Batumelebi

ბათუმის შემოვლითი გზა, ძირითადად, არსებული პროექტით აშენდება, თუმცა, გადამოწმდება და განახლდება განსახლებისა და მიწის გამოსყიდვის გეგმა. სიების გადამოწმება დაწყებულია. არის ოჯახები, რომლებიც აცხადებენ, რომ არსებული პროექტით ავტობანის ზემოქმედების ქვეშ აღმოჩნდებიან.

„თითქმის ყველა ინსტანციას მივმართეთ – ინფრასტრუქტურის სამინისტროს, საავტომობილო გზების დეპარტამენტს, აჭარის მთავრობას, აზიის განვითარების ბანკის წარმომადგენლობას თბილისში… ოფიციალური პასუხი ვერავისგან მივიღეთ“, – ამბობს მახინჯაურში მცხოვრები მირანდა ნაკაშიძე. მისი თქმით, მისი და კიდევ რამდენიმე ოჯახისთვის ავტობანის აშენების შემდეგ იქ ცხოვრება შეუძლებელი გახდება.

„იმ ზოლიდან, სადაც ავტობანი უნდა აშენდეს, სამი ოჯახი, ვინც სიაში არ ვართ, 11 მეტრით ვართ დაშორებული [სახლებთან ახლოს ხიდი კეთდება]. ამბობენ, რომ გზის პროექტი არ შეიცვლება. თუ ეს მართალია, ხიდთან 11 მეტრში, მაგისტრალის ქვეშ ცხოვრება ჩვენთვის შეუძლებელი იქნება“, – ამბობს თამარ ნაკაშიძე.

საქართველოს რეგიონული განვითარებისა და ინფრასტრუქტურის სამინისტროსა და საავტომობილო გზების დეპარტამენტში აცხადებენ, რომ ელოდებიან განსახლების გადამოწმებულ გეგმას, რის შემდეგაც განიხილავენ ნებისმიერ პრეტენზიას.

„ამ ეტაპზე არ არის შემოსული განსახლების განახლებული პროექტი. აქედან გამომდინარე, თუ ვის ეკუთვნის კომპენსაცია და ვის არა, ვერ ვისაუბრებთ. როდესაც პროექტირება დასრულდება, გვექნება საშუალება ვისაუბროთ ვის ეკუთვნის კომპენსაცია“, – უთხრეს „ბათუმელებს“ ინფრასტრუქტურის სამინისტროში.

კითხვაზე, რამდენ მეტრზე ვრცელდება ზემოქმედების არეალი – სამინისტროში ზოგადად პასუხობენ: „არსებობს საერთაშორისო ავტობანის სტანდარტები, რომლითაც ვხელმძღვანელობთ მშენებლობის პროცესში“.

განსახლების გეგმის განახლებაზე ამჟამად კომპანია „გეოგრაფიკი“ მუშაობს. კომპანიაში „ბათუმელებს“ განუცხადეს, რომ ისინი სწავლობენ მხოლოდ იმ ე.წ. „ბუფერულ ზოლს“, რომელიც მათ გზების დეპარტამენტმა მიაწოდა.

„ამ ზოლში მოხვედრილ ნებისმიერ ოჯახს, თუ მიწის ნაკვეთს გადავამოწმებთ, მაგრამ თუ ოჯახი ბუფერულ ზოლში არ ხვდება, მას ვერ გადავამოწმებთ. თავად დეპარტამენტმა უნდა გვითხრას, რომ დამატებით შევისწავლოთ ესა თუ ის ოჯახი ან ნაკვეთი“, – აღნიშნა სატელეფონო საუბარში „გეოგრაფიკის“ წარმომადგენელმა მალხაზ ხურციძემ.

„ყველაფერი უნდა იყოს შესწავლილი. სიაში ასე განცხადებებით ვერ შევიყვანთ ხალხს. ყველა მოსახლე იქნება შესწავლილი. რაც შეეხება პრეტენზიებს, ამ მოქალაქეების განცხადება ჩემთანაც არის შემოსული. ამ დღეებში სპეციალურად უნდა ჩავიდე თბილისში და პასუხსაც გავცემთ. ამ ეტაპზე, ეკუთვნის კომპენსაცია თუ არა – ამ ადამიანებს პასუხს ვერავინ გასცემს, ზუსტი აზომვები არ გვაქვს“, – განაცხადა „ბათუმელებთან“ საავტომობილო გზების დეპარტამენტის აჭარის დირექციის ხელმძღვანელმა ზურაბ სიხარულიძემ.

მისივე თქმით, ქობულეთის გზის მშენებლობის პროცესში უყურადღებოდ დეპარტამენტს არავინ დაუტოვებია: „შემიძლია გაჩვენოთ დამატებითი სიები და ისიც თუ რამდენზე გაიცა დამატებით კომპენსაცია მშენებლობის პროცეში. ქობულეთში საბოლოოდ 560 ოჯახზე გაიცა კომპენსაცია“.

ზურაბ სიხარულიძის თქმით, ის ამ დღეებში განსახლების დეპარტამენტიდანაც ელოდება სპეციალისტებს: „წინასწარ ნერვიულობენ – სახლი დაიბზარება, გზა არ გვექნება… ერთი ადამიანიც კი არ დაგვიტოვებია უყურადღებოდ, ყველას სიტუაცია განვიხილეთ. ექვსი ადამიანი დავობს დღეს – ხიდთან 11-20 მეტრში ვცხოვრობთო. არის კომუნისტების დროინდელი კანონი, სადაც წერია 50 მეტრი, მაგრამ, არის 25 მეტრიც, სადაც უნდა გაუკეთო ხმაურის დამხშობი [მაგალითად, 10-მეტრიანი ხეები უნდა დაირგოს], მტვრისგან დამცავი, დაჯახების შემანელებელი და გადმოვარდნის საწინააღმდეგო ბორდიურები კი ისედაც კეთდება ხიდებზე“.

მალხაზ ხურციძის თქმით, ბუფერული ზოლის სიგანე ზოგან 25, ზოგან 70 მეტრია. რაც შეეხება ზოლს მიღმა ტერიტორიას, ზემოქმედების ხარისხის დადგენა გარემოს დაცვის სამსახურების კომპეტენციაა [„გეოგრაფიკი“ განსახლების გეგმის საავტომობილო გზების დეპარტამენტთან ტენდერის შედეგად გაფორმებული ხელშეკრულების საფუძველზე ამოწმებს, რაშიც დეპარტამენტი 285 ათას ლარს გადაუხდის. გადამოწმება აგვისტოში უნდა დასრულდეს].

ბათუმის ასაქცევი გზის პირველ მონაკვეთზე [მახინჯაურიდან ჭოროხამდე] აშენდება 25 ხიდი, რომელთაგან სამი სატრანსპორტო კვანძებში იქნება განლაგებული; 5 კვანძი; 5 გვირაბი და მშენებლობისთვის საჭირო გვირაბები. ტრასის ჩვეულებრივი სიგანე 40 მეტრია, გარდა კვანძებზე, გვირაბებსა და ხიდებზე გამავალი მონაკვეთებისა. ხიდები გეგმის მიხედვით ორზოლიანია, მაგრამ მომავალში გაფართოვდება 4 ზოლამდე. ხიდების საშუალო სიგრძე შეადგენს 30 მეტრს [12-დან 50 მეტრამდე], ხოლო სიგანე – 15 მეტრს.

აჭარაში [48,4 კმ სიგრძის] ქობულეთისა და ბათუმის ასაქცევი გზების მშენებლობა აზიის განვითარების ბანკიდან მიღებული სესხით [500 მილიონი აშშ დოლარი] დაფინანსებული პროგრამის ფარგლებში დაიწყო. ბანკის სათავო ოფისიდან წარმომადგენლებს თბილისში ამ თვეში ელოდებიან.

ბათუმში მდებარე ძველი ავტოსადგურის შენობა და მიმდებარე ტერიტორია წლებია მნიშვნელოვნად არ განახლებულა. ავტოტრანსპორტით ყველაზე მეტად დატვირთული ავტოსადგურის 30-პროცენტიანი წილის მფლობელი აჭარის ფინანსთა და ეკონომიკის სამინისტროა, 60 პროცენტის კი – სააქციო საზოგადოება.

ბათუმის სახელმწიფო უნივერსიტეტის სტუდენტურმა მოძრაობამ – „ავტონომია უნივერსიტეტს“ 22-ის აპრილის განცხადებაზე, უნივერსიტეტის რექტორის მოვალეობის შემსრულებლისგან ოფიციალური პასუხი მიიღო. როგორც „ავტონომია უნივერსიტეტს“ წევრები აცხადებენ, რექტორის მოვალეობის შემსრულებელთან 25 მარტს შეტანილ განცხადებაზე მიღებული პასუხი სტუდენტებისთვის არადამაკმაყოფილებელი აღმოჩნდა. ამიტომ მათ კონკრეტებული კითხვებით ბსუ-ს ადმინისტრაციას კიდევ ერთხელ [22 აპრილს] ხუთ ძირითად საკითხზე მიმართეს:

საუნივერსიტეტო საქმიანობაში ჩარევა – ამ პუნქტში მოცემულია 21 მარტის შეხვედრაზე ყოფილი პრორექტორის, ირაკლი ბარამიძისა და ბსუ-ს მოქმედი ლექტორის, აჭარის უმაღლესი საბჭოს დეპუტატის, გიორგი მასალკინის ხმაურიანი განცხადებები. სტუდენტები ამ განცხადებებზე მოკვლევის დაწყებასა და მათ ირგვლივ გაჩენილ კითხვებზე პასუხებს ითხოვდნენ.

სტუდენტური თვითმმართველობა – ამ პუნქტში სტუდენტები ითხოვენ სამი სტუდენტის – მინურ პაქსაძის, უჩა აბრამიშვილისა და ბოჩია ზარანდიას ევროპაში გამგზავრების, წვეულებებისა და საჯარო სივრცის სეკულარულობის პრინციპის დამრღვევ ღონისძიებათა ხარჯების შესახებ ინფორმაციას. აღნიშნულ პუნქტში ნათქვამია: „თვითმმართველობას არ აქვს უფლებამოსილება დამოუკიდებლად განკარგოს ბიუჯეტი და, შესაბამისად, მას ვერ ექნება ბიუჯეტის არამიზნობრივი ხარჯვა, სწორედ ეს გვაძლევს საშუალებას დავაყენოთ ადმინისტრაციის პასუხისმგებლობის საკითხი. რადგანაც მათ მიერ მოხდა იმ თანხების გამოყოფა, რომლებიც თვითმმართველობამ მოითხოვა და არამიზნობრივად დახარჯა. მოვითხოვთ შესაბამისმა სამსახურებმა მოიკვლიონ არსებული ხარჯები, ყურადღება გაამახვილონ იმ ხარჯებზე, რომლებიც სცდება აკადემიური სფეროს ინტერესებს“. 

ვიდეო-კამერები – ამ პუნქტის თანახმად სტუდენტური მოძრაობის წევრები ითხოვენ სალექციო აუდიტორიებში არსებული ვიდეო-კამერების დემონტაჟს, როგორც აკადემიური თავისუფლებისთვის უნივერსიტეტის მზაობის დამადასტურებელ ქმედებას.

ცეცხლსასროლი იარაღით გადაადგილება საუნივერსიტეტო სივრცეში – ამ პუნქტში ნათქვამი იყო იმაზე, რომ უნივერსიტეტის რექტორის მოვალეობის შემსრულებელმა მერაბ ხალვაშმა პირად საუბრებში თქვა, რომ მან ენრიკო დევაძისგან [პირი, რომელსაც მოძრაობის წევრები არაოფიციალურ „ოდეერად“ ასახელებენ] მოისმინა სავარაუდო შესაძლებლობა 2014 წელს უნივერსიტეტის ტერიტორიაზე შეიარაღებული გადაადგილების შესახებ. სტუდენტები ამ საკითხზე შემდგომი რეაგირების შესახებ ინფორმაციას ითხოვდნენ.

წერილში, რომელიც სტუდენტური მოძრაობის წევრებმა ბსუ-ს რექტორის მოვალეობის შემსრულებლის ხელმოწერით მიიღეს და ზემოთ ჩამოთვლილ პუნქტებზე პასუხებს შეიცავს წერია, რომ უნივერსიტეტის რექტორისა და რექტორის მოვალეობის შემსრულებლის, ისევე როგორც კანცლერის არჩევნები ჩატარდა  მშვიდ გარემოში, საარჩევნო პროცედურების სრული დაცვით და მასთან დაკავშირებით არც ერთ კანდიდატს პრეტენზია არ გამოუთქვამს [მათ შორის არც ირაკლი ბარამიძეს].

ირაკლი ბარამიძის განცხადებასთან დაკავშირებით წერილში ასევე ნათქვამია: „შეგიძლიათ მიმართოთ ბატონ ირაკლი ბარამიძეს, რომელსაც არჩევნების მიმდინარეობის პროცესში ეკავა რექტორის მოადგილის თანამდებობა“.

წერილში განმარტებულია ახალი კანცლერის დანიშვნის შემდეგ ბსუ-ს საშტატო განრიგისთვის ადმინისტრაციის ხელმძღვანელის აპარატის უფროსის თანამდებობის დამატებისა და ამ თანამდებობაზე ყოფილი კანცლერის, ედიშერ ჩავლეიშვილის დანიშვნის საკითხი. ეს საკითხი ახსნილია სამართლებრივი რეგულაციებით, რის საფუძველზეც იქნა გადაწყვეტილება მიღებული.

წერილში ასევე აღნიშნულია, რომ სტუდენტური მოძრაობის განცხადების ასლები გადაეგზავნათ ედიშერ ჩავლეიშვილსა და გიორგი მასალკინს, რათა წარმოადგინონ თავიანთი მოსაზრებები. უნივერსიტეტს არ აქვს ინფორმაცია ედიშერ ჩავლეიშვილის მიერ თანამდებობაზე ყოფნის პერდიოში რაიმე ტიპის პოლიტიკური დაკვეთების შესრულების შესახებ [რაზეც გიორგი მასალკინი საუბრობდა 21 მარტის შეხვედრაზე].

სტუდენტური თვითმმართველობის შესახებ დასმულ საკითხზე განმარტებულია დასახელებული სამი სტუდენტისათვის ქალაქ ვენაში გამართულ შეხვედრებში მონაწილეობის ხარჯის ანაზღაურების სამართლებრივი ინსტრუმენტები: “სტუდენტებმა წარმოადგინეს ყველა შესაბამისი დოკუმენტი”. თუმცა აუდიტის დასკვნაში ნათქვამია, რომ „გაცემული თანხის მგზავრობისთვის, პროგრამაში მონაწილეობის რეგისტრაციისა და ცხოვრებისთვის ხარჯვის დამადასტურებელი მტკიცებულება ვერ იქნა წარმოდგენილი“.

ვიდეო-კამერების შესახებ ნათქვამია, რომ „განცხადება გადაეგზავნა უნივერსიტეტის ფაკულტეტების ადმინისტრაციას, რათა წარმოადგინონ სამსახურებრივი ბარათები ვიდეო-კამერების განთავსების ადგილებზე არსებობის საფუძვლიანობისა და მიზანშეწონილობის შესახებ“.

ცეცხლსასროლი იარაღით უნივერსიტეტის სივრცეში გადაადგილების საკითხთან დაკავშირებით სტუდენტებს ეცნობებათ, რომ უნივერსიტეტის დოქტორანტ ენრიკო დევაძეს გაეგზავნა განცხადების ასლი შესაბამისი განმარტების წარმოსადგენად და მიღებული პასუხი დამატებით ეცნობებათ სტუდენტებს.

უნივერსიტეტის ტერიტორიაზე კიდევ ერთი პირის იარაღით გადაადგილებაზე ასევე მითითებულია წრილში, რომელიც სტუდენტებმა უნივერსიტეტისგან 5 აპრილს მათი 31 მარტის განცხადების პასუხად მიიღეს. ამ წერილში უნივერისტეტის კანცლერი იტყობინებოდა, რომ მართლაც დადგინდა 30 მარტს 14 საათიდან 15 საათამდე შუალედში უნივერსიტეტის ტერიტორიაზე შეირაღებული პირის გადაადგილება: „ეზოში შემოსულ ავტომანქანაში [ავტომანქანის მარკა „შკოდა“ სახელმწიფო ნომრისთ „XRX 089“]  იმყოფებოდა ორი პიროვნება, ერთი სამოქალაქო ტანსაცმლით, რომელიც აღმოჩნდა ბსუ-ს იურიდიული ფაკულტეტის  სტუდენტი – ზურაბ მამულაძე, ხოლო მეორე – პოლიციის თანამშრომელი ზვიად კერვალიშვილი [რომელსაც ტანთ ეცვა უნიფორმა წარწერით „პოლიცია“ და თან ჰქონდა ცეცლსასროლი იარაღი]. ისინი ავიდნენ უნივერსიტეტის მეორე კორპუსის მეხუთე სართულზე. ეს პიროვნებები შენობაში მცირე დროის განმავლობაში იმყოფებოდნენ, რის შემდეგაც მალევე დატოვეს უნივერსიტეტის ტერიტორია“.

კანცლერის ხელმოწერილი წერილში ასევე განმარტებულია, რომ 4 აპრილის წერილით ეთხოვა  აჭარის პოლიციის დეპარტამენტს შეიარაღებული პირების უნივერსიტეტის ტერიტორიაზე გადაადგილების მიზნების შესახებ ინფორმაციის მოწოდება.

„ავტონომია უნივერისტეტს“ წევრების თქმით, რექტორის მოვალეობის შემსრულებელმა, კიდევ ერთი ღია შეხვედრის ჩატარების შეთავაზებაზე უარი განაცხადა. თუმცა, დოკუმენტებში, რომელიც  “ბათუმელებს” მოგვიანებით გააცნეს უნივერსიტეტში, წერია, რომ ადმინისტრაცია მზად არის სხვა ნებისმიერ დროს მიიღოს მონაწილეობა სტუდენტების მიერ ორგანიზებული მსგავსი საკითხების განხილვაში. 

სტუდენტური მოძრაობა „ავტონომია უნივერისტეტს”, თბილისის სახელმწიფო უნივერსიტეტში მარტის თვეში განვითარებული მოვნლენებისა და სტუდენტური მოძრაობა „აუდიტორია #115“-ის ჩამოყალიბების პარალელურად შეიქმნა. თავდაპირველად ბსუ-ს სტუდენტთა ნაწილი „აუდიტორია #115“-ის წევრებს სოლიდარობას უცხადებდნენ და მათ მოთხოვნებს უერთდებოდნენ. მათ ასევე დააყენეს ბსუ-ში არაოფიციალური „ოდეერის“ არსებობის საკითხი.

21 მარტს, ბსუ-ს 55-ე აუდიტორიაში „ავტონომია უნივერსიტეტს“ ინიციატივით  ღია შეხვედრა მოეწყო სტუდენტების, ლექტორ-მასწავლებლებისა და უნივერსიტეტის წარმომადგენლობით ორგანოებს შორის.

შენიშვნა: მოცემული სტატიის თავდაპირველი ვერსია შეიცავდა გარკვეულ უზუსტობებს, შესაბამისად, ის ვებგვერდზე განთავსებულია შეცვლილი სახით.

12 მაისს მართლმადიდებელი ეკლესია მოციქულ ანდრია პირველწოდებულის საქართველოში შემოსვლის დღეს აღნიშნავს. ამავე დღეს აღინიშნება დიდაჭარობა.

ყოველწლიურად  ქვეყნის სხვადასხვა კუთხიდან მომლოცველები თუ საზოგადოების სხვა წარმომადგენლები ხულოს მუნიციპალიტეტის სოფელ დიდაჭარას სტუმრობენ, სადაც ანდრია პირველწოდებულის სახელობის ნაეკლესიარია. სოფელში იმართება კონცერტი და სხვადასხვა ღონისძიება.

წელს დიდაჭარობაზე სტუმრებს შორის იყვნენ აჭარის უმაღლესი საბჭოს თავმჯდომარე ავთანდილ ბერიძე, სხალთის ეპისკოპოსი სპირიდონი,  ხულოს საკრებულოს თავმჯდომარე ჯამბულ ხოზრევანიძე, ასევე ხულოსა და შუახევის გამგებლები – ბესიკ ბაუჩაძე და ტარიელ ებრალიძე.

სტუმრებმა ნაეკლესიარიდან დიდაჭარის საჯარო სკოლის შენობაში გადაინაცვლეს, სადაც სასულიერო პირებმა ღვთისმშობლისა და წმ. ანდრია პირველწოდებულის ხატებიც მიიტანეს.

სკოლის მოსწავლეებმა და ადგილობრივებმა სკოლაში საზეიმო კონცერტი გამართეს.

დღეს, 12 მაისს, ბათუმის დემოკრატიული ჩართულობის ცენტრში უმაღლესი საბჭოს დეპუტატებმა: მიშა მჟავანაძემ [ფრაქცია „მაჟორიტარები“], ასმათ დიასამიძემ [ფრაქცია „თავისუფლება“], პეტრე ზამბახიძემ და ეკატერინე თარგამაძემ [„ერთიანი ნაციონალური მოძრაობა“]  ერთიანი ბრიფინგი გამართეს. ისინი აჭარის თავმჯდომარის მიერ  აჭარის უმაღლესი საარჩევნო კომისიის თავმჯდომარეობის კანდიდატად უმაღლესი საბჭოსთვის დავით ქარცივაძის, ხოლო უსკოს წევრობის კანდიდატებად მამუკა ჯაშისა და ირაკლი გვარამიას კანდიდატურების წარდგენას გამოეხმაურნენ. მათი თქმით მხარს არ დაუჭერენ დავით ქარცივაძისა და მამუკა ჯაშის კანდიდატურებს და იგივესკენ მოუწოდებენ სხვა დეპუტატებსაც.

„ძალიან ბევრი ღირსეული ადამიანი იყო სწორედ იმ სიაში, რომლიდანაც აარჩიეს დეპუატატის შვილი და  პარტიული ნიშნით, ცალკეული პარტიის – „ქართული ოცნების“ პარტიის წევრი. ეს არის მიუღებელი და მოვუწოდებ ყველა ადამიანს, ყველა დეპუტატს, ვინც მიიღებს ამ გადაწყვეტილებას, რომ არ წავიდეს კანონის და საკუთარი პრინციპების წინააღმდეგ, რათა არ მივიღოთ მართული საარჩევნო ადმინისტრაცია“, – განაცხადა „ერთიანი ნაციონალური მოძრაობის“ წევრმა, უმაღლესი საბჭოს დეპუტატმა პეტრე ზამბახიძემ.

ფრაქცია „თავისუფლების“ წარმომადგენელმა, ასმათ დიასამიძემ განაცხადა, რომ ფრაქციის ორი წევრი – თავად, ასმათ დიასამიძე და მურმან ბერიძე, უერთდებ აღნიშნულ განცხადებას და თვლიან, რომ აჭარის მთავრობის თავმჯდომარემ, არჩილ ხაბაძემ მიკერძოებულად წარმოადგინა კანდიდატურები და უარი თქვა სხვა ნეიტრალურ კანდიდატებზე კომისიის მიერ წარდგენილი სიიდან:

„ამ შემთხვევაში ძალიან გულდასაწყვეტია, რომ „ქართული ოცნება“ ცდილობს თავისი კანდიდატურის და კანდიდატის წარმოდგენას, მხარდაჭერას. მე მოვუწოდებ ჩემს კოლეგებს, რომ პირველ რიგში იყვნენ მართლანი საკუთარი თავისა და საზოგადოების წინაშე“, – განაცხადა ასმათ დიასამიძემ.

სოციალური მეწარმეობის ხელშესაწყობად კონკურსი გამოცხადდა. პროექტის ფარგლებში, წლის განმავლობაში 4 პროექტი შეირჩევა. თითოეული ჯგუფი დაფინანსების სახით 8 ათას ევროს მიიღებს. პროექტი ითვალისწინებს იმ ბიზნესპროექტის განხორციელებას, რომელიც რომელიმე სოციალური პროგრამის მოგვარებას შეუწყობს ხელს, მაგალითად, შეზღუდული შესაძლებლობის მქონე პირთა, ტრეფიკინგის მსხვერპლთა დასაქმება, ინტეგრაციის ხელშეწყობა, ბიოლოგიურად სუფთა პროდუქციის წარმოება და ასე შემდეგ.

პროექტს სტრატეგიული კვლევებისა და განვითარების ცენტრი, ასევე ქუთაისის განათლების, განვითარებისა და დასაქმების ცენტრი უწევს ორგანიზებას ევროკავშირის მხარდაჭერით. დღეს პროექტის ორგანიზატორებმა საინფორმაციო შეხევდრა ბათუმის დემოკრატიული ჩართულობის ცენტრში გამართეს.

„ამ პროექტის ერთ-ერთი მიმართულებაა ახალგაზრდების ჩართულობა. პროექტი სამწლიანია და ყოველწლიურად დაფინანსებული 4  ბიზნესჯგუფის გარდა, დაფინანსებას მიიღებს სტუდენტთა ერთი ჯგუფიც – დაახლოებით 20 ათასი ლარის ოდენობით. პროექტში ჩართული სტუდენტების ნაწილი ასევე მიიღებენ დაფინანსებას, დაახლოებით 1500 ლარის ოდენობით, უკვე არსებული სოციალური საწარმოების მხარდასაჭერად,“ – ამბობს „ბათუმელებთან“  სტრატეგიული კვლევებისა და განვითარების ცენტრის წარმომადგენელი გიგა ჩიტიშვილი.

ეს ცენტრი 2009 წლიდან ახორციელებს ამ პროექტს. ამჯერად სოციალური მეწარმეობის მხარდამჭერი ევროკავშირი გახდა და გაიზარდა პარტნიორი ორგანიზაციების ქსელიც. გიგა ჩიტიშვილის მონაცემებით, ქვეყნის მასშტაბით უკვე 50 სოციალური საწარმოა შექმნილი: „ბათუმში ასეთია „აგროდილერი“, რომელიც ეკოლოგიურად სუფთა მარწყვს აწარმოებს. სოციალური წარმოების კარგი მაგალითია ტრადიციული მოდის სახლიც, სადაც შშმ პორები ქართული ორნამენტებით ევროპულ ტანსაცმელს კერავენ“.

პროექტის ფარგლებში საკონსულტაციო ცენტრი ქუთაისში გაიხსნება. კონკურსში მონაწილეობა ნებისმიერ საინიციატივო ჯგუფს შეუძლია, სადაც მინიმუმ ორი წევრი მაინცაა გაერთიანებული. ყოველწლიურად 16 ჯგუფი შეირჩევა. მათ სოციალურ წარმოებაზე სამთვიანი ტრენინგი ჩაუტარდებათ. გამარჯვებული 4 გუნდი კი დაფინანსებას მიიღებს და სოციალურ საწარმოს აამუშავებს.

აჭარის ფინანსთა და ეკონომიკის სამინისტრო ბნქ-ს ტერიტორიაზე არსებულ ანგარის ტიპის შენობის სამწლიანი იჯარით გაცემას გეგმავს. შესაბამისი უპირობო აუქციონი სამინისტროს გამოცხადებული აქვს და ის 13 მაისს უნდა დასრულდეს. ბათუმის ნავთობგადამამუშავებელი ქარხნის [ბნქ] ყოფილი დირექტორი აცხადებს, რომ ეს და სხვა ქონება თავის დროზე ქარხნის ბალანსიდან გაიტანეს, პარალელურად კი სამინისტრომ დაბლოკა ყველა ინიციატივა, რომელთა განხორციელებაც ქარხნისთვის დამატებითი შემოსავლის წყარო იქნებოდა.

ნავთობგადამამუშავებელი ქარხნის ყოფილი დირექტორი, ლევან ჯინჭარაძე აცხადებს, რომ ინვესტორების მოთხოვნა იყო  რკინიგზისა და სასაწყობე მეურნეობის მოწესრიგება, რასაც ქარხანამ იმ დროს გაართვა თავი, თუმცა ინვესტორები დაბლოკა აჭარის ფინანსთა და ეკონომიკის სამინისტრომ, „ამიტომ იძულებული გავხდი დამეწყო პერსპექტიული ტვირთების მოძიება. კერძოდ, კომპანია „ტრანსისტემი“ მზად იყო  ჩვენი საწყობის გავლით დაემუშავებინა მშრალი ტვირთი, საიდანაც წელიწადში 144 ათას ლარს მიიღებდა ქარხანა, ტვირთის არარსებობის შემთხვევაში კი კომპანია მზად იყო, [ფიქსირებულად] გადაეხადა წელიწადში 24 ათასი ლარი. ასევე გვქონდა „კარგო ტრანს გრუპის“ შემოთავაზება. ტექნიკურად შესაძლებელი იყო ორივე კომპანიის მომსახურება“.

ყოფილი დირექტორი ასევე ამბობს, რომ კომპანია „მაქსოილ პლიუსის“ თხოვნაც არ იქნა გათვალისწინებული იმავე სასაწყობე მეურნეობის მიწის ნაკვეთში რკინიგზის გასწვრივ მიწაში ჩაეფლო 200 გრძივი მეტრი ლითონის მილი, რათა გაეგრძელებინა მუშაობა.

„აქაც ქარხანამ  წელიწადში 74 250 ლარი დაკარგა. სამინისტროს მხრიდან უარის მიზეზები, როგორც სხვა, ასევე ამ შემთხვევაშიც, არ იქნა განმარტებული…  პროკურატურაში შევიტანე განცხადება სამინისტროს კორუფციულ სქემებზე, თუმცა პროკურატურის ერთადერთი პასუხი გახლდათ ის, რომ მასალები საგამოძიებო უწყებებს გადეცა,“ – ამაბობს ლევან ჯინჭარაძე, რომელიც ქარხნის დირექტორად 2013-2014 წლებში მუშაობდა.

ამჟამად გამოცხადებული აუქციონის მიხედვით, შენობის საწყისი წლიური სარგებლობის საფასური სამინისტროს მითითებული აქვს 2900 აშშ დოლარის ექვივალენტი ლარში. მოიჯარე შენობას 2019 წლის 13 მაისამდე ისარგებლებს. მას ასევე წარმოეშვება ვალდებულება, ხელშეკრულების შეწყვეტის თაობაზე სამინისტროს შეტყობინების დღიდან ერთ თვეში გამოათავისუფლოს საიჯარო ქონება. ქონებაზე გაწეული ხარჯები კი არ ანაზღაურდება.

აჭარის ფინანსთა და ეკონომიკის სამინისტროს პრესსამსახურში „ბათუმელებს“ უთხრეს, რომ ლევან ჯინჭარაძე „საწარმოთა მართვაში არსებული ნაკლოვანებების გამო უწყებამ გაათავისუფლა დაკავებული თანამდებობიდან. სასამართლოს საბოლოო გადაწყვეტილებით კი სამინისტრო იქნა გამართლებული. შესაბამისად, ჩვენი კომენტარი არის ის, რომ მისი განცხადებები რეალურ საფუძველს მოკლებულია“.

ლევან ჯინჭარაძის თქმით კი, საქმე არ დასრულებულა და ის დავის გაგრძელებას ევროპულ სასამართლოში აპირებს.

ანგარის ტპის შენობა-ნაგებობაში [516,96 კვ.მ] ამჟამად განთავსებულია შპს „ქ. ბათუმის N1 საავადმყოფოს“ საარქივო დოკუმენტაცია და ინვენტარი. სამინისტროს პრივატიზების განყოფილების უფროსის, ია ზაქარაძის განცხადებით, როცა აუქციონში გამარჯვებული გამოვლინდება, ისინი შენობას გამოათავისუფლებენ.

ტერიტორია, რომელზეც იჯარით გასაცემი ნაგებობა დგას, თავის დროზე ბათუმის ნავთობგადამამუშავებელი ქარხნის ბალანსზე იყო. საუბარია  დღეს უკვე აჭარის ავტონომიური რესპუბლიკის საკუთრებაში არსებულ, ქ. ბათუმში, თამარის დასახლება ბნქ-ს ტერიტორიაზე მდებარე ექვსი შენობა-ნაგებობის და მასზე დამაგრებული 40 547 კვ/მ არასასოფლო-სამეურნეო დანიშნულების მიწის ნაკვეთზე.

რა ქონებას ფლობს, რას საქმიანობს და რა სერვისს სთავაზობს კლიენტებს „ბათუმის ნავთობგადამამუშავებელი ქარხანა“? – ამ კითხვაზე არ გვიპასუხეს საწარმოში, რომელიც აჭარის ავტონომიური რესპუბლიკის საკუთრებაშია. 

დღეს, 11 მაისს, თურქეთის საკონსულოს მანქანას საკონსულოს ტერიტორიიდან გამოსვლის საშუალება იმ მძღოლებმა არ მისცეს, რომელთაც სარფის საბაჟოზე პრობლემები ექმნებათ. საპროტესტო აქციაზე შეკრებილი ათეულობით მძღოლი სამუშაოს გარეშე დარჩენას აპროტესტებდა. მათი თქმით, თურქეთის მხარის მებაჟეები მათ არ აძლევენ საშუალებას, ქართველი მუშები საკუთარი მიკროავტობუსებით თურქეთის ტერიტორიაზე შეიყვანონ. მძღოლები ამ პრობლემაზე უკვე რამდენიმე დღეა საუბრობენ.

მძღოლების საპროტესტო აქციას დღეს თავად თურქეთის კონსული იასინ თემიზქანიმი გამოეხმაურა. ის ჟურნალისტებთან ერთად, ერთ-ერთ მძღოლს და არასამთავრობო ორგანიზაცია “ჩვენი უფლებებისთვის” ხელმძღვანელს, თამაზ ბაკურიძეს შეხვდა.  კონსულის თქმით, ის ამ პრობლემის შესახებ ინფორმირებული არ იყო და მისი გარკვევა საკონსულოს თანამშრომელს დაავალა.

“პრობლემა იქნება იმის გამო, რომ მათ არ აქვთ შესაბამისი ნებართვა, რაც სატრანსპორტო საშუალებით თურქეთის ტერიტორიაზე რამდენჯერმე შესვლის საშუალებას მისცემს” – თქვა საკონსულოს წარმომადეგნელმა, რომელიც შეხვედრას შემოუერთდა. კონსულთან მყოფმა მძღოლმა თქვა, რომ თითოეულ მიკროავტობუსს შესაბამისი ნებართვა აქვს და ეს რეალური მიზეზი ვერ იქნება. “იქნებ იმის გამო გადაიტვირთა მოძრაობა, რომ ჩაის კრეფის სეზონი დაიწყო” – აღნიშნა კონსულმა, რასაც არასამთავრაბო ორგანიზაციის წარმომადგენელმა, თამაზ ბაკურიძემ ინიციატივით უპასუხა: “უმჯობესია, შეიმქნას მონიტორინგის ჯგუფი, რომელიც რეგულარულად ნახავს, რა მდგომარეობაა სარფის საბაჟოზე. როცა ორი დღის წინ იქ ტელევიზიებთან ერთად მივედი, უპრობლემოდ გაატარეს მანქანები.“

მონიტორინგის ჯგუფის შექმნას კონსული არ დაეთანხმა. ის მძღოლებს ვითარების გარკვევას დაჰპირდა.

შექმნილ პრობლემაზე ინფორმაციას არ ფლობენ შემოსავლების სამსახურში. უწყების პრესსამსახურში გვითხრეს, რომ მათთვის ამ პრობლემით თურქეთის საბაჟოს არ მოუმართავს.

გუშინ მძღოლებმა საპროტესტო აქცია სარფის საბაჟოსთანაც გამართეს. მათ თურქეთიდან მომავალ ავტობუსს არ მისცეს ბათუმის მიმართულებით წამოსვლის საშუალება: “ამის შემდეგ მოვიდა ჩვენი საპატრულო პოლიცია და მათი დახმარებით მოგვცეს გადასვლის საშუალება. დღეს ისევ ჩაგვიკეტეს გზა. მებაჟეები გაიძახიან, კოდი, კოდი არ არისო, მეტი არაფერი ვიცით” – ამბობს “ბათუმელებთან” როლანდ გორგილაძე, „დოუ კა­რა­დე­ნი­ზ ბათუმის“დირექტორი.

რამდენიმე კომპანიას მიკროავტობუსებით მუშები თურქეთის სხვადასხვა ქალაქში გადაჰყავთ. მძღოლების თქმით, ისინი მგზავრებს უფრო იაფად ემსახურებიან, ვიდრე თურქეთის მხარეს მდგომი სატრანსპორტო საშუალებები. “ამას გარდა, ჩვენ სარფიდან კონკრეტულ სოფლამდე აგვყავს მუშები, სადაც მათ ჩაი, ან თხილი უნდა დაკრიფონ” – გვითხრა როლანდ გორგილაძემ.

აჭარის უმაღლესი საარჩევნო კომისიის თავმჯდომარეობის კანდიდატად აჭარის მთავრობის თავმჯდომარემ, არჩილ ხაბაძემ უმაღლეს საბჭოს დავით ქარცივაძის, ხოლო უსკოს წევრობის კანდიდატებად მამუკა ჯაშისა და ირაკლი გვარამიას კანდიდატურები წარუდგინა.

დავით ქარცივაძის საარჩევნო გამოცდილება: 2005-2010 წლებში დავით ქარცივაძე #81 საოლქო საარჩევნო კომისიის თავმჯდომარედ მუშაობდა. 2014 წლის ადგილობრივი თვითმმართველობის არჩევნებში „ქართული ოცნება – დემოკრატიული საქართველოს“ წარმომადგენელი იყო N79 ბათუმის საოლქო საარჩევნო კომისიაში. დავით ქარცივაძე სახელისუფლებო გუნდს წარმოადგენდა 2013 წლის 27 ოქტომბრის საქართველოს პრეზიდენტის არჩევნებშიც N79 ბათუმის საოლქო საარჩევნო კომისიაში. 2012 წლის პირველი ოქტომბრის საქართველოს პარლამენტის არჩევნებზე არასამთავრობო ორგანიზაცია „მოდუს ვივენდი“-ს დამკვირვებელი იყო.

ოპოზიციური ფრაქციები უმაღლეს საბჭოში, რომლებმაც უსკოს თავმჯდომარეობის კანდიდატურას მანამდე მხარი სამჯერ არ დაუჭირეს, არჩილ ხაბაძისგან ნეიტრალური, არაპარტიული კანდიდატის წარდგენას ითხოვდნენ.