჭერი

___

მგონი ცოტა რამემ შეიძლება ისეთი გავლენა იქონიოს  ადამიანზე, როგორიც ბავშვობაში წაკითხულ წიგნებს აქვთ. განსაკუთრებით კი მაშინ, როცა წიგნის პერსონაჟები თითქმის შენი ტოლები არიან. 

მახსოვს, კითხვას როგორ ვსწავლობდი, გამოჭრილი ფერადი ასოებით სიტყვებს ვაწყობდი. და ამ თამაშ-თამაშით, ისე, რომ ვერც კი მივხვდი, ჯადოსნური სამყაროს კარი შევაღე. სიტყვა-სიტყვით ჯადოსნური სამყაროსი – ჩემი პირველი სიყვარული ჰარი პოტერი იყო. სამ პატარა ჯადოქართან ერთად გავიზარდე. მათთან ერთად გადამხდარმა თავგადასავალმა მასწავლა, როგორი უშრეტი მაგიის წყარო იყო წიგნები – თავგადასავლის, ცოდნის, სიხარულის, შიშის, გამბედაობის, აღმოჩენების წყარო. 

ახლაც, რაც კოვიდი შემხვდა და მომიწია სახლში გამოკეტვა, ვიცოდი, სადაც გავატარებდი ამ დროის უმეტეს ნაწილს – ფურცლებს შორის.

სიტყვებად ინახება ის ცოდნა და გამოცდილება, რაც კაცობრიობას დაუგროვებია აქამდე – წარმოსახული, ნაკვლევი თუ ნაცხოვრები. და ჩვენ გვაქვს საშუალება ამ გამოცდილების ნაწილი გავხდეთ, ეს გამოცდილება გახდეს ჩვენი ნაწილი. 

გამიმართლა, რომ ბავშვობაში ვიპოვე ის წიგნი, რომელიც ჩემი ნაწილი გახდებოდა, შემიყვარდებოდა, ცხოვრების ნებისმიერ ეტაპზე ჩემი თავშესაფარი იქნებოდა. წიგნი, რომელიც კითხვას მასწავლიდა.

ამ პროექტის არსებობაც იმიტომაა მნიშვნელოვანი, რომ ეს უსაზღვრო სამყარო ყველასთვის გახდეს ხელმისაწვდომი, ყველას ჰქონდეს შანსი თავისი ცხოვრების თანამგზავრი წიგნები აღმოაჩინოს.  

დააკლიკე და შეავსე ცარიელი თაროები სოფლის ბიბლიოთეკებში

ან გადმორიცხეთ ჩვენს ანგარიშზე

სს “საქართველოს ბანკი”, ბანკის კოდი:BAGAGE22;
ანგარიშის ნომერი: 
GE88BG0000000103117598
ა(ა)იპ თავისუფალ ჟურნალისტთა სახლი

 

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.