საქართველოს დამოუკიდებლობის დღესთან, 26 მაისთან დაკავშირებით, დღეს, 12 მაისს, ბათუმში, „ვარდების სკვერში“ დამოუკიდებლობის დღესთან დაკავშირებული ექსპონატები გამოფინეს. გამოფენა ბათუმში 17:00 საათამდე გაგრძელდება, ხვალ კი ექსპონატებს ოზურგეთში გამოფენენ. საქართველოს მთავრობის მხარდაჭერით, საქართველოს პარლამენტის ეროვნული ბიბლიოთეკა ახორციელებს პროექტს, რომელიც ითვალისწინებს 1918 წლის საქართველოს დამოუკიდებლობის დღესთან დაკავშირებული ექსპონატების გატანას რეგიონებში.
საქართველოს პირველი კონსტიტუცია ფრანგულ ენაზე. გამოცემის წელი 1919.
ფოტო: ლელა დუმბაძის
პარლამენტის ეროვნული ბიბლიოთეკის წარმომადგენლის, ჯული ცხვედიანის თქმით, გამოფენაზე წარმოდგენილია საქართველოს 1918 წლის დამოუკიდებლობის აქტი, 1919 წელს, ფრანგულ ენაზე დაბეჭდილი საქართველოს პირველი კონსტიტუცია, 1918-21 წლებში დაწესებული პირველი ქართული ჯილდო თამარ მეფის ორდერი, პირველი პრეზიდენტის, ნოე ჟორდანიას პირადი ნივთები – საბეჭდი მანქანა, ხელჯოხი და სამელნეები. აქვეა წარმოდგენილი ნოე რამიშვილისა და ექვთიმე თაყაიშვილის ნაქონი ხელჯოხებიც.
ნოე ჟორდანიასა და ნოე რამიშვილის პირადი ნივთები.
ფოტო: ლელა დუმბაძის
ექსპონატები დასავლეთ საქართველოს ხუთ ქალაქში გამოიფინება, შემდეგ კი აღმოსავლეთ საქართველოს ქალაქებში გამოფენენ.
ექვთიმე თაყაიშვილის ხელჯოხი.
ფოტო: ლელა დუმბაძის
ნოე ჟორდანიას საბეჭდი მანქანა.
სამელნეები, რომლითაც ნოე ჟორდანია სარგებლობდა.
ნოე რამიშვილის პირველი სავიზიტო ბარათი
1918 წლის საქართველოს მთავრობის წევრები.
