აჭარაში ლიტერატურული კონკურსი ,,პეგასი“ ჩატარდება. კონკურსი ხუთ ეტაპიანი იქნება და მონაწილეები ადგილზე დაწერილ საკონკურსო ნაშრომებს წარადგენენ: როგორც პროზას ასევე პოეზიას.
კონკურსანტების რეგისტრაცია თხუთმეტი სექტემბრის ჩათვლით მიმდინარეობს. მონაწილეობის მიღება შეუძლიათ 16-დან 25 წლამდე ახალგაზრდებს.
პანდემიის პირობებში, როცა კულტურული პროცესების კრიზისია, ისევე როგორც ყველა სფეროში, ამგვარი მხარდამჭერი კონკურსები იმედისმომცემი და მნიშვნელოვანია ახალბედა ავტორებისთვის.
ლიტერატურული კონკურსის განრიგი ასეთია:
- 20 სექტემბერს, 12:00 საათზე ხულოს მუნიციპალიტეტში ტურიზმის სააგენტოს მიერ მითითებულ ადგილზე კონკურსის მონაწილეები ორგანიზატორებისგან თემატურ დავალებებს მიიღებენ. ტექსტების შესაქმნელად კონკურსანტებს სამი საათი ექნებათ;
- 22 სექტემბერს, 12:00 საათზე შუახევის მუნიციპალიტეტში კონკურსანტები წარადგენენ პირველ ტურში შექმნილ ნაწარმოებებს და ადგილზევე, კომპეტენტური ჟიური შეარჩევს მომდევნო ტურში გადასულ ავტორებს;
- 24 სექტემბერს, 12:00 საათზე, ქედის მუნიციპალიტეტის ღონისძიებაში ის კონკურსანტები მიიღებენ მონაწილეობას, რომლებიც შუახევში შეირჩევიან;
- 26 სექტემბერს, 12:00 საათზე, ხელვაჩაურის მუნიციპალიტეტში ჟიური ფინალისტებს გამოავლენს;
- 28 სექტემბერს, ფინალის საუკეთესო ათეულში გასული ავტორები გაემგზავრებიან ქობულეთის მუნიციპალიტეტში;
- ამავე ათეულის გამარჯვებულები გადაინაწილებენ „პეგასი 2021“-ის პრიზს ხუთ სხვადასხვა ნომინაციაში.
გამარჯვებული ავტორების დაჯილდოება გაიმართება 28 სექტემბერს 14:00 საათზე, პეტრას ციხეზე. „პეგასი 2021“-ის გამარჯვებულ ავტორს გადაეცემა 500 ლარი ჯილდოს სახით. ყველა ნომინანტს კი გადაეცემა 200 ლარი.
კონკურსის მხარდამჭერებსა და კერძო პირებს თავიანთი რჩეული ავტორები ეყოლებათ, რომლებსაც საჩუქრებს გადასცემენ.
გამარჯვებულებს ფულად ჯილდოებს ,,აჭარისწყალი ჯორჯია“ გადასცემს.
პროექტის მიზანია დამწყები ავტორების გამოვლენა და მათი პოპულარიზაცია, ასევე, ტურიზმის განვითარების ხელშეწყობა ხუთივე მუნიციპალიტეტში.
ფინალისტებისთვის საჩუქრად გამოიცემა ბროშურა „პეგასი 2021“ რომელშიც მათ მიერ შექმნილი ნაწარმოებები შევა.
პროექტის მხარდამჭერები არიან: ა/რ აჭარის განათლების კულტურისა და სპორტის სამინისტრო, აჭარის მწერალთა სახლი, ხულოს, შუახევის, ქედის, ხელვაჩაურისა და ქობულეთის მუნიციპალიტეტების მერიები, ,,აჭარისწყალი ჯორჯია“, შ.პ.ს ,,ოქროს არწივის” მფლობელი და გენერალური დირექტორი, სოფიო ლორთქიფანიძე, არასამთავრობო ორგანიზაცია ,,მეხუთე სტიქია“. პროექტის მთავარი ორგანიზატორი და იდეის ავტორი ნანო შაინიძეა, პროექტის თანაორგანიზატორი კი რამაზ ხმალაძე.
კონკურში მონაწილეობის მისაღებად მსურველებმა რეგისტრაცია უნდა გაიარონ სატელეფონო ზარის საშუალებით შემდეგ ნომრებზე:
[checklist]
- ქობულეთი: 599 53 38 08 ლია შაქარიშვილი
- ხელვაჩაური: 577 05 90 41 გურანდა დოლიძე
- ქედა – 599 50 08 46 ირმა ქოქოლაძე
- შუახევი – 591 71 21 41 ვახტანგ გოგრაჭაძე
- ხულო – 595 50 46 36 რამაზ ხმალაძე
[/checklist]
ლიტერატურული კონკურსი პეგასი, პირველად 2019 წელს ხულოს მუნიციპალიტეტში ჩატარდა, წელს კი მესამედ ტარდება რეგიონის მასშტაბით.
