Batumelebi

საგადასახადო შეღავათები მძიმე დაზიანება მიღებული სამხედროებისთვის

2015 წლის 16 დეკემბერს საქართველოს პარლამენტმა მიიღო კანონი „საქართველოს საგადასახადო კოდექსში ცვლილების შეტანის შესახებ’’, რომელსაც 25 დეკემბერს საქართველოს პრეზიდენტმა ხელი მოაწერა და გამოაქვეყნა. კანონი ძალაში შევიდა გამოქვეყნებისთანავე. საქართველოს საგადასახადო კოდექსში ცვლილების ავტორი საქართველოს თავდაცვის სამინისტრო იყო, ხოლო ინიციატორი – საქართველოს მთავრობა.

sagadasaxado shegavatebi mdzime dazianeba migebuli samxedroebistvis — ბესიკ ლოლაძე

საქართველოს საგადასახადო კოდექსში ცვლილების შეტანის იდეა წარმოიშვა დაჭრილი და დაშავებული მეომრების სოციალური მდგომარეობის გაუმჯობესების კონტექსტში, მათთან კონსულტაციების შედეგად.

როგორც ცნობილია, საქართველოს უდიდესი წვლილი შეაქვს საერთაშორისო მშვიდობისა და უსაფრთხოების შენარჩუნებისა და აღდგენის საქმეში. შესაბამის ოპერაციებში საქართველოს შეიარაღებული ძალების სამხედრო მოსამსახურეები და სამოქალაქო პერსონალი აქტიურად მონაწილეობს. სამწუხაროდ, არის შემთხვევები, როდესაც ისინი ჯანმრთელობის მძიმე დაზიანებებს იღებენ.

ამ კატეგორიის პირები, რომელთა თავდადება და დამსახურება ქვეყნის წინაშე ძალიან დასაფასებელია, კვლავ ირიცხებიან შეიარაღებული ძალების რიგებში (აქვე აღსანიშნავია, რომ საგადასახადო კოდექსში განხორციელებული ცვლილება ამ თვალსაზრისით არაფერს ცვლის).
მათთვის შეზღუდული შესაძლებლობის მქონე პირის სტატუსის მინიჭება გახდებოდა შეიარაღებული ძალების რიგებიდან დათხოვნისა და იმავდროულად, სოციალური მდგომარეობის გაუარესების საფუძველი.

ზემოაღნიშნულის გათვალისწინებით, საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებში ჯანმრთელობის მძიმე დაზიანება მიღებული პირებისათვის საგადასახადო შეღავათის მისანიჭებლად გადაწყდა საქართველოს საგადასახადო კოდექსში შესაბამისი სპეციალური ნორმის შეტანა. საქართველოს თავდაცვის სამინისტროს ამ ინიციატივამ მოიპოვა როგორც საქართველოს მთავრობის, ასევე საქართველოს პარლამენტის სრული მხარდაჭერა.

საგადასახადო კოდექსში შეტანილი ცვლილებით, საშემოსავლო გადასახადით კალენდარული წლის განმავლობაში მიღებული 6000 ლარამდე დასაბეგრი შემოსავალი არ იბეგრება. ეს შესამჩნევად გააუმჯობესებს საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებში ჯანმრთელობის მძიმე დაზიანება მიღებულ პირთა ფინანსურ და სოციალურ მდგომარეობას.

ბესიკ ლოლაძე, თავდაცვის მინისტრის მოადგილე

მომზადებულია საქართველოს თავდაცვის სამინისტროს სტრატეგიული
კომუნიკაციების დეპარტამენტის მიერ
ტელ: +995(32) 2 72 35 35;
ელ-ფოსტა: stratcom@mod.gov.ge;
ვებ-გვერდი: mod.gov.ge

ციალა ქათამიძე აჭარაში სახალხო დამცველის წარმომადგენლად დაინიშნა

სახალხო დამცველის რეგიონული დეპარტამენტის აჭარის სამმართველოს პირველი მარტიდან ახალი უფროსი ეყოლება და ის 29 წლის იურისტი ციალა ქათამიძე იქნება. ციალა ქათამიძე ჯერჯერობით სამთვიანი გამოსაცდელი ვადით დაინიშნება.

ციალა ქათამიძე მანამდე არასამთავრობო ორგანიზაცია „ბორჯღალის“ აღმასრულებელი დირექტორი იყო. ამ ორგანიზაციის ერთ-ერთი ძირითადი მიმართულება ეკომიგრანტების პრობლემატიკაზე მუშაობა იყო.

ციალა ქათამიძე კონკურსის წესით იქნა შერჩეული, რომელიც სახალხო დამცველის ოფისმა სულ ცოტა ხნის წინ გამოაცხადა. კონკურსში მონაწილეობას 60 იურისტი იღებდა.

სახალხო დამცველის ყოფილი წარმომადგენელი აჭარაში, გიორგი ჩარკვიანი საქმიანობას კვლავაც სახალხო დამცველის ოფისში გააგრძელებს, ამჯერად ხელშეკრულებით.

გიორგი ჩარკვიანი განათლებით იურისტი არ არის. სახალხო დამცველის ახლი მოთხოვნის მიხედვით კი, სამმართველოს უფროსი აუცილებლად განათლებით იურისტი უნდა იყოს.

სამაცივრე მეურნეობების პროგრამა ამოქმედდა – ერთად ევროპისკენ

საქართველოს ევროკავშირში კურკოვანი კულტურის ექსპორტის შესაძლებლობა იანვრიდან მარტამდე აქვს, როდესაც ევროპაში ატმის, ვაშლატამას, ალუბლის, გარგარისა და ქლიავის დეფიციტია. თუმცა წლის ამ პერიოდში კურკოვანი კულტურის ნაკლებობაა საქართველოშიც. 2015 წლის იანვრიდან მარტამდე საქართველოდან ხილის ამ სახეობების ექსპორტის მაჩვენებელი ნულის ტოლია. ადგილობრივი კომპანიების განცხადებით, ამის მიზეზი პროდუქტის მცირე რაოდენობა და სამაცივრე მეურნეობების არარსებობაა.

როდესაც ველაპარაკებით პარტნიორებს, აუცილებელი მოთხოვნაა სტაბილური მიწოდების უზრუნველყოფა, რაც ჩვენ შემთხვევაში თითქმის გამორიცხულია, რადგან არ არსებობს შესაბამისი შესაფუთი პირობები’’, – ამბობს ,,ფრუტილიას’’ დამფუძნებელი ვახტანგ ბეჟიტაშვილი.

ქართული კომპანია ,,ფრუტილია’’ ხილის ექსპორტს რუსეთში, ყაზახეთში, უკრაინასა და ბელორუსში ახორციელებს. ამ ეტაპზე ევროკავშირის ბაზარზე გასვლას რამდენიმე ფაქტორის გამო ვერ ახერხებს. კომპანიის დამფუძნებელი აცხადებს, რომ დარგს ხელისუფლებისგან მეტი მხარდაჭერა სჭირდება.

,,ევროკავშირში გატანას ვგეგმავთ, თუმცა ჯერ კონკრეტული არაფერია, რადგან ხარისხი და ფასი არ არის შესაბამისი. თუ საბაზრო ღირებულებამ არ მოგვცა იმის საშუალება, რომ კონკურენტული ფასი შევთავაზოთ, შეუძლებელია ექსპორტის განხორციელება. დარგს სჭირდება ხელისუფლებისგან უფრო მეტი მხარდაჭერა, რომ პროდუქტი ქვეყნის გარეთ გავიტანოთ. უნდა იყოს შესაბამისი შესაფუთი სამაცივრე სისტემები, ლოჯისტიკური საშუალებები, რომ ხილი დაბინავდეს სეზონზე და შემდგომ სისტემური და სტაბილური მიწოდება მოხდეს,’’ – ამბობს ვახტანგ ბეჟიტაშვილი.

კურკოვანი კულტურა – ატამი, ვაშლატამა, ქლიავი, გარგარი და ალუბალი ევროპის არა ერთ ქვეყანაში მოდის, ამიტომ ევროკავშირში განვითარებადი ქვეყნებიდან იმპორტი მხოლოდ იანვრიდან მარტამდე ხორციელდება, როდესაც მოსავლის სეზონი არ არის. ამ მიმართულებით ევროპის ყველაზე დიდი მომმარაგებლები სამხრეთ აფრიკა, თურქეთი და ჩილე არიან. განვითარებადი ქვეყნებიდან ყველაზე დიდი ოდენობით კურკოვანი კულტურა ევროკავშირში ნიდერლანდებსა და გაერთიანებულ სამეფოს შეაქვთ, შემდეგ კი ევროკავშირის სხვა ბაზრებზე რეექსპორტს ახორციელებენ. ყველაზე დიდი მოთხოვნა ატამზე, ვაშლატამაზე, ქლიავზე, გარგარსა და ალუბალზე გერმანიაშია. 2014 წელს გერმანიაში 451 000 ტონა კურკოვანი კულტურა შევიდა. გერმანიის შემდეგ ყველაზე დიდი იმპორტიორები არიან: საფრანგეთი (190 000 ტონა), გაერთიანებული სამეფო (177 000 ტონა), იტალია (143 000 ტონა) და პოლონეთი (130 000 ტონა).

გორის რაიონში ქლიავის ბაღების გაშენებას იწყებს გიორგი მაჭარაშვილი, რომელმაც პროექტის „დანერგე მომავალი“ ფარგლებში თანხა მიიღო. პროგრამა „დანერგე მომავალი“ მრავალწლოვანი კულტურების ბაღების გაშენებას ისახავს მიზნად. მაჭარაშვილმა ქლიავის ბაღებისთვის ამ ეტაპზე 335,000 ლარი დაიხარჯა, აქედან თანადაფინანსებამ 192,000 ლარი შეადგინა. ატმის ბაღებისთვის 69,000 ლარი გამოიყო, ხოლო თანადაფინანსებამ 41,000 ლარი შეადგინა. რაც შეეხება გარგარის, ვაშლატამასა და ალუბლის ბაღებს, ამ ეტაპზე პროექტის ფარგლებში განაცხადი აღნიშნული კულტურების ბაღის გაშენებაზე არ შესულა. გიორგი მაჭარაშვილი 3 წელიწადში უკვე ქლიავის მოსავალსაც მიიღებს, თავდაპირველად ადგილობრივ ბაზარზე სურს დამკვიდრება, მომავალში კი ექსპორტსაც გეგმავს.

`ვფიქრობ, ექსპორტზე გასვლას, მაგრამ ნაკლებად სავარაუდოა, რადგან საქართველოს ბაზარი დეფიციტურია, იმპორტული პროდუქტია დომინანტი, ჯერ ადგილობრივი ბაზარი უნდა დავიკავოთ, შემდეგ ექსპორტზე ვიფიქრებთ. ევროპის მიმართულებით გამოცდილება ნაკლებია, არ ვიცი, გადამზიდი კომპანიები თუ მუშაობენ, ძალიან ბევრი ბუნდოვანი საკითხია. ნაკლები ინფორმაცია მაქვს ევროპის ბაზართან დაკავშირებით,“ – ამბობს გიორგი მაჭარაშვილი.

იმისთვის, რომ ქართველმა მწარმოებლებმა ხილის სათანადოდ შენახვა და შემდგომ საჭირო დროს ექსპორტირება შეძლონ, რამდენიმე სახელმწიფო პროგრამა მოქმედებს. გადამამუშავებელი და შემნახველი საწარმოების თანადაფინანსების პროგრამას სამაცივრე მეურნეობების კომპონენტი გასული წლის ნოემბერში დაემატა, ახალი მიმართულება სავარაუდოდ თვის ბოლომდე ამოქმედდება.

თანხის მიღების მსურველებს სხვადასხვა საბუთთან ერთად ვთხოვთ 2 დოკუმენტს – ეს არის შუამდგომლობა რაიონის საინფორმაციო-საკონსულტაციო ცენტრიდან, ასევე, ტექნოლოგიების შესაბამისი ცნობა სოფლის მეურნეობის სამინისტროში არსებული ცენტრიდან იმის შესახებ, თუ რამდენად ადეკვატურია იმ ხილის შესანახად. ეს ცნობები როგორი უნდა იყოს, ამ ფორმაზე ვმუშაობთ. ჩვენ ორივე მხარეს გავუგზავნეთ ნიმუში, ვთხოვეთ, მოგვწერონ შენიშვნები, ამ ეტაპზე ველოდებით მათ პასუხს. ამის შემდეგ გამოვაცხადებთ კომპონენტის ამოქმედებას“, – აცხადებს გადამამუშავებელი და შემნახველი საწარმოების თანადაფინანსების პროექტის მენეჯერი რევაზ ასათიანი.

სამაცივრე მეურნეობების მოსაწყობად თანხის გაცემას ითვალისწინებს კიდევ ერთი პროგრამა. შეღავათიანი აგროკრედიტის ფარგლებში ამ მიმართულებით არა ერთი პროექტი განხორციელდა. ამ ეტაპზე სამაცივრე მეურნეობების მშენებლობისთვის ლარში – 14, ხოლო დოლარში 28 სესხია გაცემული. შეკითხვაზე, რატომ არის იანვრიდან მარტამდე ხილის ექსპორტის მაჩვენებელი კვლავ ნულის ტოლი, პროექტის მენეჯერი აცხადებს, რომ მომავალ წლებში გაცილებით მეტი პროდუქტის შენახვა გახდება შესაძლებელი, რადგან სამაცივრე მეურნეობების მშენებლობა ახლახან დასრულდა.

„ყველაზე მეტი სესხი 2014 წელს გაიცა. 2015 წელს ხშირ შემთხვევაში დასრულებულიც არ იყო მშენებლობა, თუმცა ეს მიმართულება განვითარებადია, კიდევ გაიცემა კრედიტები, რაც იმას ნიშნავს, რომ მომავალში კიდევ ახალი სამაცივრე მეურნეობები აშენდება. 2016 წლის სეზონზე უფრო მეტი მაცივარი იქნება მუშა მდგომარეობაში, რაც საშუალებას მოგვცემს, 2016-2017 წლების ზამთრის სეზონისთვის მეტი პროდუქტი შევინახოთ. თუ რუსეთმა და უკრაინამ ვერ აითვისეს, ევროკავშირშიც გავა ხილი. როდესაც ერთხელ შეიტანენ ევროპაში, ნახავენ, რომ ეს ბაზარი უფრო მომგებიანია, ალბათ შემდეგ უფრო გააქტიურდებიან ამ მიმართულებით, ეს გზაც გაიჭრება და უფრო დიდი წილი ევროკავშირზე გადაერთვება, თუმცა ამისთვის დროა საჭირო. თვითონ მეწარმემ უნდა განსაზღვროს რა არის მისთვის უკეთესი. დრო სჭირდება, დაინახოს, რომ ევროკავშირი უფრო მომგებიანია, ვიდრე რუსეთის ბაზარი, რომელიც შესაძლოა, არასტაბილური იყოს თუნდაც რუბლის კურსის ცვალებადობისა ან ნებისმიერი სხვა მიზეზის გამო. ბიზნესმენები ამ ეტაპამდე მივლენ~, _ აცხადებს გიორგი ჯიბლაძე.

შპს „ელენიქსტა~ ერთ-ერთია იმ სამ კომპანიას შორის, რომელმაც სესხი კურკოვანი კულტურის სამეურნეო მაცივრის მოსაწყობად შეღავათიანი აგროკრედიტის ფარგლებში მიიღო. „ელენიქსტა~ ხილის წარმოება-რეალიზაციას ეწევა, ქლიავის ბაღები კი 14 ჰექტარზე გააშენა. მიუხედავად იმისა, რომ გიორგი კვირიკაძეს ხილის შენახვის საშუალება ექნება, ექსპორტზე გასვლას ამ ეტპაზე მაინც ვერ მოახერხებს.

„ადგილობრივი ბაზარიც არ არის დაკმაყოფილებული, იმდენად ცოტაა მოსავალი, ექსპორტზე კი არა, აქაც არ გვყოფნის. ფასიც მაღალია, ქლიავი აქ უფრო ძვირი ღირს, ვიდრე ევროკავშირში. მოსავალი ცოტაა, ასევე, არ არიან ტექნოლოგები, ცოტა მებაღე და აგრონომია, მათი გადამზადებაა საჭირო, ან უნდა ჩამოიყვანონ სპეციალისტები, ვისაც შეუძლია ხარისხიან ხილის წარმოებაში დაგვეხმარონ. ქართველებს გვიჭირს ხარისხიანი და უხვი პროდუქციის მოყვანა’’, – ამბობს შპს „ელენიქსტას“ ერთ-ერთი დამფუძნებელი გიორგი კვირიკაძე.

იმისთვის, რომ განვითარებადი ქვეყნებიდან ევროპაში კურკოვანი კულტურა შევიდეს, იმპორტიორი გარკვეულ სტანდარტებს უნდა აკმყოფილებდეს. მინიმალური მოთხოვნებია: ხილს არ უნდა აღენიშნებოდეს დაზიანება, იყოს სუფთა, საღი, პესტიციდებისგან თავისუფალი, ჰქონდეს ტენიანობის შესაბამისი დონე, იყოს სათანადოდ დამწიფებული, საბოლოო ჯამში ხილი ტრანსპორტირების შედეგად არ უნდა დაზიანდეს.

განვითარებადი ქვეყნებიდან იმპორტის ხელშეწყობის ცენტრმა ევროპაში ატმის, ვაშლატამის, გარგარის, ალუბლისა და ქლიავის შეტანის მსურველებისთვის შესაბამისი რეკომენდაციებიც შეიმუშავა.

უნდა გახდე გრძელვადიანი საცალო გაყიდვების პროგრამის ნაწილი და გააუმჯობესო შენი კომპანიის საქმიანობა გამოცდილ მყიდველებთან ურთიერთობების გაღრმავებით;

უნდა შეეცადო კონკურენცია გაუწიო სხვებს არა მხოლოდ ფასში, არამედ ხარისხსა და მიწოდებაშიც;

ეძებო შესაძლებლობები, რომ ევროკავშირის ბაზარზე პროდუქცია შეიტანო მაშინ, როდესაც იქ ამ პროდუქტის დეფიციტია, შეეცადო, ახალი სახეობებით მოამარაგო ევროპა. მოლაპარაკებების პროცესში ნოვატორებს გაცილებით ძლიერი პოზიციები აქვთ;

მნიშვნელოვანია გამჭვირვალე ინფორმაცია შენი კომპანიისა და პროდუქტის ხარისხის შესახებ. სტაბილური პარტნიორობა დაგეხმარებათ ბაზარზე საკუთარი პოზიციის შენარჩუნებასა და განმტკიცებაში;

გამოიყენეთ კონკრეტული ისტორიები, რაც აჩვენებს ხილის წარმომავლობას – საინტერესო ამბები თქვენს პროდუქტს სხვებისგან განსხვავებულს გახდის.

ფასი ევროკავშირის სუპერმარკეტებში:

გარგარი – 00 – 7,50 ევრო/კგ
ალუბალი – 00-10.00 ევრო/კგ
ატამი და ვაშლატამა – 50-6.00 ევრო/კგ
ქლიავი – 50-7.50 ევრო/კგ

იბეჭდება მცირედი შემოკლებით.

მომზადებულია http://eugeorgia.info – ს მიერ.

სტუდენტური თვითმმართველობის ფინანსური პოლიტიკა

წელს ბათუმის შოთა რუსთაველის სახელმწიფო უნივერსიტეტის სტუდენტური თვითმმართველობა ბიუჯეტის გაზრდას და 190 997 ლარის დახარჯვას აპირებს. ყველაზე მეტი თანხის, 23 ათასი ლარის დახარჯვას თვითმმართველობა საახალწლო, კურსდამთავრებულთა გაცილებისა და პირველკურსელთა დასახვედრი წვეულებებისთვის გეგმავს.

სპორტული გუნდების სამი მწვრთნელის ხელფასისთვის 18 000 ლარია გათვალისწინებული, ანსამბლ „ტბეთისთვის“ კოსტიუმებისა და აქსესუარების შესაძენად – 12 230 ლარი, სტუდენტური თეატრისთვის – 4 400 ლარი, ხოლო სპორტული ინვენტარისა და ტანსაცმლისათვის – 18 855 ლარი. ანსამბლ „ტბეთისა“ და თეატრალური დასის ფესტივალებში მონაწილეობისათვის 12 000 და 7 500 ლარია გათვლილი.

ეს ბიუჯეტის სამუშაო ვერსიაა და იგი უნივერსიტეტმა უნდა დაამტკიცოს ყოველი აქტივობის განხორციელების წინ, ან შემდგომ წარმოდგენილი ხარჯთაღრიცხვის საფუძველზე.

ბსუ-ს თვითმმართველობის თავმჯდომარე გასული წლის ზაფხულიდან ბექა მაკარაძეა. მის მიერ მოწოდებული, 2016 წლის საბიუჯეტო გეგმით გათვალისწინებული აქტივობები მეტწილად გასული წლის მსგავსია. სიახლეს წარმოადგენს სტუდენტური ინიციატივების პროგრამა და საერთაშორისო სტუდენტური ფორუმი, რისთვისაც 10-10 ათასი ლარია განსაზღვრული. 9 ათასი ლარია გათვალისწინებული უცხოეთში სემინარებსა და კონფერენციებში მონაწილეობისთვის.

თვითმმართველობის თავმჯდომარესთან, ბექა მაკარაძესთან „ბათუმელების“ ინტერვიუს გასულ კვირას თვითმმართველობის სოციალურ და პოლიტიკურ მეცნიერებათა ფაკულტეტის ხელმძღვანელი უჩა აბრამიშვილიც დაესწრო. იგი 2011-2012 წლებში თავადაც გახლდათ ბსუ-ს სტუდენტური თვითმმართველობის თავმჯდომარე. უნივერსიტეტის სტუდენტთა ერთი ჯგუფის თქმით, თვითმმართველობის არაოფიციალური მმართველი სწორედ უჩა აბრამიშვილია. „ბათუმელების“ კითხვების დიდ ნაწილს სწორედ უჩა პასუხობდა.

კითხვაზე, თუ ჰქონიათ ან თუ გეგმავენ საჯარო ლექციების ან სხვა სახის საგანმანათლებლო ღონისძიებებს და შესაბამისი კომპეტენციის მქონე პირების მოწვევას, ბექა მაკარაძე პასუხობს, რომ მსგავსი პრაქტიკა არ ჰქონიათ და არც პროგრამებში აქვთ გაწერილი: „მაგრამ თუ რომელიმე სტუდენტი შემოვა და იტყვის, რომ იდეა აქვს მოიწვიოს პოეტი ან ვინმე, რომელიც ლექციას წაიკითხავს ან რამე მსგავსი, რატომაც არა, ჩვენ პრობლემა არ გვექნება“.

აქვთ თუ არა სტუდენტურ თვითმმართველობაში თემატურად დანაწილებული ფუნქციები და ადგენენ თუ არა პროექტებსა და პროგრამებს თემატურად, ცალ-ცალკე? თვითმმართველობაში ამბობენ, რომ ფაკულტეტებზე მუშაობენ ხელმძღვანელები და წარმოადგენენ თავიანთ საჭიროებებს.

„ყველა ფაკულტეტი ინდივიდუალურად აკეთებს თავისთვის [პროგრამას]. სპორტს მთლიანად ვუყურებთ ჩვენ, ანუ ყველა ფაკულტეტს ჰყავს თავისი წარმომადგენელი სპორტში, მსკ-ში [მხიარულთა და საზრიანთა კლუბი]. მაგალითად, უნივერსიტეტის მსკ-ის გუნდი რომ შევქმენით, ცხრავე ფაკულტეტმა ჩამოაყალიბა ცალკე გუნდი, ესენი შევაჯიბრეთ, საუკეთესოები ავირჩიეთ და გავუშვით თბილისში. მესამე ადგილზე გავიდნენ,“ – განმარტავს თვითმმართველობის მუშაობის სტრატეგიას უჩა აბრამიშვილი.

ბექა მაკარაძის თქმით, მისი პირველი ღონისძიება თვითმმართველობაში მოსვლის შემდეგ იყო საქველმოქმედო აქცია თბილისში, 13 ივნისის სტიქიით დაზარალებულთა დასახმარებლად. იგი იხსენებს რამდენიმე საქველმოქმედო ღონისძიებას, ეკლესიების მშენებლობებზე ჯგუფურ მონაწილეობას და მემორანდუმებს: „გავაფორმეთ რამდენიმე მემორანდუმი და კიდევ ვგეგმავთ „მეტრო ჯორჯიასთან~. სასტუმრო „ლეოგრანდთან~ უკვე შეთანხმებული გვაქვს და მხოლოდ ოფიციალური გაფორმებაა დარჩენილი, იქნება სპა, სალონი, აუზი… 50%-იანი ფასდაკლებებით ისარგებლებენ ჩვენი სტუდენტები და მგონი პროფესორებიც, ასევე „ბრიტანულ ცენტრთან~ ვაპირებთ მემორანდუმის გაფორმებას“.

შეკითხვაზე, რას მიიჩნევს უნივერსიტეტში თვითმმართველობის თავმჯდომარე ყველაზე დიდ პრობლემად, ბექა მაკარაძე ფიქრობს და იმეორებს: „პრობლემა იმდენია რომ…“ აქ უჩა აბრამიშვილი ერთვება:

„პრობლემა ბევრია, მაგრამ ეტაპობრივად მივყვებით და ვაგვარებთ. თვითმმართველობას პრობლემა არ აქვს. უნივერსიტეტში შეიძლება არის რაღაც პრობლემები, მაგრამ ქვეყანამ რომ გაიგოს, ნამდვილად არ გვსიამოვნებს. რაც არის, ადმინისტრაციასთან ერთად ვსხდებით და ვაგვარებთ, როგორც თქვენი ოჯახის საქმეს გარეთ არ გაიტანთ, ისევეა ჩვენთვის უნივერსიტეტი, მაგრამ ისეთი, რომ გადაუჭრელი იყოს, ნამდვილად არაფერი არ არის“.

გასულ წელს ბათუმის შოთა რუსთაველის სახელმწიფო უნივერსიტეტის სტუდენტურმა თვითმმართველობამ 83 538 ლარი დახარჯა.

სახლი სკოლაში კვირაში ხუთი დღე

აქ დღე 07:30 საათზე, დილის ვარჯიშით იწყება. მთელი დღე დაგეგმილია და ხანგრძლივი ზარის ხმაც ამ დღის დაწყებაზე მიანიშნებს. ასე ცხოვრობს 220 ბავშვი კვირაში ხუთი დღე და მიუხედავად იმისა, რომ მშობლებთან ერთად არ არიან, ეს ის ადგილია, სადაც, მათი თქმით, თავს სახლში გრძნობენ.

ავტობუსის გაჩერების წინ ფართო და მაღალი ჭიშკარია. დიდი ასოებით წარწერა გვამცნობს, რომ აქ მდებარეობს სალიბაურის #2 საჯარო სკოლა-პანსიონი. ჭიშკრის მიღმა ვრცელი ხეივანი უნდა გაიარო და სკოლა-პანსიონის ეზოში აღმოჩნდები. ეზოს ერთ მხარეს – სკოლის, მეორე მხარეს კი საცხოვრებელი კორპუსის შენობა დგას. დილის 11 საათზე ეზოში დარაჯისა და რამდენიმე თანამშრომლის გარდა არავინაა, გაკვეთილები მიმდინარეობს და მოსწავლეები კლასებში არიან.

სალიბაურის სკოლა პანსიონი. თორნიკე თავაძის ფოტო

სალიბაურის #2 საჯარო სკოლასთან არსებული პანსიონი აჭარაში მოქმედ ოთხ სკოლა-პანსიონს შორის ყველაზე დიდია. სკოლაში 300 მოსწავლეა, მათგან 220 საპანსიონო მომსახურებით სარგებლობს, რაც სასწავლო მომსახურების გარდა ღამისთევასა და ოთხჯერად კვებას მოიცავს. ერთი მოსწავლის კვება დღეში 4.35 ლარი ჯდება. მოსწავლეები ორშაბათს დილით მოდიან და პარასკევს საღამოს ოჯახებში ბრუნდებიან. მათ პანსიონის ავტობუსები ემსახურება.

პანსიონში 36 ადამიანია დასაქმებული. 2016 წლის ბიუჯეტი კი 357 000 ლარს შეადგენს. სკოლის დირექტორი, სერგო ხოზრევანიძე ამბობს, რომ პანსიონი ძირითადად სოციალურად დაუცველი მოსწავლეებისთვისაა განკუთვნილი.

„70 000 ქულაზე ნაკლები უნდა ჰქონდეს ოჯახს. აქ არიან მარტოხელა დედების შვილები, ასევე ბავშვები, რომელთა ოჯახის წევრებიც გადიან ხანგრძლივ მკურნალობას და დევნილები. შემოსულ განცხადებებს განიხილავს კომისია და იღებს გადაწყვეტილებას. გვაქვს სარეზერვო სიებიც და თუ ადგილი თავისუფლდება, მათ ვუკავშირდებით. გვქონია შემთხვევები, როცა სოცმუშაკებს მოუყვანიათ მოსწავლე“, – ამბობს სერგო ხოზრევანიძე.

სკოლა-პანსიონის რეაბილიტაცია 2008 წელს განხორციელდა, თუმცა სარეაბილიტაციო სამუშაოებზე გამოყოფილი ბიუჯეტის კორექტირების გამო მხოლოდ სკოლისა და საცხოვრებელი კორპუსის გარემონტება მოხერხდა.

ამ ეტაპზე სკოლას სპორტული დარბაზი არ აქვს. კლუბის შენობაში არსებულ თეატრში კი სიძველისა და სხვა მიზეზებით გაფუჭებული სკამები და სცენის იატაკი სარემონტო სამუშაოებს საჭიროებს. თეატრის ჭერს წყლის კვალი ემჩნევა და კედლების საღებავი აქა-იქ ჩამოცვენილია. გასარემონტებელია სკოლის სასადილოც.

დირექტორის თქმით, დაახლოებით 2020 წელს დაიწყებენ სპორტული დარბაზისა და კლუბის გარემონტებას.
„რაც აქ ვმუშაობ, სასადილო არ გარემონტებულა და ინვენტარიც, როგორც ხედავთ, ძველია. არც გათბობა გვაქვს“, – ამბობს სასადილოს უფროსი მზარეული ალეკო ზოიძე.

დირექტორის თქმით, სკოლას ფსიქოლოგი არ ჰყავს. კონკურსიც გამოაცხადეს, თუმცა უშედეგოდ. დირექტორის ვარაუდით, ეს დაბალ ანაზღაურებას უკავშირდება. თუმცა სერგო ხოზრევანიძე დასძენს, რომ შტატში ექვსი აღმზრდელი ჰყავთ, რომლებიც უმაღლესი განათლებით ფსიქოლოგები არიან.

პანსიონის აღსაზრდელებს სხვადასხვა მიზეზით უწევთ აქ ცხოვრება და სწავლა. ყველაზე ხშირად სიდუხჭირის გამო მოდიან. სკოლა-პანსიონის დათვალიერებისას დირექტორი ყვება მძიმე ისტორიებს, რომ ერთ-ერთ მოსწავლეს ხშირად ამჩნევდნენ სისხლჩაქცევებს და ამის გამო დაიწყეს მასწავლებლებისა და აღმზრდელების შემოწმება-დაკვირვება: „ერთხელ მასწავლებელმა ხელი წაიღო თავზე, რომ გადაესვა და ბავშვს ისტერიკა დაემართა. ძალიან შეშინებული იყო. ბოლოს აღმოჩნდა, რომ მას სახლში დედინაცვალი სცემდა, ღუმელის შესაკეთებელი გაცხელებული რკინა დაერტყა ზურგში. ჩვენ და სოცმუშაკები ჩავერიეთ ამ საქმეში და შემდეგ მოგვარდა პრობლემა – ბავშვის მამა დაშორდა ცოლს“.

დირექტორი ასევე ყვება იმ რთულ სოციალურ და ოჯახურ პირობებზე, რომელშიც აქ მცხოვრები მოსწავლეების ოჯახები არიან. იგი ამბობს, რომ ზოგიერთი მოსწავლის მშობელი შშმ პირია, ზოგიერთს მხოლოდ დედა ჰყავს, რომელიც მთელი დღით სამუშაოდ არის გასული, ზოგიერთს კი სახლში არ აქვს ელემენტარული პირობები, რის გამოც შვილების აქ მოყვანას ამჯობინებს. პანსიონის მოსწავლეთა ნაწილი „ოცნების ქალაქში“ ცხოვრობს.

„ახლა, დიდთოვლობაზე, გაკვირვებული ვიყავი, ასპროცენტიანი დასწრება გვქონდა. ბავშვებს რომ ვკითხე, მითხრეს, აქ გვირჩევნია, თბილაო“, – იხსენებს დირექტორი.

იგი დასძენს, რომ მართალია, ოჯახში ცხოვრება კარგია, თუმცა ამ ბავშვებისთვის ეს პანსიონი საუკეთესო გარემოა. დირექტორი პანსიონის დახურვის მცდელობის ფაქტის შესახებაც მოგვიყვა:

„2007 წელს ჩაატარეს ექსპერიმენტი, გამოთვალეს ბიუჯეტი და ყველა ოჯახს დაურიგეს ის თანხა, რაც იხარჯებოდა ერთ ბავშვზე. პროგრამა დაიხურა. მაგრამ ოჯახებმა ეს თანხა არამიზნობრივად დახარჯეს და ბავშვები მაინც მზრუნველობის გარეშე დარჩნენ. მიუხედავად იმისა, რომ ბავშვები სხვა სკოლებში გადაანაწილეს, მაინც ჩვენთან მოდიოდნენ და იყო ერთი ამბავი, რის შემდეგაც გაგრძელდა პანსიონის მუშაობა“.

დირექტორთან ინტერვიუს შემდეგ ბავშვებს ვესაუბრები. კითხვაზე, რის შეცვლას, გაუმჯობესებას ისურვებდა პანსიონში, მეცხრეკლასელი თორნიკე დაჟინებით იმეორებს, რომ აქ ყველაფერი ძალიან კომფორტულია და ვერაფერს იხსენებს, რაც აკლია ან რის შეცვლაც უნდა. თუმცა ამატებს, რომ ორი წლის წინ, როცა აქ მოდიოდა, იგივე შეკითხვა რომ დაესვათ მისთვის, აქედან წასვლას ისურვებდა. თორნიკე ამბობს, რომ ახლა, მის ოჯახს ფინანსურადაც რომ არ უჭირდეს, აქედან მაინც არ წავიდოდა, რადგან აქ ყველა პირობა აქვს მიზნების მისაღწევად. თორნიკეს არქიტექტორობა უნდა.

ნასტია და სერგო და-ძმანი არიან. სერგო ამბობს, რომ ბადმინტონის თამაშში უპირობო ლიდერია. დიმას კი ფეხბურთის თამაში ურჩევნია. მიყვება, რომ ორი დღის წინ ფეხბურთის თამაშისას ფეხსაცმელი გაეხა და თან მაჩვენებს. დახეულ ფეხსაცმელში ტერფის ნახევარი მოუჩანს. სამახსოვრო ფოტოების გადაღებისას შეეცადა დახეული ფეხსაცმელი მეორე ფეხით დაეფარა. დიმა ამბობს, რომ „ოცნების ქალაქში~ ცხოვრობს, თან მეკითხება, თუ გამიგია ამ ადგილის შესახებ. მეუბნება, რომ სახლში წასვლა არ უხარია. „აქ ყოფნა მირჩევნია, აქ უკეთ ვარ. ვსწავლობთ, ვთამაშობთ. ბორში არ მიყვარს, მაგრამ სხვა რამეს ვჭამ… სკოლაში ყველაზე მეტად ხატვა მიყვარს და ბურთი, მასწავლებელი სულ ამბობს – არ გახეთქოთო. ორი ბურთი გავხეთქეთ“, – ყვება ის სიცილით.

იმედი, რომელიც მე-11 კლასშია, უკვე ფიქრობს უნივერსიტეტზე. მისი ინტერესის საგანი ეკონომიკაა, ოღონდ უნივერსიტეტის არჩევისას, ფინანსური მდგომარეობა რომ დიდ როლს თამაშობს, ეს აწუხებს. პანსიონში იმედსაც მოსწონს. თუმცა ამბობს, რომ მამისა და უფროსი ძმის როლი ხშირად უთამაშია მათთვის, ვისაც პირველ დღეებში მასავით უჭირდა შეგუება სისტემასთან, რომელსაც დღეს ოჯახად აღიქვამს.

რეისი: ბათუმი – კირნათი

თამთა კახაბერიძე

ინგლისურის გაკვეთილი საღამოს შვიდის ნახევარზე მიმთავრდება. 2-3 წუთში გამოვდივარ ნატო მასწავლებლის სახლის სადარბაზოდან. აი, ამ წამიდან იწყება ჩემი და ჩემი სოფლის ავტობუსის შეჯიბრი, რომელიც ზუსტად იმ დროს გამოდის ქალაქის მეორე ბოლოს მდებარე ავტოსადგურიდან, როცა მე ინგლისურის გაკვეთილს ვამთავრებ. ჩვენი მარშრუტის გადაკვეთის ადგილამდე აუცილებლად უნდა მივასწრო, თუ სახლში დაბრუნება მინდა, რადგან ეს ბოლო ავტობუსია, რომელიც ჩემს სოფლამდე მიდის. ხვალ სკოლაში ვარ წასასველი და დილით, 9 საათამდე თუ გადავფრინდები, თორემ, ისე ქალაქიდან ვერანაირად ვერ მივაღწევ ჩემი სოფლის სკოლამდე.

კორპუსის ეზოდან გამოსვლამდე ავტობუსზე მისწრების ალბათობას ვთვლი, რაც ბევრ ფაქტორზეა დამოკიდებული: რა დღეა -სამუშაო თუ უქმე, როგორი ამინდია, რომელი მძღოლია დღეს ცვლაში და ა.შ. უკვე ქუჩაში გამოსული ვწყვეტ – სწრაფად ვიარო, თუ თავპირისმტვრევით ვირბინო. უფრო ხშირად მეორე ვარიანტს ვირჩევ და დანიშნულების ადგილას მისული ძლივს ვითქვამ სულს. თუ ავტობუსს, ჩემი გათვლებით, 3-4 წუთით მაინც ვასწრებ, მაშინ შედარებით მშვიდად ვარ და გზაში მომავლის გეგმებსაც ვაწყობ: მომავალში შეიძლება ხვალინდელი დღის გრაფიკიც იგულისხმო, შემდეგი კვირის ან თვის, ან მთელი ცხოვრების. მაგრამ, მე აბიტურიენტი ვარ და ჩემი მომავლის გეგმა მხოლოდ ეროვნულ გამოცდებამდე პერიოდს ეხება. დანარჩენს უკვე გამოცდების შედეგი განსაზღვრავს.

ჰო, აბიტურიენტი ვარ, თუმცა, რომელ ფაკულტეტზე მინდა სწავლის გაგრძელება, ჯერ კიდევ ვერ გადავწყვიტე. რა მაინტერესებს? რისი კეთება მინდა? – მაინტერესებს ადამიანის უფლებები, მაწუხებს ქალებზე ძალადობა და ნაადრევი ქორწინება, შეზღუდული გარემო შშმ პირთათვის, განათლების პრობლემა, ქუჩაში დაყრილი ნაგავი, მაწუხებს უამრავი სტერეოტიპი ჩემ გარშემო და ის უკულტურობა, რომელსაც ბევრი „ქართულ კულტურას~ უწოდებს და კბილებით იცავს არარსებული მტრისგან. მინდა რამე გავაკეთო ამ პრობლემების მოსაგვარებლად, მინდა ბევრი თანამოაზრე მყავდეს, რომ ერთად შევცვალოთ გარემო, რომელიც არ მოგვწონს და მინდა ჩვენი ქვეყანა განვითარებულ ქვეყნად იქცეს. მოკლედ, ბევრი ამბიცია მაქვს. მომავალ პროფესიად იურისპრუდენციას ან ჟურნალისტიკას განვიხილავ.

ამასობაში დანიშნულ ადგილსაც ვუახლოვდები. ავტობუსში ასული თავს უკვე მშობლიურ გარემოში ვგრძნობ. ალბათ იმიტომ, რომ ვიცი, ერთი საათი დამჭირდება თუ საათ-ნახევარი, თუნდაც ორი იყოს, ყოველ შემთხვევაში, დღეს აუცილებლად მივაღწევ სახლამდე. ეს დროც ბევრ ფაქტორზეა დამოკიდებული, რომლებიც უკვე ვახსენე.

ავტობუსში თითქმის ყოველთვის ერთსა და იმავე სახეებს ვხვდები. წინ, ძირითადად, ახალგაზრდა ბიჭები სხედან და სოფელში ასვლამდე ტოტალიზატორის ბილეთებზე, ფეხბურთზე, „გუშინდელ თამაშზე“, მანქანებსა და სიგარეტის გაძვირებაზე საუბრობენ; შუა ნაწილს ბაზრიდან წამოსული ქალები იკავებენ, რომლებსაც დაღლილობის მიუხედავად, ყოველთვის აქვთ იმის ძალა, რომ სოფლის „ყვითელი“ ამბები განიხილონ: ვინ „ახალი რძალი მოიყვანა“, ვინ მანქანა იყიდა და ვისმა ბიჭმა სად დაიწყო მუშაობა.

სულ უკან, კაცები არიან. ისინი, ძირითადად, მშენებლობაზე მუშებად მუშაობენ. იმის იმედი, რომ დასაჯდომი ადგილი მომიწევს, რა თქმა უნდა, არ მაქვს და ავტობუსის შუაში, „ქალების სექციაში“ ვდგები. ზოგჯერ, რომელიმე ახალგაზრდა ბიჭი, „ჯენტლმენობას“ იჩენს და ადგილს მითმობს, ამ დროს ძალიან უხერხულად ვგრძნობ თავს, ბევრს ვუარობ, მაგრამ მთელი ავტობუსის შეგულიანების შემდეგ, „რომ დაგითმეს, დაჯექი“, მაინც მიწევს დაჯდომა და მერე მთელი გზა ეკლებზე ვზივარ. ქალისთვის ადგილის დათმობა და ამით პატივისცემის გამოხატვა იმ საზოგადოებაში, რომელშიც ყოველი მესამე ქალი ძალადობის მსხვერპლია, ცოტა სასაცილოდ მეჩვენება.

განსაკუთრებით ნერვები მეშლება, როცა „ჩემი ჯენტლმენი“ ძმაკაცებთან საუბრით გართული და აზარტში შესული ხმამაღლა წამოიძახებს ხოლმე „ქალმა ეგ როგორ უნდა გამიბედოს, ძმაო“. ან, ენადგაკრეფილ მეგობარს შენიშვნას აძლევს, რომ ძალიან ბევრს ლაპარაკობს და თან „ნამუსზე აგდებს“: „ქალი ხომ არ ხარ, ბიჭო“. ამიტომ, რაც არ უნდა დაღლილი ვიყო, დგომა მიჩევნია, თან უკვე წლებია, თითქმის ყოველდღე, ასე ვმგზავრობ და შევეჩვიე. ამ დროს ქალები მამხნევებენ ხოლმე: „ინვალიდი ხომ არაა, იდგეს მერე, ახალგაზრდაა ჯერ და არ გაუჭირდება“. „ინვალიდი არა, შეზღუდული შესაძლებლობის მქონე“ – ვიმეორებ გულში, თუმცა ხმამაღლა არაფერს ვამბობ. ვიცი, ამ სიტუაციაში ამ თემაზე მსჯელობას აზრი არ აქვს. ბევრჯერ ვცადე და შედეგად მხოლოდ ნერვების დაგლეჯა და „გაუზრდელი და ტლიკინა“ გოგოს სახელი მივიღე.

მახსოვს, პირველად რომ დავიწყე დამოუკიდებლად ქალაქში სიარული, მთელი ავტობუსი და, შესაბამისად, მთელი სოფელი შეშფოთებული იყო: ახალგაზრდა გოგო ასე ხშირ-ხშირად სად დავდიოდი, ან ასე გვიან რატომ ვბრუნდებოდი სახლში. დედაჩემს აფრთხილებდნენ კიდეც, რომ შეიძლება ერთხელაც უკან აღარ დავბრუნებულიყავი. მალე მიხვდნენ, რომ მართლა მეცადინეობაზე დავდივარ, ან ტრენინგზე, ან რომელიმე არასამთავრობოს მიერ ორგანიზებულ კურსებზე და არა პაემანზე. ყოველ შემთხვევაში, გათხოვებას ნამდვილად არ ვაპირებ, ჯერჯერობით. თუმცა, ზოგჯერ ახლაც შენიშნავენ დანანებით: „არ იღლები ამდენი სიარულით ყოველდღე?!“, „რა ქნას, სწავლობს ბავშვი“, ამას დედაშვილური რჩევა მოყვება: „ამდენი სწავლაც არაა საჭირო, ბიჭი ხომ არ ხარ. მამაშენს რამდენი ფული ეხარჯება შენზე, მაინც უნდა გათხოვდე“.

ვცდილობ ბრაზი გადავყლაპო, უხეშად რომ არ გამომივიდეს და ისე ვუპასუხო, მოკლედ, ზრდილობის გულისთვის. ხანდახან, ჩურჩულით ნათქვამი, ეჭვიანი ტონი მესმის: „უნდა გათხოვდეს, მაგრამ, ნეტა სახლის საქმეები ეხერხება?! – სკოლის მერე ქალაქში გამორბის, მაგას საჭმლის გაკეთებაც არ ეცოდინება.“ ადრე ამ ყველაფერზე ძალიან ვბრაზდებოდი და ისე ვნერვიულობდი, სახლში მისული ვტიროდი. ახლა, უკვე აღარც ვეპასუხები. „თავის გამართლების~ რეჟიმით, ისევ იმ სტერეოტიპებს გავამყარებ, რომელიც ასე მიშლის ნერვებს.

უკან სულ ხმაურია. კაცები საქვეყნო საქმეებს განიხილავენ: ლანძღავენ მთავრობას, ჩივიან ლარის კურსის გაუფასურებაზე, რუსეთ-საქართველოს ურთიერთობაზე, დასავლეთის მიერ წართმეულ „ქართველობაზე“, საბჭოთა კავშირისდროინდელ სიკეთეებზე, 37 მანეთად მოსკოვში გადაფრენაზე, იქ 2 მანეთად ნაყიდ არაყზე და რუსულ „პეჩენიაზე“, აკრიტიკებენ ახალგაზრდა თაობას, გადაგვარებულებს და უზრდელებს გვიწოდებენ. ამ ყველაფერს იმდენად განიცდიან, რომ ნერვების დასაწყნარებლად სიგარეტს უკიდებენ და ნამწვავს წინა სკამის საზურგეზე აქრობენ.

ჩემს სახლამდე 40-50 მეტრით ადრე მეზობელი აჩერებს ავტობუსს. ჩვეულებრივ, მეც აქ ჩამოვდივარ და დარჩენილ გზას ფეხით ვაგრძელებ.

ჩემი სოფელი ძალიან ლამაზია. წელიწადის ყველა დროს თავისი ხიბლი აქვს, მაგრამ, მე ყველაზე მეტად ღამით მომწონს: სიმშვიდეში. მარტო, სიბნელეში მივაბიჯებ სოფლის ვიწრო გზაზე და ვფიქრობ: არ ვიცი სამართალმცოდნე ვიქნები თუ ჟურნალისტი, იქნებ სულ სხვა პროფესია ავირჩიო. მაგრამ, ნებისმიერ შემთხვევაში უნდა ვიზრუნო იმ პრობლემების გამოსწორებაზე, რომლებიც ასე მაწუხებს, მეც და ჩემმა თაობამაც უნდა შევძლოთ, რომ ჩვენი ქვეყანა განვითარდეს. ამისთვის კარგი განათლებაა საჭირო, კარგი განათლებისთვის – კარგ უნივერსიტეტში სწავლა, კარგ უნივერსიტეტში ჩარიცხვისთვის – გამოცდების კარგად ჩაბარება, გამოცდების ჩაბარებისთვის საჭიროა ხვალინდელი დავალება კარგად შევასრულო. ამისთვის, ალბათ, შუაღამემდე მუშაობა მომიწევს, მაგრამ არაუშავს. მთავარია, ამ ყველაფერს შედეგი ჰქონდეს.

როგორც იქნა, მოვაღწიე სახლამდე. ვაღებ ჭიშკარს, რომელიც, რაც არ უნდა ფრთხილად გავაღო, მაინც ძალიან ჭრიალებს და სახლში შევდივარ.

გერმანულ-ფრანგული ენების კვირეული სკოლა ევრო-2000-ში

სწავლა ხალისით – გზა ვეროპისაკენ!

,,მე ქართველი ვარ,მაშასადამე – ევროპელი!’’

,,მე ქართველი ვარ ჩემი ტრადიციებით, ენით, კულტურით, წარსულით, აწმყოთი და მომავლით“, ,,მე ქართველი ვარ და ყველაფერს გავაკეთებ იმის დასამტკიცებლად, რომ ჩემი წინაპარი პირველი ევროპელია, შეუძლებელს შევძლებ იმისათვის, რომ ჩემი ქვეყნის საუკეთესო ტრადიციები მსოფლიოს ვაჩვენო. ვაჩვენო ჩემი სწავლით, აღზრდილობით, თავმდაბლობით, ტოლერანტობით, შემწყნარებლობით, ჩემი ქვეყნის ისტორიული წარსულისა და აწმყოს სიყვარულით, დანარჩენი მსოფლიოს კულტურის პატივისცემით.“ მოსწავლეთა ესეებში ამოკითხული ეს ფრაზები იმედისმომცემად ჩაგვესმის, ამით ჩვენი აღსაზრდელები გვასაზრდოებენ და სტიმულს გვაძლევენ, რომ ჩვენ, მასწავლებლებმა და მშობლებმა, შეუძლებელი შევძლოთ, მხარში ამოვუდგეთ ჩვენს მომავალს, გადავცეთ ჩვენი გამოცდილება, ვასწავლოთ ის, რაც ვიცით, მივანიშნოთ იმაზე, რაც არ ვიცით და მათ უნდა აღმოაჩინონ, იმაზე, რაც ერთად უნდა ვისწავლოთ.

სწავლა ხალისით _ გზა ევროპისაკენ! – გერმანულ-ფრანგული ენების კათედრის ეს დევიზი სკოლა „ევრო-2000“-ის სავიზიტო ბარათად იქცა. სწორედ ეს კათედრა ასრულებს „ევრო-2000“-ის მოსწავლეთათვის მედიატორის როლს, რათა საყოველთაო გლობალიზაციის ეპოქაში ჩვენმა ახალგაზრდობამ შეძლოს ეროვნული და ევროპული ფასეულობების სინთეზი; კოსმოპოლიტური აზროვნების ჩამოყალიბება კი , საბოლოოდ ქვეყნის უკეთესი მომავლის მყარი გარანტი გახდება.

კვირეულის ფარგლებში ჩატარებული მრავალფეროვანი აქტივობებიც სწორედ ამ მიზანს ემსახურებოდა; ინტეგრირებული გაკვეთილები, კონკურსები, პროექტები, სპექტაკლები; ხელსაქმითა თუ მხატვრობით, მუსიკითა თუ პოეზიით ,გერმანულ, ფრანგულ, ინგლისურ, რუსულ ენებზე შესრულებული თარგმანებითა და მოსწავლეთა ნაშრომებით გაჯერებული ორი საინტერესო კვირა, სკოლის ცხოვრების წარსულ, მაგრამ ლამაზ ისტორიად იქცა. ამბად, რომლის კიდევ ერთი ნაწილი ვნახეთ; ისტორიად, რომელიც აუცილებლად გაგრძელდება, ჩვეული ხალისითა და წარმატებით, ამბავი, რომელიც ახარებს და მომავალში კიდევ უფრო გაახარებს ჩვენს მშობლებს, ოჯახებს, ქალაქს, საქართველოს და რომელსაც ერთად ქმნიან სკოლის ნიჭიერი მოსწავლეები და პედაგოგები;

ამბავი, რომელსაც ,,ევრო-2000“ ჰქვია.

მის.: ქ. ბათუმი, ზურაბ გორგილაძის ქ. N 91
ტელ.:: 422 27-42-47
ელ. ფოსტა: euro2000batumi@yahoo.com
ვებ გვერდი: https://www.euro-2000.ge/

ძველი ბათუმის ახალი სიმაღლე – როცა მერია გასაჯაროვების შიშით მოქმედებს

ბათუმის ძველ უბანში რამდენიმე შენობას ნახავთ, რომელთა სიმაღლეც დასაშვებზე მეტია. რეგულაცია მარტივია: 2013 წლიდან „ძველ ბათუმში“ მოქმედებს ბათუმის საკრებულოს გადაწყვეტილება, რომლის მიხედვითაც, არც ერთი შენობა 15 მეტრზე მეტი არ უნდა იყოს. მაგალითად, კომპანია „ჩემპიონი-2“-მა კანონდარღვევით შენობაზე სართულის დაშენება ისე დაასრულა, რომ მერიას რეაგირება არ ჰქონია. კომპანიებმა, რომლებმაც შენობები სიმაღლეში გაზარდეს, ზედამხედველობის სამსახურისგან გაფრთხილება ერთდროულად გასულ კვირას მიიღეს. გასულ კვირასვე საზოგადოება „ბათომის“ დამფუძნებელმა შოთა გუჯაბიძემ ამ შენობებს ფოტოები გადაუღო და ინტერნეტით გადაწყვეტილების მიმღებ პირებს გაუგზავნა.

„ჩემპიონი 2“ სახლს ზუბალაშვილის 7 ნომერში აშენებს. სანებართვო მოწმობის მიხედვით, შენობის სიმაღლე 14,85 მეტრი უნდა იყოს. მერიის ზედამხედველობის სამსახურის ცნობით, სახლი უკვე 19.70 მეტრია. „საქმის წარმოება წინა კვირას დავიწყეთ. ამ კომპანიამ მიიღო გაფრთხილება,“ – გვითხრა ირაკლი მოქიამ, ბათუმის მერიის ზედამხედველობის სამსახურის სამშენებლო საქმიანობაზე სახელმწიფო ზედამხედველობის განხორციელების განყოფილების უფროსმა. კითხვაზე, თუ რატომ არ დაჯარიმდა კომპანია, გვიპასუხეს, რომ თავდაპირველად გაფრთხილების უფლება აქვთ და თუ მას არ გაითვალისწინებენ, კომპანიას 1000 ლარით დააჯარიმებენ. მერიის არქიტექტურისა და ურბანული დაგეგმარების სამსახურის უფროსის, ირაკლი ახალაძის განმარტებით, ჯარიმის გადახდა კომპანიას არ ათავისუფლებს ვალდებულებისგან, შენობა პროექტით გათვალისწინებულ პირობებთან შესაბამისობაში მოიყვანოს. „ამ კომპანიას, ისევე როგორც სხვა კომპანიებს, აქვს მანსარდის მოწყობის უფლება, მაგრამ სახურავის დახრილობა არ უნდა იყოს ამ შემთხვევაში 45 გრადუსზე მეტი. ეს ნორმაა დარღვეული,“ – უთხრა „ბათუმელებს“ ირაკლი ახალაძემ. თავად კომპანია „ჩემპიონი 2“-ში ჩვენს სატელეფონო ზარს ფინანსურმა მენეჯერმა გოჩა ჯაფარიძემ უპასუხა. მან გვითხრა, რომ დარღვევები არ აქვთ და ყველაფერი გაირკვევა.

გარკვევის მოლოდინში არიან კომპანიის „სახლი პიაცასთან“ ხელმძღვანელებიც. ეს კომპანია მაზნიაშვილის 35-37 ნომერში აშენებს სახლს. შენობა ხუთსართულიანია. მეექვსე სართულის მშენებლობა, ანუ იმის, რაც 15 მეტრზე მაღალს გახდის შენობას, ჯერ დასრულებული არ არის, მაგრამ უკვე დამონტაჟებული ბოძების ნახვით მარტივად შესაძლებელია იმის დასკვნა, რომ მორიგი სართული ემატება შენობას და არა – მანსარდა 45-გრადუსიანი დახრილობით, რასაც პროექტში შესაბამისი ცვლილება ითვალისწინებს. „ძალიან წაგებაში ვართ. მე მივიღე დაპირება ბათუმის ყოფილი მერისგან – ჯემალ ანანიძისგან, რომ თუკი მოვაწყობდი ავტოსადგომს ამავე შენობაში, მივიღებდი შეღავათს. არ ვაპირებ მშენებლობის გაჩერებას, ვარკვევთ სიტუაციას,“ – უთხრა „ბათუმელებს“ ვლადიმერ შენგელიამ.

რა იგულისხმება „გარკვევაში“ ან ვისთან მიმდინარეობს მოლაპარაკება, კომპანიის ხელმძღვანელმა ამაზე არაფერი გვითხრა. ყოფილი მერი ჯემალ ანანიძე ასეთ შეთანხმებას ვერ იხსენებს და ამბობს, რომ თუ ასეთი არსებობდა, ის წერილობითი ფორმით უნდა გაცემულიყო. მერიის ზედამხედველობის სამსახურის ცნობით კი, კომპანიას „სახლი პიაცასთან“ სამუშაოების იძულებითი შეჩერების მოთხოვნით მიმართეს. „სახლი პიაცასთან“ შემთხვევაში, სანებართვო მოწმობა არ ჰქონდათ აღებული, ისე მიმდინარეობდა მშენებლობა, ანუ პროექტი დამტკიცებულია, მაგრამ მისი შემდგომი ეტაპი არის სანებართვო მოწმობის აღება, რაც მოსაკრებლის გადახდას და დამატებითი დოკუმენტაციის წარმოდგენას მოითხოვს. გარდა ამისა, რაც შენდებოდა, ისიც პროექტით გათვალისწინებულ პირობებს არ შეესაბამებოდა,“ – გვითხრა ბათუმის მერიის არქიტექტურის სამსახურის უფროსმა, ირაკლი ახალაძემ.

რატომ ვერ დააფიქსირა კანონდარღვევა ქალაქის ცენტრში მერიამ აქამდე? – არქიტექტურის სამსახურის უფროსი არ მალავს, რომ შენობებით მას შემდეგ დაინტერესდა, როცა ფოტოები ნახა: „სოციალურ ქსელში ამ შენობების ამსახველი ფოტოები კულტურული მემკვიდრეობის დაცვის საბჭოს წევრმა, ზაურ ახვლედიანმა გამომიგზავნა, მისთვის შოთა გუჯაბიძეს გაუგზავნია. მერე მე ზედამხედველობის სამსახურს შევატყობინე,“ – ამბობს ირაკლი ახალაძე.

იმავე კითხვაზე ზედამხედველობის სამსახურის წარმომადგენელმა, ირაკლი მოქიამ ასე გვიპასუხა: „თითო კაცი ხომ ვერ გააკონტროლებს თითოეულ შენობას? ძალიან ბევრი მშენებლობაა ქალაქში“.

ამ შენობებზე გაცემული ნებართვები, ასევე მათში ცვლილებები შეთანხმებულია აჭარის კულტურული მემკვიდრეობის დაცვის ზონალურ საბჭოსთან. სააგენტოს ხელმძღვანელის, მირანდა ჩარკვიანის განმარტებით, მისი უწყების კომპეტენცია მხოლოდ კონკრეტულ ობიექტებზე ვრცელდება და არა მთლიანად ძველ ბათუმზე: „ძველი ბათუმი არ არის ძეგლი, ძეგლი არის კონკრეტული შენობა. შესაბამისად, ჩვენი მონიტორინგი არ ვრცელდება ყველა შენობაზე, რომლებიც ძველ ბათუმში შენდება“.

ცირა ელისაშვილი, კულტუროლოგი, „ტფილისის ჰამქარის“ წევრი ამბობს, რომ ნებისმიერ შემთხვევაში ხელისუფლებას აქვს პასუხისმგებლობა, რომ რეგულაციები განახორციელოს დროულად ახალ მშენებლობებზე, რომ ახლის შენება არ გახდეს ძველი ქალაქის განადგურების წყარო: „ეს არის ძალიან მნიშვნელოვანი. ისედაც ძველ უბანში ერთსართულიანი „ბელეტაჟების“ ნგრევის ხარჯზე ხდება ეს მშენებლობები, რაც ძალიან დიდი დანაკარგია ბათუმისთვის.“

შსს-ს თანამშრომლებს კიბერდანაშაულის საკითხებზე ტრენინგი ჩაუტარეს

შსს-ს ინფორმაციით: „ცენტრალური კრიმინალური პოლიციის დეპარტამენტის, საექსპერტო-კრიმინალისტიკური დეპარტამენტის, შსს-ს აკადემიის და სახელმწიფო უსაფრთხოების სამსახურის წარმომადგენლებს, პროექტის „აღმოსავლეთ პარტნიორობის ქვეყნების პოლიციის სფეროში თანამშრომლობა“ ფარგლებში, კიბერდანაშაულის წინააღმდეგ ბრძოლის საკითხებზე ლიტველმა ექსპერტებმა შინაგან საქმეთა სამინისტროს აკადემიაში ხუთდღიანი ტრენინგი ჩაუტარეს.

სწავლებაზე ციფრული მტკიცებულების ძებნა-ამოღება-დამუშავების, ბავშვთა პორნოგრაფიის და ონლაინ ფინანსური მაქინაციების გამოძიების, ინტერნეტ პროვაიდერებს შორის თანამშრომლობის, სამართალდამცავ ორგანოებს შორის გამოცდილების გაზიარების და ევროპოლთან ურთიერთობის საკითხები განიხილეს. ტრენინგზე ასევე WEB ტექნოლოგიების დანერგვის და კიბერდანაშაულის გამოძიების დროს მათი ეფექტურად გამოყენების შესახებ იმსჯელეს.

პროექტის „აღმოსავლეთ პარტნიორობის ქვეყნების პოლიციის სფეროში თანამშრომლობა“ მიზანია ევროკავშირსა და აღმოსავლეთ პარტნიორობის ქვეყნებს შორის თანამშრომლობის გაღრმავება და გამოცდილების გაზიარება. ტრენინგის დასასრულს, ყველა მონაწილეს შესაბამისი სერთიფიკატი გადაეცა“.

თავდაცვის მინისტრი აბიტურიენტებს შეხვდა

განათლება თავდაცვის სამინისტროს ერთ-ერთი მთავარი პრიორიტეტია

18 თებერვალს თავდაცვის მინისტრი თინათინ ხიდაშელი საგამოფენო ცენტრ „ექსპო-ჯორჯიაში“ საერთაშორისო საგანმანათლებლო გამოფენას ეწვია და აბიტურიენტებს შეხვდა. მომავალმა სტუდენტებმა გამოფენაზე წარმოდგენილი საქართველოს დავით აღმაშენებლის სახელობის ეროვნული თავდაცვის აკადემიის შესახებ დეტალური ინფორმაცია პირადად მინისტრისგან მიიღეს.

„მნიშვნელოვანია, რომ საქართველოში ასეთი ღონისძიებები იმართება. ახალგაზრდებს ეძლევათ შესაძლებლობა, პირველწყაროს ესაუბრონ, სკოლის დამთავრების ადრეულ ეტაპზე დაგეგმონ საკუთარი მომავალი, იცოდნენ, რა არჩევანი აქვთ და ისე მიიღონ გადაწყვეტილება. ყოველთვის მნიშვნელოვანი და საყურადღებოა ამგვარი საუნივერსიტეტო ბაზრები. ჩვენ ეროვნული თავდაცვის აკადემიით წარვდექით დღევანდელ ღონისძიებაზე და სხვა უნივერსიტეტების მსგავსად ვფიქრობთ, რომ ეროვნული თავდაცვის აკადემია არის საუკეთესო შესაძლებლობა განვითარებისთვის, საუკეთესო ადგილი, სადაც ახალგაზრდები უნდა მივიდნენ მაღალი ენთუზიაზმით და ემსახურონ საკუთარ ქვეყანას კარგი განათლებით“,- განაცხადა თავდაცვის მინისტრმა.

საერთაშორისო საგანმანათლებლო გამოფენა ყოველწლიურად იმართება. ღონისძიებაში წელს 6 ქვეყნის 100-ზე მეტი უნივერსიტეტი მონაწილეობდა. „ექსპო-ჯორჯიას“ საგამოფენო დარბაზში, ეროვნული თავდაცვის აკადემია, სხვა უმაღლეს სასწავლებლებთან ერთად, სპეციალური სტენდით იყო წარმოდგენილი.

სიმბოლურია, რომ თავდაცვის სამინისტრომ წელს 17-24 თებერვალი „ცოდნის კვირეულად“ გამოაცხადა და რეგიონებშიც მრავალი საინტერესო აქტივობა განახორციელა.

ცოდნის კვირეული 17 თებერვალს გორში, დავით აღმაშენებლის სახელობის ეროვნულ თავდაცვის აკადემიაში გაიხსნა. მინისტრმა პანკისელი ახალგაზრდებისთვის ხეობაში სტუმრობის დროს მიცემული პირობა შეასრულა და კვირეულის ფარგლებში, ეროვნულ თავდაცვის აკადემიაში ღია კარის“ დღეზე, სწორედ, ახმეტის მუნიციპალიტეტის საჯარო სკოლის მოსწავლეებს უმასპინძლა. „ცოდნის კვირეულის“ ფარგლებში ღონისძიებები გორის გარდა თბილისში და საქართველოს რეგიონებშიც გაიმართა.

22 თებერვალს ტყიბულის N6 საჯარო სკოლაში დასავლეთ სარდლობის III ქვეითი ბრიგადის სამხედრო მოსამსახურეებმა ტყიბულის მუნიციპალიტეტის სკოლების მოსწავლეებს III ქვეითი ბრიგადის სამხედრო მოსამსახურეები ეწვივნენ.

თავდაცვის სამინისტროს საავიაციო ბაზაზე მარნეულის საჯარო სკოლის მოსწავლეების მოწვევა, წიგნების გამოფენა-პრეზენტაციები, აქტივობა წვრთნებისა და სამხედრო განათლების სარდლობის ეროვნულ სასწავლო ცენტრ `კრწანისში~, სამხედრო პოლიციის სპეციალისტთა და უმცროს ოფიცერთა მომზადების კურსი _ ამ და სხვა მრავალი საინტერესო ღონისძიების შემდეგ „ცოდნის კვირეული“ 24 თებერვალს სტუდენტებისთვის გამართული საჯარო ლექცია _ დისკუსიით დაიხურა, რომელიც 1921 წლის დამოუკიდებლობისთვის ბრძოლას მიეძღვნა.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

რა არის მითი?

გთავაზობთ მითების სერიას, რომელიც საზოგადოებაში ანტიდასავლური პროპაგანდის შედეგად გაჩენილი მითებისა და კითხვების საპასუხოდ მომზადდა

რა არის მითი? მითი პროპაგანდის და სიცრუის გავრცელების ერთ-ერთი ყველაზე ძლიერი იარაღია. მას კონკრეტული ავტორი არ ჰყავს. ის ვრცელდება სწრაფად და რაც უფრო სახალხო ხდება, მით მეტად ძლიერი და გავლენიანია ესა თუ ის მითი. მითი ათასჯერ უნდა გაიმეორო, სანამ ის „სიმართლედ“ იქცევა. მას ასევე აქვს „ექოს“ ეფექტი, ანუ მას შემდეგ, რაც ასმა ადამიანმა მითი მოისმინა და მიიღო, ის თვითონ გახდა გამავრცელებელი. მით უფრო, რომ ფართო საზოგადოებისთვის უბრალო ადამიანისგან მოსმენილი გაცილებით მისაღებია, ვიდრე ცნობილი პოლიტიკოსის ან საზოგადო მოღვაწისაგან მიწოდებული ფაქტი. ასე ერთვება ფართო საზოგადოება პროპაგანდისტულ ომში. თუ ადრე მითების გავრცელებისათვის მნიშვნელოვანი იყო ტრიბუნა და ორატორული უნარები, დღეს ეს აუცილებელი აღარ არის. საინფორმაციო ტექნოლოგიების საშუალებითა და სოციალური მედიის წყალობით უავტორო მითები ადვილად იკიდებს ფეხს განსაკუთრებით იმ საზოგადოებაში, რომელიც თავისი განვითარების ვექტორს მხოლოდ წარსულთან დაკავშირებულ ცრუ ღირებულებებზე აგებს.

მოსაზრება, რომ საქართველოს ნატოში გაწევრიანება შეუძლებელია, სანამ მისი რეგიონები ოკუპირებულია და მისი ტერიტორიული მთლიანობა არ აღდგება, მცდარია.

სინამდვილეში, ნატოში გაწევრიანება, სამართლებრივი თვალსაზრისით, ნიშნავს საქართველოს გაწევრიანებას საერთაშორისოდ აღიარებული საზღვრებით, რა თქმა უნდა, აფხაზეთის და ცხინვალის (ამჟამად ოკუპირებულ) რეგიონებთან ერთად. არსებობს არა ერთი ქვეყნის მაგალითი, რომლებსაც ნატოსა და ევროკავშირში გაწევრიანების დროს ტერიტორიული და საზღვრების დადგენის პრობლემა ჰქონდა. მაგალითად, მეორე მსოფლიო ომის შემდეგ გერმანია ორად გაიყო და აღმოსავლეთ გერმანია ოკუპირებული იყო საბჭოთა კავშირის საოკუპაციო ჯარის მიერ. 1955 წელს დასავლეთ გერმანია გაწევრიანდა ნატოში, რამაც გერმანიის პოლიტიკური და ეკონომიკური სიძლიერე და სტაბილური განვითარება განაპირობა. ცივი ომის დასრულებისა და ბერლინის კედლის დანგრევის შემდეგ, გერმანია გაერთიანდა და დღეს ის ნატოსა და ევროკავშირის ერთ-ერთი ყველაზე ძლიერი წევრია. ნატოში გაწევრიანებამ დასავლეთ გერმანიის უსაფრთხო და სტაბილურ განვითარებას შეუწყო ხელი, ხოლო ბერლინის კედლის დანგრევის შემდეგ გაერთიანებულ გერმანიას გაცილებით ძლიერი და მყარი ხმა აქვს ალიანსში.

ასევე, საინტერესოა ბალტიისპირეთის ქვეყნების მაგალითი, რომლებიც 2004 წელს ნატოში გაწევრიანდნენ. ამ ქვეყნებს საზღვრების დადგენის საკითხები არ ჰქონდათ მოგვარებული მეზობელ სახელმწიფოსთან. მიუხედავად ამისა, მოკავშირეებმა მიიღეს პოლიტიკური გადაწყვეტილება, რომ ესტონეთი, ლიტვა, ლატვია NATO- ში მიეწვიათ. ამ გადაწყვეტილებამ ბალტიის ქვეყნების სტაბილური და მშვიდობიანი განვითარება განაპირობა.

ეს მაგალითები ადასტურებს, რომ ნატოში გაწევრიანება ტერიტორიული მთლიანობის აღდგენისა და მისი უსაფრთხო განვითარების ხელშემწყობ ფაქტორს წარმოადგენს.

დეკორატიული ფილების დაგება ბულვარში [ვიდეო]

ნინოშვილის ქუჩის გასწვრივ ცენტრალური ბულვარის შესასვლელიდან უნივერსიტეტამდე არსებულ ალეაში მოზაიკის ნაცვლად ახალი ბეტონის დეკორატიულ ფილებს აგებენ.

ბულვარის ადმინისტრაციის ინფორმაციით, ბულვარში სარეაბილიტაციო სამუშაოები მარტის თვეში დასრულდება.

საქართველო ნატოში გაწევრიანების გზაზე

1991 წელს, როდესაც საქართველომ დამოუკიდებლობა მოიპოვა, ქვეყანამ თავისი ისტორიული არჩევანი გააკეთა და პროდასავლური კურსი აიღო. გეოპოლიტიკური მდებარეობიდან გამომდინარე, საქართველოს სუვერენიტეტი, ტერიტორიული მთლიანობა, უსაფრთხოება და დემოკრატიული განვითარება ყოველთვის საფრთხის წინაშე იდგა. სწორედ ამიტომ, საბჭოთა კავშირის დაშლის შემდეგ, საქართველომ ქვეყნის უსაფრთხოების გარანტიების ძიება ევროატლანტიკურ სივრცეში დაიწყო.

საქართველოს ჩრდილოატლანტიკურ ალიანსთან 24-წლიანი თანამშრომლობის ისტორია აკავშირებს. ქვეყანამ, როგორც ნატოს პარტნიორმა, 1992 წლიდან დღემდე გრძელი და მნიშვნელოვანი გზა განვლო. 2008 წელს ნატოს ბუქარესტის სამიტზე ალიანსის წევრი ქვეყნების ლიდერები შეთანხმდნენ, რომ საქართველო გახდება ნატოს წევრი. ამ განცხადებით, მოკავშირეებმა საქართველოს ნატოში გაწევრიანებასთან დაკავშირებით პოლიტიკური ნება გამოხატეს, ეს ნატოს მომდევნო სამიტებზეც მრავალჯერ დადასტურდა. ბუქარესტის სამიტიდან დღემდე მნიშვნელოვნად განვითარდა ნატო-საქართველოს ურთიერთობები – დაფუძნდა ნატო-საქართველოს კომისია, რომელიც მნიშვნელოვანი საკონსულტაციო ფორუმია; საქართველომ დაიწყო ყოველწლიური ეროვნული პროგრამის განხორციელება, რომელიც შინაარსით გაწევრიანების სამოქმედო გეგმის პრაქტიკული ნაწილია; საქართველოს მიენიჭა ნატოს ასპირანტი ქვეყნის სტატუსი.

ნატოსა და საქართველოს შორის ურთიერთობებმა ინტენსიური ხასიათი მიიღო და კონკრეტული შედეგებიც გამოიღო.

პირველ რიგში, ალიანსის რეკომენდაციების შესაბამისად, საქართველო ეფექტურად ახორციელებს რეფორმებს, რაც ქვეყანაში დემოკრატიული პროცესების განვითარებას, კანონის უზენაესობასა და ადამიანის უფლებების დაცვას უწყობს ხელს. ამასთან, საქართველოს მიერ ინტეგრაციული მექანიზმების ეფექტურად განხორციელება და ნატოს პროგრამებში მონაწილეობა უზრუნველყოფს ჩვენი ქვეყნის თავდაცვის ტრანსფორმაციას და თანამედროვე, მოქნილი, მუდმივ საბრძოლო მზადყოფნაში მყოფი ჯარის ჩამოყალიბებას.

საქართველოს მიერ პირნათლად და წარმატებით განხორციელებული რეფორმები არაერთგზის აღინიშნა ნატოს და წევრი ქვეყნების წარმომადგენლების მიერ.

ამას გარდა, 2014 წლის ნატოს უელსის სამიტზე ნატო-საქართველოს არსებითი პაკეტის ამოქმედებით საქართველოს ალიანსთან თანამშრომლობა თვისობრივად ახალ ეტაპზე გადავიდა. ნატო-საქართველოს არსებითი პაკეტის ინიციატივების წარმატებით განხორციელება ხელს უწყობს საქართველოს თავდაცვის შესაძლებლობების გაძლიერებას, საქართველოს შეიარაღებული ძალების ნატოსთან თავსებადობის ამაღლებას და რეგიონში სტაბილურობის განმტკიცებას.

ნიშანდობლივია, რომ ნატოს უელსის სამიტზე საქართველოსა და ალიანსს შორის ურთიერთობებში კიდევ ერთი მნიშვნელოვანი ნაბიჯი გადაიდგა და საქართველო, როგორც ნატოს ოპერაციების მნიშვნელოვანი კონტრიბუტორი, „გაძლიერებული შესაძლებლობების პარტნიორთა“ ჯგუფში მიიწვიეს. ეს ფორმატი საქართველოს დამატებითი პოლიტიკური კონსულტაციებისა და ურთიერთთავსებადობის საკითხებზე თანამშრომლობის შესაძლებლობას აძლევს.

საქართველო, როგორც ნატოს ასპირანტი ქვეყანა და საიმედო სტრატეგიული პარტნიორი, საერთაშორისო სტაბილურობისა და უსაფრთხოების განმტკიცებაში საკუთარი წვლილის შეტანას განაგრძობს. საქართველო მეორე ყველაზე მსხვილი კონტრიბუტორი ქვეყანაა ნატოს მტკიცე მხარდაჭერის მისიაში ავღანეთში, სადაც ქართველი სამხედრო მოსამსახურეები ნატოს დროშის ქვეშ ამაყად დგანან მოკავშირეთა ჯარისკაცების გვერდით და წარმატებით ასრულებენ დაკისრებულ ამოცანებს.

დღეს საქართველოს შეიარაღებული ძალები ნატოსთან თავსებადობის უმაღლესი დონის მაჩვენებლით სარგებლობს. 12 ათასზე მეტმა ქართველმა სამხედრო მოსამსახურემ ამერიკელი საზღვაო ქვეითების ინსტრუქტაჟით შესაბამისი წვრთნა გაიარა და ავღანეთში ნატოს ეგიდით წარმოებულ ოპერაციაში მიიღო მონაწილეობა. ამას გარდა, საქართველო ჩართულია მაღალი მზადყოფნის ნატოს სწრაფი რეაგირების ძალებში, რაც ქვეყანას ნატოს მაღალი დონის წვრთნასა და სწავლებაში მონაწილეობის მიღების შესაძლებლობას აძლევს და ქართული ჯარის ნატოს წევრი ქვეყნების შეიარაღებულ ძალებთან თავსებადობის გაძლიერებას უწყობს ხელს.

2015 წლის დეკემბრის ნატოს საგარეო საქმეთა მინისტერიალზე მონტენეგროს მიწვევა ალიანსში გაწევრიანებისთვის ნათელი და მკაფიო გზავნილია საქართველოს, როგორც ასპირანტი სახელმწიფოსთვის, რომ ნატოს „ღია კარის“ პოლიტიკა გრძელდება და საქართველოს ნატოში გაწევრიანება ალიანსის დღის წესრიგის მნიშვნელოვან საკითხად რჩება. მოკავშირეებმა აღნიშნეს, რომ საქართველო-ნატოს ურთიერთობები საქართველოს ალიანსში გაწევრიანებისთვის მოსამზადებლად ყველა პრაქტიკულ ინსტრუმენტს მოიცავს. გაწევრიანების სამოქმედო გეგმა საქართველოს ალიანსის წევრობისთვის ინტეგრაციის კონტექსტში არის ნატოს 28 წევრი სახელმწიფოს პოლიტიკური გადაწყვეტილება, რომელიც საქართველოს გაწევრიანებისთვის და არა გაწევრიანების გზაზე პროგრესის მისაღწევად ესაჭიროება.

ნატო-საქართველოს ურთიერთობებში არსებული მნიშვნელოვანი პროცესები იძლევა იმის მყარ საფუძველს, რომ საქართველოს ნატოში გაწევრიანების გზაზე, 2016 წლის ნატოს ვარშავის სამიტზე, კიდევ უფრო მეტი წარმატება ელის. ვარშავის სამიტის შემდეგ საქართველოს ექნება შესაძლებლობა და საშუალებები, კიდევ უფრო ეფექტურად დაიცვას საკუთარი სახელმწიფოებრიობა.

ახალი ინვესტორი სასტუმრო „ჰილტონის“ მიმდებარედ

კომპანია „ვესტინვესტი“ სასტუმრო „ჰილტონის“ მიმდებარედ სასტუმროს ტიპის აპარტამენტების, საკონფერენციო დარბაზისა და სპორტულ-გასართობი ობიექტების აშენებას გეგმავს. ამ მიზნით ბათუმის საკრებულომ რუსთაველის # 51-ში მდებარე 3508 კვ/მ მიწის ნაკვეთი განსაკარგავად აჭარის მთავრობას გასული წლის დეკემბერში გადასცა, თუმცა აჭარის მთავრობას კომპანიასთან ჯერ ხელშეკრულება არ გაუფორმებია.

პროექტის განმარტებითი ბარათის თანახმად, რომელიც მერიამ საკრებულოს სხდომაზე გამოიტანა, 2016 წლის 22 იანვარს კომპანია „ვესტინვესტმა“ მერიას წერილით მიმართა და საინვესტიციო წინადადების დაზუსტება მოითხოვა. კომპანია მზად იყო ხელშეკრულების გაფორმებიდან 45 დღის განმავლობაში ბათუმის მუნიციპალიტეტის ბიუჯეტში გადაერიცხა 525 000 აშშ დოლარის ექვივალენტური ლარი. გადაცემულ მიწის ნაკვეთზე კი შეთანხმებულ ვადაში უზრუნველყოფდა მრავალფუნქციური შენობა-ნაგებობების აშენებას.

ინვესტორი იღებდა არანაკლებ ასნომრიანი სასტუმროს ტიპის აპარტამენტების, საკონფერენციო დარბაზის, სპორტულ-გამაჯანსაღებელი ცენტრის, საზოგადოებრივი კვების ობიექტის, გასართობი ცენტრის, პარკინგისა და სარეკრეაციო ზოლის მოწყობის ვალდებულებას. ამ ყველაფერში ინვესტორს არანაკლებ 25 მილიონი დოლარის ინვესტიცია უნდა განეხორციელებინა. რა ბედი ეწია პროექტს? – ამ კითხვაზე აჭარის ფინანსთა და ეკონომიკის სამინისტროში „ბათუმელებს“ უპასუხეს, რომ შეკითხვის ადრესატი მერიაა. მერიაში კი განმარტეს, რომ ქონება მთავრობას გადაეცა და პასუხიც მთავრობამ უნდა გაგვცეს.

კომპანია „ვესტინვესტი“ 2011 წელს საქართველოს ორმა მოქალაქემ – ვლადიმერ წულაძემ და სლავა ჟღენტმა და რუსეთის მოქალაქემ, ლუდმილა ბელიაევამ დააფუძნეს. 2015 წელს რეესტრის მონაცემებში ცვლილება შევიდა, რის შემდეგაც კომპანიის სამივე დამფუძნებელი მონაცემებიდან გაქრა. ამ დროიდან კომპანიის წილებს გიორგი გველესიანი – 33,34%, თემურ უსტიაშვილი – 33,33% და გიორგი თავდიშვილი – 33,33% ინაწილებენ. კომპანიის დირექტორად თემურ უსტიაშვილი ფიქსირდება.

რუსეთ-საქართველოს სახელმწიფოებრივ ხელშეკრულებათა ისტორია და ნატოს პერსპექტივა

ქართველი მწერალი ოთარ ჭილაძე ამბობდა: „მთელი ჩემი პასუხისმგებლობით ვაცხადებ, ხუთი წუთიც არ ყოფილა მეგობრული ურთიერთობა რუსეთსა და საქართველოს შორის“. ასე იყო ფაქტობრივად და ასე არის იურიდიულადაც. ამჯერად იურიდიულ მხარეზე ვისაუბროთ.

რუსეთ-საქართველოს შორის არაერთი სახელმწიფოთაშორისი პოლიტიკური შეთანხმება შედგა. მათი ზერელედ გადახედვაც კი კმარა დასკვნების გამოსატანად.

მივყვეთ მოვლენებს ქრონოლოგიურად:

1719 წელს რუსეთის იმპერატორმა პეტრე პირველმა მოლაპარაკებები დაიწყო ქართლის მეფე ვახტანგ მეექვსესთან, რათა ეს უკანასკნელი სპარსეთის წინააღმდეგ რუსეთის მოკავშირეობას დასთანხმებოდა. „მოძმე, მართლმადიდებლურ რუსეთთან კავშირი იმდენად მიმზიდველად გამოიყურებოდა, რომ ვახტანგს ბევრი არ უფიქრია. მან არა მარტო ქართველთა, არამედ, სომხების ჯარიც შეკრიბა და 1722 წელს სამი თვე უშედეგოდ უცდიდა პეტრეს გამოხმაურებას. პეტრემ ლაშქრობა კასპიისპირეთში დაიწყო, აიღო დარუბანდი, მიზანს მიაღწია და უკან გაბრუნდა. რუსეთის იმპერატორ ვახტანგის ჯარი სპარსული ძალების საქართველოს მიმართულებით კონცენტრაციისთვის სჭირდებოდა, რათა საკუთარ ფრონტზე საქმე გაეადვილებინა. რასაკვირველია, ვახტანგის ქმედებას სპარსელთა დამსჯელი ლაშქრობები მოჰყვა, მაგრამ ეს პეტრეს აღარ აინტერესებდა… უფრო მეტიც, 1724 წელს მან ხელშეკრულება გააფორმა ოსმალეთთან და აღმოსავლეთ საქართველო ამ უკანასკნელს დაუთმო.

თუმცა, საქართველოს კიდევ დიდი დრო სჭირდებოდა იმისათვის, რომ რუსეთი რეალურად შეეცნო. 1453 წელს, კონსტანტინოპოლის დაცემის შემდეგ, მუსლიმურ რკალში დარჩენილი ქვეყანა დაიღალა, გამოიფიტა იდენტობის შენარჩუნებისთვის ბრძოლით. შესაბამისად, 1783 წელს გაფორმებული გიორგიევსკის ტრაქტატი დიდ მიღწევადაც ჩაითვალა. რუსეთი ვალდებულებას იღებდა, მუდმივად ჰყოლოდა ორი ბატალიონი ქართლ-კახეთის ტერიტორიაზე და, საჭიროების შემთხვევაში, მთელი ძალებითაც დაეცვა აღმოსავლეთ საქართველო. 1795 წელს, აღა მაჰმად ხანის ლაშქრობის წინ, რუსეთმა ბატალიონები წინასწარგანზრახულად გაიყვანა. ქართლ-კახეთი მიწასთან გასწორდა: მოიშალა ეკონომიკა, დაინგრა ტფილისი, დაიწვა სოფლები, სამეფო შინაარეულობამ მოიცვა.

დანგრეული ქვეყანა კიდევ უფრო მეტად გახდა დამოკიდებული „ერთმორწმუნე“ მეზობელზე. შედეგად, ქართლ-კახეთის უკანასკნელმა მეფე, გიორგი XII-მ რუსეთს ქვეყნის შიდა საქმეებში ჩარევა სთხოვა, ქვეყნის დამოუკიდებლობისა და სამეფო დინასტიის შენარჩუნების პირობით. რუსეთის მოწვევით, გიორგი XII მშვიდობის დამყარებას, ეკონომიკურ აღმავლობას იმედოვნებდა. საპასუხოდ, 1801 წელს რუსეთმა გააუქმა ქართლ-კახეთის დამოუკიდებლობა, ხალხი ძალით დააფიცა იმპერატორის ტახტის ერთგულებაზე, ქართული სამეფო დინასტია რუსეთში გადაასახლა, მოშალა „ერთმორწმუნე“ ეკლესიის ავტოკეფალია და ა.შ.

მფარველობის შესახებ შეთანხმება რუსეთმა იმერეთის სამეფოსაც გაუფორმა 1804 წელს (ელაზნაურის ტრაქტატი), თუმცა 1810 წელს მისი დამოუკიდებლობაც გააუქმა და უკანასკნელი მეფე სოლომონი II ქვეყნიდან გააძევა.

1918 წლის 26 მაისს, რუსეთის გუბერნიებად თუ ოკრუგებად დაყოფილმა საქართველომ დამოუკიდებლობა აღადგინა. პირველივე დღიდან, ამ დამოუკიდებლობას თანაბრად მტრობდნენ, როგორც ბოლშევიკები, ასევე თეთრგვარდიელი მეფის გენერლები. თუმცა, ტაქტიკური მოსაზრებით, რაც საერთაშორისო საზოგადოებისთვის თვალის ახვევას ისახავდა მიზნად, 1920 წლის 7 მაისს რუსეთმა საქართველოს დამოუკიდებლობა აღიარა და მისი ტერიტორიული მოთხოვნების დიდი ნაწილიც დააკმაყოფილა. ხელშეკრულების შედეგად ლეგალიზებულმა ბოლშევიკურმა პარტიამ და ახალგახსნილმა რუსეთის საელჩომ მყისიერად დაიწყეს ანტისახელმწიფოებრივი გამოსვლების მოწყობა. საკუთარი მიზნების მისაღწევად რუსეთი, ძირითადად, კოლაბორაციონისტ ქართველებს, აფხაზ და ოს სეპარატისტულ ჯგუფებს იყენებდა. ქვეყნის „შიგნიდან აფეთქება“ არ გამოვიდა, ამიტომ 1921 წლის თებერვალ-მარტში რუსეთმა ფართომასშტაბიანი სამხედრო შემოჭრა და ქვეყნის ოკუპაცია განახორციელა.

1991 წელს, საქართველოს დამოუკიდებლობის კიდევ ერთხელ აღდგენის შემდეგ, იმავე ოსი და აფხაზი სეპარატისტული ჯგუფების მართვის მეშვეობით, იმავე ქართველი კოლაბორაციონისტების გამოყენებით, რუსეთმა კვლავ დაიწყო საქართველოს „შიგნიდან აფეთქება. ქვეყანას თავს მოახვიეს სამოქალაქო და „ეთნიკური“ შიდა ომები, რომელთა სცენარები კრემლში იწერებოდა. თუმცა, ჩვენ ისევ ამ ურთიერთობათა იურიდიულ მხარეს დავუბრუნდეთ: აფხაზეთის ომის მსვლელობისას, 1992 წლის 3 სექტემბრის მოსკოვისა და 1993 წლის 28 ივნისის სოჭის შეთანხმებათა საფუძველზე მხარეები ცეცხლის შეწყვეტისა და მძიმე შეიარაღების კონფლიქტის ზონიდან გაყვანის ვალდებულებას იღებდნენ. კრემლი ამ შეთანხმებათა შესრულების გარანტად გამოდიოდა. ქართული მხარის მიერ შესრულებულ პირობას, მძიმე ტექნიკის გარეშე დარჩენილ სოხუმზე იერიში და აფხაზეთის ოკუპაცია მოჰყვა.

ბოლო და საქართველოს თანამედროვეობისთვის ყველაზე მნიშვნელოვანი შეთანხმება დაიდო 2008 წლის 12 აგვისტოს, რომელიც „ექვსპუნქტიანი შეთანხმების“ სახელით არის ცნობილი. ამ შეთანმებით, რუსეთი ვალდებულია, რუსული შეიარაღებული ძალები დაუბრუნდნენ სამხედრო მოქმედებების დაწყებამდე არსებულ ხაზს და ევროკავშირის სადამკვირვებლო მისიას კონფლიქტის ზონებში შესვლის უფლება მისცეს. რასაკვირველია, ეს უკანასკნელი შეთანხმებაც ძალიან შორს არის შესრულებისგან.

როგორც ვხედავთ, რუსეთს არც ერთი სახელმწიფოთაშორისი შეთანხმება არ შეუსრულებია. საქართველო მუდმივად მოტყუებული რჩებოდა. რატომ? იმიტომ, რომ ამ ხელშეკრულებათა უკან ცალკე აღებული საქართველო იდგა, რუსეთი ვერ ხედავდა ძალას, რომელიც მას აღებულ ვალდებულებათა შესრულებას აიძულებდა.

სწორედ, აქ არის ჩრდილო-ატლანტიკური ალიანსის _ ნატოს წევრობა, როგორც გამოსავალი. თუ გსურს, მეცხრამეტე საუკუნის მეთოდებით მოქმედმა იმპერიამ პატივი გცეს და შეასრულოს შენწინაშე აღებული ვალდებულებები, ის შენში უნდა ხედავდეს ძალას. საქართველოს ნატოში გაწევრიანება არის დასავლური, მშვიდობიანი, განვითარებასა და მყარ, სანდო პარტნიორობაზე ორიენტირებული ალტერნატივა იმისა, რაც ბოლო სამასი წლის განმავლობაში საქართველომ რუსეთთან ურთიერთობისას გამოცადა.

ავტორი: ისტორიის დოქტორი, ბექა კობახიძე

მომზადებულია საქართველოს თავდაცვის სამინისტროს სტრატეგიული
კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

მომავლის აკადემია XXI საუკუნის განათლებისთვის

ეროვნული თავდაცვის აკადემია 28 მარტიდან აბიტურიენტთა მიღებას იწყებს

თბილისიდან დილის 5 საათზე გავედით… გვსმენია, რომ მზის ამოსვლა ამ მხარეში, კავკასიონის მთების ფონზე განსაკუთრებულია. სასწავლო „ქალაქს“ გარიჟრაჟზე, დილის გამამხნევებელი ვარჯიში და იუნკერთა შეძახილები ავსებს. ასეა წლის ნებისმიერ სეზონზე. ეროვნული თავდაცვის აკადემიის ზღურბლს მიღმა ენერგიით, იმედითა და ძალით ივსები და დარჩენის თუ არა, მინიმუმ, ხშირი სტუმრობის სურვილი გიჩნდება.

თბილისიდან გორამდე 40-50 წუთის სავალია, რეგიონებიდან მისასვლელი გზაც საკმაოდ კომფორტულია. ურბანული სივრციდან მოშორებულ ადგილას, გორის ცენტრსა და ხმაურს მოწყვეტილი სტუდენტური ქალაქი ძალიან ჰგავს მსოფლიოს თანამედროვე უნივერსიტეტების სასწავლო სივრცეებს. ადმინისტრაციული, საცხოვრებელი, სასწავლო, სპორტული კომპლექსითა და სარეკრეაციო ზონებით წარმოდგენილი კორპუსები ვრცელ ტერიტორიას მოიცავს.

ეროვნული თავდაცვის აკადემია სტუდენტთა ახალი ნაკადისთვის ემზადება. 2016-2017 სასწავლო წლისთვის საბუთების მიღება 28 მარტიდან დაიწყება. როგორც წესი, მსურველი ბევრია, თუმცა, ეროვნული თავდაცვის აკადემიის სრულუფლებიანი იუნკერი მხოლოდ 180 გახდება და თითოეული მათგანის სწავლას საქართველოს თავდაცვის სამინისტრო სრულად დააფინანსებს.

სწავლის სრული დაფინანსების გარდა იუნკერები, რეიტინგის შესაბამისად, სტიპენდიას იღებენ. აკადემიის თითოეული იუნკერი უზრუნველყოფილია პირადი ნოუთბუქით, სასწავლო მასალებით, ჯანმრთელობის დაზღვევით, სამხედრო-სპორტული ფორმითა და კვებით. აშშ, დიდი ბრიტანეთი, გერმანია, საფრანგეთი, თურქეთი, ჩეხეთი, პოლონეთი, ესტონეთი, ლატვია და ლიტვა _ ეს იმ ქვეყნების ჩამონათვალია, რომელთა წამყვანი უმაღლესი სამხედრო სასწავლებლების კარი ეროვნული თავდაცვის აკადემიის იუნკრებისთვის ღიაა.

საქართველოში პირველი უმაღლესი სამხედრო სასწავლებელი მუდმივად მზად არის ახალი გამოწვევებისთვის. ჯერ კიდევ 2010 წელს აკადემიაში რეფორმების ახალი ეტაპი დაიწყო, რომელმაც ოფიცერთა განათლების მთელი სისტემა მოიცვა. 2010 წლის 8 დეკემბერს აკადემიამ, თავდაცვის სამინისტროს გადაწყვეტილებით, საჯარო სამართლის იურიდიული პირის სტატუსი მოიპოვა და „სსიპ _ დავით აღმაშენებლის სახელობის საქართველოს ეროვნული თავდაცვის აკადემია“ ეწოდა. დღეს დავით აღმაშენებლის სახელობის საქართველოს ეროვნული თავდაცვის აკადემია ერთადერთი უმაღლესი სამხედრო სასწავლებელია საქართველოში, რომელიც თანამედროვე მეთოდებით, თეორიული და პრაქტიკული ცოდნით აღჭურვილი, კონკურენტუნარიანი ოფიცრების მომზადებას უზრუნველყოფს. საკუთარი ცხოვრების წესითა და წარმატებული საქმიანობით მაღალგანვითარებული, სამართლებრივი, დემოკრატიული, ზნეობრივი შეგნების მქონე ოფიცერთა კორპუსის ჩამოყალიბება აკადემიის ძირითადი პრიორიტეტია. ეროვნული თავდაცვის აკადემიის აკადემიური და სამხედრო სკოლების ინტეგრირებული პროგრამები, კვალიფიციური აკადემიური და ადმინისტრაციული პერსონალი, სამხედრო ინსტრუქტორები, მაღალი სტანდარტების ინფრასტრუქტურა, სწავლების თანამედროვე მეთოდები და ტექნოლოგიები სამხედრო და სამოქალაქო განათლების მიღების მყარ წინაპირობას ქმნის.

ეროვნული თავდაცვის აკადემიის საბაკალავრო სკოლაში მიიღებიან 24 წლამდე აბიტურიენტები, რომლებიც წარმატებით გაივლიან აკადემიის შიდა ტურებს (ფიზიკური მომზადების ტესტი, სამედიცინო შემოწმება და გასაუბრება) და ერთიან ეროვნულ გამოცდებს (ქართული ენა, ზოგადი უნარები, უცხო ენა და მათემატიკა). მნიშვნელოვანია აბიტურიენტთა რეიტინგული სია, რადგან ეროვნული თავდაცვის აკადემიის ყველა იუნკერი უმაღლეს განათლებას თავდაცვის სამინისტროს დაფინანსებით იღებს, შესაბამისად, მაღალი კონკურენციის ფონზე, აკადემიაში მხოლოდ საუკეთესო შედეგების მქონდე აბიტურიენტები ხვდებიან.

კეთილმოწყობილ და თანამედროვე სტანდარტებით აგებულ ბაზაზე განთავსებულ აკადემიაში ყველა პირობაა შექმნილი სწავლის, დასვენების, ფიზიკური წრთობისა და განვითარებისთვის. აქ ფუნქციონირებს სხვადასხვა სპორტული სექცია და თვითშემოქმედების წრე. იუნკრებს საშუალება აქვთ, აქტიურად ჩაერთონ ადგილობრივ და საერთაშორისო აქტივობებში, თანამედროვე ინფრასტრუქტურა კი საუკეთესო განათლების მიღების შესაძლებლობას იძლევა. აკადემიაში ფუნქციონირებს კომპიუტერული ტექნიკით აღჭურვილი სამხედრო, აკადემიური და საკითხავი ლიტერატურით (20 000-ზე მეტი წიგნი ქართულ, ინგლისურ, გერმანულ და ფრანგულ ენებზე) მდიდარი ბიბლიოთეკა, საკონფერენციო დარბაზი, საგამოცდო ცენტრი, კალათბურთის, ჭიდაობის, ხელბურთისა და ტრენაჟორების დარბაზები თავისუფალი დროის სასიამოვნოდ გატარების საშუალებას იძლევა.

05:50 წუთზე აკადემიის სპორტულ ფორმაში გამოწყობილი ყველა იუნკერი დილის გამამხნევებელი ვარჯიშისთვის ემზადება…

08:40 წუთზე იუნკერს უკვე გავლილი აქვს რამდენიმე პროცედურა და ლექციებზე შედის. სადილი, თვითმომზადება, ფიზიკური მომზადება, პირადი საჭიროებისთვის განკუთვნილი დრო, ვახშამი, ტელეფონზე სასაუბრო დრო _ გარიჟრაჟიდან დღის ბოლომდე, ერთმანეთის მონაცვლეობით იუნკერთა დღის რეჟიმს ზედმიწევნით განსაზღვრავს. იციან, რომ წინ დიდი და მრავალფეროვანი დღეა… უამრავი საინტერესო აქტივობით გაჯერებული დღის რეჟიმი იუნკერთა ცხოვრებას საინტერესოს და მიმზიდველს ხდის.

იუნკრებისთვის სასწავლო კვირა პარასკევს სრულდება. შაბათ-კვირას ოჯახებს უბრუნდებიან. მათთვის კი, ვინც მაღალმთიანი რეგიონიდან არის და შაბათ-კვირას სახლში დაბრუნებას ვერ ახერხებს, დასვენების დღეების გატარება აკადემიაშიც საინტერესოდ შეიძლება. ბიბლიოთეკა, სპორტული კომპლექსი, ბილიარდი, მაგიდის ჩოგბურთი და მრავალი საინტერესო გასართობ-შემეცნებითი სივრცე; ლაზარეთი, დალაქი, მეწაღე და სრულფასოვანი ცხოვრებისთვის საჭირო ყველა პუნქტი ეროვნული თავდაცვის აკადემიის სტუდენტურ ქალაქში იუნკრების განკარგულებაშია.

ვახშმის შემდეგ ჩვენი ვიზიტიც სრულდება… ჩვეულ რიტმსა და რეჟიმში 441 იუნკერი, მათ შორის 12 გოგონა, აკადემიის კამპუსში მრავალფეროვან სტუდენტურ ცხოვრებას განაგრძობს.

რა ინტერესი აქვს ნატოს საქართველოს მიმართ?

ხშირად დასმული კითხვები

ნატოს წევრი ქვეყნების, ისევე როგორც სხვა ევროპული ქვეყნების, მიზანია ერთიანი, თავისუფალი და მშვიდობიანი ევროპის იდეის ხორცშესხმა. ამ იდეის განხორციელებისთვის კი აუცილებელია, რომ ყველა ევროპული ქვეყანა იყოს სტაბილური და მშვიდობიანი. შესაბამისად, ნატო დაინტერესებულია განვითარებული და დემოკრატიული საქართველოს ჩამოყალიბებით, რაც საბოლოოდ უზრუნველყოფს სამხრეთ კავკასიის რეგიონის უსაფრთხოების განმტკიცებას.

ნატო დაინტერესებულია შავი ზღვის რეგიონის უსაფრთხოების უზრუნველყოფით, რომლის წევრ სახელმწიფოებს შორისაც არის საქართველო.

ნატოსთვის მნიშვნელოვანია საქართველო მისი სტრატეგიული გეოგრაფიული მდებარეობიდან და ხელსაყრელი სატრანზიტო პოტენციალიდან გამომდინარე. შესაბამისად, ალიანსის ინტერესებში შედის რეგიონში საქართველოს სახით ძლიერი და სანდო მეგობარი ქვეყნის არსებობა.

თავის მხრივ, საქართველო ყველაფერს აკეთებს, რომ შავი ზღვის უსაფრთხოების არქიტექტურის სრულფასოვანი წევრი გახდეს, რაც კიდევ უფრო გაზრდის ქვეყნის უსაფრთხოებასა და მშვიდობიანი განვითარების შანსს.

საქართველოს ყველა ინსტრუმენტი აქვს წევრობისთვის მოსამზადებლად

საქართველოს დღეს გაცილებით მეტი ინსტრუმენტი აქვს. 2015 წლის დეკემბრის მინისტერიალის შემდეგ საქართველო გაცილებით უფრო მაღალ სტატუსშია, ვიდრე რამდენიმე წლის წინ, როცა მაპი ჩვენი მთავარი ამოცანა იყო. საქართველო ერთადერთი ქვეყანაა, რომელსაც ნატომ ერთი თვის წინ უთხრა, რომ მას აქვს ყველა ინსტრუმენტი წევრობისთვის მოსამზადებლად. ასეთი განცხადება არც ერთ ქვეყანასთან მიმართებაში არ გაკეთებულა. ჩვენი მთავარი ამოცანა ვარშავის სამიტზე არის ის, რომ ვარშავიდან ჩვენი თავდაცვისუნარიანობის სისტემა ინსტრუმენტულ დონეზე გაცილებით უფრო ძლიერი გამოვიდეს, ვიდრე იყო მანამდე. უფრო უკეთესად იყოს ჩვენი ქვეყანა დაცული, ვიდრე მანამდე, განაცხადა საქართველოს თავდაცვის მინისტრმა.

sakartvelos yvela instrumenti akvs wevrobistvis mosamzadeblad — თინათინ ხიდაშელი

თინათინ ხიდაშელმა ასევე აღნიშნა, რომ ბოლო ერთი წლის განმავლობაში ნატო-საქართველოს ურთიერთობები ინტენსიურ ფაზაში შევიდა. ამ ურთიერთობის ნათელ მაგალითად მინისტრმა გასული წლის აგვისტოში ნატო-საქართველოს წვრთნისა და შეფასების ერთობლივი ცენტრის (JTEC ) ინაუგურაცია დაასახელა. თინათინ ხიდაშელი: ნატოში ყველა თანხმდება, რომ მონტენეგროს შემდეგი გაჩერება არის საქართველო. დღეს ნატოში ყველა თანხმდება, რომ მონტენეგროს შემდეგ ალიანსში წევრობაზე მიწვევა საქართველოს გაეგზავნება – განაცხადა თავდაცვის მინისტრმა. თინათინ ხიდაშელმა ლატვიის თავდაცვის მინისტრის აშკარა მხარდაჭერა და ჯეიმს აპატურაის ბოლო განცხადებებიც გაიხსენა: ,,დღეს, აბსოლუტურად ყველა შეთანხმებულია ნატოში, რომ მონტენეგროს შემდეგი გაჩერება არის საქართველო, როგორც ეს ლატვიის თავდაცვის მინისტრმა ძალიან მოსწრებულად თქვა. იგივე განაცხადა ლიტვის საგარეო საქმეთა მინისტრმა იმ მინისტერიალის შემდეგ. ჯეიმს აპატურაისაც ძალიან საინტერესო ინტერვიუ ჰქონდა, სადაც მან თქვა, რომ საქართველო გახდება ნატოს წევრი, ეს გარდაუვალია და ეს, აუცილებლად მოხდება’’, – აღნიშნა თინათინ ხიდაშელმა ნატო-საქართველოს ურთიერთობების თემაზე საუბრისას.

საქართველო შავი ზღვის უსაფრთხოების არქიტექტურის სრულფასოვანი წევრი უნდა გახდეს

მეტი ნატო საქართველოში და მეტი საქართველო ნატოში!

ნატო-საქართველოს თანამშრომლობის შესახებ ნატოს წევრი სახელმწიფოებისა და ევროპის მზარდი ინტერესი ბუნებრივად ზრდის საქართველოში განვითარებული მოვლენებით უცხოელი ჟურნალისტების დაინტერესებას.

ნატო-საქართველოს არსებითი პაკეტი (SNGP) ალიანსში გაწევრიანების გზაზე უმნიშვნელოვანეს ღონისძიებებს მოიცავს. არსებითი პაკეტი საქართველოს 2014 წელს, ნატოს უელსის სამიტზე მიენიჭა. ნატოს არხის კორესპონდენტის, ჯეიკ ტაპმანის საქართველოში ვიზიტის მიზანიც, სწორედ SNGP-ის განხორციელების პროცესის გაშუქება იყო.

გადაღებები ბათუმის პორტით დაიწყო, სადაც 12-15 თებერვალს ნატოს მუდმივმოქმედი მეორე ნაღმსაწინააღმდეგო შენაერთის (SNMCMG2) ოთხმა ხომალდმა ერთობლივი სწავლება საქართველოს შინაგან საქმეთა სამინისტროს სასაზღვრო პოლიციის სანაპირო დაცვის სამ ხომალდთან ერთად გამართა. ქართული და ალიანსის სხვადასხვა წევრი ქვეყნის დროშის ქვეშ მცურავი ხომალდების წვრთნა ნატოს ტაქტიკური სახელმძღვანელოს გამოყენებით ერთობლივ საზღვაო მანევრებს მოიცავდა.

არსებითი პაკეტის ფარგლებში ერთობლივი წვრთნის დაწყებამდე, ბათუმს ნატოს გაერთიანებული საზღვაო ძალების სარდლობის შტაბის უფროსი ეწვია. კონტრ-ადმირალი ჯორჯო ლაციო შინაგან საქმეთა მინისტრ გიორგი მღებრიშვილს, საქართველოს შეიარაღებული ძალების გენერალური შტაბის უფროსს, გენერალ-მაიორ ვახტანგ კაპანაძესა და თავდაცვის მინისტრის მოადგილე დავით ებრალიძეს შეხვდა.

`ბოლო პერიოდში განვითარებული მოვლენებიდან და გამოწვევებიდან გამომდინარე, შავი ზღვის უსაფრთხოება სულ უფრო აქტუალური ხდება და ამ საკითხის გადაჭრაში საქართველოს შეუძლია, საკმაოდ მნიშვნელოვანი როლი ითამაშოს’’, _ განაცხადა გენერალ-მაიორმა ვახტანგ კაპანაძემ.

მეტი ნატო საქართველოში – გრძელდება. შესაბამისად, ეს აისახება ბათუმის პორტში სამხედრო გემების შემოსვლაზეც. ,,მსგავსი ღონისძიებები ძალზე მნიშვნელოვანია. ასეთი ღონისძიებები გაგრძელდება და გაიზრდება ნატოს გემების რიცხვი ჩვენს პორტებში’’, _ აღნიშნა დავით ებრალიძემ.

ნატოს გაერთიანებული საზღვაო ძალების სარდლობის შტაბის უფროსმა კონტრ-ადმირალმა ჯორჯო ლაციომ ქართულ მხარეს ნატო-საქართველოს 24-წლიანი თანამშრომლობისა და სოლიდარობისათვის მადლობა გადაუხადა.

ნატოს არხის კორესპონდენტის მიერ ასევე გაშუქდა არსებითი პაკეტის მნიშვნელოვანი მიმართულებები, როგორიცაა ნატო-საქართველოს წვრთნისა და შეფასების ერთობლივი ცენტრი, თავდაცვის ინსტიტუციური აღმშენებლობის სკოლა, ლოგისტიკური შესაძლებლობები, კიბერუსაფრთხოება.

უცხოელი ჟურნალისტი წვრთნისა და შეფასების ერთობლივი ცენტრის ფარგლებში მიმდინარე სიმულაციური სწავლებებით განსაკუთრებით დაინტერესდა.

არსებითი პაკეტის განხორციელების კუთხით განცდილ პროგრესზე საქართველოს შეიარაღებული ძალების გენერალური შტაბის უფროსის მოადგილემ, პოლკოვნიკმა ომარ ბეგოიძემ, თავდაცვის მინისტრის მრჩეველმა შოთა ღვინერიამ და ასევე არსებითი პაკეტის ძირითადი ჯგუფის უფროსის მოადგილე იაშ ჰოლბრუკმა ისაუბრეს.

უცხოელმა ჟურნალისტმა საქართველოში ვიზიტის ფარგლებში, გორში ეროვნული თავდაცვის აკადემიის ცოდნის კვირეულზე მყოფ საქართველოს თავდაცვის მინისტრთან ინტერვიუ ჩაწერა. თინათინ ხიდაშელმა ვრცლად ისაუბრა ნატო-საქართველოს თანამშრომლობაზე, რეგიონში არსებულ უსაფრთხოების გამოწვევებზე, ჰიბრიდული ომის მნიშვნელობასა და საქართველოს ალიანსში გაწევრიანების პროცესზე.

ჯეიკ ტაპმანი საქართველოში მესამედ ჩამოვიდა. შარშან ზაფხულში მან სიუჟეტი სამხედრო სწავლება „Agile Spirit 2015-ის შესახებ მოამზადა, რომელიც ნატო-საქართველოს თანამშრომლობის ფარგლებში ჩატარდა. ასევე იმყოფებოდა ე.წ. სამხრეთ ოსეთის ადმინისტრაციულ საზღვართან, სოფელ ხურვალეთში, სადაც დღემდე რუსეთის ფედერაციის მხრიდან „მცოცავი ოკუპაცია“ ხორციელდება. ზოგადად, მისი ინტერესის სფერო აღმოსავლეთ ევროპის ქვეყნები, მათი მოსახლეობა და მოსახლეობაში არსებული განწყობებია.

ჯეიკ ტაპმანის ამჟამინდელი ვიზიტის დაგეგმვისა და გადაღებების ლოკაციების შერჩევის პროცესში აქტიურად ჩაერთნენ საქართველოს თავდაცვის სამინისტროს სტრატეგიული კომუნიკაციების დეპარტამენტი და თავდაცვის სამინისტროს ბრიტანელი მრჩეველი. ვიზიტის დასასრულს ჯეიკ ტაპმანმა აღნიშნა, რომ საქართველო საინტერესო ქვეყანაა ალიანსისთვის და ის ნატოს გეგმების ნაწილია. რეპორტიორის განცხადებით, ყველა ღონისძიება, რომლის გადაღებაც მოახერხა, მეტყველებს, რომ მეტი ნატო საქართველოში _ ფაქტია.

ჯეიკ ტაპმანს მომზადებული აქვს რეპორტაჟები მსოფლიოს ცხელი წერტილებიდან. 2012-2014 წლებში იმყოფებოდა ავღანეთში და ნატოს ტელევიზიისთვის იღებდა ვიდეომასალებს პოლიტიკურ და სამხედრო თემებზე.

ამჟამად საქართველოში მისი ვიზიტის მიზანია, აჩვენოს უცხოურ აუდიტორიას, თუ რას გულისხმობს ნატო-საქართველოს არსებითი პაკეტი და რა სარგებლობა მოაქვს მას საქართველოსთვის. მის მიერ გადაღებული რეპორტაჟი ნატოს ოფიციალურ გვერდზე განთავსდება და, პარალელურად, სხვადასხვა საერთშორისო მედიასაშუალებებს, მათ შორის BBC-ისა და CNN-ს დაეგზავნებათ.

როგორც თინათინ ხიდაშელმა აღნიშნა, რამდენიმე წლის წინ შავ ზღვას, როგორც სტრატეგიულ ზღვას არასერიოზულად უყურებდნენ. დღეს, კი ვითარება შეიცვალა.

,,თუკი, რამდენიმე წლის წინ არასერიოზულად უყურებდნენ შავ ზღვას, როგორც სტრატეგიულ ზღვას, დღეს იმავე ტონალობით, მნიშვნელობით, ხარისხით საუბრობენ შავ ზღვაზე, როგორც, მაგალითად, ბალტიის ზღვაზე… ან ხმელთაშუა ზღვაზე… შესაბამისად, შავი ზღვის უსაფრთხოების კონცეფცია, რომელზეც დღეს ნატოში მიმდინარეობს შეთანხმება, ჩვენი ამოცანაა, ამ კონცეფციის, შეთანხმების, უსაფრთხოების არქიტექტურის სრულფასოვანი წევრი გახდეს საქართველო. არა პარტნიორი, არამედ სრულფასოვანი მონაწილე’’, – აღნიშნა თინათინ ხიდაშელმა

მომზადებულია საქართველოს თავდაცვის სამინისტროს სტრატეგიული
კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

თევზაობა აჭარისწყალზე – რა უნდა ვიცოდეთ

რა აკრძალვები მოქმედებს მდინარე აჭარისწყალზე თევზაობისას, როდის ჯარიმდებიან და რა უნდა გაითვალისწინონ მეთევზეებმა? „ბათუმელები“ ამ თემაზე გარემოსა და ბუნებრივი რესურსების დაცვის სამინისტროს გარემოსდაცვითი დეპარტამენტის ბიომრავალფეროვნების კონტროლის სამსახურის უფროსს, მაია ჩხობაძეს ესაუბრა.

ქალბატონო მაია, რა შეზღუდვა მოქმედებს მდინარე აჭარის წყალზე თევზაობისას?

აჭარისწყალი საორაგულე და საზუთხე მდინერეების ჩამონათვალში შედის. ამ ტიპის მდინარეებზე კი საქართველოს მთავრობის მიერ დადგენილი „თევზჭერისა და თევზის მარაგის დაცვის ტექნიკური რეგლამენტი“ მოქმედებს, სადაც განსაზღვრულია თევზჭერის წესები, რა უნდა გაითვალისწინონ თევზის ჭერის დროს, როდისაა დაშვებული თევზჭერა, სად და ა.შ. ამ რეგლამენტის მიხედვით, ქვეყნის მთელ ტერიტორიაზე არსებულ საორაგულე და საზუთხე მდინარეებში, წლის ნებისმიერ დროს, აკრძალულია სარეწაო მიზნით თევზჭერა, მხოლოდ სამოყვარულო და სპორტული თევზჭერაა დაშვებული.

რას ნიშნავს საორაგულე და საზუთხე მდინარეები და რას გულისხმობს სამოყვარულო და სპორტული თევზჭერა?

საორაგულე და საზუთხე ის მდინარეა, რომელიც შავ ზღვას უერთდება, ამ სახის მდინარე ბევრი გვაქვს, მათ შორისაა მდინარე აჭარის წყალიც თავისი შენაკადებითა და განშტოებებით. ამ ტიპის მდინარეებში დაშვებულია მხოლოდ სპორტული და სამოყვარულო თევზჭერა, სამოყვარულო და სპორტული თევზჭერა ხორციელდება ანკესით, სპირინგით ხორხი-ბადით, ჩოგან-ბადითა და სასროლი ბადით. მნიშვნელოვანია და გასათვალისწინებელია ისიც, რომ რეგლამენტით განსაზღვრულია აღნიშნული ბადე-იაღარების პარამეტრები.

მაგალითად, შიდა წყლებზე თვით სატყუარათი ექვსზე მეტი და სატყუარათი სამზე მეტი ნემსკავის გამოყენება აკრძალულია, მდინარე აჭარისწყალზე და ყველა მის შესართავთან 300 მეტრის მანძილზე დაშვებულია #8 ნემსკავის გამოყენება, ასევე ჩოგან-ბადე და ხოლხი ბადის გამოყენება არ შეიძლება თუ მისი დიამეტრი – სიგრძე ან სიგანე 1,2 მეტრს აღემატება და ბადის თვლების ზომა 20 მილიმეტრზე ნაკლებია; დაუშვებელია სასროლი ბადის გამოყენება, თუ მისი დიამეტრი 4,5 მეტრზე მეტია და თვლის ზომა 20 მილიმეტრზე ნაკლებია. არ შეიძლება ერთმა მოყვარულმა მეთევზემ თევზაობისას ერთდროულად ერთზე მეტი სათევზაო იარაღი გამოიყენოს.

ამ პარამეტრების დარღვევის შემთხვევაში რა საჯარიმო სანქცია ტარდება?

„თევზჭერისა და თევზის მარაგის დაცვის ტექნიკური რეგლამენტის“ დარღვევა ადმინისტრაციულ პასუხისმგებლობას ითვალისწინებს, საჯარიმო სანქციებთან ერთად დგება გარემოზე მიყენებული ზიანის საკითხი. იმ შემთხვევაში, თუ უკანონოდ მოპოვებული თევზჭერით გამოწვეული ზიანი 2000 ლარს აღემატება, სისხლის სამართლის პასუხისმგებლობის საკითხი დგება. სისხლის სამართლის საკითხი იმ შემთხვევაშიც დგება, თუ ადამიანი ელექტროშოკური აპარატით აკრძალულ დროსა და აკრძალულ ადგილზე თევზაობს. მაქსიმალურად უნდა შეიკავოს მოსახლეობამ თავი თევზჭერის წესების დარღვევისგან. თუ ვინმე შეამჩნევს სამართალდარღვევის ფაქტს, ვთხოვთ გვაცნობონ დეპარტამენტის ცხელი ხაზის ნომერზე – 153. ზარი ყველა მობილური ოპერატორისთვის უფასოა.

ვინ ამოწმებს რამდენად კანონიერად ხდება მდინარეებზე თევზის მოპოვება?

გარემოს დაცვის ზედამხედველობის დეპარტამენტი. მას ჰყავს ტერიტორიული ორგანოები და აკონტროლებენ ქვეყნის მთელ ტერიტორიას.

კონტროლი ხორციელდება რისკების შეფასებითაც, სად რა ცხელი წერტილები გვაქვს. თუ არის ფაქტები დაფიქსირებული, მაგალითად, კონკრეტულ მდინარეზე, შესართავთან ან კონკრეტულ ადგილზე, დეპარტამენტის მობილური ჯგუფები პატრულირებენ. შეიძლება დეპარტამენტში შემოვიდეს შეტყობინება, როგორც წერილობით, ასევე სატელეფონო. ნებისმიერი შეტყობინება, მათ შორის სოციალური ქსელით გავრცელებული ინფორმაცია მოწმდება. უდიდესი მნიშვნელობა ენიჭება მოსახლეობის ჩართულობას, დროულად რომ მოგვაწოდონ ინფორმაცია.

სად არის ცხელი წერტილები მთიან აჭარაში მდინარე აჭარის წყალზე?

ცხელი წერტილი ცვალებადია, შესაბამისად, კონკრეტული ადგილის თქმა შეუძლებელია. ცხელი წერტილი შესაძლოა იყოს ზღვასთან საორაგულე ან საზუთხე რომელიმე მდინარის შესართავი, ან მდინარის რომელიმე ადგილი, სადაც უკანონო თევზაობის რამდენიმე ფაქტია გამოვლენილი.

სოფლის პატარა მდინარეებზე ვრცელდება თუ არა „თევზჭერისა და თევზის მარაგის დაცვის ტექნიკური რეგლამენტით“ გათვალისწინებული მოთხოვნები?

რა თქმა უნდა, შიდა წყალსატევებში თევზჭერაზე დადგენილია კონკრეტული მოთხოვნები არამხოლოდ წყლის ობიექტის, არამედ ამ მდინარეებში არსებული თევზების დაცვის მიზნითაც. როგორც აღვნიშნე, ერთ-ერთი ასეთი მოთხოვნაა საქართველოს საორაგულე და საზუთხე მდინარეები, ორაგულისებრნი და ზუთხისებრნი დაცულნი არიან არა მხოლოდ საქართველოს წითელი ნუსხით, არამედ არაერთი საერთაშორისო კონვენციით. რაც შეეხება სხვა მდინარეებს, შიდა წყალსატევებში აკრძალვები იმის მიხედვით შემოდის, თუ რა ტიპის თევზია გავრცელებული და როდის არის მისი ქვირითობა. მაგალითად, მტკვარში და მდინარეთა დიდ ნაწილში პირველი მაისიდან 31 აგვისტოს ჩათვლით აკრძალულია თევზჭერა, ფარავანში – 15 ნოემბრიდან 31 დეკემბრის ჩათვლით და ა.შ.

რას ურჩევდით მოყვარულ მეთევზეებს?

მაქსიმალურად დაიცვან თევზჭერის წესები, ეს არ არის რთული. წესების დაცვით თუ ითევზავებენ, არ შემცირდება თევზის მარაგი. გარემოსდაცვითი დეპარტამენტის მიზანი მხოლოდ დაჯარიმება არ არის, ჩვენი მიზანია მოსახლეობას ინფორმირება, გავატაროთ პრევენციული ღონისძიებები, რომ არ დაფიქსირდეს სამართალდარღვევის ფაქტი.

12576098_946190358810004_984736336_n — მდინარე აჭარისწყალი / ეკა ბარამიძის ფოტო

“ტელეარხ 25”-ის ვებგვერდი გატეხეს

„ეგ საიტი იმიტომ გავტეხეთ, რომ თქვენ გაიგოთ ამ საიტზე არის დაშვებული შეცდომა, მაგრამ ასეთ საიტს ჯერ ბევრს გავტეხავთ. მალე ყველა გაიგებს ჩვენს შესაძლებლობებს. by elmar & h1d3“ – ეს ტექსტი ჯერ კიდევ დევს „ტელეარხ 25“-ის ვებგვერდზე. არხის მფლობელი და გენერალური დირექტორი გია სურმანიძე ამბობს, რომ დღეს არხის ვებგვერდზე ჰაკერული თავდასხმა მოხდა.

გია სურმანიძე: „დილით რომ მოვედით სამსახურში, დაგვხდა გატეხილი საიტი. იყო რაღაც მოწოდებები… და რამდენიმე დღის მასალა საერთოდ მოშლილია, ფაქტობრივად, განადგურებულია არქივი. ეტყობა სპეციალისტი იყო ყველაფერში გარკვეული და ისე გაანადგურა, რომ რაც არის წაშლილი, იმის აღდგენა არა მგონია მოხერხდეს. კი მუშაობენ რაღაც სპეციალისტებს ვთხოვეთ, მაგრამ…

განვაცხადეთ პოლიციაში, მივმართეთ შს-სამინისტროს დაიწყოს გამოძიება, ჩვენება მივეცით.

ერთადერთი ვფიქრობთ, რომ რაც გუშინ მოხდა, იმისი გაგრძელებაა. ასეთი დამთხვევები არ ხდება და რა ვიცი… იმედია, სამართალდამცავები გამოიძიებენ ამ ფაქტს. დაველოდებით ორ-სამ დღეს და ორშაბათ-სამშაბათიდან ისევ მივმართავთ სამართალდამცავებს, თუ რა დაადგინეს“.

შს სამინისტროს პრესცენტრის ინფორმაციით, ფაქტზე გამოძიება ჯერ არ დაწყებულა, რადგან შესაბამისი შეტყობინება ცენტრალური კრიმინალური პოლიციის დეპარტამენტში აჭარის პოლიციის დეპარტამენტიდან ჯერჯერობით შესული არ არის.

გუშინ, 26 თებერვალს, „ტელეარხ 25“-ის შენობაში კრიმინალისტები ბომბსაც ეძებდნენ.

„მადლიანი მაცივარი“ ბათუმში პირველი მარტიდან დაიდგმება

პირველი მარტიდან ბათუმში მოქალაქეებს ე.წ. მადლიანი მაცივრით [„სოციალური მაცივარი”] სარგებლობის საშუალება ექნებათ. მაცივარი ფარნავაზ მეფის 138-ში, ერთ-ერთი მაღაზიის წინ განთავსდება.

„მოლოდინი მაქვს, რომ მოქალაქეების სოციალური პასუხისმგებლობა გაიზრდება და მარტო აქ კი არ დატოვებენ საკვებს, არამედ სხვა მისამართებზეც გაჩნდება სოციალური მაცივარი. “ – ამბობს ბათუმში სოციალური მაცივრის დადგმის ინიციატორი ნინო ბიაძე, კერძო სტუდია „მონ პარნასის“ მენეჯერი. მასთან ერთად სოციალური დანიშნულების მაცივრებისთვის თამარ ტუღუში მუშაობს, მოძრაობის „მადლიანი – დააპურე საქართველოს“ წევრი: „მაცივარი უკვე ვიშოვეთ. ის ერთ-ერთმა ბიზნესმენმა გადმოგვცა, ვისაც ვინაობის გამხელა არ სურს. ვესაუბრები სხვა მაღაზიების მფლობელებსაც, რომ მოაწყონ მადლიანი კუთხე და ვიდრე საკვებ პროდუქტს ვარგისანობის გასვლამდე სამი დღე დარჩება, ამ კუთხეში განათავსონ“.

მაცივრის ელექტროენერგიის ხარჯების დაფარვას მოქალაქე ნინო ბიაძე აპირებს: „მაღაზიას, სადაც მაცივარი განთავსდება, აქვს ვიდეო თვალი. მაცივარს მეთვალყურეობას გაუწევენ მაღაზიის თანამშრომლებიც. საკმაოდ გაგვიჭირდა მაღაზიის შერჩევაც, ზოგმა მფლობელმა აარიდა თავი მაცივრის განთავსებას. პირველ დღეს მაცივარში საკვებ პროდუქტს სტუდია „მონ პარნასი“ დატოვებს“.

ნინოს ინიაციატივით თავდაპირველად სოციალური ქსელით დავით გაჩეჩილაძისთვის მიუწერია, რომელიც სახალო მოძრაობის „მადლიანი – დააპურე საქართველოს“ ხელმძღვანელია. ორგანიზაცია თავის ფეისბუქ გვერდზე ხელმოწერებს აგროვებს პეტიციისთვის, რომელიც პარლამენტში უნდა შევიდეს.

„მოვითხოვთ, რომ სუპერმარკეტებს აეკრძალოთ საკვები პროდუქტის გადაყრა და გამარტივდეს მისი ჩამოწერის მექანიზმები. საკვებს, რომლის ვარგისიანობის ვადა ერთი წელია, ჩამოიწეროს 10 დღით ადრე. სხვა პროდუქტებზეც პროპორციული მიდგომა დაწესდეს და ეს საკვები მაღაზიებმა ე.წ. მადლიან კუთხეში განათასონ. პეტიციის მიხედვით, სურსათის თითოეულმა მაღაზიამ საკუთარი ფართობის ერთი პროცენტი „მადლიან კუთხეს“ უნდა დაუთმოს. ხელმოწერები ფეისბუქში უკვე მიმდინარეობს“ – უთხრა „ბათუმელებს“ დავით გაჩეჩილაძემ.

პეტიციისთვის სულ 10 ათასი ხელმოწერაა საჭირო. დავით გაჩეჩილაძის ინფორმაციით, პეტიციას ამ დროისთვის ხელს 3 ათასზე მეტი ადამიანი აწერს. ორგანიზაციამ „მადლიანი – დააპურე საქართველო“ ასევე წამოიწყო სოციალური აქცია, რომლის ფარგლებშიც მოქალაქეებს მოუწოდებენ, დატოვონ ერთი ულუფა საჭმელი რომელიმე მაღაზიაში და თხოვონ მის მფლობელს, ის „მადლიან კუთხეში“ განათავსოს. „აქციის მიზანია: აღარავინ გარდაიცვალოს საქართველოში შიმშილით“ – აცხადებენ ორგანიზატორები.

„შემოსავლების სამსახურის“ პასუხი მუსლიმი სასულიერო პირის სავარაუდო დისკრიმინაციაზე

ჭელას მეჩეთის წინამძღვრის, ჯამბულ აბულაძის სავარაუდო დისკრიმინაციის შესახებ შემოსავლების სამსახურმა „ბათუმელებს“ წერილობით აცნობა. უწყებას “ბათუმელები” სარფის საბაჟოს ვიდეოჩანაწერს სთხოვდა, სადაც ასახული იქნებოდა ჯამბულ აბულაძის მიერ საზღვრის გადაკვეთა. შემოსავლების სამსახურმა ვიდეოჩანაწერის მოწოდებაზე უარი იმ მიზეზით თქვა, რომ რედაქციას ჯამბულ აბულაძის წერილობითი თანხმობა არ წარუდგენია.

ამავე წერილში შემოსავლების სამსახური აღნიშნავს: „ამასთან, საგულისხმოა, რომ თქვენ მიერ მოთხოვნილი ვიდეოჩანაწერები შესაძლოა შეიცავდეს სხვა პირების შესახებ ინფორმაციას“ . უწყების დასაბუთებით, ვიდეოჩანაწერი განეკუთვნება პერსონალურ მონაცემთა კატეგორიას და შესაბამისად, წარმოადგენს საიდუმლო ინფორმაციას. „გამომდინარე აქედან, მოკლებული ვართ შესაძლებლობას, გადმოგცეთ აღნიშნული ვიდეოჩანაწერები“.

მუსლიმი სასულიერო პირი ჯამბულ აბულაძე „ბათუმელებს“ მოუყვა, რომ სარფის საბაჟოზე 2 ყურანისა და 4 ლოცვანის შემოტანის გამო შეუქმნეს პრობლემა: არაფორმალური დაკითხვა მოუწყვეს, საათობით ალოდინეს და არც აუხსნეს, რა სურდათ მისგან.

რელიგიური ლიტერატურის ქვეყანაში შემოტანასთან დაკავშირებით, შემოსავლების სამსახური განმარტავს: „საქართველოს საგადასახადო კანონმდებლობა, რელიგიური შინაარსის ლიტერატურის შემოტანას განსხვავებული წესით არ არეგულირებს“.

„ბათუმელების“ კიდევ ერთ კითხვაზე, რა შემთხვევაში ერთვებიან შსს-ს წარმომადგენლები საბაჟო კონტროლის განხორციელების პროცესში, შემოსავლების სამსახური გვწერს: „სსიპ – შემოსავლების სამსახურის საბაჟო დეპარტამენტისა და საქართველოს შინაგან საქმეთა სამინისტროს შესაბამის ორგანოთა ურთიერთთანაშრომლობა შესაძლებელია განხორციელდეს სამართალდარღვევის გამოვლენისას/გამოსავლენად, დანაშაულის ნიშნების აღმოჩენისას ან/და სხვა ადმინისტრაციული ურთიერთდახმარებისას, სახელმწიფო ორგანოთა ურთიერთდახმარების პრინციპისა და საქართველოს კანონმდებლობის გათვალისწინებით“.

მუსლიმი სასულიერო პირების სავარაუდო დისკრიმინაცია სარფის საბაჟოზე

„საქართველოში თუ მუსლიმანი ხარ, ესე იგი, არაფერს ნიშნავ“, – ეს განცდა სოფელ ჭელას მეჩეთის წინამძღვარს – ჯამბულ აბულაძეს მას შემდეგ გაუჩნდა, როცა თურქეთიდან დაბრუნებულს სარფის საბაჟოზე 2 ყურანისა და 4 ლოცვანის შემოტანის გამო პრობლემები შეუქმნეს. ჯამბული ამბობს, რომ საბაჟოზე არაფორმალური დაკითხვა მოუწყვეს, შეურაცხყვეს და საათობით ლოდინით დაღლილს არც კი უთხრეს, რა უნდოდათ მისგან. პროტესტი სოციალურ ქსელში სასულიერო პირმა უპასუხოდ დარჩენილი კითხვების შემდეგ გამოხატა.

სოფელ ჭელას მეჩეთის წინამძღოლმა, ჯამბულ აბულაძემ, საქართველო-თურქეთის საზღვარი პირველ თებერვალს გადაკვეთა. ის თურქეთში მიდიოდა. სასულიერო პირი წერს, რომ როცა მის პასპორტს მებაჟემ დახედა, უთხრა, ვერ გაუშვებდა, ვიდრე მის პირად მონაცემებს არ გაარკვევდა. „რა თქმა უნდა, დავემორჩილე მებაჟის ამ მოთხოვნას და დაველოდე. ამასობაში დაახლოებით ასამდე მოქალაქე გაატარეს უპრობლემოდ. მე კი, როგორც დამნაშავე და გაურკვეველ ვითარებაში მყოფი, შეურაცხყოფილად ვიდექი და ველოდებოდი“, – ყვება ჯამბულ აბულაძე. ერთსაათიანი ლოდინის შემდეგ ჯამბულ აბულაძემ ოპერატორს ჰკითხა, როდის აპირებდნენ მის გაშვებას. ამ კითხვის საპასუხოდ „უფროსმა“ უთხრა: „თუ არ დაემორჩილებით წესებს, სიტუაცია დაიძაბება. თქვენი საქმე თბილისში იხილება და თუ საჭიროდ ჩათვლიან, მაშინ გაგიშვებენ, ისე – არაო“.

ჯამბულ აბულაძის შემთხვევა გამონაკლისი არ ყოფილა. „ადამიანის უფლებების სწავლების და მონიტორინგის ცენტრის“ მონაცემებით, სარფის საბაჟოზე ღირსების შემლახავ მოპყრობაზე კიდევ 5 მუსლიმანი პირი საუბრობს. „ამ პირების თქმით, საბაჟოზე ხდება ამ პირების არაფორმალური დაკითხვა და დისკრიმინაციული მოპყრობა არამხოლოდ რელიგიური შინაარსის ლიტერატურის შემოტანის გამო. იყო შემთხვევა, როცა მუსლიმი ქალი გააშიშვლეს. როგორც ეს ქალბატონი ყვება, გაურკვეველი იყო და არავის აუხსნია, რას უკავშირდებოდა ეს „შემოწმება“, რაც ძალიან შეურაცხმყოფელი და ტრავმატული იყო მისთვის“, – ამბობს თამთა მიქელაძე, „ადამიანის უფლებების სწავლების და მონიტორინგის ცენტრის“ ხელმძღვანელი. ეს ორგანიზაცია ამ ისტორიებს სწავლობს და არ გამორიცხავს, რომ დეტალური ანგარიშის გამოქვეყნების შემდეგ, „ანტიდისკრიმინაციული კანონის“ დარღვევის მოტივით სასამართლოს მიმართოს.

„დაგველოდეთ!“ – მებაჟის ეს მოთხოვნა თურქეთიდან საქართველოში დაბრუნებულ ჯამბულ აბულაძეს აღარ გაკვირვებია. ამბობს, რომ მებაჟეებთან ერთად ამჯერად პროცესში სხვა პირებიც ჩაერთნენ, რომლებმაც ვინაობა და სტატუსი არ დაასახელეს, მაგრამ უთხრეს, რომ „ზემოთ უნდა გაირკვეს“, რა მიზნით შემოჰქონდა მუსლიმ სასულიერო პირს 2 ცალი ყურანი და 4 ლოცვანი. „მებაჟემ [მელაძე] ასე ამიხსნა: ბატონო, ორი ვარიანტი გაქვთ, ან დავლუქავთ ამ წიგნებს თქვენს თვალწინ და როცა წარმოადგენთ მუფთისგან წერილობით მომართვას, მაშინ წაიღებთ, ან მეორე: ეს წიგნები უკან დააბრუნეთ, სადაც იყიდეთო“, – იხსენებს ჯამბულ აბულაძე. შეთავაზებაზე უარი უთქვამს, მაგრამ მაინც არ გამოუშვეს, „მაღლა რაღაცები უნდა გაირკვესო“.

ჯამბულ აბულაძემ რელიგიური ლიტერატურის საქართველოში შემოტანა მოახერხა.

ამ დამოკიდებულებას რადიკალიზაციის სერიოზულ საფრთხედ მიიჩნევს „ადამიანის უფლებების სწავლების და მონიტორინგის ცენტრის“ ხელმძღვანელი. „ეს არ შეიძლება დასაბუთდეს, როგორც უსაფრთხოების ლეგიტიმური ინტერესი. არ შეიძლება გონივრული დასაბუთების გარეშე დაკითხო ადამიანი და მას დისკრიმინაციულად მოექცე. მსგავსი დამოკიდებულება აძლიერებს ჩაგვრის შეგრძნებას მუსლიმ თემში“, – აცხადებს თამთა მიქელაძე.

რა რეგულაციები არსებობს საბაჟო-გამშვებ პუნქტზე, როცა პირს რელიგიური ხასიათის ლიტერატურა შემოაქვს და ჰქონდა თუ არა სავარაუდო დისკრიმინაციულ მოპყრობას ადგილი სარფის საბაჟოზე მუსლიმანი პირების მიმართ – „ბათუმელების“ ამ კითხვას არ უპასუხეს „შემოსავლების სამსახურში“. უწყების პრესსამსახურის უფროსმა, ხატია მოისწრაფიშვილმა, მსგავსი შემთხვევები ასე გამორიცხა: „კამერები აფიქსირებს ყველაფერს“, – გვითხრა მან, თუმცა ამაში დასარწმუნებლად ვიდეოჩანაწერები არ მოგვაწოდა. უწყებამ ამ დრომდე არც „ბათუმელების“ მიერ გაგზავნილ წერილობით მიმართვას უპასუხა. „ბათუმელებს“ აინტერესებდა, მოქმედებს თუ არა რაიმე შიდა ბრძანება, რაც საზღვარზე რელიგიური ლიტერატურის შემოტანა-გატანას კრძალავს.

თამთა მიქელაძე: „სამართლებრივად ამ კუთხით არ არსებობს რეგულაცია, რითაც მებაჟეები ან სასაზღვრო პოლიცია იხელმძღვანელებენ და რელიგიური ლიტერატურის ან ატრიბუტიკის შემოტანას გააკონტროლებენ. ფაქტია, რომ მებაჟეებსა და პოლიციელებს შორის გარკვეული კოორდინაცია არსებობს და საბაჟოზე აქვთ მონაცემთა ბაზაც. ჩვენი ინფორმაციით, მსგავსი შემთხვევები ბოლო ორი წელია ფიქსირდება“.

სავარაუდო დისკრიმინაციული მოპყრობა პოლიციელთა მხრიდან ასევე გამორიცხეს შინაგან საქმეთა სამინისტროში. თამთა მიქელაძემ შსს-ს გენერალურ ინსპექციას 12 თებერვალს მიმართა, თუმცა უწყების პრესსამსახურმა 18 თებერვალს „ბათუმელებს“ უთხრა, რომ ინსპექციას წერილი არ მიუღია.

„არ მაქვს მოლოდინი, რომ შსს-ს გენინსპექცია ამ შემთხვევებს გამოიძიებს და თავის თანამშრომლებს დასჯის. აშკარაა, ხელისუფლებას უჭირს სეკულარული პოლიტიკის გატარება“, – ამბობს თამთა მიქელაძე.

სარფის საბაჟოზე სავარაუდო დისკრიმინაციული ფაქტების შესახებ ინფორმირებული არიან სახალხო დამცველის აპარატშიც, თუმცა ომბუდსმენს ჯერ არ გადაუწყვეტია, დაიწყებს თუ არა მოკვლევას. „ჯამბულ აბულაძემ და სხვა პირებმა მოგვმართეს 16 თებერვალს. თავდაპირველ ეტაპზე ხდება დასაშვებობის ცნობა და შემდეგ – არსებითი განხილვა. ჩვენ გვაქვს ამისთვის 10 სამუშაო დღე და ჯერ არ მიგვიღია გადაწყვეტილება დასაშვებად ცნობის შესახებ“, – უთხრა „ბათუმელებს“ მაკა სტივენსონმა, სახალხო დამცველის თანასწორობის დეპარტამენტის ხელმძღვანელმა.

DSCN3539 — სარფის გამშვები პუნქტი / ფოტო: „ბათუმელები“

რით ეხმარება ენერგოომბუდსმენი მომხმარებლებს

„ენერგეტიკის სექტორში… კონკურენცია არ არსებობს. მომხმარებლებს ურთიერთობა უწევთ ისეთი სახის კერძო სამართლის იურიდიულ პირებთან, რომლებიც ბაზარზე ერთადერთია. საზოგადოებრივი დამცველის დახმარების გარეშე მომხმარებელთა ინტერესების დაცვა მათივე ძალებით, დამოუკიდებლად, თითქმის შეუძლებელია,“ – აღნიშნულია ენერგოსექტორში საქართველოს საზოგადოებრივი დამცველის [ენერგოომბუდსმენის] 2014 წლის ანგარიშში. სწორედ ამ წლიდან ფუნქციონირებს ენერგოომბუდსმენის წარმომადგენლობა ბათუმში, სახალხო დამცველის ოფისში. „ბათუმელები“ ოფისის ხელმძღვანელს, ბექა სიორდიას ესაუბრა მომხმარებლების უფლებების დაცვის მექანიზმებზე.

ბატონო ბექა, რატომ გახდა აუცილებელი ბათუმში წარმომადგენლობის გახსნა და რამდენად ხშირად მოგმართათ მომხმარებელი?

არიან ადამიანები, რომელთაც არ შეუძლიათ თბილისში ჩასვლა, ამიტომ შეიქმნა რეგიონული ოფისები, რომ მოვიდეს ადამიანი და დააფიქსიროს თავის პრობლემა ამა თუ იმ კომპანიის მიმართ. ჩვენი სამსახური კანონიერების ფარგლებში მაქსიმალურად ეხმარება მომხმარებელს.

ბათუმის წარმომადგენლობა აჭარა-გურიის რეგიონებს ემსახურება. რამდენი განცხადებაა შემოსული ბათუმში, ზუსტად ვერ გეტყვით. მაგალითად, ასობით განცხადება შემოდის „ენერგო-პრო ჯორჯიასთან“ მიმართებაში – დარიცხვებზე, გათიშვებზე, „სოკართან“ მიმართებაში კი მომხმარებელს პრეტენზია, ძირითადად, მიერთების საფასურის მხრივ აქვს. მომხმარებლები უჩივიან კომპანიას, რომ დაწერეს განცხადება მიერთებაზე, მაგრამ კომპანიამ გადააცილა დადგენილ 40 დღეს, ანუ დააგვიანა ბუნებრივი აირის მიწოდება.

როგორ რეაგირებთ ასეთ საჩივრებზე/განცხადებებზე?

თუ განცხადების დაწერიდან 40 დღეში ვერ ახერხებს მიერთებას კომპანია, ანუ კანონით განსაზღვრულ დროში თუ ვერ ჩაეტევა, აბონენტის მიერ გადასახდელი საფასური ნახევრდება. ჩვენ ვავალდებულებთ კომპანიას, რომ მომხმარებლის მიერ გადასახდელი თანხა გაანახევროს. ასეთი ბევრი შემთხვევა ყოფილა ბათუმში. ელექტროენერგიის დაკავშირებით კი განცხადებების 90%-ის შემთხვევაში კომპანიას მომხმარებლის სასარგებლოდ ჩამოვაწერინეთ თანხა, რაც უკანონოდ იყო დარიცხული.

მომხმარებლის განცხადებაზე რეაგირების რა მექანიზმი მუშაობს?

მოქალაქე წერილობით მოგვმართავს ჩვენ, თუ ადმინისტრაციული წარმოებაა დასაწყები – ვიწყებთ. შემდეგ მივმართავთ კომპანიას, ვითხოვთ დოკუმენტაციას აღნიშნულ პრობლემასთან დაკავშირებით, შევისწავლით საკითხს და ხშირად წერილობითი მიმართვით ხერხდება ამ პრობლემის მოგვარება. წინააღმდეგ შემთხვევაში შეგვიძლია საკითხი გავიტანოთ ენერგეტიკისა და წყალმომარაგების მარეგულირებელი ეროვნული კომისიის [სემეკის] სხდომაზე და ვცდილობთ პრობლემა აქედან მოვაგვაროთ. ბათუმის, აჭარის მაგალითზე ყოფილა შემთხვევები, როცა ჩარეულა კომისია და ყოფილა ისე, რომ ჩვენ მოგვიგვარებია. სასამართლომდეც თუ მივა საქმე, ჩვენ დავეხმარებით მომხმარებელს შესაგებელი სარჩლის დაწერაში.

როცა კომპანიებიდან ითხოვთ ინფორმაციას, გაწვდიან თუ არა მასალებს ოპერატიულად?

კომპანიებში ათასობით განცხადება შედის: მოქალაქეებისგან, ჩვენი სამსახურისგან, სემეკისგან, ამიტომ ჩვენ ვაძლევთ ზოგჯერ 5-დღიან, ზოგჯერ 10-დღიან ვადას. უმეტეს შემთხვევაში აგვიანებენ.

ბუნებრივი აირისა და ელექტროენერგიის გარდა ბათუმში სასმელი წყლის მიწოდებაშიც მონოპოლიაა. წყალთან დაკავშირებით თუ არის მომხმარებელთა პრეტენზიები?

„ბათუმის წყალთან“ მიმართებაშიც ხშირია საჩივრები დარიცხვებთან დაკავშირებით, როცა მომხმარებელი არ ეთანხმება კომპანიის მიერ დარიცხულ მაჩვენებელს. ყოფილა შემთხვევები, როდესაც ეს დარიცხვები იყო კანონიერი, ყოფილა უკანონო დარიცხვებიც და ეს თანხა ჩამოგვიწერია.

რამდენიმე წელია ბათუმში მომხმარებლების ნაწილი წყლის ე.წ. ძველ დავალიანებას იხდის. ამ დავალიანებაზე ვრცელდება თუ არა ხანდაზმულობის ვადა?

წყალზე ხანდაზმული დავალიანება გააჩნია ბათუმელი მომხმარებლის 50-60%-ს, რომლებსაც შეუძლიათ მოგვმართონ. ჩვენ შევისწავლით და შევეცდებით ეს დავალიანება ხანდაზმულობით ჩამოვწეროთ. მივმართავთ კომპანიას, რომ ჩამოწეროს და თუ კომპანია არ გაითვალისწინებს, მაშინ წერილობით მივმართავთ სემეკს და გავიტანთ კომისიის სხდომაზე. დღეიდან ბოლო სამი ან/და მეტი წლის წინ დარიცხული დავალიანება ხანდაზმულად მიიჩნევა.

ანუ ვინც დღეს იხდის წყალზე სამი წლის წინ დარიცხულ დავალიანებას ეტაპობრივად და ასევე მიმდინარე გადასახადსაც, მან ძველი დავალიანება აღარ უნდა გადაიხადოს?

ხანდაზმულ დავალიანებას თუ მომხმარებელი იხდის, ეს ნიშნავს, რომ მან ეს დავალიანება აღიარა. თუმცა, ის მიმდინარე, რაც დახარჯა, უნდა გადაიხადოს აუცილებლად და ძველ დავალიანებაზე მოგვმართოს ჩვენ. თუმცა, რომელი ვალდებულება აქვს გადახდილი – ხანდაზმული თუ მიმდინარე, ეს დოკუმენტურად იქნება შესასწავლი. ანუ, თუ სამი წლის წინ დაერიცხა და გადამხდელი არ არის, შეუძლია მოგვმართოს.

რამდენადაც ვიცი, პრობლემურია ელექტროენერგიის ხარისხი, რომელიც არ კონტროლდება. შესაბამისად, არსებობს დენის უხარისხობით გამოწვეული ზარალი. ამ კუთხით თუ მოგმართავენ?

ყოფილა ასეთი განცხადებებიც, თუმცა აქვე აღვნიშნავ, რომ ჩვენ ხარისხს ვერ ვამოწმებთ, ამას სპეციალური სამსახური ამოწმებს. მაგალითად, მახინჯაურში უხარისხო ელექტროენერგია მიეწოდებოდა მომხმარებელს და მწყობრიდან გამოვიდა საოჯახო ტექნიკა [ძაბვის ვარდნის გამო], მოითხოვეს ზარალის ანაზღაურება. თუმცა, ასეთ დროს დაზარალებულმა უნდა მიმართოს ექსპერტიზას.

თქვენ მიმართავთ ექსპერტიზას, თუ მომხმარებელმა უნდა მიმართოს თავისი ხარჯით?

ჩვენ არა, მომხმარებელმა უნდა მიმართოს თავისი ხარჯით. ექსპერტიზის ფასიც სხვადასხვაა საყოფაცხოვრებო ტექნიკის მიხედვით. სხვათა შორის, ყოფილა დადასტურების შემთხვევებიც, რომ ტექნიკა მწყობრიდან სწორედ ელექტროენერგიის უხარისხობის მიზეზით გამოსულა.

კომპანიებმა კარგა ხანია იციან ჩვენი სამსახურის შესახებ და იძულებულნი არიან შეუქმნან მომხმარებლებს კომფორტი – ვთქვათ, ელექტროენერგიის, წყლისა თუ ბუნებრივი აირის მიწოდებისას, თავისი ხელშეკრულებებით და, ზოგადად, ყველაფერში, რაც შედის კომპანიასა და მომხმარებელს შორის ურთიერთობაში.

მომხმარებლებმაც, ვინც უკვე იცის ენერგოომბუდსმენის შესახებ, იციან იმ უფლება-მოვალეობებზეც, თუ რით შეგვიძლია მათ დავეხმაროთ.

PS: მომხმარებლებს ყოველდღე – ორშაბათიდან პარასკევის ჩათვლით, შეუძლიათ განცხადებით მიმართონ ენერგოომბუდსმენის ოფისს ბათუმში, მისამართზე: გენ. მაზნიაშვილის N9 და დაუკავშირდნენ ტელეფონით ცხელ ხაზზე: [032] 242 01 90, ან ელექტრონულ ფოსტაზე: mail@pdci.ge , ასევე ელექტრონული განცხადებით ამ მისამართიდან.

ისევ შეუსრულებელი ვალდებულებები და „ანბანის კოშკი“

„ანბანის კოშკთან“ დაკავშირებული ვალდებულებები ინვესტორმა ვერ შეასრულა. შენობა, რომელშიც ბიუჯეტიდან 60 მილიონზე მეტი ლარი დაიხარჯა, ისევ უფუნქციოდაა. გავრცელებულ ინფორმაციას, რომ კომპანიის წილები გადანაწილდება და ახალი პარტნიორი რუსული ინვესტიციით შემოვა, კომპანიაში არ ადასტურებენ, თუმცა ადასტურებენ იმას, რომ ახალი კადრი გამოჩნდება მართვის მენეჯმეტში, რომელიც რუსი ტურისტების მოზიდვაზე იმუშავებს.

„ის ახალგაზრდა ბათუმელი ბიჭია, რომელიც რუსეთში მოღვაწეობდა და აქვს კარგი კავშირები. ის ფულით არ შემოდის, ჩვენ მხოლოდ მისი გამოცდილება გვჭირდება. ევროპული მენეჯმენტი უნდა ყოფილიყო, ახლა რუსი და რუსულენოვანი ტურისტების მოზიდვაზე უნდა ვიმუშაოთ, რომლებიც სეზონზე ჩამოდიან ბათუმში. მასთან მოლაპარაკება გვაქვს და მემგონი, არ იქნება სწორი, ახლა მისი სახელი რომ დაგისახელოთ. არ ვგულისხმობ კომპანიის ახალ დირექტორს,“ – უთხრა „ბათუმელებს“ კომპანია „ბუსტ ჯორჯიას“ თანამფლობელმა ზურა ნასყიდაშვილმა.

„ატმ-ანბანის კოშკის მენეჯმენტის“ ახალ დირექტორად გასულ კვირას, 19 თებერვალს, ოლეგ სანდროშვილი დაარეგისტრირეს.

აჭარის მთავრობამ ბათუმის ბულვარში 1344,7 კვ/მ შენობა – „ანბანის კოშკი“ და მასზე მიმაგრებული 5736 კვ/მ არასასოფლო-სამეურნეო დანიშნულების მიწის ნაკვეთი კომპანია „Boost Spain S.I“-ს 20 წლის ვადით გადასცა. ქონებით სარგებლობის წლიურ საფასურად კი, სიმბოლური ფასი, ერთი ლარი დაუწესა. მთავრობასთან აღებული ვალდებულების თანახმად, „ანბანის კოშკში“ გასართობი ობიექტები ინვესტორს ხელშეკრულების დადებიდან სამ თვეში უნდა გაეხსნა. ხელშეკრულება 2015 წლის ივნისში გაფორმდა.

აღებული ვალდებულების მიხედვით, კომპანიას სარგებლობაში გადაცემული ქონების მშენებლობის დროს გამოყენებული ტექნოლოგიური პროცესების დაცვით დამუშავება ევალებოდა. ასევე ხელშეკრულების გაფორმებიდან სამ თვეში კომპანიას ლიფტების გამართულობა და ექსპლუატაციაში გაშვება უნდა უზრუნველეყო. იმავე ვადაში უნდა გამართულიყო განათების სისტემა. ვალდებულების თანახმად ეს ყველაფერი კომპანიამ ობიექტის სარგებლობის პერიოდში უნდა შეინარჩუნოს. საბოლოო ჯამში კი, ხელშეკრულების დადებიდან სამ თვეში, ანუ გასული წლის სექტემბერში კომპანიას კოშკში მრავალფუნქციური ობიექტები: რესტორანი და კაფე უნდა აემოქმედებინა. კომპანიას უნდა უზრუნველეყო „მიმზიდველი ადგილის მოწყობა ტურისტებისთვის ქალაქის ხედების დასათვალიერებელი გადმოსახედის სახით“, ინვესტორს საქართველოს არანაკლებ ათი მოქალაქე უნდა დაესაქმებინა.

ადგილზე დათვალიერებით ირკვევა, რომ იქ ჯერ არც გასართობი ობიექტები აუმოქმედებიათ და არც ლიფტია გამართული. შენობაში და არც შენობის ირგვლივ პასუხის გამცემი არავინაა. ლიფტის გამჭვირვალე კარიდან კი მის ფსკერზე დაგუბებული წყალი მოჩანს. ეს ყველაფერი იმაზე მიუთითებს, რომ ინვესტორმა ვალდებულება ვერ შეასრულა. მთავრობა კი „ანბანის კოშკის“ გასართობ ობიექტად გადაქცევას ჯერ კიდევ წინა საკურორტო სეზონზე ვარაუდობდა.

გასულ წელს იქ სარემონტო სამუშაოები მიმდინარეობდა და გარკვეული დროით კაფეც მუშაობდა. ვალდებულებების რა ნაწილი შეასრულა კომპანიამ, ამაზე პასუხი ვერ მივიღეთ. „კომპანიის დამფუძნებელი აპირებს, რომ მოაწყოს ბრიფინგი ჟურნალისტებისთვის, სადაც ყველა კითხვაზე გაგცემთ პასუხს. მე არ ვარ კომპეტენტური გიპასუხოთ,“ – უთხრა „ბათუმელებს“ კომპანიის წარმომადგენლემა ირაკლი ორმოცაძემ. 19 თებერვლამდე ის კომპანიის დირექტორად ფიქსირდებოდა.

აჭარის მთავრობის ინფორმაციით, კომპანიამ ვადის გაგრძელება ითხოვა. ახალი შეთანხმებით ნაკისრი ვალდებულებები ინვესტორმა ახალ საკურორტო სეზონამდე უნდა შეასრულოს და ამ დროისთვის უნდა უზრუნველყოს კოშკის ახალი განათების დამონტაჟებაც.

რეესტრის მონაცემებით „Boost Spain S.I“ – ესპანური კომპანიაა და მისი დამფუძნებელი ესპანეთის მოქალაქე ბართლომეო სორელ სელმანკაა. ამავე მონაცემებით, ბართლომეო სორელ სელმანკა ფლობს საქართველოში 2015 წლის აპრილში დარეგისტრირებული კომპანიის – „ბუსტ ჯორჯიას“ 67 პროცენტს, დარჩენილი 33 პროცენტის მფლობელი კი საქართველოს მოქალაქე ზურაბ ნასყიდაშვილია. მათვე დააფუძნეს „ატმ-ანბანის კოშკის მენეჯმენტი“. ზურაბ ნასყიდაშვილი კიდევ ერთი კომპანიის მფლობელია – მან 2014 წელს „ბიზნეს მენეჯმენტ ჯგუფი“ დააფუძნა და კომპანიას ერთპიროვნულად ფლობს. შპს „ატმ – ანბანის კოშკის მენეჯმენტს“ 100%-ით „ბუსტ ჯორჯია“ ფლობს.

გელა წულაძის კომენტარი ქანდაკებაზე, რომელსაც გეიწყვილი უწოდეს

„აჭარის მამულიშვილთა კავშირი“ ბათუმის ბულვარიდან მხატვარ გელა წულაძის ერთ-ერთი ნამუშევრის აღებას ითხოვს. მათი განცხადებით, ქანდაკება ჰომოსექსუალ წყვილს ასახავს. ქანდაკების ავტორის, გელა წულაძის განცხადებით, კონცეფციაში მსგავსი არაფერია ჩადებული.

„უილიამ შექსპირი წაიკითხონ და მერე მიხვდებიან რა კონცეფციაა ეს. საერთოდ მაგ სერიას ჰქვია „ვარიაციები სიყვარულზე“. ფეხზე რომ დგას, ეგ არის გოგო, დაჩოქილი გოგო მე არ მინახავს ან დაჩოქილი კაცი, კაცს რომ აძლევდეს გულს. ქალი დგას ფეხზე და დაჩოქილი ბიჭი აწვდის გულს სიყვარულის ნიშნად, ეს არის და ეს. მაგათ რა დაინახეს, არ ვიცი. თუ გოგოს ძუძუ არ უჩანს, არც კაცს აქვს გამოკვეთილი რამე, პორნოგრაფია თუ უნდათ, ეს მაგათი პრობლემაა. ჩვენ პორნოგრაფიას არ ვაკეთებთ, ხელოვნებას ვაკეთებთ. თუ ვერ გაიგეს, გადაიტანონ როგორმე, რა პრობლემაა ასეთი“.

გელა წულაძის ნამუშევრები სერიიდან – „ვარიაციები სიყვარულზე“, ბათუმის ბულვარში რამდენიმე ადგილზე განთავსებული.

ავტორის ინიციატივით პროექტი „ვარიაციები სიყვარულზე“ თბილისში და ბათუმში 2008-2013 წლებში განხორციელდა. ამავე პროექტს ეკუთვნის ქანდაკებები „ლოკოკინა“, WHERE, LIBERTE და სხვა.

2016-02-26 დღის სტატისტიკა – ბათუმში პარკირების წესების დარღვევაზე

სატრანსპორტო ინფრასტრუქტურის მართვის სააგენტოს ინფორმაციით, დღეს ბათუმში პარკირების წესების დარღვევაზე სულ 398 ადამიანი დაჯარიმდა.

მათ შორის 300 – პარკირების საფასურის გადახდის გარეშე დგომის გამო, 67 – ნიშანში დგომის გამო, 20 – ტროტუარზე დგომისთვის, 5 – დგომა-გაჩერების წესის დარღვევისთვის და 6 ავტობუსის გაჩერებაზედგომის გამო.

ფოტოები გადაღებულია ბოლო რამდენიმე დღის განბმავლობაში.

“ბოდიში და ეს ცისფერების ქანდაკებას გავს” – ბათუმის ბულვარის დირექტორის მოადგილე

„აჭარის მამულიშვილთა კავშირი“ ბათუმის ბულვარში მდებარე სკულპტურის აღებას მოითხოვს. ამის შესახებ დღეს „აჭარის მამულიშვილთა კავშირმა“ ბრიფინგი გამართა ბათუმში და ჰომოფობიური განცხადებები გააკეთა:

„ბათუმში, ნოდარ დუმბაძის ქუჩის გასწვრივ რომ არის აღმართული მამათმავლების ძეგლი, იმის აღება მოვითხოვეთ. ეს არის მამათმავლების ძეგლი, ჩვენმა ცნობილმა მხატვრებმა და მოქადაკეებმა, როგორც ექსპერტებმა, ეს წერილობით დაადასტურეს, ამიტომ მოვითხოვეთ მისი აღება. შემიძლია წერილობით გადმოგცეთ, იქ არიან აჭარის და საქართველოს მხატვართა კავშირის წევრები, გია ბაღოშვილი, დუგლას ზამთარაძე და სხვები“, – განაცხადა „ბათუმელებთან“ ნიაზ ბოლქვაძემ, „აჭარის მამულიშვილთა კავშირის“ ხელმძღვანელმა.

„მე არ ვერევი სხვის საავტორო უფლებებში, მაგრამ ჩემი კრიტიკული აზრი მაქვს“, – აღნიშნა „ბათუმელებთან“ არქიტექტორმა გია ბაღოშვილმა, რომელიც ბათუმის ბულვარის დირექტორის მოადგილეა და რომლის მოსაზრებებიც ძეგლთან დაკავშირებით ასევე ჰომოფობიურია:

„ამის გადაკეთება შეიძლება, ფიგურის შეცვლა შეიძლება, რომ ცოტა მანდილოსნის ფიგურას დაემსგავსოს, ესკიზიც კი გადავაკეთე პატარა. ხელი არაფერზე არ მომიწერია, მაგრამ ჩემი აზრი მქონდა ამასთან დაკავშირებით. ყველა ადამიანი, ვისაც აღქმის უნარი აქვს, დაინახავს, რომ ერთი კაცი მეორეს გულს ჩუქნის, ბოდიში და ეს ცისფერების ქანდაკებას გაქვს – ამას ვეთანხმები, მე ასე აღვიქვამ და ამას ქვია სიყვარულის ახსნა და როგორ მივიღოთ?“ – განაცხადა გია ბაღოშვილმა „ბათუმელებთან“.

გელა წულაძის ეს ქანდაკება ბათუმის ბულვარში ერთ-ერთი ყველაზე პოპულარული ქანდაკებაა, სადაც ხშირად იღებენ ფოტოებს.

ნიაზ ბოლქვაძის თქმით, ქანდაკების აღების მოთხოვნით ჯერ კიდევ ბათუმის ყოფილ მერს, ჯემალ ანანიძეს, ქალაქის საკრებულოსა და ბათუმის მაჟორიტარ დეპუტატებსაც, კაკო ძნელაძეს [აჭარის უმაღლესი საბჭო] და მურმან დუმბაძესაც [საქართველოს პარლამენტი[ მიმართეს, თუმცა მათგან გამოხმაურება ამ თემაზე არ ყოფილა.

„მამულიშვილთა კავშირის“ ერთ-ერთი ბოლო მოთხოვნა ბათუმში ასევე უკავშირდება ზუბალაშვილისა და ბარათაშვილის ქუჩების კვეთაში „ოსმალთა სამასწლოვანი ბატონობისაგან [1552-1878წ. 25 აგვისტო] აჭარის განთავისუფლების და დედა სამშობლო საქართველოსთან დაბრუნებისათვის თავდადებულ გმირთა მემორიალის“ აღმართვას.

ამავე თემაზე:

გელა წულაძის კომენტარი ქანდაკებაზე, რომელსაც გეიწყვილი უწოდეს

ციხისძირში აქციაზე “ნაციონალური მოძრაობის” ორი წევრი დააკავეს

შსს-ს ინფორმაციით, ციხისძირში “ერთიანი ნაციოანლური მოძრაობის” მიერ ორგანზიებულ საპროტესტო აქციაზე სამართალდამცავებმა ორი ადამიანი დააკავეს, – “ორი პირია დაკავებული, ადმინისტრაციულ სამართალდარღვევათა კოდექსის 173-ე მუხლით, ანუ პოლიციის კანონიერი მოთხოვნისადმი დაუმორჩილებლობის გამო,” – განმარტავს შსს-ს პრესსამსახური.

ერთიანი ნაციონალური მოძრაობის ინფორმაციით, დაკავებულები არიან პარტიის წევრები – სოსლან ზოიძე და სოლომონ ბაჯელიძე.

საკრებულოსა და მერის პოზიცია ბათუმის საბავშვო ბაღებში ხელფასების მომატების ინიციატივაზე

დღეს, ბათუმის საკრებულოს სხდომაზე, ბოლო საკითხად საბავშვო ბაღების თანამშრომელთა ხელფასების გაზრდის ინიციატივა განიხილეს. ინიციატივას საკრებულოს წევრებმა მხარი არ დაუჭირეს.

ინიციატივის ავტორი ბათუმის საკრებულოში ფრაქცია „ერთიანი ნაციონალური მოძრაობის“ თავმჯდომარე გიორგი კირთაძეა, რომელიც საბავშო ბაღების პერსონალისთვის ხელფასების 20%-ით გაზრდას ითხოვდა -“გაწეულ შრომასთან შეფარდებით, მუნიციპალიტეტში ყველაზე არაპროპორციული ანაზღაურება სწორედ საბავშვო ბაღების თანამშრომლებს აქვთ. ჩვენთან ბაღებში არის 249 ძიძა და მათი ხელფასი 318 ლარია ხელზე, 434 – აღმზრდელის თვიური ხელფასი კი 336 ლარს (ხელზე) შეადგენს“

ბათუმის მერის გიორგი ერმაკოვის განმარტებით – ინიციატივა კარგია, მაგრამ არსებული გარემოებების გათვალისწინებით, იდეის მხარდაჭერისგან თავის შეკავება მოუწევს. „თავის დროზე ხელისუფლება ახდენდა ბაღების სუბსიდირებას ბიუჯეტის დონეზე და ნაწილობრივ ის ფინანსდებოდა მშობლების ხარჯზე. დღეს ჩვენ 33 საბავშო ბაღი გვაქვს, რომელთა სრულად დაფინანსების ვალდებულებაც სახელმწიფომ აიღო საკუთარ თავზე. 2013 წლიდან 2015 წლამდე ბათუმში ექვსი საბავშო ბაღი აშენდა. რეკონსტრუქცია (ერთსართულიან შენობა-ნაგებობებს დავაშენეთ სულ ცოტა ორი სართული) ჩაუტარდა სამ საბავშო ბაღის შენობას. კაპიტალური რემონტი ჩაუტარდა ოთხ საბავშო ბაღის შენობას. ბიუჯეტი მივიღეთ და 2016 წელს ორი ახალი საბავშო ბაღი შენდება (ურეხსა და მაზნიაშვილის ქუჩაზე). წერეთლის ქუჩაზე არსებულ ერთ საბავშო ბაღს კი კაპიტალური რეკონსტრუქცია უტარდება, ანუ კიდევ ერთი სართული დაემატება და შესაბამისად ბავშვების რაოდენობაც გაიზრდება ბაღში” – თქვა გიორგი ერმაკოვმა.

ბათუმის მერიის საფინანსო სამსახურის უფროსის არჩილ ვანაძის თქმით, 2014 წლის აპრილიდან აღმზრდელებს ხელფასები 100 ლარით გაეზარდათ, ძიძებს კი 50 ლარით და ახლა აღმზრდელების საშუალო ხელფასი 420 ლარი, ძიძების საშუალო ხელფასი კი 320 ლარია.

არჩილ ვანაძე

„ტელეარხ 25“-ში კრიმინალისტები ბომბს ეძებენ

დღეს, 26 თებერვალს, „ტელეარხ 25“-ის შენობასთან კრიმინალისტები არიან. შენობიდან ევაკუირებულნი არიან ტელევიზიის თანამშრომლები.

„მოვიდნენ პოლიციიდან და გვითხრეს, რომ დაგვეტოვებინა შენობა, რადგან პოლიციაში ზარი იყო შესული. ამჟამად გარეთ ვდგავართ თანამშრომლები, სხვა არაფერი ვიცით,“ – განაცხადა გია სურმანიძემ, „ტელეარხ 25“-ის დირექტორმა „ბათუმელებთან“.

შსს-ს პრესსამსახურის ცნობით, დღეს, ცოტა ხნის წინ საპატრულოში ნამდვილად შევიდა უცნობი პირისგან ინფორმაცია იმის თაობაზე, რომ „ტვ 25“-ის შენობაში იყო ბომბი – “წასულები არიან სამართალდამცავები და ამოწმებენ, თუ რამდენად სწორია ეს ინფორმაცია”.

რა დრო დასჭირდება შენობის შემოწმებას, ეს, შსს-ს პრესსამსახურის ინფორმაციით, შენობის მასშტაბზეა დამოკიდებული.

მერია ბათუმის სასწრაფო სამედიცინო დახმარების ცენტრისთვის 3 ავტომანქანას შეიძენს

დღეს საკრებულოს სხდომაზე მიიღეს შპს “ბათუმის სასწრაფო სამედიცინო დახმარების ცენტრისთვის” სასწრაფო დახმარების სტაციონალური ავტომანქანების შესყიდვის საკითხი, რომლის მიხედვითაც ცენტრისთვის გამოყოფილი 280 000 ლარით, ნაცვლად აქამდე გათვალისწინებული 4 მაღალი გამავლობის ავტომობილისა, 3 ასეთ ავტომანქანას შეიძენენ – “ორჯერ ჩავარდა ტენდერი, არ გამოცხადდა არც ერთი მონაწილე. შემოგვაქვს ცვლილება იმ კუთხით, რომ ამ 280 000 ლარში შევიძინოთ მაღალი გამავლობის 3 ავტომობილი, ნაცვლად ოთხისა, რადგან ამ თანხით ვერ მოხერხდა ოთხი ავტომობილის შეძენა. შემდეგ ბიუჯეტში შევა ცვლილება და შევიძენთ მეოთხესაც” – განმარტა მერიის ჯანმრთელობისა და სოციალური დაცვის სამსახურის უფროსმა სოფიო მიქელაძემ.

საკრებულომ ააიპ „ბათუმის ბულვარის“ დაფუძნების საკითხს მხარი დაუჭირა

დღეს ბათუმის საკრებულოს სხდომაზე შვიდი საკითხი განიხილეს. მათ შორის ბათუმის მერიის მიერ ააიპ “ბათუმის ბულვარის” – დაფუძნების საკითხი, რომელსაც დეპუტატების უმრავლესობამ მხარი დაუჭირა. ააიპის დაფუძნებას მხარი არ დაუჭირა ერთიანი ნაციონალური მოძრაობის წევრებმა. საკითხის არჩევის პროცესში მონაწილეობა არ მიიღo ფრაქცია “თავისუფალი დემოკრატების” წარმომადგენლებმა. ბათუმის საკრებულოში ფრაქციის თავმჯდომარის კობა ჩხეიძის თქმით, საუბარია იმავე იურიდიული ფორმის ორგანიზაციის შექმნაზე რაც უკვე არსებობს -“იმიტომ შეიქმნა ლანდშაფტური და ტურისტული ინფრასტრუქტურის მართვის სააგენტო აიპის სახით, რომ მას მიეხედა ყველა იმ სკვერისთვის, პარკისთვის და ტურისტული ინფრასტრუქტურისთვის, რომელთა მიხედვაც იქამდე ხელოვნურად შექმნილ შპს-ს ევალებოდა, რიგ შემთხვევაში კი სკვერები იყო საერთოდ მოუვლელი. როცა ზოოპარკისა და 6 მაისის პარკის გადაცემა მოხდა მის მართვაში, იგივე წარმატებით შეიძლება ამ აიპიმ განახორციელოს ბულვარის მიღებისა და მართვის პროცედურა. ამავე დროს შეგვიძლია პლიაჟის სექტორებიც კი დავამატოთ მის განკარგვაში” – თქვა კობა ჩხეიძემ.

შეგახსენებთ, რომ ბათუმის მერია ბულვარის მართვაში დაბრუნებას 2017 წლის იანვრისთვის ვარაუდობს, მას შემდეგ, რაც იქ ინფრასტრუქტურული სამუშაოები დასრულდება. ამ დროისთვის კი მერიას ახალი ააიპ „ბათუმის ბულვარი“ უკვე დაფუძნებული უნდა ჰქონდეს. ამასთან, 2017 წლის ბიუჯეტში მერიამ ბულვარის სამართავად საჭირო თანხა უნდა გაითვალისწინოს.

მერიაში მიიჩნევენ ასევე, რომ გარდამავალ პერიოდში, ვიდრე ბულვარი მერიის მართვაში გადავა, ბათუმის მერიასა და აჭარის ფინანსთა და ეკონომიკის სამინისტროს შორის უნდა გაფორმდეს მემორანდუმი, რომელშიც გაწერილი იქნება მხარეთა ვალდებულებები. გარდა ამისა, უწყებებმა უნდა გაიარონ პროცედურები, რაც ბულვარში ინფრასტრუქტურული სამუშაოების დასრულების შემდეგ უზურფრუქტის ხელშეკრულების შესაწყვეტად იქნება საჭირო.

ნათია ფანჯიკიძესთან დაგეგმილი დისკუსია გადაიდო

ასოციაცია “თავისუფალ ჟურნალისტთა სახლის” ორგანიზებული დისკუსია, რომელიც ხვალ, 27 თებერვალს, უნდა გამართულიყო, გადაიდო.

ხვალ ბათუმის სახელმწიფო უნივერსიტეტში „თაობათა ურთიეთობაზე“ მოქალაქეებთან ფსიქოლოგ ნათია ფანჯიკიძეს უნდა ესაუბრა, რომელიც საგანგებოდ ამ შეხვედრისთვის ჩამოდიოდა ბათუმში . ნათია ფანჯიკიძის განმარტებით, ის ბათუმში იმის გამო ვეღარ ახერხებს ჩამოსვლას, რომ დღეს თბილისში დაჭრეს „თავისუფალი დემოკრატების“ ერთ-ერთი ლიდერი, ყოფილი სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილი, რომელიც ნათია ფანჯიკიძის ოჯახის მეგობარია.

როდის გაიმართება დისკუსია ნათია ფანჯიკიძის მონაწილეობით, ჯერჯერობით უცნობია.

„სამართლიანი არჩევნების“ განცხადება უსკოს თავმჯდომარის არჩევაზე

ორგანიზაცია – „სამართლიანი არჩევნებისა და დემოკრატიის საერთაშორისო საზოგადოება“ მიიჩნევს, რომ უსკოს თავმჯდომარის არჩევა კანონით დადგენილი პროცედურების დარღვევით მიმდინარეობს. ამის შესახებ ორგანიზაციამ 26 თებერვალს საგანგებო განცხადება გაავრცელა:

„2015 წლის 30 დეკემბერს, „აჭარის ავტონომიური რესპუბლიკის უმაღლესი საბჭოს არჩევნების შესახებ“ აჭარის ა/რ კანონის თანახმად, აჭარის ა/რ უმაღლესი საარჩევნო კომისიის თავმჯდომარის ვაკანტურ თანამდებობაზე ღია კონკურსი გამოცხადდა. საკონკურსო კომისიამ აჭარის მთავრობის თავმჯდომარეს წარუდგინა უსკოს თავმჯდომარეობის 3 კანდიდატი, ხოლო აჭარის მთავრობის თავმჯდომარემ წარდგენილი 3 კანდიდატიდან შერჩეული ერთი კანდიდატი, კანონით დადგენილი პროცედურებისა და ვადების დაცვით, დასამტკიცებლად აჭარის უმაღლეს საბჭოს წარუდგინა.

4 თებერვალს, აჭარის უმაღლესი საბჭოს სხდომაზე, უსკოს თავმჯდომარეობის კანდიდატმა დეპუტატების ხმათა საჭირო რაოდენობა ვერ მიიღო. შესაბამისად, მისი კანდიდატურისათვის ხელახალი კენჭისყრა აჭარის უმაღლესი საბჭოს რიგგარეშე სხდომაზე, 18 თებერვლისთვის დაინიშნა. თუმცა, აღნიშნულ სხდომაზე ხელახალი კენჭისყრა კვორუმის არარსებობის გამო ჩაიშალა. რის შემდეგაც, 23 თებერვალს, აჭარის მთავრობის თავმჯდომარემ უსკოს თავმჯდომარის პოზიციაზე კონკურსი ხელახლა გამოაცხადა.

საგულისხმოა, რომ „აჭარის ავტონომიური რესპუბლიკის უმაღლესი საბჭოს არჩევნების შესახებ“ აჭარის ა/რ კანონი მკაფიოდ არ განსაზღვრავს უსკოს თავმჯდომარის კანდიდატის ხელახალი კენჭისყრის პროცედურას და ვადებს. მიუხედავად ამისა, როგორც აჭარის მთავრობამ, ასევე უმაღლესმა საბჭომ უსკოს თავმჯდომარის არჩევისას კანონის მე-13 მუხლის მე-14 პუნქტით იხელმძღვანელა, მაგრამ, აღნიშნული მუხლით დადგენილი პროცედურები ორივე უწყებამ დაარღვია.

ზემთაღნიშნული ნორმის თანახმად, მას შემდეგ, რაც უსკოს თავმჯდომარეობის კანდიდატი ხმათა საჭირო რაოდენობას ვერ მიიღებდა, უმაღლესი საბჭო ვალდებული იყო კიდევ ორჯერ ეყარა კენჭი წარდგენილი კანდიდატისთვის. თუ ამ შემთხვევაშიც ვერ მოხდებოდა უსკოს თავმჯდომარის არჩევა, აჭარის მთავრობის თავმჯდომარეს 3 დღის ვადაში უმაღლესი საბჭოსთვის უნდა წარედგინა კონკურსის შედეგად შერჩეული სხვა 2 კანდიდატი. თუ უმაღლესი საბჭო წარდგენილ კანდიდატებს მხარს კვლავ არ დაუჭერდა, მხოლოდ ამის შემდეგ, 3 დღის ვადაში უნდა გამოცხადებულიყო ახალი კონკურსი.

„სამართლიანი არჩევნები“ მიიჩნევს, რომ აღნიშნული მუხლით დადგენილი პროცედურები ორივე უწყებამ დაარღვია. ერთი მხრივ, უმაღლესმა საბჭომ არ განახორციელა კანონით მასზე დაკისრებული ვალდებულება და ვერ უზრუნველყო კანონით დადგენილი წესით ხელახლა კენჭისყრის ჩატარება, ხოლო, მეორე მხრივ, აჭარის მთავრობის თავმჯდომარემ არ შეასრულა კანონის მოთხოვნა და უმაღლეს საბჭოს არ წარუდგინა კონკურსის შედეგად შერჩეული უსკოს თავმჯდომარეობის სხვა 2 კანდიდატი.

ამასთან, უნდა აღინიშნოს, რომ კანონის ნორმების ამგვარი ინტერპრეტაციის პირობებში, ახალი კონკურსის შემთხვევაშიც არსებობს რისკი, რომ უმაღლესმა საბჭომ კვლავ გვერდი აუაროს კანონით განსაზღვრულ პროცედურებს და უსკოს თავმჯდომარის არჩევის პროცესი ისევ ჩიხში შევიდეს. შესაბამისად, მხარეებმა უნდა გამოიჩინონ მაღალი პასუხისმგებლობა და ზედმიწევნით შეასრულონ კანონით მათზე დაკისრებული მოთხოვნები.

„სამართლიანი არჩევნები“, პროცესში ჩართულ ყველა მხარეს მოუწდებს დაიცვან კანონის პროცესუალური მოთხოვნები და მაქსიმალურად გამორიცხონ პოლიტიკური ინტერესები უსკოს დაკომპლექტებისა და მისი თავმჯდომარის შერჩევის პროცესში, რათა საფრთხე არ შეექმნას საარჩევნო ადმინისტრაციის სანდოობას და მიუკერძოებლობას“ – აღნიშნულია განცხადებაში.