მთავარი,სიახლეები

დაუჭერენ თუ არა მხარს დეპუტატები არჩილ ხაბაძის იმპიჩმენტს

30.03.2016 • 1483
დაუჭერენ თუ არა მხარს დეპუტატები  არჩილ ხაბაძის იმპიჩმენტს

„აჭარის მთავრობის თავმჯდომარისთვის უნდობლობის გამოცხადებას სჭირდება 14 ხმა. ამის მზაობა  უმაღლეს საბჭოში რომ არ არის, კარგად იციან ინიციატორებმაც. ჩვენი ფრაქციისგან იმპიჩმენტის მოთხოვნა ცალსახად არ იქნება გაზიარებული“, – ამბობს „ბათუმელებთან“ რესპუბლიკელი გიორგი მასალკინი, ფრაქცია „ქართული ოცნება – აჭარის“ წევრი.

დღეს „ნაციონალური მოძრაობის“ წევრმა, პეტრე ზამბახიძემ განაცხადა, რომ იწყებს ხელმოწერებს არჩილ ხაბაძისთვის უნდობლობის გამოსაცხადებლად და კონსულტაციებს „რესპუბლიკელებთანაც“ გაივლის. იმპიჩმენტის მთავარ მიზეზად „ნაციონალური მოძრაობა“ უსკო-ს თავმჯდომარის პოსტზე დავით კვაჭაძის კანდიდატურის ხელახლა წარდგენას ასახელებს. მიუხედავად იმისა, რომ გიორგი მასალკინი საჯაროდ აფიქსირებს უსკო-ს კანდიდატების არჩევის პროცესის მიმართ კრიტიკას, ამბობს: იმპიჩმენტის საფუძველი ეს არ არის. გარდა ამისა, არსებობს კოალიციური დისციპლინა, რომელსაც ზოგჯერ იძულებული ხარ, მხარი დაუჭირო.“

ფრაქცია „დემოკრატიული აჭარას“ მდივანი, „თავისუფალი დემოკრატი“ თემურ კახიძე „ნაციონალურ მოძრაობას“ ახსენებს, რომ იმპიჩმენტის პროცედურა გასული წლის გაზაფხულზე თვითონ დაიწყეს. „,მაშინ იმპიჩმენტს არავინ დაუჭირა მხარი. იმ ფურცელზე, რომლითაც ჩვენ არჩილ ხაბაძის გადადგომას მოვითხოვდით, მხოლოდ ჩემი და სულხან ღლონტის ხელმოწერაა“, – ამბობს თემურ კახიძე. ფრაქცია „დემოკრატიული აჭარას“ პოზიცია მორიგ იმპიჩმენტზე, მოტივების გაცნობის შემდეგ გახდება ცნობილი.

პოზიცია ასევე არ აქვს ფრაქცია „თანასწორობას“. ფრაქციის თავმჯდომარემ,  ასმათ დიასამიძემ გვითხრა, რომ გადაწყვეტილებას ფრაქციის წევრებთან შეხვედრის შემდეგ მიიღებს. ეს ფრაქცია რამდენიმე დღის წინ დარეგისტრირდა. ასმათ დიასამიძე და ამ ფრაქციის წევრი მურმან ბერიძე ფრაქცია „ერთიანი ნაციონალური მოძრაობის“ წევრები იყვნენ. ფრაქციის მესამე წევრი მედეა ვასაძეა, რომელიც მანამდე დამოუკიდებელი დეპუტატი იყო.

არჩილ ხაბაძის იმპიჩმენტისთვის მხარდაჭერას კატეგორიულად გამორიცხავენ ფრაქციებში – „ქართული ოცნება“ და „ქართული ოცნება თავისუფლება“. „ეს მხოლოდ პოლიტიკური სვლაა და „ნაციონალურ მოძრაობას“ სურს ამით ახალი პოლიტიკური თემა შექმნას. არაფრის მომტანი იქნება ეს პროცესი“, – უთხრა „ბათუმელებს“ ალექსანდრე ჩიტიშვილმა, ფრაქცია „ქართული ოცნების“ ხელმძღვანელმა.

გადაბეჭდვის წესი


ასევე: