ბათუმელები
„აღნიშნული თანხა განკუთვნილია კონკრეტულად დაღუპული პირების ოჯახების დასახმარებლად. რაც შეეხება რეაბილიტაციას, ამ მიმართულებითაც ვაპირებთ თანხების გაღებას, დღეს გვექნება კიდევ გაფართოებული შეხვედრა და ამ საკითხებსაც გადავწყვეტთ“- ამბობს „ბათუმელებთან“ საუბარში, ფონდის ხელმძღვანელი, გიორგი ქვრივიშვილი.
„ბათუმელების“ კითხვაზე, რამდენი ვიდეოთვალი გადაამოწმა და როგორ? – რაულ თავარქილაძე პასუხობს:
„ვიცი, რომ ვიდეოთვალების 95 პროცენტი არ მუშაობს. ჩვენს ოფისთან, „პროკრედიტ ბანკის“ ყოფილი შენობის წინ რომ არ მუშაობს, ამის თაობაზე ქალაქის პოლიციის მე-3 ქვეგანყოფილების უფროსმა მითხრა, რადგან როცა 10 ივნისს ჩვენი ოფისის მინებზე ნიღბიანმა პირებმა წარწერები გააკეთეს და ჩვენ მასალების ამოღება მოვითხოვეთ, მითხრა, რომ ეს კამერები არ მუშაობს. ამ ვიდეოთვალების დამონტაჟებაზე მილიონ ლარზე მეტია ბიუჯეტიდან დახარჯული. მაქვს ინფორმაცია, რომ ვიდეოთვალები მხოლოდ შუქნიშნებთან არის ჩართული. ეს ფაქტი ხელს შეუწყობს ქალაქში კრიმინალის გააქტიურებას“-ამბობს რაულ თავართქილაძე.
რაულ თავართქილაძის თქმით, გამოძიებას ამ დრომდე არ აქვს ინფორმაცია იმ პირების შესახებაც, რომლებმაც „ნაციონალური მოძრაობის“ ოფისის მინებზე 10 ივნისს წარწერები გააკეთეს.
„ნიღბიანმა ადამიანებმა შეიძლება ტერორისტული აქტებიც ჩაიდინონ, ამიტომ პრობლემაა, რომ ქალაქში ვიდეოთვალები არ მუშაობს და ნიღბიანი ადამიანები დადიან“.
პირველადი სამედიცინო მომსხურების მისაღებად კლინიკას დღეს 30-ზე მეტმა ბენეფიციარმა მიმართა. ინფრექციურ საავადმყოფოში პროგრამის ამოქმედების პროცესს აჭარის ჯანდაცვის სამინისტროს წარმომადგენლები გაეცნენ.
„დღეს ბათუმში დაიწყო С ჰეპატიტის პროგრამისათვის ბენეფიციარების რეგისტრაცია და წინასწარი კვლევა. ელიმინაციის პროგრამის ფარგლებში მედიკამენტები უფასოა, ასევე სოცლალურად დაუცველი მოსახლეობისათვის სახელმწიო საჭირო კვლევებს 70 %-ით, ხოლო დანარჩენი მოსახლეობისათვის 30%-ით აფინანსებს.
დიაგნოსტიკური კვლევების თანადაფინასების პროცესში აჭარის ა/რ საზოგადოებრივი ჯანდაცვის ცენტრი და ქ. ბათუმის მერიაც ერთვება. ეს იმას ნიშნავს, რომ სოციალურად დაუცველ ბენეფიციარებს კვლევა 100%-ით დაუფინანსდებათ, სხვა დანარჩენებს კი თანაგადახდის 60%-ი“, – აღნიშნა აჭარის ჯანდაცვის მინისტრის პირველმა მოადგილემ ლევან გორგილაძემ.
ქ. ბათუმის ინფექციური პათოლოგიის, შიდსისა და ტუბერკულოზის რეგიონული ცენტრის დირექტორის განმარტებით, კლინიკა მზად არის სრული მომსახურება გაუწიოს C ჰეპატიტის ელიმინაციის პროგრამის მონაწილეებს.
„ყველა პიროვნებას, რომელსაც აქვს დადასტურებული თუ დაუდასტურებელი ან ეჭვი C ჰეპატიტზე, მას შეუძლია მონაწილეობა მიიღოს ამ პროგრამაში. მოქალაქემ თან უნდა იქონიოს პირადობის მოწმობა და C ჰეპატიტის დამადასტურებელი ლაბორატორიული კვლევის პასუხი. ამის შემდეგ ის ერთვება პროგრამაში და უტარება შესაბამისი კვლევები. კლინიკაში შექმნილია ინფრასტრუქტურა, მოვაწყვეთ ელიმინაციის პროგრამის კაბინეტი და აღვჭურვეთ საჭირო ინვენტარით“, – აცხადებს რეგიონული ცენტრის დირექტორი ჯემალ დუმბაძე.
დეპარტამენტის ცნობით, საერთაშორისო მნიშვნელობის სენაკი–ფოთი–სარფი საავტომობილო გზის ჩაქვი–მახინჯაურის გვირაბების მისასვლელებთან ავტოტრანსპორტის მოძრაობის რეჟიმის რეგულირების ტექნიკური საშუალებების მოწყობის სამუშაოების წარმოების გამო 15 ივნისის დილის 10:00 სთ-დან 22 ივნისის დილის 10:00 საათამდე მარჯვენა გვირაბში იკრძალება ყველა სახის ავტოტრანსპორტის მოძრაობა.
ავტოტრანსპორტის მოძრაობა განხორციელდება მარცხენა გვირაბში ორმხრივი მიმართულებით.
„უდიდეს მწუხარებას გამოვთქვამთ თბილისში დატრიალებული ტრაგედიის გამო. მთელი გულით ვიზიარებთ დაღუპულთა ოჯახების მწუხარებას.
ძალიან გვინდა, გარდა თითოეული თანამშრომლის ინდივიდუალური მცდელობისა და აქტიურობისა, მაღაზიამ და გამომცემლობამაც თავისი წვლილი შეიტანოს დაზარალებულთა დახმარების საქმეში. ამიტომ, დღეიდან ერთი კვირის განმავლობაში, ჩვენს მაღაზიაში თითოეული, ნებისმიერი შენაძენიდან 20%-ს შევაგროვებთ სტიქიით დაზარალებულთა დასახმარებლად. ეს რაოდენობრივად არც ისე დიდი თანხაა, მაგრამ ცოტას ცოტა დაემატება და შესაძლოა, თქვენი აქტიურობით ბოლოს ძალიან მნიშვნელოვანი ციფრიც მივიღოთ,“ – ნათქვამია გამომცემლობის მიერ გავრცელებულ განცხადებაში.
სტუდენტები, პროფესორ-მასწავლებლები და რექტორატი თანაუგრძნობს დაღუპულთა და დაზარალებულთა ოჯახებს. ბათუმის შოთა რუსთაველის სახელმწიფო უნივერსიტეტმა მათ დასახმარებლად გადაწყვიტა თანამშრომელთა ხელფასის 1% გადაირიცხოს სტიქიით დაზარალებულთა დახმარების ფონდში. ასევე დაიწყო საქველმოქმედო აქცია პირველადი მოხმარების საგნებისა და ტანსაცმლის შესაგროვებლად“.
სტიქიის შედეგად დაზარალებულთა დახმარების მსურველებმა მიმართეთ უნივერსიტეტში შექმნილ შტაბს. მისამართი: ბათუმი, ნინოშვილის #35, I კორპუსი, სასპორტო დარბაზი.
„პირველ რიგში მსურს მწუხარება გამოვთქვა თბილისში მომხდარი ტრაგედიის გამო და მივუსამძიმრო დაღუპულთა ოჯახებს და ახლობლებს. გუშინ მთელი დღის განმავლობაში საქართველოს მთავრობასთან და თბილისის მერიასთან კავშირზე ვიყავით და სხვადასხვა სახის დახმარებას ვთავაზობდით.
საქართველოს მთავრობა და სამოქალაქო საზოგადოება თბილისში მობილიზებული იყო და დროულად ახდენდა რეაგირებას. აჭარის მცხოვრებლებთან ერთად ჩვენ ვმუშაობთ სტიქიის შედეგად დაზარალებული მოქალაქეების დასახმარებლად – გროვდება სურსათი, პირველადი დახმარების საყოფაცხოვრებო ნივთები და ჰიგიენის საშუალებები.
აჭარის მთავრობა სტიქიით დაზარალებული ოჯახების ბავშვებს სთავაზობს აჭარის კურორტებზე დასვენებას და რეაბილიტაციის შესაძლებლობას, რათა მომხდარი ტრაგედიის დროს მიღებული სტრესი დაძლიონ. რეგიონში მოქმედი ყველა უწყების საჯარო მოხელემ სურვილი გამოთქვა ფულადი დახმარება გაუწიოს დაზარალებულებს.
ასევე აჭარაში მცხოვრებნი გამოთქვამენ თანადგომის სურვილს, ბათუმის მერიის ადმინისტრაციულ წარმომადგენლობებსა და მუნიციპალიტეტების გამგეობებში შექმნილია სპეციალური პუნქტები, სადაც ნებისმიერ მსურველს შეუძლია მიიტანოს პირველადი დახმარების ნივთები. ასევე ბათუმის მერიის მობილიზების სამსახურში მიმდინარეობს მოხალისეთა რეგისტრაცია. აჭარის მთავრობის აპარატში მუშაობს ცხელი ხაზი 27 20 01, რომელიც დახმარების მსურველ მოქალაქეებს მიაწვდის საჭირო ინფორმაცია.
13 ივნისს დაწყებულმა წვიმამ მდინარეების, ვერესა და მტკვრის ადიდება გამოწვია. წყნეთი-ბეთანიის გზატკეცილზე ჩამოწოლილმა მეწყერმა რამდენიმე სოფელი გარესამყაროს მოწყვიტა. სტიქიის შედეგად დაიღუპა სულ მცირე 12 ადამიანი და იძებნება 24. 36-მა დაშავებულმა მიმართა საავადმყოფოებს. მთავრობის ცნობით, ზარალი მიახლოებით 40 მილიონი ლარია.
ბათუმის #15 საჯარო სკოლის მოსწავლეები გამოსაშვებ კონცერტზე საზღვაო-სასწავლო ცენტრ ანრიში | 14 ივნისი 2015
როგორც სკოლის დირექტორმა ნინო მოდებაძემ გვითხრა ინსპირაციის წყარო გახდა გაზეთ „ბათუმელების მიერ გამოცემული წიგნი „მოგზაურობა ძველ ბათუმში“.
ბავშვებმა წიგნიდან „მოგზაურობა ძველ ბათუმში“ წაიკითხეს ამონარიდები ბათუმის დაარსებისა და მისი განვითარების შესახებ, იმ პიროვნებზე, მათ შორის უცხოელებზე, რომლებიც დიდ როლ თამაშობდნენ ბათუმის, როგორც ქალაქის ჩამოყალიბებაში.
„ჩვენმა გულთბილმა მასპინძლებმა იმის საშუალება მოგვცეს რომ მეოთხე კლასის გამოშვება, შესაბამის გარემოში გამართულიყო. ბავშვები თემატურად ჩაცმულები იყვნენ მეზღვაურის ტანისამოსში. საზღვაო საინჟინრო სასწავლებელ „ანრი“ მეზღვაურების სამჭედლოა. აქ ინტერიერიც შესაბამია თემატურად შეესაბამებოდა ჩვენს ღონისძიებას და ამიტომაც ავირჩიეთ ეს ადგილი“ – გვითხრა ნინო მოდებაძემ.
25 ივნისს მეზღვაურთა საერთაშორისო დღეს აღნიშნავენ. რექტორის მოადგილის ბადრი დოღონაძის თქმით საზღვაო-სასწვლო ცენტ „ანრიში“ ამ დღესთან დაკავირებით კონცერტი გაიმართება, სადაც სასწავლებლის ხელმძღვანელობის მიწვევით #15 საჯარო სკოლის მე-4 კლასისი მოსწავლეებიც მიიღებენ მონაწილეობას.
ქობულეთში, რუსთაველის ჩიხის #3-ში, სპორტული კომპლექსის ასაშენებლად გამოცხადებულ ტენდერში კომპანია „გზა XXI“-მ გაიმარჯვა. მუნიციპალიტეტსა და კომპანიას შორის ხელშეკრულება 2013 წლის 16 აგვისტოს გაფორმდა. პროექტის ღირებულება – 2 647 922 ლარი იყო. სამუშაოების დასრულების ვადა – 2015 წლის 30 აპრილი.
გასული კვირის მდგომარეობით, ქობულეთში, ამ მისამართზე, მხოლოდ ნულოვანი სამუშაოებია შესრულებული. არც ოთხსართულიანი შენობა დგას, რისი აშენებაც პროექტით იყო დაგეგმილი და არც მიმდებარედ გათვალისწინებული სტადიონის კონტურები მოსჩანს სადმე: ჩამოსხმული და მოშანდაგებულია საძირკველი და ჩამოსხმულია ბოძები. დახარჯული თანხა კი დაახლოებით 400 ათასი ლარია.
კომპანია „გზა XXI“-ს ტენდერებში მონაწილეობა-გამარჯვების არაერთწლიანი გამოცდილება აქვს. როგორც კომპანიის 50% წილის მფლობელი როინ აბუსელიძე ამბობს, ქობულეთში ამ პროექტის გარდა სხვა პროექტებში, ჯამში, 4 მილიონამდე ლარის ღირებულების სამუშაოები აქვს შესრულებული. აქამდე მოგებულ ყველა ტენდერს კომპანია უპრობლემოდ ასრულებდა. მეტიც – 2015 წელს იმავე კომპანიამ კიდევ ერთი ტენდერი მოიგო ასევე ქობულეთში – საკურორტო სეზონის დაწყებამდე გადათხრილი ჯავახიშვილისა და ლესელიძის ქუჩების მოპირკეთება უნდა მოასწროს.
ჯერ უცნობია, კომპანიისთვის სპორტკომპლექსის მშენებლობის ხელშეკრულების შეწყვეტით დაწყებული პრობლემები აისახება თუ არა „გზა XXI“-ს სხვა პროექტებზე და, შესაბამისად, ერთი კონკრეტული კომპანიის პრობლემა ხომ არ გადაიქცევა რამდენიმე ასეული ოჯახის პრობლემად ქობულეთში, რომლებიც ტურისტული სეზონის დაწყებას იმედით ელიან; მათ აქციებიც კი გამართეს გასულ კვირას ქუჩების მოპირკეთების დროზე დასრულების მოთხოვნით. აქ იციან, რომ თუ გადათხრილი ქუჩები არ მოწესრიგდა, მტვრით სავსე მათ სახლებში არც ერთი ტურისტი არ მოინდომებს გაჩერებას.
ურთიერთბრალდებები – „გზა XXI“ და ქობულეთის მუნიციპალიტეტი
სასპორტო სკოლის პროექტის შეწყვეტის მიზეზს მხარეები ერთმანეთში ხედავენ. არსებობს ასევე ოფიციალური დოკუმენტებიც, საიდანაც ნათლად ჩანს, რომ ტენდერი თავიდანვე შეცდომით იყო გამოცხადებული და პროექტიც არ იყო სათანადოდ დამუშავებული. ასევე ჩანს, რომ არც „გზა XXI“-ს ჰქონდა ბოლომდე ის პროექტი გააზრებული, რომლის ტენდერშიც 7 სხვა კომპანიასთან ერთად მიიღო მონაწილეობა და გაიმარჯვა კიდეც.
აი, რა წერია ოფიციალურ დოკუმენტებში: ქობულეთში სასპორტო სკოლის მშენებლობა დაიწყო 2013 წლის შემოდგომაზე. დოკუმენტების შესწავლით „ბათუმელებმა“ დაადგინა, რომ ნებართვა, რომელიც პროექტის მშენებლობაზე აჭარის ფინანსთა და ეკონომიკის სამინისტროს უნდა გაეცა და რომლის გარეშეც მშენებლობის დაწყება უკანონო იყო, გაიცა სამშენებლო სამუშაოების დაწყებიდან 9 თვის შემდეგ.
კანონდარღვევას აღიარებენ ქობულეთის გამგეობაში. მუნიციპალიტეტის გამგებლის მოადგილე ირაკლი ცეცხლაძე ამბობს, რომ ამის გამო ქობულეთის გამგეობა 19 ათასი ლარით არის დაჯარიმებული. „ჩვენ ეს თანხა გადავიხადეთ ბიუჯეტის სასარგებლოდ“, – ამბობს ირაკლი ცეცხლაძე. – „მაგრამ იმის გამო, რომ კომპანიას მშენებლობის ნებართვა არ ჰქონდა, ის დროში არ შეზღუდულა, რადგან სამუშაოების ათვლის თარიღად კომპანიას განესაზღვრა მშენებლობის ნებართვის გაცემის თარიღი და არა აქტიური თარიღი, რასაც ხელშეკრულება ითვალისწინებდა. ამ დათმობაზეც წავიდა მუნიციპალიტეტი. სინამდვილეში, კომპანია იმის გამო კი ვერ ასრულებდა ვალდებულებას, რომ ნებართვა არ მივეცით, არამედ დროში იმის გამო ვერ ჩაეტიენ, რომ ფინანსური პრობლემები ჰქონდათ“.
დოკუმენტებით მართლაც ჩანს, რომ კომპანიას მშენებლობის ვადა გაუგრძელეს და ნაცვლად 2015 წლის აპრილისა, სპორტსკოლის მშენებლობა ოქტომბერში უნდა დასრულებულიყო. „დირექტორებთან რამდენჯერმე გვქონდა საქმიანი საუბარი. ისინი გვპირდებოდნენ, რომ მალე დაიწყებდნენ მშენებლობას, მაგრამ ფაქტია, ისინი ერთი ლარის სამუშაოსაც ვერ ასრულებდნენ. მეორე ეტაპზე იყო რკინის კონსტრუქციების სამუშაოები – 800 ათასი ლარია გათვალისწინებული. აპრილის შემდეგ, როცა მეორე ეტაპის სამი თვე გავიდა, წერილი მივწერეთ – დარჩენილი დრო არარეალურია კონსტრუქციების დამზადება-ჩამოტანა-მონტაჟისთვის, ამას მინიმუმ 3-5 თვე სჭირდება. კომპანიას რეაგირება არ ჰქონია, მხოლოდ ის მოგვწერა, რომ აქვს პრობლემები და ვერ ასრულებს აღებულ ვალდებულებას. ამის შემდეგ ჩვენ გავამზადეთ შეთანხმება ხელშეკრულების ორმხრივად შეწყვეტაზე, მოვიდნენ კომპანიის წარმომადგენლები და ხელი არ მოაწერეს მას. კომპანიას საჯარიმო სანქციის სახით ეკისრება პირგასამტეხლო, ჯამში 52 ათასი ლარი“, – ეს ქობულეთის გამგეობის ოფიციალური პოზიციაა, რომელიც „ბათუმელებთან“ ირაკლი ცეცხლაძემ განმარტა.
„გზა XXI“-ის პოზიცია
კომპანია „გზა XXI“-ს 50% წილის მფლობელი როინ აბუსელიძეა. ის ძირითადად გზებისა და სკვერების მოპირკეთება-მშენებლობაზე მუშაობს. გასულ კვირას შეწყვეტილი 2,6-მილიონიანი ტენდერის თაობაზე ფიქრობს, რომ სიმართლე მის მხარესაა და აპირებს ქობულეთის გამგეობას სასამართლოში უჩივლოს. მისი აზრით, მუნიციპალიტეტს მისი კომპანიის რეპუტაციის შელახვაზე რომ არ „ეზრუნა“, ამ პროექტის ბოლომდე მიყვანა შეეძლო:
„პროექტით გათვალისწინებული იყო 100 კუბი გრუნტის მოჭრა, მოვჭარით 3 ათასი. პროექტის ავტორის ძებნაში – (გამგეობას თბილისური კომპანიისგან ჰქონდა პროექტი შესყიდული და ეს კომპანია ვალდებული იყო პროექტის ზედამხედველობა განეხორციელებინა მშენებლობის დროს) დავკარგეთ ორი თვე, გამგეობამ ვერ უზრუნველყო ამ კომპანიის მიერ პროექტის ზედამხედველობა. საპროექტო კომპანიამ იქამდე არ გაასწორა ხარვეზები პროექტში, ვიდრე ჩვენ ფული არ გადავუხადეთ, არა და ეს არ იყო ჩვენი მოვალეობა. უკანონოდ მაშენებინებდნენ – სათანადო ნებართვა არ იყო გაცემული, ავანსის სახით მუნიციპალიტეტს თანხა რომ ჩაერიცხა, კომპანია შეძლებდა საქმის გაგრძელებას. მე ქვეკონტრაქტორად მოვიწვიე „ელიტა ბურჯი“. გამგეობაში უდევთ წერილი, რომელიც „ელიტა ბურჯმა“ მისწერა. ბანკებთანაც დავიწყე მოლაპარაკება საგარანტიო თანხის მოსაძიებლად, მაგრამ სადაც არ მივედი, ყველგან დამხვდა ქობულეთის გამგეობისგან ინფორმაცია, რომ ცალმხრივად მიწყვეტდნენ ხელშეკრულებას, ამიტომ საგარანტიო არავინ მომცა, სწორედ ამის გამო არ ჩამომირიცხეს ავანსის თანხა“.
აბუსელიძე ამბობს, რომ ის თავდაპირველად თანახმა იყო ორმხრივად შეეწყვიტათ ხელშეკრულება, მაგრამ როდესაც ხელშეკრულების შეწყვეტის დოკუმენტებს გაეცნო, აღმოჩნდა, რომ მას აჯარიმებდნენ, ამიტომ აღარ მოაწერა ხელი შეთანხმებას: „ბოლო სამი თვე ამაში გაიყვანეს – ხვალ რა იქნება, ზეგ რა იქნება… დარეკეს სადაზღვევოში, მაგენს ჩვენ ცალმხრივად ვუწყვეტთ ხელშეკრულებასო და ყველამ თავი შეიკავა, სადაც მივედი, საორჭოფო სიტუაცია შექმნეს. ამასობაში ლარის კურსის გამო თითქმის 900 ათასი ლარით გაძვირდა პროექტი. გამგეობას მივმართეთ, რომ პრემიერის განკარგულების მიხედვით ლარის კურსით გამოწვეული ზარალი დაემატებინათ პროექტისთვის და სამუშაოს გავაგრძელებდით, მაგრამ ამაზეც უარი გვითხრეს“.
როინ აბუსელიძე ამბობს, რომ ის აუცილებლად იჩივლებს სასამართლოში. ის ფიქრობს, რომ სამუშაოს 50% შესრულებული აქვს და არც ერთ სხვა კომპანიას ამ დაკვეთის მიღება არ მოუნდება: ვიცი, რომ თანხის დამატებაც შესთავაზეს სხვა კომპანიებს, მაგრამ ეს ასე არ გამოვა, მე დღეში რვაჯერ გადავამოწმებ ამ ამბავს“.
ირაკლი ცეცხლაძე კი ფიქრობს, რომ სათანადო ექსპერტიზის დასკვნებისა და „გზა XXI“-სთან მიღება-ჩაბარების აქტების გაფორმების შემდეგ აუცილებლად გამოაცხადებენ ახალ ტენდერს.
„გზა XXI“-ში ამბობენ, რომ მათ მოახერხეს და ყოფილი პრემიერის, მილიარდერ ბიძინა ივანიშვილის კომპანია _ „ელიტა ბურჯი“ დაითანხმეს ქვეკონტრაქტორობაზე. როინ აბუსელიძე გვაცნობს ქობულეთის გამგებლისა და მათდამი „ელიტა ბურჯის“ მიერ წლის დასაწყისში გაგზავნილი წერილის შინაარს, რომელშიც ვკითხულობთ: „გაცნობებთ, რომ 2015 წლის 16 იანვარს „გზა XXI“-სთან გაფორმებული ხელშეკულების თანახმად, შპს „ელიტა ბურჯი“ იღებს ვალდებულებას 2015 წლის 31 დეკემბრადე, ქ. ქობულეთში, რუსთაველის გამზირის მე-3 ჩიხში არსებული სპორტული კომპლექსისთვის დაამზადოს და დაამონტაჟოს 432 ტონა ლითონის კონსტრუქცია. აღნიშნული ხელშეკრულებით გათვალისწინებული სამუშაოებისთვის ვადები დამოკიდებულია „გზა XXI“-ის მიერ საავანსო ღირებულების ჩამორიცხვაზე. „ელიტა ბურჯს“ დღეისათვის გაწეული აქვს რიგი მოსამზდებელი სამუშაოები“.
გამგეობაში ამბობენ, რომ მსგავსი თანხმობის შესახებ მათ არაფერი იციან. მათთვის „გზა XXI“ უკვე საეჭვო რეპუტაციის კომპანიაა და ამიტომაც უთხრეს უარი ლარის ცვლილებით გამოწვეული თანხის დამატებაზეც.
ჯერჯერობით უცნობია, ამ ურთიერთბრალდებების ფონზე კიდევ რამდენ ხანს არ ექნება ქობულეთს სასპორტო სკოლა.
სხვა შემთხვევები
2014 წლის აუდიტის სამსახურის მიერ აჭარის ფინანსთა და ეკონომიკის სამინისტროს შემოწმების მასალებში წერია, რომ ამ უწყებამ კერძო კომპანიებს სახელმწიფოსთან გაფორმებული ხელშეკრულებით დადგენილი ვადების თუ სხვა პირობების დარღვევისთვის დაკისრებული ჯარიმები ჩამოაწერა. 2014 წლის პირველი იანვრის მდგომარეობით პირგასამტეხლოს სახით დარიცხული თანხა კი 89 მილიონზე მეტი ლარი და მილიონ-ნახევარი დოლარი იყო. მაგალითად, კომპანია „ჟასმინს“ სახელმწიფომ 288 000 აშშ დოლარი აპატია. ამ კომპანიას ბათუმის ცენტრში, ყოფილ პირველ აფთიაქზე 40-ნომრიანი სასტუმრო უნდა აეშენებინა. ამ სასტუმროს მშენებლობა დღემდე არ არის დაწყებული, თუმცა ამის მიუხედავად, სახელმწიფომ კომპანიას საჯარიმო თანხა გაუუქმა, ხოლო ასაშენებელი ფართობი გაუზარდა. სახელმწიფომ 245 800 ლარით დააჯარიმა კომპანია „მერსინ ტურიზმი“, დაჯარიმებულთა შორის ყველაზე ბევრი თანხა – 8 63 900 აშშ დოლარი ბიზნესმენ ირის ბორჩაშვილს ჩამოაწერეს.
საქართველოს აუდიტის სამსახური იმავე დასკვნაში მიუთითებს, რომ სახელმწიფო დაჯარიმების ინსტრუმენტს ყველა კომპანიის მიმართ თანაბრად არ იყენებს – ზოგიერთის მიმართ ლოიალურია, ხოლო ზოგიერთის მიმართ – მკაცრი.
აჭარის ფინანსთა სამინისტროში აუდიტის სამსახურის დასკვნასთან დაკავშირებით კომენტირებისას აცხადებდნენ, რომ ამ ქმედებით სახელმწიფო ბიზნესის მხარდაჭერას ცდილობს.
ქალაქის მერის, დავით ნარმანიას განცხადებით, სტიქიის შედეგად დაღუპული მოქალაქეების ოჯახებს სახელმწიფო 10-10 ათასი ლარით დაეხმარება. დაღუპულთა დაკრძალვას სახელმწიფო უზრუნველყოფს. ბოლო მონაცემებით, სტიქიის შედეგად 12 ადამიანი დაიღუპა.
ქალაქის მერის განცხადებით, 45 ოჯახი ევაკუირებულია და გადაყვანილია უსაფრთხო ადგილზე.
„მიმდინარეობს დაზარალებული პირების სახლების გაწმენდა, იქ სადაც ცხოვრება შეუძლებელია, ქირით გაყვანაზე ვიფიქრებთ. იწმინდება გვირაბი და გზები, დაბინდებამდე ვიმუშავებთ“- აცხადებს თბილისის მერი.
„ბათუმში მცხოვრებო, ამჟამად ამ მყოფო მეგობრებო, ვისაც სურვილი გაქვთ, ტანსაცმელი, სასმელი წყალი, ნებისმიერი ნივთი, რომელიც ასე საჭიროა ახლა ამ ადამიანებისთვის, მოიტანოთ “საერთაშორისო გამჭვირვალობა – საქართველოს” ბათუმის ოფისში (ლუკა ასათიანის 27, მერიის გვერდით). ველაპარაკე მერიის წარმომადგენელს და ხვალ დილიდანვე შეეძლებათ ამ ნივთების გაგზავნა თბილისში. დამატებით თუ ვინმეს რამე დააინტერესებს, შეგიძლიათ ჩემი ნომერი მისცემთ 595 22 56 50,“ – წერს „საერთაშორისო გამჭვირვალობა- საქართველოს“ ბათუმის ოფისის წარმომადგენელი მალხაზ ჭკადუა ფეისბუქზე.
„საერთაშორისო გამჭვირვალობა- საქართველოს“ ბათუმის ოფისის მისამართი: ლუკა ასათიანის ქ.#27 (ბათუმის მერიის გვერდით)
„აქვე მინდა განვაცხადო, ქართველ მუსლიმთა კავშირი მზადაა საჭიროების მიხედვით აჭარიდან მიავლინოს მოხალისეები და ფიზიკური შრომით დახმარება გავუწიოთ შესაბამის უწყებებს, რათა ცოტათი მაინც შევამსუბუქოთ მდგომარეობა“ – წერია განცხადებაში.
„იქნებიან თანამშორმლები, რომლებიც ჩანაწერებით მიიღებენ მოქალაქებისგან იმ დახმარებას რასაც ბათუმელები ჩათვლიან საჭიროდ. თუ საჭირო გახდება მერიის სარეზერვო ფონდიდან გამოვყოფთ თანხას და შევიძენთ ჰუმანიტარულ დახმარებას,“ – თქვა გიორგი ერმაკოვმა.
ქალაქ ბათუმის ადმინისტრაციული ერთეულები:
ძველი ბათუმის ადმინისტრაცია
მერის წარმომადგენელი: ირაკლი დევაძე
ტელეფონი: 27-74-52
რუსთაველის ადმინისტრაცია
მერის წარმომადგენელი: მამუკა ცხვარაძე
ტელეფონი: 27-41-30
ბაგრატიონის ადმინისტრაცია
მერის წარმომადგენელი: იოსებ შერვაშიძე
ტელეფონი: 27-39-43
აღმაშენებლის ადმინისტრაცია
მერის წარმომადგენელი: იოსებ ტარიელაძე
ტელეფონი: 24-07-26
ჯავახიშვილის ადმინისტრაცია
მერის წარმომადგენელი: ამირან ოქროპირიძე
ტელეფონი: 24-63-31
თამარის ადმინისტრაცია
მერის წარმომადგენელი: თამაზ სალუქვაძე
ტელეფონი: 25-50-76
ხიმშიაშვილის ადმინისტრაცია
მერიის წარმომადგენელი: ირაკლი პატარიძე
ბონი-გოროდოკის ადმინისტრაცია
ტელეფონი: 25-47-54
აეროპორტის ადმინისტრაცია
მერის წარმომადგენელი: რომან დუმბაძე
კახაბრის ადმინისტრაცია
ბათუმის სამრეწველო ადმინისტრაცია
გონიო-კვარიათის ადმინისტრაცია
მწვანე კონცხის ადმინისტრაცია
ტელეფონი: 25-13- 22
„ყველას, ვისაც ექნება სურვილი, საჭიროების შემთხვევაში ჩავიდეს თბილისში და დახმარება გაუწიოს დედაქალაქის მცხოვრებლებს, შეუძლია მოვიდეს ბათუმში, ჩვენს სამობილიზაციო სამსახურში [მისამართი: ქ.ბათუმი, 26 მაისის #45, ტელეფონი: 27- 41- 72] და გაიაროს რეგისტრაცია. ჩვენ შეგვეძლება საჭიროების შემთხვევაში ორგანიზებულად მოვახდინოთ დამხმარე ძალის გადაყვანა თბილისში“, – განაცხადა გიორგი ერმაკოვმა.
ბათუმის მერის თქმით, მას მუდმივი კავშირი აქვს თბილისის მერთან და ამ ეტაპზე დახმარება საჭირო არ არის. თუმცა თუკი საჭიროება დადგება, ბათუმის მერია დედაქალაქის მცხოვრებლებს დაეხმარება.
“ამ ეტაპზე გადამოწმებული ინფორმაცია საჭირო დახმარების შესახებ:
დავალება #1
ვისაც გსურთ ჰუმანიტარული ნივთების ჩაბარება (ტანსაცმელი, საკვები, საბნები), მიმღები პუნქტი არის თამარაშვილის 10-ში გამგეობის შენობაში და თავისუფლების მოედანზე “საბვეის” რესტორანთან. ასევე შეგიძლიათ დახმარების ჩაბარება თქვენი უბნის გამგეობაში (რაც უფრო უპრიანია ქალაქში მოძრაობის შესამცირებლად.
დავალება #2
საჭიროა მანქანები დახმარების დასარიგებლად.
თუ გყავთ მანქანა და შეძლებთ დახმარება დარეგისტრირდით და მიუთითეთ ამის შესახებ შემდეგ ფორმაში:
https://docs.google.com/…/18UeTz-i667-WaAhHLZqmDq…/viewform…
დავალება #3
ვისაც ფიზიკურად მუშაობა შეუძლია – გმირთა მოედანზე მისვლა (სასურველია ნიჩაბი, ბატი და რაც გაქვთ გქონდეთ თქვენით)
მადლობა,
13 ივნისის ჯგუფი და პარტიზანი მებაღეები” – წერენ მოხალისეები.
ცოტა ხნის წინ, ქალაქის მერმა დავით ნარმანიამ მოხალისეებს მოუწოდა მონაწილეობა მიიღონ სარეაბილიტაციო სამუშაოებში – “თუ ვინმეს ექნება სურვილი, გმირთა მოედანზე არის შესაბამისი შეკრების ადგილი, სადაც შემდეგ ნაწილდება ეს ადამიანები ტერიტორიების მიხედვით. მათ შეუძლიათ მოვიდნენ და აქედან განაწილდებიან შესაბამისი მიმართულებებით და დაეხმარონ ჩვენს თანამშრომლებს, რათა უფრო სწრაფად მოვახდინოთ დაზიანებული ნაწილის აღდგენა და იმ ჩამონატანისგან ტერიტორიების გაწმენდა, რაც უხვმა ნალექმა ჩამოიტანა” – თქვა მან.
მოხალისეებს ახალი დავალებების შესახებ ინფორმაციის ნახვა შეუძლიათ აქ.
მუსიკალური საღამოს მიმდინარეობის პარალელურად, კოლონადებთან გაიმართება ფოტოგამოფენა, რომელზეც ასახული იქნება არაადაპტირებული ბათუმის გარემო და ის საჯარო ტიპის დაწესებულებები, სადაც შშმ პირებისთვის გადაადგილება, ფაქტობრივად – დღემდე შეუძლებელია.
შშმ პირთა უფლებების დაცვის დღის აღნიშვნის ინიციატორი ორგანიზაცია „ცვლილებები თანაბარი უფლებებისათვისა“.
ღონისძიებების დაგეგმვისა და განხორციელების პროცესში მონაწილეობდნენ: აჭარის სპორტისა და ახალგაზრდობის საქმეთა დეპარტამენტი, ორგანიზაცია „ბორჯღალი“, პროგრამა „საქართველოს მოხალისე“-ს აჭარის რეგიონის მონაწილეები, ახალგაზრდული ორგანიზაცია „Art Way”.
14 ივნისი საქართველოში, შეზღუდული შესაძლებლობის მქონე პირთა უფლებების დაცვის დღედ 1995 წლიდან აღინიშნება. სწორედ 1995 წელს იქნა მიღებული კანონი „შეზღუდული შესაძლებლობის მქონე პირთა სოციალური დაცვის“ შესახებ, რომელმაც დაარეგულირა და განსაზღვრა შშმ პირთა სტატუსი და უფლებები.
შშმ პირთა უფლებების დაცვის დღის აღნიშვნის მიზანია საზოგადოების ცნობიერების ამაღლება შეზღუდული შესაძლებლობის შესახებ, შეზღუდული შესაძლებლობის მქონე პირთა საზოგადოებრივ ცხოვრებაში ჩართულობის ხელშეწყობა, მათი შესაძლებლობების წარმოჩენა და საზოგადოებაში დამკვიდრებული სტერეოტიპული წარმოდგენების დაძლევა.
„ძალიან მაინტერესებს ადგილობრივი პრობლემატიკის გაგება, ადამიანებთან შეხვედრა, პირისპირ საუბარი. ამწუთას მთავარი მიზანი არის ჩვენი შეხედულებები გავუზიაროთ ხალხს და მათი პრობლემები გავიგოთ კარგად.
მოვისმინოთ და შემდეგ დიალოგის რეჟიმში გავაგრძელოთ ურთიერთობა. ბუნებრივია ურთიერთობა არის გათვლილი გრძელვადიან ურთიერთობაზე. ჩვენ არ ვართ ორგანიზაცია, რომელიც ფიქრობს დღევანდელ ან ხვალინდელ არჩევნებზე, ჩვენ ვფიქრობთ შორი პერსპექტივით ქვეყნის წინსვლაზე, ამიტომ გვინდა რომ ბევრ ადამიანს ჰქონდეს ჩვენი საზოგადოების შეასახებ მაქსიმალურად ბევრი ინფორმაცია და მათთვის ყველასთვის პროფესიონალი ხალხისთვის ღია იყოს „ივერიის“ კარები,“ – თქვა ნიკა რურუამ.
ნიკა რურუასთან ერთად შეხვედრას ყოფილი ხელისუფლების სხვა წარმომადგენლებიც ესწრებოდნენ. მათ შორის საქართველოს ყოფილი საგარეო საქმეთა მინისტრი გრიგოლ ვაშაძე, საქართველოს საგარეო საქმეთა მინისტრის ყოფილი მოადგილე ნიკოლოზ ვაშაკიძე, საქართველოს ყოფილი ელჩი საფრანგეთში მამუკა კუდავა, საქართველოს ყოფილი ელჩი ეუთოსა და ავსტრიაში პაატა გაფრინდაშვილი, საქართველოს ყოფილი ელჩი ჩინეთის სახალხო რესპუბლიკაში მამუკა გამყრელიძე.
ასევე შეხვედრაზე იმყოფებოდნენ პოლიტიკური პარტია „ქართული ოცნების“ ყოფილი წევრები, მურმან დუმბაძე და მედეა ვასაძე.
„ბათუმელების“ კითხვაზე ექნება თუ არა საზოგადოებრივ მოძრაობა „ივერიას“ რაიმე სახის კავშირი პოლიტიკურ პარტია „ნაციონალურ მოძრაობასთან“ ნიკა რურუა პასუხობს:
„მე ვიყავი მიხეილ სააკაშვილის კაბინეტის წევრი, თუმცა პარტიის წევრი არ ვყოფილვარ არასდროს და „ივერიაც“ არ არის პარტია. ეს არის საზოგადოებრივი მოძრაობა და ამიტომ გვინდა რომ ეს დარჩეს ასეთად, იმისთვის რომ ეს იყოს ბევრად უფრო ღია, ვიდრე ნებისმიერი პარტია. ღია ახალი ხალხისთვის, ადამიანებისთვის რომლებიც თავისი კომპეტენტური ხედვით ცდილობენ არსებულის გამოსწორებას. ჩვენ ამათ ყველას ბუნებრივ მოკავშირეებად მივიჩნევთ. მათ შორის ყველა პროდასავლურ ძალებს. ჩვენ ვართ სრულიად დამოუკიდებელი ხალხი, მაგრამ ყველა პროდასავლური, ყველა თავისუფლებაზე, საქართველოს ერთიანობაზე, საქართველოს ევროპულობაზე ორიენტირებული ძალა არის ჩვენი ბუნებრივი მოკავშირე.
კითხვაზე, რამდენად უკავშირდება მოძრაობის გეგმები მომავალ საპარლამენტო არჩევნებს რურუამ განაცხადა რომ „ყველაფერი უკავშირდება სიტუაციის უკეთესობისკენ შეცვლას“.
ნიკა რურუა
აუქციონში გამარჯვებული ინვესტორი ხელშეკრულების თანახმად ვალდებულია სოფელ ქვედა მახუნცეთში 80 000 დოლარის ინვესტიცია განახორციელოს, ხელშეკრულების გაფორმებიდან 12 თვის განმავლობაში კი არანაკლებ 10-ნომრიანი სასტუმრო ააშენოს და 24 თვის განმავლობაში აამოქმედოს კიდეც.
ამავდროულად ხელშეკრულება ინვესტორს ავალდებულებს სასტუმროს გახსნიდან 1 თვის შემდეგ ხუთი წლის განმავლობაში მინიმუმ 5 მოქალაქე დაასაქმოს.
კულტურული ღონისძიებების დაგეგმვასა და მის განხორციელებაზე პასუხისმგებლობა მერიის აიპ-ს, „ბათუმის კულტურის ცენტრს“ ევალება. ცენტრის ადმინისტრაციაში 35 თანამშრომელი მუშაობს და ყოველწლიურად მის შენახვაზე 200 ათასი ლარი იხარჯება ბიუჯეტიდან. აიპ-ის ხელმძღვანელად ჯონი საბაშვილი უკვე მეორე წელია რაც დაინიშნა. ის გასულ წელს, ტურისტული სეზონის გახსნის წინ დანიშნეს ამ თანამდებობაზე და განმარტებისთვის ითქვა, რომ ფორსმაჟორული სიტუაციის გამო მისთვის „ბევრი არ უნდა მოეთხოვათ“. თუმცა ერთი წლის წინ ფორსმაჟორში დანიშნული კულტურის ცენტრის ხელმძღვანელი კულტურულ ღონისძიებებს წელსაც ფორსმაჟორში გეგმავს.
„წლევანდელი წელი ცოტათი განსხვავებული გვინდოდა, მაგრამ გამომდინარე იქედან, რომ ღონისძიებებისთვის საჭირო ბიუჯეტი სეზონის გახსნის წინ დამტკიცდა, მუშაობა ექსტრემალურ ვითარებაში მოგვიწევს“, – უთხრა მან „ბათუმელებს“.
აიპ-ის დაქვემდებარებაში ექვსი შემოქმედებითი ჯგუფია, რომლის წევრებიც წლის განმავლობაში ბიუჯეტიდან ხელფასს (300-400 ლარი) იღებენ. ჯონი საბაშვილისთვის ექსტრემალურ სიტუაციაში დასაყრდენს სწორედ ეს ჯგუფები წარმოადგენენ:
„გვინდა, ქუჩის კონცერტები გავმართოთ და ამით გავახალისოთ ხალხი. თავდაპირველად ვფიქრობდით, რომ კონცერტები მხოლოდ შაბათ-კვირას, ბულვარში კოლონადებთან გაგვემართა. ეს ქალაქს გამოაცოცხლებს, თანაც ამ დღეებში უფრო მეტი ტურისტი შემოდის ქალაქში. მაგრამ შემდეგ ვიფიქრეთ, რომ კარგი იქნება თუ სხვა დღეებშიც გაიმართება ქუჩის კონცერტები“, – ამბობს ჯონი საბაშვილი.
რამდენი იქნება ქუჩის მუსიკოსების ჰონორარი, პროგრამაში დაზუსტებული არ არის. საორიენტაციო გეგმის მიხედვით, ქუჩის მუსიკოსებისთვის (10 ადამიანზე) 2 240 ლარია გათვალისწინებული, თუმცა ჯონი საბაშვილის თქმით, ბიუჯეტის გეგმა კორექტირებას ექვემდებარება და ეს მოცემული ციფრები დიდი ალბათობით შეიცვლება. „ტურისტული სეზონი ოფიციალურად 15 ივნისს უნდა გაიხსნას. ამ დროისთვის ყველაფერს დავარეგულირებთ“.
როგორც ჯონი საბაშვილი ამბობს, ტურისტულ სეზონს გახსნის და დახურავს „ხარისხიანი DJ, შიგადაშიგ დაუკრავენ სხვა დონის DJ-ებიც“. ამ დროისთვის არც ის ადგილებია დაზუსტებული, სადაც DJ-ებმა უნდა დაუკრან. „სავარაუდოდ, ეს იქნება ზღვის პირას, ბულვარში“, – ამბობს საბაშვილი.
საორიენტაციო ბიუჯეტში, იქ, სადაც უცხოელი შემსრულებლებისთვის განკუთვნილი ჰონორარებია მითითებული, ვკითხულობთ: „სეზონის გახსნა – 1 კაცი. საჰონორარო თანხა – 33 350 ლარი“. ადგილობრივ DJ-ისთვის კი 11 500 ლარია გათვალისწინებული.
უცხოელი შემსრულებლებისთვის განკუთვნილი ჰონორარი, მთლიანობაში, 1 471 250 ლარს აღწევს. თუმცა, აიპ-ის დირექტორი კიდევ ერთხელ აზუსტებს, რომ ჰონორარები ღონისძიების გეგმის კორექტირების მიხედვით შეიცვლება.
ყველაზე მეტი თანხა – 140 ათასი, 255 ათასი, 102 ათასი ლარი, გათვალისწინებულია შავი ზღვის მოდის დღეების, თეატრალური კვირეულის და როკისა და ბლუზის დღეებისთვის. ფესტივალის გამართვის დღეები არც ამ შემთხვევაშია დაზუსტებული. ერთადერთი, რაც ღონისძიებაზე პასუხისმგებელმა პირებმა იციან, არის ის, რომ საზაფხულო თეატრი ერთი თვის განმავლობაში დაკავებულია: „კერძო პირებს აქვთ იჯარით აღებული და კონცერტები გაიმართება“. ამ კონცერტების ორგანიზატორი „ბათუმის კულტურის ცენტრი“ ბუნებრივია არ არის.
„ის, რომ ღონისძიებების თარიღები ან კონკრეტული მომღერლების ვინაობა დადგენილი არ არის, ამის მიზეზი ბიუჯეტის დაგვიანებით დამტკიცებაა. საერთაშორისო დონის ფესტივალების დროს მუსიკოსებთან შეთანხმება რამდენიმე თვით ადრე იწყება. სანამ მათ არ წარუდგენ დოკუმენტს, რომ თანხა ნამდვილად არსებობს ჩვენს ანგარიშზე, მანამდე მოლაპარაკებაზე არ მოდიან. ამიტომ, ახლა მოგვიწევს ამ პროცესის ფორსმაჟორში მოგვარება“, – ამბობს ჯონი საბაშვილი.
რატომ გამოიყო ღონისძიებებისთვის თანხა არა წლის დასაწყისში, არამედ სეზონის გახსნიდან ათი დღით ადრე? – ჯონი საბაშვილს ამაზე პასუხი არ აქვს: „რაღაც თანხები გამოთავისუფლდაო. მე არ ვეთანხმები ამ მიდგომას და ვფიქრობ, რომ ბიუჯეტი უფრო ადრე უნდა გვქონოდა“.
აიპ-ის ვალდებულებაში „ბათუმობის“ დღესასწაულის ორგანიზებაც შედის. ღონისძიების ბიუჯეტი „სეზონი ჰიტ 2015“-სგან განსხვავებით წლის დასაწყისში დამტკიცდა. შექმნილია სპეციალური ათკაციანი კომისიაც, თუმცა „ბათუმობასთან“ დაკავშირებული სიახლეებისა და წინადადებების განხილვა კომისიას ჯერ არ დაუწყია. ბიუჯეტი 150 ათასი ლარითაა განსაზღვრული, რაც ითვალისწინებს ტენდერებსაც.
„ბათუმობაც არ არის ჯერ დაგეგმილი. ტენდერები ალბათ ოცი დღით ადრე გამოცხადდება. თუმცა, მე მაქვს რაღაც იდეები, ჩემი მეგობარი მხატვრები ვამუშავე იდეებზე და რაღაცები გვაქვს მოფიქრებული. პრობლემაა ის, რომ სატენდერო თანხებს გავცდით. ვნახოთ, რა გამოვა“, – ამბობს აიპის ხელმძღვანელი.
სპეციალური ათკაციანი კომისია შეიქმნა „ბათუმი ჰიტ სეზონი 2015“-სთვისაც, რომელსაც საკრებულოს თავმჯდომარე ირაკლი ჭეიშვილი ხელმძღვანელობს.
როგორც ჯონი საბაშვილი ამბობს, სეზონის განმავლობაში დაგეგმილია უკრაინელი და რუსი შემსრულებლების ჩამოყვანაც. თუმცა საბაშვილი არც ერთი მათგანის ვინაობას არ აკონკრეტებს: „ახლა სახელი და გვარები დავასახელო, მაშინ მართლა შევრცხვებით, რადგან შეიძლება შეთანხმება არ შედგეს.“
კულტურის ცენტრის ხელმძღვანელი ამბობს, რომ ცდილობს სეზონი საინტერესო გახადოს და დაზოგოს თანხაც: „ჩვენ ვგეგმავთ როგორც 50-ათასიანი ღირებულების, ასევე 30, 10-ათასიანი და უფრო ნაკლები ღირებულების მომღერლების ჩამოყვანას. მაგრამ შეიძლება გავაკეთოთ თანხის ეკონომია და ჩამოვიყვანოთ არა ერთი 50-ათასლარიანი მომღერალი, არამედ რამდენიმე და უფრო ნაკლებფასიანი. ასე ჩვენც დაგვრჩება თანხა განვითარებისთვის, ტექნიკას ვიყიდით და აღარ მოგვიწევს ყოველთვის სხვისგან ქირაობა“.
ჯონი საბაშვილის თქმით, ბათუმს საერთაშორისო დონის ღონისძიების ჩასატარებელი ტექნიკა დღეს არ აქვს: „მერიას აქვს სცენა და გახმოვანება, მაგრამ ბევრი დეტალი აკლია. პიაცაზე და ერას მოედანზე გამართული კონცერტების დროს ეკრანები და ბევრი სხვა დეტალი თბილისიდან იყო ჩამოტანილი.“
„ბათუმი მეტად უნდა გაიხსნას მსოფლიოსთვის – მეტი უნდა მიიღოს და მეტიც უნდა გასცეს. ვინაიდან კულტურული ტურიზმის როლი მეტად მნიშვნელოვანია ქალაქის განვითარებისთვის“, – ვკითხულობთ სახელდახელო პროექტში, რის საფუძველზეც საკრებულომ სამ მილიონზე მეტი ლარი გამოყო ბიუჯეტიდან.
საორიენტაციო პროექტში ასევე ნათქვამია, რომ „ბათუმი ჰიტ სეზონი 2015“ იქნება „დიდებული ზეიმი“. სწორედ ამ „დიდებული ზეიმის“ დაგეგმვა დაიწყო მერიამ „ექსტრემალურ დროში“, ტურისტული სეზონის გახსნიდან ათ დღეში.
საქართველოს სამინისტროებისა და მათ კონტროლს დაქვემდებარებული საბიუჯეტო ორგანიზაციების მიერ ეკონომიით დარჩენილი თანხის მიმართვა შესაძლებელია საქართველოს ფინანსთა სამინისტროსთან შეთანხმებით.
2015 წლის იანვარ-მარტში გამოცხადებული ტენდერების შედეგად წარმოქმნილი ეკონომია უწყებების მიხედვით:
მეტი საჯაროობის უზრუნველყოფის მოტივით 2013 წელს წინა მოწვევის საკრებულომ ტელე და რადიოსიგნალის მიმღები აპარატურა ელექტრონული ტენდერით 22 000 ლარად შეისყიდა. გარდა ამისა, საკრებულოს ბიუჯეტიდან 7684 ლარი დახარჯეს ე.წ. სერვერისა და ქსელის მარშუტიზატორის შესაძენად. ამის შემდეგ საკრებულომ სხდომების პირდაპირი ტრანსლირება დაიწყო საკრებულოს ვებგვერდზე: www.batumicc.ge სხდომის დასრულებიდან რამდენიმე საათში კი გადაღებულ მასალას ვებგვერდზე ტვირთავდნენ.
ბათუმის საკრებულოს მხრიდან ამ ინოვაციის დანერგვამ საზოგადოებაში მოწონება დაიმსახურა, საკრებულოს მაშინდელი თავმჯდომარე ირაკლი ჩავლეიშვილი კი, რომელიც ახლა თავმჯდომარის მოადგილეა, ანგარიშის ჩაბარებისას ჟურნალისტებთან ამ სიახლით თავს ყოველთვის იწონებდა და საკრებულოს მუშაობის გამჭვირვალობაზე მიუთითებდა.
სხდომების ვიდეოარქივის შევსება ახალი მოწვევის საკრებულომაც გააგრძელა. თუმცა სამ თვეზე მეტია, რაც ახალი სხდომის ვიდეოჩანაწერს საიტზე აღარ ათავსებენ.
დაახლოებით ორი თვის წინ ამ საკითხით დაინტერესების შემდეგ საკრებულოს თავმჯდომარის, ირაკლი ჭეიშვილის დავალებით “ბათუმელებს” საკრებულოს სხდომის ვიდეოჩანაწერი პროგრამისტმა მიაწოდა. მაშინ სხდომის ვიდეოჩანაწერის ვებგვერდზე განუთავსებლობის მიზეზად სამსახურში პროგრამისტის არყოფნა დაასახელეს. მას შემდეგ სამ თვეზე მეტი გავიდა, თუმცა არათუ ახალი სხდომის ჩანაწერი არ აუტვირთავთ, არამედ ძველი ჩანაწერები, საკრებულოს ვიდეოარქივი საერთოდ წაშალეს.
„თავისუფალი დემოკრატები“ რეგლამენტზე მუშაობისას მოვითხოვდით არამარტო სხდომების, არამედ კომისიისა და ბიუროს სხდომების ეთერში ტრანსლირებასაც. სამწუხაროდ, ამ ინიციატივას უმრავლესობამ არ დაუჭირა მხარი იმ არგუმენტით, რომ კომისია სამუშაო პროცესია და მოქალაქეებს არ დააინტერესებთ კომისიაზე გამოთქმული შეხედულებები. მაშინ ითქვა, რომ კომისიებს აქვთ საშუალება, თავად გადაწყვიტონ სხდომის ეთერში ტრანსლირების შესახებ. რაც შეეხება საკრებულოს სხდომების ვიდეოარქივის განთავსებას საიტზე, ეს ბუნებრივად უნდა ხდებოდეს და ხდებოდა. სამწუხაროა, რომ საკრებულოს სხდომების მიმართ გაზრდილი ინტერესის მიუხედავად, აღარ არსებობს სხდომათა ვიდეოარქივი. „ქართული ოცნება“ ერთგვარ კარჩაკეტილობას იწყებს“, – განაცხადა საკრებულოს წევრმა, ფრაქცია „თავისუფალი დემოკრატების“ თავმჯდომარემ კობა ჩხეიძემ „ბათუმელებთან“.
საკრებულოს თავმჯდომარის მოადგილეს ირაკლი ჩავლეიშვილს კი ინფორმაცია არ აქვს, თუ რატომ შეწყვიტა „მისი წამოწყების“ – სხდომის ვიდეოჩანაწერის ატვირთვა საკრებულოს აპარატმა. ინფორმაცია ამის შესახებ არც საკრებულოს უმრავლესობის ფრაქციის „ქართული ოცნების“ თავმჯდომარეს, თამაზ თურმანიძეს ჰქონდა: „გავარკვევ და ხვალ დამირეკეთ“.
მეორე დღეს თამაზ თურმანიძემ „ბათუმელებს“ უთხრა, რომ „ვებგვერდი განახლების რეჟიმშია და მისი დასრულების შემდეგ ვიდეოჩანაწერების ატვირთვა გაგრძელდება“. იგივე ინფორმაცია აქვს საკრებულოს აპარატის უფროსს პაატა მგელაძესაც.
კითხვაზე, რატომ დასჭირდა ამდენი დრო ვებგვერის განახლებას? – საკრებულოს თავმჯდომარის თანაშემწე სულხან მეფარიშვილი განმარტავს, რომ ვებგვერდის სერვერი გადაიტვირთა: „საიტი რეიტინგული გახდა, პირდაპირი ტრანსლირების დროს ჭედავდა და ითიშებოდა. სილქნეტმა, რომელთანაც ხელშეკრულება გვაქვს გაფორმებული, წერილი მოგვწერა, რომ განახლება აუცილებელია. ჩვენ მათზე ვართ დამოკიდებული“.
არასამთავრობო ორგანიზაციის ხელმძღვანელი ნათია აფხაზავა, რომელიც ასევე ბათუმის საკრებულოს საზოგადოებრივი მრჩეველთა საბჭოს წევრიცაა, მიიჩნევს, რომ საკრებულომ როგორც სხდომის ტრანსლირება, ასევე ვიდეოჩანაწერის ატვირთვა უნდა გააგრძელოს, მითუმეტეს, როცა ეს მეტ საჯაროობას უზრუნველყოფს და ამომრჩეველსაც მოსწონს.
„თავისუფალ ჟურნალისტთა სახლის“ ხელმძღვანელის ასლან ჭანიძის თქმით კი, ვიდეოჩანაწერის ატვირთვა უნდა გაგრძელდეს, რადგან ის დანახარჯს საერთოდ არ უკავშირდება. ეს იმ პირებს, ვინც მოუცლელობის მიზეზით სხდომებს ვერ ესწრება და ვერც ტრანსლირებას ადევნებს თვალს, სხდომის ჩანაწერის მოგვიანებით ნახვის საშუალებას აძლევს.
საკრებულოს თავმჯდომარის თანაშემწის თქმით, ვებგვერდის განახლებას ორი თვე დასჭირდება.
საქართველოს მთავრობის განკარგულებით, მთავრობის ადმინისტრაციას, მიეცა თანხმობა რომ „ადმინისტრაციული შენობის (მდებარე: ქ. თბილისი, პ. ინგოროყვას ქ. №”7) II, III, IV, V, VI, IX, X, XI და XII სართულებზე არსებული წინასწარ განსაზღვრული ფართი (საერთო ფართი: 21 მ 2 ), ბანკომატების, სავაჭრო და ყავის აპარატების განთავსების მიზნით, იჯარის ფორმით, აუქციონის გარეშე, შესაბამისი ხელშეკრულების დადებიდან 3 წლის ვადით, ყოველთვიური საიჯარო ქირის 80 (ოთხმოცი) ლარის სანაცვლოდ − ერთი ერთეული პროდუქტის/ყავის აპარატი, ხოლო ყოველთვიური საიჯარო ქირის 90 (ოთხმოცდაათი) ლარის სანაცვლოდ − ერთი ერთეული ბანკომატი, სარგებლობაში გადასცეს შესაბამის პირებს“.
დაახლოებით 300 წელი აჭარაში მოსახლეობა მევენახეობას აღარ მისდევდა. ვაზი გახმა და განადგურდა, ქვევრები კი მიწით ამოივსო და დატყდა. ამის მიუხედავად აჭარაში მეღვინეობას დიდი ტრადიცია აქვს. ამას ის არქეოლოგიური აღმოჩენებიც ადასტურებს, რომლებიც წლების მანძილზე პერიოდულად ხდებოდა ხოლმე.
ტოპონიმ „აჭარას“ წარმოშობასთან დაკავშირებით ბევრი ვერსია არსებობს, მკვლევარები დღემდე ვერ შეჯერდნენ ერთ საერთო ვერსიაზე. ერთ-ერთი ვერსიით სახელწოდება აჭარა სიტყვა „მაჭარადან“ უნდა იყოს წარმოშობილი. მკვლევარ შალვა ვარშანიძის აზრით, ტოპონიმი მაჭარა შეიძლება მეღვინეობასთან, მემაჭრეობასთან იყოს დაკავშირებული. მეღვინეობა-მევენახეობით კი რეგიონში ქვემო აჭარა გამოირჩეოდა. აქ აღმოჩენილი მარნები და ქვევრები სწორედ კარგად განვითარებულ მეღვინეობის ტრადიციაზე მიუთითებს.
აჭარაში მეღვინეობა ყველაზე მასშტაბურად ქედაში იყო გავრცელებული. კლდეში ნაკვეთი ძველი საწნახელი დღემდეა შემორჩენილი სოფელ ზუნდაგაში. ორგანყოფილებიანი საწნახელი სოფლის თავზე მდებარე ტყეშია განთავსებული. ერთ განყოფილებაში ყურძენს ყრიდნენ, ჭყლეტდნენ, დაწურვის შემდეგ კი ყურძნის წვენი მეორე განყოფილებაში ჩაედინებოდა. დაწურულ ტკბილს საგანგებოდ მომზადებულ ჭურჭელში აგროვებდნენ და შემდგომ ოჯახებში მიჰქონდათ ქვევრში ჩასასხმელად.
ქედაში, სოფელ ბაბუჩოღლებში კლდეში ნაკვეთი საწნახელია, რომელიც ანტიკურ ხანას განეკუთვნება და დაახლოებით ძვ.წ. აღრიცხვით IV-III საუკუნეებით თარიღდება. ეს ფაქტი ამყარებს იმ აზრს, რომ აჭარაში მეღვინეობას ღრმა ფესვები აქვს. ერთ-ერთი ვერსიით, ხელვაჩაურის მუნიციპალიტეტში მდებარე სოფელ მარადიდს ადრე მარანდიდი ერქვა, ნიშნად იმისა, რომ იქ ღვინის მარნები იყო. აჭარაში სხვადასხვა დროს არქეოლოგიური გათხრების შედეგად აღმოჩენილი ქვევრები და საწნახლები, ასევე განვითარებულ მეღვინეობის ტრადიციაზე მიუთითებს.
მეცხრე-მეათე საუკუნეებში აჭარა „ქართველთა სამეფოში“ შედიოდა შავშეთთან, კოლა-არტაანთან და სხვა პროვინციებთან ერთად. ეს ტერიტორიები ხევად იწოდებოდა, ხოლო მათ მმართველებს ხევისუფლები ერქვათ. აჭარაში ყოველ მეორე-მესამე სოფელს თავისი სამეთვალყურეო ციხე ჰქონდა, რომლის ირგვლივაც საციხისთავოს მოსახლეობა ცხოვრობდა. ციხეს მართავდა ციხისთავი. სწორედ მას ევალებოდა მოსახლეობიდან ხარკის აკრეფა სამეფო კარის თუ ცალკეული ფეოდალებისთვის. ხარკი გლეხებს უნდა გადაეხადათ როგორც ფულადი, ისე ღვინის სახით.
სოფელში იყო ერთი ადგილი გამოყოფილი, სადაც იდგმებოდა ე.წ. ბაკანი (ჭურჭელი). გლეხები რიგრიგობით მიდიოდნენ და მასში ღვინოს ასხამდნენ. ბაკანათი – ასე ჰქვია დღემდე მერისის ხეობაში მდებარე სოფელ კუჭულაში ერთ-ერთ უბანს. ისტორიკოსები ვარაუდობენ, რომ ეს უნდა ყოფილიყო ადგილი, სადაც მოსახლეობა ღვინის ხარკად შესაწირად გროვდებოდა.
მას შემდეგ, რაც 1453 წელს ოსმალებმა აიღეს კონსტანტინეპოლი, მოგვიანებით კი ბიზანტიის იმპერია, საქართველოს დაპყრობა მხოლოდ დროის საკითხი იყო. მოგვიანებით ასეც მოხდა. აჭარაში ოსმალთა მმართველობის დაწყებამ მხარის კულტურასა და ტრადიციაზე გავლენა იქონია. სარწმუნოებიდან დაწყებული, ტრადიციული ჩვევებით დამთავრებული – ყველაფერი ოსმალური კულტურის გავლენის ქვეშ მოექცა. ეს აისახა ღვინის კულტზეც.
აჭარაში საუკუნეების მანძილზე გავრცელებული მევენახეობის ტრადიცია გაქრა. ქვევრები წლობით მოუვლელობისგან დასკდა, ვაზი კი გახმა. მოგზაური თედო სახოკია, რომელმაც აჭარაში მას შემდეგ იმოგზაურა, რაც ის საქართველოს შემადგენლობაში დაბრუნდა, წერს:
„ვაზი უზარმაზარ ხეზეა გაშვებული. ღვთის ანაბარა იზრდება სხვა ხეთა შორის. უმეტესობას ნაცარი და ობი აქვს მოდებული და მოსავალს აღარ იძლევა. თუ გამოისხა სადმე, დამწიფდება თუ არა ყურძნად ჭამენ და ჭამის დროსღა მოიგონებენ თავიანთ ქრისტიან წინაპრებს: გურჯობის დროს დაურგავთო. ასეა ზემო აჭარაში”.
ზემო აჭარისგან განსხვავებით საუკუნის წინ სხვა ვითარება იყო ქვემო აჭარაში. როგორც სახოკია წერს, ვაზის მოსავალი ქვემო აჭარელი გლეხისთვის ერთგვარი შემოსავლის წყარო ყოფილა. ყურძენი ბათუმის ბაზარში ჩამოჰქონდათ და ერთ ფუთს მანეთად ყიდდნენ. მიუხედავად იმისა, რომ ყურძენი მოჰყავდათ, მისგან ღვინოს აღარ ამზადებდნენ. თედო სახოკიამ იმ ადამიანის ვინაობა შემოგვინახა, ვინც საუკუნეების შემდეგ პირველად დააყენა ღვინო აჭარაში.
„ქრისტიანობის გადავარდნის შემდეგ, აქაური ყურძენი მგონი პირველად გაწურა და ღვინო დააყენა ქვემო აჭარის უფროსის თანაშემწემ სიმონ იოსელიანმა 1896 წელს. როცა ქედაში გავიარე, მითხრა, ყურძენი სულ იაფად ვიყიდე (ფუთი სამ აბაზად) და 300 კოკა მშვენიერი ღვინო დავაყენეო. ჯერ არავის უცდია აქაური ყურძენი ღვინისთვის გაეწურაო”, – წერს სახოკია. მის მიერვე მოპოვებული მონაცემებით, 1894 წელს ზემო აჭარაში 120 ფუთი ყურძენი დაუკრეფიათ.
მიუხედავად იმისა, რომ 300 წლის მანძილზე აჭარაში მცხოვრებთ ღვინის დაყენება აკრძალული ჰქონდათ, ყურძნის აუდუღარი წვენის დალევა შეეძლოთ. ამ სახის წვენს აჭარაში ხარდალი ერქვა და მას გარკვეული ტექნოლოგიით ამზადებდნენ. მოზელდნენ მდოგვს, იმით გამოლესავდნენ, როგორც აჭარაში ამბობენ, „გამოფაფავდნენ“ ქვევრს, შიგ ტკბილს ჩაასხამდნენ და თავს დაახურავდნენ. ასე შენახული ტკბილი არ დუღდებოდა და ღვინოდ არ იქცეოდა. ნადიმის დროს სწორედ ამ ტკბილს შეექცეოდნენ ღვინის ნაცვლად. ხარდალს ბევრს არ აკეთებდნენ, რადგან ქვევრს თავს როგორც კი მოხდიდნენ, ტკბილი მაშინვე უნდა ამოეღოთ. ყურძენს იმერულ საწნახელში წურავდნენ, რომელსაც ჯარა ერქვა. წვენისგან აკეთებდნენ ჩურჩხელას, რომელსაც აჭარაში ქუმას ეძახდნენ.
აჭარაში შემდეგი ყურძნის ჯიშები იყო გავრცელებული: ადესა, ბუდეშური, ბურძგალა, ბუტკურა, ბროლა, ვანური თეთრი ყურძენი, კლარჯული, მატენაური, მეკრენჩხი, მწვანე, შხუმი, ჩხავერი, ცხენისძუძუ, ჭოდი, ხარისთვალა, ხოფათური, ჯანიში.
2015 წლის მაისში, ხელვაჩაურში, სოფელ კაპნისთავში მცხოვრებმა ხასან კახიძემ საკუთარ საკარმიდამო ნაკვეთში VI-XI საუკუნეების მარანი აღმოაჩინა. 11 ქვევრი საუკუნეების მანძილზე მიწით იყო ამოვსებული. დღეს აჭარაში მეღვინეობის განვითარებას უფრო მეტ ყურადღებას უთმობენ, ვიდრე გასულ საუკუნეებში.
https://nyti.ms/1dEuW3I
აღნიშნულ სკოლა-პანსიონში მოსწავლეებმა, სავარაუდოდ, საკვებისმიერი ინტოქსიკაცია მიიღეს, რის შესახებაც სააგენტოს საზოგადოებრივი ჯანდაცვის ცენტრიდან აცნობეს.
სურსათის ეროვნული სააგენტოს აჭარის რეგიონული სამმართველოს წარმომადგენლებმა ვითარება ადგილზე შეისწავლეს. მონიტორინგის შედეგად სკოლა-პანსიონში გამოვლინდა ვადაგასული სურსათი – 165 ცალი კვერცხი და 5 კილოგრამი სპრედი, რომლებიც კანონმდებლობის შესაბამისად განადგურდება; ასევე აიღეს არაჟნის ნიმუშები, რომლებიც კვლევისთვის აკრედიტებულ ლაბორატორიაში გადაიგზავნა.
დოკუმენტური შემოწმების შედეგად დადგინდა, რომ სოფელ სალიბაურის N2 საჯარო სკოლა-პანსიონს სურსათით ამარაგებს ფონდი „ვიქტორია”, რომელიც ბიზნესოპერატორად არ არის დარეგისტრირებული, რის გამოც იგი 500 ლარით დაჯარიმდა.
„ინფორმაციის თავისუფლების განვითარების ინსტიტუტი“ (IDFI), რომელიც ციფრულ მაუწყებლობაზე გადასვლის პროცესის მხარდაჭერას და მონიტორინგს ახორციელებს და ამ პროცესში აქტიურადაა ჩართული 2012 წლის დეკემბრიდან, დაინტერესდა, თუ სად იყიდება „სეტ ტოპ ბოქსები“, რა რაოდენობის აპარატურაა შემოტანილი საცალო ვაჭრობის ქსელში და როგორია მათი ფასები.
IDFI-ის ცნობით 2015 წლის 2 ივნისის მდგომარეობით საცალო ვაჭრობის ბაზარზე უმეტესად ორი ტიპის „სეტ ტოპ ბოქსია“ შემოტანილი – Eurostar-ი და TV Star-ი, რომელთა ფასი 55-65 ლარამდე მერყეობს. Eurostar-ის წარმოებული სხვა მოდელები დაახლოებით 70-80 ლარი ღირს. ბაზარზე ასევე წარმოდგენილია Sven-ის ფირმის 95 ლარის ღირებულების „სეტ ტოპ ბოქსები“. ეს უკანასკნელი „არაი თუმოროუს“ მაღაზიათა ქსელში იყიდება. „ციფრული მაუწყებლობის სააგენტომ“ სოციალურად დაუცველი პირებისთვის Konka-ს ფირმის რისივერები შეიძინა. IDFI-ის ინფორმაციით, უახლოეს მომავალში Konka ამ მოწყობილობის შემოტანას საცალო ბაზარზეც გეგმავს.
“ბაზარზე ძირითადად წარმოდგენილია TV Star-ის მიერ წარმოებული სეტ ტოპ ბოქსების ორი მოდელი – TV STAR DVB-T2 516 და TV STAR DVB-T2 525. პირველ მათგანს, რომელიც შედარებით იაფი, 55 – 60 ლარი ღირს, არ აქვს RCA კაბელის შესაერთებელი. RCA იგივე სამფერიანი კაბელია, რომელსაც მოსახლეობა „ტულპანებს“ ეძახის. სწორედ ამგვარი კაბელი სჭირდება ძველ ტელევიზორებს „სეტ ტოპ ბოქსის“ მისაერთებლად (დაახლოებით 1-2 ლარად მომხმარებელმა შესაძლოა შეიძინოს SCART-ის სამფერა კაბელზე გადამყვანი მოწყობილობა). აღნიშნულ მოწყობილობას აქვს ასევე HDMI გამოსასვლელი ახალი ტელევიზორებისთვის ამგვარი კაბელით მისაერთებლად. TV Star-ის „სეტ ტოპ ბოქსებს“ მართალია HDMI კაბელის შესაერთებელი აქვს, თუმცა ეს კაბელი არ მოჰყვება და მისი შეძენა მომხმარებელს ცალკე მოუწევს” – წერია ანგარიშში. მათივე ცნობით შედარებით ძვირი – 60-ლარი ღირს მეორე მოდელი TV STAR DVB-T2 525, რომელსაც TV Scart-ის შეერთების შესაძლებლობაც აქვს, სამფერიანი (RCA) კაბელი არც მას უერთდება პირდაპირ, ამისთვის მომხმარებელს დამატებითი გადამყვანი დასჭირდება. გადამყვანის ფასი დაახლოებით ერთი ლარია.
TV Star-ის მიერ წარმოებული სეტ ტოპ ბოქსების დისტრიბუტორი საქართველოში კომპანია accdistribution-ია. მათ მიერ IDFI-სთვის მიწოდებული ინფორმაციის თანახმად, შემოტანილი აქვთ ოთხი ტიპის რესივერი –
TV Star DVB-T2 517
TV Star DVB-T2 516
TV Star DVB-T2 525
TV Star DVB-T2 525+Dolby
სამ მოდელს გააჩნია ქართული მენიუ და ინსტრუქცია. კომპანიის მიერ IDFI-სთვის მიწოდებული მონაცემებით მასდღემდე ბაზარზე შემოტანილი აქვს 62 340 ცალი სეტ ტოპ ბოქსი. 17 ივნისამდე კი დამატებით 133 368 ცალის შემოტანას გეგმავს. საგარანტიო ვადა პროდუქტზე არის 12 თვე, სერვის ცენტრში მიღებიდან 24 საათში ნივთი იცვლება ან შეკეთდება.
საცალო ბაზარზე განთავსდება ასევე ქართულ – აზერბაიჯანული კომპანია „AG მიკროელექტრონიქსი“-ს მიერ საქართველოში დამზადებული სეთ-ტოპ-ბოქსები. კომპანიის მენეჯმენტის ინფორმაციით 23 ათასი ცალი რესივერს უახლოეს პერიოდში გამოუშვებენ საცალო ვაჭრობის ქსელში.
ყველაზე ძვირადღირებული Sven-ის ფირმის „სეტ ტოპ ბოქსებს“ (ხელმისაწვდომია „არაი თუმოროუს“ მაღაზიებში), რომლის ფასი 95 ლარია, მოჰყვება როგორც სამფერიანი (RCA) ასევე HDMI მისაერთებელი. თუმცა მაღაზიის წარმომადგენელთა განცხადებით, მარაგი ამ ეტაპზე ამოწურულია.
IDFI-ს ცნობით, 2 ივნისის მდგომარეობით, „სეტ ტოპ ბოქსები“ არ იყიდებოდა ტექნიკის ისეთ მსხვილ დისტრიბუტორებთან როგორიცაა „ტექნობუმი“, „სმაილი“, „ალტა“, „ოქეი“, „გალაქსი“.
ბათუმში მაღაზია „KTM ელექტრონიქსში“ არის შესაძლებელი „სეტ ტოპ ბოქსის“ ყიდვა. მისი ფასი 55 ლარია. ოზურგეთში სამ მაღაზიაში იყიდება აღნიშნული მოწყობილობა. მათი საერთო რაოდენობა დაახლოებით 150 ცალია. რესივერს არ მოჰყვება ტელევიზორთან მისაერთებელი კაბელები. TV Star-ის მიერ წარმოებული „სეტ ტოპ ბოქსები“ იყიდება გურჯაანშიც. მისი შეძენა „ელიტ ელექტრონიქსისა“ და „ბეკოს“ მაღაზიებში არის შესაძლებელი.
როგორც IDFI-ს ადგილობრივებმა აცნობეს, „სეტ ტოპ ბოქსები“ არსად იყიდება ფოთში, ზესტაფონში, ჩხოროწყუში, ჭიათურასა და ახალციხეში. სხვა გეოგრაფიულ წერტილებში ჩვენი ორგანიზაციის მიერ მონიტორინგი არ განხორციელებულა.
ნებისმიერი ტიპის „სეტ ტოპ ბოქსის“ შეძენისას აუცილებელია მომხმარებელმა მოითხოვოს:
– „სეტ ტოპ ბოქსის“ შემოწმება ადგილზე – მოწყობილობა უნდა იჭერდეს ქართულ არხებს და უნდა ჰქონდეს მეტრულ და დეციმეტრულ დიაპაზონებში სიგნალის მიღების შესაძლებლობა;
– დამატებითი კაბელების მიერთება და მისი შემოწმება – „სეტ ტოპ ბოქსს“ არჩევისას მომხმარებელი უნდა დარწმუნდეს, რომ სწორად შეარჩია ის კაბელი, რაც მის ტელევიზორს „სეტ ტოპ ბოქსთან“ დააკავშირებს. ასეთი სულ სამი ტიპის კაბელია – RCA (სამფერიანი, მოძველებული ტელევიზორებისთვის), HDMI (თანამედროვე ტელევიზორებისთვის) და Scart გადამყვანი. ადგილზევე უნდა მოხდეს გადამყვანი მოწყობილობების შეძენა და გატესტვა.
დეტალური ინფორმაციისთვის მომხმარებელი უნდა დაუკავშირდეს ციფრული მაუწყებლობის სააგენტოს ცხელ ხაზზე – 1480.
ანგარიშის სრულად სანახავად, გადადით ბმულზე.
შეხვედრას ესწრებოდნენ ხულოს გამგეობის წარმომადგენლებიც. შეხვედრის მიზანი ეკომიგრანტების პროგრამაში ჩართვა იყო. ჯანდაცვის სამინისტროს ცნობით, გადამზადბის შედეგად ეკომიგრანტები ყველაზე მოთხოვნად პროფესიებს დაეუფლებიან, რაც მათი დასაქმების შანსს კიდევ უფრო გაზრდის.
მიზნობრივი პროგრამის ფარგლებში ბენეფიციარები სამთვიანი სასწავლო პროგრამით შემდეგ სპეციალობებში გადამზადდებიან: მზარეული, კონდიტერი, სარესტორნო საქმისმწარმოებელი, სასტუმრო საქმისმწარმოებელი, შემდუღებელი, ამწის ოპერატორი და მძიმე ტექნიკის ოპერატორი. სწავლის განმავლობაში მაღალმთიანი აჭარის მაცხოვრებლები სასწავლებლის საერთო საცხოვრებლით ისარგებლებენ, ხოლო, ბათუმში და ხელვაჩაურში მცხოვრები პროგრამის მოსარგებლე ბენეფიციარებისათვის უზრუნველყოფილი იქნება ტრანსპორტი.
ამ დღისთვის ბათუმში ევროპაში მოღვაწე ქართველი ექიმების ჯგუფიც ჩამოვა, რომლებიც კონფერენციაზე მედიცინის კონკრეტულ დარგებში მსოფლიო მიღწევების შესახებ მოხსენებებით წარდგებიან.
2 დღის განმავლობაში, კონფერენციის ფარგლებში, 6 სამეცნიერო სესია გაიმართება და ძირითადი თემები ონკოლოგიას, პალიატიურ მზრუნველობას, ევთანაზიის ეთიკურ ასპექტებს, შაქრიანი დიაბეტის მართვას, მწვავე ინსულტების თანამედროვე მკურნალობას და ღვიძლის ტრანსპლანტაციას დაეთმობა.
როგორც მოგეხსენებათ თვითმმართველობის არჩევნები ჩატარდა 28 მაისიდან 3 ივნისის ჩათვლით და ეს გახლდათ ტრადიციული პროცესი, რაც 2006 წლიდან მოსდევს უნივერსიტეტს, იმ პერიოდიდან როცა პირველად შეიქმნა თვითმმართველობის სისტემა, რომელიც თითქოსდა სტუდენტთა ინტერესების დაცვაზე იყო ორიენტირებული, რეალურად კი ის პოლიტიკურ ინტერესს ატარებდა და სტუდენტთა უკეთ გასაკონტროლებლად შეიქმნა იმ ფორმით რა ფორმითაც დღეს არსებობს.
ხშირად მესმის საუბრები იმის შესახებ, რომ არჩევნები სრულიად თავისუფლად და სამართლიანად ჩატარდა და მექმნება წარმოდგენა რომ ამ პოზიციის მქონე პიროვნებებმა ან არ იციან თუ რას ნიშნავს სამართლიანი არჩევნები ან კიდევ არსებულ მდგომარეობას ფუთავენ, მექმნება წარმოდგენა რომ ეს არჩევნები არა სტუდენტების არამედ ლექტორების არჩევნები იყო, გამომდინარე იქედან რომ თითქმის ყველა ფაკულტეტზე შეიმჩნეოდა ლექტორთა აქტიურობა არჩევნებთან დაკავშირებით, მაგალითან სოციალურ და პოლიტიკურ მეცნიერებათა ფაკულტეტზე, სადაც ამ ბინძური პოლიტიკის მთავარი შემოქმედი გახლდათ ერთ-ერთი ლექტორი, ირაკლი მანველიძე, რომელიც პირადი ინტერესებიდან გამომდინარე ერეოდა სტუდენტთა გადაწყვეტილებაში და ამისათვის მარტივად იყენებდა დაშინების მეთოდს. მსგავსი ფაქტები შეიმჩნეოდა ტურიზმის ფაკულეტეტზე, სადაც ანალოგიურ პოლიტიკას ანხორციელებდა ყოფილი თვითმმართველობის თავმჯდომარე და აწ უკვე ლექტორად წოდებული ლაშა ბაჟუნაიშვილი, მსგავსი ფაქტები იყო ტექნოლოგიურსა და კიდევ სხვა ფაკულტეტებზე.. მსგავსი ფაქტები კი სამარცხვინო და საუნივერსიტეტო სივრცისათვის მიუღებელია, ვინაიდან ეს მეტყველებს საუნივერსიტეტო საზოგადოების დაბალ დონეზე, მითუმეტეს როდესაც ლექტორებს ეხება ეს საკითხი, ეს კიდევ უფრო სამარცხვინო და სავალალოა.
რაც შეეხება პოლიტიკურ გავლენას, როგორც უკვე აღვნიშნე ეს ინტერესი დიდი ხანია არსებობს და ბუნებრივია დღესაც მიმდინარეობს ბრძოლა უნივერსიტეტში გავლენის მოსაპოვებლად, უნივერსიტეტი დღითიდღე კარგავს დამოუკიდებლობას და დღითიდღე გადაწყვეტილების მიღების უფლებები გადადის გარე ძალების ხელში, რომლებიც უკვე ხშირი სტუმრები არიან საუნივერსიტეტო სივრცისა და მე მინდა ვუთხრა თითოეულ პიროვნებას რომელიც ხელს უწყობს ამ პროცესებს, რომ ეს არის უნივერსიტეტის ავტონომიურობის ხელყოფა და მსგავსი ქმედება მიუთითებს თქვენს უპრინციპობაზე.
და მაინც.. ყველაზე დიდი პრობლემა ისევ და ისევ საარჩევნო კულტურაა, რომელიც არ არსებობს საუნივერსიტეტო საზოგადოებაში, რაც იმაში გამოიხატება, რომ კანდიდატთა უმრავლესობას არ გააჩნდა იდეა, პროგრამა, რაზე დაყრდნობითაც უნდა მიეღო რეალურად გადაწყვეტილება ამომრჩეველს, თუმცა ეს ალბათ იმითაც არის განპირობებული, რომ უმრავლესობას არც კი აინტერესებს მსგავსი იდეა თუ პროგრამა, რადგან მათი გადაწყვეტილებები მკვეთრად სუბიექტურია. უფრო მეტიც, გასაოცარი სცენები იდგემებოდა არჩევნების დღეს, თავისუფლად იყო შესაძლებელი გეხილათ ძალით მოყვანილი ამომრჩეველი, რომელმაც არც კი იცოდა რომ არჩევნები იყო, ზოგიერთი ამომრჩეველი არცერთ ანდიდატს არ იცნობდა, ზოგი ლექტორის თხოვნით თუ დაშნებით მოდიოდა, ზოგმა ინფორმაცია დილით მიიღო მთავარ შემოსასვლელთან დარაზმული კანდიდატებისაგან, ასევე დროდადრო გაისმოდა სატელეფონო საუბრები დაპროგრამებული ტექსტებით, “თუკი კონკრეტულ კანდიდატს არ მიცემ ხმას ნიშანს არ გაღირსებს ლექტორი”. ამ გარემოებებში კი რთულია ისაუბრო თავისუფალ არჩევნებზე და დემოკრატიულ ღირებულებებზე.
მიუხედავად ყველაფრისა რაც ზემოთ ვახსენე, ყოველივე ეს რომ არაფრად ჩავთვალოთ, ის რაც დღეს მოხდა, კონკრეტულად კი ის რომ დღეს პრეზიდენტობის კანდიდატებს უნდა წარედგინათ თავიანთი პროგრამები ამომრჩევლების წინაშე, რაზეც სამწუხაროდ არ გამოცხადდა ერთ-ერთი კანდიდატი, ბექა მაკარაძე და თავისი სავარაუდო ამომრჩეველი, რაც ცხადყოფს რომ ყოველივე ეს არის ნაკარნახევი და თვითმმართველობის დიდი ნაწილი და თავად პრეზიდენტობის კანდიდატიც ირგებს მარიონეტის მდგომარეობას, ამ გარემოებებში კი ზედმეტია საარჩევნო კულტურის ხსენება.
ეს არის თვითმმართველობა რომელმაც თავისი ფუნქციონირების პირველივე კვირა დაიწყო უპასუხისმგებლობით, მითუმეტეს როცა უმრავლესობა არცკი ცდილობს დამოუკიდებლად გადაწყვეტილების მიღებას, აქ კი ბუნებრივია ჩნდება ეჭვი იმისა რომ თვითმმართველობა კიდევ მინიმუმ 2 წლის განმავლობაში იქნება გარე ძალებისა და ადმინისტრაციის დაკვეთების შემსრულებელი.
თუმცა აქვე მინდა აღვნიშნო რომ თვითმმართველობის რიგებში არიან სტუდენტები რომლეიბიც გამოირჩევიან ობიექტურობით და დარწმუნებული ვარ ისინი ყოველთვის იდგებიან სადარაჯოზე იმისათვის რომ თითმმართველობა არ გასცდეს იმ საზღვრებს რომლის იქითაც უკვე სხვისი ინტერესები ჩნდება.
ვიმედოვნებ ადრე თუ გვიან თითოეული წევრი გააცნობიერებს რეალურად იმ პასუხისმგებლობას რომელიც იკისრეს თვითმმართველობის წევრობით.
არჩევნებში ორი კანდიდატი – ბექა მაკარაძე და გიორგი ბაგრატიონი მონაწილეობდა. სტუდენტური თვითმმართველობის 94 წევრიდან არჩევანი 85-მა გააკეთა.
წინასწარი შედეგების მიხედვით, ჰუმანიტარულ მეცნიერებათა ფაკულტეტის თურქეთისმცოდნეობის საგანმანათლებლო პროგრამის II კურსის სტუდენტმა ბექა მაკარაძემ 64 ხმა დააგროვა, ეკონომიკისა და ბიზნესის ფაკულტეტის მენეჯმენტის საგანმანათლებლო პროგრამის III კურსის სტუდენტმა გიორგი ბაგრატიონმა – 17 ხმა, 4 ბიულეტინი კი ბათილად იქნა ცნობილი.
14 ივნისს საქართველოში შეზღუდული შესაძლებლობის მქონე პირთა უფლებების დაცვის დღე აღინიშნება. 1995 წელს სწორედ ამ დღეს იქნა მიღებული საქართველოს კანონი „შეზღუდული შესაძლებლობის მქონე პირთა სოციალური დაცვის“ შესახებ. მისი აღნიშვნის მიზანია შეზღუდული შესაძლებლობის მქონე პირების საზოგადოებაში ინტეგრაციის ხელშეწყობა, მათი შესაძლებლობების წარმოჩენა და საზოგადოებაში დამკვიდრებული სტერეოტიპული წარმოდგენების დაძლევა.
მერიის ცნობით, შპს ,,ბათუმის ავტოტრანსპორტი“ უკვე მუშაობს ტექნიკურ დოკუმენტაციაზე და სავარაუდოდ, 2016 წლის პირველ კვარტალში ყველა მუნიციპალური ტრანსპორტი ადაპტირებული იქნება შშმ პირთათვის
“მინდა ავღნიშნო,რომ გასულ წელთან შედარებუთ წელს ენერგეტიკამ მესამე პოზიციიდან (7%) პირველზე გადმოინაცვლა. ეს ნიშნავს, რომ აღნიშნული სფერო ვითარდება, ყოველწლიურად ინვესტორები უფრო მეტად ინტერესდებიან ენერგეტიკაში თავიანთი კაპიტალის დაბანდებით. ჩვენთვის მნიშვნელოვანია,რომ მაქსიმალურად ავითვისოთ თითოეულ სფეროში არსებული რესურსი, რათა შემდეგ ფინანსური სარგებელი მიიღოს აჭარის რეგიონმა” – ამბობს იონა წითელაძე.
მისივე ტქმით, საქართველოს სტატისტიკის ეროვნულმა სამსახურმა ბიზნეს სექტორის მაჩვენებლების ახალი მონაცემები გაასაჯაროვა, რომლის მიხედვითაც 2014 წელს 2013 წელთან შედარებით, აჭარაში უმუშვრობის დონე 2,3% შემცირდა – ”ეს ბუნებრივია არ არის საკმარისი, თუმცა საკმაოდ მნიშვნელოვანი წინსვლაა. დასაქმება ჩვენი მთავარი პრიროტეტია და თითოეული ახალი ინვესტიცია, ახალი სამუშაო ადგილების გაჩენის წინაპირობაა. აქტიურად ვაგრძელებთ მუშაობას ინვესტორებთან. ჩვენს მიერ უცხოეთში ორგანიზებულ ბიზნეს ფორუმებზე ინვესტორებს რეგიონის პოტენციალს ვაცნობთ. ბიზნესმენების მიერ რეგიონის გაცნობის ინტერესი საკმაოდ მზარდია და ჩვენ ველოდებით,რომ ეს ტემპი გაგრძელდება,უფრო ინტენსიური გახდება და კიდევ უფრო მასშტაბური პროექტები განხორიცელდება რეგიონში”- ამბობს ის.
ორგანიზაციამ ინფორმაცია 59 მუნიციპალიტეტიდან და 12 თვითმმართველი ქალაქიდან, მათ შორის თბილისის რაიონებიდან, გამოითხოვა და აღმოჩნდა რომ 2012-2014 წლებში საქართველოს თვითმმართველობებში პრემიისა და სახელფასო დანამატის სახით 100 მილიონ ლარზე მეტი გაიცა – ”გამომდინარე იქედან, რომ ცალკეული მუნიციპალიტეტის საკრებულომ და გამგეობამ/მერიამ ჩვენ მიერ გამოთხოვილი ინფორმაცია საერთოდ არ მოგვაწოდა, შეგვიძლია ვივარაუდოთ, რომ გაცემული პრემიებისა და დანამატების რიცხვი აღემატება ზემოხსენებულ მაჩვენებელს” – წერია ანგარიშში.
“საერთაშორისო გამჭვირვალობა – საქართველოს” ბათუმის ოფისის კოორდინატორი მალხაზ ჭკადუა ამბობს, რომ 2012 წლიდან 2014 წლის ჩათვლით, მთლიანად აჭარის რეგიონში მცირდება გაცემული პრემიების და დანამატების რაოდენობა, მაგრამ თვალში საცემია ბათუმში ამ თანხების ზრდის მაჩვენებელი – ”კონკრეტულად ეს ზრდის მაჩვენებელი ჭარბობს ბათუმის მერიაში, 2013 წელთან შედარებით 2014 წლისთვის ეს მაჩვენებელი დაახლოებით 500 000 ლარით არის გაზრდილი. აღასსანიშნავია, რომ 2014 წელს ზოგადად სახელფასო ანაზღაურების ფონდი 2 მილიონით შემცირდა ბათუმში. საკრებულოში 200 000-ით ნაკლები თანხაა გაცემული. ასევე თვალშისაცემია ის ტენდენცია, რომ 2014 წლის დეკემბრიდან აგვისტოს ჩათვლით საკრებულოს თანამდებობის პირებს, მათ შორის საკრებულოს თავმჯდომარის მოადგილეს და ფრაქციის კომისიის თავმჯდომარეს აქვთ აღებული ყოველთვიური პრემია, ხოლო დეკემბერში კი წინა თვეებში აღებული თითო პრემიის სამმაგი ოდენობა – 3 125 ლარი” – ამბობს ის.
მისივე თქმით ასეთივე მდგომარეობაა მერიის მაღალჩინოსნებთან :”კონკრეტულად საქმე ეხება ქალაქის მერს, ვიცე-მერს და ორ მოადგილეს, მათ ჯამში აგვისტოდან დეკემბრის ჩათვლით პრემიისა და დანამატის სახით დაახლოებით 105 000 ლარი აიღეს, ვფიქრობთ, რომ ძალიან დიდი თანხაა და თუ გამოვიანგარიშებთ, ყოველთვიურად გამოვა თითოზე საშუალოდ 6000 ლარი” – ამბობს მალხაზ ჭკადუა.
ანგარიშის მიხედვით ერთ-ერთი მნიშვნელოვანი პრობლემაა ისიც, რომ პრემიების გაცემა ხდება მხოლოდ ერთი ბრძანებით – ”არანაირად არ გავქვს საშუალება ვიხილოთ ის არგუმენტაცია თუ, რა დამსახურებისთვის აძლევს ამა თუ იმ თანამშრომელს და თანამდებობის პირს, საკრებულოს თავმჯდომარე ან მერი პრემიას. ჩვენ ვითხოვთ, რომ პრემიის გაცემა იყოს ინდივიდუალური სამართლებრივი აქტით გამყარებული და ეს არგუმენტაცია იყოს წარმოდგენილი რომ ჩვენც ავინახოთ ყველაფერი” – ამბობს “საერთაშორისო გამჭვირვალობა – საქართველოს” ბათუმის ოფისის კოორდინატორი.
აღსანიშნავია, რომ ავტონომიური რესპუბლიკაში წლიდან წლამდე პრემიებისა და დანამატების გაცემის მაჩვენებელი მცირდება: 2012 წელს გაიცა – 6,3 მილიონი ლარი, 2013 წელს – 5,9 მილიონი ლარი, 2014 წელს კი 5,9 მილიონი ლარი.
“საერთაშორისო გამჭვირვალობა – საქართველოს” მიერ ჩატარებული კვლევის შედეგად:
”არასრულყოფილი საკანონმდებლო რეგულაციების გამო, პრემიებისა და დანამატების გაცემის დამკვიდრებულმა მანკიერმა პრაქტიკამ სისტემური პრობლემის ხასიათი მიიღო. მიუხედავად მთავრობის არაერთი განცხადებისა, კვლავ გრძელდება პრემიებისა და დანამატების რეგულარულად გაცემის პრაქტიკა. ასევე, რიგ მუნიციპალიტეტებში ჯერ კიდევ არ არის შემუშავებული პრემირებისა და სახელფასო დანამატების გაცემის წესი. არის შემთხვევები, როდესაც წახალისების მიზნით, საჯარო მოხელეები თანხას კონკრეტული ძვირადღირებული საყოფაცხოვრებო ნივთის შესაძენად იღებენ;
მუნიციპალიტეტების ნაწილში პრემიები თითქმის ყოველთვიურად, ყოველგვარი დასაბუთების გარეშე გაიცემა. ადმინისტრაციული ორგანო გამოსცემს მხოლოდ ერთ სამართლებრივ აქტს, სადაც დასაბუთებული არ არის საჯარო მოხელეთა ფინანსური წახალისების საფუძველი;
„საჯარო დაწესებულებებში პრემიის ოდენობის განსაზღვრის წესის დამტკიცების შესახებ“ საქართველოს მთავრობის 2014 წლის 15 ივლისის N449 დადგენილებით, ადგილობრივი თვითმმართველობის ორგანოებს გაეწიათ რეკომენდაცია პრემიების ოდენობის განსაზღვრისა და გაცემის წესის მიღების შესახებ, თუმცა დადგენილება ამ ეტაპისათვის 71 მუნიციპალიტეტიდან 43 მუნიციპალიტეტმა მიიღო;
მუნიციპალიტეტის აბსოლუტურ უმრავლესობაში, როგორც წესი, პრემია სადღესასწაულო დღეებთან დაკავშირებით გაიცემა, (ახალ წელს, მარიამობას, დედისა და ქალთა, ასევე დამოუკიდებლობის დღეს), თუმცა ბევრგან პრემია და დანამატი არასადღესასწაულო პერიოდშიც აქტიურად გაიცემა;
რამდენიმე მუნიციპალიტეტში თანამდებობის პირებს სახელფასო სარგოს ოდენობაზე მეტი პრემია აქვთ აღებული.
