Batumelebi

მგლების ბუნებიდან ამოღების უფლება ხულოს გამგეობას

„ამ ცხოველების ბუნებიდან ამოღებაზე უფლება გასულ წელსაც გვქონდა, მაგალითად, 6 მგლის, თუმცა ერთიც არ მოგვიკლავს. მიმდინარე წლის ზაფხულშიც მივმართეთ საქართველოს გარემოსა და ბუნებრივი რესურსების დაცვის სამინისტროს, ცხოველების ამოღების უფლება მოეცა, თუმცა მხოლოდ ახლახან მოგვწერეს თანხმობა, ისიც მგლებზე. მოვითხოვთ, ერთი დათვის ამოღების უფლებაც მოგვცენ, თუმცა პასუხი ჯერ არ მიგვიღია,“ – განაცხადა ხულოს მუნიციპალიტეტის გამგეობის ინფრასტრუქტურის სამსახურის უფროსმა ზაზა აბულაძემ.

მისივე თქმით, გამგეობის მოთხოვნა განპირობებული იყო მოსახლეობის ხშირი მომართვიანობით: „ინიციატივა ჩვენგან მოდიოდა, რადგან თხოვნა იყო მოსახლეობიდან – დათვი ხშირად აზიანებს ფართობებს, ნათესებს. იყო მგლების მიერ შინაურ პირუტყვზე თავდასხმის ფაქტებიც. თუმცა ეს ძირითადად გვიან გაზაფხულზე და ზაფხულში, მთაში წასვლის პერიოდში ხდება, როცა მოსახლეობას საქონელი საძოვრებზე გადაჰყავს“.

აღსანიშნავია, რომ ხელშეკრულებას, რომელსაც გარემოსა და ბუნებრივი რესურსების სამინისტრო მუნიციპალიტეტთან აფორმებს, მოქმედების ვადა 31 მაისამდე აქვს. მოსახლეობა კი ამბობს, რომ ამ პერიოდში მგელი, განსაკუთრებით კი დათვი, იმდენად არ აქტიურობს და არც აგრესიულობით გამოირჩევა.

გამგეობაში ვერ ხსნიან, თუ რა პრინციპით ხდება ხელშეკრულების მოქმედების ვადის განსაზღვრა. თუმცა, ამჯერადაც, 2016 წლის 31 მაისამდე ექნებათ ბუნებიდან 8 მგლის ამოღების უფლება, დათვზე კი პასუხი არ მიუღიათ.

„უფლება გვჭირდება იმისთვის, რომ თუ ხშირად აზიანებს ფართობს დათვი ან არის მგლის თავდასხმის საფრთხე, ჩავუსაფრდეთ და მოვკლათ ცხოველი. კანონით, ამოღების შემდეგ ხდება ლეშის დაწვა და დამარხვა. ესეც გარემოს დაცვის სამინისტროს წარმომადგენლების თანდასწრებით და შესაბამისი ოქმის შედგენით. გარეული ცხოველის ამოღება თუ დაიგეგმება, მას მონადირეთა კავშირის მონადირეები განახორციელებენ. გამგეობა მათთვის ტყვიებს შეისყიდის. თუმცა ასეთი ფაქტი ჯერ არ გვქონია. ზოგადად კი, კანონით, თუ ცხოველი თავს ესხმის ადამიანს და მის სიცოცხლეს საფრთხე ემუქრება, ამ შემთხვევაშიც შეიძლება მისი განადგურება. ბუნებრივია, აქ არავითარ ნებართვაზე საუბარი არ არის,“ – ამბობს ზაზა აბულაძე.

მისივე თქმით, მტაცებელ ცხოველთა გარკვეუული რაოდენობის ბუნებიდან ამოღების ნებართვის მიღება ნებისმიერ მუნიციპალიტეტს შეუძლია, თუ საჭიროდ ჩათვლის და თუ საქართველოს მთავრობაც დათანხმდება.

“საქართველოს გარემოსა და ბუნებრივი რესურსების დაცვის სამინისტროსა და ხულოს მუნიციპალიტეტის გამგეობას შორის „ხულოს მუნიციპალიტეტის ტერიტორიაზე მგლის რაოდენობის რეგულირების ღონისძიების განხორციელების შესახებ უფლებამოსილების დელეგირების თაობაზე“ გასაფორმებელი ხელშეკრულების პროექტის მოწონების შესახებ“ განკარგულება საქართველოს მთავრობამ მიმდინარე წლის 10 ნოემბერს გამოსცა.

აღნიშნული ხელშეკრულების საბოლოო, ხელმოწერილი ვარიანტი კი სამინისტროსგან ხულოს მუნიციპალიტეტს ჯერჯერობით არ მიუღია.

საქველმოქმედო ონლაინმაღაზია ბათუმში ონკოპალიატიური პაციენტებისთვის

პალიატიური მზრუნველობა აქტიური, მრავალპროფილური ზრუნვაა პაციენტზე, ტერმინალური დაავადებების სიმპტომების პრევენციისა და შემსუბუქების მიზნით. იგი გათვალისწინებულია პაციენტებისთვის ქრონიკული, უნკურნებელი დაავადებებით ტერმინალურ (სასიკვდილო) სტადიაში, როცა მათი სიცოცხლის ხანგრძლივობა სავარაუდოდ 6 თვეს ან უფრო ნაკლებს შეადგენს. საქართველოში ასეთი მზრუნველობის საჭიროების მქონედ, ძირითადად, ტერმინალური სტადიის ონკოლოგიური პაციენტები მოიაზრება.

ჯანდაცვის ეროვნული პროგრამის 2011 წლის სტატისტიკური მონაცემებით, ყოველწლიურად საქართველოში დაახლოებით 25 000 ადამიანი საჭიროებს პალიატიურ მზრუნველობას.

საქველმოქმედო პროექტის ავტორი, ონკოლოგი თეიმურაზ გოგიტიძე განმარტავს, რომ პალიატიური მზრუნველობის ორი ძირითადი მიმართულება არსებობს: შინ მოვლის მექანიზმი, რომელიც ბინაზე ექიმის კონსულტაციებს, ექთნის ყოველდღიურ (საჭიროების შემთხვევაში დღეში რამდენიმე) ვიზიტს, პაციენტისა და მისი ოჯახის წევრების ფსიქოლოგიურ მხარდაჭერას გულისხმობს; პალიატიური მზრუნველობის მეორე მექანიზმი კი ჰოსპისია, სიცოცხლის ბოლო დღეების მონიტორინგი სტაციონარში. იმის გამო, რომ ჰოსპისების მშენებლობა დიდ ხარჯებთანაა დაკავშირებული, საჭიროა ასეთი პაციენტების ბინაზე ჰოსპისის უზრუნველყოფა. “ევროპაშიც ყველაფერი სწორედ ბინაზე მოვლისგან დაიწყო, რადგან სტაციონარში მოვლა ძვირია, ცალკე ჰოსპისების აშენება კი კიდევ უფრო ძვირი,” – ამბობს თეიმურაზ გოგიტიძე.

დღეისთვის საქართველოში სულ სამი ჰოსპისი მოქმედებს – ფერისცვალების დედათა მონასტრის სასნეულო სახლი (7 საწოლი ქალებისთვის), ონკოპრევენციის პალიატიური მზრუნველობის ჰოსპისი 22 საწოლზე და ონკოლოგიის ნაციონალური ცენტრის პალიატიური მზრუნველობის განყოფილება – 18 საწოლზე. სამივე მათგანი თბილისშია.

აჭარის ჯანდაცვის სამინისტროს ცნობით, აჭარაში პალიატიური მზრუნველობის საჭიროების მქონე პაციენტებისთვის სტაციონარულ ჰოსპისს ონკოლოგიური ცენტრი ახორციელებს, რაც ფედერალური ბიუჯეტიდან ფინანსდება. ანუ ასეთი საჭიროების პაციენტები დაახლოებით ერთი კვირით წვებიან ონკოლოგიური ცენტრის სტაციონარში მანამ, სანამ მათი მდგომარეობა გარკვეულწილად არ დარეგულირდება, შემდეგ კი ამბულატორიულ მოვლაზე გადადიან. ასეთივე პაციენტებს ემსახურება ბათუმის მერიის შინმოვლის პროგრამაც, რომელიც გათვლილია არა მხოლოდ ონკოპალიატიური, არამედ შინ მოვლის საჭიროების მქონე სხვადასხვა კატეგორიის პაციენტზე. ამ ეტაპზე პროგრამით ასამდე ბენეფიციარი სარგებლობს. პროგრამა ითვალისწინებს პაციენტთათვის სამედიცინო და სოციალური სერვისების მიწოდებას სახლის პირობებში.

რეგიონებში მსგავსი ტიპის სამედიცინო მომსახურებას ბენეფიციარებს სოფლის ექიმები უწევენ. სპეციალისტების აზრით, ეს სერვისები არ არის საკმარისი ბინაზე ჰოსპისის პროგრამის განსახორციელებლად.

წინასწარი მონაცემებით, აჭარაში პალიატიური მზრუნველობის საჭიროების მქონე პაციენტთა რაოდენობა ყოველწლიურად 160-200 ადამიანია. “ფონდ ღია საზოგადოება საქართველოს” მიერ 2013 წელს ჩატარებული კვლევის შედეგებით კი, პალიატიური მზრუნველობა საქართველოში ყოველწლიურად 800-ზე მეტ ბავშვს ესაჭიროება.

თეიმურაზ გოგიტიძე ამბობს, რომ ევროპაში პალიატიურ მზრუნველობაზე დახარჯული თანხის ძირითადი ნაწილი ქველმოქმედებით არის შეგროვებული, დანარჩენს კი სახელმწიფო აფინანსებს. “ონკოლოგიურ პაციენტებს პალიატიური მზრუნველობის დროს მუდმივად ესაჭიროებათ თანხა. ევროპისა თუ ინგლისის ყველა ჰოსპისში, სადაც კი ვიყავი, მითხრეს, რომ დაახლოებით 60-70% ქველმოქმედებით შემოსული თანხაა, რომელიც მოიცავს როგორც უბრალო მოქალაქეების მიერ ცენტობით შეგროვებულ თანხას, ისე ბიზნესმენების მიერ გაკეთებულ მსხვილ შენატანებს,” – ამბობს ის.

სწორედ ასეთი პრაქტიკის დასამკვიდრებლად შეიქმნა საქველმოქმედო ორგანიზაცია “ბათუმის ჰოსპისი”, რომელიც გარდა საქველმოქმედო მაღაზიისა, ონკოპალიატიური მზრუნველობის საჭიროების მქონე პაციენტებისთვის თანხას “TBC ბანკშიც”, შეაგროვებს შემდეგ ანგარიშზე: GE38TB7219036080100003.

“საქველმოქმედო მაღაზია”, ე.წ. Charity Shop-ი დასავლეთში აპრობირებული მექანიზმია თანხის შესაგროვებლად. გარდა სხვადასხვა დონორი ორგანიზაციის მოზიდვისა, გვინდა ადამიანებს გაუჩნდეთ გრძნობა, რომ რაღაც პერიოდულობით, რადენიმე თვეში თუ წელიწადში ერთხელ, თუნდაც ერთი ლარი გაიღოს იმისთვის, რომ ონკოლოგიურ პაციენტს მის ქალაქში რაღაცით დაეხმაროს. ეს შეიძლება იყოს თვეში 20 ლარი, მას შემდეგ რაც მაღაზია უფრო პოპულარული გახდება, შეიძლება ეს გახდეს თვეში 1000 ლარი. ჩვენი მიზანია თვეში 5000 ლარის მოგროვება, ეს საკმარისი იქნება თვეში ათი პაციენტის სრულფასოვნად მოსავლელად,” – ამბობს თეიმურაზ გოგიტიძე.

ექიმის განმარტებით, ყველაზე დიდი პრობლემა, რის გადაჭრაშიც ონკოპალიატიურ პაციენტებს დაეხმარებით, ტკივილის გაყუჩებაა. ზოგჯერ რეცეპტის გამოწერის, ზოგჯერ კი ნათესავების გაუბედაობის გამო, ონკოპაციენტებს მორფის გაკეთება უგვიანდებათ. “უმეტესად ხდება ისე, რომ ცოტას უკეთებენ და ეს არ ჰყოფნის პაციენტის ტკივილებს. სამწუხაროდ, ვერც მე ვახერხებ ყველა პაციენტის ყოველდღიურ კონტროლს და როცა კვირის ბოლოს მოვიკითხავ, აღმოჩნდება, რომ პაციენტს მცირე დოზა გაუკეთეს. ეს კი იმას ნიშნავს, რომ პაციენტს იმ კვირის განმავლობში ტკივილები ჰქონდა. მათ ეს ტკივილი არ უნდა ჰქონდეთ,” – ამბობს ონკოლოგი.

ექიმის თქმით, ამ ეტაპზე “საზღვაო ჰოსპიტალს” შვიდ პაციენტზე მორფის ორი პამპი აქვს, რომელიც სპეციალური მოწყობილობაა ასეთი პაციენტებისთვის მორფის მცირე დოზებით, კანქვეშ, უმტკივნეულოდ შესაყვანად. იგი 20 მილილიტრ წამალს ანაწილებს ერთ კვირაზე და პაციენტს შეუძლია ეს დოზები ღილაკზე თითის დაჭერით არეგულიროს. პამპებს იმ პაციენტებს ატანენ სახლში, რომელთაც ძლიერი ტკივილები აწუხებს. საქველმოქმედო მაღაზიის ამუშავების შემდეგ კი 20-მდე ასეთი პამპის შეძენა იგეგმება. თითოეული ასეთი მოწყობილობის ფასი საშუალოდ 100 ევროა.

თეიმურაზ გოგიტიძე ამბობს, რომ კიდევ ერთი სერვისი, რაც ონკოპალიატიურ პაციენტებსა და მათი ოჯახის წევრებს ესაჭიროებათ, ფსიქოლოგის კონსულტაციაა. შემოწირულობებიდან თანხა ამ სერვისზეც დაიხარჯება. “პრაქტიკამ გვიჩვენა, რომ ფსიქოლოგის მუშაობის შემდეგ უმეტესობას უმცირდება გამაყუჩებლის დოზები, ორჯერ, სამჯერ… ზოგს საერთოდ აღარ სჭირდება,” – ამბობს ექიმი.

ამ ეტაპზე საქველმოქმედო მაღაზიის საორგანიზაციო ჯგუფში რამდენიმე ადამიანია, ისინი უზრუნველყოფენ მოსახლეობისგან ნივთების ჩაბარებას, ნივთებისთვის ფოტოების გადაღებას და ინტერნეტში – აუქციონზე განთავსებას. ყოველი თვის ბოლოს კი, ფეისბუქის გვერზე გამოქვეყნდება ანგარიში – თუ რა თანხა მოგროვდა ამ დროის განმავლობაში და რაში დაიხარჯა თითოეული ლარი.

იმისთვის, რომ თქვენი წვლილი შეიტანოთ ონკოპალიატიური პაციენტებისთვის ტკივილის შემსუბუქებაში, ნივთების ჩასაბარებლად შეგიძლიათ ორგანიზაცია “ბათუმი ჰოსპისის” ოპერატორს დაუკავშირდეთ ნომერზე: 574 10 00 30 ან მისწეროთ ფეისბუქზე (Batumi Hospice). გარდა ამისა, შეგიძლიათ დარეკოთ ორგანიზაციის საქველმოქმედო ხაზზე: 09 01 70 10 23, ზარის ღირებულება 1 ლარია.

შემოდგომა სოფელ კირნათში [ფოტო]

ფიზიკური აქტივობის დეფიციტი – შაქრიანი დიაბეტი ტიპი 2-ის მიზეზი

“ინსულინრეზისტენტობის (ინსულინისადმი მგრძნობელობის დაქვეითების) გამომწვევი ერთ-ერთი მიზეზი არის ჭარბი წონა, რომელიც შეიძლება გამოწვეული იყოს კვების რაციონში მაღალი კალორაჟით ან ფიზიკური აქტივობის დეფიციტით, ამიტომ დიაბეტი ტიპი 2-ის დროს, ძირითადი მკურნალობის გარდა, დიდი მნიშვნელობა ენიჭება ფიზიკური აქტივობის გაზრდასა და სწორ კვებას, რადგან ამ შემთხვევაში პაციენტის წონა იკლებს – მგრძნობელობა ინსულინის მიმართ უმჯობესდება და შესაბამისად, შაქრის დონეც ქვეითდება ორგანიზმში,” – განმარტავს ენდოკრინოლოგი შოთა ჯანჯღავა.

ექიმი ამბობს, რომ პროტოკოლის მიხედვით, დაავადების დროს აუცილებელია პაციენტი ფიზიკური აქტივობის რომელიმე ფორმით დაკავდეს, ეს შეიძლება იყოს: ყოველდღიურად ფეხით სიარული 30-45 წუთის განმავლობაში, ცურვა ნახევარი საათის განმავლობაში, დატვირთვა მსუბუქი ფიტნესით ან აკვა-აერობიკით – “რა თქმა უნდა აუცილებელია დოზირება, რადგან თუ ზედმეტი მოუვიდა დიაბეტიან პაციენტს, შეიძლება იგი ჰიპოგლიკემიურ მდგომარეობაში გადავიდეს და ამან უფრო გაართულოს საქმე. ბუნებრივია, ფიტნესზე სიარულს ვერ მოვთხოვთ 80 წლის პაციენტს, მაგრამ ნელი ნაბიჯებით ზღვის პირზე ერთსაათიანი გასეირნება მისთვის სავსებით შესაძლებელია. ამიტომ უშუალოდ პაციენტებში ასაკის, სქესის, წონისა და შაქრის (გლუკოზის) დონის მიხედვით უნდა განისაზღვროს ფიზიკური აქტივობის ინტენსივობა,” – ამბობს ის.

ფიზიკური აქტივობის (ფეხით სიარული, ცურვა, ვარჯიში, ცეკვა და სხვა) მომატებაა რეკომენდებული დიაბეტი ტიპი 2-ის პრევენციისთვისაც. ჯანმოს რეკომენდაციით, ყოველდღიურად ოცდაათი წუთი საშუალო სიმძიმის ფიზიკური აქტივობა და ჯანსაღი დიეტა საგრძნობლად ამცირებს დიაბეტი ტიპი 2-ის განვითარების რისკს. დიაბეტი ტიპი 1-ის პრევენცია კი შეუძლებელია.

შაქრიანი დიაბეტი ტიპი 2 აქამდე 40 წლის და უფროსი ადამიანების დაავადებად მიიჩნეოდა, მაგრამ ენდოკრინოლოგი შოთა ჯანჯღავას თქმით, დაავადება საგრძნობლად გაახალგაზრდავდა და ცხოვრების არაჯანსაღი წესის გამო იგი უკვე 14-15 წლის მოზარდებსაც ხშირად ვლინდება. “რაც 10-15 წლის წინ სრულიად გამორიცხული იყო, ასეთი პრაქტიკა არ არსებობდა,” – ამბობს ექიმი.

დიაბეტი ტიპი 2-ის მქონე პაციენტთა ასაკის გაახალგაზრდავებას მოწმობს ჯანმო-ს სტატისტიკაც. ამის მთავარ მიზეზად კი, მსოფლიო მასშტაბით, გახშირებული ბავშვთა სიმსუქნე და ფიზიკური აქტივობის დეფიციტია. ჯანმოს რეკომენდაციით, ბავშვებს ყოველდღიურად ესაჭიროებათ სულ ცოტა 1 საათი საშუალო ან ძლიერი ინტენსივობის ფიზიკური აქტივობა. მიუხედავად ამისა, დღეს ევროპელი მოზარდების (13-15 წლის) მხოლოდ 34%-ია ფიზიკურად საკმარისად აქტიური. ჯანმო-ს ცნობით, ბოლო დროს ფიზიკური აქტივობა საგრძნობლად მცირდება 11-15 წლის მოზარდებში. ეს ტენდენცია განსაკუთრებით ძლიერია მოზარდ გოგონებში.

ენდოკრინოლოგის თქმით, ჯანსაღი ცხოვრების წესს გადამწყვეტი მნიშვნელობა აქვს დაავადების მართვაში. გარდა ფიზიკური აქტივობის მომატებისა, შაქრიანი დიაბეტი ტიპი 2-ით დაავადებულმა პაციენტებმა კვების რაციონიდან უნდა ამოიღონ ადვილად ათვისებადი ნახშირწყლები, ანუ ტკბილეული (ყველაფერი რაც მზადდება შაქრისგან). “მაქსიმალურად უნდა შეიზღუდოს ცომეული, ასევე შემწვარი საკვები. ნებადართულია მოხარშული, მოთუშული და რაც შეიძლება ნაკლებ მარილიანი საკვები. ხილიდან უნდა შეიზღუდოს – ბანანის, მსხლის, კარალიოკის, ლეღვის, ყურძნისა და სხვა ტკბილი ხილის მიღება, მარწყვი ციტრუსი და დანარჩენი ხილი ნებადართულია, თუმცა ყველაფერი ზომიერად,” – ამბობს ექიმი.

შაქრიანი დიაბეტი ტიპი 2-ის ძირითადი სიმპტომებია: პირის სიმშრალე და შესაბამისად წყურვილის შეგრძნება, ასევე ხშირი შარდვა, მადის გაძლიერება, წონის კლება, დაღლილობა, მხედველობის დაბინდვა, ჭრილობების ძნელად შეხორცება და მუქი ლაქები კანზე (ძირითადად იღლიებსა და კისერზე).

პაატა შამუგიას საჯარო ლექცია ბათუმში

ლექციის მიზანია, თანამედროვე ლიტერატურაში არსებული გამოწვევების თავმოყრა და საერთო ნიშნით ტიპოლოგია. პაატა შამუგია ისაუბრებს უახლეს ლიტერატურულ ტენდენციებსა და პერსპექტივებზე.

ლექცია ჩატარდება 32-ე აუდიტორიაში.

საჯარო ლექცია აჭარის ავტონომიური რესპუბლიკის განათლების, კულტურისა და სპორტის სამინისტროს დაფინანსებით გაიმართება.

მინი-ფეხბურთის კლუბი ”ახპიური”

”ახპიურის” გერბი და დროშა

პრეზენტაციას ესწრებოდნენ „ახპიურის“ ფეხბუთელები, სომხური დიასპორის წარმომადგენლები, აჭარის სომეხთა კავშირის თავმჯდომარე, ბათუმში სომხეთის რესპუბლიკის გენერალური კონსული და აჭარის სპორტისა და ახალგაზრდობის საქმეთა დეპარტამენტის წარმომადგენლები.

„ახპიური“ 2014 წელს შეიქმნა. მანამდე, კი 2009 წლიდან არსებობდა გუნდი, რომელიც მონაწილეობდა ბათუმის ადმინისტრაციულ უბნებს შორის გამართულ ტურნირებში ახლა კი მონაწილეოს საქართველოს ბიზნესლიგის პირველობაზე.

კლუბში ამჟამად, ოციდან ოცდახუთ წლამდე, 18 სომეხი, ებრაელი, ქართველი, უკრაინელები, ბელორუსი ფეხბურთელია . კლუბის მთავარი მწვრთნელია კარენ მინასიანი, გუნდის კაპიტანი – არმენ გალოიანი.

არტურ ოგანესიანი

აჭარის სომხური დიასპორის პრეს-მდივნისა და „ახპიურის“ მენეჯერის არტურ ოგანესიანის თქმით, ამჟამად გუნდს ფინანსურად სომხური დიასპორა ეხმარება. თუმცა ტურნირზე გამგზავრების ხარჯების დაფინანსებაში აჭარის სპორტისა და ახალგაზრდობის საქმეთა დეპარტამენტიც მონაწილეობს, რომელმაც დააფინანსა ახპიურის პირველი გასვლითი ტურნირი ბათუმთან დაძმობილებულ ქალაქ ვანაძორში, სადაც კლუბი ვანაძრის მერიის თასის მფლობელი გახდა.

„ჩვენ მხარს ვუჭერთ როგორც პროფესიულ სპორტის სახეობებს ისე არაპროფესიული სპორტის სახეობებსაც, ჯანსაღი ცხოვრების წესის დანერგვა ჩვენთვის ერთ-ერთი პრიორიტეტია“ – განუცხადა „ბათუმელბს“ აჭარის სპორტისა და ახალგაზრდობის საქმეთა დეპარტამენტის ხელმძღვანელის მოადგილემ დავით მიქელაძემ.

არტურ ოგანესიანის თქმითვე, 2016 წლიდან შეიძლება დეპარტამენტმა დააფინანსოს კალენდარული ღონისძიებები.

დავით მიქელაძე

„დეპარტამენტი ჯერჯერობით დააკვირდება „ახპიურს“, იმიტომ, რომ ახალი გუნდია. წარმატების მიხედვით ჩვენ აუცილებლად დავეხმარებით ამ გუნდს“ – აღნიშნა დავით მიქელაძემ.

კლუბს ასევე მხარს უჭერს აჭარის საპლაჟო ფეხბურთის გუნდი.

კახა მიქელაძე

„ბიზნესლიგაში ჩვენ ვმონაწილეობთ სუპერლიგაში „ახპიური“ ქვედა ლიგაშია. ლიგის წესდება და დებულება ითვალისწინებს ფეხბურთელის დამატების შესაძლებლობას, ასე რომ თუ დასჭირდებათ მათ ჩვენი რესურსის გამოყენება. შეგვიძლია დავახმაროთ ფეხბურთელი, ეს არ იქნება ცალმხრივი თანამშრომლობა. ჩვენ საპლაჟო ფეხბურთის გუნდი ვართ და ვმონაწილეობთ საერთაშორისო შეჯიბრებაში, გამომდინარე იქიდან რომ საქართველოს ორგზის ჩემპიონები ვართ და წელსაც ვემზადებით 2016 წელს ჩემპიონთა ლიგაზე ასპარეზობისთვის. თუ გამოჩნდება ისეთი ფეხბურთელი, რომელიც დააკმაყოფილებს ჩვენი გუნდის მოთხოვნებს, ქვიშაზე თამაშის სპციფიკას, მზად ვართ შევთავაზოთ, ითამაშონ ჩვენს გუნდში“ – თქვა აჭარის ქვიშის ფეხბურთის გუნდის ხელმძღვანელმა კახა მიქელაძემ.

”ახპიურის” ფეხბურთელები

სომხური დიასპორის წარმომადგენლები

”ახპიურის” გერბი და დროშა

”ახპიურის” ჰიმნი

იხილეთ ”ახპიურის” ჰიმნი, რომელსაც ასრულებს ბათუმის სახელმწიფო ვოკალური ანსამბლი “ბათუმი”.

მუსიკა შექმნილია სომხური, ერთ-ერთი პატრიოტული სიმღერის მელოდიაზე. ტექსტის ავტორია პოეტი ვახტანგ ღლონტი.

მაღალმთიან დასახლებაში მცხოვრები პირის სტატუსის მინიჭების წესი

სტატუსის მინიჭების მიზნით, ფიზიკური პირი განცხადებით მიმართავს შესაბამისი მუნიციპალიტეტის გამგებელს/მერს.

18 წლამდე ფიზიკური პირისათვის სტატუსის მინიჭების საკითხი განიხილება მისი კანონიერი წარმომადგენლის განცხადების საფუძველზე.

16 წლამდე არასრულწლოვნის კანონიერ წარმომადგენელს, ამ წესის შესაბამისად, სტატუსის მინიჭების თაობაზე განცხადების წარდგენა შეუძლია იმ შემთხვევაში, თუ არასრულწლოვანს წარმოეშობა „მაღალმთიანი რეგიონების განვითარების შესახებ“ საქართველოს კანონით განსაზღვრული შეღავათებით სარგებლობის უფლება.

სტატუსის მინიჭების თაობაზე ადმინისტრაციულ წარმოებას მუნიციპალიტეტი, 2016 წლის 15 იანვრამდე, თავისი ინიციატივით ახორციელებს იმ ფიზიკურ პირთა მიმართ, რომლებიც:

ა) არიან პროფესიული განათლების მასწავლებლები და დასაქმებულნი არიან მაღალმთიან დასახლებაში მდებარე, სახელმწიფოს მიერ დაფუძნებულ პროფესიულ საგანმანათლებლო დაწესებულებაში, საჯარო სკოლის მასწავლებლები, მოსწავლეები და მათი მშობლები და შესაბამისად, დასაქმებულნი არიან/ირიცხებიან/მათი შვილები ირიცხებიან მაღალმთიან დასახლებაში მდებარე საჯარო სკოლაში, ამ წესის ამოქმედების დღიდან 9 თვის ან მეტი ვადით ადრე;

ბ) რეგისტრირებულნი არიან მაღალმთიან დასახლებაში და დასაქმებულნი არიან მაღალმთიან დასახლებაში მდებარე საბიუჯეტო ორგანიზაციაში, ამ წესის ამოქმედების დღიდან 9 თვის ან მეტი ვადით ადრე;

გ) სოციალურად დაუცველი ოჯახების მონაცემთა ერთიანი ბაზის მონაცემებით ოჯახი რეგისტრირებულია და საცხოვრებელ ადგილად მითითებულია მაღალმთიანი დასახლება, ამ წესის ამოქმედების თვის მინიმუმ წინა 9 თვის ვადისა, უწყვეტად.

სტატუსის მინიჭების, შეჩერების, შეწყვეტის და აღდგენის შესახებ ინფორმაცია საქართველოს იუსტიციის მინისტრის მიერ დამტკიცებული წესის შესაბამისად, აისახება მაღალმთიან დასახლებაში მუდმივად მცხოვრებ პირთა რეესტრში.

ბათუმის კორპუსი ენმ-ის წევრების სამსახურში აღდგენაზე: შეიძლება ჩვენ გავმართლდეთ

„განჩინება როდესაც მოგვივა ოფიციალურად აღმასრულებიდან, შემდეგ, რა თქმა უნდა, იურისტები გაეცნობიან ამას და მივიღებ გადაწყვეტილებას. სააპელაციო სასამართლოს მიერ გამოგზავნილი განჩინება ჯერ არ ჩაგვბარებია. განჩინება მოიტანეს ვიღაც მოქალაქეებმა, შესაბამისად, უნდა ჩამბარდეს ოფიციალურად“.

თუ დადასტურდება, რომ განჩინება რეალურია, მაშინ ზურა ნაკაიძე მის აღსრულებას აპირებს: „სასამართლო გადაწყვეტილება უნდა აღვასრულოთ, მაგრამ რა და როგორ, ეს უნდა გადავწყვიტოთ. ისე, ჯერჯერობით, შტატები არ არის“.

ზურა ნაკაიძის თქმით, ენმ-ის წევრებმა შეცდომაში შეიყვანეს ჟურნალისტები, რადგან ქუთაისის სასამართლოს განჩინება არ არის საბოლოო დოკუმენტი:

„ბათუმის სასამართლომ ზაფხულში დააკმაყოფილა მათი სარჩელი. ამ გადაწყვეტილების დაუყოვნებელი აღსრულების მოთხოვნით მათ მიმართეს ისევ ბათუმის სასამართლოს, რაზეც უარი მიიღეს. ეს უარი შემდეგ მათ გაასაჩივრეს ქუთაისში. აი, ეს საჩივარი დაუყოვნებლივ აღსრულებაზე დააკმაყოფილა სააპელაციო სასამართლომ. თორემ ჩვენ გასაჩივრებულზე, რომელიც ბათუმის სასამართლოს გადაწყვეტილებას ეხება, პროცესი ქუთაისში ჯერ არ ჩატარებულა. ორი პარალელური დავა მიდის. შეიძლება სააპელაციო სასამართლომ დაადგინოს, რომ მისი დღევანდელი განჩინება არასწორია და გავმართლდეთ ჩვენ. მაშინ კიდევ ერთხელ ყველაფერი უკან იქნება დასაბრუნებელი“.

რაც შეეხება ნაცდური ხელფასის ანაზღაურებას, ზურა ნაკაიძის თქმით, აიპი „ბათუმის კორპუსს“ თავისი შემოსავლები არ აქვს, ამიტომ ჯერ არ იცის, როგორ შეძლებენ მისი ყოფილი თანამშრომლებისთვის ნაცდური თანხის ანაზღაურებას.

დღეს ენმ-ის სამ წევრს ბათუმში, რომლებიც გაზაფხულზე აიპი “ბათუმის კორპუსიდან” გაათავისუფლეს, ქუთაისის სააპელაციო სასამართლოს განჩინება ჩაჰბარდათ, რომლის მიხედვითაც სამივე მათგანი სამსახურში დაუყოვნებლივ უნდა აღადგინონ.

„ბათუმის წყალი“ ინტერნეტმომსახურებაში 36 556 ლარს გადაიხდის

ინტერნეტმომსახურება უნდა განხორციელდეს ქალაქ ბათუმში შემდეგ მისამართებზე:

თაბუკაშვილის ქ. №19 – შპს „ბათუმის წყლის“ ადმინისტრაციული შენობა;

თაბუკაშვილის ქ. №19 – შპს „ბათუმის წყლის“ ავტოფარეხის ტერიტორია;

ტ. აბუსერისძის ქ. № 6 – შპს „ბათუმის წყლის“ №1 სატუმბო სადგური;

ადლიის დასახლება – შპს „ბათუმის წყლის“ გამწმენდი ნაგებობა;

წერეთლის ქ. №2, შპს „ბათუმის წყალი“ და

ჯავახიშვილის ქ. №72, შპს „ბათუმის წყალი“.

სატენდერო პირობების თანახმად, გამარჯვებულმა პრეტენდენტმა უნდა უზრუნველყოს საქართველოს კომუნიკაციების ეროვნული კომისიის მიერ განსაზღვრული პარამეტრების შესაბამისი ხარისხიანი ინტერნეტის მიწოდება;

არაპროვაიდერი კომპანიის გამარჯვების შემთხვევაში კი მომსახურებასთან დაკავშირებული სამონტაჟო, გაყვანილობის და გადაერთების სამუშაოებს უზრუნველყოფს მიმწოდებელი საკუთარი ხარჯებით.

ინსტალაცია უნდა განხორციელდეს ხელშეკულების გაფორმებიდან 2015 წლის 31 დეკემბრის ჩათვლით, ხოლო ინტერნეტის მიწოდების მომსახურება უნდა განხორციელდეს 2016 წლის 1 იანვრიდან, 2016 წლის 31 დეკემბრის ჩათვლით. ელექტრონული ტენდერი 30 ნოემბერს დასრულდება.

სააპელაციო სასამართლოს დადგენილება ენმ-ის წევრების სამსახურში დაუყოვნებლივ აღდგენაზე

ქუთაისის სააპელაციო სასამართლოს განჩინება ნაციონალური მოძრაობის წევრებს დღეს ჩაბარდათ. განჩინებაში წერია: „დადგენილია, რომ ლაშა კილაბერიას, ირაკლი მექვაბიშვილის და თომა ხალვაშის სასარჩელო მოთხოვნა დაკმაყოფილდეს და ბათილად იქნა ცნობილი ბათუმის კორპუსის დირექტორის 2015 წლის 01 აპრილის #32 ბრძანება ლაშა კილაბერიას ბათუმის კორპუსის დირექტორის მოადგილის თანამდებობიდან გათავისუფლების შესახებ…“

განჩინების თანახმად, სამივე მათგანი დაუყოვნებლივ უნდა აღადგინონ თანამდებობაზე, შესაბამისად, ლაშა კილაბერია ისევ უნდა გახდეს აიპი „ბათუმის კორპუსის“ დირექტორის მოადგილე. თავიანთ სამსახურებს დაუბრუნდებიან ირაკლი მექვაბიშვილი და თომა ხალვაშიც. ასევე სამივე მათგანს უნდა აუნაზღაურდეს სამი თვის ნაცდური ხელფასი:

ლაშა კილაბერიას ერთი თვის ანაზღაურება იყო 1100 ლარი, ხოლო მისი თანაპარტიელების 750-750 ლარი.

ლაშა კილაბერია ამბობს, რომ მის თანამდებობაზე ამ დროისთვის ნაციონალური მოძრაობის ყოფილი წევრი დავით კასრაძე მუშაობს: „რეორგანიზაციის შედეგად ჩემი თანამდებობა გაუქმდა და შეიქმნა განყოფილება, რომლის ხელმძღვანელად დანიშნეს დათო კასრაძე, ყოფილი ნაციონალური მოძრაობის წევრი. სხვების თანამდებობებზეც „ოცნების“ საარჩევნო ზონების შტაბების კოორდინატორები ჰყავთ დანიშნულები. ჩვენი წამოსვლის შემდეგ ამ სამსახურში შტატები 40-დან 67-მდე გაიზარდა და ყველგან მათი პარტიული აქტივისტები დანიშნეს“.

ენმ-ის სამი წევრის სამსახურში აღდგენაზე გადაწყვეტილება, ჯერ კიდევ აგვისტოს თვეში, ბათუმის საქალაქო სასამართლო მიიღო. თუმცა ბათუმის მერიამ სასამართლოს ეს გადაწყვეტილება ქუთისის სააპელაციო სასამართლოში გაასაჩივრა. ქუთაისის სააპელაციო სასამრთლოს გადაწყვეტილება გასაჩივრდებას აღარ ექვემდებარება.

2015-11-24 დღის სტატისტიკა – ბათუმში პარკირების წესების დარღვევაზე

მათგან ყველაზე მეტი, 365 – პარკირების საფასურის გადახდის გარეშე დგომის გამო დაჯარიმდა, 38 – ნიშანში დგომისთვის, 10 – ტროტუარზე დგომისთვის, 2 – ტაქსის და სპეცტქნიკის პარკირების საფასურის გადაუხდელობის გამო, 6 დგომა-გაჩერების წესის დარღვევისთვის და კიდევ 6 – ავტობუსის გაჩერებაზე დგომის გამო.

ოთხი ქორწინება და ერთი იძულებით გათხოვების მცდელობა

პოსტერი ქალთა მოძრაობის ფეისბუკის გვერდიდან.ქალთა მოძრაობა არასრულწლოვანთა ქორწინების წინააღმდეგ აქციას 25 ნოემბერს რამდენიმე ქალაქში ერთდროულად გამართავს

ოფიციალური ინფორმაციით, ზაფხულში 15 წლის გოგონას იძულებით გათხოვების მცდელობა დაფიქსირდა ხელვაჩაურის მუნიციპალიტეტში, რის გამოც არასრულწლოვან გოგონასა და დედას შორის კონფლიქტი წარმოიშვა.

„ამ დროისთვის გოგონა მინდობით აღზრდაშია, რადგან დედასთან უთანხმოება აქვს,“ – ამბობს სოციალური მუშაკი ნანი ბოლქვაძე.
სოციალური მუშაკის ინფორმაციით, მოზარდი 14 წლის ასაკში გაათხოვეს.

„ბავშვმა მიიღო გათხოვების გადაწყვეტილება და გაიპარა ბიჭთან ერთად. ალბათ ოჯახიდანაც იყო თანხმობა, რადგან შემდეგ გოგონა გვიყვებოდა, რომ ეს იძულებით გააკეთა. შემდეგ მოხდა ისე, რომ ბიჭმა მიატოვა. გოგონა ჩაიკეტა სახლში და ძალიან განიცდიდა, ჰქონდა სიუციდის მცდელობაც“.

სოციალური მუშაკის თქმით, მშობლების ჩარევით გოგონა ხელმეორედ გააყოლეს იმავე, ასევე არასრულწლოვან ბიჭს. „თუმცა, იქედან გამომდინარე, რომ ოჯახი შეიქმნა არა სიყვარულით, არამედ გარიგებით, მაინც არ შედგა მათი ურთიერთობა გოგონა მშობლების ოჯახში დაბრუნდა“.

ნანი ბოლქვაძე ამბობს, რომ ოჯახის დანგრევის შემდეგ მათ სამედიცინო სამსახურიდან დაუკავშირდნენ და საქმეში ჩართეს.

„ჩავრთეთ ფსიქოლოგი და ვმუშაობდით გოგონასთანაც და ბიოლოგიურ ოჯახთანაც. რადგან გოგონაზე ხდებოდა ფსიქოლოგიური ზეწოლა, შემდეგ კი ფიზიკური ძალადობა, საქმეში ჩავრთეთ სამართალდამცავებიც და გამოიწერა შემაკავებელი ორდერი. ჩვენ ვცხოვრობთ სტერეოტიპულ გარემოში, სადაც ოჯახში მიბრუნებულ გოგოზე ხშირად ხდება ზეწოლა. „შენ ოჯახში დაბრუნებული ხარ“, „ოჯახს სირცხვილი აჭამე“ – ეუბნებოდნენ და ბავშვი დაითრგუნა. არაერთი მცდელობა ჰქონდა სახლიდან გაქცევის“.

ამ ამბებიდან ერთი წლის შემდეგ, როცა გოგონა 15 წლის შესრულდა, სოციალური მუშაკის ინფორმაციით, მშობლები მას არასასურველ მამაკაცზე გათხოვებას უპირებდნენ.

„ჩვენ მოზარდისგან მივიღეთ ეს ინფორმაცია და მაშინვე ჩავრთეთ შესაბამისი სამსახურები. გოგონა დათრგუნულია ფსიქოლოგიურად და მასთან ხანგრძლივი მუშაობაა საჭირო. ამ დროისთვის გოგონა იმყოფება მინდობით აღზრდაში და მისი უფლებები დაცულია. ვმუშაობთ იმაზე, რომ სამომავლოდ გოგონამ პროფესიული განათლება მიიღოს, რადგან სკოლაში არ დადის“.

სოციალური მუშაკი ამბობს, რომ ისინი გოგონას ოჯახთანაც მუშაობენ და არწმუნებენ იმაში, რომ მოზარდზე ძალადობა დაუშვებელია: „აუცილებელია ადამიანების ცნობიერება ამაღლდეს და მშობლებმა გაიგონ, რომ თუნდაც შეცდომის გამო არ შეიძლება შვილი უარყო ან მასზე მოახდინო ფსიქოლოგიური და ფიზიკური ძალადობა, მით უმეტეს, რომ გოგონას აქვს ეპილეფსია ქვეცითი აშლილობით“.

სოციალური სამსახურის ინფორმაციით, არასრულწლოვანი გოგონას გათხოვების ერთი ფაქტი შუახევის მუნიციპალიტეტში დაფიქსირდა. გოგონა 15 წლის ასაკში გაათხოვეს. სოციალური მუშაკის, ნინო ტყეშელაშვილის ინფორმაციით, მოზარდი მშობლების ნებართვით გათხოვდა.

„ფაქტი მოხდა გაზაფხულზე, როცა ჯერ კიდევ არ იყო სასწავლო პროცესი დასრულებული. მშობლები საქმის კურსში იყვნენ. თუმცა, როცა გაიგეს, რომ არასრულწლოვანზე ქორწინება კანონით ისჯება, გოგონა სკოლაში დააბრუნეს და საბაზისო საფეხური დაამთავრებინეს. თუმცა, ამის შემდეგ სწავლა აღარ გაუგრძელებია, რადგან სექტემბერში როცა გოგონას 16 წელი შეუსრულდა, მშობლებმა ქორწილი ოფიციალურად გადაუხადეს“, – ამბობს ნინო ტყეშელაშვილი.

მისივე ინფორმაციით, სკოლამ არასრულწლოვანი მოსწავლის გათხოვების შესახებ სოციალური მომსახურების სააგენტოს ორი კვირის შემდეგ შეატყობინა.

არასრულწლოვანი გოგონების გათხოვების ორი შემთხვევა იყო ქობულეთის მუნიციპალიტეტში. ამ შემთხვევაშიც გოგონა იყო 16 წლის, მისი მეუღლე კი – 19-ის.

„მომართვა გაკეთდა თბილისის საჯარო სკოლიდან, გოგონა იყო მეთერთმეტეკლასელი. სოციალური სამსახურის ჩარევის შემდეგ, გოგონამ გააგრძელა ქობულეთის სკოლაში სწავლა.

რაც შეეხება მეორე ფაქტს, გათხოვების დროს გოგონა იყო 17 წლის, მისი მეუღლე კი – 20 წლის. ჩვენ გვქონდა მშობლებთან საუბარი. იმ დროისთვის გოგონა გამოსული იყო სკოლიდან და გეგმავდა კოლეჯში ჩაბარებას. თუმცა გააგრძელა თუ არა სწავლა გათხოვების შემდეგ, ამის თაობაზე ინფორმაცია არ გვაქვს“, – ამბობს სოციალური მუშაკი.

სკოლა მოსწავლის გათხოვების შესახებ ინფორმაციას შესაბამის სამსახურებს ფაქტის გაგების მომენტიდან უგზავნის. „როგორც ვიცით, ამ შემთხვევაში სკოლამ შეტყობინება ორი კვირის შემდეგ გააგზავნა, ანუ მას შემდეგ, როცა გოგონა არ გამოცხადდა სკოლაში და თანაკლასელებმა თქვეს, რომ ის გათხოვდა“.

არასრულწლოვანი გოგონას გათხოვების ერთი შემთხვევა დაფიქსირდა ბათუმშიც. სოციალური სამსახურის ინფორმაციით, გათხოვების მომენტში გოგონა არ იყო 16 წლის, ბიჭი კი 21 წლის იყო. „გაიპარნენ და ასე დაქორწინდნენ, თუმცა როგორც გავარკვიეთ, არც მშობლები იყვნენ ქორწინების წინააღმდეგი“, – ამბობს სოციალური მუშაკი.

მოქმედი კანონმდებლობის მიხედვით, 16 წელს მიუღწეველთან სექსუალური ურთიერთობა სისხლის სამართლის კანონმდებლობით ისჯება. „როცა ინფორმაცია შემოვიდა ჩვენთან და მშობლებმა გაარკვიეს, რომ არასრულწლოვნის ქორწინება კანონს ეწინააღმდეგება, გოგონასა და ბიჭის მშობლები შეთანხმდნენ იმაზე, რომ სანამ გოგონა 16 წლის არ გახდებოდა, ის სკოლაში ივლიდა და მხოლოდ ამის შემდეგ გააყოლებდნენ ოფიციალურად“, -ამბობს ნინო ტყეშელაშვილი.

სოციალური მუშაკის თქმით, ბათუმის შემთხვევაში არასრულწლოვანთა ქორწინების ფაქტზე სამართალდამცავებიც ინფორმირებულნი იყვნენ: „ჩვენ ჩავრთეთ ისინი საქმეში, თუმცა, რა ზომები იქნა მათი მხრიდან მიღებული, ამის შესახებ ინფორმაციას არ ვფლობთ“.

საქართველოს პარლამენტის დეპუტატის თამარ კორძაიას ინიციატივით, პარლამენტი განიხილავს „საქართველოს სამოქალაქო კოდექსში“ ცვლილებების შეტანას, რომელიც კრძალავს არასრულწლოვანი გოგონებისა და ბიჭების როგორც იძულებით, ასევე ნებაყოფლობით ქორწინებას. ცვლილების მიხედვით, ქორწინება მხოლოდ 18 წლის ასაკში იქნება შესაძლებელი და მშობელს ან მეურვეს უფლება აღარ ექნება, არასრულწლოვან შვილს თანხმობა მისცეს ქორწინებაზე. ეს საკითხი მოექცევა სასამართლოს კომპეტენციის ფარგლებში.

„გვინდა, რომ სასამართლოს მხრიდანაც გამონაკლისი დაშვებული იყოს მხოლოდ პატივსადები მიზეზის გამო“, – ამბობს თამარ კორძაია. ეს პატივსადები მიზეზი არასრულწლოვნის ორსულობა ან ბავშვის დაბადებაა.

კანონპროექტის წარდგენისას თამარ კორძაიამ პარლამენტში განაცხადა, რომ საკანონმდებლო ცვლილების ინიციატივის მიზეზი სახალხო დამცველის ანგარიში გახდა, სადაც მოყვანილია დასაბუთებული ფაქტები არასრულწლოვანთა იძულებითი ქორწინების შესახებ.

„მშობლები ხშირად ბოროტად სარგებლობენ მშობლის უფლევა-მოვალეობით და აიძულებენ საკუთარ შვილებს დაქორწინებას“, – ამბობს დეპუტატი. მისი თქმით, ნაადრევი ქორწინების შემთხვევაში გოგონებს/ბიჭებს ერთმევათ თავისუფალი განვითარების უფლება და ეზღუდებათ განათლების მიღების შესაძლებლობა.

თამარ კორძაიას თქმით, აღნიშნული ცვლილება არ ეწინააღმდეგება ბავშვთა უფლებების კონვენციას, „პირიქით, ბავშვის უფლებათა კომიტეტი რეკომენდაციას აძლევს ყველა სახელმწიფოს, რათა ქორწინების მინიმალური ასაკი გაიზარდოს 18 წლამდე. ეს იქნება იმის გარანტია, რომ მაქსიმალურად იყოს დაცული კონვენციით დაცული ბავშვის ყველა უფლება“.

ბავშვის უფლებათა კონვენციის მიხედვით, სახელმწიფოებმა ზიანის მომტანი ტრადიციული პრაქტიკის მიმართ საკანონმდებლო პოლიტიკა უნდა გაამკაცრონ.

”ბათუმის წყლის” განცხადება

წყალმომარაგება სამუშაოების დასრულებისთანავე, დღეს 18:00 საათამდე აღდგება.

შსს-ს განცხადება: სავიზო კონტროლი გამკაცრდა

2015 წლის 13 ნოემბერს პარიზში მომხდარი ტერორისტული აქტების შემდეგ, შინაგან საქმეთა მინისტრის – გიორგი მღებრიშვილის დავალებით, საქართველოს სახელმწიფო საზღვრის ყველა გამშვებ პუნქტში სავიზო კონტროლი გამკაცრდა.

საპატრულო პოლიციის თანამშრომლები ახდენენ მგზავრებთან დეტალურ გასაუბრებას და მათი ვიზიტის ნამდვილი მოტივაციის გამოვლენას. განსაკუთრებული ყურადღებით მოწმდება ქვეყანაში შემომსვლელთა სამგზავრო დოკუმენტები, კონტროლდება სატრანზიტო მგზავრთა ნაკადი, რათა მაღალი რისკების მქონე ქვეყნების მოქალაქეები, საქართველოს გავლით, სხვა ქვეყნებში არალეგალურად არ მოხვდნენ. ზემოხსენებული პროცედურები საერთაშორისო სტანდარტების შესაბამისად ტარდება.

2015 წლის 14 ნოემბრიდან 24 ნოემბრის ჩათვლით, სასაზღვრო-სამიგრაციო კონტროლის გავლით, საქართველოში შემოსვლაზე უარი უცხო ქვეყნის 479 მოქალაქეს ეთქვა.

შინაგან საქმეთა მინისტრის გადაწყვეტილებით, საქართველოს სახელმწიფო სახმელეთო საზღვრის დაცვისა და სასაზღვრო კონტროლის გამკაცრების მიზნით, გაძლიერდა სასაზღვრო პოლიციის პირადი შემადგენლობა და მოხდა დამატებითი ძალების მობილიზება.

სასაზღვრო პოლიციის თანამშრომლებმა 2015 წლის 14-დან 24 ნოემბრის ჩათვლით, საქართველოს სახელმწიფო სახმელეთო საზღვრის უკანონოდ კვეთის ბრალდებით, საქართველოს 1 და უცხო ქვეყნის 31 მოქალაქე დააკავეს.

საქართველოს შინაგან საქმეთა სამინისტრო კვლავაც აგრძელებს განსაკუთრებულ რეჟიმში მუშაობას, რომ დაიცვას ქვეყნის მოსახლეობის უსაფრთხოება.

შსს-მ საზღვრის უკანონოდ გადაკვეთის მცდელობის ფაქტზე 17 პირი დააკავა

„შსს-ს სასაზღვრო პოლიციის საგამოძიებო-ოპერატიული მთავარი სამმართველოს, საპატრულო პოლიციის დეპარტამენტისა და შემოსავლების სამსახურის საბაჟო დეპარტამენტის თანამშრომლებმა, ერთობლივად ჩატარებული ოპერატიულ-საგამოძიებო ღონისძიებების შედეგად, პირველი სამმართველოს (ბათუმი) N1 სასაზღვრო სექტორის (სარფი) დასაცავ მონაკვეთზე, სომალის რესპუბლიკის 15, საქართველოს 1 და თურქეთის რესპუბლიკის 1 მოქალაქე მიგრანტის უკანონოდ გადაყვანის მცდელობისა და საქართველოს სახელმწიფო საზღვრის უკანონოდ, ჯგუფურად გადაკვეთის მცდელობის ბრალდებით დააკავეს.

გამოძიებამ დაადგინა, რომ საქართველოსა და თურქეთის რესპუბლიკის მოქალაქეები, სატვირთო ავტომანქანაში არსებული სპეციალური სამალავის მეშვეობით, სომალის რესპუბლიკის მოქალაქეების თურქეთში უკანონოდ გადაყვანას ცდილობდნენ.

გამოძიება საქართველოს სსკ-ის 19-344-ე მუხლის მე-2 ნაწილის „ა“ ქვეპუნქტით და 19-344 პრიმა მუხლის მე-2 ნაწილის „ბ“ ქვეპუნქტით მიმდინარეობს“.

ტარიელ ნაკაიძე: ეს საკმაოდ სახიფათო ვიდეოა, ამ თემაზე მხოლოდ აღშფოთება საკმარისი არ არის

ტარიელ ნაკაიძე ამბობს, რომ ხვიჩა გობაძეს, რომელიც ვიდეოში ჩანს და საქართველოს მოსახლეობას მიმართავს, პირადად იცნობს:

ერთ-ერთი პირი, რომელიც საქართველოს ISIS-ის სახელით ემუქრება ხვიჩა გობაძეა

”ნეტგაზეთის” მოპოვებული ინფორმაციით, ხვიჩა გობაძე რადიკალი ისლამის მიმდევარია, რომელმაც დაახლოებით 2 თვის წინ დატოვა საქართველოს ტერიტორია. მანამდე იგი ბათუმში იმყოფებოდა.

გობაძე სასკოლო ასაკში, წალკაში ყოფნის დროს სკოლამ შეარჩია როგორც ნიჭიერი ბავშვი. იგი ერთი წელი სწავლობდა კომაროვის გამაძლიერებელ მათემატიკურ სკოლაში. ბათუმში ჩამოსვლის შემდეგ ერთი წელი რელიგიურ სკოლაში ისწავლა, ორი წელი კი – კაიროში. იცის სრულყოფილად არაბული და ასევე ზეპირად იცის ყურანი.

დღეს, 23 ნოემბერს, ვებგვერდზე ”ხალიფატი – ისლამური სახელმწიფო” გავრცელდა ვიდეომიმართვა, სადაც საქართველოს მოქალაქეებს სისხლისღვრით ემუქრებიან.

სახელმწიფო უსაფრთხოების სამსახურის უფროსის მოადგილე ლევან იზორია 16 ნოემბერს მაესტროს ეთერში განაცხადა, რომ „ისლამური სახელმწიფოს” პროპაგანდისტული ქართული ვებგვერდების შექმნის თაობაზე გამოძიება მიმდინარეობს. იზორიას თქმით, ისინი მიმართავენ სასამართლოს, რომ აირკძალოს ეს საიტები.

”ნეტგაზეთის” შეკითხვაზე, მიმართა თუ არა სასამართლოს სუს-მა ამ შუამდგომლობით, უსაფრთხოების სამსახურის პრესსამსახურში ასე უპასუხეს:

“გამოძიების ინტერესებიდან გამომდინარე, ვერ გიპასუხებთ ამ კითხვაზე, თუმცა იმავე ინტერვიუში ლევან იზორიამ განმარტა, რომ ამ პროცედურისთვის დრო იყო საჭირო”.

სახელმწიფო უსაფრთხოების სამსახურმა ასევე გამოძიება დაიწყო წალკის რაიონის სოფელ კოხტას იმამის, მურმან პაიჭაძის სახელით გავრცელებული მუქარის შემცველი განცხადების ფაქტზე.

გამოძიება ჯერ კიდევ იანვრიდან მიმდინარეობს თამაზ ჭაღალიძის წინააღმდეგაც, რომელმაც ფეისბუქით არაერთი ვიდეომიმართვა გაავრცელა.

სარაგბო კლუბი „ბათუმი“

პირველი ნაკრების ზედიზედ მესამე მსოფლიო ალაფაზე მონაწილეობა, იქ მოგებული თამაშები, უკანასკნელის შემდეგ მიღწეული შედეგით პირდაპირ მსოფლიო ალაფაზე გასვლა, სხვადასხვა ასაკობრივი ნაკრებების წარმატებები მსოფლიოსა და ევროპის ჩემპიონატებზე, არცთუ მცირე რაოდენობა უცხოეთში მოთამაშე ქართველი მოთამაშეებისა, რომლებიც წამყვანი სარაგბო ქვეყნების ტოპგუნდებში თამაშობენ, მათი როგორც გუნდური, ასევე ინდივიდუალური აღიარება და წარმატებები – არასრული ჩამონათვალია იმ მიღწევებისა, რომლებიც ამ საუკუნეში ქართული რაგბის უახლეს ისტორიას უკავშირდება.

რა ასაკიდან შეიძლება მივიყვანოთ ბავშვი რაგბიზე

როგორც ბავშვთა რაგბის განვითარების ხელმძღვანელი ზვიად უნგიაძე ამბობს: ისინი უარს არავის ეუბნებიან, ვისაც სურს ითამაშოს რაგბი, თუმცა რაც უფრო პატარა ასაკში მოხვდება ბავშვი რაგბის სკოლაში, მით უფრო დიდი შანსია იმისა, რომ ის მომავალში დიდ რაგბის ითამაშებს, რადგან მოზარდი ადრეული ასაკიდანვე ეფლება პროფესიულ უნარ-ჩვევებს, გამოიმუშავებს ნებისყოფას და სათამაშო დისციპლინას. ამასთან, რაც ყველაზე მთავარია, პროფესიონალი ტრენერის ხელში ხდება მისი ფიზიკურად სწორად განვითარება“.

ამჟამად სარაგბო კლუბის ბაზაზე არსებულ სარაგბო სკოლებში 8 ლიცენზირებულ მწვრთნელთან 2002 წლიდან 2008 წლამდე დაბადებული ბავშვები ეუფლებიან სპორტის ამ სახეობას.

სად შეიძლება ვატაროთ ბავშვი რაგბიზე ბათუმში

რაგბის სკოლები ბათუმში ტერიტორიულად 8 სხვადასხვა ადგილზეა განაწილებული და ნებისმიერმა შეიძლება შეარჩიოს მისთვის სასურველი ადგილმდებარეობა. ყველა ჯგუფი სხვადასხვა დროს ვარჯიშობს, ამიტომ თქვენთვის ხელსაყრელი დროს შერჩევაც არის შესაძლებელი.

კლუბი მუნიციპალურ ბალანსზეა, მას ბათუმის საკრებულო აფინანსებს. შესაბამისად, სრულიად უფასოა: ვარჯიში, ფორმა, შეჯიბრებებზე გამგზავრება და კვება.

რაგბის სკოლებში გაწევრიანების ან სხვა ინფორმაციის მისაღებად, შეგიძლიათ მიმართოთ კლუბებსა და მწვრთნელებს შემდეგ მისამართებზე:

• თამარის დასახლება, ყინულის სასახლე, სასულიერო გიმნაზია, მწვრთნელი რამაზ სანებლიძე, მობ.: 593 64 92 62, თამაშობენ 2003/2004,2005/2006,2007/2008 წლებში დაბადებული ახალგაზრდები.

• მე-14 საჯარო სკოლა, მწვრთნელი გიორგი კალანდაძე, მობ.: 593 64 92 62, თამაშობენ, 2005/2006 წლებში დაბადებული ახალგაზრდები.

• მე-14 საჯარო სკოლა, მწვრთნელი დიმიტრი დუმბაძე, მობ.: 514 89 24 24, თამაშობენ, 2003/2004 წლებში დაბადებული ახალგაზრდები.

• მე-14 საჯარო სკოლა, მწვრთნელი გიგა სერგია, მობ.: 593 92 39 92, თამაშობენ, 2005/2006/2007 წლებში დაბადებული ახალგაზრდები.

• მე-9 საჯარო სკოლა, მწვრთნელი ნიკა ნინიძე, მობ.: 593 90 67 90, თამაშობენ, 2004/2005/2006/2007 წლებში დაბადებული ახალგაზრდები.

• 28-ე საჯარო სკოლა, მწვრთნელი თედო დუმბაძე, მობ.: 599 27 87 54, თამაშობენ, 2002/2006 წლებში დაბადებული ახალგაზრდები.

• მახინჯაური, მწვრთნელი მინდია ბოლქვაძე, მობ.: 571 14 56 28, თამაშობენ, 2002/2003 წლებში დაბადებული ახალგაზრდები.

• ხელვაჩაური, მწვრთნელი გურამ ქერქაძე, მობ.: 568 60 63 63, თამაშობენ 2003/2006 წლებში დაბადებული ახალგაზრდები.

სარაგბო კლუბი ბათუმის „ბათუმი“

www.rcbatumi.ge

მის.: ქალაქი ბათუმი, გორგილაძის ქუჩა N12

ტელ.: 27 28 87

რაგბი ჩვენი თამაშია!

პარტნიორობა ენების სრულყოფილი სწავლებისათვის

უკვე რამდენიმე წელია სკოლა ,,ევრო 2000’’ აქცენტს სწორედ გერმანულ ენაზე აკეთებს და სერიოზულ წარმატებებსაც მიაღწია. ამას, რა თქმა უნდა, წინ უძღოდა დაუღალავი შრომა და მუდმივი ზრუნვა პროფესიული სრულყოფისათვის. წლების განმავლობაში პერიოდულად მიემგზავრებიან გერმანული ენის პედაგოგები გერმანიის სხვადასხვა ქალაქში კვალიფიკაციის ასამაღლებელ კურსებზე. ამჯერად გერმანიის ქალაქ დიუსელდორფში საერთაშორისო კომუნიკაციის ინსტიტუტისა და გერმანიის პედაგოგიური გაცვლითი სამსახურის მიერ ორგანიზებულ საერთაშორისო სემინარში მონაწილეობდა მასწავლებელი ირმა დავითაძე. სემინარის ინიციატორი იყო სკოლა „ევრო 2000“’ – ის პარტნიორი ორგანიზაციის „გერმანიის სასკოლო სამსახური უცხოეთში (ZFA)“. სემინარი საინტერესო და მრავალფეროვანი იყო;

მეთოდურ-დიდაქტიკური კურსის დღის წესრიგში შედიოდა შემდეგი საკითხები:

• „გერმანული ენის _ როგორც უცხო ენის სწავლების მეთოდიკა გერმანული ენის დიპლომის სკოლებში;

• გაკვეთილის კონცეფციების შექმნა;

• გერმანიის სკოლების საგაკვეთილო პროცესის დაკვირვება. სემინარის განმავლობაში დამუშავდა ისეთი აქტუალური თემები, როგორებიცაა:

• გერმანიის სასკოლო განათლება და მასწავლებელთა პედაგოგიური განათლება ნორდრაინ-ვესტფალენში;

• უცხო ენის სწავლების თანამედროვე მეთოდების დანერგვა;

• თანამედროვე მედიასაშუალებების გამოყენების ტექნიკა გერმანული ენის გაკვეთილზე და მოსწავლეთა მოტივირება;

• პრეზენტაციის ტექნიკის მიწოდება;

• გერმანიის ქვეყანათმცოდნეობა და მისი დიდაქტიზირება;

• კოოპერატიული სწავლება და ჯგუფური მუშაობა გერმანული ენის გაკვეთილზე;

• გერმანულენოვანი საგაკვეთილო მასალების საძიებო სისტემა; მაღალხარისხიანი გერმანულენოვანი ვებგვერდები და მუშაობის ტექნიკა.

სემინარი ორ კვირას გაგრძელდა; ირმა დავითაძე, დანარჩენ 17 მონაწილესთან ერთად, მუშაობდა ზემოთ აღნიშნულ თემებზე, ასევე ესწრებოდა გერმანიის სკოლებში საგაკვეთილო პროცესებს და განიხილავდა მათ მონაწილეებთან ერთად.

სემინარის ფარგლებში მონაწილეები გაეცნენ ნორდრაინ-ვესტფალენის კულტურასა და ყოველდღიურობას, ქალაქ დიუსელდორფის, კიოლნისა და ბონის ღირშესანიშნაობებსა და ისტორიას.

გერმანიაში მიღებული ცოდნა და გამოცდილება დაეხმარება ჩვენს პედაგოგებს, კიდევ უფრო ნაყოფიერი და მიზანმიმართული გახდეს სკოლაში გერმანული ენის სწავლება.

ილია გოგიტიძე ჩემპიონია

საზეიმო დახვედრა ილია გოგიტიძეს

ილიასათვის ეს ტურნირი პირველი არ ყოფილა. ის ოთხი წლის ასაკიდან დადის ფიგურულ სრიალზე. 2013 წლიდან უკვე აქტიურად მონაწილეობდა სხვადასხვა ტიპის შეჯიბრში და ბევრ წარმატებას მიაღწია. 2013-2014 წლებში ზედიზედ მოიგო საქართველოს ჩემპიონატი და პირველი ადგილის მფლობელი გახდა, ამავე წელს უნგრეთში, ბუდაპეშტში გამართულ საერთაშორისო ტურნირზე – 25 Sportland Trophy მესამე ადგილი მოიპოვა. მოიგო ასევე „აჭარის თასი’“ (I ადგილი); 2015 წელს ორ საერთაშორისო ტურნირში მონაწილეობდა: მე-4 ადგილის მფლობელი გახდა ტურნირში – Mellmut Seibt Memorial 2015 (ავსტრია, ქ. ვენა), ხოლო მე-6 ადგილით დაგვიბრუნდა ტურნირიდან – Rooster cup ( საფრანგეთი, ქ.პარიზი).

2015 წელი წარმატებული აღმოჩნდა ილიასათვის. რეიტინგული ტურნირის გარდა პირველი ადგილი დაიკავა აგრეთვე საქართველოს ჩემპიონატში ფიგურულ ციგურაობაში.

ილია ასეთივე წარმატებულია ყოვედღიურ ცხოვრებაში, გულითადი მეგობარი, თბილი, ტოლერანტული, ბეჯითი მოსწავლეა. უყვართ მეგობრებსა და მასწავლებლებს და ამაყობენ მისით. განსაკუთრებით ამაყობს მისი დამრიგებელი თინათინ მეფარიშვილი, რომლის ინიციატივითაც მოეწყო ეს გულთბილი და საზეიმო დახვედრა.

,,ევრო-2000’’ -ის პედაგოგიური კოლექტივი და დირექცია ულოცავს ილიას ამ დიდ გამარჯვებას და უსურვებს შემდგომ წარმატებებს.

P.S. სტატია უკვე მომზადებული იყო, როცა სკოლის დირექტორმა საზეიმოდ გაგვაცნო ილია გოგიტიძის სწავლის საფასურის გადასახადისაგან გათავისუფლების ბრძანება!

გამგებლის მოადგილის ვაკანტური თანამდებობა

რატომ დარჩა ვაკანტური გამგებლის მოადგილის თანამდებობა ქედის მუნიციპალიტეტში? – ამ კითხვით მუნიციპალიტეტის გამგებელს დავით დუმბაძეს მივმართეთ. ის აცხადებს, რომ ვაკანტურ პოზიციაზე მის მოადგილედ ეკონომიკური განათლების მქონე კადრის დანიშვნა უნდოდა. შესაბამისი კადრის ძიებამ კი გამგებლის მოადგილის დანიშვნის პროცესი დააყოვნა.

„განათლებით ინჟინერი ვარ, მეორე სპეციალობით კი – იურისტი. იქედან გამომდინარე, რომ ერთი მოადგილე განათლების კუთხით მუშაობს და მეორე – ჯანდაცვის, მინდოდა მოადგილე განათლებით ეკონომისტი ყოფილიყო და ფინანსური კუთხით ემუშავა. ეს იყო მიზეზი, რამაც დააყოვნა პროცესი. კარგ ფინანსისტს ვეძებდი“, – ამბობს გამგებელი.

კითხვაზე, არის თუ არა საჭიროება ვაკანტური თანამდებობის დროულად შევსება და ხომ არ აფერხებს შტატით გათვალისწინებული კადრის არარსებობა სამუშაო პროცესს მუნიციპალიტეტში, დავით დუმბაძე პასუხობს:

„ამ ეტაპზე სამუშაოს თავს ვართმევთ, მაგრამ, ვფიქრობთ, ან შეიცვლება სტრუქტურა, ან ვნახავთ კარგ ფინანსისტს. საჭიროება ნამდვილად არის. ვფიქრობთ, მალე გამოინახება შესაბამისი კადრი“.

მუნიციპალიტეტებში გამგებლებს კანონმდებლობით პირველი მოადგილე და მოადგილეები ჰყავთ. ქედაში სწორედ პირველი მოადგილის პოზიციაა ვაკანტური. მოადგილეების თანამდებობას აქ მამუკა ფარტენაძე და გურამ ბერიძე იკავებენ. რაც შეეხება პირველი მოადგილის თანამდებობას – მას შემდეგ, რაც ქედაში გამგებლის პოზიციაზე დავით დუმბაძე აირჩიეს, მის მოადგილედ გურამ ლომინაძე დანიშნა. ლომინაძე ამ თანამდებაზე ქედის გამგეობაში რვა თვის განმავლობაში მუშაობდა, დაკავებული თანამდებობიდან კი ის გამგებლისვე განცხადების საფუძველზე გათავისუფლდა.

ვინ და როგორ მართავს სტიქიას აჭარაში

აჭარის ჯანდაცვის მინისტრის ნუგზარ სურმანიძის განმარტებით, რომელიც სტიქიური მოვლენების დროს აჭარის მთავრობის საგანგებო შტაბს არაერთხელ ხელმძღვანელობდა, სტიქიური მოვლენების განვითარებისას პრიორიტეტი სიცოცხლის დაცვას ენიჭება.

„გააჩნია სტიქიის მასშტაბებს. ჩვენ ვაწვდით ინფორმაციას საქართველოს მთავრობას. თუკი ჩვენი რესურსი არ არის საკმარისი, მაშინ შეიძლება საგზაო დეპარტამენტის ტექნიკა გამოვიყენოთ ან სხვა რეგიონების სამაშველო სამსახურები დაგვეხმარნონ. ზიანის შესამცირებლად საჭიროა კომპლექსური მიდგომა. ჩვენ ვალდებულები ვართ დავიცვათ ადამიანების სიცოცხლე და შემდეგ მათი ქონება, ასევე მუნიციპალური ქონება. იქმნება საგანგებო შტაბი, რომელიც 24-საათიან რეჟიმში მუშაობს. შეტყობინების მიღებისთანავე ადგილზე გადის რეაგირების ჯგუფი, საფრთხის შემცველი ადგილებიდან მოსახლეობა გამოგვყავს:.

რეგიონის მუნიციპალიტეტებში, სადაც გეოლოგების დასკვნებით უფრო მეტი მეწყერსაშიში ზონაა და (ეს ზონები უმეტეს შემთხვევებში დასახლებულია) მცირემასშტაბიანი სტიქიის დროსაც კი მოსახლეობა ელექტროენერგიის გარეშე რჩება, გამგებლები სიტუაციას ადგილობრივი წარმომადგენლების დახმარებით აკონტროლებენ.

„ყველა უბანში გვყავს ჩვენი წარმომადგენელი, რომელიც დროულად გვატყობინებს ვითარებას სოფელში – მეწყერმა გზა ხომ არ ჩაკეტა და ჩვენ დაუყოვნებლივ ვრეაგირებთ. თუ ადგილობრივი რესურსი საკმარისი არ აღმოჩნდა, მაშინ დახმარებას მთავრობას ვთხოვთ“, – ამბობს ხელვაჩაურის გამგებელი ნადიმ ვარშანიძე.

გასულ კვირას სტიქიური მოვლენების გამო ხელვაჩაურის მუნიციპალიტეტის სოფლებიდან ორი ოჯახის ევეკუაცია გახდა საჭირო. გამგებლის ინფორმაციით, ისინი მათივე თხოვნით დროებით საცხოვრებლად ნათესავებთან გადაიყვანეს.

კითხვაზე, თუ ამ ადამიანებს ნათესავებთან წასვლის საშუალება არ ექნებოდათ? – გამგებელი პასუხობს: „მათ ჩემთან წავიყვანდი“. ნადიმ ვარშანიძის თქმით, მთავრობას ამ დრომდე არ აქვს საბინაო ფონდი, სადაც სტიქიით დაზარალებულ ოჯახებს დროებითი საცხოვრებლით უზრუნველყოფდა.

რამდენად შეუძლია სოფლის რწმუნებულს განსაზღვროს საფრთხეები? – გამგებლის განმარტებით, მუნიციპალიტეტი სპეციალისტებს შესასწავლილი აქვთ და იმ ზონებზე ფლობენ ინფორმაციას, რომლებზეც ასეთ დროს ყურადღება უნდა გაამახვილონ.

სტიქიის გამო მოქალაქეები დაზარალდნენ სხვა რაიონებშიც.

როგორ იქცევიან მუნიციპალიტეტის ხელმძღვანელები, თუ საჭირო დროს საჭირო ტექნიკა საკმარისი არ არის და ვითარება სწრაფ რეაგირებას საჭიროებს? – ქობულეთის გამგებელი სულხან ევგენიძე განმარტავს, რომ მას შეუძლია ერთ პირთან მოლაპარაკების წესით, ტექნიკა რამდენიმე დღით კერძო პირისგან იქირაოს.

სტიქიური მოვლენების სამართავად, 2015 წელს აჭარის რესპუბლიკურ ბიუჯეტში 2 მილიონ 100 000 ლარი, ბათუმის ბიუჯეტის სარეზერვო ფონდში კი 400 000 ლარი გაითვალისწინეს. რესპუბლიკურ ბიუჯეტში ამ თანხას რეგიონის მთავრობის თავმჯდომარე, ხოლო მუნიციპალიტეტის ბიუჯეტში გათვალისწინებულ სარეზერვო ფონდს – მუნიციპალიტეტის მერი ან გამგებელი განკარგავს.

„სტიქიური მოვლენების დროს ხშირ შემთხვევაში იქმნება სამთავრობო შტაბი, მაგრამ თუ ვთვლი, რომ რაღაც გასაკეთებელია ქალაქისთვის, ვიყენებ ბათუმის ბიუჯეტის სარეზერვო ფონდს. თუ ეს თანხა საკმარისი არ აღმოჩნდა, ბიუჯეტის ცვლილების დროს შეიძლება ისევ მოვითხოვოთ თანხის დამატება. ეს ფონდი, ძირითადად, დახმარებებს და გადაუდებელი აუცილებლობით გამოწვეულ ღონისძიებებს ხმარდება“, – განმარტავს ბათუმის მერი გიორგი ერმაკოვი.

2015 წლის საქართველოს რესპუბლიკურ ბიუჯეტში სარეზერვო ფონდში 70 მილიონი, ხოლო პრეზიდენტის სარეზერვო ფონდში 5 მილიონი ლარია გათვალისწინებული.

კიდევ ერთი დეტალი: „სამოქალაქო უსაფრთხოების შესახებ“ საქართველოს კანონის შესაბამისად, საგანგებო სიტუაციების მართვის სააგენტოსთვის დაკისრებული ფუნქციების შეუფერხებლად განხორციელების მიზნით, აჭარის ავტონომიურმა რესპუბლიკამ და თვითმმართველმა ერთეულებმა 2015 წლის ბიუჯეტში უნდა გაითვალისწინონ თანხა საჯარო სამართლის იურიდიული პირის – საგანგებო სიტუაციების მართვის სააგენტოსთვის გადასაცემად. ეს თანხა არ უნდა იყოს 2014 წელს აჭარის ბიუჯეტსა და შესაბამისი თვითმმართველი ერთეულის ბიუჯეტში სახანძრო ან/და სამაშველო სამსახურების ფუნქციონირებისთვის გათვალისწინებულ თანხაზე ნაკლები. 2015 წლის ბიუჯეტში გათვალისწინებული თანხა აჭარამ და თვითმმართველმა ერთეულებმა საგანგებო სიტუაციების მართვის სააგენტოს უნდა გადაურიცხონ ეტაპობრივად, მისი წერილობითი მოთხოვნის საფუძველზე.

ქვეყანაში საფრთხეებზე დროული რეაგირება და რისკის შემცველ ზონებში მოსახლეობის დაცვა საგანგებო სიტუაციების მართვის სააგენტოს პრეროგატივაა. ეს სამსახური შინაგან საქმეთა სამინისტროს დაქვემდებარებაში 2015 წლის დასაწყისში გადავიდა. რეგიონებში მოქმედი სამაშველო სამსახურების ცენტრალიზებულ მართვაზე გადასვლას უფრო ეფექტური სისტემის შექმნით ხსნიან.

გასულ კვირას სტიქიური მოვლენები საქართველოს თითქმის ყველა რეგიონში განვითარდა. რიგი უბნებიდან საჭირო გახდა მოსახლეობის ევაკუაცია. ზარალი ჯერ არ დაუთვლიათ.

„მწოლიარე პოლიციელებს“ რადარებით არ ჩაანაცვლებენ

ბათუმი-ახალციხის ცენტრალური საავტომობილო გზის ქედის მონაკვეთზე, სოფელ მახუნცეთთან, საჯარო სკოლის მიმდებარედ, იქ, სადაც სკოლის მოსწავლეები ცენტრალურ საავტომობილო გზას ყოველდღიურად კვეთენ, გზაზე მოწყობილი საავტომობილო სიჩქარის შემზღუდველი ხელოვნური ბარიერები, ე.წ. „მწოლიარე პოლიციელი“ რამდენიმე კვირის წინ აიღეს. მახუნცეთის გარდა, საგზაო დეპარტამენტის მიერ ცენტრალურ საავტომობილო გზაზე მოწყობილი ხელოვნური ბარიერები სხვა ადგილებშიც აყრილია.

არადა, მოსახლეობამ ამ მონაკვეთებზე საავტომობილო სვლის შემანელებელი ხელოვნური ბარიერის მოწყობა ადგილობრივ გამგეობას გასულ წელს სთხოვა. გამგეობამ, მოსახლეობის მოთხოვნიდან გამომდინარე, დასახლებულ პუნქტებთან და საჯარო სკოლების მიმდებარედ, სიჩქარის შემანელებელი ბარიერების მოწყობის თხოვნით საატომობილო გზების აჭარის დირექციას მიმართა. წერილობითი მოთხოვნის საფუძველზე, დეპარტამენტმა ქედის მონაკვეთზე 13, ხოლო ბათუმი-ახალციხის სრულ მონაკვეთზე 36 შემანელებელი მოაწყო.

საქართველოს საავტომობილო გზების დეპარტამენტის ტერიტორიული ორგანოს აჭარის საავტომობილო გზების ადმინისტრაციის დირექტორი ზურაბ სიხარულიძე ამბობს, რომ სვლის შემანელებელს საგზაო დეპარტამენტი მოსახლეობისა და მუნიციპალიტეტების მოთხოვნის შესაბამისად აკეთებს. ის აღნიშნავს, რომ რიგ ადგილებზე მოწყობილი „მწოლიარე პოლიციელები“ მოსახლეობამ თვითნებურად აყარა, ზოგან კი საგზაო დეპარტამენტმა მოსახლეობის მოთხოვნის საფუძველზე აიღო.

„მას შემდეგ, რაც სვლის შემანელებლები მოვაწყეთ, ავარიების რიცხვი საგრძნობლად შემცირდა. თუ იქნება მოსახლეობის მოთხოვნა მოეწყოს შემანელებლები, აუცილებლად გავაკეთებთ“, – ამბობს ზურაბ სიხარულიძე.

შემცირებული ტრაგიკული შემთხვევების მიუხედავად, ქედის გამგებელი „მწოლიარე პოლიციელებს“ უარყოფითად აფასებს. ამბობს, რომ ხელოვნური ბარიერები საავტომობილო მიმოსვლას აფერხებს, განსაკუთრებით კი რეანომობილისთვის, რომელსაც კრიტიკულ სიტუაციაში მყოფი პაციენტები გადაჰყავს ბათუმში მაღალმთიანი აჭარიდან.

წელს ქედის გამგეობას ცენტრალური საავტომობილო გზის ქედის მონაკვეთზე „მწოლიარე პოლიციელების“ ნაცვლად სიჩქარის განმსაზღვრელი მოწყობილობები და ვიდეოთვალები უნდა დაემონტაჟებინა. როგორც ქედის გამგებელი დავით დუმბაძე აცხადებს, გამგეობა წელს რადარების მონტაჟს ვერ შეძლებს:

„ერგეში მოსახლეობამ მოითხოვა „ბუგორის“ აღება. რაც შეეხება ქედის მონაკვეთს, არ ვიცით ვინ აიღო, ეს არის სახელმწიფო მნიშვნელობის გზა და საქართველოს საავტომობილო გზების შესახებ კანონით, რაიმე სახის ხელოვნური ბარიერების მოწყობა იკრძალება. ჩვენ ვფიქრობდით ცენტრალური საავტომობილო გზის ქედის მონაკვეთზე სიჩაქარის მზომი ორი რადარი და ვიდეოთვალები მოგვეწყო. გასული წლის გათვლებით, რადარების მოსაწყობად 60 000 ლარი გვქონდა გათვალისწინებული. მაგრამ მას შემდეგ ისეთი თანამედროვე ტექნიკა შემოვიდა, რის ყიდვასაც ვაპირებდით, აღარ ვიყიდით. ის ტექნიკა სრულყოფილად ვერ არკვევდა მანქანის ნომერს, რაც ახალ ტექნიკას შეუძლია. თანამედროვე ტექნიკისთვის კი 60 000 ლარი საკმარისი არ არის. ვფიქრობდი, ერთი რადარი დოლოგანში მოგვეწყო, იქ, სადაც, ერთი კვირის განმავლობაში სამი ავარია მოხდა. გამოსავალს რადარებისა და ვიდეოთვალების მოწყობაში ვხედავ“.

ნარჩენები და დასაწყობებული ურნები სოფლებში

ყოველდღიური ნარჩენები ქედის სოფლებში მოუგვარებელ პრობლემად რჩება, რადგან სოფლებში არ არის ურნები, სადაც მოსახლეობა ნარჩენების შეგროვებას, ხოლო ხელისუფლება მის გატანას და გადამუშავებას შეძლებს. რადგან სოფლად მცხოვრები ადამიანებისთვის ნარჩენების მართვის სისტემის მომსახურება ხელმიუწვდომელია, ისინი საცხოვრებელი ადგილებიდან იშორებენ ნარჩენებს და ნებისმიერ ადგილას ყრიან. თითქმის ყველა სოფელში მდინარეების სანაპიროები და ხევები პოლიეთილენის პარკებით, ბოთლებითა და სხვა სპეციალურად გადასამუშავებელი ნარჩენებითაა სავსე.

ქედის მუნიციპალიტეტის გამგეობა ნარჩენების მართვაზე ყოველწლიურად 25 000 ლარს ხარჯავს. ეს თანხა მხოლოდ დაბის ქუჩებისა და ბათუმი-ახალციხის საავტომობილო გზის მიმდებარე ტერიტორიაზე განთავსებული ურნებიდან ნარჩენების გატანას ხმარდება.

სოფლებში ნარჩენების პრობლემის გადასჭრელად ქედის გამგეობამ წელს ტენდერის გზით 90 ურნა შისყიდა, რაზეც გამგებლის, დავით დუმბაძის თქმით, ადგილობრივი ბიუჯეტიდან 70 000 ლარი დაიხარჯა. თუმცა ელექტრონული ტენდერით შეძენილმა ურნებმა პრობლემა ვერ მოხსნა – რამდენიმე კვირის წინ შეძენილი ურნები გამგეობას სოფლებში ჯერ კიდევ არ გაუტანია.

დავით დუმბაძის თქმით, სოფლებში ნარჩენების პრობლემის მოსაგვარებლად სამოქმედო გეგმა აქვს გაწერილი. გეგმა სპეცტექნიკის შეძენასა და ბუნკერის მოწყობას ითვალისწინებს. გამგებელი აქვე იმასაც დასძენს, რომ ურნები სოფლებში რომც გაიტანოს, ნარჩენების გამოტანა ვერ მოხერხდება, რადგან ტენდერში გამარჯვებულ კომპანიას ნარჩენების მართვაზე ვალდებულება მხოლოდ იმ სოფლებში აქვს აღებული, სადაც გზის საფარი ასფალტით ან ბეტონით არის დაფარული, ასეთი სოფელი კი ქედაში რამდენიმეა:

„ვფიქრობდით 90-მდე ტენდერით შეძენილი ურნა სოფლებში გადაგვენაწილებინა, დაგვეწყო იქ, სადაც სკოლა და საბავშვო ბაღი ფუნქციონირებს. თუმცა, პრობლემა იმან შექმნა, რომ ნარჩენების გამოსატანად სპეცტექნიკაა საჭირო, რაც ჩვენ არ გვაქვს. შესაბამისად, სოფლებში რომ გაგვეტანა ურნები, გაივსებოდა და ვეღარ გამოვიტანდით, რის გამოც აღარ გავიტანეთ… მოასფალტებული ან მობეტონებული გზა სოფელ უჩხითსა და მერისში გვქონდა, წელს მოასფალტდა სოფელ ოქტომბრისა და გეგელიძეების გზაც, მაგრამ როდესაც ხულოდან დატვირთული მაღალი გამავლობის მანქანა მოდის, ის ვერ შეძლებს მთის სოფლებში ასვლას. სამომავლოდ სპეცტექნიკის შეძენას ინფრასტრუქტურის სამინისტრო გვპირდება, დიდი მანქანების სოფლებში მოძრაობას ჯობია 3-5-ტონიანი, მცირე ტექნიკა შევიდეს, რომლითაც ნაგავს ჩამოვიტანთ. ასევე ვფიქრობთ ბუნკერის მოწყობას, სადაც შეგროვდება ნარჩენები. ქედის მუნიციპალიტეტის დასუფთავებაზე შპს „ბათუმის სანდასუფთავება“ მუშაობს“.

დაბისთვის ქედის გამგეობა დამატებით სპეციალური პატარა ურნების შეძენას გეგმავს, რომელშიც მხოლოდ ქაღალდის ნარჩენების ჩაყრა იქნება ნებადართული. „ვფიქრობ, ამ პრობლემას მალე გადავჭრით“, – აცხადებს დავით დუმბაძე.

სოფლებში მოსახლეობა წუხს იმის გამო, რომ თავადაც არის გარემოს დაბინძურების მონაწილე. ზოგიერთი მათგანი ფიქრობს, რომ გარემოს დანაგვიანებას სოფლებში სანაგვე ურნების არარსებობა იწვევს, ზოგიერთს კი ამის მიზეზად დაბალი საზოგადოებრივი ცნობიერება მიჩნია.

სოფელ ხარაულაში მცხოვრები აიშე ჯაბნიძე ამბობს, რომ გარემოს დასაცავად აუცილებელია სოფლებში ურნების განთავსება. ის აქვე იმასაც აღნიშნავს, რომ ის ხერხი, რასაც თვითონ იყენებს ნარჩენების გადასამუშავებლად, გარემოს არანაკლებ აბინძურებს, ვიდრე ბუნებაში დაყრილი ნაგავი.

„საკვები პროდუქტების ნარჩენებს სოფლებში თითქმის არავინ ყრის, ყველა საქონლის საკვებად იყენებს, როგორც მე. მაგრამ პრობლემად რჩება პოლიეთილენის პარკები, ბოთლები თუ სხვა სამშენებლო მასალები, დაძველებული სამოსი, ნაგავი მე არასდროს გადამიყრია მდინარეში, ვაგროვებ და ბაღჩაში ყველაფერს ერთად ვწვავ. მართალია, არ ვყრი მდინარეშე, მაგრამ ბუნება, ჰაერი ხომ მაინც ბინძურდება. არ მინდა ჩემი ნაგავით ვინმე შეწუხდეს. გამოსავალი მხოლოდ სოფლებში ურნების შემოტანა იქნება. ნაგავს სოფლებში, ძირითადად, ხევებსა და მდინარეებში ყრიან, მდინარეებში ჩაყრილი ნაგავი აჭარისწყალში ხვდება, აჭარისწყალს კი ზღვაში გააქვს“, – ამბობს აიშე.

სოფელ წონიარისში მცხოვრები ისმაილ ბერიძეც არ იშურებს ძალისხმევას, თავის ოჯახში დაგროვილი ნარჩენებით ბუნება არ დააბინძუროს. ამბობს, რომ მას ნაგავი სოფლის ცენტრში ჩააქვს და იქ არსებულ ურნაში ყრის: „მოვაგროვებ ნაგავს და როცა მანქანით წავალ ცენტრში, ურნაში ვყრი. მაგრამ ყველას არც მანქანა აქვს და არც ჩემსავით იქცევა, ზოგი ისეთია, თავის ნაგავს მოიშორებს და სადაც მოესურვება გადააგდებს, მერე ამ ნაგავს ხან ძაღლი გაათრევს და ხან კიდევ ძროხები ჭამენ. სხვას უხდის პრობლემას. ამიტომ ვართ ყველა ერთად ამ დღეში“.

25 748 ლარი შვიდი სალონური საღამოსთვის ბათუმში

თუ რატომ ატარებს თითოეული ეს ღონისძიება სახელმწიფოებრივი და საზოგადოებრივი მნიშვნელობის ხასიათს – მუსიკალურ ცენტრს შესყიდვების ვებგვერდზე არანაირი არგუმენტი არ აქვს მოყვანილი, გარდა იმისა, რომ „აღნიშნული ღონისძიება ატარებს მნიშვნელოვან საზოგადოებრივ ხასიათს“.

ის, თუ რამ გამოიწვია ცალკეული ამ ღონისძიების შეზღუდულ ვადაში ჩატარების აუცილებლობა და რატომ ვერ იქნებოდა შესყიდვები წინასწარ დაგეგმილი? – მუსიკალური ცენტრი განმარტავს: „ღონისძიების ჩატარების იდეა წარმოიშვა მიმდინარე წლის ნოემბრის პირველ ნახევარში. გამარტივებული ელტენდერის ან ელტენდერის საშუალებით ვერ მოხერხდება აღნიშნული ღონისძიების ჩატარება მიმდინარე წელს. წინასწარ შეუძლებელია აღნიშნული ღონისძიების დაგეგმვა, რადგან დაკავშირებულია მთელ რიგ სპეციფიკურ მომენტებთან, მონაწილესთან შეთანხმება და დაგეგმვა“.

ამჯერად საუბარია 7 საღამოზე, რისთვისაც ჯამში 25 748 ლარია გათვალისწინებული. რაც შეეხება ღონისძიებების ჩატარების გრაფიკს:

2015 წლის 27 ნოემბერს ბათუმის ხელოვნების ცენტრში გაიმართება მუსიკალური საღამო „სალონური შეხვედრები“, საღამოს სტუმარია მუსიკოსი ზვიად ბოლქვაძე. ღონისძიების ჩატარების მიზნით ზვიად ბოლქვაძესთან გაფორმდება ხელშეკრულება 3 250 ლარზე.

2015 წლის პირველ დეკემბერს ბათუმის ხელოვნების ცენტრში გაიმართება მუსიკალური საღამო „სალონური შეხვედრები“, საღამოს სტუმარია მუსიკოსი რევაზ კიკნაძე. ღონისძიების ჩატარების მიზნით რევაზ კიკნაძესთან გაფორმდება ხელშეკრულება 3 250 ლარზე.

2015 წლის 4 დეკემბერს ბათუმის ხელოვნების ცენტრში გაიმართება სალონური საღამო „ყავა ქვიშაზე ნანა მესხთან“, საღამოს სტუმარია კომპოზიტორი მარიკა კვალიაშვილი. ღონისძიების ჩატარების მიზნით ნანა მესხთან გაფორმდება ხელშეკრულება 6 250 ლარზე.

2015 წლის 8 დეკემბერს ბათუმის ხელოვნების ცენტრში გაიმართება სალონური საღამო „სტუმრად ლაშა ღლონტთან“, საღამოს სტუმარია სპორტული ჟურნალისტი ჯამლეტ ხუხაშვილი. ღონისძიების ჩატარების მიზნით ლაშა ღლონტთან გაფორმდება ხელშეკრულება 5 000 ლარზე.

მუსიკალური ცენტრის მთავარი ადმინისტრატორის ჯაბა სალუქვაძის მოხსენებითი ბარათის მიხედვით ირკვევა, რომ „ბათუმის სახელმწიფო მუსიკალურმა ცენტრმა 2015 წლის ზაფხულიდან დაიწყო პროექტის განხორციელება, რომელიც იმართება მუსიკალური ცენტრის არტ-კაფეში და „სალონური საღამო“-ების სახელით ხორციელდება. ჩვენი პროექტი შედგება ხუთი სხვადასხვა სახელწოდების საღამოებისაგან. კერძოდ: „ყავა ქვიშაზე ნანა მესხთან“, „სტუმრად ვახტანგ ღლონტთან“, „სტუმრად ლაშა ღლონტთან“, „სტუმრად ზაზა მარჯანიშვილთან“ და „სალონური შეხვედრები“. ყველა საღამოს მასპინძელს სტუმრად ჰყავს ცნობილი ადამიანები – მუსიკოსები, რეჟისორები, სპორტული ჟურნალისტები და სხვა.

ერთ-ერთი საღამო „სტუმრად ვახტანგ ღლონტთან“, რომელიც დაგეგმილია ნოემბერ-დეკემბრის თვეში მოიცავს 3 საღამოს, თითოეულ საღამოს ეყოლება თავისი სტუმარი“.

ამ სამი საღამოს სტუმრები იქნებიან მხატვარი ნინო ნიჟარაძე, მწერალი სანდრო ბერიძე და ახალგაზრდა პოეტები. საღამოების გამართვა დაგეგმილია 2015 წლის 28 ნოემბერს, 9 და 24 დეკემბერს.

თითოეული ამ საღამოსთვის გამოყოფილია 2 666 ლარი. შესაბამისად, ამ სამი ღონისძიების გამართვისთვის ვახტანგ ღლონტთან ხელშეკრულება ჯამში 7 998 ლარზე გაფორმდება.

ბათუმის მუსიკალურ ცენტრს აჭარის მთავრობისგან ზემოაღნიშნული ღონისძიებების გამარტივებულ შესყიდვაზე თანხმობა უკვე აქვს, თუმცა ეს, კანონმდებლობის მოთხოვნის შესაბამისად, შესყიდვების სააგენტოსთან შეთანხმებასაც საჭიროებს.

სსიპ „ბათუმის სახელმწიფო მუსიკალური ცენტრი“ აჭარის განათლების, კულტურისა და სპორტის სამინისტროს დაქვემდებარებაშია. სამინისტროს მონაცემებით მიმდინარე წელს ცენტრის ბიუჯეტი 3 938 391 ლარია, საიდანაც 2 575 296 ლარი შრომის ანაზღაურებას [ხელფასებს] ხმარდება. ცენტრში 338 ადამიანია დასაქმებული.

ქობულეთში დამწვარი სასტუმროს მეპატრონის ოჯახის წევრებმა შიმშილობა დაიწყეს

ხანძრის შედეგად დამწვარი სასტუმრო ქობულეთში

„შიმშილობა დაიწყო სამმა ადამიანმა, ჩემი შვილის ზაზა ართმელაძის მეუღლემ და ზაზას და-ძმამ. ჩვენ ვითხოვთ პრემიერ-მინისტრთან შეხვედრას, რომ გამოძიება ობიექტურად წარიმართოს. ვითხოვთ, დაისაჯოს ნამდვილი დამნაშავე, ის პირები, რომლებმაც ბავშვები ჩაკეტეს სასტუმრო ოთახში და მარტო დატოვეს,“- ამბობს ბრალდებულის დედა თალიკო ართმელაძე.

ბრალდებულის ოჯახის წევრები ქობულეთის მუნიციპალიტეტის გამგეობის წინ შიმშილობენ.

სწავლა მაგისტრატურასა და დოქტორანტურაში ცენტრალური ევროპის უნივერსიტეტში

ბიზნესი
კოგნიტური მეცნიერება (PhD)
ეკონომიკა
გარემოს დაცვა და პოლიტიკა
გენდერული კვლევები
ისტორია
საერთაშორისო ურთიერთობები
სამართალი
გამოყენებითი მათემატიკა
შუა საუკუნეების კვლევები
ნაციონალიზმის კვლევები
ქსელური მეცნიერება (PhD)
ფილოსოფია
პოლიტიკური მეცნიერება
საჯარო პოლიტიკა
სოციოლოგია და სოციალური
ანთროპოლოგია

დარეგისტრირდით ლინკზე https://bit. ly/1OX5LbQ და თუ გსურთ დაფინანსების მოპოვება, უნივერსიტეტში გაგზავნეთ საგანაცხადო ფორმა თანდართულ საბუთებთან ერთად არაუგვიანეს 2016 წლის 4 თებერვლისა.

ვინც აბარებს MUNDUS MAPP პროგრამაზე და სურს ერასმუს მუნდუსის სტიპენდიის მოპოვება, განაცხადი უნდა გაგზავნოს 2016 წლის 11 იანვრამდე, ხოლო თვითდაფინანსებული სტუდენტებისათვის და მათთვის, ვინც აბარებს ATILDA – ს პროგრამაზე და ისტორიისა და გარემოსდაცვისა და პოლიტიკის ფაკულტეტებზე და სურს სწავლის საფასურისათვის დაფინანსების მოპოვება [master’s tuition awards], განაცხადის გაგზავნის ბოლო ვადაა 2016 წლის 3 მაისი. ამ დროისათვის აპლიკანტებს უნდა შეეძლოთ ინგლისური ენის ცოდნის დამადასტურებელი რომელიმე ტესტის ქულის წარმოდგენა.

სასწავლო პროგრამებსა და აპლიკაციასთან დაკავშირებით დეტალური ინფორმაციის მისაღებად ეწვიეთ ცენტრალური ევროპის უნივერსიტეტის ვებგვერდს ან მოგვმართეთ საერთაშორისო განათლების ცენტრში შემდეგ მისამართებზე:

თბილისი, ჭოველიძის ქუჩა 10, ტელ. 2252615, ელფოსტა: cie@osgf.ge; კონსულტაციის დღე – ორშაბათი, 15:00 ბათუმი, ნინოშვილის ქ. 35; უნივერსიტეტის პირველი სართული, ოთახი # 26; ტელ. 275817 კონსულტაციის დღე – სამშაბათი, 15:00 უნივერსიტეტისა და კონკურსის შესახებ ინფორმაცია ასევე შეგიძლიათ მოიპოვოთსაერთაშორისო განათლების ცენტრის ვებგვერდზე: www.cie.ge და ფეისბუქში: Access CEU – Georgia Page და Center for International Education – Tbilisi

გოდერძის უღელტეხილის მონაკვეთზე ყველა სახის ტრანსპორტის მოძრაობა აკრძალულია

კურორტი გოდერძი/ფოტო: აჭარის გიდების ასოციაციის ვებ-გვერდიდან

მეწყერული პროცესების განვითარების შედეგად მოძრაობა შეფერხებული იყო ხულო-ადიგენის მიმართულებითაც, თუმცა როგორც ხულოს მუნიციპალიტეტის გამგებელი ბესიკ ბაუჩაძე აცხადებს, ამ დროისთვის გოდერძის უღელტეხილამდე მოძრაობა აღდგენილია.

გამგებლის თქმით, „გზა ჩაკეტილია მხოლოდ გოდერძის უღელტეხილზე, რადგან თოვლის საფარი დიდია.“

გამგებელი არ ფლობს ინფორმაციას, თუ როდის გაიხსენება გოდერძის უხელტეხილზე საავტომობილო და კურორტთან მისასვლელი გზა.

საერთაშორისო განათლების ცენტრი და ამერიკული უნივერსიტეტი AUBG ბულგარეთში

 ბიზნესადმინისტრაცია

 ეკონომიკა

 კომპიუტერული მეცნიერებები

 ევროპათმცოდნეობა

 ისტორია და ცივილიზაცია

 ინფორმაციული სისტემები

 ჟურნალისტიკა/მასობრივი კომუნიკაციები

 პოლიტიკური მეცნიერება/საერთაშორისო ურთიერთობები

 მათემატიკა

 ამერიკათმცოდნეობა

 ლიტერატურა და პროგრამა, რომელსაც თავად ქმნით

უნივერსიტეტში სწავლა ოთხწლიანია და მიმდინარეობს ინგლისურ ენაზე. აპლიკანტები კონკურსის ფარგლებში ჩააბარებენ ინგლისური ენის ტესტს PBT TOEFL და გაივლიან ინტერვიუს.

ბულგარეთის ამერიკული უნივერსიტეტი საუკეთესო სტუდენტებს სთავაზობს სწავლის დაფინანსების სხვადასხვა შესაძლებლობას როგორც სტიპენდიების [merit based and need based scholarships] , ასევე უნივერსიტეტის ფინანსური დახმარების (institutional fi – nancial aid) და საბანკო სესხის სახით.

AUBG -ის ფინანსური დახმარებისა და სტიპენდიების სრული ჩამონათვალი შეგიძლიათ იხილოთ ვებგვერდზე: www.aubg.edu/finance-your-education კონკურსში მონაწილეობის მსურველები უნდა სწავლობდნენ საშუალო სკოლის დამამთავრებელ კლასში ან იყვნენ აბიტურიენტები. კონკურსში მონაწილეობა შეუძლიათ ასევე პირველი კურსის სტუდენტებსაც. განაცხადის ფორმის შევსება შეგიძლიათ ვებგვერდზე: https://www.aubg.bg/how-to-apply-first-year

საშემოდგომო სემესტრი ვისაც სურს სწავლის 2016 წლის შემოდგომაზე დაწყება და კონკურსის ფარგლებში უფასო PBT TOEFL -ის ტესტის ჩაბარება, უნივერსიტეტის საგანაცხადო ფორმა უნდა გაგზავნოს და ტესტზე დარეგისტრირდეს 2016 წლის პირველი იანვრამდე.

საშემოდგომო სემესტრისათვის ვისაც სურს უნივერსიტეტიდან საუკეთესო ფინანსური დახმარებისა და სტიპენდიების მიღება, საგანაცხადო ფორმისა და მოთხოვნილი საბუთების გაგზავნის ბოლო ვადაა 2016 წლის პირველი მარტი.

განაცხადის გაგზავნის სტანდარტული ვადაა 2016 წლის პირველი ივნისი. საგაზაფხულო სემესტრზე განაცხადების გაგზავნის ბოლო ვადაა პირველი ოქტომბერი.

დეტალური ინფორმაციისათვის გთხოვთ მოგვმართოთ შემდეგ მისამართზე:

საერთაშორისო განათლების ცენტრი ბათუმი, ბსუ, ნინოშვილის ქ.#35, ოთახი #26 ტელ.: 2 25 26 15; ელფოსტა: cie@osgf.ge

ასევე იხილეთ ჩვენი ცენტრის ვებგვერდი: www. cie.ge და გვერდი ფეისბუქზე: Center for International Education – Tbilisi – თბილისი ჯგუფური კონსულტაციები ჩატარდება ყოველ ოთხშაბათს, 15:00 საათზე

ნონა გაფრინდაშვილი ისევ მსოფლიო ჩემპიონია

ბოლო ტურში, ის ქართველ მოჭადრაკეს თამარ ხმიადაშვილს შეხვდა, რომელთანაც პარტია ფრედ დაასრულა, თუმცა ნონა გაფრინდაშვილისთვის ეს ფრე საკმარისი აღმოჩნდა, რომ ქულათა რაოდენობით პირველ ადგილზე გასულიყო.

ჩემპიონატი 10 ნოემბერს გაიხსნა და 21 ნომებერს დასრულდა. 65 წელს ზევით მოთამაშეთა შორის პირველობისთვის 10 მოჭადრაკე იბრძოდა, ორი მოჭადრაკე ქალი საქართველოდან, ოთხი – რუსეთიდან, ისრაელიდან, ყაზახეთიდან.

ნონა გაფრინდაშვილი ხუთგზის მსოფლიო ჩემპიონია ჭადრაკში (1962; 1965; 1969, 1972).

მეხუთეჯერ ჩემპიონი 1975 წელს გახდა, როცა ქართველი მოჭადრაკე ნანა ალექსანდრია დაამარცხა (8,5:3,5). ტუტული დათმო ასევე ქართველ მოჭადრაკესთან მაია ჩიბურდანიძესთან 1978 წელს (6,5:8,5).

საერთაშორისო დიდოსტატის წოდება ქალთა შორის მან 1976 წელს მოიპოვა, 1978 წელს ჭადრაკის ისტორიაში პირველად კი მამაკაცთა შორისაც.

ნონა გაფრინდაშვილი ასევე არის მსოფლიოს საჭადრაკო ოლიმპიადების თერთმეტგზის ჩემპიონი.

ახალშენში ხანძარია

„იწვის ტყე-ბარდი, ამჟამად ადგილზე ერთი სახანძრო მანქანაა გასული, მეტის საჭიროება არ არის“ – უთხრა „ბათუმელებს“ ხუსეინ სირაბიძემ. მისი თქმით მოსახლეობას ხანძრისგან საფრთხე არ ემუქრება.

რას და როგორ კითხულობენ მოზარდები

ლიტერატურული კლუბის წევრები ბათუმის მე-10 საჯარო სკოლიდან

ლიტერატურულ კლუბში არიან ბიჭებიც, თუმცა შეხვედრა მხოლოდ გოგონებთან მოვახერხეთ. ისინი მე-11 კალასელები არიან.

ნინო ჭაღალიძე კლუბის წევრი 2012 წელს გახდა. ლექსებს წერდა და ეს ერთ-ერთი მიზეზია, რომ კლუბის წევრი გამხდარიყო. „კლუბში მასტერკლასები გვიტარდება წერის ტექნიკაზე. ეს მეხმარება, უკეთესი ლექსები დავწერო“, – ამბობს ნინო.

კლუბის წევრი გოგონებიდან თითქმის ყველა წერს, ზოგიერთი ლექსს, ზოგიც – პროზას.

ქრისტინა ვაშაყმაძე ამბობს, რომ კლუბში მოსვლის შემდეგ მიხვდა, მის ლექსებს ბევრი რამ რომ აკლდა: „ჩვენ ცნობილ პოეტებსა და მწერლებს ვხვდებით, მათთან საუბარი გვეხმარება, გავიზარდოთ ჯერ როგორც მკითხველები, შემდეგ კი პოეტები. გვქონდა შეხვედრა დავით წერედიანთან, ზაალ ებანოიძესთან, გურამ დოჩანაშვილთან, დათო ტურაშვილთან და კიდევ ბევრთან. მომწონს გიორგი ზანგურის ლექსებიც’.

მოზარდები ამბობენ, რომ წერის ტექნიკის დასახვეწად სხვადასხვა თამაშს იგონებენ. „ერთ-ერთი თამაში ჩვენი კლუბის წევრმა მირიან გორგილაძემ მოიგონა, რომელსაც რითმების თამაშს ვეძახით. სტრიქონებს შორის ვეძებთ არეულ სიტყვებს და იქედან ვაწყობთ ახალ ლექსს. ამბის გადაცემის თამაშებსაც ვაკეთებთ, რომელიც გვეხმარება მეხსიერების გაუმჯობესებაში“, – ამბობს ქრისტინა.

ლიტერატურულ კლუბში მოსწავლეები ყოველ შაბათს იკრიბებიან. „ამის გამო ძალიან მიყვარს შაბათი“, – გვეუბნება მაკა ვაშაკიძე.

მაკას თქმით, „ქართულ პოეზიაში ჭარბობს პატრიოტული თემატიკა და ხშირად პათეტიკურია. რაც უფრო მეტს ვკითხულობ, მით უფრო მიჯდება გონებაში, რომ რაღაც ახალი და განსხვავებული უნდა ვწერო“.

„ჩვენც ვექცევით ხოლმე ქართველი პოეტების გავლენის ქვეშ, მაგრამ დროთა განმავლობაში ვპოულობთ საკუთარ სტილსა და ადგილს“, – ეს ქრისტინას მოსაზრებაა.

მოსწავლეები ამბობენ, რომ ლიტკლუბი მათ ახალი მწერლების აღმოჩენაშიც ეხმარება. მეგი ქამაშიძე: „კლუბმა აღმომაჩენინა მზია სალვარიძე, რომელმაც კრიტიკულად განმაწყო კოელიოს მიმართ. მივხვდი, რომ კოელიო ბანალურ თემებზე წერს“. მეგის საყვარელი ნაწარმოები კენ კიზის რომანია „გუგულის ბუდეზე სხვა გადაფრინდა“. „მიყვარს ო, ჰენრი და გოდერძი ჩოხელი. ო, ჰენრი იმიტომ მიყვარს, რომ მარტივია, ლაკონური და მაგარი დასასრული აქვს მის ნაწარმოებებს, დიდ ემოციას გიტოვებს. ჩოხელიც სულში გწვდება. რაც დრო გადის, ვხვდები, რომ რაღაც იცვლება ჩემში და აზროვნებას ვიწყებ“.

„ლიტკლუბმა აღმომაჩენინა მწერალი ჯემალ ქარჩხაძე, მაგარია მისი „ზებულონი“. ძალიან მიყვარს ნოდარ დუმბაძეც“, – ამბობს თამთა ჯაიანი.

ო, ჰენრის ნაწარმოებები მოსწონს მარი ბალაძესაც. როგორც მარი ამბობს, წაკითხვის შემდეგ ხშირად არჩევენ ხოლმე ნაწარმოებებს, რისი შესაძლებლობაც ლიტერატურის გაკვეთილებზე არ აქვთ. „კლასში ყველას არ აინტერესებს ლიტერატურა. რთულია სერიოზულად რაღაც განიხილო, როცა სიტყვაზე „ჩამომალაბორანტეს“ ერთი საათი შეუძლიათ იცინონ“.

მოსწავლეების აზრით, „ლიტკლუბი არის ერთგვარი კიდობანი, რომელიც სავსეა მუზებით“.

კლუბის წევრები კითხვაზე – რატომ კითხულობთ ლიტერატურას, რას გაძლევთ ის? პასუხობენ: „ინტელექტს“. როგორ აისახება ლიტერატურა ჩვენს თანამედროვეობაში და რას გაძლევთ ის ყოველდღიურობაში? – ისევ ვეკითხებით მათ.

ისინი იხსენებენ დოსტოევსკის „ძმები კარამაზოვებიდან“ ერთ-ერთ თავს – „დიდი ინკვიზიტორი“, სადაც რელიგიური საკითხებია განხილული. „რელიგიური თემები გვაინტერესებს, მაგრამ ამ თემაზე მასწავლებლები არ გვესაუბრებიან“, – ამბობენ მოზარდები და პარალელებს ავლებენ.

„ჩემი აზრით, თანამედროვე საზოგადოებაც საკმაოდ არამიმტევებელია, რადგან ნებისმიერი ადამიანი შეგვიძლია „დავწვათ კოცონზე“, თუ ის ჩვენთვის მიუღებელია. დღეს ძნელად იღებენ ადამიანები განსხვავებულებს“, – ამბობს ქრისტინა.

„ამის გამოვლინებაა ბულინგი სკოლებში, თანატოლების ჩაგვრა და დაცინვა, თუნდაც ჩაცმულობის გამო“, – მიაჩნია მეგის.

მოსწავლეები ქალის ჩაგვრის საკითხსაც განიხილავენ. ამ კონტექსტში ნინო ჭაღალიძე საყვარელ ნაწარმოებად ჯონ მაქსველ კიტზეეს „სირცხვილს“ ასახელებს. „ის მოგვითხობს ქალზე, რომელიც გააუპატიურეს. თუმცა ძალადობასთან ბრძოლის ნაცვლად ის ნებდება. დღესაც ბევრი ქალი განიცდის ფსიქოლოგიურ თუ ფიზიკურ ძალადობას, მათ შორის ქმრების მხრიდან. თუმცა ბევრი ეგუება ამ მდგომარეობას და ცოტა თუ იბრძვის საკუთარი უფლებებისთვის“, – გვეუბნება ნინო.

კლუბის წევრები ამბობენ, რომ დისკუსიის თემას იმის მიხედვით ირჩევენ, თუ რა ნაწარმოებს კითხულობენ.

მომავალ შაბათს პოეზიას უთმობენ, ოთარ ფალიანის შემოქმედებაზე ვიდეოპრეზენტაციას გეგმავენ.

სკოლის ლიტკლუბს ამ დროისთვის 20-ზე მეტი წევრი ჰყავს, მათ შორის სკოლის ყოფილი მოსწავლეებიც, რომლებიც უკვე სტუდენტები არიან.

აქცია ”ნუ გაათხოვებ” ბათუმსა და ქობულეთშიც გაიმართება

აქცია, ქალთა მოძრაობის ინიციატივით იმართება, რომელმაც აქცია facebook-ღონისძიებაზე დააანონსა, სადაც წერია: “16 წლამდე გოგონებთან სრულწლოვანი ქმრების სექსუალური კავშირი სისხლის სამართლის დანაშაულია, რომელზეც სახელმწიფო თვალს ხუჭავს! ადრეულ ქორწინებას თან ახლავს არასრულწლოვანთა ორსულობა და მშობიარობა, რომელიც საფრთხეს უქმნის გოგონების ჯანმრთელობას და სიცოცხლეს!

საქართველოს კანონმდებლობით 18 წელი არის ქორწინებისთვის დასაშვები ასაკი. სიტყვა „ქორწინება“ შეუფერებელია იმ არასრულწლოვანი გოგონების მდგომარეობის აღსანიშნავად, რომლებიც მშობლებმა ეკონომიკური გაჭირვების თუ ტრადიციების გამო, ფაქტობრივად სახლიდან გააგდეს, გაათხოვეს, გაასხვისეს ნივთივით”.

“მიეცით გოგონებს ის, რაც ეკუთვნით: საკუთარი ცხოვრება, არჩევანი, სწავლა, დამოუკიდებლობა!” – ამ ლოზუნგით, აქციები საქართველოს მასშტაბით, ერთდროულად 14 საათზე დაიწყება შემდეგ მისამართებზე:

ქუთაისში – ოპერის თეატრის წინ;

გორში – თეატრის ბაღში;

ახალციხეში – ახალციხის ცენტრალურ პარკში;

ახალქალაქში -ახალქალაქის ცენტრალური პარკში;

გარდაბანში – კულტურის სახლის წინ;

ზუგდიდში – ზუგდიდის ცენტრალურ ბულვარში;

თელავში – თეატრის წინ;

მარნეულში – კულტურის სახლის წინ;

ოზურგეთში – თეატრის წინ;

ქობულეთში – გამგეობის წინ;

დუისში, პანკისის ხეობაში – საზოგადოებრივ ცენტრში (კლუბი).

20:00 საათზე აქციას თბილისი შეურთდება. აქციის გამართვის ადგილი – საქართველოს კანცელარია.

დაგირავებული ”ინტურისტი” და ჰოლდინგი ”მეტრო”

საჯარო რეესტრის მიხედვით, სასტუმრო „ინტურისტი“ შპს „სასტუმრო ინტურისტ პალასის“ საკუთრებაშია. საკუთრივ „ინტურისტ პალასის“ მფლობელი კი შპს „ბათუმი ინტურისტია“, რომლის წილის 50%-ს ფლობს ლევან თურმანიძე, ხოლო დანარჩენ 50%-ს თურქული კომპანია „მეტრო ავრასია ჯორჯია“. ამ კომპანიის დირექტორები არიან – მეჰმეთ აიაღი, ონურ თანრივერდი და რაულ კახაძე.

2015 წლის ივლისში „ინტურისტ პალასი“ გარდაიქმნა სააქციო საზოგადოებად საფირმო სახელით – „მეტრო ინტურისტი ბათუმი“, რა დროსაც მისი დირექტორები იყვნენ ლევან თურმანიძე და მეჰმედ აიაღი.

ლევან თურმანიძემ და „მეტრო ავრასია ჯორჯიამ“ მიმდინარე წლის 29 სექტემბერს გადაწყვიტეს „ბათუმი ინტურისტს“ შერწყმოდა მისი შვილობილი „მეტრო ინტურისტი ბათუმი“, კომპანია გარდაქმნილიყო სააქციო საზოგადოებად და სახელწოდება ყოფილიყო „მეტრო ბათუმი ინტურისტ“ [სხვათა შორის, სასტუმრო „ინტურისტმა“ სექტემბერში 70-მდე თანამშრომელიც დაითხოვა. მაშინ სასტუმროში „ბათუმელებს“ განუცხადეს, რომ რეორგანიზაცია მიმდინარეობდა].

ზემოაღნიშნული კომპანიების შერწყმასა და ახალი სააქციო საზოგადოების რეგისტრაციაზე საჯარო რეესტრმა უარი განაცხადა.

„2015 წლის 9 ივლისის შეთანხმების შესაბამისად, „მეტრო ავრასია ჯორჯიას“ შეეზღუდა წილის გასხვისება და რაიმე სახით უფლებრივად დატვირთვა… შესაბამისად, რეორგანიზაციის [გარდაქმნის] განხორციელებისთვის საჭიროა, კრედიტორის ხვიჩა მაქაცარიას თანხმობა ან ხელშეკრულებით დადგენილი ვალდებულების შესრულების დამადასტურებელი დოკუმენტის წარმოდგენა“, – აღნიშნულია რეესტრის გადაწყვეტილებაში.

რეესტრმა „ინტურისტის“ პარტნიორებს მაქაცარიას თანხმობის წარსადგენად ერთთვიანი ვადა მისცა, თუმცა ასეთი დოკუმენტი რეესტრში არ შესულა. შესაბამისად რეესტრმა რეორგანიზაციის წარმოება შეწყვიტა.

„ბათუმი ინტურისტის“ 50 პროცენტი 5 მილიონ დოლარად

ხვიჩა მაქაცარიამ 2015 წლის 9 ივლისის ხელშეკრულების საფუძველზე „ბათუმი ინტურისტის“ 50% წილი 5 მილიონ აშშ დოლარად „მეტრო ავრასია ჯორჯიას“ იმ პირობით მიჰყიდა, რომ თანხის სრულად გადახდამდე კომპანიას არ ექნებოდა უფლება წილი გაესხვისებინა ან უფლებრივად სხვაგვარად დაეტვირთა. ამასთან, ხვიჩა მაქაცარია წილის გასხვისებასა და „ბათუმი ინტურისტის“ დირექტორობიდან გათავისუფლებაზე იმ შემთხვევაში თანხმდებოდა, თუ დარჩენილი 50% წილის მფლობელი ლევან თურმანიძე აიღებდა ვალდებულებას, რომ სასტუმრო „ინტურისტი“ ნებისმიერ დროს მოემსახურებოდა ხვიჩა მაქაცარიას 4 სტანდარტული და 1 საპრეზიდენტო ნომრით. რეესტრის დოკუმენტების მიხედვით, პარტნიორთა კრებაზე ლევან თურმანიძე დაეთანხმა ზემოაღნიშნულ პირობას. გადაწყდა გაფორმებულიყო შეთანხმება, რომ „ლევან თურმანიძე კისრულობს ვალდებულებას, ნებისმიერ დროს, მანამდე, სანამ ლევან თურმანიძის ან მასთან აფილირებული პირების საკუთრებაში იქნება სასტუმრო „ინტურისტი“, ხვიჩა მაქაცარიას ან მისი ოჯახის წევრის/ების მოთხოვნისა და სურვილის შესაბამისად, ნებისმიერ დროს, შეუზღუდავად და უსასყიდლოდ, სრული პაკეტით მოემსახურება გამყიდველს ან მის მიერ მითითებულ ნებისმიერ პირს/ებს სასტუმროს ნომრებით, კერძოდ: ერთი საპრეზიდენტო და ოთხი ჩვეულებრივი ნომერი სრული პაკეტით შეუზღუდავად და უსასყიდლოდ იქნება ხვიჩა მაქაცარიას, მისი ოჯახის წევრების ან მათ მიერ მითითებული ნებისმიერი პირის სარგებლობაში“.

ხვიჩა მაქაცარიას თავისი წილი „საქართველოს ბანკსა“ და „თიბისი ბანკში“ ჰქონდა დაგირავებული. შესაბამისად, ორივე ბანკმა თანხმობა განაცხადა, ეს წილები გასხვისებულიყო „მეტრო ავრასია ჯორჯიაზე“, ამ ბანკის სასარგებლოდ არსებული გირავნობების სრულად შენარჩუნების პირობით. შპს „ბათუმი ინტურისტი“ ლევან თურმანიძემ და ხვიჩა მაქაცარიამ 2012 წლის იანვარში დაარეგისტრირეს. მაქაცარია წილებს სხვადასხვა კომპანიში ფლობს: „თბილისი მოლიში“ 8%-ს, „ჯეო ტაოში“ – 16%-ს, „თბილისურში“ – 20%-ს, „მელისა ჯგუფში“ – 75%-ს.

“იშ ბანკში” დაგირავებული „ინტურისტი“

სასტუმრო „ინტურისტის“ მესაკუთრემ ლევან თურმანიძემ შპს „CASINO INTURIST“-ი 2012 წლის მარტში დააფუძნა. სამი დღის დარეგისტრირებულ კომპანიას კი სახელი შეეცვალა და დარეგისტრირდა, როგორც შპს „GRAND INTURIST“-ი. 2015 წლის 17 ივნისს ლევან თურმანიძემ „გრანდ ინტურისტის“ 100% წილიდან ნახევარი გაასხვისა ონურ თანრივერდიზე [რომელიც „მეტრო ავრასია ჯორჯიას“ ერთ-ერთი დირექტორია]. კრების ოქმის მიხედვით გასხვისების საფასური 200 ათასი ლარი იყო. სამეწარმეო რეესტრმა აღნიშნული ცვლილების რეგისტრაციაზე უარი განაცხადა, ვინაიდან რეესტრის მონაცემებით დადგინდა, რომ „გრანდ ინტურისტის“ მესაკუთრესა და სს „თურქეთის იშ ბანკის ბათუმის ფილიალს“ შორის დადებული იყო გირავნობის ხელშეკრულება, რომლის მიხედვითაც გირავნობის უფლებით კომპანიის 100% იყო დატვირთული. რეესტრმა მოითხოვა ქონების განკარგვაზე ბანკის თანხმობა, რაც არ იყო წარდგენილი რეესტრში. ამის შემდეგ, 2015 წლის 29 სექტემბერს, რეესტრში შევიდა განცხადება კომპანიაში პარტნიორის ცვლილებაზე. ლევან თურმანიძეს ამჯერად, კრების ოქმის მიხედვით, 50% წილი 2 მილიონ ლარად ჰქონდა გაყიდული იმავე ონურ თანრივერდიზე.

რეესტრის ამონაწერის მიხედვით, „ლევან თურმანიძის არამატერიალური ქონებრივი სიკეთე: 100%-წილი შპს GRAND INTURIST-ში დაგირავებულია თურქეთის „იშ ბანკის“ ბათუმის ფილიალის სასარგებლოდ, ხოლო წარმოდგენილი დოკუმენტაციით არ დგინდება ბანკის თანხმობა აღნიშნული წილის გასხვისებასთან დაკავშირებით“. შესაბამისად, რეესტრმა შეაჩერა სარეგისტრაციო წარმოება, ხოლო მოგვიანებით ბანკის თანხმობის არარსებობის გამო მთლიანად შეწყვიტა. აღსანიშნავია, რომ მიმდინარე წლის აგვისტოდან სასტუმრო „ინტურისტის“ იპოთეკარი უკვე სააქციო საზოგადოება „იშბანკი საქართველოა“, რომელიც თურქმა პარტნიორებმა თბილისში 2015 წლის ივნისში დაარეგისტრირეს. სწორედ ეს ახალი საზოგადოებაა თურქული „იშ ბანკის“ ბათუმის ფილიალის სამართალმემკვიდრე. ფილიალი კი ლიკვიდაციის რეჟიმშია.

გალიფ ოზთურქი და „მეტრო ჰოლდინგი“

თურქულ „მეტრო ჰოლდინგს“ არაერთი შვილობილი კომპანია და სააქციო საზოგადოება უკავშირდება საქართველოში, ბათუმში. მათ შორისაა „მეტრო ატლას ჯორჯია“, რომლის დირექტორთა საბჭოში შედიან მეჰმეთ აიაღი, ონურ თანრივერდი, რაულ კახაძე და დირექტორთა საბჭოს თავმჯდომარე გალიფ ოზთურქი.

ბიზნესმენი გალიფ ოზთურქი „მეტრო ჰოლდინგის“ დამფუძნებელი და საპატიო თავმჯდომარეა. „ბათუმელები“ კომპანიის წარმომადგენლებს დაუკავშირდა, თუმცა ინვესტორთან, ან რომელიმე დირექტორთან აუდიენცია ვერ შედგა. ინვესტორს კარგი ურთიერთობა აქვს საქართველოს ხელისუფლებასთან. ჩვენი ინფორმაციით, ის ხშირადაა ბათუმში და, ძირითადად, სასტუმრო „ინტურისტში“ ცხოვრობს. „მეტროსითის“ ვებგვერდის ინფორმაციით, საქართველოს პრემიერმა ამ ბოლოს ბათუმში მადლობა გადაუხადა გალიფ ოზთურქს „სოლიდარობის ფონდში“ გადარიცხული ნახევარი მილიონი ლარისთვის.

პროექტს – „მეტროსითი“ „მეტრო ატლას ჯორჯია“ ახორციელებს. მიმდინარე წლის დასაწყისში ჰოლდინგმა ბათუმში ახალი სააქციო საზოგადოება „მეტრო ქონსტრაქშენ მათერიალს“ დააფუძნა, რომლის მიმართულებაც სამშენებლო საქმიანობაა. ჩვენი ინფორმაციით, მეტრო ჰოლდინგი შვილობილი კომპანიების მეშვეობით არაერთ სხვა ახალ პროექტში აპირებს სერიოზული ინვესტიციების ჩადებას, განსაკუთრებით მშენებლობის სფეროში. ჩვენივე ინფორმაციით, ამ კუთხით ინვესტორი გარკვეულ მოლაპარაკებებსაც კი აწარმოებს ბათუმში სამშენებლო კომპანიებთან, მშენებლებთან თუ მესაკუთრეებთან.

„მეტრო ატლას ჯორჯიას“ ვებსაიტის მიხედვით, „მეტრო ჰოლდინგი“, რომელიც თურქეთში, სტამბულის საფონდო ბირჟაზე მნიშვნელოვან წილს ფლობს, მსოფლიოს სხვადასხვა ქვეყანაში 70-ზე მეტ კომპანიაში 35 000-ზე მეტი დასაქმებული ჰყავს. ამავე საიტის ინფორმაციით, გალიფ ოზთურქი გეგმავს ნახევარი მილიარდი დოლარის ინვესტირებას საქართველოში და 3000 ადამიანის დასაქმებას 3 წლის განმავლობაში.

ქობულეთში არტ-ფესტივალი გაიხსნა

ფესტივალი 23 ნოემბერს, ბათუმში, გალა კონცერტით დასრულდება.

კულტურული ღონისძიება საერთაშორისო კულტურის დღეების ფარგლებში ახალგაზრდულ ცენტრ „არტ-ფესტის“ ორგანიზებით იმართება.

ბათუმის მერია შადრევნებს არემონტებს

სამუშაოებს შპს „მონოლითი-2005“, გამარტივებული ელექტრონული ტენდერის საფუძველზე ასრულებს.

ხელშეკრულების თანახმად, რომელიც ბათუმის მერიასა და „მონოლითი-2015“-ს შორის 24 ოქტომბერს გაფორმდა, კომპანიამ სამუშაოები 187 787 ლარად, 25 დეკემბრამდე უნდა შეასრულოს.

შპს „მონოლითი-2005“-ს 2011 წლიდან დღემდე ბათუმის მერიის მიერ გამოცხადებულ 52 ტენდერში აქვს მონაწილეობა მიღებული, მათგან 26 ტენდერი – მოგებული. საერთო ჯამში კი, ოთხი წლის მანძილზე მერიის მიერ გამოცხადებულ ტენდერებში 8,400,790 ლარის ღირებულების სამუშაოები აქვს შესრულებული.

2015 წელს ეს მესამე ტენდერია, რომელშიც „მონოლითი-2005“-მა გაიმარჯვა.

პარალელურად კომპანიას აქვს ვალდებულება აღებული შეასრულოს ჯავახიშვილის #70, 72, 74 მიმდებარედ სკვერის კეთილმოწყობის დამატებითი სამუშაოები 42,455 ლარად და დემეტრე თავდადებულისა და ბესიკის ქუჩების კვეთაში მდებარე სტადიონის გადატანა და მის ადგილას სკვერის მოწყობა 125,403 ლარად.

ბათუმის მერიასთან გაფორმებული ხელშეკრულების თანახმად „მონოლითი-2005“-მა ჯავახიშვილზე სკვერის მოწყობის სამუშაოები 25 დეკემბრამდე, ხოლო სტადიონის ადგილას სკვერის გაკეთება 30 დეკემბრამდე უნდა დაასრულოს.

შადრევანი აჭარის ხელოვნების მუზეუმთან

აჭარის ხელოვნების მუზეუმთან მდებარე შადრევნების სარემონტო-აღდგენითი სამუშაოების გეგმა