საია სისხლის სამართლის და საპროცესო კოდექსში ცვლილებების შეტანას ითხოვს

ლელა დუმბაძე

საქართველოს ახალგაზრდა იურისტთა ასოციაციამ მორიგი ანგარიშის პრეზენტაცია გამართა. კვლევა შეეხებოდა სავარაუდოდ პოლიტიკური მოტივაციის მქონე სისხლის სამართლისა და ადმინისტრაციულ სამართალდარღვევათა საქმეების ანალიზს. კვლევაში მოხვდა 2011 წლის მაისში  აქციის დროს დაკავებულ პირთა მიმართ წარმოებული საქმეები.

შეხვედრა სასტუმრო „რედისონში“

„სისხლის სამართლის საქმეთა ანალიზმა გამოავლინა კანონის დარღვევა და უარყოფითი ტენდენციები როგორც საგამოძიებო ორგანოების, ისე სასამართლოს მხრიდან, რაც კითხვის ნიშნის ქვეშ აყენებს მართლმსაჯულების განხორციელებას“ – აღნიშნულია ანგარიშში.

„გავაანალიზეთ 2011 წლის 21 მაისთან დაკავშირებული ყველა საქმეები და ანგარიშში ასევე მოხვდა აჭარის ტელევიზიასთან მომხდარი ინცინდენტის და ყველა იმ პირის საქმე, რომელიც ამ ინცინდენტთან დაკავშირებით იქნა დაკავებული. ყველა იმ საქმეში, რომელიც საიამ შეისწავლა, არსებობს სისხლის სამართლის და პროცესუალური ნორმების აშკარა დარღვევები, მართლმსაჯულება წარიმართა დიდი ხარვეზებით და ყველა საქმეში აშკარა ფაქტებია იმისა, რომ ბრალდება მოხდა პოლიტიკური მოტივებით“ – აცხადებს ახალგაზრდა იურისტთა ასოციაციის აღმასრულებელი დირექტორი ეკატერინე ფოფხაძე.

„ამ ანგარიშით საია არა მარტო ამ საქმეებს აანალიზებს, არამედ წარმოადგენს რეკომენდაციებსაც, თუ რა უნდა გაუმჯობესდეს სისხლის სამართლის კანონმდებლობაში, რომ ვერცერთმა ხელისუფლებამ ვერ მოახერხოს მისით მანიპულირება და სისხლის სამართლის საქმეების ფაბრიკაცია, როგორც ეს აქამდე ხდებოდა“.

საიას ანგარიშის მიხედვით, ცვლილებები უნდა შევიდეს როგორც ოპერატიულ სამძებრო საქმიანობის კანონში, ასევე სისხლის სამართლის საპროცესო კოდექსში, რაც მეტ დაცულობას მიანიჭებს განსასჯელს, რომ მის მიმართ დაიღვეს კანონმდებლობა.

„ძალიან მნიშვნელოვანია საპროცესო შეთანხმების ინსტიტუტი, ის თუ როგორ ხდება იძულებით საპროცესო შეთანხმების დადება პირებთან და ამის შემდეგ არანაირი ძიება საქმესთან დაკავშირებით არ ხდება. პირის აღიარება და საპროცესო შეთანხმება არის საკმარისი მტკიცებულება, რომ პიროვნებას მსჯავრი დაედოს, რაც არის ძალიან მანკიერი პრაქტიკა. ჩხრეკასთან დაკავშირებით არის ძალიან დიდი პრობლემები, ასევე საქმე, რომელიც უნდა გავაანალიზოთ, შეეხება იარაღისა და ნარკოტიკის უკანონო ტარებას. მათზე არ ტარდება შესაბამისი ექსპერტიზა“ – ამბობს ეკატერინე ფოფხაძე.

საიას პოლიტპატიმრის სტატუსით გათავისუფლებულმა სამმა პირმა მიმართა, რომლებსაც აქვთ სურვილი რომ მათ საქმეებზე განახლებული პროცესი დაიწყოს, რადგან დაისაჯონ ის პირები, ვინც მათ საქმეეში, როგორც კანონდამრღვევები ფიგურირებდა.

შეხვედრა ბათუმში, სასტუმრო „რედისონში“ გაიმართა, რომელსაც პოლიტპატიმრის სტატუსით გათავისუფლებული პირები, ჟურნალისტები, ადვოკატები და არასამთავრობო ორგანიზაციის წარმომადგენლები ესწრებოდნენ.

„მძღოლო, გახსოვდეს, რომ სახლში გელოდებიან!”

აქციის მონაწილეებმა ყურადღება გაამახვილეს რკინიგზის გადასასვლელებზე არსებულ საფრთხეზე, „ბალავარის” წევრები მძღოლებს მოუწოდებენ, არ დააყენონ საკუთარი და სხვების სიცოცხლე საფრთხის წინაშე.

სამოქალაქო კლუბ „ბალავარის“ კორდინატორი მადონა გვარამია „ბათუმელებთან” საუბარში აღნიშნავს, რომ მათი აქციის მიზანია არამარტო მძღოლების არამედ ფეხით მოსიარულეების უსაფრთხოებაზე ყურადღების გამახვილება: „მსგავსი აქციები საჭიროა, რომ გადასასვლელებთან ადამიანებმა მოძრაობის წესები არ დაარღვიონ.

მძღოლებს დავურიგეთ ბუკლეტები, სადაც გაეცნობიან გადასვლელზე საჭირო წესებს, პატარა ფლეშმობსაც მოვაწყობთ, მეორე სკოლის მოსწავლეები დაეხმარებიან კონტროლიორებს მოძრაობის მოწესრიგებაში, ალმის მოძრაობა ხშირ შემთხვევაში უშედეგოა, ბავშვები ცოცხალ კედელს შექმნიან, რაც იძულებულს გახდის მძღოლებს,  შეჩერდნენ, რომ საფრთხე არ შეუქმნან სიცოცხლეს.”

მარიამ ჩხაიძე აქციის ერთ ერთი მონაწილეა. ის ფიქრობს, რომ მძღოლების ნაწილი  ამ აქციის შემდეგ სიფრთხილეს გამოიჩენს: „ჩემთვის ძალიან მნიშვნელოვანია ამ აქციაში მონაწილეობა, ბუკლეტები დავურიგეთ მძღოლებს, წესით შედეგი უნდა მოყვეს ამ აქციას.”

ბათუმის რესპუბლიკურ საავადმყოფოს ახალი დირექტორი ჰყავს

ბათუმის რესპუბლიკურ საავადმყოფოს ახალი დირექტორი ჰყავს. დღეს აჭარის ფინანსთა და ეკონომიკის მინისტრმა გიორგი თავართქილაძემ, აჭარის ჯანმრთელობისა და სოციალური დაცვის მინისტრთან ერთად, შპს ქ. ბათუმის რესპუბლიკური კლინიკური საავადმყოფოს თანამშრომლებს ხელმძღვანელის თანამდებობაზე ოთხი კანდიდატი წარუდგინა. თანამშრომელთა უმრავლესობის გადაწყვეტილებით, აბესალომ გურგენიძე ამ პოსტზე პედიატრმა მალხაზ ხალვაშმა შეცვალა. 

 

მალხაზ ხალვაში აჭარის რეგიონის მკვიდრია. იგი 1972 წელს ხელვაჩაურის რაიონის სოფელ წინსვლაში დაიბადა. რესპუბლიკური საავადმყოფოს ახალ ხელმძღვანელს სამედიცინო საქმიანობის ოცწლიანი გამოცდილება აქვს. ბოლო სამი წლის განმავლობაში იგი ბიზნეს სექტორში იყო დასაქმებული. მალხაზ ხალვაშის განცხადებით, რესპუბლიკურ საავადმყოფოში ყველაფერი გაკეთდება პაციენტებისთვის მაღალკვალიფიციური სამედიცინო დახმარების გასაწევად.

 

შპს  ქ. ბათუმის რესპუბლიკური კლინიკური საავდმყოფოს 100%-იანი წილის მფლობელი აჭარის ფინანსთა და ეკონომიკის სამინისტროა.

 

მომზადებულია პრესრელიზზე დაყდნობით

თამბაქოს მომხმარებელთა რაოდენობა ორნახევარჯერ გაიზარდა

„ხუთი წლის წინ, რვა ათასი ადამიანი დაიღუპა თამბაქოს მავნე ზემოქმედების შედეგად, ბოლო მონაცემებით ეს მაჩვენებლი 11 ათასამდეა გაზრდილი და სადამდე უნდა ველოდოთ? თუ დღეს არ დავიწყეთ ამაზე მოქმედება, ის მძიმე სტატისტიკა რომელიც დღეს გვაქვს, უფრო გაუარესდება. ჩვენი ძირითადი ამოცანაა დავიცვათ პასიური მწეველობისგან ბავშვები და ახალგაზრდები“-ასეთია არასამთავრობო ორგანიზაციათა შეფასება დღეს არსებულ მდგომარეობაზე.

2008 წლიდან კანონით ყველა დახურულ ნაგებობაში მოწევა იზღუდება, თუმცა ორგანიზაციების წარმომადგენელთა განცხადებით, დღეს ვერ ნახავთ ვერცერთ დაწესებულებას, კაფეს თუ რესტორანს სადაც არ ეწევიან: „იქ ბავშვს ვერ შეიყვანთ. ეწევიან როგორც საგანმანათლებლო და სხვა დახურული ტიპის დაწესებულებებში, ასევე სამედიცინო დაწესებულებებშიც. ეს იმიტომ ხდება, რომ არ სრულდება კანონი. და ის აღმასრულებლები, ვისაც აქვს სახელმწიფოსგან დელეგირებული უფლებები კონტროლზე, არ ახორციელებენ თავიანთ უფლებამოსილებას. ესენი არიან უბნის ინსპექტორები. წინა ხელისუფლების დროს, როცა ვესაუბრებოდით მათ, გვებნებოდნენ, რომ პოლიტიკური ნება არ იყო, იმიტომ რომ საკმაოდ სერიოზულ გარიგებაში იყვნენ თამბაქოს ინდუსტრიასთან“-აცხადებს გიორგი ბახტურიძე.

გიორგი ბახტურიძის თქმით, თამბაქოსთან ბრძოლა მხოლოდ ერთჯერადი აქციებით შემოიფარგლება და კანონის ამოქმედებას ყოველთვის ვეტო ედო.
„2008 წელს ჩვენი ინიციატივა იყო, რომ სრული აკრძალვა მომხდარიყო თამბაქოს რეკლამის, რაც დაბლოკილი იყო რეკლამის გამავრცელებლების მხრიდან. დღეს ვაკეთებთ საზოგადოებრივი აზრის მობილიზაციას და ვთხოვთ როგორც ჟურნალისტებს, ასევე არასამთავრობო ორგანიზაციის წარმომადგენლებს, რომ გავააქტიუროთ ეს თემა“.

კანონის მიხედვით, საჯარო ადგილებში ცალკე მოსაწევი ადგილი უნდა იყოს გამოყოფილი მწეველებისთვის, მაგრამ ეს არ შეიძლება იყოს ფოიეში, სველ წერტილში ან კიბის ქვეშ. სრული აკრძალვის რეჟიმი გვაქვს სასწავლო-საგანმანათლებლო, სპორტულ, კულტურულ და საზოგადოებრივი თავშეყრის ადგილებში, სადაც არც მოსაწევი ადგილი არ უნდა იყოს გამოყოფილი. „ნებისმიერ პოლიციელს დღესაც შეუძლია შეამოწმოს ეს ადგილები და კანონის დარღვევის შემთხვევაში დააჯარიმოს. მინიმალური ჯარიმა არის 200 ლარი“.

გიორგი ბახტურიძე თამბაქოს ინდუსტრიის სხვა მავნებლობაზეც საუბრობს: „თამბაქოს ინდუსტრიას მოაქვს ეკონომიკური ზიანიც. ბოლო სამი წლის განმავლობაში თამბაქოს აქციზიდან სახელმწიფო ბიუჯეტში შემოდის 150 მილიონი ლარი, ეს მაშინ როცა ამერიკელი ექსპერტების გათვალებით, უნდა შემოდიოდეს 300 მილიონი ლარი. ეს 150 მილიონი ლარი ილექება ინდუსტრიის და იმ ჩინოვნიკების ჯიბეში რომლებიც ამ ბიზნესს ლობირებენ. მეორე დანაკარგი ეს არის თამბაქოსგან გამოწვეული დაავადებების მკურნალობაზე გაცემული თანხები ბიუჯეტიდან, რაც სულ მცირე 280 მილიონი ლარია. კონვენცია ავალდებულებს ქვეყანას,  რომ შეიქმნას კონკრეტული სტრუქტურები, რომელიც რეალურად გააკონტროლებს ამ სიტუაციას“.

გიორგი ბახტურიძის განცხადებით, თავის დროზე უკანონოდ შემოვიდა ქვეყანაში ელექტრონული სიგარეტიც, როგორც თამბაქოსგან თავის დანებების საშუალება: „ამიტომაც ეს სიგარეტი არ დაბეგრილა, თუმცა ისიც ისევე აყენებს ჯანმრთელობას ზიანს, როგორც ჩვეულებრივი სიგარეტი“.

თამბაქოს მავნებლობის შესახებ და კანონის გამკაცრებასთან დაკავშირებით შეხვდერა, დემოკრატიული ჩართულობის ცენტრში, არასამთავრობო ორგანიზაციებმა „თამბაქოს კონტროლის ალიანსმა“ და „welfare Foundation“ გამართეს.

ექიმების პროტესტი ბათუმში

„ნახევარმა თანამშრომლებმა გაიარეს კონკურსი და  გადადიან ალდაგის კლინიკაში. გვეუბნებიან, თქვენი საავადმყოფო დაიხურებაო. ჩვენ შენარჩუნება გვინდა რესპუბლიკური საავადმყოფოს. იმის იმედით ვართ, რომ დავრჩებით მუნიციპალურ საავადმყოფოდ და არ გავითიშებით, ზოგი ალდაგის კლინიკაში, ზოგი აქით. ყველას გვინდა რომ ადგილზე  ვიმუშაოთ ისე, როგორც აქამდე ვმუშაობდით,“ – აცხადებს რესპუბლიკური საავადმყოფოს თანამშორმელი გულნარა აგიბა.

 

„დღეს ჩვენი თავშეყრის მიზეზი არის ის, რომ გვაინტერესებს, თუ რა ბედი ელის რესპუბლიკურ საავადმყოფოს. ჩვენ გვინდა  ამ ტერიტორიაზე იყოს ძლიერი, მულტიპროფილური საავადმყოფო. მინისტრმა დაგვაიმედა, რომ ამ ტერიტორიაზე აშენდებოდა ახალი კლინიკა. ახლა ჩვენ გვაინტერესებს, აშენებამდე რა გველოდება. როგორ ვიმუშაოთ. რა დაფინანსების წყარო გვექნება,“ – ამბობს რესპუბლიკური საავადმყოფოს ნევროლოგი ნინო კახიძე.

 

ბათუმის რესპუბლიკურ საავადმყოფოში 600-ზე მეტი ადამიანი მუშაობს.

 

დღის ბოლოს “ბათუმელებთან” კომენტარი გააკეთა აჭარის ჯანმრთელობისა და სოციალური დაცვის მინისტრმა ნუგზარ სურმანიძემ. 

 

„რესპუბლიკური საავადმყოფო გააგრძელებს მუშაობას. განხორციელდება ღონისძიებები რომ უპასუხოს სამედიცინო პირობებს. პარალელურად მიმდინარეობს სამუშაოები რომ აშენდეს  ახალი მრავალპროფილიანი კლინიკური საავადმყოფო, რომელსაც  ექნება  რეფერალური დატვირთვა, რომელიც იქნება ყველაზე მძლავრი საავადმყოფო.  ამ ეტაპზე ასე ვფიქრობთ ჩვენ, ასე გვინდა.  ახლა მიმდინარეობს სამუშაოები რომ მოვიპოვოთ რესურსი და გაკეთდეს რესპუბლიკური საავადმყოფო,” – განაცხადა ნუგზარ სურმანიძემ.

 

ექიმების პროტესტი
ექიმების პროტესტი

 

 

 

დისკუსია აჭარის უფლებების გაფართოებაზე

ლელა დუმბაძე



საქართველოს ტერიტორიულ-სახელმწიფოებრივი მოწყობის პრობლემა, – ეს იყო დისკუსიის თემა, რომელიც ახალგაზრდა იურისტთა ასოციაციის, იურიდიული განათლების ხელშეწყობის ფონდის სტიპენდიანტმა, სულხან ფალავანდიშვილმა წარმოადგინა. მისი განცხადებით, დღეს დეცენტრალიზაციის პრობლემა აქტუალურია, რადგან ავტონომიურ ერთეულებში რეალური თვითმმართველობა, არ ხორციელდება. „თუ ვერ მოხდება შეთანხმებული პროცედურების გავლა ცენტრალურ ხელისუფლებასა და ავტონომიურ ერთეულების ხელმძღვანელებს შორის, ეს რეალურად შექმნის პრობლემას“ -ამბობს სულხან ფალავანდიშვილი.

 

 

„ამ შემთხვევაში ჩვენ ყურადღებას ვამახვილებთ არა მარტო აჭარის ავტონომიურ ერთეულებზე, არამედ, მთლიანად საქართველოს ტერიტორიულ მოწყობაზე. აჭარაზე უფრო მეტად იმიტომ გამახვილდა ყურადღება, რომ ეს არის ერთადერთი ავტონომიური ერთეული, სადაც საქართველოს ხელისუფლების იურისდიქცია ვრცელდება. შესაბამისად, ავტონომიის სტატუსის განსაზღვრა და უფლებების გაზრდა მნიშვნელოვანია როგორც რეგიონისთვის, ასევე ქვეყნისთვის“.

 

სულხან ფალავანდიშვილის აზრით, უნდა განისაზღვროს თვითმმართველობებისა და აღმასრულებელი ხელისუფლების დაკომპლექტების წესი, შესაძლებელია გარკვეული საკანონმდებლო პაკეტების მომზადება უფლებამოსილების გაფართოების მიზნითაც. „ვეთანხმები იმ აზრს რომ ავტონომიურ ერთეულებს არ უნდა ჰქონდეს ცალკე, დამოუკიდებელი ძალოვანი სტრუქტურები და გასამხედროებული პოლიციური ძალები, რადგან უსაფრთხოების უზრუნველყოფა ცენტრალური ხელისუფლების კომპეტენციაში შედის, მაგრამ სხვა სფეროებში, უფლებამოსილების გაფართოებაზე უნდა ვიფიქროთ“.

 

 

დისკუსია დღეს, დემოკრატიული ჩართულობის ცენტრში გაიმართა.

აქცია „დავეხმაროთ მიუსაფარ ადამიანებს“

 ბათუმელები

 

25 იანვარს ტარდება საქველმოქმედო აქცია, სადაც უსახლკარო და მიუსაფარი ადამიანებისთვის თბილი ტანსაცმელი და ფახსაცმელი შეგროვდება. ასევე, ზამთარში გამოსადეგი სხვა ნივთები, შესაძლებელია ფულადი დახმარების გაცემაც. 

 

აქციაში მონაწილეობის მსურველებს შეუძლიათ 25 იანვარს, აჭარის მთავრობის სახლის წინ შეუერთდნენ აქციას 12 საათიდან დღის სამ საათამდე. საქველმოქმედო აქციას ორგანიზებას უწევს სტუდენტი ედიშერ მჟავანაძე. 

 

აქცია – „დავეხმაროთ მიუსაფარ ადამიანებ“, პირველად ათ იანვარს გაიმართა, სადაც ჟურნალისტებმა, აჭარის მთავრობისა და სხვადასხვა სამინისტროების თანამშრომლებმა მიუსაფარი ადამიანებისთვის შემწეობა გაიღეს.  

 

აქცია ანსამბლის ხელმძღვანელის გადადგომის მოთხოვნით

„მესამე დღეა ვაპროტესტებთ და ვითხოვთ გადადგეს ამირან პაიჭაძე. მიზეზი ისაა, რომ გულგრილი დამოკიდებულება არის ანსამბლის ხელმძღვანელის მხრიდან მსახიობებისადმი. წინხედვა არ არის ანსამბლის და ასე შემდეგ. უნდა გადადგეს დირექტორი, ქორეოგრაფი და ბევრია კიდევ მანდ გადასადგომი და მოსახსნელი,“ – აცხადებს ანსამბლის მსახიობი ბესო ჯინჭარაძე „ბათუმელებთან“ საუბრისას.

 

ანსამბლის წევრთა ნაწილმა განათლების კულტურისა და სპორტის სამინისტროს 14 პუნქტიანი განცხადება წარუდგინა, სადაც მათი მოთხოვნებია ჩამოყალიბებული. რაც შეეხება თავად ამირან პაიჭაძეს, ის გადადგომას არ აპირებს და სამინისტროს გადაწყვეტილებას ელოდება.

 

„მსახიობთა გარკვეული ჯგუფი, თავისი პრეტენზიებით წარმოდგნენ.  განვილიხე მათი პრეტენზიები,  არ ვეთანხმები და უსაფუძვლოდ მიმაჩნია.  ამაზე ჩვენ გვქონდა გუშინ მსჯელობა, აქტიურად მონაწილეობს სამინისტროც, რომელმაც მოისმინა ორთავე მხარის პრეტენზიები, თვალნათლივ დაინახა სად იყო სიმართლე და სად – ტყუილი,“ – განაცხადა ამირან პაიჭაძემ.

 

პაიჭაძის თქმით სამინისტროს გადაწყვეტილებას ელოდება და რასაც სამინისტრო გადაწყვეტს, იმის მიხედვით იმოქმედებს.

 

რაც შეეხება აჭარის განათლების, კულტურისა და სპორტის სამინისტროს პოზიციას, მინისტრის მოადგილის, ლადო მგალობლიშვილის განცხადებით სამინისტროში შეიქმნა სამუშაო ჯგუფი, რომელიც არსებულ მდგომარეობას შეისწავლის და გადაწყვეტილებას 22 იანვრამდე მიიღებს.  

 

კირთაძის პასუხი უმაღლეს საბჭოს და პასუხის პასუხი ავთანდილ ბერიძისგან

გიორგი კირთაძე, ბათუმის საკრებულოს თავმჯდომარე
გიორგი კირთაძე, ბათუმის საკრებულოს თავმჯდომარე

 

„ – მინდა გულწრფელად გითხრათ, რომ მსგავსი ტიპის არაკომპეტენტური წერილი  მუშაობის პრაქტიკაში პირველად ვნახე  თვითმმართველობაში შემოსული. წერილში მოყვანილი სწრაფად განსახორცილებელ ღონისძიებათა ნაწილი უკვე ხორცილედება ბათუმში, მაგრამ როგორც ჩანს მათ ამის შესახებ  ინფორმაცია არ აქვთ. ნაწილის განხორციელებისათვის ჩვენ დაახლოებით  მილიარდამდე ლარი  და რამოდენიმე წელი  გვჭირდება. მნიშვნელოვანი არის ის, რომ უმაღლესი საბჭოს თავმჯდომარეს და მის მეგობრებს ჯერ კიდევ ვერ გაურკვევიათ კომპეტენციები ვის რა ეხება.

 

 

თვითმმართველობას უგზავნიან სასწრაფოდ გადასაწყვეტად ისეთ თემებს, რომლებიც არ შედის თვითმმართველობის კომპეტენციაში და უფრო მეტად შედის მათ კომპეტენციაში. მაგალითად  გაზის საკითხი, რომელიც საქართველოს მთავრობასა და შესაბამის კომპანიას შორის გაფორმებული ხელშეკრულებით რეგულირდება. ასევე ენერგოპროსთან დაკავშირებულ პრობლემებზე, მინდა ვთხოვო, რომ  თვითონ დაინტერესდნენ, იმიტომ, რომ  მთავარი მაკონტროლებელი ამ ყველაფრისა არის ენერგეტიკის სამინისტრო. ასევე დაავიწყდათ, რომ ჯანდაცვის სამინისტრო აქვთ და როგორც წესი მათი განსახორციელებელია გარკვეული პროექტები.

 

 

იმას, რომ ბათუმში სწრაფად აშენდეს სტადიონი, დასრულდეს გზების მშენებლობა, კომუნიკაციების ბოლომდე გაიმართოს და ასე შემდეგ –  ამ ყველაფერს სჭირდება  ფინანსური რესურსი და დრო.  ამის მიუხედავად, ჩვენ მზად ვართ ვითანამშრომლოთ უმაღლეს საბჭოსთან, სადაც ქალაქის თვითმმართველობისა და აჭარის უმაღლესი საბჭოს ფუნქციები იკვეთება.  უბრალოდ მოვუწოდებთ, რომ იქნებ ცოტა უფრო მეტად კარგად ჩახედონ კანონს და ამის შემდეგ აგზავნონ წერილები ჩვენთან. ” – განაცხადა გიორგი კირთაძემ.

 

 

უმაღლესი საბჭოს თავმჯდომარის „სწრაფად განსახორცილებელ ღონისძიებათა“ ჩამონათვალი 23 პუნქტისგან შედგება და სხვადასსხვა სფეროებს შეეხება. მათ შორისაა  სადარბაზოებისა და სარდაფების მავნე მწერებისა და მრღნელების საწინააღმდეგო ხსნარით დაწამვლა, ნაგავსაყრელის ადგილმონაცვლეობა; მოზარდებისთვის ხერხემლის სვეტის დარღვევის მკურნალობის ხელშეწყობა და სხვა საკითხები.

 

 

„მე წერილი გავუგზავნე ქალაქ ბათუმის მერს და ბატონ ჯემალ ანანიძისგან ველოდები შესაბამის პასუხს. ტელევიზიით რა კომეტარი გაკეთდა ამის შესახებ, არ ვიცი, რადგან მისი გაცნობის დრო და საშუალება არ მქონდა, შესაბამისად ვერც კომანტარს ვერ გავაკეთებ. “ – ასეთი პასუხი გაგვცა ავთანდილ ბერიძემ  გიორგი კირთაძის განცხადებასთან დაკავშირებით თანაშემწის, გიორგი გორაძის დახმარებით. უშუალოდ ავთანდილ ბერიძესთან დაკავშირება ვერ შევძელით, ამის მიზეზი უმაღლეს საბჭოში მიმდინარე თანამშრომელთა ატესტაცია დაასახელეს.  

 

 

გიორგი კირთაძის თქმით კი ამ დღეებში უმაღლესი საბჭო მიიღებს პასუხს, რომელსაც თან ექნება დართული ის პროექტები, რომლებიც ქალაქში ხორციელდება  და ასევე „დეტალურად იქნება გაწერილი თუ რა ჯდება მათი ოცნებები.“

 

 

ახალი გამგებელი, საკადრო პოლიტიკა და დაძაბულობა ხელვაჩაურის მუნიციპალიტეტში

 „რაც ახალი გამგებელი მოვიდა, მისაღებში  მასთან შეხვედრის მსურველთა რიგები არ წყდება; უმეტესობა ქართული ოცნების ხელვაჩაურის საარჩევნო შტაბის ყოფილი ხელმძღვანელისგან წინასაარჩევნო დანაპირების შესრულებას, ანუ დასაქმებას ითხოვს;  მოდიან ადამიანები, კონკრეტულ თანამდებობებს ადებენ ხელს და ამბობენ: ეს ადგილი მე მინდა; ახალი გამგებელიც ძალიან ცუდ დღეში ჩავარდა, ქართული ოცნების კოორდინატორებმა მის კაბინეტში ერთი ამბავი ატეხეს, სამსახურებს თუ არ მოგვცემთ, აქედან არ გავალთო; ახალმა გამგებელმა კი ამაზე ისე ინერვიულა, წნევა აუწია და ცუდად გახდა;“ – ამ ყველაფერზე ხელვაჩაურის მუნიციპალიტეტის გამგეობის სამსახურებში საუბრობენ. ოღონდ არა დიქტოფონთან, მათგან უმეტესობა სწორედ ახლა, როცა „სამსახურის შენარჩუნების საკითხი ეჭვქვეშ დგას“, „ვინმეს თვალში ცუდად მოხვედრას“ ერიდება.     

 

 

 

ხელვაჩაურის გამგებლის ვაკანტურ თანამდებობაზე „ქართული ოცნების“  ხელვაჩაურის საარჩევნო შტაბის ყოფილი ხელმძღვანელი ლევან ლორთქიფანიძე ყოფილი გამგებლის გურამ საფარიძის გადადგომიდან მესამე დღეს, 31 დეკემბერს  დანიშნეს.  რიგგარეშე სხდომას, რომელზეც საკრებულოს წევრებმა გამგებლის თანამდებობაზე მისი კანდიდატურა განიხილეს, საკრებულოს 22 წევრიდან 17 ესწრებოდა. ლევან ლორთქიფანიძის დანიშვნას მხარი „ნაციონალურმა მოძრაობამაც“ დაუჭირა. არჩევნების შემდეგ ამ ფრაქციაში გაერთიანებულთა რიცხვი ათამდე შემცირდა.

 

 

 

ხელვაჩაურის საკრებულოს განათლების, კულტურის, სპორტისა და ტურიზმის კომისიის თავმჯდომარე მიშა ბოლქვაძე, რომელიც ასევე „ნაციონალური მოძრაობის“ ფრაქციის წევრია, „ბათუმელებთან“ საკადრო პოლიტიკის გამო გამგეობაში შექმნილი ვითარების შესახებ გავრცელებულ ინფორმაციას ადასტურებს. „სოციალური პროგრამების განხორციელების გარდა ქართული ოცნების კიდევ ერთი მნიშვნელოვანი დაპირება, რაც  ვფიქრობ არჩევნების მოგების ერთ-ერთი მიზეზია, იყო დასაქმება. ცხადია ახლა  მოაკითხეს მას იმ ადამიანებმა, რომლებსაც, როგორც შტაბის ხელმძღვანელი, არჩევნებამდე დასაქმებას პირდებოდა. იმისთვის კი, რომ გამოთავისუფლდეს ადგილები ამ ადამიანებისთვის, გამოდის რომ უკვე დასაქმებულები, რომლებიც წლებია მუშაობდნენ  და თავიანთი საქმის პროფესიონალები არიან, სახლებში უნდა გაუშვან, რასაც ჩვენ ვეწინააღმდეგებით, დანიშვნამდე მას შევხვდით და ვთხოვეთ, რომ მისი მხარდაჭერის შემთხვევაში პოლიტიკური ნიშნით ადამიანები სამსახურიდან არ გაეშვათ, რაზეც თანხმობა მივიღეთ. ამის შემდეგ ჩვენ მხარი დავუჭირეთ მის დანიშვნას, თუმცა როგორც ჩანს პირობა არ სრულდება. “

 

 

ახალი გამგებლის დანიშვნის დღესვე სამსახურიდან წასვლის თაობაზე განცხადებები გამგებლის სამივე მოადგილემ: ირაკლი სურმანიძემ, ლეონ თედორაძემ და თამაზ კარანაძემ დაწერეს. მოგვიანებით სამსახური საკუთარი განცხადების საფუძველზე დატოვა გამგებლის თანაშემწემ ჯაბა აბულაძემაც.  სამსაურიდან წასვლის თაობაზე განცხადებები უკვე დაწერეს მუნიციპალიტეტის თერთმეტივე თემის რწმუნებულებმაც,  თუმცა რწმუნებულების  მოთხოვნა ჯერ  არ დაკმაყოფილებულა და ისინი შესაბამისი ბრძანების მიღებამდე მოვალეობის შესრულებას აგრძელებენ. „ბათუმელები“  მათ ტელეფონით დაუკავშირდა:

 

 

 

ორთაბათუმის თემის რწმუნებული მერაბ ძნელაძე: „- ცუდი არაფერი გამიკეთებია, პატიოსნად ვემსახურებოდი ხალხს და არც არავისი მეშინია, თანამდებობა ჩემთვის არ არის მნიშვნელოვანი. თან ძალიან გადავიღალე. შევთანხმდით თემის რწმუნებულები, რომ ერთობლივად დაგვეწერა განცხადებები წავლაზე და ასეც მოვიქეცით. ზეწოლა მართლა არ გვქონია. ახლა მოვალეობის შემსრულებელი ვარ, მეტყვიან დარჩიო – დავრჩები , წადიო –  წავალ.“  

 

 

 

სარფის თემის რწმუნებული ირაკლი ვანაძე: „რატომ გადავწყვიტე? – მითხრეს დაწერეო და დავწერე. ვინ მითხრა მაგას რა მნიშვნელობა აქვს. მთავრობა შეიცვალა და უნდა წახვიდეთო.“

 

 

 

გავრცელებულ ინფორმაციას თანამშრომლების სამსახურებიდან გაშვების თაობაზე თავად გამგებელი, ლევან ლორთქიფანიძე არ ადასტურებს, თუმცა აცხადებს, რომ უახლოეს პერიოდში მომზადდება კონკურსი გამგეობაში თანამდებობების დასაკავებლად, მანამდე კი უკვე დასაქმებულებს სტატუსი შეეცვლებათ და კონკურსის გავლამდე ისინი  მოვალეობის შემსრულებლებად იმუშავებენ. 

 

რაც შეეხება მის ჯანმრთელობის მდგომარეობას, ლევან ლორთქიფანიძე ამბობს, რომ ეს მის კაბინეტში ვიზიტორთა რაოდენობას ან მათ მოთხოვნებს არ უკავშირდებოდა: „ვირუსი მქონდა და შეუძლოდ გავხდი, ისე კი მინდა გითხრათ, რომ უმეტესობა მოსალოცად მოდის და არა მოთხოვნებით. რაც შეეხება მათ, ვინც წასვლაზე განცხადება დაწერა, მე მათთვის არაფერი დამივალებია. პირიქით ვთხოვე რომ დარჩნენ და იმუშავონ.“  

 

ხელვაჩაურის საკრებლოს სხდომა

დავით ბაციკაძე: “აჭარის ტელევიზიამ უნდა იმაუწყებლოს, როგორც რეგიონულმა მაუწყებელმა”

„არასამთავრობოებს გამოკითხვაც აქვთ ჩატარებული ამასთან დაკავშირებით და საზოგადოების საკმაოდ დიდი ნაწილი ეთანხმება იმ პრინციპს, რომ აჭარის ტელევიზიამ უნდა იმაუწყებლოს, როგორც რეგიონულმა მაუწყებელმა“, –  განაცხადა დავით ბაციკაძემ.

საქართველოს პარლამენტის ვიცე-სპიკერმა მურმან დუმბაძემ პარლმანეტში კანონპროექტი აჭარის საზოგადოებრივი მაუწყებლის შექმნის შესახებ გასული წლის 11 დეკემბერს შეიტანა. ამ კანონპროექტის მიხედვით მაუწყებლობის შესახებ საქართველოს კანონში ცვლილებები უნდა შევიდეს და შეიქმნას აჭარის საზოგადოებრივი მაუწყებელი. ტელევიზია სახელმწიფო ბიუჯეტიდან დაფინანსდება. აჭარის საზოგადოებრივ მაუწყებელს 5 ადამიანისგან შემდგარი სამეურვეო საბჭო და დირექტორი უხელმძღვანელებს.

გარდა ამ კანონპროექტისა არსებობს  “კოალიაცია მედია ადვოკატირების” მიერ ინიცირებულ კანონპროექტი, რომლის მიხედვითაც აჭარის ტელევიზია საქართველოს საზოგადოებრივი მაუწყებლის მეოთხე არხად უნდა ჩამოყალიბდეს.

„ჩვენ ვეწინააღმდეგებით და  არ მოგვწონს ის კანონი რომლის ინიცირებასაც აპირებენ საქართველოს პარლამენტში. ვფიქრობთ, რომ როდესაც  გაცხადებულია ქვეყნის დეცენტრალიზაცია, ამას ეწინააღმდეგება ის, რომ აჭარის ტელევიზია დაემატოს მეოთხე არხად საქართველოს საზოგადოებრივ მაუწყებელს. არ ვეთანხმებით არც იმ პრინციპებს, თითქოს ორჯერ არ უნდა იხდიდეს ფულს, ესეც საკამათო თემაა, მაგ ლოგიკით მაშინ არც უმაღლესი საბჭო უნდა არსებობდეს და არც აჭარის მთავრობა, იმიტომ რომ ორჯერ გადახდილი ფული გამოდის. დეცენტრალიზაციის პირობებში ერთ მაუწყებელში მოქცევა, რამდენიმე  არხის და ერთი დიდი მონსტრის გაკეთება ჩვენთვის არის ყოვლად მიუღებელი. ვფიქრობთ, რომ აჭარის ტელევიზიამ ცალკე უნდა იმაუწყებლოს“, – აცხადებს დავით ბაციკაძე. 

დღესვე მედიასთან კომენტარი გააკეთა  მურმან დუმბაძემაც.

„ბატონი ზვიად ქორიძისა და ბატონი ლაშა ტუღუშის მიერ შემოტანილი პროექტი ამბობს, რომ  აჭარის ტელერადიო დეპარტამენტი უნდა გადაკეთდეს მაუწყებელ არხად,  დაახლოებით ისეთი ტიპის არხი უნდა იყოს, როგორიც არის საზოგადოებრივი მაუწყებელი, მაგრამ ეს უნდა ამოვიდეს  ცენტრალურ დონეზე, მისი ქონება, ფინანსების მართვა ყველაფერი უნდა გადაეცეს საზოგადოებრივ მაუწყებელს. ანუ ზოგადად ვერ ამბობენ ამას ღიად, მაგრამ ის უნდა გახდეს საზოგადოებრივი მაუწყებლის ფილიალი. აჭარის ავტონომიური რესპუბლიკის  უმაღლეს საბჭოში 21 დეპუტატი მუშაობს. ეს არის ერთადერთი საკითხი, სადაც როგორც უმცირესობა ისე უმრავლესობა შეთანხმებული არიან იმაზე, რომ აჭარაში ჩამოყალიბდეს რეგიონული მაუწყებელი.

 მარტივი პროცედურა არის ჩასატარებელი, საზოგადოებრივ მუწყებლის შესახებ კანონში ერთი წინადადება უნდა ჩაიწეროს, რომ საქართველოს სახელმწიფო უშვებს საზოგადოებრივი მაუწყებლის არსებობას და ქვეყანაში შეიძლება არსებობდეს რეგიონალური მაუწყებლები. მაგალითად აფხაზეთის მაუწყებელი. თუ რეგიონალური მაუწყებლები იარსებებენ, თუ ქვედა დონის ჟურნალისტები იარსებებენ, თუ ფინანსები იარსებებს, თუ რეგიონები ამას მოუვლიან, დაე მოუარონ“, – განაცხადა მურმან დუმბაძემ.

აღსრულების ეროვნული ბიუროს სემინარი ჟურნალისტებისათვის

აღსრულების ეროვნული ბიურო დასავლეთ საქართელოში მოქმედი მედია-საშუალებების ჟურნალისტებისათვის მედია სემინარს მართავს.

 

17 იანვარს, ხუთშაბათს, 16.00სთ.-ზე სსიპ აღსრულების ეროვნული ბიურო ევროკავშირის პროექტის- “დაძმობილების პროექტი სააღსრულებო სისტემის გაუმჯობესებისთვის”, მხარდაჭერით სააღსრულებო თემაზე მედია-სემინარს მართავს.

 

 

მედია სემინარის მიზანი ქართული მედიისთვის სააღსრულებო სისტემის, აღსრულების ეროვნული ბიუროს მიერ საზოგადოებისთვის შეთავაზებული სერვისებისა და ყველა იმ სიახლის გაცნობაა, რომელიც ბიუროში უკანასკნელი პერიოდის განმავლობაში განხორციელდა.

 

 

მედია-სემინარზე წარმოდგენილი იქნება პრეზენტაციები შემდეგ საკითხებზე:

 

 

• აღსრულების ეროვნული ბიურო;
• სააღსრულებო წარმოება ყოველდღიურ პრაქტიკაში;
• აღსრულების ეროვნული ბიუროს თანამშრომელთა ქცევის კოდექსი;
• გამარტივებული წარმოება;
• ფაქტების კონსტატაცია;
• კერძო აღმასრულებელთა საქმიანობის თავისებურებანი;
• ელექტრონული აუქციონი.



მედია-სემინარის მსვლელობის დროს დამსწრე ჟურნალისტებს საშუალება ექნებათ მათთვის საინტერესო თემებზე დასვან შეკითხვები და მიიღონ ამომწურავი ინფორმაცია აღსრულების ეროვნული ბიუროს, სააღსრულებო პროცესისა და ბიუროს მიერ მოსახლეობისთვის შეთავაზებული ახალი სერვისების შესახებ. მედია სემინარი ბიზნეს ვახშამით დასრულდება.

 

 

მისამართი: ქ. ბათუმი, ხიმშიაშვილის ქ. N7, იუსტიციის სახლის სადემონსტრაციო დარბაზი.



 

მომზადებულია პრესრელიზზე დაყრდნობით.

204 ათასი ადამიანი მახათას მთაზე ტაძრის მშენებლობის მხარდასაჭერად

„ამ ტაძრის მშენებლობის ტემპი იქნება დამოკიდებული იმაზე, თუ რამდენი ადამიანი გადარიცხავს შესაბამის ფონდში შემოწირულობას, ჩვენ მას ვერც შევანელებთ და ვერც დავაჩქარებთ“ – განაცხადა პაატა ბურჭულაძემ ჟურნალისტებთან საუბრისას შეხვედრის დასრულების შემდეგ. შეხვედრაზე კი მან დარბაზში მყოფებს დეტალურად მიაწოდა ინფორმაცია იმის შესახებ, თუ როგორ შეიძლება სპეციალური ბლანკის საშუალებით მშენებლობის დაფინანსებაში საკუთარი წვლილის შეტანა. ამ ბლანკის შევსებით პირი ადასტურებს თანხმობას წინასწარ მითითებული ვადის განმავლობაში ჩამოეჭრას გარკვეული თანხა სახელფასო შემოსავლიდან.

შეხვედრას აჭარის მთავრობის თავმჯდომარე არჩილ ხაბაძე, უმაღლესი საბჭოს თავმჯდომარე ავთანდილ ბერიძე, უმაღლესი საბჭოს კომისიების თავმჯდომარეები და სხვა წევრები, ასევე მთავრობის სხვა წარმომადგენლები და კერძო კომპანიების წარმომადგენლებიც ესწრებოდნენ.

პეტრე ზამბახიძე, კაკო ძნელაძე, ავთანდილ ბერიძე

არჩილ ხაბაძის თქმით, ის ამ პროეტის დაფინანსებაში მონაწილეობას „ქართუ ბანკიდან“ ცდილობდა, ბოლო ორი თვის განმავლობაში კი, რაც სამსახური შეიცვალა, შეწირულობა არ გაუკეთებია: „დღეიდან მთავრობის აპარატი, სურვილის შესაბამისად, ამ საქმეში ისევ ჩავერთვებით. მთავარია ასევე ამ პროცესში ჩაერთოს ბიზნეს სექტორი, ეს შეხვედრაც ამას ისახავდა მიზნად.“

ბათუმიდან უკვე გადარიცხულ სოლიდურ შეწირულობებზე საუბრისას პაატა ბურჭულაძემ  ბანკი „ქართუ“, რომელის აჭარის ფილიალს არჩილ ხაბაძე ხელმძღვანელობდა და კომპანია „ტექნო-ბუმი“ დაასახელა.

შეხვედრაზე ითქვა, რომ სახალხო აქციაში, რაც მშენებლობაში საკუთარი წვლილის შეტანის შესაძლებლობას ყველა მსურველს აძლევს, ამ დროისათვის 204 000 ადამიანია გაწევრიანებული.

რაც შეეხება მშენებლობის პროცესს, უკვე დასრულებულია საძირკვლის ამოყვანა. მახათას მთაზე დამონტაჟებული ვიდეოკამერის საშუალებით კი  ყველა მსურველს შეუძლია თვალი ადევნოს მშენებლობის პროცესს ფონდის ვებ გვერდზე ( მახათა . გე)

შეხვედრის დასკვნით ნაწილში „რედისონის“ დარბაზში მოწვეულ სტუმრებს აჩვენეს ოთარ ლითანიშვილის დოკუმენტური ფილმი  „ღირს არს ჭეშმარიტად“, რომელიც ათონის მთის მონასტერს „ივერონსა“ და მახათას მთის კომპლექსის მშენებლობას შეეხებოდა.

ჰესების მშენებელი კომპანია მოსახლეობას და საჯარო რეესტრს უჩივის

 „საერთაშორისო გამჭვირვალობა საქართველოს“ ბათუმის ორგანიზაციის ხელმძღვანელი ირინე ურუშაძე თავად გაეცნო იმ სარჩელებს, რომლებიც დღეს სოფელ აჭარისწყლის მოსახლეობამ მიიღო. ორგანიზაცია სასამართლო პროცესზე მოქალაქეების ინტერესებს დაიცავს.

„იმ სარჩელების თანახმად, რომლებიც   მესაკუთრეებს  ჩააბარეს, „აჭარ ენერჯი 2007“, რომელიც აშენებს ჰესებს,  მესაკუთრეებსა და საჯარო რეესტრს უჩივის.

2012 წლის ზაფხულში, წინასაარჩევნო პერიოდში, საჯარო რეესტრმა სპეციალური დადგენილების საფუძველზე, უფასოდ დაურეგისტრირა ნაკვეთები მოსახლეობას.  ამავე დადგენილების საფუძველზე  დაირეგისტრირეს ნაკვეთები აჭარისწყლის თემშიც.

კომპანია „აჭარ ენერჯი 2007″ -მა  ჰესების მშენებლობა რომ გააგრძელოს, უნდა იყოს ამ მიწის ნაკვეთების მესაკუთრე, ახლანდელი მესაკუთრეები  კი უარს ეუბნებიან ნაკვეთების მიყიდვაზე, რადგან პირობებზე ისინი ვერ შეთანხმდნენ.

ამის გამო „აჭარ ენერჯი 2007“ -მა მესაკუთრეებს უჩივლა სასამართლოში, რათა გააუქმოს მათ მიერ რეგისტრირებული მიწის ნაკვეთები.  ასეთი რამ შეიძლება მოხდეს იმ შემთხვევაში, როცა მომჩივანს აქვს რაღაც უფლება მიწის ნაკვეთზე და ეს ნაკვეთი არის სხვის საკუთრებაში.

„აჭარ ენერჯი 2007“  უჩივის როგორც მესაკუთრეს, ასევე საჯარო რეესტრს.  სარჩელის თანახმად კომპანია მესაკუთრე არ არის და ამაზე პრეტენზიას არც აცხადებს, მაგრამ ამბობს: მე უნდა ვაშენო ჰესი, მაქვს აღებული ვალდებულება, მაგრამ ვერ ავაშენებ თუ ვერ ვიყიდე ნაკვეთები. კომპანია აცხადებს, რომ ვერ იყიდის ამ ნაკვეთებს მოსახლეობისგან და უფრო მარტივად იყიდის სახელმწიფოსგან. ეს არგუმენტია საჩივარში მითითებული.

დღეს შეხვედრაზე კომპანიის წარმომადგენლებმა უთხრეს მოსახლეობას, თქვენი რეგისტრაცია არ არის სრულყოფილი და შესაბამისად, თქვენგან ნაკვეთების შესყიდვის შესაძლებლობა არ გვაქვსო.  რეალურად სარჩელში არსად არ არის მითითებული, რომ რეესტრმა რომელიმე შესყიდული ნაკვეთის რეგისტრაციაზე უარი უკვე თქვა.

კომპანია მოსახლეობას ეუბნება: ან ჩვენ მოგიგებთ დავას, ან გაასწორეთ რეგისტრაცია და  თქვენგან შევისყიდით ამ ნაკვეთებს. რაში მდგომარეობს რეგისტრაციის გასწორება  – ჩვენთვის ეს ჯერჯერობით გაუგებარია, ახლა ვსწავლობთ საქმეს და სამართლებრივად სრულყოფილად ჯერჯერობით ვერ შევაფასებთ პროცესს. ერთადერთი შეიძლება განვიხილოთ შესაძლებლობა, როდესაც  რეგისტრაცია გაკეთებულია ელექტრონული ნახაზის გარეშე. ყველა საქმეს  არ ვიცნობთ ჯერჯერობით, მაგრამ რასაც უკვე გადავხედეთ, თითქმის ყველას აქვს გაკეთებული ელექტრონული ნახაზი.

ჯერჯერობით, სანამ ბოლომდე არ შევისწავლით საქმეს, ძნელია იმის თქმა, რომ „აჭარ ენერჯი 2007″ -ის სარჩელი უსაფუძვლოა, მაგრამ პირველადი შეფასებით, კომპანია, როგორც მინიმუმ, არ არის მართალი,  პლიუსი არის ის, რომ კომპანია მზადაა მოლაპარაკებები აწარმოოს მოსახლეობასთან.

რეჟისორი ზაზა ხალვაში თეატრიდან წავიდა

 

„ახალი დირექტორი გახდა ჩემი მოადგილე, თემურ კეჟერაძე. მე შემოქმედებით გეგმები მაქვს. ახლა ვიღებ მხატვრულ ორსაათიან ფილმს და ვიმყოფები გადაღებაზე. ფილმი ეხება ადამიანებს, რომელიც დაავიწყდა საზოგადოებას. ფილმი ორ-სამ თვეში დასრულდება. მაქვს ასევე შემოთავაზება უკრაინულ-აზერბაიჯანული კომპანიისგან თექვსმეტ სერიანი ფილმის გადაღებაზე. ამ ფილმს რომ მოვრჩები მერე დავიწყებ ახალს. ფილმს ჩემი უკრაინელი ქართველი მეგობრები აფინანსებენ“.   – განაცხადა რეჟისორმა.

 

ზაზა ხალვაში ბათუმის ილია ჭავჭავაძის სახელობის დრამატულ თეატრს 2007 წლიდან ხელმძღვანელობდა.  სხვადასხვა პერიოდში მუშაობდა „ქართულ ფილმში” დამდგმელ რეჟისორად, ბათუმის ხელოვნების სახელმწიფო ინსტიტუტში კათედრის გამგედ, აჭარის ტელერადიო დეპარეტამენტის თავმჯდომარედ, აჭარის კურორტებისა და ტურიზმის დეპარტამენტის თავმჯდომარის მოადგილედ და აჭარის მაღალმთიანი რაიონების რესურსცენტრის უფროსად. 

სასამართლო ნაკვეთების წინასაარჩევნოდ რეგისტრაციის კანონიერებაზე იმსჯელებს

აჭარისწყალში მცხოვრები რეზო დიასამიძის ინფორმაციით, დოკუმენტში, რომელიც მოსახლეობამ სასამართლოდან მიიღო, მითითებულია, რომ თუ ისინი სარგებლობაში არსებულ ნაკვეთებს არ გაიფორმებენ, ამ ნაკვეთებს სახელმწიფო „აჭარ ენერჯი 2007“-ს გადაუფორმებს, ეს ის კომპანიაა, რომელიც მდინარე ჭოროხზე ორი კალაპოტური ტიპის ჰიდროელექტროსადგურის მშენებლობას აწარმოებს.

„ვიცოდით, რომ ნაკვეთები უფასოდ წინასაარჩევნოდ ხალხის გულის მოსაგებად გააფორმეს ნაციონალებმა და ეს საკუთრების დოკუმენტი მხოლოდ ფარატინა ქაღალდი იყო და ისიც ვიცით, რომ ჩვენი ნაკვეთები ინვესტორს აჩუქეს, მაგრამ მაინც არ დავუთმობთ“ – ასეთი პოზიცია აქვს სოფლის მოსახლეობას.

„ბათუმელებთან“ სატელეფონო საუბარში ხელვაჩაურის საკრებულოს საკუთრების უფლების აღიარების კომისიაში განაცხადეს, რომ წინასაარჩევნოდ ნაკვეთების უფასოდ გაფორმება არ უწარმოებიათ და არც ამ რეგისტრაციის გაუქმებასთან აქვთ რაიმე კავშირი.

საჯარო რეესტრის ბათუმის ორგანიზაციის ხელმძღვანელმა ირაკლი არჩელიამ კი წინასაარჩევნოდ მიწის ნაკვეთების უფასოდ რეგისტრაციის აქციის შესახებ ინფორმაცია დაადასტურა, თუმცა რეგისტრაციის გაუქმების შესახებ გადაწყვეტილება უარყო: „ ამასთან ჩვენთან  კავშირი არ აქვს.“

აჭარისწყლის თემის სოფელ მირვეთის მოსახლეობა

მაისიდან ბათუმში საცხენოსნო კლუბი ამოქმედდება

 

 

საცხენოსნო კლუბის მოწყობა ადლიის დასახლებაში, აჭარის საცხენოსნო მეურნეობის ტერიტორიაზე  უკვე დაწყებულია და მაისის თვეში დასრულდება.

 

საცხენოსნო კლუბის ერთ-ერთი დამფუძნებლისა და „აიპის“ ხელმძღვანელის ირაკლი ნაცვლიშვილის თქმით საცხენოსნო კლუბის ტერიტორიის რეკონსტრუქციის გარდა  მიღებული დაფინანსებით დამფუძნებლები ე.წ. სამკურნალო „რაიდ“ თერაპიის ჩამოყალიბებას, ტურისტული მარშრუტების შემოშავებას და სპორტული ცხენების შესყიდვას გეგმავენ.   

 

საცხენოსნო კლუბით სარგებლობა უფასო  იქნება 14 წლამდე ასაკის ბავშვებისთვისა და სოციალურად დაუცველებისთვის. დაინტერესებული პირისათვის კი ყოველთვიურად სააბონენტო გადასახადი 100-დან 200 ლარამდე იქნება. პაკეტში სწავლება ჯირითი და ცხენით  გასეირნება შევა.

 

უმაღლესი საბჭოს ძველი თანამშრომლები ზეპირ ტესტირებას გაივლიან

აპარატის საზოგადოებასთან ურთიერთობის სამსახურის უფროსი ნინო გრძელიძე „ბათუმელებთან“  საუბარში აცხადებს, რომ „ტესტირების კომისია არაობიექტურია და შედეგები წინასწარვეა ცნობილი“: 

 

 

 

„ეს კომისია რომ არაობიექტური და ტენდენციური და ტესტირებაც მხოლოდ იმიტომ ტარდება, რომ ძველი თანამშრომლები გაუშვან სამსახურიდან. ამაზე ისიც მეტყველებს, რომ დარღვეულია პარიტეტი და კომისიაში უმცირესობის არც ერთი წარმომადგენელი არ არის. არც არასამთავრობოებია წარმოდგენილი. გასაუბრება ხდება ზეპირი სახით, ანუ არ ქმნიან დოკუმენტს, რომ პრეტენზიის შემთხვევაში შეედავო. ეს კიდევ უფრო მიღრმავებს ეჭვს, რომ კონკრეტული ადამიანებისგან სურთ გაათავისუფლონ უმაღლესი საბჭო. ძველ თანამშრომლებზე და მათ შორის ჩემზეც ფსიქოლოგიური ზეწოლა პოლიტიკური ნიშნით  ხორციელდება“.  

 

 

 

უმაღლესი საბჭოს აპარატის უფროსის რამაზ ბოლქვაძის განმარტებით, ტესტირების ზეპირ ფორმას კანონი ითვალისწინებს: „ზეპირი გასაუბრება დასაშვებია   პრეზიდენტის ბრძანებულების საფუძველზე“.  

 

 

 

უმაღლეს საბჭოში ახალი პრესსამსახური  ფუნქციონირებას ოფიციალურად 1 თებერვლიდან დაიწყებს. ამ დროისთვის კი ფუნქციონირებას შეწყვეტს საზოგადოებასთან და მასმედიასთან ურთიერთობის განყოფილება, რომლის ხელმძღვანელიც პირველ თებერვლამდე ნინო გრძელიძეა. იგი ამ თანამდებობაზე ორი მოწვევის უმაღლეს საბჭოში მუშაობდა. ამ განყოფილებაში სულ სამი ადამიანი მუშაობდა.

 

  

 

ახალ პრესსამსახურს „ინფო 9“-ის ყოფილი ჟურნალისტი მარინე კუპრეიშვილი უხელმძღვანელებს, რომელიც საინფორმაციო სააგენტო „ინფო-9“-ში მუშაობამდე ბათუმის მერიის დაფინანსებაზე არსებულ გაზეთში – „ბათუმურ ქრონიკებში“ მუშაობდა.

 

 

 

 

მარინე კუპრეიშვილის გარდა ახალშექმნილ პრესსამსახურში „ქართული ოცნების“ აქტივისტები კობა ადეიშვილი და ვახტანგ თავბერიძე იმუშავებენ, რომლებიც ნინო გრძელიძის განცხადებით, არჩევნების პერიოდში კოალიციის შტაბში მუშაობდნენ და, ასევე, გაზეთ „აჭარას“ ყოფილი ჟურნალისტი, მანანა მიქელაძე.   

 

სტატიის თავდაპირველი ვერსია შეცვლილია. 

 

 

ბათუმში ღამით მოხალისეების ჯგუფი მიუსაფარ ადამიანებს დაეხმარება

ამ წუთებში მოხალისეების ჯგუფი ბათუმში არსებული უსახლკარო ადამიანებისთვის განკუთვნილ, კათოლიკური ეკლესიის მფარველობის ქვეშ მყოფ ღამის თავშესაფრში იმყოფება, სადაც ღამის გასათევად მისულ 24 ადამიანს გადასცემენ თბილ ტანსაცმელს. შეგროვებული ნივთების ტრანსპოტირებას და მოხალისეთა ჯგუფის გადაადგილებას ბათუმის მერია უზრუნველყოფს.

მოხალისეთა ჯგუფი გათენებამდე დარჩება ქუჩებში, რომ ღია ცისქვეშ დარჩენილი ადამიანები თბილი ტანსაცმლითა და საკვებით უზრუნველყონ და  ღამის თავშესაფარში გადაიყვანონ. დღეს ბათუმში ცივი ამინდია, თოვლ-ჭყაპი, სწორედ ასეთ ამინდში 2011 წელს ბათუმის ქუჩებში ორი ადამიანი გარდაიცვალა სიცივისაგან.

მოხალისეთა ჯგუფის წევრები არიან ბათუმის შოთა რუსთაველის უნივერსიტეტის სტუდენტები: ედო მჟავანაძე, გოჩა სურგულაძე და აჭარის უმაღლესი საბჭოს დეპუტატი სვეტა კუდბა, რომელიც წლების მანძილზე საქველმოქმედო ორგანიზაციასა და უფასო თავშესაფარს ხელმძღვანელობდა. მოხალისეებს თან ახლავთ ბათუმის რესპუბლიკური საავადმყოფოს ექთანი ელენა შუმსკაია,  რომელიც საჭიროების შემთხვევაში სამედიცინო და მედიკამენტოზურ დახმარებას გაუწევს მიუსაფარ ადამიანებს.

მოხალისეთა ჯგუფი აპირებს ზამთრის ცივ ამინდებში ბათუმის ქუჩებში იმორიგეონ და სხვა ადამიანებსაც მოუწოდებენ, შეუერთდნენ აქციას, რომლის მიზანია უსახლკარო ადამიანების დახმარება.

მოხალისეებმა დღეს აქციის ფარგლებში 429 ლარი შეაგროვეს, შეგროვებული თანხით ისინი მედიკამენტებისა და საკვების შეძენას გეგმავენ უსახლკაროდ დარჩენილი და უკიდურესად ღარიბი ადამიანებისათვის.

შეგახსენებთ, რომ ბიუჯეტიდან დაფინანსებული უსახლკაროთა თავშესაფარი საქართველოში არ არსებობს. ბათუმში უსახლკარო ადამიანები, ძირითადად, ქუჩაში ან დანგრეულ შენობებში ათევენ ღამეს. ბათუმში ორი თავშესაფარია, მართლმადიდებლური ეკლესიის დაფინანსების ქვეშ მყოფი  „სავანე” და კათოლიკური ეკლესიის მფარველობის ქვეშ არსებული თავშესაფარი, სადაც ღამის გათევა საბუთების არმქონე ადამიანებსაც შეუძლიათ. ორივე თავშესაფარში ადგილების სიმცირეზე საუბრობენ.

2013 წელს ბათუმის მერია უფასო ღამის თავშესაფრის გახსნას გეგმავდა, თუმცა, როგორც მერიაში აცხადებენ, ქალაქის შემცირებული ბიუჯეტის გამო, თავშესაფარის დაფინანსება ვერ მოხდება.

შეგროვებული თანხა

თბილი ტანსაცმელი

ხვალ – დავეხმაროთ მიუსაფარ ადამიანებს

ბათუმში 100-მდე ადამიანს არ აქვს თავშესაფარი, ეს ადამიანები დღევანდელ სუსხშიც ქუჩაში ათევენ ღამეს.

 

გასულ წლებში სწორედ ამ მიზეზით ორი ადამიანი გაიყინა ქუჩაში და გარდაიცვალა.

 

ჟურნალისტების ერთმა ჯგუფმა გადაწყვიტა, მიუსაფარი ადამიანებისთვის ხვალ, 10 იანვარს, შეაგროვოს თბილი ტანსაცმელი, ფეხსაცმელი, პლედები, ფული. შეგროვილი ნივთები გადაეცემა ბათუმში არსებულ თავშესაფარს, სადაც მიუსაფარი ადამიანები შეძლებენ სველი ტანსაცმლის გამოცვლას.

 

თბილი ტანსაცმელი შეგიძლიათ მოიტანოთ ბათუმში, აჭარის მთავრობის ოფისის წინ.

 

ჟურნალისტებს ვთხოვთ ამ აქციის გაშუქებას, რათა მაქსიმალურად ბევრმა ადამიანმა შეიტყოს აქციის შესახებ.

 

შეკრება დაიწყება 14:00 საათიდან.

არ მინდა ადამიანები ჩემი ქალაქის ქუჩებში იყინებოდნენ

ჩემმა პროდიუსერმა ეს ამბავი მნიშვნელოვნად ჩათვალა და დილით პირდაპირი ჩართვა მთხოვა ადგილიდან, სადაც, სავარაუდოდ, ამ წლის ბოლოს უსახლკარო 90-მდე ადამიანი ღამეს გაათევდა; პირდაპირი ჩართვა მქონდა იმ ადგილიდან, სადაც ადრე ბავშვთა სახლი იყო. მერიის პროექტით, ეს შენობა უნდა გადაკეთებულიყო ისე, რომ ყველა ოთახს სველი წერტილი ჰქონოდა. ანუ აქ იგეგმებოდა თავშესაფარის მოწყობა, მიუსაფარ ადამიანებს ზამთარში სითბოში რომ ეცხოვრათ, დღეში სამჯერადი კვებით. წინასწარი გაანგარიშებით პროექტს ბათუმის მერია აფინანსებდა; მაშინ ზუსტი ბიუჯეტის დადგენაზე მუშაობდნენ.

 

რამდენიმე დღის წინ კი ბათუმის მერმა ბრიფინგი გამართა: თემა ბათუმის ბიუჯეტის შემცირება; მერმა დაასახელა პროექტები, რომლებიც ამ წელში იყო დაგეგმილი, მაგრამ ვეღარ გაკეთდებოდა, რადგან ბათუმის ბიუჯეტი შემცირდა… მჯეროდა, რომ ბიუჯეტის შემცირება მაინცადამაინც მიუსაფარ ადამიანებს არ შეეხებოდა, რადგან ყველაზე მნიშვნელოვანი, პირადად მე, ეს  პრობლემა მგონია. მაგრამ აღმოჩნდა, რომ ვცდებოდი – სწორედ თავშესაფარის დაფინანსებაზე თქვა მერიამ უარი. მიზეზად ბათუმის ბიუჯეტის შემცირება დაასახელეს.

 

მე მაინტერესებს, რატომ არ შეიძლება მერიამ შარშან მორჩენილი თითქმის 20 მილიონიდან დააფინანსოს ერთი პატარა თავშესაფარი ბათუმში… ჩემი აზრით, ჩემს ქალაქს შეუძლია მაქსიმუმ ასამდე ადამიანისთვის თავშესაფარის მიცემა, თუნდაც ისეთ საშინელ სუსხში, როგორიც დღესაა ბათუმის ქუჩებში.

 

ამ ქვეყნად მართლა ყველაზე მნიშვნელოვანი ხომ ადამიანის სიცოცხლეა… აღარ მინდა ჩემს ქალაქში,  ქუჩაში, ადამიანები იყინებოდნენ და ისე იხოცებოდნენ. ნუთუ ეს ასე ბევრია.

 

დავეხმაროთ სიცივეში დარჩენილ ადამიანებს

დაახლოებით 2011 წლის მიწურულს, როცა უკვე აცივდა, ქალაქ ქობულეთში სახანძროს მახლობლად პატარა „ბუტკაში“ ბებია ცხოვრობდა. ქალაქში ბევრმა იცოდა ამ ადამიანის შესახებ – ბევრი საკვებსაც აძლევდა. მას საცხოვრებელში არც დენი ჰქონდა და არც წყალი, იმდენად პატარა იყო, რომ საწოლი ეტეოდა მხოლოდ, არც ღუმელი ჰქონდა და რომც ჰქონოდა შეშას ვერ ნახავდა. ალბათ ამიტომაც მრავლად ჰყავდა ძაღლი მეგობრები, რომლებიც ეხუტებოდნენ და ათბობდნენ.

 

გადავწყვიტე რამენაირად დავხმარებოდი ამ ქალს და დავიწყე ინფორმაციის მოძიება თუ როგორ შემეძლო ამის გაკეთება. სოციალურ ქსელში ვნახე ახალშექმნილი ფონდის – „ბორანის“ განცხადება. ის ისეთი ხალხის დახმარებას იწყებდა, ვისაც მსგავსი პრობლემები ჰქონდა. 2012 წლის თებერვალში მივწერე წერილი ამ ქალის შესახებ, მაგრამ, სამწუხაროდ, ჩემმა წერილმა დააგვიანა, ისე როგორც ამ წერილზე პასუხმა. ეს ბებო გაყინული იპოვეს თავის პატარა „ბუტკაში“, ცხოველების სითბო არ ეყო გადასარჩენად…

 

ამ ქალის სიკვდილში ნაწილობრივ მეც ვარ დამნაშავე და თითოეული ჩვენგანი.

 

ხშირად გვიყვარს ქართველებს იმის თქმა, რომ ჩვენზე კარგი ერი არ არსებობს და ჩვენ ვართ რაც ვართ. როცა თავს ადამიანს ვუწოდებთ, იქნებ ამ სიტყვაზე გვიღირს დაფიქრება. ბათუმში, და არამხოლოდ ბათუმში, ბევრია ისეთი ადამიანი, ვისაც სჭირდება დახმარება, მაგრამ ყურს არ ვუგდებთ მათ პრობლემას. ბათუმში ბევრჯერ მინახავს ადამიანს, როგორ სძინავს მაღაზიის ვიტრინასთან ან კიდე სადმე…

 

ერთი თვის წინ დავიწყე ფიქრი თუ როგორ შემეძლო მათი დახმარება, ვიფიქრე და მივხვდი, რომ ეს იოლი არ იქნებოდა. მეგობართან ერთად მივედი მერიაში, სადაც გავესაუბრეთ ადამიანს, რომელსაც ეხებოდა ეს ყველაფერი. საუბარი არც თუ ისე სასიამოვნო იყო, რადგანაც რაც გვინდოდა ის ვერ მოვისმინეთ. გვითხრეს, რომ სახელმწიფო აფინანსებს  მხოლოდ იმ ხალხის კვებას, ვისაც გააჩნია მოქალაქეობა ან რაიმე დამადასტურებელი საბუთი. ვისაც არანაირი დოკუმენტი არ გააჩნია, ისინი არ ითვლებიან ადამიანებად საქართველოში.

 

იმედგაცრუებული წამოვედით მერიიდან, მაგრამ იმედი მაინც არ დაგვიკარგავს. თბილისში ასეთ ადამიანებს უყიდეს ეგრეთ წოდებული „პალატკები“, რაც მოყინვისგან დაიცავს გარკვეულ რაოდენობას თბილისში უსახლკარო ხალხის, მაგრამ ბათუმში ეს საფრთხე  ბევრ უსახლკაროს ემუქრება…

 

ჩემ გულის ტკივილს სიტყვებით ვერ გადმოვცემ, ასე რომ მოკლედ დავწერ:  მინდა დავეხმარო ამ ხალხს და ყველაფერს გავაკეთებ ამისათვის, რაც საჭირო იქნება, კეთილი ხალხია ბევრია საქართველოში, ყოველთვის იყო და იქნება. მჯერა თქვენი – ვინმეს თუ რაიმე იდეა გაქვთ ან რამენაირად შეგიძლიათ ამ საქმეში დახმარება, ძალიან გთხოვთ შემომიერთდით.

 

ცოტა ხანში მექნება პროექტი სახელწოდებით – „ხელი ხელს“, რომელშიც გაწერილია  გრძელვადიანი პროექტი ამ ხალხთან დაკავშირებით. ეს მომავლის გეგმებია ახლა კი რაღაც ისეთი უნდა გავაკეთოთ, რაც მათ ამ ზამთარს გადაატანინებს.

 

ყველას დიდ მადლობას გეტყვით დახმარებისთვის. ჩვენთან არს ღმერთი.



ედო მჟავანაძე, ბათუმის უნივერსიტეტის სტუდენტი


ედო მჟავანაძე
ედო მჟავანაძე

„ჩემი მუზა? – შეგიძლიათ მტრებით დაიწყოთ”

პირველ რიგში გთხოვთ გვიამბოთ თქვენს შესახებ, რადგან მკითხველების ნაწილი მეტ–ნაკლებად გიცნობთ, ნაწილი კი ამ ინტერვიუს საშუალებით გაგიცნობთ.

 

თბილისში გავიზარდე და დავიბადე.  ბაღი იქ დავამთავრე. მაშინ ოჯახში ძალიან გვიჭირდა და ამის გამო ქალაქ ბათუმში გადმოვედი საცხოვრებლად. ძალიან ჩუმი და წყნარი ბავშვი ვიყავი, თუმცა ძალიან პატარა ასაკიდან გამიჩნდა ჩემი სამშობლოს, გერმანიის სიყვარულის გრძნობა.  

 

აქ გადმოსვლისთანავე ბათუმის სასულირო გიმნაზიაში დავიწყე სწავლა, შემდეგ კი ნომერ პირველ საჯარო სკოლაში გავაგრძელე.  ერთ დღეს ლექსის წერის ნიჭიც აღმოვაჩინე ჩემში. სიმართლე გითხრათ პოეზია არ მიყვარდა, თუმცა სულ მქონდა იმის სურვილი, რომ რაღაც მეწერა. მეგობრებმა გიორგი გაბაიძის ლიტერატურულ კლუბში გაწევრიანება შემომთავაზეს, სადაც უამრავი წარმატება მოვიპოვე და ძალიან დავიხვეწე შემოქმედებითი მხრითაც.

 

პირველი პოეზიის საღამო 2011 წლის წლის 10 ოქტომბერს მქონდა პრესკაფეში, რომელსაც ძირითადად სამეგობრო წრე ესწრებოდა. შემდეგ უამრავი საღამო გავიარე და ასეც გრძელდება. გადმომცეს ზურაბ გორგილაძისა და ფრიდონ ხალვაშის ოქროს დიპლომი. ამ ნაბიჯების გადადგმის შემდეგ კი თავად გავხდი პირველი საჯარო სკოლის ლიტერატურული კლუბის ხელმძღვანელი, სადაც ამავე წლის 25 ნოემბერს, ჩემი ხელმძღვანელობითა და ორგანიზებით ჩავატარე ტერენტი გრანელის იუბილესთან დაკავშირებული  საღამო.

 

 

იქნებ გვიამბოთ თქვენი ლიტერატურული კლუბის შესახებ?

 

 

ჩვენი ლიტერატერატურული კლუბი წლებია რაც ჩამოყალიბდა. აქამდე მას სათავეში ლევან დევაძე და მალხაზ რეხვიაშვილი ედგნენ, რომლებმაც კლუბს დიდი წარმატება მოუპოვეს. მათი დამსახურებით კლუბმა ორი პროექტი მოიგო და უამრავი ღონისძიება ჩაატარა. რაც შეეხება კლუბის ახალნადელ მდგომარეობას, მოგახსენეთ,  რომ ხელმძღვანელი მე გახლავართ და საღამოს ჩატარებაც მოვასწარით.   

 

 

ახლა კლუბის ახალ პროექტზე ვმუშაობთ. კლუბში განახლდა ყოველკვირეული შეხვედრები. მაქვს გეგმა, ჩავატაროთ კიდევ რამოდენიმე საღამო წლის განმავლობაში. ასევე ვმუშაობთ, რომ კლუბს რამენაირად მისი კაბინეტიც მოვუძებნოთ და უფრო მეტი წევრი მოვიზიდოთ ჯგუფში. ჩვენს წლევანდელ პროექტში კი შემაქვს კრებული, რომელშიც ჩვენი გარდაცვლილი მოსწავლისა და ჩვენი შემოქმედება იქნება დაბეჭდილი. ასევე ამ წიგნის პრეზენტაცია და ექსკურსია თბილისში თანამედროვე პოეტებთან და დიდიბისა და მთაწმინდის პანთეონში. ასევე ობოლ ბავშვთა თავშესაფრის დახმარება იმ თანხებით, რასაც გავწვდებით. და დიდი იმედი გვაქვს, რომ განათლების სამინისტრო ნამდვილად დაგვთანხმდება ასეთი კარგი პროექტის დაფინანსებაზე.

 

 

ლიტერატურული კლუბის გარდა რას უკავშირდება თქვენი სამომავლო გეგმები? თქვენი ლექსების კრებულის გამოშვებას ხომ არ აპირებთ?

 

 

ჩემი პირველი გეგმაა დავუბრუნდე ჩემს სამშობლოს (გერმანიას). წიგნს რაც შეეხება, ამასთან დაკავშირებით დაპირება მაქვს მიღებული. ასევე 2013 წელს უამრავ საღამოს ჩატარებას ვგეგმავ. დიდი სურვილი მაქვს თბილისშიც მოვახერხო ერთი საღამოს ჩატარება.

 

 

 

ვის ენდობით ყველაზე მეტად?

 

 

ადამიანი თუ მიყვარს ადვილად ვენდობი, თუმცა იმედების გაცრუების შემთხვევაში მძიმე ცხოვრებისეული დარტყმა შეიძლება მიიღოს ჩემგან. ყველაზე მეტად მხოლოდ საკუთარ თავს ვენდობი, მიუხედავად იმისა რომ ხშირად მღალატობს.

 

რაც შეეხება პირად ცხოვრებას, ჩაკეტილი ადამიანი ვარ და არც არსებობს ადამიანი, რომელთანაც პირდაპირ შემიძლია ბოლომდე ვისაუბრო იმაზე, თუ რას ვფიქრობ, როგორ ვგრძნობ თავს, რა ხდება ჩემს პირად ცხოვრებაში და თან ამას დაერთოს კითხვა – რატომ. რა თქმა უნდა მცირე ან საშუალო დოზით ყველას ვუზიარებ მათ, მაგრამ ბოლომდე მაინც არავისთან შემიძლია ამაზე საუბარი პოეზიის გარდა.  

 

 

ვინ არის თქვენი მუზა?

 

 

 

ჩემი მუზა არის ყველა ის ადამიანი, რომელიც მაძლიერებს, შეგიძლიათ მტრებით დაიწყოთ.  

 

 

ანდრია ფენის პოეზიით დაინტერესებულ მკითხველს შეუძლია მის პოეზიას ლიტკლუბის გვერდზე გაიცნოს.  

 

 

 

მედიალაბორატორია. დავალება: ინტერვიუ.   

მომზადებულია გაზეთ „ბათუმელების” მედიასკოლაში. 

 

 

ამნისტია და საზოგადოება

ბატონო რამინ, პირველ რიგში დიდი მადლობა, რომ დამთანხმდით ინტერვიუზე. დავიწყოთ იქედან, თუ რა არის ამნისტია და რა კარგი და ცუდი მხარეები შეიძლება ჰქონდეს მას?

 

 

ამნისტია ბერძნული წარმოშობის სიტყვაა და დავიწყებას, პატიებას ნიშნავს. აქედან მოდის ამნისტია, როგორც სახელმწიფოს მხრიდან გარკვეული დანაშაულისათვის დანიშნული სასჯელისაგან პირის გათავისუფლება ან ამ სასჯელის შემსუბუქება. ამნისტიას აქვს ის დადებითი მხარე, რომ დანაშაულისათვის დაპატიმრებულ ადამიანებს აძლევს საშუალებას სასჯელის სრულად მოხდამდე გათავისუფლდნენ საპატიმროებიდან, ეს კი წარმოადგენს საზოგადოების მხრიდან მათთვის გამოცხადებულ ნდობას. თუმცა, შესაძლოა, სასჯელიდან გათავისუფლებულმა ადამიანებმა კვლავ გაიმეორონ დანაშაული და გამოშვებულ იქნას მძიმე და განსაკუთრებით მძიმე დანაშაულის ჩადენისთვის მსჯავრდებული პირებიც. მაგალითად, ნარკოტიკული ნივთიერებების შეძენა-შენახვისათვის მსჯავრდებული პირები მთლიანად გაათავისუფლეს, ანუ აქ მხედველობაში მიიღეს არა მხოლოდ დანაშაულის სიმძიმე, არამედ სახეობაც.

 

 

ნარკოტიკების შეძენა-შენახვა მძიმე დანაშაულია?

 

 

დანაშაული სიმძიმის მიხედვით სამი კატეგორიისაა: ნაკლებად მძიმე, მძიმე და განსაკუთრებით მძიმე. ის დანაშაული, რომლის სასჯელადაც კანონით მაქსიმუმ 5 წელია გათვალისწინებული, ნაკლებად მძიმეა, 10 წლის ჩათვლით – მძიმე, ხოლო 10 წლის ზემოთ განსაკუთრებით მძიმე.  შესაბამისად, ნარკოტიკების შეძენა-შენახვა განსაკუთრებით მძიმე დანაშაულებს მიეკუთვნება.

 

 

 

ნარკომანი ციხეში უნდა იქნეს ჩასმული თუ მან უნდა გაიაროს საჭირო რეაბილიტაცია? ცოტათი თემას გადავუხვევ, თქვენი აზრი მაინტერესებს ამ თემასთან დაკავშირებით.

 

 

 

 

ჩემი აზრით, ნარკომანისთვის უნდა არსებობდეს 90 დღიანი პატიმრობა, ხშირად პატიმრობას მკურნალობაზე მეტი შედეგი მოაქვს. თუკი პატიმარი ნარკომანიით დაავადებულია, მაშინ მას სასჯელაღსრულების საპატიმროში უნდა ჩაუტარდეს იძულებითი მკურნალობა, ვინაიდან ნარკომანების 90% ნებაყოფლობით მკურნალობაზე უარს ამბობს.

 

 

 

გასაგებია. თქვენი აზრით რა ტიპის დანაშაულებს უნდა შეეხებოდეს ამნისტია?

 

 

 

ყველას, გარდა განზრახ მკვლელობებისა და სახელმწიფოს წინააღმდეგ ჩადენილი დანაშაულებებისა. დანარჩენებზე შეიძლება გავრცელდეს სხვადასხვა შეღავათი, ზოგს გაუნახევრონ, ზოგი საერთოდ გაათავისუფლონ და ზოგსაც ერთი მესამედით ან ერთი მეოთხედით შეუმცირონ სასჯელები.

 

 

 

დღევანდელი მასშტაბური ამნისტიის შესახებ რას იტყოდით?

 

 

 

ჩემი პოზიცია ამ თემის მიმართ დადებითია.

 

 

 არსებობს სასჯელისგან ვადაზე ადრე გათავისუფლების კომისია. ეს კომისია გამოითხოვს პატიმრების პირად საქმეებს ციხეებიდან, ციხეების დირექტორებს ეკითხებიან ამ პატიმრების შესახებ, მაგრამ აქაც გარკვეული პირობების დაცვაა საჭირო. პატიმრებს, რომლებიც ნაკლებად მძიმე დანაშაულებისათვის იხდიან სასჯელს, სასჯელის ნახევარი უნდა ჰქონდეთ მოხდილი, რათა კომისიამ განიხილოს მათი საქმეები, ნაკლებად მძიმე დანაშაულის ჩამდენ პირებს 2/3 უნდა ჰქონდეთ მოხდილი, ხოლო განსაკუთრებით მძიმე დანაშაულის ჩამდენ პატიმრებს 3/4. არსებობს სასჯელისაგან გათავისუფლების სხვა ფორმაც – შეწყალება, რომელსაც მხოლოდ პრეზიდენტი გამოსცემს და მას შეწყალების აქტით შეუძლია შეიწყალოს ნებისმიერი დანაშაულისათვის მსჯავრდებული პირი.  ის მსჯავრდებულები რომლებიც მძიმედ არიან ავად შესაძლოა გათავისუფლდნენ სასჯელის შემდგომი მოხდისგან გამოჯანმრთელებამდე.

 

 

და თუკი პატიმარი ვერ გამოჯანმრთელდება?

 

 

ამ შემთხვევაში ხდება მისი სასჯელის შემდგომი მოხდისგან გათავისუფლება.

 

 

ძალიან დიდი მადლობა საინტერესო ინტერვიუსათვის. წარმატებებს გისურვებთ!

 

 

თქვენც ასევე!

 

 

მედიალაბორატორია. დავალება: ინტერვიუ.   

მომზადებულია გაზეთ „ბათუმელების” მედიასკოლაში. 

 


ინტერვიუ ხალიჩასთან

წყარო: https://www.ehow.com
წყარო: https://www.ehow.com


– გამარჯობა, როგორც მაცნობეს თქვენ იყავით თვითმხილველი თუ როგორ გატეხა ლუკამ ფინჯანი…


– დიახ, რით შემიძლია დაგეხმაროთ? 

– ორიოდე შეკითხვას დაგისვამთ, ოღონდ არა ამ ფაქტზე, არამედ უბრალოდ თქვენზე.  

– როგორც გნებავთ.

– მაშ ასე, თქვენი აზრით რა როლს ასრულებთ ყოველდღიურ ცხოვრებაში?

– ადამიანთა თქმით, მე მხოლოდ დეკორაციული როლი მაკისრია, რაღაცის გალამაზების ან თუნდაც დაფარვის. მათი თქმით, სილამაზისთვის მიყენებენ, თუმცა სინამდვილეში ფეხით მთელავენ და ტალახს მახოცავენ. 

– თქვენი პასუხიდან გამომდინარე მივხვდი, რომ ნაწყენი ხართ ადამიანებზე. გთხოვთ, საკუთარი ხედვით შეაფასოთ ისინი.

-ჰაჰ, ჩემთვის ამ შეკითხვით არავის მოუმართავს, მეტიც, საერთოდ არ მოუმართავთ ჩემთვის კითხვებით.

იცით რა, მიუხედავად იმისა, რომ ხან მჭრიან, ხან მკერავენ, ფეხით მთელავენ, აუგს მეტყვიან, მხოლოდ გარეგნობას მიფასებენ, მე ისინი მაინც ძალიან მიყვარს… იცით რატომ? მე არ მაქვს სული, მაგრამ თქვენი სულით ვცოცხლობ. 

– გმადლობთ გულახდილობისთვის. მაინტერესებს მეგობრობთ თუ არა სხვა საგნებთან? რომელია თქვენი საუკეთესო მეგობარი?  

– რა თქმა უნდა ვმეგობრობ, მეგობრობის გარეშე შეუძლებელია ამდენ ხანს ვყოფილიყავი. იცით ერთი შემთხვევა მახსენდება, როდესაც არაკომუნიკაბულურობის გამო მაგიდის გადასაფარებელი გააგდეს, სულ ეჩხუბებოდა მაგიდას და…

საუკეთესო მეგობარი? რა თქმა უნდა მყავს, ჩემი საუკეთესო მეგობარი კუთხეში ჩამაგრებული ლურსმანია, ის სულაც არ მამადლის მეგობრობას იატაკისგან განსხვავებით, ამიტომ მიყვარს ყველაზე ძალიან.

– შესანიშნავია. მაინტერესებს, რითი იკვებებით? 

– ჰმ, რა რთულად მარტივი შეკითხვაა, მე მტვერით ვიკვებები, არა იმიტომ რომ ის მომწონს, უბრალოდ, მინდა, რომ იგი თავს ავაცილო ადამიანებს.  

– გასაგებია, თავი ხომ არ მოგაბეზრეთ ამდენი შეკითხვებით? 

– ასე ფიქრობთ? რა სამწუხაროა, იცით რა სასიამოვნოა, როდესაც ვიღაცას მაინც აინტერესებ?!

– კარგი, მაშ, გავაგრძელოთ. როგორი წარმოგიდგენიათ სიკვდილი? 

– სიკვდილი – ჩემთვის ძაფად დაშლასთან ასოცირდება, როცა ვერაფერს ჩადიხარ, ვიღაც ხელებს გიფათურებს, შენ კიდევ უღონო ხარ. 

–  რას მეტყვით თქვენეული ბედნიერების შესახებ? 


– ჩემთვის ყველაზე დიდი ბედნიერებაა, როცა სახლში არავინაა, რადგან მხოლოდ მაშინ არ მტკენენ სხულის ნაწილებს, მხოლოდ მაშინ შემიძლია შევიგრძნო თავისუფლება და არა მტვრის სუნი :)) 

– დიდი მადლობა. მინდა გითხრათ, რომ ძალიან კარგი რესპოდენტი იყავით :)) იმედია კიდევ შევხვდებით.





მედიალაბორატორია. დავალება: ინტერვიუ.   

მომზადებულია გაზეთ „ბათუმელების” მედიასკოლაში.


 

 

 

ხანძარი ბუკნარში

ხანძრის გამომწვევი ზუსტი მიზეზი ჯერ-ჯერობით დადგენილი არ არის, ერთ-ერთ ვერსიად მოკლე ჩართვა სახელდება, რის შედეგადაც ხის შენობას ცეცხლი სწრაფად მოედო, შემდეგ კი ცეცხლი მეზობელ სახლებზე გადავიდა. აქ მცხოვრებნი ამბობენ, რომ დაგვიანებით მოსულმა სახანძრო სამსახურმა ხანძრის დროულად ჩაქრობა ვერ შეძლო.

 

დაზარალებული მადონა ხილაძე ამბობს, რომ ჯერ ძლიერი აფეთქების ხმა გაიგეს: „ოთახის კარი გავაღე და იქედან ცეცხლი გამოვარდა, უცებ დავიბენი, არ ვიცოდი როგორ მოვქცეულიყავი, პატარა ბავშვები მყავს და იმათი ძებნა დავიწყეთ, ძვლივს მოვასწარით სახლიდან გამოსვლა, სხვა ვერაფერი გამოვიტანეთ, მეზობლებმა მოგვცა ჩასაცმელებიც კი, ყველაფერი დაგვეწვა, განვადებებით ტექნიკა გვქონდა გამოტანილი და ვერაფერი ვერ გადავარჩინეთ. გამგეობა დაგვპირდა, რომ მაისში ჩაგვაბარებენ აშებებულ შენობას და მანამდე გვიქირავეს საცხოვრებელი სახლი.“      

 

 

დაზარალებულები იმაზეც საუბრობენ, რომ ადგილზე მისულ სახანძრო სამსახურს ტექნიკა გაუმართავი ჰქონდა: „მარტო ორასი ლიტრა წყალი ჰქონდათ, არც წყლის მილები უვარგოდათ, გვერდზე ასხამდა, დახეთქილი იყო, ქობულეთიდან და ბათუმიდან მოვიდნენ სახანძრო მანქანები, საბოლოოდ იმათმა ჩააქრეს, მაგრამ ვერაფერი გადავარჩინეთ, ხის შენობა იყო და უცებ დაიწვა, ჩემი და საშინაო ტანსაცმლით დარჩა ქუჩაში სამ მცირე წლოვან ბავშვთან ერთად.“ – გვიამბობს ერთ-ერთი დაზარალებულის და.     

 

დაითხოვენ თუ არა ხელვაჩაურის გამგეობაში თანამშრომლებს?

ახლად დანიშნული გამგებელი ამბობს, რომ მას ამის შესახებ არაფერი სმენია. ლევან ლორთქიფანიძის თქმით, დღის ბოლომდე განცხადებას მოადგილეები დაწერენ: „მე მათ შევხვდი და ველაპარაკე, დღის ბოლომდე, ალბათ, დაწერენ განცხადებას. თუმცა, ეგ მათი გადასაწყვეტია“.

 

„ბათუმელებთან“ ერთ-ერთი მოადგილე, თამაზი კარანაძე ამბობს, რომ მან უკვე „დაწერა განცხადება და სახლში მიდის“. მისივე ინფორმაციით, განცხადება დაწერა კიდევ ორმა მოადგილემ – ლევან თედორაძემ და ირაკლი სურმანიძე. „მე მიჩვეული ვარ მუშაობას, როცა უფროსთან ნორმალური დამოკიდებულება გაქვს. ახალი კაცი მოვიდა, არ ვიცნობ საერთოდ და არაფერი… ასაკის გამო დავწერე რა, საპენსიო ასაკის ვარ“, – აცხადებს თამაზ კარანაძე.

 

ირაკლი სურმანიძე გადადგომის შესახებ განცხადებას არ ადასტურებს. „ამ წუთში მოხდა ცვლილება და დაწერა ვინ გითხრათ… მე არ დამიწერია პირადად. არ ვიცი ვისგან რა მოთხოვნა იყო და არც არავის შევხვედრივარ. რომ შევხვდები მერე, ალბათ, იქნება“.

 

განცხადების დაწერას არ ადასტურებს არც ლევან თედორაძე. კითხვაზე, იყო თუ არა მოთხოვნა, რომ დაგეწერათ განცხადება, ლევან თედორაძე ამბობს, „მერე დამირეკეთ თუ შეიძლება“.

 

ლევან თედორაძე „ვერც იმას ადასტურებს“, მოსთხოვეს თუ არა გამგეობის სხვა თანამშრომლებს განცხადების დაწერა.

 

ახალი გამგებელი, ლევან ლორთქიფანიძე კი ამბობს, რომ რადიკალური ცვლილებები გამგეობაში არ იქნება საჭირო. „გავივლით ყველაფერს და ამის შემდეგ მივიღებთ გადაწყვეტილებას. ზოგს შეიძლება არც უნდა ჩემი ხელმძღვანელობით მუშაობა. ვნახოთ როგორ იქნება. მე არ ვარ მოწადინებული რადიკალური ცვლილებები განვახორციელო“.

 

ლევან ლორთქიფანიძის ინფორმაციით, მის დამტკიცებას საკრებულოს სხდომაზე 17-მა დეპუტატმა დაუჭირა მხარი. სხდომას ზუსტად ამდენივე დეპუტატი ესწრებოდა.

 

ხელვაჩაურის საკრებულო 21 წევრისგან შედგება. 

მიწისძვრის შედეგად დაზარალებულებს ბინებს უქირავებენ

ქობულეთის მუნიციპალიტეტის სოფელ ზენითში მცხოვრები ქათამაძეების სახლი, რომელიც მიწისძვრის შედეგად დაზიანდა
ქობულეთის მუნიციპალიტეტის სოფელ ზენითში მცხოვრები ქათამაძეების სახლი, რომელიც მიწისძვრის შედეგად დაზიანდა

 

მთავრობის გადაწყვეტილებით „300-ლარიან დახმარებას 6 თვის განმავლობაში ხელვაჩაურის მუნიციპალიტეტში მცხოვრები 9, ხოლო ქობულეთის მუნიციპალიტეტში მცხოვრები 19 ოჯახი მიიღებს. დაზარალებულებს 3 ეტაპად დახმარებიან. მეორე ეტაპზე კომისია დაზიანებული სახლების აღდგენის საკითხის განიხილავს, მესამე ეტაპი დანგრებული სახლების აშენებას ითვალისიწინებს“.

 

 ეს გადაწყვეტილება მიიღო კომისიამ, რომლის შემადგენლობაში აჭარის მინისტრთა კაბინეტის წევრები, აჭარის მთავრობის წარმომადგენლები, მუნიციპალიტეტის გამგებლები, გარემოს დაცვის სამმართველოსა, გელოგიის სამსახურის ხელმძღვანელები და კონსტრუქტორები შედიან.

 

ჯანდაცვის სამინისტროს პრეს-სამსახურის ცნობით, დაზარალებულების შესახებ დახმარების გადაწყვეტილება მთავრობამ 29 დეკემბერს მიიღო. დაზარალებულებისათვის თანხა 10 იანვრიდან გამოიყოფა.

 

 

ქობულეთის მუნიციპალიტეტის სოფელ კონდიდში მცხროვრები შაქარიშვილების სახლი, რომელიც მიწისძვრის შედეგად დაზიანდა
ქობულეთის მუნიციპალიტეტის სოფელ კონდიდში მცხროვრები შაქარიშვილების სახლი, რომელიც მიწისძვრის შედეგად დაზიანდა

 

ხელვაჩაურის გამგებლად „ქართული ოცნების“ წევრს ნიშნავენ

რამდენიმე წუთში საგანგებო სხდომა დაიწყება ხელვაჩაურის საკრებულოში. სხდომაზე დაამტკიცებენ ხელვაჩაურის მუნიციპალიტეტის ახალ გამგებელს, რომელიც ლევან ლორთქიფანიძე იქნება.

 

 

ლევან ლორთქიფანიძე „ქართული ოცნების“ შტაბის ხელმძღვანელად მას შემდეგ დაინიშნა, რაც თემურ კახიძე ხელვაჩაურის მაჟორიტარ კანდიდატად დაასახელეს აჭარის უმაღლეს საბჭოს არჩევნების დროს.

 

თემურ კახიძე პირველი ოქტომბრის არჩევნების შემდეგ აჭარის უმაღლესი საბჭოს დეპუტატი გახდა.

 

არჩევნების შემდეგ ხელვაჩაურის გამგებლის თანამდებობაზე საკრებულომ გურამ საფარიძე დანიშნა, რომელმაც თანამდებობა პირადი განცხადების საფუძველზე 27 დეკემბერს დატოვა. 12 დეკემბერს ის „ბათუმელებთან“ აცხადებდა, რომ არსად წასვლას არ აპირებდა.

 

 

როგორც ხელვაჩაურის საკრებულოს ნაციონალი დეპუტატები „ბათუმელებთან“ ამბობენ, ისინი სხდომის ჩატარების შესახებ ოფიციალურად არავის გაუფრთხილებია და ეს ინფორმაცია მხოლოდ კერძო საუბრებიდან შეიტყვეს.

 

 

ხევლაჩაურის მუნიციპალიტეტში პირველი ოქტომბრის არჩევნების შემდეგ ნაციონალური მოძრაობა აღარ არის უმრავლესობაში.

განხილული საჩივრები და დაუსჯელი საარჩევნო მოხელეები

ბათუმის #79 საოლქო საარჩევნო კომისიის 3 ოქტობრის სხდომაზე, სადაც კომისიამ  2012 წლის 1 ოქტომბრის საპარლამენტო არჩევნებზე საუბნო-საარჩვენო კომისიებში დაფიქსირებული საჩივრები განიხილა საქართველოს იურისტთა ასოციაციის (საია) დამკვირვებელი თამარ კალანდაძე #52 საუბნო კომისიის თავმჯდომარის, დავით მწერალიშვილის მიმართ დისციპლინარული პასუხისმგებლობის საკითხის დაყენებას ითხოვდა. „კომისიის თავმჯდომარე ერეოდა საიას სადამკვირვებლო მისიის  წარმომადგენელთა საქმიანობაში, ბიულეტენების ბათილად ცნობის შესახებ მსჯელობისას არ ითვალისწინებდა კომისიის წევრთა შეხედულებებს, ხმების დათვლის შემდეგ კი ხელოვნურად დააბრკოლა მონაცემთა შეყვანა შემაჯამებელ ოქმში“, – ნათქვამია დამკვირვებლის საჩივარში.

 

 

დავით მწერალიშვილის მიმართ დისციპლინური სასჯელის დაკისრებას ითხოვდა საოლქო კომისიის წევრი მერი ცენტერაძეც. თუმცა თავმჯდომარემ კენჭისყრაზე მხოლოდ შენიშვნის მიცემის საკითხი დააყენა, რასაც კომისიის 12 წევრიდან ცხრა დაეთანხმა.

ამ უბანზე დაფიქსირებული დარღვევების შესახებ საჩივრები სხვა დამკვირვებლებმაც დაწერეს.

 

 

„ასეთი სერიოზული დარღვევების შემდეგ თამჯდომარე არც კი დაუჯარიმებიათ, მხოლოდ დისციპლინური წესით გააფრთხილეს. რამდენიმე მსგავს შემთხვევაში შენიშვნის მიცემითაც კი შემოიფარგლენ, ჯარიმა არავისთვის  დაუკისრებიათ. ეს აბსოლიტურად მიუღებელია ჩვენთვის, რადგან ასეთი თანამშრომლები კვლავაც შეიძლება საუბნო-საარჩევნო კომისიებში აღმოჩდნენ“, – ამბობს „საერთაშორისო გამჭვირვალობა საქართველოს“  ბათუმის ორგანიზაციის ხელმძღვანელი ირინა ურუშაძე.

 

 

ამ ორგანიზაციის წარმომადგენლები ბათუმში 22 საარჩევნო უბანს აკვირდებოდნენ. დანარჩენ უბნებზე კი ორგანიზციის მობილური ჯგუფი გადაადგილდებოდა.

გაფრთხილების გამო დისციპლინარულ პასუხისმგებლობაში სახელდადებული პირის კომისიაში მეორედ არჩევას კანონი არ ზღუდავს. თუ კომისია პირის დაჯარიმების გადაწყვეტილებას მიიღებს, შემდეგი არჩევნებისთვის ოლქი მას ვეღარ შეარჩევს საუბნო-საარჩევნო კომისიაში სამუშაოდ.

 

 

საერთაშორისო გამჭვირვალობა საქართველოს დამკვირვებლებმა სხდომაზე კანონდამრღვევი საარჩევნო მოხელეების მიმართ საოლქო კომისიის მიერ გამოჩენილი ლოიალური დამოკიდებულება გააპროტესტეს. მათ აღნიშნეს, რომ შემდეგი არჩევნებისთვის ამ ადამიანების  კომისიებში ისევ მოხვედრას კატეგორიულად შეეწინააღმდეგებიან. „თუმცა კანონიერი ბერკეტი, ეს არ დავუშვათ,  არ გვექნება“, – აზუსტებს ირინა ურუშაძე  „ბათუმელებთან“ . 

 

 

საქართველოს საარჩევნო კოდექსი, პირს  კომისიაში  ხელმეორედ მუშაობას დისციპლინარული სასჯელის გატარების შემთხვევაში არ უკრძალავს. აკრძალვა მხოლოდ დაჯარიმებულ ან უფლებამოსილება შეწყვეტილ პირზე  ვრცელდება.

ტენდენცია, რომ კანონდამრღვევ საარჩევნო მოხელეებს ოლქი კომისიებში სამუშაოდ ისევ იწვევს, 2012 წლის საპარლამენტო არჩევნებმაც აჩვენა. ბათუმის #79 ოლქში საუბნო-საარჩევნო კომისების დასაკომპლექტებლად კონკურსის წესით შერჩეულთა შორის მოხვდნენ პირები, რომლებიც ცესკომ 2008 წლის 3 ნოემბრის აჭარის უმაღლესი საბჭოს არჩევნების შემდეგ უბნებზე დაფიქსირებული დარღვევების გამო დაითხოვა, ოლქის შედეგები კი მთლიანად გააბათილა.

 

 

საოლქო კომისიიის სხდომაზე #49 საარჩევნო უბანში ამირან ფირცხალავას წინააღმდეგ ოთხი საჩივარი განიხილეს. „საიას“, „საერთაშორისო გამჭვირვალობა საქართველოს“, „სამართლიანი არჩევნებისა“ და „მოდუს ვივენდის“ დამკვირვებლები ამ უბნის ბათილი ბიულეტენების ხელახლა გადათვლას, საუბნო საარჩევნო კომისიის  მთელი შემადგენლობის ადმინისტრაციული წესით დაჯარიმებას, კომისიის თავმჯდომარისთვის კი დამატებით დისციპლინური პასუხისმგებლობის დაკისრებას ითხოვდნენ. 

 

 

კომისიის მთელი შემადგენლობის დაჯარიმების მოთხოვნასთან დაკავშირებით ოლქის იურისტმა მალხაზ ბოლქვაძემ განმარტა, რომ ადმინისტრაციული სამართალდარღვევის საქმეზე გადაწყვეტილებას იღებს კომისიის თავმჯდომარე და არა კომისია. ამასთან დაკავშირებით კი, მოგვიანებით ცალკე ზეპირი მოსმენა დაიგეგმებოდა. კენჭისყრაზე მხოლოდ ბათილი ბიულეტენების ხელახლა გადათვლისა და თავმჯდომარისთვის უფლებამოსილების ვადამდე შეწყვეტის საკითხი დააყენეს. ორივე შემთხვევაში ცხრით სამის წინააღმდეგ საკითხი უარყოფითად გადაწყდა: კომისია კანონდამრღვევი საარჩევნო მოხელის მიმართ ამჯერადაც გაფრთხილებით  შემოიფარგლა.

 

 

საოლქო კომისია ბათუმის 104 უბნიდან შესულ საჩივრებს ხუთი საათის განმავლობაში იხილავდა. ამ დროის განმავლობაში საარჩევნიო უბნის კომისიის მთელი შემადგენლობის, კომიის თავმჯდომარის, მდივნისა და რეგისტრატორის მხრიდან უფლებამოსილების გადამეტების საკითხზე დამკვირვებელი ორგანიზაციების წარმომადგენლებმა რამდენჯერმე იმსჯელეს.

კიდევ ერთი ტენდენცია, რაც არჩევნების დღეს ბათუმში საარჩევნო უბნებზე დამკვირვებლების მიერ დაწერილი საჩივრებით გამოიკვეთა, თითქმის ყველა საარჩევნო უბანზე ამომრჩევლისთვის ხმის უფლების შეზღუდვა და უბნებზე ბიულეტენების ნაკლებობა იყო.

 

 

ხმის უფლების შეზღუდვის განსაკუთრებული სიმრავლის გამო, საჩივრები დაწერეს და #17 უბნის შედგეგების ბათილობას ითხოვდნენ არასმთავრობო ორგანიზაციები -„საერთაშორისო გამჭვირვალობა საქართველო“,  „სამართლიანი არჩევნები“ და საია. ამ უბანზე 17:16 საათზე მისულ ამომრჩეველს, მიხეილ გაბაიძეს ხმის უფლება შეეზღუდა. საარჩევნო უბანში ამავე სახელით და გვარით 12 საათამდე  გამოცხადდა ამომრჩეველი, რომელსაც ხმა მიხეილ გაბაიძის ნაცვლად უკვე მიცემული ჰქონდა.  იგივე მიზეზით #17-ე უბანზე ხმის უფლება კიდევ ათ მოქლაქეს შეეზღუდა:  თეიმურაზ ტუღუშს, ირაკლი კეჭაყმაძეს, ზვიად მალაყმაძეს, არტურ მარკოსიანს, გარსევან ჯორბენაძეს, ზაზა სარიშვილს და მამუკა თურმანიძეს სამაგიდო სიაში მათი სახელის და გვარის გასწვრივ ხელმოწერები დახვდათ.

 

 

ამ დარღვევის გამო „სამართლიანმა არჩებნების“ წარმომადგენელმა ოლქში საჩივრების განხილვისას უბნის შედგების გაბათილების კენჭისყაზე დაყენება მოითხოვა.  საკითხზე მსჯელობისას „საიას“ წარმომადგენელმა განმარტა, რომ შედგების გაბათილებას მხარს იმ შემთხვევაში დაუჭერდა, თუ მითითებული ფაქტები უბნის შედგებზე მოხდენდა გავლენას . საბოლოოდ საკითხი კენჭისყრაზე მაინც დადგა, თუმცა 12 ხმით ორის წინააღმდეგ ბათილობის მოთხოვნას კომისია არ დაეთანხმა.

 

 

ბათუმის #29 უბანზე დამკვირვებლებმა სხვის ნაცვლად ხმის მიცემის ფაქტზე ექვსი საჩივარი დაწერეს. დამკვირვებლები ამ უბანზე გადასატანი ყუთის დაგვიანებით გატანასა და რეგისტრატორის ხელმოწერის გარეშე  საარჩევნო ბიულეტენებზე ყუის ჩამოხევის ფაქტსაც აპროტესტებდნენ. „გაუგებარია დარღვევის არსი და არ არსებობს კონკრეტული მოთხოვნა“, – ამ მიზეზით ბათუმის საოლქო კომისიამ უბანზე დაფიქსირებული საჩივრები განუხილველად დატოვა.  იგივე მოტივით განუხილველად კიდევ ათამდე საჩივარი დატოვეს.

 

 

სხდომაზე განხილული საჩივრების მიხედვით, ბათუმის თითოეულ საარჩევნო უბანზე ხმის მიცემის უფლება, იმის გამო, რომ  სამაგიდო  სიაში მათი სახელისა და გავრის გასწვრი ხელი მოწერილი დახვდათ, მინიმუმ შვიდ ადამიანს შეეზღუდა. ზოგ უბანზე კი ეს რიცხვი ათსაც გასცდა. ბათუმის 104 საარჩევნო ამ მიმართულებით უბანის მონაცემების დაჯამების მიხედვით, პირველი ოქტომბრის საპარლამენტო არჩევნებზე ხმის უფლება მინიმუმ უბანზე მისულ 800 მოქალაქეს შეეზღუდა.

არასამთავრობო ორგანიზაცია „სამართლიანი არჩევნების“  ბათუმის ორგანიზაციის ხელმძღვანელის, მადონა ბერიძის თქმით, ოლქის კომისიამ დამკვირვებელ ორგანიზაციებს საჩივრების განხილვის დრო და თარიღი არ შეატყობინა: „ვიღაცამ შემთხვევით გაიგო და ამბავი მოგვიტანა, შემდეგ კი ერთმანეთს გავაგებინეთ“. იგივეს ადასტურებენ სხვა ორგანიზაციის დამკვირვებლებიც.

ოლქის კომისიამ ეს საკითხი გაუგებრობით ახსნა.

 

 

არასამთავრობო ორგანიზაციების წარმომადგენლებმა, საჩივრების განხილვის პროცესი,  წინა საარჩევნო პროცესებთან შედარებით, საერთო ჯამში, დადებითად შეაფასეს.

„წინა არჩევნებთან შედარებით, ჩვენ ოლქთან მკვეთრი დაპირისპირება არ გვქონია. არც ჩვენი დამკვირვებელი უცემია რომელიმე საარჩევნო მოხელეს  . ვფიქრობ, ეს ისევ და ისევ ამომრჩევლის ზეაქტიურობამ განაპირობა“, – აღნიშნა საიას იურისტმა ნინო ტავლალაშვილმა  „ბათუმელებთან“.

იგივე პოზიცია აქვთ სხვა ორგანიზაციების დამკვირვებლებსაც.

არჩევნების შემდეგ დავები აჭარის უმაღლეს საარჩევნო კომისიაში არ გაგრძელებულა.


 

 

 

სტატია მომზადებულია გაეროს დემოკრატიის ფონდის მხარდაჭერით. სტატიის შინაარსზე პასუხისმგებელია სამოქალაქო განვითარების ინსტიტუტი  და მასში გამოთქმული მოსაზრებები, შესაძლოა, არ ასახავდეს გაერთიანებული ერების ორგანიზაციისა და გაერთიანებული ერების დემოკრატიის ფონდის შეხედულებებს.



“აჭარ-ენერჯი 2007” “ბათუმელებში” გამოქვეყნებულ სტატიას ეხმაურება

 

შპს „აჭარ ენერჯი-2007“ („კომპანია“) საქართველოს მთავრობასთან დადებული ურთიერთგაგების მემორანდუმის პირობების შესაბამისად ახორციელებს მიმდინარე სამუშაოებს სამი ჰიდროელექტრო სადგურის მშენებლობლობის მიზნით აჭარის რეგიონში, რომელთაგან ერთი არჩევითია („პროექტი“).

 

ყველა დაინტერესებული პირის საყურადღებოდ გვინდა განვაცხადოთ, რომ პროექტის განხორციელება მიმდინარეობს საქართველოს კანონმდებლობის სრული დაცვით. პროექტის გარემოზე ზემოქმედების შეფასების („გზშ“) ანგარიშის განხილვა და დამტკიცება მოხდა დადგენილი წესის შესაბამისად, აგრეთვე, კომპანიამ კანონის მოთხოვნათა დაცვით მოიპოვა შესაბამისი მშენებლობის ნებართვები.

 

დღემდე პროექტი მიმდინარეობს გზშ ანგარიშისა და მშენებლობის ნებართვებით განსაზღვრული ყველა მოთხოვნის დაცვით. კომპანია სამშენებლო საქმიანობას ახორციელებს შესაბამისი ორგანოებისაგან თუ სხვა დაინტერსებული კომპეტენტური პირებისაგან მიღებული მითითებებისა თუ შენიშვნების გათვალისწინებით.

 

გვინდა განვაცხადოთ და დავარწმუნოთ საზოგადოება, რომ კომპანიისათვის გარემოზე ზემოქმედების საკითხი და ადგილობრივი მოსახლეობის ინტერესების გათვალისწინება და დაცვა ყოველთვის იყო და იქნება კომპანიის პრიორიტეტი პროექტის განხორციელების მთლიანი პერიოდის განმავლობაში.

 

შპს „აჭარ ენერჯი-2007“

ბათუმს ტრანსფერები შეუწყდა

ტრანსფერების შეწყვეტის თაობაზე ბათუმის მერმა ჯემალ ანანიძემაც განაცხადა. „ტრანსფერების შეჩერების შედეგადაც ბევრი მნიშვნელოვანი პროექტი, რომლის გაკეთებაც მომავალი წლისთვის იყო დაგეგმილი, აღარ განხორციელდება“ _ თქვა მან.

 

ამ პროექტებიდან ერთ-ერთი დროებითი თავშესაფრის პროექტია, რომელიც ურეხის ყოფილი ბავშვთა სახლის ბაზაზე უნდა გახსნილიყო. მერის განცხადებით, შეჩერდება ორი სოციალური სახლის მშენებლობაც, ქალაქის ნაწილში სანიაღვრე სისტემებისა და ჟილინის არხის კაპიტალური რეაბილიტაცია. ახალი ბიუჯეტის ფარგლებში განახევრდა ბინათმესაკუთრეთა ამხანაგობის განვითარების ხელშემწყობი პროგრამა და შეჩერდა ქალაქისთვის მუნიციპალური ავტობუსების შეძენა.

 

„დასახელებულ პროექტებზე უნდა დასაქმებულიყო ჩვენი ქალაქის 5 000 მკვიდრი, რაც დაახლოებით 2 0000 მოქალაქის კეთილდღეობაზე აისახებოდა“ _ აცხადებს ჯემალ ანანიძე. იგი ამბობს, რომ აღნიშნული პროექტების აუცილებლობაში ცენტრალური ხელისუფლების დარწმუნება იმიტომ ვერ მოხერხდა, რომ ხელისუფლებას ბიუჯეტის პროექტი არ განუხილავს: „არსებობს მოსაზრება, რომ რადგან თვითმმართველობას ყოფილი სახელისუფლებო გუნდი მართავს, ამ პირობებში არ მოხდება თვითმმართველობების ბიუჯეტის ზრდა.“

 

საკრებულოს თავმჯდომარის, გიორგი კირთაძის განცხადებით, ტრანსფერების რაოდენობა შეამცირა აჭარის მთავრობამაც: „უნდა ყოფილიყო 18 მილიონი და მოგვცეს ექვსი მილიონი“. რაც, კირთაძის განცხადებით, გარკვეულ პრობლემებს შექმნის. აღარ დაფინანსდება ბათუმის ცენტრალური სტადიონის მშენებლობა, შეფერხდება ქუჩების კეთილმოწყობა, ისტორიული ბათუმის რეაბილიტაცია. სავარაუდოდ, აღარ დაფინანსდება ეკოლოგიური ელექტრომობილების შესყიდვაც, რასაც მერია მომავალი წლისთვის გეგმავდა. „აღარ დაფინანსდება საცხოვრებელი კორპუსების თბოიზოლაციის პროგრამა, რომელიც ქალაქში არსებული ყველა მაღლივი კორპუსის შეფუთვას ითვალისწინებდა. და ყველაზე ცუდი ის არის, რომ გარდა იმისა, რომ ქალაქის ინფრასტრუქტურა წესრიგდებოდა, ამით ადამიანებიც საქმდებოდნენ“ _ აცხადებს საკრებულოს თავმჯდომარე.
2013 წლის ბიუჯეტის პროექტის მიხედვით, ბათუმი მხოლოდ გამოთანაბრებით ტრანსფერს 44 მილიონ ლარს მიიღებს, სპეციალური ტრანსფერიდან კი _ არც ერთ თეთრს.

 

87 მილიონიდან შრომის ანაზღაურებაზე შვიდი მილიონ 896 ათასი ლარი დაიხარჯება. აღმასრულებელი და წარმომადგენლობითი ორგანოების საქმიანობის უზრუნველყოფისთვის, მათი ფინანსური და ფისკალური საქმიანობისთვის 15 მილიონი ლარია გათვალისწინებული, თავდაცვის სფეროზე კი _ 45 ათასი ლარი, ეკონომიკური საქმიანობის სფერო, რომელიც მოიცავს ინფრასტრუქტურის განვითარებას, რეაბილიტაციას და ექსპლოატაციას, დაფინანსებული იქნება 48 მილიონ 672 ათასი ლარით. ამაში შედის გზების, ქუჩების, ტროტუარების კეთილმოწყობა, ხარჯები მუნიციპალური სატრანსპორტო სისტემის მართვისთვის, კომუნალური ინფრასტრუქტურის დაფინანსება, დასუფთავებისა და გარეგანათების ხარჯები.
განათლების სფეროზე შვიდი მილიონი ლარია გამოყოფილი, რომელიც საბავშვო ბაღების დაფინანსებას მოხმარდება.

 

კულტურის სფერო ცხრა მილიონ 387 ათასი ლარით დაფინანსდა, ჯანდაცვა _ ერთი მილიონ 881 ათასი ლარით, სოციალურ სფეროზე კი ოთხი მილიონ 450 ათასი ლარი დაიხარჯება.

 

ბათუმის საკრებულოს დაფინანსება ერთი მილიონ 600 ათასი ლარით განისაზღვრა. აქედან ერთი მილიონ 179 ათასი ლარი შრომით ანაზღაურებაზე მოდის.

 

 

აჭარის ბიუჯეტი ფინანსური დახმარების გარეშე



ისევე როგორც ბათუმის ბიუჯეტი, აჭარის რესპუბლიკური ბიუჯეტიც 2013 წელს ტრანსფერების გარეშე დარჩა. ცენტრალური ბიუჯეტიდან აჭარისთვის არც ერთი თეთრი არ გადმოირიცხება, რაც იმას ნიშნავს, რომ რესპუბლიკურ ბიუჯეტში გათვალისწინებული ხარჯები მთლიანად საკუთარი შემოსავლებიდან დაფინანსდება. ბიუჯეტის საპროგნოზო მაჩვენებელი მომავალი წლისთვის 128 მილიონ 012,5 ათასი ლარია. თუმცა, აჭარის მთავრობა არ გამორიცხავს, რომ მომავალი წლის ბიუჯეტი 110 მილიონი ლარით განისაზღვროს.

 

ცენტრალური ბიუჯეტიდან ტრანსფერების შეწყვეტის მიზეზად ბიუჯეტის პროექტში რეგიონის ეკონომიკური ზრდის ტემპი და სოციალური ფონის გაუმჯობესება სახელდება. „რაც განაპირობებს ახალი სამუშაო ადგილების შექმნას, დასაქმებულთა რიცხოვნობის ზრდას და სამეწარმეო სექტორის გააქტიურებას“ _ აღნიშნულია მთავრობის მიერ წარმოდგენილ ბიუჯეტის პროექტში.

 

შემცირებული ბიუჯეტის ფონზე აჭარის მთავრობა 2013 წლის პრიორიტეტებს ასახელებს. ერთ-ერთ პრიორიტეტად გარემოს დაცვაა მიჩნეული, რაც გულისხმობს გარემოს ინტეგრირებული მართვის ხელშეწყობას და ტყის მდგრად მართვას. „არანაკლებ მნიშვნელოვანია გეოლოგიური მონიტორინგი, სანაპირო ზოლის დაცვა და საზოგადოების ეკოლოგიური ცნობიერების ამაღლება~ _ ვკითხულობთ ბიუჯეტის პროექტში.

 

მთავრობა შემდეგ პრიორიტეტად გზებს მიიჩნევს, მათ რეაბილიტაციას, ხიდების შეკეთებას და აღდგენას, მუნიციპალურ ცენტრებთან ისტორიულ ძეგლებსა და ტურისტულ ადგილებთან მისასვლელი გზების მოწესრიგებას, სამელიორაციო სისტემებისა და ჰიდროტექნოლოგიური ნაგებობების რეაბილიტაციას.

 

შემდეგ პრიორიტეტად სახელდება ტურიზმი. მისი განვითარებისთვის მთავრობა გეგმავს მარკეტინგული სარეკლამო საქმიანობის გაზრდას, ახალი ტურისტული პროდუქტის შექმნას, ახალი ტურისტული მარშრუტების შემუშავებას და ორგანიზებას, საინფორმაციო სქელის განვითარებას. ასევე მონაწილეობას საერთაშორისო ფესტივალებში, საინფორმაციო პროდუქციის მომზადებას და გავრცელებას საერთაშორისო ბაზარზე.

 

პრიორიტეტად ცხადდება ასევე განათლება, რაც გულისხმობს საგანმანათლებლო პროგრამების განხორციელებას და ხარისხზე ზრუნვას, სკოლებისა და სკოლა-პანსიონების რეაბილიტაციას, საჯარო სკოლების მასწავლებლებით უზრუნველყოფას, უცხო ენებისა და კომპიუტერული პროგრამების სწავლებას, ინკლუზიური სწავლების ხელშეწყობას, მათემატიკის გაძლიერებულ სწავლებას, უცხოეთში სტაჟირების მიზნით ახალგაზრდების გაგზავნას.
ჯანდაცვის პრიორიტეტებად მთავრობა კონკრეტული პროგრამების განხორციელებას განიხილავს. კერძოდ, გადაუდებელ და გეგმიურ ჰოსპიტალურ მომსახურებას, ონკოლოგიურ დახმარებას, ბავშვთა რეაბილიტაციას, კარდიოქირურგიულ მკურნალობას, სოფლის მოსახლეობისთვის ექიმამდელი სამედიცინო დახმარების მიწოდებას.

 

სოციალური კუთხით კი მთავრობა მზრუნველობამოკლებულ და მიუსაფარ პირთა დასახმარებლად, სოციალური აქტივობების განხორციელებას მიიჩნევს საჭიროდ. „ამ მხრივ განსაკუთრებული ყურადღება უნდა მიექცეს მარტოხელა დედებს და ორსულ ქალებს, რომელთა შვილები წარმოადგენენ მიტოვების რისკს, აღნიშნული პირებისთვის მატერიალური და მორალური მხარდაჭერისა და სოციალური მდგომარეობის გაუმჯობესებას“;
მაღალმთიანი რეგიონებისთვის კვალიფიციური კადრების მომზადებას და სამედიცინო პერსონალის სტიმულირებას მათთვის ხელფასის დანამატის დანიშვნით;

 

გარკვეული კატეგორიის სოციალურად დაუცველი ოჯახის წევრებისა და შეზღუდული შესაძლებლობის სტატუსის მქონე პირებისთვის პროფესიული სწავლება-გადამზადებას.

 

მთავრობის განცხადებით, სოფლის მეურნეობის განვითარების მიზნით, 2013 წელს სოფლებში უნდა გაიზარდოს ახალი ტექნოლოგიების დანერგვა და კონკურენტუნარიანი პროდუქცია. ამისთვის მნიშვნელოვანია ფერმერების სასათბურე კონსტრუქციებით უზრუნველყოფა, ფერმერების ხეხილოვანთა ნარგავებით უზრუნველყოფა, მეფუტკრეობის ხელშეწყობა.

 

 

 

 

მოსწავლეები კინოს იღებენ

„მეც ადამიანი ვარ“ – ეს არის პირველი ფილმი, რომელმაც სასკოლო ფილმების კონკურსზე პრიზი აიღო ნომინაციაში – საუკეთესო დებიუტი ფილმი. `დიპლომი მოგვცეს და კინოთეატრ „აპოლოს“ ბილეთებზე 50-პროცენტიანი ფასდაკლება მივიღეთ“ – ამბობს მარიამ კვაჭაძე. ის და ჯაბა წილოსანი ამ ფილმში მთავარ როლებსაც ასრულებენ.

 

 

ფილმი უსახლკარო, უპოვარი ადამიანის ყოფას ასახავს, რომელსაც ყოველდღიური არსებობისთვის ბრძოლა უწევს, ბოლოს კი იღუპება: „ჩვენ ერთი ადამიანის ისტორიით პრობლემა განვაზოგადეთ. ამ ადამიანის ცხოვრებაში ერთადერთი ნათელი წერტილი მეგობარი გოგონა იყო, რომელიც მას თანაუგრძნობდა და სულიერ მარტოობას უმსუბუქებდა. თუმცა, გოგონას შეყვარებულს არ მოეწონება მისი საქციელი, რაც კონფლიქტის მიზეზი გახდება. უპოვარი ადამიანი ისევ მარტო რჩება, რაც საბოლოოდ მას ანადგურებს. ჩვენ ამ ფილმით უფრო მეტი პასუხისმგებლობა საზოგადოებას დავაკისრეთ, რადგან ადამიანებს უნდა ჰქონდეთ სხვისი თანაგრძნობის უნარი“, _ ამბობს მეთორმეტეკლასელი სოფო პაქსაძე.

 

 

„შევეცადეთ გვეჩვენებინა საზოგადოების გულგრილობის პრობლემა სოციალურად დაუცველი ადამიანების მიმართ. ხშირად საზოგადოება ამ ადამიანებს არ განიხილავს როგორც სრულფასოვან წევრებს. ჩვენი გმირის დაღუპვის მიზეზი გაჭირვებასთან ერთად ადამიანური სითბოს ნაკლებობა იყო“ – ამბობს ჯაბა წილოსანი.

 

 

მარიამ კვაჭაძე: „სახელმწიფო ყველა ადამიანზე ვერ იზრუნებს, უფრო საზოგადოების პრობლემაა, როცა ადამიანები მარტო და გარიყულად რჩებიან“.

 

 

შორენა ბერიძე: „ეს ფილმები იქმნება როგორც სამოქალაქო, ასევე სასკოლო კლუბებში. სასკოლო კლუბის ფარგლებში ფილმი სოციალურ ქსელებსა და მასზე დამოკიდებულებაზე გავაკეთეთ. ვფიქრობ აქტუალური თემაა, რადგან Fაცებოოკ-ი და სხვა ტიპის სოციალური ქსელები არამარტო ჩვენი თაობის პრობლემაა. არის თუ არა სოციალური ქსელი ნარკოტიკი, ამაზე ზუსტი პასუხი არ არსებობს. ზოგისთვის შეიძლება კი, ზოგისთვის – არა“.

 

 

„ფილმში სხვადასხვა ასაკისა და სქესის ადამიანები გამოვკითხეთ. აღმოჩნდა, რომ სოციალური ქსელების მომხმარებლებს წიგნი ნაკლებად აინტერესებთ. თუმცა, თემა მაინც საკამათოდ დარჩა“, _ გვეუბნება მეგი ბერიძე.

 

 

მოსწავლეები ამბობენ, რომ არის თემები, რომლებსაც სიფრთხილით ეკიდებიან: „გვინდოდა ფილმის გაკეთება ე.წ „შავ სამყაროზე“. არის სტერეოტიპი, რომ ამ კატეგორიის ადამიანებს არ შეუძლიათ სიყვარული, რომ ისინი სასტიკი და დაუნდობლები არიან. მაგრამ საბოლოოდ მაინც გადავიფიქრეთ, რადგან არ გვინდოდა ვინმეს ეს „შავი სამყაროს“ პოპულარიზაციად აღექვა. ერთი სიტყვით, ფოკუსზე ვერ შევჯერდით“, _ გვიხსნის ჯაბა.

 

 

სოფოს პაქსაძისათვის კი ყველაზე მნიშვნელოვანი თემა, რომელზეც საზოგადოება უფრო მეტად უნდა საუბრობდეს, ნარკომანია და ძალადობაა. „ძალიან მაწუხებს გახშირებული მკვლელობები, განსაკუთრებით მაშინ, თუ ეს ახალგაზრდების მიერ არის ჩადენილი“.

 

 

ანრი ვარშანიძისა და ილო თოფჩიძის ფილმი შეზღუდული შესაძლებლობების ადამიანების პრობლემებს ეხება. „ვფიქრობთ, სახელმწიფოს მხრიდან არ არის ამ პირების უფლებები დაცული, რადგან მათ არ აქვთ სრულფასოვანი გადაადგილების საშუალება არც სკოლებში, არც ქალაქში, არ არსებობს ადაპტირებული ლიფტები მაღლივ კორპუსებში. ადამიანის უფლებების წინ წამოწევა ყველაზე მნიშვნელოვანია“, – ამბობენ ისინი.

 

 

მოსწავლეები ამბობენ, რომ ფილმების გადაღება ან სხვა ტიპის სასკოლო აქტივობები, მათ სკოლის პოპულარიზაციის გარდა წარმატებაში ეხმარება. „როცა რაიმე სერიოზული საკითხები განიხილება ან ეწყობა კონფერენციები, აქცენტი მაინც აქტიურ მოსწავლეებზე კეთდება“.

სასკოლო ოლიმპიადების მოტივაციას ზრდის

ლელა დუმბაძე


რატომ განსხვავდება სკოლისა და ილიმპიადის დონეები ერთმანეთისგან

სკოლის მოსწავლეებისთვის ოლიმპიადები დაიწყო. წელს ოლიმპიადას ინგლისურ ენასა და მათემატიკაში ორგანიზებას ორგანიზაცია „კინგ’ს-ი იუწევს. პირველი ოლიმპიადა „კინგს“-მა გასულ წელს ჩაატარა, რომლის მხარდამჭერი სპორტისა და ახალაგზრდულ საქმეთა სამინისტრო იყო, ინტელექტუალურ მხარდაჭერას კი საერთაშორისო სკოლა „ბრითიშ ქონექშენი“ უწევდა.

 

როგორც ორგანიზაციის წარმომადგენლები ამბობენ, ინგლისური ენის ოლიმპიადას მოსწავლეების მხრიდან დიდი დაინტერესება მოჰყვა, მასში გასულ წელს 12 ათასმა მოსწავლემ მიიღო მონაწილეობა: „ამიტომ „ქინგსმა“ გადაწყვიტა, რომ წელსაც ჩაგვეტარებინა ოლიმპიადა. წელს შევთავაზეთ ორი პროექტი:King’s English და King’s Math.“-ამბობს ერთ-ერთი ორგანიზატორი, გიორგი კვინიკაძე.
რა პრინციპით ადგენენ ოლიმპიადის ტესტებს?

 

„ქინგსის“ მიერ მოწოდებული განმარტებების მიხედვით, ოლიმპიადის ტესტებს ლონდონის ინგლისური ენის სკოლა ადგენს: „აღნიშნული ტესტები შეთავსებადია საქართველოს განათლებისა და მეცნიერების მიერ დადგენილ სასწავლო გეგმასთან“. თუმცა, როგორც გასული წლის ოლიმპიადაში გამარჯვებული მოსწავლეები „ბათუმელებთან“ საუბარში ამბობდნენ, ოლიმპიადის ტესტების დონე გაცილებით მაღალია სკოლის პროგრამაში გათვალისწინებულ დონეზე. `„ენაში პირველი კლასიდან რეპეტიტორებთან ვემზადები, მხოლოდ სკოლის დონით შეუძლებელია ოლიმპიადის ტესტების დაძლევა“ – გვითხრა მაშინ პროექტის ერთ-ერთმა გამარჯვებულმა მოსწავლემ, ანა რამიშვილმა.

 

„რა თქმა უნდა მხოლოდ სასკოლო დონის შესაბამისად ვერ დაიწერება ოლიმპიადის ტესტები, წინააღმდეგ შემთხვევაში ნიჭიერ ბავშვებს ვერ გამოვავლენთ“ _ აცხადებენ ორგანიზაციის წარმომადგენლები. მათივე თქმით, მოსწავლეების აქტივობამ გასულ წელთან შედარებით იკლო, რასაც „კინგსის“ წარმომადგენლები არ უკავშირებენ ოლიმპიადაში მონაწილეობის ხარჯებს. პირველ ტურში მონაწილეობა არის უფასო, მეორე ტურში გადასული მოსწავლეები კი იხდიან 15 ლარს. დასკვნითი ტური ტარდება თბილისში, რაც ასევე ხარჯებთან არის დაკავშირებული. „წელსაც იგივე იქნება გადასახადი, პირველი ტური იმიტომ არის უფასო, რომ ბავშვებმა გააანალიზონ ოლიმპიადის დონე და განსაზღვრონ, უღირთ თუ არა შემდგომ ეტაპში მონაწილეობა. ფინალის ხარჯებიც გავითვალისწინეთ, ამიტომ თბილისის გარდა მესამე ტური ჩატარდება ქუთაისშიც“.

 

როგორც სკოლის მასწავლებლები ამბობენ, სასკოლო პროგრამა ზოგადი უნარ-ჩვევების სწავლებას არ ითვალისწინებს, ოლიმპიადის ტესტების მესამე ეტაპი კი სწორედ უნარ-ჩვევებზე გათვლილი ამოცანებით არის შედგენილი.

 

პირველი საჯარო სკოლის დირექტორის, მედეა გვენეტაძის თქმით, „სკოლის პროგრამები პირველ და მეორე ტურში უთანაბრდება ოლიმპიადის დონეს, მაგრამ მესამე ტურში არის ისეთი საკითხები, რომელიც საერთოდ არ აქვთ სკოლაში მოსწავლეებს ნასწავლი. ვერ ვეტყვი, რომ ამის გამო სკოლას უფრო მეტი მოეთხოვება, ეს ალბათ გათვლილია მოსწავლის ინდივიდუალურ მუშაობაზე, დამატებით განათლებაზე. ფაქტია, რომ ოლიმპიადები მშობლებისა და მოსწავლეების მოტივაციას ზრდის. ჩვენი სკოლიდანაც ბევრი მონაწილეობს და გვყავდა გამარჯვებულებიც“.

 

მედეა გვენეტაძის თქმით, უნარ-ჩვევები ცალკე არ ისწავლება, „სასკოლო პროგრამაში შეიძლება მართლაც ბევრი რამეა გასათვალისწინებელი, შეიძლება მართლა ვერ სწვდება, იმას რასაც თანამედროვე სწავლის ბაზარი მოითხოვს, არის რაღაც დეტალები შესაცვლელი და იმედი გვაქვს, ახალ ეროვნულ სასწავლო გეგმაში შევა ცვლილება“.

 

 

აჭარის განათლების სამინისტროს 2013 წლის პრიორიტეტები

განათლების სამინისტროს პრიორიტეტებში კვლავ რჩება სკოლების რეაბილიტაცია. იგეგმება ერთი ახალი სკოლის მშენებლობა ქობულეთში, რისთვისაც ბიუჯეტში სამი მილიონი ლარია გათვალისწინებული. სამინისტრო აგრძელებს სასკოლო წიგნების დაფინანსების პროგრამას, თუმცა უარს ამბობს მოსწავლის ფორმების დაფინანსებაზე. განათლების მინისტრის, გია თავამაიშვილის აზრით, სასკოლო ფორმამ არ გაამართლა, „რადგან მან თავისი ფუნქცია დაკარგა და უბრალოდ, ტანსაცმლად გადაიქცა“.

 

სოციალურად დაუცველი მოსწავლეების სახელმძღვანელოებზე ბიუჯეტიდან 270 ათასი ლარი დაიხარჯება. შენარჩუნდება სტუდენტთა დაფინანსების პროგრამაც, ერთი სტუდენტის დაფინანსებისთვის დაახლოებით 2250 ლარია გათვალისწინებული, განათლების სამინისტრო სულ 226 სტუდენტს დაეხმარება.

 

სკოლებში მოსწავლეთა მოტივაციის ასამაღლებლად კი ბიუჯეტში 96 ათასი ლარია გათვალისწინებული. სამინისტრო აფინანსებს სკოლის კლუბების ხელშეწყობის პროგრამასაც, რისთვისაც 35 ათასი ლარი იქნება გათვალისწინებული.

 

უცხოეთში სტუდენტთა სტაჟირების პროგრამაზე დაიხარჯება 35 ათასი ლარი, ხოლო კინოწარმოების ხელშეწყობისთვის _ ასი ათასი ლარი: „განსაკუთრებით მნიშვნელოვანი იქნება ეს პროგრამა ხელოვნების ინსტიტუტის სტუდენტებისთვის, რომლებიც დოკუმენტურ თუ სხვა ჟანრის ფილმებზე იმუშავებენ“ _ განაცხადა მინისტრმა. მისივე თქმით, მოთხოვნა იყო სკოლა-პანსიონების დაფინანსების ზრდაზე, თუმცა „წარმოდგენილი პროექტები არ იყო სრულყოფილი, რის გამოც სამინისტრომ ბიუჯეტში არ გაითვალისწინა ეს საკითხი“ _ დასძინა გია თავამაიშვილმა.

 

კულტურული მემკვიდრეობის რეაბილიტაციისთვის ბიუჯეტში ნახევარი მილიონი ლარია გათვალისწინებული. იგეგმება ხიხანის ციხის ტერიტორიაზე სასმელი წყლის მიყვანა, არქეოლოგებისთვის სახლის მოწყობა და აღმოჩენილი ეკლესიის ნაშთების რეაბილიტაცია. მომავალი წლისათვის დაგეგმილია არქეოლოგიური მუზეუმის რეაბილიტაციაც, რისთვისაც ბიუჯეტში ერთი მილიონ 220 ათასი ლარია გათვალისწინებული.
მიზნობრივი პროგრამა გათვალისწინებულია მხატვრებისთვისაც. კონკურსის წესით შეირჩევა ოთხი მხატვარი, რომლებიც კვალიფიკაციას დანიასა და გერმანიაში აიმაღლებენ. პროგრამა საქართველო-დანიის პარტნიორული პროექტის ფარგლებში დაფინანსდება. დანიაში კვალიფიკაციის ასამაღლებლად დაგეგმილია მუსიკალური სკოლის მოსწავლეების გამგზავრებაც, თუმცა როგორც მინისტრი ამბობს, ეს ჯერ კიდევ მოლაპარაკებების საგანია.

 

განათლების მინისტრმა სპორტის ცალკე სამინისტროდ გამოყოფის იდეაც დააყენა. გია თავამაიშვილი ამბობს, რომ სურვილი აქვს საწყის საფეხურებზე სპორტული სექციები სახელმწიფომ დააფინანსოს, თუმცა ჯერ არ იცის, ეს რამდენად იქნება შესაძლებელი.

 

ბიუჯეტის პროექტის განხილვაზე არასამთავრობო ორგანიზაციების წარმომადგენლების მხრიდან გარკვეული რეკომენდაციებიც გაიცა.
„ახალგაზრდა იურისტთა ასოციაციის“ წარმომადგენლის, ნინო ტავლალაშვილის განცხადებით, სამინისტრომ ახალი სკოლების რეაბილიტაციის ან მშენებლობის დროს უნდა გაითვალისწინოს შეზღუდული შესაძლებლობის მქონე პირთა გადაადგილებისთვის საჭირო ნორმები. მინისტრის განმარტებით, შშმ პირთა გადაადგილება საერთაშორისო სტანდარტებით შესაძლებელი იქნება მხოლოდ იმ ახალ სკოლაში, რომლის მშენებლობაც ქობულეთშია დაგეგმილი: „სკოლას ექნება ლიფტიც, რომ მოსწავლეებმა, ვინც ეტლებით გადაადგილდება, შეძლონ მეორე და შემდგომ სართულებზე გადაადგილება. სხვა სკოლებში კი მხოლოდ სკოლის პირველ სართულზე იქნება შესაძლებელი ეტლით გადაადგილება. ლიფტები დიდ ხარჯებთანაა დაკავშირებული და ვერ შევძლებთ“.

 

ნინო ტავლალაშვილი შეეხო მაღალმთიანი რეგიონების სკოლებში ნაკლებკვალიფიციური პედაგოგების მუშაობასაც. მისი განცხადებით, ისეთ საგნებს როგორიცაა „სამოქალაქო განათლება“, ან „სახელმწიფო“, ძველი მენტალობის პედაგოგები ასწავლიან: „ერთ-ერთი მასწავლებელი საქართველოს კონსტიტუციას 1996 წლის ვერსიით ასწავლიდა მოსწავლეებს, ცვლილებების გარეშე. ვფიქრობ ასეთი პედაგოგები არათუ ვერ აამაღლებენ მოსწავლეთა განათლების დონეს, პირიქით ზიანსაც მიაყენებენ, ამიტომ კადრებზე სამინისტრომ უნდა იზრუნოს“.

 

ახალგაზრდულმა ორგანიზაცია „არტვეი“-მ უსინათლო მოსწავლეებისა და სტუდენტების პრობლემაზე გაამახვილა ყურადღება. მათი წარმომადგენლის განცხადებით, უსინათლო ადამიანების დიდმა ნაწილმა არ იცის კითხვა, რადგან არ ჰყავთ სპეციალისტი, ვინც ბრაილის შრიფტს ასწავლის მათ. აჭარაში სულ 400-მდე უსინათლოა რეგისტრირებული. ორგანიზაციის განცხადებით, აქედან სულ რამდენიმე მათგანმა იცის კითხვა. განათლების მინისტრის თქმით, პრობლემა არა მარტო კითხვის შესწავლაშია: `როგორც აღმოვაჩინე, უსინათლოებს ვერც უნივერსიტეტი ეხმარება, რადგან სტუდენტი აბარებს გამოცდებს, მაგრამ ამის შემდეგ ყველაფერი ჩერდება. მას არ აქვს შესაბამისი ლიტერატურა შემდგომი განათლებისთვის, გამოდის, ტყუილად იღებენ სტუდენტებს“.

 

ორგანიზაცია „სთეფ ფორვარდმა“ სმენადაქვეითებული ბავშვების სპორტულ აქტივობებში ჩართვის საკითხი წამოსწია წინ და განათლების სამინისტროს ამ საკითხზე ყურადღების გამახვილება სთხოვა. ორგანიზაცია „ინტელექტის“ ხელმძღვანელის, ლევან გობაძის აზრით კი, სკოლებში დაბალი დონეა ზუსტი მეცნიერებების სწავლის მხრივ, რაზეც სამინისტროს უფრო მკვეთრი რეაგირება უნდა ჰქონდეს. „ოლიმპიადებიდანაც კარგად ჩანს, რომ მოსწავლეების მცირე რაოდენობა ახერხებს მესამე ტურში გადასვლას. მაღალმთიანი რეგიონებიდან კი გასულ წელს არც ერთი მოსწავლე არ გასულა. მომავალი ტექნოლოგიებს ეკუთვნის, ამიტომ მათემატიკის სწავლება, ვფიქრობ, უფრო მაღალ დონეზე უნდა ავიდეს სკოლებში“.

ენერგო პრო-ჯორჯია: ჩვენი მიზეზით შუქი აღარ გაითიშება

ლელა დუმბაძე



ბლიცინტერვიუ კომპანია „ენერგო პრო-ჯორჯიას“ საზოგადოებასთან ურთიერთობის სამსახურის ხელმძღვანელთან, გიორგი სურმავასთან.

 

–  ბატონო გიორგი, რა კონკრეტული მიზეზების გამო ეთიშება მოსახლეობას ელექტროენერგია ბოლო ხანს ბათუმში და როდემდე გაგრძელდება ასე?

 

_ ჩვენ ტელევიზიითაც გამოვედით, ვაჩვენეთ ის ტრანსფორმატორი, რომელიც ჩაირთო და ვთქვი, რომ დღეიდან გათიშვები აღარ იქნება.

 

_ ამ განცხადების შემდეგ ღამის საათებში მაინც გაითიშა შუქი, რატომ?

 

_ ეს ჩვენი მიზეზით არ იყო გამოწვეული, სათავო ოფისმა გამორთო და ხუთ წუთში ისევ ჩართო. ჩვენი მიზეზით შუქი აღარ გაითიშება. თუ გამოირთო ხაზი, მაშინ კი.

 

_ მანამდე რა მიზეზით ითიშებოდა?

 

_ მანამდე გამოვცვალეთ 16-მეგავატიანი მაღალი ძაბვის ტრანსფორმატორი და დავაყენეთ ახალი, 25-მეგავატიანი ძაბვის ტრანსფორმატორი.

 

_ რატომ არ იგეგმება ტექნიკური სამუშაოები ზაფხულის პერიოდში?

 

_ ახლა გაფუჭდა. დაგვეტოვებინა ახალი წლის დღეებში? ერთი ტრანსფორმატორის იმედზე ხომ არ ვიქნებოდით, სასწრაფოდ მოგვიწია მისი აღდგენა.

 

_ აძლევთ მოსახლეობას გარანტიას, რომ ამის შემდეგ ინტენსიურად აღარ გაითიშება ელექტროენერგია, თანაც გაუფრთხილებლად?

 

_ გარანტია არაფრის არ არსებობს. თუ მოხდა საგანგებო შემთხვევა და დაზიანდა, ეს ნებისმიერ წუთს შეიძლება მოხდეს, სპეციალურად არავინ არ გამორთავს.

 

_ მოსახლეობაში უკვე იყო საუბარი საბოტაჟზე თქვენი მხრიდან…

 

_ ხალხი ბევრ რამეზე საუბრობს… ჩვენ გავაფრთხილეთ მოსახლეობა, რომ ერთსაათიანი შეზღუდვები იქნებოდა და მეტი რა ვქნათ.

 

_ ანუ შეზღუდვები დასრულდა?

 

_ დასრულდა, 20 დეკემბერს ჩავრთეთ სარელეო ხაზი, შეიძლება იქ მოხდეს რაღაც და ხუთი, მაქსიმუმ ათი წუთით გაითიშოს, მაგრამ ოპერატიულად აღდგება ელექტროენერგიის მიწოდება.

 

 

„ენერგო პრო“ ჩეხური კომპანიაა. საქართველოში „ენერგო-პრო“ ჯგუფის პროექტი განხორციელდა ჩეხეთის ექსპორტბანკის მხარდაჭერით, რომელიც სახელმწიფო საკუთრებაა.

Exit mobile version