Batumelebi | იცოდე რას ჭამ იცოდე რას ჭამ – Batumelebi
ნეტგაზეთი • RU

იცოდე რას ჭამ

ბუნების წიაღში, ტბის პირას, კოცონთან მეგობრების გარემოცვაში მწვადის დაგემოვნებისას თითქმის არასდროს ვფიქრობთ თუ რა წარმომავლობის შეიძლება იყოს: ხორცი, სოსისი თუ ძეხვი, რომელსაც გრილზე, ნაკვერჩხალზე ან თუნდაც ტაფაზე ვამზადებთ. ცხოველთა იდენტიფიკაცია – რეგისტრაციის ეროვნული სისტემა NAITS მომხმარებელს საშუალებას მისცემს გადაამოწმოს, როგორც ხორცის უვნებლობა, ასევე მისი წარმომავლობა.

22251300_10209968891874679_1877825721_o

რა არის ცხოველთა რეგისტრაციის ეროვნული სისტემა

2012 წლიდან სურსათის ეროვნული სააგენტო ცხოველთა იდენტიფიკაცია – რეგისტრაციის პროგრამას ახორციელებს, რომლის ახალ, გაუმჯობესებულ მოდელზე გადასვლა, 2017 წლიდან დაიწყო. განახლებული სისტემა, რომლის იმპლემენტაციას გაეროს სურსათისა და სოფლის მეურნეობის ორგანიზაცია FAO, სურსათის ეროვნულ სააგენტოსთან ერთად ახორციელებს, გულისხმობს მონაცემთა ელექტრონულ ბაზას, რომელიც ეტაპობრივად შეივსება ინფორმაციით ქვეყანაში არსებული მსხვილფეხა და წვრილფეხა პირუტყვის შესახებ. NAITS ელექტრონული ბაზის შესაქმნელად, რომელიც შეგიძლიათ წარმოიდგინოთ, როგორც ცხოველთა ჯანმრთელობის ელექტრონული ბარათი, ავსტრიისა და შვეიცარიის განვითარების სააგენტოებმა 5 მილიონი აშშ დოლარი გამოყვეს.

მომდევნო ხუთი წლის მანძილზე, როცა ბაზა სრულყოფილად ამუშავდება, შესაძლებელი იქნება მსხვილფეხა თუ წვრილფეხა საქონლის შესახებ დეტალური ინფორმაციის მიღება, სამკურნალო და პრევენციული ღონისძიებების ზედმიწევნით ზუსტად დაგეგმვა და განხორციელება – რაც უზრუნველყოფს, ცხოველიდან ადამიანზე გადამდები დაავადებების რისკის მინიმუმამდე დაყვანას, ასევე, ხორცპროდუქტების ხარისხის ზრდას და მომხმარებელთა ინტერესების მაქსიმალურ დაცულობას.

საქართველოში იდენტიფიკაცია – რეგისტრაციის პროგრამის დაწყებიდან, გამოიკვეთა ცხოველური, ასევე ცხოველიდან ადამიანზე გადამდები დაავადებების მუდმივი კლების ტენდენცია. მხოლოდ 2016 – 2017 წლებში, მსხვილფეხა პირუტყვში ბრუცელოზის 4339 შემთხვევა 1536-მდე შემცირდა. იკლებს ადამიანებში ჯილეხის შემთხვევებიც, რაც ნათლად გამოხატავს NAIST პროექტის მნიშვნელობას სურსათის უვნებლობის სფეროში.

NAITS და ევროპული ბაზრის პერსპექტივები

საქართველო რეგიონის პირველი ქვეყანაა, რომელიც ცხოველთა იდენტიფიკაცია რეგისტრაციის სისტემას ნერგავს. NAITS ერთ-ერთი სავალდებულო კომპონენტია ევროპაში ქართული წარმოების ხორცისა და სხვა მეცხოველეობის პროდუქტების ექსპორტისათვის. რაც დამატებითი ინვესტიციებისა და შემოსავლის გარანტია, როგორც ქვეყნისთვის ასევე ფერმერებისთვის.

 

21935215_10209895379516916_66640992_n

ნეტგაზეთის მასალების სხვა გამოცემებში გადაბეჭდვის წესი
ავტორი