ბათუმელ აზერბაიჯანელებს დღეიდან საშუალება ექნებათ მშობლური ენა ბათუმში შეისწავლონ. ენის შესწავლის საკვირაო სკოლის გახსნის ცერემონია სასტუმრო „დივანში“ გაიმართა. ენის გაკვეთილები ამავე სასტუმროს შენობაში, ყოველ შაბათს ჩატარდება. მსურველებს ენას აზერბაიჯანიდან მოწვეული სპეციალისტები შეასწავლიან.
ოფიციალურ ღონისძიებას, 14 ოქტომბერს, „დივანში“ ბათუმელი აზერბაიჯანელები, აზერბაიჯანის გენერალური კონსული ბათუმში რაშად ფაილ ოღლუ ისმაილოვი, ასევე საკონსულოს წარმომადგენლები ესწრებოდნენ. საკვირაო სკოლას ბათუმში საკონსულო დააფინანსებს.
„ეს სკოლა არ იქნება მხოლოდ ბათუმში მცხოვრები აზერბაიჯანელებისთვის. აქ აზერბაიჯანული ენის შესწავლა ნებისმიერ მსურველს შეეძლება… სკოლას აზერბაიჯანის ხელისუფლება ფინანსურად უჭერს მხარს, ამასთან, აქ არა მარტო ენის გაკვეთილები ჩატარდება, არამედ საუბარი იქნება ისტორიასა და ორ ქვეყანას შორის ურთიერთობებზე“ – აღნიშნა „ბათუმელებთან“ გენერალურმა კონსულმა.
ენის შესწავლის კურსების გახსნის თხოვნით აზერბაიჯანის საკონსულოს ბათუმში, საქართველო-აზერბაიჯანის საქველმოქმედო ორგანიზაციამ მიმართა. ეს ორგანიზაცია ბათუმში ფუნქციონირებს და ის ერთგვარი სათვისტომოა ბათუმელი აზერბაიჯანელებისთვის. ორგანიზაციის პრეზიდენტის, ვიდადი ახუნდოვის განცხადებით, ბათუმში მცხოვრებ აზერბაიჯანელებს მშობლიური ენა ფაქტობრივად დავიწყებული აქვთ, ისინი ერთმანეთში ძირითადად ქართულად და რუსულად ურთიერთობენ. ენის შესწავლის სურვილი ოცზე მეტმა ადამიანმა უკვე გამოთქვა.
აზერბაიჯანელები აჭარაში, კერძოდ ბათუმში, ძირითადად მე-18 საუკუნის ბოლოსა და მე-19 საუკუნის დასაწყსიდან ცხოვრობენ. საზოგადოების ინფორმაციით, აჭარაში დღეს ათასზე მეტი ეროვნებით აზერბაიჯანელი ცხოვრობს.
აზერბაიჯანული ენის შემსწავლელი საკვირაო სკოლის პრეზენტაცია
აზერბაიჯანული ენის შემსწავლელი საკვირაო სკოლის გახსნა / ბათუმი / 14.10.2017
აზერბაიჯანული ენის შემსწავლელი საკვირაო სკოლის გახსნა / ბათუმი / 14.10.2017
