Batumelebi

გადაცემაში „მთავარი თემა“ ამჯერად ხანდაზმულთა ცხოვრების პირობებზე ვისაუბრებთ. გაეროს მონაცემებით დაბერება, როგორც მსოფლიო პრობლემა, განსაკუთრებულად აქტუალურია საქართველოსთვის. მოწყვლად ჯგუფებზე ზრუნვას ქვეყანას ევროკავშირთან ასოცირების ხელშეკრულებაც ავალდებულებს.

როგორ ცხოვრობენ მოხუცები დღეს და რას აკეთებს მთავრობა მათი მდგომარეობის შესამსუბუქებლად? – ამ კითხვებზე მთავრობის პასუხებს გადაცემის პირველ სიუჟეტში მოისმენთ, მეორე სიუჟეტში კი მოხუცები თავანთ ისტორიებს მოგვიყვებიან.

საქართველოში ხანდაზმულების ცხოვრებაზე სახალხო დამცველის აჭარის რეგიონული სამმართველოს ხელმძღვანელი ციალა ქათამიძე და არასამთავრობო ორგანიზაცია „ღირსეული სიბერე“-ს იურისტი მარინე ჟღენტი საუბრობენ.

24 მარტს ტუბერკულოზის მსოფლიო დღე აღინიშნება იმ თარიღის აღსანიშნავად, როდესაც ნობელის პრემიის ლაურეატმა, გერმანელმა მეცნიერმა რობერტ კოხმა ტუბერკულოზის გამომწვევი მიკობაქტერია აღმოაჩინა 1882 წელს.

2016 წლის ტუბერკულოზის მსოფლიო დღის თემაა გლობალური მზაობა ტუბერკულოზის ეპიდემიის დასამთავრებლად, სლოგანით – „გავერთიანდეთ ტუბერკულოზის დასამარცხებლად“.

აჭარის საზოგადოებრივი ჯანდაცვის ცენტრს ტუბერკულოზთან ბრძოლის მსოფლიო დღის აღსანიშნავად 24 მარტს ბათუმში სხვადასხვა ღონისძიებები აქვს ჩანიშნული:

11:00  საათზე ბათუმის N2 საჯარო სკოლაში გაიმართება შეხვედრა, სადაც მე–10 და მე–11 კლასის მოსწავლეები მოისმენენ  ინფორმაციას ტუბერკულოზის გავრცელების,  მკურნალობისა და პრევენციის შესახებ.

14:00 საათზე კი, ბათუმის შოთა რუსთაველის სახელმწიფო უნივერსიტეტში ჩატარდება ლექცია თემაზე: – ,,ტუბერკულოზი, როგორც საზოგადოებრივი ჯანდაცვის განსაკუთრებული პრობლემა“

„მსოფლიოში ყოველწლიურად 9 მილიონი ადამიანი ავადდება ტუბერკულოზით და 1,5 მილიონზე მეტი იღუპება. საქართველომ შეიმუშავა ტუბერკულოზის კონტროლის ახალი სტრატეგია, რომელიც 2016-2020 წლებისთვის განსაზღვრავს ტუბერკულოზის მართვის სტრატეგიულ მიმართულებებს.

ბოლო რამოდენიმე წლის განმავლობაში  ტუბერკულოზის კონტროლის მიმართულებით ქვეყანაში გახორციელებული ღონისძიებების შედეგად გაიზარდა  დაავადების დიაგნოსტიკასა და მკურნალობაზე მიმართული სახელმწიფო დაფინანსება, რომელიც სხვა უმნიშვნელოვანეს საკითხებთან ერთად – პაციენტთა ფულადი წახალისების სქემის თანადაფინანსებასაც უნზრუნველყოფს;

2015 წლიდან მულტირეზისტენტული ტუბერკულოზის მკურნალობა მიმდინარეობს ახალი რეჟიმების მიხედვით [ჯანმო-ს რეკომენდაციების შესაბამისად განახლებული გაიდლაინების მოთხოვნათა დაცვით];

ქვეყანაში პროგრამულად ხელმისაწვდომია ახალი მედიკამენტი – ბედაქილინი [აშშ-ს საერთაშორისო განვითარების სააგენტოს გლობალური დონაციის პროგრამით];

2015 წელს, ქვეყანამ საბიუჯეტო სახსრებით პირველად  შეიძინა ტუბერკულოზის სამკურნალო პირველი რიგის მედიკამენტები;

ქვეყნის მასშტაბით ხელმისაწვდომია ტუბერკულოზის და რეზისტენტული ტუბერკულოზის სწრაფი სადიაგნოს­ტი­კო საშუალება ჯინ ექსპერტ-აპარატურა, რომელიც გლობალური ფონდის პროგრამის ფარგლებში იქნა შეძენილი“ – აღნიშნულია აჭარის საზოგადოებრივი ჯანდაცვის ცენტრის მიერ გავრცელებულ პრესრელიზში.

სოციალური დახმარება გიული დავითაძეს და ბადრი მგელაძეს მას შემდეგ შეუწყვიტეს, რაც ოჯახი თამარის დასახლებაში, ე.წ. ეკომიგრანტების სახლში გადავიდა საცხოვრებლად. მიუხედავად იმისა, რომ ბინა ახლაც თითქმის ცარიელია, მდგომარეობა სოციალურმა აგენტმა დამაკმაყოფილებლად შეაფასა და ოჯახს სოციალური დახმარების მიღება შეუწყდა.

„გასული წლის ზაფხულში შემოვედით ამ ბინაში. მოვიდა სოციალური აგენტი, რა დაწერა არ ვიცი, მაგრამ მას შემდეგ სოციალური დახმარება არ მიგვიღია,“ – გვიყვება გიული დავითაძე.  როგორც გიული ამბობს, მას  სოციალური მომსახურების სააგენტოში განუმარტეს, რომ დახმარება ბინის მიღების გამო შეუწყდა: „ახალი ბინა გაქვთ და გამოიყენეთ, დახმარება აღარ გეკუთვნითო, ასე მიპასუხეს სააგენტოში“.

გიული დავითაძემ სოციალური სახლის მე-6 სართულზე ბინა მიიღო არა როგორც ეკომიგრანტმა, არამედ როგორც მძიმე სოციალური პირობების მქონე ოჯახმა. ამას ადასტურებს სოციალური მომსახურების სააგენტო, თუმცა სააგენტოს დირექტორი, თემურ ქარცივაძე გამორიცხავს დახმარების შეწყვეტას ბინის მიღების გამო: „ამ ოჯახის მიერ შევსებულ დეკლარაციაში წერია, რომ მათ აქვთ ყოველთვიური შემოსავალი – 1200 ლარი. დეკლარაციას ხელს აწერს გიული დავითაძე,“ – უთხრა „ბათუმელებს“ თემურ ქარცივაძემ. ის ადასტურებს იმასაც, რომ დეკლარაციის მიხედვით, ოჯახში არავინ მუშაობს. საიდან შეიძლება ჰქონდეს უმუშევარ ადამიანებს 1200 ლარი შემოსავალი ყოველთვიურად სოციალური სახლის მე-6 სართულზე? – ამ კითხვას თემურ ქარცივაძემ ასე უპასუხა: „ამის გარკვევა ჩვენი საქმე არ არის, აგენტს ამის ვალდებულება არ აქვს. დეკლარაციაში ჩანს, რომ ოჯახს აქვს მიწის ნაკვეთიც“

გიული დავითაძე კი ამბობს, რომ ჩვენგან გაიგო დეკლარაციაში დაფიქსირებული 1200 ლარის შემოსავლის შესახებ და არც მიწის ნაკვეთი აქვთ. „მიწა დედამთილის ოჯახს ჰქონდა, სადაც წლების განმავლობაში ერთად ვცხოვრობდით“. ოჯახმა სოციალური მომსახურების სააგენტოს კიდევ ერთხელ მიმართა, თუმცა უარი მიიღო, რადგან ოჯახის მდგომარეობა უკვე შესწავლილია. სოციალური მომსახურების სააგენტოს პრესსამსახურში გვითხრეს, რომ გიული დავითაძეს ისევ შეხვდებიან და შემდეგ ექნებათ პასუხი, შეივსება თუ არა დეკლარაცია ხელახლა.

გიული დავითაძე „ბათუმელებს“ გასულ კვირას დაუკავშირდა და უთხრა, რომ მეუღლის საავადმყოფოდან გამოყვანის ფინანსური საშუალება არ ჰქონდა.

„170 ლარი გადავიხადე საავადმყოფოში, რადგან საყოველთაო ჯანდაცვა სრულად არ ფარავს მომსახურებას. ახლა შვილი მყავს საოპერაციო, თვალები სტკივა,“ – ამბობს გიული დავითაძე. გიულის გოგო 6 წლისაა და თამარის დასახლებიდან მახინჯაურის საბავშვო ბაღში დადის, რადგან მახლობლად მდებარე ბაღში თავისუფალი ადგილი აღარ იყო. ბადრისა და გიულის მეორე შვილი 4 წლის ბიჭია. თამარის დასახლების საბავშვო ბაღში არც მისთვის აღმოჩნდა ადგილი.

კომპანია „ზიმო“ – ს წარმომადგენლის ირაკლი შანავას განცხადებით, ერთ ძირ ხეს ციხისძირის სანაპიროდან დღეს გადაიტანენ შეკვეთილში [ოზურგეთის მუნიციპალიტეტი]. ხეს ბარჟათი [სპეციალური მცურავი საშუალებით] გადაიტანენ.

ამავე თემაზე:

ციხისძირში ასწლოვანი ხეების გადატანის პროცესი განახლდა

ხეების გადასატანად ციხისძირში ნავმისადგომი კეთდება [ფოტო]

სამინისტრო: მიწის ნაკვეთზე, საიდანაც ხეები გადააქვთ, სასტუმრო არ აშენდება

არჩილ ხაბაძის ბრძანება ივანიშვილისთვის ხეების გადასაცემად

ივანიშვილის პარკში გადასატანი ხეების ამოთხრა დაიწყო [ფოტო, ვიდეო]

ციხისძირში ასწლოვანი ხეების გადატანის პროცესის განახლების შესახებ ინფორმაცია „ბათუმელებს“ ქობულეთის მუნიციპალიტეტის გამგეობის პრესსამსახურში დაუდასტურეს.

ადგლიზე მყოფ მოქალაქეს „ბათუმელები“ ტელეფონით დაუკავშირდა, მისი თქმით დღეს მხოლოდ ერთი ხის გადატანის სამუშაოები მიმდინარეობს. ამ დროისთვის ქობულეთის გამგეობის წარმომადგენლები ადგილზე არ იმყოფებიან.

გავრცელებული ინფორმაციით სპეციალური ბარჟა უკვე ციხისძირის სანაპიროსთან დგას, რომლითაც ხეს დენდროლოგიურ პარკში გადაიტანენ.
სამუშაოებს კომპანია “ზიმო” აწარმოებს.

შს სამინისტრო სასამართლოს კანონიერ ძალაში შესულ გადაწყვეტილებას არ ასრულებს – საქმე ეხება „გაზეთ ბათუმელების“ საჩივარს შს სამინისტროს წინააღმდეგ, რომელიც ამ უწყების პრემიების გასაჯაროებას უკავშირდებოდა. აღნიშნული საქმის შესახებ ბოლო, უზენაესი სასამართლოს განჩინება „გაზეთ ბათუმელებს“ 2015 წლის 27 ოქტომბერს ჩაბარდა.

ამ განჩინების მიხედვით, უზენაესმა სასამართლომ წარმოებაში არ მიიღო სამინისტროს საჩივარი, რომელიც ითხოვდა პირველი და მეორე ინსტანციების სასამართლოების გადაწყვეტილების გაუქმებას. სარჩელის მიხედვით, შს სამინისტროში მიაჩნდათ, რომ მაღალი თანამდებობის პირების პრემიების შესახებ ინფორმაცია განეკუთვნება პერსონალური ინფორმაციის კატეგორიას. სასამართლომ კი პირიქით, უწყებას ამ ინფორმაციის გასაჯაროება დაავალდებულა.

ამის მიუხედავად, შს სამინისტრომ სასამართლოს კანონიერ ძალაში შესული გადააწყვეტილების ნებაყოფილობით აღსრულება არ ისურვა. შესაბამისად, „გაზეთ ბათუმელები“ იძულებული გახდა უწყებისთვის მიემართა სააღსრულებლო ფურცლით. სააღსრულებლო ფურცელი საფოსტო გზავნილის სახით „გაზეთ ბათუმელების“ კანონიერმა წარმომადგენელმა – საქართველოს ახალგაზრდა იურისტთა ასოციაციამ 2016 წლის 11 თებერვალს გაუგზავნა შს სამინისტროს.

დღეს, 22 მარტს „გაზეთი ბათუმელები“ კიდევ ერთხელ დაუკავშირდა შს სამინისტროს საჯარო ინფორმაციის გამცემ სამმართველოს. პასუხი, თუ რატომ ვერ მოხერხდა დღემდე ინფორმაციის მოწოდება „გაზეთმა ბათუმელებმა“ უწყებისგან ვერც ამჯერად მიიღო.

„გაზეთმა ბათუმელებმა“ შს სამინისტროსგან პრემიების შესახებ ინფორმაცია, თანამდებობის პირების სახელებისა და გვარების მითითებით, 2013 წლის ბოლოს გამოითხოვა. ინფორმაციის ვერმიღების შემდეგ, 2014 წლის თებერვალს, რედაქციამ შინაგან საქმეთა სამინისტროს სასამართლოში უჩივლა. თბილისის საქალაქო სასამართლომ ამ საქმეზე გადაწყვეტილების გამოტანა მხოლოდ 2015 წლის 27 თებერვალს მოახერხა და “ბათუმელების” საჩივარი ნაწილობრივ დააკმაყოფილა – დაავალდებულა პრემიების შესახებ ინფორმაციის გაცემა. თუმცა, პირველი ინსტანციის გადაწყვეტილება, შს სამინისტრომ მეორე ინსტანციაში გაასაჩივრა, სადაც სამინისტროს საჩივარი არ დაკმაყოფილდა.

გასული წლის შემოდგომაზე შს სამინისტროს საჩივრი დასაშვებად არ ცნეს უზენაესი სასამართლოს ადმინისტრაციულ საქმეთა პალატის მოსამართლეებმა – ვასილ როინიშვილის, ლევან მუსერიძისა და მაია ვაჩაძის შემადგენლობით.

მთელი ამ წლების განმავლობაში გაზეთ „ბათუმელების“ ინტერესებს საერთო სასამართლოებში საქართველოს ახალგაზრდა იურისტთა ასოციაცია იცავდა.

21 მარტს, სტუდენტების, ლექტორ-მასწავლებლებისა და უნივერსიტეტის წარმომადგენლობით ორგანოებს შორის ღია შეხვედრა, რომელიც სამ საათს გაგრძელდა, ხმაურიანი გამოდგა ბათუმის შოთა რუსთაველის სახელმწიფო უნივერსიტეტში. შეხვედრის მიზანი საუნივერსიტეტო საკითხებზე მსჯელობა იყო. შეხვედრას სტუდენტური მოძრაობა – “აუდიტორია #115”-ის წევრებიც ესწრებოდნენ, სწორედ მათი გამოსვლით დაიწყო დისკუსია და აღინიშნა, რომ ბსუ-ში მიმდინარე ეს პროცესი “აუდიტორია #115”-ის მანიფესტის პათოსიდან ამოდიოდა.

პირველი მომხსენებლის გამოსვლის შემდეგ ბსუ-ს სტუდენტური თვითმმართველობის წევრმა ლაშა ბობოხიძემ მიმართა საზოგადოებას: “მინდა ყველამ იცოდეს დღეს ვინ გვესაუბრება, ეს ის ხალხია, რომლებიც რამდენიმე ხნის წინ მოგვიწოდებდა თვითმმართველობის კაბინეტიდან ხატები გადაგვეყარა”, – განაცხადა მან. ამ მიმართვამ სტუდენტური თვითმმართველობის წევრი და მხარდამჭერი სტუდენტების აპლოდისმენტები დაიმსახურა, მოპასუხე მხარემ კი თვითმმართველობას სეკულარიზმზე მიუთითა:

„უნივერსიტეტი სეკულარული სივრცეა და დღესაც ვფიქრობთ, რომ თვითმმართველობის კაბინეტში იმხელა სამლოცველო კუთხე და ხატები არ უნდა იყოს”, – ასე უპასუხა თვითმმართველობას სტუდენტური საინიციატივო ჯგუფის წევრმა გიორგი ბაგრატიონმა.

შეხვედრაზე სტუდენტებმა უნივერისტეტის იდეისგან მოწყვეტაზე ისაუბრეს და აღნიშნეს, რომ პრაქტიკის მიხედვით, უნივერსიტეტი სხვადასხვა დროს, სხვადასხვა პოლიტიკური ძალის გავლენის ქვეშაა. ყურადღება გამახვილდა უნივერსიტეტებში “ოდეერის” ინსტიტუტის არსებობაზე. სტუდენტები შეხვედრაზე უნივერსიტეტის ადმნისტრაციის მხრიდან “ოდეერის” არსებობის დადასტურებას მოითხოვდნენ.

საუბარი შეეხო ყოფილ კანცლერს ედიშერ ჩავლეიშვილს და მის ნებაყოფილობით გადადგომას. ერთ-ერთი სტუდენტის მტკიცებით, ვიდრე კანცლერი გადადგომაზე განცხადებას დაწერდა, ერთი-ორი დღით ადრე იგი უნივერსიტეტის ეზოში დემონსტრაციულად ესაუბრებოდა შეიარაღებულ ენრიკო დევაძეს, პირს რომელზეც ამბობენ, რომ იგი ბსუ-ს “ოდეერია“.

დაისვა კითხვა, თუ რატომ აიყვანა თანაშემწედ ახალმა კანცლერმა უკვე ყოფილი კანცლერი და ამით შექმნა ახალი შტატი.

შეხვედრის ამ ნაწილის სადისკუსიო რეჟიმში, ბსუ-ს რექტორის მოვალეობის შემსრულებელმა, მერაბ ხალვაშმა აღნიშნა, რომ ის ვერც დაადასტურებს და ვერც უარყოფს ინფორმაციას იმის შესახებ, ასრულებს თუ არა ენრიკო დევაძე უშიშროების სამსახურის დავალებებს, რადგან ის არც უნივერსიტეტის შტატში ფიქსირდება და არც ზეწოლა განხორციელებულა მისი მხრიდან.

რაც შეეხება სტუდენტების შენიშნვნას, რომ ენრიკო დევაძე უნივერსიტეტის ტერიტორიაზე ცეცხლსასროლი იარაღით გადაადგილდება, მან აღნიშნა, რომ არასდროს შეუნიშნავს ენრიკო დევაძე ცეცხლსასროლი იარაღით უნივერსიტეტის ტერიტორიაზე.

ამ საკითხს გამოეხმაურა ბსუ-ს ლექტორი არმაზ კახიძე, რომელმაც თავდაპირველად რამდენჯერმე გაიმეორა, რომ „ეს პრობლემა აღარ დგას“, ხოლო სტუდენტების რეაქციის შემდეგ სიტყვაზე – “აღარ”, მან აღნიშნა რომ ასე არ უთქვამს და მსგავსი პრობლემა არც არასდროს მდგარა.

საკითხს გამოეხმაურა უნივერსიტეტის წარმომადგენლობითი საბჭოს წევრი, ბსუ-ს ლექტორი, უმაღლესი საბჭოს დეპუტატი გიორგი მასალკინიც, რომელმაც თვითმმართველობის წარმომადგენელ დამსწრე სტუდენტებს მიმართა, რომ მათ უნდა მიეცათ დამსწრეთა პოზიციების გაცნობის საშუალება და ასევე დასძინა, რომ უსაფრთხოების სამსახურის უნივერსიტეტში ყოფნას არ ეწინააღმდეგება იმ შემთხვევაში, თუ მისი ვინაობა ცნობილი იქნება და ის არ ჩაერევა უნივერსიტეტის შიდა პოლიტიკაში. მან ასევე აღნშნა, რომ წინააღმდეგია უნივერსიტეტს ტერტორიაზე ნებისმიერი პირის ცეცხლსასროლი იარაღით გადაადგლებსა.

გიორგი მასალკინმა ასევე გაიხსენა, რომ ედიშერ ჩავლეიშვილს კანცლერობის დროს დაუდგენელ პირთა დავალებით გაჰყავდა სტუდენტები და პროფესორ-მასწავლებლები სხვადასხვა მიტინგებზე. მასალკინის თქმით ჩავლეიშვილმა ხელისუფლების შეცვლის შემდგომაც არ აღიარა თუ ვის დავალებას ასრულებდა და ისე დატოვა თანამდებობა. მასალკინმა გაიხსენა ძველი ისტორიაც, როდესაც სტუდენტური თვითმმართველობის არჩევნებში ერთ-ერთ კანდიდატზე “ოდეერის” მხრიდან განხორციელდა ზეწოლა, რის შედეგადაც მან კანდიდატურა მოხსნა. თუმცა, როგორც მასალკინმა აღნიშნა, ეს იყო უნივერსტეტის ძველი გამოცდილება და ახლა ბსუ-ში მხოლოდ პიროვნულ დონეზე დგას თავისუფლების შენარჩუნების საკითხი.

უფრო დაძაბული აღმოჩნდა შეხვედრის ის ნაწილი, რომელიც ბსუ-ს სტუდენტურ თვითმმართველობის საქმიანობის განხილვას მიეძღვნა.

სტუდენტური თვითმმართველობის წარმომადგენლებისა და მათი მხარდამჭერების გაღიზიანება გამოიწვია ბსუ-ს სტუდენტური თვითმმართველობის ყოფილი თავმჯდომაროს უჩა აბრამიშვილის მმართველი პარტიის მხარდასაჭერ აქტიურობას, როცა 2012 წელს აბრამიშვილი ბეშუმში, შუამთობის დღესასწაულზე „ერთიანი ნაციონალური მოძრაობის“ მაისურში მხარს უჭერდა მაშინდელ მმართველ პარტიას თვითმმართველობის სხვა წევრებთან ერთად.

მომხსენებელ, სტუდენტური საინიციატივო ჯგუფის წევრ თამარ ბაუჟაძეს უჩა აბრამიშვილმა კონტრ-ბრალდებით უპასუხა და აღნიშნა, რომ იმ ექსკურსიაზე იმყოფებოდნენ სწორედ აღნიშნული საინიციატივო ჯგუფის წევრები დიანა და თამარ ბაუჟაძეები.

გარდა ამისა, სტუდენტური თვითმმართველობის წევრმა მინურ პაქსაძემ სანიციატივო ჯგუფის წევრ გიორგი ბაგრატიონს შეახსენა, რომ იგი სწორედ იმ თვითმმართველობის პრეზიდენტობისთვის იყრიდა კენჭს, რომლის გაუქმებასაც დღეს ითხოვს.

თვითმმართველობის წევრების მხრიდან გაისმა ბრალდება გოჩა სურგულაძის [ბსუ-ს ყოფილი სტუდენტი, ამჟამად თსუ-ს მაგისტრანტი, რომელიც მოძრაობა „აუდიტორია #115“-ის წარმომადგენლის სტატუსით ესწრებოდა შეხვედრას] და საინიციატივო ჯგუფის მიმართ, რომ ისინი წლების განმავლობაში „პროვოკაციებისა და კრიტიკის მეტს არაფერს აკეთებდნენ“. უჩა აბრამიშვილი მოუწოდებდა მათ გაეხსენებინათ ერთი ფაქტი, როდესაც სათანანმშრომლოდ, რაიმე ინიციატივით შესულან მის კაბინეტში.

თვითმმართველობის მხარდამჭერებმა სტუდენტურ საინიციატივო ჯგუფს ათეიზმსა და მარქსისტობაში დასდეს ბრალი.

შეხვედრაზე ურთიერთშეურაცხმყოფელი ბრალდებებიც გაჟღერდა. როგორც გოჩა სურგულაძემ საჯაროდ განაცხადა, უჩა აბარამიშვილი აგინებდა მათ, ვისაც ის „ოდეერი“ ჰგონია, რაზეც აბრამიშვილმა უპასუხა, რომ ვინც იმსახურებს, მას შეაგინებს კიდევაც. სტუდენტური თვითმმართველობის წევრი ლაშა ბობოხიძე რამდენიმე სტუდენტს ფიზიკური ანგარიშსწორებითაც დაემუქრა. უჩა აბრამიშვილმა ასევე განაცხადა, რომ „შეაკვდება და უნივერსიტეტში მარქსიზმის ბუდეს არ გაახსნევინებს არავის“.

უნივერსიტეტს დაამთავრებთ და მორჩება, მერე სად მიდიხართ, ყველანი უფლის წინაშე უნდა წარვსდგეთ! – ასე მიმართა სტუდენტური თვითმმართველობის ერთ-ერთმა მხარდამჭერმა გოგონამ სტუდენტური ინიციატივის ჯგუფის წევრებს.

საბოლოოდ დაპირისპირების განსამუხტად აკადემიური საბჭოს წევრმა გულიკო შერვაშიძემ სტუდენტებს სამუშაო ჯგუფის შექმნა შესთავაზა, რასაც რექტორიც დაეთანხმა.

შეხვედრის ბოლოს სტუდენტთა საინიციატივო ჯგუფმა მანიფესტი წაიკითხა, რის შემდეგაც ბსუ-ს სტუდენტურმა თვითმმართველობამ დემონსტრაციულად დატოვა 55-ე აუდიტორია შეძახილით: „გაუმარჯოს თვითმმართველობას, ძირს ათეისტები!“

შეხვედრის თითქმის სრული ვიდეოჩანაწერი “თავისუფალ ჟურნალისტთა სახლმა” მოამზადა. იხილეთ ვიდეომასალა:

21 მარტს ბათუმის შოთა რუსთაველის სახელმწიფო უნივერსიტეტის 55-ე აუდიტორიაში გაიმართა საჯარო შეხვედრა სტუდენტებს, ლექტორ-მასწავლებლებსა და უნივერსიტეტის სხვადასხვა წარმომადგენლობითი ორგანოების წევრებს შორის. შეხვედრას ასევე ესწრებოდნენ „აუდიტორია #115“ -ის წევრები. შეხვედრის ბოლოს სტუდენტთა საინიციატივო ჯგუფმა შეჯამების სახით სტუდენტური მანიფესტი წარმოადგინა, რომლის ტექსტსაც „ბათუმელები“ უცვლელად გთავაზობთ. მანიფესტს არ უერთდება ბსუ-ს სტუდენტური თვითმმართველობა.

ბათუმის შოთა რუსთაველის სახელმწიფო უნივერსიტეტის სტუდენტთა ნაწილი სრულიად ვიზიარებთ მოძრაობა „აუდიტორია #115“-ის მიერ წარმოდგენილ მანიფესტს, რომელიც ითვალისწინებს განათლების სისტემის ფუნდამენტურ რეფორმირებას და მასში სტუდენტების უშუალო მონაწილეობას. მიგვაჩნია რა, რომ ეს პროცესები არ შემოიფარგლება მხოლოდ თბილისის სახელმწიფო უნივერსიტეტით, არამედ ის სცდება მის ფარგლებს და ვრცელდება ქვეყნის მასშტაბით არსებულ ყველა უმაღლეს საგანმანათლებლო დაწესებულებაზე.

ჩვენს წინაშე მდგარი პრობლემათა ჯაჭვი პირდაპირ კავშირშია დღეს არსებულ განათლების სისტემასთან, რომელიც არ აძლევს უნივერსიტეტს რეალურ ავტონომიას და შესაბამისად ის ვერ იქნება სტუდენტებისა და ლექტორების აკადემიური თავისუფლების გარანტი.

წლების განმავლობაში ეს მანკიერი სისტემა იწვევდა რიგ პრობლემებს, რომლებმაც კიდევ უფრო მეტად ჩაკეტა საუნივერსიტეტო სივცრცე თავისუფალი, კრიტიკული აზრისაგან და ძალოვანი სტრუქტურებისა თუ პარტიული მუშაკების ჩარევით მთლიანად დაუქვემდებარა ის მმართველ პარტიებსა თუ სხვა პრივილეგირებულ პირებს. შესაბამისად, დღეს უნივერსიტეტი იქცა მმართველი ძალების/პარტიის პოლიტიკური ინტერესების გამტარად საზოგადოებაში თუ პოლიტ. ცხოვრებაში.

დღევანდელ შეხვედრაზე წარმოებული პროცესი ცხადყოფს, რომ ბათუმის შოთა რუსთაველის სახელმწიფო უნივერსიტეტში დღემდე არსებობს ზემოთხსენებული პრობლემები და სისტემა კვლავაც განაგრძობს ძალადობას თავისუფალ აზრზე/სივრცეზე. ვფიქრობთ, რომ დღეს განხილული საკითხები მნიშვნელოვანი უნდა იყოს ბსუ-ს სტუდენტებისა და ლექტორებისათვის, საკითხები, რომლებიც დღემდე გამოუძიებელია ან კითხვის ნიშნებს ბადებს. კერძოდ:

1. 2007 წლის 8 ნოემბერს უნივერსიტეტის ტერიტორიაზე, მოხდა სპეციალური დანიშნულების რაზმის შეჭრა, რამაც გამოიწვია სასწავლო პროცესის ჩაშლა და მშვიდობიანი მომიტინგეების დარბევა, რომლებიც სოლიდარობას უცხადებდნენ 7 ნოემბრის აქტივისტებს. ამ დღეს ძალოვანი სტრუქტურების წარმოამდგენლებმა მშვიდობიანი საპროტეტსქტო აქციის მოანწილეები და სხვა სტუდენტები რეზინის ტყვიებისა და ცრემლსადენი გაზის გამოყენებით დაარბიეს.

2. უნივერსიტეტში ფიქსირდება შეიარაღებული პირი, რომელიც ბადებს გონივრულ ეჭვს, რომ ის არის ე. წ. „ოდეერი“. აღიძრას საქმე უნივერსიტეტში იარაღის ტარების უფლებაზე.

3. თვითმმართველობის პრივილეგირებული პირების მიერ ბიუჯეტის არამიზნობრივი ფლანგვა, არასაგანმანათლებლო, მათ შორის ისეთ ღონისძიებებში, რომლებიც სწორხაზოვნად ეწინააღმდეგება სეკულარიზმის პრინციპს.

ამის გათვალისწინებით, ბათუმის შოთა რუსთაველის სახელმწიფო უნივერსიტეტის სტუდენტების ნაწილი მოვითხოვთ, ზემოთაღნიშნული პუნქტების სასწრაფო გამოძებისათვის სპეციალური კომისიის შექმნას და საქმის ობიექტურობისა და გამჭვირვალობისათვის მესამე სექტორის წარმომადგენლების ჩართულობას.

ჩვენი ძირითადი მოთხოვნები გარდა გამოძიებისა არის შემდეგი:

1. მოხდეს ბათუმის სახელმწიფო უნივერსიტეტშიც უშიშროების საკითხის მოკვლევა, რომელშიც ჩაერთვებიან დამოუკიდებელი საგამოძიებო ჯგუფები;

2. მოხდეს თვითმმართველობის რეფორმირება; ჩვენ მოვითხოვთ ამ პროცესებში ჩართულობას, კომისიის შემადგენლობაში შესვლას, სადაც დაცული იქნება ძალთა ბალანსი მხარეებს შორის;

3. მოხდეს ბათუმის სახელმწიფო უნივერსიტეტის აუდიტორიებში ვიდეოთვლებისა და მოსასმენი აპარატების დემონტაჟი, რომელიც ლახავს სტუდენტებისა და ლექტორების უფლებებს;

4. მოხდეს წარმომადგენლობითი და აკადემიური საბჭოს რეფორმირება;

5. შეიქმნას სტუდენტებისა და ლექტორებისგან დაკომპლექტებული დამოუკიდებელი საბჭო, რომელიც განიხილავს და იმსჯელებს საუნივერსიტეტო სივრცეში არსებულ ყველა იმ პრობლემებზე და გამოწვევებზე, რომლებიც შეეხება უნივერსიტეტს.

წარმოდგენილი მოთხოვნების შესახებ ეფექტური რეაგირება ადმინისტრაციის მხრიდან უნდა მოხდეს „აუდიტორია #115“-ის მიერ შემუშავებული მანიფესტის პარალელურად, საქართველოს განათლების სამინისტროსათვის მიცემულ ვადებში. ჩვენი მოთხოვნების იგნორირების ან არაობიექტური გამოძიების შემთხვევაში საინიციატივო ჯგუფი იტოვებს უფლებას შეუერთდეს სტუდენტთა მასობრივ გაფიცვას“.