ფოტოები სანდასუფთავების სამსახურის ფეისბუქგვერდიდან.  

ძლიერმა ქარმა ბათუმის რუსთაველის უნივერსიტეტის შენობის ნაწილს სახურავი ღამით გადახადა. უნივერსიტეტის ადმინისტრაციის ინფორმაციით, დაზიანებულია სახურავის 1/4. ქარისგან მიყენებული ზარალის ოდენობა კი ჯერ არ დაუთვლიათ.

„ჯერ ისევ სტიქიას ვებრძვით, წვიმა არ წყდება, ამიტომ ზარალის ოდენობა დათვლილი არ არის. სახურავის აღდგენა უნივერსიტეტის შიდა ფინანსური რესურსით მოხდება, თუმცა დიდი ალბათობით საჭირო იქნება თანხის დამატებაც.

უკვე ვესაუბრეთ მთავრობის თავმჯდომარეს და ძალიან მოკლე დროში ელექტრონული ტენდერით მოხდება სამუშაოების შესყიდვა,“-ამბობს „ბათუმელებთან“ საუბარში ნინო დოლიძე, უნივერსიტეტის პრესსამსახურის წარმომადგენელი.

მისივე ინფორმაციით, წვიმის წყალს ზიანი არ მიუყენებია აუდიტორიებისთვის, „რადგან მეხუთე სართულზე განთავსებულია საცავი. ახლა ამ საცავში დაგროვილი წყლის ამოქაჩვა მიმდინარეობს,“-ამბობს ის.

ოფიციალური ინფორმაციით, სახურავის დაზიანებას სასწავლო პროცესის შეჩერება არ გამოუწვევია, გადარჩენილია წიგნადი ფონდიც.

7 ოქტომბერს სამშენებლო კომპანია „მეგა-პალასის“ დამფუძნებლი და ამ კომპანიის ერთ-ერთი თანამშრომელი დაჭრეს. 9 ოქტომბერს ბათუმის საქალაქო სასამართლომ ამ საქმეზე რამაზ ხიმშიაშვილს წინასწარი პატიმრობა შეუფარდა. მომხდართან დაკავშირებით დაზარალებული მხარის გამოხმაურებას უცვლელად გთავაზობთ:

„სიმართლე, მხოლოდ სიმართლე“

2017 წლის 7 ოქტომბერს ბათუმში, ფიროსმანის ქ. #18-ში, სამშენებლო კომპანიების ოფისში საზარელი შემთხვევა მოხდა. დღისით, შუადღისას, ამჟამად წინასწარ პატიმრობაში მყოფი რამაზ ხიმშიაშვილი თავს დაესხა სამშენებლო კომპანიების ერთ-ერთ დამფუძნებელს, ჯუმბერ ზოიძეს. ცეცხლსასროლი იარაღით ორჯერ ესროლა ადამიანს, რომელიც გამოირჩევა წესიერებითა და მოყვასის სიყვარულით. არის სამშენებლო ბიზნესის ერთ-ერთი პიონერი ქ. ბათუმში. გაწეული აქვს ქველმოქმედებები და უანგარო დახმარება მრავალი ადამიანისათვის. მათ შორის თვით ბრალდებულის, რამაზ ხიმშიაშვილის მიმართაც. დაზარალებული ახლა უცხოეთშია სამკურნალოდ.

2017 წლის 9 ოქტომბერს ჟურნალისტმა ჯაბა ანანიძემ „ბათუმელებში“ გააშუქა ბრალდებულის, რამაზ ხიმშიაშვილის წინა სასამართლო პროცესი. აღნიშნულ პროცესზე ბრალდებული ცდილობს დეზინფორმაციით საზოგადოების შეცდომაში შეყვანას. კერძოდ, იგი აღნიშნავს, რომ კომპანია „მეგა პალასი“ მისი დაარსებულია და მან გააკეთა ყველაფერი. აღნიშნულთან დაკავშირებით რეალობა და სიმართლე შემდეგში მდგომარეობს:

ბრალდებულ რამაზ ხიმშიაშვილს არათუ დაარსებასთან, არამედ არავითარი შეხება არ ჰქონდა და მით უმეტეს არც ახლა აქვს სამშენებლო კომპანიებთან: „რეალ პალასთან“ და „მეგა პალასთან“, თუ არ ჩავთვლით იმას, რომ 2015 წლის 25 მარტიდან 26 ოქტომბრამდე იგი მუშაობდა „რეალ პალასის“ ობიექტზე უსაფრთხოების უფროსად, ხოლო 2015 წლის 1-ელი თებერვლიდან 2015 წლის ბოლომდე – ამწეს მემანქანედ.

ბრალდებულ რამაზ ხიმშიაშვილის მიმართ მიმდინარეობს საგამოძიებო მოქმედებები. ჩვენ მზად ვართ ვითანამშრომლოთ გამოძიებასთან ჭეშმარიტების დადგენისათვის, საიდანაც საზოგადოება გაიგებს რეალურ სიმართლეს ამ დანაშაულის შესახებ.“

ლევან ხიმშიაშვილი – შპს „რეალ პალასის“ და „მეგა პალასის“ დამფუძნებელი 

თამაზ ბექაია – „რეალ პალასის“ დამფუძნებელი

ედნარ ხიმშიაშვილი – „რეალ პალასის“ დირექტორი

ედვარდ ხიმშიაშვილი – „მეგა პალასის“ დირექტორი

გოჩა კამკია – კომპანიის იურისტი 

ხელვაჩაურის მუნიციპალიტეტის სოფელ ყოროლისთავში მცხოვრებმა კობა დუმბაძემ „ბათუმელებს“ მის საცხოვრებელ სახლთან გადაღებული ფოტოებს მოაწოდა. ფოტოების მიხედვით, საცხოვრებელ სახლთან მეწყერია განვითარებული.

კობა დუმბაძე ამბობს, რომ ის ხელვაჩაურის გამგეობას დაუკავშირდა და მდგომარეობის შესწავლა სთხოვა. „ჯერჯერობით არავინ მოსულა, მითხრეს, რომ ხვალ მოვლენ,“-გვითხრა მან სატელეფონო საუბარში.

მოქალაქის თქმით, ყოროლისთავში მეწყერი მხოლოდ მისი სახლის მიმდებარედ არის განვითარებული.

ინოპტიკოსების ცნობით, ამ წუთებში ბათუმში ხუთბალიანი, ქობულეთში კი ექვსბალიანი შტორმია ზღვაზე. ხვალ, როგორც სინოპტიკოსები გვეუბნებიან, ბათუმში წვიმიანი ამინდი შენარჩუნდება. „ზეგ წვიმა შესუსტდება, ოთხშაბათიდან კი მზიანი ამინდია მოსალოდნელი“.

ოთხშაბათს, 18 ოქტომბერს 17:00 სთ-ზე ჰაინრიჰ ბიოლის ფონდი ბათუმში გიწვევთ საჯარო დისკუსიაზე

თვითმმართველობის არჩევნები: როგორ მივიღოთ ადგილობრივი დემოკრატიული ხელისუფლება?

მომხსენებლები:

• ასლან ჭანიძე – იურისტი, „თავისუფალ ჟურნალისტთა სახლის“ ხელმძღვანელი;
• პეტრე ზამბახიძე – ბათუმის მერობის კანდიდატი „ევროპული საქართველოდან“;
• ზვიად ქორიძე – ჟურნალისტი;

მოდერატორი:

• ნატა იმედაიშვილი – ჟურნალისტი

2017 წლის 21 ოქტომბერს დაგეგმილ თვითმართველობის არჩევნებს მნიშვნელოვანი როლი ენიჭება ქვეყნის დემოკრატიული განვითარებისთვის. ამ არჩევნების ერთ-ერთ მნიშვნელოვან გამოწვევად მიიჩნევა მოსახლეობის შემცირებული ინტერესი არჩევნებში მონაწილების მიმართ. ეროვნულ-დემოკრატიული ინსტიტუტის (NDI)-ის მიერ ჩატარებული ბოლო კვლევის თანახმად, გამოკითხული რესპოდენტების 43% სავარაუდოდ არ აპირებს არჩევნებში მონაწილეობას.

პრობლემურია ჩამოუყალიბებელი ამომრჩევლების მაღალი რაოდენობაც (62%), რაც გარკვეულწილად შესაძლებლობადაც შეგვიძლია განვიხილოთ პოლიტიკური პარტიებისთვის, რადგან მათ ეძლევათ საშუალება, დაარწმუნონ მერყევი ამომრჩევლები თავიანთი საარჩევნო პროგრამის უპირატესობაში.

დისკუსიაზე მსჯელობა იქნება შემდეგ საკითხებზე:

[checklist]

• ადგილობრივი დემოკრატიის ქართული გამოცდილება: როგორია ადგილობრივი თვითმმართველობის არჩევნების ძირითადი მახასიათებლები და დინამიკა? რამდენად იცვლებოდა თვითმმართველობის არჩევნების სპეციფიკა დროთა განმავლობაში?
• რა გავლენა იქონია ადგილობრივი თვითმმართველობის რეფორმამ 2017 წლის არჩევნებზე?
• რა არის მთავარი გამოწვევა პოლიტიკური პარტიებისთვის/დამოუკიდებელი კანდიდატებისთვის ოქტომბრის არჩვენებზე?
• რას ელიან მოქალაქეები?

[/checklist]

დასწრება თავისუფალია!

მისამართი: ქ. ბათუმი, ფარნავაზ მეფის ქ. 62-64 (დემოკრატიული ჩართულობის ცენტრი)

ქობულეთის გამგებლის სულხან ევგენიძის ინფორმაციით, ძლიერმა წვიმამ  სოფელ საჩინოში სამ სახლს სახურავი  გადახადა.  სოფელ აჭყვაში მეწყერი  ჩამოწვა, რის გამოც ერთი ოჯახის უსაფრთხო ადგილას გაყვანა გახდა საჭირო. მეწყრის გამო ჩახერგილია სოფელში მისასვლელი გზებიც.

სოფელ ლეღვაში კი, ჯინჭარაძეების სახლი დაიწვა. ოჯახში ექვსი ადამიანი ცხოვრობდა. როგორც გამგებელი ამბობს, ხანძრის შედეგად არავინ დაშავებულა, „თუმცა საცხოვრებელი სახლი მთლიანად განადგურდა.“

დაზარალებული ოჯახის წევრები ნათესავის სახლში გადაიყვანეს.

მთავარი ფოტო: სტიქია ქობულეთში / ფოტო „ბათუმელების“ არქივიდან

საქართველოს საავტომობილო გზების დეპარტამენტის ინფორმაციით, ინტენსიური თოვის და ქარბუქის გამო, ბათუმი-ახალციხის საავტომობილო გზის კმ106-კმ117 მონაკვეთზე [გოდერძის უღელტეხილი] ავტოტრანსპორტის მოძრაობა დასაშვებია მოცურების საწინააღმდეგო ჯაჭვების გამოყენებით.

15 ოქტომბერს სამაშველო სამსახურის თანამშრომლებმა ბეშუმის უღელტეხილიდან თოვლში ჩარჩენილი მგავრები გამოიყვანეს, სულ 13 ავტომანქანა.

მთავარი ფოტო: რიყეთი, ბათუმი-ახალციხის გზის მონაკვეთი / ფოტო „ბათუმელების“ არქივიდან

მახუნცეთის ჩანჩქერი ტურისტებს შორის ერთ-ერთი ყველაზე პოპულარული ადგილია აჭარაში. შემოდგომაზე აქ ტურიტების რაოდენობა, ისევე როგორც ბათუმში, მცირდება, თუმცა წვიმიანი ამინდის მიუხედავად, ჩანჩქერთან შორიახლოს მაინც არიან გამყიდველები, რომლებიც სუვენირებსა და ადგილობრივ ნაწარმს ყიდიან. წყალვარდნილი კი ძლიერი წვიმების ფონზე შედარებით მნიშვნელოვნად გაიზარდა.

სამაშველო სამსახურის ცნობით, დღეს, 15 ოქტომბერს სამაშველო სამსახურის თანამშრომლებმა ბეშუმის უღელტეხილიდან თოვლში ჩარჩენილი მგავრები გამოიყვანეს, სულ 13 ავტომანქანა.

„ეს სამარშრუტო ტაქსები იყო, რომელბიც ჩვეულებრივ, ემსახურებიან მგზავრებს. შეტყობინება შემოვიდა და სამი ჯგუფი გავიდა ადგილზე. თოვლის სიმაღლე იმ დროისათვის ნახევარტი მეტრი იყო“ – უთხრეს „ბათუმელებს“ სამაშველო სამსახურში.

დღეს ხულოს მუნიციპალიტეტის მაღალმთიან სოფლებში დილიდან თოვს. ხულოს გამგეობაში ამინდის გაუარესებასთან დაკავშირებით, მუნიციპალიტეტის გამგებლის მოვალეობის შემსრულებლის ლაშა ბოლქვაძის ხელმძღვანელობით მუდმივმოქმედი საგანგებო შტაბის სხდომაც გაიმართა.

მთავარი ფოტო: „ბათუმელების არქივიდან“

ბათუმის საჭადრაკო კლუბმა „ნონამ“ 11 მატჩქულით (17,5 პარტიებში აღებული ქულა) ევროპის საკლუბო ჩემპიონატზე ანტალიაში ოქრო მოიპოვა. „ნონას“ შემადგენლობაში თამაშობდნენ: ნანა ძაგნიძე, ჰარიკა დრონავალი (ინდოეთი), ნინო ბაციაშვილი, ბელა ხოტენაშვილი და სალომე მელია.

ეს ბათუმის საჭადრაკო კლუბ „ნონას“ მესამე გამარჯვებაა ევროპის საკლუბო ჩემპიონატზე. „ნონა“ 2014-2015 წლებშიც ევროპის ჩემპიონი იყო.

ჩემპიონატი კლუბებს შორის თურქეთში, ანტალიაში მიმდინარეობდა 7-15 ოქტომბერს. ევროპის საკლუბო პირველობა ყოველ წელს იმართება და მსოფლიოს საუკეთესო მოჭადრაკეებს უყრის თავს საჭადრაკო დაფასთან.

მთავარ ფოტოზე: ნინო ბაციაშვილი. ფოტო: Chess.com

_________________________________________

ამავე თემაზე: 

ნინო ბაციაშვილი მეხუთე ქართველი ქალი გროსმაისტერი გახდა

საქართველოს 2015 წლის ჩემპიონი ნინო ბაციაშვილი 

„ნონას“ მენეჯერი: ჩვენი მთავარი მიზანი ბავშვთა ჭადრაკის განვითარება იქნება 

ქობულეთის მერობის კანდიდატს „ქართული ოცნებიდან“ მირიან ქათამაძეს ამ დრომდე არ მოუსმენია კომპეტენტური მოსაზრება მრავალწლოვანი ხეების გადარგვის გამო ციხისძირის ეკოსისტემის დაზიანების თუ მოსალოდნელი შედეგების შესახებ. არც იმ სამშენებლო პროექტების შესახებ აქვს ინფორმაცია, რომელთა პარამეტრები დადგენილ რეგულაციებს გასცდა – კიდევ რა არ იცის ან იცის მერობის კანდიდატმა, რომელიც ამბობს, რომ მისი არჩევის შემთხვევაში ქობულეთში ტურიზმის ბუმს შექმნის? – ამ ყველაფერზე მან „ბათუმელების“ კითხვებს უპასუხა.

ბატონო მირიან, რატომ ხართ კარგი კანდიდატურა ქობულეთისთვის? 

ეს ერთ-ერთი უმნიშვნელოვანესი გამოწვევაა ჩემს ცხოვრებაში, რაც შეიძლებოდა ყოფილიყო. ყველაზე მნიშვნელოვანი, ალბათ, ის ფაქტორია, რომ რთულია საქმის კეთება შენს მშობლიურ მუნიციპალიტეტში, მშობლიურ ქალაქში გიწევს. მე მაქვს პროფესიული გამოცდილება, ასევე შრომისმოყვარეობა, გუნდური მუშაობის უნარი და, რა თქმა უნდა, პატიოსნებით გამორჩეული გუნდი. ჩვენ ალბათ შევძლებთ, რომ გადავწყვიტოთ ყველა ის პრობლემა, რაც დგას ქობულეთის მუნიციპალიტეტში.

მერს გათავისებული უნდა ჰქონდეს, რომ მისი მთავარი ფუნქცია საზოგადოების მსახურებაა. ვიმედოვნებ, შევძლებ ვიმუშაო იმ გუნდთან ერთად, რომელსაც ეს გათავისებული ექნება. ჩვენ, ალბათ, ვჭირდებით ქობულეთს – გაბედული ადამიანები გაბედული იდეებით იმისთვის, რომ ძალიან ბევრი იდეა, რომელიც სუფთა, ლამაზი, მიმზიდველი ქალაქის იდეას უკავშირდება, რეალობად იქცეს.

ამ იდეებით თავად შესთავაზეთ საკუთარი კანდიდატურა „ოცნებას“, თუ „ოცნებამ“ შეგარჩიათ?

„ოცნების“ მხრიდან იყო ეს წინადადება, მანამდე მე ვიყავი განათლების მინისტრის მოადგილე, რვა თვის განმავლობაში ამ უწყების იმ კონკრეტულმა მიმართულებამ, რომელსაც მე ვკურირებდი, ალბათ გარკვეულ წარმატებას მიაღწია. ორმოცამდე სკოლის რეაბილიტაცია მოვასწარით, დაახლოებით ხუთი საშუალო სკოლის მშენებლობა დასრულდება წელს. მათ შორის შეჩერებული მშენებლობებიც, იქაც ძალიან კვალიფიციურ გუნდთან ერთად მიწევდა მუშაობა. ალბათ შეიქმნა გარკვეული ხასიათის ინფორმაცია და სოციალური მოლოდინი, რომ ჩვენ ვიქნებოდით წარმატებული, თუნდაც ქობულეთის მუნიციპალიტეტის სამსახურში. ეს არის ჩემთვის დიდი პატივი, რომ მმართველმა გუნდმა ჩემზე გააკეთა არჩევანი. განსაკუთრებული მადლობა ამ შესაძლებლობისათვის – ჩემთვის პატივია იზრუნო საკუთარ ქალაქზე და საკუთარ სოფელზე.

ზურაბ პატარაძის მეზობელი ხართ, ასეა?

რა თქმა უნდა, შორეული ურთიერთობა ზურაბ პატარაძესთან არ მაქვს, მისი გადაწყვეტილებით დავინიშნე განათლების მინისტრის მოადგილედ. კანდიდატობაზე წინადადება იყო მმართველი გუნდისაგან და დარწმუნებული ვარ, ბატონი ზურაბიც უჭერს მხარს ამ გადაწყვეტილებას. ყველა მუნიციპალიტეტის კანდიდატთან დაკავშირებით იყო კონსენსუსი. მე ვიქნები ბედნიერი, როცა მომავალში ასეთ დიდ ნდობას გავამართლებ.

თქვენ საუბრობთ წარმატებულ მუნიციპალიტეტზე – რამდენია ქობულეთის ბიუჯეტი დღეს, რა პროგრამები მოქმედებს, რომლებიც მოგწონთ ან არ მოგწონთ და რას დაამატებთ ახალს?

ქობულეთის მუნიციპალიტეტის ბიუჯეტი ამ დროისთვის 36 მილიონამდეა, დაახლოებით 22 მილიონზე მეტი არის განსაზღვრული ინფრასტრუქტურული პროექტებისთვის. ჩემი ერთ-ერთი პრიორიტეტი იქნება ინფრასტრუქტურული პროექტების გაგრძელება. ჩვენი მთავარი ამოცანაა ქობულეთი ვაქციოთ შავი ზღვისპირეთში ერთ-ერთ ყველაზე მიმზიდველ ადგილად, სადაც იქნება მიმზიდველი გარემო არამხოლოდ ვიზიტორებისათვის, არამედ ინვესტორებისთვის. ცოტა ხნის უკან საფუძველი ჩაეყარა ხუთვარსკვლავიანი სასტუმროს მშენებლობას, რომლის საინვესტიციო ღირებულება 200 მილიონი ლარია, მაგრამ ამით გაჩერებას არ ვაპირებთ. დაახლოებით ოც მილიონ ლარამდეა დახარჯული ქუჩების, სკვერების გადასასვლელების კეთილმოწყობაში – ეს გაგრძელდება.

ჩემს ვადაში აუცილებლად განვახორციელებ ქობულეთის ბულვარის განაშენიანების იდეას, რომელიც უნდა იყოს ქობულეთის სავიზიტო ბარათი. ეს რვა მილიონ ლარზე მეტის სამუშაოებს ითვალისწინებს. ვფიქრობ, ადგილობრივ ბიუჯეტში შესაბამისი თანხების მოძიება შესაძლებელი იქნება, – თანადაფინანსებით, ან სხვა გზით ამ პროექტს მივიყვანთ ბოლომდე.

სოფლად ტურიზმის განვითარება ჩვენთვის ერთ-ერთი პრიორიტეტი იქნება და შესაბამის დეპარტამენტთან ერთად ვგეგმავთ ბევრი საინტერესო პროექტის განხორციელებას. გვაქვს ოთხი დაცული ტერიტორია. მინდა, რომ კინტრიშის ხეობა, მისი პოტენციალის გათვალისწინებით, მაქსიმალურად ჩაებას ტურიზმის განვითარებაში, მოეწყოს დარჩენილი და მოუწყობელი მისასვლელი გზები. ამ ხეობის ერთ-ერთი გვირგვინი არის ხინოწმინდა, ადგილი, რომელიც თავისი ლეგენდით, ისტორიული წარსულით არის ერთ-ერთი თვალსაჩინო. ჩემს სამოქმედო გეგმაში შედის ხიმოწმინდისკენ მიმავალი გზის რეაბილიტაცია.

ტურისტული სეზონის ბოლოს გავესაუბრე სხვადასხვა პროფესიის ადამიანს ქობულეთში – ტაქსისტებს, სავალუტო ჯიხურების თუ რესტორნების მფლობელებს, დავინტერესდი, როგორი იყო ტურისტული სეზონი, იგრძნობოდა თუ არა დამსვენებელთა რაოდენობა. მათი პასუხი იყო, რომ რენტაბელობის თვალსაზრისით, ეს იყო ძალიან კარგი სეზონი. მიუხედავად იმისა, რომ ტურისტი ბევრი იყო ქალაქში ეს არ იგრძნობოდა. დამსვენებელმა უკვე აირჩია ალტერნატიული გზა და ის აქტიურად გადავიდა ქობულეთის სოფლებში, ეს არ იყო ძალიან სასიამოვნო მოულოდნელობა ჩემთვის… მაქსიმალურად ხელს შევუწყობთ ისეთი პროგრამების პოპულარიზაციას, როგორიც არის „აწარმოე საქართველოში“ და სხვა მცირემეწარმეობის ხელშემწყობ პროგრამები. ხალხი უნდა მოემზადოს  იმისათვის, რომ სულ ცოტა ხანში ქობულეთის სოფლებში იქნება ტურისტების ბუმი.

ჩვენ ვაპირებთ ისეთი მიმართულებების განვითარებას, როგორიც არის კულტურული ტურიზმი, ამ კუთხით კულტურული მემკვიდრეობის ძეგლების გამოყენება გვჭირდება. გარდა ამისა, ქობულეთში კულტურისა და სპორტის განვითარება უნდა იყოს ერთ-ერთი პრიორიტეტი, ქობულეთი უნდა გახდეს არა ერთი, არამედ რამდენიმე კულტურული ფესტივალის ადგილი.

სამი წლის წინაც „ოცნების“ კანდიდატის მთავარი დაპირება იყო ინფრასტრუქტურა და ტურიზმის განვითარება. იგივეს ამბობთ თქვენც. მოქმედმა გამგებელმა ცუდად იმუშავა?

ძალიან ბევრი დაპირება, რაც იქნა გაცემული წინა თვითმმართველობის არჩევნებზე, თითქმის მთლიანად აქვს შესრულებული მოქმედ გამგებელს.  ჩვენ ყველას გვახსოვს, რომ 2014 წლის ბოლომდე „ქართული ოცნება“ ადგილობრივ თვითმმართველობაში არ იყო, ბევრ შემთხვევაში ჩვენი დღევანდელი ოპონენტები ბლოკავდნენ მნიშვნელოვან საკითხებს პოლიტიკური თვალსაზრისით…
დასრულდა კანალიზაციის მოწყობის პროცესი, მომავალში კიდევ რამდენიმე წყალსადენის სისტემის მოწყობა იგეგმება. როგორც ვიცი, არის ლოკალური პრობლემები წყლის მარაგთან დაკავშირებით. ეს პრობლემა უნდა გადაიჭრას ახალი ჭაბურღილების დამატებით.

ნარინჯისფერ ფესტივალზე საუბრობდით, რას გულისხმობს ეს იდეა?

ეს ჯერ იდეის დონეზეა. ბავშვობა ქობულეთში მაქვს გატარებული და ყოველთვის, როდესაც მთავრდებოდა საზღვაო ტურიზმი, მოიწყენდა ხოლმე ქობულეთი, განსაკუთრებით სოფლები. ნოემბერში, როდესაც იწყება ციტრუსის რთველი, ყველამ იცის, რომ ამ დროს არის თბილი ამინდები… ეს არის ერთ-ერთი მიმზიდველი თემა, რომ ციტრუსის რთველი იყოს არამარტო სასოფლო სამეურნეო საქმიანობა და გლეხისთვის ჭირნახულის დაბინავების პროცესი, არამედ ჩვენი სტუმრებისთვის ერთ-ერთ მიმზიდველ ადგილი. თუმცა ამ იდეას სჭირდება ბევრი მუშაობა კრეატიულ ადამიანებთან ერთად.

ამის გარდა, ქობულეთი ყოველთვის იყო ძალიან საინტერესო სპორტული შეჯიბრებების ადგილი. იდეალური იქნება ციხისძირის შემოვლითი გზა ველოსპორტისთვის. და, რა თქმა უნდა, შეჩერებული სპორტსკოლა, რომელიც მე მაღელვებს და ყველა ღონე უნდა ვიხმარო, რომ ქობულეთს ჰქონდეს მომავალში.

ძალიან საინტერესო ადგილია ციხისძირიც, იგივე პეტრას ციხე. ბოლო არქეოლოგიური გათხრების შედეგად უნიკალური არტეფაქტები აღმოაჩინეს, რომელმაც ძალიან ბევრ ისტორიულ საიდუმლოს ფარდა ახადა…

რაც შეეხება ასწლოვანი ხეების გატანას და ეკოსისტემის დაზიანებას ციხისძირში?

ეს არის კერძო სამართლებრივი ურთიერთობის საკითხი. არ მინახავს არც ერთი კომპეტენტური ექსპერტის მოსაზრება…

„ბათუმელებთან“ ამაზე გეოლოგებმა ისაუბრეს, მაგალითად, ტარიელ ტუსკიამ…

მე არ ვიცი მისი [ტარიელ ტუსკიას] მოსაზრება, მაგრამ არც ერთი მოსაზრება არ მომისმენია, რომელიც გულისხმობს ამ პროცესების გამო რაიმე ეკოლოგიურ კატასტროფას. ხეების გადატანის ადგილი ციხისძირი არ არის, ხეების გადატანა ხდება სხვადასხვა ადგილებიდან და ეს არის ორ პირთან ურთიერთობის საკითხი. მე აქ ვერანაირ პრობლემას ვერ ვხედავ, ციხისძირიდან ხეების გადატანა იმიტომ გახდა აქტუალური, რომ ციხისძირი გახდა სპეკულაციის თემა „ნაციონალური მოძრობის“ წარმომადგენლების მხრიდან. კომპეტენტურ მოსაზრებას პატივს ვცემ, მაგრამ კიდევ ერთხელ გეუბნებით, რომ არ მინახია კომპეტენტური მოსაზრება ეკოსისტემის დაზიანების შესახებ.

პოლიტიკური პარტიის მოსაზრებებს არ ვეყრდნობი ბატონო მირიან, მე სპეციალისტების შეფასებაზე გესაუბრებით.

ძალიან საეჭვოა ეს მოსაზრება, მე არ გამოვდგები ხეების გადარგვის ექსპერტად. არ სჭირდება ჩემი ადვოკაცია ამ პროცესს. ჩემი აზრია, რომ ეს საკითხი გახდა პოლიტიკური ბრძოლის მეთოდი, რომელსაც იყენებს პოლიტიკური მოწინააღმდეგე ოპონენტის დისკრედიტაციის მიზნით.  ეს არის უშედეგო ხასიათის მცდელობაა.

ანუ ეს არის თემა, რომელიც პოლიტიკურ ოპონენტს „ოცნების“ დისკრედიტაციის საშუალებას აძლევს? – თუ პრობლემა არ არის, მაშინ ვერც დისკრედიტაციის საშუალებას მისცემდა, არა?

ეს არის მცდელობა და არა შედეგი. იღებენ რაღაც ხედით სურათებს, რომ თითქოს იქ გაჩეხილია ხეები. კიდევ ერთხელ გეუბნებით, არანაირი კავშირი ამას სახელმწიფო რეგულაციასთან არ აქვს. თუ ერთი ხის გადარგვა ხდება, ათი ირგვება. მთავარი, რაც მე ვიცი, არის ის, რომ კეთდება უნიკალური დენდროლოგიური პარკი, რომელიც იქნება ერთ-ერთი მიმზიდველი ადგილი შავიზღვისპირეთში. თუ ასეთი სიკეთე კეთდება, რაც არანაირ გვერდით მოვლენას არ იწვევს, კითხვები არ უნდა არსებობდეს. ციხისძირელები არაფერს ამბობენ ამ თემასთან დაკავშირებით, ვისი საკუთრებიდანაც ხდება ხეების გადარგვა. თუ ვინმეს აწუხებს გარემოს პრობლემა, მას ზოგადი ადმინისტრაციული კოდექსი და საქართველოს კონსტიტუცია აძლევს უფლებას შევიდეს წერილობით ადმინისტრაციულ ორგანოში და მიიღოს ინფორმაცია. პოლიტიკოსებმა მაჩვენონ ერთი დოკუმენტი, რომ რაიმე ზიანი მოადგა ეკოსისტემას.

ქობულეთში, ზღვის პირას, მაღლივი მშენებლობები დაიწყო, მათ შორის რეგულაციების გვერდის ავლით. ასეთ გამონაკლისებს თქვენც დაუშვებთ?

ვინ ამბობს ამას. წყარო მითხარით, ეს არ შეესაბამება სინამდვილეს.

შემიძლია დაგისახელოთ გამგეობის გვერდით ახალი კორპუსი.

სანაპირო ზოლთან დაკავშირებული საკითხი არ არის ქობულეთის მუნიციპალიტეტის კომპეტენციაში შემავალი საკითხი, ყველა ის ნაკვეთი, რომელიც იქ არსებობს და რომელიც შესაძლებელია გამოიყენო სამშენებლოდ, უნდა გახდეს ვიღაცის საკუთრება. უძრავი ქონება, რომელიც სანაპირო ზოლში მდებარეობს, ფინანსთა და ეკონომიკის სამინისტროს საკუთრებაშია, შესაბამისად, განკარგვა ხდება მხოლოდ მის მიერ. საინვესტიციო პოლიტიკა, რომელსაც ახორციელებს სამინისტრო, ჩემი აზრით, სწორია.

ბათუმის შოთა რუსთაველის სახელმწიფო უნივერსიტეტი 17 სექტემბერს ქობულეთში კაიკაციშვილის ქუჩაზე №1-ის მიმდებარედ კვლევითი ინსტიტუტის შენობის სამშენებლო სამუშაოების საფუძვლის ჩაყრის ცერემონიას გამართავს. 18 სექტემბერს კი, ბათუმში,  ლეონიძის ქუჩაზე სტუდენტთა საერთო საცხოვრებლის შენობის მშენებლობა დაიწყება. უნივერსიტეტის რექტორი და მიწვეული სტუმრები კაფსულის ჩადების ცერემონიალში მიიღებენ მონაწილეობას. ორივე პროექტისთვის ჯამში 3,5 მილიონი ლარი დაიხარჯება. სამუშაოებს ტენდერში გამარჯვებული კომპანია „ვექტორი“ შესარულებს.

200 მობინადრეზე გათვლილი სტუდენტთა საცხოვრებლის მშენებლობა 2018 წლის ზაფხულში დასრულდება. ამ შენობისთვის უნივერსიტეტის ბიუჯეტიდან 2 მილიონ 359 ათასი ლარია გამოყოფილი.

საცხოვრებლის შენობის მიწისზედა სამ სართულზე განთავსდება ადმინისტრაცია, დაცვის ოთახი, სამრეცხაო-საშრობი, საკონფერენციო დარბაზი, ასევე საცხოვრებლის ბლოკები: ძირითადი, 5 სტუდენტზე გათვლილი ბლოკური პრინციპით, რომელსაც გააჩნია თავისი სველი წერტილი და სამზარეულო; აგრეთვე, შშმ პირებისთვის ადაპტირებული 3 ბლოკი – თითო თითოეულ სართულზე. შენობაში განთავსდება ლიფტი შშმ პირებისთვის.

როგორი იქნება ახალი საერთო საცხოვრებელი, შეგიძლიათ იხილოთ ამ ბმულზე.

უნივერსიტეტის კანცლერმა, ჯემალ ანანიძემ, რამდენიმე თვის წინ „ბათუმელებთან“ განაცხადა, რომ საერთო საცხოვრებლის მშენებლობისთვის 3 მილიონი ლარი უნივერსიტეტმა მწვანე კონცხზე არსებული აგრარული ფაკულტეტის სასწავლო კორპუსისა და საერთო საცხოვრებლის გასხვისებით, კერძო კომპანიისგან მიიღო.

შუახევის მინიციპალიტეტის გამგეობა სოფელ ინწკირვეთის ჩანჩხალოსა და ნიგაზეულის წყალმომარაგების სისტემის მოწყობას გეგმავს. შესაბამისი სამუშაოების შესყიდვის მიზნით გამგეობის შესყიდვების სამსახურმა ორწლიანი ტენდერი გამოცხადა. შესყიდვისთვის სამი მილიონ 646 322 ლარი გაითვალისწინეს. სატენდერო კომისიის ინფორმაციით სასურველია 2017 საბიუჯეტო წლის ბოლომდე შესრულდეს მილიონ ხუთასი ათასი ლარის ღირებულების სამუშაოები.

ტენდერის პირობების მიხედვით პროექტი მოიცავს სოფელ ინწკირვეთის მთის გორის ძირიდან მდინარის ხევში მთავარი წყალმიმღები ზღუდარის მოწყობას, რომელიც ზღვის დონიდან 1741მ სიმაღლეზე მდებარეობს.

პროექტი 2018 წლის 15 დეკემბერში უნდა დასრულდეს. ამ ვადაში გამარჯვებულმა კომპანიამ შემსყიდველს შესრულებული სამუშაოების შესახებ ლევან სამხარაულის ექსპერტიზის ეროვნული ბიუროს ან სხვა აკრედიტებული პირის მიერ გაცემული საინჟინრო-ტექნიკური ექსპერტიზის დადებითი დასკვნა უნდა წარუდგინოს.

შესრულებული სამუშაოს ხარისხის საგარანტიო ვადად სამი წელია მითითებული. საბოლოო მიღება-ჩაბარების გაფორმების დღიდან, „მიმწოდებელი“ ვალდებულია საკუთარი ხარჯებით უზრუნველყოს ექსპლოატაციის პროცესში წარმოქმნილი დაზიანებების და დეფექტების აღმოფხვრა შემსყიდველის მოთხოვნისთანავე.

„პოლიტიკა ჩვენ არ გვეხება, რა შუაშია არჩევნები,“ – ასე უპასუხა ბათუმის მერიის საკუთრების უფლების აღიარების კომისიის თავმჯდომარემ, დავით კოპინაძემ „ბათუმელების“ კითხვას – ხომ არ დაუბრუნეს 13 გონიოელს მიწა სპეციალურად არჩევნებამდე ერთი კვირით ადრე? „მიწის კომისიამ“ მოულოდნელად დღეს, 13 ოქტომბერს გამართა სხდომა და გონიოელებს უთხრა, რომ მათ 2010 წელს ჩამორთმეულ მიწებზე საკუთრებას აღუდგენდნენ.

ბათუმის მერიის წინააღმდეგ 54-მა გონიოელმა სასამართლო დავა მიმდინარე წლის გაზაფხულზე მოიგო. 31 აგვისტოს მერიის „მიწის კომისია“ შეიკრიბა და თქვა, რომ საკითხი ხელახლა უნდა შეიწავლოს. ასევე კიდევ ერთხელ უნდა გაიგოს კულტურული მემკვიდრეობის დაცვის სააგენტოს პოზიცია, რადგან სადავო მიწები გონიოს ციხესთან ახლოს მდებარეობს. მაშინ „საერთაშორისო გამჭვირვალობა საქართველოს“ იურისტმა, ანა ბერძენიშვილმა დააფიქსირა, რომ კომისია მიზანმიმართულად აჭიანურებდა პროცესს, რადგან სააგენტოს გონიოს მიწებზე უკვე დაფიქსირებული ჰქონდა მოსაზრება.

„სააგენტოს ეს პოზიცია დაფიქსირებული ჰქონდა 2014 წელს- სასამართლოს დავალება იყო, რომ ინდივიდუალურად მომხდარიყო გამოკვლევა, სწორედ ამან განაპირობა, რომ სააგენტოს ხელახლა მივმართეთ. 2014 წელს სააგენტო გვეუბნებოდა, რომ ამ მიწების გაცემის დროს არ მომხდარა მათთან შეთანხმება, თუმცა წინააღმდეგი არ ვართო. ახლა კი მოგვწერეს, სასურველია შეთანხმებაო,“ – გვითხრა დავით კოპინაძემ.

რამდენიმე დღის წინ გონიოელებმა „საერთაშორისო გამჭვირვალობა საქართველოს“ მხარდაჭერით პროკურატურასაც მიმართეს. მათი აზრით, კომისია შეგნებულად თავს არიდებდა გადაწყვეტილების მიღებას. მიწის კომისიის თავმჯდომარე, დავით კოპინაძე ირწმუნება, რომ დღეს გამართული სხდომა პროკურატურაში შეტანილ საჩივარს არ უკავშირდება.

დავით კოპინაძე: „აუცილებლად შევისწავლით ჩვენ სხვა დანარჩენების საკითხებსაც. მომავალი სხდომა არ ვიცი როდის იქნება – არჩევნებამდე, თუ არჩევნების შემდეგ. ჩვენ დაწყებული გვქონდა მუშაობა და ამის მტკიცებულებები არსებობს, მიმოწერები და ასე შემდეგ. პროკურატურისგნა რამე ზეწოლა არ ყოფილა. მე ამ თანამდებობაზე დავინიშნე სამი თვის წინ და ასეთ საკითხზე ერთ და ორ კვირაში ვერ მივიღებდი გადაწყვეტილებას, 7 წელია მიმდინარეობს ამის შესწავლა“.

მერიის მიწის კომისიამ ამჯერად სხვა გონიოელების საქმეზე უნდა მიიღოს გადაწყვეტილება. პირველ ეტაპზე 13 გონიოელის საქმეზე კომისიამ იმიტომ იმსჯელა, რომ მათზე სასამართლოს უფრო ადრე ჰქონდა გადაწყვეტილება მიღებული.

„ეჭვები და კითხვის ნიშნები, ბუნებრივია, ისევ არსებობს,“ – გვითხრა ანა ბერძენიშვილმა, „საერთაშორისო გამჭვირვალობა საქართველოს“ იურისტმა. ის არ გამორიცხავს, რომ კომისიის მიერ აღდგენილ მოწმობებს პრობლემა საჯარო რეესტრში შეექმნათ და ისევ დაფიქსირდეს იდენტიფიკაციის, ან ზედდების პრობლემა. რაც შეეხება არჩევნებამდე ერთი კვირით ადრე მიწების დაბრუნებას – ანა ბერძენიშვილი ფიქრობს, რომ მიწის კომისიამ პოლიტიკური გადაწყვეტილება მიიღო:

„ეს იყო პოლიტიკური გადაწყვეტილება, ამას ვერ გავექცევით. არის კითხვის ნიშნებიც, რომ ეს მოხდა არჩევნებამდე ერთი კვირით ადრე… სამწუხაროა, რომ მოქალაქეებს მოგებული სასამართლო პროცესის შემდეგ იძულებითი მექანიზმების გამოყენება მოუხდათ, ვგულისხმობ პროკურატურას, რომ კომისიას ემოქმედა“.

სურსათის ეროვნული სააგენტოს მცენარეთა დაცვის სპეციალისტები ციტრუსოვანი კულტურების აზიური ფარისანასგან დაცვის მიზნით მოსახლეობას მოუწოდებენ სააგენტოს მიერ გადაცემული პრეპრატებით დროულად შეწამლონ ციტრუსი.

სააგენტოს ინფორმაციით ბიფენტრინის შემცველი პრეპარატი [ზონდერი 100ეკ; ინსაკარი 100ეკ; თეიქოფ 100ეკ] მაღალეფექტური, ფართო სპექტრის ინსექტიციდია, რომელიც გამოიყენება აზიური ფაროსანას, ფოთლის მავნებლების, ყურძნის ჭიის, ტკიპების, ბუგრების, ნაყოფჭამიების, ხვატარის, ხოჭოების, მავნე კუსებურას და სხვა მავნებლების წინააღმდეგ ხეხილში, ბოსტნეულში, ვაზში, მარცვლეულსა და პარკოსნებში.ქიმიური წამლობისას მნიშვნელოვანია პრეპარატების გამოყენების წესების და ვადების დაცვა.

აზიური ფაროსანას წინააღმდეგ ბიფენტრინით წამლობა ტარდება სხვადასხვა შემასხურებელი მოწყობილობის მეშვეობით, მათ შორის, ზურგსაკიდი აგრეგატებით.

პრეპარატის კონცეტრაცია 10 ლიტრ წყალზე 30 მილიგრამს უნდა შეადგენდეს. რეკომენდებული ნორმებით გამოყენებისას, პრეპარატი არ არის ფიტოტოქსიკური მცენარეების მიმართ. პრეპარატის დაცვითი მოქმედების ეფექტია 10-14 დღე. მნიშვნელოვანია, ლოდინის პერიოდის დაცვა მოსავლის აღებამდე: 21 დღე – ციტრუსოვან კულტურებზე, 30 – დღე სხვა მრავალწლიან კულტურებზე, 20 – დღე მარცვლეულზე, 15 დღე -ბოსტნეულსა და პარკოსნებზე. ბიფენტრინის გამოყენება შესაძლებელია სხვა კლასის პესტიციდებთან ერთად კომბინირებულ ნაზავში, გარდა ძლიერი ტუტე და მჟავა რეაქციის მქონე პრეპარატებისა.

პესტიციდების გამოყენებისას, მნიშვნელოვანია, უსაფრთხოების წესების დაცვა. პრეპრატების გამოყენების ინსტრუქცია იხილეთ აქ.

საქართველოს მთავრობის გადაწყვეტილებით, აზიურ ფაროსანასთან ბრძოლის მიზნით 230 ათას ოჯახს პრეპარატები გადაეცემა. სურსათის ეროვნული სააგენტოს ინფორმაციით მავნებლის საწინააღმდეგო პრეპარატების დარიგების პროცესი დაწყებულია სამეგრელოს, გურიის, იმერეთის, აჭარის იმ მუნიციპალიტეტებში, სადაც მავნებელია გავრცელებული.

ერთ ოჯახს ერთი ლიტრი პრეპარატი, ფერომონი (მავნებლის მოსაზიდი ხაფანგი) და მათი გამოყენების ინსტრუქცია და საინფორმაციო მასალები გადაეცემა.

სოფლის მეურნეობის სამინისტროს სურსათის ეროვნულმა სააგენტომ სამგერლოს, გურიის, იმერეთის და აჭარის მუნიციპალიტეტებს დასარიგებლად უკვე გადასცა პრეპარატები; [ სამეგრელოს რეგიონი -116 000; გურია – 50 670; იმერეთი – 38 838; აჭარა – 13 000.] პრეპარატების მოსახლეობისათვის გადაცემას ადგილობრივი მუნიციპალიტეტები უზრუნველყოფენ.