ზუბალაშვილის და ლუკა ასათიანი ქუჩების კვეთაში საცხოვრებელი კორპუსის მშენებლობა ბათუმის საკრებულოს ფრაქცია„თავისუფალი დემოკრატების“ ხელმძღვანელმა, კობა ჩხეიძემ გააპროტესტა. მისი თქმით, სარეკრეაციო ზონაში მშენებლობა ყოველგვარი ნებართვის გარეშე მიმდინარეობს.
„საქმე გვაქვს სამართალდარღვევასთან, რომელსაც ხელი შეუწყო ბათუმის მერმა, საკრებულოს წინა თავმჯდომარე ირაკლი ჩავლეიშვილმა. ამ უკანონობას დღესაც უწყობს ხელს მერიის ზედამხედველობის სამსახური, რომელიც არ რეაგირებს ამ დარღვევებზე. ეს არის დივერსიული აქტი, რომელიც აჭარის ფინანსთა და ეკონომიკის სამინისტროს მხრიდანაც არის წახალისებული. ერთადერთი ინტერესი აქ არის ის, რომ ინვესტორი იყოს ფუფუნებაში საჯარო ინტერესების დაცვის ხარჯზე“ – აცხადებს კობა ჩხეიძე.
ბათუმის საკრებულოს თავმჯდომარის 2013 წლის N02/610 ბრძანებით ზუბალაშვილისა და ლუკა ასათიანის ქუჩების კვეთაში არსებული ტერიტორიის ნაწილი სარეკრეაციო ზონაა. ბრძანებას თან ახლდა რუკა, სადაც სარეკრეაციო ზონები მწვანე ფერითაა აღნიშნული.
ვიდრე ზუბალაშვილის ქუჩა N37-ში მშენებლობას კომპანია „DS GROUP” დაიწყებდა, ტერიტორიიდან 25 ძირი მრავალწლიანი ხე გადაიტანეს, 2 – მოჭრეს. ქალაქის ცენტრალურ ადგილას სარეკრეაციო ზოლს მალე მრავალსართულიანი კორპუსი ჩაანაცვლებს. „ორი ძირი კვიპტომერია ისეც მოსაჭრელი იყო, გამხმარი იყო თითქმის. დანარჩენი კი გადავრგით და ყველა კარგადაა“ – უთხრა „ბათუმელებს“ მერიის გამწვანების სამსახურის უფროსმა, ეთერ მაჭუთაძემ. მისი განმარტებით, 12 ძირი ოლიანდრა ლერმონტოვის ქუჩაზე მოწყობილ სკვერში გადაირგო, ხოლო დარაჩენს, მათ შორის რამდენიმე მუშმულას ხე, სპეციალურ სანერგეშია მოთავსებული და გამწვანების სამსახური მათ გადარგვას ბაგრატიიონის ქუჩაზე მოწყობილ სკვერში აპირებს.
„ეს ადგილი, როგორც მახსოვს, სარეკრეაციო ზონა არ არის. დაზუსტებით არქიტექტურის სამსახური გეტყვით“ – ასე გამოემხაურა დღეს კობა ჩხეიძის ბრიფინგს ბათუმის მერი, გიორგი ერმაკოვი. ქალაქის არქიტექტურის სამსახურის უფროსმა ირაკლი ახალაძემ კი, „ბათუმელების“ სატელეფონო ზარებს არ უპასუხა.
საკრებულოს წევრის, კობა ჩხეიძის განმარტებით, ბათუმის მერს თვალები დაახუჭინეს: „ნებართვა ასე 
არასწორად გასცა საკრებულოს მაშინდელმა თავმჯდომარე ირაკლი ჩავლეიშვილმა. მიუხედავად იმისა, რომ აქ მხოლოდ შენობის დემონმტაჟის ნებართვაა გაცემული, მიმდინარეობს საძირკვლის მომზადება ახალი მშენებლობლისთვის“
ზუბალაშვილის ქუჩაზე 3392 კვ/მ მიწის ნაკვეთი აჭარის ფინანსთა და ეკონომიკის სამინისტრომ 2009 წელს მიჰყიდა შპს „კმ გრუპს“. რამდენიმე თვის წინ ამ კომპანიამ ტერიტორია „DS GROUP“-ს გადასცა. გაფორმებული ხელშეკრულების მიხედვით, მშენებელი კომპანია ვალდებულია შეინარჩუნოს დარჩენილი სკვერი [რომელიც ასევე სარეკრეაციო ზონაა]. საუბარია რამდენიმე ძირ მაგნოლიაზე, საქალაქო სასამართლოს პირდაპირ.
ზუბალაშვილის #37
