ჰაიდარ აბაშიძის #8-ში, ერთი ორსართულიანი სახლისა და ორი ბელეტაჟის დემონტაჟის ხარჯზე ათსართულიანი სასტუმროს მშენებლობას გეგმავენ. ეს ადგილი კულტურული მემკვიდრეობის დაცვის ზონაშია. შესაბამისად, პროექტის შეთანხმების თაობაზე კულტურული მემკვიდრეობის დაცვის სააგენტოს ზონალურ საბჭოს მოქალაქე ოთარ ჭეიშვილმა მიმართა. საჯარო რეესტრის მონაცემებით, ის ამავე მისამართზეა რეგისტრირებული. შეითანხმებს თუ არა სააგენტო ამ ადგილზე ათსართულიან მშენებლობას, ეს უახლოეს მომავალში გახდება ცნობილი.
ჰაიდარ აბაშიძის რვაში ამ დროისთვის ერთი ორსართულიანი სახლია, რომელსაც უკანა მხრიდან ეზო აქვს, ამ ეზოში კი სამი ერთსართულიანი ბელეტაჟი დგას. ეს სახლები დაცლილი და მოუვლელია, მოუვლელია ეზოც. სახლის გვერდით ავტომანქანების სამრეცხაოა. როგორც სააგენტოში წარდგენილი მონაცემებით ირკვევა, ინვესტორი სამრეცხაოს ტერიტორიასაც აითვისებს.
ჰაიდარ აბაშიძის #8- შიდა ეზო
ამ სახლების უკან მრავალბინიანი სახლია, რომელსაც ჰაიდარ აბაშიძის ქუჩის მხარეს აქვს ღია სადარბაზო და აივნები. ათსართულიანი შენობის მშენებლობის შემდეგ მათი სადარბაზო და აივნები მეთერთმეტე სართულამდე დაბნელდება.
ზონალური საბჭოს სხდომაზე წარმოადგინეს ასევე ახალი პროექტის რენდერიც, სადაც კარგად ჩანს, თუ როგორ აითვისებს ამ ადგილს ახალი სასტუმრო, მისი მშენებლობის შემდეგ.
გარდა ამისა, ზონალური საბჭოს სხდომაზე ასევე განიხილეს რამდენიმე საკითხი – ბათუმში, მელიქიშვილისა და ფარნავაზ მეფის ქუჩების გადაკვეთაზე მრავალბინიანი სახლის მშენებლობის, ფარნავაზ მეფის #63-ში ინდივიდუალური სახლის რეკონსტრუქციის, ფალიაშვილისა და ჰაიდარ აბაშიძის ქუჩების გადაკვეთაზე მრავალბინიანი სახლის მშენებლობის, ბაქოს ქუჩის #24-ში მრავალფუნქციური ობიექტის მშენებლობისა და კიდევ სხვა რამდენიმე პროექტი.
ბათუმი. ჰაიდარ აბაშიძის ქუჩის #8
