ნეტგაზეთი • RU

სააპელაციო სასამართლოს დადგენილება ენმ-ის წევრების სამსახურში დაუყოვნებლივ აღდგენაზე

 

ქუთაისის სააპელაციო სასამართლომ აიპი „ბათუმის კორპუსს“ დაავალა, 5 დღის ვადაში სამსახურში აღადგინოს „ნაციონალური მოძრაობის“ სამი წევრი, რომლებმაც სასამართლოს მას შემდეგ მიმართეს, რაც ისინი სამსახურიდან დაითხოვეს. ლაშა კილაბერია, ირაკლი მექვაბიშვილი და თომა ხალვაში, რომლებიც ბათუმის მერიის აიპი – „ბათუმის კორპუსში“ მუშაობდნენ, მიიჩნევდნენ, რომ ისინი სამსახურიდან პოლიტიკური ნიშნით დაითხოვეს. სამივე პირი ნაციონალური მოძრაობის წევრია.

 

ქუთაისის სააპელაციო სასამართლოს განჩინება ნაციონალური მოძრაობის წევრებს დღეს ჩაბარდათ. განჩინებაში წერია: „დადგენილია, რომ ლაშა კილაბერიას, ირაკლი მექვაბიშვილის და თომა ხალვაშის სასარჩელო მოთხოვნა დაკმაყოფილდეს და ბათილად იქნა ცნობილი ბათუმის კორპუსის დირექტორის 2015 წლის 01 აპრილის #32 ბრძანება ლაშა კილაბერიას ბათუმის კორპუსის დირექტორის მოადგილის თანამდებობიდან გათავისუფლების შესახებ…“

 

განჩინების თანახმად, სამივე მათგანი დაუყოვნებლივ უნდა აღადგინონ თანამდებობაზე,  შესაბამისად, ლაშა კილაბერია ისევ უნდა გახდეს აიპი „ბათუმის კორპუსის“ დირექტორის მოადგილე. თავიანთ სამსახურებს დაუბრუნდებიან ირაკლი მექვაბიშვილი და თომა ხალვაშიც. ასევე სამივე მათგანს უნდა აუნაზღაურდეს სამი თვის ნაცდური ხელფასი:

 

ლაშა კილაბერიას ერთი თვის ანაზღაურება იყო 1100 ლარი, ხოლო მისი თანაპარტიელების 750-750 ლარი.

 

ლაშა კილაბერია ამბობს, რომ მის თანამდებობაზე ამ დროისთვის ნაციონალური მოძრაობის ყოფილი წევრი დავით კასრაძე მუშაობს: „რეორგანიზაციის შედეგად ჩემი თანამდებობა გაუქმდა და შეიქმნა განყოფილება, რომლის ხელმძღვანელად დანიშნეს დათო კასრაძე, ყოფილი ნაციონალური მოძრაობის წევრი. სხვების თანამდებობებზეც „ოცნების“ საარჩევნო ზონების შტაბების კოორდინატორები ჰყავთ დანიშნულები.  ჩვენი წამოსვლის შემდეგ ამ სამსახურში შტატები 40-დან 67-მდე გაიზარდა და ყველგან მათი პარტიული აქტივისტები დანიშნეს“.

 

ენმ-ის სამი წევრის სამსახურში აღდგენაზე გადაწყვეტილება, ჯერ კიდევ აგვისტოს თვეში, ბათუმის საქალაქო სასამართლო მიიღო. თუმცა ბათუმის მერიამ სასამართლოს ეს გადაწყვეტილება ქუთისის სააპელაციო სასამართლოში გაასაჩივრა. ქუთაისის სააპელაციო სასამრთლოს გადაწყვეტილება  გასაჩივრდებას აღარ ექვემდებარება.

ნეტგაზეთის მასალების სხვა გამოცემებში გადაბეჭდვის წესი
ბათუმელები