Batumelebi

„იმპორტშიც გაზრდილია იგივე მონაცემები, რაც ექსპორტში, ანუ რაც გაგვაქვს საზღვარგარეთ, შემოტანილია საქართველოში,“ – გვითხრა ეკონომისტმა, კავკასიის უნივერსიტეტის ეკონომიკის სკოლის დეკანმა სოსო ბერიკაშვილმა, რომელსაც ვკითხეთ: რატომ არ აისახება მოსახლეობის შემოსავლებზე ექსპორტის გაზრდილი მაჩვენებლები?

ეკონომისტი განმარტავს, რომ იმპორტზე დამოკიდებულების მაჩვენებელია მაღალი და ადგილობრივი წარმოება ისევ ვერ ვითარდება. ეს მთავარი მიზეზებია, რის გამოც ექსპორტის ზრდას ადამიანები საკუთარ ჯიბეებზე ნაკლებად გრძნობენ.

ექსპორტი 2021 წლის იანვრიდან ნოემბრის ჩათვლით, სტატისტიკის ეროვნული სამსახურის მონაცემებით, 3.8 მილიარდ ამერიკულ დოლარამდე გაიზარდა. ეს 26.7 პროცენტით მეტია გასული წლის ანალოგიურ პერიოდთან შედარებით.

სტატისტიკის მონაცემებით, საქართველოსთვის უმსხვილესი პარტნიორები ისევ არიან: ჩინეთი [537,9 მილიონი აშშ დოლარი], რუსეთი [502,1 მილიონი აშშ დოლარი] და თურქეთი [275,5 მილიონი აშშ დოლარი].

ექსპორტის ათეულში პირველ ადგილზე წინა წლების მსგავსად ისევ სპილენძის მადნები და კონცენტრატებია 750.1 მლნ. აშშ დოლარით [აღნიშნული სასაქონლო ჯგუფის წილი მთლიანი ადგილობრივი ექსპორტის 26.7 პროცენტია].

მე-2 ადგილზეა ფეროშენადნობები 414.8 მლნ. აშშ დოლარით [მთლიანი ადგილობრივი ექსპორტის 14.8 პროცენტი], ხოლო მე-3 ადგილს იკავებს ყურძნის ნატურალური ღვინოები 214.9 მლნ. აშშ დოლარით [მთლიანი ადგილობრივი ექსპორტის 7.7 პროცენტი].

„ეს არის შემოსავალი, რომელიც პირდაპირ გლეხის ოჯახისკენ მიმართულია,“ – აღნიშნა ეკონომიკის მინისტრმა ნათია თურნავამ, რომელმაც მთავრობის სხდომის შემდეგ გამართულ ბრიფინგზე ექსპორტის გაზრდილ მაჩვენებლებზე ისაუბრა და თქვა, რომ განსაკუთრებით ღვინის და სოფლის მეურნეობის პროდუქტებზე ექსპორტის მაჩვენებლების ზრდა აისახება „პირდაპირ გლეხის ოჯახზე“.

„ღვინო გაგვაქვს და ეს ძალიან კარგია, თუმცა იგივე ბოთლები, რომლებშიც ღვინო ასხია, იმპორტირებული მასალითაა შექმნილი,“ – აღნიშნავს ეკონომისტი სოსო ბერეკაშვილი. ის გვესაუბრა ექსპორტის გაზრდის მაჩვენებლებზე.

„პროცენტულად შესაძლოა ეს ციფრები მაღალი გვეჩვენებოდეს, მაგრამ აბსოლუტურ რიცხვებში იმდენად მცირეა, რომ ეს რეალურად ვერ ყოფნის ვერაფერს: ინფლაცია არის უზარმაზარი, უმუშევრობის დონე მაღალია და ეს ამას ვერ აბალანსებს.

მსოფლიო ტენდენციაა ის, რომ გაზრდილია სავაჭრო ბრუნვები ყველგან. პანდემიის გამო იყო მოთხოვნები შეჩერებული და რადგან შეზღუდვების ნაწილი მოიხსნა, ეს პროცესი გააქტიურდა.

ცუდი რაც არის ქართულ ექსპორტში არის ის, რომ დიდ წილს იკავებს ისევ ავტომობილები, რკინა და ასე შემდეგ, ის პროდუქტები, რასაც ჩვენ არ ვაწარმოებთ. მაგალითად, შემოდის მეტალი და გადის სხვა ფორმით… ექსპორტის ზრდა კარგია, მაგრამ ცუდია ის, რომ ძალიან ვართ დამოკიდებული იმპორტზე. რეექსპორტიც კარგია, მაგრამ უმჯობესია ადგილობრივი წარმოება გვქონდეს,“ – ამბობს სოსო ბერიკაშვილი.

ანალიტიკოსმა ნათქვამის საილუსტრაციოდ მიგვითითა სტატისტიკურ მონაცემზე, საიდანაც ჩანს, რომ, მაგალითად, სპილენძის მადნები და კონცენტრატები პირველ ადგილზეა ექსპორტის სტატისტიკაში და ამავდროულად იმპორტში სამეულშია.

„მსუბუქი ავტომანქანებია ექსპორტში მეორე ადგილზე, იმპორტში კი, პირველ ადგილზე,“ – დასძინა სოსო ბერიკაშვილმა.

ფინანსთა სამინისტროს საგამოძიებო სამსახურის ინფორმაციით, გამოვლინდა უკანონო სამეწარმეო საქმიანობის 4 ფაქტი, რის გამოც სისხლის სამართლის პასუხისგებაში მიეცა 5 პირი.

„გამოძიებით დადგინდა, რომ ბრალდებულები თბილისის და რუსთავის სხვადასხვა უბანში მდებარე, მათივე მფლობელობაში არსებულ აფთიაქებში, სალიცენზიო პირობების დარღვევით ყიდდნენ ფსიქოტროპულ მედიკამენტებს ფიზიკურ პირებზე რეცეპტის გარეშე, რითაც ხელს უწყობდნენ ე.წ. სააფთიაქო ნარკომანიას.

აღნიშნული ქმედებით ბრალდებულებმა მიიღეს დიდი ოდენობით შემოსავალი, ხოლო სამოქალაქო ბრუნვაში ყოველგვარი რეგულაციისა და ნებართვის გარეშე შევიდა ჯამში დაახლოებით 850 000 ლარის ღირებულების ფსიქოტროპული და სპეციალურ კონტროლს დაქვემდებარებული მედიკამენტი“, – წერს საგამოძიებო სამსახური.

გამოძიება გრძელდება საქართველოს სისხლის სამართლის კოდექსის 192-ე მუხლის პირველი და მე-2 ნაწილებით, რაც სასჯელის სახით ითვალისწინებს თავისუფლების აღკვეთას 3-დან 5 წლამდე.

დღეს, 22 დეკემბერს, ბათუმში ელექტროენერგია შეუწყდა ქალაქის გარკვეულ უბნებს.

ამ დროისთვის ელექტროენერგია არ მიეწოდება ბარცხანის დასახლების და ლერმონტოვის ქუჩის ნაწილს.

როგორც „ბათუმელებს“ ენერგოკომპანიაში უთხრეს, დენის შეწყვეტის მიზეზი უამინდობაა, ტექნიკური სამუშაოები მიმდინარეობს და მოსახლეობას ელექტროენერგია მალე მიეწოდება.

ჰიდრომეტეოროლოგიური ობსერვატორიის ინფორმაციით, 22 დეკემბრის 21 საათიდან 23 დეკემბრის 21 საათამდე აჭარაში მოსალოდნელია ღრუბლიანი ამინდი და თოვა, სანაპირო რაიონებში უმეტესად, თოვლ-ჭყაპის სახით.

22 დეკემბრის მონაცემებით, გასული დღე-ღამის განმავლობაში აჭარაში კორონავირუსის 202 ახალი შემთხვევა დადასტურდა. გარდაიცვალა 4 ადამიანი.

ამ დროისთვის აჭარის კოვიდ კლინიკებში 518 ადამიანი მკურნალობს კოვიდზე, კოვიდსასტუმროში – 247.

აჭარაში სულ ვაქცინირებულია  281 842 ადამიანი. ორი დოზით – 125 899, ბუსტერის ერთი დოზა მიღებული აქვს 3 382 პირს.

დღეს, 22 დეკემბერს, ბათუმში ძლიერმა ქარმა ცენტრალურ პარკში მოსაცდელი წააქცია. პარკში ქარმა ერთი ხეც მოგლიჯა.

როგორც ბათუმის მერიაში ამბობენ, ქალაქის ტერიტორიაზე ჯერჯერობით სხვა ზიანი უამინდობას არ გამოუწვევია. „მოსაცდელს დღის განმავლობაში აღადგენენ,“ – გვითხრეს მერიაში.

აჭარაში ამინდი გუშინ გაუარესდა. ბათუმში დროგამოშვებით ძლიერი წვიმა და სეტყვაა, მაღალ მთაში კი, თოვლის საფარმა ერთ მეტრს მიაღწია.

22 დეკემბრის მონაცემებით, საქართველოში დადასტურდა კოვიდის 2739  ახალი შემთხვევა. ჩატარდა 45 153 ტესტი კორონავირუსზე.

გასულ 24 საათში 52 პაციენტი გარდაიცვალა კოვიდით.

21 დეკემბრის მდგომარეობით, დადებითობის დღიური მაჩვენებელი არის 6.07%, ბოლო 14 დღის მანძილზე – 6.58% ხოლო 7 დღის მანძილზე – 6.19%.

დღეს ქვეყანაში გამოვლენილი ინფიცირების 2 739 ახალი შემთხვევიდან თბილისში გამოვლენილია 1 246 შემთხვევა, აჭარაში – 204, იმერეთში – 437, ქვემო ქართლში – 120, შიდა ქართლში – 174, გურიაში – 99, სამეგრელო – ზემო სვანეთში – 184, კახეთში -147, მცხეთა-მთიანეთში – 66, სამცხე-ჯავახეთში – 50, რაჭა-ლეჩხუმსა და ქვემო სვანეთში -12.

ქობულეთის ახალი მერი, ლევან ზოიძე, საკრებულოში ხელფასების ზრდის ინიციატივით შევიდა, შესაბამისი განკარგულების პროექტი განსახილველად საკრებულოში უკვე გადაგზავნილია.

პროექტის მიხედვით, მერის ხელფასი 5060 ლარი იქნება, ხოლო პირველ მოადგილეს ხელფასის სახით 3850 ლარი დაერიცხება, მერის მეორე მოადგილე 3 520 ლარს მიიღებს.

ქობულეთის მერიის პირველადი სტრუქტურული ერთეულის ხელმძღვანელის ხელფასი 1650 ლარით განსაზღვრეს, მეორე რანგის საჯარო მოხელის ხელფასი 1320, ხოლო მესამე რანგის მოხელის ხელფასი 880 ლარი იქნება.

საკმაოდ დაბალი თანხა – 605 ლარი გაითვალისწინეს მერიის სტრუქტურულ ერთეულებში [სოფლების წარმომადგენლები] დასაქმებული პირებისთვის, უფრო ნაკლები – 550 ლარი იქნება მერიაში უმცროსი სპეციალისტის ხელფასი.

ხელფასებს იზრდიან ქობულეთის საკრებულოს თანამდებობის პირებიც, შესაბამისი განკარგულების პროექტის მიხედვით, საკრებულოს თავმჯდომარის ხელფასი 4510 ლარი იქნება. პირველ მოადგილეს 3410, მეორე და მესამე მოადგილეების ხელფასი კი 2970 ლარით განსაზღვრეს.

საკრებულოს კომისიის თავმჯდომარის ხელფასი 2420, ხოლო ფრაქციის თავმჯდომარის ხელფასი 2200 ლარი იქნება. ფრაქციის თავმჯდომარის მოადგილე კი შრომის ანაზღაურების სახით 1760 ლარს მიიღებს.

„გამოძიება ყოველთვის იწყება მსგავს შემთხვევებში, მაგრამ არანაირი შედეგი არ დგება, პასუხისმგებლობის დაკისრება არ ხდება. ეს ნიშნავს, რომ სახელმწიფო გარკვეულწილად ახალისებს მსგავს საქციელს პოლიციელების მხრიდან,“ – ასეთია საია-ს აჭარის ფილიალის ხელმძღვანელის, პაატა დიასამიძის შეფასება შემთხვევებზე, როცა პოლიციელების მხრიდან სავარაუდო დანაშაულის ჩადენის შემთხვევებზე გამოძიება მხოლოდ იწყება და აღარ სრულდება.

გუშინ, 20 დეკემბერს, უკვე მესამე გამოძიება დაიწყო ბათუმის პოლიციის მე-6 განყოფილებაში მომხდარ შემთხვევაზე. ამჯერად პოლიციელები პოლიციის შენობაშივე ფიზიკურ ძალადობაში ჟურნალისტებმა დაადანაშაულეს.

„პოლიციის მე-6 განყოფილებაში გვცემეს“ – ბათუმელი ჟურნალისტები

მანამდე „ბათუმელები“ ორი შემთხვევის შესახებ წერდა, სადაც მოქალაქეები ასევე ჰყვებოდნენ, რომ მათზე პოლიციელებმა იძალადეს.

პოლიციის მე-6 განყოფილება ბათუმში რუსთაველის ქუჩაზეა. ამ შენობიდან გამოსულმა მოქალაქემ, ირაკლი ქაჯაიამ ზუსტად 5 წლის წინ – 2016 წელს თქვა, რომ პოლიციელებმა სცემეს – პოლიციის შენობაში ნეკნი ჩაუმტვრიეს. იმის მიუხედავად, რომ ამ საქმეში პირდაპირი მტკიცებულებებია იმაზე, რომ მოქალაქეზე პოლიციის განყოფილებაში ფიზიკურად იძალადეს, პროკურატურა დანაშაულზე არ რეაგირებს.

„გამოძიების ფარგლებში ამოიღეს სამეთვალყურეო კამერის ჩანაწერები, კამერა პოლიციის განყოფილების ფოიეშია განთავსებული და ჩანს, რომ დაკავებული ირაკლი ქაჯაია შედის ჩვეულებრივად, ხოლო იქიდან გამოჰყავთ ფიზიკური დაზიანებებით… შესაძლებელი იყო დადგენა, რის გამო მიადგა დაზიანებები მოქალაქეს პოლიციის განყოფილებაში. საქმეშია ექსპერტიზის დასკვნაც სხეულის დაზიანებებზე,“ – აღნიშნავს პაატა დიასამიძე.

პოლიციის განყოფილებიდან მაშინ ირაკლი ქაჯაია წინასწარი დაკავების იზოლატორში გადაიყვანეს, თუმცა იქ შეყვანამდე ადმინისტრაციული წესით დაკავებული მოქალაქის რეფერალურში გადაყვანა გახდა საჭირო. 2016 წელს, „ბათუმელებმა“ მოიპოვა სამედიცინო დაწესებულების მიერ შედგენილი დოკუმენტი, რომლის მიხედვითაც დაკავებულს ჩამტვრეული ჰქონდა ნეკნი და გახეთქილი ჰქონდა წარბი. გრაფაში „ავადმყოფობის მიმდინარეობა“ კი ჩაწერეს – „მწვავე“.

გამოძიების ფარგლებში მაშინ რამდენიმე პოლიციელი გამოჰკითხეს, მათ შორის, თემურ ბერულავა, რომელმაც მოქალაქე ირაკლი ქაჯაია პოლიციის განყოფილებაში მიიყვანა.

„უცებ თავი გაწია და სკამის კუთხეს მიარტყა,“ – უთხრა ამ პოლიციელმა გამომძიებლებს.

„ირაკლი ქაჯაიას საქმეზე“ გამოძიების დაწყებიდან 5 წელზე მეტი დრო გავიდა. საია-ს იურისტი, პაატა დიასამიძე სწორედ დროს ასახელებს არგუმენტად, როცა ამბობს, რომ სახელმწიფო „ახალისებს“ პოლიციელების მხრიდან ძალადობას.

„რატომ ხართ ასე აგრესიული პოლიციის მიმართ?” – ეს შეკითხვა უკვე პოლიციელმა ავთანდილ ბერულავამ დაუსვა ადმინისტრაციული წესით დაკავებულ ლევან ბერიანიძეს და თორნიკე კუსიანს 2017 წელს. ამ სამოქალაქო აქტივისტებმა პოლიციის მე-6 განყოფილების პოლიციელები ასევე ფიზიკურ ძალადობაში დაადანაშაულეს. სასამართლო პროცესზე კი, სადაც ბერიანიძის და კუსიანის სამართალდარღვევის შემთხვევა განიხილებოდა, შსს-ს პოზიციას ავთანდილ ბერულავა გამოხატავდა.

ლევან ბერიანიძე და თორნიკე კუსიანი ადმინისტრაციული წესით 2017 წლის ზაფხულში დააკავეს. დაკავებამდე მათ და სამ ტრანსგენდერ ქალს ბათუმის ბულვარში რამდენიმე პირი თავს დაესხა.

გამოძიება პოლიციელების წინააღმდეგ სავარაუდო დანაშაულის ჩადენაზე პროკურატურამ ამ შემთხვევაზეც დაიწყო, თუმცა ლევან ბერიანიძეს და თორნიკე კუსიანს არც დაზარალებულის სტატუსი მიანიჭეს. შესაბამისად, უცნობია რა საგამოძიებო მოქმედებები ჩატარდა.

ფაქტი ისაა, რომ ამ დრომდე არც ამ საქმეზე დაუსჯიათ ვინმე.

„ავთანდილ ბერულავა ჩვენთან უკვე აღარ მუშაობს, ვერ გეტყვით, სად მუშაობს,“ – გვიპასუხეს ბათუმის პოლიციის მე-6 განყოფილების ცხელ ხაზზე.

საია-ს იურისტი პაატა დიასამიძე ყურადღებას ამახვილებს იმაზეც, რომ კიდევ რამდენიმე მსგავსი შემთხვევაა, რაც პოლიციის სხვა განყოფილებებს უკავშირდება, თუმცა გამოძიებას არც სხვა შემთხვევაში დაუდია შედეგი.

„პრაქტიკაში არ მახსენდება შემთხვევა, როცა რომელიმე პოლიციელი პასუხისგებაში მისცეს,“ – დასძინა პაატა დიასამიძემ.

ბოლო 2 წლის განმავლობაში რამდენ შემთხვევაში დაიწყო გამოძიება სახელმწიფო ინსპექტორის სამსახურმა პოლიციელების მიერ სამსახურებრივი უფლებამოსილების გადამეტების ფაქტებზე და რამდენ შემთხვევაში დასრულდა გამოძიება? – სახელმწიფო ინსპექტორის სამსახურში გვითხრეს, რომ ამ ინფორმაციის მისაღებად საჯარო ინფორმაცია უნდა გამოვითხოვოთ.

ამ უწყებას, სადაც პოლიციელების მხრიდან სავარაუდო დანაშაულის ჩადენას იძიებენ, გავახსენეთ კიდევ ერთი კონკრეტული შემთხვევა – 2020 წლის აპრილი, როცა კომენდანტის საათის დროს ბათუმშიო მოქალაქეს პოლიციელებმა სცემეს. სახელმწიფო ინსპექტორის სამსახურის პრესცენტრში გვითხრეს, რომ გამოძიება ამ საქმეზე დასრულდა, თუმცა პროკურატურას საბოლოო გადაწყვეტილება არც ამ საქმეზე მიუღია.

„აღნიშნული სისხლის სამართლის საქმეზე ჩატარებულია ყველა საჭირო საგამოძიებო და საპროცესო მოქმედება… გამოძიების ამოწურვის შემდგომ, კანონმდებლობით შემაჯამებელი გადაწყვეტილება უნდა მიიღოს საქართველოს პროკურატურამ. ამ ეტაპზე შემაჯამებელი გადაწყვეტილება პროკურატურის მიერ არ არის მიღებული,“ – მოგვწერეს სახელმწიფო ინსპექტორის სამსახურიდან.

კომენდანტის საათის დროს მოქალაქის ცემაზე გამოძიება სახელმწიფო ინსპექტორს 2021 თებერვალში დაუსრულებია.

რატომ არ რეაგირებს პროკურატურა დანაშაულზე, ანუ როცა პოლიცია ძალადობს? – კითხვები დღეს, 21 დეკემბერს,  მთავარ პროკურატურაში უპასუხოდ დატოვეს.

„ახალგაზრდა იურისტთა ასოციაცია“ ბოლო წლებში 18 საქმეზე იცავს ისეთი ადამიანის ინტერესებს, რომელიც პოლიციელს უფლებამოსილების გადამეტებაში ადანაშაულებს. არცერთი საქმის გამოძიება არ დასრულებულა.

მთავარი ფოტო: მოქალაქე, რომელიც კომენდანტის საათის დროს ბათუმში პოლიციელებმა სცემეს.

ამ თემაზე:

„ვხედავ, რაც მემუქრება და აღარ ვიცი, რა გავაკეთო, სახლი არ დამენგრეს თავზე-მეთქი!“ – მოქალაქე სოფელ განახლებიდან ხელისუფლებას  მის საცხოვრებელ  სახლთან ახლოს, მდინარის გასწვრივ, ჯებირის მოწყობას სთხოვს. წინააღმდეგ შემთხვევაში მის საცხოვრებელს საფრთხე ემუქრება – ეს დოკუმენტურადაც დადასტურებულია.

მისი ამბავი საინტერესოა იმითაც, რომ მოქალაქის თქმით, მას  თავისი საცხოვრებელი სახლის პროექტი ხელვაჩაურის მერიაში გადასცეს. ის ირწმუნება, რომ მას ამაში 900 აშშ დოლარი გაახდევინეს. სახლის აშენების ხარჯების დასაფინანსებლად რამაზ დუმბაძის მეუღლე თურქეთის ერთ-ერთ ქალაქში მუშაობს.

ადიდებულმა მდინარე ბარცხანამ სოფელ განახლებაში, რამაზ დუმბაძის სახლთან, ავტომანქანის სავალი გზის ნაწილი 2021 წლის თებერვალში წაიღო. როგორც სოფელში გვიყვებიან, კალაპოტიდან გადმოსული ადიდებული მდინარე საცხოვრებელი სახლისკენ წავიდა, მას გვერდი აუარა და  სამანქანე გზაზე გადავიდა. გზის ამ მონაკვეთში გარღვეულია საგანგებოდ მოწყობილი დამცავი ჯებირიც.

სახლის მეპატრონე, რამაზ დუმბაძე შიშობს, რომ ზამთარში ან გაზაფხულზე წყალდიდობის დროს შესაძლოა მდინარე ისევ ადიდდეს. აქ არც იმას გამორიცხავენ, მდინარემ რადგან მიმართულება ერთხელ უკვე შეიცვალა, შესაძლოა ეს ისევ განმეორდეს, ამიტომაც ოჯახი საკუთარ საცხოვრებელ სახლში თავს უსაფრთხოდ არ გრძნობს:

„მაშინ წყალი ჩვენს სახლშიც შემოვიდა, მაგრამ მხოლოდ დავიტბორეთ. მდინარემ ჩემი ეზო გადაკვეთა და სამანქანე გზიდან ისევ დაბუნდა კალაპოტში. ისევ რომ ადიდდეს და სახლისკენ წამოვიდეს, რა უნდა ვქნა. ვდარდობ, არ მძინავს, კარგ ამინდში შეიძლება დავიძინო, უამინდობის დროს საერთოდ არ მძინავს“, – გვიყვება რამაზ დუმბაძე, სახლის მეპატრონე.

მოსალოდნელი საფრთხის შესახებ მოქალაქემ მუნიციპალიტეტს ოფიციალურად 2021 წლის აპრილში, წერილობით აცნობა და პრობლემის შესწავლა, ასევე დამცავი ჯებირის მოწყობა მოითხოვა. მუნიციპალიტეტის შესაბამისმა სამსახურმა შეისწავლა მისი საცხოვრებელი გარემო, აჭარის გარემოს დაცვის სამმართველოს გეოლოგიის სამსახურთან ერთად და დასკვნაც მოამზადა. ამის შემდეგ კი რამაზ დუმბაძეს ოფიციალურად, წერილობით აცნობეს, რომ მისი მოთხოვნა თბილისში, საავტომობილო გზების დეპარტამენტში გადააგზავნეს.

„ხან იქით გადამამისამართებენ, ხან აქით, რომ ვუყურებ, არ არიან ესენი გამკეთებლები. ხან ბათუმში, ხან თბილისში, ხან საგზაო დეპარტამენტში, ასე ზევით-ქვევით მარბენინებენ და მხოლოდ განცხადებებს მაწერინებენ, მერე მომდის უარყოფითი პასუხები. რა ვქნა? – ამას უკვე ვერ ვხვდები.

წყალმა უნდა წამიღოს-მეთქი – თუ იცოდნენ, რომ აქ სახლი არ დაიდგმებოდა, რატომ მომცეს პროექტი ან დასკვნა გეოლოგებმა. ახლა მოდიან და უყურებენ, მეუბნებიან გაკეთდებაო, მაგრამ არაფერი, არანაირი შედეგი რომ არ მაქვს, ფაქტი აგერ სახეზე.

ახლა ისევ თბილისში გადავაგზავნეთო, მე თბილისში ხომ არ ვცხოვრობ, მე ვცხოვრობ სოფელ განახლებაში. თბილისი უნდა დამეხმაროს თუ მერია უნდა დამეხმაროს?  – თბილისმა მითხრა, მერიას მიმართეო. ვერ ვხდები ამ ხალხის საქმეს, წარმოდგენა  აღარ მაქვს ვის მივმართო, ვინ მოვა და რას გააკეთებს“, – ამბობს რამაზ დუმბაძე.

ხელვაჩაურის მერიაში განგვიმარტეს, რომ გზის სავალი ნაწილი, რომელიც მდინარემ წაიღო, საქართველოს საავტომობილო გზების დეპარტამენტის მართვაშია. ამ დეპარტამენტს ჰქონდა შესყიდული ნაპირსამაგრი სამუშაოებიც, ამიტომაც მოქალაქის განცხადება რეაგირებისთვის მათ გადაუგზავნეს. საპასუხო წერილით დეპარტამენტმა ისევ ხელვაჩაურის  მერიას სთხოვა, მუნიციპალიტეტის თანამშრომლებს შეესწავლათ ვითარება ადგილზე და დეპარტამენტისთვის ეცნობებინათ შედეგების შესახებ.

სწორედ ამ მიმართვის საფუძველზე მუნიციპალიტეტის სპეციალისტებმა განმეორებით შეისწავლეს ვითარება ადგილზე და მოამზადეს კიდევ ერთი დასკვნა, რომელიც, 12 დეკემბერს, მოქალაქის მოთხოვნასთან ერთად, ისევ საავტომობილო გზების დეპარტამენტში გადააგზავნეს.

გეოლოგიურ დასკვნაში წერია, რომ მდინარე  საფრთხეს უქმნის როგორც საავტომობილო გზას, ასევე რამაზ დუმბაძის საცხოვრებელ სახლს. ეროზიული პროცესების თავიდან არიდების მიზნით აუცილებელია კალაპოტის გასწორხაზოვნება, ხოლო მდინარის ორივე ნაპირზე, დაზიანებულ მონაკვეთზე, შესაბამისი საპროექტო დოკუმენტების მიხედვით უნდა განხორციელდეს ნაპირსამაგრი სამუშაოები. ამავე დასკვნის მიხედვით, ნაპირსამაგრი კონსტრუქციის საძირკველი უნდა დაფუძნდეს ძირითად ქანებზე.

დასკვნაში ხაზგასმით არის ნათქვამი, რომ სამუშაოები უნდა შესრულდეს უახლოეს მომავალში: „წინააღმდეგ შემთხვევაში გვერდითი ეროზიული პროცესები პერიოდული ხასიათის მატარებელი და საფრთხის შემცველია.

მიტაცებული სამანქანე გზა პრობლემებს უქმნის რამაზ დუმბაძის მეზობლებსაც. ყველა, ვინც გზის ამ მონაკვეთით სარგებლობს, ავტომანქანის მოსაბრუნებლად რამაზ დუმბაძის ეზოში შედის: „სხვაგვარად შეუძლებელია“. ერთ-ერთ ოჯახს კი სახლთან მისასვლელად უფრო გრძელი გზის გავლა უწევს. მეზობლები შიშობენ, რომ თუ  გზა კიდევ დავიწროვდება, შესაძლებელია მათი პრობლემა უფრო გამწვავდეს, რადგან საჭიროების შემთხვევაში სახლებთან მისვლას ვერც სასწრაფო დახმარება და ვერც სახანძრო ვერ შეძლებს.

რამაზ დუმბაძის მეზობლების თქმით, გზის დავიწროებული მონაკვეთის შევსებას საკუთარი ძალებით ცდილობდნენ, მაგრამ უფლება არ მისცეს: „ბუნებრივი მასალა გვაჩუქეს, გვინდოდა აქ ჩაგვეყარა, რომ შეგვევსო, მაგრამ გაგვაფრთხილეს გარემოს დაცვა დაგაჯარიმებთო.“

რამაზ დუმბაძე და მისი მეზობლები მიიჩნევენ, რომ ცუდად იმუშავა კომპანიამ, რომელიც საავტომობილო გზების დეპარტამენტის დაკვეთით, ნაპირსამაგრ სამუშაოებს აწარმოებდა.

ნაპირსამაგრის მოწყობიდან მალევე, პირველივე წყალმოვარდნისას, მდინარე კალაპოტიდან გადმოვიდა. გარდა ამისა, ყოველი უამინდობის დროს იტბორება სოფლის სტადიონიც.

რამაზ დუმბაძის სახლი მდინარიდან მხოლოდ 15-20 მეტრის დაშორებითაა. მდინარესთან ასე ახლოს  სახლის აშენება კანონით დასაშვები არ არის. თუმცა მშენებლობის ნებართვა გაცემულია და მეპატრონეს სახლი კანონის ყველა პროცედურის გავლისა და შესაბამისი სანებართვო დოკუმენტების საფუძველზე აუშენებია.

ნებართვა რამაზ დუმბაძის საცხოვრებელი სახლის მშენებლობაზე 2013 წელს არის გაცემული. ეს იმას ნიშნავს, რომ პროექტს გავლილი უნდა ჰქონდეს ყველა ეტაპი, როგორც გეოლოგიური, ასევე ტოპოგრაფიული კვლევა.

რამაზ დუმბაძე ამბობს, რომ პროექტი თავად ხელვაჩაურის მერიაში მოუმზადეს და ამაში 900  დოლარი გადაახდევინეს.

„კომპიუტერში მაჩვენეს სხვადასხვა პროექტი, ამარჩევინეს და მომიმზადეს, 900 დოლარი გადავიხადე ხელზე, ყველაფერი თვითონ გააკეთეს, გეოლოგია და ასე შემდეგ“, – გვითხრა მან.

პროექტის ბეჭდურ ვარიანტზე, რაც რამაზ დუმბაძემ გვაჩვენა, წერია, რომ ის ინდმეწარმე დურსუნ თედორაძის მომზადებულია.

რამაზ დუმბაძის თქმით, ის ხელვაჩაურის მერიაში მუშაობდა.

ხელვაჩაურის მერიის ინფორმაციით, დურსუნ თედორაძე მერიაში არ მუშაობს. რაც შეეხება რამაზ დუმბაძის სახლის მშენებლობის ნებართვას, „ის გაცემულია მოქალაქის მიერ წარმოდგენილი ნახაზისა და სხვა საჭირო დოკუმენტების საფუძველზე“, – განგვიმარტეს მერიაში.

შემოსავლების სამსახურის ინფორმაციით, საბაჟო გამშვებ პუნქტზე ,,წითელი ხიდი“ აზერბაიჯანის რესპუბლიკიდან შემოვიდა სატვირთო ავტომობილი, რომელსაც აზერბაიჯანის მოქალაქე მართავდა. ავტომობილის მფლობელმა შემოსავლების სამსახურის მებაჟე ოფიცერთან გასაუბრებისას განაცხადა, რომ დასადეკლარირებელ ნივთებს არ ფლობდა, თუმცა ეჭვის საფუძველზე, ავტომობილის დეტალური დათვალიერების შედეგად, 21 მილიონ 680  ათასი რუსული რუბლი იქნა აღმოჩენილი.

ეს თანხა  ეროვნული ბანკის კურსის შესაბამისად  915 633  ლარია.

საქართველოს საბაჟო  კოდექსის 169-ე მუხლის მე-3 ნაწილის თანახმად, კანონდამრღვევ მოქალაქეს სანქციის სახით განესაზღვრა არადეკლარირებული თანხის  ჩამორთმევა.

გარემოს ეროვნული სააგენტო გაფრთხილებას ავრცელებს მოსალოდნელი ამინდის შესახებ.

სააგენტოს ცნობით, 21-23 დეკემბერს საქართველოში მოსალოდნელია რთული მეტეოროლოგიური პირობები: ნალექი, უმეტესად თოვლის სახით, ძლიერი ქარი.

მთაში მოსალოდნელია ძლიერი თოვა, ნისლი და ქარბუქი, ზღვაზე – შტორმი, საავტომობილო გზებზე – ლიპყინული, ელექტროგადამცემ ხაზებზე – შემოყინულობა, მთიან რეგიონებში – ზვავსაშიშროება.

„საავტომობილო გზების ცალკეულ მონაკვეთებზე შეიზღუდება ტრანსპორტის გადაადგილება. 23-26 დეკემბერს კოლხეთის დაბლობზე ღამის საათებში მოსალოდნელია ჰაერის ტემპერატურის -4, -6 გრადუსამდე დაწევა, რამაც შესაძლებელია ციტრუსოვანი კულტურების დაზიანება გამოიწვიოს.“ – წერს სააგენტო.

___________

ფოტო „ბათუმელების“ არქივიდან

აჭარაში ციტრუსის კრეფის სეზონი მთავრდება. მეციტრუსეების თქმით, მანდარინის საშუალო ფასი ადგილზე დაახლოებით 70-80 თეთრია და ინფლაციის მიუხედავად, ციტრუსის ფასი არ გაზრდილა.

აჭარის სოფლის მეურნეობის სამინისტროს ინფორმაციით, 20 დეკემბრის მდგომარეობით, აჭარიდან ექსპორტზე გაიტანეს 32 081 ტონა მანდარინი, რაც 2020 წლის ანალოგიურ პერიოდთან შედარებით 28 პროცენტით მეტია.

რაც შეეხება ბაზრების ჩამონათვალს, სიის სათავეში ისევ ტრადიციული ბაზრებია: რუსეთი, სომხეთი, უკრაინა. მანდარინი აჭარიდან ასევე გაიტანეს მოლდოვაში, ბელარუსში, სლოვენიაში, ყირგიზეთში, ესტონეთსა და ყაზახეთში.

მეციტრუსეებს არასტანდარტული მანდარინის ჩაბარება ქობულეთის საკონსერვო ქარხანაში შეუძლიათ, სადაც სამინისტროს მონაცემებით, უკვე გადამუშავებული აქვთ 4932 ტონა არასტანდარტული მანდარინი.

17 წელია უსაბუთოდ ცხოვრობს საბერძნეთის ერთ პატარა ქალაქში. ექიმიც რომ დასჭირდეს, პრობლემა შეექმნება. საქართველოში 17 წლის განმავლობაში მხოლოდ სამჯერ შეძლო ჩამოსვლა. მრავალშვილიან ოჯახში გაზრდილ 57 წლის ციალა შავაძეს ყველაზე ძალიან მოხუცთან ერთად ოთხ კედელს შორის ცხოვრება გაუჭირდა.

უცხოეთში წასვლა, როგორც გვეუბნება, გაჭირვებამ და უფულობამ გადააწყვეტინა. ციალას სიტყვებით „არ იყო მეტი გზა”.

რას ჰყვება ციალა შავაძე, ემიგრანტი საბერძნეთიდან: 

ვარ ხულოს რაიონის სოფელ დიდაჭარიდან, მრავალშვილიანი ოჯახიდან, მე არ ვარ დაქორწინებული.

როცა ჩამოვედი, ყველაზე ძნელი უსაბუთობა იყო, ენის არცოდნა და ოჯახისგან მოწყვეტა.

ამ წლების განმავლობაში ვიყავი საქართველოში ორჯერ თუ სამჯერ. დედის ავადმყოფობის გამო ჩამოვედი, მაინც პრობლემები იყო და უკან დაბრუნება მომიხდა ისევ.

ყველაფერი გადამაქვს იმ იმედით, იმ დროის ნატვრით, რომ დავბრუნდები და ჩემს ოჯახში, ჩემს ხალხთან ერთად ვიქნები თბილად და ტკბილად.

აქ [ბერძნები] მოსიყვარულე ხალხია, არ გვაგრძნობინებენ, რომ მოსამსახურეები ვართ და ამით ბედნიერი ვარ.

ჩემი დილა ბებიის მოვლით იწყება, დედა რომ გყავდეს სახლში, არ შეეძლოს და ხელის დაბანით, საუზმის მომზადებით დაწყებული ყველაფერში რომ სჭირდებოდეს დახმარება – ასეა. დღე იწყება ამით და ამითვე ღამდება. სახლში მხოლოდ მე და ბებია ვართ, ჰყავს შვილები. მოდიან კვირაში ერთხელ, რაც გვჭირდება, მოაქვთ ჩვენთვის და მიდიან.

ძნელია, როცა დედა გყავს მისახედი და სხვას უყურებ, ეს არის მგონი დიდი სასჯელი, ამის გამო შეიძლება ადამიანს ფსიქიკაც შეერყეს.

დიდი მოთმინება და დიდი გამძლეობა გვჭირდება.

ყველა ემიგრანტი ელოდება ცვლილებებს და სიახლეებს სამშობლოში, რომ დაბრუნდნენ შვილებთან, შვილიშვილებთან იცხოვრონ, პურის ფული ჰქონდეთ და მეტი არაფერი უნდათ.

ვისურვებდი, ჩვენი მთავრობა, სახელმწიფო, ისე გაძლიერებულიყოს, ისეთი ხალხი მოსულიყოს სათავეში, რომ ეს გაეთვალისწინებინოს.

• 17 წელი ემიგრაციაში, არალეგალურად 

17 წელია უსაბუთოდ ვარ. ძნელია შიშით ცხოვრება, როცა ვერ გადიხარ ქუჩაში, გეშინია, რამე არ შეგემთხვეს. საავადმყოფო რომ დაგჭირდეს, წასვლა, წამოსვლა, საბუთები აუცილებელია და მეშლება ხელი.

საქართველოში დედა ისე მომიკვდა, ვერ ჩამოვედი, ამაზე ძნელი მგონი არაფერია. ჯოჯოხეთში ვიცხოვრე მთელი წელი. 2 წლის წინ გარდაიცვალა და მას მერე ღამე უცრემლოდ არ მიძინია.

მყავს 8 და-ძმა, შვილებიც ჰყავთ. ძალიან მენატრებიან და მიყვარან. მრავალშვილიან ოჯახში ვარ გაზრდილი და ჩემთვის ყველაზე ძნელი გადასალახი იყო მარტო ყოფნა ეს წლები, ბებიასთან ერთად.

საქართველოში ამბობენ ხოლმე: თუ რთულია ემიგრანტობა, რატომ მიდიხარ ისევო. არადა, როცა უყურებ რაღაც შეგიძლია ოჯახისთვის გააკეთო, დისთვის, ძმისთვის, თავისთვისაც, რა თქმა უნდა, და დაეხმარო ოჯახს, ფეხზე დააყენო, იღებ ამ პასუხისმგებლობას და დგამ ამ ნაბიჯს, მით უფრო, რომ უკვე ენა კარგად ვისწავლე და ხალხი გავიცანი. საბერძნეთში უკვე ისე ვარ, როგორც საკუთარ ქალაქში, 17 წელი ცოტა არაა.

ვისურვებდი, საქართველოში ისეთი მთავრობა მოვიდეს, თუ ემიგრანტებს ვერ დააბრუნებენ და ვიცი, რომ ეს ადვილი არ არის, ისე მაინც მოხდეს, რომ ნუღარავინ წავა და ამ ჯოჯოხეთს ნურავინ გამოივლის, არავის ვუსურვებ.

ემიგრანტობით ვიყიდე ქალაქში ბინა. დედა მყავდა ავად და დახმარება სჭირდებოდა. ახლა ძმა მყავს 45 წლის, პენსიონერია, არ შეუძლია მარტო ცხოვრება და გადაადგილება, ვეხმარები ჩემს ძმას. ცოტ-ცოტას ყველას ვეხმარებოდი და-ძმებს, როგორც შემეძლო.

კვირაში მხოლოდ ერთ დღეს ვისვენებ, ისიც 8 საათით. ამ დროსაც იმისთვის ვიყენებ, რომ გავდივარ და კიდევ ერთ ოჯახს ვალაგებ. დარჩენილ ორ- სამ საათს მეგობარს ვნახულობ, თბილისიდანაა ეს გოგო. ყავას ვსვამთ, ვსაუბრობთ და ამასობაში ჩემი თავისუფალი დროც მთავრდება.

დანარჩენ დღეებს ოთხ კედელში ვატარებ. ასე ვართ. იშვიათად ბებიას ვინმე ნათესავი მოვიდეს და შეგცვალოს ერთი ან ორი საათით, მაღაზიაში რომ გახვიდე რამე თუ გინდა, რაღაც რომ მოასწრო, იყიდო ან გაგზავნო საქართველოში ვინმეს გულის გასახარად.

ასეთი ცხოვრებით ვცხოვრობთ, გადარბენაზე.

_________________________________________________________________

ფინანსთა სამინისტროს საგამოძიებო სამსახურის ინფორმაციით, ყალბი მონეტების დამზადება-გამოყენების გზით, სხვისი ქონების მოტყუებით დაუფლების ფაქტზე ერთი პირი დააკავეს.

„გამოძიებით დადგინდა, რომ ბრალდებულმა, უკანონო მატერიალური სარგებლის მიღების მიზნით, კუსტარულად დაამზადა 563 ცალი 1-ლარიანის ფორმისა და ზომის მონეტა, რომელიც სწრაფი ჩარიცხვის აპარატების გამოყენებით, ჩარიცხა თავისი მეუღლის ანგარიშზე, საიდანაც შემდგომში მოხდა მისი განაღდება.

ბრალდებული დაკავებულ იქნა უშუალოდ დანაშაულის ჩადენის ფაქტზე. პირადი და საცხოვრებელი სახლის ჩხრეკის შედეგად ამოღებულია 30 ცალი კუსტარულად დამზადებული მონეტა და აღნიშნული მონეტების დასამზადებლად განკუთვნილი მოწყობილობები“-ამბობს საგამოძიებო სამსახური.

ამავე წყაროს ცნობით, გამოძიება სისხლის სამართლის კოდექსის 180-ე მუხლის მე-2 ნაწილით გრძელდება, რაც სასჯელის სახით ითვალისწინებს თავისუფლების აღკვეთას 4-დან 7 წლამდე ვადით.

21 დეკემბრის მონაცემებით, ბოლო 24 საათის განმავლობაში საქართველოში დაფიქსირდა კორონავირუსის 3282 ახალი შემთხვევა, გარდაიცვალა 53 პაციენტი.

აჭარის რეგიონში დადასტურდა კორონავირუსის 272 ახალი შემთხვევა.

stopcov.ge-ზე გამოქვეყნებული ინფორმაციის მიხედვით, დღეს ქვეყანაში გამოვლენილი ინფიცირების 3 282 ახალი შემთხვევიდან: თბილისში გამოვლენილია 1 378 შემთხვევა, აჭარაში – 272, იმერეთში – 532, ქვემო ქართლში – 121, შიდა ქართლში – 256, გურიაში – 122, სამეგრელო – ზემო სვანეთში – 252, კახეთში –162, მცხეთა-მთიანეთში -76, სამცხე-ჯავახეთში – 73, რაჭა-ლეჩხუმსა და ქვემო სვანეთში -38.

„სოციალურ მუშაკებს, განსაკუთრებით რეგიონებში, კვლავ საკუთარი ხელფასიდან უწევთ ოჯახებში განსახორციელებელი ვიზიტების ტრანსპორტირების ხარჯების ანაზღაურება,“ – აღნიშნულია კვლევაში „სოციალური მუშაობის შესახებ კანონის სამოქმედო გეგმის აღსრულების შეფასება“.

ეს კვლევა „სოციალურ მუშაკთა გაერთიანებამ“ მოამზადა ევროკავშირის მხარდაჭერით. კვლევა აღწერს იმას, თუ რამდენად შეიცვალა სოცმუშაკების სამუშაო გარემო.

სოცმუშაკები 2019 წელს გაიფიცნენ და სამუშაო გარემოს გაუმჯობესება მოითხოვეს. ისინი ამბობდნენ, რომ მათ „ზრუნვა ცარიელი ხელებით“ უხდებოდათ, რაც ეფექტური ვერ იქნებოდა, მით უფრო იმის გათვალისწინებით, რომ სოციალურად დაუცველ ჯგუფებს ემსახურებოდნენ.

გაფიცვის შემდეგ ათეულობით სოცმუშაკს სამსახურის დატოვება მოუწია. მათგან რამდენიმე მათგანი ახლა იმ კვლევის ავტორია, სადაც აღწერილია, რამდენად ასრულებს ხელისუფლება სოცმუშაკების მასობრივი გაფიცვის შემდეგ დადებულ პირობებს.

კვლევის მიხედვით, პასუხისმგებელი სახელმწიფო უწყებების მიერ სამოქმედო გეგმით 2021 წლის 1-ელ ივნისამდე შესასრულებელი 6 ამოცანის 13 ღონისძიებიდან სრულად შესრულდა მხოლოდ 2 და ნაწილობრივ შესრულდა 10, ხოლო 1 ღონისძიებას სტატუსი არ მიენიჭა. ამ ღონისძიებებს შორის იყო სოცმუშაკების ტრანსპორტით უზრუნველყოფა, ხელფასის მატება და ადამიანური რესურსების გაუმჯობესების საკითხები.

„კვლევის შედეგად გამოვლინდა, რომ ტრანსპორტირების საკითხის სრულად უზრუნველყოფა ყველა უწყებაში კვლავ მწვავე პრობლემას წარმოადგენს,“  – აღნიშნულია კვლევაში.

„ზოგიერთ შემთხვევაში მომსახურების ხელშეკრულება გაფორმდა ტაქსის კომპანიებთან და ასე გადაადგილდებიან სოცმუშაკები, მაგრამ არსებობს ლიმიტები, რაც ზოგჯერ ქმნის პრობლემას. სოცმუშაკი ვერ ეტყვის მოქალაქეს, რომ ლიმიტი ამოწურულია და ამიტომ ვერ მივა მასთან,“ – აღნიშნავს „ბათუმელებთან“ სოფო ხვთისიაშვილი,  ყოფილი სოცმუშაკი და სოცმუშაკების სამუშაო გარემოზე მომზადებული კვლევის ერთ-ერთი ავტორი.

სოფო ხვთისიაშვილის თქმით, ამ დრომდე სისტემა ეტაპობრივად ზრდის სოცმუშაკების შრომის ანაზღაურებას და ამ მიმართულებით დადებული პირობა სრულდება – თუკი გაფიცვის დროს სოცმუშაკის საშუალო ანაზღაურება 650 ლარი იყო, დღეს სოცმუშაკების საშუალო ხელფასი 1200 ლარია.

„2022 წლისთვის ხელზე სოცმუშაკები აიღებენ 1500 ლარს… თუმცა სოცმუშაკობის პოპულარიზაცია ისევ მთავარ პრობლემად რჩება. სისტემაში ცხადდება კონკურსები პერიოდულად და ვერ აჰყავთ კადრები,“ – ამბობს სოფო ხვთისიაშვილი.

„მონიტორინგის პროცესში გამოიკვეთა, რომ სოციალური მუშაკის კადრის დამატების საჭიროება და აუცილებლობა თითოეულ უწყებაში კვლავ ერთ-ერთ ყველაზე პრობლემურ საკითხს წარმოადგენს, რაზეც არის შემდგომ დამოკიდებული საქმეთა გადატვირთულობა და პროფესიული გადაწვის რისკები,“ –  ვკითხულობთ კვლევაში.

გაფიცვის დროს სოცმუშაკები ჰყვებოდნენ, რომ თითო სოცმუშაკს 100-მდე საქმე ჰქონდა და პრაქტიკულად შეუძლებელი იყო ამ პირობებში ეფექტური მუშაობა. კვლევის ავტორების შეფასებით, ამ მიმართულებით სოცმუშაკების მდგომარეობა არ შეცვლილა.

სოციალური მუშაკები აიყვანეს მუნიციპალიტეტებში, თუმცა, კვლევის ავტორების შეფასებით, მკაფიოდ ჩამოყალიბებული ამ დრომდე არ არის ახალი კადრების ფუნქცია-მოვალეობები.

„ის, რომ სოციალურ მუშაკთა დასაქმება მუნიციპალიტეტებში არ ყოფილა ღია და გამჭირვალე პროცესი, მნიშვნელოვნად აფერხებს სოციალური მუშაობის ეფექტურ განხორციელებას აღნიშნულ უწყებაში.

კვლევით გამოვლინდა, რომ კვლავაც არ არის მკაფიოდ ჩამოყალიბებული, თუ რა ტიპის ფუნქცია-მოვალეობების დელეგირება განხორციელდება საქართველოს ოკუპირებული ტერიტორიებიდან დევნილთა, ჯანმრთელობის, შრომისა და სოციალური დაცვის სამინისტროდან ადგილობრივ თვითმმართველობაზე.

შესაბამისად, ამ ეტაპზე სოციალურ მუშაკებს სრულიად განსხვავებული საქმიანობისთვის იყენებენ ადგილობრივი თვითმმართველობები. ზოგან სხვა პოზიციის ადამიანს შეუთავსეს სოციალური მუშაობა, ზოგან კი საერთოდ არ ჰყავთ ასეთი კადრი,“ – ვკითხულობთ კვლევაში.

_____________

ფოტოზე: სოციალური მუშაკების გაფიცვა, 2019 წლის მარტი. ფოტო „ბათუმელების“ არქივიდან

ხანძარი იყო დღეს, 20 დეკემბერს, ქობულეთში, აღმაშენებლის გამზირზე.

ცეცხლი კერძო სახლის მეორე სართულზე გაჩნდა. 

საგანგებო სიტუაციების მართვის სამსახურის ინფორმაციით, შემთხვევის ადგილზე სახანძრო-სამაშველო სამსახურის ჯგუფები და  სასწრაფო სამედიცინო დახმარების სამსახური იყო მობილიზებული. 

შემთხვევას მსხვერპლი არ მოჰყოლია. ქობულეთის მერიის ცნობით, სახლის მეპატრონეს მსუბუქი დამწვრობა ჰქონდა, რომელიც თვითონ დაიმუშავა. 

ხანძრის მიმდებარე ტერიტორია დაიკვამლა. გადაკეტეს ცენტრალური გზაც. 

ამ დროისთვის ხანძარი ჩამქრალია.