Batumelebi | ზონალურმა საბჭომ იმსჯელა სახლის პროექტზე, რომლის ორი სართულიც უკვე აშენებულია ზონალურმა საბჭომ იმსჯელა სახლის პროექტზე, რომლის ორი სართულიც უკვე აშენებულია – Batumelebi
RU | GE  

ზონალურმა საბჭომ იმსჯელა სახლის პროექტზე, რომლის ორი სართულიც უკვე აშენებულია

კულტურული მემკვიდრეობის ზონალურ საბჭოში დღეს იმსჯელეს სამშენებლო პროექტზე, რომელსაც უკვე აშენებენ. ზონალურმა საბჭომ კი ამის შესახებ არაფერი იცის, ან იცის და დუმს. კანონით, როდესაც მშენებლობა დაგეგმილია კულტურული მემკვიდრეობის დაცვის ზონაში, პროექტს ჯერ ითანხმებს სააგენტოს ზონალური საბჭო, შემდეგ კი პროექტს განიხილავს მერია და გასცემს ნებართვას.

ზონალური საბჭოს წევრია ბათუმის მერიის ქალაქგანვითარებისა და ურბანული პოლიტიკის სამსახურის უფროსი მირიან მეტრეველი, რომლის სამსახურშიც შედის მშენებლობაზე ზედამხედველობის განყოფილება. სწორედ ეს განყოფილებაა ქალაქში უკანონო მშენებლობების კონტროლზე პასუხისმგებელი. ამ შემთხვევაში კი მშენებელმა ისე ააშენა ორი სართული, რომ მერიის ზედამხედველობის სამსახურმა პროცესის აღკვეთა ვერ შეძლო. რატომ? ამაზე დღეს სხდომაზე მირიან მეტრეველს განმარტება არ გაუკეთებია. მას ზონალური საბჭოსთვის სხდომაზე არაფერი უთქვამს არც იმის შესახებ, რომ უკვე დაწყებულ სამშენებლო პროექტს განიხილავდნენ და არა დაგეგმილ პროექტს.

საკითხი ეხება ბათუმში, ჰაიდარ აბაშიძისა და ფალიაშვილის ქუჩების კვეთაში დაგეგმილ და ამავდროულად დაწყებულ მშენებლობას, სადაც ცოტა ხნის წინ ძეგლის ნიშნის მქონე შენობა დაანგრიეს. ზონალური საბჭოს სხდომაზე დღეს, 2 აპრილს, ამ ადგილზე დაგეგმილი სამშენებლო პროექტი განიხილეს და არა უკვე მიმდინარე პროექტი. საბჭოში წარდგენილი ვერსიით, შპს „ძმების სახლი“ აქ ათსართულიანი სახლის მშენებლობას გეგმავს.

შპს „ძმების სახლის“ პროექტის რენდერი, რომელიც დღეს ზონალური საბჭოს სხდომაზე წარმოადგინეს

ეს ჰაიდარ აბაშიძისა და ფალიაშვილის ქუჩების კვეთაში ზუსტად ის ადგილია, სადაც კულტურული მემკვიდრეობის ზონალური საბჭოს ინფორმაციით, შპს „ძმების სახლი“ მშენებლობას გეგმავს. როგორც ხედავთ, მშენებლობა დაწყებულია.

რა გადაწყვეტილება მიიღო დღეს ზონალურმა საბჭომ  წარდგენილი პროექტის დასაშვებობასთან დაკავშირებით, ჯერჯერობით არ ვიცით. სხდომაზე თავის პოზიციას ყველა წევრი ღიად არ აფიქსირებს, ამიტომაც ზუსტ პასუხს სხდომიდან რამდენიმე დღეში, ოქმის მომზადების შემდეგ გავიგებთ.

ამ საკითხის  წარდგენას დღეს სხდომაზე ხმაური მოჰყვა: ზონალური საბჭოს წევრებს „ბათომის“ თავმჯდომარემ, ნინო ინაიშვილმა მოუწოდა, არ დათანხმდნენ პროექტს და არ წაახალისონ უკანონობა, რადგან „მშენებელმა კომპანიამ ამ ადგილზე ძეგლის ნიშნის მქონე სახლი და მის გვერდით მდებარე კიდევ ერთი ბელეტაჟი დაანგრია“. მისმა შეფასებამ, რომ ასეთი გადაწყვეტილება დანაშაულის ტოლფასი იქნება, ზონალური საბჭოს წევრები გააღიზიანა.

„ქალბატონო ნინო, ძალიან ადვილად ეპყრობით სიტყვა დანაშაულს, თქვენ იურისტი არა ხართ, მე ვარ იურისტი. თუ ამდენი იცით, ისიც უნდა იცოდეთ, რომ ამ სახლს არ ჰქონდა სტატუსი. თუ დამნაშავეა, ციხეში უნდა იჯდეს. ყველა ციხეში, ყველა ციხეში – რამეს ხომ არ გახსენებთ ეს პათოსი?“ – მიმართა მას ზონალური საბჭოს წევრმა, კულტურული მემკვიდრეობის სააგენტოს ხელმძღვანელის მოადგილემ, ოლეგ ბოლქვაძემ.

მშენებელი კომპანიის დირექტორი რაულ დიასამიძემ  „ბათუმელებთან“ ირწმუნება, რომ ისტორიული სახლი მას არ დაუნგრევია და ადგილი როცა შეისყიდა შპს „ძმების სახლმა“, ის უკვე დანგრეული იყო. რაც შეეხება ფალიაშვილის #16-ში არსებულ ბელეტაჟს, მშენებლის თქმით, ის ამორტიზებული იყო – „ამის ფოტოებიც მაქვს “.

მშენებელი კომპანიის დირექტორი ასევე ირწმუნება, რომ მშენებლობის ნებართვა აქვს, დოკუმენტის ასლის გამოგზავნაზე კი უარი გვითხრა. მანვე გვითხრა, რომ დღეს მისი პროექტი კულტურული მემკვიდრეობის სააგენტოში განიხილეს.

ბათუმის მერიის ინფორმაციით, კომპანიას მშენებლობის ნებართვა არ აქვს, ის დაჯარიმებულია ტერიტორიის უკანონოდ შემოღობვისა და უნებართვო დემონტაჟის გამო, უნებართვოდ მშენებლობის დაწყებაზე კი ადმინისტრაციული წარმოება მიმდინარეობს.

ამავე თემაზე:

ძეგლის სტატუსის მისანიჭებლად წარდგენილი სახლი ბათუმში დაანგრიეს – ნებართვა მერიამ გასცა

 

ნეტგაზეთის მასალების სხვა გამოცემებში გადაბეჭდვის წესი
ავტორი