ავტოსადგურები ტურისტული ქალაქების ერთ-ერთი სავიზიტო ბარათია. ბათუმს კი აქვს ავტოსადგური, რომლის ინფრასტრუქტურა წლებია არ განახლებულა. ქალაქის შემოსასვლელში არსებული სადგურის შენობა, ასევე მიმდებარე ტერიტორია მოუწესრიგებელია – მგზავრებს გადაადგილება არაჰიგიენურ გარემოში უწევთ. როგორც ჩანს, ბათუმის ავტოსადგურის განახლება ჯერ არ იგეგმება. ამ თემაზე სააქციო საზოგადოება „ბათუმის სადგურის“ უფროსის მოადგილემ, ბადრი სოლომონიძემ „ბათუმელების“ კითხვებს უპასუხა.
ბადრი სოლომონიძე
ინფრასტრუქტურა გასაახლებელია და ვაპირებთ რაღაცების გაკეთებას. ტურისტული სეზონის დაწყებამდე მეორე სართულის მოწესრიგებას ვგეგმავთ შიგნიდან. გასულ წელს მეორე სართულზე სასტუმრო გავაკეთეთ და სახურავი მოვაწესრიგეთ. პირველ სართულზე ტერიტორია მთლიანად არის მობეტონებული, დანარჩენი კი კომერციული ობიექტებია და ცდილობენ მოაწესრიგონ გარემო… მთლიანობაში ინფრასტრუქტურაზე ჩვენ ვართ პასუხისმგებელი.
შენობის მიმდებარე ტერიტორიაზე, იქ, სადაც ავტოტრანსპორტი ჩერდება, არაფრის შეცვლას არ აპირებთ?
მიმდებარე ტერიტორიაც გვინდა მოვაწესრიგოთ, დავხაზოთ ადგილები და ისე გავაჩეროთ ავტომანქანები. მოიშლება ღობეც, რომელიც ავტოსადგომს აქვს შემოკრული, არც თავის დროზე იყო საჭირო მაგის გაკეთება.
ავტობუსების გასაჩერებელ ადგილზე სახურავი არის დახავსებული, წვიმა ჩამოდის და დგება ტბორები. ამ მიმართულებით რას შეცვლით?
მართალია, ეგ სახურავიც შესაბათქაშებელია და ამ სამუშაოებს წელს შევასრულებთ.
გაქვთ პროექტი, რისი მიხედვითაც აახლებთ შენობის ინტერიერს ან ექსტერიერს, თუ სამუშაოები სპონტანურად ხორციელდება?
ჩვენ გვინდა ყველაფერი კარგად იყოს, მაგრამ ჩვენი ეკონომიკური შესაძლებლობები ამის საშუალებას არ იძლევა. იმდენი არ არის, რამდენიც ავტოსადგურის ინფრასტრუქტურის მოწესრიგებასა და ევროსდანტარდებთან მიახლოებას სჭირდება.
სახელმწიფო წილი რამდენია „ბათუმის ავტოსადგურში“ და ამ წილიდან გამომდინარე აკისრია რაიმე პასუხისმგებლობა სახელმწიფოს?
ეკონომიკის სამინისტროს აქვს 30-პროცენტიანი წილი, მაგრამ ცალკე სამინისტრო ვერაფერს გააკეთებს, ერთად უნდა შევიმუშაოთ პროექტი.
როდის და რაზე იმუშავეთ ერთად და როგორია სამინისტროს პოზიცია მოუწესრიგებელ ინფრასტრუქტურაზე?
სამი წლის განმავლობაში 480 ათასი ლარის სარემონტო სამუშაოები გავაკეთეთ და ეკონომიკის სამინისტროსთვის ეს ცნობილია. გვქონდა სამმილიონიანი პროექტი, ინვესტორიც გვყავდა, მაგრამ წინა ხელისუფლებამ არ დაგვიმტკიცა და ინვესტორიც წავიდა.
მოქმედი მთავრობის დროს ხომ შეგეძლოთ ისევ წარგედგინათ ეს პროექტი?
რადგან ინვესტორი წავიდა, პრობლემები გაჩნდა და საქმე დღემდე სასამართლოშია. ვედავებით ინვესტორსაც და ძველ მთავრობასაც, ვითხოვთ პროექტზე დახარჯული თანხის კომპენსაციას. ორი პროექტი გავაკეთეთ, რომელიც 50 ათასი დოლარი დაგვიჯდა.
თქვენ თქვით, რომ შემოსავალი ცოტა აქვს სადგურს, ხომ არ აპირებთ ბიზნესპარტნიორის მოძიებას და რას შეცვლის ეს?
რა თქმა უნდა, მაგაზე ვფიქრობთ, რადგან სადგურების საკითხი ქალაქში მოწესრიგებული არ არის და მთელი ქალაქი გავსილია მიკროავტობუსებით, მინიბუსებით და ამის გამო მგზავრი სადგურში აღარ შემოდის. ამიტომ ვცდილობთ მოვიყვანოთ ვინმე პარტნიორი და გავზარდოთ შემოსავლები. სამი მილიონი ლარი სჭირდება სადგურის მოწესრიგებას, ეს თანხა კი ამ დროისთვის არ გვაქვს.
ბათუმის ავტოსადგური
