ევროპის ჩემპიონატისთვის ქართველები და თურქები ერთად ემზადებიან

აკაკი ცენტერაძე, საქართველოს ახალგაზრდული ნაკრების მწვრთნელი: ერთობლივი შეკრების ჩატარება ჩვენი იდეა იყო. თავდაპირველად მხოლოდ ქართველი სპორტსმენებით ვაპირებდით შეკრებას, თუმცა, ფედერაციის პრეზიდენტს ვესაუბრე და ვუთხარი, რომ თურქულ მხარესთან კარგი კავშირები მქონდა. დავუკავშირდი ჩვენს მეზობლებს და ახლა უკვე ჩვენთან არიან. საკმაოდ ძლიერი შემადგენლობა ჩამოვიდა, რაც ძალიან წაადგება ჩვენს ბიჭებს.

 

 

 

– იქნებ, გაგვაცნოთ ვინ არიან?

 

 

– პირველ რიგში აღვნიშნავ, რომ თურქეთის დელეგაციის ხელმძღვანელია ილჰამ აშკანი, რომელიც სიხარულით დათანხმდა ჩვენს მოწვევას. ის თურქეთის ტაეკვონდოს ფედერაციის ტექნიკური დირექტორია. მწვრთნელი კი ჯენგიზ ანგინია, რომელიც ვეტერანებს შორის თურქეთის ჩემპიონი გახლავთ. კიდევ ერთი გოგონაა, რომელიც თურქეთის 18-გზის ჩემპიონია, გარდა ამისა, ის ახალგაზრდებს შორის 2004 წლის ევროპის ჩემპიონია, ასევე, 1998 წელს მსოფლიო ჩემპიონატის ბრინჯაოს პრიზიორი. მათ გარდა არიან იაქულ ემირჯი – 2012 წლის ევროპის ჩემპიონატის ბრინჯაოს პრიზიორი 21 წლამდელთა შორის და თურქეთის ორგზის ჩემპიონი; გექან ბუჰანი – ახალგაზრდებს შორის მსოფლიოს 2009 წლის ჩემპიონატის მესამეადგილოსანი და თურქეთის სამგზის ჩემპიონი; ოზალფ ანგინი – თურქეთის სამგზის ჩემპიონი და მრავალი საერთაშორისო ტურნირის გამარჯვებული; აჰმედ აივაზი – თურქეთის ორგზის ჩემპიონი და საერთაშორისო ტურნირების გამარჯვებული. 13 ჩამოსული სპორტსმენიდან 9 თურქეთის ახალგაზრდული ნაკრების კანდიდატია სხვადასხვა წონით კატეგორიაში. გარდა ამისა, ქობულეთში იმყოფებოდა მსოფლიო ტაეკვონდოს ფედერაციის საერთაშორისო კლასის არბიტრი ადნან ემიროღლუ, რომელმაც მოკლე სემინარი ჩაუტარა სპორტსმენებს ახალ წესებთან დაკავშირებით. ვფიქრობ, კარგი შეკრება გამოგვივა.

 

 

– როგორც ვიცი, ბათუმელი სპორტსმენებიდან სამი იყო ევროპისათვის მზადების განაცხადში შეყვანილი…

 

 

– ცვლილებები განხორციელდა. პირდაპირ გეტყვით, რომ დისციპლინის დარღვევის გამო ჩემი ორი სპორტსმენი სახლში დავტოვე და შეკრებაზე არ წამოვიყვანე. ამჯერად მხოლოდ ერთის, გურამ კუტუბიძის კანდიდატურა განიხილება, რომელიც 68 კგ. წონით კატეგორიაში იასპარეზებს. ნაკრებში არიან და პორტუგალიაში წამოვლენ თორნიკე ქავთარაძე (59 კგ.), მერაბ შუკაკიძე (63 კგ.) და ნიკა ღონღაძე (73 კგ.).

 

 

– თქვენი პროგნოზი?

 

 

– ევროპის ჩემპიონატი დიდი ტურნირია. ჩვენი პროგრამა მინიმუმ საუკეთესო ათეულში მოხვედრაა, მაქსიმუმ კი – ორი საპრიზო ადგილის მოპოვება. ყველაფერი ტატამზე გამოჩნდება.

 

აზერბაიჯანელი ტანმოვარჯიშეები ბათუმში

ასიფ ბაირამოვი: ბათუმში ჩამოსვლა გადაწყვეტილი გვქონდა. სპორტსკოლის დირექციას მოველაპარაკეთ და ბათუმელ სპორტსმენებთან ერთად ერთობლივი საწვრთნელი შეკრება გავიარეთ. ეს გოგონები ბაქოს „ნეფთჩის“ სპორტულ საზოგადოების წევრები არიან. ეს ერთ-ერთი ყველაზე დიდი სპორტული საზოგადოებაა აზერბაიჯანში. ქვეყნის მასშტაბით 15 სპორტული კომპლექსი გვაქვს, სადაც სპორტის 40 სახეობის, როგორც ოლიმპიური, ასევე არაოლიმპიური წარმომადგენლები ვარჯიშობენ, 200 მწვრთნელი მუშაობს ჩვენთან და ყოველდღიური დასწრება 5 ათასს სპორტსმენს აღემატება. ბათუმში ორი მწვრთნელი ვიახლეთ, ნურხაჯან ასკეროვა და ნარგიზ ჯალილოვა. ორივე სპორტის ოსტატია, ნურხაჯანი აზერბაიჯანის დამსახურებული მწვრთნელი და რესპუბლიკის სამგზის ჩემპიონია მხატვრულ ტანვარჯიშში. ამ შეკრების შემდეგ, ბაქოში რესპუბლიკის ჩემპიონატი გაიმართება, სადაც ნაკრების კანდიდატები შეირჩევიან. ბათუმში 10-11 წლის ასაკის 15 ბავშვი ჩამოვიყვანეთ. დღეში სამჯერადი ვარჯიშები გვაქვს.

 

 

 

– ბათუმელ სპორტსმენებს როგორ შეაფასებდით?

 

 

– თავად თქვენი მწვრთნელები ამბობენ, რომ კლასი ჩვენებს უფრო მაღალი აქვს და ეს გასაკვირი არცაა, იმიტომ რომ ჩვენთან სპორტი სახელმწიფო დონეზეა აყვანილი და მას დიდი ყურადღება ექცევა. ისე კი პერსპექტიული ბავშვები გყავთ და მინდა მათ წარმატება ვუსურვო, ასევე მადლობა მინდა გადავუხადო სპორტსკოლის დირექციას გულთბილი მიღებისათვის.

ხუთთეთრიანი ჩითილების მოსავალი – „პომიდორი გახმა, კიტრი კი მცირე ზომის მოვიდა“

 

 

„აქამდე სახლში გამომყავდა ნერგი, წელს ნერგები შემოიტანეს, თქვეს, ავადმყოფობას უძლებს ეს ნერგებიაო. მეც ვიფიქრე, დავრგავ, რას წავაგებმეთქი. ვიყიდე პომიდვრის ნერგი, მაგრამ სანამ ნაყოფს გაიკეთებდა მანამდე გახმა მცენარე და დავრჩი მოსავლის გარეშე. ეს რომ მცოდნოდა, არ ვიყიდდი, მაგრამ ვინ იცოდა, მარტო ჩემთან კი არა, ყველგან გაფუჭდა პომიდორი, მეზობლებიც ამას ჩივიან“ – ამბობს ომარ ბოლქვაძე.

 

ქედელი ფერმერი ამირან დიასამიძე კი ნაყიდი ჰიბრიდული ჩითილებიდან მხოლოდ ბადრიჯნის მოსავლითაა კმაყოფილია. როგორც იგი ამბობს, პომიდორი ადრე გაფუჭდა, კიტრმა კი მცირე ზომის ნაყოფი მოისხა.

 

 

„ჩითილები ადგილზე, სოფელში შემოიტანეს, კიტრის, პომიდვრისა და ბადრიჯნის ჩითილები ვიყიდე, მართალია კიტრი ადრე მოვიდა, მაგრამ ისეთი კარგი ნაყოფი არ მოისხა, როგორსაც ადგილზე გამოყვანილი ნერგები იძლევა. პიკულები მოისხა, არც წონა აქვს და არც იყიდება, იაფია ასეთი ჯიშის კიტრის ფასი, ადგილზე გამოყვანილი კიტრი და პომიდორი ბაზარზე კარგად ფასობს, ქედის პომიდორს ყოველთვის მაღალი ფასი აქვს, მაგრამ ჩითილების შემხედვარე დარჩა ხალხი მოსავლის გარეშე“ – ამბობს ფერმერი.

 

 

ხულოს გამგებლის თანაშემწე სოფლის მეურნეობის დარგში, ნოდარ მიქელაძე ამბობს, რომ ჰიბრიდულმა ჯიშებმა ხულოში ზოგან გაამართლა, ზოგან – არა.

 

„სათბურში გამოყვანილ კიტრის, პომიდვრის, ბადრიჯნისა და წიწაკის ჩითილს კლიმატთან შეგუების პრობლემა შეექმნა, ზოგ ადგილს შეეგუა, ზოგან ვერ დაიხარა, შესაბამისად, მოსავალიც ზოგან არის, ზოგან არა. მაგალითად მე ნაყიდი ჩითილიდან კარგი მოსავალი მივიღე და კმაყოფილიც ვარ, მაგრამ ჩემმა მეზობლებმა მოსავალი ვერ მიიღეს. ზოგადად ბარში მოყვანილი ჩითილს მთაში უჭირს, ადგილზე გამოყვანილი ჩითილი უფრო ამართლებს. აქვე მთავარი გასათვალისწინებელი ფაქტორი შხამ-ქიმიკატებია, რის გარეშეც ვერანაირ მოსავალს ვერ მიიღებ,  რაც არ უნდა გამძლე ჰიბრიდი იყოს“ –  ამბობს ნოდარ მიქელაძე.

 

 

პროგრამას წარმატებულად აფასებს შუახევის საინფორმაციო საკონსულტაციო სამსახურის უფროსი ავთანდილ კაკალაძე. მისი თქმით ჩითილების პროგრამამ შუახევში გაამართლა და ამბობს, რომ ვიღაც უკმაყოფილო ყოველთვის იქნება.

 

 

„მოსახლეობა კმაყოფილია. გვინდა მომავალშიც განხორციელდეს პროგრამა, ჩითილმა გაამართლა. პომიდორი ადგილზე გამოყვანილიც გაფუჭდა, დაავადებებს ჰიბრიდული ჯიშები უფრო უძლებს, ვიდრე ადგილზე გამოყვანილი ნერგი. კიტრი საადრეო ჯიში იყო, ადრე მოვიდა და ხშირი მოსავალი მოგვცა, ვეგეტაციის მოკლე პერიოდი ჰქონდა და დაასრულა მოსავლის მიღება. პომიდორიც ნორმალურადაა, ბადრიჯანს კი არანაირი პრობლემა არ აქვს“ –  ამბობს ავთანდილ კაკალაძე.

 

 

ქედის საინფორმაციო-საკონსულტაციო სამსახურის უფროსი სოსო შერვაშიძის განცხადებით მოსახლეობამ ქედაში ნაყიდი ჩითილებიდან კიტრის, ბადრიჯნისა და წიწაკის კარგი მოსავალი მიიღო, პომიდორი კი ნაადრევად გაფუჭდა. იგი შესაბამისი პრეპარატების გამოყენების აუცილებლობაზე საუბრობს:

 

„იმისთვის, რომ კარგი მოსავალი მივიღოთ, აუცილებელია აგრონომიული წესების დაცვა და შესაბამისი პრეპარატების გამოყენება. ჩვენი სამსახური მონიტორინგს აწარმოებს, მონიტორინგიდან გამოიკვეთა, რომ არ ხდება აგრონომიული წესების დაცვა, რაც მცენარეს ვნებს. პომიდორზე გამოვლენილი ავადმყოფობის გამოსაკვლევად დაავადებული მცენარე ლაბორატორიაში გამოსაკვლევად გავაგზავნეთ, პასუხს ველოდებით, რამ გამოიწვია მცენარის ნაადრევად განადგურება.“

 

 

სოსო შერვაშიძის თქმით მათი სამსახური შესაბამის რეკომენდაციებს უწევდა მოსახლეობას: „თუმცა მოსახლეობა არ გიჯერებს, შაბსა და კირს იყენებს, მედიცინა განვითარდა, ახალი პრეპარატებია, სოფელ ჯალაბაშვილებში მოსახლეობა ძირითადად პომიდორი გამოჰყავს, წელს კი 80% გაფუჭდა. ადგილობრივი მოსახლეობა წერილობით თხოვს ხელისუფლებას დახმარებას, აგროწესების დაუცველობამ გამოიწვია ნაყოფის გაფუჭება, ძირითადად ფტოტოქტოროზი ემართება მცენარეს, ყვითლდება, ავდდება და ხმება, ჯერ შემოტანილი გაფუჭდა და შემდეგ ადგილობრივი ჯიშის პომიდორი. კარგი მოსავალი მოგვცა წიწაკამ, თუმცა მწვანეა, არ წითლდება, მწვანე წიწაკა კი ბაზარზე ნაკლებად მოთხოვნადია“.

 

 

ქედელი აგრონომი ლევან ბერიძე ამბობს, რომ საჭიროა ჯიშების შეცვლა. მისი თქმით არსებული ჩითილებიდან მოწეული ნაყოფის საბაზრო ღირებულება ადგილობრივ ჯიშებთან შედარებით გაცილებით დაბალია: „მე მხოლოდ წიწაკის ჩითილი დავრგე, საუკეთესო მოსავალი მოგვცა კიტრის ჩითილმა, მაგრამ კიტრის ამ ჯიშის საბაზრო ღირებულება დაბალია, ნაკლები მყიდველი ჰყავს. ფერმერთა  ჩითილებით  მომარაგების პროგრამა აუცილებელია, მაგრამ საჭიროა ჯიშის შეცვლა, უნდა შემოიტანონ ის ჩითილები, რომლებსაც ექნება მაღალი კვებითი და საბაზრო ღირებულება. ადგილზე არსებული ჯიშები საუკეთესოა, ჩვენი მოთხოვნაა ჩვენი მოსახლეობიდან წაიღოს პომიდვრის კიტრის თესლი და იქედან იქნეს გამოყვანილი ჩითილი“ – აცხადებს ქედელი აგრონომი.

 

 

მიზნობრივი პროგრამის დაფინასებისთვის აჭარის ბიუჯეტიდან 521 000 ლარი გამოიყო, რითაც 3 მილიონი ჩითილი იქნა გამოყვანილი.

 

 

ფიროსმანის ქუჩა რეკონსტრუქციის შემდეგ

 

 

სარეკონსტრუქციო სამუშაოები შ.პ.ს. „გზამ“ შეასრულა. ხელშეკრულების მიხედვით შ.პ.ს. „გზას“ სამშენებლო ვადა 25 ნოემბრამდე აქვს განსაზღვრული, თუმცა რეალურად სამუშაოები უკვე დასრულებულია.

 

შემოსავლების სამსახურის შენობის მიმდებარე ტერიტორიაზე ახლად დაგებულ ასფალტზე რამდენიმე  მცირე მონაკვეთი დაზიანებულია.

 

 

„ბათუმელებმა“ ამის დამადასტურებელი ფოტოც აჩვენა  შ.პ.ს „გზას“. კომპანიის ტექნიკური დირექტორი ალექსანდრე ბაღათურია განმარტავს, რომ: „სურათზე ნაჩვენები ასფალტის დაზიანება აშკარად გამოწვეულია JCB ტიპის ექსკავატორის წინა კოვშის დარტყმის გამო. ამას ადასტურებს დაზიანებული წერტილებს შორის მანძილი. შესაბამისად აქ არ დგას ასფალტის დაგების ხარისხის საკითხი და საქმე გვაქვს განზრახ ან დაუდევრობის გამო ასფალტის საფარის დაზიანებასთან, რომელიც გამოწვეულია მძიმე ტექნიკით“.

 

ნომერ 24 სამარშტო ტაქსის მძღოლი ჯუმბერ კოშორაძე კმაყოფილია ქუჩის განახლებით: „შემოვლითი გზებით დავდიოდით. ხალხი წვალობდა და ფეხით უხდებოდათ ქუჩებზე გადასვლა.“  მას ჯერჯერობით შეკეთებული ქუჩისთვის წუნი არ შეუმჩნევია.  იგი ახლა ბათუმში გაუმართავსი გზის სხვა მონაკვეთზე წუხს:

 

„ავტოსადგურიდან ბონამდე გზა შესაკეთებელია, ბევრი იამებია, საცობია და ჭირს მოძრაობა, კარგი იქნება ეს მონაკვეთიც თუ გაკეთდება“ – ამბობს სამარშუტო ტაქსის მძღოლი.

 

 

მერიის პრესსამსახურის ცნობით ფიროსმანის ქუჩის რეკონსტრუქციის ღირებულება 2 მლნ 349 ათას 500 ლარი დაჯდა.

 

 

 „პროექტის ფარგლებში რეკონსტრუქციამ 1036 მეტრი გზის მონაკვეთი მოიცვა, რომელშიც ასევე შედის ხიმშიაშვილის ქუჩაზე ახალი დამაკავშირებელი ჩიხის გაკეთება.  გამოიცვალა ასწლიანი საკანალიზაციო სისტემა, დამონტაჟდა განათება და ბორდიურები, გამოიცვალა  ტროტუარის ფილები და დაიგო ასფალტი“,  – ამბობენ მერიის პრესსამსახურში.

 

 

ბათუმის ავტოტრანსპორტის მიერ ქუჩაზე გაკეთებულია ავტობუსის გაჩერების ნიშნულები, თუმცა არ არის დამონტაჟებული მოსაცდელები. საზოგადოებრივი ტრანსპორტის გაჩერების ერთი საინფორმაციო დაფის დადგმა 220 ლარამდე ჯდება, მოსაცდელების დამონტაჟება კი გაცილებით ძვირიო, ამბობს ბათუმის ავტოტრანსპორტის დირექტორი გიორგი ლორია.

 

„იქიდან გამომდინარე, რომ ბათუმი წვიმიანი ქალაქია, რთულია ქუჩაში ათი წუთი დგომა, ამიტომ ვფიქრობ, საჭიროა მოსაცდელების გაკეთება, თუმცა ეს ქალაქის საკრებულომ უნდა გადაწყვიტოს, გამოყოს თანხები და გამოაცხადოს ტენდერი“ – აცხადებს გიორგი ლორია.

 

 

გარდა იმისა, რომ ქუჩას რესტავრაცია ჩაუტარდა, გაკეთდა სავალი გზის გამყოფი ზოლიც,  სადაც 64  პალმაა დარგული.

 

პალმებით გალამაზებული ქუჩა ასევე მოსწონს ფიროსმანზე მცხოვრებ ნინო თურმანიძესაც, თუმცა უფრო მეტის გაკეთების სურვილს გამოთქვამს, იგი ამბობს, რომ ეს ცვლილება არ ეხება იმ ოჯახებს, ვისი ოთახებიც ქუჩის მხარეს არ მდებარეობს:

 

„მოგვწონს ახალი სტილის გზა, ის რომ რაღაც კეთდება, მაგრამ ეს არის ქუჩის მხარე. ბინის იქით კი არ გვივარგა ეზო, არ გვაქვს ბავშვებისთვის გასართობი და დასაჯდომი ადგილი, რომ ჩახვიდე, დაჯდე და დაილაპარაკო. ახალი ასფალტი მხოლოდ კორპუსის შემოსასვლელთანაა დაგებული, შუაზეა გაჩერებული და იმის იქით არაფერი არ გაკეთებულა“,– ამბობს ნინო.

 

 

მერიის პრესსამსახურში აცხადებენ, რომ ეზოების ასფალტირება–კეთილმოწყობა სულ სხვა პროექტია და ფიროსმანის ქუჩის რეაბილიტაციას არ ეხება:

 

„ფიროსმანის ქუჩის რეკონსტრუქციის ფარგლებში იქ მცხოვრებ მოსახლეობას რომ ეზოები და სკვერები მოუწესრიგო, ასე არ ხდება. იმიტომ, რომ რეკონსტრუქცია თავისი სახელშეკრულებო ნორმებით მიმდინარეობს და მისი დარღვევა კანონსაწინააღმდეგო ქმედებაა და დასჯადია“ – განმარტავენ მერიაში.  

ბრძოლა ქედის გამგებლობისთვის

ქედის საკრებულოში გასული კვირა დაძაბული იყო. 29 აგვისტოს დანიშნულ რიგგარეშე სხდომაზე, სადაც ქედის ახალი გამგებლის ვინაობა უნდა გარკვეულიყო, საკრებულოს 19 დეპუტატიდან მხოლოდ 8 დეპუტატი გამოცხადდა. კვორუმის არარსებობის გამო სხდომა ერთი საათით გადაიდო, თუმცა კვორუმი ვერც ერთი საათის შემდეგ შედგა.

საკრებულოს სხდომის დაწყებას და გადაწყვეტილების მიღებას დილიდანვე ელოდნენ მუნიციპალიტეტის თვითმმართველობაში მოსული „ქართული ოცნების“ მხარდამჭერები, მათი ჯგუფი კი პარალელურად  ქედის 9 აპრილის პარკში აქციას მართავდა, ისინი ვაჟა ბოლქვაძის გადადგომას, გამგებლად დავით ანანიძის დანიშვნას მოითხოვდნენ და საკრებულოს მოუწოდებდნენ, გამგებლად დავით დუმბაძის კანდიდატურა არ წარედგინათ.

ქართული ოცნების მხარდამჭერთა აქცია ქედაში

სანამ ქედის საკრებულოში არსებულ მდგომარეობაში გარკვევასა და საკრებულოს წევრებთან დაკავშირებას ცდილობდნენ, აქციის მონაწილეებს შეხვდა საკრებულოს თავმჯდომარის მოვალეობის შემსრულებელი (ქედის საკრებულოს თავმჯდომარე ბადრი დიასამიძე შვებულებაშია) ჯემალ შარაძე. მან „ოცნების აქტივისტებს“ არსებული მდგომარეობა გააცნო და ძალოვანებს მოუწოდა გაერკვიათ სიტუაცია, სად იმყოფებოდნენ დეპუტატები. მანვე აღნიშნა, რომ საკრებულოს წევრებს ვერ უკავშირდებოდა, რადგან მათი ტელეფონები გამორთული იყო.

რამდენიმე წუთში აქცია დაიშალა, თუმცა დაანონსებული სხდომა კვორუმის არარსებობის გამო ისევ ჩაიშალა და 30 აგვისტოს, 12 საათისთვის გადაიდო.

რატომ არ შედგა კვორუმი? ქედის საკრებულოს დეპუტატებმა არც „ბათუმელების“ სატელეფონო ზარებს უპასუხეს, თავისი პოზიცია მხოლოდ საკრებულოს „ქრისტიან-დემოკრატიული მოძრაობის“ დეპუტატმა გააჟღერა: „საკრებულოს პროტესტს ვუცხადებთ, როგორც დანიშნეს გამგებლად ვაჟა ბოლქვაძე, ისე გაათავისუფლონ“- განაცხადა ასლან შაქარაძემ.

30 აგვისტოს ქედის საკრებულოს სხდომათა დარბაზში დეპუტატთა რაოდენობა კიდევ უფრო შემცირდა, სხდომაზე მხოლოდ 6 დეპუტატი მივიდა. საკრებულოს ბოიკოტი გამოუცხადა და საკრებულოს თავმჯდომარის კაბინეტში შეიკრიბნენ დეპუტატები: გურამ ქობულაძე, როსტომ ბერიძე, ინგა ბერიძე, ზეინაბ წულუკიძე, ამირან დიასამიძე, შოთა ბერიძე და შორენა შერვაშიძე, თუმცა კომენტარის გაკეთება პრესასთან არც ერთმა მათგანმა არ ისურვა.

საკრებულოს თავმჯდომარის მოვალეობის შემსრულებლის ჯემალ შარაძის თქმით, ეს დეპუტატები გამგებლის მოვალეობის შემსრულებლად დავით დუმბაძის დანიშვნას მოითხოვენ, წინააღმდეგ შემთხვევაში სხდომაზე დასწრებას არ აპირებენ.

„მე ჩემს პოზიციას არ ვცვლი, მოქმედი გამგებლის წასვლის შემდეგ კონკურსს ვაცხადებ, მანამდე მოვალეობის შესრულებას გამგებლის მოადგილეს, ბადრი სურმანიძეს ვაკისრებ. მათი მოთხოვნაა გამგებლის მოვალეობის შემსრულებლად დავით დუმბაძე დაინიშნოს, დავით დუმბაძეს არ ვიცნობ, იმ ადამიანს, რომელსაც მუნიციპალიტეტთან შეხება არ ჰქონია, ვერ ვენდობი“ –  უთხრა ჯემალ შარაძემ „ბათუმელებს“.

ამ დროისათვის ქედის გამგებლობის სამი სავარაუდო კანდიდატი სახელდება: დავით დუმბაძე, რომელიც გავრცელებული ინფორმაციით პარლამენტის ვიცე-სპიკერის, მურმან დუმბაძის ნათესავია, დავით ანანიძე, რომელიც „ქართული ოცნების“ მაჟორიტარობის კანდიდატი იყო საპარლამენტო არჩევნებზე და ბადრი სურმანიძე, რომელიც ქედის გამგებლის მოადგილეა 2009 წლიდან.

შედგება თუ არა კვორუმი დღეს, 2 სექტემბერს? საკრებულოში იმედოვნებენ, რომ შედგება და ქედის ახალი გამგებლის ვინაობაც გაირკვევა.

„ორშაბათს გამოვცხადდები და გამგებლის განცხადებას მხარს დავუჭერ. პარასკევს შეუძლოდ ვიყავი, ამიტომაც ვერ მივედი. ამ ეტაპზე გამგებლობის კანდიდატი არ არის, ჯერ უნდა დაკმაყოფილდეს მოქმედი გამგებლის განცხადება წასვლის თაობაზე, რის შემდეგაც საკრებულოს  თავმჯდომარე წარმოადგენს კანდიდატურას, ჩვენთვის თუ მისაღები იქნება კანდიდატი, მხარს დავუჭერთ“ –  ამბობს ქედის საკრებულოს წევრი ამირან დიასამიძე „ბათუმელებთან”.

რაც შეეხება სტატიაზე მუშაობის დროს ჯერ ისევ მოქმედ გამგებელს, ვაჟა ბოლქვაძეს, მან განცხადება სამსახურიდან გათავისუფლების თხოვნის შესახებ კვირის დასაწყისში დაწერა. იგი პოლიტიკურ ზეწოლას გამორიცხავს და გამგებლის პოსტის დატოვების მიზეზად იმას ასახელებს, რომ „ნაციონალური მოძრაობის“ საპრეზიდენტო კანდიდატის შტაბს უხელმძღვანელებს ქედაში: „მე დარწმუნებული ვარ, რომ ყველაფერი საჯარო და გამჭვირვალე იყო. ზეწოლას ჩემზე ვერ განახორციელებენ, იმიტომ, რომ მე ქედაში სამარცხვინო არაფერი გამიკეთებია. ამ ეტაპზე საარჩევნო შტაბში ვარ საჭირო და შტაბს ვუხელმძღვანელებ. რაც შეეხება განვითარებულ მოვლენებს, პოლიტიკური დატვირთვა არა მგონია იყოს, თითქმის 11 თვე ვიმუშავე“ –  ამბობს ვაჟა ბოლქვაძე.

იგი სამსახურიდან გათავისუფლების თაობაზე განცხადების დაკმაყოფილებას ელის. „იმედია, ორშაბათს მიიღებს საკრებულო საბოლოო გადაწყვეტილებას, მე ვფიქრობ, კვორუმი შეიკრიბება“-  უთხრა ვაჟა ბოლქვაძემ „ბათუმელებს”.

“ჩემმა პაციენტებმა უანგარო სიყვარული იციან”



გიორგი ცხოველთა უფლებების დამცველი არასამთავრობო ორგანიზაციის “მეგობრის ხმის” დამფუძნებელია. ასევე აჭარის სოფლის მეურნეობის სამინისტროში საინფორმაციო-საკონსულტაციო ცენტრის მთავარი სპეციალისტია ვეტერინარიის დარგში, თან შოთა რუსთაველის სახელმწიფო უნივერსიტეტის დოქტორანტია, მიკრობიოლოგიაში იცავს ხარისხს.

“არასამთავრობო ორგანიზაციაში ჩვენი ენთუზიაზმის ხარჯზე, ყოველგვარი გრანტის გარეშე, ბევრ კარგ საქმეს ვაკეთებთ, ამ ეტაპზე, მაგალითად, სკოლებში დავდივართ და ვაკეთებთ პრეზენტაციებებს, ცნობიერებას ვუღრმავებთ ცხოველთა უფლებების შესახებ. მომავალ თაობას ვუნერგავთ ცხოველების სიყვარულს.” – ამბობს გიორგი.

 

დროის უმეტეს ნაწილს პაციენტებს უთმობს. “ძალიან კარგი პაციენტები მყავს, უანგაროდ იციან ცხოველებმა სიყვარული. მათთან ურთიერთობა ნამდვილად სასიამოვნოა ჩემთვის. ვეტერინარობა ბავშვობაში მიღებული გადაწყვეტილებაა, თუმცა არ ვიცი, ეს არჩევანი რატომ გავაკეთე, უბრალოდ გადავწყვიტე, რომ უნდა გავმხდარიყავი ცხოველების ექიმი” – იხსენებს გიორგი.

 

მიუხედავად იმისა, რომ ვეტერინარია, სახლში ცხოველი არ ჰყავს. პატარა რომ იყო, სარდაფში მალავდა ფრინველებს და მაწანწალა ცხოველებს: “ჩემი სარდაფი იყო მათი თავშესაფარი, ვუვლიდი და ვაჭმევდი. ყოველდღიურად მაქვს შეხება ცხოველებთან, ამით სიყვარულს მათ მიმართ მაინც ვივსებ. ჩემი საყვარელი ცხოველი ძაღლია, რომელიც არის ერთგულების ეტალონი. თავისი იდუმალებით საოცრად მიზიდავენ კატებიც. ვფიქრობ, ცხოველის სახლში ყოლა ძალიან დიდი პასუხისმგებლობაა.”

 

ძაღლები განსაკუთრებით კი უყვარს, მაგრამ ამ ბოლო დროს გადაწყვიტა სახლში შინშილა იყოლიოს: “შინშილა პატარა ცხოველია, ციყვს ჰგავს, არსებობს თეთრი და ნაცრისფერი, 20 წელს ცოცხლობს. შინშილები ადამიანებთან კარგად შედიან კონტაქტში, თუ შინშილას მიატოვებ, შეიძლება გული გაუსკდეს და მოკვდეს. სახლში ბევრნი ვართ, იმედია ჩვენთან არ მოიწყენს.”

 

როგორც ყველა ექიმს, გიორგისაც არ აქვს კონკრეტული გრაფიკი, თუმცა მეგობრებისთვის დროის გამონახვას მაინც ახერხებს: “საღამოობით ვიკრიბებით მეგობრები და მივდივართ კაფეში, ვსაუბრობთ, ვსვამთ ყავას ან ალკოჰოლს, მუსიკას ვუსმენთ. ბათუმში სხვა რამის კეთება ძნელია, თუმცა მე ძალიან მიყვარს ჩემი ქალაქი ზაფხულის გარდა, რადგან ზაფხულში ირღვევა ბათუმის მყუდროება. სასწავლებლად მინდა საზღვარგარეთ წასვლა, თუმცა უკან აუცილებლად დავბრუნდები, უბრალოდ არ შემიძლია ბათუმის გარეშე.” 

 

გიორგი მეგობრებთან ერთად კინოჩვენებებსაც ხშირად აწყობს, ნაქირავებ ბინაში მეგობრებთან ერთად კინოსეანსები აქვთ, პროექტორის დახმარებით საყვარელ ფილმებს უყურებენ: `შეიძლება გაგეცინოთ, მაგრამ ფანტასტიკა მომწონს, ჩემი საყვარელი ფილმია “ბეჭდების მბრძანებელი”.

 

გარდა ფილმებისა, გიორგის განტვირთვის საუკეთესო საშუალება პოეზიაა, საყვარელი ავტორი – მურმან ლებანიძე: “სამწუხაროდ მე არ ვწერ, სხვის ლექსებს ვკითხულობ, დროის დეფიციტი რადგან მაქვს, რომანებს ვერ ვკითხულობ, მხოლოდ ლექსებს. პოეტებიდან ჩემთვის ყველაზე ახლო მურმან ლებანიძეა.”

 

გიორგი ამბობს, რომ გოგონებთან მიმართებაში აუცილებელ პირობად ცხოველების სიყვარული არ უდევს: “გოგო რომ მომეწონოს, ის აუცილებლად კარგად მოაზროვნე უნდა იყოს და განათლებული, თუ ადამიანი არის შეგნებული, მას აუცილებლად ეყვარება ცხოველებიც.”

აჭარაში მეფუტკრეებს სკები დაურიგეს

 

აჭარის სოფლის მეურნეობის სამინისტროს მიზნობრივი პროგრამა “მეფუტკრეობის განვითარების ხელშეწყობა” გულისხმობს. არჩილ ხაბაძის განცხადებით, აღნიშნული პროგრამა ხელს შეუწყობს რეგიონში მეფუტკრეობის დარგის განვითარების ხელშეწყობას და მეფუტკრეობის საკვები ბაზის ათვისებას, რომლის შედეგადაც გაიზრდება ფუტკრის პროდუქტების წარმოება, სამომხმარებლო ბაზარზე ადგილს დაიმკვიდრებს ეკოლოგიურად სუფთა თაფლის პროდუქტები, ასევე გაუმჯობესდება მეფუტკრეობით დასაქმებული მოსახლეობის შემოსავალი.

 

“მეფუტკრეობის განვითარების ხელშეწყობის” პროგრამა ითვალისწინებს რეგიონის ხუთივე მუნიციპალიტეტის და ბათუმის თვითმმართველობაში ფერმერებზე სკების გაცემას თანადაფინანსების პრინციპით (ღირებულების 40%-ის გადახდით) რაც შეადგენს ერთ სკაზე 82,40 თეთრს.

 

მიმდინარე წელს პროგრამის ფარგლებში შესყიდულია 960 პენოპოლისტირული სკა. პენოპოლისტირული სკას, რომელსაც სამინისტროს წარმომადგენელთა განცხადებით, ფუტკრის ჩვეულებრივი ხის სკებისგან განსხვავებით აქვს ბევრი უპირატესობა, დამზადებულია მსუბუქი და ეკოლოგიურად სუფთა მასალისგან, უძლებს გარემო პირობების მკვეთრ ცვლილებებს, იცავს მწერებს ხმაურისგან. სკების წარმოება ხორციელდება ფინეთში, პოლონეთში, გერმანიაში, აშშ-სა და სხვა ქვეყნებში.
პროგრამას ახორციელებს ტენდერში გამარჯვებული ფირმა “აგროინვესტი”.

„მისტერ ინტელექტის“ მომავალი გეგმები

 

 

ერეკლე გურგენიძე: ერთი წელია „ნიუ სთაილის“ მოდელი ვარ, ია ღონიაძის სააგენტოში. უკვე კარგა ხანია არა მარტო მოდელის, არამდე მასწავლებლის ფუნქციაც შევითავსე, ბიჭებს სიარულს ვასწავლი.

 

 ერეკლე, როგორ აღმოჩნდი პოდიუმზე?

 

 სრულიად შემთხვევით, სამოდელო სააგენტო „ნატალი“ სკოლებში არჩევდა ბავშვებს, ჩემდა გასაკვირად მეც ამარჩიეს, მანამდე ნამდვილად არ მიფიქრია მოდელობაზე, ინერტულად ვიყავი რაღაც განწყობილი, მაგრამ როცა ამარჩიეს, ვთქვი _ რატომაც არა, სადღაც ნახევარი წელი დავდიოდი სააგენტოში, მერე კი სააგენტოს შეექმნა პრობლემები და დაიხურა. ჩემი ოჯახის წევრები თავიდან ღიმილით შეხვდნენ ჩემს სურვილს, არასერიოზულად მიიღეს. მერე კი როცა ნახეს, რომ მართლა ვიყავი დაინტერესებული, ჩვეულებრივად მიიღეს.
თავიდან მქონდა დისკომფორტის შეგრძნება, მრცხვენოდა კიდეც, საზოგადოების დამოკიდებულების გამო, როცა გავიზარდე, მივხვდი, რომ სასირცხვილო არაფერი იყო, პირიქით, ვამაყობ კიდეც.

 

 რატომ გახდა შენთვის საინტერესო მოდელის კარიერა?

 

 მარტივი გზაა წარმატებისთვის, მარტივად ხდები ცნობადი სახე, მთავარი გარეგნობაა, რომელიც ან გაქვს, ან არ გაქვს, განსაკუთრებულ ძალისხმევას არ მოითხოვს.

 

 როგორია მოდელის ცხოვრება ბათუმში?

 

ბათუმში არაფერი ხდება ისეთი, რომ განსაკუთრებული მიდგომები სჭირდებოდეს. ჩვენებები იშვიათად ეწყობა. შემოთავაზებები მქონდა თბილისიდან, მართალია იქ შედარებით უკეთესი სიტუაციაა, მაგრამ წასვლა ვერ შევძელი, ჯერ ვსწავლობ. საქართველოში მოთხოვნა ამ სფეროში უფრო გოგონებზეა, თუმცა ძალიან ცოტა აღწევს წარმატებას, ბიჭებზე კი თითქმის არ არის, ბათუმში სულ 3–4 ბიჭი მოდელია.

 

 „მისტერ აჭარის“ კონკურსზე მოგვიყევი…

 

 “შერატონში” ჩვენებაზე ვიყავი, ფლაერები დაარიგეს, საიდანაც გავიგე ამ კონკურსის შესახებ, მომეწონა. საერთოდ ძალიან კარგი იდეაა, მაგრამ ორგანიზებაში იყო დიდი პრობლემები. დაპირებული პრიზები თითქმის არ გაცემულა. თხუთმეტ საუკეთესოთა შორის მოვხვდი, „მისტერ ინტელექტუალის“ ტიტულიც მივიღე.

 

 რამ განაპირობა შენი არჩევანი მომავალ პროფესიასთან მიმართებაში?
_ ალბათ უფრო მამამ, მამაჩემიც არქიტექტორია, ბავშვობიდანვე ვხატავდი და ვხაზავდი. სამხატვრო სკოლა მაქვს დამთავრებული. არქიტექტორი პირველ რიგში არის ხელოვანი, რომელსაც აქვს თავისი სამყარო, ამიტომ მნიშვნელოვანია, რომ საკუთარ მუზას მიჰყვეს. მირჩევნია დამოკიდებული არაფერზე ვიყო, საკუთარი თავის გარდა.

 

 როგორი უნდა იყოს შენი წარმოდგენით ბათუმში არქიტექტურა?
 

 

ქუჩაში სეირნობისას პროექტებს ვხაზავ გონებაში. ვფიქრობ, სად რისი გაკეთება შეიძლება. რაღაც მომწონს, რაღაც _ არა. არქიტექტურაში მთავარია არ დაირღვეს შენობათა თანწყობა, ბათუმში კი ეს ხშირად ირღვევა. ფოსტის შენობის მიმართ რაღაცნაირი თბილი დამოკიდებულება მქონდა, დღეს კი მისგან ფასადია დარჩენილი, სადაც სასტუმრო უნდა ააშენონ, ეს ჩემთვის მტკივნეულია. რას შევცვლიდი ბათუმში? პირველ რიგში, მიდგომას შევცვლიდი არქიტექტურის და ურბანიზაციის მიმართ, როგორც ვიცი, ბათუმი ეკოლოგიურად თბილისზე და სხვა დიდ ქალაქებზე უფრო ბინძურია, ამიტომაც გამწვანებას დავუმატებდი ბათუმს, ეკოლოგიური პირობები მნიშვნელოვანია, ამ მხრივ განსაკუთრებულად უჭირს ძველ ბათუმს. ვფიქრობ, უმთავრესია შევინარჩუნოთ ის სიძველეები, რაც დაგვრჩა.

 

 შენი მომავალი გეგმები სამოდელო სფეროს უკავშირდება თუ არქიტექტურას?

 

 საზღვარგარეთ მინდა სასწავლებლად წასვლა, უფრო ევროპაში, სადაც სამოდელო სფეროც კარგადაა განვითარებული და წარმატების მოპოვების შანსიც მაქვს. მე ვფიქრობ, ნიჭს და შესაძლებლობებს ვერ გართმევს სხვა პროფესია, ალბათ არჩევანის გაკეთება არ მომიწევს. მოდელობა უფრო ადვილია, არქიტექტურა კი მთლიანად შენს უნარზეა დამოკიდებული, მით უფრო, რომ დიდია კონკურენცია. თავი რომ დაიმკვიდრო, რაღაც ღირებული უნდა შექმნა.

 

 რა არის შენთვის განტვირთვის საშუალება?

 

 მეგობრებთან ერთად ყოფნა. თუმცა წელს დავიწყე სიარული სამუსიკო სკოლაში, ყველა გაკვირვებულია, აქამდე სად იყავიო. ჩემი პედაგოგია ლია ჯაში, ვოკალის განხრით ვსწავლობ, ძალიან კმაყოფილი ვარ. აქამდე არ წამიმღერია, რომ შეემჩნიათ ჩემთვის ეს ნიჭი, ამიტომაც დამიგვიანდა. მშობლებს უბრალოდ არ ეგონათ, რომ სიმღერის ნიჭი მქონდა, მერე გაკვეთილზეც დამესწრნენ, მაშინ აღმოაჩინეს, რომ მაქვს ეს მონაცემებიც. ჩემი მუსიკით დაინტერესება ჯერჯერობით მხოლოდ გატაცებაა, ჰობი. მე ვფიქრობ, რომ რა შესაძლებლობაც გაქვს ცხოვრებაში, ყველაფერი უნდა გამოიყენო მაქსიმალურად.

 

 საპირისპირო სქესის ყურადღებას ალბათ ხშირად გრძნობ, რა დამოკიდებულება გაქვს ამ საკითხისადმი?

 

 კი ვგრძნობ, მაგრამ ცოტა მეუხერხულება, საერთოდ არ მომწონს, როცა მაქებენ, შინაგანად მორცხვი და კრიტიკული ვარ. თუმცა სხვებისთვის კომპლიმენტს არასოდეს ვიშურებ, შეიძლება ქუჩაში მომეწონოს გოგო და ვუთხრა, რომ საოცრად მშვენიერია.
როგორი გოგოები მომწონს? წითურები :) ჩემი სიმაღლის გამო კი მირჩევნია მაღალი იყოს ჩემი პარტნიორი. მომწონს გულწრფელი ადამიანები, როცა ვინმესთან გაქვს ურთიერთობა, მთავარი ნდობაა, უნდა ვენდობოდე და უნდა მენდობოდეს.

ბრეუსის თასის გათამაშება წყალბურთში

 

 

ჩემპიონატში  14-17 წლამდე ასაკის  სულ 109 მოზარდი  მონაწილეობს. აჭარის წყალბურთის ფედერაციის პრეზიდენტის ირაკლი ფანცხავას თქმით „შეჯიბრი მომავალში უფრო მაშტაბურ ფორმატს მიიღებს. მსგავსი ტიპის შეხვედრები მნიშვნელოვანია ჩვენს რეგიონში და არა მარტო წყალბურთის განვითარებისთვის.“

 

ჩემპიონატი სამი დღის განმავლობაში იახტკლუბის ტერიტორიაზე გაიმართება. ჩემპიონატი მერიის დაფინანსებითა და აჭარის წყალბურთის ფედერაციის ორგანიზებით ტარდება. თამაშს დაესწრო ცნობილი წყალბურთელის შვილი, შალვა ბრეუსიც.

 

პეტრე ბრეუსის თასს გამარჯვებული გუნდი ბათუმობაზე, 1 სექტემბერს მიიღებს.

თვითნასწავლი ხელოვანის მუყაოს ლაზიკა

თავისი სახლის ეზოში სულხანმა დღეს გამოფენა, სახელად „ლაზიკა“ გამართა. სათამაშო მოედანზე საკუთარი ფანტაზიით რამდენიმე საცხოვრებელი კორპუსის, ავტომობილების, ორი რესტორნის, ფეხბურთის სტადიონის,  მაკეტით არაშენებული ქალაქი „ლაზიკა“ მოაწყო. ის ხუმრობით ამბობს, რომ სულხან შაქარაძემ ამით მიხეილ სააკაშვილს ოცნება აუსრულა.

„ბავშვების თხოვნით მოვაწყე ეს გამოფენა. მათ ინტერნეტის მეშვეობით ნახეს ჩემი ნამუშევრები და სურვილი გაუჩნდათ დღევანდელი გამოფენის ნახვის.“

ქალაქ ლაზიკის სულხან შაქარაძისეული მაკეტი ირგვლივ ყვავილებითაა მორთული. ცარცით დახატულ გზებზე მუყაოს მანქანები აწყვია. ერთ მხარეს მუყაოს რესტორანი, სახელად „მსოფლიო თანამეგობრობა“ დევს, მეორე მხარეს –  „მარანი“,  ცენტრში აღმართულია ფეხბურთის სტადიონი და წითელი ნაძვის ხე, მასთან ახლოს კი საქორწინო მანქანა.  სულხანი მასზე აღფრთოვანებით საუბრობს და სურს, რომ ბულვარში ამ მანქანის სკულპტურა დაიდგას. სულხანი ამბობს, რომ ეს იდეა ბათუმის მერიასაც შესთავაზა, მაგრამ 2014 წლამდე გადაიდო მისი განხილვა.

პროფესიით ბუღალტერს სურს მთელი თავისი დრო და ენერგია მუყაოს ქმნილებებს მოახმაროს.

ამჟამად ის მუყაოს ყვავილების 80  დიზაინის შექმნაზე მუშაობს.

`დაიმსახურებენ ნაკრებში მოხვედრას?! _ წავლენ ტურნირზე~

აკაკი ცენტერაძე: პირველ რიგში მადლობა მინდა გადავუხადო ფედერაციის პრესიდენტს სულხან ბაბუაძეს ნდობისათვის. კარგად მესმის, რას ნიშნავს საქართველოს ნაკრების მწვრთნელობა და ვაცნობიერებ იმ პასუხისმგებლობას, რომელიც დამეკისრა. აქვე მინდა განვმარტო, რომ ამ ფაქტს დიდი მითქმა-მოთქმა მოჰყვა და არაერთგვაროვანი რეაქცია გამოიწვია სპორტის ამ სახეობის ბევრ წარმომადგენლებს შორის. მინდა ყველას გასაგონად განვაცხადო, რომ ეს არის შანსი, რომელიც მომეცა იმისთვის, რომ საკუთარი თავი საქართველოს ნაკრების მწვრთნელის ამპლუაში წარმომეჩინა, ანუ იმის თქმა მინდა, რომ ჯერ ჩემი კანდიდატურა საბოლოოდ დამტკიცებული არ არის. პორტუგალიაში გასამართი ევროპის ჩემპიონატის შემდეგ გადაწყდება, დავრჩები მთავარ მწვრთნელად თუ არა. ეს უკვე ფედერაციის ხელმძღვანელობის პრეროგატივაა.

 

 

– როგორ ფიქრობ, გუნდი მზად გყავთ?

 

 

– ბიჭები მონდომებულები არიან და მაქსიმალურად ემზადებიან. სამწუხაროდ, ყველაზე ამას ვერ ვიტყვი და ვისაც ვგულისხმობ, კარგად მიხვდება. ერთი საწვრთნელი შეკრება უკვე გავიარეთ ქობულეთში, შემდეგ თბილისში გავმართეთ სატესტო სპარინგები, ამ ტურნირმა ნაკრების კანდიდატები წარმოაჩინა, თუმცა საბოლოოდ ყველაფერი მეორე შეკრების შემდეგ გადაწყდება, რომელიც 29 აგვისტოს ქობულეთში დაიწყება. თითოეული სპორტსმენის გასაგონად მინდა ვთქვა, რომ უკვე პირადად მათზეა დამოკიდებული ყველაფერი. დაიმსახურებენ ნაკრებში მოხვედრას – წავლენ ტურნირზე, არავინ დაიჩაგრება. ეგრეთ წოდებული „ლიუბიმჩიკების“ დრო დამთავრდა. ჩემთვის არა აქვს მნიშვნელობა სპორტსმენი ბათუმელი იქნება, თბილისელი, წყალტუბოელი თუ ქუთაისელი. დაიმსახურებს?! – მოხვდება ნაკრებში! არ დაიმსახურებს? – საკუთარ თავს დააბრალოს.

 

 

_ “ლიუბიმჩიკობამ” ეტყობა თქვენც გაზარალათ..

 

 

– მარტო მე?! რამდენი სპორტსმენი დავზარალდით იმის გამო, რომ ნაკრების ყოფილი ხელმძღვანელობა მხოლოდ საკუთარ რჩეულებს ატარებდა ტურნირებზე! აღარ მინდა ამ თემაზე საუბარი. ყველამ ყველაფერი ისედაც კარგად იცის. ჩემს შემთხვევაში მსგავსი რამ გამორიცხულია. ჩემი მოსწავლეც რომ იყოს, თუ არ დაიმსახურებს და არ იქნება სათანადო ფორმაში, არ წავიყვან და მორჩა. აქვე იმასაც გეტყვით, რომ ჩემთვის მხოლოდ შიდა ტურნირზე ნაჩვენებ შედეგს არ ექნება მნიშვნელობა, ანუ შესაძლებელია სპორტსმენმა პირველი ადგილი დაიკავოს, მაგრამ ვარჯიშები გააცდინოს, უპასუხისმგებლოდ მიუდგეს საქმეს და ასე შემდეგ, ასეთ ადამიანს მე ნაკრებში არ ავიყვან. თუ სპორტსმენი ხარ, მარტო შედეგზე და საკუთარ თავზე კი არ უნდა ფიქრობდე, არამედ ქცევითაც უნდა იყო სხვისთვის მისაბაძი.

 

 

– შეკრებას დავუბრუნდეთ, ამბობენ, რომ თურქეთის ნაკრები ჩამოდის…

 

 

– საუბარია თურქეთის ახალგაზრდული ნაკრების კანდიდატებზე. თურქეთის ერთ-ერთი რეგიონის ფედერაციის ხელმძღვანელობას შევუთანხმდით, რომ სხვადასხვა რეგიონებიდან ახალგაზრდული ნაკრების კანდიდატებს შეკრებდა და საწვრთნელ შეკრებაზე ჩამოიყვანდა. დაახლოებით 15 სპორტსმენს ველოდებით. ეს შეკრება ორივე მხარეს ძალიან წაგვადგება. როგორც იცით, თურქეთს ტაეკვონდოს საკმაოდ კარგი სკოლა აქვს. ჰყავთ ოლიმპიური, მსოფლიოსა და ევროპის ჩემპიონები.

 

 

 

– ნაკრების კანდიდატებში ბათუმელებიც განიხილებიან?

 

 

– ამ ეტაპზე კონკრეტული გვარების დასახელებისგან თავს შევიკავებ და მარტო იმას ვიტყვი, რომ ნაკრებში მხოლოდ ღირსეული მოხვდება.

 

 

– მოქმედი სპორტსმენი ხართ, ახლა ნაკრებიც ჩაგაბარეს…

 

 

– გაინტერესებს ერთს მეორესთან როგორ შევათავსებ?! როცა საქმეს გულით მიუდგები, გამოგივა. როგორც სპორტსმენი, ბევრს ჩამოწერილი ვგონივარ, მაგრამ ასე იოლად დანებებას არ ვაპირებ. ახალგაზრდებთან ერთად შეკრებას ეროვნული ნაკრების კანდიდატებიც გავივლით. ოქტომბერში უკრაინაში A კლასის საერთაშორისო ტურნირი გველოდება, სადაც ევროპის უძლიერესი მებრძოლები მოიყრიან თავს. ჩვენს შესაძლებლობებსაც იქ გამოვავლენთ. დიდი პასუხისმგებლობა და გამოწვევაა ჩემთვის ახალ ამპლუაში ყოფნა და ვეცდები გავამართლო.

სარაგბო მოედანი – უთანხმოების მიზეზი საკრებულოში

 

 

გიორგი კირთაძე
გიორგი კირთაძე

სხდომის განახლებამდე უმცირესობის ფრაქციის თავმჯდომარემ გიორგი კირთაძემ საგანგებო ბრიფინგი გამართა, სადაც მან ჟურნალისტებს  აუხსნა, თუ რატომ ეწინააღმდეგება სარაგბო სტადიონის მშენებლობის დაფინანსებას და დოკუმენტებიც წარადგინა.

 

 „ბათუმის საკრებულომ გასულ წელს მიიღო გადაწყვეტილება და საქართველოს მთავრობას გადასცა ტერიტორია იმისათვის, რომ მთავრობას ეს მიწა გადაეცა რაგბის კავშირისთვის სიმბოლურ ფასად, ერთ ლარად. საქართველოს რაგბის კავშირი კი ფონდი „ქართუს“ დახმარებით ააშენებდა რაგბის მოედანს.  თავის მხრივ აჭარის მთავრობამ საქართველოს რაგბის კავშირს თვითონაც გადასცა მიწა, რომელიც მის საკუთრებაში იყო. შემდეგ  ეს ტერიტორია გაერთიანდა  და რაგბის კავშირს სტადიონისათვის საჭირო ადგილი გამოეყო. ამის შემდეგ რაგბის კავშირმა ქალაქ ბათუმის მერიას წარუდგინა პროექტი და სთხოვა მშენებლობის ნებართვა, რომელიც გაცემულია 2012 წლის პირველ ივნისს. მშენებლობის დასრულების თარიღად მითითებულია 2014 წლის პირველი  ივნისი. დამკვეთია საქართველოს  რაგბის კავშირი,  ხოლო პროექტის ავტორი შპს „ქართუ მენეჯმენტი“.

 

შეთანხმება იყო, რომ ფონდი „ქართუ“ გამოყოფდა თანხას, რაგბის კავშირი კი „ქართუ მენეჯმენტს“ დაუკვეთავდა სტადიონის აშენებას.  ორივე შპს არის ბიძინა ივანიშვილის.  ამის შემდეგ ირაკლი ჩავლეიშვილი ხდება რაგბის კავშირის ხელმძღვანელი და ის აგზავნის  წერილს პრემიერთან.“

 

წერილში, რომელიც დღეს ჟურნალისტებს გიორგი კირთაძემ გააცნო,  ბათუმის საკრებულოს თავმჯდომარე ირაკლი ჩავლეიშვილი საქართველოს ფინანსთა მინისტრს ნოდარ ხადურს მიმართავს: „იმის გამო რომ მშენებლობის დაწყების  პროცესში შეიქმნა ტექნიკური ხასიათის პრობლემები, კერძოდ საკანალიზაციო კოლექტორთან დაკავშირებით, აღნიშნული მშენებლობის დაწყება გაჭიანურდა.

 

 

მოგმართავთ თხოვნით ინფრასტრუქტურული პროექტების განვითარების პროგრამიდან გამოგვიყოთ 3 მილიონ 600 ათასი ლარი ბათუმში სარაგბო სტადიონის მშენებლობისათვის და დააყენოთ საკითხი საქართველოს მთავრობის წინაშე, რათა აღნიშნული თანხით სამუშაოების წარმართვა განხორციელდეს გამარტივებული შესყიდვის ფორმით- ერთ პირთან მოლაპარაკების წესით.“

 

ამას მოყვა პრემიერმინისტრ ბიძინა ივანიშვილის 2013 წლის 19 აგვისტოს განკარგულება #1083, რომლის თანამხმადაც საკრებულომ სარაგბო სტადიონის მშენებლობისათვის მოთხოვნილი თანხა მიიღო. პრემიერმა საკრებულოს თანხმობა მისცა სამუშაოების გამარტივებული წესით შესყიდვასთან დაკავშირებითაც.

 

გიორგი კირთაძე კი აცხადებს, რომ ფონდ „ქართუს“ ჰქონდა ამ სტადიონის მშენებლობაზე ვალდებულება აღებული და ჯერ კიდევ არსებობს მშენებლობის ვადები, ამიტომ ამ კუთხით თანხის ხარჯვა ბიჯეტიდან „არ არის გამართლებული.  გარდა ამისა, იმისათვის, რომ მერიამ მშენებლობა კანონიერად წამოიწყოს, ტერიტორია, რომელიც საქართველოს მთავრობაზეა გადაცემული, ჯერ ბათუმს უნდა დაუბრუნდეს. “

 

ირაკლი ჩავლეიშვილი
ირაკლი ჩავლეიშვილი

„მცირედი იურიდიული ნიუანსია, რაც დაიხვია ხელზე ნაციონალური მოძრაობის წარმომადგენელმა. უახლოეს დღეებში ეს საკითხი იურიდიულად გაიმართება. გარწმუნებთ, რომ საკანონმდებლო ჩარჩოებში ჩავჯდებით და შესაბამისად ვიმოქმედებთ. რაც შეეხება იმას, რატომ არ დაველოდეთ „ქართუს“. მოგეხსენებათ, რომ ბიძინა ივანიშვილი აფინანსებდა მსგავს პროექტებს, მაგრამ ბათუმის სარაგბო სტადიონის მშენებლობა დროში ძალიან გაიწელა.  იქ შეიქმნა კოლექტორის პრობლემა. შემდგომში რაც მოხდა ბანკ „ქართუსთან“ და ამ კომპანიებთან დაკავშირებით, ეს საზოგადოებამ იცის, ამიტომ ეს პროექტი დადგა კითხვის ნიშნის ქვეშ. ბათუმში რაგბის განვითარების ხელშეწყობის საჭიროების გამო ეს პროექტი ვეღარ გაჩერდება. ჩვენი გუნდი უმაღლეს ლიგაში თამაშობს და აქვს პერპეტივაც. საჭიროა ხელშეწყობა, ამიტომაც  ჩამოირიცხა თანხა ცენტრალური ბიუჯეტიდან სტადიონის მშენებლობის დასაფინანსებლად.“- განმარტავს საკრებულოს თავმჯდომარე ირაკლი ჩავლეიშვილი.


დღეს  საკრებულოს განახლებულ სხდომაზე იმ მოტივით, რომ პროგრამაში სტადიონის მშენებლობის ადგილი ვერ ჩაიწერებოდა „რადგან ტერიტორია, სადაც სტადიონი უნდა აშენებულიყო აღარ არის ბათუმის შემადგენლობაში“, ოპოზიციის მოთხოვნით, პროგრამა დღის წესრიგიდან, ასევე შესყიდვების დოკუმეტიდან ამოიღეს. თუმცა მხარი დაუჭირეს ბიუჯეტის დამტკიცებას, რომელშიც სარაგბო მოედნის მშენებლობის თანხაცაა გათვალისწინებული. ამ შემთხვევაში შემდგომში მის დამტკიცებას საარჩევნო კოდექსით გათვალისწინებული  შეზღუდვა ხელს ვეღარ შეუშლის.

 

მოედნის მშენებლობისათვის ბათუმის ბიუჯეტმა 3 მილიონ 600 ათასი ლარი მიიღო.

 

 

განახლებულ სხდომაზე დასწრების გადაწყვეტილების მიზეზად გიორგი კირთაძემ, რომელმაც დილით სხდომა პროტესტის ნიშნად ფრაქციის წევრებთან ერთად დატოვა, „ბავშვთა ბაღების დაფინანსებისა და ბათუმობასთან დაკავშირებული საკითხების დამტკიცების აუცილებლობა“ დაასახელა.

 

ირაკლი ჩავლეიშვილი კი ამტკიცებს, რომ „ისინი სხდომას დაესწრნენ, რადგან მიხვდნენ, რომ ქვორუმი მაინც შედგებოდა.“ განახლებულ  სხდომას დამატებით კიდევ ორი წევრი შეემატა, რომლებიც დილით სხდომას არ ესწრებოდნენ. პირად საუბარში საკრებულოს წევრები იმასაც ამბობდნენ, რომ მათ შორის ერთ-ერთი, კობა ზაქარია „ქვორუმის შედგენისა და ბიუჯეტის დამტკიცების ხათრით“ ბათუმში ხულოს მუნიციპალიტეტის სოფელ ღორჯომიდან, სადაც ის სამსახურიდან იყო მივლინებული, საგანგებოდ ჩამოიყვანეს. 

ბათუმის უნივერსიტეტის კონკურსის შედეგები

 

ბათუმის შოთა რუსთაველის სახელმწიფო უნივერსიტეტი აკადემიური თანამდებობების დასაკავებლად გამოცხადებული კონკურსის შედეგებს აქვეყნებს. დოკუმენტის მიხედვით, უნივერსიტეტში ამჟამად დაკავებულია 216 აკადემიური თანამდებობა. კონკურსის კრიტერიუმების დაკმაყოფილება ვერ შეძლო 83 აპლიკანტმა.

 

უნივერსიტეტის რექტორის, ალეკო ბაკურიძის განცხადებით, დარჩენილია 6 ვაკანტური ადგილი. უნივერსიტეტის აკადემიური საბჭო უახლოეს დღეებში გადაწყვეტს, თუ როდის გამოცხადდება კონკურსი ვაკანტური ადგილების დასაკავებლად.

 

შეგახსენებთ, რომ კონკურსის შედეგებს სასამართლოში დაახლოებით 30 აპლიკანტი ასაჩივრებს.

ბათუმის უნივერსიტეტში სულ 261 აკადემიური თანამდებობაა. აქედან უნივერსიტეტს კონკურსი გამოცხადებული ჰქონდა 222 თანამდებობაზე. კონკურსანტთა რაოდენობა კი 305 იყო.

ფრაქცია „ნაციონალური მოძრაობა მაჟორიტარების” ხელმძღვანელი მინარეთის დემონტაჟს ეხმაურება

 

 ირაკლი ბარამიძე ცენტრალურ ხელისუფლებას რელიგიური უმცირესობების უფლებების შელახვაში ადანაშაულებს: 

 

„ეს არის ქვეყნისათვის ძალიან სახიფათო, დამანგრეველი ფაქტი. საქართველოს მთავრობამ ვერ შეასრულა მასზე დამოკიდებული მინიმალური პასუხისმგებლობა და ვერ დაიცვა ადამიანების კონსტიტუციური უფლება. ნაციონალური მოძრაობის მმართველობის დროს ჩვენ უდიდეს ყურადღებას ვაქცევდით მსგავს ფაქტებს, რადგან საქართველო მრავალეთნიკური ქვეყანაა.“ – განაცხადა ირაკლი ბარამიძემ. 

 

იგი თანადგომას უცხადებს ადიგენში მცხოვრებ რელიგიური უმცირესობების წარმომადგენლებსა და თხოვნით მიმართავს საქართველოს მთავრობას, რომ უმოკლეს ვადებში გამოიძიოს ვითარება და დასაჯოს დამნაშავეები.

ბათუმის საკრებულოს სხდომა ჩაშლის პირას

 

 

საკრებულოს „ნაციონალური მოძრაობის“ ფრაქციის „ბათუმის მომავლისათვის“ თავმჯდომარე გიორგი კირთაძე  დღეს ბათუმის საკრებულოს სხდომაზე კატეგორიულად ითხოვდა განმარტებას იმის თაობაზე, თუ რატომ გახდა ბათუმში  რაგბის მოედნის მშენებლობის ბათუმის ბიუჯეტიდან დაფინანსება  საჭირო, მაშინ როცა მის დაფინანსებას გასულ წელს ფონდი „ქართუ“ გეგმავდა. მან ამ საკითხთან დაკავშირებით საკრებულოს მიერ შესყიდვის გამარტივებული „ერთ პირთან მოლაპარაკების“ წესის გამოყენებაც გააპროტესტა, რის შემდეგაც  პროტესტის ნიშნად მან და მისმა მხარდამჭერებმა სხდომა დატოვეს.

 

 

იმ შემთხვევაში თუ ქვორუმისათვის საჭირო რაოდენობის საკრებულოს წევრები (მინიმუმ 13 წევრი) სხდომას არ დაესწრებიან, იმ ცვლილებების  შეტანა ბიუჯეტში, რომლის დამტკიცებასაც საკრებულო დღეს გეგმავდა,  საპრეზიდენტო არჩევნების შემდგომ პერიოდამდე გადაიწევს, რადგან ხვალიდან უკვე წინასაარჩევნო პერიოდში საარჩევნო კოდექსით გათვალისწინებული შეზღუდვა ამოქმედდება.

 

საკრებულოს თავმჯდომარის ირაკლი ჩავლეიშვილის თქმით, გიორგი კირთაძეს სწორედ საარჩევნო კოდექსით გათვალისწინებულ შეზღუდვაზე  აქვს გათვლილი „სხდომის ჩაშლა, შესაბამისად ბიუჯეტის ჩავარდნა, რაც ქალაქს დააზარალებს.“ 

 

ბათუმის საკრებულოს სხდომა
ბათუმის საკრებულოს სხდომა

ოთხი ახალი გამგებელი ერთ დღეში

 

 

„ყოფილი გამგებელი შემოვიდა განცხადებით თანამდებობიდან წასვლის თაობაზე. პირად საუბარში მითხრა, რომ  სხვა სამსახურს იწყებს ბათუმში.  ამის უკან თუ რაიმე იმალება, ჩემთვის უცნობია. ადრეც ქონდა მას საუბარი ჩემთან, შეიძლება წავიდეო. სხვა განსაკუთრებული აქ არაფერი ყოფილა.“ – ასე აუხსნა შუახევის საკრებულოს თავმჯდომარემ იური აბაშიძემ „ბათუმელებს“ ყოფილი გამგებლის თენგიზ დავითაძის თანამდებობიდან  წასვლის მიზეზი.

 

 

თენგიზ დავითაძემ საკრებულოს თანამდებობიდან წასვლის თაობაზე 22 აგვისტოს მიმართა. მეორე დღეს, 23 აგვისტოს საკრებულომ ახალი გამგებელი რიგგარეშე სხდომაზე აირჩია. სხდომას 18 დეპუტატი ესწრებოდა, წარდგენილმა კანდიდატმა ტარიელ ებრალიძემ ყველას მხარდაჭრა მიიღო. საკრებულოს თავმჯდომარის თქმით, მის განცხადებას საკრებულოს „ქართული ოცნების“ ფრაქციის რვა წევრის „გამამაგრებელი“ წერილიც თან ახლდა.

 

ახალი გამგებელი ტარიელ ებრალიძე თანამდებობაზე მოსვლამდე საგანმანათლებლო საქმიანობას ეწეოდა, ის ხიჭაურის უნივერსიტეტში ერთ-ერთი ფაკულტეტის დეკანის მოადგილედ მუშაობს. 

 

საკრებულოში  „რაიმე ხელმოსაკიდი“ ვერც ხულოს გამგებლის თანამდებობიდან წასვლასთან დაკავშირებით შენიშნეს. გურამ ხოზრევანიძემ განცხადება თანამდებობიდან წასვლის თაობაზე იმავე დღეს 22 აგვისტოს, იმავე მიზეზით, „ბათუმში ახალ სამსახურში გადასვლის გამო,“ დაწერა. მისი ადგილი მეორე დღესვე გამართულ რიგგარეშე სხდომაზე ფინანსისტმა ბესიკ ბაუჩაძემ დაიკავა. ის სხდომაზე საკრებულოს სხდომაზე 22 ხმით არც ერთის წინააღმდეგ აირჩიეს. 

 

ერდროულად ოთხ მუნიციპალიტეტში ახალი გამგებლის მოსვლის გადაწყვეტილებას ხულოს საკრებულოს თავმჯდომარე ნოდარ თავართქილაძე ასე ხსნის: „ხანდახან დამთხვევა ხდება.“

 

 

23 აგვისტოს ახალი გამგებლები აირჩიეს ხელვაჩაურსა და ქობულეთშიც. ხელვაჩაურის საკრებულოს თავმჯდომარის, მალხაზ ფარტენაძის ინფორმაციით, საკრებულოში ბათუმის საზღვაო აკადემიის ყოფილი რექტორის ნადიმ ვარშანიძის გამგებლად დანიშვნაზე დიდი ხანია მსჯელობდნენ და ის ყველასთვის მოსაწონი კანდიდატურა იყო. მის დანიშვნასაც საკრებულომ კენჭი 23 აგვისტოს უყარა და სრული მხარდაჭერით დაამტკიცა. მანამდე კი ხელვაჩაურის საკრებულომ თანამდებობიდან ყოფილი გამგებელი ლევან ლორთქიფანიძე გაათავისუფლა.  ცოტა ხნის წინ მას სამსახურეობრივი მდგომარეობის ბოროტად გამოყენებაში დასდეს ბრალი. ორი კვირის წინ კი, საკუთარი განცხადების საფუძველზე, ის თანამდებობიდან გათავისუფლდა.

 

 

მას შემდეგ რაც სამართალდამცავებთან პრობლემები შეექმნა, თანამდებობიდან წასვლა გადაწყვიტა ქობულეთის გამგებელმა თენგიზ ზოიძემაც. ის სასამართლომ გირაოს სანაცვლოდ გაათავისუფლა. თენგიზ ზოიძეს სამსახურეობრივი გულგრილობის ბრალდებით ედავებოდნენ. მისი ადგილი საკრებულოს გადაწყვეტილებით გიორგი რომანაძემ დაიკავა. ქობულეთის საკრებულოს თავმჯდომარის, ელგუჯა ბაგრატიონის თქმით „ახალი გამგებლების დანიშვნის გადაწყვეტილება დროში შემთხვევით დაემთხვა და სხვა რაიმე მიზეზი არ არსებობს.“

 

 

ქედის გამგებლის მოვალეობის შემსრულებელი ვაჟა ბოლქვაძე კი ამტკიცებს, რომ შვებულებაში „ოჯახური პირობების გამო“ გავიდა. შვებულებაშია ქედის საკრებულოს თავმჯომარე ბადრი დიასამიძეც.

 

ლევან გობაძე, არასამთავრობო ორგანიზაცია „ინტელექტის“ ხელმძღვანელი, ოთხი გამგებლის ერთ დღეში შეცვლის ფაქტის შემთხვევითობას ეჭვით უყურებს: „მოვლენათა ლოგიკას თუ მივყვებით, შეგვიძლია ვთქვათ, რომ ძალიან ნაკლებ სავარაუდოა, რომ ოთხი საკრებულოს სხდომა გაიმართოს ერთდროულად და ოთხივეზე გატანილი იქნას საკითხი მუნიციპალიტეტების გამგებლების დანიშვნის შესახებ. ნაკლაბად სავარაუდო ასეთი დამთვევა მოხდეს, ეს უფრო მიანიშნებს იმაზე, რომ მითითებები გამგებლების დანიშვნაზე იყო ცენტრალიზებულად მოწოდებული, ალბათ თარიღიც და კანდიდატურებიც. მეტი ლოგიკური ახსნა ამ სიტუაციას, ვფიქრობ, არ გააჩნია. ჩემი აზრით დირექტივას ჰქონდა ადგილი და რადგან ახალი ხელისუფლების მიერ დანიშნული გამგებლების გადარჩევაც მოხდა, მე ვფიქრობ, უფრო ცენტრალურ დირექტივას ჰქონდა ადგილი.“

 

„ ეს ნიშნავს, რომ ოთხივე თვითმმართველობის ორგანოში ერთი პოლიტიკის გატარებას აქვს ადგილი.“ – ამბობს ნათია აფხაზავა, სამოქალაქო საზოგადოების ინსტიტუტის აჭარის ფილიალის ხელმძღვანელი. „თვითმმართველობის ორგანოები დამოუკიდებლად უნდა ფუნქციონირებდნენ და ღებულობდნენ გადაწყვეტილებას. წარმოუდგენელია, რომ ყველამ ერთდროულად მოიფიქრა ახალი გამგებლის არჩევა. ის, რომ არჩევნების შემდგომ რაღაც ცვლილებები უნდა ყოფილიყო თვითმმართველობაში, ცხადია, მაგრამ როცა ცვლი გამგებელს, უნდა დადგეს პოლიტიკური პასუხიმგებლობის საკითხი, რატომ მოხდა შეცვლა და ახლის დანიშვნა უნდა იყოს დასაბუთებული. ის, რომ ყოფილმა გამგებლებმა დაწერეს განცხადებები, არასტაბილურ და არასახარბიელო ვითარებაზე მიუთითებს. თუმცა ამ შემთხვევაში განცხადებების დაწერა რომ რაღაც ზეგავლენის გამო მოხდებოდა, ამის რისკები არის.“ – ამბობს ნათია აფხაზავა.

ქედის გამგებელი თანამდებობას ტოვებს

„შვებულებიდან სამსახურში დაბრუნებასთან დაკავშირებით განცხადება გუშინ შემოიტანა, დავაბრუნე და დღეს მომმართა, გამათავისუფლეთო. განაცხადში წასვლის მიზეზი არ წერია, სრული პასუხისმგებლობით ვაცხადებ, რომ ახალი გამგებელი არ დაინიშნება, მანამ, სანამ არ შეირჩევა კანდიდატი კონკურსის წესით. მოქმედი გამგებლის განცხადება წასვლის თაობაზე  არ დამიკმაყოფილებია, თუმცა, თუ წავა, მოვალეობის შესრულებას სავარაუდოდ მოადგილეს დავაკისრებ“ –  აცხადებს ჯემალ შარაძე.

მოქმედმა გამგებელმა ვაჟა ბოლქვაძემ  შვებელება 22 აგვისტოდან  20 სექტემბრამდე აიღო.  შეგახსენებთ, რომ 23 აგვისტოს ქედის გარდა, აჭარის ოთხივე მუნიციპალიტეტში შეიცვალნენ გამგებლები.

რა გახდა ვადამდე ადრე სამსახურში დაბრუნებისა და დაკავებული თანამდებობიდან გათავისუფლების თხოვნის მიზეზი, ამის გარკვევა გამგებელთან ვცადეთ, თუმცა ვაჟა ბოლქვაძის ტელეფონი გამორთულია.

„ბათუმელების“ ინფორმაციით, ვაჟა ბოლქვაძეძე ზეწოლა განხორციელდა,  იმ შემთხვევაში თუ გამგებელი სამსახურში დაბრუნებასა და წავლაზე უარს იტყოდა ქედის გამგეობაში აუდიტის სამსახური  შევიდოდა, რასაც რიგი საჯარო მოხელეების გათავისუფლება და დაკავება მოჰყვებოდა.

გამგებლის თანამდებობაზე კონკურსის გამოცხადებას საკრებულო მომავალი კვირიდან  გეგმავს.

ხალხის პარტიის ბათუმის ოფისის ბრიფინგი ადიგენის მოვლენებზე

 

ხალხის პარტიის აჭარის რეგიონალური ორგანიზაციის თავმჯდომარე ჯუმბერ თავართქილაძე პრესკონფერენციას მართავს და ადიგენში ჩატარებულ სპეც-ოპერაციას ეხმაურება. თავართქილაძე გმობს სამართალდამცავების მხრიდან მსგავს მოქმედებას და ცენტრალურ ხელისუფლებას რელიგიური უმცირესობების უფლებების შელახვაში ადანაშაულებს.

 

„ჩემი აზრით, ეს არის ვანდალური ფაქტი, რომლის აღკვეთა, სამწუხაროდ, სახელმწიფომ ვერ მოახერხა. შესაძლებელია ამ ფაქტს უარესი გართულებები მოჰყვეს, როგორიცაა რელიგიური უმცირესობების დაპირისპირება ხელისუფლებასთან და დომინანტი აღმსარებლობების მატარებელ მოსახლეობასთან“, – აცხადებს თავართქილაძე.

 

ის თანადგომას უცხადებს ადიგენში მცხოვრებ რელიგიური უმცირესობების წარმომადგენლებსა და თხოვნით მიმართავს საქართველოს პრემიერ-მინისტრს, რომ უმოკლეს ვადებში გამოიძიოს ვითარება და დასაჯოს დამნაშავეები.

მარგინალობა


მარგინალები – ადამიანთა ერთობა, ამ თუ იმ სოციალური ჯგუფის ან ქვეჯგუფის წარმომადგენლები, რომელთა ცნობიერება, მოქმედება და სტატუსი ზღვარზე, შუალედურ მდგომარეობაში იმყოფება. ეს შეიძლება გამოწვეული იყოს იმით, რომ მარგინალებმა არ იციან, როგორ მოხდეს მათი ადაპტირება რომელიმე სოციალურ ჯგუფთან ან კულტურასთან. ჩვეულებრივ მარგინალები ის ადამიანები არიან, რომლებიც მოწყვეტილი აღმოჩნდნენ წარსული სოციალურ-კულტურული სისტემიდან და ვერ შეძლეს ახალში – არსებულში ჩართვა, ამიტომაც მათი სტატუსი შუალედურ, გარდამავალ ხასიათს ატარებს და ერთგვაროვან თვითიდენტიფიკაციას არ ექვამდებარებიან (უცხო სიტყვათა ლექსიკონი).


დიანა დუმბაძე
დიანა დუმბაძე

 

მარგინალი – ტერმინი პირველად გამოიყენა რ. პარკმა 1982 წელს „კულტურული ჰიბრიდის“ აღსანიშნავად, რომელიც ორ განსხავევბული ჯგუფის ცხოვრების წესსა და ტრადიციებს მისდევს. სტიგმა შეიძლება იყოს ფიზიკური, სოციალური ან რასობრივი და ა.შ. სტიგმა და მარგინალობის პრობლემა დაკავშირებულია იდენტობასთან.
იდენტობა, პასუხობს კითხვას თუ ვინა ვარ მე და გვაძლევს კონკრეტულ ადგილს კონკრეტულ სოციალურ გარემოში.  თავის მხრივ საზოგადოება რთული ფენომენია, ამიტომაც პრობლემატურია თვითდამკვიდრება და ინტეგრაცია.
ხშირია საზოგადოების მიღმა აღმოჩენა რელიგიური, ეთნიკური თუ სოციალური სტატუსის გამო. ამის თანმდევია გარკვეული იარლიყის მიწებება – მაგალითად, „ზანგი“, „იაღოველი“, „მათხოვარი“ და ა.შ.

 

ბოლო პერიოდის მოვლენების ანალიზი აჩვენებს, რომ მოკლე ინტერვალში, ადგილობრივ დონეზე, რელიგიური კონფლიქტის არა ერთი კერა გაჩნდა და დომინანტი რელიგიური ჯგუფის მხრიდან რელიგიური უმცირესობის, განსაკუთრებით აჭარელი მუსლიმების შევიწროების შემთხვევებმა (სოფელი ნიგვზიანი, წინწყარო, ციხისძირის ინციდენტი) იმატა. ადგილობრივ ქრისტიანებსა და მუსლიმებს შორის პირველი დაპირისპირება 24 მაისს მოხდა, როცა სალოცავად შეკრებილ მუსლიმურ თემს სიტყვიერი შეურაცხყოფა მიაყენეს, რიტუალისთვის აუცილებელი ნივთები შენობიდან თვითნებურად გაიტანეს და აიძულეს დაეტოვებინათ  სამლოცველო. ქცევის ნორმების მიხედვით, საზოგადოება ვალდებულია  არ გამოჰყოს ადამიანები მათი აღმსარებლობის, სქესისაა და რასობრივი ნიშნის მიხედვით. მეტიც, ეს კონსტიტუციითაც გარანტირებულია.

 

საქართველოს კონსტიტუციის მე-2 თავის, მე-16 მუხლის თანახმად, ყველას აქვს საკუთარი პიროვნების თავისუფალი განვითარების უფლება.
ხოლო, მე-17 მუხლის პირველი პუნქტის მიხედვით, ადამიანის პატივი და ღირსება ხელშეუვალია.

 

ამ გარემოებიდან გამომდინარე ჩნდება საფრთხე, რომელიც რელიგიური ჯგუფის, როგორც მარგინალის რაობაში მდგომარეობს.
როგორც წესი, უმრავლესობისთვის საქართველოში ერთ-ერთი ყველაზე მეტად გამაღიზიანებელია განსხვავებული რეელიგისა და ეთნიკურობის მქონე ადამიანი. უმარავლესობა მათ თავიანთი კულტრურისათვის საფრთხის შემცველად მიიჩნევს.

 

ყოველი ინდივიდი ესწრაფვის თავისნაირს, იქმნება ადამიანთა გაერთიანებები საერთო ნიშნით, რამაც საზოგადოების დიფერენციაცია გამოიწვია. საზოგადოება რთული ფენომენია და მასთან დაკავშირებული თითოეული მოვლენა  პრობლემატურია. ძნელია იქონიო პროგნოზი მოსალოდნელ საფრთხეებზე.

სტიგმატიზაცია ყველა დროში ნებისმიერი საზოგადოებისთვის დამახასიათებელი, სტერეოტიპებიდან შექმნილი ხელოვნური იარლიყია. სტიგმა მრავალგანზომილებიანი ცნებაა – შეიძლება იყოს ფსიქოლოგიური, იურიდიული, სოციალური.

ადვილად შეგვიძლია განვსაჯოთ და გავრიყოთ სხვა იმიტომ, რომ ის ჩვენ არ გვგავს, ან მისი რატომღაც გვეშინია, ან მას არ ვთვლით საზოგადოების ღირსეულ წევრად. სტიგმა შეიძლება განისაზღვროს, როგორც სოციალური დამღა, დადაღვა, რომელსაც პიროვნებას საზოგადოება ცნობიერად თუ გაუცნობიერებლად ადებს; ასეთ ადამიანებს  მით უფრო უგულებელყოფენ, რაც უფრო განსხვავდება მათი ყოფაქცევა ე.წ. „ნორმისაგან“.          

 

უძლურების, მოცემულ სიტუაციაზე კონტროლის დაკარგვის განცდა ამ ეპოქაში პრობლემატურია არაა, თუმცა არსებობს იმის საფრთხეც, რომ საზოგადოებაში  დამკვიდრდდეს ახლებური სტიგმები თუ გაჩნდეს მარგინალი ჯგუფები.                                                                                                   

კლასიკური მუსიკის საღამო ბათუმში

 

დღეს ბათუმის ხელოვნების ცენტრში კლასიკური მუსიკისადმი მიძღვნილი საღამო გაიმართება.  

 

ქართველი მსმენელის წინაშე ბელორუსიის ოპერისა და ბალეტის დიდი თეატრს სოლისტები წარსდგებიან. პროგრამაშია უვერტიურები და არიები მოცარტის, ვებერის, ჯაკომო პუჩინის, ბიზეს, ვერდის და ლეონკავალოს ოპერებიდან.  

 

კონცერტში ასევე მონაწილეობას მიიღებს ბათუმის საელმწიფო მუსიკალური ცენტრის სიმფონიური ორკესტრი. 

კონცერტი საღამოს 6 საათზე დაიწყება. 

 

მუფტი ასლან აბაშიძე: აჭარიდან მუსლიმი მრევლი ახალციხისკენ მიემართება

ხულოს მუფტის, ასლან აბაშიძის თქმით, ხალხი გზაშია სოფელ დანისპარაულის პერიფერებში ჩერდებიან. „ვჩერდებით იმიტომ, რომ როგორმე სახელმწიფომ გამოიჩინს კეთილი ნება და ეს საკითხი მშვიდობიანად გადაწყდეს. ხალხი არის აღელვებული და შეურაცხყოფილი, სპეცრაზმა ჩაკეტა საზოგადოება, მოჭრეს მინარეთი, ვინც წინაღმდეგობა გაუჭია სასტიკად სცემეს სოფელ ჭელში.

მეც მრევლთან ერთად ვართ, შეიძლება გავჩერდეთ იქედან გამომდინარე, რომ არ მოხდეს დესტაბილიზაცია სახელმწიფოში და არ დაიწყოს არეულობა რელიგიის ნიადაგზე. ჩვენ რადგანაც გვინდა სტაბილურობის შენარჩუნება, იქედან გამომდინარე, დავიცდით დანისპარაულში, ხელისუფლებამ ეს საკითხი დადებითად რომ გადაჭრას“.

სოფელ ჭელში დღეს დილით მინარეთი დაანგრიეს, ხოლო მრევლის წარმომადგენლები სცემეს და დააკავეს. მუფტის – ასლან აბაშიძის ინფორმაციით, მრევლი ამ ფაქტის გამო არის აღშფოთებული.

ნადირობის სეზონი გამკაცრებული კანონითა და ჯარიმებით

 

მაია ჩხობაძე: მონადირეს აუცილებლად სჭირდება ბუნებრივი რესურსით სარგებლობისათვის დაწესებული მოსაკრებლის გადახდის დამადასტურებელი ქვითარი. ამ ქვითრის ღირებულება სეზონზე, ანუ აგვისტოს მესამე შაბათიდან მომდევნო წლის პირველ მარტამდე შეადგენს 10 ლარს. ამასთანავე, მოქალაქეს რომელიც გადამფრენ ფრინველებზე ნადირობს, უნდა ჰქონდეს თოფის ფლობისა და ტარების უფლების დამადასტურებელი დოკუმენტი, რომელიც გაცემულია შსს სამინისტროს მიერ. ნადირობის წესები განსაზღვრულია მოქმედი კანონმდებლობით, ნორმატიული აქტით და ნადირობის წესებში გაწერილია სად უნდა ვინადიროთ, რა სახეობებზე, რა დღიური ლიმიტები არსებობს და ა.შ.

 

– როგორია დღიური ლიმიტი ცალკეულ სახეობაზე და სად არის აკრძალული ნადირობა?

– ნადირობა აკრძალულია ნაკრძალებსა და ეროვნულ პარკებში და მათ გარშემო ხუთასმეტრიან ზოლში. განსაზღვრულია ნადირობის დღიური ლიმიტი, ანუ რა სახეობებზე უნდა ინადიროს მონადირემ, რა რაოდენობით და ა.შ. 17 აგვისტოდან 2014 წლის თებერვლამდე ნადირობა დაშვებულია ჩიბუხაზე, მწყერზე, ქედანზე, გარეულ მტრედზე, გულიოზე, ჩვეულებრივ გვრიტზე. ეს არის პერიოდი, როცა ამ სახეობებზე ნადირობა შესაძლებელია. ამავდროულად თითოეულ სახეობაზე დადგენილია დღიური ლიმიტი, მაგალითად, ჩიბუხა არ შეიძლება, რომ დღეში მოვკლათ ხუთზე მეტი. მწყერი არ შეიძლება მოვიპოვოთ 20 ცალზე მეტი, ქედანის დღიური ლიმიტი განსაზღვრულია 10 ცალით და ა.შ. უახლოეს პერიოდში განხორციელდება ნადირობის წესებში ცვლილება და წყალმცურავ ფრინველების რაოდენობას, რაც დღეისათვის არის შვიდი სახეობა, დაემატება კიდევ ხუთი სახეობა. სამეცნიერო ორგანოს დასკვნის საფუძველზე, წყალმცურავი ფრინველების 12 სახეობაზე იქნება ნადირობა დაშვებული.

 

– რა მეთოდებითაა აკრძალული ნადირობა და როგორ მოხდება ამის კონტროლი?

 – მინდა მონადირეები გავაფრთხილო, რომ გაძლიერებული იქნება კონტროლი, რა თქმა უნდა, გამკაცრებულია წესები. ნადირობა არ შეიძლება მცენარეული საფარის დაწვით, ღამით განათებული ფარების და ცეცხლის დანთების მეშვეობით. ეს ისეთი მეთოდებია, რომელიც მასობრივად იზიდავს ფრინველებს. ასევე არ შეიძლება წყალმცურავ ფრინველებზე ნადირობა მოტორიანი ნავებიდან და კატერებიდან, როდესაც ძრავა გამორთული არ არის. წინა წლებში გავრცელებული იყო ნადირობა ხმოვანი სიგნალების გამომცემი ელექტრონული მოწყობილობებით, ე.წ. „მანიოკებით“. ეს არის აკრძალული და ვინც მას გამოიყენებს, განიხილება როგორც ნადირობის წესის დარღვევა და გათვალისწინებულია ადმინისტრაციული სამართალდარღვევის პასუხისმგებლობის ზომები. ამასთან მინდა ვთქვა, რომ საჯარიმო სანქციები გაზრდილია.

 

თუ ნადირობას მიკუთვნებულ სახეობებზე ნადირობს პიროვნება და დარღვევა გამოვლინდა, ამ შემთხვევაში ადმინისტრაციული ჯარიმა არის ასიდან 500 ლარამდე. ამ ჯარიმას ემატება, თუ მოპოვებული ჰყავს უკანონოდ ფრინველი, გარემოსათვის მიყენებული ზიანის თანხა. ხოლო თუ ნადირობს ისეთ სახეობაზე, რომელიც არ მიეკუთვნება ნადირობის ობიექტს, ამ შემთხვევაში ჯარიმა არის 500-დან 700 ლარამდე. ასევე ნადირობა იმ იარაღით ან მეთოდით, რომლითაც ნადირობა აკრძალულია, გამოიწვევს დაჯარიმებას 1000-დან 2000 ლარამდე. გამკაცრებულია სისხლის სამართლის პასუხისმგებლობის ზომებიც. იმ შემთხვევაში, თუ გარემოსათვის მიყენებული ზიანის თანხა აჭარბებს 2000 ლარს, ეს არის უკვე მნიშვნელოვანი ზიანი. თუ ნადირობა ხდება ნებართვის გარეშე, აკრძალულ ადგილას, აკრძალული იარაღით, ეს უკვე წარმოადგენს სისხლის სამართლის პასუხისმგებლობის დაკისრების საფუძველს, სსკ-ის 301-ე მუხლის პირველი ნაწილის თანახმად.

 

იმ შემთხვევაში, თუკი ნადირობა სახელმწიფო ნაკრძალში ან ეროვნულ პარკში ხდება, ასევე მექანიკური, სატრანსპორტო ან მასობრივი განადგურების იარაღით თუ ხდება საქართველოს წითელ ნუსხაში შეტანილ ფრინველზე ნადირობა, ამ შემთხვევაშიც სისხლის სამართლის პასუხისმგებლობა დაეკისრება პირს.

 

– სამონადირეო მეურნეობებს რაც შეეხება, რამდენი მეურნეობაა ამ დროისათვის საქართველოში და როგორი მდგომარეობაა იქ?

– ცხოველებზე ნადირობა, დამტკიცებული კვოტების მიხედვით, შესაძლებელია მხოლოდ სამონადირეო მეურნეობებში. ნადირობა დანარჩენ შემთხვევებში დაშვებულია მხოლოდ გადამფრენ ფრინველებზე.

 

სამონადირეო მეურნეობებზე გაცემულია სპეციალური ლიცენზიები. დღეის მდგომარეობით ფუნქციონირებს 17 სამონადირეო მეურნეობა და 8 თევზის მეურნეობა. სამონადირეო მეურნეობა სწორედ იმ მიზნით იქმნება, რომ იქ გამრავლდეს გარეული ცხოველები. სამონადირეო მეურნეობა ყოველწლიურად იმტკიცებს კვოტას _ ეს არის მოსაპოვებელი რესურსის ოდენობა. თუ ადამიანს სურს ინადიროს გარეულ ცხოველზე და არამხოლოდ ფრინველზე, ამ შემთხვევაში უნდა მიაკითხოს სამონადირეო მეურნეობებს.

 

–  როგორია მიმდინარე და გასული წლების ბრაკონიერობის ფაქტების სტატისტიკა?

– 2011 წელს ენერგეტიკის სამინისტროს გადაეცა ბუნებრივი რესურსების მართვის სააგენტო. ამ პერიოდმა უარყოფითად იმოქმედა და ბრაკონიერობის ფაქტების გამოვლენათა რიცხვი შემცირებულია. მაგრამ ამ წლებამდე მე მაქვს სტატისტიკა და შემიძლია ვთქვა, რომ ნადირობისას ბრაკონიერობის 134-150 ფაქტი იყო გამოვლენილი. ასევე აღძრული იყო სისხლის სამართლის საქმეები უკანონო ნადირობის ფაქტებზე. გარემოსდაცვითი ზედამხედველობის დეპარტამენტი 2013 წლის მაისში შეიქმნა და დღემდე 10-მდე ფაქტია გამოვლენილი უკანონო ნადირობის, აღძრულია ერთი სისხლის სამართლის საქმე.

 

ახალგაზრდები თურქეთში, მოხუცები – ბეშუმში

სოფლამდე მისვლა საავტომობილო გზითა და ბილიკითაა შესაძლებელი. საავტომობილო გზა პირველ დასახლებამდე ერთ კილომეტრშია, ბილიკით კი, სოფელში რამდენიმე წუთში მიხვალ. რადგან სამარშრუტო ტაქსი მხოლოდ ხულოს ცენტრამდე მიდის, სოფელში მისვლა ბილიკით გადავწყვიტე.

გზაზე მხოლოდ ერთ ადამიანს შევხვდი, სოფლის შესახებ პირველ ინფორმაციასაც ემზარ ბოლქვაძისგან ვეცნობი. „შუამთობის დღესასწაულია, ბაირამიცაა, მოსახლეობა, უფრო მეტად მოხუცები, ბეშუმში არიან წასული, ახალგაზრდები კი –  თურქეთში, თხილის საკრეფად წავიდნენ, “  –  მიხსნის სოფლის მკვიდრი.

რამდენიმე წუთში პირველ მოსახლესაც შევხვდი, ომარ ბოლქვაძე სოფელში მეუღლესთან და შვილიშვილთან ერთად ცხოვრობს. როგორც ბატონი ომარი მიყვება, მისი შვილი ბათუმში მუშაობს და საცხოვრებლად ქალაქში გადავიდა: „სამსახური იქ აქვს, მე რომ წავიდე, რა ვქნა ქალაქში, ცოტ-ცოტა მოსავალი მომყავს, წელს ნერგები მოიტანეს, დავრგე პომიდორი, ამბობდნენ, ავადმყოფობას უძლებს, ადვილად ვერ აფუჭებსო, მაგრამ ადრე გაფუჭდა, არც მოსავალი მომცა. ჩემი მეზობლები, ძმისშვილები, სოფლის ახალგაზრდები თურქეთში არიან წასული, რატომ უნდა მიდიოდეს ჩვენი ხალხი თურქეთში სამუშაოდ, თან ისეთ პირობებში, რა პირობებშიც ამუშავებენ?! მაგრამ რა ქნას ხალხმა, შემოსავალი რომ არ არის, სკოლის მოსწავლეებიც წავიდნენ. კარგია, რომ წიგნებს უფასოდ დაურიგებენ, მაგრამ ჩაცმა-დახურვა ხომ უნდა, მშობელს რომ არ აქვს შესაძლებლობა, ბავშვმა რა ქნას? ამიტომაც მიდიან,“ –  მიყვება ომარ ბოლქვაძე. საუბარში ომარის მეზობელი ალბერტ ბოლქვაძეც ერთვება: „ოჯახს შემოსავალი რომ ჰქონდეს, სკოლის მოსწავლე თხილის საკრეფად წავა?!“  –  ამბობს ის.

ალბერტის მთავარი საფიქრალი უმუშევრობაა. სამი წელია, რაც უმაღლესი განათლება მიიღო და ვერ დასაქმდა. როგორც ის ამბობს, „ხულოში სამსახურს ვერ ნახავ შენი ნათესავი ან ახლობელი დიდ თანამდებობაზე თუ არ მუშაობს. სამი წელია მაგისტრატურა დავამთავრე, იურისტი ვარ, მაგრამ სამსახური ვერ ვნახე. ნათესავი თუ არ გყავს დიდ თანამდებობაზე, უმუშევარი დარჩები.  სოფელში 2-3 კაცი თუ იქნება საჯარო სამსახურში დასაქმებული, სხვა ყველა უმუშევარია,“  – ამბობს ალბერტი.

კოჩალიძეების ექვსსულიანი ოჯახიდან სოფელში მხოლოდ ამირანი და მისი ცოლი დარჩნენ.  როგორც ამირანი ამბობს, შვილები სამუშაოდ თურქეთში გაამგზავრა, მოხუცები მშობლები კი  –  ბეშუმში: „მოხუცები დასასვენებლად მთაში გავუშვი, შვილები სამუშაოდ თურქეთში წავიდნენ, ეს მათი სურვილი იყო, ჩვენი ფული გვექნებაო. ორი ბიჭი მყავს, უფროსს, ლაშას საინჟინრო დავამთავრებინე, ოთხი წელი 1500 ლარს ვუხდიდი სწავლაში, დიპლომსაც მალე აიღებს, მაგრამ რად გინდა, მეც ინჟინერი ვარ, მაგრამ ჩემი დიპლომი ამდენი ხანია ვერაფერში გამოვიყენე და ლაშას სად უნდა ვანახიო სამუშაო? ლერი მე-12 კლასშია, იფიქრა, მისი ფული ექნება, სასკოლოდ ჩასაცმელს მაინც იყიდის,“ – ამბობს ამირანი.

ამირანის მეზობლად მცხოვრები ზაზა ბოლქვაძის სახლი დაკეტილია, როგორც ამირანი ამბობს, ამ ოჯახიდანაც თურქეთში არიან წასული სამუშაოდ.

კოჩალიძეების საცხოვრებელი სახლიდან რამდენიმე მეტრში ხის ავარიული შენობაა, ავარიულ სახლში მზიური ბოლქვაძე მარტოდ ცხოვრობს, მისი ოჯახი საცხოვრებლად წლების წინ წალკაში გადავიდა, თუმცა როგორც ის ამბობს, ჰაერის გამოცვლას ვერ შეეგუა, სოფელს დაუბრუნდა და მამაპაპისეულ სახლსაც შემორჩა. ახლა სახლი დეფორმირებულია, იატაკი ალაგ-ალაგ ამოცვენილია და როგორც მზიური ამბობს, წვიმის დროს სახურავიდან წყალი ჩამოდის: „ჩემი შემოსავალი პენსია და სოციალური დახმარებაა, სულ 130 ლარი, მეორე ჯგუფის ინვალიდი ვარ,“  –  მიყვება მზიურ ბოლქვაძე.

სოფელში საჯარო სკოლა ფუნქციონირებს. განახლებაში სამედიცინო პუნქტი არ არის.

სოფლის განაპირა მხარეს, ბოსელზე დაშენებულ  ხის ერთსართულიან სახლში კი ნანული ბოლქვაძე ქმართან და ორ შვილთან ერთად ცხოვრობს. ბოლქვაძეების ოჯახის მთავარი საფიქრალი 16 წლის იმედას ჯანმრთელობის მდგომარეობაა. ორი წელია, რაც იმედამ გადაადგილების უნარი დაკარგა, მოზარდს ხერხემალთან დაკავშირებით პრობლემა აქვს, ოჯახს კი მკურნალობისთვის საჭირო თანხა არ გააჩნია: „გასულ წელს თბილისში წავიყვანე სამკურნალოდ, ფული არ მქონდა, ვის არ ვთხოვე დახმარება, მაგრამ ამაოდ, ბოლოს ძროხები გავყიდე და იმ ფულით ვუმკურნალე თბილისში. მას შემდეგ ორი წელი გავიდა, ისევ გამოკვლევები აქვს ჩასატარებელი და სამკურნალოა, მე ამის საშუალება არ მაქვს. სოციალურ შემწეობას ვიღებდი, გაზაფხულზე ისიც მომიხსნეს, იქნებ ვიღაცამ გულთან მიიტანოს ჩემი შვილის გასაჭირი და დამეხმაროს, უფულობის გამო დაინვალიდდა ბავშვი, ორი წელია სკოლიდანაც გამოვიდა, სიარული რომ ვეღარ შეძლო,“ –  ამბობს აცრემლებული დედა.

ახალგაზრდობის ცენტრები დაფინანსების გაზრდის იმედით

ქედის ახალგაზრდულ ცენტრში საინიციატივო ჯგუფ ,,new mentality” მის მიერ წარდგენილი პროექტის  –  „მუნიციპალიტეტში არსებული საჯარო სკოლების სპორტულ – გამაჯანსაღებელ  ღონისძიებებში ჩართვა“ დაფინანსებას ერთი კვირაა ელოდება. პროექტის დაფინანსებისთვის 2894 ლარია საჭირო, თუმცა ამ ეტაპზე საჭირო თანხა სამსახურს არ გააჩნია. საინიციატივო ჯგუფის გარდა ქედის ახალგაზრდულ ცენტრში ოთხი პროექტია წარდგენილი, ახალგაზრდები დაფინანსებას დონორი ორგანიზაციებისგან ელოდებიან.

ახალგაზრდობის ცენტრების დაფინანსებისთვის მიმდინარე წელს სამივე მუნიციპალიტეტში 15 000 ლარი გამოიყო, 15 000-ლარიანი ფონდი ადგილობრივმა თვითმმართველობებმა, მუნიციპალიტეტების გამგეობების შესაბამისი სამსახურების მიერ წარდგენილი მიზნობრივი პროგრამებით დაამტკიცეს. გამოყოფილი თანხით ქედის მუნიციპალიტეტის ახალგაზრდულ საქმეთა განყოფილებებმა ქედაში რვა, შუახევსა და ხულში კი ცხრა ღონისძიება დაგეგმა. ინტელექტუალური თამაშები, მარათონი ახალგაზრდებს შორის, ექსკურსიისა და დებატების მოწყობა, მუნიციპალური პირველობა მხიარულთა და საზრიანთა გუნდებს შორის – ეს იმ პროექტების ჩამონათვალია, რომლებსაც ახალგაზრდული ცენტრები წლის განმავლობაში ახორციელებენ. მიზნობრივი პროგრამების გარდა ცენტრები ახალგაზრდებს უფასო კომპიუტერულ მომსახურებასაც სთავაზობენ.

ლევან ქავთარია ქედაში ერთი თვეა იმყოფება. ზუგდიდელი ფეხბურთელი ქედის საფეხბურთო კლუბ „ბეთლემში“ თამაშობს, როგორც ის ამბობს, ახალგაზრდულ ცენტრს ხშირად მიმართავს. „მნიშვნელოვანია ასეთი ცენტრების არსებობა ისეთ რაიონში, როგორიც ქედაა, რადგან აქ ინტერნეტი ახალგაზრდობისთვის მიუწვდომელია. ხშირად მოვდივარ, ზოგი ინფორმაციას ეცნობა, ზოგიც თემას იძიებს, მე ახლობლებს ვუკავშირდები ინტერნეტით, უკეთესია ცენტრი გაფართოვდეს და მეტი კომპიუტერით აღიჭურვოს, რადგან ხშირად როცა კომპიუტერთან ვზივარ, სხვა ჩემს წასვლას ელოდება“,  – ამბობს ლევან ქავთარია.

ქედის ახალგაზრდულ საქმეთა განყოფილების მთავარი სპეციალისტი არჩილ ბეჟანიძე ახალგაზრდებს ეთანხმება. ის ამბობს, რომ ცენტრს არასაკმარისი ფართობი და დაფინანსება აქვს. მისი თქმით აუცილებელია დაფინანსების გაზრდა და დებატებისთვის შესაბამისი ოთახის მოწყობა. ბეჟანიძე აქვე დასძენს, რომ რაც უფრო დიდია ბიუჯეტი, აქტიურობაც მეტია.

„15 000 ლარი არაფერია, ახალგაზრდებმა რამდენიმე პროექტი შემოიტანეს. წარმოდგენილ პროექტებს შორის არის პროექტი სადებატო ბანაკის მოწყობაზე. დაფინანსება სპორტისა და ახალგაზრდობის დეპარტამენტს ვთხოვეთ, დეპარტამენტმა თანხის ნაწილი შემოგვთავაზა, თუმცა პროექტი ჩავარდა, რადგან თანხა ჩვენ არ გაგვაჩნდა. რაც უფრო დიდია დაფინანსება, აქტიურობაც მეტია, 25-30 000-მდე ლარი გვჭირდება. სადეპატო კლუბის მოწყობა ყველაზე კარგ პროგრამად მიმაჩნია, ფართობი რომ გვქონდეს, მოვიწვევ ახალგაზრდებს, ფირზე ვაჩვენებ თემებს: პოეზიაზე, არჩევნებზე, პოლიტიკაზე, ნატოს როლზე, ეს ყველაფერი კარგია, მაგრამ რანაირად,“ –  ამბობს არჩილ ბეჟანიძე.

ქედის მუნიციპალიტეტის ახალგაზრდულ საქმეთა განყოფილების უფროსი მამია გვარიშვილი ამბობს, რომ ადგილობრივ თვითმმართველობას 10 მიზნობრივი პროგრამის დაფინანსებისთვის 20 000 ლარის გამოყოფა სთხოვა, წარმოდგენილი 10 პროგრამიდან რვა დააფინანსეს. ამ ეტაპზე ქედაში დაფინანსების 70 პროცენტი ათვისებულია.

„საფინანსო სამსახური 5 000 ლარის დამტკიცებას დაგვპირდა, თანხას თუ დაგვიმტკიცებენ, „ყველაზე ჭკვიანისა“ და „მხიარული სტარტების“ ჩატარება გვინდა. ფართობი არასაკმარისია, 9 კომპიუტერი გვაქვს, მათგან 8 არის გამართულ მდგომარეობაში. გვინდა ჩამოვაყალიბოთ ლიტერატურული კლუბი, წერა-კითხვის კლუბი, ახალგაზრდები გაწევრიანების სურვილს გამოთქვამენ, მაგრამ არსებული ფართობი არ გვაძლევს ამის საშუალებას,“ – ამბობს სამსახურის უფროსი.

„არდადეგებზე ბებიასთან ხულოში ამოვდივარ, აქ ინფორმაცია მიუწვდომელია, ახალგაზრდობის ცენტრი, სადაც კომპიუტერი და ინტერნეტია, რაც სკოლა მოიხსნა, მას შემდეგ თითქმის სულ დაკეტილია. როცა ცენტრი მუშაობს, კომპიუტერები დაკავებულია და უნდა დაელოდო სხვის წასვლას,“ –  ამბობს სალომე ქოქოლაძე.

ხულოს ახალგაზრდული ცენტრი კონფერენციებისათვის მუნიციპალიტეტის გამგეობის დარბაზს იყენებს, სამსახურის უფროსი აკაკი ქონიანიძე ამბობს, რომ ამ მხრივ პრობლემა არ ექმნებათ, თუმცა უკეთესია ცენტრს საკუთარი დარბაზი გააჩნდეს.

„კარგი იქნება, ცენტრი თუ გაფართოვდება და დაფინანსებას გაგვიზრდიან. უკეთესია თემებში გაიხსნას მსგავსი სამსახურები, რადგან რიგი თემებისა რაიონულ ცენტრებს ათეული კილომეტრითაა დაშორებული,“ –  ამბობს აკაკი ქონიანიძე.

დაფინანსებითა და ფართობით კმაყოფილია შუახევის ახალგაზრდულ საქმეთა განყოფილების  მთავარი სპეციალისტი თამილა თოიძე: „დაფინანსებაც და ფართობიც საკმარისი გვაქვს. შვიდი კომპიუტერი გვაქვს, ორი ოთახი და საკონფერენციო დარბაზი, 9 მიზნობრივი  ღონისძიებიდან 4 ჩავატარეთ, პროგრამებში აქტიურად ჩაერთო ახალგაზრდობა, საკუთარი პროგრამებიც შემოაქვთ, პროგრამას დეპარტამენტი თუ მოიწონებს, დააფინანსებს,“ –  ამბობს თამილა თოიძე.

„დღეს ყველა საკრებულოზე ერთდროულად შეტევა მოხდა“

 

როგორც რობერტ ჩხაიძემ  აღნიშნა,  „დღეს ყველა საკრებულოზე ერთდროულად შეტევა მოხდა“. მისივე თქმით, მსგავსი ტიპის გადაწყვეტილებებს აჭარის მთავრობის თავმჯდომარეც კი ვერ იღებს და „ ეს განცხადებები იგეგმება და საბოლოო სახეს ღებულობს ძალოვანი უწყებების ხელმძღვანელთა კაბინეტებში“.  

 

„მინდა დღევანდელი განცხადებით მოვუწოდო არასამთავრობო და საერთაშორისო ორგანიზაციებს, რომ გაერკვნენ, თუ რა მოხდა დღეს აჭარაში.  დღეს, ფაქტიურად აიძულეს საკრებულოები, რომ ძალოვან სტრუქტურებთან შეთანხმებული კანდიდატები არჩეულიყო.“ – განაცხადა რობერტ ჩხაიძემ.

 

 

 „ნაციონალური მოძრაობის“ აჭარის ორგანიზაციაში მიიჩნევენ, ის ფაქტი, რომ აჭარის ოთხი მუნიციპალიტეტის საკრებულოში ერთდროულად და დამოუკიდებლად მიიღეს გადაწყვეტილება, საეჭვოა.

 

 

 „მთელი ამ ხნის განმავლობაში ჩვენ გვესმის, რომ „ქართულმა ოცნებამ“ კომპეტენტური ადამიანები დანიშნა, თუმცა, რატომ გახდნენ ისინი ერთდროულად ცუდები, ჩვენთვის გაუგებარია. ასევე ინფორმაცია ქედის გამგებელთან დაკავშირებით, რომ ის გაიქცა,  არასწორია. ამ ადამიანმა საკრებულოს თხოვნით მიმართა და შვებულებაშია გასული. სამსახურში გამოსვლისთანავე თვითმართველობაში იმსჯელებენ და მიიღებენ გადაწყვეტილებას“ – განაცხადა „ნაციონალური მოძრაობის“ წევრმა ირაკლი ბარამიძემ, რომელიც ქედის ყოფილი გამგებელია.

 

 

ქობულეთს ახალი გამგებელი ჰყავს

 

ქობულეთს ახალი გამგებელი ჰყავს – ამ ინფორმაციას ქობულეთის საკრებულოს თავმჯდომარე ელგუჯა ბაგრატიონი ადასტურებს. მისი თქმით საკრებულომ გამგებლად გიორგი რომანაძე აირჩია.

 

ქობულეთის საკრებულო 27 წევრისგან შედგება. დღევანდელ სხდომაზე 25 წევრი ესწრებოდა. საკრემულომ  ახალი თავმჯდომარე გიორგი რომანაძე 25 ხმით არც ერთის წინააღმდეგ აირჩია. ახლად არჩეული გამგებელი გიორგი რომანაძე ბიზნესსკოლაში ლექციებს კითხულობს და აქვს საბანკო სექტორში მუშაობის 16 წლიანი გამოცდილება.

ახალი გამგებლები ხულოსა და შუახევში

 

 დღეს გამართულ საკრებულოს რიგგარეშე სხდომას შუახევში საკრებულოს 19 დეპუტატიდან  18 დეპუტატი ესწრებოდა, გამგებლის მოვალეობის დროებით შემსრულებლად წარდგენილ კანდიდატს – ტარიელ ებრალიძეს  ყველა დამსწრე დეპუტატმა დაუჭირა მხარი. ტარიელ ებრალიძე ხიჭაურის უნივერსიტეტის სრული პროფესორია.

ხულოში გამართულ რიგგარეშე სხდომას კი 23-დან 22 დეპუტატი ესწრებოდა, წარდგენილ კანდიდატს, ბესიკ ბაუჩაძეს ყველა დამსწრე დეპუტატმა დაუჭირა მხარი. ბესიკ ბაუჩაძე კი ბათუმის შოთა რუსთაველის სახელმწიფო უნივერსიტეტის ფინანსების, აღრიცხვისა და აუდიტის დეპარტამენტის ასოცირებული პროფესორია. 

 

რაც შეეხება ქედის მუნიციპალიტეტს, აქ საკრებულო სხდომა ორშაბათისთვის აქვს ჩანიშნული. „ბათუმელების” ინფორმაციით, იმ შემთხვევაში თუ მოქმედ გამგებელზე ზეწოლა მოხდება, ქედის საკრებულო საკუთარი კანდიდატების, ჯემალ შარაძისა და ედნარ აბულაძის წარდგენას გეგმავს. ჯემალ შარაძე საკრებულოს თავმჯდომარის მოადგილეა, ედნარ აბულაძე კი საკრებულოს წინა მოწვევის თავმჯდომარე. ქედის მოქმედი გამგებელი კი გუშინ შვებულებაში გავიდა.

ხელვაჩაურში ახალი გამგებელი აირჩიეს

 

ნადიმ ვარშანიძე ცოტა ხნის წინ ბათუმის საზღვაო აკადემიის რექტორის თანამდებობაზე მუშაობდა და საკრებულოს თავმჯდომარის მოადგილის ნუკრი სირაბიძის ინფორმაციით ის ამჟამად არც ერთი პარტიის წევრი არ არის.

 

მთავარი ხარისხია და არა რაოდენობა



ჯონი ცივაძე: მთელი ჩემი ცხოვრება სპორტს მივუძღვენი. მართალია, აქტიური სპორტული კარიერა დიდი ხნის წინ დავასრულე, მაგრამ სხვადასხვა სტრუქტურებში ვმუშაობდი, რომლებიც აჭარაში სპორტს კურირებდა. რვა წლის მანძილზე აჭარის სპორტის სამინისტროს ვხელმძღვანელობდი, საჩოგბურთო კორტების პრეზიდენტიც ვიყავი და ბათუმის „დინამოსაც“ ვმეთვალყურეობდი, ველოსპორტის ფედერაციის პრეზიდენტიც ვიყავი. ეს გასული საუკუნის 1990-იან წლებში იყო, სწორედ ის პერიოდია, როდესაც სპორტი აჭარაში იმაზე გაცილებით უკეთეს მდგომარეობაში იყო, ვიდრე ახლაა. გაიხსენეთ, რაგბი, კალათბურთი, ფეხბურთი, სხვადასხვა სახეობები და თავად მიხვდებით, რომ სიმართლეს ვამბობ. სწორედ ჩემი ინიციატივითა და ძალისხმევით მოხერხდა, რომ 2000 წელს, ბათუმში, აღმოსავლეთ ევროპის ახალგაზრდული ჩემპიონატი ჩავატარეთ ჩოგბურთში 14 წლამდე ასაკის სპორტსმენთა შორის, იმავე წელს, „ბათუმი ლეიდის ოუფენის“ საპრიზო ფონდი 50 ათასამდე ავიყვანეთ.

 

 

– ეს რაც შეეხება თქვენს წარსულს. ოლიმპიური კომიტეტის პრეზიდენტობა რატომ გადაწყვიტეთ?

 

 

– ეს ნაბიჯი სპორტსმენთა და მწვრთნელთა მიმართ უსამართლო დამოკიდებულებამ გადამადგმევინა. ვხედავდი, რომ ძირეული ცვლილებები აუცილებელი იყო და სწორედ ამიტომ გადავწყვიტე პრეზიდენტობაზე კენჭი მეყარა. მადლობა მინდა გადავუხადო იმათ, ვინც მხარი დაუჭირა ჩემს კანდიდატურას.

 

 

– არჩევისთანავე თქვენი გეგმების შესახებ ღიად ისაუბრეთ. რისი გაკეთება მოახერხეთ ამ ხუთი თვის მანძილზე?

 

 

– ამ ეტაპზე მუშა პროცესში ვართ. გეგმებს რაც შეეხება, არ შეცვლილა, ვაპირებ ყოველთვიური სტიპენდიების დანიშვნას სპორტსმენებისა და მწვრთნელებისთვის. სტიპენდიას ისინი ადრეც იღებდნენ, მაგრამ განსხვავება ის იქნება, რომ გაიზრდება სტიპენდიანტი სპორტსმენების რაოდენობა და თავად სტიპენდიაც. სავარაუდოდ, 20 სპორტსმენსა და 10 მწვრთნელს დავუნიშნავთ სტიპენდიას, რა თქმა უნდა, შედეგების გათვალისწინებით. უახლოეს მომავალში უნდა გადაწყდეს ოლიმპიური კომიტეტისთვის ოფისის გადაცემის საკითხი, სადაც პირველ რიგში, მუზეუმს განვათავსებთ, რათა მომავალ თაობას არ დავუკარგოთ ის სპორტსმენები, რომლებმაც არაერთხელ ასახელეს ჩვენი ქვეყანა და ჩვენი კუთხე. დიდი სურვილი მაქვს, რომ აჭარის ოლიმპიური კომიტეტი თავის მუზეუმთან ერთად, ქალაქის სავიზიტო ბარათად იქცეს. კავშირებს ვამყარებთ სხვადასხვა ქვეყნის ოლიმპიურ კომიტეტებთან. ბადრი ნაკაშიძე, რომელიც მოსკოვის სახელმწიფო უნივერსიტეტის (მგუ) სახელმწიფო მართვის ფაკულტეტზე კათედრის გამგეა, რუსეთში აჭარის ოლიმპიური კომიტეტის წარმომადგენლად დავნიშნე, მას სერიოზული კავშირები აქვს, რაც სამომავლოდ სპორტის განვითარებისთვის გამოგვადგება, პირველ რიგში კი ინვესტიციების მოსაზიდად.

 

 

– როგორც ვიცი, აჭარის მთავრობა ოლიმპიურ კომიტეტს აფინანსებს. რა ოდენობის თანხაზეა საუბარი და აპირებთ თუ არა სხვა ინვესტიციების მოზიდვასაც, თუ მხოლოდ სახელმწიფო კმაყოფაზე იქნებით?

 

 

– საუბარია 400 ათას ლარზე, მაგრამ ამის გარდა, ვაპირებთ კერძო სექტორის ჩართვასაც ამ საქმეში, მთავარი ისაა, რომ სახელმწიფო გვერდში დაგვიდგეს, მაშინ ინვესტორიც დაინტერესდება. მე კარგად ვიცი, თუ რას ნიშნავს სპორტსმენისთვის უსახსრობა. პირადად მე ბევრჯერ მქონია შემთხვევა, როდესაც საკუთარი ჯიბიდან დამიფინანსებია ის სპორტსმენები, რომლებიც ბევრს ჩამოწერილად მიაჩნდა, მაგრამ შემდეგ ამ ბიჭებს შედეგი უჩვენებიათ. ასე რომ, უყურადღებოდ არავის დავტოვებთ.

 

 

– სტიპენდიები ძირითადად დიდებს ენიშნებოდათ, ახალგაზრდები და კადეტები კი, ასე ვთქვათ, თამაშგარეთ რჩებოდნენ…

 

 

– ეს ერთ-ერთი მთავარი პრიორიტეტია ჩვენთვის. ვაპირებთ ოლიმპიური რეზერვების სკოლის დაარსებას, სადაც ახალგაზრდა თაობას დაეთმობა დიდი ყურადღება, რომელიც ახლანდელს კარგ შევსებას მოუმზადებს. რაც მთავარია, დავაფინანსებთ სპორტსმენებს, რათა მათ რაც შეიძლება მეტ ტურნირზე მიიღონ მონაწილეობა. ვინც სპორტში ჩახედულია, კარგად იცის, რომ ერთი შეჯიბრი ათ ვარჯიშს უდრის და თუ ტურნირებზე არ იარა ბავშვმა, ისე სპორტსმენად ვერ გაიზრდება. ავიღოთ გიორგი ნადირაძის მაგალითი, ის საქართველოს ერთ-ერთი წარმატებული სპორტსმენია, ხელი მოვკიდე, ჩემთან ვარჯიშობდა და ოლიმპიური ლიცენზიაც მოიპოვა.

 

 

– ნადირაძის ლიცენზიას ბევრი მითქმა–მოთქმა მოჰყვა, თითქოს `ველური ბარათის~ საშუალებით მოხვდა ოლიმპიადაზე…

 

 

– ეს ყველაფერი ჩემი დისკრედიტაციის გამო ხდებოდა. არ მინდა ინტერვიუს პოლიტიკური ელფერი მივცე, მაგრამ `ნაცმოძრაობის~ მხარეს რომ არ ვიყავი, ბევრი ჭორი მომიგონეს, მაგრამ დრომ ყველაფერი თავის ადგილზე დააყენა და მტყუან-მართალიც გამოაჩინა.

 

 

– რიოს ოლიმპიურ თამაშებამდე სამ წელზე ოდნავ მეტი დრო დარჩა, რამდენი სპორტსმენით აპირებთ წარსდგეთ მსოფლიოს უდიდეს სპორტულ ფორუმზე?

 

 

– პირველ რიგში, მინდა აღვნიშნო, რომ ჩემთვის მთავარი ხარისხია და არა რაოდენობა. ვინც გაემგზავრება ოლიმპიადაზე, ყველა მედლისთვის უნდა წავიდეს და რაც მთავარია, უმაღლესი სინჯის მედლისთვის. მარტო მონაწილეობა მე არ მაკმაყოფილებს. მოგებას უნდა მივაჩვიოთ სპორტსმენები ჯერ ადგილზე, შემდეგ კი საერთაშორისო მასშტაბებზე. გვყავს რამდენიმე ბიჭი, რომლებსაც არა მარტო ლიცენზიის, არამედ ოლიმპიური მედლის მოპოვებაც შეუძლიათ. სალიცენზიო ტურნირები 2015 წელს დაიწყება და ყველაფერი მაშინ გამოჩნდება.

 

 

– 2015 წელს თბილისი ახალგაზრდულ ოლიმპიურ თამაშებს მასპინძლობს და ალბათ, აჭარასაც ეყოლება თავისი წარმომადგენლები…

 

 

– რა თქმა უნდა, როგორც თბილისში, ასევე ბაქოს ახალგაზრდულ თამაშებზეც წარვადგენთ გუნდს, რომელიც იმავე წელს გაიმართება. კარგი თაობა მოდის და თუ როგორც ჩვენ, ასევე სახელმწიფო სათანადო ყურადღებას გამოიჩენს, მაშინ შედეგი აუცილებლად იქნება.

 

 

– და ერთი კითხვა, საქართველოს სხვადასხვა რეგიონის წარმომადგენლები ხშირად ასპარეზობენ აჭარის სახელით, ადგილობრივები კი ჩრდილში რჩებიან, თუნდაც ვარლამ ლიპარტელიანი ავიღოთ…

 

 

– ვარლამი უდავოდ კარგი სპორტსმენია, მე არ ვარ ამ მეთოდის წინააღმდეგი, მაგრამ ერთი ნიუანსია გასათვალისწინებელი, თუ აჭარის სახელით უნდა სპორტსმენს გამოსვლა, მაშინ ძირითადად აქ უნდა იყოს, აჭარაში, აქვე ივარჯიშოს და რაც მთავარია, ახალი თაობის აღზრდაში მიიღოს მონაწილეობა. ასეთი ტიტულოვანი სპორტსმენების გვერდით ვარჯიში, ახალგაზრდა თაობისთვის დიდი სტიმული იქნება.

ევროპის ჩემპიონატამდე ერთი შეკრება დარჩა

თბილისიდან დაბრუნდა აჭარის ტაეკვონდისტთა ნაკრები, რომელმაც მონაწილეობა მიიღო შესარჩევ ტურნირზე. როგორც ადრე ვიუწყებოდით, საქართველოს ახალგაზრდულ ნაკრებს სექტემბერში ევროპის ჩემპიონატზე მონაწილეობა ელის. თბილისურმა ტურნირმა ის კანდიდატები გამოავლინა, რომლებიც უახლოეს დღეებში ქობულეთში საწვრთნელ შეკრებაზე შეიკრიბებიან, სწორედ იქ გადაწყვეტს ნაკრების ხელმძღვანელობა, თუ ვინ გაემგზავრება ევროპირველობაზე, რომელსაც პორტუგალია უმასპინძლებს. ბათუმელთაგან ახალგაზრდული ნაკრების კანდიდატებად გურამ კუტუბიძე, კახა მახარაძე და მარი ბოლქვაძე მოიაზრებიან. შესარჩევ ტურნირზე იასპარეზეს დიდებმაც, რომლებიც ახალგაზრდებთან ერთად ქობულეთში მოემზადებიან, ვინაიდან მათ ოქტომბერში A კლასის ტურნირი ელით უკრაინაში. ეროვნული ნაკრების ხელმძღვანელობამ დიდებიდან შეკრებაზე აკაკი ცენტერაძეს, თეონა ვაშაყმაძეს, სოფია ცეცხლაძესა და გოგია კაკაბაძეს უხმო.

სიახლეები ბათუმის “დინამოში”

ბათუმური კლუბის სპორტულ დირექტორად წარსულში “დინამოს” კაპიტანი მალხაზ მახარაძე დაინიშნა. მთავარ მწვრთნელს კობა ჟორჟიკაშვილს, ასევე წარსულში ცნობილი ბათუმის „დინამოელები“ ლევან ხომერიკი და ბორის გონჩაროვი დაეხმარებიან, განვითარების მენეჯერი კი გელა შეყილაძე იქნება. „დინამო 2“-ს ივანე მახარაძე ჩაიბარებს.

2013/14 სეზონში „დინამოს“ ახალი ტექნიკური სპონსორი, გერმანული „SALLER“-ი შემოსავს. ბათუმის „დინამოს“ ერთგულ ქომაგებს, ფანკლუბ „შავი ზღვის მეკობრეების“ დაფინანსებასა და ტრანსპორტირებას კომპანია „კოკა-კოლა“ უზრუნველყოფს.

Batumi Summer Set იწყება

ხვალ, 22 აგვისტოს, ბათუმში  „Batumi Summer Set“  იწყება. „Miracle Park”-ის მიმდებარე ტერიტორიაზე  საფესტივალო ქალაქის მშენებლობა, რომელიც ანბანის კოშკსა და ეშმაკის ბორბალს შორის მდებარეობს,  პრაქტიკულად დასრულებულია.

„Batumi Summer Set“ – ის  მთავარი მოვლენა  დანიური ელექტრონული მუსიკის დუეტი „Laid Back“-ია, რომელიც ფესტივალს გახსნის. „Laid Back“  რომელიც  1979 წელს ჩამოყალიბდა, 22 აგვისტოს ძველ და ახალ ჰიტებს შესთავაზებს მსმენელს.  მათ შორის  Sunshine Reggae და  Happy Dreamer.

უცხოელ დიჯეებს აკომპანიმენტს 12 ქართველი დიჯეი   გაუწევს.

„ფესტივალის მიზანია ქართველი არტისტების პრომოუშენი. იქიდან გამომდინარე, რომ ეს არტისტები უკრავენ ძალიან დიდი სახელების გვერდით და შესაბამისად მათ კარიერაში ძალიან კარგად იწერება ამ არტისტებთან ერთად მონაწილეობის მიღება მსგავს ფესტივალებში. ასევე ეს ფესტივალის ბათუმის პრომოუშენსაც ემსახურება. მსგავსი ტიპის ფესტივალები აჭარი რეგიონში ტურიზმის განვითარებისთვის ძალიან მნიშვნელოვანია,“ – ამბობს ფესტივალის არტ მენეჯერი ტატო ხარჩილავა.

„Batumi Summer Set“-ს 22 აგვისტოს  საღამოს რვა საათზე  SOLAR ECLIPSE გახსნის, ასევე გამოვლენ, BACHO&COBERT,  SYNKRO, PHON-O. ღამის 12 საათზე სცენა მთავარ ჰედლაინერს LAID BACK -ს დაეთმობა.

„Batumi Summer Set“ ბათუმში უკვე მეორედ იმართება.

ღია წერილი საქართველოს განათლების სამინისტროს

 

 

აღნიშნული კონცეპციის  ჩამოყალიბებისას უნდა გაეცეს პასუხი  შემდეგ ორ კითხვას: 1. როგორი უნდა იყოს თანამედროვე უმაღლეს სასწავლებლების კურსდამთავრებულების მომზადების დონე, რომ ის აკმაყოფილებდეს თანამედროვე  მოთხოვნებს და 2. როგორია ამჟამად ჩვენი უნივერსიტეტის შესაძლებლობანი მაღალკვალიფიციური კადრების მომზადების საქმეში და რა პერსპეკტივები ისახება დღევანდელი მდგომარეობიდან გამომდინარე.

 

 

ამჟამად პოსტინდისტრიული საზოგადოება თანდათან გადადის  ინფორმაციულში, სადაც მთავარი სიმდიდრე გახდება  არა მატერიალური ობიექტები, არამედ   დაუფლება და მაქსიმალურად ქმედითად გამოყენება ინფორმაციული მასივების, სადაც პრიორიტეტულად იზრდება ინფორმაციული და ორგანიზაციული ტექნოლოგიების როლი, ინტელექტუალიზირდება წარმოება. შესაბამისად, პროგრესის ქვაკუთხედათ ისახება  ადამიანის პიროვნება, მისი ცოდნა, გამოცდილება, ღირებული ორიენტირები, უნარი მიიღოს დამოუკიდებელი  გადაწყვეტილებები და მათზე პასუხისმგებლობის გათვითცნობიერება.

 

 

      ამგვარი მიდგომის  გამოყენების მომწიფება გამოწვეულია განათლების უკვე არსებული მსოფლიო კრიზისით. ეს გამოიხატება რიგ ასპექტებში -შეუთანხმლებლობით  დინამიკურად ცვლადი  საზოგადოების მოთხოვნებსა და უმაღლესი სკოლის გამოშვებულების უნარებს შორის ადეკვატური რეაგირება მოახდინონ ამ ცვლილებეზე; წინაღმდეგობებში  უმაღლესი სასწავლებლების ახალ მიზნებსა და  ძველ ორგანიზაციულ სტრუქტურებთან და მთელი უმაღლესი სასწალებლების მართვის ფორმებთან.

 

 

ჩვენი ქვეყანა არაა იზოლირებული მსოფლიოს სხვა ქვეყნებისაგან და ის განიცდის მსგავს სიძნელეებს განათლების სფეროში, მაგრამ   ჩვენი მდგომარეობის სირთულე იმაშია, რომ ზოგად ტენდენციებს ემატება  საკუთარი  სპეციფიკური  პრობლემები, უპირველეს ყოვლისა დაფინანსების სიმცირე და ზოგ შემთხვევაში საერთოდ არარსებობა,  პროვინციალიზმი და წინა მთავრობის ცხრაწლიანი მართველობის პერიოდში გატარებული  „რეფორმისაგან“  დატოვებული რეციდივები.  

 

 

ასეთი სტაგნაციის  ნათელი მაგალითია ფიზიკის დეპარამენტის  ზოგიერთი პრობლემები განათლების სფეროში:

 

 

1) საბჭოთა პერიოდის ბოლო წლებიდან (დაახლოებით  1980 წლიდან) ფიზიკის   კათედრას, არავითარი ფინანსური მხარდაჭერა არ გააჩნდა, ნაციონალების „რეფორმის“   დროს ამას დაემატა სასწავლო და სამეცნიერო ლაბორატორიების გაჩანაგების ტენდენციების გაძლიერება. მაგალითად, ელექტრომაგნეტიზმის ლაბორატორია გადატანილ იქნა მცირე ფართის მქონე ოთახში, გადატანის დროს ადრე  დადგმული ამოცანების უმრავლესობა უვარგისი გახდა სტუდენტთა ლაბორატორიული სამუშაოთა ჩატარებისათვის. ლაბორატორიის ყოფილი ფართი კი გადაეცა ბიბლოთეკას. მსგავსი ბედი ეწია ფიზიკის პრაქტიკუმის და გამბნევ გარემოთა სამეცნიერო ლაბორატორიებს, ოღონდ იმ განსხვავებით, რომ გამონთავისუფლებული ოთახების ნაცვლად ერთი დიდი აუდიტორია გაკეთდა.  შედეგად, სამი ლაბორატორია გაუქმდა.

 

 

2) არა დამაკმაყოფილებელი   შოთა რუსთაველის სახელმწიფო უნივერსიტეტის (შსუ) ფიზიკის  დეპარტამენტის სამეცნიერო საქმიანობა. აი რას წერს საქართველოს ეროვნული აკადემიის წევრ – კორესპონდენტი გ. ჩაგელიშვლი თავის რეცენზიაში „შოთა რუსთაველის სახელმწიფო უნივერსიტეტის ფიზიკის  დეპარტამენტის 2011წლის სამეცნიერო საქმიანობის  ანგარიშზე“:  – „ფორმალურად ანგარიში წარმოდგენილია 18 გვერდზე. გარკვეული ფორმა ანგარიშს მიცემული აქვს, მაგრამ აქცენტები გადატანილია არა საჭირო საკითხებზე: ფოტოები კონფერენციის დროს, ფოტოები მუშაობის დროს, ფოტოები საუბრის დროს… ასევე, ბოლოში, ფაქტიურად, მთელი სტატია მოყვანილი თავისი გრაფიკებით (10 ნახაზი) და მსჯელობებით. გაბუნდოვნებულია ფაქტიური მონაცემები: კონფერენციის მასალებში გამოქვეყნებული სტატიები ჩათვლილია უცხოეთის რეცენზირებად ჟურნალებში გამოქვეყნებულად. გამოქვეყნებული სტატიების სიაში არის 2010 წელს გამოქვეყნებული სტატია. მითითებულია, რომ 2011 წელს უცხოეთის რეცენზირებად ჟურნალებში გამოქვეყნებულია 6 სტატია, რაც არ შეესაბამება სინამდვილეს. ამგვარად, არსებითად ანგარიშის დონე დაბალია -იგი არ აკმაყოფილებს წლიური საქმიანობის ანგარიშის მოთხოვნებს. ამასთან, ანგარიშის გამოსწორება შეუძლებელია, რადგანაც რეალურად მაღალი დონის კვლევები ჩატარებული არ არის.

 

 

წლების განმავლობაში ბათუმის და სხვა რეგიონალური უნივერსეტებიდან მოსული წლიური ანგარიშები მიუთითებენ მეცნიერების „რეფორმების“ მცდარ კურსს.  მეცნიერებათა აკადემიის სისტემაში ადრე შემავალი სამეცნიერო დაწესებულებები მექანიკურად არიან მიერთებული თბილისის უნივერსიტეტებს და ამდენად შეუძლებელია მათი ზემოქმედება რეგიონალური უნივერსიტეტების სამეცნიერო დონის აწევაზე. ამ მხრივ მათი როლი მეცნიერების ამაღლებაზე საქართველოს რეგიონალურ უნივერსიტეტებში დაკნინებულია. მიზანშეწონილი იყო მეცნიერებათა აკადემიის კომისიის მიერ ხელისუფლებისათვის 2004 წელს შეთავაზებული სამეცნიერო დაწესებულებების უნივერსიტეტებთან ინტეგრების სქემის რეალიზაცია, რომლის მიხედვითაც წამყვანი სამეცნიერო ინსტიტუტები უნივერსიტეტბთან ქმნიდნენ საერთო სამაგისტრო და სადოქტორო პროგრამებს. ამ სქემით ინტეგრების პირობებში იყო საშუალება რეგიონალური უნივერსიტეტებისათვის მაღალკვალიფიციური კადრების გაზრდისა, რაც გარკვეული პერიოდის განმავლობაში აწევდა რეგიონალური უნივერსიტეტების სამეცნიერო დონეს. დღეს არსებული ინტეგრების ფორმის პირობებში კი რეგინალური უნივერსიტეტების სამეცნიერო დონის დონის აწევა პრობლემატურია თუ არა შეუძლებელი. მეტიც, „რეფორმების“ დღეს არსებული სქემით მიმდინარეობის პირობებში, ადრე მეცნიერებათა აკადემიის სისტემაში შემავალი წამყვანი სამეცნიერო დაწესებულებების ბედიც სავალალოა. უნივერსიტეტების მიერ მიღებული წესდებების მიხედვით, ისინი განწირული არიან უუფლებო და უსახსრო არსებობისათვის. “    

 

 

უნდა აღინიშნოს, რომ ამ ანგარიშში, ჩვენგან დამოუკიდებელი მიზეზით, ჩვენი (აკად. დოქტორი თ. ბერიძე, ფიზ. მათემატ. მეცნიერებათა დოქტორი ჯ. ბერიძე ) ანგარიში არ შეუტანიათ. მაგრამ ეს არ ცვლის შეფასებას, „არსებითად ანგარიშის დონე დაბალია -იგი არ აკმაყოფილებს წლიური საქმიანობის ანგარიშის მოთხოვნებს. ამასთან, ანგარიშის გამოსწორება შეუძლებელია, რადგანაც რეალურად მაღალი დონის კვლევები ჩატარებული არ არის“. ამ ამოცანის გადაწყვეტა ცხადია სათანადო კადრების ყოლაზე არის დამოკიდებული.  ბოლო, 2009 წლის კონკურსის დროს დაშვებული შეცდომები მხილებულ იქნა საგაზეთო სტატიაში (ქრონიკა, 2009წ. 12 – 18 ოქტომბერი). კონკურსი უნდა ჩატარებულიყო  ზოგადი (ექსპერიმენტალური)  ფიზიკის   და თეორიული ფიზიკის მიმართულებით.  ზოგადი (ექსპერიმენტალური)  ფიზიკის  მიმართულება დეპარტამენტის ხელმძღვანელმა (10 წელი ერთი და იგივე პირია ამ თანამდებობაზე) თვითნებურად შეცვალა რადიოფიზიკით  რამაც  ზოგადი (ექსპერიმენტალური)  ფიზიკის  სპეციალისტებს ხელოვნურად შეექმნათ დაბრკოლება კონკურსში მონაწილეობაზე, სამაგიეროდ გზა გაეხსნათ ე.წ. რადიოფიზიკის და თეორიული ფიზიკის სპეციალისტებს. ეს დარღვევა გაკეთდა გააზრებულად ორი კონკრეტული პირის სასარგებლოდ და რა თქმა უნდა შედეგად ფიზიკის სწავლების საზიანოდ. მიმდინარე კონკურსის დროს დეპარტამენტის ხელმძღვანელმა მოიგონა გაყალბების უფრო „უკეთესი“ სქემა, ინტერნეტში დეპარტამენტის განაცხადში მიმართულებათა გრაფაში მხოლოდ ერთი საგანმანათლებლო ფიზიკის მიმართულება ჩასვა ზოგადი (ექსპერიმენტალური) ფიზიკის და თეორიული ფიზიკის მიმართულებების ნაცვლად.

 

 

განა ფიზიკას არ ააქვს როგორც სხვა ფუნდამენტალურ საბუნებისმეტყველო მეცნიერებას ეს ძირითადი და ურთიერთ აუცილებელი განაყოფები: თეორია და პრაქტიკა? რა ფასი აქვს იმ თეორიას რომელიც ექსპერიმენტით არაა გამყარებული?

მაშინ როდესაც სხვა ყველა დანარჩენ სპეციალობებზე მსგავს მდგომარეობას ვერ შეხვდებით. ეს იგივე შენიღბული სიყალბეა, რომელსაც ადგილი ჰქონდა 2009 წლის ჩატარებული კონკურსის დროს. ესე იგი კვლავ დაზარალდა ზოგადი (ექსპერიმენტალური) ფიზიკა.  ისახება დილემური სიტუაცია ერთის მხვრივ ასეთი მიდგომა უცოდინარობა და უკომპეტენტურობაა, თუ უფრო უარესი, ვეღაცის მერკანტილური ინტერესის გამო კნინდება დარგი მისი განვითარება და მომავალი.

        რა უნდა გაკეთდეს, რომ ფიზიკის სპეციალობაზე ამაღლდეს სამეცნიერო მუშაობის დონე? რა საკვირველია რომ ამისათვის საჭიროა სამეცნიერო კვლევითი მუშაობა ვაწარმოოთ ფიზიკის მოსაზღვრე დარგების სპეციალისტებთან ალიანსში.   ამჟამად,  ვღებულობთ  მონაწილეობას თემაში: შავი ზღვის ეკოლოგიური და ენერგეტიკული პრობლემები, საზოგადოებრივ საწყისებზე (თემის ხელმღვანელი საქართველოს ტექნიკური უნივერსიტეტის   პროფესორი მ.ჯიბლაძე).

 

 

ბოლოს ნაციონალების რეფორმატორებს უნდა შევახსენო, რომ წლების განმავლობაში დიდი რუდუნებით და შრომის ფასად ჩვენს მიერ შექმნილი იქნა ახალი მიმართულება მეცნიერებაში -სინათლის გამბნევი არხის ოპტიკა და მისი გამოყენება პრაქტიკაში. ამ მიმართულებით შექმნილი იყო სასწავლო და სამეცნერო ლაბორატორიები, სადაც შესრულებული იქნა სადოქტორო და საკანდიდატო დისერტაციები, რომლებიც წარმატებულად დაცული იქნა მოსკოვის ლომონოსოვის სახელობის და თბილისის ი. ჯავახიშვილის სახელობის უნივერსიტეტების სამეცნიერო საბჭოებზე. აქ მომზადებული და მივლინებული იქნა მოსკოვის უნივერსიტეტში ო. ნაკაშიძე, ზ. გამიშიძე, რომლებმაც დაიცვეს დისერტაცია და შემდეგ დაუბრუნდნენ მშობლიურ უნივერსიტეტს.

 

 

აღნიშნულ ლაბორატორიებში მომზადებულ იქნა  სადიპლომო და სამაგისტრო საკვალიფიკაციო შრომები სტუდენტების მიერ. სალიბაურის სკოლაინტერნატის მოსწავლეებმა დ.დევაძემ (ახლა ჩვენი უნივერსიტეტის პროფესორი) და ა. ლომინეიშვილმა მოამზადეს სამეცნიერო მოხსენებები ექსპერიმენტალურ თემებზე, რომლებმაც შემდგომში თბილისის სახელმწიფო უნივერსიტეტში ჩატარებულ კონფერენციაზე დაიმსახურეს პირველი პრიზები. ლაბორატორიის ბაზაზე ჩატარდა საკავშირო სამეცნიერო კონფერენცია გამბნევ გარემოთა სპეკტროსკოპიაში, რომლის მუშაობაში მონაწილეობას ღებულობდა ასზე მეტი მეცნიერი. ჩვენს ბაზაზე, აგრეთვე ჩატარდა(1984 წ) საბჭოთა კავშირის მეცნიერებათა აკადემიის კრისტალოგრაფიის ინსტიტუტის გამსვლელი სესია. ლაბორატორიის საქმიანობის ყველა შედეგის ჩამოთვლა შორს წაგვიყვანდა.

 

 

მიუხედავად ზემოთ აღნიშნულ ვანდალისტურ ქმედებებს ყველაფერი ვერ გაგვინადგურეს, ნაწილი შემოვინახეთ, უფრო მეტიც რამდენიმე ექსპერიმენტალური დანადგარის მოდერნიზაცია მოვახდინეთ მაგრამ უკვე პირადი სახსრებით უნივერსიტეტის გარეთ.

 

 

რჩება კითხვები:  რა აზრი აქვს შენობას დაარქვა სასწავლებლის სახელი თუ მხოლოდ კედლები გაქვს და არა გყავს პროფესიონალი სპეციალისტები? დასაფიქრებელია რა საჭიროა ასეთი „განათლება“? ან და რა საჭიროა ისეთი  „განმანათლებები“ რომელებიც არაფერს არ აძლევენ მომავალ თაობას პარავენ მას და ირგებენ გართულებულ მდგომარეობას თავიანთი ამპარტავნების და მუცლის დასაკმაყოფილებლად.

 

 

ალბათ პასუხი შემდეგნაირი უნდა იყოს: მხოლოდ შემოქმედ პიროვნებებს შეუძლიად  განვითრებას შეუწყონ ხელი. ხოლო შემოქმედებას ნიადაგი უნდა შეუქმნა და არა გამოაცალო ის.

51 მილიონი ევრო ბათუმის 24 საათიანი წყალმომარაგებისათვის

 

დღეს ბათუმის მერიაში ბათუმის წყალმომარაგებისა და ჩამდინარე წყლების მუნიციპალური ინფრასტრუქტურის რეაბილიტაციის   მესამე ფაზით გათვალისწინებული სამუშაოების პროექტი წარმოადგინეს. 

 

„ქალაქ ბათუმში ერთ-ერთი წარმატებული პროექტია წყლის და კანალიზაციის სისტემების რეაბილიტაცია, ახლა მიმდინარეობს მესამე ფაზის დაპროექტება. დაპროექტებას ახდენს კომპანია ეჯისი. ამ პროექტის განორციელებით ქალაქში ფაქტობრივად დარჩენილ 40 % ში მოხდება წყლის კანალიზაციის და სანიაღვრე სისტემის რეაბილიტაცია.  ეს დასახლებებია  ბენზე, ბარცხანა, ბონი, გარადოკი და  ჭაობი ჯავახიშვილის ქუჩამდე. ამ ეტაპზე მიმდინარეობს დაპროექტების სამუშაოები. და ფაქტობრივად ჩვენ უკვე მზად ვიქნებით აგვისტოს ბოლოს, სექტემბერში გამოვაცხადოთ საერთაშორისო ტენდერი.  ვფიქრობთ  რომ ნოემბერ დეკემბერში გვეყოლება ის გამარჯვებული,“ – განაცხადა ბათუმის მერმა ჯემალ ანანიძემ.

 

მისივე თქმით პროექტი მომავალ სამ წელში განხორციელდება. პირველი სამუშაოები კი 2014 წელს დაიწყება. მერის განცხადებით ქალაქის სანიაღვრე  სისტემების მოწესრიგების  პარალელურად ქუჩების სრული მოწესრიგებაც მოხდება.  პროექტის საერთო ბიუჯეტი 51 მილიონი ევროა. თანხის ნაწილი  გრანტია, ნაწილი მერიის თანადაფინანსება, ნაწილი კი  სესხი. ამასთან  მომავალ სამ წელში მოხდება  ქალაქის სრული გამრიცხველიანება. რის შემდეგაც ბათუმს 24 საათიანი წყალმომარაგება ექნება.

 

ტროტუარზე გაჩერებული მანქანები და ჯარიმები ბათუმში

 

ქუჩების შევიწროების ხარჯზე ტროტუარების გაფართოებისა და ველობილიკის მოწყობის გადაწყვეტილება ბათუმის მერიამ მიწისქვეშა კომუნიკაციების მოწესრიგების პროექტის ფარგლებში განახორციელა, თუმცა ბათუმში ჩამოსული ტურისტები და ბათუმელი ველოსიპედისტები ამბობენ, რომ  „ასეთი ველობილიკის არსებობას აზრი არ აქვს: `ცხრაჯერ რომ ჩამოხვალ ველოსიპედიდან იმისთვის, რომ მანქანას გვერდი აუარო და ტროტუარზე გადასვლის შემთხვევაში არავის დაეჯახო, რა არის აქ მოსაწონი.“-  ამბობს დამსვენებელი გოგი კახიშვილი.    

 

პრობლემაა ავტობუსის გაჩერებაზე არსებული ვითარებაც: „ავტობუსის გაჩერებაზე ვერ გაჩერდები, მანქანები დგას. ხშირად იქვე პატრული მოძრაობს, მაგრამ რეაგირებას არ ახდენს. #11-ით დავდივარ. რამდენჯერმე იმის გამო, რომ მანქანები იდგა გაჩერებაზე, ავტობუსმა ისე გაიარა, ვერ დავჯექი.“ –  ამბობს ლამარა ბალაძე.

 

 

მანქანის არასათანადო ადგილზე გაჩერების შემთხვევაში რეაგირების უზრუნველყოფა შპს „ბათუმის ავტოპარკინგის“ მოვალეობაა. ამ სამსახურმა იანვრიდან დღემდე 28 601 მძღოლი დააჯარიმა, მათ შორის 1372  მანქანა საჯარიმო ავტოფარეხში იყო გადატანილი. დაჯარიმებულებს შორის არიან ტურისტები და უცხოეთის მოქალაქეებიც.

 

ჯარიმის ფასი ადგილზე დაჯარიმების შემთხვევაში 10 ლარია, მანქანის ავტოფარეხში გადატანის შემთხვევაში კი მძღოლმა მის დასაბრუნებლად „ბათუმის ავტოპარკინგის“ ადმინისტრაციას პირადობის დამადასტურებელ დოკუმენტთან და მანქანის მფლობელობის დოკუმენტებთან ერთად 35-ლარიანი გადახდის ქვითარი უნდა წარუდგინოს. სპეციალურ სადგომზე მანქანის დამატებით 24 საათის განმავლობაში გაჩერების შემთხვევაში კი გადასახადი იზრდება. თუ მფლობელი მანქანას დროულად ვერ გადაიყვანს, ამ შემთხვევაში ის ვალდებულია დამატებით  ათი ლარი გადაიხადოს. სპეციალურ სადგომზე მანქანის გადაყვანის შემთხვევაში მფლობელს ეძლევა საჯარიმო ქვითარი, რომლის  გადახდის ვადაც 30 დღეს შესადგენს.  იმ შემთხვევაში კი თუ ჯარიმა არ იქნება გადახდილი მითითებულ ვადაში, მძღოლს საურავის სახით დამატებითი ჯარიმის სახით 150 ლარი დაერიცხება. 

 

ჯარიმის გადასახადი სახელმწიფო ხაზინაში ირიცხება, იანვრიდან დღემდე არსებული მონაცემებით, ბათუმში იმ პირთა მიერ გადახდილი ჯარიმების ოდენობა, რომლებიც 10 ლარით დაჯარიმდნენ, 272 290 ლარს შეადგენს, 35 ლარით დაჯარიმებულთა გადახდილი თანხა კი – 480 020 ლარია. მთლიანობაში ჯარიმისათვის ბიუჯეტში გადახდილი თანხა 752 310 ლარია, თუმცა ამას დაემატებოდა ის მოსაკრებელიც, რომელსაც მძღოლები სპეციალურ სადგომზე ავტომანქანის დამატებითი 24 საათის გაჩერების შემთხვევაში იხდიან.

 

პრეტენზიები აქვთ მძღოლებსაც: „ქუჩები დაავიწროვეს, მოძრაობაც გადატვირთულია, პარკინგის ნიშნებთან კი ხშირად ადგილი არ არის. მეც გამიჩერებია არასათანადო ადგილზე, რადგან ბანკში ვიყავი შესასვლელი და იმის გამო, რომ იქვე ახლოს ადგილი არ იყო, რამდენიმე მეტრის მოშორებით უნდა დამეყენებინა მანქანა. ვიფიქრე მალევე გამოვალ-მეთქი. ბანკში რიგში ჩადგომა მომიწია, რომ გამოვედი, მანქანა აღარ დახვდა“ –  უთხრა „ბათუმელებს“ დავით დიასამიძემ. 

 

კითხვაზე, როგორ უნდა მოიქცეს მძღოლი, როცა ბანკთან ან კაფესთან ახლოს მანქანის წესების ფარგლებში გაჩერების საშუალება არ არის, „ბათუმის პარკინგის“ დირექტორს ნუკრი ცინცაძეს ასეთი პასუხი აქვს: „გამოსავალი მანქანის  წინასწარ განსაზღვრულ ადგილზე გაჩერება და დარჩენილი გზის ფეხით გავლაა.“

 

პარკირების საფასური თვითმმართველი ქალაქის –  ბათუმის საკრებულოს 2013 წლის 28 თებერვლის #4 დადგენილებით განისაზღვრება. საკრებულოს დადგენილებით მსუბუქი მანქანებისთვის 30-დღიანი პარკირების ფასი ბათუმში 10 ლარია, ნახევარი წლის საფასური 25 ლარს, ერთი წლის პარკირების საფასური კი –  40 ლარს შეადგენს. იმ მძღოლებისთვის კი, რომლებიც ბათუმში მხოლოდ ერთი დღით ან ერთი კვირით აპირებენ დარჩენას, სპეციალური ტარიფი მოქმედებს: „მათ შეუძლიათ პარკირებისთვის შესაბამისი გადასახადი აირჩიონ, ნებისმიერ ბანკში გადაიხადონ და დოკუმენტი საჭიროების შემთხვევაში წარუდგინონ ჩვენს თანამშრომლებს“ –  განმარტა ნუკრი ცინცაძემ.

 

საკრებულოს დადგენილების მიხედვით, სხვადასხვა კატეგორიის მანქანებისთვის დაწესებული გადასახადი ასე ნაწილდება: 

 

მსუბუქი ტექნიკა: 1-დღიანი პარკირება -1 ლარი; 7-დღიანი პარკირება – 5 ლარი;  30-დღიანი პარკირება _ 10 ლარი; 182-დღიანი პარკირება – 25 ლარი; 365-დღიანი პარკირება – 40 ლარი;

ტაქსის პარკირება: 10-დღიანი პარკირება – 10 ლარი; 20-დღიანი პარკირება – 20 ლარი;  30-დღიანი პარკირება – 30 ლარი; სპეც.ტექნიკის პარკირება: 1-დღიანი პარკირება – 3 ლარი; 30-დღიანი პარკირება  – 30 ლარი;182-დღიანი პარკირება – 150 ლარი; 365-დღიანი პარკირება – 250 ლარი.

 

 

როცა სასამართლოს დოკუმენტი უსარგებლოა


ჟურნალისტისთვის ბათუმის სასამართლოდან გადაწყვეტილების წამოღებას იმ შემთხვევაში აქვს აზრი, როცა ამ კონკრეტული საქმის სასამართლო პროცესებს ესწრები. სხვა შემთხვევაში სასამართლოდან გადაწყვეტილების გამოთხოვა აზრს კარგავს – გადაწყვეტილებაში, უბრალოდ, წაშლილია არამხოლოდ განსასჯელის ან დაზარალებული პირის ვინაობა, არამედ ადვოკატისა და პროკურორის გვარებიც კი.

 

გადაწყვეტილებაში, რომელიც ახლახანს მოაწოდა „ბათუმელებს“ საქალაქო სასამართლომ, წაშლილია სახელმწიფო საკუთრებაში არსებული დაწესებულების სახელწოდება. ასევე საგულდაგულოდ არის წაშლილი იმ თანხის ოდენობა, რომელიც, ძიების ვერსიით, გარკვეული პირების ქმედების შედეგად სახელმწიფომ იზარალა.

 

სასამართლომ მიიჩნია, რომ სახელმწიფო ქონების – ბათუმის ყოფილი ქიმიურ-ფარმაცევტული ქარხნის სახელწოდება (დოკუმენტში ეს სახელწოდებაა მოშლილი) პირადი ინფორმაციაა. ასევე პირადი ინფორმაციის მოტივით წაშალეს გადაწყვეტილებიდან ხალხისთვის მოპარული თანხის – სამ მილიონზე მეტი ლარის ოდენობის შესახებ ინფორმაცია. 

 

ვისი პირადი ინფორმაცია შეიძლება იყოს სახელმწიფო საკუთრებაში არსებული ქონების სახელწოდება ან ქვეყნისთვის მიყენებული ზარალის ოდენობა? – ამის გარკვევა „ბათუმელებმა“ უზენაეს სასამართლოში სცადა. სასამართლოში ამბობენ, რომ დოკუმენტის დაშტრიხვას მათ ზოგადი ადმინისტრაციული კოდექსი და საქართველოს კონსტიტუცია ავალდებულებს, „რადგან, როგორც კანონით, ისე კონსტიტუციით პირადი ინფორმაცია საიდუმლოა“.

 

გარდა ამისა, პრესცენტრში ამბობენ, რომ „სასამართლოს აქვს შიდა სტანდარტის დოკუმენტი, რომელიც აზუსტებს რა როგორ დაშტრიხონ“.

 

„ბათუმელებს“ უზენაესი სასამართლოდან დაჰპირდნენ „შიდა სტანდარტის დოკუმენტის“ მოწოდებას, მაგრამ ეს დოკუმენტი არ მოგვაწოდეს. სასამართლოდან მიღებულ წერილში, რომელსაც საერთო განყოფილების უფროსი, გოჩა დიდავა აწერს ხელს, წერია: „ზოგადი ადმინისტრაციული კოდექსის თანახმად, პერსონალური მონაცემების დაცვა საჯარო დაწესებულების ვალდებულებას წარმოადგენს. პერსონალური მონაცემი არის ნებისმიერი ინფორმაცია, რომელიც უკავშირდება იდენტიფიცირებულ ან იდენტიფიცირებად ფიზიკურ პირს. პირი იდენტიფიცირებადია, როდესაც შესაძლებელია მისი იდენტიფიცირება პირდაპირ ან არაპირდაპირ, კერძოდ, საიდენტიფიკაციო ნომრით ან პირის მახასიათებელი ფიზიკური, ფსიქოლოგიური, ფიზიოლოგიური, ეკონომიკური, კულტურული, ან სოციალური ნიშნით“.

 

უზენაესი სასამართლოდან მიღებულ დოკუმენტში ასევე წერია, რომ „პერსონალურ მონაცემების დაცვისა და დამუშავებასთან დაკავშირებული საკითხები წესრიგდება „პერსონალურ მონაცემთა დაცვის შესახებ საქართველოს კანონით“.

 

ჟურნალისტები ამბობენ, რომ სასამართლო გადაწყვეტილებების „დაშტრიხვის არსებული მეთოდი უაზრობაა“. გიორგი მგელაძე – სტუდია „მონიტორის“ გამომძიებელი ჟურნალისტი, მეთოდის აბსურდულობაზე საუბრის დროს კიდევ ერთ მნიშვნელოვან გარემოებაზე მიუთითებს: ღია სასამართლო სხდომაზე ნებისმიერ ადამიანს, მათ შორის არაჟურნალისტსაც, შეუძლია ჩაიწეროს ყველაფერი, რაც პროცესზე ითქმება, მათ შორის პროცესის მონაწილე ნებისმიერი პირის ვინაობა. პროცესიდან ორ დღეში თუ მოითხოვ განაჩენს, მასში აუცილებლად მოშლიან ყველა სახელს, გარდა მოსამართლისა.

 

სამი კვირის წინ გიორგი მგელაძე ამ პრობლემის შესახებ ერთ-ერთ ტრენინგზე პირადად ესაუბრა იუსტიციის უმაღლესი საბჭოს წევრს, მოქმედ მოსამართლე მერაბ გაბინაშვილს. გიორგი ამბობს, რომ მოსამართლემ მანამდე არ დაიჯერა აპრობირებული დაშტრიხვის მეთოდების არსებობა, ვიდრე ერთ-ერთი გადაწყვეტილება არ აჩვენეს.

 

გიორგი და სხვა ჟურნალისტები აპირებენ გამოიყენონ მოსამართლე გაბინაშვილის შემდეგი შეთავაზება – „მოგვმართეთ იუსტიციის უმაღლეს საბჭოს, შეიძლება საკანონმდებლო ინიციატივის შემუშავებაც გახდეს საჭირო“.

 

ჯერ უცნობია მართლა იმსჯელებს იუსტიციის საბჭო ამ საკითხზე თუ არა. ფაქტად მხოლოდ ის რჩება, რომ სასამართლოდან გამოთხოვილ გადაწყვეტილება ფორმალურად არის დოკუმენტი, მაგრამ ამ დოკუმენტისგან ინფრომაციის მიღება შეუძლებელია და მისთვის დრო იმ შემთხვევაში უნდა დახარჯო, თუ კონკრეტული საქმის შესახებ სხვა წყაროსგან ხარ დეტალურად ინფორმირებული.

 

სხვა წყარო, როგორც წესი, ძირითადად, დაზარალებულია. 2010 წლამდე დაზარალებულს ჰქონდა უფლება მასთან დაკავშირებული საქმის გადაწყვეტილება მიეღო. 2010 წლის შემდეგ, როგორც გიორგი მგელაძე ამბობს, დაუშტრიხავი გადაწყვეტილების მიღების უფლება მხოლოდ ბრალდებულს დაუტოვეს. შესაბამისად, თუ დაზარალებული ჩათვლის, რომ მის მიმართ უკანონო გადაწყვეტილება გამოიტანეს, დაზარალებული კი არ მოინდომებს ჟურნალისტთან თანამშრომლობას, მაშინ დაუშტრიხავი დოკუმენტის, ანუ ამომწურავი ინფორმაციის მისაღებად, სამართლებრივი გზა აღარ რჩება.

 

ნინო ზურიაშვილი – კიდევ ერთი ჟურნალისტი, რომელმაც დაშტრიხული განაჩენის მიწოდებისთვის საქართველოს ევროსასამართლოში უჩივლა, დაშტრიხვის არსებულ მეთოდს უწოდებს „უაზრობას, რომელიც საქმიანობაში ძალიან უშლის ხელს“.

 

Exit mobile version