ციხისძირში, ხეების გადატანის წინააღმდეგ გამართულ აქციაზე, დაახლოებით 45 წუთის წინ, პოლიციამ ნაციონალური მოძრაობის წევრები – ქობულეთის საკრებულოს წევრი ბონდო თედორაძე და ოლეგ ბროლაძე დააკავა.

შსს-ს ინფორმაციით, ქობულეთში ორი მამაკაცი ადმინისტრაციული სამართალდარღვევათა კოდექსის 173-ე მუხლით, ანუ პოლიციის დაუმორჩილებლობის გამო დააკავეს.

ამ წუთებში აჭარის მთავრობის თავმჯდომარე, არჩილ ხაბაძე, მთავრობის შენობაში ენმ-ს წევრებს, მათ შორის პეტრე ზამბახიძესა და რობერტ ჩხაიძეს ხვდება. დახურულ შეხვედრაზე იმყოფება პარტიზანი მებაღე ნატა ფერაძე და კიდევ ერთი აქტივისტი.

მოქალაქე ლ. ა. „ლიბერთი ბანკს” სასამართლოში უჩივის. ის ბანკისგან მორალური და მატერიალური ზიანის ანაზღაურებას მოითხოვს. პენსიონერმა გასული წლის დასაწყისში აღებული სესხით მაცივარი და მტვერსასრუტი შეიძინა. ჯამში გადასახდელი 732,24 ლარის ნაცვლად, ლ. ა-ს 1015,45-ის გადახდა მოუხდა. მას ბანკმა ზედმეტად 283,21 ლარი გადაახდევინა. მიმდინარე წლის იანვარში მარტოხელა პენსიონერს, რომელსაც შემოსავლის სხვა არავითარი წყარო არ აქვს, „ლიბერთი ბანკმა” სრულად ჩამოაჭრა პენსია – 160 ლარი, გასული წლის ნოემბრის თვეში კი – 93 ლარი.

ლ. ა-ს ერთადერთი შემოსავალი პენსიაა. „ლიბერთი ბანკთან~ გაფორმებული განვადების ხელშეკრულების გრაფაში: „ინფორმაცია კლიენტის შემოსავლის შესახებ~ მხოლოდ ერთი უჯრაა შევსებული: „პენსიის ოდენობა ყოველთვიურად – 150 ლარი”. ხელშეკრულების მიხედვით, ლ. ა-ს ერთი წლის განმავლობაში ყოველთვიურად 74,13 ლარი უნდა გადაეხადა.

წლის განმავლობაში ლ.ა-ს წინააღმდეგ ბანკმა არაერთხელ აამოქმედა სესხის დაფარვის დაგვიანების მიზეზით გათვალისწინებული ჯარიმები, მათ შორის მაშინ, როცა ანგარიშზე არსებული თანხა ბანკმა პენსიონერს არ ჩამოაჭრა. “ლიბერთი ბანკის” საბანკო ამონაწერის მიხედვით, ერთ-ერთ ასეთ ფაქტს ადგილი ჰქონდა 2015 წლის 11 ივნისს, როცა ლ. ა.-ს ანგარიშზე 110 ლარი ჰქონდა, მაგრამ მას ეს თანხა არ ჩამოაჭრეს, შემდეგ კი დააჯარიმეს.

ლ.ა-ს მიმართ გატარებულ სანქციებს შორის გამოყენებულია პირგასამტეხლოს ფორმაც. ხელშეკრულების მიხედვით, ლ. ა-ს ყოველი თვის 12 რიცხვში უნდა დაეფარა სესხი, მაშინ, როცა სახელმწიფოსგან პენსიის გაცემის ბოლო თარიღად თვის 15 რიცხვია დადგენილი. ლ. ა-ს საბანკო ამონაწერიდან ჩანს, რომ მას პენსია 6-ჯერ ჩაერიცხა 12 რიცხვის შემდეგ. ეს იმას ნიშნავს, რომ პენსიონერს მისგან დამოუკიდებელი მიზეზის გამო პირგასამტეხლოს თანხის გადახდა სწორედ 6-ჯერ მოუწია.

„შეუძლებელია, „ლიბერთი ბანკს”, რომელიც პენსიებს გასცემს, არ ჰქონოდა ინფორმაცია იმის შესახებ, რომ პენსიები 15 რიცხვში გაიცემა. როცა მოქალაქეს აძლევ სესხს და იცი, რომ მხოლოდ პენსიაა მისი შემოსავალი, მიუღებელია 12 რიცხვში დააწესო სესხის დაფარვის თარიღი”, – ამბობს ეკონომიკის ექსპერტი ლია ელიავა.

საბანკო საკითხების სპეციალისტისთვის ასევე გაუგებარია, როგორ ჩამოაჭრა ბანკმა მიმდინარე წლის იანვარში მოქალაქეს სრული პენსია: „ეს ნიშნავს იმას, რომ ადამიანი ულუკმაპუროდ დატოვო. ამას აუცილებლად უნდა აკონტროლებდეს ეროვნული ბანკი. მათ აქვთ დებულება რისკების მართვაზე, მაგრამ დებულება იმდენად ზოგადი სახისაა, რომ ზედამხედველობა და რეგულირება პრაქტიკულად არ ხდება”.

ეროვნულმა ბანკმა „ბათუმელებს“ არ მოაწოდა ინფორმაცია, გამოვლინდა თუ არა დარღვევები „ლიბერთი ბანკში” გეგმიური მონიტორინგის დროს. „სახელშეკრულებო ურთიერთობები მხარეთა შორის შეთანხმების საგანს წარმოადგენს და მხარეები თავისუფალი არიან სახელშეკრულებო ურთიერთობის განსაზღვრისას. შესაბამისად, საქართველოს ეროვნულ ბანკს კრედიტის გაცემაზე, მათ შორის, პენსიის უზრუნველყოფით, რაიმე სახის შეზღუდვა არ აქვს დაწესებული”, – ნათქვამია ეროვნული ბანკის პრესსამსახურის მიერ “ბათუმელებისთვის” მოწერილ წერილში.

ეკონომიკის ექსპერტი, მეცნიერებათა დოქტორი ლია ელიავა პრობლემად მიიჩნევს ამ კუთხით საკანონმდებლო რეგულაციების არარსებობას:

„სამწუხაროა, რომ არ არსებობს სპეციალური კანონი საკრედიტო საქმიანობის შესახებ, სადაც გაწერილი იქნება წესი, თუ ვისზე შეიძლება გაიცეს სესხი და ვისზე – არა. ჩვენ შეგვიძლია ვისაუბროთ მხოლოდ ამ საკითხის მორალურ მხარეზე. კომერციულმა ბანკმა, ფაქტობრივად, პენსიონერი სიცოცხლისთვის აუცილებელი შემოსავლის გარეშე დატოვა, ოღონდაც საკუთარი შემოსავალი გაეზარდა.

სახელმწიფომ „ლიბერთი ბანკს” ანდო პენსიების დარიგება და მას ამისთვის უხდის დაახლოებით მილიონ-ნახევარ ლარს ყოველწლიურად. საპენსიო თანხა არ არის განკუთვნილი კომერციული საქმიანობისთვის. ეს არ არის „ლიბერთი ბანკის” საკრედიტო რესურსი და ეს თანხები მან არ უნდა გამოიყენოს პირადი შემოსავლების გაზრდისთვის, ეს არის ამორალური.”

„ლიბერთი ბანკის” სამეთვალყურეო საბჭოს თავმჯდომარეს, ლადო გურგენიძეს ლ. ა-მ რამდენჯერმე მიმართა, მათ შორის სამჯერ წერილობით, მაგრამ მოქალაქემ ბანკისგან პასუხის მიღება ჟურნალისტების დაინტერესების გარეშე ვერ შეძლო. “ბათუმელების” მიერ წერილობითი კითხვების გაგზავნისთანავე „ლიბერთი ბანკის” პრესსამსახურმა გვაცნობა, რომ ბანკმა შეცდომა დაუშვა და გაათავისუფლებენ იმ თანამშრომელს, რომელიც ლ. ა-ს უწევდა მომსახურებას. „ლიბერთი ბანკმა” იმავე დღეს ლ. ა-ს ანგარიშზე დაუბრუნა 350 ლარი, თუმცა ბანკს არ განუმარტავს, რატომ გადაიხადა ზედმეტად 66,79 ლარი. როგორც აღვნიშნეთ, თავად ბანკის მიზეზით ლ. ა-ს ზედმეტად 283,21 ლარი ჰქონდა გადახდილი.

„ლიბერთი ბანკში” შეკითხვებს ლ. ა-ს საბანკო სესხთან დაკავშირებით არ უპასუხეს კონფიდენციალობის არგუმენტით. ბანკმა ასევე კომერციულ საიდუმლოებად მიიჩნია “ბათუმელების” კითხვები რისკების მართვაზე. „ბანკების რისკების მართვის პოლიტიკა შედგება ბანკის შიდანორმატიული აქტებისგან და წარმოადგენს კომერციულ საიდუმლოებას”, – აღნიშნულია „ლიბერთი ბანკის” მიერ “ბათუმელებისთვის” მოწერილ ოფიციალურ წერილში.

ლ. ა-ს სამართლებრივად „ახალგაზრდა იურისტთა ასოციაცია” ეხმარება. ამ ორგანიზაციის აჭარის ფილიალის ხელმძღვანელი გიორგი ხიმშიაშვილი ადამიანის უფლებების უხეშ დარღვევებზე ამახვილებს ყურადღებას: „ბანკი საერთოდ არ რეაგირებდა ქალბატონის განცხადებაზე. ჩვენი შეფასებით ამ პროცესმა მოქალაქე დააზარალა როგორც მატერიალურად, ისე მორალურად. მატერიალურად იმიტომ, რომ ლ. ა. პენსიონერია და ის უმძიმეს სოციალურ ვითარებაში აღმოჩნდა, როცა მას მთლიანად ჩამოაჭრეს პენსია გასულ თვეში. არ შეიძლება მსგავს სიტუაციაში ადამიანის მიტოვება. მორალური ზიანიც აშკარაა, რადგან ლ. ა. ძალიან განიცდიდა ამ მდგომარეობას, ის არაერთხელ იყო მოსული ჩვენთან იურიდიული დახმარების მისაღებად და რაც მთავარია, წერილობით მიმართვებზეც კი ის პასუხს ბანკის ხელმძღვანელობისგან ვერ იღებდა”.

ლ. ა. რომელსაც ბოლო პერიოდში თავი მაღაზიებში ნისიად აღებული საკვებით გაჰქონდა, ახალი წლის შემდეგ მძიმე მდგომარეობაში აღმოჩნდა, რადგან მაღაზიები უარს ეუბნებოდნენ პროდუქციის ნისიად გატანაზე. სწორედ ამის გამო ლ.ა. აპირებს მორალური და მატერიალური ზიანის ანაზღაურების მოთხოვნით ისევ „ლიბერთი ბანკს” მიმართოს, შემდეგ კი სასამართლოს, თუკი ბანკი მოქალაქის წერილს ისევ უპასუხოდ დატოვებს.

ქვეყნის მასშტაბით სესხს პენსიონერებზე მხოლოდ “ლიბერთი ბანკი” გასცემს. საქართველოს 2016 წლის ბიუჯეტში საპენსიო ფონდისთვის 1 152 549 120 ლარია გათვალისწინებული.

ბულვარის ადმინისტრაციამ შადრევნების მოვლა-ექსპლუატაციაზე ტენდერში გამარჯვებულ კომპანიასთან ხელშეკრულება შეწყვიტა. ადმინისტრაციის განცხადებით  მიზეზი კომპანიის მხრიდან ვალდებულების შესრულებაზე უარის თქმაა. ბათუმის ბულვარი აღნიშნული სამუშაოების ხელახლა შესყიდვას გამარტივებული წესით აპირებს.

ბულვარმა 2016 წელს შადრევნების მოვლა-ექსპლუატაციისთვის ტენდერი გასული წლის ნოემბერში გამოაცხადა, სავარაუდო ღირებულებით – 208 528 ლარი. ტენდერში მონაწილეობა მიიღო ორმა კომპანიამ – შპს “ვლს” და შპს “ტექნოსერვისმა”, ხოლო გამარჯვებულად შპს „ტექნოსერვისი“ გამოცხადდა, რომელთანაც ხელშეკრულება – 183 474 ლარზე მიმდინარე წლის 18 იანვარს გაფორმდა [მანამდე ბულვარის გადაწყვეტილება – ხელშეკრულების გასაფორმებლად “ტექნოსერვისის“ მიწვევაზე – შესყიდვების სააგენტოში გაასაჩივრა “ვლს”-მ, ტენდერი შეწყდა და განახლდა 2016 წლის 14 იანვრიდან, მას შემდეგ, რაც დავების საბჭომ “ვლს”-ს მოთხოვნა არ დააკმაყოფილა].

ბულვარის დოკუმენტების მიხედვით: „2016 წლის 04 თებერვალს ბათუმის ბულვარის ადმინისტრაციაში, შპს „ტექნოსერვისის“ მიერ შემოტანილი იქნა განცხადება, სადაც აღნიშნულია, რომ ისინი ვერ ახერხებენ შადრევნების გამართულ მუშაობას, მიუხედავად იმისა, რომ კომპანიაში დასაქმებულია მაღალი კვალიფიკაციის მქონე სპეციალისტები“.

შადრევნების მუშაობასთან დაკავშირებით არსებობს ბულვარის ინსპექტირების ჯგუფის მიერ მომზადებული წერილი ბულვარის ადმინისტრაციისადმი, რომელშიც აღნიშნულია: „ჩვენ მიერ 2016 წლის 01 თებერვლიდან 2016 წლის 04 თებერვლამდე, ყოველდღიურად ხდებოდა მიმწოდებლის კონტროლი თუ როგორ ასრულებდა ხელშეკრულებით აღებულ ვალდებულებას. მოგახსენებთ, რომ მომწოდებელმა საერთოდ ვერ უზრუნველყო შადრევნების გამართული მუშაობა.

კერძოდ: ბათუმის ბულვარის ცენტრალურ შადრევანზე ვიზუალურად ჩანდა, რომ შადრევნის მუსიკალური და წყლის ჭავლები სინქრონულად არ მუშაობდა, რაც სავარაუდოდ შადრევნის პროგრამული უზრუნველყოფის გაუმართავი მუშაობის მიზეზია, რაც თავისთავად შესაძლოა გამოეწვია არასათანადო მოქმედებებს შადრევნის კომპიუტერის მართვის დროს.

იუსტიციის სახლის წინ, ხიმშიაშვილის ქუჩაზე მდებარე შადრევანზე სამართავი კარადა და შადრევნის კომპიუტერულ პროგრამას შორის დარღვეულია სინქრონიზაცია, რის შედეგადაც შადრევნის სამართავი კარადა არ რეაგირებს ავტომატურ რეჟიმზე.

რაც შეეხება ახალ ბულვარში მდებარე შადრევნებს, მესამე შადრევანში ქარის შედეგად გადაღვრილი იქნა წყალი აუზის გარეთ და ტუმბოებმა იმუშავა წყლის გარეშე“.

„ბათუმის ბულვარმა“ მიმართა შესყიდვების სააგენტოს, რომელშიც აღნიშნულია: „ბათუმის ბულვარში არსებული შადრევნების მოვლა-ექსპლუატაციის მომსახურების შესყიდვაზე განმეორებით უნდა გამოცხადდეს ელექტრონული ტენდერი, რასაც სჭირდება 20 დღე, ასევე ტენდერში გამარჯვებული მიმწოდებლის გამოვლენა და მასთან ხელშეკრულების გაფორმება დაკავშირებულია გარკვეულ დროსთან. აღნიშნულიდან გამომდინარე მიზანშეწონილი იქნება თანხმობის მიღებიდან ბათუმის ბულვარში არსებული შადრევნების მოვლა-ექსპლუატაციის მომსახურება გამარტივებული შესყიდვის საშუალებით განხორციელდეს 2016 წლის 31 მარტის ჩათვლით“.

სააგენტოს პასუხს ბულვარის ადმინისტრაცია 12 თებერვალს მიიღებს.

ბულვარის ინფორმაციით, ბათუმის ბულვარის ტერიტორიაზე განთვასებულია 10 შადრევანი და 7 არხი, რომელებსაც ყოვლდღიურად ესაჭიროება მოვლა-ექსპლუატაცია.

11 თებერვალს აჭარის მთავრობის მორიგი სხდომა ჩატარდა, რომელზეც ძალადაკარგულად გამოაცხადეს “აჭარის ავტონომიური  რესპუბლიკის რესპუბლიკური ბიუჯეტიდან სპორტის სფეროში ღონისძიებების დაფინანსების ერთიანი ნორმების, თანხის გამოყოფისა და ხარჯვის ანგარიშების წესების დამტკიცების შესახებ” აჭარის მთავრობის 2012 წლის განკარგულება.

განკარგულება მოიცავდა ისეთ ნორმებს, როგორიცაა მივლინების დროს დანამატების გაცემა, კვებისა და ტრანსპორტირების ხარჯების რეგულირება და ა.შ. სხდომაზევე დადგინდა, რომ უწყებამ უნდა იმუშაოს პროექტზე, რომელიც განსაზღვრავს თუ როგორ უნდა ჩამოყალიბდეს ეს ნორმები სამომავლოდ:

მეორე საკითხი სხდომაზე საარქივო სამმართველოსა და მისი ტერიტორიული ორგანოების მიერ გაწეული მომსახურებისთვის დაწესებული საფასურის ოდენობის, გადახდის წესისა და მომსახურების ვადების დამტკიცებას ეხებოდა. ამ თემაზე აჭარის მთავრობის საქვეუწყებო დაწესებულების საარქივო სამმართველოს ხელმძღვანელმა მაია ივანიშვილმა ისაუბრა. როგორც საკითხის განხილვისას აღმოჩნდა, ტარიფები საარქივო სამმართველოსა და მისი ტერიტორიული ორგანოების მიერ გაწეული მოსახურებებზე მომატებულია. თუმცა, მაია ივანიშვილის განმარტებით, ტარიფები იუსტიციის სამინისტროს მიერაა დადგენილი და იგი სოციალურად დაუცველებზე, შშმ პირებსა და  პენსიონრებზე არ გავრცელდება – „კომერციული დაინტერესება იქნება მაშინ, როცა დოკუმენტის მომზადება დაჩაქრებული წესით სურს არა სოციალურად დაუცველ ან პენსიონერ ადამიანს“ – განმარტა მან.

როგორც მაია ივანიშვილმა თქვა, აჭარის საარქივო სამმართველო წელიწადში რამდენჯერმე, რვა ან ოთხგვერდიანი გაზეთის გამოშვებასაც გეგმავს, 150-იანი ტირაჟით. გაზეთის კონტენტი – საარქივო მასალებისა და სააგენტოს სიახლეებისგან უნდა შედგებოდეს. აჭარის განათლების მინისტრის გიორგი თავამაიშვილის თქმით, გაზეთის ნაცვლად  უმჯობესი იქნებოდა ინფორმაციული ბუკლეტები გამოეცათ: “იქნებ რამე სხვა დატვირთვა ჰქონდეს? ჩვენ რეალურად ყველა ინტერნეტმომსახურებაზე ვართ გადასული, ჩვენი განსწავლულობა ძალიან ცოტაა არქივთან მიმართებაში და თუ კი ინფორმაციული ბუკლეტები იქნება, შესაძლოა ამ კუთხით უფრო მომგებიანი იყოს, ვიდრე ნომინალური გაზეთი, რომელსაც არ ვიცი ვინ წაიკითხავს ” – აღნიშნა მინისტრმა.

გარდა ამისა, მთავრობის დღევანდელ სხდომაზე, თანხმობა გაიცა ხელვაჩაურის მუნიციპალიტეტის გამგეობისთვის სახელმწიფო შესყიდვის გამარტივებული შესყიდვით განხორციელებაზე – “ხელვაჩაურის ბიუჯეტიდან გამოიყო 15 000 ლარი უმწეო ოჯახებისთვის. 21 ბენეფიციარი უნდა გამოიკვებოს ამ თანხით, რისთვისაც გამარტივებული შესყიდვების თაობაზე მივმართეთ შესყიდვების სააგენტოს, საიდანაც მივიღეთ პასუხი – გამოგვეცხადებინა გამარტივებული ელექტრონული ტენდერი. ორჯერ გამოვაცხადეთ – ორჯერვე ჩავარდა” – განმარტა ხელვაჩაურის მუნიციპალიტეტის გამგებელმა ნადიმ ვარშანიძემ.

დღესვე მიიღეს ბათუმის ძველ ბულვართან დაკავშირებით შექმნილი კომისიის საბოლოო რეკომენდაციები.

ციხისძირში ხეების გადატანის წინააღმდეგ გამართულ აქციაზე პოლიციამ 5 პირი დააკავა: „პარტიზანული მებაღეობის“ სამი წევრი და „ნაციონალური მოძრაობის“ წევრები – ქობულეთის საკრებულოს დეპუტატი ელგუჯა ბაგრატიონი და ბათუმის საკრებულოს დეპუტატი ნოდარ დუმბაძე.

შსს-ს პრესცენტრის ინფორმაციით, პოლიციამ აქციის მონაწილეები ადმინისტრაციულ სამართალდარღვევათა კოდექსის 173-ე მუხლის საფუძველზე დააკავა, რაც პოლიციისთვის წინააღმდეგობის გაწევას გულისხმობს. ამ უწყების ინფორმაციით, მხოლოდ 4 პირია დაკავებული, მათ შორის ერთი ჩაქვის პოლიციის განყოფილებაშია, ხოლო დანარჩენი სამი პოლიციის ქობულეთის განყოფილებაში გადაიყვანეს. მოგვიანებით შსს-მ ხუთივე პირის დაკავება დაადასტურა.

აქციის მონაწილე „ნაციონალური მოძრაობის“ წევრი პეტრე ზამბახიძე „ბათუმელებთან“ ამბობს, რომ უკანონო სამუშაოების შეჩერებას ისევ მოითხოვენ. ადგილზე რჩებიან პოლიციელები, ხოლო სამუშაოების მწარმოებელ კომპანია „ზიმოს“ სამუშაო პროცესი შეჩერებული აქვს.

კომპანია “ზიმოს” წარმომადგენელმა დღეს “ბათუმელებთან” განაცხადა, რომ სამუშაოების გაგრძელების საშუალება მათ აქციის მონაწილეებმა არ მისცეს. „ჩვენ შევატყობინეთ პოლიციას, რომ არ გვაქვს მუშაობის გაგრძელების საშუალება. პოლიციელები უკვე მოვიდნენ და მოლაპარაკებას მართავენ აქციის მონაწილეებთან“

ციხისძირში, სადაც ხეების გადატანის წინააღმდეგ საპროტესტო აქცია იმართება, პოლიციელები გამოჩნდნენ. „ნაციონალური მოძრაობის“ ინფორმაციით, ადგილზე იმყოფებიან პოლიციის მაღალჩინოსნები, მათ შორის, ქობულეთის პოლიციის უფროსი.

შინაგან საქმეთა სამინისტრო არ ადასტურებს ინფორმაციას საპროტესტო აქციაზე პოლიციის მაღალჩინოსნების ყოფნის შესახებ. უწყების პრესსამსახურის ცნობით, ციხისძირის აქციაზე პოლიციის ორი ეკიპაჟია მობილიზებული საზოგადოებრივი წესრიგის დაცვის მიზნით.

ხეების გადატანის პროცესი დღეს დილიდან შეჩერებულია. სამუშაოების მწარმოებელი კომპანია „ზიმო“-ს წარმომადგენლის, ირაკლი შანავას ინფორმაციით, სამუშაოების გაგრძელების საშუალება მათ აქციის მონაწილეებმა არ მისცეს: „ჩვენ შევატყობინეთ პოლიციას, რომ არ გვაქვს მუშაობის გაგრძელების საშუალება. პოლიციელები უკვე მოვიდნენ და მოლაპარაკებას მართავენ აქციის მონაწილეებთან“.

პოლიციელების გამოჩენის შემდეგ „ნაციონალური მოძრაობის“ წევრი პეტრე ზამბახიძე „ბათუმელებთან“ ამბობს, რომ საპროტესტო აქციის შეწყვეტას არ აპირებს, რადგან „უნებართვოდ იცვლება სანაპირო ზოლი“.

ხეების გადატანის წინააღმდეგ აქციას გუშინ „პარტიზანული მებაღეობის“ აქტივისტებიც  შეუერთდნენ.

აჭარის მთავრობის თავმჯდომარის, არჩილ ხაბაძის ბრძანებით შექმნილმა კომისიამ, ბულვართან დაკავშირებით  რეკომენდაციები თავმჯდომარეს უკვე წარუდგინა. კომისიის რეკომენდაციებს აჭარის მთავრობის სხდომაზე განიხილავენ, რომელიც „ბათუმელების“ ინფორმაციით 11 თებერვალს გაიმართება, რის შემდეგაც  მთავრობამ ბულვართან დაკავშირებით გადაწყვეტილება უნდა მიიღოს.

კომისიის ოქმში აღნიშნულია, რომ კომისიის მუშაობაში ჩართვაზე უარი განაცხადეს მიწვეულმა წევრებმა: არასამთავრობო ორგანიზაციებისა და საინიციატივო ჯგუფის წარმომადგენლებმა.

კომისიის ოქმის მიხედვით, ბათუმის ძველ ბულვარში მესამე ბილიკის შენარჩუნების მიზნით უნდა გატარდეს შემდეგი პროცედურები: კონტრაქტორმა კომპანიამ შეაჩეროს მიმდინარე სამუშაოები, უნდა შემუშავდეს ალეას ახალი პროექტი; აღებულ იქნას ახალი ნებართვები, კომპანიასთან მიღწეული უნდა იქნას შეთანხმება ხელშეკრულებაში ცვლილების შეტანაზე და ბოლოს, ბათუმის ბულვარმა დაჩქარებული წესით განახორციელოს დარჩენილი პროცედურები, რათა სამუშაოები ტურისტულ სეზონამდე დასრულდეს.

აჭარის ფინანსთა და ეკონომიკის სამინისტროში ბულვართან დაკავშირებით მთავრობის თავმჯდომარის, არჩილ ხაბაძის ბრძანებით შექმნილი სარეკომენდაციო კომისიის პირველი სხდომა 5 თებერვალს ჩატარდა.

არჩილ ხაბაძის ბრძანების მიხედვით, კომისიას 2016 წლის 10 თებერვლამდე უნდა უზრუნველეყო „ძველ ბულვარში ინფრასტრუქტურული სამუშაოების მიმდინარეობისა და ინფრასტრუქტურულ სამუშაოებთან დაკავშირებული შემდგომი ღონისძიებების გატარების თაობაზე შესაბამისი წინადადებებისა და რეკომენდაციების აჭარის მთავრობის თავმჯდომარისთვის წარდგენა“. 

„აჭარის რეგიონში სახელისუფლებო ძალებს შორის არის სერიოზული გაუგებრობა საკადრო პოლიტიკასთან დაკავშირებით, რაც ძირითადად გავლენის სფეროების გადანაწილებას ეხება“ – აცხადებს ბათუმის საკრებულოს წევრი ფრაქცია „თავისუფალი დემოკრატებიდან“  ჯაბა ბერიძე.  დღეს გამართულ ბრიფინგზე მან თქვა, რომ ამ „გაუგებრობა“ ძირითადად კოალიციაში შემავალ პარტიებს შორის დავას უკავშირდება, რის  შედეგადაც რამდენიმე მაღალი თანამდებობა თვეების განმავლობაში ვაკანტურია. „აჭარის რამდენიმე მუნიციპალიტეტის ხელმძღვანელს, ხელვაჩაურისა და შუახევის, არ ჰყავს მოადგილე. ასევე თვეების მანძილზე ვაკანტურია ბათუმის მერის მოადგილის პოსტი, რომელიც მერიის ფინანსურ პოლიტიკაზეა პასუხისმგებელი“ – ამბობს ჯაბა ბერიძე.

ბათუმის მერიაში „ბათუმელებს“ განუცხადეს, რომ „მერის მოადგილეს როგორც კი დანიშნავენ, საზოგადოებასაც აცნობებენ“.

„თავისუფალი დემოკრატები“ მოუწოდებენ ხელისუფლებას საჯარო კონკურსების გზით შეარჩიონ კადრები, რადგან რეგიონში კომპეტენტური და კეთილსინდისიერი, გამოცდილი მოქალაქეების დიდი არჩევანია.

ბათუმის მერის მოადგილის პოსტი 2015 წლის 6 ივლისიდან არის ვაკანტური. ზურაბ ბერიძემ საკუთარი სურვილით დატოვა ეს თანამდებობა. შუახევის გამგებლის მოადგილე რომან ფუტკარაძე 2015 წლის 7 ნოემბერს დააკავა ანტიკორუფციულმა სააგენტომ  ქრთამის აღების ბრალდებით, ხოლო ხელვაჩაურის გამგებლის მოადგილე ანზორ ფერსელიძე რამდენიმე თვის წინ გარდაიცვალა.

აჭარის რესპუბლიკური ბიუჯეტის თავისუფალ ფულად სახსრებს „ვითიბი ბანკი“ განკარგავს. საუბარია იმ თანხაზე, რომელიც აჭარის რესპუბლიკური ბიუჯეტის დაფინანსებაზე მყოფი ორგანიზაციების ანგარიშზეა. ამ საბიუჯეტო ორგანიზაციებს შეუძლიათ თანხა „ვითიბი ბანკის“ დეპოზიტზე განათავსონ, რასაც წლიურად 14 პროცენტი სარეგებელი დაერიცხება. საბიუჯეტო ორგანიზაციებს შეეძლებათ მათთვის სასურველ დროს გაიტანონ თანხა ბანკის ანგარიშიდან.

კომერციული ბანკი თავისუფალი საბიუჯეტო თანხისთვის აუქციონის წესით შეირჩა. აჭარის ფინანსთა და ეკონომიკის სამინისტროს სახაზინო სამსახურის უფროსის, ზურაბ ღომიძის ინფორმაციით, აუქციონში სულ ოთხი ბანკი მონაწილეობდა: „თიბისი ბანკი“, „ბანკი რესპუბლიკა“ , „საქართველოს ბანკი“ და „ვითიბი ბანკი“ . გამარჯვებულმა ბანკმა აჭარის მთავრობას ყველაზე მაღალი საპროცენტო სარგებელი შესთავაზა. გასულ წელს აჭარის საბიუჯეტო ორგანიზაციებს ანალოგიურ მომსახურებას „თიბისი ბანკი“ უწევდა.

ამ დროისთვის „ვითიბი ბანკის“ დეპოზიტზე, აჭარის საბიუჯეტო ორგანიზაციების კუთვნილი 77 მილიონი ლარია განთავსებული.