რატომ დარჩა ვაკანტური გამგებლის მოადგილის თანამდებობა ქედის მუნიციპალიტეტში? – ამ კითხვით მუნიციპალიტეტის გამგებელს დავით დუმბაძეს მივმართეთ. ის აცხადებს, რომ ვაკანტურ პოზიციაზე მის მოადგილედ ეკონომიკური განათლების მქონე კადრის დანიშვნა უნდოდა. შესაბამისი კადრის ძიებამ კი გამგებლის მოადგილის დანიშვნის პროცესი დააყოვნა.
„განათლებით ინჟინერი ვარ, მეორე სპეციალობით კი – იურისტი. იქედან გამომდინარე, რომ ერთი მოადგილე განათლების კუთხით მუშაობს და მეორე – ჯანდაცვის, მინდოდა მოადგილე განათლებით ეკონომისტი ყოფილიყო და ფინანსური კუთხით ემუშავა. ეს იყო მიზეზი, რამაც დააყოვნა პროცესი. კარგ ფინანსისტს ვეძებდი“, – ამბობს გამგებელი.
კითხვაზე, არის თუ არა საჭიროება ვაკანტური თანამდებობის დროულად შევსება და ხომ არ აფერხებს შტატით გათვალისწინებული კადრის არარსებობა სამუშაო პროცესს მუნიციპალიტეტში, დავით დუმბაძე პასუხობს:
„ამ ეტაპზე სამუშაოს თავს ვართმევთ, მაგრამ, ვფიქრობთ, ან შეიცვლება სტრუქტურა, ან ვნახავთ კარგ ფინანსისტს. საჭიროება ნამდვილად არის. ვფიქრობთ, მალე გამოინახება შესაბამისი კადრი“.
მუნიციპალიტეტებში გამგებლებს კანონმდებლობით პირველი მოადგილე და მოადგილეები ჰყავთ. ქედაში სწორედ პირველი მოადგილის პოზიციაა ვაკანტური. მოადგილეების თანამდებობას აქ მამუკა ფარტენაძე და გურამ ბერიძე იკავებენ. რაც შეეხება პირველი მოადგილის თანამდებობას – მას შემდეგ, რაც ქედაში გამგებლის პოზიციაზე დავით დუმბაძე აირჩიეს, მის მოადგილედ გურამ ლომინაძე დანიშნა. ლომინაძე ამ თანამდებაზე ქედის გამგეობაში რვა თვის განმავლობაში მუშაობდა, დაკავებული თანამდებობიდან კი ის გამგებლისვე განცხადების საფუძველზე გათავისუფლდა.
