– ნინო, სად გადიოდით ჩემპიონატისთვის წინა მოსამზადებელ ეტაპს და როგორ ემზადებოდით?
– სანამ ეს ტურნირი დაიწყებოდა, მანამდე სხვა ტურნირები მქონდა, დეკემბერში საფრანგეთში ვიასპარეზე, მერე „ქალთა ოუფენსა“ და „მამაკაცთა ოუფენზე“, რომელიც 30 დეკემბერს დამთავრდა. ქალების ჩათვლაში მეორე ადგილი მოვიპოვე. 3 იანვარს დავბრუნდი საქართველოში, ცოტა დავისვენე და 9 იანვარს ახალი ძალებით დავიწყე ასპარეზობა საქართველოს ჩემპიონატისთვის.
– როგორ შეაფასებთ წლევანდელ ჩემპიონატს?
– რთული ტურნირი იყო. თავიდან ყაიმით დავიწყე, მაგრამ მერე სალომე მელიასა და ლელა ჯავახიშვილს მოვუგე, რომელიც გასულ წელს ჩემპიონი იყო. ამ ორმა მოგებამ გამიყვანა ლიდერებისკენ და ბელა ხოტენაშვილს დავეწიე. სულ ათი მოთამაშე ვიყავით და ცხრა შეხვედრა გაიმართა. არც ერთი პარტია არ წამიგია. ცხრა შესაძლებლობიდან შვიდი ქულა დავაგროვე. ხუთი პარტია მოვიგე, ოთხი ყაიმით დავასრულე. ერთი ქულით გავასწარი მეორე ადგილზე გასულ ბელა ხოტენაშვილსა და მესამე ადგილის პრიზიორს ნინო ხურციძეს. 2013 წელს მხოლოდ ნახევარი ქულა დამაკლდა, მაშინ მეორე ადგილზე გავედი. წელს ვთქვი, რომ ამ შანს ხელიდან არ გავუშვებდი. ქალთა შორის ეროვნული ჩემპიონატები ერთ-ერთი საუკეთესო ჩემპიონატია მსოფლიოს მასშტაბით და ყოველთვის დიდი პრესტიჟია მისი მოგება.
– რა ტურნირებისთვის ემზადებით და საქართველოს ჩემპიონობის შემდეგ რა იქნება მთავარი ტიტული თქვენთვის?
– ამ გამარჯვებით ეროვნულ ნაკრებში უკონკურენციოდ თამაშის უფლება მოვიპოვე. ჯერჯერობით, ვისვენებ. 10-დან 20 თებერვლამდე თბილისში გვექნება ნაკრების ვარჯიშები. მერე, 23 თებერვალს, კაცების ევროპას ვითამაშებ იერუსალიმში. ეს ყველაფერი დამეხმარება ევროპისთვის მომზადებაში.
– თქვენ საჭადრაკო კლუბ „ნონას“ წევრი ხართ, რომელიც შარშან ევროპის ჩემპიონი გახდა. რას ნიშნავს „ნონა“ თქვენთვის და გააგრძელებთ თუ არა კლუბში ასპარეზობას?
– ალბათ გავაგრძელებ. შარშან ფენომენალური შედეგი იყო, რომლის მსგავსი დიდი ხანი არც იქნება, მგონი. ერთ წელში ევროპისა და საქართველოს ჩემპიონები გავხვდით. მეგონა, პრემიას ჩაგვირიცხავდა მერია, სამწუხაროდ, მას არაფერი გაუკეთებია.
