ბათუმში ვიზიტით იმყოფება ბრიტანული თეატრალური კომპანიის ,,GECKO“-ს ტექნიკური რეჟისორი ნეითან ჯონსონი. წელს, ბათუმში, კომპანია თეატრალურ გასტროლს გეგმავს, წარმოდგენილი იქნება სპექტაკლი – „ინსტიტუტი“. რეჟისორი დღეს ბათუმის მუსიკალური ცენტრის მატერიალურ-ტექნიკურ ბაზას გაეცნო და გასტროლისათვის საჭირო ტექნიკური დეტალები შეათანხმა.
აჭარის განათლებისა და კულტურის სამინისტროს ინფორმაციით, რეჟისორი ნეითან ჯონსონი, მინისტრის მოადგილეს ნათია სირაბიძესაც შეხვდება.
„კრიტიკოსების მიერ აღიარებული ფიზიკური თეატრის საცეკვაო დასი „Gecko“ 2001 წელს დაარსდა დიდ ბრიტანეთში. 2001 წლიდან დღემდე კომპანიამ 7 წარმოდგენა შექმნა, რომლებსაც დიდი წარმატება ხვდა წილად როგორც დიდ ბრიტანეთში, ასევე არაერთ საერთაშორისო თეატრალურ ფესტივალზე ევროპასა თუ აზიაში“ – ნათქვამია სამინისტროს მიერ მოწოდებულ ინფორმაციაში.
სამინისტროში მიიჩნევენ, რომ „ამ პროექტის მეშვეობით ქართველი მაყურებელი თანამედროვე ბრიტანული თეატრის ასპექტებს გაეცნობა, ხოლო ქართველი მსახიობები და რეჟისორები თანამედროვე ბრიტანული თეატრისა და დრამატურგიის მიმდინარეობებს, „რაც საბოლოოდ, სწორედ საშემსრულებლო ხელოვნების წარმომადგენელთა პროფესიული დონის ამაღლებას და საერთო შემოქმედებითი პროცესების გაუმჯობესებას შეუწყობს ხელს“.
„2013 წელს ბრიტანული კომპანია ,,Gecko“ სპექტაკლით ,,დაკარგულნი“ წარმოდგენილი იყო თბილისის საერთაშორისო თეატრალურ ფესტივალზე და „ქართველი მაყურებლისა და თეატრალური კრიტიკოსების ერთსულოვანი აღფრთოვანება დაიმსახურა.
,,Gecko“ ცნობილია განუმეორებელი სამყაროს წარმოქმნის უნარით, თავისი დახვეწილი სასცენო ხელოვნებისა და სულისშემკვრელი ქორეოგრაფიით. ,,ინსტიტუტში“ გამოყენებულია მოძრაობა, გამოსახულება და სხვადასხვა ქორეოგრაფიული სტილი ადამიანის ქცევის სირთულის, კომპლექსურობის უფრო ღრმად შესასწავლად. ვიზუალურად შთამბეჭდავი წარმოდგენა ამავდროულად უკიდურესად ინტიმური და იდუმალი, თუმცა ამასთანავე და ხშირად ძალიან სასაცილოც. პროექტი წარმოგვიდგენს ანალიზს, თუ როგორ ვზრუნავთ ერთმანეთისა და საკუთარი თავისთვის“ – ნათქვამია სამინისტროს მიერ თეატრალური ჯგუფის შესახებ გავრცელებულ ინფორმაციაში.
