Batumelebi | ქედის გამგებელი თანამდებობას ტოვებს ქედის გამგებელი თანამდებობას ტოვებს – Batumelebi
RU | GE  

ქედის გამგებელი თანამდებობას ტოვებს

 

 

ქედის მუნიციპალიტეტის გამგებელმა ვაჟა ბოლქვაძემ დაკავებული თანამდებობიდან გათავისუფლების თაობაზე განცხადებით საკრებულოს დღეს მიმართა, თუმცა საკრებულომ ვაჟა ბოლქვაძის მოთხოვნა არ დააკმაყოფილა. ქედის საკრებულოს თავმჯდომარის მოადგილის, ჯემალ შარაძის განცხადებით გამგებლის თანამდებობას ქედაში მხოლოდ კონკურსის წესით დანიშნული პირი დაიკავებს.  

„შვებულებიდან სამსახურში დაბრუნებასთან დაკავშირებით განცხადება გუშინ შემოიტანა, დავაბრუნე და დღეს მომმართა, გამათავისუფლეთო. განაცხადში წასვლის მიზეზი არ წერია, სრული პასუხისმგებლობით ვაცხადებ, რომ ახალი გამგებელი არ დაინიშნება, მანამ, სანამ არ შეირჩევა კანდიდატი კონკურსის წესით. მოქმედი გამგებლის განცხადება წასვლის თაობაზე  არ დამიკმაყოფილებია, თუმცა, თუ წავა, მოვალეობის შესრულებას სავარაუდოდ მოადგილეს დავაკისრებ“ –  აცხადებს ჯემალ შარაძე.

მოქმედმა გამგებელმა ვაჟა ბოლქვაძემ  შვებელება 22 აგვისტოდან  20 სექტემბრამდე აიღო.  შეგახსენებთ, რომ 23 აგვისტოს ქედის გარდა, აჭარის ოთხივე მუნიციპალიტეტში შეიცვალნენ გამგებლები.

რა გახდა ვადამდე ადრე სამსახურში დაბრუნებისა და დაკავებული თანამდებობიდან გათავისუფლების თხოვნის მიზეზი, ამის გარკვევა გამგებელთან ვცადეთ, თუმცა ვაჟა ბოლქვაძის ტელეფონი გამორთულია.

„ბათუმელების“ ინფორმაციით, ვაჟა ბოლქვაძეძე ზეწოლა განხორციელდა,  იმ შემთხვევაში თუ გამგებელი სამსახურში დაბრუნებასა და წავლაზე უარს იტყოდა ქედის გამგეობაში აუდიტის სამსახური  შევიდოდა, რასაც რიგი საჯარო მოხელეების გათავისუფლება და დაკავება მოჰყვებოდა.

გამგებლის თანამდებობაზე კონკურსის გამოცხადებას საკრებულო მომავალი კვირიდან  გეგმავს.

ნეტგაზეთის მასალების სხვა გამოცემებში გადაბეჭდვის წესი
ეკა ბარამიძე