ლეოგრანდში დაღუპულის დედის განცხადების შემდეგ მაშველი სამსახურიდან გაუშვეს 


„ბათუმელების“ ფეისბუქგვერდზე მოგვმართა „ლეოგრანდში“ ხანძრის შედეგად ერთ-ერთი დაღუპულის დედამ. ის გვწერს: „ვარ ბექა შატაკიშვილის დედა, რომელიც დაიღუპა წინა წლის 24 ნოემბერს, ლეოგრანდში მომხდარი ხანძრის დროს. დედას, რომელსაც ერთი შვილი მყავდა და ისიც დამეღუპა, ვეძებდი ტელეფონს მთელი წელიწადი და თვეები, მხოლოდ იმიტომ, რომ მისი ფოტოები და ვიდეოები მინდოდა. აღმოჩნდა, რომ ეს ტელეფონი მაშველს ხანძრის დროს მოუპარია, სიმბარათის გარეშე ქონია სარგებლობაში და როგორც კი სიმბარათი გააქტიურა, ეგრევე ფაქტზე დაასწრო პოლიციამ“.

ბექა შატაკიშვილის დედა აცხადებს, რომ ტელეფონში, რომელიც პოლიციამ იპოვა, მისი შვილის ფოტოები წაშლილი იყო. „მისი ცოლ-შვილის ფოტოები იყო. ცოლს აჩუქა ტელეფონი“.

საგანგებო სიტუაციების მართვის სამსახურის პრესცენტრის ინფორმაციით, მას შემდეგ, რაც ქალბატონმა მათ გვერდზე დაწერა ეს ინფორმაცია, მაშველი, ვის შესახებაც საუბრობს ქალი, სამსახურიდან დაითხოვეს.

„ეს ადამიანი აღარ მუშაობს ჩვენთან. უწყებისთვის უცნობი იყო ამ ფაქტის შესახებ და მხოლოდ მას შემდეგ გახდა ცნობილი, რაც ამ ქალბატონმა მოგვწერა. ჯერჯერობით ეს ინფორმაცია დადასტურებული არ არის. თუმცა, გამომდინარე იქედან, რასაც ეს ქალბატონი საუბრობს, არის მართლა შოკისმომგვრელი… ჩვენ მივიღეთ გადაწყვეტილება, რომ ეს ადამიანი ჩვენთან აღარ მუშაობს. მოდით, მივანდოთ საქმე სამართალდამცავებს, მაგრამ არ მიგვაჩნია სწორად, თუ ვინმეს მიმართ რაიმე ტიპის, თუნდაც მცირედი ეჭვი არსებობს, ასეთი კითხვის ნიშნის მქონე ადამიანი ჩვენს რიგებში არ უნდა იყოს… რა თქმა უნდა, უდანაშაულობის პრეზუმფციას ვერავინ დაარღვევს და ჩვენ არ ვადასტურებთ ამ ფაქტს, რადგან ჩვენ ამის შესახებ დადასტურებული ინფორმაცია არ გვაქვს. ვიდრე არ გაირკვევა სიმართლე, ვიდრე საბოლოოდ არ გაირკვევა, რომ ეს ინფორმაცია არის მართალი, ტყუილი, სანამ შესაბამისი ორგანოები არ დაადგენენ სიმართლეს, ეს ადამიანი ვერ იმუშავებს ჩვენთან. ჩვენ სრულ მხარდაჭერას ვუცხადებთ ამ ქალბატონს“.

შს სამინისტროში „ბათუმელებს“ უთხრეს, რომ ამ ეტაპზე ვერაფერს გვეტყვიან. უწყებიდან მიღებულ ინფორმაციას აქვე შემოგთავაზებთ.

2017 წლის 24 ნოემბერს ლეოგრანდში გაჩენილი ხანძრის შედეგად 11 ადამიანი დაიღუპა.

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან