Batumelebi | ჭავჭავაძის ქუჩის გზაგამყოფზე ლითონის ღობე გაკეთდება ჭავჭავაძის ქუჩის გზაგამყოფზე ლითონის ღობე გაკეთდება – Batumelebi
RU | GE  

ჭავჭავაძის ქუჩის გზაგამყოფზე ლითონის ღობე გაკეთდება

ბათუმში, ჭავჭავაძის ქუჩაზე [ბარათაშვილის ქუჩიდან – წრიულიდან] 26 მაისის ქუჩამდე] მდებარე გზაგამყოფზე ლითონის ღობე მოეწყობა.

გზის აღნიშნულ მონაკვეთზე ბოლო დროს გახშირდა ავტოსაგზაო შემთხვევები, რომლის დროსაც დაიღუპა და დაშავდა არაერთი ქვეითი.

მიუხედავად, იმისა, რომ აქ არის ზებრა-გადასასვლელები, ქალაქის საზოგადოების ერთ-ერთი მოთხოვნა – გზის აღნიშნულ მონაკვეთში ავტოავარიების პრევენციის მიზნით – სწორედ ღობის მოწყობა იყო.

ლითონის ღობის მოწყობაზე ბთუმის მერიამ ტენდერი უკვე გამოაცხადა. ღობის მოსაწყობად 66 299 ლარია გათვალისწინებული.

შესაბამისი ტენდერი 2017 წლის 25 აგვისტოს დასრულდება, ხოლო სამუშაოები უნდა განხორციელდეს ხელშეკრულების გაფორმებიდან 30 კალენდარული დღის განმავლობაში.

სამუშაოების მწარმოებელმა უნდა უზრუნველყოს:

სამუშაო ადგილის ფარგლებში გარემოზე ეკოლოგიური ზემოქმედების მინიმუმამდე დაყვანა;
ასევე მინიმუმამდე დაიყვანოს სამუშაოებთან დაკავშირებული ხმაურის, ვიბრაციის და მტვრის გავლენა გარემოზე;
ყველა სახის მოსამზადებელი სამუშაოების დაწყება შეთანხმებული უნდა იყოს ქ. ბათუმის მერიის კეთილმოწყობის სამსახურთან;
სამუშაოების დასრულების შემდეგ შემსრულებელი თავისი ძალებით და სახსრებით 5 დღის განმავლობაში ვალდებულია გაათავისუფლოს სამუშაო ადგილი სამშენებლო მოწყობილობა-დანადგარებისაგან, მასალებისაგან, დროებითი ნაგებობებისაგან და ა.შ.

პროექტის მიხედვით, მოაჯირები გაკეთდება ნხოლოდ გზაგამყოფზე. რაც შეეხება უშუალოდ ჭავჭავაძისა და 26 მაისის კვეთას [სადაც ასევე არაერთი ავტოსაგზაო შემთხვევა მოხდა], ამ ადგილზე არაფერი იცვლება. აღნიშნულ კვეთაში არც შუქნიშანია. აქ შუქნიშნის დამონტაჟება არ არის გათვალისწინებული არც იმ პროექტით, რომლითაც ქალაქში ახალი შუქნიშნები უნდა განთავსდეს, რისთვისაც 1,3 მილიონამდე ლარია გათვალისწინებული.

ჭავჭავაძის ქუჩის მონაკვეთი სადაც გზაგამყოფზე ლითონის ღობე გაკეთდება

ჭავჭავაძის ქუჩის მონაკვეთი სადაც გზაგამყოფზე ლითონის ღობე გაკეთდება

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com