Batumelebi

„ეს არის ფოტოები, რომლებიც მოგზაურობის დროს გადავიღე, მათ შორის, აფრიკაში, ტანზანიაში… გამოვფენ აჭარის მაღალმთიან სოფლებში გადაღებულ ფოტოებსაც,“ – ამბობს გურბეთ ქართალმიში. ის თურქეთიდანაა და მეორე წელია ბათუმში ცხოვრობს. გურბეთი ბათუმის სახელმწიფო უნივერსიტეტში მაგისტრატურას ამთავრებს და ერთ-ერთ კერძო სკოლაში ინგლისურს ასწავლის.

გურბეთ ქართალმიშის ფოტოების გამოფენა-გაყიდვა ხვალ, 5 აპრილს, საღამოს ხუთ საათზე გაიხსნება სამხატვრო სკოლაში [ბათუმი, ფიროსმანის 16]. ეს საქველმოქმედო ღონისძიებაა. გურბეთი ფოტოების გაყიდვიდან შემოსული ფულით მაღალმთიან სოფლებში საბავშვო ბაღებისთვის სათამაშოების შეძენას აპირებს.

„ამ ღონისძიების ორგანიზატორია ქალთა სოლიდარობის პლატფორმა. ორგანიზაციის მიზანია სოლიდარობის, საქართველოს და თურქეთს შორის მეგობრობის, ასევე ქალთა გაძლიერება. ჩემთან ერთად იქნება ჯემილე ჩეთინქაია. ის ჩაატარებს სამუშაო შეხვედრას „ებრუზე“, ანუ დაინტერესებულ პირებს შესაძლებლობა ექნებათ პრაქტიკულად ნახონ, როგორ კეთდება თურქული არტი წყალზე,“ – გვიყვება გურბეთ ქართალმიში.

ფოტოების ფასი სხვადასხვაა. გურბეთის თქმით,  თითო ფოტოს საშუალოდ 30 ლარად გაყიდის.

„შეხედე სამყაროს სიყვარულის თვალით,“ – გურბეთმა ასე დაარქვა საკუთარ გამოფენას, რომელიც 6 აპრილს, ანუ შაბათს, ხუთ საათამდე გაგრძელდება. იგი დარწმუნებულია, რომ განსაკუთრებულ ინტერესესს ტანზანიაში გადაღებული ფოტოები გამოიწვევს. ტანზანიაში გურბეთმა გასულ ზამთარს იმოგზაურა. ის ერთ-ერთი პროექტის მოხალისე იყო და იქ სოციალურად დაუცველ ბავშვებს ინგლისურ ენას ასწავლიდა.

 

 

 

ხელვაჩაურში დღეს დილიდან აბონენტებს ბუნებრივი აირის მიწოდება შეუწყდათ. „სოკარ ჯორჯია გაზის“ ინფორმაციით, შეზღუდვა გაზსადენზე გეგმიურ სამუშაოებს უკავშირდება, რასთან დაკავშირებითაც მოსახლეობა წინასწარ sms შეტყობინებებით გააფრთხილეს.

კომპანია „სოკარ ჯორჯია გაზი” მომხმარებელს მოუწოდებს, დაკეტილ მდგომარეობაში იქონიონ საცხოვრებელ ბინებში არსებული გაზის ონკანები და უყურადღებოდ არ დატოვონ დანადგარები.

კომპანიის ინფორმაციით, ბუნებრივი აირის მიწოდება ხელვაჩაურში 3 საათიდან  ეტაპობრივად აღდგება, საღამოს საათებში კი, გაზი ყველა აბონენტს მიეწოდება.

დამატებითი ინფორმაციისთვის აბონენტებს შეუძლიათ დარეკონ „სოკარ ჯორჯია გაზის“ ცხელ ხაზზე: 16 114

ფინანსთა სამინისტროს შემოსავლების სამსახურის ცნობით, საბაჟო გამშვებ პუნქტებში – „სადახლო-საავტომობილო“, „წითელი ხიდი“ და „სარფი“,  ქვეყნის საზღვარზე არადეკლარირებული სიგარეტის კანონდარღვევით შემოტანის მცდელობის ფაქტები აღიკვეთა.

მებაჟე ოფიცრებმა ეჭვის საფუძველზე, საქართველოსა და აზერბაიჯანის მოქალაქეების ფიზიკური დათვალიერების შედეგად, ჯამში, 3 000 ღერი არადეკლარირებული სიგარეტი აღმოაჩინეს. შემთხვევები 1-2 აპრილს მოხდა.

საქართველოს საგადასახადო კოდექსის 289-ე მუხლის მე-14 ნაწილის შესაბამისად, კანონდამრღვევ მოქალაქეებს ჩამოერთვათ საქონელი და სანქციის სახით, თითოეულს, ფულადი ჯარიმა, ათას ათასი ლარის ოდენობით შეეფარდათ.

ტელეკომპანია „პირველმა“ გადაცემა „პოლიტმეტრში“ ფარული ჩანაწერის ის ფრაგმენტი აჩვენა, სადაც, სავარაუდოდ, არჩილ ხაბაძე  [ჩანაწერის ავთენტურობა დადასტურებული არ არის] უცნობ პირს დეპუტატების: გია ვოლსკისა და ერეკლე ტრიპოლსკის აჭარაში ბიზნესინტერესებზე ელაპარაკება.

ტელეკომპანია „პირველის“ განმარტებით, აუდიოჩანაწერი ერთსაათიანია და ესაა საუბარი ორ პირს შორის. TV „პირველს“ ინფორმაცია „ოცნების“ ბათუმელმა აქტივისტმა, არჩილ გვიანიძემ მიაწოდა. ამის შესახებ გვიანიძემ თავად განაცხადა გადაცემა „პოლიტმეტრში“.

ფრაგმენტი ჩანაწერიდან, რომელიც ტელეკომპანიამ გაავრცელა:

არჩილ ხაბაძე: გიორგი რაღაცაზე იყო ნაწყენი და არ ამბობდა, მე ერთი ორჯერ ვუთხარი…

უცნობი: გიორგი?

არჩილ ხაბაძე: კვირიკაშვილი, ცხვირი დარჩა გაშვერილი, რა ვიცი მე, იგი ხომ არ ვარ..

უცნობი: ისე რა იყო თემა?

არჩილ ხაბაძე: ვერ მივხვდი რაცხა.

უცნობი: დღემდე არ იცი?

არჩილ ხაბაძე: დღემდე არ ვიცი. ბოლო შეხვედრა რომ იყო და ჩავიყვანე უმაღლესი საბჭოდან ჩემი მინისტრები, ვერ მივხვდი, 13 მინისტრი დამახვედრა და რაცხა ყ… სიტუაცია შეიქმნა, ამის გამო არ იყო, რაცხა ჩაჩორტეს, ვერ მივხვდი, ვერ ვხვდები.

უცნობი: დღემდე არ იცი მიზეზი რა უნდა?

არჩილ ხაბაძე: არა, მე მითხრა მიზეზი, სისხლის გადასხმაა საჭიროო და მერე მაქ ვოლსკი..

უცნობი: სისხლის გადასხმაა საჭირო და ესე იგი ჩემს ფლაგზე გადმო და ჩემთანო?

არჩილ ხაბაძე: არა, სისხლის გადასმაა საჭირო რეგიონში, მაქ პარტიის ვოლსკები და ტრიპოლსკებიც დამიპირისპირდნენ.

უცნობი: ვოლსკიც დაგიპირისპირდა და ტრიპოლსკიც?

არჩილ ხაბაძე: ხო, ახლა მაგენს ბიზნესები უნდოდათ აქ და ჩავჩეხე, მივჩეხე, მოვჩეხე.

უცნობი: არ უკეთებდი?

არჩილ ხაბაძე: რა არ ვუკეთებდი, ტირ-პარკი მაგის არაა, ვოლკსის.

უცნობი: რომელი ტირ-პარკი?

არჩილ ხაბაძე: მეორე, იგი რომაა. მაგან იჩალიჩა. მერე ტრიპოლსკი მაგერ არ გვყავდა, ქობულეთში რომ ლაზიშვილს პატრონობდა და რაცხა, ახლა ჩაბარებული რომაა.

უცნობი: კაროჩე მაგენის ტენდერები და შავბნელი საქმეები ჩაჩეხე.

არჩილ ხაბაძე: ვჩეხავდი სერიოზულად.

უცნობი: მერე მაი ბიძინამ არ იცი ყველაფერი თუ არ ეუბნებოდი?

არჩილ ხაბაძე:  ბიძინასთან რომ დამდგარიყო საკითხი, ვიტყოდი, აბა არ ვიტყოდი, არ დადგა, იქამდე არ აქონდათ, მერე გიორგისთან თქვეს, ჩვენ რომ ბათუმი, აჭარა მოვიგოთ, ხაბაძის რეიტინგი დაბალიაო.

აჭარის მთავრობის ყოფილი თავმჯდომარე, არჩილ ხაბაძე ამბობს, რომ ფარულ ჩანაწერში, რომელიც „TV პირველის“ ეთერში გავიდა, საკუთარ ხმას ვერ ცნობს, თუმცა, მსგავსი შინაარსის თემებზე, მისი შეფასებით, საეჭვო პირებთან სხვა დროსაც უსაუბრია და მათ მიზანმიმართულად ცრუ ინფორმაციას აწვდიდა.

“მიზანმიმართულად ვაწვდიდი მცდარ ინფორმაციას” – ხაბაძე “TV პირველის“ ფარულ ჩანაწერზე

See more

აჭარის უმაღლესი საბჭოს დეპუტატი „ქართული ოცნებიდან“, ლადო მგალობლიშვილი, ფეისბუქზე გამოეხმაურა ფარულ ჩანაწერს, რომელიც დღეს ტელეკომპანია „პირველმა“ გაავრცელა.

ფარულ ჩანაწერში, სავარაუდოდ, ისმის აჭარის ყოფილი მთავრობის თავმჯდომარის, არჩილ ხაბაძის ხმა, რომელიც თავისი გადადგომის მიზეზებზე უამბობს უცნობ თანამოსაუბრეს. ჩანაწერის ავთენტურობა დადასტურებული არ არის.

„ადამიანის ფარულად ჩაწერა უმდაბლესი საქციელია, ამიტომ არ ვეუბნები ამის ჩამწერს გამარჯობას. ვინც ეს საქციელი წააქეზა ისიც არაკაცია“, – წერს ლადო მგალობლიშვილი ფეისბუქზე.

ნიშნავს თუ არა ეს იმას, რომ დეპუტატმა იცის, ვინ გააკეთა ფარული ჩანაწერი და აცნობა თუ არა ამის შესახებ პოლიციას? – „ბათუმელებმა“ ეს კითხვები ლადო მგალობლიშვილს დაუსვა.

ლადო მგალობლიშვილი ამბობს, რომ მას აქვს ვერსია, თუ ვის შეიძლება გაეკეთებინა ჩანაწერი:

„მე მაქვს ჩემი მოსაზრება, ხმაზე ეს ადამიანი ვიცანი, მაგრამ ამას ჯერჯერობით ხმამაღლა ვერ ვიტყვი. ეს გამოძიებამ უნდა დაადგინოს. პირველ რიგში უნდა დადგინდეს, ავთენტურია თუ არა ჩანაწერი, მერე მერე ხმები და მე იმის მომხრე ვარ, რომ აუცილებლად უნდა დაისაჯოს ამის გამკეთებელი. მე არ ვარ ფიგურანტი, ამ პროცესის მონაწილე და არანაირი უფლება არ მაქვს მივმართო [პოლიციას], მაგრამ რადგან საჯაროდ გავრცელდა ჩანაწერი, ალბათ მოხდება ფაქტის შესწავლა. ზოგადად, ამ ადამიანზე [ვინც გააკეთა ფარული ჩანაწერი] არა ვარ დიდი წარმოდგენის, ვიცნობ, მაგრამ არ ვესალმები“, – განაცხადა ლადო მგალობლიშვილმა.

კითხვაზე, მისი აზრით, რატომ შეიძლებოდა ჩანაწერი გავრცელებულიყო ახლა, ლადო მგალობლიშვილი ამბობს, რომ მიზეზი მისთვის უცნობია, თუმცა შესაძლოა პირადი განაწყენება გამხდარიყო ამის მიზეზი.

ბათუმის ციხეში პატიმრებს, რომლებმაც ხელში მავუთულები გაიყარეს, ცოტნე ანანიძე შეხვდა, უმაღლესი საბჭოს ადამიანის უფლებათა დაცვის კომიტეტის თავმჯდომარე. მისი თქმით, პატიმრები ამ დროისთვის დეესკალაციის ოთახში განმარტოებით იმყოფებიან და მათი ჯანმრთელობის მდგომარეობა სტაბილურია.

„მათ აღარ აქვთ გაყრილი ხელში მავთულები… ერთ-ერთს პატიმარს აქვს მხოლოდ ხელში მავთული. მე სამივე პატიმარს ცალ-ცალკე შევხვდი და სამივე მათგანმა დაადასტურა, რომ აქვთ წყლისა და ვენტილაციის პრობლემა. ერთ-ერთი მათგანი ასევე ყვება თანამშრომელთან სიტყვიერი დაპირისპირების შესახებ. მე მხოლოდ ამ სამ პატიმარს შევხვდი მას შემდეგ, როცა „ბათუმელების“ სტატიიდან ხელში მავთულების გაყრის შესახებ გავიგე,“ – ამბობს ცოტნე ანანიძე.

პატიმრების პროტესტს დღეს, 3 აპრილს, პენიტენციური სამსახურიც გამოეხმაურა. სამსახურის ცნობით, მათთვის უცნობია მიზეზი, რის გამო მიმართეს პატიმრებმა პროტესტის ამ ფორმას. პენიტენციური სამსახური პატიმრებისთვის წყლის გრაფიკით მიწოდებაშიც საკუთარ პასუხისმგებლობას გამორიცხავს: „დაწესებულების წყალმომარაგება მოსახლეობაზე ბევრად უკეთესია,“ – განმარტავენ აქ.

ცოტნე ანანიძე, უმაღლესი საბჭოს ამდაიანის უფლებათა დაცვის კომიტეტის თავმჯდომარე, კი მიიჩნევს, რომ წყლის პრობლემა უპირობოდ მოსაგვარებელია, როგორც ბათუმის ციხეში, ასევე ციხესთან ახლოს მყოფ ოჯახებში.

„ციხეში წყლის პრობლემა გამოსასწორებელია და ჩვენ ვიმუშავებთ ამ საკითხზე აუცილებლად… კანონი მოითხოვს თავად პენიტენციური დაწესებულების 24-საათიან წყალმომარაგებას. აქ უკვე მნიშვნელობა არ აქვს, ვინ რას მიიჩნევს…

მოსაგვარებელია ვენტილაციის პრობლემაც. მე თავად დავათვალიერე ვენტილაციის სისტემა, მაგრამ, როგორც ჩანს, ეს პატიმრებისთვის არ არის საკმარისი,“ – გვითხრა ცოტნე ანანიძემ.

 

„მსჯავრდებულებმა აღნიშნული ქმედების მიზეზი არ განმარტეს,“ – აღნიშნულია წერილობით პასუხში, რომელიც იუსტიციის სამინისტროს პენიტენციურმა სამსახურმა „ბათუმელებს“ გამოუგზავნა. ამ სამსახურის ინფორმაციით, სამი პატიმარი, რომლებმაც ხელში მავთული გაიყარეს და ერთმანეთს გადაებენ, ამჟამად „ბათუმის ციხეში“, დეესკალაციის ოთახში იმყოფება და მათი ჯანმრთელობის მდგომარეობა სტაბილურია. პროტესტის ნიშნად მავთულების ხელში გაყრის შესახებ დღეს, 3 აპრილს, „ბათუმელებს“ ადვოკატმა, თეონა ნიკოლაიშვილმა უთხრა.

„მსჯავრდებულმა გ.მ.-მ 2019 წლის 1 აპრილს, 23:39 სთ-ზე, კისერზე კანქვეშ და მარცხენა ხელის „ცერა“ თითთან ე.წ „სპილენძის მავთული“  გაიყარა და ხელით მიება მაგიდის ფეხს. ნახევარი საათის შემდეგ მის საკანში მყოფმა მსჯავრდებულმა დ. ჭ.-მ (2 აპრილს 00:08 სთ-ზე) მარცხენა ხელის „ცერა“ თითთან გაიყარა ძაფი და  მ.-ს მიერ თითებს შუა გაყრილ მავთულს გამოაბა. დაახლოებით ერთი საათის შემდეგ, მათ მესამე მსჯავრდებული, შ. დ.-ც შეუერთდა (2 აპრილს 01:14 სთ-ზე) – მარცხენა ხელის ცერა თითთან გაიყარა ძაფი და მ.-ს მიერ თითებს შუა გაყრილ მავთულს გამოაბა. მსჯავრდებულებმა აღნიშნული ქმედების მიზეზი არ განმარტეს. 2 აპრილს, 12:50 სთ-ზე მსჯავრდებულმა მარსაგიშვილმა ადვოკატთან შეხვედრამდე მაგიდიდან აიხსნა ხელი, სხვა მსჯავრდებულებს მავთულის ამოძრობის გარეშე ჩამოეხსნა და ადვოკატთან შესახვედრად გავიდა. ადვოკატთან შეხვედრის შემდეგ მარსაგიშვილი  საკანში შეიყვანეს, სადაც კარადა დააზიანა, რის შემდეგაც  დეესკალაციის ოთახში გადაიყვანეს.

2 აპრილს, 23:25 სთ-ზე საკანში დარჩენილმა დ.-მაც დააზიანა საკანში არსებული კარადა. ციხის თანამშრომლების ინფორმაციით, დ. და ჭ. არაადეკვატურად იქცეოდნენ, თვითდაზიანებით იმუქრებოდნენ. ამასობაში კი, თითებს შუა გაყრილი ძაფებით ერთმანეთზე გადაბმული პატიმრები ერთმანეთს ჩაეხსნენ, ხოლო ციხის თანამშრომლებმა ისინი დეესაკალციის ოთახებში გადაიყვანეს,“ – აღნიშნულია პენიტენციური სამსახურიდან მიღებულ ინფორმაციაში.

პენიტენციური სამსახურისვე ცნობით, გუშინ, ღამით, ერთ-ერთმა მსჯავრდებულმა „გაურკვეველი საშუალებით“ ორივე ხელზე მრავლობით ჭრილობა მიიყენა – 23 საათსა და 48 წუთზე. 4 წუთის შემდეგ კი, დაზიანება მეორე მსჯავრდებულმაც მიიყენა – ხელის მეორე და მესამე თითებს შუა.

„საქმის მასალები გადაიგზავნა საგამოძიებო დეპარტამენტში. მსჯავრდებულები ამჟამად დეესკალაციის საკანში იმყოფებიან, მათი ჯანმრთელობის მდგომარეობა სტაბილურია,“ – აღნიშნავენ პენიტენციურ სამსახურში.

ამ სამი პატიმრის გარდა კიდევ 13 პატიმარი აწერს ხელს წერილს, რომელიც დღეს ბათუმის ციხიდან სხვადასხვა სახელმწიფო ორგანოს, საერთაშორისო და არასამთავრობო ორგანიზაციებს გადაუგზავნეს. კოლექტიურ წერილში პატიმრები სხვადასხვა პრობლემაზე საუბრობენ, მათ შორის, სასმელი წყლის და ვენტილაციის პრობლემაზე. პატიმრების თქმით, განსაკუთრებით გაუსაძლისი დეესკალაციის ოთახია, სადაც ფანჯარა ჩაცემენტებულია, ხოლო საპირფარეშო იზოლირებული არ არის.

სასმელი წყლის პრობლემას ადასტურებს პენიტენციური სამსახურიც, თუმცა მათი თქმით, დაწესებულებას აქვს რეზერვუარი.

ციხიდან გამოგზავნილ წერილში პატიმრები საუბრობენ სამედიცინო მომსახურების და მედიკამენტებზე წვდომის პრობლემებზეც, რასაც პენიტენციური სამსახური კატეგორიულად უარყოფს.

„…შემოდიან ხსენებულ საკნებში და გვართმევენ საწერ კალმებს, არ გვაწერინებენ განცხადება-საჩივრებს, არ მოჰყავთ სოციალი და ამ ყველაფერს ახორციელებენ ზემოთ ხსენებული დაწესებულების დირექტორისა და მისი მოადგილის დავალება-მითითებით… საკნებში მოთავსებისას ასევე შემოდიან და ძალის გამოყენებით გვადებენ „ნარუჩნიკებს,“, გვაგდებენ პოლზე უწყლოთ და უსაკვებოთ, ასევე, ხშირ შემთხვევაში გვართმევენ ტანსაცმელსაც…“ – წერენ პატიმრები.

ტელეკომპანია „პირველი“ აჭარის ყოფილი მთავრობის თავმჯდომარის, არჩილ ხაბაძის ფარულ ჩანაწერს ავრცელებს, სადაც ხაბაძე საუბრობს, რა გახდა მისი მხრიდან აჭარის მთავრობის თავმჯდომარის პოსტის დატოვების მიზეზი.

ჩანაწერის ავთენტურობა დადასტურებული არ არის. „ბათუმელები“ ცდილობს დაუკავშირდეს არჩილ ხაბაძეს, რომელიც ამჟამად საქართველოს პარლამენტარია.

ტელეკომპანია „პირველის“ მიერ გავრცელებულ ჩანაწერში კი ისმის:

არჩილ ხაბაძე: ბიძინასთან რომ დამდგარიყო საკითხი, ვიტყოდი, აბა არ ვიტყოდი? არ დადგა, იქამდე ვერ აქონდათ… მერე გიორგისთან თქვეს, ჩვენ რომ ბათუმი, აჭარა მოვიგოთ, ეს ხაბაძის რეიტინგი დაბალიაო, მარა ბიძინას რომ ველაპარაკე, ბათუმში არ გაქვსო, ბათუმში რატომ მაქვს დაბალი მე ვუთხარი, ქობულეთში ნორმალური და ზედა რეგიონებში ძაან მაღალი, იმიტომ, რომ ეს ერმაკოვი შემოგვტენეს ყ…. და არ მემორჩილება მე ვუთხარი და აკეთებს მისებურად…

უცნობი: ერმაკოვს კიდე მილიონები აქვს გადარიცხული…

არჩილ ხაბაძე: მე ვუთხარი აბა რა, რეალობა სახეზეა, აბა ზედა რაიონებში, ხელვაჩაურში და ქობულეთში ნორმალურია, მაინც საქმე კეთდებოდა და ნუ, ბათუმია მთავარიო და ეს იყო მიზეზი, ბიძინას რომ ველაპარაკე, ეფექტურობა უნდა გავზარდო აჭარაშიო, მერე დეემთხვა ეს ბულვარის თემაც და…

დეპუტატები ასე ამბობდნენ, რომ პრემიერს უნდა ვუთხრათო, ერთმა დეპუტატმა მითხრა და ეტყობა იგიც და არაა გამორიცხული ამის ნაჩალიჩარიც იყოს.

უცნობი: ვისი?

არჩილ ხაბაძე: თვითონ პატარაძის, მისი უკანა ფლანგებით..

უცნობი: ვისი, პატარაძის?

არჩილ ხაბაძე: ჰო.

არჩილ ხაბაძემ აჭარის მთავრობის თავმჯდომარის პოსტზე სამი წელი და 8 თვე იმუშავა. მანამდე იგი „ქართუ ბანკის“ აჭარის ფილიალის ხელმძღვანელი იყო.

„ჩვენ პოლიტიკურ გუნდთან კონსულტაციებისა და მსჯელობის საფუძველზე მივიღეთ გადაწყვეტილება, ოთხწლიანი მოღვაწეობის შემდეგ, დავტოვო აჭარის ავტონომიური რესპუბლიკის მთავრობის თავმჯდომარის პოსტი და ახალ ამპლუაში განვაგრძო ქვეყნისა და რეგიონის სამსახურში ყოფნა. პოსტის დატოვების შემდეგ აქტიურად ჩავერთვები „ქართული ოცნების“ წინასაარჩევნო პროცესებში…  წარმატებას ვუსურვებ აჭარის ავტონომიური რესპუბლიკის მომავალ თავმჯდომარეს,“ – განაცხადა არჩილ ხაბაძემ ბრიფინგზე 6 ივლისს, როცა თანამდებობის დატოვების შესახებ განაცხადა.

არჩილ ხაბაძის შემდეგ აჭარის მთავრობის თავმჯდომარე ზურაბ პატარაძე გახდა, რომელმაც ამ პოსტზე ორი წელი იმუშავა, 2018 წლის 4 ივლისს მანაც დატოვა თანამდებობა  და აჭარის მთავრობის თავმჯდომარის სავარძელი თორნიკე რიჟვაძემ დაიკავა, რომელიც მერვე თვეა ამ თანამდებობაზეა.

 

კონსენსუსი – ამ სიტყვას ისევ აქტიურად იყენებს თორნიკე რიჟვაძე, აჭარის მთავრობის თავმჯდომარე ბათუმში ახალი მეჩეთის მშენებლობის თემაზე საუბრის დროს. რატომ უნდა იყოს დამოკიდებული მუსლიმი თემი კონსენსუსზე, თუკი რელიგიის თავისუფლება კონსტიტუციით გარანტირებულია? – „ბათუმელები“ თორნიკე რიჟვაძესთან ინტერვიუს იმ მონაკვეთს გთავაზობთ, სადაც აჭარის მთავრობის თავმჯდომარე მეჩეთის აგების თემაზე საუბრობს.

ბატონო თორნიკე, ბათუმის მეჩეთზე თქვენი თავდაპირველი განცხადების გამო ბულინგის მსხვერპლი აღმოჩნდით. რამდენიმე დღეში შეცვალეთ პათოსი და თქვით, რომ საზოგადოება უნდა შეთანხმდეს ახალი მეჩეთის აგებაზე. რატომ მოიქეცით ასე – ფეისბუქრეაქციის გამო, თუ მრჩევლების რეკომენდაცია იყოს ეს?

პირველი, რომ ეგრე მარტივად არ ვბულინგდები, ეს ერთი. რაც შეეხება აღნიშნულ საკითხს, ეს არის სიღრმისეული მსჯელობის საგანი და მე ვრჩები იმავე აზრზე, რაც მაშინ განვაცხადე. ყველა გადაწყვეტილება იქნება ისე, როგორც ამ სახელმწიფოს ეკადრება, ისე, როგორც ამას საზოგადოებრივი კონსენსუსი მოითხოვს. რიგი საკითხები, როგორიცაა სამართლებრივი და სანებართვო, რა თქმა უნდა, ეს პროცედურების მიხედვით უნდა გადაწყდეს.

მერიასა და მუსლიმ თემს შორის სასამართლო განხილვა შეჩერებულია გაურკვეველი ვადით… თქვენ რატომ მიიჩნევთ, რომ კონსენსუსზე უნდა იყოს დამოკიდებული მუსლიმი თემი? ასე საზოგადოება შესაძლოა ვერასდროს შეთანხმდეს იმაზე, რომ ბათუმს ახალი მეჩეთი სჭირდება. 

მე გავუწიე ერთადერთ ფაქტორს ანგარიში და მას ყოველთვის გავუწევ, რადგან მე სხვა პასუხისმგებლობა მაქვს. ამ განცხადებით პრევენცია გავუკეთე იმ სპეკულაციებს, რომელიც გარკვეულ ჯგუფებს სურდათ… საბედნიეროდ, ამ ქვეყანაში ყველა აღმსარებლობის ადამიანის უფლება არის დაცული. თუ არსებობს კონკრეტული პრობლემა, შეზღუდვა, ეს არის იმ კონკრეტულ კონფესიებთან განსახილველი. ამაში აქტიურადაა ჩართული იგივე რელიგიის სააგენტო. სანებართვო ამბები, ეს არის სასამართლოს კომპეტენცია. ჩვენთვის მნიშვნელოვანია და პატივსაცემია, რომ ყველა რწმენის ადამიანს ჰქონდეს აღმსარებლობის და რელიგიურ რიტუალებში მონაწილეობის საშუალება.

როცა ამბობთ, რომ მუსლიმმა ჯგუფმა კონსენსუსს უნდა მიაღწიოს, ეს არ ნიშნავს უკვე იმას, რომ ამ ჯგუფის უფლება ირღვევა? 

მე ვთქვი ადრე და ახლაც ვამბობ, რომ თუ აშენდება, უნდა აშენდეს ფართო საზოგადოებრივი კონსენსუსის საფუძველზე, ისე, როგორც ამ სახელმწიფოს ეკადრება. თუ ეს შეეხება კონკრეტულ საკულტო ნაგებობას, რომელიც შენდება ამ ქვეყანაში დადგენილი წესების შესაბამისად, რა თქმა უნდა, ეს არის მუსლიმი მრევლის უფლება. ეს უფლება არის რეალიზებადი ჩვენს ქვეყანაში. თუ არსებობს ნებართვასთან დაკავშირებული პრობლემა, არსებობს ამაზე მიმდინარე სასამართლო დავა.

იცით თუ არა, რომ თვითონ მუსლიმ მრევლშიც არსებობს კონსენსუსის საჭიროება კონკრეტულ საკულტო ნაგებობის მშენებლობასთან დაკავშირებით? ეს არის კონსენსუსის სტანდარტი, თუ როგორ და რა ფორმით უნდა შენდებოდეს საკულტო ნაგებობა. ნებართვის გაცემის გარეშე ამ ქვეყანაში საკულტო ნაგებობის აგების პრაქტიკა არსებობს? კონკრეტული საკულტო ნაგებობა, იქნება ეს ტაძარი მართლმადიდებლური, მეჩეთი, სინაგოგა თუ სხვა საკულტო ნაგებობა, ამ ქვეყანაში უნდა შემოწმდეს იმ დადგენილი წესების შესაბამისად, რაც ამ ქვეყანაში მოქმედებს.

ეს წესები ხომ საერთოა ყველასთვის? 

ეს წესები საერთოა, რა თქმა უნდა.

როცა, მაგალითად, მართლმადიდებლები აგებენ ახალ ტაძარს, რატომ არ ამბობთ იმავეს, რომ კონსენსუსია საჭირო, იქნებ წინააღმდეგია ვინმე? 

მუსლიმ თემსაც ჰყავს სამუფთო სამმართველო, ალბათ, იცით ამის თაობაზე. ტაძრების მშენებლობის დროსაც ხდება შესაბამისი პროცედურების დაცვა. მე აქ სანებართვო საკითხებში არ შევალ. ამ შემთხვევაში არსებობს სამუფთო სამმართველო… როცა ვამბობ კონსენსუსს, ვგულისხმობ, რომ თუნდაც შიგნით უნდა იყოს კონსენსუსი, რომ ეს დადგენილი წესის შესაბამისად აშენდეს. ეს განსაკუთრებით ფაქიზი თემაა. აქ ხომ ვერ გამოვა პოლიტიკოსი და არ მიიღებს გადაწყვეტილებას, აქ არის დადგენილი წესები…

მთავარი ფოტო: პარასკევის ლოცვა ბათუმის ორთა ჯამესთან, მანანა ქველიაშვილის ფოტო „ბათუმელების“ არქივიდან

თორნიკე რიჟვაძესთან ვრცელი ინტერვიუ „ბათუმელებმა“ პირველ აპრილს ჩაწერა. ინტერვიუს ეტაპობრივად შემოგთავაზებთ.

ხელვაჩაურში სახელმწიფო ქონების თაღლითურად დაუფლების საქმეზე ხელვაჩაურის მერი – ჯუმბერ ვარდმანიძეც გამოკითხეს.

„კი, იყო გასაუბრება, მაგრამ რაზე ვისაუბრეთ, ვერ გეტყვით გამოძიების ინტერესებიდან გამომდინარე“, – გვითხრა ხელვაჩაურის მერმა, ჯუმბერ ვარდმანიძემ.

„ბათუმელების“ ინფორმაციით, ჯუმბერ ვარდმანიძის გამოკითხვა საგამოძიებო ორგანოში დილის 4 საათამდე გაგრძელდა. ხელვაჩაურის მერმა შეხვედრის დროისა და ხანგრძლივობის შესახებ ინფორმაციის მოწოდებაზეც უარი თქვა.

„საბოლოო გადაწყვეტილება იქნება სასამართლოს შემდეგ… იყო გასაუბრება, მიდის გამოძიება, ნუ გავასწრებთ მოვლენებს,“ – აღნიშნა ჯუმბერ ვარდმანიძემ „ბათუმელებთან“.

ფინანსთა სამინისტროს საგამოძიებო სამსახურმა დღეს, 3 აპრილს, გაავრცელა ცნობა, რომ დაკავებულია სამშენებლო კომპანიის დირექტორი და ხელვაჩაურის მუნიციპალიტეტის მერიის თანამშრომელი, ხოლო ყალბი ოფიციალური დოკუმენტის დამზადების ფაქტზე სისხლის სამართლებრივი დევნა დაიწყო ერთი პირის მიმართ.

გამოძიებით დადგინდა, რომ ბრალდებულმა, რომელიც იყო ერთ-ერთი სამშენებლო კომპანიის ხელმძღვანელი ხელვაჩაურის მუნიციპალიტეტის მერიის დაკვეთით განახორციელა ახალშენის კულტურის სახლის შენობისა და მიმდებარე ტერიტორიის სარეაბილიტაციო სამუშაოები, რა დროსაც, უკანონო მატერიალური გამორჩენის მიღების მიზნით, სამუშაოების შესრულებასთან დაკავშირებულ დოკუმენტაციაში, ხელოვნურად გაზარდა შესრულებული სამუშაოების მოცულობები, რითაც, მართლსაწინააღმდეგოდ დაეუფლა 37 787 ლარს.

რა სტატუსით გამოკითხეს ან დაკითხეს ჯუმბერ ვარდმანიძე? – შემოსავლების სამსახურის საგამოძიებო სამსახურის პრესცენტრში გვითხრეს, რომ ამ ეტაპზე ინფორმაციას ვერ მოგვაწვდიან.

სუს-ი ხელვაჩაურში ახალშენის კულტურის სახლის საქმეს სწავლობს

See more

 

 

2019 წლის პირველი აპრილიდან საპატრულო პოლიციას უფლება აქვს მძღოლი ნარკოტესტერის საშუალებით შეამოწმოს, იმყოფება თუ არა ის ნარკოტიკული/ფსიქოტროპული/ახალი ფსიქოაქტიური ნივთიერების [მათ შორის მარიხუანას] ზემოქმედების ქვეშ. ასეთი ზემოქმედების ქვეშ ავტომობილის მართვა ითვალისწინებს ჯარიმას ანდა თავისუფლების აღკვეთას ვადით ერთ წლამდე.

თუ პოლიციელს გაუჩნდა საკმარისი საფუძველი ვარაუდისთვის, რომ პირი სატრანსპორტო საშუალებას მართავს მარიხუანას ან სხვა ნარკოტიკული ნივთიერების ზემოქმედების ქვეშ, პოლიციელი პორტატული ნარკოტესტერის მეშვეობით უზრუნველყოფს ამ პირის შემოწმებას.

იმ შემთხვევაში, თუ პირს დაუდასტურდა ნარკოტიკული ნივთიერების ზემოქმედების ქვეშ ყოფნა, პოლიციელი ვალდებულია პირი ჩამოაშოროს სატრანსპორტო საშუალების მართვას, რის შემდეგაც უნდა წარადგინოს კლინიკური ან/და ლაბორატორიული [ქიმიო-ტოქსიკოლოგიური] გამოკვლევისთვის საქართველოს შინაგან საქმეთა სამინისტროს საექსპერტო-კრიმინალისტიკურ დეპარტამენტში. აღნიშნულ დეპარტამენტში გამოკვლევის ჩატარება ხდება ბიოლოგიური მასალის – ნერწყვის გამოკვლევით.

თუ მძღოლი უარს აცხადებს ნარკოტესტერის მეშვეობით შემოწმებაზე, პოლიციელი მძღოლს წარადგენს საექსპერტო-კრიმინალისტიკურ დეპარტამენტში ნარკოტიკული/ფსიქოტროპული/ახალი ფსიქოაქტიური ნივთიერების ზემოქმედების/სიმთვრალის დასადგენად.

იმ შემთხვევაში, თუ მძღოლი უარს იტყვის ლაბორატორიულ გამოკვლევაზე [ანუ უარს ამბობს ბიოლოგიური მასალის ჩაბარებაზე], მისი ნარკოტიკული ზემოქმედების ქვეშ ყოფნა დგინდება მხოლოდ კლინიკური დასკვნით. ამას უშვებს სისხლის სამართლის კოდექსის 276-ე მუხლი, სადაც შენიშვნის სახით გაწერილია, რომ „ამ მუხლით გათვალისწინებული ქმედების ნარკოტიკული/ფსიქოტროპული/ახალი ფსიქოაქტიური ნივთიერების ზემოქმედების ქვეშ ჩადენა დგინდება კლინიკური და ლაბორატორიული დასკვნებით, ხოლო ლაბორატორიულ გამოკვლევაზე უარის თქმის შემთხვევაში – მხოლოდ კლინიკური დასკვნით“.

საიას იურისტის, პაატა დიასამიძის თქმით, ეს შექმნის პრობლემას, ვინაიდან ამ შემთხვევაში სახეზე გვაქვს მტკიცების დაბალი სტანდარტი, რის გამოც სისხლის სამართლებრივი დევნა შეიძლება განხორციელდეს პირის მიმართ – ცნონ ბრალდებულად და დააკავონ.

თუ მძღოლი უარს იტყვის ნარკოტესტერის შემდგომ კლინიკურ ან/და ლაბორატორიულ [ქიმიო-ტოქსიკოლოგიური] გამოკვლევაზე, ასეთ შემთხვევაში ნარკოტესტირების დადებითი პასუხი მიიჩნევა კლინიკური სიმთვრალის დამადასტურებელ ფაქტად/დასკვნად.

პირველი აპრილიდან ძალაში შევიდა სისხლის სამართლის კოდექსის 276-ე მუხლის ახალი რედაქცია, რომლითაც გათვალისწინებულია პასუხისმგებლობა სატრანსპორტო საშუალების ნარკოტიკული, ფსიქოტროპული ან ახალი ფსიქოაქტიური ნივთიერების ზემოქმედების ქვეშ მართვისთვის და რომელიც სანქციის სახით ითვალისწინებს ჯარიმას ანდა თავისუფლების აღკვეთას ვადით ერთ წლამდე.

ცვლილებები შევიდა ასევე „ნარკოტიკული და ფსიქოტროპული საშუალებების მოხმარებასთან დაკავშირებული ადმინისტრაციული სამართალდარღვევების დადგენის წესის დამტკიცების შესახებ“ საქართველოს შინაგან საქმეთა და ჯანდაცვის მინისტრების ერთობლივ ბრძანებაშიც.

ამ ბრძანების მიხედვით, მძღოლს უფლება აქვს მოითხოვოს, საკუთარი ხარჯით, ალტერნატიული გამოკვლევის ჩატარების მიზნით ერთი თვის განმავლობაში ბიოლოგიური მასალის [ნერწყვის] საკონტროლო ულუფის შენახვა.

საიას იურისტის, პაატა დიასამიძის თქმით, სისხლის სამართლის კოდექსის 276-ე მუხლი და მინისტრების ერთობლივი ბრძანება არ ითვალისწინებს კონკრეტულ განსაზღვრებას, თუ როგორ უნდა მოხდეს თავად პორტატული ნარკოტესტერის მეშვეობით პირის ზემოქმედების ქვეშ მყოფად მიჩნევა.

მაგალითად, მარიხუანას შემთხვევაში, შესაძლოა ნარკოტესტერით შემოწმებაზე პირმა უარი არ თქვას და პასუხი იყოს დადებითი, თუმცა არ არის კანონით განსაზღვრული, ეს პირი რა შემთხვევაში ითვლება ამ ნივთიერების ზემოქმედების ქვეშ. ანუ, პირმა ადრე მოიხმარა მარიხუანა, ნარკოტესტერმა აჩვენა დადებითი პასუხი, მაგრამ შესაძლოა შემოწმების მომენტში ეს პირი აღარ იყოს უშუალოდ ამ ნივთიერების ზემოქმედების ქვეშ.

„მაგალითისთვის, ადმინისტრაციული სამართალდარღვევათა კოდექსი ითვალისწინებს, თუ რა ჩაითვლება ალკოჰოლური სიმთვრალის მდგომარეობად, რაც წარმოადგენს მძღოლის სისხლში 0,3 პრომილეზე მეტი ოდენობით ეთანოლის შემცველობას. როდესაც ქმედება ითვალისწინებს სისხლის სამართლის წესით გათვალისწინებულ პასუხისმგებლობას, კანონმდებელი ვალდებულია, განსაკუთრებული სიზუსტით განსაზღვროს, თუ რა შემთხვევაში შეიზღუდება ადამიანის უფლება.

ნარკოტესტერის მეშვეობით გადამოწმებაზე უარის თქმა შეიძლება გახდეს დაკავების საფუძველი, მაგრამ ეს იქნება საფრთხის შემცველი, ვინაიდან დაკავების საფუძველი არის პატრულ-ინსპექტორის ვარაუდი [რომელსაც არ აქვს სპეციალური ცოდნა], რომ პირი იმყოფება ნარკოტიკული ნივთიერების ზემოქმედების ქვეშ, რაც შეიძლება გახდეს პირის მიმართ სისხლის სამართლებრივი დევნის დაწყების საფუძველი“, – აცხადებს პაატა დიასამიძე.

ამასთან, იურისტის თქმით, „პრობლემას წარმოადგენს მტკიცების სტანდარტი, ვინაიდან პირის დაკავების საფუძველი არის დასაბუთებული ვარაუდის სტანდარტი. განსახილველ შემთხვევაში პატრულ-ინსპექტორის შეფასება, რომ პირი იმყოფება ნარკოტიკული ნივთიერების ზემოქმედების ქვეშ, არ იძლევა დასაბუთებული ვარაუდის სტანდარტს“.

პაატა დიასამიძე თვლის, რომ „მნიშვნელოვანია, სისხლის სამართლის კოდექსით განისაზღვროს ნარკოტიკული საშუალების ზემოქმედების ქვეშ ყოფნის შეფასების განჭვრეტადი კრიტერიუმები ისე, როგორც ეს არის განსაზღვრული ალკოჰოლური სიმთვრალის მდგომარეობის შემოწმებისას“.

შინაგან საქმეთა სამინისტროს მიერ უკვე შეძენილია გერმანული წარმოების 10 000 ცალი ნარკოტესტერი, რაშიც ბიუჯეტიდან 540 ათასი ლარი [ერთ ნარკოტესტერში 54 ლარი] დაიხარჯა. სატენდერო დოკუმენტების მიხედვით, ნარკოტესტერი, რომელიც სამინისტრომ შეიძინა, „ადგენს ნარკოტიკული საშუალებების შემდეგი კომპონენტების მოხმარებას ნერწყვის საშუალებით: მარიხუანა, ჰაშიში, THC; ამფეტამინი და მეტანმეტამინი [მათ შორის ექსტაზი]; კოკაინი; ოპიატები [მორფი, ჰეროინი].

ტესტირების სრული საშუალო დრო: 5 წუთი.

მარიხუანას შემთხვევაში ტესტი ავლენს ყველა იმ შემთხვევას, როცა ნარკოტიკული საშუალების მიღება მოხდა 8 საათის განმავლობაში“.

[red_box]საქართველოს სისხლის სამართლის კოდექსის 276-ე მუხლის მიხედვით:[/red_box]

[checklist]

• ავტომობილის, ტრამვაის, ტროლეიბუსის, ტრაქტორის ან სხვა მექანიკური სატრანსპორტო საშუალების ნარკოტიკული, ფსიქოტროპული ან ახალი ფსიქოაქტიური ნივთიერების ზემოქმედების ქვეშ მართვა ისჯება ჯარიმით ანდა თავისუფლების აღკვეთით ვადით ერთ წლამდე.
• ავტომობილის, ტრამვაის, ტროლეიბუსის, ტრაქტორის ან სხვა მექანიკური სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც ჯანმრთელობის ნაკლებად მძიმე დაზიანება გამოიწვია, ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით სამ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ. იგივე ქმედება, ჩადენილი ალკოჰოლის ან ნარკოტიკული/ფსიქოტროპული/ახალი ფსიქოაქტიური ნივთიერების ზემოქმედების ქვეშ, ისჯება თავისუფლების აღკვეთით ვადით ორიდან ხუთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.
•  ავტომობილის, ტრამვაის, ტროლეიბუსის, ტრაქტორის ან სხვა მექანიკური სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც ჯანმრთელობის მძიმე დაზიანება გამოიწვია, ისჯება ჯარიმით ანდა თავისუფლების აღკვეთით ვადით სამიდან ხუთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე. იგივე ქმედება, ჩადენილი ალკოჰოლის ან ნარკოტიკული/ფსიქოტროპული/ახალი ფსიქოაქტიური ნივთიერების ზემოქმედების ქვეშ, ისჯება თავისუფლების აღკვეთით ვადით ოთხიდან ექვს წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.
• ავტომობილის, ტრამვაის, ტროლეიბუსის, ტრაქტორის ან სხვა მექანიკური სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც ადამიანის სიცოცხლის მოსპობა გამოიწვია, ისჯება თავისუფლების აღკვეთით ვადით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე. იგივე ქმედება, ჩადენილი ალკოჰოლის ან ნარკოტიკული/ფსიქოტროპული/ახალი ფსიქოაქტიური ნივთიერების ზემოქმედების ქვეშ, ისჯება თავისუფლების აღკვეთით ვადით ექვსიდან ცხრა წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.
• ავტომობილის, ტრამვაის, ტროლეიბუსის, ტრაქტორის ან სხვა მექანიკური სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც ორი ან მეტი ადამიანის სიცოცხლის მოსპობა გამოიწვია, ისჯება თავისუფლების აღკვეთით ვადით ექვსიდან ათ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე. იგივე ქმედება, ჩადენილი ალკოჰოლის ან ნარკოტიკული/ფსიქოტროპული/ახალი ფსიქოაქტიური ნივთიერების ზემოქმედების ქვეშ, ისჯება თავისუფლების აღკვეთით ვადით რვიდან თორმეტ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

[/checklist]

 

ირანის ისლამური რესპუბლიკის გენერალურმა საკონსულომ ბათუმში სპარსული ენის შემსწავლელი კურსები დაიწყო. როგორც საკონსულოში ამბობენ, კურსის პროგრამაზე ორი წლის განმავლობაში მუშაობდნენ. საკონსულოში გამართულ  პრეზენტაციას  ესწრებოდნენ ირანის კონსული საქართველოში და ასევე, თბილისის სახელმწიფო უნივერსიტეტის  აღმოსავლური ენების დეპარტამენტის თავმჯდომარე ემზარ მაკარაძე.

ათკაციანი ჯგუფი უკვე შეივსო, იგი ბსუ-ს აღმოსავლური ენების ფაკულტეტის სტუდენტებითა და სხვა მოქალაქეებით არის დაკომპლექტებული. კვირაში ორჯერ იქნება სწავლება – ორშაბათსა და ოთხშაბათს.

ექვსთვიანი კურსის ფარგლებში, მსურველები უფასოდ შეისწავლიან გრამატიკულად გამართულ სალაპარაკო ენას, რომელიც შეიძლება გამოადგეთ ნებისმიერ სიტუაციაში, იქნება ეს მარტივი კომუნიკაცია თუ საქმიანი საუბარი. ენას შეასწავლის ირანელი ქართველი მოჰამედ რიგი, რომელიც 26 წელია საქართველოს მოქალაქეა.

საკონსულოში ამბობენ, რომ ჯერჯერობით მხოლოდ ერთი ჯგუფი ჰყავთ.

 

 

 

 

დღეს, 3 აპრილს, ხელვაჩაურის პოლიციასთან მაჭახლის ხეობის მცხოვრებლები საპროტესტო აქციას გამართავენ. საქმე იმაშია, რომ ამ ხეობაში გუშინ პოლიცია მივიდა და აქ მცხოვრები ოთხი პირის გამოკითხვაზე გადაყვანას აპირებდა. ხეობაში პოლიციას უარი უთხრეს ამ პირების გადაყვანაზე.

ოთხი მაჭახლელი, ვის გადაყვანასაც გამოკითხვაზე გუშინ აპირებდნენ, მონაწილეობდა ჰესების საწინააღმდეგო საპროტესტო აქციაში – სოფლის მოსახლეობამ ჰესის მშენებელი კომპანიის წარმომადგენლებს ტოპოგრაფიული სამუშაოების ჩატარების საშუალება არ მისცა.

ხეობის მცხოვრები როინ მალაყმაძე ამბობს, რომ კომპანიის წარმომადგენელმა – ლევან ბაკურიძემ იჩივლა პოლიციასა და პროკურატურაში, რის საფუძველზეც პოლიციამ ოთხი პირი დაიბარა გამოკითხვაზე.

„გუშინ იყო პოლიცია ამ ოთხი პირის წასაყვანად მოსული. ჩვენ ვუთხარით, რომ ისინი მარტო არ წავლენ და მთელი ხეობა ჩავალთ გამოკითხვაზე. პოლიციას სურს გამოკითხოს თითქოსდა აქტიური ოთხი ადამიანი. ეს აქვთ პრაქტიკა – სხვაგანაც, სადაც ჰესების მშენებლობას ეწინააღმდეგებიან, ასე გამოყოფენ ადამიანებს, რომ შემდეგ პროცესებზე მოახდინონ გავლენა. გამოკითხვაზე ის ადამიანები დაიბარეს, ვინც ჟურნალისტებთან კომენტარები გააკეთეს. ჩვენ არ გვინდა, ამ ადამიანების გამოყოფა, არც ახლა დავასახელებ მათ ვინაობას. ჩვენ, ყველა ერთად, მივალთ დღეს, 4 საათზე, პოლიციაში“, – უთხრა „ბათუმელებს“ როინ მალაყმაძემ.

როინ მალაყმაძის თქმით, კომპანიას, რომელსაც სურს სოფელში ახალი ჰესის მშენებლობა, ამ ხეობაში უკვე ათწლეულებია აქვს ერთი მოქმედი ჰესი, მაგრამ ამით სოფელს არავითარი სარგებელი არ მიუღია.

შენიშვნა: ინფორმაციის გამოქვეყნების შემდეგ გამოგვეხმაურა კომპანიის წარმომადგენელი, რომელსაც მაჭახლის ხეობაში ჰესის მშენებლობის ნებართვა აქვს – „ბიჯი თრეიდის“ წარმომადგენელმა, ნონა ბაკურიძემ გვითხრა, რომ როინ მალაყმაძის მიერ დასახელებული ლევან ბაკურიძე საერთოდ არ ყოფილა სოფელში და პოლიცია თავად გამოიძახა:

„მე ვიმყოფებოდი ტოპოგრაფებთან ერთად. ისინი ასრულებდნენ იმ სამუშაოს, რომლის ნებართვაც გვაქვს სახელმწიფოსგან. მოვარდა ხალხი, ადგილი ჰქონდა ხელშეშლას და მე დავრეკე 112-ში. მოვიდა ხელვაჩაურის პოლიცია, ნახეს ადგილზე რაც ხდებოდა. განყოფილების წარმომადგენელმა გვთხოვა, რომ დაგვეტოვებინა ტერიტორია. ამ დროს მოხდა ხალხის მობილიზება… გადით ხეობიდანო. ჩვენ წამოვედით. ჩვენ არ მიგვითითებია არავისზე, არავინ დაგვისახელებია… ეტყობა, რადგან შეტყობინება მოხდა, პოლიცამ დააფიქსირა რამდენიმე მოქალაქე.

ჩვენ არ ვყოფილვართ როინ მალაყმაძის საკუთრებაში და არც არავის საკუთრებაში… რასაც ვაკეთებდით, იმის უფლება გვაქვს. ეს არის მცირე, გამდინარი ჰესი და არ ითვალისწინებს წყლის დაგროვებას. ყველა აიგივებს ჩვენს ჰესს „სილქ როუდის“ ჰესთან, მაგრამ მინდა გითხრათ, რომ ეს ჰესები განსხვავდება…

რაც შეეხება როინ მალაყმაძის განცხადებას, თუ რა სარგებელს ნახავს სოფელი – სოფელი ნამდვილად ნახავს სარგებელს, ხალხი დასაქმდება“.

 

 

 

„ისინი ითხოვენ წყალს, ვენტილაციას, ადეკვატურ სამედიცინო მომსახურებას, წამლებს… ისინი აპროტესტებენ უსაფრთხოების სამსახურის კონკრეტული თანამშრომლების უხეშ მოქცევას, რის გამოც იქმნება კონფლიქტი და შემდეგ პატიმრები ე.წ. დეესკალაციის ოთახში განმარტოებით გადაჰყავთ,“ – ამბობს ადვოკატი თეონა ნიკოლაიშვილი. მისი აღწერით, ბათუმის ციხის ერთ საკანში მყოფი სამი პატიმარი ერთმანეთს მავთულით 30 მარტს გადაება. მავთული პატიმრებმა ხელებში გაიყარეს.

„ერთ-ერთმა პატიმარმა მავთული ყელშიც გაიყარა… ლეიბი იატაკზე აქვთ დაგებული და ისე იძინებენ. ეს ის პატიმრები არიან, რომლებმაც რამდენიმე დღის წინ ციხეში სასმელი წყლის პრობლემაზე ჰქონდათ პრეტენზია,“ – ამბობს ადვოკატი, თეონა ნიკოლაიშვილი.

ბათუმის ციხეში სასმელი წყლისა და ვენტილაციის პრობლემაზე „ბათუმელები“ 28 მარტს წერდა. პატიმრების თქმით, განსაკუთრებით გაუსაძლისი უწყლოდ ყოფნა ე.წ. დეესკალაციის ოთახშია, სადაც ფანჯარა ჩაცემენტებულია, ხოლო ვენტილაცია ხშირად გამორთულია. განმარტოებით მყოფი პატიმარი დეესკალაციის ოთახშია, სადაც საპირფარეშო იზოლირებული არ არის. მაშინ „ახალგაზრდა იურისტთა ასოციაციის“ იურისტმა, პაატა დიასამიძემ, რომელმაც პატიმრები ამ მდგომარეობაში უშუალოდ ნახა, ეს ვითარება არაადამიანურ მოპყრობად შეაფასა. ციხეში წყლის პრობლემის არსებობა იუსტიციის სამინისტროს პენიტენციურმა სამსახურმაც დაადასტურა.

ადვოკატ თეონა ნიკოლაიშვილის შეფასებით, პატიმრები ე.წ. დეესკალაციის ოთახში გადაჰყავთ არა მხოლოდ მაშინ, როცა უსაფრთხოების კუთხით პრობლემა არსებობს, არამედ დასჯის მიზნითაც, რაც კანონით დაუშვებელია. მისივე თქმით, პატიმრებმა საერთო საჩივრითაც მიმართეს სასჯელაღსრულების დაწესებულებას.

„მათი ჯანმრთელობის მდგომარეობა სტაბილურია. უცნობია, რატომ არ გადაიყვანეს ეს პატიმრები დეესკალაციის ოთახში. ეს ოთახი რეალურად იმ პატიმრებისთვისაა, ვინც საფრთხეს უქმნის საკუთარ ჯანმრთელობას… ჩემთვის უცნობია ციხის ადმინისტრაციის რეაგირების შესახებ,“ – გვითხრა თეონა ნიკოლაიშვილმა.

რა რეაგირება მოახდინა სასჯელაღსრულების მესამე დაწესებულებამ პატიმრების პროტესტზე – პენიტენციური სამსახურისგან განმარტებას მიღებისთანავე, აქვე შემოგთავაზებთ.

ფინანსთა სამინისტროს საგამოძიებო სამსახურის ცნობით, სახელმწიფო ქონების დიდი ოდენობით თაღლითურად დაუფლების ფაქტზე, მოსამართლის განჩინების საფუძველზე, დაკავებულია სამშენებლო კომპანიის დირექტორი და ხელვაჩაურის მუნიციპალიტეტის მერიის თანამშრომელი, ხოლო ყალბი ოფიციალური დოკუმენტის დამზადების ფაქტზე სისხლის სამართლებრივი დევნა დაიწყო ერთი პირის მიმართ.

გამოძიებით დადგინდა, რომ ბრალდებულმა, რომელიც იყო ერთ-ერთი სამშენებლო კომპანიის ხელმძღვანელი, ხელვაჩაურის მუნიციპალიტეტის მერიის დაკვეთით განახორციელა ახალშენის კულტურის სახლის შენობისა და მიმდებარე ტერიტორიის სარეაბილიტაციო სამუშაოები, რა დროსაც, უკანონო მატერიალური გამორჩენის მიღების მიზნით, სამუშაოების შესრულებასთან დაკავშირებულ დოკუმენტაციაში, ხელოვნურად გაზარდა შესრულებული სამუშაოების მოცულობები, რითაც, მართლსაწინააღმდეგოდ დაეუფლა 37 787 ლარს.

გამოძიების პროცესში, ასევე დადგინდა, რომ სამუშაოების შესრულებაზე ზედამხედველობა ევალებოდა ხელვაჩაურის მუნიციპალიტეტის მერიის თანამშრომელს, რომელიც, თავის მხრივ, სამსახურებრივი მოვალეობების განხორციელებისას, დაეხმარა კომპანიის დირექტორს სახელმწიფო თანხის მოტყუებით დაუფლებაში, ხოლო კერძო საექსპერტო დაწესებულების ექსპერტმა გასცა ყალბი დასკვნა, თითქოსდა ობიექტზე ფაქტობრივად შესრულებული სამუშაოები შესაბამისობაში იყო დოკუმენტაციაში დაფიქსირებულ სამუშაოებთან.

გამოძიება მიმდინარეობს საქართველოს სისხლის სამართლის კოდექსის 180-ე მუხლის მესამე და 362-ე მუხლის მეორე ნაწილებით, რაც სასჯელის სახით ითვალისწინებს თავისუფლების აღკვეთას 6-დან 9 წლამდე ვადით.

ახალშენის კულტურის სახლზე საუბარი იყო აუდიტის დასკვნაში, რომელიც 2019 წლის 8 თებერვალს გამოქვეყნდა. გამოვლენილ გარემოებებში აღნიშნულია, რომ პროექტში გამორჩენილი იყო შენობის სახურავის და სარეპეტიციო დარბაზის მოწყობა. 

თბილისში, ბათუმში, რუსთავსა და ქუთაისში გაზომვების შედეგად ატმოსფერულ ჰაერში განსაზღვრული ზოგიერთი ნივთიერების შემცველობები, კერძოდ, აზოტის დიოქსიდისა (NO2) და მყარი ნაწილაკების (PM10) კონცენტრაციები, კვლავ აჭარბებს დასაშვებ ნორმას.

გარემოს ეროვნული სააგენტო,   ავტომატური სადგურების საშუალებით, ატმოსფერული ჰაერის ხარისხს უწევს მონიტორინგს. ისაზღვრება ძირითადი დამაბინძურებელი ნივთიერებების კონცენტრაციები. 

26 მარტს მყარი ნაწილაკების PM10-ის კონცენტრაციების ნორმაზე გადაჭარბება დაფიქსირდა ქუთაისში 1.3-ჯერ. 27, 28, 29 მარტს და პირველ აპრილს მყარი ნაწილაკების PM10-ის კონცენტრაციების ნორმაზე გადაჭარბება არ დაფიქსირებულა. 30 მარტს ნორმაზე გადაჭარბება დაფიქსირდა ქუთაისში-1.5-ჯერ, ხოლო 31 მარტს ისევ ქუთაისში – 1.4-ჯერ. 

მყარი ნაწილაკების PM10-ის კონცენტრაციების საშუალო წლიურ ნორმაზე გადაჭარბება დაფიქსირდა თბილისში, წერეთლის გამზირზე 1.3-ჯერ, ყაზბეგის გამზირზე – 1,1-ჯერ.

ამ დღეების განმავლობაში აზოტის დიოქსიდის  კონცენტრაციების საშუალო წლიურ ნორმაზე გადაჭარბება ყველაზე მაღალი მაჩვენებლით ბათუმში აბუსერიძის ქუჩაზე დაფიქსირდა, სადაც მაჩვენებელი დასაშვებ ნორმაზე 1,6-ჯერ მაღალია, თბილისში წერეთლის გამზირზე კი – 1.5-ჯერ.