Batumelebi

კოოპერატივი „რ.კ. ქაქუთი“ აჭარის ფინანსთა და ეკონომიკის სამინისტროს შავ სიაშია. სამინისტროს მიერ „ბათუმელებისთვის“ მოწოდებულ ინფორმაციაში ამ კოოპერატივთან დაკავშირებული ორი ურთიერთგამომრიცხავი განმარტებაა. პირველით სამინისტრო „რ.კ ქაქუთთან“ 2013 წლის აგვისტოში გაფორმებული ხელშეკრულების მოშლას გეგმავს. მეორეთი კი „მიმდინარეობს საინვესტიციო პირობების შეთანხმებაზე მოლაპარაკება“. კოოპერატივის მფლობელს ეჭვი აქვს, რომ მთავრობა მისთვის საწარმოს წართმევას და სხვა პირზე გადაცემას გეგმავს.

ინდმეწარმე მერაბ ბერაძემ (შემდგომში კოოპერატივი რ.კ ქაქუთი) ხელისუფლებასთან ვალდებულებები 2013 წელს, მას შემდეგ აიღო, როცა მთავრობამ ოფიციალურად გამოაცხადა ციტრუსის შემფუთავი საწარმოების აღდგენის ინიციატივის შესახებ. აჭარაში ციტრუსის შემფუთავი, დამხარისხებელი და ტარის მწარმოებელი საწარმოების მოწყობის მიზნით აჭარის მთავრობის თავმჯდომარის, არჩილ ხაბაძის განკარგულების საფუძველზე მილიონ 682 400 ლარის ღირებულების ქონება პირდაპირი მიყიდვის წესით, 1 ლარად და გარკვეული ვალდებულებებით საკუთრებაში კერძო პირებს გადასცეს. მათ შორის იყო ინდმეწარმე მერაბ ბერაძეც.

1300კვ/მდე შენობა-ნაგებობა და 7000 კვ/მ მიწა ქობულეთის მუნიციპალიტეტის სოფელ ქაქუთში აჭარის მთავრობამ ინდმეწარმე მერაბ ბერაძეს – 1 ლარად, შენობაში ციტრუსის შემფუთავი საწარმოს გახსნის პირობით გადასცა. მთავრობასთან გაფორმებული ნასყიდობის ხელშეკრულების თანახმად, 2013 წლის პირველ ნოემბრამდე მას არანაკლებ 1 ტონა/საათში წარმადობის ციტრუსის დამხარისხებელი საწარმო უნდა აემოქმედებინა; 2014 წლის პირველ ოქტომბრამდე საკუთრებაში გადაცემულ შენობაზე სახურავის გამაგრება-შეკეთება, ხოლო 2015 წლის ოქტომბრამდე შენობის კეთილმოწყობითი სამუშაოები უნდა დაესრულებინა. 2013 წლის პირველი ნოემბრის მდგომარეობით საწარმოს საკუთარებაში უნდა ჰქონდა ელექტროსასწორი, პნევმატური ურიკა და ორი ტონა ტვირთამწეობის ავტომტვირთავი, ხოლო 2014 წლის პირველ ოქტომბრამდე – სატვირთო ავტომანქანები. მთლიანობაში კი ქონების ახალ მეპატრონეს 114 000 ლარის ინვესტიციის განხორციელება დაეკისრა.

„რ/კ ქაქუთის“ მეპატრონე მერაბ ბერაძე ამბობს, რომ ხელშეკრულებით ნაკისრი ვალდებულებები შეასრულა და 114 000 ლარის ნაცვლად 130 000 ლარის ინვესტიცია განახორციელა. ის ამბობს, რომ ამას დოკუმენტებითაც დაადასტურებს. თუმცა, აჭარის მთავრობასთან პრობლემები მაინც აქვს. მისივე ინფორმაციით, გასულ წელს ის მთავრობამ დოკუმენტების წარდგენის დაგვიანების გამო 16 500 ლარით დააჯარიმა და საწარმო ჩამოართვა.

მერაბ ბერაძე მიიჩნევს, რომ მას ვალდებულებები შესრულებული ჰქონდა და არ უნდა დაეჯარიმებინათ. ამიტომ მან პრობლემის შესახებ ჯერ აჭარის მთავრობის თავმჯდომარეს – არჩილ ხაბაძეს, შემდეგ კი ყოფილ პრემიერს ირაკლი ღარიბაშვილს მისწერა და დახმარება სთხოვა. ირაკლი ღარიბაშვილმა საქმეში გარკვევა ბიზნესომბუდსმენს დაავალა. რომელმაც თავის მხრივ „რ.კ ქაქუთის“ მთავრობასთან პრობლემების გასარკვევად აჭარაში თავისი წარმომადგენელი ოთარ რიკაძე მიავლინა. მერაბ ბერაძის ინფორმაციით, ოთარ რიკაძე მას აიმედებდა, რომ ყველაფერი რიგზე იყო და პრობლემები აღარ ექნებოდა.

თავად ოთარ რიკაძემ „ბათუმელებთან“ საუბარი არ ისურვა.

ამის შემდეგ მერაბ ბერაძე ბათუმში, სასტუმრო „ჰილტონში“ ყოფილი პრემიერისა და ბიზნესმენების შეხვედრაზე მიიწვიეს. იქ მან ირაკლი ღარიბაშვილს მიმართა. „პრემიერს ჩემი საქმე შევახსენე. მან არჩილ ხაბაძეს გახედა და ჰკითხა, იცით თუ არა რაშია საქმეო“, – იხსენებს ბერაძე.

„ჰილტონში“ შეხვედრის შემდეგ მერაბ ბერაძეს უთხრეს, რომ აღარ აჯარიმებდნენ, პრობლემები მოგვარებული იყო და მალე მისცემდნენ ვალდებულების შესრულების დადასტურების დოკუმენტს. თუმცა, ასე არ მოხდა. ერთი თვის შემდეგ ის სამინისტროში დაიბარეს და აუხსნეს, რომ ჯარიმის ათი პროცენტი მაინც უნდა გადაეხადა: „მითხრეს, ასეთი წესია, ეს საურავიაო. მინისტრის პირველ მოადგილესაც შევხვდი. მისგან მივიღე პირობა, რომ თუ ამ თანხას გადავიხდიდი, მუშაობას ჩვეულებრივად გავაგრძელებდი და პრობლემები აღარ მექნებოდა“.

მერაბ ბერაძემ დაკისრებული თანხა 2016 წლის 18 თებერვალს გადაიხადა. რის შემდეგაც მას უნდა მიეღო სახელმწიფოსთან ნაკისრი ვალდებულებების შესრულების დადასტურების დოკუმენტი. ერთი თვის შემდეგ ის სამინისტროში ისევ დაიბარეს:

„დამირეკა სამინისტროს თანამშრომელმა არჩილ ბერიძემ. მე ვუთხარი – ხომ შევასრულე უკვე, რაზეც მინისტრის მოადგილეს შევუთანხმდი-მეთქი. მითხრა, თუ ისე არ მოიქცევი, როგორც ჩვენ გეტყით, შეიძლება ქონება ჩამოგართვათ ან ჯარიმა გაგიცოცხლოთო. სამინისტროში არჩილ ბერიძემ ამომიბეჭდა დოკუმენტი, სადაც წერია, რომ მე დავარღვიე და მაპატიეს.მე არაფერი დამირღვევია, რა მაპატიეს? – შევშინდი. ეს ხაფანგი ხომ არ არის და ჩემთვის ქონების წართმევა უნდათ-მეთქი. რადგან ვიცი, ამ ქონებით ერთი პირია დაინტერესებული“.

მერაბ ბერაძემ „ბათუმელებს“ აჩვენა მინისტრ დავით ბალაძის სახელზე შედგენილი განცხადება, რომელზე ხელმოწერასაც მას სამინისტროს თანამშრომელი არჩილ ბერიძე სთხოვდა. „…ხელშეკრულებით ნაკისრი ვალდებულებების დაგვიანებით შესრულებისთვის დარიცხული ჯარიმის 10% გადახდილი იქნა 2015 წლის 18 თებერვალს. აღნიშნულიდან გამომდინარე, გთხოვთ, დარჩენილი ჯარიმებისგან გამათავისუფლოთ“, – ნათქვამია განცხადებაში.

იმ ლოგიკით, რომ ამ განცხადების ხელმოწერა ნაკისრი ვალდებულებების ვერ შესრულების აღიარებას ნიშნავდა, მერაბ ბერაძემ განცხადებას ხელი არ მოაწერა.

კოოპერატივ „კ.მ ქაქუთთან“ დაკავშირებულ პრობლემებზე „ბათუმელებთან“ საუბარი ფინანსთა და ეკონომიკის სამინისტროში არ ისურვეს. სამინისტროს პრესსამსახურისგან მივიღეთ მოკლე ანოტაცია, სადაც ნათქვამია, რომ მერაბ ბერაძემ სახელმწიფოსთან ნაკისრი ვალდებულებები დაგვიანებით შეასრულა:

„მყიდველის მიერ წარმოდგენილი აუდიტორული დასკვნებიდან ირკვევა, რომ ხელშეკრულებით გათვალისწინებული ვალდებულებები დაგვიანებით იქნა შესრულებული, რაზეც კოოპერატივ „ქაქუთს“ დაერიცხა ჯარიმა – ჯამში 16 512 ლარი. ხოლო აჭარის ეკონომიკური საბჭოს 2015 წლის 14 დეკემბრის (N10) ოქმით, აჭარის ფინანსთა და ეკონომიკის სამინისტროს მიეცა რეკომენდაცია მყიდველი გაათავისუფლოს დარიცხული ჯარიმებისაგან, გარდა დარიცხული ჯარიმის 10%-სა (1651,2 ლარი), რომელიც მყიდველმა გადაიხადა 2016 წლის 18 თებერვალს“.

ეკონომიკურ საბჭოს, რომელიც კონტრაქტორებსა და სახელმწიფო უწყებებს შორის დავებს განიხილავს, არჩილ ხაბაძე ხელმძღვანელობს.

„ბათუმელებთან“ 2013 წლის ნოემბერში კოოპერატივებზე მომზადებულ სტატიაში „რ.კ ქაქუთის“ ბუღალტერი ბესო ცეცხლაძე ამბობდა, რომ კოოპერატივმა 16 000 ლარად ღირებული დანადგარი კომპანიას ვალდებულებების ნაწილში მხოლოდ იმიტომ არ ჩაუთვალა, რომ კომპანიამ ერთი დღის დაგვიანებით შეისყიდა ის. „უკვე მივმართეთ მთავრობის თავმჯდომარეს და მისგან გვაქვს კეთილი ნება, რომ ხელშეკრულების პირობას შეგვიცვლიან“.

კითხვაზე – ჯარიმის 10% გადახდის შემდეგ დასრულდა თუ არა მერაბ ბერაძის ვალდებულებების შესრულება სახელმწიფოსთან? – ფინანსთა და ეკონომიკის სამინისტროს პრესსამსახურში `ბათუმელებს~ უპასუხეს: „დიახ, დასრულდა. მას ახლა დარჩა ვალდებულება, რომ ეს პროფილი ათი წლის განმავლობაში შეინარჩუნოს და დასაქმებული ჰყავდეს არანაკლებ ხუთი მოქალაქე“.

კიდევ ერთი დეტალი: მერაბ ბერაძემ ჯარიმით გათვალისწინებული თანხა 2015 წლის 18 თებერვალს გადაიხადა. „ბათუმელებმა“ კი საჯარო ინფორმაცია მიიღო 17 მარტს, სადაც წერია, რომ აჭარის ფინანსთა და ეკონომიკის სამინისტრომ „რ.კ ქაქუთთან“ ხელშეკრულების მოშლის ან საინვესტიციო წინადადების შეცვლის საკითხი უნდა განიხილოს.

2013 წლის აგვისტოში არჩილ ხაბაძემ მერაბ ბერაძესთან ერთად 11 პირს გადასცა ქობულეთსა და ხელვაჩაურში მიწის ნაკვეთები 1 ლარად: პირველ ნოემბრამდე მათ უნდა მოეწყოთ მანდარინის მიმღებ-გადამამუშავებელი საწარმო. 2013 წლის ნოემბრისთვის რამდენიმე მესაკუთრემ „ბათუმელებს“ უთხრა, რომ პირობები ვერ შეასრულა.

2013 წლსი 21 ნოემბერს გამოკითხული ექვსი მეწარმიდან „ბათუმელებს“ მხოლოდ ორმა დაუდასტურა სახელმწიფოსთან გაფორმებული ხელშეკრულების პირობის სრულად შესრულება. ერთ-ერთი მათგანი შპს „გუდგუდის“ მფლობელი მურთაზ მიქელაძეა, ხოლო მეორე -შპს – „მანიაკეთი“.

შპს „მანიაკეთთან“ ამ დროისთვის აჭარის ფინანსთა და ეკონომიკის სამინისტროს სასამართლოში აქვს დავა პირგასამტეხლოს ამოღებაზე, პრობლემები აქვს შპს „გუდგუდსაც“.

30 მარტს, 14:00-15:00 საათამდე შუალედში, ბათუმის შოთა რუსთაველის სახელმწიფო უნივერსიტეტის სტუდენტებმა უნივერსიტეტში ორი შეიარაღებული პირი დააფიქსირეს.

„უნივერსიტეტის ეზოში ვისხედით და როცა „შკოდას“ ფირმის ავტომანქანა შემოვიდა, მანქანიდან ორი პირი ჩამოვიდა, ერთს [ზედატანზე] პოლიცია ეწერა, მეორე პირი კი სამოქალაქო ფორმაში იყო. რომელსაც პოლიცია ეწერა, იმ პირს ცეცხლსასროლი იარაღი ჰქონდა ქამარზე. ორივე შენობაში ავიდნენ, რადგანაც იარაღით უნივერსიტეტის ტერიტორიაზე გადაადგილების საკითხზე უკვე ძალიან ბევრი ითქვა და ეს საკითხი ე.წ. უსამხილო ბრალდებად იყო ქცეული, კიბეებზე ვიდეო გადავიღე“, – ამბობს ბსუ-ს ჰუმანიტარულ მეცნიერებათა ფაკულტეტის მესამე კურსის სტუდენტი ზურა მელიქაძე.

სტუდენტებმა აღნიშნულ საკითხზე უნივერსიტეტის პრორექტორს ინგა შამილიშვილს მიმართეს, რომელმაც მათ სატელეფონო საუბარში უთხრა, რომ ამ დროს უნივერსიტეტში ტარდებოდა „ნატოსთან“ დაკავშირებული ღონისძიება და აღნიშნული პირები შესაძლოა იქ იმყოფებოდნენ, ხოლო შემდეგ დასძინა, რომ უნივერსიტეტში „მსგავსი არაფერი დაფიქსირებულა“.

31 მარტს, სტუდენტებმა უკვე განცხადებით მიმართეს უნივერსიტეტის კანცლერს აღნიშნული ფაქტის მოკვლევისა და რეაგირების მოთხოვნით. განცხადებაში ასევე ითხოვდნენ, აღნიშნული პირების უნივერსიტეტში იარაღით გადაადგილების მიზეზების დასახელებას.

„ბათუმელები“ დაუკავშირდა  ბსუ-ს კანცლერს, ჯემალ ანანიძეს. მისი თქმით განცხადება მან იურიდიულ დეპარტამენტს გადააწერა. რაც შეეხება აღნიშნულ ფაქტს, ჯემალ ანანიძის თქმით, უნივერისტეტის შინაგანაწესის მიხედვით, იარაღით შესვლა, უნივერსიტეტის ტერიტორიაზე ეკრძალება უნივერსიტეტის სტუდენტებსა და თანამშრომლებს, ხოლო ძალოვანი სტრუქტურების წარმომადგენლებისათვის უნივერსიტეტს არ აქვს ამკრძალავი წესი.

„დაცვის თანამშრომლებმა, ზეპირსიტყვიერად დამიდასტურეს, რომ იყვნენ შსს-ს წარმომადგენლები, გარკვეულ საქმეზე მოვიდნენ და მალევე დაბრუნდნენ. ამიტომ ვინმე ვინმეს შეხვედროდა, რაიმე ზეწოლა ყოფილიყო, ან შენობაში შესულიყვნენ ასეთი ფაქტი არ დაფიქსირებულა“, – აღნიშნა „ბათუმელებთან“ საუბარში ჯემალ ანანიძემ, უნივერსიტეტის კანცლერმა.

მისი თქმით, სახელმწიფო დაცვის სამსახურის წარმომადგენელთან ერთად დღეს შეთანხმდნენ, რომ უნდა გაიწეროს რეგულაციები: „ჩვენი ტიპის დაწესებულებებში რა როგორ უნდა მოხდეს, ვისი შესვლა შეიძლება და რა შემთხვევაში უნდა შევიდეს, ვინ უნდა გააფრთხილოს [შესვლისას]… ალბათ იმ კვირაში ჩვენ გვექნება საბოლოო შეჯერებული ვარიანტი, ზოგადად სამომავლოდ ასეთი შემთხვევა პრობლემურად უნდა განვიხილოთ თუ არა“, – ამბობს კანცლერი.

ამავე თემაზე:

ოდეერები ბსუ-ში და ყველგან

„გაუმარჯოს თვითმმართველობას, ძირს ათეისტები“ – ხმაური და დაპირისპირება უნივერსიტეტში

„ერთადერთი, რაც იმედს იძლევა, სტუდენტური მოძრაობებია“

„პაციენტს აქვს თავის ტვინის შერყევა, მარცხნივ იდაყვის ძვლის მოტეხილობა. თაბაშირი უკვე გაუკეთდა, ჭრილობები დამუშავდა და გადის სტაციონარულ მკურნალობას. ამ ეტაპზე მდგომარეობა სტაბილურია და მის სიცოცხლეს საფრთხე არ ემუქრება,“ – უთხრა „ბათუმელებს“ ბათუმის რესპუბლიკური საავადმყოფოს ექიმმა გია კიკაბიძემ.

ნაჯახით დაჭრილი ქალი საავადმყოფოში დილით, 08 საათსა და 15 წუთზე მიიყვანეს. დაჭრილმა ექიმებს უთხრა, რომ მას ყოფილი ქმარი სახლში მიუვარდა და რამდენიმე ჭრილობა მიაყენა. დაჭრილი ქალი ბათუმში ცხოვრობს.

შინაგან საქმეთა სამინისტროს ინფორმაციით, საქმე აღძრულია მე-19 (დანაშაულის მცდელობა) და 108-ე მუხლით (განზრახ მკვლელობა). ასევე დაკავებულია პირი, ვინც სავარაუდოდ ქალს ჭრილობები მიაყენა.

პატიმარი ბათუმის მე-3 სასჯელაღსრულების დაწესებულებიდან გვწერს, რომ მშრალი შიმშიმლი მან 25 მარტიდან დაიწყო. მიზეზი სამედიცინო მომსახურების მიუღებლობაა. კახა მეცხვარიშვილის თქმით, ის იმის გამო ისჯება, რომ საჩივრებს წერს და ციხის ადმინისტრაციამ დაუსაბუთებლად ე.წ. „ანტივანდალურ საკანში“ გადაიყვანა. „აქ არ არის ლოგინი, ვშიმშილობ, რომ ჯანმრთელობაზე მომექცეს ყურადღება და ბეტონის იატაკზე მარტო ლეიბი დევს და რატომ გადაგყავართ-თქო. მით უმეტესს, მე არც თვითდაზიანება მიმიყენებია და არც დავმუქრებულვარ თვითდაზიანების მიყენებით… 26 მარტს ღამე გავხდი ძალიან ცუდათ, შევწყვიტე შიმშილობა. არ გადამიყვანეს საცხოვრებელ საკანში, ხოლო სიტყვიერად შემომითვალა რეჟიმის უფროსმა დათო შატაკიშვილმა უსაფრთხოების მიზნით არისო… 27 მარტს ბრიტვაც მქონდა და სარკეც, მაგრამ საჩივრების გულისთვის მაწამებს. 28 მარტს ისევ დავიწყე მშრალი შიმშილობა, ძალიან ცუდათ ვარ, მაგრამ ვიშიმშილებ, სანამ წავიქცევი და გონს დავკარგავ,“ – წერს პატიმარი.

პატიმრის შიმშილობის ფაქტი დაგვიდასტურეს სასჯელაღსრულების სამინისტროში. „დროდადრო შიმშილობს, შეწყვეტს, მერე ისევ იწყებს. ამ დროისთვის არ შიმშილობს. „ანტივანდალურ საკანში“ მისივე უსაფრთხოების გამო გადაიყვანეს“ – გვითხრეს უწყების პრესსამსახურში, თუმცა ვერ დაგვიკონკრეტეს, რის საფუძველზე ჩათვალა საჭიროდ ციხის ადმინისტრაციამ, რომ პატიმარი ზიანს მიაყენებდა საკუთარ ჯანმრთელობას.

პატიმარი კახა მეცხვარიშვილი 28 მარტს მოინახულეს სახალხო დამცველის წარმომადგენლებმა: „პატიმარი შიმშილობდა და ის იყო მოთავსებული უსაფრთხოების საკანში. როგორც დაწესებულების ადმინისტრაციამ განგვიმარტა, პატიმარი იმუქრებოდა თვითდაზიანების მიყენებით. ვსწავლობთ ამ საქმეს, მათ შორის, რამდენად კანონიერად მოათავსეს პატიმარი ე.წ. „ანტივანდალურ საკანში“- უთხრა „ბათუმელებს“ ციალა ქათამიძემ, სახალხო დამცველის აპარატის რეგიონული დეპარტამენტის აჭარის სამმართველოს უფროსმა.

კახა მეცხვარიშვილს „ბათუმელებისთვის“ არაერთხელ მოუწერია. რამდენიმე დღის წინ მეცხვარიშვილი გვატყობინებდა, რომ მძიმე დაავადებები აქვს და სათანადო სამედიცინო მომსახურებას ვერ იღებს. მაშინ სასჯელაღსრულების სამინისტრომ გვიპასუხა, რომ შესაძლებლობის ფარგლებში, ყველა საჭირო სამედიცინო მომსახურება უტარდება პაციენტს და მან მადლობის წერილიც კი გაუგზავნა ციხის ადმინისტრაციის სამედიცინო დეპარტამენტს.

კახა მეცხვარიშვილის საქმეს სწავლობს „ახალგაზრდა იურისტთა ასოციაცია“. ეს ორგანიზაცია სასჯელაღსრულების სამინისტროსგან ელოდება წერილს, საიდანაც უნდა გაირკვეს, გაუმჯობესდა თუ გაუარესდა პატიმრის ჯანმრთელობის მდგომარეობა სამედიცინო მომსახურების გაწევის შემდეგ.

31 მარტს, „ერთიანი ნაციონალური მოძრაობის“ წევრმა რაულ თავართქილაძემ პრესკონფერენცია გამართა. მისი თქმით აჭარის რეგიონში ბოლო ორი კვირის განმავლობაში გაქურდული იქნება 25-მდე საცხოვრებელი სახლი და ავტომანქანა.

რაულ თავართქილაძემ ჟურნალისტებს უთხრა, რომ გუშინ ქედის მუნიციპალიტეტის სოფელ ზენდიდში დაფიქსირდა ოთხი საცხოვრებელი სახლის გაქურდვის ფაქტი. აღნიშნულთან დაკავშირებით შსს პრესსამსახურმა “ბათუმელებს” უთხრა, რომ ქედის მუნიციპალიტეტში ქურდობის თაობაზე დაფიქსირდა მხოლოდ ორი შეტყობინება და გამოძიება დაწყებულია სსკ-ის 177-ე მუხლით [ქურდობა].

„ქედის ცენტრიდან გატაცებულ იქნა ავტომანქანა, რომელიც შემდგომ ხელვაჩაურის მუნიციპალიტეტის სოფელ ერგეში გაძარცვული იპოვეს. განსაკუთრებით მინდა აღვნიშნო, რომ მოქმედებენ ორგანიზებული ჯგუფები, რომლებიც თავაღებული ძარცვავენ და იტაცებენ სახლებსა და ავტომანქანებს, პოლიცია კი უძლურია, ვერაფერს ვერ აკეთებს და ამ ფაქტებიდან არცერთი არ არის გახსნილი”, – განაცხადა რაულ თავართქილაძემ.

რაულ თავართქილაძემ შს მინისტრს მიმართა ინიციატივით შეიქმნას ოპერატიული ჯგუფი, რომელიც გამოიძიებს და გამოავლენს აღნიშნული დანაშაულებების ჩამდენ პირებს.

გამამართლებელი განაჩენი მოსამართლე თამარ ბეჟანიშვილმა გასულ კვირას იმ პირის მიმართ გამოიტანა, ვისაც პოლიციისთვის წინააღმდეგობის გაწევაში ედებოდა ბრალი. სხვებისგან განსხვავებით, შალვა ქორიძე სამწლიან პატიმრობას იმით გადაურჩა, რომ 4 პოლიციელის, მათ შორის ერთი მაღალჩინოსნის ჩვენება მოსამართლისთვის დამაჯერებელი არ აღმოჩნდა. მას შემდეგ, რაც პოლიციელებმა სასამართლოს ჩვენება მისცეს, ადვოკატმა სასამართლოს თავად პოლიციის მიერ გადაღებული და გავრცელებული ვიდეოკადრები წარმოუდგინა, სადაც აშკარად გამოჩნდა, რომ პოლიციელებმა იცრუეს.

შინაგან საქმეთა სამინისტროს ოფიციალურ ინტერნეტგვერდზე ახლაც შეგიძლიათ ნახოთ გასული წლის 3 ივლისს გავრცელებული ვიდეო, სადაც ჩანს, რომ სპეციალური ნიღბებით აღჭურვილი სპეცრაზმის თანამშრომლები აკავებენ ორ პირს. დაკავებულთაგან ერთ-ერთი შალვა ქორიძეა. ვიდრე ამ ვიდეოჩანაწერს სასამართლო დარბაზში აჩვენებდნენ, სასამართლოს ჩვენება ბრალდების მხარის ოთხმა მოწმემ მისცა, ოთხივე პოლიციელია. ისინი ამტკიცებდნენ, რომ ბრალდებულები სპეციალურმა რაზმმა კი არა, მათ დააკავეს. მოწმე პოლიციელებს შორის ერთ-ერთი შს სამინისტროს აჭარის მთავარი სამმართველოს უბნის ინსპექტორების სამმართველოს უფროსი მიხეილ ბარნოვიც იყო.

მან სასამართლო პროცესზე თქვა, რომ შალვა ქორიძემ წინააღმდეგობის გაწევის დროს მაისური შემოახია. „მაჩვენეთ თქვენი მაისური და გაჩვენებთ, როგორ დახია“, – ასე უპასუხა მიხეილ ბარნოვმა დაცვის მხარის ადვოკატის, რამინ პაპიძის შეკითხვას: „როგორ და რა ხარისხით დააზიანა მაისური ბრალდებულმა?”

გარდა მიხეილ ბარნოვისა, ამ საქმეზე მოწმის სახით ჩვენება მისცეს შსს-ს აჭარის პოლიციის დეპარტამენტის დეტექტივ-გამომძიებლებმა – მალხაზ დუმბაძემ, მინდია მალაყმაძემ და გიორგი ნაკაშიძემ. სასამართლოს მათვე დაუდასტურეს, რომ შალვა ქორიძე თავად დააკავეს და დამხმარე ძალა, ანუ სპეციალური რაზმი ამ პროცესში ჩართული არ ყოფილა. კადრების ნახვის შემდეგ პროკურორმა რამაზ შავაძემ თქვა: „გასაგებია, რომ ეს კადრები გადაღებულია შსს-ს პრესსამსახურის მიერ, მაგრამ არ ვიცი, როდის მოხდა. ჩვენს დაკავების ოქმში ეს დაფიქსირებული არ არის. გადაღება რომ მომხდარიყო, ეს აისახებოდა ოქმის ჩანაწერებში“.

პროკურორს ადვოკატმა რამინ პაპიძემ შეახსენა, რომ თუკი კადრები საეჭვოა, მისი გადამოწმების საშუალება პროკურატურას აქვს.

„ჟურნალისტურ გამოძიებას მე ვერ ჩავატარებდი“, – იმართლა თავი პროკურორმა, რომელმაც ამ ვიდეოკადრების ჩვენებამდე სასამართლოს შუამდგომლობით მიმართა, არ დაშვებულიყო კადრები დამატებით მტკიცებულებად. „დაცვის მხარემ მოწმე პოლიციელების დაკითხვამდეც იცოდა ამ კადრების არსებობის შესახებ და იგი დროულად უნდა წარმოედგინა“, – ამბობდა რამაზ შავაძე. შუამდგომლობა მოსამართლემ არ დააკმაყოფილა. თამარ ბეჟანიშვილმა გადაწყვეტილების სარეზოლუციო ნაწილი კადრების ნახვიდან რამდენიმე წუთში გამოაცხადა და შალვა ქორიძე პოლიციისთვის წინააღმდეგობის გაწევის ნაწილში გაამართლა. მას მხოლოდ ნარკოტიკების მოხმარების გამო შეეფარდა 10 თვით თავისუფლების აღკვეთა.

„გაუგებარია, რატომ დამალა ბრალდების მხარემ ის, რომ ეს პირები სპეცრაზმელებმა დააკავეს“, – იკითხა მოსამართლემ ჩაქუჩის ჩამოკვრის შემდეგ, ანუ განმარტებების დროს. „ეს დასჭირდათ იმიტომ, რომ შალვა ქორიძეს სპეცრაზმელებმა მანქანაში მუშტებით სცემეს სახეში, როცა ის სიტუაციის გარკვევას ცდილობდა“, – ამბობს ადვოკატი რამინ პაპიძე.

გასული წლის 3 ივლისს სპეცრაზმელებმა, შალვა ქორიძესთან ერთად, ქურდული სამყაროს წევრობისა და გამოძალვის ბრალდებით გ.მ.-ც დააკავეს. გ.მ.-ს საქმის განხილვა სასამართლოში ჯერ არ დასრულებულა. ამ საქმესაც მოსამართლე თამარ ბეჟანიშვილი განიხილავს. აქაც მოწმეებად უკვე დაკითხულნი არიან პოლიციელები, ვისი ჩვენებაც მოსამართლისთვის არადამაჯერებელი აღმოჩნდა.

„საგანგაშოა, როცა პოლიციელის ჩვენება სასამართლოსთვის უტყუარი არ არის“, – ასე აფასებენ ამ გადაწყვეტილებას „ახალგაზრდა იურისტთა ასოციაციაში“. „გამოდის, რომ საქმე გვაქვს ან გამოძიების არაეფექტურობასთან, ან უფრო უარესთან – პოლიციელთა მიერ „შეკერილ“ საქმესთან. ამიტომ, მნიშვნელოვანია, ამ ეტაპზე დაველოდოთ გადაწყვეტილებას, სადაც სასამართლო განმარტავს, თუ რა გარემოებებით მიიღო გამამართლებელი განაჩენი. სასამართლოს გადაწყვეტილების გაცნობის შემდეგ, აუცილებელია შსს-ში დაიწყოს შიდა უწყებრივი მოკვლევა, რათა ამან არ მიიღოს განგრძობადი ხასიათი. ამის რისკები ყოველთვის არსებობს, რადგან დაუსჯელობის სინდრომი ხშირად წამახალისებელი ხდება ისეთი კატეგორიის ადამიანებისთვის, ვის ხელშიც ძალაუფლების ბერკეტებია თავმოყრილი“, – უთხრა „ბათუმელებს“ გიორგი ხიმშიაშვილმა, „ახალგაზრდა იურისტთა ასოციაციის“ აჭარის ფილიალის ხელმძღვანელმა.

დაიწყებს თუ არა შინაგან საქმეთა სამინისტრო ამ პოლიციელების მიმართ საქმის მოკვლევას? – შსს-მ „ბათუმელების“ შეკითხვა უპასუხოდ დატოვა. ბათუმის საქალაქო სასამართლოს მონაცემებით, 2012 წლიდან დღემდე სასამართლომ 127 პირის საქმე განიხილა, ვისაც პოლიციელებისთვის წინააღმდეგობის გაწევა ედებოდა ბრალად.

შსს-ს მიერ გავრცელებულ ვიდეოკადრებში, რომლითაც პოლიციელების ტყუილი დადასტურდა, ასევე ჩანს გიგლა მოსიძე, რომელიც შსს-ს აჭარის პოლიციის დეპარტამენტის უფროსის მოადგილეა. გიგლა მოსიძე ჯერ კიდევ ბათუმის პოლიციის მეორე განყოფილების უფროსად მუშაობდა, როდესაც საია-ს აჭარის ფილიალის ოფისმა იგი გამოძიებისთვის მნიშვნელოვანი ფირის გაქრობაში დაადანაშაულა (საქმე ეხება 2013 წელს აჭარის სამმართველოს მაშინდელი უფროსის, ვალერი თელიას და საია-ს თანამშრომელს შორის მომხდარ ქუჩის ინციდენტს, როცა ვალერი თელიამ საია-ს თანამშრომლის მიმართ ანთებული სიგარეტი ისროლა და პერანგი შემოახია. ინციდენტის ადგილზე დამონტაჟებული ორი კამერიდან ერთ-ერთზე დაფიქსირებული კადრები წაიშალა. თვითმხილველმა ჟურნალისტმა მაშინ თქვა, რომ კადრები სწორედ გიგლა მოსიძემ ამოიღო).

რაც შეეხება აჭარის პოლიციის დეპარტამენტის უბნის ინსპექტორების სამმართველოს უფროსს, მიხეილ ბარნოვს, იგი გასული წლის აგვისტოშიც მოხვდა „ბათუმელების“ ფურცლებზე. მაშინ ერთ-ერთი ადვოკატი მას დაკავებულისთვის იძულებით წყლის დალევაში ადანაშაულებდა, რომელშიც შერეული იყო ნარკოტიკული ნივთიერება. ხმაურიან სასამართლო პროცესზე
დაკავებულები ამბობდნენ, რომ მათი დაკავების მიზეზი ე.წ. კანონიერი ქურდის, „ლავას-ოღლის“ ახლობლობაა. უბნის ინსპექტორების სამმართველოს 29 წლის უფროსი, აჭარის პოლიციის დეპარტამენტის ყოფილი ხელმძღვანელისა და ამჟამად უკვე შს მინისტრის მოადგილის, ბესიკ ამირანაშვილის გუნდის წევრია.

მოწმეზე ძალადობის სხვა საქმე სასამართლოში

მოწმეზე ძალადობას ედავებიან ქობულეთის პოლიციის უბნის ინსპექტორების სამმართველოს უფროსს – ირაკლი შაქარიშვილსაც. გასული წლის 2 ნოემბერს 20 წლის რეზო ტაკიძემ თქვა, რომ იგი პოლიციამ სარფის საბაჟოზე დააკავა – ქობულეთის პოლიციის შენობაში მისგან ყაჩაღობის აღიარებას ითხოვდნენ. „შაქარიშვილი იჯდა იქ და მკითხა, მე მიცნობ, ბიჭო? მგონი, ირაკლი ხარ შაქარიშვილი-მეთქი. მომკლა ცემაში, მაგინებდა, გამაგდენ პოლზე. სასაკლაოზე ხარ მოყვანილი, თუ იცი შენო. შარვალი გამხადა ბუტა ანთაძემ, გაუპატიურებით მემუქრებოდა, მაცივრიდან გამოღებულ ცივ წყალს მასხამდნენ. არაფერი ვიცოდი ყაჩაღობის შესახებ. თქვი, რომ შენ იყავიო, თუ არა წამლით გაგივსებ ჯიბეებსო და მაინც გაგიშვებ „სროკზეო“, – ამბობდა რეზო ტაკიძე, ვის საქმესაც ახლა მოსამართლე დავით მამისეიშვილი განიხილავს.

ამ საქმეშიც მოწმე პოლიციელები არიან: ექვსივე პოლიციელი ყვება, რომ რეზო ტაკიძე საღამოს ათის ნახევარზე მოწმის სახით დაიბარეს (ეს უწყისში მითითებული ოფიციალური დროა), გვარაში, ბენზინგასამართ სადგურზე მომხდარი ყაჩაღობის გამო. „თავისი ფეხით მოვიდა პოლიციაში, ვაწარმოებდი ზეპირ გასაუბრებას და ამ დროს ის გახდა აგრესიული, აიღო ჩემი მაგიდიდან კომპიუტერის მონიტორი და დაახეთქა, ხელებს იქნევდა, ფეხი ჩაარტყა პროცესორს. მერე სხვა პოლიციელებსაც აგინა, ვინც იქ შემოვიდა. წაიქცა გასვლის დროს და დავაკავეთ“, – დაახლოებით ამ სიტყვებით აღწერა პოლიციელმა ბესიკ კაკალაძემ პოლიციის შენობაში რეზო ტაკიძესთან შეხვედრა.

პოლიციელს დამაზუსტებელი კითხვა მოსამართლე დავით მამისეიშვილმაც დაუსვა: „რეზო ტაკიძე მოვიდა პოლიციაში 21 საათსა და 30 წუთზე, დაკავების ოქმში წერია, რომ დაკავება 00 საათსა და 10 წუთზე მოხდა. ორსაათნახევარი რატომ დასჭირდა გასაუბრებას? თან თქვენ აღნიშნეთ, რომ ზეპირ გასაუბრებას ახდენდით“.

ბესიკ კაკალაძემ მოსამართლეს უპასუხა, რომ კითხვები ბევრი იყო, რადგან პოლიციას სურდა დროულად გამოეძიებია ყაჩაღობის ფაქტი და ლოგიკური ეჭვები არსებობდა რევაზ ტაკიძის მისამართით.

სასამართლოს ჩვენება მისცეს პოლიციელებმა – ირაკლი დავითაძემ და ჯუმბერ თხილაიშვილმაც. „გვერდით ოთახიდან შემოგვესმა გინებისა და მტვრევის ხმა და შევედით“, – ყვებიან დეტექტივ-გამომძიებლები. „რატომ ვერ აღკვეთეთ დროულად რეზო ტაკიძის აგრესია ამდენმა გამოცდილმა პოლიციელმა?“ – დაცვის მხარის ადვოკატის ამ შეკითხვას პოლიციელებმა უპასუხეს, რომ ისინი ბრალდებულს თავდაპირველად დამშვიდებისკენ მოუწოდებდნენ. „პერანგიდან სამხრე და ჯიბე რომ ჩამომახია, მაშინ იძულებული გავხდით, დაგვეკავებია,“ – აღნიშნა ჯუმბერ თხილაიშვილმა.

სასამართლო ჯერ არ გადასულა დაცვის მხარის მტკიცებულებებზე, სადაც ერთ-ერთი – სამხარაულის ექსპერტიზის დასკვნა იქნება. „დასტურდება, რომ რეზო ტაკიძეს ჰქონდა სხეულის დაზიანებები. პოლიციელებმაც ხაზი გაუსვეს თავიანთ ჩვენებაში იმას, რომ თითქოს რეზო თავისით წაიქცა. არადა, მას მთელი სახის მიდამოები ჩალურჯებული ჰქონდა, ასევე მუხლის მიდამოები“, – ამბობს მერი ცინარიძე, რეზო ტაკიძის ადვოკატი. ის დაკავების დღეს იხსენებს, როცა რეზო ტაკიძის სახლი პოლიციელებმა ისე დაათვალიერეს, რომ ბრალდებულის დაკავების შესახებ ოჯახს არაფერი გაუგია:

„ოჯახმა იცოდა, რომ ის თურქეთში სამუშაოდ მიდიოდა. სახლის დათვალიერების დროს პოლიციელებმა თქვეს, რომ სოფელ გვარაში მომხდარ ყაჩაღობას იძიებდნენ, მაგრამ არ უთხრეს ოჯახს, რეზო დაკავებული რომ იყო. დაკავებამდე პროცედურები ადვოკატის გარეშე ჩატარდა. რეზო რეალურად სარფის საბაჟოზე დააკავეს, მაგრამ ეს კადრები ჩვენ არ მოგვაწოდეს. პოლიციას სურდა სწრაფად გაეხსნა ყაჩაღობის ფაქტი და უკანონოდ დაკავებულ პირს აიძულებდნენ ჩვენების მიცემას“.

პოლიციელებისთვის წინააღმდეგობის გაწევის გარდა, რეზო ტაკიძეს სხვისი ნივთის განზრახ დაზიანებას ედავებიან. საუბარია კომპიუტერზე, რომელიც პოლიციელების ჩვენებით, ბრალდებულმა დაამტვრია. რეზო ტაკიძე წინასწარ პატიმრობაში არ იმყოფება. სასამართლო დარბაზიდან იგი მოსამართლე ხვიჩა კიკალიშვილმა გაათავისუფლა – დაკავების პროცედურების აშკარა დარღვევის გამო.

აჭარის კულტურული მემკვიდრეობის დაცვის სააგენტოს 16-მა არასამთავრობო ორგანიზაციამ მიმართა წერილით, სააგენტოში მიმდინარე ცვლილებების პარალელურად სარეკომენდაციო საბჭოს წევრის სტატუსი შეუნარჩუნდეს შოთა გუჯაბიძეს, საზოგადოება „ბათომის“ დამფუძნებელს.

„ჩვენი ინფორმაციით, აჭარის კულტურული მემკვიდრეობის დაცვის სააგენტოში არსებული სარეკომენდაციო საბჭოს რეორგანიზაციის მიზნით იგეგმება ბ-ნ შოთა გუჯაბიძისთვის საბჭოს წევრობის სტატუსის შეწყვეტა.

მოგახსენებთ, რომ შოთა გუჯაბიძე არის ბათუმის ისტორიის მკვლევარი, ცნობილი და მნიშვნელოვანი არასამთავრობო ორგანიზაცია „ბათომის“ აქტიური წევრი, რომელიც წლების მანძილზე იბრძვის ურბანული მემკვიდრეობის შენარჩუნებისათვის.

მისი საქმიანობა მიმართულია ბათუმის ისტორიული ქალაქის დაცვისკენ, მისი ღვაწლი საყოველთაოდ არის ცნობილი და სწორედ ასეთი პიროვნებების ყოფნა მნიშვნელოვნად გაზრდის თქვენი სააგენტოს დაქვემდებარებაში მყოფი საბჭოს ლეგიტიმაციისა და სანდოობის ფაქტორს.

ამასთანავე, გვინდა შეგახსენოთ, რომ გადაწყვეტილების მიღების პროცესში საზოგადოების/სამოქალაქო სექტორის ჩართულობა და მონაწილეობა გახლავთ ხელისუფლების ვალდებულება, რაც გამყარებულია ეროვნული კანონმდებლობითა და საქართველოს პარლამენტის მიერ რატიფიცირებული უმნიშვნელოვანესი კონვენციებით.

ამდენად, ჩვენ, კულტურული მემკვიდრეობისა და გარემოს დაცვის სფეროში არსებული არასამთავრობო ორგანიზაციები ვშუამდგომლობთ თქვენ წინაშე და იმედს ვიტოვებთ, რომ ზემოხსენებულ ფაქტორებთან ერთად გაითვალისწინებთ შოთა გუჯაბიძის საბჭოში მუშაობის გამოცდილებას, ბათუმის ურბანული მემკვიდრეობის პროფესიულ ცოდნას და რაც მთავარია მის შეუბღალავ რეპუტაციას და დადებითად გადაწყვეტთ ამ ადამიანის საბჭოში ყოფნის საკითხს,“ – აღნიშნულია წერილში, რომელსაც შემდეგი არასამთავრობო ორგანიზაციები აწერენ ხელს:

„ტფილისის ჰამქარი”, „პარტიზანული მებაღეობა”, „სამოქალაქო ინიციატივა”, „ინიციატივა საჯარო სივრცისთვის”, „ლურჯი ფარის საქართველოს ეროვნული კომიტეტი”, მოძრაობა „მწვანე მუშტი”, „თბილისის არქიტექტურული ფორუმი”, „მწვანე ალტერნატივა”, „კამპუსი”, „ცხოველთა უფლებების კომიტეტი”, „ქართველ არქიტექტორთა ინსტიტუტი”, „საყდრისის დაცვის კომიტეტი“, „იარე ფეხით“, „თავისუფალ ჟურნალისტთა სახლი“, “საერთაშორისო ბიზნესის განვითარების და ინვესტიციათა ხელშეწყობის ცენტრი” და „სამოქალაქო საზოგადოების ინსტიტუტის ბათუმის ფილიალი“.

საზოგადოება „ბათომის“ დამფუძნებელი შოთა გუჯაბიძე პროფესიით რეჟისორია. იგი აჭარის კულტურული მემკვიდრეობის დაცვის სააგენტოსთან არსებული სარეკომენდაციო საბჭოს წევრია 2013 წლიდან და წლებია ყველაზე ხშირად აკრიტიკებს აჭარის კულტურული მემკვიდრეობის დაცვის სააგენტოს პოლიტიკას.

ამჟამად აჭარის კულტურული მემკვიდრეობის სააგენტოს ხელმძღვანელი მირანდა ჩარკვიანი სააგენტოსთან არსებულ სარეკომენდაციო საბჭოს განახლებას გეგმავს.