Batumelebi

ბულვარში დეკორატიული ფილების დაგება დაიწყო [ფოტო]

ბათუმის ბულვარის რეაბილიტაციის ფარგლებში, ნინოშვილის ქუჩის გასწვრივ ცენტრალური ბულვარის შესასვლელიდან უნივერსიტეტამდე არსებულ ალეაში, მოზაიკის ნაცვლად ახალი ბეტონის დეკორატიული ფილები დაიგება. გაკეთდება ბაზალტის ბორდიურები.

აღნიშნულ სამუშაოებზე „ბათუმის ბულვარმა“ ელექტრონული ტენდერი 2015 წლის სექტემბერში გამოაცხადა, გამარჯვებულ კომპანიასთან [„იმერეთი 98“] კი ხელშეკრულება მიმდინარე წლის 18 იანვარს გააფორმა. სატენდერო საწყისი ფასი 317 202 ლარი იყო, ხელშეკრულება კომპანიასთან 305 202 ლარზე გაფორმდა.

ბულვარის ადმინისტრაციის ინფორმაციით, ბულვარში სარეაბილიტაციო სამუშაოები მარტის თვეში დასრულდება.

12 გამარჯვებული მოსწავლე თურქეთის სამეცნიერო ბანაკში გაემგზავრება

2016 წლის ზაფხულში, თურქეთის სამეცნიერო ბანაკის საზაფხულო პროგრამაში, აჭარიდან 12 მოსწავლე მიიღებს მონაწილეობას. გამარჯვებულები აჭარის განათლების კულტურისა და სპორტის სამინისტრომ დღეს, 15 თებერვალს, გამოავლინა.

მონაწილეთა გამოსავლენად ინგლისურ ენაში ჩატარდა კონკურსი. სამინისტროს ინფორმაციით, კონკურსში მონაწილეობა შეეძლოთ აჭარაში არსებული კერძო და საჯარო სკოლების მე-9 კლასის მოსწავლეებს, რომელთა შეფასება ბოლო სამი წლის განმავლობაში დამრგვალების გარეშე შეადგენს 10 ქულას. კონკურსში სულ დარეგისტრირებული იყო 107 მოსწავლე.

ბანაკის მიზანია ახალგაზრდების მეცნიერებითა და ტექნოლოგიებით დაინტერესების ხელშეწყობა.

აჭარის განათლების სამინისტრო 2011 წლიდან ახორციელებს სამეცნიერო ბანაკში მონაწილე მოსწავლეების შერჩევას და უზრუნველყოფს მგზავრობის დაფინანსებას.

თურქეთის სამეცნიერო ბანაკის საზაფხულო პროგრამის მონაწილე მოსწავლეთა სია (2016)
№	ადმინისტრაციული ერთეული	სკოლის სახელწოდება	სახელი	გვარი
1	ბათუმი	შპს “სკოლა – ნიკე”	მარიამ	მიქელაძე
2	ბათუმი	შპს “გორდას ქალაქ ბათუმის კერძო მრავალპროფილიანი საერო ელიტარული საშუალო სკოლა”	გიორგი	სურგულაძე
3	ბათუმი	შპს “სკოლა ევრო-2000”	დავით	ზოიძე
4	ბათუმი	სსიპ ქალაქ ბათუმის N6 ფიზიკა-მათემატიკის საჯარო სკოლა	ავთო	ველიაძე
5	ბათუმი	სსიპ ქალაქ ბათუმის N6 ფიზიკა-მათემატიკის საჯარო სკოლა	მარიამ	ცინცაბაძე
6	ბათუმი	შპს “სკოლა – ნიკე”	გიგი	დიასამიძე
7	ბათუმი	სსიპ ილია ჭავჭავაძის სახელობის ქალაქ ბათუმის N1 საჯარო სკოლა	გიორგი	გორგილაძე
8	ბათუმი	სსიპ ქალაქ ბათუმის N2 საჯარო სკოლა	მარიამ	ინაიშვილი
9	ქობულეთი	სსიპ ქალაქ ქობულეთის №2 საჯარო სკოლა	ქეთევან	ნოღაიდელი
10	ბათუმი	შპს “სკოლა ევრო-2000”	ლიზი	ზოიძე
11	ქობულეთი	სსიპ ქალაქ ქობულეთის №2 საჯარო სკოლა	ნინო	მუჯირი
12	ბათუმი	სსიპ ილია ჭავჭავაძის სახელობის ქალაქ ბათუმის N1 საჯარო სკოლა	კახი	კინწურაშვილი

16 თებერვალს ბათუმის დემოკრატიული ჩართულობის ცენტრში პოლიტიკური დისკუსია გაიმართება

„ბათუმის მაჟორიტარი დეპუტატების წინასაარჩევნო დაპირებების შედეგი“ – ამ თემაზე პოლიტიკური დისკუსია „ბათუმის დემოკრატიული ჩართულობის ცენტრში“ 16 თებერვალს, 17 საათზე გაიმართება. დისკუსიაზე მომხსენებლებად მოწვეული არიან: მურმან დუმბაძე – ბათუმის მაჟორიტარი დეპუტატი საქართველოს პარლამენტში და აკაკი ძნელაძე – ბათუმის მაჟორიტარი დეპუტატი აჭარის უმაღლეს საბჭოში. დისკუსიაზე დასწრება თავისუფალია. შეხვედრაზე მომხსენებლები ისაუბრებენ, თუ რამდენად შეძლეს ბათუმისთვის მიცემული დაპირებების შესრულება. დისკუსიაზე მყოფ პირებს შეეძლებათ დასვან კითხვები და მიიღონ პასუხები ბათუმის მაჟორიტარი დეპუტატებისგან. პოლიტიკური დისკუსიის ორგანიზატორია „თავისუფალ ჟურნალისტთა სახლი“ ამერიკული ორგანიზაცია NED-ის მხარდაჭერით.

ბიზნესიდეების წარდგენის კონკურსი განახლდა

მიკრო და მცირე მეწარმეობის ხელშეწყობის პროგრამის ფარგლებში ბიზნესიდეების წარდგენის კონკურსი 15 თებერვლიდან განახლდა. ბიზნესიდეის წარდგენა შესაძლებელია 2016 წლის 31 მარტამდე. რეგიონების მოსახლეობას შეუძლია საკუთარი ბიზნესიდეა წარადგინოს ვებგვერდის მეშვეობით და ჩაერთოს მიკრო და მცირე მეწარმეობის ხელშეწყობის პროგრამაში, რომელიც სახელმწიფოს მხრიდან 5 000-დან 15 000 ლარამდე თანადაფინანსებას გულისხმობს.

საქართველოს ეკონომიკისა და მდგრადი განვითარების სამინისტროს მეწარმეობის განვითარების სააგენტოს ინფორმაციით, მიკრო და მცირე მეწარმეობის ხელშეწყობის პროგრამა მოიცავს შემდეგ ეტაპებს:
ბიზნესიდეის წარდგენა ვებგვერდზე www.qartuli.ge აპლიკაციის ფორმის შევსების გზით;
ბიზნესგეგმის წერის ტრენინგი;
დამუშავებული ბიზნესგეგმის წარდგენა;
საბოლოოდ არჩეული ბიზნესგეგმების თანადაფინანსება;
ბიზნესის კეტებისათვის საჭირო ტრენინგი და ინდივიდუალური კონსულტაციები.

მიკრო და მცირე მეწარმეობის ხელშეწყობის პროექტის მეორე რაუნდში იგეგმება მინიმუმ 1500 ბენეფიციარის დაფინანსება და 3000-მდე ბენეფიციარის გადამზადება. მიკრო და მცირე მეწარმეობის ხელშეწყობის ინიციატივა ხორციელდება სახელმწიფო პროგრამის „აწარმოე საქართველოში“ ფარგლებში.

კონკურსში ჩართვის შესაძლებლობა აქვს პირს, რომელიც სრულწლოვანია [18 წელს მიღწეული], არის საქართველოს მოქალაქე, არ არის საჯარო მოხელე, არ არის სსიპ მეწარმეობის სააგენტოს თანამშრომელი ან მისი ოჯახის წევრი, არ გააჩნია მიმდინარე ვადაგადაცილებული საგადასახადო ვალდებულება სახელმწიფოს წინაშე განაცხადის შეტანის მომენტში და აცხადებს მზაობას ბიზნესგეგმების კონკურსში გამარჯვების შემთხვევაში, დარეგისტრირდეს გადასახადის გადამხდელ ფიზიკურ პირად.

აჭარის ჩემპიონატი სპორტულ ცეკვებში დასრულდა

14 თებერვალს დასრულდა აჭარის ღია ჩემპიონატი სპორტულ ცეკვებში. აჭარის სპორტისა და ახალგაზრდობის საქმეთა დეპარტამენტის ცნობით, 16 ნომინაციაში ასაკობრივი კატეგორიების მიხედვით წყვილებში და ინდივიდუალურ შეჯიბრებაში 250 მოცეკვავე მონაწილეობდა. მათ ლათინო ამერიკული და ევროპული ცეკვები შეასრულეს. მონაწილეები მსაჯებმა შეაფასეს და გამოვლინდნენ გამარჯვებულები:

ევროპული ცეკვების კატეგორიაში – წყვილები [10-დაn 12 წლამდე] პირველი ადგილი მოიპოვეს ვახტანგ გელაძემ და ელიზაბეტ მეგრელიშვილმა. აღნიშნულ თანრიგში ლათინო ამერიკულ ცეკვებში პირველი ადგილი ლევან ბერიძეს და მილა არჩაიას, ხოლო უფროს ასაკში, ინდივიდუალურ შესრულებაში, პირველი ადგილი ტატიანა ცივაძეს ერგო.

შეჯიბრების შემდგომ დაკომპლექტდა აჭარის ნაკრები გუნდი სპორტულ ცეკვებში, რომლებიც მიმდინარე წლის მაისის თვეში ქალაქ თბილისში საქართველოს ჩემპიონატსა და „კავკასიის თასის“ ტურნირში მიიღებენ მონაწილეობას.

შეჯიბრება სპორტისა და ახალგაზრდობის საქმეთა დეპარტამენტის მხარდაჭერით ჩატარდა.

აჭარის ჩემპიონატი სპორტულ ცეკვებში, 2016 წელი

საქართველოს ჩემპიონები მშვილდოსნობაში

საქართველოს ჩემპიონატის ფინალური შეხვედრები მშვილდოსნობაში 14 თებერვალს ხელვაჩაურის სასპორტო სკოლის დარბაზში დასრულდა. ტურნირი საქართველოს მშვილდოსნობის ფედერაციის ორგანიზებით გაიმართა.

აჭარის სპორტისა და ახალგაზრდობის საქმეთა დეპარტამენტის ცნობით, ჩემპიონატში თბილისის, ქუთაისის, ბათუმისა და ხელვაჩაურის სპორტსმენები მონაწილეობდნენ. ჩემპიონატში ასევე ოთხი პარაოლიმპიელი სპორტსმენი ასპარეზობდა. ჩემპიონატის შემდეგ გამოვლინდნენ ჩემპიონები და საპრიზო ადგილზე გასული სპორტსმენები:

დიდები ქალთა შორის:

ქრისტინე ესებუა – I ადგილი (თბილისი).
ხათუნა ნარიმანიძე – II ადგილი (ხელვაჩაურის სასპორტო სკოლა).
იულია ლობჯენიძე – III ადგილი (ხელვაჩაურის სასპორტო სკოლა).

დიდები ვაჟთა შორის:

ლაშა ფხაკაძე – I ადგილი (ქუთაისი).
ჯაბა მოსეშვილი – II ადგილი (ქუთაისი).
ტარიელ ქადიძე – III ადგილი (ბათუმის სასპორტო სკოლა).

ახალგაზრდა გოგონები:

ციკო ფუტკარაძე – I ადგილი (ხელვაჩაურის სასპორტო სკოლა).
მარიკა მახარაძე – II ადგილი (ბათუმის სასპორტო სკოლა).
მედეა აბულაძე – III ადგილი (თბილისი).

ახალგაზრდა ვაჟები:

ზურა მესტვირიშვილი – I ადგილი (თბილისი).
ანრი ბასილაძე – II ადგილი (ხელვაჩაურის სასპორტო სკოლა).
ვლადიმერ დოლიძე – III ადგილი (თბილისი).

პარაოლიმპიელები დიდები:

გოდერძი ზაქარაია – I ადგილი (თბილისი).
ზვიად დუმბაძე – II ადგილი (ხელვაჩაურის სასპორტო სკოლა).
ვანო წიკლაური – III ადგილი (თბილისი).

ტურნირმა საქართველოს ეროვნულ ნაკრებში ახალგაზრდა ქალებს შორის ცვლილებები გამოიწვია. კერძოდ, ანა ცხომელიძე მარიკა მახარაძემ ჩაანაცვლა.

აჭარის სპორტისა და ახალგაზრდობის საქმეთა დეპარტამენტის ცნობით, 27 თებერვლიდან 7 მარტის ჩათვლით თურქეთის დედაქალაქ ანკარაში საქართველოს ეროვნული ნაკრები გუნდის წევრები როგორც დიდები, ასევე ახალგაზრდები, მშვილოსნობაში მსოფლიო ჩემპიონატზე გაემგზავრებიან.

ხელვაჩაურში ოთხი საბავშვო ბაღის რეაბილიტაციის პროცესი შეჩერებულია

ხელვაჩაურის მუნიციპალიტეტის სოფლებში – მახინჯაურში, კირნათში, ფერიასა და ქედქედში საბავშვო ბაღების რეაბილიტაციის პროცესი შეჩერებულია. ინფორმაციას „ნაციონალური მოძრაობის“ წევრები ავრცელებენ. „ამ სოფლებში გასული წლის დეკემბერში უნდა დასრულებულიყო სამუშაოები, მაგრამ ასე არ მოხდა. ჯერ კიდევ ზაფხულში ხელვაჩაურის ინფრასტრუქტურის სამსახურმა სამუშაოების მწარმოებელ კომპანიებს გაუგზავნა გაფრთხილების წერილები. ოთხ სოფელში ბაღების რეაბილიტაციისთვის გასული წლის ბიუჯეტიდან დაახლოებით 2 მილიონი ლარი დაიხარჯა,“ – უთხრა „ბათუმელებს“ თემურ დუმბაძემ, „ერთიანი ნაციონალური მოძრაობის“ წევრმა. პარტიის კიდევ ერთი წევრი, ასმათ დიასამიძე, ხელვაჩაურის მუნიციპალიტეტის გამგეობისგან სამუშაოების შეჩერების მიზეზის დადგენას და იმ პირების პასუხისმგებლობის დასმას მოითხოვს, ვინც ანგარიშვალდებული იყო სამუშაოების დროულად დასრულებაზე.

ხელვაჩაურის მუნიციპალიტეტის გამგებელი, ნადიმ ვარშანიძე, „ბათუმელებთან“ ადასტურებს, რომ ამ საბავშვო ბაღების რეაბილიტაციის პროცესი გაჭიანურდა, ტენდერი ხელახლა გამოცხადდა და აღნიშნული ბაღები მიმდინარე წლის ბოლომდე ამოქმედდება: „ნაციონალები“ რომ აშენებდნენ ორ კვირაში და იბარებდნენ უხარისხოდ გაკეთებულს, იმიტომ გახდა ხელახლა სარეაბილიტაციო ეს ბაღები. სამშენებლო კომპანიებმა დაარღვიეს ხელშეკრულებით გათვალისწინებული პირობები და ისინი სოლიდური თანხით დაჯარიმდნენ ამის გამო. ჩვენ მათ სასამართლოშიც ვუჩივით, რომ ჯარიმები გადაიხადონ“.

„ხან მომხსენებელი ვარ, ხან მსმენელი“ – ბათუმის მერის მრჩეველი შშმ პირთა უფლებებზე

შორენა მამულაძე ბათუმის მერის მრჩეველია შშმ პირთა საკითხებში. ამ პოსტზე ის ერთი წელია მუშაობს. რა რჩევები მისცა და რა გაითვალისწინა გიორგი ერმაკოვმა და მისმა გუნდმა შშმ პირთა უფლებების დასაცავად?

შორენა მამულაძე მერის მრჩევლად 2014 წლის სექტემბერში დაინიშნა, 2015 წლის თებერვალში კი საჯარო მოსამსახურეთა კონკურსი ვერ გაიარა, რის გამოც ის მრჩევლის პოსტს სამი თვით ჩამოშორდა. თუმცა, როგორც შორენა მამულაძე ამბობს, კონკურსის ხელმეორედ გავლის შემდეგ, ის მერის მრჩევლად გასული წლის აპრილიდან ისევ დაინიშნა. „ფაქტობრივად ერთი წელი გამოდის, რაც ამ თანამდებობაზე ვარ“, – ამბობს შორენა, რომელიც თავადაც შშმ პირია.

შორენა მამულაძის თქმით, მისი ფუნქცია მერიაში ძირითადად კონფერენციებზე მონაწილეობით შემოიფარგლება.

„ხან მომხსენებელი ვარ, ხან – მსმენელი. თბილისსა და ბათუმში ოთხჯერ მივიღე მონაწილეობა კონფერენციაში. შვედეთის საელჩოს ხელშეწყობით გამართულ კონფერენციაზე მომხსენებელი ვიყავი, სადაც ვისაუბრე თემაზე „სახელმწიფოს როლი შშმ პირთა ცხოვრებაში~. მიწვეული ვიყავი ასევე ორგანიზაცია – „კოალიცია დამოუკიდებელი ცხოვრებისთვის“ ორგანიზებულ საერთაშორისო კონფერენციაზეც“.

კითხვაზე, რამდენად ეფექტურია მერიის რეაგირება შშმ პირთა რეკომენდაციებზე და რა იყო ყველაზე მნიშვნელოვანი რეკომენდაცია, რომელიც მერს მისცა, შორენა მამულაძე ამბობს: „ერთი წლის მანძილზე მერის სახელზე წერილობით მხოლოდ ორი რეკომენდაცია გავგზავნე, ძირითადად ზეპირად ვთანხმდებით გარკვეულ თემებზე.

მაგალითად, მერს ზეპირად შეუთანხმდნენ მერიის ადმინისტრაციული შენობების ადაპტირებაზე, თუმცა პრობლემა კვლავ არსებობს. ორბელიანის ქუჩაზე, ახალ ადმინისტრაციულ შენობაზე გააკეთეს პანდუსი, მაგრამ, როგორც მეუბნებიან, არ არის ნორმები დაცული და მოუხერხებელია ეტლით მოსარგებლეებისთვის. ამაზე საუბარი მერთან არ მქონია, სამუშაოებს ვინც ასრულებდა, მათ ვესაუბრეთ, მაგრამ უკვე დაგვიანებულიაო, ასე გვითხრეს. წელს, ადაპტირებული ლიფტი გაკეთდება მერიის ადმინისტრაციის ცენტრალურ შენობაზე, კულტურული მემკვიდრეობის დაცვის სააგენტოდან, როგორც ვიცი, ამაზე მერიამ ნებართვა მოიპოვა“.

შორენა მამულაძის თქმით, რეკომენდაციების მიუხედავად, პრობლემა ხშირად პრობლემად რჩება: „საბავშვო ბაღების რეაბილიტაციის დროს მქონდა რეკომენდაციები, რომ პანდუსებთან ერთად სველი წერტილების ადაპტირებაც მომხდარიყო, მაგრამ, როცა ეს ამბავი მოვიკითხე, მითხრეს არ ვიცოდითო. ვერ ვიტყვი, რომ ყველაფერი რიგზეა“.

მრჩევლის თქმით, დღეს სიტყვით უფრო აქტიურია მერია, ვიდრე საქმით. „მაინც იქამდე მივდივართ, რომ ეს ყველაფერი ახალია და ყველა საჯარო მოხელე უნდა მივიდეს იმ აზრამდე, რომ ადაპტირებული გარემოს შექმნა – ეს მათი ერთ-ერთი ვალდებულებაა. თუმცა არის საკითხები, რომლებიც ჩემი შეხსენების გარეშეც ნათელია, მაგალითად, თოვლის შემდეგ კიდევ უფრო დაზიანდა ქუჩები, ტროტუარები და შშმ პირებისთვის გადაადგილება გართულდა. მათაც იციან, რომ ამის მოწესრიგება ევალებათ“, – ამბობს ის.

შორენა მამულაძე წელს აპირებს იურისტების დახმარებით იმუშაოს კანონპროექტზე, რომელიც ითვალისწინებს სამუშაო საათების შემცირებას იმ პირებისთვის, ვისი ოჯახის წევრებიც შშმ პირები არიან და ვისაც არ აქვს შესაძლებლობა მომვლელი აიყვანოს. „ამ საკითხზე ბევრმა მოქალაქემ მომმართა და ვფიქრობ მეც ამ საკითხზე“,- ამბობს შორენა მამულაძე.

საქართველოს მთავრობის 41-ე დადგენილების მიხედვით, ხელისუფლება ვალდებულია ყველა საჯარო სტრუქტურა ადაპტირებული და ხელმისაწვდომი გახადოს შეზღუდული შესაძლებლობის მქონე პირებისთვის. როგორც ბათუმის მერის მრჩეველი გვეუბნება, ჯერჯერობით, ეს დადგენილება ნაკლებად სრულდება.

გამგებლის მოადგილის მამა დირექტორად და სხვა ცვლილებები ქედის “ბეთლემში”

ქედის საფეხბურთო კლუბ „ბეთლემის“ დირექტორად გამგებლის ერთ-ერთი მოადგილის მამა, ნაზიმ ფარტენაძე, დაინიშნა. დირექტორის შეცვლასთან ერთად ცვლილებები განხორციელდა საფეხბურთო კლუბის ადმინისტრაციაშიც: 5 შტატით შემცირდა ადმინისტრაციის შემადგენლობა, რეორგანიზაციის გატარება დაგეგმილია გუნდშიც. ამ დროისთვის კლუბს ხელშეკრულება არც ერთ ფეხბურთელთან არ გაუფორმებია. ვის გაუგრძელდება ხელშეკრულება და ვინ დარჩება თამაშგარეთ, ამას, ადმინისტრაციის განცხადებით, 17 თებერვლამდე ჩატარებული თამაშები განსაზღვრავს.

შპს „ქედის საფეხბურთო კლუბ ბეთლემის~ დირექტორად ქედის გამგებლის მოადგილის მამუკა ფარტენაძის მამა, ნაზიმ ფარტენაძე, ოფიციალურად 10 იანვარს დაინიშნა. მანამდე დირექტორის თანამდებობას საფეხბურთო კლუბის ადმინისტრაციაში ედიშერ კაკაბაძე იკავებდა, რომელსაც გუნდში დირექტორობამდე მწვრთნელის პოზიცია ეკავა.

სამი წელია რაც „ბეთლემი~ პირველ ლიგაში თამაშობს, გასული წლის თამაშების შედეგებით კი საფეხბურთო კლუბი ქვეყნის მასშტაბით პირველ ლიგაში მოთამაშე გუნდებს შორის მეოთხე ადგილს იკავებს.

მიუხედავად იმისა, რომ პირველი ლიგის თამაშები რამდენიმე დღეში დაიწყება, „ბეთლემის“ გუნდის შემადგენლობა ოფიციალურად ჯერ არ დაკომპლექტებულა, კლუბს ხელშეკრულება გასულ წელს გუნდში მოთამაშე 27 ფეხბურთელიდან არც ერთთან არ გაუგრძელებია. „ბათუმელების“ ინფორმაციით, ადმინისტრაციას გუნდის დაკომპლექტება ადგილობრივი კადრებით სურს, თუმცა ამ ინფორმაციას ადმინისტრაციაში ოფიციალურად არ ადასტურებენ. ახალდანიშნული დირექტორი ნაზიმ ფარტენაძე ამბობს, რომ ფეხბურთელების შერჩევაში არ ჩაერევიან და ვინ ითამაშებს გუნდში და ვინ არა – ამას მთავარი მწვრთნელი, ავთანდილ კუნჭულია გადაწყვეტს.

„გასულ წელს ბეთლემში 27 ფეხბურთელი თამაშობდა, მათგან ადგილობრივი მხოლოდ რამდენიმე იყო. წელს ხელშეკრულება ფეხბურთელებთან ჯერ არ გაგვიფორმებია, ჩვენ შეგვიძლია გუნდში 30 ფეხბურთელი გვყავდეს, თუმცა, ვფიქრობთ, მაქსიმუმ 22 ფეხბურთელით დაკომპლექტდეს გუნდი. ხელშეკრულებას იმ ფეხბურთელებთან გავაფორმებთ, რომლებიც კარგ ფიზიკურ და ტაქტიკურ მომზადებას აჩვენებენ თამაშებში, რომელიც რამდენიმე დღის განმავლობაში გაიმართება. ვინ ითამაშებს გუნდში, ამას საბოლოოდ მთავარი მწვრთნელი ავთანდილ კუნჭულია გადაწყვეტს. ქედელი ფეხბურთელები გუნდს ვერ ავსებენ, შესაბამისად, მოწვეული ფეხბურთელები აუცილებლად იქნებიან, ჩვენ არავისთან არ შეგვიწყვეტია ხელშეკრულება“, – ამბობს ნაზიმ ფარტენაძე.

ავთანდილ კუნჭულია კი ამბობს, რომ გასულ წელს მოთამაშე 27 ფეხბურთელიდან კონტრაქტი წელს შვიდს შეუწყვიტეს, ფეხბურთელების შერჩევისას კი აქცენტი ადგილობრივ კადრებზე გაკეთდება. „წელს ქედის ბეთლემი ორ ასაკობრივ გუნდს დააფინანსებს. ვცდილობთ, ადგილზე აღვზარდოთ პროფესიონალი კადრები, გუნდებს ფორმებს შევუძენთ და გადაადგილების ხარჯებს დავუფინანსებთ, გვინდა „ბეთლემს“ ჰყავდეს ქედელი ფეხბურთელები, თუმცა ოცივე ფეხბურთელი ქედელი ვერ იქნება. წლევანდელ თამაშებში ხუთი ადგილობრივი ითამაშებს, გადაწყვეტილია, რომ გუნდში დარჩება ფერადკანიანი ტელა მაგნოლიც, დანარჩენ თოთხმეტს კი მოწვეული ფეხბურთელებიდან შევარჩევთ. რაც შეეხება შვიდ ფეხბურთელს, მათგან სამს ჩვენ შევუწყვიტეთ კონტრაქტი, მათ ვინაობას ვერ დავასახელებ, არ მინდა ითქვას, კუნჭულიამ დაიწუნა და სხვა გუნდმა მიიღოს ფეხბურთელი, ან პირიქით არ მიიღოს. ფეხბურთში ასეთი საუბარი არ შეიძლება, დანარჩენი ოთხი თავისი სურვილით წავიდა გუნდიდან“, – ამბობს მთავარი მწვრთნელი.

`ბეთლემის~ ყოფილი დირექტორი და მწვრთნელი ედიშერ კაკაბაძე ამბობს, რომ ფეხბურთელთა გადახალისება გუნდისთვის ხელსაყრელია, თუმცა იმასაც აღნიშნავს, რომ ამისთვის მინიმუმ ხუთი თამაშია საჭირო. „გუნდის გადახალისება, რა თქმა უნდა, კარგია, მაგრამ ფეხბურთელს ერთი და ორი თამაშით ვერ შეარჩევ, შეიძლება ერთ თამაშში ვერ ითამაშოს, მაგრამ მეორე თამაშში კარგი შედეგი აჩვენოს. ფეხბურთელის შერჩევისთვის მინიმუმ ხუთი თამაშია საჭირო“, – ამბობს ის.

ადგილობრივმა, ქედელმა ფეხბურთელმა, რომა ქობულაძემ ჩაანაცვლა მთავარი მწვრთნელის მოადგილე რამაზ სამნიძე. ავთანდილ კუნჭულიას თქმით, რამაზ სამნიძე გასულ წელს საფეხბურთო კლუბში მწვრთნელის მოადგილესთან ერთად სპორტული დირექტორის თანამდებობასაც იკავებდა.

ვიდრე ქედაში ფეხბურთელებს შეარჩევენ, საფეხბურთო კლუბის ადმინისტრაციაში რეორგანიზაცია დასრულდა და 17 საშტატო ერთეულიდან ადმინისტრაციაში ხუთი შტატი გაუქმდა. საფეხბურთო კლუბის ადმინისტრაციასა და გუნდში მიმდინარე რეორგანიზაციას დირექტორი საჭიროებით ხსნის. „ბეთლემის“ ყოფილი დირექტორის ედიშერ კაკაბაძის გათავისუფლების მიზეზად ადმინისტრაციაში სხვადასხვა ფაქტორს ასახელებენ, პირად საუბარში ამბობენ, რომ მას მწვრთნელთან ხშირი უთანხმოება ჰქონდა, რაც დირექტორის მწვრთნელის საქმიანობაში ჩარევით იყო გამოწვეული.

„ბეთლემის“ ფეხბურთელი და დღეს უკვე მთავარი მწვრთნელის მოადგილე რომა ქობულაძე ამბობს, რომ დირექტორსა და მწვრთნელს შორის დაპირისპირება არასდროს ყოფილა. „არ ვიცი, ედიშერ კაკაბაძის გათავისუფლების მიზეზი, კონფლიქტი და დაპირისპირება გუნდში არასდროს ყოფილა, ამასთან დაკავშირებით ინფორმაციას არ ვფლობ“, – ამბობს რომა.

თავად ედიშერ კაკაბაძე ამბობს, რომ დირექტორის თანამდებობიდან საკუთარი განცხადების საფუძველზე გათავისუფლდა.
კითხვაზე, რამ განაპირობა რეორგანიზაციის გატარება საფეხბურთო კლუბში და რა დამსახურებით დაინიშნა შპს-ს დირექტორად, ნაზიმ ფარტენაძე პასუხობს:

„პრობლემები იყო გუნდში, კადრები ბლომად, დაფინანსება – ცოტა, მოედანს ხუთი მომვლელი ჰყავდა, რაც საჭირო არ იყო, სწორედ აქედან გამომდინარე შევამცირეთ შტატები, არსებული საშტატო შემადგენლობა სრულიად საკმარისია და პასუხობს მოთხოვნებს, ადმინისტრაციასთან ერთად საჭირო იყო გუნდის გადახალისება, რაც შეეხება ჩემ დანიშვნას დირექტორის თანამდებობაზე, ჩემი შვილის, არჩილ ფარტენაძიდან გამომდინარე მოხდა, როგორც იცით, ჩემი შვილი არჩილი თამაშობდა გუნდში, გუნდის კაპიტანი იყო, მისი გარდაცვალების შემდეგ გუნდის გადაწყვეტილებით და მათი სურვილით დავინიშნე დირექტორად“.

საფეხბურთო კლუბი ქედის ადგილობრივი ბიუჯეტიდან ფინანსდება. წელს გუნდის დასაფინანსებლად 385 000 ლარი გამოიყო, ფეხბურთელის მაქსიმალური ხელფასი აქ – 1000, მინიმალური კი 600 ლარია, რასაც ემატება პრემია, რომელსაც ფეხბურთელები თამაშის შემდეგ, თამაშის ხარისხის მიხედვით იღებენ. მთავარი მოთამაშე პრემიის სახით – 300-ს, შემცვლელი მოთამაშე კი 150 ლარს იღებს.

რა ელის ბათუმს, თუ ისევ ითოვებს

„კარგად ვიქნებით, არ ინერვიულოთ”, – ასეთია ბათუმის მერის, გიორგი ერმაკოვის პასუხი „ბათუმელების” შეკითხვაზე: რას უნდა ველოდოთ, თუ ისევ გათოვდება? ქალაქის მერიასა თუ აჭარის მთავრობაში დიდთოვლობას სტიქიას არქმევენ და ასე ცდილობენ რიგ შეკითხვებს თავი აარიდონ. რაც მთავარია – მაღალჩინოსნების გეგმები, დიდთოვლობის განმეორების შემთხვევაში, ერთმანეთისგან განსხვავებულია.

რატომ ვერ გაიწმინდა ქუჩები თოვლისგან დროულად? – ამ კითხვას არაერთი ბათუმელი სვამდა დიდთოვლობის დროს. ქუჩების თოვლისგან გაწმენდისთვის მოხალისეების პარალელურად საჯარო მოხელეების ჩართვა, ასევე შინაგან საქმეთა მინისტრის ბრძანებით აჭარაში დისლოცირებული სამხედრო მოსამსახურეების დახმარებაც გახდა საჭირო. თუმცა, ამ უკანასკნელს მხოლოდ მას შემდეგ მიმართა აჭარის მთავრობამ, რაც თოვა შეწყდა და, შესაბამისად, აქტივისტების მხრიდან ბულვარში ხეების გადარჩენის მცდელობა არაეფექტური გამოდგა.

თოვლისგან გაწმენდით სამუშაოებს ბათუმის მერიის დაქვემდებარებაში მყოფი შპს „ბათუმის სანდასუფთავება” ახორციელებდა. აქ გვითხრეს, რომ სამუშაოებისთვის საკმარისი ტექნიკა ჰქონდათ. „საკმარისში” იგულისხმება ნაქირავები ტექნიკა, რადგან ქუჩებში „სანდასუფთავების” მხოლოდ 11 ერთეული ტექნიკა მუშაობდა, ხოლო დამატებით 24 მერიამ კერძო კომპანიებისგან დაიქირავა. „24 საათის განმავლობაში არ გავჩერებულვართ. რაც არ გვყავდა, ვიქირავეთ. ნალექი იმდენი იყო, რომ ტექნიკა ფიზიკურად ვეღარ ასწრებდა მის გაწმენდას. სტიქია იყო ფაქტობრივად, რადგან ქალაქში ნახევარ მეტრზე მეტი თოვლი იყო. მაინცადამაინც ზღვა ხომ არ უნდა გადმოვიდეს და წაგიღოს, ბათუმში მეტი რა უნდა მოხდეს?” – გვითხრა შპს „სანდასუფთავების” დირექტორის მოადგილე ირაკლი თედორაძემ.

ამ უწყებაში, ასევე აჭარის მთავრობაში, თოვლის საწმენდი დამატებითი მოწყობილობის შეძენის აუცილებლობას ვერ ხედავენ. კახა შაშიკაძე, აჭარის მთავრობის აპარატის ადმინისტაციულ ერთეულებთან ურთიერთობის დეპარტამენტის უფროსი:

„ტექნიკის უკმარისობის პრობლემა არ გვქონია. გართულდა მხოლოდ ძველი ბათუმისა და ჭაობის დასახლების ქუჩების გაწმენდა. კონსტანტინე გამსახურდიას ქუჩიდან გოგებაშვილამდე ვიწრო ქუჩებია და თან მანქანები არასწორად იყო პარკირებული. ჭაობში კი, თოვლიც რომ არ იყოს, რთულია გადაადგილება იქ მიმდინარე სარეაბილიტაციო სამუშაოების გამო”.

სწორედ ამ მიზეზით ჭაობის დასახლებაში, პურიც კი ვერ შეჰქონდათ.

მთავრობისგან განსხვავებით, ტექნიკის შეძენის საჭიროებას ხედავს ბათუმის მერი გიორგი ერმაკოვი: „მარტში ან აპრილში ვაპირებ გერმანიაში წასვლას, სადაც იქნება ტექნიკის მწარმოებელი კომპანიების გამოფენა-გაყიდვა. ვაპირებ, იქ ჩავიდე სპეციალისტებთან ერთად და შევიძინო ის ტექნიკა და დანამატები, რომლებიც თოვლის გასაწმენდად გამოგვადგება”, – უთხრა „ბათუმელებს” გიორგი ერმაკოვმა. რამდენი ერთეული ტექნიკის შეძენა იგეგმება და რა ფასად? – ქალაქის მერს კითხვაზე კონკრეტული პასუხი ჯერ არ აქვს: „ამდენი შეკითხვა ერთად ბევრია… კონკრეტულად რას ვიყიდით, მაგას საკრებულოს მოვახსენებ და ქალაქი დაინახავს”.

დიდთოვლობაზე უკვე გაწეული სამუშაოს ჩასაბარაბელად მერი ბათუმის საკრებულოს სხდომაზე არ მივიდა.
რის შეცვლის აუცილებლობა დაინახა ქალაქის საკრებულოს თავმჯდომარემ – ამ თემაზე ირაკლი ჭეიშვილის პასუხს `ბათუმელები~ მთელი კვირის განმავლობაში უშედეგოდ ელოდა.

კიდევ ერთი პრობლემა, რაზეც ბათუმის მოსახლეობა დიდთოვლობის დროს სოციალურ ქსელში საუბრობდა, გზებზე ტექნიკური მარილის დაყრა იყო. „მარილს ვყრიდით სისტემატურად. სადაც საჭირო იყო, ყველგან. პუშკინის ქუჩაზე და იქეთ, ჭაობში, სადაც სამი-ოთხი დღე ვერ შევედით, იქ არ დაგვიყრია მხოლოდ”, – უთხრა „ბათუმელებს” ირაკლი თედორაძემ, შპს „ბათუმის სანდასუფთავების” დირექტორის მოადგილემ. აჭარის მთავრობის შტაბის წევრი კახა შაშიკაძე კი ამბობს: „მარილის დაყრა დაგვიანდა და თუკი ისევ იქნება თოვლი, ამას გავაძლიერებთ. თუ სანდასუფთავებას არ ყოფნის ხალხი, დავუმატებთ”.

მერიის ინფორმაციით, თოვლის დროს დაახლოებით 11 105 კგ. ტექნიკური მარილი დაიყარა ბათუმის ქუჩებში. ამჟამად 10 125 კგ-ის მარაგია დარჩენილი. სახელმწიფო შესყიდვა მარილის შესაძენად ამჟამად გამოცხადებული არ არის.

დიდთოვლობის დროს ქალაქში ბევრგან შეხვდებოდით წაქცეულ ხეებს, ჩამოტეხილ ტოტებს. თოვლმა არაერთი ხე გაანადგურა ბათუმის ბულვარშიც. ბათუმის მერიის გამწვანების სამსახურის ინფორმაციით, ქალაქის ხე-მცენარეების დაახლოებით 10 პროცენტამდე მძიმედ დაზიანდა ან განადგურდა. ხეების გადასარჩენად ქუჩაში გამოსული მოხალისეების ერთი ჯგუფი ამბობდა, რომ მერიას საკმარისი რაოდენობის ჭიგოებიც კი არ ჰქონდა, რომ ადამიანებს ხეები დაეფერთხათ. ბათუმის მერიაში ჭიგოების სიმცირეს უარყოფენ და ცდილობენ დაგვაჯერონ, რომ ხეები დაუფერთხაობის გამო არ დაზიანებულა. „უფრო მეტი მოხალისეც რომ ყოფილიყო, ამ მასშტაბს მაინც ვერ გაუმკლავდებოდა. მოხალისეები როგორც კი გამოჩნდნენ, ჩვენ ისევ მოვთხოვეთ სპეციალური ჭიგოები ბოტანიკურ ბაღს და გადმოგვცეს. რაც ჩამოტყდა და დაზიანდა, დაუფერთხაობის გამო არ იყო ეგ. დაფერთხვა არის საჭირო სუსტი და პატარა ხეების და ეს ხეები ჩვენ დავფერთხეთ”, – უთხრა „ბათუმელებს“ ბათუმის მერიის გამწვანების სამსახურის უფროსმა ავთანდილ ტარიელაძემ.

დაუფერთხაობით დაზიანებული დიდი ხეები გამწვანების სამსახურს არ უნახავს. შესაბამისად, არც იმაზე ზრუნავს ვინმე, რომ დიდი ხეების დასაცავად სპეციალური ღონისძიება გატარდეს, თუკი ამის საჭიროება ისევ დადგება. არადა, ბათუმის ბულვარში უზარმაზარი ხეები დაზიანდა.

თუ ბათუმში ისევ მოთოვს, აჭარის მთავრობასა თუ მერიაში უჭირთ პასუხის გაცემა – რა იქნება შეცვლილი მართვის კუთხით, ან რა რესურსი უნდა გაუმჯობესდეს. კახა შაშიკაძე აჭარის მთავრობის აპარატიდან ამბობს, რომ მოხალისეებს თოვლის მოსვლის შემთხვევაში პირდაპირ ძველი ბათუმის ქუჩებში შეიყვანს, ხოლო ირაკლი თედორაძე კონკრეტულს არაფერს გეგმავს: „ჩვენ კი არა, შეერთებული შტატები ჩაიკეტა, სტამბულს, მაგალითად, აეროპორტიც ჩაეკეტა იმის მიუხედავად, რომ ამხელა თოვლი იქ არ ყოფილა”.

JTEC – ახალი ფაზა ნატო-საქართველოს ურთიერთობებში

ზუსტად ექვსი თვის წინ ეროვნულ სასწავლო ცენტრ კრწანისის“ ტერიტორიაზე ნატო-საქართველოს წვრთნისა და შეფასების ერთობლივი სასწავლო ცენტრი ( JTEC) დაფუძნდა. იქ, სადაც ერთ დროს საბჭოთა საწვრთნელი პოლიგონი იყო და სადაც საქართველოს დამოუკიდებლობის შემდეგაც ჩამოდიოდნენ, რათა ტერიტორია, როგორც საბჭოთა საწვრთნელი პოლიგონის ნიმუში, დოკუმენტური ფილმებისთვის გადაეღოთ. გზა პოლიგონ იაღლუჯიდან ნატო-საქართველოს წვრთნისა და შეფასების ერთობლივ სასწავლო ცენტრამდე ნატო-საქართველოს ურთიერთობების, პრაქტიკულად, ყველა ეტაპს მოიცავს.

საქართველოსა და ნატოსთვის JTEC -ის მნიშვნელობა რომ გავიაზროთ, აუცილებელია ნატო-საქართველოს ურთიერთობების ისტორიულ ჭრილში განხილვა და, ამ კონტექსტში, იმ მოლოდინების იდენტიფიცირება, რომელიც წვრთნისა და შეფასებების ერთობლივ სასწავლო ცენტრს უკავშირდება.

საქართველოს პირველი ნაბიჯი ალიანსისკენ 1992 წელს, ჩრდილოატლანტიკური თანამშრომლობის საბჭოში გაწევრიანება იყო. მას შემდეგ თითქმის საუკუნის მეოთხედმა განვლო. ამ, ერთი შეხედვით ხანგრძლივი დროის განმავლობაში მრავალი შეხების წერტილი გამოიკვეთა. ურთიერთობები უფრო ინტენსიური, საინტერესო და ურთიერთსასარგებლო გახდა.

ამას გარდა, განხორციელდა არაერთი პროგრამა, ჩატარდა არაერთი სწავლება თუ წვრთნა, რომელიც 1994 წელს „პარტნიორობა მშვიდობისათვის“ პროგრამით (PFP) დაიწყო და 2014 წლის სექტემბრის უელსის სამიტზე „ნატო-საქართველოს არსებითი პაკეტის“ მიღებით დასრულდა.

არსებითი პაკეტი ცამეტი ქვეპროგრამისაგან შედგება: ლოგისტიკა, სამხედრო პოლიცია, უსაფრთხო და სტრატეგიული კომუნიკაციები, საზღვაო უსაფრთხოება, შესყიდვები, კიბერთავდაცვა, ავიაცია, საჰაერო თავდაცვა, სპეცდანიშნულების ძალები, სტრატეგიულ-ოპერატიული დაგეგმვა, თავდაცვის ინსტიტუციური აღმშენებლობის სკოლა და, რა თქმა უნდა, ერთობლივი წვრთნისა და შეფასების ცენტრი (JTEC).

JTEC ნატოს არსებობის ისტორიაში უპრეცედენტო პროექტია, რომელსაც ალიანსი პარტნიორ ქვეყანასთან ერთად ახორციელებს და სადაც ნატოს 10 წევრი ქვეყნის ამდენივე ოფიცერი მუდმივად იქნება წარმოდგენილი. მათ არ ექნებათ დამკვირვებლის სტატუსი, დაინიშნებიან კონკრეტულ თანამდებობებზე და განესაზღვრებათ კონკრეტული პასუხისმგებლობები.

ცენტრის ჩამოყალიბება ნატო-საქართველოს ურთიერთობების ახალი, უფრო მჭიდრო თანამშრომლობის ფაზის დაწყებაზე მიუთითებს, რომელიც საქართველოს ნატოში გაწევრიანების ერთ-ერთი მექანიზმია. მისი წარმატებული ფუნქციონირება საქართველოს ნატოსთან ოპერატიულ დონეზე თავსებადობის მზაობას დაადასტურებს, რომელიც ტაქტიკურ დონეზე თავსებადობის შემდგომი ეტაპია. ეს უკანასკნელი გამოცდა კი, საქართველომ მსოფლიოს სამ კონტინენტზე წარმატებით ჩააბარა _ 1999 წლიდან დაწყებული, როდესაც პირველი კონტინგენტი გააგზავნა კოსოვოში, შემდეგ ავღანეთში, ერაყში და ცენტრალურ აფრიკაში. ეს არაერთხელ აღუნიშნავთ ნატოს, გაეროს თუ სხვა წამყვანი ორგანიზაციების წევრი ქვეყნების წარმომადგენლებს სხვადასხვა დონის ოფიციალურ, თუ არაოფიციალურ შეხვედრებზე.

სწორედ, სხვადასხვა მისიაში მონაწილეობამ გახადა მიმზიდველი თანამშრომლობა საქართველოს შეიარაღებულ ძალებთან. .

მისიებში მონაწილე ოფიცრების, სერჟანტებისა და კაპრალ-რიგითების პროფესიონალიზმი აყალიბებს და ამყარებს ნდობას ჩვენს შეიარაღებულ ძალებსა და სხვა მოკავშირე ქვეყნებს შორის. ეს ნდობა კი საბოლოო წარმატების მისაღწევად მეტად მნიშვნელოვანია.

იმედია, JTEC ღირსეულად ჩაებმება დაწყებულ დიდ საქმეში და კიდევ ერთ წარმატებულ ფურცელს ჩაწერს ქართული ჯარის ისტორიაში.

ავტორები: პოლკოვნიკი გრიგოლ ჭელიძე, ვიცე-პოლკოვნიკი გიორგი დუმბაძე

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

ქართული „დიდგორი“ არაბულ უდაბნოებს დალაშქრავს

2016 წელი საქართველოში უმნიშვნელოვანესი სიახლით დაიწყო, საქართველო თანამედროვე სამხედრო ტექნიკის იმპორტიორი ქვეყანა გახდა. საზოგადოების სხვადასხვა წრეში ეს ისტორიული მნიშვნელობის მოვლენად და ქართული სამხედრო ინჟინერიის გამარჯვებად შეფასდა, რადგან შეიარაღების საერთაშორისო ბაზარზე უმსხვილესი კომპანიების წარმოებული თანამედროვე ჯავშანმანქანების გვერდით ქართული „დიდგორის“ გამოჩენა უდიდესი წარმატებაა.

საქართველოს თავდაცვის სამინისტროს სახელმწიფო სამხედრო-სამეცნიერო ტექნიკურ ცენტრ „დელტას“ მიერ საუდის არაბეთთან გაფორმებული ხელშეკრულების მიხედვით, საქართველო ზემოაღნიშნულ ქვეყანას რამდენიმე ათეული ქართული წარმოების სამედიცინო-საევაკუაციო ჯავშანმანქანას მიაწვდის, რომელთა საერთო ღირებულება 100 მილიონამდე ლარია. ქართულმა სამედიცინო ჯავშანმანქანამ წარმატებით გაიარა ტესტირების ყველა ეტაპი და ფინალში ამერიკულ კომპანია LENCO- სთან ერთად გავიდა.

ჯავშანმანქანა სამედიცინო-საევაკუაციო ჯავშანმანქანების კლასს განეკუთვნება და ბრძოლის ველზე დაჭრილი ჯარისკაცების უშუალოდ საბრძოლო მოქმედებების ზონიდან უსაფრთხო ტერიტორიაზე გადასაყვანად და ტრანსპორტირების დროს პირველადი სამედიცინო დახმარების უზრუნველსაყოფადაა განკუთვნილი.

საქართველო საუდის არაბეთის სამეფოს თავდაცვის სამინისტროს მიერ გამოცხადებულ ტენდერში 2014 წლიდან ჩაერთო. ტენდერი თანამედროვე სამედიცინო-საევაკუაციო ჯავშანმანქანების შესყიდვას ითვალისწინებდა. 2014 წლის 27 აგვისტოს საუდის არაბეთში „დელტას“ მიერ დამზადებული 4X4 სავალი ნაწილის ფორმულის მქონე დიდგორის უნიფიცირებული ჯავშანმანქანა გაიგზავნა. სულ ტესტირებაში სხვადასხვა კომპანიის მიერ წარმოებული 6 ერთეული ჯავშანმანქანა მონაწილეობდა: Oshkosh, Streit Group, AIG, Steyr, Lenco, bearcat. საველე ტესტირებებისას ადგილობრივი მძღოლ-მექანიკოსების მიერ ჯავშანმანქანა სხვადასხვა რელიეფის პირობებში გამოიცადა – მათ შორის: მანევრირება მაღალ და დაბალ სიჩქარეებზე, მუხრუჭების, აჩქარების, მაქსიმალური სიჩქარის ტესტი, გამავლობის შემოწმება მაღალმთიან და უდაბნოს პირობებში, ძრავისა და სავალი ნაწილების მაქსიმალური დატვირთვის შემოწმება 40-კილომეტრიანი გარბენის პირობებში ზღვრულ სიჩქარეებზე.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

არ დაუჯეროთ მატყუარებს!

ვიდრე აზრებს გაგიზიარებდეთ, მოკლედ გიამბობთ ჩემ შესახებ. წლებია, ჟურნალისტად ვმუშაობ… 22-25 წელია, თითქმის ყოველდღე ვწერ… ხან გამომდის და ხანა _ არა. ბოლო პერიოდია, საქართველოს ევროპაში შესვლასა და ამ ამბის აუცილებლობაზე ვწერ… აგრეთვე, რუსეთზე, სახელმწიფოზე, რომელმაც საქართველოს ტერიტორიების 20%- ის ოკუპაცია მოახდინა.

ვწერ და ვწერ… ზოგს მოსწონს ჩემი ნაწერი, ზოგს _ არა. ზოგი მეთანხმება და ზოგიც პირიქით _ მეწინააღმდეგება. ეს კარგია _ დემოკრატიულ საზოგადოებაში აზრთა სხვადასხვაობა უნდა იყოს… ჩვენ დემოკრატიული საზოგადოება ვართ _ სოფლად და ქალაქად მცხოვრებლებს _ თბილისელებს და ბათუმელებს; ზუგდიდელებს და თელაველებს; ქუთათურებს და ახალციხელებს; გორელებს და საგარეჯოელებს; მესტიელებს და ოზურგეთელებს _ დემოკრატია და დემოკრატიულობა გვაერთიანებს.

ამ აზრთა ჭიდილში იკვეთება მთავარი აზრი, ის, რასაც ქვეყანა მიჰყვება… მისი ხელისუფლება აღასრულებს…

ამას წინათ დავწერე, რომ 1801 წლიდან დღემდე, დიდი მსხვერპლი გავიღეთ… ანუ, ჩვენი ბევრი წინაპარი შეეწირა საქართველოს ტერიტორიულ მთლიანობას. გავიხსენე XIX საუკუნის არაერთი აჯანყება, სისხლში ჩახშობილი წინააღმდეგობები… ბოლოს კი 2008 წლის ამბებიც მიმოვიხილე და, მგონი, ყველა დამეთანხმა… თითქმის ყველა.

…ახლა მახსენდება, იმ დისკუსიაში ჩვენი რამდენიმე თანამემამულე შემეკამათა და არ მოიწონეს შეფასება _ `რუსეთი ოკუპანტია~… მერე ვფიქრობდი, რა შეიძლება ყოფილიყო ამის მიზეზი? რატომ არ უნდა ეთანხმებოდე ხსენებულ ჭეშმარიტებას?! სიმართლე გითხრათ, სათანადო პასუხი ვერ მოვძებნე, ვერ მოვიძიე.

ერთადერთი აზრი, რომელიც დღემდე მიტრიალებს და არ მასვენებს, ისაა, რომ ეს პირები, ვინც რუსეთის ოკუპანტობას არ აღიარებენ, უბრალოდ არარსებულები არიან… უფრო ზუსტად, რა თქმა უნდა, კონკრეტული ადამიანი იმალება მათი სახელების მიღმა, მაგრამ, ეს ადამიანი ნამდვილ გვარ-სახელს მალავს და ფსევდონიმით კი არა, ტყუილი სახელით ავრცელებს ათას ჭორსა და ცრუ ამბავს.

`ფეისბუქს~, რომლითაც ბევრი ჩვენგანი სარგებლობს (და სადაც ხსენებული დისკუსია გაიმართა), სამწუხაროდ, არ აქვს ფუნქცია, რომ ნამდვილი ცრუ მომხმარებელისგან გაარჩიოს. მაგალითად, შემიძლია გავხდე აშშ-ის პრეზიდენტი ობამა და ბევრს შეიძლება დავაჯერო კიდეც, რომ ობამას წერილებს თუ სტატუსს ეცნობა.

ინტერნეტში წავაწყდი ცნობას, რომ ჩვენი ქვეყნის არაკეთილმოსურნე სახელმწიფოს სპეცსამსახურებს ამგვარი მინიმუმ 30 000, _ სხვისი სახელით მოსარგებლე პირი ჰყავს _ ზოგს ობამა ჰქვია, ზოგი კი უცნაური სახელებით სარგებლობს.

მათი ამოცნობა, დაკვირვებული თვალისთვის რთული არ არის. საკმარისია, მათივე გვერდების ფოტოები დავათვალიეროთ და აღმოაჩენ, რომ არც ერთს, არ აქვს დადებული საკუთარი ფოტო, ისინი სხვისი ფოტოებით სარგებლობენ. ინტერნეტში მათ `ტროლ არმიას~ უწოდებენ _ ანუ, ტყუილების გამავრცელებლებს და სიტუაციის ამრევებს.

რა ზიანი მოაქვთ ამგვარ პირებს? ისინი რეალურად ხელს უწყობენ ჭორების, ანუ მითების, უფრო მარტივად რომ ვთქვათ _ ტყუილების გავრცელებას.

ეს ტყუილები, რეალურად, საშიშია ჩვენი ქვეყნისთვის. ამომრჩევლის ნაწილს მართლაც სჯერა, რომ, მაგალითად, ევროპაში შესვლის შემთხვევაში ჩვენს რელიგიას, მართლმადიდებლობას საფრთხე შეექმნება; ზოგს იმისიც სჯერა, რომ ნატოში შესვლის შემთხვევაში, ჩვენ სამუდამოდ წაგვართმევენ აფხაზეთს და ცხინვალის რეგიონებს.

რეალურად, _ ევროპასა და ევრო-ატლანტიკურ სივრცეში საქართველოს გაერთიანება, ქვეყანას ბევრ სიკეთეს მოუტანს… ამას ადასტურებენ არა მხოლოდ გონიერი ადამიანები, არამედ ციფრებიც. მაგალითად, როდესაც ლიტვა, ლატვია ან ესტონეთი გაწევრიანდნენ ევროკავშირსა და ნატოში, მათი ეკონომიკა 6-ჯერ გაიზარდა. რუსეთმა დამოუკიდებელი და დაცული ქვეყნების ტერიტორიებზე უარი თქვა.

მეორე ტყუილი _ ბრძოლა მართლმადიდებლობასთან ხომ საერთოდ აბსურდულია _ იმ ევრო-ატლანტიკურ სივრცეში, რომელშიც საქართველო აუცილებლად გაწევრიანდება, სწორედ რამდენიმე მართლმადიდებელი სახელმწიფოა, რომლებიც თავს უფრო უსაფრთხოდაც გრძნობენ და მათი რელიგიაც, რწმენაც, უფრო დაცულია. მაგალითად, ასეთია საბერძნეთი _ ისტორიული და ტრადიციული ქვეყანა.

სამწუხაროდ, რუსეთის მომხრეებს, იმ პირებს, რომლებიც ჭორებს და ტყუილებს ავრცელებენ ევროკავშირსა და ნატოზე, ეს მაგალითები არ ახსენდებათ… აგრეთვე, არაფერს ამბობენ იმაზე, რომ ჩვენი კულტურის არაერთი ძეგლი სწორედ ჩვენმა ევროპელმა მეგობრებმა გადაგვირჩინეს. სამწუხაროდ, არავის ახსენდება ის, რომ ღვინის ქვევრში დაყენების წესი, მსოფლიომ მის კულტურულ მემკვიდრეობად აღიარა… ან, ვთქვათ ის, რომ რამდენიმე წლის წინ `იუნესკომ~ ვაჟა-ფშაველას იუბილე მსოფლიოს მასშტაბით აღნიშნა.

ტყუილებს ავრცელებენ ჩვენს ჯარზეც _ თითქოს, ის სათანადოდ შეიარაღებული არ არის, ან მას ბრძოლა არ შეუძლია _ დაახლოებით 12 ათასი სამხედრო მოსამსახურე იმყოფებოდა ავღანეთში და იქ საკუთარი პროფესიონალიზმი დაამტკიცეს, რასაც, ამერიკელები და ევროპელები ერთხმად აღიარებენ.

სამწუხაროდ, უამრავ სხვა ტყუილთან ერთად, ისმის, რომ ნატო და ევროკავშირი აფხაზეთს და ცხინვალის რეგიონს არ დაგვიბრუნებს, თუმცა, მათ ავიწყდებათ: რეალურად ვინ წაგვართვა ხსენებული ტერიტორიები? პასუხი ნათელია _ რუსეთმა! ნატოს წევრობა კი მინიმუმ იმის გარანტიაა, რომ ტერიტორიებს ვეღარ წაგვართმევენ… დამყარებული მუდმივი მშვიდობა კი განვითარების წინაპირობაა. განვითარების (და მუდმივი ომის შიშის გარეშე ცხოვრების) შემდეგ კი, ჩვენი ტერიტორიული მთლიანობა გაცილებით იოლად აღდგება.

…დაბოლოს, ტყუილია, თითქოს საქართველოსთვის გამოსავალი ნეიტრალიტეტია.

შეგახსენებთ, რომ 1918 წლის დამოუკიდებლობის აქტში საქართველოს იმდროინდელმა ხელისუფლებამ გააკეთა ჩანაწერი: `საერთაშორისო ომიანობაში საქართველო მუდმივი ნეიტრალური სახელმწიფოა~, ანუ, ფაქტობრივად, საკუთარი თავი ნეიტრალურ სახელმწიფოდ აღიარა, თუმცა, ამას ხელი არ შეუშლია ბოლშევიკური რუსეთისათვის, რომ არასრულ სამ წელიწადში _ 1921 წლის თებერვალში შემოჭრილიყო და საქართველოს სახელმწიფოებრიობა გაეუქმებინა. დაახლოებით იგივე ხდება უკრაინაში _ უკრაინა დღემდე ამბობს, რომ აღარ სურს ნატოში გაწევრიანება, თუმცა, ამ სახელმწიფოს ტერიტორია _ ყირიმის ნახევარკუნძული უკვე მიტაცებულია.

ასე რომ, ტყუილია, თითქოს ნეიტრალიტეტი ჩვენი ქვეყნისთვის მშვიდობისა და უსაფრთხოების გარანტიაა. ტყუილია ისიც, რომ ნატოში გაწევრიანებაზე უარის თქმა გვიხსნის შესაძლო აგრესიისგან, პირიქით, ამ დროს ჩვენს მოწინააღმდეგეს მადა კიდევ უფრო გაეხსნება.

ავტორი: ირაკლი ტაბლიაშვილი

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

ბრძოლა დამოუკიდებლობისთვის – 1921 წლის თებერვალი

ივანე ჯავახიშვილის მიმართვა სტუდენტებს!

„შვილებო! ჩემი მოვალეობაა თქვენ წიგნისა და კალმისკენ მოგიწოდოთ, მაგრამ ერის ცხოვრებაში არის ისეთი მომენტები, როცა საჭიროა ყველაფერი განზე გადასდო და იარაღით ხელში მტერს მიეგებო. და აი, მეც თქვენ დღეს იარაღისკენ მოგიწოდებთ“.

25 თებერვლის ღამე მოგონებები ბრძოლის ველიდან

ტაბახმელაზე საშინელი ქარი ქრის. ხვეტავს და პირში გვაყრის ხორხოშელასა და თოვლს. თხელ ფარაჯებში გახვეულნი, გაყინულნი, გულდასმით ვდარაჯობთ კუთვნილ სივრცეს. სასროლად გამზადებული თოფები ხელში გვიჭირავს. ოთხნი ვართ: მათიკაშვილი, სომხიანცი, ანდრონიკაშვილი, ლომკაცი, 21 წელს არც ერთი ვართ გადაცილებულნი, ტანითაც დაბალი და სუსტი აგებულებისანი ვართ, ყველაზე ჯმუხი სომხიანცია, ქართველთა ერთგული და გულადი სომეხი.

ტაბახმელის რაიონის ერთ ტრანშეაში 40 ჯარისკაცია. მათ კაპიტანი ყიფიანი მეთაურობს. უცბად, ტრანშეას თავს დაესხა წითელი რაზმი. თითქმის ალყაში მოაქცია. რიცხობრივად, მათ შორის, უშველებელი სხვაობაა, მაგრამ ქართველები არ ნებდებიან. იმედოვნებენ, დახმარება მოუსწრებთ, ეს იმედი ამაოა. ქართველთა რაოდენობა სწრაფად კლებულობს. რჩება მხოლოდ ფეხზე მდგომი ხუთი ჯარისკაცი და მათი კაპიტანი. ბოლშევიკები ტრანშეას იღებენ. ხუთი გადარჩენილი რწმუნდება, რომ დამარცხება გარდაუვალია. ისინი ერთმუშტად იკვრებიან. კაპიტანი მათგან ცოტა მოშორებით აღმოჩნდა, მას არც გაქცევა სურს და არც ცოცხლად მტრის ხელში ჩავარდნა. მკერდზე რევოლვერს მიიდებს და ერთიმეორის მიყოლებით ტყვიებს დაიხლის. სასწაული! კაპიტანს სიკვდილი არ ეკარება. უკანასკნელი ძალა მოიკრიბა, რომ სიცოცხლე მოისწრაფოს. უეცრად, ვიღაცამ უსწრაფესად ხელიდან გამოგლიჯა რევოლვერი. ეს სამხედრო სკოლის კურსანტები გამოჩნდნენ დასახმარებლად. კურსანტებმა მტერი უკუაგდეს. ტრანშეა ბოლშევიკებისაგან გაწმინდეს.

ნ. მათიკაშვილისა და მ. კვალიაშვილის მოგონებებიდან

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

2008 წლის აგვისტო და მას შემდეგ…

კაპიტანი რომან აბაშიძე ახლა 30 წლისაა. აგვისტოს ომში მიღებული მძიმე ჭრილობების მიუხედავად ისევ ფორმაშია და საკუთარ გამოცდილებას სხვა ჯარისკაცებს უზიარებს. მისია საკმაოდ რთულია – დაჭრილი და დაშავებული სამხედრო-მოსამსახურეების რეაბილიტაცია. მათ ხშირად ეუბნება, რომ ჭრილობის შემდეგ ყველაფერი არ მთავრდება და ასეთ ვითარებაშიც შესაძლებელია ემსახურო სამშობლოს ისევ იმ შემართებით, მოტივაციით და ენერგიით. დამაჯერებლად საუბრობს, რადგან ეს გზა თავადაც გაიარა, ამ ამბავს ხშირად იხსენებს.

2008

წლის აგვისტო… მეორე ქვეითი ბრიგადის ოცდამეერთე ბატალიონი, ცხინვალის მისადგომებთან, ზემო ნიქოზში განთავსდა. ჯარისკაცებმა პოზიციები დაიკავეს და მეთაურის ბრძანებას ელიან… ოცეულის მეთაური, რომან აბაშიძე ქვეყნისათვის გადამწყვეტ მომენტში, თავისი ოცეულით, ბრძოლის შუაგულში იმყოფება…

ოცეული ზემდგომი მეთაურის ბრძანებას ელის…

ტაქტიკური ჩანაფიქრი ასეთია: ტერიტორიაზე მოწინააღმდეგის შემოსვლის შემდეგ, აქტიური ცეცხლის დროს, დათქმულ მონაკვეთში ოცეული გარკვეულ მანძილზე სწრაფად იხევს უკან. შემდეგ ელვისებური შეტევით გეგმავს მიზნის მიღწევას….

23 წლის ოცმეთაურს მტკიცედ აქვს გადაწყვეტილი, ბრძოლის ველი მას შემდეგ დატოვოს, რაც დარწმუნდება, რომ მისი ოცეულის თითოეული წევრი სამშვიდობოსაა. ბოლოს მეკავშირესთან ერთად რჩება, უკვე მზად არის თავადაც დატოვოს ბრძოლის ველი, სწორედ ამ დროს, მოწინააღმდეგე საბრძოლო ტანკსაწინააღმდეგო ყუმბარას ისვრის და კაპიტანი მიწაზე ეცემა… წამიერი ბურუსი, ფიქრი ოჯახზე, შვილებზე, ცხოვრებაზე… ტკივილისგან გონებადაბინდულმა მაინც შენიშნა, რომ ყუმბარა არ აფეთქებულა. გაიფიქრა, რომ გაუმართლა… აფეთქების შემთხვევაში ხომ გადარჩენის შანსი არ არსებობს…

მეკავშირე ჯარისკაცი რაციით კაპიტნის დაჭრის შესახებ გადასცემს… იმის მიუხედავად, რომ მტერი ას მეტრშია, სამშვიდობოს გასული ჯარისკაცებიდან ოთხი ბრძოლის ველზე ბრუნდება. დაჭრილების გასაყვანად……

ახსოვს როგორ გამოიყვანეს ბიჭებმა. შემდეგ ბატალიონის თავშეყრის ადგილი ნიქოზში და გზა ტყვიავამდე… სწორედ აქ ჩაუტარდა ფეხის კიდურის ამპუტაცია…

ერთი პერიოდი ყველაფერზე უარს ამბობდა… ეგონა, რომ ყველასთვის ზედმეტი გახდა. თუმცა… გარკვეული დროის შემდეგ დარწმუნდა, რომ ისევ საჭიროა. ამაში თავდაცვის სამინისტროს მიერ შარშან წამოწყებული ახალი პროექტიც დაეხმარა.

,,მხარი მხარს’’ დაჭრილი და დაშავებული სამხედრო მოსამსახურეების ფიზიკური და ფსიქოსოციალური რეაბილიტაციის პროგრამაა. მისი მხარდაჭერით, კაპიტან რომან აბაშიძის მსგავსად, ბევრი დაშავებული სამხედროს ცხოვრება უკეთესობისკენ შეიცვალა. პროექტი დაჭრილი და დაშავებული სამხედრო მოსამსახურეებისა და მათი ოჯახების ფსიქოლოგიურ, მორალურ და სოციალურ კეთილდღეობასთან ერთად მათ დასაქმებასაც ითვალისწინებს.

იმ დაჭრილ სამხედროებს, რომელთაც ჩაუტარდათ მუხლს ზედა ცალმხრივი, ორმხრივი და ზედა კიდურის ამპუტაცია, დაუმზადდათ უახლესი ტექნოლოგიის მიოელექტრო ხელის და ბიონიკური X3 მუხლის პროთეზები. ეს პროთეზები დაჭრილი და დაშავებული სამხედროების ცხოვრებას საგრძნობლად აიოლებს, საშუალებას აძლევს მათ ჩვეულ რეჟიმში განაგრძონ ყოველდღიური აქტივობები, იქნება ეს სირბილი, მანქანის მართვა, თხილამურებზე დგომა და სხვა.

კაპიტანმა რომან აბაშიძემ რეაბილიტაციისა და პროთეზირების კურსი უმოკლეს დროში გაიარა და ახლა უკვე პროგრამის „მხარი მხარს“ ფარგლებში საკუთარ გამოცდილებას სხვა ჯარისკაცებს უზიარებს. თუმცა, დრო სპორტული აქტივობებისთვისაც რჩება….

2016 წელი, 4 თებერვალი, 09:00 საათი…

კაპიტანი სავარჯიშო დარბაზში შედის. იქ 12:00 საათამდე უნდა დაჰყოს. ასე ხდება თითქმის ყოველდღე… თავდაცვის სამინისტროსთან არსებული მჯდომარე ფრენბურთის გუნდი ჩემპიონატისთვის ემზადება. მალე ამერიკის შეერთებულ შტატებში წავლენ და შემართებას, პროფესიონალიზმს და ქვეყნის სიყვარულს ძლიერთა შეჯიბრებაზეც დაამტკიცებენ.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

საარჩევნო სპეცუბნები უქმდება

თავდაცვის, შინაგან საქმეთა, სასჯელაღსრულებისა და პრობაციის სამინისტროების, ასევე, სახელმწიფო უსაფრთხოების, დაზვერვის და სახელმწიფო დაცვის სპეციალური სამსახურის ქვედანაყოფების ტერიტორიაზე სპეციალური საარჩევნო უბნების შექმნა კანონით აიკრძალება. პროექტს, რომელიც თავდაცვის სამინისტრომ სამართლიანი არჩევნებისთვის შექმნილი უწყებათაშორისი კომისიისა და არასამთავრობო ორგანიზაციების რეკომენდაციების საფუძველზე მოამზადა, მთავრობამ მხარი უკვე დაუჭირა.

კანონპროექტის თანახმად, თავდაცვის, შინაგან საქმეთა, სასჯელაღსრულებისა და პრობაციის სამინისტროს, სახელმწიფო უსაფრთხოების, დაზვერვისა და სახელმწიფო დაცვის სპეციალური სამსახურის სამხედრო მოსამსახურეები, სპეციალური წოდების მქონე პირები, აგრეთვე, სასჯელაღსრულებისა და პრობაციის სამინისტროს სამედიცინო დეპარტამენტის, პენიტენციური დეპარტამენტისა და პენიტენციური დაწესებულების მოსამსახურეები, არჩევნებში მონაწილეობას, როგორც წესი, მათი რეგისტრაციის ადგილის მიხედვით მიიღებენ.

კანონპროექტის ავტორებმა გაითვალისწინეს ის სპეციფიკა, რომ ზემოაღნიშნული კატეგორიის მოსამსახურეთა გარკვეული ნაწილი არჩევნების დღეს სამსახურის პირობების (მაგ. საბრძოლო მორიგეობაზე ყოფნა) ან ჯანმრთელობის მდგომარეობის გამო ვერ მოახერხებს რეგისტრაციის ადგილზე გამგზავრებას. ამიტომ, მათ სპეციალურ სიაში შეიყვანენ და ხმას მისცემენ შესაბამისი საოლქო საარჩევნო კომისიის მიერ განსაზღვრულ საარჩევნო უბანზე. სიახლეა სამხედრო მოსამსახურეების პარლამენტის მაჟორიტარული სისტემით ჩატარებულ არჩევნებში სპეცსიებით მონაწილეობასთან დაკავშირებითაც. ამის საშუალება ექნებათ იმ მოსამსახურეებს, რომლებიც არჩევნების დღისათვის მუდმივი წესით, 1 წლით ან 1 წელზე მეტი ვადით განთავსებული იქნება დისლოკაციის ადგილზე ან თუ ისინი ადგილსამყოფელს შეიცვლიან ერთი და იმავე საარჩევნო ოლქის ტერიტორიაზე. ამ კატეგორიის პირები, მიუხედავად მათი სამსახურის სპეციფიკისა, წარმოადგენენ ადგილობრივი საზოგადოების ნაწილს და უნდა სარგებლობდნენ თანაბარი საარჩევნო უფლებით.

ავტორები იმედოვნებენ, რომ კანონპროექტი საარჩევნო პროცედურების დახვეწასა და სპეციალური საარჩევნო უბნების თუ სპეციალური საარჩევნო სიების ფორმირების პროცესში შესაძლო დარღვევების პრევენციას შეუწყობს ხელს. ასევე, უზრუნველყოფს სპეციალურ სიებში შეყვანილი პირების საარჩევნო უფლების დაცვას, მათი ნების თავისუფალი გამოვლინების შესაძლო ხელშემშლელი გარემოებების თავიდან აცილებას და ე.წ. ადმინისტრაციული რესურსის გამოყენების შესაძლებლობის მინიმიზაციას.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

რა ინტერესი აქვს საქართველოს ნატოს მიმართ?

ხშირად დასმული კითხვები

პოლიტიკური: საქართველო, როგორც დემოკრატიული განვითარების გზაზე მყოფი ქვეყანა, ბუნებრივად მიისწრაფვის დემოკრატიული ფასეულობების მქონე განვითარებული ქვეყნების საერთო ოჯახისკენ. შესაბამისად, საქართველოს ნატო-ში გაწევრიანება, ქვეყნის მშვიდობიანი, უსაფრთხო და დემოკრატიული განვითარების გარანტიაა.

თავდაცვა/სამხედრო: ნატოსთან აქტიური თანამშრომლობის განვითარება ხელს უწყობს საქართველოს თავდაცვისუნარიანობის განმტკიცებასა და საქართველოს შეიარაღებული ძალების ნატოსთან თავსებადობის გაზრდას.

ნატოს „კოლექტიური თავდაცვის“ პრინციპის შესაბამისად, საქართველო დაცული იქნება ნატოს 28 წევრი ქვეყნის მიერ, რაც ნატოს უსაფრთხოების გარანტს წარმოადგენს _ თავდასხმა ერთ წევრ სახელმწიფოზე განიხილება, როგორც თავდასხმა ნატოს ყველა წევრ სახელმწიფოზე.

უსაფრთხოება: საქართველოს ინტეგრაცია ნატოში შექმნის ეროვნული უსაფრთხოების მყარ გარანტიებს და ხელს შეუწყობს მშვიდობისა და სტაბილურობის განმტკიცებას, როგორც სამხრეთ კავკასიაში, ასევე შავი ზღვის რეგიონში.

საქართველოს, როგორც შეზღუდული რესურსების მქონე პატარა ქვეყანას, სჭირდება ნატოს და მისი წევრი ქვეყნების საერთო ძალისხმევა არსებული საფრთხეების დასაბალანსებლად.

ეკონომიკური: ნატოს წევრობა საქართველოს ეკონომიკურ განვითარებას და ქვეყნის საერთო კეთილდღეობას მნიშვნელოვნად შეუწყობს ხელს, უზრუნველყოფს ინვესტიციების მოზიდვას, რადგან ალიანსის წევრობა ინვესტორებისთვის წარმოადგენს სტაბილურობის გარანტს.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

ქართველები ავღანეთის „ცხელ მიწაზე“

საქართველოს შეიარაღებული ძალების მთავარი ამოცანა ჩვენი ქვეყნის გარეშე მტრისაგან დაცვაა. მაგრამ, როცა საქართველო ამდენი გამოწვევის და პრობლემის წინაშე დგას, ჩვენი ქვეყნის ათასამდე ჯარისკაცი, შორეულ ავღანეთში, NATO –ს წევრი ქვეყნების წარმომადგენლებთან ერთად, ერთ-ერთ ყველაზე რთულ მისიას ასრულებს. რა თქმა უნდა, იბადება კითხვა, რა გვინდა ავღანეთში, მაშინ, როდესაც ჩვენ ირგვლივ და ჩვენს რეგიონში ამდენი პრობლემაა და ახალი გამოწვევები, ფაქტობრივად, ყოველდღიურად იჩენს თავს.

საქართველო ავღანეთში NATO -ს ეგიდით წარმოებულ სამხედრო ოპერაციაში 2004 წლიდან ჩაერთო. შესრულდა 16 საბატალიონო როტაცია. „ავღანური გამოცდილება“ მიიღო 8000-მდე სამხედრო მოსამსახურემ. სამწუხაროდ, დაიღუპა 31 ჯარისკაცი, ათობით მეომარი კი მძიმედ დაიჭრა.

ავღანეთის სამხედრო მისიამდე საქართველოს შეიარაღებული ძალები აქტიურად მონაწილეობდნენ საერთაშორისო მისიებში კოსოვოში (1999 _ 2008 წ), ერაყში (2003 _ 2008წ). XXI საუკუნის ამ უმნიშვნელოვანესი კონფლიქტების გადაჭრის დროს, სხვა ქვეყნების დროშებთან ერთად, ამაყად ფრიალებდა საქართველოს დროშა. ქართველმა ჯარისკაცებმა საქართველოსა და დასავლეთს შორის ხიდების გადებაში უმნიშვნელოვანესი როლი შეასრულეს.

თანამედროვე გლობალურმა გამოწვევებმა, საერთაშორისო ტერორიზმის აღზევებამ კიდევ ერთხელ გვაჩვენა, რომ არ არსებობს „სხვისი ომი, არ არსებობას ,,სხვისი პრობლემები’’. ტერორისტების უმოწყალო ქმედებებმა, ლტოლვილების მილიონიანმა ნაკადმა ყველას დაანახვა, რამდენად გადაჯაჭვულია დიდი და პატარა ქვეყნების ინტერესები, რამდენად მნიშვნელოვანია უსაფრთხოება დღევანდელ დღეს.

საერთაშორისო უსაფრთხოების გარემოს გაუარესება, რომლის ახალი ფაზაც 2008 წლის რუსეთ-საქართველოს ომით დაიწყო და ყირიმის, აღმოსავლეთ-სამხრეთ უკრაინის და სირიის მოვლენებით გაგრძელდა, საქართველოს რთული არჩევანის წინაშე აყენებს: ის, ან უნდა დაუბრუნდეს აღმოსავლური ტირანიის, ავტორიტარიზმისა და სიღარიბის მოდელს, ან გახდეს დასავლური ცივლიზაციის ნაწილი _ გააგრძელოს ბრძოლა ძლიერი, ერთიანი, ევროპული საქართველოს მშენებლობისთვის.

ჩვენი ჯარისკაცები, რომლებიც ახლა NATO -ს წევრი და პარტნიორი ქვეყნების ჯარისკაცების მხარდამხარ დგანან, კვლავ თავიანთ მთავარ ამოცანას ასრულებენ _ იქაც საქართველოს მშვიდობას იცავენ. შორეულ ავღანეთში საფუძველი ეყრება ერთობას, რომელიც მომავალში ჩვენი უსაფრთხოების გარანტი იქნება და რაც ასე გვჭირდება. ჩვენი შეიარაღებული ძალების ქვედანაყოფები უნიკალურ საბრძოლო გამოცდილებას იღებენ, თუ როგორ უნდა აწარმოონ სამხედრო ოპერაციები ახალ რეალობასა და პირობებში. ჩვენი ოფიცრები და სერჟანტები იღრმავებენ ცოდნას იმ ურთულეს ოპერაციებში, რასაც ჰქვია არაკონვენციური ომის წარმოება. სადაც ხიშტების რაოდენობა და საცეცხლე ძალა კი არ წყვეტს ყველაფერს, არამედ, ბრძოლა ადგილობრივი მოსახლეობის „გულის და გონების“ მოსაგებად.

ქართველი ჯარისკაცი ამ ოპერაციებში მხოლოდ მეომარი არ არის. ის საქართველოს ელჩი და წარმომადგენელია. ქართველებმა არაერთხელ დაიმსახურეს მაღალი შეფასება პროფესიონალიზმისა და ეთიკური საქციელისთვის. მათ არა მხოლოდ ადგილობრივ მოსახლეობას დაანახვეს, ვინ არის ქართველი ჯარისკაცი, არამედ NATO -ს წევრ ქვეყნებსაც შეუქმნეს წარმოდგენა ჩვენი ჯარის და ქვეყნის შესახებ. NATO -ს ნებისმიერი დონის შეხვედრაზე ყველა აღიარებს, რომ საქართველო არის სანდო პარტნიორი, რომელზეც დაყრდნობა ნებისმიერი გამოწვევების დროს შეიძლება. ავღანეთის სამხედრო ოპერაციების ქარიშხალში იწვრთნება და იზრდება ქართული ჯარის ოფიცერთა და სერჟანტთა კორპუსის ახალი თაობა _ საქართველოს შეიარაღებული ძალების ხვალინდელი დღე. ქართველ ჯარისკაცებს ეს უნიკალური გამოცდილება მთელი სამხედრო კარიერის განმავლობაში გაჰყვება და სამშობლოს დაცვაში დაეხმარება.

ავღანეთის პროვინცია ჰელმანდში ყოფნის დროს, ქართულმა ქვედანაყოფებმა „თალიბებთან“ ბრძოლისას, კიდევ ერთხელ დაუმტკიცეს საკუთარ თავსა და მთელ მსოფლიოს, რა არის თავდადება და სიმამაცე. დაიმსახურეს ქება არა მხოლოდ კოალიციის წევრი პარტნიორებისგან, არამედ მტრისგანაც. რადიოგადაჭერების დროს ხშირად ისმოდა როგორ აფრთხილებდნენ „თალიბები“ ერთმანეთს „სადაც ქართველები დგანან, იმ ტერიტორიებს მოერიდეთ, იქ ვერ გახვალთ!“

ავღანეთში სამხედრო ოპერაციების დროს 31 ქართველი მეომარი დაიღუპა. ისინი იმ ქართველი გმირების განუყოფელ ნაწილად იქცნენ, რომლებიც შორეული დროიდან დღემდე იცავდნენ და ეწირებოდნენ საქართველოს თავისუფლებას. მათი გმირობა ტოლფასია ჩვენი იუნკრების გმირობისა, ვინც 1921 წელს კოჯორში თავი შესწირა საქართველოს დამოუკიდებლობისთვის ბრძოლას. საქართველოს დღევანდელმა შეიარაღებულმა ძალებმა წინაპრებისგან მიიღო ესტაფეტა, რათა შეინარჩუნოს და დაიცვას საქართველოს თავისუფლება და დამოუკიდებლობა.

ავტორი: პოლკოვნიკი, ნიკოლოზ ჯანჯღავა

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

კაპიტანი ეროვნული გვარდიიდან

-გენერალმა მოგიკითხათ.
-ძალიან დიდი მადლობა გადაეცით – მიპასუხა და კმაყოფილს ოდნავ გაეღიმა. შევატყვე, ძალიან გაუხარდა.

გვარდიის გენერალ ლევან გამყრელიძის მოკითხვა ბიჭებს მალევე გადასცა…

საქართველოს ეროვნული გვარდიის სწრაფი რეაგირების მეორე ოცეულის მეთაური 39 წლის კაპიტანი, თენგიზ თეთრაშვილია. დინჯი, გაწონასწორებული, მკაცრი გამომეტყველებითა და სპორტული აღნაგობით. მოხდენილად ატარებს სამხედრო ფორმას…

ისეთია, ჩვენში რომ იტყვიან, „ჯიგრიანი, „ჯიშიანი… მშვიდი და აუღელვებელი. იშვიათად და ძალიან ცოტას ლაპარაკობს. ენაწყლიანი თანამოსაუბრის შთაბეჭდილებას ნამდვილად არ ტოვებს, მაგრამ ნდობისა და კეთილგანწყობის მოპოვებას საუბრის პირველივე წუთიდან ახერხებს. ხვდები, რომ ზუსტად იცის, რა უნდა და რატომ.

ერთმანეთი ავღანეთში, „ბაგრამის“ სამხედრო ბაზაზე გავიცანით. თანამებრძოლ „გვარდიელებთან“ ერთად „სწრაფი რეაგირების ჯგუფშია. გვარდიელებს“ ბაგრამზე „გარე სწრაფებს“ ეძახიან. ბაზის პერიმეტრის უსაფრთხოებაზე აგებენ პასუხს და ამოცანას პირნათლად ასრულებენ. ამოცანა იოლი ნამდვილად არ არის. რამდენიმე კვირის წინ ჩვენი პარტნიორი ამერიკელი სამხედრო მოსამსახურეების სიცოცხლე იხსნეს.

ეს ინტერვიუ კი მორიგ დავალებაზე (შემოვლა, როგორც თავად ეძახიან) გასვლის წინ ჩავწერეთ. კაპიტან თენგიზ თეთრაშვილს ვთხოვე, რამდენიმე წუთი დაეთმო.

თენგიზ თეთრაშვილი: სკოლა სოფელ დიღომში დავამთავრე 1996 წელს, შემდეგ თსუ-ის იურიდიული ფაკულტეტი – 2001 წელს. სავალდებულო სამსახური საზღვრის დაცვის დეპარტამენტში გავიარე 1999 წელს – მოტოსამანევრო ქვედანაყოფში. ორი წელი, 2003-2005 შინაგანი ჯარების მთავარ სამმართველოში ვიმსახურე. მას შემდეგ საქართველოს შეიარაღებულ ძალებში ვმსახურობ… სხვადასხვა თანამდებობაზე… მყავს მშობლები, ერთი ძმა, მეუღლე და 7 წლის გოგო.“

სამხედრო სამსახური რატომ აირჩიე, წინაპირობები ჰქონდა ამ ნაბიჯს?

სამხედრო სავალდებულო სამსახურის გავლის შემდეგ მივხვდი, რომ გეგმა, რომელიც შეიარაღებულ ძალებში ჩემს დარჩენას არ ითვალისწინებდა, 180 გრადუსით უნდა შემომებრუნებინა. უკვე ვიცოდი, რომ მინდოდა ქვეყნისა და საკუთარი ხალხის სამსახური. გამიჭირდება ახსნა, რას განიცდი ამ დროს, მაგრამ დამიჯერეთ, „სავალდებულოს“ შემდეგ ეს ნაბიჯი არ გამჭირვებია… მშობლებმაც მხარი დაუჭირეს ჩემს გადაწყვეტილებას. დროც ისეთი იყო… შეიძლება სუბიექტური ვარ, მაგრამ ქვეყნის მოქალაქემ არ უნდა გამოტოვოს ეს ეტაპი, იმის მიუხედავად, დარჩება თუ არა სამხედრო სამსახურში… ბავშვობაში ჩემს წარმოდგენებში, ხშირად დამინახავს საკუთარი თავი სამხედრო ფორმაში, შემიძლია ვთქვა, რომ ეს იყო ოცნება, რომელიც ამისრულდა. ახლა საკუთარ თავზე ვმუშაობ, რომ ღირსეულად ვიარო ამ მეტად საპასუხისმგებლო გზაზე.

როგორ შეაფასეს შენი გადაწყვეტილება მეგობრებმა?

მეგობრების ნაწილი ჩემს ნაბიჯს დადებითად შეხვდა. რამდენიმეს ჰქონდა კითხვები, მაგრამ დღეს ყველა ხვდება ჩემი გადაწყვეტილების სიმტკიცეს… აქ ვიპოვე ჩემი თავი, აქ დავრწმუნდი ჩემს შესაძლებლობებში და მხოლოდ მე არა, ზოგადად, ჯარი არის ასეთი ადგილი…

გვარდიაში როგორ მოხვდი?

საქართველოს ეროვნულ გვარდიაში 2010 წლის დასაწყისიდან ვმსახურობ… 2011 წელს გამიშვეს (ეღიმება)… 2013 დავბრუნდი. უკვე სულ სხვა სიტუაცია დამხვდა გვარდიაში. დღეს თავს ჯარისკაცად ვგრძნობ… ზოგადად, ეროვნული გვარდიის ისტორია რად ღირს?! გზა საბჭოთა იმპერიიდან დამოუკიდებლობის მოპოვებამდე. თითქმის არ არსებობს კონფლიქტი, რომელმაც ეროვნული გვარდიის მონაწილეობის გარეშე ჩაიარა. ეროვნული გვარდიის ბრძოლების მატიანე არის მატიანე ქართული საზოგადოების მრავალი თაობის ძალიან ნათელი არჩევანისა _ დამოუკიდებელი, თავისუფალი, ევროპული საქართველოს სასარგებლოდ. ეს არის დიდი ისტორია, ერთი დიდი ოჯახი…

ავღანეთში როგორ მოხვდი?

ჩემი სურვილი და ხელმძღვანელობის გადაწყვეტილება დაემთხვა. აქ ერთ-ერთი სერიოზული მისიის შესრულება გვაქვს დავალებული. ჩვენი პარტნიორების _ ამერიკელების, ჩეხების თუ სხვა ქვედანაყოფების დახმარება, რომლებიც ბაზა `ბაგრამზე~ იმყოფებიან… დაჭრილების ევაკუაცია და სხვა ნებისმიერი სახის ჩართულობა, რომელიც სიცოცხლის გადარჩენას უკავშირდება.

შენს თანამებრძოლებზე მომიყევი…

რაც შეეხება ჩემს თანამებრძოლებს, ჩემი ოცეულის ჯარისკაცებს, ჩემს მეგობრებს, ესენი არიან ბიჭები, რომლებსაც ვეყრდნობი და ყოველთვის მექნება მათი იმედი ბრძოლის ველზე. მათ ჩემს სიცოცხლეს ვანდობ. ეს ბედნიერებაა ჯარისკაცისთვის… ყველამ ზედმიწევნით ზუსტად იცის საკუთარი საქმე. ღირსეული ჯარისკაცები არიან. ჯერ არ ყოფილა ამოცანა, ვერ შეესრულებინოთ ან შესრულებაზე უარი ეთქვათ. პირიქით, როდესაც ერთი ჯგუფი დავალების შესასრულებლადაა, `დამსვენებელი ჯგუფი~ ყოველთვის ითხოვს, რომ დასახმარებლად გაუშვან. აქ ბევრი რამ ვისწავლეთ, ერთმანეთი ხელახლა აღმოვაჩინეთ, ერთმანეთი შევიძინეთ. დავაგროვეთ დიდი გამოცდილება, რომელიც საჭიროების შემთხვევაში ჩვენს ქვეყანას უნდა მოვახმაროთ.

რა უხარიათ და რა სწყინთ ჯარისკაცებს ყველაზე მეტად და ადვილად?

რთული შეკითხვაა. არის ასეთი შეფასება „კარგი მებრძოლია. ჯარისკაცისთვის ეს, ალბათ, ყველაზე დიდი მოტივაციაა… ისე, ცოტა გვწყინს და ცოტა გვიხარია…

გსურს, რამე დაამატო იმ ყველაფერს, რაც უკვე გვითხარი?

ჩვენს დასაცავს, ჩვენს საომარს არავინ იომებს… ყველას ჩვენი წვლილი გვაქვს ქვეყნის დაცვის საქმეში.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ-ფოსტა: stratcom@mod.gov.ge;
ვებ-გვერდი: mod.gov.ge

თინათინ ხიდაშელი: „ვარშავიდან მეტ პოლიტიკურ მხარდაჭერას და თავდაცვისუნარიანობის მეტად გამყარებას ველოდებით“

თავდაცვის მინისტრმა საზოგადოებრივი მაუწყებლის ეთერში ვარშავის სამიტის მოლოდინებზე ისაუბრა. მისი თქმით საქართველო სამიტიდან არ ელოდება გაწევრიანების სამოქმედო გეგმას.

,,ველოდები, რომ ვარშავიდან საქართველოს თავდაცვისუნარიანობა უფრო ძლიერი პოზიციებით იქნეს გამყარებული, ვიდრე ეს არის ამ წუთის მდგომარეობით… ჩვენ გვექნება უფრო მეტი თავდაცვისუნარიანობის საშუალებები, ჩვენ გვექნება უფრო მეტი პოლიტიკური, მაგრამ არა მხოლოდ პოლიტიკური, არამედ პრაქტიკული მხარდაჭერაც და ამას ყველანი ძალიან კარგად ნახავთ, სულ რამდენიმე თვეში, იმ საერთაშორისო წვრთნების დროს, რომელიც საქართველოში გაიმართება’’, – აღნიშნა თინათინ ხიდაშელმა.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

ბათუმში ზღვამ მამაკაცის გვამი გამორიყა

ბათუმში, ჭოროხისა და ზღვის შესართავთან ზღვამ მამაკაცის გვამი გამორიყა. „ბათუმელების” ინფორმაციით, ეს ის მამაკაცია, რომელსაც 10 თებერვლიდან ეძებენ.

შს სამინისტროს ინფორმაციით, საქმე სისხლის სამართლის კოდექსის 115-ე მუხლითაა აღძრული, რაც თვითმკვლელობამდე მიყვანს გულისხმობს.

ბათუმში მამაკაცი მეოთხე სართულიდან გადმოხტა და დაიღუპა

14 თებერვალს, დილით, ბათუმში, 26 მაისის ქუჩაზე მდებარე სახლის მეოთხე სართულიდან 41 წლის მამაკაცი გადმოხტა და დაიღუპა. ადგილზე მისულ სასწრაფო სამედიცინო დახმარების ჯგუფს მამაკაცი უკვე გარდაცვლილი დახვდა.

ურეხში სოციალური სახლი აშენდება

სოციალური სახლის მშენებლობას ხელვაჩაურის მუნიციპალიტეტი ადგილობრივი ბიუჯეტიდან მაქსიმუმ 1 563 480 ლარით დააფინანსებს [2016 წელს – 700 000 ლარით და 2017 წელს – 863 480 ლარით].

მუნიციპალიტეტის მიერ სოციალური სახლის მშენებლობაზე გამოცხადებულ ტენდერში წინადადებების მიღება 2016 წლის 10 მარტს დაიწყება და 15 მარტს დამთავრდება. სახლი ბათუმში, ურეხის დასახლებაში აშენდება.

სატენდერო დოკუმენტაციის მიხედვით, მშენებლობა უნდა დაიწყოს ხელშეკრულების გაფორმებიდან არაუმეტეს 10 კალენდარული დღის ვადაში და დასრულდეს ხელშეკრულების გაფორმებიდან 16 თვეში.

განსაზღვრულია გაწეულ სამუშაოებზე საგარანტიო ვადებიც: სახურავზე – 15 წელი, კარ-ფანჯრებზე – 5 წელი, ელექტროგაყვანილობაზე – 3 წელი, წყლისა და საკანალიზაციო მილებზე – 10 წელი, გათბობის ქვაბზე – 4 წელი, გათბობის მილებზე – 10 წელი, გათბობის რადიატორებზე – 10 წელი.

როგორ მოწმდება წამლის ხარისხი

წამლის ხარისხის კონტროლი მკაცრდება – განაცხადა 2016 წლის დასაწყისში საქართველოს ჯანდაცვის მინისტრმა. როგორ იცვლება კონტროლის მექანიზმი მაშინ, როცა სამკურნალო საშუალებების ხარისხის სახელმწიფო კონტროლის უზრუნველყოფის პროგრამის ბიუჯეტი უცვლელია და პროგრამის ფარგლებში 600-ზე მეტი დასახელების მედიკამენტის შესასყიდად 10 000 ლარია გათვალისწინებული, ხოლო ლაბორატორიულად შესამოწმებლად – 80 ათასი ლარი? საკმარისია თუ არა მედიკამენტების ხარისხის კონტროლის არსებული სახელმწიფო მექანიზმები?

ფარმაცევტულ ბაზარზე წამლების ხარისხის კონტროლზე პასუხისმგებელი ჯანდაცვის სამინისტროა, უფრო კონკრეტულად – სამინისტროს დაქვემდებარებაში მყოფი სამედიცინო საქმიანობის სახელმწიფო რეგულირების სააგენტო. სააგენტოს ფარმაცევტული საქმიანობის დეპარტამენტის რეგისტრაციის სამმართველოს ხელმძღვანელი, ნაილი შენგელიძე განმარტავს, რომ სააგენტო ახორციელებს ლაბორატორიულ კონტროლსა და სადისტრიბუციო ჯაჭვის ადმინისტრაციულ კონტროლს, კერძოდ: „ლევან სამხარაულის სახელობის ექსპერტიზის ეროვნულ ბიუროსთან გვაქვს გაფორმებული ხელშეკრულება, სადაც ხდება შესყიდული ნიმუშების სრული ლაბორატორიული ტესტირება და ვიღებთ დასკვნას – რამდენად შეესაბამება კონკრეტული წამლის ნიმუში განსაზღვრულ კრიტერიუმებს.

გარდა ამისა, არის ადმინისტრაციული კონტროლის მექანიზმი. შევისყიდით მედიკამენტებს, შევისწავლით, როგორია შეფუთვა-მარკირება, თვითონ პრეპარატის მახასიათებლები: რა ფერისაა ტაბლეტი, როგორია დიამეტრი და ა.შ. იმ შემთხვევაში, თუ რაღაც ეჭვი არსებობს და ვიზუალურად ჩანს პრობლემა, ნიმუშს ვაგზავნით ლაბორატორიაში”.

კონკრეტულად როგორ გამკაცრდება წამლების ხარისხის კონტროლი, ამის შესახებ განმარტება საქართველოს ჯანდაცვის მინისტრმა, დავით სერგეენკომ თავად გააკეთა 2016 წლის დასაწყისში. მინისტრის განცხადებით, პროგრამაში შედის ცვლილება, რომელიც გაზრდის სამკურნალო საშუალებების ხარისხის კონტროლს: „კერძოდ, ის ითვალისწინებს არა მარტო ადგილობრივ, არამედ საერთაშორისო, ამ საკითხში აკრედიტებულ ლაბორატორიაში ხარისხის გადამოწმებას. …თუკი აქამდე ხორციელდებოდა მხოლოდ საწარმოდან გამოშვებული და ექსპორტით შემოტანილი მედიკამენტების ერთჯერადი კონტროლი, ამჯერად ეს იქნება მთელი ჯაჭვი, რომელიც მოიცავს იმ ნედლეულის სერტიფიცირების შემოწმებას, რომელიც შედის საწარმოში და შემდგომ მედიკამენტად გადაიქცევა. თუკი აქამდე ხარისხის კონტროლი ხორციელდებოდა არჩევითად ადგილობრივ სამხარაულის სახელობის ლაბორატორიაში, რომელიც ამაში არ არის საერთაშორისო აკრედიტაციის მფლობელი, წელს დაემატება მედიკამენტების ხარისხის საერთაშორისო ევროპულ ლაბორატორიებში გადამოწმება“.

საქართველოს ფარმაცევტულ ბაზარზე 10 000-მდე მედიკამენტია რეგისტრირებული. სამკურნალო საშუალება ყოველ ხუთ წელიწადში ერთხელ გადის რეგისტრაციას. სახელმწიფო პროგრამა, რომლის მიზანი ფარმაცევტული ბაზრის დაცვაა ფალსიფიცირებული, წუნდებული, უვარგისი, ვადაგასული და საქართველოს ბაზარზე დაშვების უფლების არმქონე სამკურნალო საშუალებისაგან, 2009 წლიდან მოყოლებული 100 000 ლარით ფინანსდება. აქედან სამკურნალო საშუალებების ხარისხის ლაბორატორიულ კვლევაზე წელს 80 000, სამკურნალო საშუალებების შესყიდვაზე კი – 10 000 ლარი დაიხარჯება.

პროგრამის ბიუჯეტი არც წელს გაზრდილა. როგორ შეძლებს სახელმწიფო არსებული ბიუჯეტით წამლების ხარისხის შემოწმებას ევროპულ ლაბორატორიებში? „ბათუმელების“ შეკითხვაზე საქართველოს ჯანდაცვის მინისტრის მოადგილე ვალერი კვარაცხელია პასუხობს, რომ თანხა გაიზრდება.

„თამასა უფრო მაღლა ავწიეთ და ვთქვით, რომ ჩვენ გვჭირდება საერთაშორისო სერტიფიკატის, ჯანმო-ს მიერ ლიზენცირებული ლაბორატორია, სადაც მოხდება შერჩეული მედიკამენტების შემოწმება. საქართველოში ჯანმოს ლიზენცია არც ერთ ლაბორატორიას არ აქვს, ამიტომ ჩვენ ზოგ შემთხვევაში მოგვიწევს საზღვარგარეთ გაგზავნა მედიკამენტების. ბიუჯეტი ჯერ არ შეცვლილა, მაგრამ ამისთვის თანხა გამოიყოფა, რადგან 100 00 ლარი საკმარისი აღარ იქნება“, – აღნიშნა ვალერი კვარაცხელიამ.

გასულ წელს სააგენტოს ფარმაცევტული საქმიანობის დეპარტამენტის ინსპექტირების სამმართველომ 600-ზე მეტი დასახელების მედიკამენტი შეამოწმა. მათგან სამხარაულის ექსპერტიზის ბიურომ ლაბორატორიულად შეამოწმა 224 დასახელების შესყიდული ნიმუში და 29 დასახელების რეგისტრაციის პროცესში მყოფი ფარმაცევტული პროდუქტი. სამმართველოს უფროსის, ნანა შაშიაშვილის განმარტებით, 9 დასახელების ფარმაცევტულ პროდუქტს მოთხოვნებთან შეუსაბამობის გამო უარი ეთქვა ბაზარზე დაშვებაზე: „მათი შერჩევა და ლაბორატორიაში შემოწმება რეგისტრაციის პროცესშივე მოხდა. რაც შეეხება შეძენილ სამკურნალო საშუალებებს, ორი დასახელების ფარმაცევტული პროდუქტის ანალიზმა აჩვენა, რომ ისინი არ აკმაყოფილებენ სააგენტოს მიერ რეგისტრაციის პროცესში განხილულ და შეფასებულ ხარისხის სტანდარტებსა და სპეციფიკაციის მოთხოვნებს; ერთ შემთხვევაში ლაბორატორიული დასკვნის საფუძველზე რეგისტრაცია შეუჩერდა ერთ ფარმაცევტულ პროდუქტს – ამოღებულ იქნა ბაზრიდან. ვიზუალური შემოწმება გაიარა 628 დასახელების ფარმაცევტულმა პროდუქტმა, მათგან 67 შემთხვევაში დაფიქსირდა, რომ პროდუქტების შეფუთვა-მარკირება არ შეესაბამებოდა სახელმწიფო ნიმუშების შეფუთვა-მარკირებას, პროდუქტი არ იქნა დაშვებული ბაზარზე. ფალსიფიკაციის შემთხვევა არ დაფიქსირებულა“.

როგორ წყვეტს ინსპექტირების სამმართველო, რომელი მედიკამენტები შეისყიდოს შესამოწმებლად? ნანა შაშიაშვილი განმარტავს, რომ ძირითადი აქცენტი ამ შემთხვევაში არის GMP-ის საერთაშორისო სტანდარტის არმქონე ქვეყნებში არსებული წარმოებების მიერ დამზადებულ ან ადგილობრივი წარმოების ფარმაცევტულ პროდუქტზე. „ასევე, როცა ჩნდება ეჭვი ხარისხთან მიმართებაში ვიზუალური კონტროლის შედეგად. ჩვენთვის მნიშვნელოვანია ის ინფორმაციაც, რომელსაც ვიღებთ სხვადასხვა საერთაშორისო ორგანიზაციიდან და მოქალაქეებიდან, შეტყობინების სახით“, – ამბობს ნანა შაშიაშვილი.

საკმარისია თუ არა წამლების ხარისხის გასაკონტროლებლად არსებული სახელმწიფო მექანიზმი? სერგო ჩიხლაძე, ჯანდაცვის პოლიტიკისა და მართვის სპეციალისტი ამბობს, რომ – არა.

„რასაკვირველია არ არის საკმარისი, განსაკუთრებით ახლა, როცა ბაზარზე შემოვიდა გენერიკული წამლები. მე მივესალმები გენერიკების შემოსვლას, რადგან ეს ხელმისაწვდომია მოსახლეობისთვის, მაგრამ მეორე მხრივ, ხელმისაწვდომი უნდა იყოს ხარისხიანი წამალი. გენერიკებს კი სჭირდება განსაკუთრებული კონტროლი.

სამინისტროს ინიციატივა წამლებზე კონტროლის გამკაცრებაზე მისასალმებელია, მაგრამ არ ვიცი ეს რამდენად მივა ბოლომდე და არ მივიღებთ მხოლოდ მორიგ პოპულისტურ გაცხადებას. წამლების ევროპულ ლაბორატორიებზეა საუბარი. ეს რომ გაკეთდეს ისე, როგორც საჭიროა, საკმაოდ დიდ თანხასთანაა დაკავშირებული“, – ამბობს სერგო ჩიხლაძე.

წამლების ხარისხის კონტროლის გამკაცრებაზე ხარჯის გაწევა სახელმწიფოს მოუწევს. მაგრამ სერგო ჩიხლაძის თქმით, არსებობს რისკი, რომ ფარმაცევტული კომპანიები ისარგებლებენ კონტროლის გამკაცრებით და წამლებზე ფასს გაზრდიან:

„შემოწმებამ შეიძლება გამოავლინოს ხარვეზები, ან წამლები აკრძალოს ბაზარზე, საჭირო გახდება სხვა წამლების შემოტანა. ამ პერიოდში მწარმოებელსა თუ შემომტანს შეიძლება ჰქონდეს წამლის გაძვირების მცდელობა. ამიტომაც ძალიან მკაცრად გასაკონტროლებელი იქნება, ეს ტვირთი ირიბად რომ არ დააწვეს მოსახლეობას, რომლის ჯანდაცვის დანახარჯის 60 პროცენტი ისეც წამლებზე მოდის.“

ქვეყანაში წამლისა და ფარმაციის მიმართ დამოკიდებულება შეიცვალოს – მიიჩნევს ალიოშა ბაკურიძე, საქართველოს ფარმაცევტთა ასოციაციის პრეზიდენტი, თბილისის სახელმწიფო სამედიცინო უნივერსიტეტის პროფესორი: „ჩვენ ვერ უარვყოფთ, რომ წამალი კომერციული პროდუქციაა, მაგრამ იგი პირველ რიგში უნდა განვიხილოთ, როგორც სასიცოცხლოდ აუცილებელი პროდუქტი, ამიტომ მასთან დაკავშირებული ნებისმიერი ქმედება უნდა იყოს დარეგულირებული შესაბამისად. ჩვენ ქვეყანაში უნდა ჩამოყალიბდეს წამლის ხარისხის უზრუნველყოფის სისტემა. წამლის ქსელიდან ამოღება და შემოწმება აუცილებელია, მაგრამ ამით წამლის ხარისხი ვერ გაუმჯობესდება. ასე მხოლოდ დასკვნა, ანგარიში შედგება და მეტი არაფერი. ფალსიფიცირებისგან რომ დავიცვათ თავი, ორი რამ უნდა გაკეთდეს ქვეყანაში: უნდა დარეგულირდეს წამლის პრემარკეტ კონტროლი, რომელიც მოიცავს რეგისტრაციის რეჟიმს და ნებართვების გაცემას საქმიანობაზე და მეორე – პოსტმარკეტ კონტროლი. დღეს ჩვენს ქვეყანაში 4000-ზე მეტი აფთიაქია, მარეგულირებელში დასაქმებულთა რაოდენობა კი, სამწუხაროდ -ცოტა.“

ფეხით მოსიარულის ჩანაწერები

გიორგი კალანდაძე

მანქანა არ მყავს და ბათუმში გადაადგილება ძირითადად ფეხით მიწევს. ფეხით სიარული კი მიყვარს, მაგრამ ბათუმში ეს გარკვეულ პრობლემებთანაა დაკავშირებული. ქალაქის ცენტრს გასცდები თუ არა, გგონია, რომ სხვა ქალაქში მოხვდი, სადაც წვიმიან ამინდში ქუჩაში მუხლებამდე წყალი შეიძლება იდგეს და ტალახით სავსე გუბეებზე დაგჭირდეს ხტუნვა, მშრალ ამინდში კი – მტვრიანი ჰაერის სუნთქვა. ქალაქის ცენტრს მიღმა ბევრი დაწესებულებაა, სადაც როგორმე კი მიაღწევ, მაგრამ კოჭებამდე ტალახში ამოსვრილი შეაღებ კარს.

ხან ისეთი შთაბეჭდილება გვრჩება ბათუმელებს, რომ ტურისტული ქალაქი მთავრდება ცენტრში, არადა, ბათუმი ხომ ცენტრში მდებარე რამდენიმე ქუჩა არ არის მხოლოდ, ქალაქია გარეუბნებიც და იქ სიარულისას არ უნდა გეგონოს, რომ სოფლის ორღობეში ხარ, სადაც არასდროს ყოფილა დაგებული არც ასფალტის საფარი და არც ფილები.

თუმცა პრობლემები მხოლოდ ქალაქის გარეუბნებში არ არის. დღეს ქალაქის ცენტრშიც კი უამრავი პრობლემაა, რაც, ძირითადად, მოუწესრიგებელ გზას და საგზაო მოძრაობას უკავშირდება. ვერაფრით დავიხსომეთ ქალაქში წითელი ბილიკებისა და ტროტუარების დანიშნულება, რომელიც ველოსიპედისტებისა და ფეხით მოსიარულეებისთვისაა განკუთვნილი, თუმცა მანქანებითაა ჩახერგილი.

ცალკე საკითხია „ზებრები“, რომლებიც ფეხით მოსიარულეებისთვისაა განკუთვნილი. სხვათა შორის, ვფიქრობ, რომ ბოლო პერიოდში მძღოლებმა მეტ-ნაკლებად ისწავლეს გზის დათმობა ქვეითის გადასასვლელებზე, მაგრამ მძღოლების დიდი ნაწილი მაინც არასწორად იქცევა. შუქნიშანზე, როცა შენი გზა არის და მწვანე შუქი გაქვს, გვერდით ქუჩებიდან შემოსული მანქანები არც კი ანელებენ სიჩქარეს, ისე გადაგიჭრიან გზას. ძალიან ვბრაზდები ამაზე, ბევრჯერ მიფიქრია საპატრულო პოლიციაში დარეკვაზე, აქამდე თავს ვიკავებდი, მაგრამ, როგორც ჩანს, ეს არასწორია, მეტი მოქალაქეობრივი თვითშეგნებაა საჭირო.
ჯარიმების გამკაცრებასაც ვემხრობი, დარწმუნებული ვარ, ამას ექნება ეფექტი. ასევე, ვფიქრობ, კარგი იქნება მეტი ე.წ. „მწოლიარე პოლიციელი” თუ იქნება ქალაქის გზებზე, რადგან ზოგიერთი მძღოლი არანორმალური სისწრაფით მოძრაობს.

მერია ამბობს, რომ გარეუბნებში გზები კეთდება და ამიტომაცაა გადათხრილი. კი, ჩანს, რომ სამუშაო პროცესები მიდის, მაგრამ აქვე ჩნდება სხვა კითხვა: რამდენად სწორად მიდის ეს სამუშაოები, რამდენად იცის ამ ხალხმა რას აკეთებენ?! როცა 5-მეტრიანი მონაკვეთის შესაკეთებლად ორი თვე გადათხრილი იქნება ქუჩა, ნებისმიერ მოქალაქეს გაუჩნდება ეს კითხვა. ჩემი აზრით, არ ხდება საჭირო კონტროლი და მონიტორინგი იმ სამსახურების, ვინც ამას აკეთებს, ამიტომ ვფიქრობ, ცოტა სხვანაირი, უფრო აქტიური მიდგომაა საჭირო ამ საკითხისადმი.

ქუჩას სჭირდება მოვლა და თუ გვაქვს ამბიცია, რომ ტურისტული ქალაქი ვიყოთ, ამაზე უნდა ვიზრუნოთ.

“ყველაფერი კონტრაქტორების ბრალია” – მაღალბიუჯეტიანი დაკვეთები ტენდერის გარეშე

ისინი აღებულ ვადებულებებს დროულად ვერ ასრულებენ. ხშირად გამოცხადებულ ტენდერებში მონაწილეობას არ იღებენ, რის გამოც ყოველი წლის ყოველი კვარტალის ბიუჯეტი ირღვევა. ამის გამო მთავრობა „იძულებულია“ კონკურენციის პრინციპი დაარღვიოს და პოტენციურ შემსრულებლებს `გამარტივებული შესყიდვა~ გაუფორმოს. შედეგად მაღალბიუჯეტიან დაკვეთებს ხშირად ახალდაფუძნებული კომპანიები, მთავრობის ხელმძღვანელი პირების მეზობლები ან მათთან დაახლოებული პირები იღებენ. მთავრობაში განმარტავენ, რომ ამაში უხერხული და მითუმეტეს საეჭვო, არაფერია.

გასულ წელს ქობულეთის მუნიციპალიტეტის გამგეობამ „სოფლის მხარდაჭერის პროგრამის“ ფარგლებში მილიონამდე ლარის სამუშაოები, გამარტივებული შესყიდვის წესით, ახალდაფუძნებულ კომპანიას, შპს „ბელუს“ დაუკვეთა. შესყიდვის ამ ფორმის გამოყენებას, როცა ღირებულება 5000 ლარს აჭარბებს, კანონმდებლობა ფოსმაჟორულ სიტუაციაში ან მთავრობის შესაბამისი ნებართვის არსებობის შემთხვევაში ითვალისწინებს. სხვა შემთხვევაში ელექტრონული ტენდერი უნდა გამოცხადდეს. გამარტივებული შესყიდვა ბაზარზე კონკურენციას, ასევე ბიუჯეტში ეკონომიის გაკეთების შესაძლებლობას გამორიცხავს. რაც ზემოთ აღნიშნული სამუშაოს ტენდერით შესყიდვის შემთხვევაში იქნებოდა შესაძლებელი. შესყიდვა ქობულეთის სოფლების შიდა გზებზე ბეტონის საფარის მოწყობის სამუშაოებს ითვალისწინებდა.

შპს „ბელუ“ 2014 წლის მარტში ქობულეთში მხოვრებმა გიგა ცინცაბაძემ დააფუძნა. 2014 წლის ბოლოს ქობულეთის გამგეობამ ახალდაფუძნებულ კომპანიას ნახევარი მილიონი ლარის ღირებულების სამუშაოები ანდო. გასული წლის ბოლოს კი ამ კომპანიამ ქობულეთის მუნიციპალიტეტის გამგეობისგან კიდევ ორი, ჯამში მილიონამდე ლარის ღირებულების დაკვეთა მიიღო.
როგორ მოახერხა გამოუცდელმა კომპანიამ გამგეობის ნდობის მოპოვება? – კითხვაზე შპს „`ბელუს“ წარმომადგენელი ელგუჯა ცინცაბაძე პასუხობს: „ადრე სხვა კომპანია გვქონდა. შესაბამისი ტექნიკაც გვაქვს და გამოცდილებაც“. „ბათუმელების“ ინფორმაციით კი, ამ კომპანიის ფინანსური მენეჯერი ქობულეთის გამგებლის მოადგილის, ირაკლი ცეცხლაძის ძმა – ბესო ცეცხლაძეა.

ირაკლი ცეცხლაძე განმარტავს, რომ მისი ძმა აუდიტორია და, შესაბამისად, შპს `ბელუს~ მსგავსად შეხება თხუთმეტამდე კომპანიასთან აქვს.

კომპანიასა და დამკვეთს შორის გაფორმებულ ერთ-ერთ ხელშეკრულებაში (2015 წლის 15 აგვისტო) დამკვეთი შესყიდვის ამ ფორმის გამოყენების საფუძვლად `სოფლის მხარდაჭერის სახელმწიფო პროგრამის~ ფარგლებში მთავრობის 2015 წლის 19 თებერვლის #67 და 2015 წლის 3 აპრილის #151 დადგენილებებს ასახელებს. პირველი დადგენილება, რომლითაც გამგეობამ შესყიდვის გამარტივებული წესით განხორციელება ახსნა „სახელმწიფოებრივი და საზოგადოებრივი მნიშვნელობის ღონისძიების შეზღუდულ ვადებში შეუფერხებლად ჩატარების მიზნით“, მუნიციპალიტეტს უფლებამოსილებას ანიჭებს სამუშაოების, საქონლისა და მომსახურების სახელმწიფო შესყიდვა გამარტივებული შესყიდვის საშუალებით განახორციელოს და იქვე განმარტავს, რომ შესყიდვა „პროგრამით დადგენილი მოთხოვნების გათვალისწინებითა და საქართველოს კანონმდებლობით დადგენილი წესით“ უნდა განხორციელდეს.

ამ დადგენილებით ყოფილმა პრემიერმა დაუშვა შესაძლებლობა, რომ სახელმწიფო პროგრამას, რომელიც უკვე ათი წელია ხორციელდება და წლის ბოლოს მომავალი წლის ბიუჯეტში პროგრამისთვის გათვალისწინებული თანხა მტკიცდება, შეიძლებოდა ეფექტურად განხორციელების თვალსაზრისით პრობლემები შექმნოდა და დაქვემდებარებულ უწყებებს ამ თანხის გამარტივებული წესით დახარჯვის უფლება მისცა.

იმავე დადგენილებაში, რომლითაც მუნიციპალიტეტმა ისარგებლა, ნათქვამია, რომ „…თუ პროექტის განსახორციელებლად სამუშაოების, საქონლისა და მომსახურების სახელმწიფო შესყიდვის ღირებულება აღემატება 50 000 (ორმოცდაათი ათასი) ლარს, მუნიციპალიტეტი უფლებამოსილია, სახელმწიფო შესყიდვა განახორციელოს გამარტივებული ელექტრონული ტენდერის მეშვეობით.“

გამარტივებული ელეტრონული ტენდერი ისე არ არღვევს კონკურენტული გარემოს შექმნის პრინციპს, როგორც გამარტივებული შესყიდვა. მართალია, ასეთ შემთხვევაში ტენდერი მალე უნდა დასრულდეს, მაგრამ მასში მონაწილეობა ყველა მსურველს შეუძლია. ამ შემთხვევაში ქობულეთის გამგეობამ აჭარის მთავრობის თავჯდომარის ნებართვა გამოიყენა. კანონმდებლობა ავტონომიური რესპუბლიკის თავმჯდომარეს უფლებამოსილებას ანიჭებს, მუნიციპალიტეტს გამარტივებულ შესყიდვაზე თანხმობა მისცეს, თუ თხოვნა დასაბუთებულია. დასაბუთებაში, როგორც წესი, უმეტესად სამუშაოების ეფექტურად განხორციელებაზე წერია.

2015 წლის ოქტომბერში სტიქიის შედეგად ქობულეთის ნაპირსამაგრი საფეხურებიანი ჯებირი დაზიანდა. ამ კედლის აღდგენითი სამუშაოები ქობულეთის გამგეობამ 2015 წლის ივლისში შეისყიდა. მიუხედავად იმისა, რომ დაზიანებული კედლის აღსადგენად სამუშაოები მისი დაზიანებიდან ხუთი თვის შემდეგ დაგეგმეს, გამგეობამ გამარტივებული (სამდღიანი) ელექტრონული ტენდერიც კი არ გამოაცხადა და ლოგიკით – „ეს სტიქიას უკავშირდებოდა და უფლება გვქონდა“ პირდაპირი შესყიდვის ფორმა გამოიყენა. სამუშაოები შპს „შარა-გზამშენსაც“ დაუკვეთეს.

ქობულეთის ნაპირდამცავი საფეხურებიანი კედლის აღსადგენად ნახევარმილიონიანი კონტრაქტი `შარა-გზამშენმა~ მიიღო. ქობულეთის მუნიციპალიტეტის ოფიციალურ ვებგვერდზე გამოქვეყნებულ ინფორმაციაში წერია, რომ `შარა-გზამშენი~ კონკურსით შეარჩიეს. ქობულეთის გამგეობის შესყიდვების განყოფილების უფროსის დავით ვერულიძის განმარტებით, ეს იმას ნიშნავს, რომ გამგეობამ კონკურსის შესახებ განცხადება გამოაქვეყნა და კომპანიებმა წინადადებები წარადგინეს. რატომ კონკურსი და არა თუნდაც გამარტივებული ელექტრონული შესყიდვა, რომელიც მხოლოდ სამდღიან ვადას ითვალისწინებს? – ამომწურავი პასუხი ვერც ამ კითხვაზე მივიღეთ.

„შარა-გზამშენი“ 2005 წელს დაფუძნებული კომპანიაა და მას გივი შენგელია ფლობს.

შედარებით დაბალბიუჯეტიანი, პირდაპირი დაკვეთა ქობულეთის გამგეობისგან ორჯერ მიიღო შპს „ზომა“-მაც. ამ კომპანიასაც ქობულეთში მცხოვრები ოთარ ზოიძე ფლობს.

ხელვაჩაურის მუნიციპალიტეტის გამარტივებული შესყიდვები

ბოლო წლებში ყველაზე მაღალბიუჯეტიანი დაკვეთა ხელვაჩაურის გამგეობამ კომპანიებს – შპს „აჭარელს“ და შპს „იმპულსი და ინდივიდს“ გაუფორმა. ორივე კომპანიას გამგეობისთვის სოფლის მხარდაჭერის პროგრამის ფარგლებში სოფლის გზების შესაკეთებლად საჭირო მზა ბეტონი უნდა მიეწოდებინა.

შპს `აჭარელს~ 2014 წელს პირდაპირი წესით ორ მილიონზე მეტი ლარის, ხოლო შპს „იმპულსი და ინდივიდს“ მილიონზე მეტი ლარის სამუშაოები დაუკვეთეს.

შპს „აჭარელი“ 2013 წელს დაფუძნებული კომპანიაა და ურეხის დასახლებაში მცხოვრებ ზაზა ძნელაძეს ეკუთვნის. კომპანიასაც თავად ხელმძღვანელობს.

„ბათუმელების“ წყაროს ინფორმაციით, ზაზა ძნელაძე გამგებლის ნათესავია, ხოლო შპს „იმპულსი და ინდივიდის“ მფლობელი გია ჯაშიტაშვილი – გამგებლის მეგობარი.

საჯარო რეესტრში მითითებულ ტელეფონის ნომერზე პასუხობენ, რომ ეს არ არის ზაზა ძნელაძის მობილური. კომპანიას არც ვებგვერდი აქვს და არც ფეისბუქგვერდი. შესაბამისად, „ბათუმელებმა“ „აჭარელთან“ დაკავშირება ვერ მოახერხა. `ბათუმელები~ ვერც გია ჯაშიტაშვილს დაუკავშირდა.

თავად ხელვაჩაურის გამგებელი ამ ინფორმაციას უარყოფს. „ეს სიცრუეა, თანაც ჩვენ კომპანიები კონკურსით ავარჩიეთ და ვინც ყველაზე დაბალი ფასი დააფიქსირა, მას გავუფორმეთ ხელშეკრულება. გარდა ამისა, მინდა გითხრათ, რომ სოფლის მხარდაჭერის პროგრამა ტენდერს არ ითვალისწინებს“, – ამბობს ნადიმ ვარშანიძე.

ბათუმის მერიის პირდაპირი შესყიდვები

მიუხედავად იმისა, რომ რეკლამის ფესტივალის მსგავსი ტიპის ღონისძიებებს უწყება რამდენიმე თვით ადრე ან ბიუჯეტის დაგეგმვასთან ერთად გეგმავს, ბათუმის მერიამ რეკლამის ფესტივალისთვის საჭირო მომსახურების შესყიდვის მიზნით მაინც გამარტივებული შესყიდვის ფორმა გამოიყენა და აჭარის მთავრობის თავმჯდომარის თანხმობაც მიიღო. სარეკლამო ფესტივალისთვის ბიუჯეტიდან 211 000 ლარი დაიხარჯა. კომპანია „ედ ბლექ სი“ კი, რომელსაც სარეკლამო ფესტივალის ანდეს 2015 წლის 12 თებერვალს დააფუძნეს, 2015 წლის სექტემბერში კი კომპანიამ მერიისგან დაკვეთა მიიღო.

კომპანიის 50%-ს ვახტანგ ქავთარაძე, ხოლო დარჩენილ წილებს უკრაინის მოქალაქე მაქსიმ ლაზებნიკი ფლობს. რატომ გამარტივებული შესყიდვით და არა ტენდერით ან კონკურსით? – ეს კითხვა ფესტივალთან მიმართებაში ბევრჯერ დასვეს, თუმცა ამ კითხვაზე ბათუმის მერიისგან არგუმენტირებული პასუხი საზოგადოებას არ მიუღია.

2014 წელს ყველაზე მაღალბიუჯეტიანი პირდაპირი დაკვეთა ბათუმის მერიისგან მუნიციპალურმა ორგანიზაციამ შპს `ბათუმის ავტოტრანსპორტმა~ მიიღო. მგზავრთა იმ კატეგორიის მომსახურებისთვის, რომელთა მგზავრობის საფასურის სუბსიდირებასაც მერია ბიუჯეტიდან ფარავს, „ბათუმის ავტოტრანსპორტს“ ხელშეკრულება მილიონ 200 000 ლარზე, შემდეგ კი დამატებით 300 000 ლარზე ერგო.

საქართველოს შესყიდვების სააგენტოში პირ¬დაპირი შესყიდვის პრაქტიკის შესაცვლელად გამოსავალს ეძებენ, მაგალითად, სააგენტოს ხელმძვანელმა გასული წლის ბოლოს გამოსცა ნორმატიული აქტი (#9) და მოითხოვა, რომ გამარტივებული შესყიდვა, თუნდაც მთავრობის ნებართვით, სააგენტოს შეათანხმონ.

შსს: იანვარში 3183 დანაშაულია რეგისტრირებული

შს სამინისტროს ინფორმაციით, 2016 წლის იანვრის თვეში საქართველოს ყველა საგამოძიებო უწყების მიერ რეგისტრირებულ იქნა 3183 დანაშაული, რომელთაგან გაიხსნა 1211 დანაშაული. დანაშაულის გახსნის პროცენტია 38.05%. ხოლო წინა წლის ანალოგიურ საანგარიშო პერიოდთან შედარებით დანაშაულის პროცენტული მატებაა +3.95%.

საქართველოდ ყველა საგამოძიებო უწყება (2016 წლის იანვარი)

შსს-ს განმარტებით, „საქართველოს ყველა საგამოძიებო უწყება მოიცავს საქართველოში არსებულ იმ სამინისტროების სტრუქტურაში შემავალ დანაყოფებს, რომლებიც თავიანთი ქვემდებარეობის მიხედვით აწარმოებენ გამოძიებას სისხლის სამართლის საქმეებზე, კერძოდ: საქართველოს მთავარი პროკურატურა, იუსტიციის სამინისტრო, თავდაცვის სამინისტრო, სასჯელაღსრულებისა და პრობაციის სამინისტრო, ფინანსთა სამინისტრო, სახელმწიფო უსაფრთხოების სამსახური, შინაგან საქმეთა სამინისტრო“.

შსს ტერიტორიული დანაყოფების საგამოძიებო ქვემდებარეობის მიხედვით (2016 წლის იანვარი)

„2016 წლის იანვრის თვეში შსს–ს ტერიტორიული დანაყოფების საგამოძიებო ქვემდებარეობის მიხედვით რეგისტრირებულ იქნა 2125 დანაშაული, რომელთაგან გაიხსნა 1103 დანაშაული. დანაშაულის გახსნის პროცენტია 51.91%. ხოლო წინა წლის ანალოგიურ საანგარიშო პერიოდთან შედარებით დანაშაულის პროცენტული მატებაა +1.87%.“ – აღნიშნულია შსს-ს განცხადებაში

დისკუსია ტოლერანტობაზე სოფელ დოლოგანში

13 თებერვალს, ქედის მუნიციპალიტეტის დოლოგანის საჯარო სკოლაში გაიმართა დისკუსია თემაზე – „ტოლერანტობა“. დისკუსიაზე მოხსენება გააკეთეს შოთა რუსთაველის სახელმწიფო უნივერსიტეტის სტუდენტებმა: თეკლა შერვაშიძემ და ნიკა სვანიძემ.

დისკუსია გაიმართა “თავისუფალ ჟურნალისტთა სახლის” ორგანიზებით პროექტის – “ახალგაზრდებში დემოკრატიული იდეების პოპულარიზაცია” – ფარგლებში, დემოკრატიის მხარდამჭერი ნაციონალური ფონდის (NED) დაფინანსებით.

„დაკარგული სიყმაწვილე“ – ფოტოგამოფენა ბათუმში

14-15 წლის პატარძლები და მათი მოსწავლე მეგობრები, გარემო, სადაც ადრეულ ასაკში ქორწინება ხშირად ტრადიციად მიიჩნევა, არასრულწლოვანი გოგონების ქორწილის დღის ამსახველი ფოტოები და პეიზაჟები – ამ ყველაფრის ნახვა ბათუმში, თანამედროვე ხელოვნების სივრცეში შეგიძლიათ. „დაკარგული სიყმაწვილე“ – ასე ეწოდება ფოტოგრაფ დარო სულაკაურის ფოტოპროექტს, რომლის გამოფენაც დღეს, 13 თებერვალს გაიხსნა.

მიზეზი, რატომაც დარო სულაკაურმა ამ ფოტოპროექტზე მუშაობა დაიწყო, საქართველოში ნაადრევი ქორწინების მაღალი მაჩვენებელია.

ფოტოები ძირითადად აჭარასა და კახეთშია გადაღებული. დარო ფოტოპროექტისთვის ორი წლის მანძილზე მუშაობდა და მიიჩნევს, რომ პროექტი ჯერ-ჯერობით არ დასრულებულა:

„პროექტი არ არის დასრულებული და მგონი დიდხანს არ დასრულდება. ხანგრძლივი პროექტი აღმოჩნდა, მეგონა რომ მოვრჩებოდი რამდენიმე თვეში, მაგრამ ასე არ მოხდა.

მინდოდა ადრეულ ასაკში ქორწინების ორი მხარე მეჩვენებენია. ერთია, როცა 14-15 წლის ბავშვი თხოვდება და ასევე, შევეცადე მეჩვენებინა ის გარემოც, სადაც ცხოვრობენ ეს ადამიანები, გოგოები, მათი ოჯახები, ბებიები… ამიტომაც გადავიღე არა მარტო ქორწილები, არამედ ოჯახური ყოფა, გარემო სადაც იზრდებიან ეს გოგოები. ყველა სიტუაცია ძალიან ინდვიდუალური იყო, მათი დათანხმება ფოტოს გადასაღებად რთული არ იყო.

ერთი ფოტო იყო, რომელსაც არ მოჰყვა კარგი გამოხმაურება. დავაწერე ფოტოს, რომ გოგომ ბიჭი ნიშნობის დღეს გაიცნო და ისე გაიგეს, რომ გაიცნო ქორწილის დღეს. ამას მოჰყვა ძალიან დიდი გამოხმაურება და მთხოვეს ფოტო მომეხსნა“ -ამბობს დარო.

დები, ქორწილის დღე. პატარძალი ნაჩუქარ ოქროს სამკაულებს იკეთებს. 2015 წ. ზემო აჭარა. დარო სულაკაურის ფოტო

არასრულწლოვანი პატარძალი საქმროს პირველად ნიშნობის დღეს შეხვდა. კახეთი, 2014. დარო სულაკაურის ფოტო

პატარძალი კლასელებთან საქორწინო კაბით თავს იწონებს. კახეთი. დარო სულაკაურის ფოტო

„დაკარგული სიყმაწვილე“ დარო სულაკაურის პირველი პროექტი არ არის.

„პირველი ფოტოპროექტი იყო ჩეჩნებზე, რომლებიც პანკისში ცხოვრობდნენ. მინდოდა დამენგრია ის სტერეოპიტი, რომ თითქოს ჩეჩენი არის ტერორისტი. იმ პერიოდში პანკისში ძალიან არეული სიტუაცია იყო, მინდოდა მეჩვენებინა, როგორ ცხოვრობდნენ სინამდვილეში ჩეჩნები. ეს იყო პირველი პროექტი, მას შემდეგ ხშირად ვაკეთებ მოკლე ისტორიებს, ეთნიკურ უმცირესობებზე გავაკეთე ერთი ფოტოპროექტი ჯავახეთში“ – ამბობს დარო.

ფოტოგამოფენით – „დაკარგული სიყმაწვილე“ – დღეს თანამედროვე სახელოვნებო სივრცეში 2016 წლის სეზონი გაიხსნა. გამოფენის გახსნის პარალელურად სივრცეში გაიმართა დისკუსია ადრეული ქორწინების შესახებ, რომლის მომხსენებელი კავშირ „პროგრესის“ ხელმძღვანელი ნინო გაბუნია.

გამოფენა თანამედროვე ხელოვნების სივრცეში

ლაშა ფალავანდიშვილი, ხელოვნების სივრცის პიარმენეჯერი ამბობს, რომ დარო სულაკაურის ფოტოპროექტი შემთხვევით არ შეურჩევიათ სეზონის გასახსნელად:

გამოფენა თანამედროვე ხელოვნების სივრცეში [ზ.გამსახურდიას 1/5] 10 მარტამდე გაგრძელდება. ხელოვნების სივრცე ღიაა ყოველ დღე, 11-დან საღამოს ექვს საათამდე. გამოფენის დათვალიერება უფასოა.

ნატოს პოლიტიკური ოფიცერი ბათუმში სტუდენტებს შეხვდა

12 თებერვალს საქართველოში ნატოს სამეკავშირეო ოფისის წარმომადგენელი, პოლიტიკური ოფიცერი ჯირი პრეცლიკი ბათუმის შოთა რუსთაველის სახელობის სახელმწიფო უნივერსიტეტის სტუდენტებს შეხვდა.

პოლიტიკური ოფიცერი სტუდენტებს ჩრდილოატლანტიკური ალიანსის მიზნებსა და პრინციპებზე, ნატო-საქართველოს თანამშრომლობის და საქართველოს ნატოში გაწევრიანების პროცესზე და პერსპექტივებზე ესაუბრა.

ჯირი პრეცლიკი რექტორის მოვალეობის შემსრულებელს, მერაბ ხალვაშსაც შეხვდა. შეხვედრა „ნატოსა და ევროკავშირის შესახებ საინფორმაციო ცენტრის“ აჭარის ბიუროს ორგანიზებით შედგა.

ნატოს პოლიტიკურ ოფიცერი და ბსუ-ს რექტორის მოვალეობის შემსრულებელი. ფოტო: https://bsu.edu.ge/

12 თებერვალს „საპორტო ვიზიტის“ ფარგლებში, ბათუმს ნატო-ს სარდლობის მუდმივმოქმედი საზღვაო გამნაღმველი ჯგუფი 2-ის 5 გემი ეწვია. ვიზიტის მიზანია ერთობლივი საქმიანობის გაფართოება და პარტნიორ ქვეყნებთან ურთიერთობების გაძლიერება.

დღეს, 13 თებერვალს საქართველოს შინაგან საქმეთა მინისტრი გიორგი მღებრიშვილი საქართველოში ოფიციალური ვიზიტით მყოფ, ნატო-ს გაერთიანებული საზღვაო ძალების სარდლობის შტაბის უფროსს, კონტრ-ადმირალ ჯორჯო ლაციოს შეხვდა. შეხვედრაზე ნატო-საქართველოს შორის საზღვაო სფეროში არსებულ ორმხრივ ურთიერთობებზე და სამომავლო, კიდევ უფრო ფართომაშტაბიანი თანამშრომლობის პერსპექტივებსა და შესაძლებლობზე ისაუბრეს.

ბათუმში 76 წლის მამაკაცს ეძებენ

76 წლის თენგიზ ღლონტს ოჯახის წევრები ეძებენ. იგი 10 თებერვალს, საღამოს 6 საათზე გავიდა სახლიდან. მამაკაცი დაახლოებით 176 სანტიმეტრი სიმაღლის, სუსტი აღნაგობისაა, ჭაღარა თმით. ტანთ ეცვა ნაცრისფერი ჟაკეტი, ვილვეტის შარვალი და შავი ფერის ტყავის ქურთუკი.

შს სამინისტროს ინფორმაციით, დაკარგული მამაკაცის სამძებრო სამუშაოები აქტიურად მიმდინარეობს.

თუ ვინმე ფლობთ ინფორმაციას მის შესახებ, გთხოვთ დარეკოთ ნომერზე: 577 52 82 09

განახლებული ინფორმაცია: 14 თებერვალს ბათუმში, ჭოროხისა და ზღვის შესართავთან ზღვამ მამაკაცის გვამი გამორიყა. მასში თენგიზ ღლონტი ამოიცნეს. შს სამინისტროს ინფორმაციით, საქმე სისხლის სამართლის კოდექსის 115-ე მუხლითაა აღძრული, რაც თვითმკვლელობამდე მიყვანს გულისხმობს.

ცხოვრება პენსიაზე გასვლის შემდეგ

„თითქმის ყოველდღე ვხვდებით ჩვენი თაობის ადამიანს, რომელიც დახმარებას საჭიროებს, როგორც მატერიალურს, ასევე სულიერს. ახალგაზრდებს უჭირთ იმის აღქმა და გათავისება, რომ სიბერეს თან ახლავს სევდა და წარსულში დარჩენილი ცხოვრების ნოსტალგია. სწორედ ამიტომ ვერ ახერხებენ ჩვენს თანაგრძნობას.“
ნათელა ჩელებაძე, 81 წლის, ქობულეთი

„არის შემთხვევა, როცა მოხუცს სურს გულით რაიმე პროდუქტის შეძენა, მაგრამ ვერ იმეტებს თავისთვის, რადგან ოჯახს სულ სხვა დანიშნულებისთვის ესაჭიროება მისი კუთვნილი პენსიის თანხა. არის შემთხვევა, როდესაც ვინმეს პატივისცემა უნდა, მაგრამ პენსია არ არის მის ხელში, მინდობილობით აიღო მისმა ოჯახის წევრმა სხვა საქმისათვის. საქართველოში იყო ხანდაზმული, ნიშნავს ოჯახის მარჩენალს…“
თამარ მაღალდაძე, 61 წლის, თეთრიწყაროს რაიონის სოფელ კოდას დევნილთა დასახლება

– ეს ამონარიდებია ასაკოვანი ადამიანების თხზულებებიდან თემაზე: “დაბერება საქართველოში”. რა სოციალურ და ფსიქოლოგიურ სირთულეებს აწყდებიან ხანდაზმული ადამიანები საქართველოში, რომელთა ერთი ჯგუფი პენსიით ოჯახს ინახავს და თავისთვის ჯიბის ფულიც არ რჩება?

88 წლის ჰენრი, რომელიც ჩიკაგოში, მოხუცებულთა სახლში ცხოვრობს, კვირაში სამჯერ საგანგებოდ იცვამს, სარკის წინ თმას ივარცხნის და 17 წლის ბრაზილიელ ჯონასსთან შესახვედრად ემზადება. მისი მიზანია ჯონასს ინგლისური ასწავლოს, ამისთვის კი უნდა ესაუბროს. ხანდაზულთა უნარების გამოყენების ასეთი ეფექტური ხერხი იპოვა უცხო ენების გაცვლის ამერიკულმა სკოლამ CNA-მ, რომელმაც ორი წლის წინ სარეკლამო კომპანია FCB-ის ბრაზილიის ფილიალთან ერთად საუბრის გაცვლის პროექტი წამოიწყო.

პროექტი, CNA-ს სტუდენტებს, რომელთაც ინგლისური ენის სწავლის მიზნით ინგლისურენოვან ადამიანებთან საუბარი სურთ, ბრაზილიიდან ამერიკაში, მოხუცებულთა თავშესაფარში მცხოვრებ ადამიანებთან აკავშირებს, რომელთაც, უბრალოდ, ახალი მეგობრები სჭირდებათ. შეხვედრა ვიდეოჩათის საშუალებით ხდება, რომლისთვისაც თავშესაფარში მცხოვრები მოხუცები, სარკის წინ საგანგებოდ ემზადებიან.

სოციალური მომსახურების სააგენტოს გასული წლის მონაცემებით, საქართველოში 606 900-მდე ასაკით პენსიონერი ცხოვრობს. მოხუცებულთა უფლებების დაცვაზე, მათ საზოგადოებაში აქტიურ ინტეგრაციასა და მათი რესურსების რეალიზაციაზე კი საქართველოში მხოლოდ ერთი ორგანიზაცია, ასოციაცია “ღირსეული სიბერე” მუშაობს, რომელიც აჭარაში 500-მდე ბენეფიციარს აერთიანებს.

ხანდაზმული ადამიანები გარდა ბიოლოგიურ-ფიზიოლოგიური პრობლემებისა, ასაკის მატებასთან ერთად, სხვადასხვა სოციალური სახის სირთულეებსაც აწყდებიან. ფსიქოლოგ მარიტა მერკვილაძის განმარტებით, ამის ძირითადი მიზეზი საპენსიო ასაკის შემდეგ, ოჯახში სოციალური როლის დათმობა და საზოგადოებაში სტატუსის რადიკალური ცვლილება ხდება.

“სტატუსის დათმობა ოჯახში ყველაზე თვალსაჩინო მაშინ არის, მაგალითად, როცა სახლში დიასახლისი (ოჯახის მმართველი) ხდება სხვა – შვილი ან რძალი, ანუ ოჯახის მართვის პრივილეგიას ისინი მომავალ თაობას გადასცემენ და ამით ძალაუფლების შემცირებას გრძნობენ. ეს რა თქმა უნდა ნორმალურია, მაგრამ არ ნიშნავს იმას, რომ ხანდაზმულებს ისე მოვექცეთ, როგორც უსუსურებს და ჩამოვართვათ ყველა ფუნქცია/მოვალება. რაც შეეხება საზოგადოებრივ საქმიანობას ხანდაზმულების ის ნაწილი, რომლებიც კმაყოფილნი არიან განვლილი ცხოვრებით და მიღწევებით, შედარებით კარგად გრძნობენ თავს პენსიის ასაკში, ვიდრე ის ადამიანები, რომლებიც ფიქრობენ, რომ ცხოვრებაში მნიშვნელოვანი არაფერი გაუკეთებიათ. თუმცა ორივე შემთხვევაში ფუნქციების და როლების შემცირებასთან გვაქვს საქმე და ხშირად სრულიად უფუნქციოდ დარჩენასთანაც კი, რაც აბსოლიტურად გაუმართლებელია. ასეთ შემთხვევაში საჭიროა, მათი წარსული საქმიანობები სხვა ქმედებებით ჩანაცვლდეს, წინააღმდეგ შემთხვევაში ისინი შესაძლოა დეპრესიულები ან სულაც აგრესიულები გახდნენ,” – ამბობს მარიტა მერკვილაძე.

ფსიქოლოგი მიიჩნევს, რომ ქვეყნის სოციალურ-ეკონომიკური მდგომარეობის გათვალისწინებით, ხანდაზმულების უმეტესობას უფუნქციობის განცდა აქვს. გასათვალისწინებელია ტექნოლოგიური სიახლეებიც, საქარტველოსჰი გარდამავალი პერიოდია ამ მხრივ. უკვე ყველაფერი ტექნიკაზეა დამოკიდებული, რაზედაც ხანდაზმულებს საქართველოში ცოტათი უჭირთ ფეხის აწყობა. თუმცა ამას ყველა ადამიანზე ვერ ვიტყვით, არსებობენ ხანდაზმული ადამიანები, რომელთაც უყვართ სიახლეების მიგნება თავიანთ ცხოვრებაში, თუმცა მათი რაოდენობა მცირეა. ევროპაში ეს პროცესი უკვე კარგა ხანია დაიწყო და იქ უფრო ადაპტირებულები არიან ადამიანები, _ ამბობს ფსიქოლოგი.

ასოციაციის – “ღირსეული სიბერე” წარმომადგენელი მარინე ჟღენტი მიიჩნევს, რომ დღეს საქართველოში მოხუცები ნაკლებად ინარჩუნებენ საზოგადოების სრულფასოვანი წევრის სტატუსს: “მათ, ძირითადად, სახლში უწევთ ჯდომა, რადგან არ არიან დასაქმებული, არც რაიმე აქტივობებში არიან ჩართული, რის გამოც ნელ-ნელა შორდებიან სოციუმს და ფიქრობენ, რომ საზოგადოებისთვის აღარ არიან საჭირო. ჩვენ, სწორედ ამ თვითრწმენის დაბრუნებას ვცდილობთ მათთვის” – ამბობს ის.

ხანდაზმულთა რესურს ცენტრის ბენეფიციარები ქობულეთის სანაპიროზე. ფოტო: ასოციაცია ,,ღირსეული სიბერე" — ხანდაზმულთა რესურს ცენტრის ბენეფიციარები ქობულეთის სანაპიროზე. ფოტო: ასოციაცია ,,ღირსეული სიბერე”

“ხანდაზმულ ადამიანებს საქართველოში თავადაც სტერეოტიპული შეხედულება აქვთ საკუთარ შესაძლებლობებზე, რასაც, ზოგადად, საზოგადოებაში არსებული კულტურული განწყობა განაპირობებს. ჩვენს საზოგადოებაში მიღებულია ხანდაზმული ადამიანების პასიური როლი და როცა ადამიანები საპენსიო ასაკს უახლოვდებიან, თავადაც განწყობილები არიან საამისოდ, ამიტომაც ვერ აცნობიერებენ, თუ რა შესაძლებლობებია მათ ირგვლივ,” – ამბობს ფსიქოლოგი მარიტა მერკვილაძე.

კითხვაზე: საზოგადოების ასეთი განწყობა არის თუ არა ეიჯიზმი [ადამიანების დისკრიმინაციად ასაკბრივი ნიშნით], თუნდაც უნებლიე? – მარიტა მერკვილაძე პასუხობს: “საქათველოში პატივს ვცემთ მოხუცებს, გვიყვარს ისინი, მაგრამ გარკვეული სტერეოტიპული განწყობის გამო გაუაზრებლად ვახდენთ მათ დისკრიმინაციას. ფინანსური თუ სხვა მიზეზების გამო ხანდაზმულები არც ისე ხშირად დადიან კაფეებსა თუ სხვა საზოგადოების შეკრების ადგილებში, ამიტომ გვგონია, რომ ისინი ჩვენ არ გაგვიწევია გვერდზე, რეალურად კი, თითქოს ჩამოწერილი გვყავს ეს ადამიანები. უნდა დავაღწიოთ თავი შეხედულებებს, რომ მოხუცები მორჩნენ თავიანთ ცხოვრებას, რომ ასაკის გამო მათ არაფერი მოეკითხებათ და ა.შ.

მარინე ჟღენტი ამბობს, რომ საქართველოში ეიჯიზმის პირდაპირი გამოვლინებაც გვხვდება, როცა მოხუცებზე ოჯახის წევრები ფსიქოლოგიურად და ზოგჯერ ფიზიკურადაც ძალადობენ: “გვქონია შემთხვევები, როცა შვილსა და შვილიშვილს ფიზიკური შეურაცხყოფა მიუყენებია ბებიისთვის. ასევე ფსიქოლოგიური ძალადობის მაგალითები, როცა პენსიას სთხოვენ და წინააღმდეგ შემთხვევაში, სახლიდან გაგდებით ემუქრებიან”.

ფსიქოლოგის განმარტებით, მართალია, ხანდაზმულ ადამიანებს უნელდებათ მოტორიკა და ბუნებრივი აზროვნების ტემპი, მაგრამ ეს სრულებით არ ნიშნავს იმას, რომ მათ არ შეუძლიათ იყვნენ ქმედითები, შეიძინონ ახალი ცოდნა და ახალი უნარები და იყვნენ საზოგადოებისთვის საწირო და საინტერესო ადამიანები. მარინე ჟღენტი ამბობს, რომ ამის კარგი მაგალითია ასოციაცია “ღირსეული სიბერის” ბენეფიციარები, რომელთაც კომპიუტერის უფასო კურსების ფარგლებში შეისწავლეს კომპიუტერთან მუშაობა, ბეჭდვა, სოციალურ ქსელებში შესვლა და ახლა თავიანთ ახლობლებს შკყპე-თი უკავშირებიან საზღვარგარეთ. პროექტის ფარგლებში ზოგიერთმა მათგანმა საოჯახო ბიზნესიც კი წამოიწყო, ზოგიერთი კი საკვებსა და ტანსაცმელს უგროვებს უკიდურესად გაჭირვებულებს.

იმისთვის, რომ ხანდაზმულ ადამიანებს უსარგებლობის განცდა არ ჰქონდეთ, ფსიქოლოგის რეკომენდაციით, საჭიროა მათი დასაქმება/ფუნქციების და მნიშვნელოვნების მინიგნება – ეს შესაძლოა იყოს როგორც მარტივი ხელსაქმე სახლში, ისე მათი ჩართვა შვილიშვილების აღზრდასა და მათი მსოფლმხედველობის ჩამოყალიბებაში. „ხშირად, იმის გამო, რომ მოხუცი არ გადაიტვირთოს, ოჯახის წევრები ხელიდან ჰგლეჯენ მას ისეთ მარტივ საქმეებს, რომელთა გაკეთება მასაც თავისუფლად შეუძლია, ეს არასწორია. გარდა ამისა, დიდი მნიშვნელობა აქვს მათი ცხოვრებისეული გამოცდილების გაზიარებას. შეიძლება ახალგაზრდა რაიმე საკითხში კარგად იყოს განსწავლული, მაგრამ გამოცდილება, რომელიც ხანდაზმულ ადამიანს შეიძლება ჰქონდეს ამავე საკითხში – სულ სხვა რესურსია, რომელიც აუცილებლად უნდა გამოვიყენოთ. მით უმეტეს, ღირებულებების გაცვლის თვალსაზრისით, ახალგაზრდა და ხანდაზმული თაობების მეგობრობა თანაბრად სასარგებლოა ორივე მხარისთვის” – ამბობს მარიტა მერკვილაძე.

კომპიუტერის შემსწალელი კურსები ხანდაზმულთა ცენტრში. ფოტო: ასოციაცია „ღირსეული სიბერე" — კომპიუტერის შემსწალელი კურსები ხანდაზმულთა ცენტრში. ფოტო: ასოციაცია „ღირსეული სიბერე”

ასოციაცია “ღირსეული სიბერე” ახალგაზრდებისა და ხანდაზმულების დაახლოების მიზნით წელს სხვადასხვა კულტურულ-საგანმანათლებლო ღონისძიებასაც გეგმავს, რომლებშიც ხანდაზმული ადამიანები ახალგაზრდებთან ერთად ჩაერთვებიან. მარინე ჟღენტი: “ღონისძიებებში გათვალისწინებულია სკოლის მოსწავლეების, ბაღის აღსაზრდელების, სტუდენტებისა და საშუალო ასაკის აქტიური ადამიანების ჩართვა. გვინდა, ეს ორი კატეგორია არ გრძნობდეს თავს ერთმანეთისგან განცალკევებულად და როგორც ერთიანი თაობა, ჩავრთოთ სხვადასხვა აქტივობაში”.

მარიამობა ხანდაზმულთა ცენტრში. ფოტო: ასოციაცია ,,ღირსეული სიბერე" — მარიამობა ხანდაზმულთა ცენტრში. ფოტო: ასოციაცია ,,ღირსეული სიბერე”

რას ნიშნავს წამყვანი მასწავლებელი

საქართველოში წამყვანი მასწავლებლის სტატუსი 184 პედაგოგს აქვს მინიჭებული, მათგან 15-ს _ აჭარაში. რა ვალდებულებებს აკისრებს წამყვანი მასწავლებლის სტატუსი პედაგოგს და მაღალსტატუსიანი მასწავლებლების ნაკლებობა ნიშნავს თუ არა იმას, რომ ქვეყანაში განათლების დონე ძალიან დაბალია? „ბათუმელები“ ამ საკითხზე ბათუმის პირველი საჯარო სკოლის წამყვანი სტატუსის მქონე ინგლისურის მასწავლებელს ნინო მაისურაძეს ესაუბრა.

ქალბატონო ნინო, როდის მიიღეთ წამყვანი მასწავლებლის სტატუსი და რა დამატებით აქტივობებს გაკისრებთ ეს სტატუსი?

წამყვანი მასწავლებლის სტატუსი 2015 წლის სექტემბერში მომანიჭეს. თითქმის იმავე აქტივობების გავლა გვიხდება, იქნება ეს სასწავლო პროცესის მართვა, დაგეგმვა და ა.შ. ბუნებრივია, აქამდეც ვატარებდი ინტეგრირებულ გაკვეთილებს და ახალი სტატუსის შემდეგაც გავაგრძელებ ამ აქტივობას. ბუნებრივია, გაკვეთილების რაოდენობა გაიზარდა. ამჟამად დაგეგმილი მაქვს საგაკვეთილო კლასგარეშე აქტივობა, მინდა მოვამზადო თემა – „ქართველები საზღვარგარეთ“. ბაირონს ჰქონდა შეხება საქართველოსთან, ლეკიანობის დროს ქართველი გოგო გადაურჩენია და ამ თემაზე ვაპირებ პროექტის მომზადებას. ვგეგმავ ინტეგრირებულ გაკვეთილებს.

სქემის მიხედვით ხუთი წლის განმავლობაში გევალებათ ხუთი სამოდელო გაკვეთილის ჩატარება. თუ ახალ ეტაპზე გადასვლას აპირებთ, მაშინ ათი გაკვეთილის მომზადება მოგიწევთ. აპირებთ შემდეგი ეტაპისთვის მუშაობას?

რა თქმა უნდა, ვგეგმავ მენტორობას, ამიტომ ათი სამოდელო გაკვეთილი უნდა მოვამზადო. აქამდე სამოქალაქო განათლებაზე მქონდა სამოდელო გაკვეთილები მომზადებული და ეს თემა მინდა გავაგრძელო. ასევე მევალება სასწავლო რესურსების შექმნა. ამაში იგულისხმება ციფრული რესურსებიც, სლაიდშოუები, ის, რაც ძირითადად გვჭირდება გაკვეთილზე. 2011-იდან 2014 წლამდე ვმუშაობდი სტატიებზე და წელსაც ვაპირებ გავაგრძელო.

რა თემას ეხება თქვენი სტატიები?

ანბანის სწავლების თანამედროვე, ეფექტური სტრატეგიები; ტურიზმი როგორც განათლების საუკეთესო საშუალება; რა როლი ენიჭება ექსკურსიებს და ა.შ. ამაში ხელი შემიწყო იმანაც, რომ პარალელურად დოქტორანტურაშიც ვსწავლობდი, მქონდა წვდომა სამეცნიერო ლიტერატურასთან და პარალელურ რეჟიმში მიწევდა სტატიების გამოქვეყნება, რაც სასკოლო ვალდებულებებზეც აისახა.

წამყვანი მასწავლებელი ვალდებულია გასცდეს თავის კლასს და კოლეგებსაც გაუზიაროს გამოცდილება. აქ მხოლოდ ინგლისურის მასწავლებლები იგულისხმებიან, თუ სხვა პედაგოგებიც?

რა თქმა უნდა, ინგლისური ენის პედაგოგები. იმ პედაგოგებთან, ვისთან ერთადაც ვიმყოფებოდი ამერიკაში, თანამშრომლობას ვაგრძელებ. ჩვენ ერთად გამოვუშვით სახელმძღვანელო აბიტურიენტებისთვის. ორი წელია უცხო ენებში ფორმატი შეიცვალა, დაემატა მოსასმენი ნაწილი და ამან გააჩინა ახალი რესურსის საჭიროება. მე და კიდევ სამმა პედაგოგმა ერთად გავაკეთეთ სრული კურსი და წამყვანი მასწავლებლის რანგშიც ვაპირებთ ახალ სახელმძღვანელოზე მუშაობას. გარდა ამისა, ვმუშაობ ახალ სტატიაზე, რომელიც ჟურნალ „მასწავლებელში“ დაიბეჭდება და ეხება ტრენინგების აუცილებლობას. მეორე თემას ჰქვია „მოვუსმინოთ მოსწავლეებს“. აქ საუბარია იმაზე, თუ როგორ შეიძლება ბავშვს მოუსმინო გაკვეთილზე ისე, რომ არ მისცე ამას ფორმა – „დამიწერე“.

სქემის მიხედვით არსებობს სამოდელო გაკვეთილის რამდენიმე ტიპი, მათ შორის სტანდარტული, სიახლეებსა და პრობლემაზე ორიენტირებული სწავლება. თქვენ რომელი ტიპის გაკვეთილის მომზადებას გეგმავთ წელს?

ვაპირებ ინოვაციურ მეთოდებზე მუშაობას. ინოვაციურ მეთოდად შეგვიძლია განვიხილოთ გაკვეთილი, რომელიც მოსწავლის საჭიროებაზეა მორგებული. დაბალ საფეხურზე ინგლისურის სწავლებისას მულტფილმებს ვიყენებთ ენის ასათვისებლად ან გრამატიკის უკეთ აღსაქმელად. ასეთი ათი სამოდელო გაკვეთილი გვაქვს მომზადებული დაწყებით საფეხურზე. მაღალ კლასებში შევცვალეთ მეთოდი და მოკლე ვიდეორგოლების გამოყენება დავიწყეთ. იყო დისკუსია იმაზე, უნდა ესწავლათ თუ არა პირველკლასელებს ანბანი, მაშინ როცა ქართულად არ იცოდნენ წერა-კითხვა. გამოვიკვლიეთ სამი პარალელური პირველი კლასი და გადავწყვიტეთ, რომ პირველკლასელებს ესწავლათ ანბანი ფიზიკური აქტივობების ფონზე. ამ მეთოდს ქართულ სკოლებში ფაქტობრივად არ იყენებენ. ამერიკაში ყოფნის დროს ათი სქელტანიანი სამოდელო წიგნიც მოგვცეს, რომელიც თანხვედრაშია სამინისტროს მოთხოვნებთან და გათვლილია ჩვენი გეგმებიც.

ქართველი მასწავლებლები იშვიათად იყენებენ „გამჭოლ კომპეტენციებსო“ – ამბობენ განათლების ექსპერტები. რა იგულისხმება ამაში?

კომპეტენციებში შედის ყველაფერი ის, რაც სქემით გვევალება. მათ შორის კლასის მართვის სტრატეგიები, მენეჯმენტი, შეფასება და ა.შ. რას ვერ იყენებენ, ამაზე ვერ ვისაუბრებ, მაგრამ ერთი შემიძლია ვთქვა, რომ თანამშრომლობის კომპეტენციები მას შემდეგ უფრო განვითარდა, როცა კრედიტქულების დაგროვება დაიწყო. თავიდან იყო სკეპტიკური განწყობა „იმან ჩემზე მეტი რა იცის“, მაგრამ ეს პრობლემა მეტ-ნაკლებად დაძლეულია, თუმცა არა ბოლომდე.

თქვენ გევალებათ სკოლის საჭიროებების კვლევაც, ხომ არ დაგიწყიათ მუშაობა და რა საჭიროებებს ხედავთ ამ ეტაპზე?

დავიწყე მუშაობა მოსწავლეთა შეფასების რუბრიკებთან დაკავშირებით, რადგან დაბალ საფეხურზე მოსწავლეებმა არ იციან, რა ნიშნით ხდება მათი შეფასება. ინგლისურის სახელმძღვანელოები მოსწავლის შეფასების საშუალებას იძლევა, რადგან გაკვეთილები შეიცავს მზა კითხვარს, რაც არ აქვს ქართულ სახელმძღვანელოებს. ამაზეც ვმუშაობ ჩემს კოლეგებთან, რადგან თვითშეფასების კითხვარის შევსებისას ხშირად წერენ, რომ მოსწავლეს თვითშეფასებას არ აკეთებინებენ. ეს შეუძლებელია, რადგან ეს კითხვარი გაკვეთილშია მოცემული.

გარდა წამყვანი მასწავლებლის ვალდებულებებისა, თქვენ ფასილიტატორის ვალდებულებებიც გაქვთ, ეს ძალიან ბევრი არ არის ერთი ადამიანისთვის?

ამის მართვის ინსტრუმენტებს ტრენინგებზე ვსწავლობთ. იმ პედაგოგებს, რომლებსაც უჭირთ კომპიუტერის ფლობა, ბუნებრივია ვეხმარები, მაგრამ ნელ-ნელა ითვისებენ და ისინიც დაძლევენ ალბათ ამ პრობლემას.

როცა რეგიონში მხოლოდ 15 წამყვანი მასწავლებელია, ნიშნავს თუ არა ეს იმას, რომ სწავლის ხარისხი ძალიან დაბალია სკოლებში?

რა თქმა უნდა, ნიშნავს.

სტატუსის ზრდა ანაზღაურებაზე თუ აისახება?

ზუსტად ვერ გეტყვით, რამდენია წამყვანი მასწავლებლის ხელფასი, რადგან მე ათასლარიანი მასწავლებლების სქემით ვიღებ ხელფასს (800 ლარამდე ვიღებთ ხელზე) და ეგ დანამატი მე არ მეხება. სადღაც 700 ლარამდეა, ზუსტად არ ვიცი.

ორიონის თანავარსკვლავედის პირველი ფოტო და სამი კარტოფილის დილემა

მარიამ ორიონ მუთიძე, სტუდენტი

შარშან, სექტემბერში, დავწერე სასურველი ნივთების ჩამონათვალი. მინდოდა ტელესკოპი, საბეჭდი მანქანა, ვარსკვლავების რუკა და ფოტოაპარატი, რომელიც ღამის ცას გადაიღებდა. მაშინ ვერ წარმოვიდგენდი, რომ დღეს ჩემს ოთახში შევიდოდი და თვალს მოვავლებდი ამ ნივთებს. რამდენიმე დღის წინ მეგობარი მესტუმრა, ჩემი ფოტოაპარატის ფუნქციებში კარგად გამარკვია და იმ საღამოსვე გადავიღე თბილისის ცაზე ორიონის თანავარსკვლავედის პირველი ფოტო. ასეთ დროს ვგრძნობ, რომ ჯადოსნურ სამყაროში ვცხოვრობ.

შარშან სტუდენტი გავხდი. ერთხელ წავიკითხე, რომ ვერასდროს შეძლებ დედობისთვის და მამობისთვის წინასწარ მოემზადო, რადგან ეს ჯერ განუცდელ შეგრძნებებთანაა კავშირშიო. ეგებ და სტუდენტური ცხოვრება დიდად ვერ გაუტოლდება მშობლისას, მაგრამ აქაც მსგავსი შემთხვევაა, ვერაფრით განსაზღვრავ წინასწარ რა მოგელის. სიმართლე რომ ვთქვა, ჩემი პირველი უნივერსიტეტი მხოლოდ სახელისა და მშობლებთან შეთანხმების საშუალოს გამოყვანით ავირჩიე. სოციალურ-პოლიტიკური ფაკულტეტი იყო. თავიდან მომეწონა თუ არა ვერ ვიხსენებ, რადგან რაღაც მომენტში ერთი კორპუსიდან მეორისკენ მიმავალი ვჩერდებოდი და ვფიქრობდი: აქ რატომ ვარ? პირველ კურსს გავუძელი, მერე კი…

მერე ერთ სანაყინეში გავაგზავნე CV-ი. მალევე დავწერე ტესტები, გავიარე გასაუბრება და მუშაობაც დავიწყე. მანდვილად არ იყო მარტივი საქმე, მაგრამ რადგან ეს ჩემი პირველი სამუშაო იყო, მთელი გულით ვცდილობდი ყველაფერი კარგად მეკეთებინა. მთელი ბავშვობა ვეუბნებოდი დედაჩემს, 18 წლის რომ გავხდები, მუშაობას დავიწყებ და სახლიდან გადავალ-მეთქი. სამსახურში რომ ამიყვანეს, დავურეკე და ვუთხარი, რომ რამდენიმე თვის დაგვიანებით შევასრულე პირობა. პირველი ხელფასი, რა თქმა უნდა, სისულელეებში დავხარჯე. არასდროს დამავიწყდება, რამდენად სასიამოვნოა ეს პროცესი. მერე კარგი რეკომენდაციით ერთ არაჩვეულებრივ წიგნის მაღაზიაში დავიწყე მუშაობა, ეს იყო ნამდვილად ოცნების სამსახური. შემომსვლელებს წიგნებს ვურჩევდი და ვფიქრობდი, რომ ძალიან გამიმართლა, რომ აქ ვიყავი.

მაღაზიაში ერთი კარადა გვქონდა, რომელზეც კვირაში ერთხელ წიგნის პოსტერებს ვახატავდი, გამვლელები და თანამშრომლები უყურებდნენ, მოსწონდათ. ალბათ ეს „მოწონება“ გახდა იმის საბაბი, რომ ზაფხულის ბოლოს გადავწყვიტე უნივერსიტეტი გამომეცვალა. ეს ძალიან დიდ რისკად დამიჯდა, დავბრუნდი ბათუმში, მოვაგროვე ჩემი ნამუშევრები, დავიწყე ჩანახატების გაკეთება და ერთ-ერთ საუკეთესო უნივერსიტეტში შევიტანე მობილობაზე განაცხადი. მშობლებთანაც ბევრის ახსნა დამჭირდა, მაგრამ ისინი ძალიან კარგი ადამიანები არიან და გამიგეს. საუკეთესო უნივერსიტეტში მიმიღეს ვიზუალური ხელოვნებისა და დიზაინის ფაკულტეტზე და ეს იყო ჩემი საუკეთესო გადაწყვეტილება განვლილი ცხოვრების მანძილზე. ახლა ჩემი უნივერსიტეტის ერთი კორპუსიდან მეორისკენ მიმავალი ვჩერდები და ვფიქრობ, რომ იქ ვარ, სადაც უნდა ვიყო.

შეიძლება სპონტანური ადამიანი ვარ, მაგრამ სისულელედ მეჩვენება რაღაცების გათვლა. ვერაფრით მიხვდები, მოგეწონება თუ არა შენ მიერ არჩეული გზა, მაგრამ არასდროსაა გვიან კურსის შეცვლა. სამყარო ძალიან არასწორხაზოვანია წინასწარ დაგეგმისთვის.

სტუდენტობაში ხანდახან სახლში მხოლოდ სამ ცალ კარტოფილს აღმოაჩენ და მთელი საღამო იმაზე იფიქრებ, ეს კარტოფილი მოხარშო და ჭამო, თუ მარსზე დარჩენილი მარკ უოტნივით დარგო და სამომავლოდ აიღო მოსავალი. საბოლოოდ ცხოვრება მაინც საინტერესო თავგადასავლებით და უფრო საინტერესო ადამიანებით ივსება, რომლებიც ერთ დღეს კარზე მოგიკაკუნებენ და ტელესკოპს გაჩუქებენ. ასეც რომ არ იყოს, მათთან ერთად საღამოების გატარებაც ძალიან გაგიხარდება. ნამდვილად არ ღირს ამაზე უარის თქმა. უბრალოდ, ხშირად უნდა ჰკითხო თავს, რამდენად კმაყოფილი ხარ შენი ამჟამინდელი მდგომარეობით და თუ არ მოგწონს, უნდა მოძებნო გზები მის შესაცვლელად. სამყაროს ძალები ყოველთვის შენ მხარეს იქნებიან ასეთ შემთხვევაში.

თელ-ავივიდან ბათუმის მიმართულებით ფრენების რაოდენობა იზრდება

აჭარის ტურიზმის დეპარტამენტის ინფორმაციით, წელს ავიაკომპანია – Arkia აჭარაში ფრენების პერიოდულობის გაზრდას გეგმავს – იგი შარშან განხორციელებული სამთვიანი ფრენების ნაცვლად, წელს 10 თვის განმავლობაში შეასრულებს პირდაპირ რეისებს თელ-ავივსა და ბათუმს შორის. ბათუმში, ზაფხულის სეზონზე რეგულარულად იფრენს საქართველოს ბაზარზე ახალი კომპანიაც – El Al Israel Airlines, რომელიც თელ -ავივიდან ბათუმის მიმართულებით კვირაში ორ საჰაერო მიმოსვლას განახორციელებს.

TAV Airport Holding- ის წარმომადგენლები, აჭარის ტურიზმის დეპარტამენტთან ერთად, მოლაპარაკებებს აგრძელებენ ავიაკომპანია -Israir Airlines-თან, რათა კომპანიამ გასული წლის მსგავსად, წელსაც განახორციელოს ავიარეისები ბათუმსა და თელ -ავივს შორის.

დღეისათვის, საქართველოსა და ისრაელს შორის პირდაპირ რეგულარულ რეისებს ავიაკომპანიები Arkia, Israir Airlines და Georgian Airways ასრულებენ.

აჭარის ტურიზმის დეპარტამენტის მონაცემებით, 2015 წელს ისრაელიდან საქართველოში შემოსულ ვიზიტორთა რაოდენობა წინა წლის მონაცემებთან შედარებით 44 % პროცენტითაა გაზრდილი, აჭარაში შემოსულ ებრაელ ვიზიტორთა რაოდენობა კი 19,9 %-ით.

2016-02-12 დღის სტატისტიკა – ბათუმში პარკირების წესების დარღვევაზე [ფოტო]

სატრანსპორტო ინფრასტრუქტურის მართვის სააგენტოს ცნობით, დღეს ბათუმში პერკირების წესების დარღვევის გამო სულ 518 ადამიანი დაჯარიმდა. მათ შორის: 420 – პარკირების საფასურის გადახდის გარეშე დგომის გამო, 51 – ნიშანში დგომის გამო, 34 – ტროტუარზე დგომისთვის, 1 – ტაქსისა და სპეცტქნიკის პარკირების საფასურის გადაუხდელობისთვის, 8 – დგომა-გაჩერების წესის დარღვევისთვის და 4 – ავტობუსის გაჩერებაზე დგომის გამო.

ფოტოები გადაღებულია ბოლო რამდენიმე დღის განმავლობაში.