82 წლის ალექსანდრა ტერუნი, რომელიც ორი დღის წინ სახლიდან აღსრულების ბიურომ გამოასახლა, ბათუმის რესპუბლიკურ საავადმყოფოში მოათავსეს. ალექსანდრა თავის ყოფილ ბინაში ამწეთი შევიდა. ალექსანდრა ახლა საავადმყოფოში თავის ტვინის შერყევით წევს.

„გამოსახლების შემდეგ მოხუცი ჭიშკართან იჯდა და მას სახლის მესაკუთრემ – სოფიო გეგუჩაძემ სცემა. მოხუცი პოლიციაში გამოკითხეს და ექსპერტიზა ჩაუტარდა. ახლა მისი მდგომარეობა მძიმეა და სიარული უჭირს,“ – გვითხრა ალექსანდრას მინდობილმა პირმა, ჟუჟუნა ჯიჯავაძემ.

გია კიკაბიძე, ბათუმის რესპუბლიკური საავადმყოფოს დირექტორის მოადგილე: „მას თავის ტვინის შერყევა აქვს. მდგომარეობა სტაბილურია. მოხუცს ჩაუტარდა სხვადასხვა გამოკვლევა და სხვა პრობლემა არ აქვს. მისთვის ახლა უმჯობესია, თუ სახლში იქნება მშვიდ გარემოში, მაგრამ, როგორც ვიცი, სახლი არ აქვს. ალექსანდრა ჯერჯერობით საავადმყოფოში რჩება“.

ალექსანდრა ტერუნი ადრეც ამბობდა, რომ მას ბინის ამჟამინდელმა მესაკუთრეებმა, და-ძმა გეგუჩაძეებმა სცემეს. სავარაუდო ცემის მეორე ფაქტზე გამოძიება 20 მარტს დაიწყო. ალექსანდრა ტერუნზე ფიზიკური ძალადობის პირველ შემთხვევას კი უკვე განიხილავს ბათუმის საქალაქო სასამართლო, სადაც ბრალდებული ასევე სოფიო გეგუჩაძეა.

ალექსანდრა ტერუნი 1983 წლიდან საიათნოვას 4-ში ცხოვრობდა. ბინა მას შემდეგ დაკარგა, როცა მისმა შვილიშვილმა კერძო მევახშისგან სესხი [როგორც ალექსანდრა აცხადებს, 600 დოლარი] აიღო და ბინა იპოთეკით დატვირთა. ალექსანდრა ამბობს, რომ მას ამ სესხის შესახებ არაფერი უთხრეს, თორემ თავად გადაიხდიდა ვალს. სწორედ ამ სასესხო ხელშეკრულების საფუძველზე გაყიდა ბინა თანხის მსესხებელმა. საბოლოოდ რამდენჯერმე გადაყიდული ბინა ალექსანდრას კარის მეზობელმა – გიორგი გეგუჩაძემ იყიდა. იგი სპეცრაზმის თანამშრომელია.

და-ძმა გეგუჩაძეებს „ბათუმელები“ ვერ უკავშირდება.

ალექსანდრას თქმით, მისი შვილიშვილი მძიმედ ავადაა და უკრაინაში იმყოფება. ალექსანდრას გასული წლის 25 დეკემბერს ბინის კარი აჭედილი დახვდა და მას შემდეგ ქუჩაშია.

ალექსანდრა ტერუნი 19 მარტს  ამწეთი შევიდა საიათნოვას 4-ში მდებარე სახლის აივანზე, აივნიდან კი – ბინაში. ბინა მას სასამართლოს გადაწყვეტილებით ჩამოართვეს, თუმცა მიიჩნევს, რომ ჩამორთმევა თაღლითური გზით მოხდა და ის სამართლებრივ დავას განაგრძობს.

ქობულეთში ძველ, საბჭოთა მანქანებს, განსაკუთრებით „ვოლგებსა“ და „ჟიგულებს“ ხშირად შეხვდებით, თუმცა აჭყვისთაველმა რამაზ ზოიძემ ოჯახის ძველ ჟიგულს ახალი სიცოცხლე შესძინა, როცა „პიკაპის“ ტიპის მანქანად გადააკეთა. ავტოსახელოსნოში არ მიმიყვანია, მე თვითონ გავაკეთე ყველაფერიო – ამბობს რამაზი.

ბათუმში მიმდინარე წლის სამ თვეში მოსახლეობამ, კომერციულმა თუ საბიუჯეტო ორგანიზაციებმა, მოხმარებული წყლისა და წყალარინებისთვის, ჯამში, 2 447 208 ლარი გადაიხადეს. ბათუმში წყლის ერთადერთი მიმწოდებელი მუნიციპალური შპს „ბათუმის წყალია“.

აბონენტებს ძველი დავალიანებებიც აქვთ, თუმცა „ბათუმის წყალმა“ არ მოგვაწოდა ინფორმაცია, თუ რამდენია ეს დავალიანება ჯამში. კომპანიამ არც ის საბიუჯეტო ორგანიზაციები დაგვისახელა, რომლებსაც წყლის ყველაზე მეტი დავალიანება აქვთ.

ინფორმაცია დავალიანებების შესახებ „ბათუმელებმა“ კომპანიისგან დღეს ოფიციალურად გამოითხოვა. „ბათუმის წყალმა“ კი მხოლოდ მიმდინარე წლის იანვარ-თებერვალ-მარტში [დღემდე] დარიცხული და გადახდილი თანხის შესახებ მოგვაწოდა მონაცემები.

„ჯამში რამდენია ძველი დავალიანება დღევანდელი დღის მდგომარეობით, ეს არის კომპანიის შიდა ინფორმაცია. რაც შეეხება კომერციული ორგანიზაციების დავალიანებებს, ეს პერსონალური ინფორმაციაა. იგივე შეგვიძლია ვთქვათ საბიუჯეტო ორგანიზაციებთან მიმართებაშიც. ამიტომ, თქვენ მიერ მოთხოვნილ მონაცემებს ვერ მოგაწვდით“, – გვითხრეს „ბათუმის წყალში“.

[crosslist]

• საბიუჯეტო ორგანიზაციებს დაარიცხეს 230 780 ლარის გადასახადი, ორგანიზაციებმა კი 12 437 ლარით ნაკლები გადაიხადეს;
• კომერციულ ორგანიზაციებს დაარიცხეს 1 277 206 ლარი, მათ მიერ კი გადახდილია 1 275 179 ლარი [2 027 ლარით ნაკლები];
• მოსახლეობას დაარიცხეს 939 223 ლარი, გადახდილია – 1 132 271 ლარი, ანუ 193 048 ლარით მეტი.

[/crosslist]

იმ თანხაში, რაც აბონენტებმა გადაიხადეს, ძველი დავალიანებების ნაწილიც შედის.

„მოსახლეობასთან და ასევე კომერციასთან მიმართებაში ყოველთვიურ დარიცხვასა და ამოღებას შორის არსებული სხვაობა გამოწვეულია ძველი დავალიანებების გადანაწილების გამო“, – მოგვწერა „ბათუმის წყალმა“.

კომპანიის მიერ მოწოდებული სამი თვის მონაცემებით ნათლად ჩანს, რომ საბიუჯეტო და კომერციული ორგანიზაციები იმაზე ნაკლებს იხდიან, რაც გადასახდელი აქვთ, მოსახლეობას კი, იმაზე მეტს ახდევინებენ, რაც დაარიცხეს.

„აბონენტებს, რომლებსაც გააჩნიათ ძველი დავალიანება და არ შეუძლიათ მათი ერთდროულად დაფარვა, კომპანია სთავაზობს გადახდის განსხვავებულ მეთოდს, რომელიც გულისხმობს ძველი დავალიანების რამდენიმე წელზე გადანაწილებას და ყოველთვიურად, შეთანხმების შედეგად დადგენილი თანხის რაოდენობის დაფარვას, ყოველთვიურად მოხმარებული წყლის საერთო ხარჯთან ერთად“, – აცხადებს „ბათუმის წყალი“.

დღეს წყლის მსოფლიო დღეა.

„ყველაზე ძვირფასი, რაც კაცობრიობას შეუქმნია, წიგნია. წიგნებში ყველა კითხვაზე იპოვი პასუხს, კითხვისას თვითონ ხარ მხატვარი, გმირი, მკითხველი და ყველაფერი ერთად,“ – გვეუბნება მანანა ბოლქვაძე, ბათუმის საჯარო ბიბლიოთეკის ბიბლიოთეკარი, რომელსაც ვეკითხებით, თუ რატომ აირჩია ეს პროფესია.

„დედაჩემი, ავრორა ჩხაიძე, ბიბლიოთეკარი იყო. თავიდან ჭავჭავაძის ქუჩაზე მდებარე საბავშვო ბიბლიოთეკაში მუშაობდა, პირველკლასელები ვიყავით მე და ჩემი ტყუპისცალი და, როცა დედამ ბიბლიოთეკაში წიგნებით სავსე უზარმაზარ თაროებთან დაგვაყენა და გვკითხა, ამ წიგნებს როდის წაიკითხავთო. დაუფიქრებლად ვუპასუხეთ, რომ ანბანს ვისწავლიდით და მერე ერთ კვირაში წიგნებსაც წავიკითხავდით“.

ბავშვობაში საჯარო ბიბლიოთეკის მუდმივი მკითხველი იყო, ახლა ამავე ბიბლიოთეკის ყველაზე სტაჟიანი თანამშრომელია. მართალია, ბიბლიოთეკაში მასზე ხანდაზმულებიც მუშაობენ, თუმცა საჯარო ბიბლიოთეკის ამ კორპუსში 44 წელი უწყვეტად მანანა ბოლქვაძის გარდა არავის გაუტარებია. ამბობს, რომ ბიბლიოთეკა მისთვის მეორე სახლია და არა სამსახური.

მისი აზრით ხუთი სიცოცხლე მაინცაა საჭირო, ადამიანმა ყველაფერი რომ წაიკითხოს.

„ავად გავხდი ბავშვობაში ერთხელ, სიცხიანი ვიწექი და „ბიძია თომას ქოხს“ ვკითხულობდი. ისე ვინერვიულე, სიცხემ ამიწია. ეს იყო ერთ-ერთი პირველი წიგნი, რომელიც ყველაზე კარგად მახსოვს. ემოციები, რაც კითხვის პროცესს ახლავს, შეუცვლელია“.

მოარულ აზრს, რომ ციფრულ ეპოქაში წიგნებს ნაკლებად კითხულობენ, ბიბლიოთეკარი არ იზიარებს და სამკითხველო დარბაზს გვაჩვენებს, რომელიც ცარიელი თითქმის არასდროსაა.

მოსწონს ბიბლიოთეკის სიახლეები, როგორც ამბობს, ყოველთვის ესწრება  „ამერიკულ კუთხეში“ გამართულ შეხვედრებს, დისკუსიებს და  ახალგაზრდების დიდ შესაძლებლობებზე საუბრობს: „ძალიან მონდომებულები არიან, დიდი შესაძლებლობები აქვთ, ჩემს დროს რომ ამდენი ინფორმაცია და სამოქმედო ასპარეზი ყოფილიყო, ბევრი რამ სხვანაირად იქნებოდა. ნეტა მეც ახალგაზრდა შევხვედროდი ამ დროს. მე წიგნის და ტელევიზორის თაობა ვარ, თქვენ – კომპიუტერის“.

მიუხედავად იმისა, რომ ტექნიკა არ უყვარს, კომპიუტერთან მუშაობა მარტივად ისწავლა, საჯარო ბიბლიოთეკის ყველა  განყოფილებაში უმუშავია, ახლა კი ბიბლიოგრაფიის განყოფილების მთავარი ბიბლიოთეკარია და „ბათუმელების“ ყოველთვიური ნომრები: ძველი გაზეთები თუ ახალი ჟურნალები მას შეჰყავს კატალოგებსა და ბაზებში ავტორების, სტატიების სათაურებისა და თემის მიხედვით. ამ დიდი ჟურნალიდან გადადის „ბათუმელების“ ნომრები საჯარო ბიბლიოთეკის ელექტრონულ მონაცემთა ბაზაში.

ვეკითხებით, რას ფიქრობს ელექტრონულ წიგნებზე და როგორ წარმოუდგენია მომავალი – იარსებებს თუ არა წიგნი არსებული ფორმით.

„წარმოდგენაც არ მინდა, ღმერთმა დაგვიფაროს, ადამიანების თანამგზავრები ისევ ადამიანები და წიგნები არიან,“ – ამბობს მანანა ბოლქვაძე. თუმცა იმასაც აღნიშნავს, რომ მთავარია იკითხონ ადამიანებმა და სულერთია რა ფორმით – წიგნში თუ კომპიუტერის ეკრანზე. როგორი მოსახერხებელიც არ უნდა გახდეს კითხვის პროცესი ელექტრონული წიგნების საშუალებით, მისთვის ჩვეულებრივ წიგნს ვერაფერი შეცვლის, როგორც ამბობს, მტვერიც კი უყვარს, ბიბლიოთეკის საცავებში რომ აფენია ძველ წიგნებს.

სასიამოვნო სიახლეებზეც გვიყვება, უსინათლოთა და სმენის უნარის არმქონე პირებისთვის შექმნილი ხმოვანი პროგრამების პაკეტზე, ბრაილის შრიფტით დაბეჭდილ წიგნებსა და დისკებზე ჩაწერილ ხმოვან წიგნებზე. ეს ყველაფერი აუცილებელი აღჭურვილობით საჯარო ბიბლიოთეკის პირველ სართულზე, დარბაზში მოწყობილ სპეციალურ კუთხეშია განთავსებული.

ბიბლიოთეკარი მანანა ბოლქვაძე გარდა სიამოვნებისა, რასაც საკუთარი საქმიანობიდან იღებს, იღებს უცნობი ადამიანების ყურადღებასაც, ვინც შეიძლება თავად მას არ ახსოვს, მაგრამ ახალგაზრდები ქუჩაში ცნობენ:

„კინოთეატრის გრძელ რიგში ვიდექი ერთხელ ბილეთების საყიდლად და უცებ ახალგაზრდა ბიჭი მოვიდა, ბილეთი გადმომცა და მითხრა: ეს იმისთვის, რა დროც ჩვენზე დაგიხარჯავთ ბიბლიოთეკაშიო,“- ყვება ბიბლიოთეკარი.

იხსენებს მუდმივ მკითხველებს, რომლებსაც თურმე ბიბლიოთეკაში უშტატო თანამშრომლებად მიიჩნევენ: „მწერალ ანზორ კუდბას, მაგალითად, საყვარელი ადგილი აქვს ჩვენს დარბაზში, ბოძთან უყვარს ჯდომა, თუ იქ თავისუფალი ადგილი არ დახვდა, უკან ბრუნდება, მიდის,“- ამბობს ბიბლიოთეკარი.

რა ემართება დაძველებულ წიგნებს, როცა მათი განახლება შეუძლებელია?

„ნეტა, ყველა წიგნი ასე დაძველდეს,“-ამბობს მანანა ბოლქვაძე, – „ახალს შევიძენთ ან დავაქსეროქსებთ. წიგნმა უნდა იმოძრაოს, ხელიდან ხელში გადავიდეს, გაცვდეს. თაროზე შემორჩენილ ხელუხლებელ გამოცემებს ბიბლიოთეკაში მკვდარ წიგნებს ვეძახით“. სურს, რომ ასეთი ბედი არც ერთმა წიგნმა არ გაიზიაროს.

თუ „მკვდარი“ წიგნები არსებობენ, არსებობენ ცოცხალი წიგნებიც, გაინტერესებთ რომელი წიგნები ცოცხლობენ ყველაზე აქტიურად? გადადით ლინკზე და გაიგეთ რას კითხულობენ ყველაზე ხშირად ბათუმის ბიბლიოთეკაში.

რა წიგნებს კითხულობენ ყველაზე ხშირად ბიბლიოთეკაში ბათუმელები

საქართველოს ეკონომიკისა და მდგრადი განვითარების სამინისტრო 2 წელია იჯარით აღებულ შენობაშია და ქირას სახელმწიფო ბიუჯეტი იხდის. შენობის დაქირავებისთვის უკვე 1 მილიონ 800 ათასი აშშ დოლარია [ექვივალენტი ლარში] გადახდილი. საიჯარო ხელშეკრულებით ერთი თვის გადასახადი 75 ათასი აშშ დოლარი [ექვივალენტი ლარში] იყო.

ეკონომიკისა და მდგრადი განვითარების სამინისტრომ ნაქირავები შენობა მიმდინარე წლის პირველ აპრილამდე უნდა დაცალოს. ის ყოფილი ენერგეტიკის სამინისტროს შენობაში [სანაპიროს ქ. N2] განთავსდება. გადასვლის პროცესი დაწყებულია. სამინისტროში პასუხი ვერ მივიღეთ კითხვაზე, რამდენ ხანში მორჩება სამინისტრო ახალ მისამართზე გადასვლის პროცესს.

ეკონომიკისა და მდგრადი განვითარების სამინისტრო ჭოველიძის ქ. 10ა-ში, ნაქირავებ შენობაში 2016 წლის 1 აპრილს გადავიდა, სამინისტროს ყოფილი შენობა [თბილისში, ჭანტურიას ქუჩა 12-ში] კი აუქციონზე სახელმწიფომ 9,45 მილიონ აშშ დოლარად გაყიდა.

შენობის გაყიდვიდან მიღებული შემოსავლის 19%-ი უკვე კერძო კომპანიის ანგარიშზეა გადარიცხული, საიჯარო ქირის სახით.

ეკონომიკის სამინისტროსთვის შენობის დაცლიდან ერთ წელში ახალი შენობა უნდა აშენებულიყო, თუმცა, სამინისტრო დღემდე ნაქირავებ შენობაში აგრძელებდა მუშაობას.

თბილისში, ჭოველიძის ქ. 10ა-ში შენობა სამინისტრომ  შპს „ბიზნეს ცენტრი ბელინსკისგან“ იქირავა.

„ბიზნეს ცენტრი ბელინსკიზე“ „ტიფლის ბიზნეს ჯგუფის“ მიერაა დაფუძნებული. „ტიფლის ბიზნეს ჯგუფი“ კი 2013 წელს დააფუძნა ცაცა კვირიკაშვილმა. კომპანიის დარეგისტრირების პროცესში ცაცა კვირიკაშვილის მინდობილი პირი იყო მისი შვილი გიორგი ზაქაიძე, რომელიც რეესტრის ბოლო ამონაწერების მიხედვით, ამ ორივე კომპანიის დირექტორია.

საჯარო რეესტრის ამონაწერის მიხედვით, თბილისში, ჭოველიძის ქ. 10ა-ში მდებარე შენობის მესაკუთრე არის შპს „ბელინსკის 10ა“. ამავე ამონაწერით, ეს კომპანია არის მეიჯარე, მოიჯარე კი საქართველოს ეკონომიკისა და მდგრადი განვითარების სამინისტრო. იჯარის ხელშეკრულებად დოკუმენტში მითითებულია ის ხელშეკრულება, რომელიც სამინისტროსა და „ბიზნეს ცენტრი ბელინსკიზე“-ს შორის გაფორმდა 2016 წელს.

შპს „ბელინსკის 10ა“ ასევე დაკავშირებულია ცაცა კვირიკაშვილის ოჯახთან. ეს კომპანია შარშან დააფუძნა „ბიზნეს ცენტრი ბელინსკიზემ“, ხოლო დღეს მისი მესაკუთრეა კომპანია [„ადია ბიზნეს ჯგუფი“], რომლის 100-ივე პროცენტს ფლობს ცაცა კვირიკაშვილის შვილი, ნინო ზაქაიძე.

რაც შეეხება გიორგი ზაქაიძეს, ის ერთ-ერთი შპს „ტიფლის დეველოპმენტის“ მფლობელი და დირექტორიც იყო. გიორგი ზაქაიძე 2014 წელს ნოშრევან ნამორაძეს და მის ოჯახს კომპანიის იმიჯის შელახვაში ადანაშაულებდა. ნოშრევან ნამორაძე სოდ-ის ყოფილი ხელმძღვანელის, ერეკლე კოდუას ძმაზე, დავით კოდუაზე თავდასხმაში იყო ბრალდებული; ნოშრევან ნამორაძის მეუღლე, ნინო სუთიძე კი, დავით კოდუასთან დაპირისპირების მიზეზად „ტიფლის დეველოპმენტში“ მხარეებს შორის არსებულ ბიზნესინტერესებს ასახელებდა.

რეესტრის ბოლო ამონაწერით, გიორგი ზაქაიძე შპს „ტიფლის დეველოპმენტის“ დირექტორია, თუმცა წილის 100-ვე პროცენტი უკვე ყაზახეთის მოქალაქეს ეკუთვნის.

ბათუმის ზოოკუთხეში, სადაც 120-ზე მეტი ცხოველია, ყველაზე მეტად ცხოვრება პრიმატებს უჭირთ. ვოლიერში, სადაც ისინი ცხოვრობენ, იატაკი მეტლახისაა და ზამთარი მათ ვოლიერში ჩართული ელექტროგამათბობლით გადაიტანეს, თუმცა უკეთესი პირობების მოლოდინი პრიმატებს ვერც უახლოეს ხანში ექნებათ. ბათუმის მერიას ჯერ არ გადაუწყვეტია, კონკრეტულად სად გადაიტანენ ზოოპარკს, როგორ იქნება მოწყობილი და სხვა მნიშვნელოვანი საკითხები, შესაბამისად, ზოოკუთხის ცხოველები კვლავ საფრთხის ქვეშ რჩებიან.

„ტურისტული ობიექტების მართვის სააგენტოს“ ხელმძღვანელი, ალექსანდრე თევზაძე  ამბობს, რომ მდგომარეობის გასაუმჯობესებლად, შესაძლებლობის ფარგლებში, მუშაობენ და ზოოკუთხის მინიმალური მოთხოვნების დაკმაყოფილებას ცდილობენ:

„ეს შეეხება რაციონის მიმართულებას, ვოლიერებში დენდროექსპოზიციის მიმართულებას, წამლებით უზრუნველყოფას. მეტლახზე [ვოლიერში, სადაც პრიმატები ცხოვრობენ] ნახერხი იყრება რეგულარულად, მაქსიმალურად დავტვირთეთ ხის მასალებით, რომ ნაკლები შეხება ჰქონდეთ მეტალთან და ქვასთან. სისხლის ლაბორატორიული ანალიზი ვერ კეთდებოდა აქამდე, ახლა უკვე ვაკეთებთ, თანხა გამოყოფილია ამისთვის…. მაგრამ რაც უფრო სწრაფად გაკეთდება პროექტი, მით უკეთესი, რადგან ამ პირობებში მეტს ვერაფერს გავაკეთებთ. საფრთხე, რომ კვლავ შეიძლება დაიღუპონ ცხოველები, ისევ არსებობს. ამდენი წლის განმავლობაში, არასწორი მოპყრობის გამო, რა მდგომარეობაც გვაქვს, ასე უცებ არ გადაწყდება“, – ამბობს ალექსანდრე თევზაძე.

სააგენტოს ხელმძღვანელი არ უარყოფს, რომ ცხოველების მდგომარეობა მძიმეა. პირიქით, მას ბევრი არგუმენტი აქვს ამ ფაქტის გასამყარებლად, თუმცა ამბობს, რომ მას ამ ეტაპზე სხვა არაფრის გაკეთება არ შეუძლია.

„რაც ჩვენ გვაქვს ახლა, ვერც ზოოკუთხეს ვუწოდებთ და ვერც ზოოპარკს. მწარე სიმართლეა, რომ ესაა ზოოციხე, კარცერები, რომლებშიც იმყოფებოდნენ ცხოველები. ცხოველები ძილში კი არ გარდაიცვალნენ, წამებით მოკვდნენ, ღვიძლის დაშლა, მოტეხილობები, ანთებები… ეს ხდებოდა წლების განმავლობაში. მარტო 2013 წლიდან მაქვს მე სტატისტიკა, ალბათ 70-80 ცხოველია დაღუპული, მანამდე რა ხდებოდა, არც კი ვიცით…“

„ბათუმელები“ დაინტერესდა, ხომ არ იგეგმება ბათუმის ზოოკუთხიდან ცხოველების გადაყვანა თბილისის ზოოპარკში, სადაც ბათუმის ზოოკუთხიდან გასულ წელს უკანასკნელი კენგურუ გადაიყვანეს. ალექსანდრე თევზაძე ამბობს, მას ამის სურვილი ჰქონდა, განსაკუთრებით პრიმატების გადაყვანის, თუმცა თბილისის ზოოპარკი ამისთვის მზად არ არის:

„ყველა ცხოველის მისაღებად არ არის მზად თბილისის ზოოპარკი, მათ უნდა აიღონ პასუხისმგებლობა, ისე არ არის, როგორც აქ, ბათუმში იყო ადრე – ოღონდ გვყავდეს ცხოველები. 35 პრიმატი გვყავს, განსაკუთრებული ყურადღება ესაჭიროებათ, სტრესის ქვეშ არიან, მათი იერარქიული წყობა დარღვეულია და ეს ყველაფერი მათზე მოქმედებს.“

ბათუმის ზოოკუთხის პრობლემები წელს სასამართლოს განხილვის საგანიც გახდა. ზოოპარკის ყოფილი დირექტორი, ამირან მურვანიძე ბათუმის „ტურისტული ობიექტების მართვის სააგენტოს“ წინააღმდეგ დავობდა, საიდანაც იგი გასული წლის აპრილში გაათავისუფლეს. სასამართლომ მერიას დაქვემდებარებულ უწყებას გათავისუფლებული თანამშრომლის სამსახურში აღდგენა, ასევე განაცდურის ანაზღაურება დააკისრა, რაც ამ დროისთვის უკვე 11 ათას ლარს შეადგენს. თუმცა ალექსანდრე თევზაძე ამბობს, რომ სასამართლოს გადაწყვეტილებას აუცილებლად გაასაჩივრებს:

„თუ ზოოპარკის მომავალზე ვლაპარაკობთ, ვერ დავაბრუნებთ იმ მმართველობას, რომელმაც ამ მდგომარეობამდე მიიყვანა ზოოპარკი. გამოძიება უნდა ჩატარდეს, დადგინდეს, რატომ მოკვდა ამდენი ცხოველი. თუ ისეთი ზოოპარკი უნდა გავაკეთოთ, სადაც ამდენი ცხოველი დაიღუპება, მაშინ სჯობს საერთოდ უარი ვთქვათ ზოოპარკზე.  ჩვენ აუცილებლად გავასაჩივრებთ სასამართლოს გადაწყვეტილებას. სპეციფიკიდან გამომდინარე, მოსამართლემ, როგორც ჩანს, ვერ გაითვალისწინა რასთან გვაქვს საქმე. ამას ის შედეგები მალაპარაკებს, რაც გვაქვს ზოოპარკში.“

ადგილი, სადაც ბათუმის ზოოკუთხე უნდა გადაიტანონ, ჯერ შერჩეული არ არის. სააგენტოს დირექტორი ამბობს, რომ საუბარი იყო რამდენიმე ადგილზე, მათ შორის ბოტანიკური ბაღის მიმდებარე ტერიტორიაზეც. მისი თქმით, ჩეხეთში იყო ფაქტი, როცა ბოტანიკური ბაღის მახლობლად გადაიტანეს ზოოპარკი და ამან გაამართლა, რადგან ზოოპარკს ბევრი მნახველები ჰყავდა.

სანამ ბათუმის მერია ახალი ზოოკუთხისთვის ადგილს შეარჩევს, კონცეფციას დაამუშავებს, ტენდერს გამოაცხადებს და ადმინისტრაციულ დავას მოაგვარებს, ცხოველები ძველ ვოლიერებში რჩებიან. ბათუმის ზოოკუთხეში უკვე მარტო დარჩა დურუკული, მცირე ზომის მაიმუნი, რომელიც ღამის ცხოველია. მას მეწყვილე მოუკვდა.

როგორც ჩანს, ბათუმის ზოოკუთხის ბინადრებიდან ყველაზე მეტად კენგურუს გაუმართლა, რომელიც ბათუმიდან წაიყვანეს და ახლა თბილისის ზოოპარკში ცხოვრობს.

ამავე თემაზე: 

ზურაბ გურიელიძე ბათუმის ზოოკუთხის შესახებ: გორილა მომწონს და მინდა მყავდეს – ასე არ შეიძლება

ვოლიერებში დაღუპული ცხოველები – ბათუმის მერი ზოოკუთხის მომავალზე 

ბათუმის ზოოკუთხესთან დაკავშირებული ურთიერთბრალდებები – ორი მხარე

________________________________________________

მთავარ ფოტოზე: ბათუმის ზოოპარკი. ედო მჟავანაძის ფოტო 

ბათუმის საფეხბურთო სტადიონის მშენებლობის ტექნიკური ზედამხედველობისთვის აჭარის ფინანსთა და ეკონომიკის სამინისტროს 3 მილიონ 520 ათას 474 ლარი აქვს გათვალისწინებული. სტადიონის მშენებლობა 2 თვეა მიმდინარეობს, ტექნიკური ზედამხედველი კი შერჩეული არ არის.

ფინანსთა და ეკონომიკის სამინისტროს შპს „სტადიონმა“ „სტადიონის სამშენებლო სამუშაოების ტექნიკური ზედამხედველობის მომსახურების შესყიდვაზე“ ტენდერი ბოლოს, მიმდინარე წლის 28 თებერვალს გამოაცხადა. წინადადებების მიღება 23 მარტს დასრულდება. ადრე გამოცხადებულ ტენდერებში კი ზედამხედველის შერჩევა ვერ მოხერხდა.

სატენდერო პირობების მიხედვით, გამარჯვებულს ევალება სტადიონის სამშენებლო სამუშაოების მიმდინარეობის ყოველდღიური ზედამხედველობა – სამუშაოების სამშენებლო კანონმდებლობისა და პროექტით გათვალისწინებული მოთხოვნების/ტექნიკური სპეციფიკაციების სრული დაცვით შესრულების უზრუნველყოფა.

აჭარის მთავრობაში „ბათუმელებს“ განუცხადეს, რომ სტადიონის მშენებლობას, ტენდერში გამარჯვებულის გამოვლენამდე, სამინისტროს მიერ გამოყოფილი 2 სპეციალისტი უწევს ზედამხედველობას: „ამ ეტაპისთვის ეს საკმარისია სამშენებლო სამუშაოების მონიტორინგისთვის“.

სტადიონის მშენებლობაზე შპს „სტადიონსა“ და შპს „ანაგს“ შორის გაფორმებული ხელშეკრულების მიხედვით, სახელშეკრულებო თანხა, დღგ-ს გარეშე, 99 მილიონ 448 ათას 408 ლარია. თუმცა ხელშეკრულებაში აღნიშნულია, რომ საერთო ღირებულება არის 117 მილიონ 349 ათას 122 ლარი დღგ-ს ჩათვლით.

ბათუმში, მანქანათმშენებელი ქარხნის ტერიტორიაზე 20 000 მაყურებელზე გათვლილი სტადიონის მშენებლობას საძირკველი მიმდინარე წლის 21 იანვარს ჩაუყარეს.

სტადიონის მშენებლობა 2020 წლის სექტემბერში უნდა დასრულდეს.

ამავე თემაზე:

ეროვნული ბანკი საქართველოს დამოუკიდებლობის დღესთან დაკავშირებით 10 ლარის ნომინალის ვერცხლის საკოლექციო მონეტას გამოუშვებს. ბანკის ინფორმაციით, მონეტის რეალიზაცია მიმდინარე წლის 15 მაისიდან დაიწყება და მისი შეძენა შესაძლებელი იქნება როგორც ეროვნული ბანკის საკასო ცენტრსა და ყვარლის ფულის მუზეუმში, ისე ეროვნული ბანკის ვებგვერდზე განთავსებული ონლაინმაღაზიის მეშვეობით.

მონეტის სარეალიზაციო ფასი 100 ლარია.

„საერთაშორისო გამჭვირვალობა – საქართველომ“ ბათუმის რეგიონული წარმომადგენლობის კოორდინატორის თანამდებობაზე ვაკანსია გამოაცხადა.

ამ თანამდებობაზე ბათუმში 2015 წლიდან მალხაზ ჭკადუა მუშაობს. მისი თქმით, იგი თბილისში, ამავე ორგანიზაციაში იმუშავებს რეგიონული ოფისების მენეჯერად.

ბათუმში კი ორგანიზაცია სამუშაოდ იწვევს კვალიფიციურ პირს  კოორდინატორის პოზიციაზე.

რეგიონული კოორდინატორის ძირითადი მოვალეობები იქნება: წარმომადგენლობის საქმიანობის ადმინისტრირება და კოორდინაცია; შეხვედრები ადგილობრივი ხელისუფლების წარმომადგენლებთან; ადგილობრივი მოვლენების რეგულარული ანალიზი და მათთან დაკავშირებით მოსაზრებების წარმოდგენა; ადგილობრივი თვითმმართველობის ორგანოებში განვითარებული მოვლენების მონიტორინგი და მათ შესახებ მოხსენების რეგულარულად მომზადება;  ქვეყნის კანონშემოქმედებითი პროცესისა და რეგიონში განვითარებული მნიშვნელოვანი მოვლენების შესახებ ანგარიშების, ბლოგებისა და სხვა წერილობითი მასალის მომზადება; ადგილობრივი მოვლენებისა და ღონისძიებებისათვის თვალის დევნება და ა.შ. ინფორმაცია ვაკანსიის შესახებ დაწვრილებით იხილეთ ბმულზე. 

განცხადებების წარდგენის ბოლო ვადაა 2018 წლის 10 აპრილი.

„საერთაშორისო გამჭვირვალობა – საქართველო“ „საერთაშორისო გამჭვირვალობის გლობალური ანტიკორუფციული მოძრაობის“ ეროვნული ბიუროა საქართველოში. ორგანიზაციის საქმიანობის მიზანი საჯარო ინსტიტუტების განვითარების, კარგი მმართველობისა და კანონის უზენაესობის დამკვიდრების ხელშეწყობა, მთავრობის გამჭვირვალობისა და ანგარიშვალდებულების უზრუნველყოფა, სამართლიანი და დემოკრატიული არჩევნების მხარდაჭერა და საყოველთაოდ აღიარებული ადამიანის უფლებების დაცვაა.