ნეტგაზეთი • RU

ბათუმის კორპუსი ენმ-ის წევრების სამსახურში აღდგენაზე: შეიძლება ჩვენ გავმართლდეთ

 

აიპი „ბათუმის კორპუსის“ ხელმძღვანელის ზურა ნაკაიძის თქმით, მას ჯერ არ ჩაბარებია ქუთაისის სააპელაციო სასამართლოს განჩინება,  ერთიანი ნაციონალური მოძრაობის წევრი ყოფილი თანამშრომლების სამსახურში აღდგენის თაობაზე. ზურა ნაკაიძე ამბობს, რომ ამ საკითხზე დავა ჯერ არ დასრულებულა – მას იმედი აქვს, რომ სააპელაციო სასამართლო აიპის სასარგებლო გადაწყვეტილებას მიიღებს.

 

„განჩინება როდესაც მოგვივა ოფიციალურად აღმასრულებიდან, შემდეგ, რა თქმა უნდა, იურისტები გაეცნობიან ამას და მივიღებ გადაწყვეტილებას. სააპელაციო სასამართლოს მიერ გამოგზავნილი განჩინება ჯერ არ ჩაგვბარებია. განჩინება მოიტანეს ვიღაც მოქალაქეებმა, შესაბამისად, უნდა ჩამბარდეს ოფიციალურად“.

 

თუ დადასტურდება, რომ განჩინება რეალურია, მაშინ ზურა ნაკაიძე მის აღსრულებას აპირებს: „სასამართლო გადაწყვეტილება უნდა აღვასრულოთ, მაგრამ რა და როგორ, ეს უნდა გადავწყვიტოთ. ისე, ჯერჯერობით, შტატები არ არის“.

 

ზურა ნაკაიძის თქმით, ენმ-ის წევრებმა შეცდომაში შეიყვანეს ჟურნალისტები, რადგან ქუთაისის სასამართლოს განჩინება არ არის საბოლოო დოკუმენტი:

 

„ბათუმის სასამართლომ ზაფხულში დააკმაყოფილა მათი სარჩელი. ამ გადაწყვეტილების დაუყოვნებელი აღსრულების მოთხოვნით მათ მიმართეს ისევ ბათუმის სასამართლოს, რაზეც უარი მიიღეს. ეს უარი შემდეგ მათ გაასაჩივრეს ქუთაისში. აი, ეს საჩივარი დაუყოვნებლივ აღსრულებაზე დააკმაყოფილა სააპელაციო სასამართლომ. თორემ ჩვენ გასაჩივრებულზე, რომელიც ბათუმის სასამართლოს გადაწყვეტილებას ეხება, პროცესი  ქუთაისში ჯერ არ ჩატარებულა. ორი პარალელური დავა მიდის. შეიძლება სააპელაციო სასამართლომ დაადგინოს, რომ მისი დღევანდელი განჩინება არასწორია და გავმართლდეთ ჩვენ. მაშინ კიდევ ერთხელ ყველაფერი უკან იქნება დასაბრუნებელი“.

 

რაც შეეხება ნაცდური ხელფასის ანაზღაურებას, ზურა ნაკაიძის თქმით, აიპი „ბათუმის კორპუსს“ თავისი შემოსავლები არ აქვს, ამიტომ ჯერ არ იცის, როგორ შეძლებენ მისი ყოფილი თანამშრომლებისთვის ნაცდური თანხის ანაზღაურებას.

 

დღეს ენმ-ის სამ წევრს ბათუმში, რომლებიც გაზაფხულზე აიპი “ბათუმის კორპუსიდან” გაათავისუფლეს, ქუთაისის სააპელაციო სასამართლოს განჩინება ჩაჰბარდათ, რომლის მიხედვითაც სამივე მათგანი სამსახურში დაუყოვნებლივ უნდა აღადგინონ. 

ნეტგაზეთის მასალების სხვა გამოცემებში გადაბეჭდვის წესი
ბათუმელები