„გუშინ მერიის ორი წარმომადგენელი მოვიდა, გვითხრა განცხადება დაწერეთ და ხვალ დილით მოიტანეთ მერიაშიო. ოღონდ განცხადებაში არ მიუთითოთ სად უნდა ჩადგათ ჯიხურიო. დღეს კიდევ, დილიანად მოვდივარ და ჯიხური არაა. არ ვიცით სადაა, ასე ქურდულად ღამით მიპარვით, მერია ასეთ რაღაცას გვიკეთებს… გარემოვაჭრეები დეკემბრის მერე ვიბრძვით, მერია არ გვაჩერებს, ხან გვეუბნება დარჩი, ხან გვეუბნება არ დარჩე…“ – უთხრა „ბათუმელებს“ ერთ-ერთმა გარემოვაჭრემ, ნინო მეფარიშვილმა.
ამ პრობლემის მოსაგვარებლად, იმავე დღეს ისინი ქალაქის მერს, გიორგი ერმაკოვს შეხვდნენ. მერმა გარემოვაჭრეებს ჯიხურების დადგმა ალტერნატიული ადგილზე შესთავაზა.
„გოგებაშვილის ქუჩაზე ეს ხალხი უკანონოდ ვაჭრობდა, ხელშეკრულება არ ჰქონდათ. ხელი ეშლებოდათ ფეხით გამვლელებს, ზონა იყო უსახური“, – უთხრა „ბათუმელებს“ გიორგი ერმაკოვმა.
ქალაქის პირველმა პირმა ალტერნატიულ ადგილად ისევ გოგებაშვილის ქუჩაზე, ჭაჭა თაურის მიმდებარე ტერიტორია დაასახელა და აღნიშნა, რომ უახლოეს დღეებში იქ ჯიხურები განთავსდება; გამსახურდიასა და რუსთაველის ქუჩის კვეთაში მყოფ გარემოვაჭრეებსაც აქ მოუწევთ გადმოსვლა:
„ყველაფერს უნდა ჰქონდეს კანონიერი ფორმა. ჩვენ მათ ხელს შევუწყობთ. იქ [საზღვაო ნავსადგურიდან გოგებაშვილის ქუჩის მონაკვეთი რუსთაველის ქუჩამდე] ჩამწკრივდება ჯიხურები და ყველა გარემოვაჭრე იქნება ერთნაირ პირობებში“.
გარემოვაჭრეები შიშობენ, რომ ეს ადგილი მათთვის მომგებიანი არ იქნება, რადგან ტურისტები ნაკლებად დადიან.
რაც შეეხება ჯიხურებს, როგორც ნინო მაფარიშვილმა გვითხრა, მერიაში განუცხადეს, რომ ადლიის მიმდებარე ტერიტორიაზე გადაიტანეს და შეუძლიათ მათი დაბრუნება.
