ქობულეთის მუნიციპალიტეტის მერიის ინფორმაციით, პირველ ივნისს, ბავშვთა დაცვის დღესთან დაკავშირებით, ქობულეთში რამდენიმე ღონისძიებაა დაგეგმილი. ღონისძიება 12:00 საათზე ცენტრალურ პარკში დაიწყება – საჯარო სკოლების დაწყებითი კლასის მოსწავლეები მხიარულ სტარტებს მოაწყობენ.
14:00 საათზე ზღაპრის გმირების მონაწილეობით საბავშვო შემეცნებითი და სახალისო წარმოდგენა გაიმართება. მოეწყობა საპნის ბუშტების შოუ, ფერადი ცარცებით მოხატავენ ასფალტის საფარს ცენტრალურ პარკში.
18:00 საათზე ცენტრალური პარკის ამფითეატრის ტერიტორიაზე გაიმართება კონცერტი საბავშვო ბაღების აღსაზრდელების მონაწილეობით.
გარდა ამისა, მთელი დღის განმავლობაში ცენტრალურ პარკში მოეწყობა საერო სკოლა „ფარნავაზის“ მე-7 კლასის მოსწავლის, სერგო მახარაძის ნახატების პერსონალური გამოფენა.