Batumelebi

 

კონფერენციას მეიოს კლინიკის ნეონატოლოგიური დეპარტამენტის უფროსი ქრისტოფერ კოლბი, ასევე მეიოს კლინიკის ნეონატოლოგი ვილიამ ქერი გაუძღვებიან და ქართველ ექიმებს კრიტიკულ პაციენტებში თანდაყოლილი გულის მანკების მართვის საერთაშორისო გაიდლაინებს გააცნობენ.

 

სამდღიანი კონფერენცია სასტუმრო „რედისონში“ გაიმართება და მასში აჭარის ჯანდაცვის სამინისტროსთან ერთად მონაწილეობას მიიღებენ  ბათუმის, ქუთაისის, ზუგდიდის, თბილისისა და თელავის ნეონატოლოგები და ბავშვთა კარდიოლოგები.

 

კონფერენცია გაიმართება სამედიცინო კორპორაცია „ევექსის“ ორგანიზებით და საქართველოს ნეონატოლოგთა ასოცოციაციის ეგიდით. კონფერენცია 21 ნოემბერამდე გაგრძელდება.

საქართველოს მთავრობის 9 ნოემბრის განკარგულებით, გონიოს პოლიგონის განაღმისთვის თავდაცვის სამინისტროზე გადასაცემი 220 ათასი ლარი სსიპ – საქართველოს ეროვნული საინვესტიციო სააგენტოსთვის გათვალისწინებული თანხის შემცირების ხარჯზე გამოიყოფა.

 

2010 წლის 14 იანვარს ხელვაჩაურში, გონიოს პოლიგონზე, ჯართად შეგროვებულ ტანკსაწინააღმდეგო ნაღმს ბილვანიძეების ოჯახის სამი წევრი ემსხვერპლა, მათ შორის ოთხი წლის ბავშვი. მაშინ თავდაცვის სამინისტროში განაცხადეს, რომ არსებობდა გეგმა, რომელიც იმ ტერიტორიების „დასუფთავებას“ ითვალისწინებდა, სადაც რუსული ბაზა იყო განთავსებული. სამინისტროს მაშინდელი ინფორმაციით, გონიოს პოლიგონი, სავარაუდოდ, 2010 წლის ბოლომდე უნდა გაწმენდილიყო.

 

 

 2013 წლის განმავლობაში სამინისტროს მიერ, „წარმომადგენლობითი ხარჯების“ ქვემუხლით, გაწეულია 1 მილიონ 859 ათას 700  ლარის ხარჯი, ხოლო 2014 წლის განმავლობაში – 1  მილიონ 82 ათას 200 ლარის ხარჯი. თუმცა, ამ ხარჯების გაწევისას „ზოგიერთ შემთხვევებში გაურკვეველია სტუმრების ვინაობა და რაოდენობა“. – აღნიშნულია აუდიტის ანგარიშში, სადაც რამდენიმე მაგალითია მოყვანილი:

2014 წლის 8 მაისს ქ. ბათუმში გაიმართა ვახშამი, რისთვისაც შპს „აჭარულ-ლაზურისთვის“ გადახდილია 3,6 ათასი ლარი; ასევე ქ. ბათუმში, 2014 წლის 30 მაისს, პოლიციელის დღის აღსანიშნავად გაიმართა დაჯილდოების ცერემონია და ვახშამი მოწვეული სტუმრებისთვის. ვახშამი გაიმართა სასტუმრო „შერატონში“ 400 პერსონაზე, რისთვისაც სს „ნუროლ ინშაათ ვე თიჯარეთისთვის“ გადახდილია 55,6 ათასი ლარი.

ზემოაღნიშნულ შემთხვევებში, წარმოდგენილი დოკუმენტებით, არ ფიქსირდება თუ ვინ და რამდენი პირი იმყოფებოდა სტუმრის რანგში.

 

2014 წლის 11 მარტს გაიმართა ვახშამი 20 პირზე რესტორანში „მცხეთის დარბაზი“ სტუმრების გასამასპინძლებლად, რისთვისაც შპს „გუჯარისთვის“ გადახდილია 4,5 ათასი ლარი. სტუმრების რანგში იმყოფებოდნენ ბელორუსიის საგანგებო   სიტუაციების სამინისტროს დელეგაცია (5 პირი).

ამავე დღეს რესტორან „კოპალაში“ გაიმართა ვახშამი 20 პირზე იმავე ბელორუსი სტუმრების გასამასპინძლებლად, რისთვისაც შპს „კოპალასთვის“ გადახდილია 3,7 ათასი ლარი.

მეორე დღეს (2014 წლის 12 მარტს) რესტორან „ფუნიკულიორში“ გაიმართა ვახშამი 20 პირზე იმავე ბელორუსი სტუმრების გასამასპინძლებლად, რისთვისაც შპს „ჯი-ემ-თი მთაწმინდისთვის“ გადახდილია 8,2 ათასი ლარი;

 

2014 წლის 24 აპრილს რესტორან „ფუნიკულიორში“ გაიმართა ვახშამი 25 პირზე ისრაელიდან სტუმრად მყოფი პირების გასამასპინძლებლად, რისთვისაც შპს „ჯი-ემ-თი მთაწმინდისთვის“ გადახდილია 9,5 ათასი ლარი;

 

2014 წლის 4 სექტემბერს ქ. მცხეთაში რესტორან მუზეუმ „გუჯარში“ გაიმართა ვახშამი 15 პერსონაზე უკრაინული დელეგაციის გასამასპინძლებლად, რისთვისაც შპს „რესტორან მუზეუმ გუჯარისთვის“ გადახდილია 5,2 ათასი ლარი;

                                                                                                                                 

2014 წლის 29 ნოემბერს ქ. მცხეთაში რესტორან მუზეუმ „გუჯარში“ გაიმართა ვახშამი 14 პერსონაზე უკრაინული დელეგაციის გასამასპინძლებლად, რისთვისაც შპს „რესტორან მუზეუმ გუჯარისთვის“ გადახდილია 7 ათასი ლარი;

 

2013 წლის 2 იანვარს რესტორან „სენატში“ გაიმართა ვახშამი, რისთვისაც შპს „სენატისთვის“ გადახდილია 15,5 ათასი ლარი. წარმოდგენილ დოკუმენტებში დაფიქსირებული არ არის სტუმრების ვინაობა და რაოდენობა;

 

ანალოგიურად, 2013 წლის 19 აპრილს რესტორან „სენატში“ გაიმართა ვახშამი 50 კაცზე, რისთვისაც შპს „სენატისთვის“ გადახდილია 9,8 ათასი ლარი. დაფიქსირებული არ არის სტუმრების ვინაობა და ხარჯის გაწევის აუცილებლობა.

 

2013 წლის 1 აგვისტოს რესტორან „ფუნიკულიორში“ გაიმართა ვახშამი აზერბაიჯანელი სტუმრების საპატივცემულოდ, რისთვისაც შპს „ჯი-ემ-თი მთაწმინდისთვის“ გადახდილია 22,9 ათასი ლარი. უცნობია, თუ რამდენი პირი ესწრებოდა ვახშამს და მათ შორის რამდენი იყო სტუმარი;

 

იმავე დღეს რესტორან „კოპალაში“ გაიმართა ვახშამი ასევე აზერბაიჯანელი სტუმრების საპატივცემულოდ, რისთვისაც შპს „კოპალასთვის“ გადახდილია 9,7 ათასი ლარი. მიღება-ჩაბარების აქტიდან ირკვევა, რომ ვახშამი გაიმართა 45 პირზე. დაფიქსირებული არ არის თუ რამდენი იყო სტუმარი;

 

ხოლო 8 აგვისტოს, იმავე რესტორან „კოპალაში“ გაიმართა ვახშამი სომხეთიდან ვიზიტად მყოფი სტუმრების საპატივცემულოდ, რისთვისაც შპს „კოპალასთვის“ გადახდილია 9,6 ათასი ლარი. მიღება-ჩაბარების აქტიდან ირკვევა, რომ ვახშამი გაიმართა 40 პირზე. გაურკვეველია აქედან რამდენი იყო სტუმარი;

 

ანალოგიურად, 2013 წლის 9 აგვისტოს რესტორან „ფუნიკულიორში“ გაიმართა ვახშამი ისევ აზერბაიჯანელი სტუმრების საპატივცემულოდ, რისთვისაც შპს „ჯი-ემ-თი მთაწმინდისთვის“ გადახდილია 16,3 ათასი ლარი. ასევე უცნობია, თუ რამდენი პირი ესწრებოდა ვახშამს და მათ შორის რამდენი იყო სტუმარი;

 

2013 წლის 31 დეკემბრიდან 2014 წლის 3 იანვრამდე პერიოდში შსს დელეგაცია ვიზიტით იმყოფებოდა სამეგრელო-ზემო სვანეთის რეგიონში. ქ. ანაკლიაში სასტუმროში განთავსებისთვის შპს „ლაზისთვის“ გადახდილია 3,8 ათასი ლარი. წარმოდგენილი დოკუმენტებიდან გაირკვა, რომ დაქირავებული იყო სასტუმროს 19 ნომერი ერთი დღე-ღამით, თუმცა გაურკვეველია ვინ და რამდენმა პირმა იცხოვრა სასტუმროში. ვიზიტთან დაკავშირებით გაიმართა ასევე ვახშამი 62 პირზე, რისთვისაც იმავე შპს „ლაზისთვის“ გადახდილია 7,4 ათასი ლარი. დაფიქსირებული არ არის თუ ვინ ესწრებოდა ვახშამს და რა აუცილებლობით იყო გამოწვეული მისი გამართვა.

 

სახელმწიფო აუდიტის სამსახურმა საქართველოს შინაგან საქმეთა სამინისტროს ცენტრალური აპარატის შესაბამისობის აუდიტის ანგარიში ახლახან გამოაქვეყნა. აუდიტის ინფორმაციით შემოწმდა 2013-2014 წლებში გაწეული საფინანსო–ეკონომიკური საქმიანობის კანონმდებლობასთან შესაბამისობა, შესაბამისი პერიოდების წლიური ბალანსები და მასთან დაკავშირებულ ანგარიშები. ზემოაღნიშნულთან გარდა სამსახურმა გამოავლინა მთელი რიგი შეუსაბამობები, მაგალითად:

 

„სახელმწიფო შესყიდვების განხორციელებასთან დაკავშირებით ცალკეულ შემთხვევებში შეინიშნება, რომ ტენდერების გამოცხადებისას არასწორად არის განსაზღვრული შესყიდვის სავარაუდო ღირებულებები. ასეთ შემთხვევებში [თუ ტენდერში მონაწილეობას არ ღებულობს ბევრი პრეტენდენტი და ადგილი არ აქვს კონკურენციას], ცალკეული კომპანიები სარგებლობენ შექმნილი სიტუაციით და გამარჯვებულად ცხადდებიან სატენდერო წინადადებების ღირებულებებით, რომელიც აღემატება საბაზრო ღირებულებას;

 

2013 წლის განმავლობაში სამინისტროს ცენტრალური აპარატის მიერ ქვეყნის გარეთ მივლინებებზე გაწეულია 964,4 ათასი ლარის საკასო ხარჯი, ხოლო 2014 წლის განმავლობაში – 1 მილიონ 16 ათას შვიდასი ლარის საკასო ხარჯი. აუდიტის ჯგუფისთვის ვერ იქნა წარმოდგენილი ქვეყნის გარეთ მივლინებების მიწვევები. სამივლინებო თანხები ანაზღაურებულია ბრძანებებში მითითებული პირობების შესაბამისად. ვერ მოხერხდა ბრძანებებში მითითებული პირობების შედარება მიწვევებში დაფიქსირებულ პირობებთან. ადგილი ჰქონდა აუდიტის მასშტაბის შეზღუდვას;

 

გათვალისწინებული არ არის საგადასახადო კანონმდებლობის მოთხოვნები სამინისტროს მიერ დაქირავებულთათვის გაწეულ მომსახურებასა და ფასიანი საჩუქრებით დაჯილდოების დროსაც;

მაგალითად:

 

ბინის ქირაზე სამინისტროს 2013 წლის განმავლობაში გაწეული აქვს 138,9 ათასი ლარის, ხოლო 2014 წლის განმავლობაში – 287,6 ათასი ლარის ხარჯი. აღნიშნული ხარჯები გაწეულია სამინისტროს ბრძანებების საფუძველზე, რომელთა მიხედვითაც სამინისტროს თანამშრომლებს დაუქირავდათ საცხოვრებელი ბინები. აუდიტის დასკვნის მიხედვით, დამქირავებლის მიერ დაქირავებულისთვის მომსახურების მიწოდებისას [ასევე საცხოვრებლის სარგებლობაში გადაცემისას] საიჯარო ქირის წლიური საბაზრო ღირებულება განეკუთვნება ხელფასის სახით მიღებულ შემოსავლებს და იბეგრება საშემოსავლო გადასახადით. სამინისტროს მიერ აღნიშნული გადასახადის ბიუჯეტის ხარჯებში გათვალისწინების შემთხვევაში სახელმწიფო ბიუჯეტის კუთვნილი გადაუხდელი საშემოსავლო გადასახადის თანხა შეადგენს 106,5 ათას ლარს;

 

ანალოგიურად, 296,3 ათასი ლარი არ არის გადახდილი ბიუჯეტში, მინისტრის 2013 წლის 22 ნოემბრის ბრძანების შესრულების შედეგად, რომლითაც საქართველოს შინაგან საქმეთა სამინისტროს მოსამსახურეები [მათ შორის შტატგარეშეები], დაღუპულ მოსამსახურეთა ოჯახის წევრები და შპს „სუფთა სამყაროს“ თანამშრომლები [რომლებიც ემსახურებიან სამინისტროს] დაჯილდოებული იქნენ საახალწლო ფასიანი საჩუქრებით [აღნიშნული ღონისძიების განხორციელების მიზნით სამინისტრომ გააფორმა ხელშეკრულებები სახელმწიფო შესყიდვებზე გამარტივებული შესყიდვის საშუალებით შპს „გუდვილთან“ – 877,2 ათას ლარზე; შპს „ბადაგონთან“ – 134,2 ათას ლარზე; სს „ბაგრატიონი 1882“-თან – 174 ათას ლარზე]“.

 

„ჩვენი აზრით სამინისტროს საქმიანობა ზემოთ მოტანილი ფაქტების გამოკლებით შესაბამისობაშია მოქმედი კანონმდებლობის მოთხოვნებთან“ აღნიშნულია სახელმწიფო აუდიტის ანგარიშში.

 

აჭარის ფინანსთა და ეკონომიკის სამინისტრომ სასწავლებლის ტერიტორიის ნაწილი – 25 160 კვ/მ მიწის ფართობი, რომელიც სახელმწიფო საკუთრებაში იყო, აჭარის ქონებად სექტემბერში დაარეგისტრირა; აქედან 1 ჰა-მდე სასოფლო-სამეურნეო დანიშნულების მიწის ნაკვეთს დანიშნულება შეუცვალა და მთელი ეს ქონება, 200 კვ/მ ფართობის ნაგებობებთან ერთად, საკუთრებაში გაფორმებიდან ერთ კვირაში პირობებიან აუქციონზე გაიტანა. საწყისი გასაყიდი ფასი – 2,8 მილიონი ლარი იყო.

 

ელექტრონული აუქციონის ვებგვერდის მიხედვით, აუქციონში მონაწილეობა მიიღო მხოლოდ „ბიზნეს დეველოპმენტმა“ და ქონება 12 ოქტომბერს 2 მილიონ 856 ათას ლარად შეიძინა. აუქციონის პირობების თანახმად, „ბიზნეს დეველოპმენტი“ ვალდებულია ხელშეკრულების გაფორმებიდან სამი წლის ვადაში აქ ააშენოს არანაკლებ 150-ნომრიანი სასტუმრო, ავტოსადგომით, ღია და დახურული ტიპის აუზებით, კვების ობიექტებით, გამაჯანსაღებელი სპაცენტრით. აღნიშნულ პროექტში კომპანიამ არანაკლებ 30 მილიონი ლარის ინვესტიცია უნდა განახორციელოს.

 

 

შპს „ბიზნეს დეველოპმენტი“ 2015 წლის ივნისში დაფუძნებული კომპანიაა, რომლის 100% წილს შპს „ნოდია, ურუმაშვილი და პარტნიორები“ ფლობს. „ნოდია, ურუმაშვილი და პარტნიორები“, კომპანიის საიტის მიხედვით, 2005 წელს შეიქმნა და ის ინდუსტრიულ და კომერციულ სექტორებში კლიენტებს ძირითადად იურიდიულ მომსახურებას სთავაზობს.

 

თანამშრომლობს თუ არა კომპანია საპარტნიორო ფონდთან, რომელი კომპანიები არიან მისი პარტნიორები მწვანე კონცხის პროექტში, რა გეგმები გაქვთ და ან რა კავშირები იმ ფირმებთან, რომლებიც ბიძინა ივანიშვილს სახელს უკავშირდება? – ამ კითხვების პასუხად კომპანიიდან შემდეგი SMS-ს შეტყობინება მივიღეთ: `სამწუხაროდ „ნოდია, ურუმაშვილი და პარტნიორები“ ვერ მოგაწოდებთ ინფორმაციას თქვენს მიერ დასმული კითხვების და საკითხის გარშემო ვინაიდან ამ ეტაპისთვის ეს ინფორმაცია კონფიდენციალურია“.

 

არაოფიციალური ინფორმაციით, მწვანე კონცხზე აღნიშნული ტერიტორიით სწორედ ბიძინა ივანიშვილი იყო დაინტერესებული.

 

 

მწვანე კონცხზე სასწავლებლის შენობისა და დარჩენილი ტერიტორიის ბედი გაურკვეველია. გამორიცხული არ არის ისიც გაიყიდოს. საქმე იმაშია, რომ უნივერსიტეტი ალტერნატიული ფართობის გადაცემის შემთხვევაში ამ ტერიტორიას დათმობს. ასეთი შეთავაზება კი უნივერსიტეტისადმი აჭარის მთავრობას წერილობითაც ჰქონდა.

 

„მაქ არის დიდი ფართობი, რომელიც უნივერსიტეტს არ სჭირდება. თან ტერიტორიაზე შემოჭრილი არიან მოქალაქეები, მიტაცებული აქვთ ნაკვეთები და იმათთან ცალკე პრობლემები იქმნება. ტერიტორიის მოვლას კიდევ ადმინისტრაციული ხარჯები სჭირდება, რომელიც თავისთავად პრობლემური სისტემაა. ჩვენ გვაქვს ერთ-ერთი კვლევითი ინსტიტუტი ქობულეთში და მიწის ნაკვეთიც. ვფიქრობთ, მას გამოვიყენებთ“, – აღნიშნა „ბათუმელებთან“ ბათუმის რუსთაველის სახელმწიფო უნივერსიტეტის კანცლერმა ჯემალ ანანიძემ.

 

კანცლერის ინფორმაციით, აჭარის მთავრობისგან იყო წერილი რამდენად შეიძლებოდა განხილულიყო ამ ფართობის ამოღება და მთავრობისთვის გადაცემა, სანაცვლოდ კი უნივერსიტეტს სხვა ფართობს გადასცემდნენ. მთავრობის ამ წინადადებას, საქართველოს შესაბამისი სამინისტროების თანხმობით, უნივერსიტეტის წარმომადგენლობითი საბჭოც დაეთანხმა. განიხილება უნივერსიტეტისთვის ჩაქვში მდებარე აჭარის უმაღლესი საბჭოს შენობის გადაცემაც. შესაძლოა აგრარული მიმართულების სტუდენტები ჩაქვში ერთი წლის შემდეგ გადავიდნენ სასწავლებლად.

 

„მაგრამ, ამ შენობას, რომელსაც სასწავლო პროცესისთვის ვიყენებდით მწვანე კონცხზე, მაინც უნდა ჩავუტაროთ ექსპერტიზა. თან ამბობენ, რომ ეს მცოცავი ფერდობია. იმ ვარიანტსაც განვიხილავთ – გავარემონტოთ თუ არა. თანხაც რომ რამე, ისევ მთავრობას უნდა მოვთხოვოთ, დაახლოებით 4 მილიონი დასჭირდება გარემონტებას. შემოთავაზება, რომ მთლიანად დავუთმოთ ეს ტერიტორია, არ ყოფილა, თუმცა პერსპექტივაში რა იქნება, ვერაფერს გეტყვით. ჩვენთვის მთავარია სასწავლო პროცესი იყოს გამართული,“ – განაცხადა ჯემალ ანანიძემ.

 

„ბათუმელების“ ინფორმაციით, ქობულეთში მდებარე ყოფილი კვლევითი ინსტიტუტიც, რომელზეც კანცლერი საუბრობს, უნივერსიტეტისთვის პრობლემური იქნება, ვინაიდან ის თავის დროზე მთავრობამ კერძო ფიზიკურ პირს 1 ლარად გადასცა.

 

რამდენადაც „ბათუმელებმა“ გაარკვია, გამორიცხული არ არის მწვანე კონცხზე სასწავლებლის დარჩენილი ტერიტორია ინვესტორს იმ პირობით გადაეცეს, რომ ის ააშენებს ახალ შენობას ბათუმში უმაღლესი საბჭოსთვის, ხოლო უმაღლესი საბჭოს არსებული შენობა მწვანე კონცხის სანაცვლოდ უნივერსიტეტს გადაეცემა.

 

უნივერსიტეტში ამბობენ, რომ მწვანე კონცხის ტერიტორია სახელმწიფო ქონებაა, მათ კი აგრარული სექტორისთვის 5 ჰექტარი მიწის ნაკვეთიც ეყოფათ. უნივერსიტეტში პარალელურად იმაზეც მუშაობენ, თუ რა დაუჯდებათ ახალი შენობის აგება.

 

სად დაიდებს ბინას უმაღლესი საბჭო, გაურკვეველია. იმ ნაკვეთზე, რომელიც უმაღლეს საბჭოს ახალი შენობის ასაშენებლად უნდოდა, მერია აცხადებს, რომ სარეკრეაციო ზონაა. საუბარია ხელოვნების უნივერსიტეტის მიმდებარე ტერიტორიაზე. მერიაში „ბათუმელებს“ უთხრეს, რომ უმაღლესი საბჭოსთვის ტერიტორიის გამოყოფაზე მათთვის ოფიციალურად არავის მიუმართავს.

 

„თავიდან საუბარი იყო უმაღლესი საბჭოს შენობა ხელოვნების უნივერსიტეტის გვერდით აშენებულიყო, თუმცა მერია აცხადებს, რომ რეკრეაციულ ზონას აკეთებს და მაგის წინააღმდეგ ნამდვილად არ წავალთ. ჩვენ არ ვითხოვთ ქალაქში კონკრეტულ ადგილს, ჩვენ ვითხოვთ ნებისმიერ ტერიტორიას – ჭაობის მხარე იქნება ეს, ხორცკომბინატის ტერიტორია თუ ახალი ბულვარი. ნებისმიერ ადგილას, ოღონდ ქალაქში“, – განაცხადა უმაღლესი საბჭოს ფრაქცია „ქართული ოცნების“ თავმჯდომარემ ალექსანდრე ჩიტიშვილმა. მისივე თქმით, მთავრობა მუშაობს ბათუმში შესაბამისი ტერიტორიის შერჩევაზე: „სახელმწიფომ რომ ხარჯი არ გაიღოს, მოსაძებნია ინვესტორი, რომელიც ჩაქვის შენობას გამოიყენებს და სანაცვლოდ ახალ შენობას ააშენებს. რამდენიმე ვარიანტი განიხილება. შეიძლება მწვანე კონცხი უფრო მომგებიანია ინვესტორისთვის, ვიდრე ჩვენი ტერიტორია. მიწის ფართობიც დიდი გვაქვს და შესაძლოა უნივერსიტეტი გადმოვიდეს აქ. მაგრამ ზუსტად ვერ გეტყვით, ტექნიკური საკითხებია“.

 

ალექსანდრე ჩიტიშვილის თქმით, 2016 წელში უმაღლესი საბჭოს ახალი შენობის პროექტის გაკეთება მაინც უნდა მოესწროს, რაზეც მთავრობა იმუშავებს, თუმცა მანამდე ტერიტორიაა გამოსაყოფი.

 

სოფლის მეურნეობის პროექტების მართვის სააგენტომ 2015 წლის არასტანდარტული მანდარინის მოსავლის რეალიზაციის ხელშეწყობის ღონისძიებების შეუფერხებლად განხორციელების მიზნით, უნდა უზრუნველყოს სამუშაო ჯგუფის შექმნა საქართველოს სოფლის მეურნეობის სამინისტროს, საქართველოს შინაგან საქმეთა სამინისტროსა და აჭარის ავტონომიური რესპუბლიკის სოფლის მეურნეობის სამინისტროს წარმომადგენელთა მონაწილეობით.

 

„დაევალოს საქართველოს შინაგან საქმეთა სამინისტროს, ამ განკარგულებით გათვალისწინებული ღონისძიებების მიმდინარეობისას,  უზრუნველყოს არასტანდარტული მანდარინის ჩაბარების კონტროლი, წესრიგის დაცვა და უსაფრთხოება“, – აღნიშნულია მთავრობის განკარგულებაში.

 

საქართველოს ფინანსთა და  სოფლის მეურნეობის სამინისტროები კი ვალდებულნი არიან,  2015 წლის მანდარინის (არასტანდარტული) მოსავლის რეალიზაციის ხელშეწყობის ღონისძიებების დასაფინანსებლად, საქართველოს 2016 წლის სახელმწიფო ბიუჯეტის პროექტში გაითვალისწინონ 2 000 000 ლარი.

 

როგორც სამინისტროს წერილიდან ირკვევა, გადამხდელების შესახებ ინფორმაციას სამინისტრო იმ მიზეზით არ გვაწვდის, რომ „აღნიშნული მოიცავს პირად ინფორმაციას და დაკავშირებულია კერძო საკითხებთან“;

 

სამინისტრო არც იმ ინფორმაციას იძლევა, თუ კონკრეტულად რა ღონისძიებებში დაიხარჯა ბიუჯეტში შემოწირულობით შესული თანხა, ვინაიდან, როგორც სამინისტროს წერილშია აღნიშნული – „ბიუჯეტის ყველა შემოსულობა მიიმართება საერთო გადასახდელების დასაფინანსებლად“.

 

საქართველოს ფინანსთა სამინისტროს პასუხი:

 

„თქვენი მიმდინარე წლის 19 ოქტომბრის №1833 განცხადებასთან დაკავშირებით გაცნობებთ, რომ ჩარიცხული თანხების შესახებ ინფორმაციას ცალკეული გადამხდელების მიხედვით ვერ მოგაწოდებთ, ვინაიდან აღნიშნული მოიცავს პირად ინფორმაციას და დაკავშირებულია კერძო საკითხებთან.

 რაც შეეხება 2013, 2014 და 2015 წლებში ნებაყოფლობითი ტრანსფერების, გრანტების გარდა, სახეში ჩარიცხული თანხების საერთო ოდენობას, სახაზინო სამსახურმა გაცნობათ 2015 წლის 13 ოქტომბრის N146389-18 წერილით.

 აქვე გაცნობებთ, რომ საქართველოს საბიუჯეტო კოდექსის მე-4 მუხლის ვ) ქვეპუნქტის თანახმად, ბიუჯეტის ყველა შემოსულობა მიიმართება საერთო გადასახდელების დასაფინანსებლად“.

 

პროექტის პარტნიორები არიან: სტამბულისა და კოჩის უნივერსიტეტები (თურქეთი), კავალას მუნიციპალიტეტი (საბერძნეთი); კონსტანცას ნაციონალური ისტორიისა და არქეოლოგიის მუზეუმი (რუმინეთი); ოდესის მუნიციპალიტეტის კულტურისა და ტურიზმის დეპარტამენტი (უკრაინა); ვარნას მუნიციპალიტეტი (ბულგარეთი). პროექტის მხარდამჭერები არიან: შავი ზღვის ეკონომიკური თანამშრომლობის ორგანიზაცია (BSEC), შავი და აზოვის ზღვების პორტების ასოციაცია (BASPA), შავი ზღვის საერთაშორისო კლუბი (IBSC).

 

საქართველოში პროექტი „ლიმენის“ ლიდერი ორგანიზაციაა გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული ცენტრი. ლიმენის ქართული ქსელის წევრი ორგანიზაციები არიან: აჭარის არ ტურიზმისა და კურორტების დეპარტამენტი, აჭარის არ განათლების, კულტურისა და სპორტის სამინისტრო, აჭარის კულტურული მემკვიდრეობის სააგენტო, ქალაქ ბათუმის მერია, ბათუმის საზღვაო ნავსადგური, სამეცნიერო-აკადემიური დაწესებულებები: ბათუმის შოთა  რუსთაველის სახელმწიფო უნივერსიტეტის ნიკო ბერძენიშვილის ინსტიტუტი, ბათუმის ხელოვნების სასწავლო უნივერსიტეტი, ბათუმის არქეოლოგიური მუზეუმი, აჭარის ხარიტონ ახვლედიანის სახელობის მუზეუმი და თანამედროვე ხელოვნების ცენტრი CAC.

 

პროექტის მიზანი

 

პროექტის მიზანია შავი ზღვის რეგიონში კულტურული ტურიზმის განვითარება და „კულტურის ევროპული დედაქალაქის“ გამოცდილების გამოყენებით ახალი ინსტიტუციის „შავი ზღვის კულტურული პორტის“ იდეისა და სტრატეგიის შემუშავება. „შავი ზღვის კულტურული პორტის“ ინსტიტუციის მიზანია შავი ზღვის აუზის ქალაქი-პორტების მემკვიდრეობისა და სპეციფიკური ტურისტული პროდუქტების პოპულარიზაცია: ქალაქი-პორტების მდგრადი და თანასწორი თანამშრომლობის ეკონომიკური და კულტურული პლატფორმის მომზადება.

 

რა არის საჭირო პროექტის მიზნის მისაღწევად

 

„შავი ზღვის კულტურული პორტის“ ინსტიტუციას, კულტურული მემკვიდრეობის, როგორც მნიშვნელოვანი ფასეულობის აღიარება უდევს საფუძვლად. როგორც გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული ცენტრის ხელმძღვანელი, მარიამ დიდებულიძე ამბობს, „ამ იდეის განსახორციელებლად თავდაპირველად შეიქმნება ისტორიული პორტების ერთიანი ქსელი, რომელიც დაეხმარება თავის წევრებს მათი კულტურის  უკეთ წარმოჩენასა და რეკლამირებაში. ასევე, უნდა შეიქმნას ერთიანი ტურისტული მარშრუტები, ნიშნულების ერთიანი სისტემა, საინფორმაციო ბუკლეტები, ცნობარები, ფირნიშები. დღევანდელ მსოფლიოში საყოველთაოდ აღიარებულია, რომ კულტურულ მემკვიდრეობას სათანადო დაცვისა და განვითარების პირობებში მატერიალური კეთილდღეობის მოტანა შეუძლია“.

 

რა აქტივობები განხორციელდა პროექტის ფარგლებში

 

ადგილობრივი ქსელების ჩამოყალიბების გარდა, ყველა პორტისათვის შემუშავებული ერთიანი სქემის მიხედვით მომზადდა კონკრეტული პროდუქტები: ვებგვერდი https://www.limenproject.net, სადაც ინგლისურ ენაზე მოცემულია ინფორმაცია პროექტის მონაწილე შვიდი საპორტო ქალაქის ისტორიული და ბუნებრივ-კულტურული ღირსშესანიშნაობების შესახებ, რომლებიც თითოეული ქალაქის უნიკალურ სახეს ქმნის. ბათუმის შესახებ ინფორმაციაც საერთო თემატური სქემის მიხედვით მომზადდა: არქეოლოგიური ძეგლები (ბათუმისციხე, გონიო-აფსაროსი, პეტრა-ციხისძირი), დაცული ტერიტორიები (მტირალა, ისპანი), ქალაქის ურბანული მემკვიდრეობის ნიმუშები, რელიგიური ნაგებობები, უმაღლესი სასწავლებლები, მუზეუმები, კულტურის დაწესებულებები, თანამედროვე არქიტექტურის ნიმუშები, კულტურული პროექტები. ასევე ატვირთულია კლიპი ბათუმისა და მისი შემოგარენის კულტურული მემკვიდრეობის ძეგლების შესახებ. დაიბეჭდა გზამკვლევები და საინფორმაციო ბუკლეტები მოკლე ანოტაციებით ქართულ, რუსულ და ინგლისურ ენებზე. ამ მასალებს წარმატებით გამოიყენებენ აჭარის ტურიზმის დეპარტამენტი და ტურისტული სააგენტოები.

 

მომზადდა მარშრუტები, რომლებიც ძირითადად განკუთვნილია ქალაქში კრუიზით ჩამოსული ტურისტებისათვის. ვინაიდან კრუიზის მონაწილეები ჩვეულებრივ ერთი დღით ან დაახლოებით რვა საათით ჩერდებიან ხოლმე პორტებში, ამიტომ მარშრუტები შედგენილია ისე, რომ ვიზიტორებმა შეძლონ როგორც ფეხით გასეირნება ქალაქში, ასევე სურვილის მიხედვით აირჩიონ არქეოლოგიური ძეგლებისა და მუზეუმების მონახულება. მიუხედავად იმისა, რომ ეს მარშრუტები საკრუიზო ტურისტებზეა გათვლილი, ნებისმიერ ტურისტულ სააგენტოს შეუძლია მათი პრაქტიკულად გამოყენება და ნებისმიერი კომბინაციით მათი შეთავაზება სხვა ტიპის ტურისტებისთვისაც. ეს მარშრუტები განსხვავდება აქამდე არსებული ტურისტული მარშრუტებისაგან სიახლით და მეცნიერულად გამართული ანოტაციებით. მთავარი აქცენტი გაკეთებულია კულტურულ მემკვიდრეობაზე, რითაც ბათუმი და, ზოგადად, აჭარის რეგიონი არის უნიკალური.

 

ორგანიზატორების მიერ მოწოდებული მოდელის მიხედვით, მზადდება ადგილობრივი მოთხოვნების შესაბამისი დიზაინითა და გამძლე მასალით შესრულებული ფირნიშები. ფირნიშები განთავსდება აჭარის კულტურული მემკვიდრეობის სააგენტოს მიერ შერჩეულ ძეგლებთან და მათ ადგილზე განთავსებასაც აჭარის კულტურული მემკვიდრეობის სააგენტო უზრუნველყოფს.

 

პროექტის დასასრულს, ამა წლის დეკემბრის დასაწყისში, ჯერ თბილისში და შემდეგ ბათუმში ჩატარდება ფოტოგამოფენა „ნაოსნობა ბიზანტიიდან და ბიზანტიისკენ: შუა საუკუნეების პორტები შავი ზღვიდან აღმოსავლეთ ხმელთაშუაზღვისპირეთისაკენ“. მსგავსი ფოტოგამოფენა პროექტის მონაწილე ყველა ქვეყანაში ჩატარდა. აღსანიშნავია ასევე, რომ ფოტოგამოფენის მასალები დარჩება ბათუმში. ეს ძალიან ძვირფასი შენაძენი იქნება ქალაქისთვის, რადგან მას დიდი შემეცნებითი და საგანმანათლებლო მნიშვნელობა გააჩნია.

 

პროექტის ერთ-ერთი ყველაზე მნიშვნელოვანი ღონისძიება იყო საკრუიზო გემზე „ზურმუხტის პრინცესა“ (სიდიდით მეხუთე გემი მსოფლიოში) ბიზანტიური და პოსტბიზანტიური ძეგლების ევროპული ცენტრისა და სტამბულის უნივერსიტეტის მიერ ორგანიზებული სიმპოზიუმი „საპორტო ქალაქები ეგეოსიდან შავ ზღვამდე. შუა საუკუნეების და თანამედროვეობის კავშირები“. სიმპოზიუმი გაიმართა ამა წლის 22-28 აგვისტოს. „კულტურული კრუიზის“ ფარგლებში მონაწილეებს ჰქონდათ საშუალება გასცნობოდნენ საბერძნეთის ქალაქ ვოლოსის (რაც სიმბოლურია, რადგან ამ ქალაქიდან დაიწყო ლეგენდარული „არგოს“ მოგზაურობა შავი ზღვისკენ), კ.ქიოსის, კონსტანცასა და ვარნას ღირსშესანიშნაობებსა და მუზეუმებს. დაუვიწყარი სანახაობა იყო საკრუიზო გემით შესვლა ბოსფორში და ზღვიდან დანახული სტამბული – ძველი კონსტანტინოპოლი. მოგზაურობა დასრულდა სტამბულში ფოტოგამოფენით „სამი ზღვა და შვიდი პორტი: კულტურული მარშრუტები ეგეოსიდან შავ ზღვამდე“, რომელიც წარმოდგენილი იყო კოჩის მუზეუმის სპეციალურ დარბაზში. სამეცნიერო სიმპოზიუმში მონაწილეობდნენ სხვადასხვა ქვეყნის მეცნიერები, კულტურისა და ტურიზმის სფეროში მომუშავე სპეციალისტები, კულტურის საერთაშორისო ორგანიზაციებისა და ტურისტული ორგანიზაციების წარმომადგენლები, ასევე ექსპერტები ბრიუსელის ევროპული დაწესებულებებიდან. ყველა ქვეყნის 60-მა მონაწილემ წარმოადგინა მოხსენებები, სადაც განხილული იყო როგორც სამეცნიერო კვლევის საკითხები, ასევე ახალი გეგმები და იდეები დაკავშირებული შავი ზღვის საპორტო ქალაქების კულტურულ და ტურისტულ განვითარებასთან.

 

სიმპოზიუმის მუშაობაში საქართველოს მხრიდან მონაწილეობდნენ გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული ცენტრის და ბათუმის შოთა რუსთაველის სახელმწიფო უნივერსიტეტის თანამშრომლები. სიმპოზიუმის მოხსენებები ნოემბრის ბოლოს დაიბეჭდება.

 

სიმპოზიუმის მთავარი მიზანი იყო შავი ზღვის კულტურული პორტის ინსტიტუციის დაფუძნებისთვის საფუძვლის მომზადება. შავი ზღვის კულტურული პორტის ინსტიტუციის დაარსებამ ხელი უნდა შეუწყოს ეგეოსისა და შავი ზღვის რეგიონების კულტურული თვალსაზრისით დაკავშირებას და კულტურული ტურიზმის განვითარებას.

 

რა უნდა გააკეთოს ხელისუფლებამ იმისათვის, რომ  ბათუმმა მომავალში მოიპოვოს შავი ზღვის კულტურული პორტის სტატუსი

 

შავი ზღვის კულტურული პორტის სტატუსის მოპოვება სამეცნიერო კვლევით ორგანიზაციებთან ერთად იმ სახელმწიფო სტრუქტურების ჩართულობასა და ოპერატიულობაზეა დამოკიდებული, რომლებიც მონაწილეობენ საორგანიზაციო საკითხების მოგვარებასა და რეკომენდაციების შესრულებაში. ამას პროექტის გაგრძელებისთვის არსებითი მნიშვნელობა ექნება.

 

საქართველოში პროექტის ხელმძღვანელი მარიან დიდებულიძე იმედოვნებს, რომ პროექტი ერთი მხრივ, ხელს შეუწყობს შავი ზღვის რეგიონში ტურიზმის განვითარებას, ხოლო მეორე მხრივ, წინ წამოწევს კულტურული მემკვიდრეობის მნიშვნელობას, მისი დაცვის, მოვლისა და შენარჩუნების საკითხებს.

 

„ლიმენის“ პროექტის ერთ-ერთი მონაწილის ნინო ინაიშვილის აზრით, შავი ზღვის კულტურული პორტის ტიტულის მოპოვებისათვის კონკურენციაში ჩაბმა მნიშვნელოვანი გამოწვევაა ბათუმისთვის, თუმცა მას საამისო პოტენციალი გააჩნია. ვინაიდან ეს პროგრამა ფართო კულტურულ, სოციალურ და ეკონომიკურ მიზნებს უკავშირდება, ამიტომ სახელისუფლებო სტრუქტურების მხრიდან საჭიროა ძლიერი პოლიტიკური მხარდაჭერა და საზოგადოების სხვადასხვა ჯგუფის: პოლიტიკოსების, კულტურისა და ბიზნესსექტორების, აკადემიური წრეების, მოქალაქეებისა და ადგილობრივი თემების ჩართულობა. სწრაფვა აღნიშნული ტიტულის მოსაპოვებლად უნდა იქნას გამოყენებული ქალაქის მდგრადი განვითარების მიზნების მისაღწევად და უნდა შეესაბამებოდეს ადგილობრივი ეკონომიკური და სოციალური განვითარების სტრატეგიას. ფაქტობრივად, ეს პროექტი გვთავაზობს ქალაქისა და რეგიონის ეკონომიკური და სოციალური განვითარების მიზნების მიღწევას კულტურის მეშვეობით. ამ პროცესში მნიშვნელოვანი როლი ეკისრება კულტურული ტურიზმის განვითარებას, რომლის უმნიშვნელოვანესი კომპონენტია ქალაქის ისტორიული და კულტურული მემკვიდრეობა. ქალაქის განსაკუთრებულობისა და ისტორიის, გარემოს კულტურული იდენტობის წარმოჩენა და კრეატიული ინდუსტრიების განვითარება ხელს შეუწყობს ბათუმისა და, ზოგადად, აჭარის, როგორც კულტურული რეგიონის იმიჯის დამკვიდრებას შავი ზღვის აუზში.

 

„შავი ზღვის კულტურული პორტის“ ინიციატივა უფრო გლობალურ მიზნებსაც ემსახურება, კერძოდ სხვადასხვა ქვეყნის მოქალაქეებს შორის ურთიერთგაგებისა და თანამშრომლობის ჩამოყალიბებას და კულტურათა შორის დიალოგის ხელშეწყობას. პროექტის ავტორებსა და პარტნიორებს სწამთ, რომ განსაკუთრებით ახლა, ამ კონფლიქტების დროს, კულტურას შეუძლია გახდეს უმნიშვნელოვანესი იარაღი ამ არეალში ურთიერთკავშირისა და მეგობრობის დამყარებისათვის. კულტურას შესწევს ძალა, დააკავშიროს, გააერთიანოს ადამიანები და თავისი წვლილი შეიტანოს როგორც რეგიონის, ისე მისი მოქალაქეების განვითარებაში.

 

 

მთავრობამ ზემოაღნიშნულ პერიოდში საქართველოს მართლმადიდებელ ეკლესიას 1 ლარად საკუთრებაში გადასცა მსუბუქი ავტომანქანა „Toyota Landcruiser LC 200“ [გამოშვების წელი – 2010, ფერი – შავი, მაღალი გამავლობის, ძრავის მოცულობა – 4700]; ასევე 1 ლარად – ავტომანქანა „Mercedes-Benz S 500“ [გამოშვების წელი – 2012, ფერი – შავი, ტიპი – სედანი, ძრავის მოცულობა – 4700]; ეკლესიას 1 ლარად გადაეცა აგრეთვე ორი ავტომობილი: „MERCEDES-BENZ 310 და „ნივა“; ასევე 1 ლარად – ორი ავტობუსი, ხოლო უფასოდ ორი ტრაქტორი – „SAME SOLARIS 55“; ეკლესიას 1 ლარად მიჰყიდეს სახელმწიფოს კუთვნილი 97 ძირი კრიპტომერიის ხის მორიც.

 

გარდა მოძრავი ქონებისა, საპატრიარქოს 1 ლარად გადასცემდნენ [მიმდინარე წლის მაისიდან კი სრულიად უფასოდ] უძრავ სახელმწიფო ქონებასაც – მიწას და შენობა-ნაგებობებს. მოქმედი ხელისუფლების მიერ საქართველოს საპატრიარქოს 917 504 კვ/მ ფართობის ათეულობით მიწის ნაკვეთი გადაეცა თბილისსა და საქართველოს სხვა ადგილებში. მათ შორის ოცზე მეტი ნაკვეთი, მათზე არსებული შენობა-ნაგებობებით.

 

აღსანიშნავია, რომ იმ შენობა-ნაგებობების ფართობების დადგენა, რომლებიც საპატრიარქოს მიწასთან ერთად გადაეცემა, ფაქტობრივად, შეუძლებელია. ეს შენობა-ნაგებობები რეესტრის ამონაწერებში ხშირ შემთხვევაში მხოლოდ დანომრილია და ფართობი არ არის მითითებული. საპატრიარქოსთვის გადაცემული შენობების  საერთო ფართობის შესახებ ინფორმაცია კი საქართველოს ეკონომიკისა და მდგრადი განვითარების სამინისტრომ და მისმა ქვემდებარე სახელმწიფო ქონების ეროვნულმა სააგენტომ, მოთხოვნის მიუხედავად, არ მოგვაწოდა.

 

სამინისტრომ არც იმ სახელმწიფო ქონების საბალანსო ღირებულების [რომ არაფერი ვთქვათ საბაზრო ღირებულებაზე] შესახებ მოგვაწოდა ინფორმაცია, რომელიც საპატრიარქოს 1 ლარად ან/და უსასყიდლოდ გადასცეს. შეგვიძლია ვივარაუდოთ, რომ გადაცემული ქონების უმეტესობა სახელმწიფოს შეფასებული არც აქვს.სამინისტრომ დაზუსტებით არც ის ინფორმაცია მოგვაწოდა, საპატრიარქომ გადაიხადა თუ არა ზემოაღნიშნულ პერიოდში გადაცემული სახელმწიფო ქონების საპრივატიზაციო ღირებულება _ ჯამში 40 ლარი.

 

უმეტეს შემთხვევაში არ არის დაკონკრეტებული თუ რის საფუძველზე, რა მოტივითა თუ პირობებით გადასცემენ [ფაქტობრივად ჩუქნიან] საპატრიარქოს სახელმწიფო ქონებას.

 

დოკუმენტებს თუ გადავხედავთ, მექანიზმი ერთი შეხედვით  მარტივია – მთავრობაში შედის საპატრიარქოს წარმომადგენლების შუამდგომლობა, რომლითაც საპატრიარქო ამა თუ იმ ქონების 1 ლარად პრივატიზებას, საკუთრებაში უსასყიდლოდ გადაცემას, ან უსასყიდლო უზუფრუქტით გადაცემას ითხოვს.

 

დოკუმენტებიდან ისიც ჩანს, რომ მთელი ეს შუამდგომლობა-დაკმაყოფილება ფორმალობაა და წინასწარი მოლაპარაკებებით ყველაფერი გარკვეულია. ანუ, როცა საპატრიარქოს შუამდგომლობა შედის ამა თუ იმ სახელმწიფო სტრუქტურაში, გარკვეული ქონების გადაცემის თხოვნით, ამ ქონების ბედი იმ დროისთვის უკვე გადაწყვეტილია. მთავრობა საპატრიარქოს თითქმის ყველა შუამდგომლობას ქონების გადაცემაზე  აკმაყოფილებს, ეკლესიის სასარგებლოდ.

 

სახელმწიფო საკუთრებაში არსებული ქონების საპატრიარქოსთვის გადაცემის შუამდგომლობებს კი საპატრიარქოს მხრიდან ხელს ძირითადად სრულიად საქართველოს კათოლიკოს-პატრიარქის ქორეპისკოპოსი, ბოდბელი ეპისკოპოსი იაკობი, ასევე ქორეპისკოპოსი, მიტროპოლიტი თეოდორე და კათოლიკოს-პატრიარქის მდივანი, დეკანოზი მიქაელ ბოტკოველი აწერენ.

 

მოქმედი ხელისუფლების მიერ საპატრიარქოზე უსასყიდლო უზუფრუქტით კი შემდეგი სახელმწიფო ქონებაა გადაცემული: ქ. ახალქალაქში 2207 კვ/მ და ქ. ქობულეთში 11 810 კვ/მ [ბობოყვათის ყოფილი სამთავრობო რეზიდენციის მიმდებარე პლაჟი] მიწის ნაკვეთები ამ ნაკვეთებზე განთავსებულ შენობა-ნაგებობებთან ერთად.

 

სააგენტოს მიერ მოწოდებული ინფორმაციით, საქართველოს საპატრიარქოს სოციალური უზრუნველყოფის სამსახურის შუამდგომლობის საფუძველზე, ეკლესიას მთავრობამ თავშესაფრისთვის 1 ლარად ინვენტარი და აღჭურვილობა გადასცა. თუმცა მთავრობის შესაბამის განკარგულებაში აღნიშნულია, რომ 43 დასახელებისა და სხვადასხვა რაოდენობის ინვენტართან ერთად, იმ ერთ ლარში, საპატრიარქოს ჯამში 1127 კვ/მ ფართობის სამი მიწის ნაკვეთიც გადაეცა თბილისში.

 

სამინისტროს მხრიდან ვითხოვდით ასევე, სახელმწიფო საკუთრებაში არსებული რა უძრავ-მოძრავი ქონების გადაცემა იყო დაგეგმილი საპატრიარქოსთვის და რა ფორმით. ასეთი ინფორმაცია ვერ მივიღეთ.

 

სახელმწიფო ქონების ეროვნულმა სააგენტომ საპატრიარქოზე გადაცემული ქონების ნუსხა 4 ნოემბერს მოგვაწოდა, თუმცა მასში არ არის საქართველოს მთავრობის მიერ მიმდინარე წლის 29 ოქტომბრის განკარგულებით საპატრიარქოსთვის უსასყიდლოდ საკუთრებაში გადაცემული შემდეგი ქონება: 14 ტრაქტორი, 1 სათიბელა, 7 ცალი სამფრთიანი და ერთიც ხუთფრთიანი გუთანი, დისკებიანი ფარცხი, 5 კულტივატორი და სამი სიმინდის სათესი.

 

აღსანიშნავია, რომ ქონების ეროვნულმა სააგენტომ მოგვაწოდა საპატრიარქოსთვის გადაცემული იმ უძრავ-მოძრავი ქონების ჩამონათვალი, რომელიც ადრე სახელმწიფო საკუთრებაში იყო. შესაბამისად, რა უძრავ-მოძრავ ქონებას გადასცემენ მუნიციპალიტეტები მართლმადიდებელ ეკლესიას საკუთრებაში თუ სარგებლობაში, ეს ცალკე საკითხია.

 

2012 წლის პირველი ოქტომბრიდან მიმდინარე წლის 6 ნოემბრის ჩათვლით პერიოდში  საჯარო რეესტრში საპატრიარქოს წარმომადგენლების მიერ 633 სხვადასხვა შინაარსის განცხადებაა შეტანილი, უძრავ ქონებასთან დაკავშირებით. ამ განცხადებებით საპატრიარქო, ძირითადად, საკუთრების უფლების რეგისტრაციას ითხოვს ამა თუ იმ ქონებაზე.

 

 

 

 

ავტომანქანა „VOLKSWAGEN JETTA” (სახელმწიფო ნომრით PO992OP) აუქციონზე განმეორებით, 20%-იანი ფასდაკლებით იყიდება. საწყისი ფასი ამჯერად 400 აშშ დოლარია.  ავტომანქანა არის ცუდ მდგომარეობაში, გამოშვების წელი 1993; საწვავი – ბენზინი. აუქციონი 16 ნოემბერს დასრულდება.

 

 

 

ავტომანქანა „ვოლგა 3110“ (სახელმწიფო ნომრით PO993OP), განმეორებით, 20%-იანი ფასდაკლებით; საწყისი გასაყიდი ფასი – 600 აშშ დოლარი; გამოშვების წელი – 1998; მექანიკა; ცუდ მდგომარეობაში; საწვავი – ბენზინი. აუქციონი 16 ნოემბერს დასრულდება.

 

 

აჭარის ავტონომიური რესპუბლიკის საკუთრებაში არსებული ავტომანქანა „ტოიოტა პრადო“ (სახელმწიფო ნომრით QB-699-BQ) განმეორებით, 20%-იანი ფასდაკლებით, იყიდებოდა თუმცა აუქციონი არ შედგა. ამ ავტომანქანის საწყისი ფასი თავიდან 13 700 აშშ დოლარი იყო, განმეორებით აუქციონზე კი, რომელიც ასევე არ შედგა 9 ოქტომბერს – 10 960 აშშ დოლარი. ხელახალი აუქციონი სამინისტროს ჯერ არ გამოუცხადებია. აღნიშნული „ტოიოტა პრადო“-ს გამოშვების წელია 2008; ავტომატიკა; საშუალო მდგომარეობაში; ძრავის კუბატურა – 2,9; საწვავი – დიზელი.

 

„რამდენი თანხა გადმოირიცხა სახელმწიფო, ავტონომიური რესპუბლიკებისა და ადგილობრივ ბიუჯეტებში, აგრეთვე საბიუჯეტო ორგანიზაციებში კერძო ფიზიკური და იურიდიული პირების მიერ შემოწირულობების [ქველმოქმედებისთვის, ამა თუ იმ ღონისძიების, სამუშაოების დასაფინანსებლად და ა.შ.] სახით, 2013 წლის პირველი იანვრიდან დღემდე პერიოდში [შემომწირველების ვინაობა, შემოწირული თანხის ოდენობა და გადმორიცხვის მიზანი. ამასთან, გთხოვთ, მიუთითოთ თუ რას მოხმარდა აღნიშნული თანხები.]“ – ამ კითხვით `ბათუმლებმა~ საქართველოს ფინანსთა სამინისტროს მიმდინარე წლის 30 სექტემბერს მიმართა.

 

სამინისტრომ არასრულყოფილი პასუხი, ისიც თავისივე ქვემდებარე სახაზინო სამსახურის ინფორმაციაზე დაყრდნობით, ორი კვირის შემდეგ გაგვცა:

 

„გაცნობებთ, რომ სახაზინო სამსახური ბიუჯეტის შემოსულობებს აღ¬რიცხავს შემოსულობების სახეების მიხედვით და ცალკეული გადამხდელებისა და დანიშნულების მიხ¬ედვით სისტემურ აღრიცხვას არ ახორციელებს. აქვე გაცნობებთ, რომ წერილში აღნიშნული თანხები აღირიცხება როგორც  – ნებაყოფლობითი ტრანსფერები, გრანტების გარდა“.

 

სახაზინო სამსახურის ინფორმაციით, აღნიშნულ სახეში – „ნებაყოფლობითი ტრანსფერები, გრანტების გარდა“, შემოსულმა თანხამ 2013 წლის პირველი იანვრიდან 2015 წლის პირველ ოქტომბრამდე პერიოდში შეადგინა 72 108 128 ლარი და 25 თეთრი. აქედან, სახელმწიფო და ადგილობრივ ბიუჯეტებში 2013 წელს მხოლოდ 1,8 მილიონი ლარი, 2014 წელს – 21,6 მილიონი, ხოლო მიმდინარე წლის 9 თვეში – 48,5 მილიონზე მეტი ლარია ნებაყოფლობით ჩარიცხული.

 

რამდენადაც „ბათუმელებმა“ გაარკვია, უშუალოდ ბათუმისა და აჭარის ბიუჯეტებში ამ ფორმით თანხა არ შესულა.

 

ვინ გადარიცხა სახელმწიფო და სხვა ადგილობრივ ბიუჯეტებში ზემოაღნიშნული 72,1 მილიონი ლარი? ანუ ვინ შეწირა ეს ფული სახელმწიფოს? – საქართველოს ფინანსთა სამინისტრომ ამ კითხვაზე პასუხი არ გაგვცა, თუმცა არც უარის მიზეზი განუმარტავს.

 

საქართველოს ახალგაზრდა იურისტთა ასოციაციის ბათუმის ფილიალის ხელმძღვანელი, გიორგი ხიმშიაშვილი კი განმარტავს, რომ ნებისმიერ დაინტერესებულ პირს უფლება აქვს მიიღოს ინფორმაცია ზოგადი სტატისტიკის [ანუ ბიუჯეტში გადარიცხული თანხის ოდენობის] შესახებ: „რაც შეეხება ბიუჯეტში გადამრიცხველების შესახებ ინფორმაციას, აღნიშნული ინფორმაცია არის საიდუმლო. აქ გარდა კანონის ვალდებულებისა, ჩვენ უნდა გავითვალისწინოთ შემომწირველთა ინტერესებიც, ვინაიდან ხშირად ქველმოქმედების გამწევ პირებს არ სურთ საჯარობაა“.

 

ვინაიდან სამინისტროს პასუხში არ იყო აღნიშნული, თუ რატომ ვერ გასცემდნენ  ინფორმაციას [თუნდაც შემომწირველების თანხმობის გარეშე], იგივე ინფორმაცია ხელახლა გამოვითხოვეთ. სამინისტროდან კონკრეტული პასუხი ვერც ამჯერად მივიღეთ.

 

საქართველოს ფინანსთა სამინისტრომ არც ის ინფორმაცია გაასაჯაროვა, თუ რა მიზნით გადაურიცხეს მთავრობას ეს ფული ნებაყოფლობით.

 

ნებაყოფლობით ტრანსფერთან მიმართებაში აღსანიშნავია ისიც, რომ თბილისში მიმდინარე წლის 13 ივნისს სტიქიით დაზარალებულთა დასახმარებლად მსურველებს ქველმოქმედებისთვის თანხის გადარიცხვა სახელმწიფო სახაზინო ანგარიშზე შეეძლოთ. ამასთან უნდა მიეთითებინათ, რომ ისინი ნებაყოფლობით ტრანსფერს ახორციელებდნენ.

 

სამინისტროს და არც ხაზინას არ დაუკონკრეტებია, თუ რამდენი ლარი შევიდა ამ კუთხით ბიუჯეტში. მეტიც, ჩვენი მოთხოვნის მიუხედავად, სამინისტრომ დამალა ინფორმაცია, თუ რა ღონისძიებები დაფინანსდა კონკრეტულად ამ თანხით, ანუ ნებაყოფლობითი ტრანსფერებით.

 

„საბიუჯეტო ხარჯვის შესახებ ინფორმაცია სრულიად ხელმისაწვდომი უნდა იყოს ნებისმიერი დაინტერესებული პირისათვის, გარდა კანონით გათვალისწინებული შემთხვევებისა. სწორედ, საჯაროობა და ინფორმირება უწყობს ხელს ქვეყანაში დემოკრატიული პროცესების ჯანსაღ გარემოში წარმართვას და რაც მთავარია, სწორი გადაწყვეტილებების მიღებას მოქალაქეთა მხრიდან. ხოლო თუ ჩვენ შევუზღუდავთ მოქალაქეებს „საჯარო ინფორმაციის“ კონსტიტუციურ თავისუფლებას, ეს ყოველივე იღებს ჯაჭვურ რეაქციას და თანაბრად იწვევს სხვა უფლებების ხელყოფას. ამიტომ, მიზანშეწონილია ადმინისტრაციული ორგანოები მეტი სიფრთხილით მოეკიდონ ამ უფლების შეზღუდვას,“ – ამბობს გიორგი ხიმშიაშვილი.

 

ზოგადად, „ტრანსფერი“ გარკვეული მიზნით ფულადი სახსრების გადაცემას ნიშნავს. საქართველოს ფინანსთა მინისტრის 2010 წლის ბრძანებით განსაზღვრულია, რომ კატეგორია – „ნებაყოფლობითი ტრანსფერები, გრანტების გარდა“ [რომელიც თითქმის 2007 წლიდან მოქმედებს] მოიცავს ფულად შემოწირულობებს და სხვა ნებაყოფლობით ტრანსფერებს, რომლებსაც ფიზიკური პირები, კერძო არამომგებიანი ორგანიზაციები, არასამთავრობო ფონდები და ორგანიზაციები, საწარმოები და კორპორაციები (მთავრობისა და საერთაშორისო ორგანიზაციების გარდა) გადასცემენ სახელმწიფოს.

 

 

საქართველოს სტატისტიკის ეროვნული სამსახურის ინფორმაციით, მთლიანი სავაჭრო ბრუნვიდან, ექსპორტი 1832 მლნ. აშშ დოლარი იყო [24 პროცენტით ნაკლები, გასული წლის ანალოგიურ პერიოდთან შედარებით], ხოლო იმპორტი 6289 მლნ. აშშ დოლარი [10 პროცენტით ნაკლები].

 

უარყოფითმა სავაჭრო ბალანსმა 2015 წლის იანვარ-ოქტომბერში 4457 მლნ. აშშ დოლარი და საგარეო სავაჭრო ბრუნვის 55 პროცენტი შეადგინა.

 

ჯანდაცვის სამინისტროსთვის შესაბამისი სახსრების დამატება, მთავრობის დავალებით, საქართველოს ფინანსთა სამინისტრომ, საბიუჯეტო კანონის ცვლილების პროექტის მომზადების დროს უნდა უზრუნველყოს.

 

მთავრობის გადაწყვეტილებით საგარეო სახელმწიფო ვალდებულებების მომსახურებისა და დაფარვისათვის გათვალისწინებული ასიგნებების 60 სამოცი მილიონი ლარით და ასევე სასამართლო გადაწყვეტილებების აღსრულებისათვის გათვალისწინებული ასიგნებების   2 მილიონი ლარით შემცირების ხარჯზე, გაიზარდა საქართველოს რეგიონებში განსახორციელებელი პროექტების ფონდის ასიგნებები 20 მილიონი ლარით, ხოლო საქართველოს მთავრობის სარეზერვო ფონდის ასიგნებები 42 მილიონი ლარით;

 

საქართველოს ფინანსთა სამინისტროს ასევე დაევალა საქართველოს მთავრობის სარეზერვო ფონდის 21 მილიონი ლარით გაზრდა საქართველოს თავდაცვის სამინისტროს ასიგნებების ამავე თანხით შემცირების ხარჯზე.